BTV NEWS

សម្តេចតេជោ ហ៊ុន សែន ជួបពិភាក្សាការងារតាមប្រព័ន្ធវីដេអូជាមួយប្រធានរដ្ឋសភា អាស៊ែបៃហ្សង់

គណៈប្រតិភូនៃសន្និសីទប្រធានសភានៃអន្តរសភា វាយតម្លៃខ្ពស់ចំពោះជោគជ័យនៃ «សន្និសីទប្រធានសភានៃអន្តរសភា លើកទី២» នៅកម្ពុជា

ប្រធានរដ្ឋសភាម៉ាឡេស៊ី ប្ដេជ្ញាបន្តលើកកម្ពស់កិច្ចសហប្រតិបត្តិការទ្វេភាគីជាមួយកម្ពុជាឱ្យកាន់តែរីកចម្រើន និងរឹងមាំ

ព្រីតថេន នឹងបន្តគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា

នយោបាយ និង ការអភិវឌ្ឍន៍

តោ១ក្បាលដែលដកហូតពីបុរសជនជាតិចិន ត្រូវបានសម្តេចតេជោ ប្រកាសឲ្យម្ចាស់យកទៅចិញ្ចឹមវិញ

ភ្នំពេញ ៖ តាមរយៈហ្វេសប៊ុកផ្លូវការរបស់សម្តេចតេជោ នាយករដ្ឋមន្ត្រីនៅយប់មិញនេះសម្តេចបានប្រកាសអំពីសត្វតោ១ក្បាលដែលបានដកហូតពីជនជាតិចិនម្នាក់នៅភ្នំពេញ កន្លងមកនេះ ត្រូវបានសម្តេចណែនាំប្រគល់ឲ្យម្ចាស់យកទៅចិញ្ចឹមថែទាំវិញ។សម្តេចបានសរសេរថា កាលពីល្ងាចថ្ងៃម្សិលមិញនេះសម្តេច បានពិភាក្សាជាមួយរដ្ឋមន្ត្រីក្រសួងកសិកម្ម និងបានឯកភាពគ្នាថា អនុញ្ញាតឱ្យម្ចាស់យកទៅចិញ្ចឹមវិញក្នុងលក្ខខណ្ឌម្ចាស់ត្រូវធ្វើទ្រុង ឱ្យបានត្រឹមត្រូវដើម្បីធានា សុវត្ថិភាពទាំងមនុស្សក្នុងផ្ទះ និងអ្នករស់នៅជិតខាង។ អរគុណបងប្អូនជនរួមជាតិទាំងក្នុង និងក្រៅប្រទេស ដែលបានផ្តល់យោបល់និងអាណិតដល់សត្វតោ។សូមជម្រាបជូនផងដែរថា កាលព្រឹកថ្ងៃទី២៧ ខែមិថុនា ឆ្នាំ២០២១ អាជ្ញាធរចម្រុះ បានចុះធ្វើការដកហូតយកសត្វតោឈ្មោលមួយក្បាល ពីជនជាតិចិន ដែលបានចិញ្ចឹមដោយខុសច្បាប់ នៅក្នុងលំនៅឋានរបស់ខ្លួន ស្ថិតនៅផ្ទះលេខ២២ ផ្លូវ៣០៦ ភូមិ៧ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ។សត្វតោឈ្មោលមួយក្បាលនេះ មានទម្ងន់ ៧០គីឡូក្រាម ត្រូវបានបុរសជនជាតិចិនចិញ្ចឹមតាំងពីតូច រហូតដល់ពេលនេះ មានអាយុប្រមាណ១ឆ្នាំកន្លះ ដោយឱ្យវាស៊ីសាច់៦គីឡូក្រាមក្នុង១ថ្ងៃ។ប្រតិបត្តិការចុះដកហូតសត្វតោដែលជាប្រភេទសត្វព្រៃកម្រនេះ ដឹកនាំដោយ លោក គាំ សីហា នាយខណ្ឌរដ្ឋបាលព្រៃឈើភ្នំពេញ សហការជាមួយព្រះរាជអាជ្ញារងអមសាលាដំបូង រាជធានីភ្នំពេញ និងមានការចូលរួមពីអង្គការសម្ព័ន្ធមិត្តសត្វព្រៃ Wildlife Alliance ព្រមទាំងសមត្ថកិច្ចចម្រុះមូលដ្ឋាន ដកហូតពីជនជាតិចិនដែលបានចិញ្ចឹមសត្វតោឈ្មោលមួយក្បាលជាប្រភេទសត្វព្រៃនៅក្នុងផ្ទះដោយខុសច្បាប់។សមត្ថកិច្ចរដ្ឋបាលព្រៃឈើភ្នំពេញ បានឱ្យដឹងថា ដោយសារមានប្រជាពលរដ្ឋជិតខាងបានរាយការណ៍ប្រាប់អំពីការចិញ្ចឹមសត្វតោ នៅក្នុងផ្ទះវីឡាខាងលើពីសំណាក់បុរសជនជាតិចិន ទើបអាជ្ញាធរសហការជាមួយអាជ្ញាធរមូលដ្ឋានចុះធ្វើការស្រាវជ្រាវឈានដល់ការចុះដកហូតយកសត្វតោឈ្មោលមួយក្បាលនោះ ដើម្បីបញ្ជូនទៅថែរក្សាទុក។ទោះជាយ៉ាងណាសត្វតោមួយក្បាលនេះ ត្រូវសម្តេចអនុញ្ញាតឲ្យម្ចាស់យកទៅចិញ្ចឹមវិញហើយ ប៉ុន្តែត្រូវធ្វើទ្រុងឲ្យបានត្រឹមត្រូវដើម្បីធានា សុវត្ថិភាពទាំងអ្នកនៅក្នុងផ្ទះ និងអ្នកជិតខាង៕អត្ថបទ ៖ មុត សុទ្ធ

ក្រសួងប្រៃសណីយ៍ទទួលបានការបញ្ជាទិញឧបករណ៍តេស្តរហ័សរហូតជាង២៦ម៉ឺនឧបករណ៍

ភ្នំពេញ ៖ គិតត្រឹមថ្ងៃទី ៤ ខែកក្កដាឆ្នាំ ២០២១នេះ ក្រសួងប្រៃសណីយ៍ និងទូរគមនាគមន៍ បានទទួលការបញ្ជាទិញឧបករណ៍តេស្តរហ័ស អង់ទីហ្សែនកូវីដ-១៩ លើសំណើរទិញចំនួន៧៤៥ ដោយគិតជាចំនួនឧបករណ៍តេស្តសរុប គឺមានចំនួន ២៦២,៧៧៥ ឧបករណ៍។ យ៉ាងណាម៉ិញការផ្គត់ផ្គង់ជាក់ស្ដែងគឺក្រសួងផ្ដល់ជូនមុនគេ ដល់បណ្ដាក្រុមហ៊ុន-ស្ថាប័ន ដែលប្រឈមហានិភ័យខ្ពស់ពីកូវីដ-១៩។ នេះជាការបញ្ជាក់របស់មន្ត្រីជំនាញនៃក្រសួងប្រៃសណីយ៍។ចាប់ពីការប្រកាសលក់ ឧបករណ៍តេស្តរហ័សអង់ទីហ្សែនកូវីដ-១៩ មកត្រឹមថ្ងៃទី ៤ខែកក្កដា ឆ្នាំ២០២១ ក្រសួងប្រៃសណីយ៍បានទទួលការបញ្ជាទិញ ពីក្រុមហ៊ុន-ស្ថាប័នចំនួនលើសំណើទិញចំនួន ៧៤៥ សំណើរគិតជាបរិមាណឧបករណ៍គឺមាន ២៦២,៧៧៥។ នេះជាការបញ្ជាក់របស់ ឯកឧត្តម ម៉ុក រ៉ាឌី ជាអគ្គនាយកនៃអគ្គនាយករដ្ឋបាលក្រសួងប្រៃសណីយ៍ និងទូរគមនាគមន៍។ ឯកឧត្តម បន្តថា គិតត្រឹមថ្ងៃម្សិលម៉ិញដដែលនេះ គឺមានក្រុមហ៊ុន-ស្ថាប័នចំនួន២១០ បានមកទទួលឧបករណ៍តេស្តរហ័សពីក្រសួងរួចរាល់ ដោយគិតជាឧបករណ៍គឺមានចំនួន ៤៦៦៧៥ ឧបករណ៍។ ការលក់ឧបករណ៍តេស្តរហ័សជូនបណ្ដាក្រុមហ៊ុន-ស្ថាប័ន គឺក្រសួងផ្ដល់ជូនអាទិភាព ដល់ទីតាំងដែលមានបុគ្គលិកច្រើន និងកំពុងប្រឈមហានិភ័យ ឬមានការពាក់ព័ន្ធនឹងជំងឺកូវីដ-១៩។ ក្រសួងក៏នឹងធ្វើការដោះស្រាយសំណើទិញផ្សេងទៀតស្របតាមអាទិភាពខាងលើ ជាបន្តបន្ទាប់ទៅតាមបរិមាណស្តុករបស់ឧបករណ៍ ដែលនៅសល់ និងនាំចូលបន្ថែម។ នេះជាការបញ្ជាក់បន្ថែមរបស់ ឯកឧត្តម អគ្គនាយកនៃអគ្គនាយករដ្ឋបាលក្រសួងប្រៃសណីយ៍។ជុំវិញការផ្ដល់នូវវគ្គបណ្ដុះបណ្ដាលពីការប្រើប្រាស់វិញ ឯកឧត្តម បញ្ជាក់ថា ក្រសួងប្រៃសណីយ៍ និងសហការជាមួយក្រសួងសុខាភិបាល ក្នុងការរៀបចំការបណ្ដុះបណ្ដាលដល់បណ្ដាក្រុមហ៊ុន-ស្ថាប័នដែលត្រូវការ។ តែបច្ចុប្បន្ននេះ គឺក្រុមហ៊ុនដែលបានទិញនូវឧបករណ៍តេស្តរហ័សរួចរាល់ គឺមានក្រុមការងាររបស់ខ្លួន រឺបានជួលនូវក្រុមគ្រូពេទ្យជំនាញ ដើម្បីបំពេញលើការងារនេះហើយ។ អ្វីដែលក្រុមហ៊ុន-ស្ថាប័នត្រូវការជាចាំបាច់នាពេលនេះ គឺឧបករណ៍តេស្តរហ័ស ។ ទោះបីជាពុំទាន់មានការបណ្ដុះបណ្ដាលពីរបៀបប្រើប្រាស់ក្ដី ក្រសួងប្រៃសណីយ៍ តាមរយៈទំព័រហ្វេសប៊ុកផ្លូវការរបស់ខ្លួន គឺបានបង្ហោះនូវ វីដេអូខ្លីស្ដីពីនីតិវិធីប្រើប្រាស់ ឧបករណ៍តេស្តរហ័ស អង់ទីហ្សែនកូវីដ-១៩ ឱ្យបានត្រឹមត្រូវ ដោយវីដេអូនោះ មានរយៈពេលជាង៣នាទី ជាពីរភាសាទាំងភាសាខ្មែរ និងភាសាអង់គ្លេសផងដែរ។យោងតាមសេចក្ដីជូនដំណឹងកន្លងទៅរបស់ ក្រសួងប្រៃសណីយ៍ បញ្ជាក់ថា ឧបករណ៍តេស្តរហ័ស អង់ទីហ្សែនកូវីដ-១៩ ដែលក្រសួងប្រៃសណីយ៍នាំចូលដើម្បីលក់ជូន ក្រុមហ៊ុន-ស្ថាប័ននាពេលនេះ គឺជាផលិតផលមកពីប្រទេសកូរ៉េ ដោយលក់ក្នុងតម្លៃដើមត្រឹមតែ ៣.៧ ដុល្លារក្នុងមួយឧបករណ៍តែប៉ុណ្ណោះ។ ការលក់ជូននេះ ធ្វើឡើងក្នុងគោលដៅប្រើប្រាស់សម្រាប់បុគ្គលិករបស់ក្រុមហ៊ុន-ស្ថាប័នរបស់ខ្លួន ដោយហាមប្រាមការចែកចាយ រឺ លក់បន្តជាដាច់ខាត។ គួរបញ្ជាក់ថា ការលក់ឧបករណ៍តេស្តរហ័ស អង់ទីហ្សែនកូវីដ-១៩ របស់ក្រសួងប្រៃសណីយ៍ នាពេលនេះ គឺពុំទាន់អនុញ្ញាតឱ្យសាធារណជនទូទៅបញ្ជាទិញបាននោះទេ។ ចំពោះសាធារណជនដែលមានការសង្ស័យ គឺត្រូវទៅយកសំណាកតាមទីតាំងដែលក្រសួងសុខាភិបាល ឬអាជ្ញាធរ បានកំណត់៕អត្ថបទ៖ គឹមហុក

និស្សិតបណ្ឌិតសភាយោធាកម្ពុជា ដឹងគុណនិងអរគុណរាជរដ្ឋាភិបាល ដែលចេញថ្លៃការសិក្សារហូតដល់ចប់

ភ្នំពេញ ៖ ក្រុមនិស្សិតបណ្ឌិតសភាយោធាកម្ពុជា ដែលកំពុងសិក្សានៅអាមេរិក បានបង្ហាញនូវក្តីរំភើប និងអរគុណថ្នាក់ដឹកនាំរាជរដ្ឋាភិបាលកម្ពុជាយ៉ាងខ្លាំង ដែលបានជួយបង់ថ្លៃសិក្សាដល់ពេលគេទាំង៦នាក់ ដើម្បីបន្តការសិក្សាដល់ទីបញ្ចប់ ក្រោយរដ្ឋាភិបាលអាមេរិកសម្រេចបញ្ឈប់ការផ្តល់អាហារូបករណ៍។ក្រុមនិស្សិតបណ្ឌិតសភាយោធាកម្ពុជា ដែលកំពុងសិក្សានៅអាមេរិកទាំងនោះ បានបង្ហាញនូវអារម្មណ៍ សប្បាយចិត្តរៀងៗខ្លួន តាមរយៈបណ្តាញសង្គមហ្វេសប៊ុករបស់ពួកគេ ដោយអរគុណនិងដឹងគុណ យ៉ាងជ្រាលជ្រៅជាទីបំផុតជូនចំពោះ រាជរដ្ឋាភិបាលកម្ពុជា ជាពិសេសសម្តេចតេជោ ហ៊ុន សែន នាយករដ្ឋមន្រ្តីកម្ពុជា និងសម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ព្រមទាំងថ្នាក់ដឹកនាំ នៃកងយោធពលខេមរភូមិន្ទទាំង ដែលមិនបោះបង់ពួកគេ។និស្សិតម្នាក់ ឈ្មោះ អ៊ុន វុឌ្ឍិ ជាសិក្ខាកាមកម្ពុជា ដែលកំពុងសិក្សានៅសាលាបណ្ឌិតសភាយោធាជើកគោកសហរដ្ឋអាមេរិក (United States Army Academy) នៃសាលា West Point ឆ្នាំទី១ បានលើកឡើងយ៉ាងនេះថា ៖ «ខ្ញុំបាទពិតជាមានសេចក្ដីក្តីរំភើប និងរីករាយក្រៃលែង ដែលរាជរដ្ឋាភិបាលកម្ពុជា និងក្រសួងការពារជាតិកម្ពុជា សម្រេចផ្តល់ការឧបត្ថម្ភថវិកាសម្រាប់ការសិក្សារបស់ខ្ញុំ សម្រាប់រយៈពេល៣ឆ្នាំខាងមុខទៀត រហូតដល់ទីបញ្ចប់ បន្ទាប់ពីការបញ្ឈប់ផ្ដល់ជំនួយឧបត្ថម្ភអាហារូបករណ៍ពីសំណាក់រដ្ឋាភិបាលអាមេរិក»។ និស្សិតរូបនេះ បន្តថា ទោះបីជារាជរដ្ឋាភិបាលកម្ពុជា កំពុងខិតខំពុះពារដោះស្រាយវិបត្តិ covid-19 នៅក្នុងប្រទេសកម្ពុជាលំបាកប៉ុណ្ណាក្តី ប៉ុន្ដែថ្នាក់ដឹកនាំនូវតែយកចិត្តទុកដាក់ខ្ពស់និងមានចំណាត់ការបន្ទាន់សម្រាប់ដោះស្រាយការឧបត្ថម្ភជូននិស្សិតយោធាទាំង៦ រូបដែលកំពុងជួបការលំបាក និងខ្វះខាតក្នុងការបន្តការសិក្សានៅសហរដ្ឋអាមេរិកផងដែរ។នាយឧត្តមសេនីយ៍ ណឹម សុវត្តិ អគ្គនាយកអគ្គនាយកដ្ឋាននយោបាយ និងកិច្ចការបរទេសក្រសួងការពារជាតិ បានចាត់ទុកការសម្រេចជាឯកតោភាគីរបស់អាមេរិកបញ្ឈប់ការផ្តល់អាហារូបករណ៍ដល់និស្សិត កម្ពុជានៅពាក់កណ្តាលផ្លូវបែបនេះថា ជាការសម្រេចចិត្តដូចជាក្មេងបៀមដៃ ដែលមានសក្ដិសមនឹងខ្លួនជាប្រទេសមហាអំណាចនោះឡើយ។តែយ៉ាងណា នាយឧត្តមសេនីយ៍ បានលើកឡើងថា បើទោះបីជា អាមេរិកធ្វើបែបនេះ ដាក់និស្សិតកម្ពុជាក្តី ក៏រាជរដ្ឋាភិបាលមិនព្រងើយចំពោះការលំបាក របស់និស្សិតកម្ពុជានោះដែរ ពោលគឺរាជរដ្ឋាភិបាលបានសម្រេចបង់ថ្លៃឲ្យនិស្សិតបានរៀនដល់ចប់។នាយឧត្តមសេនីយ៍ ណឹម សុវត្តិ បញ្ជាក់ប្រាប់BTVថា ការសម្រេចរបស់រាជរដ្ឋាភិបាលបែបនេះ គឺបង្ហាញពី គុណតម្លៃនៃថ្នាក់ដឹកនាំ និងជាទម្លាប់ធ្វើការរបស់ថ្នាក់ដឹកនាំកម្ពុជាឲ្យចប់ចុងចប់ដើម ដោយមិនបោះបង់ ចោលពាក់កណ្តាលទី ទោះបីជាកម្ពុជាមានការលំបាកក្តីដោយសារបញ្ហាកូវីដក្តី។ នាយឧត្តមសេនីយ៍ បន្ថែមថា ការយកចិត្តទុកដាក់របស់ថ្នាក់ដឹនាំជាន់ខ្ពស់ពេលនេះ ក៏ផ្ញើសារដល់និស្សិតដែលត្រូវបានថ្នាក់ដឹកនាំយកចិត្តទុកដាក់ហើយ ត្រូវខិតខំប្រឹងរៀនដើម្បីយកចំណេះ មកជួយដល់ប្រទេសជាតិវិញ។ជាមួយគ្នានេះ និស្សិតម្នាក់ទៀត ឈ្មោះ ឡុង តុលា ជានិស្សិតអន្តរជាតិតំណាងឲ្យកម្ពុជា ដែលបានជាប់ អាហារូបករណ៍បណ្ឌិតសភាទ័ពអាកាសអាមេរិកនិងកំពុងសិក្សាឆ្នាំទី១ បានប្តេជ្ញាចិត្តថា រូបគេនឹងខិតខំសិក្សារៀនសូត្រឲ្យទទួលបានជោគជ័យ និងទទួលលទ្ធផលល្អប្រសើរ ដោយវិលមកបំពេញការងារជូនជាតិមាតុភូមិវិញ ដើម្បីសងគុណនិងដឹងគុណចំពោះថ្នាក់នាំរាជរដ្ឋាភិបាលកម្ពុជា និងប្រទេសជាតិ ដែលបានយកចិត្តទុកដាក់ជួយដល់ខ្លួនក៏ដូចជានិស្សិតរូបផ្សេងទៀត ដែលត្រូវអាមេរិកផ្តាច់អាហារូបករណ៍ពាក់កណ្តាលទី៕អត្ថបទ ជា ធីរិទ្ធ

មូលដ្ឋានសង្កាត់ទឹកល្អក់ទី៣ ខណ្ឌទួលគោក អនុញ្ញាតបើកទីតាំងធ្វើចត្តាឡីស័ក ឲ្យដំណើរការឡើងវិញចំនួន៤ទីតាំង

ភ្នំពេញ ៖ ដោយមានការបញ្ជាផ្ទាល់ពីលោក ឯក ឃុនដឿន អភិបាលនៃគណៈអភិបាល ខណ្ឌទួលគោក បានណែនាំឲ្យរដ្ឋបាលសង្កាត់ទឹកល្អក់ទី៣ដឹកនាំដោយលោក ជា ឃាង ចៅសង្កាត់ ចុះធ្វើកំណត់ហេតុ អនុញ្ញាតបើកទីតាំងធ្វើចត្តាឡីស័ក ឲ្យដំណើរការឡើងវិញចំនួន ០២ទីតាំងបន្ថែមទៀត នៅរសៀលថ្ងៃទី០៤ ខែកក្កដា ឆ្នាំ២០២១។យោងតាមរបាយការណ៍របស់រដ្ឋបាលសង្កាត់ទឹកល្អក់ទី៣ បានបញ្ជាក់ថា ទីតាំង១.ផ្ទះលេខ៧៩A ច្រកផ្លូវលេខ១៩២ ភូមិ៨ ។ទី២.ផ្ទះលេខ៥១ ច្រកផ្លូវលេខ១៩២ ភូមិ១០។ ទី៣.ផ្ទះលេខP៩ ច្រកផ្លូវ២៦៥ ភូមិ១៣។ទី៤.ផ្ទះលេខ៦៣x ច្រកផ្លូវ២៦៥ ភូមិ១៣បានអនុវត្តវិធាន របស់ក្រសួងសុខាភិបាល និងសេចក្ដីណែនាំរបស់រដ្ឋាភិបាល បានត្រឹមត្រូវផងដែរ។ក្នុងនោះលោកចៅសង្កាត់ទឹកល្អក់ទី៣ បានណែនាំឲ្យម្ចាស់ផ្ទះអនុវត្ត តាមវិធានការណ៍របស់រាជរដ្ឋាភិបាល ៣កុំ ៣ការពារ និងបន្តធ្វើចត្តាឡីស័ក នៅផ្ទះរយៈពេល១៤ថ្ងៃទៀត អនុវត្តន៍តាមការ ណែនាំរបស់ក្រសួងសុខាភិបាលដាក់ខ្លួន ដាច់ដោយឡែក ចំពោះអ្នកដែលបានជាសះស្បើយពីជំងឺ៕អត្ថបទ ៖ កុម្ភះ

អំណោយសម្តេចតេជោ ត្រូវបានប្រគល់ជូនលោកយាយ-លោកតាដែលមានអាយុ១០០ដល់១០២ឆ្នាំ បានស្ម័គ្រចិត្តចាក់វ៉ាក់សាំងកូវីដ-១៩ នៅមន្ទីរពេទ្យបង្អែកពញាឮ

ភ្នំពេញ ៖ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មាការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស ព្រឹកថ្ងៃទី០៤ ខែកក្កដា ឆ្នាំ២០២១នេះ បាននាំអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី ទៅជូនលោកយាយ លោកតាអាយុ ១០០ ដល់១០២ឆ្នាំ ដែលបានស្ម័គ្រចិត្តចាក់វ៉ាក់សាំងកូវីដ-១៩ នៅមន្ទីរពេទ្យបង្អែកពញាឮ ស្រុកពញាឮ ខេត្តកណ្ដាល និងនៅខណ្ឌកំបូល ខណ្ឌមានជ័យ រាជធានីភ្នំពេញ។សម្រាប់ទីតាំងទី១. លោកជំទាវ វេជ្ជបណ្ឌិត ឱ វណ្ណឌីន រួមនឹងក្រុមការងារបាននាំយកអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រួមមានគ្រឿងឧបភោគបរិភោគ រួមនឹងថវិកាចំនួន ០៣លានរៀល ទៅជូនលោកយាយ ហាយ សាម៉េត មានអាយុ១០១ឆ្នាំ រស់នៅស្រុកពញាឮ ខេត្តកណ្ដាល បានស្ម័គ្រចិត្តចាក់វ៉ាក់សាំងបង្ការជំងឺកូវីដ-19 ប្រភេទកូវីសែល។សម្រាប់ទីតាំងទី២. ថវិកាចំនួន០៣លានរៀល ទៅជូនលោកយាយ អៀម រៀមអាយុ១០១ឆ្នាំ រស់នៅភូមិគោកខ្សាច់ សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ បានស្ម័គ្រចិត្តចាក់វ៉ាក់សាំងបង្ការជំងឺកូវីដ-19 ប្រភេទកូវីសែល។

ឯកអគ្គរដ្ឋទូតវៀតណាម ជំរាបសម្តេចតេជោថា ទំនាក់ទំនងរវាងប្រទេសកម្ពុជា និងវៀតណាមមានការរីកចម្រើន

ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បាអនុញ្ញាតឲ្យឯកឧត្តម វ៉ូ ក្វាង មិញ (Vu Quang Minh) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសង្គម និយមវៀតណាម ចូលជួបសម្តែងការគួរសម និងជម្រាបលា ខណៈឯកឧត្តមបានបញ្ចប់អាណត្តិ បេសកកម្មការទូតប្រចាំនៅកម្ពុជា។ក្នុងជំនួបដែលធ្វើនៅវិមានសន្តិភាព ទីស្តីការនាយករដ្ឋមន្ត្រី នាព្រឹកថ្ងៃទី៣ កក្កដានេះ ឯកឧត្តម អ៊ាង សុផល្លែត ជំនួយការផ្ទាល់សម្តេចតេជោ បានប្រាប់ដល់ក្រុមអ្នកសារព័ត៌មានថា ក្នុងបេសកកម្មការទូតនៅកម្ពុជា ឯកឧត្តម វូ ជំរាបសម្តេចតេជោថា បេសកម្មកម្មការទូតនៅកម្ពុជា ឯកឧត្តម បានសង្កេតឃើញទំនាក់ទំនងរវាងប្រទេសទាំងពីរកម្ពុជា និងវៀតណាមមានការរីកចម្រើនគួរឱ្យកត់សម្គាល់ ។ឯកឧត្តម បានបន្ថែថា ជាការឆ្លើយតបសម្តេចតេជោ បានយល់ស្រប ជាមួយអ្វីដែលឯកឧត្តមវូ បានលើកឡើង ហើយសម្តេច ក៏បានថ្លែងអំណរគុណជូនឯកឧត្តម វូ ដែលបានប្រឹងប្រែងអស់ពីកម្លាំងកាយចិត្តបំពេញបេសកកម្មការទូតនៅព្រះរាជាណាចក្រកម្ពុជា ធ្វើឲ្យទំនាក់ទំនងរវាងប្រទេសទាំងពីរ មានការរីកចម្រើនកាន់តែរឹងមាំ។សម្ដេចក៏បានជម្រាបជូនថា ក្នុងកាលៈទេសៈនេះ អ្វីដែលគប្បីត្រូវធ្វើទីមួយ ៖ ត្រូវរួមគ្នាប្រយុទ្ធប្រឆាំងកូវីដ១៩ តាមរយៈវិធានសុខាភិបាល,ទីពីរ ៖ បន្តជំរុញកិច្ចសហប្រតិបត្តិការលើវិស័យសេដ្ឋកិច្ច, ពាណិជ្ជកម្ម, វិនិយោគ ,និងទីបី ៖ ពិនិត្យមើលវិស័យដទៃទៀត ដែលប្រទេសទាំងពីរ អាចជំរុញធ្វើការរួមគ្នាបាន។ជាទីបញ្ចប់ សម្តេចបានជូនពរអោយឯកឧត្តម ទទួលបានជោគជ័យ ជាបន្តបន្ទាប់ទៀត ក្នុងបេសកកម្មការទូតរបស់ឯកឧត្ដម នៅថ្ងៃអនាគត។សូមបញ្ជាក់ថា លោក វ៉ូ ក្វាង មិញ បានមកបំពេញ បេសកកម្មការទូតនៅកម្ពុជា កាលពីឆ្នាំ២០១៨ ដែលគិតរហូតមកដល់ពេលនេះ មានរយៈពេលជិត៤ឆ្នាំ៕ អត្ថបទ៖ មុត សុទ្ធ

មន្រ្តីជំនាញប្រាប់ពីហេតុផល៣ចំណុចពីដំណើរការចាក់វ៉ាក់សាំងកូវីដនៅរាជធានីភ្នំពេញលើសផែនការ

ភ្នំពេញ ៖ ស្ថិតក្នុងយុទ្ធនាការចាក់វ៉ាក់សាំងកូវីដ ក្នុងរាជធានីភ្នំពេញ គណៈកម្មការចំពោះកិច្ចការចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស ចាក់វ៉ាក់សាំងជូនពលរដ្ឋ ក្នុងរាជធានីភ្នំពេញ លើសតួលេខដែលកំណត់ ដោយមន្រ្តីជំនាញបង្ហាញហេតុផលចំនួន៣ចំណុច។មានប្រសាសន៍ប្រាប់អ្នកសារព័ត៌មាន ក្នុងពិធីប្រគល់អំណោយរបស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា ជូនលោកយាយ ហូ ខាំ មានអាយុ១០១ឆ្នាំ ស្ម័គ្រចិត្តចាក់វ៉ាក់សាំងកូវីដ-19 ស្ថិតនៅសាលាបឋមសិក្សាចតុមុខ នាថ្ងៃទី០២ខែកក្កដាម្សិលមិញ លោកជំទាវ ឱ វណ្ណឌីនរដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចការចាក់វ៉ាក់សាំងកូវីដ-19 ក្នុងក្របខណ្ឌទូទាំងប្រទេស បានលើកឡើងពីហេតុផលបីចំណុច ធ្វើឱ្យដំណើរកាចាក់វ៉ាក់សាំងកូវីដ នៅរាជធានីភ្នំពេញ លើសតួលេខដែលបានកំណត់។ ហេតុផលទាំងបីនោះ រួមមាន ៖ ទី១.តួលេខដែលគ.វ.ក១៩ រៀបចំចាក់វ៉ាក់សាំងជូនពលរដ្ឋដែលមានវ័យពី១៨ឡើងទៅ គឺជាតួលេខប៉ាន់ស្មាន ដែលមានចូលសហការពីអាជ្ញាធរមូលដ្ឋាន។ ទី២.ពលរដ្ឋមួយចំនួននៅជិតរាជធានីភ្នំពេញ គាត់ស្ម័គ្រចិត្តមកទទួលការចាក់វ៉ាក់សាំងនៅរាជធានីភ្នំពេញ ។ទី៣.ពេលរៀបចំយុទ្ធនាការចាក់វ៉ាក់សាំង គឺគ.វ.ក ១៩ គិតតែពលរដ្ឋខ្មែរ ប៉ុន្តែនៅពេលបើកយុទ្ធនាការចាក់វ៉ាក់សាំង ដោយមានការគិតគូយកចិត្តទុក ពីសម្តេចតេជោ ហ៊ុន សែន នាយករដ្ឋមន្រ្តី បានអនុញ្ញាតដល់ជនបរទេសរស់នៅក្នុងរាជធានីភ្នំទទួលបានការចាក់វ៉ាក់សាំងផងដែរ។ក្រៅពីនេះ លើកជំទាវបានក្រើនរំលឹកដល់ពលរដ្ឋចាក់វ៉ាក់សាំងកូវីដដូសទី១ រួចរាល់ ស្ថិតក្នុងខណ្ឌចំនួន៣ ចុងក្រោយគេក្នុងរាជធានីភ្នំពេញ សូមអញ្ជើញទៅចាក់វ៉ាក់សាំងដូសទី២ តាមការកំណត់របស់គ្រូពេទ្យ ខណៈយុទ្ធនាកាចាក់វ៉ាក់សាំង នឹងបញ្ចប់នៅថ្ងៃទី០៨ ខែកក្ដដា ខាងមុខនេះ។តាមផែនការមេ នៃគណៈកម្មការចំពោះកិច្ចការចាក់វ៉ាក់សាំងកូវីដ-19 ក្នុងក្របខណ្ឌទូទាំងប្រទេស នឹងចាក់វ៉ាក់សាំងជូនពលរដ្ឋមានវ័យ១៨ឆ្នាំឡើងទៅ គោលដៅប្រមាណ១០លាននាក់ នៅពាក់កណ្តាលឆ្នាំ២០២២ ប៉ុន្តែការអនុវត្តជាក់ស្តែង អាចនឹងបញ្ចប់នៅអំឡុងខែតុលា ឫខែវិច្ឆិកា ឆ្នាំ២០២១ បន្ទាប់ពីកម្ពុជាទទួលបានវ៉ាក់សាំងគ្រប់គ្រាន់ ប្រមាណ២០លានដូស ដែលការគ្រោងទុក នឹងមកដល់នៅអំឡុងខែសីហា ខាងមុខនេះ។ ការចាក់វ៉ាក់សាំងកូវីដ-19 គឺជាមធ្យោបាយមួយ ក្នុងចំណោមវិធានការសុខាភិបាលចាំបាច់ដទៃទៀត ដែលនឹងបង្ការការរាតត្បាត ការចម្លងជំងឺកូវីដ-19 និងកាត់បន្ថយផលប៉ះពាល់នៃជំងឺកូវីដ-19 ទៅលើវិស័យសេដ្ឋកិច្ច និងសង្គម៕អត្ថបទ៖ទូច សោភ័ណ

រដ្ឋមន្រ្តីក្រសួងសុខាភិបាល ៖ វិទ្យាស្ថានប៉ាស្ទ័រ គឺជាដៃគូដ៏យូរអង្វែងដែលបានជួយឧបត្ថម្ភគាំទ្រប្រទេសកម្ពុជា

ភ្នំពេញ ៖ ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល រសៀលថ្ងៃទី២ ខែកក្កដា ឆ្នាំ២០២១ បានអនុញ្ញាតឲ្យលោកស្រី វេជ្ជបណ្ឌិត Laurence Baril នាយកវិទ្យាស្ថានប៉ាស្ទ័រកម្ពុជា ចូលជួបសម្តែងការគួរសម និងជម្រាបលា។ក្នុងជំនួបពិភាក្សាការងារខាងលើនេះ ឯកឧត្តម រដ្ឋមន្រ្តី បានបញ្ជាក់ជូនថា វិទ្យាស្ថានប៉ាស្ទ័រកម្ពុជា គឺជាដៃគូដ៏យូរអង្វែងដែលបានជួយឧបត្ថម្ភគាំទ្រប្រទេសកម្ពុជា ទាំងការអភិវឌ្ឍស្ថាប័នផ្នែកមន្ទីរពិសោធន៍ និងការអភិវឌ្ឍធនធានមនុស្ស។ ឯកឧត្តម រដ្ឋមន្រ្តីក្រសួងសុខាភិបាល ក៏បានថ្លែងអំណរគុណយ៉ាងជ្រាវជ្រៅចំពោះវិទ្យាស្ថានប៉ាស្ទ័រកម្ពុជា និងស្នើសុំឲ្យបន្តសហការ និងគាំទ្រវិស័យសុខាភិបាលកម្ពុជា ឲ្យកាន់តែច្រើនថែមទៀត ជាពិសេសលើការបណ្តុះបណ្តាលធនធានមនុស្ស និងស្រាវជ្រាវវិទ្យាសាស្រ្ត ផ្នែកជំងឺឆ្លង៕

ព្រឹទ្ធសភាអនុម័តច្បាប់ទាក់ទិននឹងគម្រោងអភិវឌ្ឍន៍ និងផ្គត់ផ្គង់អគ្គិសនី

ភ្នំពេញ ៖ សមាជិកព្រឹទ្ធសភាចំនួន៤០រូប បានអនុម័តលើសេចក្តីព្រាងច្បាប់ ចំនួន៤ ទាក់ទិននឹងគម្រោងអភិវឌ្ឍន៍ និងការផ្គត់ផ្គងអគ្គិសនីក្នុងសម័យប្រជុំពេញអង្គ ព្រឹទ្ធសភា លើកទី៧ នីតិកាលទី៤ ក្រោមអធិបតីភាពសម្តេច សាយ ឈុំ ប្រធានព្រឹទ្ធសភា ។អង្គប្រជុំបានពិនិត្យ និងឲ្យយោបល់លើ សេចក្តីព្រាងច្បាប់ ស្តីពី ការអនុម័តយល់ព្រមលើការ ធានាទូទាត់របស់រាជរដ្ឋាភិបាលកម្ពុជាឲ្យក្រុមហ៊ុន ស្នេថេក ខូ អិលធីឌី សម្រាប់គម្រោងអភិវឌ្ឍន៍ ខ្សែបណ្តាញបញ្ជូន អគ្គិសនីតង់ស្យុង៥០០គីឡូវ៉ុលពីខេត្តបាត់ដំបង ទៅកាន់ព្រំដែនកម្ពុជា-ថៃ ។ សេចក្តីព្រាងច្បាប់នេះ តាក់តែងឡើងមាន ៣មាត្រា ត្រូវបានរដ្ឋសភាអនុម័ត យល់ព្រមជាលើកដំបូង ចំនួន៨០សំឡេង នៃចំនួនសមាជិករដ្ឋសភា ទាំងមូល កាលពីថ្ងៃទី២៤ ខែមិថុនា ឆ្នាំ២០២១ នាសម័យប្រជុំរដ្ឋសភាលើកទី៦ នីតិកាលទី៦ ។ពិនិត្យ និងឲ្យយោបល់លើសេចក្តី ព្រាងច្បាប់ស្តីពី ការអនុម័តយល់ ព្រមលើការធានាទូទាត់ របស់រាជរដ្ឋាភិបាលកម្ពុជា ឲ្យក្រុមហ៊ុន ស្នេថេក ខូ អិលធីឌី សម្រាប់គម្រោងអភិវឌ្ឍខ្សែបណ្តាញ បញ្ជូនអគ្គិសនីតង់ស្យុង៥០០គីឡូវ៉ុល ពីរាជធានីភ្នំពេញ ទៅកាន់ព្រំដែន កម្ពុជា-ឡាវ ។ សេចក្តីព្រាងច្បាប់នេះ មាន ៣មាត្រា ត្រូវបានរដ្ឋសភាអនុម័ត យល់ព្រមជាលើកដំបូង ចំនួន ៧៩សំឡេង នៃចំនួនសមាជិករដ្ឋសភា ទាំងមូល កាលពីថ្ងៃទី២៤ ខែមិថុនា ឆ្នាំ២០២១ ។ពិនិត្យ និងឲ្យយោបល់លើសេចក្តីព្រាងច្បាប់ស្តីពី ការអនុម័តយល់ព្រមលើការធានា ទូទាត់របស់រាជរដ្ឋាភិបាលកម្ពុជា ឲ្យក្រុមហ៊ុនអគ្គិសនីវៀតណាម សម្រាប់ធានាលើការទិញ ថាមពលអគ្គិសនី ពី វៀតណាម ។៤.ពិនិត្យ និងឲ្យយោបល់លើសេចក្តីព្រាងច្បាប់ស្តីពី ការអនុម័តយល់ព្រមលើការធានា ទូទាត់របស់រាជរដ្ឋាភិបាល កម្ពុជា ឲ្យក្រុមហ៊ុន ឆាយណា ណេសិនណល ហេវី ម៉ាស៊ីនណឺរី ខបភើរេសិន សម្រាប់គម្រោងអភិវឌ្ឍវារី អគ្គិសនីស្ទឹងតាតៃលើអានុភាព ១៥០មេហ្កាវ៉ាត់ ខេត្តកោះកុង ៕អត្ថបទ ៖ បាន

ប្រមុខការទូតកម្ពុជាប្រាប់អ្នករាយការណ៍ពិសេសUNថា ការវាយតម្លៃណាមួយមកលើកម្ពុជា គួរតែចងចាំថា តើចេញពីប្រភពណា

ភ្នំពេញ ៖ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្តីការបរទេស និងសហប្រតិបត្តិការអន្តរជាតិ បានជួបជាមួយលោកសាស្ត្រាចារ្យ វិទិត មុនតាប៊ន អ្នករាយការណ៍ពិសេសទទួលបន្ទុកស្ថានភាពសិទ្ធិមនុស្សនៅកម្ពុជា ដោយនៅក្នុងពេលនោះលោក វិទិត មុនតាប៊ន បានចាត់ទុកខ្លួនលោកជាមិត្តល្អរបស់កម្ពុជា។នេះបើតាមប្រកាសព័ត៌មានរបស់ក្រសួងការរបរទេស ដែលបានបង្ហាញលទ្ធផលនៃជំនួបនៅរសៀលថ្ងៃទី០១ ខែកក្កដា ម្សិលមិញនេះ ដែលឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ បានទទួលជួបតាមប្រព័ន្ធវីដេអូ ជាមួយលោក សាស្ត្រាចារ្យ វិទិត មុនតាប៊ន អ្នករាយការណ៍ពិសេសថ្មី ទទួលបន្ទុកស្ថានភាពសិទ្ធិ មនុស្សនៅកម្ពុជា។កិច្ចពិភាក្សានេះ បានផ្តោតលើ(១) កិច្ចសហប្រតិបត្តិការអន្តរជាតិ និងតំបន់ (២)ជំងឺ កូវីដ១៩ និងផលវិបាករបស់វាព្រមទាំង (៣) សិទ្ធប្រជាធិបតេយ្យ និងពលរដ្ឋ។ដោយចាត់ទុកខ្លួនលោកជាមិត្តល្អរបស់កម្ពុជា លោកសាស្ត្រាចារ្យ វិទិត មុនតាប៊ន បានគូស បញ្ជាក់ពីការគោរពដ៏ជ្រាលជ្រៅចំពោះព្រះរាជាណាចក្រកម្ពុជា។ លោក បានសម្តែងនូវអំណរសាទរ ចំពោះកិច្ចសហប្រតិបត្តិការយ៉ាងទូលំទូលាយរបស់កម្ពុជា នៅក្នុងយន្តការសិទ្ធិមនុស្ស ដូចជាការផ្តល់ សច្ចាប័នអនុសញ្ញាអន្តរជាតិស្តីពីសិទ្ធិមនុស្សជាច្រើន ការចូលរួមក្នុងស្ថាប័នសន្ធិសញ្ញា យន្តការត្រួត ពិនិត្យតាមកាលកំណត់ និងអ្នករាយការណ៍ពិសេស និងការរីកចម្រើនគួរឱ្យកត់សម្គាល់នៅក្នុងសិទ្ធិ សេដ្ឋកិច្ចនិងសង្គម។ឯកឧត្តម ឧបនាយករដ្ឋមន្ត្រី បានអបអរសាទរចំពោះលោកសាស្ត្រាចារ្យ វិទិត មុនតាប៊ន ដែល បានទទួលការតែងតាំងជាអ្នករាយការណ៍ ពិសេសថ្មីទទួលបន្ទុកស្ថានភាពសិទ្ធិមនុស្សនៅកម្ពុជា និង បានស្វាគមន៍ចំពោះវិធីសាស្ត្រប្រកបដោយការគោរពរបស់លោកសាស្ត្រាចារ្យ ព្រមទាំងបានបញ្ជាក់ សារជាថ្មីពីកិច្ចសហប្រតិបត្តិការរបស់កម្ពុជា ក្នុងការធ្វើការយ៉ាងជិតស្និទ្ធជាមួយអ្នករាយការណ៍ ពិសេស។ភាគីទាំងពីរបានផ្លាស់ប្តូរទស្សនៈផងដែរលើការរៀបចំរបស់កម្ពុជា ក្នុងនាមជាប្រធានអាស៊ាននៅឆ្នាំ២០២២ និងគំនិតផ្ដួចផ្ដើមដែល មានសក្ដានុពលពាក់ព័ន្ធមួយចំនួន។ចំពោះការរីករាលដាលនៃជំងឺកូវីដ១៩ ឯកឧត្តម ឧបនាយករដ្ឋមន្ត្រី បានជម្រាបជូនដោយសង្ខេប ពីវិធានការហ្មត់ចត់ និងយុទ្ធសាស្ត្ររបស់កម្ពុជាក្នុងការឆ្លើយតបនឹងវិបត្តិសុខភាព និងកាត់ បន្ថយផលប៉ះពាល់សេដ្ឋកិច្ច-សង្គមលើជនងាយរងគ្រោះ ក្នុងនោះ មានកម្មវិធីឧបត្ថម្ភសាច់ប្រាក់ ការផ្តល់ ម្ហូបអាហារក្នុងអំឡុងការបិទខ្ទប់ និងការចាក់វ៉ាក់សាំង។ អាទិភាពរបស់រដ្ឋាភិបាលគឺធានាសិទ្ធិរស់រាន មានជីវិតនិងសុខភាព រួមជាមួយស្ថិរភាពសង្គម និងសុខភាពសាធារណៈ។ជាការឆ្លើយតប លោក សាស្ត្រាចារ្យ វិទិត មុនតាប៊ន បានស្វាគមន៍ចំពោះការឧបត្ថម្ភសាច់ប្រាក់ និងការចាក់វ៉ាក់សាំងការពារ ដោយឥតគិតថ្លៃនៅក្នុងប្រទេសកម្ពុជា។ ស្តីពីប្រជាធិបតេយ្យនិងពលរដ្ឋ ឯកឧត្ដមឧបនាយករដ្ឋមន្ត្រី បានសង្កត់ធ្ងន់ថា ការវាយតម្លៃ ណាមួយមកលើប្រទេសកម្ពុជា គួរតែចងចាំថា តើការវាយតម្លៃនោះចេញពីប្រភពណា ហើយវាស្ថិតនៅ ត្រង់ណានៅពេលនេះ ។ យន្តការនានា ត្រូវបានរៀបចំបង្កើតឡើង ដើម្បីបង្កើតភាពជាដៃគូរវាងរដ្ឋាភិបាល និងអង្គការសង្គមស៊ីវិលឲ្យកាន់តែជិតស្និទ្ធ លទ្ធិប្រជាធិបតេយ្យមិនមែនជាការរត់ប្រណាំងចម្ងាយខ្លីនោះទេ ប៉ុន្តែវាជាការរត់ចម្ងាយឆ្ងាយមួយ។ រាល់វិធានការច្បាប់ និងគ្រប់គ្រងរដ្ឋបាល ត្រូវបានពង្រឹង និងអនុវត្តនៅក្នុងព្រំដែនច្បាប់ ការចោទប្រកាន់ត្រូវបានធ្វើឡើងនៅចំពោះមុខតុលាការ ពាក់ព័ន្ធនឹង បទល្មើសព្រហ្មទណ្ឌនិងការរំលោភច្បាប់រដ្ឋធម្មនុញ្ញ។ ជនជាប់ចោទមានឱកាសពេញលេញក្នុងការស្ដាប់ និងបដិសេធរាល់ការចោទប្រកាន់ ដែលជាផ្នែកមួយនៃសិទ្ធិទទួលបាននីតិវិធីត្រឹមត្រូវ។នេះជាកិច្ចប្រជុំលើកទី៦ តាមប្រព័ន្ធវីដេអូ ដែលលោកសាស្ត្រាចារ្យ វិទិត មុនតាប៊ន បានជួប ជាមួយបណ្តាឥស្សរជននៃរាជរដ្ឋាភិបាលកម្ពុជា ចាប់តាំងពីលោកបានចូលកាន់តំណែងក្នុងអាណត្តិ របស់លោក។អ្នករាយការណ៍ពិសេសថ្មីទទួលបន្ទុកស្ថានភាពសិទ្ធិមនុស្សនៅកម្ពុជាបានជួប ជាមួយឥស្សរជន និងតំណាងមកពីក្រសួងមហាផ្ទៃ គណៈកម្មាធិការសិទ្ធិមនុស្សកម្ពុជា ក្រសួងសុខាភិបាល ក្រសួងសង្គមកិច្ច អតីតយុទ្ធជន និងយុវនីតិសម្បទា និងក្រសួងយុត្តិធម៌។លោកសាស្ត្រាចារ្យ វិចិត បានថ្លែងអំណរគុណដល់រាជរដ្ឋាភិបាលកម្ពុជា ដែលបានជួយសម្រួលឲ្យមានការសន្ទនាដោយបើក ចំហនិងប្រកបដោយការស្ថាបនា ដែលបង្ហាញពីការផ្ដល់កិច្ចសហប្រតិបត្តិការល្អរបស់កម្ពុជា នៅក្នុងអាណត្តិថ្មីរបស់លោក៕អត្ថបទ ៖ មុត សុត

បណ្ដាញសង្គម

ព័ត៌មានថ្មីៗ

ចាប់ពីពេលនេះតទៅ អ្នកល្មើសច្បាប់ចរាចរណ៍តម្រូវឱ្យបង់ប្រាក់ពិន័យតាមរយៈធនាគារ កាណាឌីយ៉ា

រដ្ឋមន្រ្តីក្រសួងវប្បធម៌ ជួបពិភាក្សាការងារជាមួយអនុប្រធានបេសកកម្មស្ថានទូតសាធារណរដ្ឋកូរ៉េប្រចាំកម្ពុជា

អង្គភាពប្រឆាំងអំពើពុករលួយធ្វើការសម្រេចលើពាក្យបណ្តឹងចំនួន៣៣ ក្នុងខែសីហា ឆ្នាំ២០២៦

លោក Trump៖ អ៊ីរ៉ង់បច្ចុប្បន្នគឺជាប្រទេសបរាជ័យ ហើយការបិទច្រក គឺជារឿងមិនគួរឲ្យជឿទាល់តែសោះ

នាយករដ្ឋមន្ត្រីបែលហ្ស៊ិក៖ អឺរ៉ុបកំពុងដើរយឺតជាងអាមេរិក និងចិន ក្នុងវិស័យនវានុវត្តន៍ និងផលិតភាព

ការវាយប្រហាររបស់អ៊ីរ៉ង់លើអេមីរ៉ាតអារ៉ាប់រួម និងហ្ស៊កដានី ត្រូវបានថ្កោលទោសយ៉ាងដាច់អហង្ការ

ក្រុមគ្រូពេទ្យនិយាយថា ការវាយប្រហាររបស់អ៊ីស្រាអែល បានសម្លាប់មនុស្ស ២នាក់ នៅតំបន់ហ្កាហ្សា

ប្រធានាធិបតីលីបង់ ជំរុញឱ្យអនុវត្តកិច្ចព្រមព្រៀងក្របខ័ណ្ឌយ៉ាងពេញលេញ និងមិនលម្អៀង ជាមួយអ៊ីស្រាអែល

ទួរគី អារ៉ាប៊ីសាអ៊ូឌីត និងប៉ាគីស្ថាន រៀបចំជំនួបគណៈកម្មាធិការកិច្ចព្រមព្រៀងការពារជាតិលើកដំបូង

យានដ្រូនរបស់រុស្ស៊ី ស្រោចសន្ធាប់លើទីក្រុងគីវ ជាថ្ងៃទី៥ ដោយរំខានដល់ជីវិតប្រចាំថ្ងៃ នៅទូទាំងរដ្ឋធានី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

តោ១ក្បាលដែលដកហូតពីបុរសជនជាតិចិន ត្រូវបានសម្តេចតេជោ ប្រកាសឲ្យម្ចាស់យកទៅចិញ្ចឹមវិញ

ក្រសួងប្រៃសណីយ៍ទទួលបានការបញ្ជាទិញឧបករណ៍តេស្តរហ័សរហូតជាង២៦ម៉ឺនឧបករណ៍

និស្សិតបណ្ឌិតសភាយោធាកម្ពុជា ដឹងគុណនិងអរគុណរាជរដ្ឋាភិបាល ដែលចេញថ្លៃការសិក្សារហូតដល់ចប់

មូលដ្ឋានសង្កាត់ទឹកល្អក់ទី៣ ខណ្ឌទួលគោក អនុញ្ញាតបើកទីតាំងធ្វើចត្តាឡីស័ក ឲ្យដំណើរការឡើងវិញចំនួន៤ទីតាំង

ឯកអគ្គរដ្ឋទូតវៀតណាម ជំរាបសម្តេចតេជោថា ទំនាក់ទំនងរវាងប្រទេសកម្ពុជា និងវៀតណាមមានការរីកចម្រើន

មន្រ្តីជំនាញប្រាប់ពីហេតុផល៣ចំណុចពីដំណើរការចាក់វ៉ាក់សាំងកូវីដនៅរាជធានីភ្នំពេញលើសផែនការ

ព្រឹទ្ធសភាអនុម័តច្បាប់ទាក់ទិននឹងគម្រោងអភិវឌ្ឍន៍ និងផ្គត់ផ្គង់អគ្គិសនី

ប្រមុខការទូតកម្ពុជាប្រាប់អ្នករាយការណ៍ពិសេសUNថា ការវាយតម្លៃណាមួយមកលើកម្ពុជា គួរតែចងចាំថា តើចេញពីប្រភពណា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

ក្រសួង​ប្រៃសណីយ៍​ទទួល​បាន​ការ​បញ្ជាទិញ​ឧបករណ៍​តេស្ត​រហ័ស​រហូត​ជាង​២៦​ម៉ឺន​ឧបករណ៍​

និស្សិតបណ្ឌិតសភាយោធាកម្ពុជា ដឹងគុណនិងអរគុណរាជរដ្ឋាភិបាល​ ដែលចេញថ្លៃការសិក្សារហូតដល់ចប់

ឯកអគ្គរដ្ឋទូតវៀតណាម ជំរាបសម្តេចតេជោថា ទំនាក់ទំនងរវាងប្រទេសកម្ពុជា និងវៀតណាម​មានការរីកចម្រើន

មន្រ្តីជំនាញប្រាប់ពីហេតុផល​៣ចំណុច​ពី​ដំណើរ​ការ​ចាក់​វ៉ាក់សាំង​កូវីដ​នៅរាជធានីភ្នំពេញ​លើស​ផែនការ

ព្រឹទ្ធសភា​អនុម័តច្បាប់​ទាក់ទិន​នឹង​គម្រោងអភិវឌ្ឍន៍ និង​ផ្គត់ផ្គង់អគ្គិសនី

ប្រមុខការទូតកម្ពុជាប្រាប់អ្នករាយការណ៍ពិសេសUNថា ការវាយតម្លៃណាមួយមកលើកម្ពុជា គួរតែចងចាំថា តើចេញពីប្រភពណា

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

ក្រសួងប្រៃសណីយ៍ទទួលបានការបញ្ជាទិញឧបករណ៍តេស្តរហ័សរហូតជាង២៦ម៉ឺនឧបករណ៍

និស្សិតបណ្ឌិតសភាយោធាកម្ពុជា ដឹងគុណនិងអរគុណរាជរដ្ឋាភិបាល ដែលចេញថ្លៃការសិក្សារហូតដល់ចប់

ឯកអគ្គរដ្ឋទូតវៀតណាម ជំរាបសម្តេចតេជោថា ទំនាក់ទំនងរវាងប្រទេសកម្ពុជា និងវៀតណាមមានការរីកចម្រើន

មន្រ្តីជំនាញប្រាប់ពីហេតុផល៣ចំណុចពីដំណើរការចាក់វ៉ាក់សាំងកូវីដនៅរាជធានីភ្នំពេញលើសផែនការ

ព្រឹទ្ធសភាអនុម័តច្បាប់ទាក់ទិននឹងគម្រោងអភិវឌ្ឍន៍ និងផ្គត់ផ្គង់អគ្គិសនី