នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
BREAKING NEWS | កម្ពុជា និងថៃឯកភាពឈប់បាញ់គ្នា និងត្រលប់ទៅអនុវត្តបទឈប់បាញ់តាមរយៈការសម្របសម្រួលរបស់ប្រធានាធិបតីអាមេរិក
តម្លៃសេវាអ៊ីនធឺណិតនឹងទាបជាងមុន បន្ទាប់ពីកម្ពុជាតបណ្តាញប្រព័ន្ធអ៊ីនធឺណិតពីហុងកុង
វេទិកានយោបាយអាស៊ី-អឺរ៉ុប ស្នើឱ្យភាគីជម្លោះគោរពចំពោះកិច្ចព្រមព្រៀងសន្តិភាពនានា និង​ធម្មនុញ្ញ UN
ក្រសួងរៀងចំដែនដី នឹងបង្កើតសួនបន្ថែមក្នុងទីក្រុង ឆ្លើយតបនឹងកំណើនពលរដ្ឋក្នុងទីក្រុង

នយោបាយ​ និង ការអភិវឌ្ឍន៍

លោក Biden នឹងមិនលើកលែងទោសឲ្យកូនប្រុសរបស់លោកឡើយ ជុំវិញបទចោទប្រកាន់ទាក់ទងនឹងអាវុធ

2024/06/07 10:54:14 am        231
Facebook Telegram Linkin
បងថ្លៃស្រីរបស់លោក Hunter Biden បានផ្តល់សក្ខីកម្មនៅក្នុងការជម្រះក្តីបទព្រហ្មទណ្ឌរបស់លោកកាលពីថ្ងៃព្រហស្បតិ៍ថា អ្នកស្រី បានរកឃើញសំណល់កូកាអ៊ីន និងកាំភ្លើង នៅក្នុងរថយន្តរបស់លោក ដែលជាសក្តានុពលជំរុញសំណុំរឿងរបស់រដ្ឋអាជ្ញាដែលថាកូនប្រុសរបស់ប្រធានាធិបតី លោក Joe Biden បានបំពានច្បាប់ដែលរារាំងអ្នកប្រើប្រាស់គ្រឿងញៀនមិនឲ្យកាន់កាប់អាវុធ។កាលពីថ្ងៃព្រហស្បតិ៍ ប្រធានាធិបតីសហរដ្ឋអាមេរិក លោក Joe Biden បាននិយាយថា លោកនឹងមិនលើកលែងទោសដល់កូនប្រុសរបស់លោក លោក Hunter ប្រសិនបើត្រូវបានគេរកឃើញថាមានពិរុទ្ធពីបទបំពានច្បាប់ដែលរារាំងអ្នកប្រើប្រាស់គ្រឿងញៀនខុសច្បាប់ មិនឲ្យកាន់កាប់អាវុធ។គណៈវិនិច្ឆ័យក្នុងការជម្រះក្តីបទព្រហ្មទណ្ឌលើកដំបូង លើកូនប្រុសរបស់ប្រធានាធិបតីសហរដ្ឋអាមេរិក បានស្តាប់សក្ខីកម្មនៅសប្តាហ៍នេះ ពីសាក្សីរួមទាំងបងថ្លៃស្រីរបស់លោក អ្នកស្រី Hallie Biden ជាស្ត្រីមេម៉ាយ។ អ្នកស្រី បានប្រាប់គណៈវិនិច្ឆ័យថា អ្នកស្រី បានរកឃើញឧបករណ៍ប្រើប្រាស់គ្រឿងញៀន និងកាំភ្លើងខ្លីមួយដើម ក្នុងពេលសម្អាតរថយន្តរបស់លោក។លោក Hunter Biden បានផ្តល់ចម្លើយពីភាពគ្មានទោសចំពោះបទព្រហ្មទណ្ឌចំនួនបីករណី ដែលចោទប្រកាន់លោកថា ពុំបានបង្ហាញពីការប្រើប្រាស់គ្រឿងញៀនខុសច្បាប់ នៅពេលដែលលោកបានទៅទិញកាំភ្លើងខ្លីក្នុងឆ្នាំ២០១៨ និងបានកាន់កាប់អាវុធដោយខុសច្បាប់។ យោងតាមក្រសួងយុត្តិធម៌សហរដ្ឋអាមេរិកបានឲ្យដឹងថា ប្រសិនបើ លោក Hunter Biden ត្រូវបានកាត់ទោសលើបទចោទប្រកាន់ទាំងអស់ លោកអាចប្រឈមមុខទៅនឹងការជាប់ពន្ធនាគាររហូតដល់២៥ឆ្នាំ។

ឯកអគ្គរដ្ឋទូតអូស្ត្រាលី ប្រចាំអាមេរិក៖ សង្គ្រាមលើកោះតៃវ៉ាន់ នឹងមានផលវិបាកធ្ងន់ធ្ងរដល់ពិភពលោក

2024/06/07 10:50:35 am        190
Facebook Telegram Linkin
ឯកអគ្គរដ្ឋទូតអូស្ត្រាលី ប្រចាំនៅសហរដ្ឋអាមេរិក លោក ខេវីន រ៉ូដ (Kevin Rudd) បានព្រមាននៅក្នុងសុន្ទរកថាមួយថា ផលវិបាកជាសកលនៃសង្រ្គាមលើកោះតៃវ៉ាន់ នឹងខ្លាំងក្លាដូចឥទ្ធិពលនៃសង្គ្រាមលោកលើកទីពីរ ដែលធ្វើឱ្យពិភពលោក «ផ្លាស់ប្ដូរយ៉ាងខ្លាំង»។លោក រ៉ូដ បាននិយាយនៅក្នុងសុន្ទរកថានៅទីក្រុង ហូណូលូលូ (Honolulu) របស់សហរដ្ឋអាមេរិក កាលពីថ្ងៃព្រហស្បតិ៍ (០៦ មិថុនា) ថា ប្រសិនបើប្រធានាធិបតីចិន លោក ស៊ី ជីនពីង (Xi Jinping) ដែលមានវ័យ ៧១ ឆ្នាំក្នុងខែនេះ ចង់សម្រេចបាន «ការបង្រួបបង្រួមជាតិចុងក្រោយ» ជាមួយកោះតៃវ៉ាន់ លោកទំនងជានឹងធ្វើសកម្មភាពក្នុងទសវត្សរ៍ក្រោយនេះ មុនពេលលោកឈានដល់វ័យ ៨០ ឆ្នាំ។ លោក រ៉ូដ បានបន្ថែមថា សកម្មភាពរបស់ចិន បែបណានោះនឹងអាស្រ័យលើការយល់ឃើញរបស់ខ្លួនចំពោះភាពរឹងមាំនៃការរារាំងរបស់សហរដ្ឋអាមេរិក។ចិន អះអាងសិទ្ធិលើកោះស្វ័យគ្រប់គ្រងតាមបែបប្រជាធិបតេយ្យ តៃវ៉ាន់ ថាជាទឹកដីរបស់ខ្លួន ហើយមិនដែលបោះបង់ការប្រើប្រាស់កម្លាំងដើម្បីក្រសោបយកកោះនេះមកក្រោមការគ្រប់គ្រងរបស់ខ្លួនឡើយ។ កោះតៃវ៉ាន់ ជំទាស់យ៉ាងខ្លាំងចំពោះការទាមទារអធិបតេយ្យភាពរបស់ចិន ហើយនិយាយថាមានតែប្រជាជនរបស់កោះនេះទេ ដែលអាចសម្រេចចិត្តអនាគតរបស់ពួកគេបាន។ សហរដ្ឋអាមេរិក បានសម្តែងការព្រួយបារម្ភអំពីសកម្មភាពយោធារបស់ចិន នៅជិតកោះតៃវ៉ាន់ រួមទាំងបន្ទាប់ពីការបោះឆ្នោតជ្រើសរើសមេដឹកនាំរបស់កោះនេះ និងការឡើងកាន់តំណែងរបស់មេដឹកនាំថ្មី លោក ឡៃ ឆឹងទ័រ (Lai Ching-te) កាលពីខែមុន។ ចិន បានព្រមានអាមេរិក ថាមិនគួរលូកដៃចូលក្នុងកិច្ចការរបស់ចិន ជាមួយកោះតៃវ៉ាន់ឡើយ៕

ទីក្រុងប៉េកាំងជំទាស់ ក្រោយលោក Modi អរគុណមេដឹកនាំកោះតៃវ៉ាន់សម្រាប់សារអបអរការបោះឆ្នោត

2024/06/07 10:45:57 am        95
Facebook Telegram Linkin
រដ្ឋាភិបាលក្រុងប៉េកាំងបានតវ៉ាប្រឆាំងនឹងការឆ្លើយតបរបស់លោកនាយករដ្ឋមន្ត្រីឥណ្ឌាទើបជាប់ឆ្នោត Narendra Modi ចំពោះសារអបអរសាទរពីមេដឹកនាំកោះតៃវ៉ាន់លោក វីលៀម ឡៃ ឆឹង-ទ័រ (William Lai Ching-te)និងបានជំរុញឱ្យទីក្រុង New Delhi ប្រុងប្រយ័ត្នចំពោះការឃុបឃិតខាងនយោបាយ របស់ទីក្រុងតៃប៉ិ (Taipei)។ អ្នកនាំពាក្យក្រសួងការបរទេសចិន លោកស្រី ម៉ៅ នីង (Mao Ning) បាននិយាយកាលពីថ្ងៃព្រហស្បតិ៍សប្ដាហ៍នេះថា ទីក្រុងប៉េកាំង បានប្រឆាំងយ៉ាងម៉ឺងម៉ាត់រាល់ទម្រង់នៃការផ្លាស់ប្តូរជាផ្លូវការរវាងអាជ្ញាធរនៅតៃវ៉ាន់ និងប្រទេស ដែលមានទំនាក់ទំនងការទូតជាមួយទីក្រុងប៉េកាំង។ លោកស្រី ម៉ៅ បាននិយាយថា ឥណ្ឌាបានប្តេជ្ញាចិត្តខាងនយោបាយដ៏ឧឡារិកមួយទាក់ទងនឹងគោលនយោបាយចិនតែមួយ ហើយគួរតែដឹង និងប្រុងប្រយ័ត្នប្រឆាំងនឹងការឃុបឃិតខាងនយោបាយដោយភាគីតៃវ៉ាន់។ កាលពីថ្ងៃពុធ សប្ដាហ៍នេះ លោក Lai បានបង្ហោះសារនៅលើបណ្ដាញសង្គម X អបអរសាទរលោក Modi ដែលបានឈ្នះការបោះឆ្នោតអាណត្តិទីបីរបស់លោក។ លោក Lai បាននិយាយថា លោកទន្ទឹងរង់ចាំការជំរុញកិច្ចសហប្រតិបត្តិការរវាងកោះតៃវ៉ាន់ និងឥណ្ឌាលើវិស័យដូចជាសេដ្ឋកិច្ច និងបច្ចេកវិទ្យាជាដើម។ នៅក្នុងការថ្លែងអំណរគុណចំពោះលោក Lai លោក Modi បានឆ្លើយតបថា លោកក៏ទន្ទឹងរង់ចាំ ទំនាក់ទំនងកាន់តែជិតស្និទ្ធដែរ ខណៈយើងធ្វើការឆ្ពោះទៅរកភាពជាដៃគូសេដ្ឋកិច្ច និងបច្ចេកវិទ្យាដែលបានផ្ដល់ផលប្រយោជន៍ឲ្យគ្នាទៅវិញទៅមក៕

ហ្វីលីពីន ចោទឆ្មាំល្បាតឆ្នេរចិន ថាបានរារាំងដល់ការជម្លៀសវេជ្ជសាស្ត្រនៅសមុទ្រចិនខាងត្បូង

2024/06/07 10:42:52 am        104
Facebook Telegram Linkin
ឆ្មាំល្បាតឆ្នេរហ្វីលីពីន នៅថ្ងៃសុក្រ (០៧ មិថុនា) នេះ បានចោទប្រកាន់សមភាគីចិន ថាបានរារាំងកិច្ចខិតខំប្រឹងប្រែងដើម្បីជម្លៀសសមាជិកកងកម្លាំងប្រដាប់អាវុធដែលមានជំងឺ នៅក្នុងសមុទ្រចិនខាងត្បូងដោយហៅការរំខាននោះថាជារឿង «ព្រៃផ្សៃ និងអមនុស្សធម៌»។ឧប្បត្តិហេតុ ដែលហ្វីលីពីននិយាយថាបានកើតឡើងកាលពីខែមុន ពាក់ព័ន្ធនឹងសមាជិកនៃកងម៉ារីនតូចមួយក្រុមដែលបានប្រតិបត្តិការដើម្បីការពារនាវា ប៊ីអាភី សៀរ៉ា ម៉ាដ្រេ (BRP Sierra Madre) ដែលជានាវាហ្វីលីពីន ចូលចតនៅដែនទឹកជម្លោះ សេខិន ថូម៉ាស ស្ហូល (Second Thomas Shoal) ដែលជាទីតាំងនៃការប្រឈមមុខដាក់គ្នាម្តងហើយម្តងទៀតជាមួយចិន កាលពីឆ្នាំមុន។អ្នកនាំពាក្យឆ្មាំល្បាតឆ្នេរហ្វីលីពីន លោក ជេយ តារៀលឡា (Jay Tarriela) បាននិយាយថា ឆ្មាំល្បាតឆ្នេរ និងទូកតូចៗរបស់កងទ័ពជើងទឹកត្រូវបានរំខានដោយនាវាចិន ទោះបីជាបានជូនដំណឹងដល់ពួកគេថា ប្រតិបត្តិការនេះគឺមានលក្ខណៈវេជ្ជសាស្រ្តក៏ដោយ។ ស្ថានទូតចិនប្រចាំហ្វីលីពីន មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។ហ្វីលីពីន និងចិន បានប៉ះទង្គិចគ្នាម្តងហើយម្តងទៀតកាលពីឆ្នាំមុន នៅជិតលក្ខណៈដែនទឹកជម្លោះដែលស្ថិតនៅក្នុងតំបន់សេដ្ឋកិច្ចផ្តាច់មុខរបស់ទីក្រុងម៉ានីល។ ប្រទេសចិន តែងតែចោទប្រកាន់ហ្វីលីពីន ពីការទន្ទ្រានកាន់កាប់ ខណៈដែលទីក្រុងម៉ានីល និងសម្ព័ន្ធមិត្តបានរិះគន់នូវអ្វីដែលពួកគេហៅថាសកម្មភាពអរិភាពរបស់ទីក្រុងប៉េកាំង៕

រុស្ស៊ី និងចិន ជំទាស់នឹងអាមេរិក ជុំវិញសេចក្ដីសម្រេច UN ស្តីពីផែនការឈប់បាញ់ហ្កាហ្សា

2024/06/07 10:35:52 am        140
Facebook Telegram Linkin
រុស្ស៊ី និងចិន ដែលកាន់អំណាចវេតូនៅក្នុងក្រុមប្រឹក្សាសន្តិសុខអង្គការសហប្រជាជាតិ បានលើកឡើងពីការព្រួយបារម្ភរបស់ខ្លួនកាលពីថ្ងៃព្រហស្បតិ៍ (០៦ មិថុនា) ជាមួយនឹងពង្រាងសេចក្ដីសម្រេចរបស់សហរដ្ឋអាមេរិក ដែលនឹងគាំទ្រសំណើមួយ ដែលគូសបញ្ជាក់ដោយលោកប្រធានាធិបតី ចូ បៃដិន (Joe Biden) សម្រាប់បទឈប់បាញ់រវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីនហាម៉ាស។ក្រុមអ្នកការទូតនិយាយថា សមាជិកអារ៉ាប់តែមួយគត់របស់ក្រុមប្រឹក្សានេះ គឺអាល់ហ្សេរី ក៏បានបង្ហាញសញ្ញាថាខ្លួនមិនទាន់ត្រៀមដើម្បីគាំទ្រពង្រាងនេះដែរ។ សេចក្ដីសម្រេចមួយត្រូវការសំឡេងគាំទ្រយ៉ាងតិចប្រាំបួន ហើយគ្មានការវេតូពីសហរដ្ឋអាមេរិក បារាំង អង់គ្លេស ចិន ឬរុស្ស៊ី ដើម្បីអនុម័ត។លោក បៃដិន បានដាក់ចេញនូវផែនការបទឈប់បាញ់បីដំណាក់កាលសម្រាប់តំបន់ហ្កាហ្សា កាលពីមួយសប្តាហ៍មុន ដែលលោកបានពណ៌នាថាជាគំនិតផ្តួចផ្តើមរបស់អ៊ីស្រាអែល ហើយកំពុងស្វែងរកការគាំទ្រពីអន្តរជាតិចំពោះផែនការ ដែលក្រុមហាម៉ាស កំពុងតែសិក្សាមួយនេះ។ ពង្រាងដែលអាមេរិកដាក់ទៅក្រុមប្រឹក្សា UN ស្វាគមន៍សំណើបទឈប់បាញ់ ដោយពិពណ៌នាថាវា «អាចទទួលយកបាន» ចំពោះអ៊ីស្រាអែល ហើយ «អំពាវនាវឱ្យក្រុមហាម៉ាស ទទួលយក និងជំរុញឱ្យភាគីទាំងពីរអនុវត្តលក្ខខណ្ឌរបស់ខ្លួនឱ្យបានពេញលេញដោយមិនពន្យារពេល និងដោយគ្មានលក្ខខណ្ឌ»។ ប៉ុន្តែអ្នកការទូតនិយាយថា សមាជិកក្រុមប្រឹក្សាមួយចំនួនបានចោទជាសំណួរថាតើអ៊ីស្រាអែល ពិតជាបានទទួលយកផែនការនេះដែរឬទេ ហើយចង់ឱ្យក្រុមប្រឹក្សានេះប្រកាន់ខ្ជាប់នូវការទាមទារដែលបានធ្វើឡើងកាលពីខែមីនា ជំនួសវិញ សម្រាប់បទឈប់បាញ់ជាបន្ទាន់ និងការដោះលែងចំណាប់ថ្នូរទាំងអស់ដោយគ្មានលក្ខខណ្ឌ៕

លោក Trump នឹងដាក់ពន្ធលើប្រទេសនានា រួមទាំងចិន ជុំវិញការមិនទប់ស្កាត់អន្តោប្រវេសន៍ខុសច្បាប់

2024/06/07 10:31:09 am        108
Facebook Telegram Linkin
បេក្ខជនប្រធានាធិបតីរបស់គណបក្សសាធារណរដ្ឋ លោក Donald Trump បាននិយាយ កាលពីថ្ងៃព្រហស្បតិ៍ ថា លោកអាចនឹងដាក់ពន្ធលើប្រទេសនានា រួមទាំងប្រទេសចិន ដែលមិនទប់ស្កាត់លំហូរជនអន្តោប្រវេសន៍គ្មានឯកសារមកពីទឹកដីរបស់ពួកគេ ចូលទៅកាន់សហរដ្ឋអាមេរិក ប្រសិនបើលោកទទួលជ័យជម្នះក្នុងការបោះឆ្នោតនៅសហរដ្ឋអាមេរិក ក្នុងខែវិច្ឆិកា។ លោក Trump បាននិយាយដូច្នេះ នៅក្នុងព្រឹត្តិការណ៍មួយនៅរដ្ឋ Arizona ខណៈឆ្លើយតបទៅនឹងសំណួររបស់អ្នកចូលរួម ប៉ុន្តែពុំបានបញ្ជាក់ច្បាស់ពីទំហំនៃពន្ធ ដែលលោកនឹងដាក់ក្នុងសេណារីយ៉ូ បែបណានោះទេ។ នៅពេលត្រូវបានសួរអំពីវិធីដែលលោកនឹងទប់ស្កាត់លំហូរជនអន្តោប្រវេសន៍ឆ្លងកាត់ចូលទៅក្នុងសហរដ្ឋអាមេរិកដោយខុសច្បាប់ លោក Trump បាននិយាយថា យើងមានអំណាចសេដ្ឋកិច្ចយ៉ាងខ្លាំង។ លោក Trump និយាយថា ប្រសិនបើប្រទេសមួយ ដូចជាប្រទេសចិន មិនជួយទប់ស្កាត់លំហូរជនអន្តោប្រវេសន៍ចូលទៅក្នុងសហរដ្ឋអាមេរិក យើងមានរឿងរ៉ាវទាំងនេះដែលហៅថា ការដាក់ពន្ធ។ លោក Trump បានព្រមានថា ប្រសិនបើប្រទេសផ្សេងៗ មិនជួយកាត់បន្ថយការធ្វើអន្តោប្រវេសន៍នោះទេ លោកអាចនឹងដាក់ពន្ធ ប្រសិនបើលោកជាប់ឆ្នោតជាថ្មី។ សន្តិសុខនៅព្រំដែន និងបញ្ហាអន្តោប្រវេសន៍ បានលេចចេញជាបញ្ហាចម្បង សម្រាប់ប្រជាជនអាមេរិក នៅក្នុងការបោះឆ្នោតនៅថ្ងៃទី ៥ ខែវិច្ឆិកាខាងមុខ ដែលលោក Trump នឹងប្រឈមមុខជាមួយប្រធានាធិបតីសហរដ្ឋអាមេរិក លោក Joe Biden មកពីគណបក្សប្រជាធិបតេយ្យ នៅក្នុងការប្រជែងឡើងវិញ នៃការដណ្តើមយកសេតវិមាន បន្ទាប់ពីការបោះឆ្នោតឆ្នាំ២០២០។ វាគឺជាព្រឹត្តិការណ៍យុទ្ធនាការលើកដំបូងរបស់លោក Trump ចាប់តាំងពីគណៈវិនិច្ឆ័យនៅទីក្រុង Manhattan កាលពីថ្ងៃទី៣០ ខែឧសភា បានរកឃើញថាលោកមានទោសលើបទចោទប្រកាន់ចំនួន៣៤ករណី ដែលលោកបានប្រឈមមុខទៅនឹងការក្លែងបន្លំកំណត់ត្រាអាជីវកម្មដើម្បីបិទបាំងការបង់ប្រាក់ចំនួន ១៣០.០០០ដុល្លារ ដែលអតីតមេធាវីរបស់លោក គឺលោក Michael Cohen បានបង់ទៅឱ្យតារាភាពយន្តអាសអាភាស នាង Stormy Daniels មុនពេលការបោះឆ្នោតឆ្នាំ២០១៦ ដើម្បីឲ្យរក្សាភាពស្ងៀមស្ងាត់របស់នាង ជុំវិញការជួបទំនាក់ទំនងផ្លូវភេទដែលនាងបាននិយាយថា មានជាមួយលោក trump។ លោក Trump បានបដិសេធរាល់ការប្រព្រឹត្តខុសទាំងអស់ ហើយបានប្តេជ្ញាប្តឹងឧទ្ធរណ៍ចំពោះសាលក្រមនេះ។ លោក Biden បានចេញក្រិតមួយ កាលពីថ្ងៃអង្គារ ដែលបង្កើតបម្រាមសិទ្ធិជ្រកកោនយ៉ាងទូលំទូលាយ លើជនអន្តោប្រវេសន៍ ដែលត្រូវចាប់ខ្លួនខណៈឆ្លងកាត់ព្រំដែនអាមេរិក-ម៉ិកស៊ិក ដោយខុសច្បាប់។

សម្តេចធិបតី៖ ការជឿនលឿននូវបច្ចេកវិទ្យាបានផ្លាស់ប្តូរនូវមូលដ្ឋានឧស្សាហកម្ម និងទិដ្ឋភាពសង្គម

2024/06/07 09:33:23 am        110
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា វិទ្យាសាស្រ្ត និងបច្ចេកវិទ្យាគឺជានិច្ចកាលជាសរសរស្តម្ភដ៏សំខាន់ដែលទ្រទ្រង់វឌ្ឍនៈភាពរបស់មនុស្សជាតិ ហើយការជឿនលឿននូវបច្ចេកវិទ្យានេះ បានផ្លាស់ប្តូរនូវមូលដ្ឋានឧស្សាហកម្ម និងទិដ្ឋភាពសង្គមផងដែរ។ថ្លែងក្នុងឱកាសអញ្ជើញជាអធិបតីភាពបើកកិច្ចប្រជុំរដ្ឋមន្រ្តីអាស៊ានផ្នែកវិទ្យាសាស្រ្ត បច្ចេកវិទ្យា និងនវានុវត្តន៍លើកទី២០ នៅខេត្តសៀមរាប នាថ្ងៃទី៧ ខែមិថុនា ឆ្នាំ២០២៤នេះ សម្តេចធិបតី ហ៊ុន ម៉ាណែត បានបញ្ជាក់ថា វិទ្យាសាស្រ្តបច្ចេកវិទ្យានេះ បានជួយផ្តល់ដំណោះស្រាយផ្សេងៗ បាន​ជួយឲ្យជីវិត របស់មនុស្សរស់នៅកាន់តែប្រសើរ ងាយស្រួលជាងមុន និងថែមទាំងជួយពង្រឹង​វិសាលភាពរបស់មនុស្សជាតិឲ្យកាន់តែល្អប្រសើរផងដែរ។នៅក្នុងឱកាសនោះដែរ សម្តេចធិបតី នាយករដ្ឋមន្រ្តីក៏បានលើកឡើងផងងដែរថា បច្ចេកវិទ្យា និងវិទ្យាសាស្រ្តបន្ត​វិវត្តន៍​ក្នុងល្បឿនយ៉ាងលឿន ហើយវាមានភាពចាំបាច់ដែលពិភពលោក​ត្រូវការ​ប្រើប្រាស់ និងត្រួតពិនិត្យឲ្យបានម៉ត់ចត់លើបច្ចេកវិទ្យាដែលកំពុងលេចឡើងថ្មី ដែលវាអាច​មានលទ្ធភាព និង​ឥទ្ធិពល​កែប្រែពិភពលោក​ និងតម្រង់​ទិសវឌ្ឍនៈភាពនៃបច្ចេកវិទ្យា ដើម្បីឲ្យវាអាច​បម្រើគាំទ្រដល់បរិយាបន្ន និងភាពនៃការអភិវឌ្ឍប្រកបដោយចីរភាព និងភាពធនជាដើម។ សម្តេចធិបតី បានបន្ថែមទៀតថា​ ការជួបជុំគ្នានាឱកាសនេះ គឺជាឱកាសមួយរួមគ្នា​សិក្សាឈ្វេងយល់​ពីប្រធានបទសំខាន់ៗ ​ពោលគឺការប្រើប្រាស់បញ្ញាសិប្បនិមិត្តដំណើរទៅអនាគត៕អត្ថបទបាន ចក់

យន្តហោះចម្បាំង NATO ហ្វឹកហាត់ក្នុងការប្រកួតមិត្តភាពនៅលើមូលដ្ឋានទ័ពអាកាសអាមេរិក Ramstein នៅអាល្លឺម៉ង់

2024/06/07 09:21:55 am        184
Facebook Telegram Linkin
យន្តហោះចម្បាំង មកពីបណ្តាប្រទេសរបស់សម្ព័ន្ធយោធាណាតូ បានចូលរួមក្នុងសមយុទ្ធនៅលើមូលដ្ឋានទ័ពអាកាសរបស់សហរដ្ឋអាមេរិក Ramstein នៅភាគខាងត្បូងប្រទេសអាល្លឺម៉ង់ កាលពីថ្ងៃព្រហស្បតិ៍។រដ្ឋនៃសម្ព័ន្ធយោធាណាតូ បាននិយាយថា យន្តហោះចម្បាំងជំនាន់ទី៤ និងទី៥ បានហ្វឹកហាត់ក្នុងការប្រកួតជាមិត្តភាពនៅក្នុងការបង្ហាញមួយដែលប្រធានអង្គភាពនៅមូលដ្ឋាន Ramstein របស់អាល្លឺម៉ង់ បាននិយាយថា សមាជិកយានិក និងយន្តហោះចម្បាំង ដែលពាក់ព័ន្ធ ត្រូវបានបណ្តុះបណ្តាលយ៉ាងល្អ និងត្រៀមជាស្រេច ដើម្បីការពារពួកយើង។វរសេនីយ៍ឯក មីឈែល ត្រៅធឺម៉ាន(Michael Trautermann) នៃកងកម្លាំងប្រដាប់អាវុធអាល្លឺម៉ង់ បាននិយាយថា គោលបំណងនៃការបណ្តុះបណ្តាល គឺដើម្បីឱ្យមានការប្រយុទ្ធតាមអាកាសនៅក្នុងលំហដែលត្រូវបានកំណត់ ដោយមានគោលបំណងបាញ់ទម្លាក់យន្តហោះផ្សេងទៀតនៅក្នុងសេណារីយ៉ូ ដែលលោកហៅថា សិល្បៈដ៏ល្អនៅពេលដែលចូលក្នុងការប្រយុទ្ធតាមអាកាស។លោក Trautermann បាននិយាយថា សមយុទ្ធកាលពីថ្ងៃព្រហស្បតិ៍នៅមូលដ្ឋាន Ramstein ពុំមែនជាផ្នែកមួយនៃការហ្វឹកហ្វឺនជាប្រចាំនោះទេ ចាប់តាំងពីចុងបញ្ចប់នៃសង្គ្រាមត្រជាក់មក។

វិមានក្រឹមឡាំងបន្ថែមការព្រមានលើលោកខាងលិច ជុំវិញការផ្តល់អាវុធរយៈចម្ងាយឆ្ងាយដល់អ៊ុយក្រែន ក្រោយការគំរាមពីលោកPutin

2024/06/07 09:17:58 am        177
Facebook Telegram Linkin
វិមានក្រឹមឡាំងបាននិយាយកាលពីថ្ងៃព្រហស្បតិ៍ទី៦មិថុនាសប្ដាហ៍នេះ ថាប្រទេសលោកខាងលិចដែលផ្គត់ផ្គង់អាវុធដល់អ៊ុយក្រែនដើម្បីវាយប្រហារចូលទៅជ្រៅក្នុងទឹកដីរុស្ស៊ី នឹងត្រូវជម្រះបញ្ជីជាមួយរុស្ស៊ី បន្ទាប់ពីលោកប្រធានាធិបតី Vladimir Putin លើកឡើងថាលោកកំពុងពិចារណាផ្តល់អាវុធដល់សត្រូវរបស់លោកខាងលិច ជាការសងសឹក។ អ្នកនាំពាក្យវិមានក្រឹមឡាំង លោក Dmitry Peskov បានប្រាប់ទូរទស្សន៍រដ្ឋ ថាលោក ជឿថា ការព្រមានរប់លោក Putin បានលិចលឺទៅដល់លោកខាងលិចមិនខាន ជាទីដែល លោកជឿថា ប្រទេសទាំងនោះបានស្វែងយល់រួចទៅហើយ។ ថ្លែងជាមួយនិពន្ធនាយកជាន់ខ្ពស់នៃទីភ្នាក់ងារសារព័ត៌មានអន្តរជាតិនៅទីក្រុង សេន ភីធ័រស្បើក (St Petersburg) កាលពីថ្ងៃពុធសប្ដាហ៍នេះ មេដឹកនាំរុស្ស៊ី រូបនេះ បាននិយាយថា ទីក្រុងមូស្គូកំពុងគិតអំពីការផ្តល់អាវុធរយៈចម្ងាយឆ្ងាយ ស្រដៀងគ្នាទៅនឹងអ្វីដែលលោកខាងលិចកំពុងផ្តល់ឲ្យអ៊ុយក្រែន ដល់សត្រូវរបស់លោកខាងលិចជុំវិញពិភពលោក។ នៅក្នុងការអត្ថាធិប្បាយរបស់លោក លោក Putin បានលើកឡើងពីមីស៊ីលរយៈចម្ងាយឆ្ងាយដែលត្រូវបានផ្គត់ផ្គង់ដល់អ៊ុយក្រែនដោយសហរដ្ឋអាមេរិក និងអង់គ្លេស។ ការអត្ថាធិប្បាយរបស់លោក បានលើកឡើងថា លោកអាចផ្គត់ផ្គង់អាវុធដល់ក្រុមប្រឆាំង សហរដ្ឋអាមេរិក ដូចជាកងជីវពលគាំទ្រដោយអ៊ីរ៉ង់នៅក្នុងប្រទេសអ៊ីរ៉ាក់ និងស៊ីរី ដែលបានបាញ់គ្រាប់រ៉ូកែត និងយានដ្រូន ជាប្រចាំទៅកាន់កងទ័ពសហរដ្ឋអាមេរិក៕

ប្រទេសបារាំង នឹងផ្តល់យន្តហោះចម្បាំង រួមនិងការហ្វឹកហ្វឺនដល់អ៊ុយក្រែន

2024/06/07 08:49:50 am        156
Facebook Telegram Linkin
ប្រធានាធិបតីបារាំង លោក អ៊ីម៉ានុយអែល ម៉ាក្រុង (Emmanuel Macron) បានប្រកាសផែនការមួយនៅក្នុងបទសម្ភាសន៍ជាមួយស្ថានីយទូរទស្សន៍ក្នុងស្រុកមួយកាលពីថ្ងៃព្រហស្បតិ៍ (០៦ មិថុនា) ដែលផ្តល់ឱ្យអ៊ុយក្រែននូវយន្តហោះចម្បាំងប្រភេទ ម៉ាយរ៉េច ២០០០ (Mirage 2000) ជាមួយនិងការបណ្តុះបណ្តាលបើកយន្តហោះនោះផងដែរ។ លោក ម៉ាក្រុង បាននិយាយថា អ្នកបើកយន្តហោះអ៊ុយក្រែន នឹងត្រូវហ្វឹកហាត់នៅប្រទេសបារាំង នៅដើមរដូវក្តៅនេះ។យន្តហោះចម្បាំងប្រភេទ ម៉ាយរ៉េច ២០០០ ដែលផលិតដោយបារាំង ត្រូវបានគេចាត់ទុកថាជាយន្តហោះចម្បាំងជំនាន់ទី៤ ដែលស្រដៀងនឹងយន្តហោះ F-16 ។ ក្រុមអ្នកផលិតរបស់បារាំងនិយាយថា យន្តហោះចំនួន ៦០០ គ្រឿងត្រូវបានផលិតឡើង ដោយខ្លះត្រូវបាននាំចេញទៅកាន់កោះតៃវ៉ាន់ ឥណ្ឌា និងកន្លែងផ្សេងទៀត។បារាំង រួមជាមួយប្រទេសមួយចំនួនទៀត បានបង្ហាញការគាំទ្រសម្រាប់ការពង្រឹងសមត្ថភាពទ័ពអាកាសរបស់អ៊ុយក្រែន។ ប្រទេសជាច្រើនរួមទាំងហូឡង់ និងដាណឺម៉ាក បានប្រកាសផែនការផ្តល់យន្តហោះចម្បាំង F-16 ខណៈដែលស៊ុយអែត បានសន្យាផ្ដល់យន្តហោះឃ្លាំមើលឈ្លបយកការណ៍ និងប្រព័ន្ធគ្រប់គ្រងលើដែនអាកាស។ប្រធានាធិបតីបារាំងរូបនេះក៏បានស្នើឱ្យមានការបណ្តុះបណ្តាលទាហានអ៊ុយក្រែន ចំនួន ៤.៥០០ នាក់ផងដែរដើម្បីបង្កើតកងពលតូចថ្មី ប៉ុន្តែលោកមិនបានផ្តល់ព័ត៌មានលម្អិតដូចជាថា តើគ្រូបង្វឹកទាហានជនជាតិបារាំង នឹងត្រូវបញ្ជូនទៅអ៊ុយក្រែន ឬយ៉ាងណានោះទេ។ លោក ម៉ាក្រុង និយាយថា លោកនឹងប្រកាសពីភាពជាក់លាក់នៃជំនួយថ្មីនៅថ្ងៃសុក្រ (០៧ មិថុនា) នេះ នៅពេលដែលលោកជួបជាមួយប្រធានាធិបតីអ៊ុយក្រែន លោក វ្ល៉ូឌីមី ហ្ស៊េឡិនស្គី (Volodymyr Zelenskyy)៕

បណ្ដាញសង្គម

ព័ត៌មានថ្មីៗ

មន្រ្តីអាមេរិក៖ អ៊ុយក្រែន អាចនឹងទទួលបានការធានាសន្តិសុខដូចអង្គការណាតូ ក្នុងកិច្ចព្រមព្រៀងសន្តិភាព
12/16/2025 10:12 AM
Facebook Telegram Linkin
បេឡារុស នឹងស្វាគមន៍មេដឹកនាំវ៉េណេស៊ុយអេឡា លោក Maduro ប្រសិនបើលោកចុះពីតំណែង
12/16/2025 10:12 AM
Facebook Telegram Linkin
អនាគតការងារនៅកម្ពុជា ដោយផ្អែកលើជំនាញ មុខរបរនិងការងារ និងការគាំពារសង្គម សំដៅបង្កើតទីផ្សារការងារដែលមានភាពធន់ ត្រូវបានកំណត់ជាប្រធានបទ នៃសន្និសីទថ្នាក់ជាតិ ស្តីពីសេដ្ឋកិច្ចការងារ ឆ្នាំ២០២៥
12/16/2025 09:12 AM
Facebook Telegram Linkin
អ៊ីស្រាអែល ស្តីបន្ទោសរដ្ឋាភិបាលអូស្ត្រាលីចំពោះការវាយប្រហារសម្លាប់មនុស្ស១៥នាក់អំឡុងបុណ្យសាសនា
12/16/2025 09:12 AM
Facebook Telegram Linkin
ឯកឧត្តម ជ្រុន ថេរ៉ាវ៉ាត បន្តទទួលអំណោយពីសប្បុរសជនដើម្បីឧបត្ថម្ភគាំទ្រដល់វីរកងទ័ពជួរមុខ និង​ជួយដល់ជនភៀសសឹក
12/16/2025 09:12 AM
Facebook Telegram Linkin
ថ្ងៃនេះ ទាហានឈ្លានពានថៃបាញ់កំាំភ្លើងធំចេញពីនាវាចម្បាំងខ្លួន ចូលតំបន់អូរភ្លុកដំរី និងបន្តផ្លោងចូលកម្ពុជាជាច្រើនកន្លែងទៀត
12/16/2025 09:12 AM
Facebook Telegram Linkin
ប្រធានាធិបតី ដូណាល់ ត្រាំ បង្ហាញការប្ដេជ្ញាចិត្តក្នុងការដោះស្រាយសង្រ្គាមកម្ពុជា និងថៃ ខណៈ​បច្ចុប្បន្ន​កំពុងមានមនុស្សស្លាប់ ដែលជារឿងមិនគួរកើតឡើងទេ ហើយលោកបញ្ជាក់ថា​នឹង​ដោះ​ស្រាយ​បញ្ហា​នេះ
12/16/2025 09:12 AM
Facebook Telegram Linkin
តំណាងអចិន្ត្រៃយ៍កម្ពុជាប្រចាំ UN ជម្រាបជូនកិច្ចប្រជុំគណៈកម្មការកសាងសន្តិភាពអង្គការសហប្រជាជាតិ អំពីការឈ្លានពានទ្រង់ទ្រាយធំដោយខុសច្បាប់ ពីសំណាក់កងកម្លាំងថៃ មកលើកម្ពុជា
12/16/2025 08:12 AM
Facebook Telegram Linkin
អាមេរិកស្តីបន្ទោសលោក Netanyahu ចំពោះការរំលោភលើបទឈប់បាញ់នៅហ្កាហ្សា សម្លាប់មេបញ្ជាការយោធាហាម៉ាស
12/16/2025 08:12 AM
Facebook Telegram Linkin
អឺរ៉ុប នឹងបង្កើតគណៈកម្មការអន្តរជាតិសម្រាប់ទាមទារសំណងពីសង្គ្រាមរបស់រុស្ស៊ី ឱ្យអ៊ុយក្រែន
12/16/2025 08:12 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.