នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចអគ្គមហាសេនាបតីតេជោ ហ៊ុន សែន អញ្ជើញដង្ហែព្រះមហាក្សត្រ ក្នុងព្រះរាជពិធីពន្លត់ទៀនជ័យ នៃទិវាបុណ្យឯករាជ្យជាតិ ៩ វិច្ឆិកា ខួបលើកទី៧៣
នាយកប្រតិបត្តិអង្គការ HFHI កោតសរសើរគោលនយោបាយ​អភិវឌ្ឍលំនៅដ្ឋានរបស់កម្ពុជា​
ឯកអគ្គរាជទូតជប៉ុនថ្មី ប្តេជ្ញាបន្តពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែរឹងមាំ និងស៊ីជម្រៅ
សម្ដេចតេជោផ្ដល់អនុសាសន៍ដល់គុនខ្មែរ និងសមាគមខ្មែរនៅជប៉ុនឱ្យខិតខំបន្ថែម ដើម្បីនិរន្តរភាពស្ថាប័ន

នយោបាយ​ និង ការអភិវឌ្ឍន៍

ចិន៖ សមយុទ្ធជុំវិញកោះតៃវ៉ាន់ បានសម្រេចគោលដៅ ប៉ុន្តែក៏នឹងត្រៀមមានសកម្មភាពបន្ថែមទៀត

2024/05/31 04:48:44 pm        109
Facebook Telegram Linkin
អ្នកនាំពាក្យក្រសួងការពារជាតិចិន បាននិយាយកាលពីថ្ងៃព្រហស្បតិ៍ (៣០ ឧសភា) ថា យោធារបស់ប្រទេសចិន បានសម្រេច «គោលដៅរំពឹងទុក» ក្នុងអំឡុងពេលពីរថ្ងៃនៃសមយុទ្ធនៅជុំវិញកោះតៃវ៉ាន់ កាលពីសប្តាហ៍មុន ប៉ុន្តែខ្លួនក៏បានត្រៀមរៀបចំសម្រាប់សកម្មភាពយោធាបន្ថែមទៀតផងដែរ ប្រសិនបើមានការបង្កហេតុ។ប្រទេសចិន ដែលចាត់ទុកកោះស្វ័យគ្រប់គ្រងតាមបែបប្រជាធិបតេយ្យ តៃវ៉ាន់ ថាជាទឹកដីរបស់ខ្លួននោះ បានរៀបចំហ្គេមសង្រ្គាមរយៈពេលពីរថ្ងៃជុំវិញកោះនេះ បន្ទាប់ពីពិធីចូលកាន់តំណែងរបស់មេដឹកនាំថ្មី លោក ឡៃ ឆឹងទ័រ (Lai Ching-te) ដែលទីក្រុងប៉េកាំង ហៅថាជា «ជនផ្ដាច់ខ្លួនដ៏គ្រោះថ្នាក់»។ ការអត្ថាធិប្បាយកាលពីថ្ងៃព្រហស្បតិ៍ នេះបានកើតឡើងប៉ុន្មានម៉ោងបន្ទាប់ពីកោះតៃវ៉ាន់ បានព្រមានថាទីក្រុងប៉េកាំង កំពុងព្យាយាម «លុបបំបាត់» ដែនអាកាសរបស់ខ្លួន និងបង្កើតភាពធម្មតាថ្មីមួយជាមួយនឹងសមយុទ្ធ និងសកម្មភាពផ្សេងទៀតដើម្បីដាក់សម្ពាធលើរដ្ឋបាលថ្មីរបស់លោក ឡៃ។អ្នកនាំពាក្យលោក អ៊ូ ឈាន (Wu Qian) បាននិយាយនៅក្នុងទីក្រុងប៉េកាំង ថា សមយុទ្ធរួមគ្នាដោយកងទ័ពរំដោះប្រជាជនគឺជា »វិធានការដើម្បីទប់ស្កាត់ឯករាជ្យភាព និងសកម្មភាពផ្ដាច់ខ្លួនរបស់តៃវ៉ាន់ដ៏ឈ្លានពាន និងការព្រមានប្រឆាំងនឹងការជ្រៀតជ្រែកពីបរទេស»។ ខណៈពេលដែលសមយុទ្ធបានបញ្ចប់ជាផ្លូវការ សកម្មភាពយោធារបស់ចិនមិនបានបញ្ឈប់នោះទេ ដោយតៃវ៉ាន់ បាននិយាយកាលពីថ្ងៃពុធ ថា យន្តហោះចម្បាំង និងនាវាចម្បាំងរបស់ចិន បានអនុវត្ត «ការល្បាតត្រៀមប្រយុទ្ធរួមគ្នា» នៅក្បែរនោះ៕

សាលក្រមមានទោសរបស់លោក Trump ជំរុញឱ្យមានការគាំទ្រកាន់តែខ្លាំងពីម្ចាស់ជំនួយ

2024/05/31 04:45:47 pm        159
Facebook Telegram Linkin
បណ្ដាម្ចាស់ជំនួយមកពីគណបក្សសាធារណរដ្ឋសំខាន់ៗបាននិយាយកាលពីថ្ងៃព្រហស្បតិ៍ (៣០ ឧសភា) ថា ពួកគេមានឆន្ទៈគាំទ្រអតីតប្រធានាធិបតីអាមេរិក ដែលជាប់ទោសព្រហ្មទណ្ឌដំបូងគេរូបនេះ ឱ្យឈរឈ្មោះជាបេក្ខជនប្រធានាធិបតី ដោយយ៉ាងហោចណាស់ម្ចាស់ជំនួយម្នាក់បានផ្តល់ប្រាក់ដល់លោក ដូណាល់ ត្រាំ (Donald Trump) ជាលើកដំបូង នេះបើយោងតាមអ្នកផ្តល់ជំនួយ និងអ្នករៃអង្គាសប្រាក់ប្រហែលរាប់សិបនាក់។ម្ចាស់ជំនួយអភិរក្សនិយមជាច្រើនបានចាត់ទុកសំណុំរឿងប្រាក់បំបិទមាត់នៅក្រុងញូវយ៉ក (New York) នេះថាជាការធ្វើទុក្ខបុកម្នេញផ្នែកនយោបាយ ដោយបានជំរុញការអះអាងរបស់បេក្ខជនប្រធានាធិបតីមកពីគណបក្សសាធារណរដ្ឋរូបនេះ ដែលថាគណបក្សប្រជាធិបតេយ្យកំពុងព្យាយាមធ្វើឱ្យលោកបាត់បង់ប្រជាប្រិយភាពនៅមុនការបោះឆ្នោតថ្ងៃទី០៥ ខែវិច្ឆិកា ប្រឆាំងនឹងលោកប្រធានាធិបតី ចូ បៃដិន (Joe Biden) ប៉ុន្តែរដ្ឋអាជ្ញាបានច្រានចោលការអះអាងទាំងនោះថាមិនពិត។គណៈវិនិច្ឆ័យនៅទីក្រុងញូវយ៉ក កាលពីថ្ងៃព្រហស្បតិ៍ បានរកឃើញថាលោក ត្រាំ មានទោសពីបទក្លែងបន្លំឯកសារដើម្បីបិទបាំងការបង់ប្រាក់ដើម្បីបំបិទមាត់តារាភាពយន្តអាសអាភាសម្នាក់នៅមុនការបោះឆ្នោតឆ្នាំ២០១៦។ សាលក្រមនេះបានជំរុញម្ចាស់ជំនួយមួយចំនួនឱ្យបង្កើនការគាំទ្រផ្នែកហិរញ្ញវត្ថុរបស់ពួកគេកាន់តែខ្លាំងឡើងសម្រាប់លោក ត្រាំ។បន្ទាប់ពីការកាត់ទោសកាលពីថ្ងៃព្រហស្បតិ៍ លោក ដន ថាភា (Don Tapia) អតីតឯកអគ្គរដ្ឋទូតជំនាន់រដ្ឋបាលលោក ត្រាំ ប្រចាំប្រទេសហ្សាម៉ាអ៊ីក បានប្រាប់សារព័ត៌មានរ៉យទ័រ ថា ក្រុមម្ចាស់ជំនួយមានបំណងផ្តល់ប្រាក់ជាង ១ លានដុល្លារសម្រាប់ការចំណាយដល់ក្រុមគាំទ្រលោក ត្រាំ ឈ្មោះថា ម៉ាហ្កា អាយអែនស៊ី (MAGA Inc) ក្នុងប៉ុន្មានសប្តាហ៍ខាងមុខនេះ។ ម្ចាស់ជំនួយផ្សេងទៀតដែលត្រូវបានសម្ភាសដោយសារព័ត៌មានរ៉យទ័រ ក៏មានការរំពឹងទុកយ៉ាងទូលំទូលាយអំពីជ័យជម្នះលោក ត្រាំ ក្នុងខែវិច្ឆិកា ដោយផ្អែកលើការស្ទង់មតិសាធារណៈមួយចំនួនដែលបង្ហាញថាលោក ត្រាំ នាំមុខលោក បៃដិន នៅក្នុងរដ្ឋសំខាន់ៗមួយចំនួន៕

ប្រតិកម្មពីពិភពនយោបាយអាមេរិក បន្ទាប់ពីលោក Trump មានទោសក្នុងសំណុំរឿងប្រាក់បំបិទមាត់

2024/05/31 04:40:11 pm        135
Facebook Telegram Linkin
ក្រុមអ្នកនយោបាយអាមេរិក បញ្ចេញប្រតិកម្មរបស់ខ្លួនចំពោះសាលក្រមប្រវត្តិសាស្ត្រក្នុងបណ្ដឹងប្រាក់បំបិទមាត់របស់លោក ដូណាល់ ត្រាំ (Donald Trump) បន្ទាប់ពីគណៈវិនិច្ឆ័យនៅទីក្រុងញូវយ៉ក (New York) កាលពីថ្ងៃព្រហស្បតិ៍ (៣០ ឧសភា) បានរកឃើញថាលោក ត្រាំ មានទោសពីបទក្លែងបន្លំកំណត់ត្រាអាជីវកម្មដើម្បីបិទបាំងការបង់ប្រាក់ដល់តារាភាពយន្តអាសអាភាស ដែលធ្វើឱ្យលោកក្លាយជាអតីតប្រធានាធិបតីអាមេរិកដំបូងគេ ដែលត្រូវបានកាត់ទោសពីបទព្រហ្មទណ្ឌ។លោក ត្រាំ បាននិយាយថា «នេះជាភាពអាម៉ាស់ និងជាការកាត់ក្តីដោយចៅក្រមពុករលួយ ហើយយើងនឹងបន្តតស៊ូរហូតដល់ទីបញ្ចប់។ សាលក្រមពិតប្រាកដនឹងធ្វើឡើងនៅថ្ងៃទី០៥ ខែវិច្ឆិកា ដោយប្រជាជន ព្រោះពួកគេដឹងច្បាស់ពីអ្វីដែលបានកើតឡើងនៅទីនេះ»។យុទ្ធនាការរបស់លោកប្រធានាធិបតី ចូ បៃដិន (JOE BIDEN) និងអនុប្រធានាធិបតី លោកស្រី ខាម៉ាឡា ហារីស (KAMALA HARRIS) បានលើកឡើងថា «លោក ត្រាំ តែងយល់ច្រឡំថាខ្លួននឹងមិនប្រឈមមុខនឹងផលវិបាកចំពោះការបំពានច្បាប់ ប៉ុន្តែសាលក្រមថ្ងៃនេះបង្ហាញថាពុំមាននរណាម្នាក់នៅលើច្បាប់នោះទេ»។ ប្រធានសភា លោក ម៉ៃ ចនសុន (MIKE JOHNSON) បាននិយាយថា «ថ្ងៃនេះជាថ្ងៃដ៏អាម៉ាស់ក្នុងប្រវត្តិសាស្ត្រអាមេរិក។ សមាជិកបក្សប្រជាធិបតេយ្យ បានត្រេកអរនៅពេលពួកគេកាត់ទោសមេដឹកនាំបក្សប្រឆាំង លើការចោទប្រកាន់ដ៏គួរឱ្យអស់សំណើច»។បន្ថែមពីលើនេះ អ្នកនយោបាយអាមេរិកជាច្រើនរូបទៀតបានបញ្ចេញប្រតិកម្មរបស់ពួកគេនៅជុំវិញការកាត់ក្ដីនោះ ដោយសមាជិកបក្សសាធារណរដ្ឋនិយាយថា សាលក្រមនេះគឺជាភាពបរាជ័យដ៏អាក្រក់សម្រាប់ជនជាតិអាមេរិក ហើយនេះជាការជ្រៀតជ្រែកក្នុងការបោះឆ្នោត និងការបញ្ឈប់លោក ត្រាំ ពីការឈ្នះឆ្នោតឡើងវិញដ៏ត្រឹមត្រូវ។ចំណែកក្រុមបក្សប្រជាធិបតេយ្យ បានសម្តែងការពេញចិត្ត ដោយនិយាយថា យើងដឹងថា លោក ត្រាំ មានឆន្ទៈធ្វើគ្រប់យ៉ាងដើម្បីការពារផលប្រយោជន៍ផ្ទាល់ខ្លួន រួមទាំងការបំផ្លាញការបោះឆ្នោត។ គ្មាននរណានៅពីលើច្បាប់នោះទេ ហើយយើងរីករាយណាស់ដែលមើលឃើញថា យុត្តិធម៌ពិតជាមានប្រាកដមែន៕

របាយការណ៍៖សមយុទ្ធយោធា កំពុងកើនឡើងនៅអាស៊ី ប៉ុន្តែចិននៅតែបង្កើនការទប់ទល់អាមេរិក និងសម្ព័ន្ធមិត្ត

2024/05/31 04:29:22 pm        144
Facebook Telegram Linkin
ការសិក្សាថ្មីមួយបានរកឃើញថា សហរដ្ឋអាមេរិក និងចិនបានបង្កើនទំហំសមយុទ្ធយោធានៅទូទាំងអាស៊ី ស្របពេលមានភាពតានតឹងក្នុងតំបន់កើនឡើងក្នុងប៉ុន្មានឆ្នាំថ្មីៗនេះ ទោះបីជាសមយុទ្ធរបស់ទីក្រុងប៉េកាំងនៅតែមានទំហំធំ និងភាពស្មុគស្មាញក៏ដោយ ។ នៅក្នុងការវាយតម្លៃនៃសមយុទ្ធយោធានៅក្នុងតំបន់អាស៊ីចន្លោះឆ្នាំ ២០០៣និង២០២២ វិទ្យាស្ថានអន្តរជាតិនៃការសិក្សាយុទ្ធសាស្ត្រដែលមានមូលដ្ឋាននៅទីក្រុងឡុងដ៍្រចក្រភពអង់គ្លេសបាននិយាយថា សមយុទ្ធកំពុងពង្រីកក្នុងអត្រាកើនឡើងដ៏ខ្ពស់ ដែលជំរុញដោយផ្នែក ដោយកិច្ចខិតខំប្រឹងប្រែងរបស់សហរដ្ឋអាមេរិក និងចិន ដើម្បីសាកល្បងសមត្ថភាព និងជំរុញការទូតជាយុទ្ធសាស្ត្រ។ ការសិក្សារបស់វិទ្យាស្ថាន IISS ខាងលើដែលបានចេញផ្សាយនៅថ្ងៃសុក្រទី៣១ខែឧសភា បានធ្វើតារាងលំហាត់សមយុទ្ធរបស់សហរដ្ឋអាមេរិកចំនួន១.១១៣ លើក ដែលចូលរួមជាមួយបណ្តាប្រទេសនៅអាស៊ី ធៀបនឹង សមយុទ្ធចំនួន ១៣០លើក របស់ប្រទេសចិន។ ការសិក្សានេះបានកត់សម្គាល់ថា សហរដ្ឋអាមេរិកនឹងព្យាយាមរក្សាការនាំមុខរបស់ខ្លួនតាមរយៈការធ្វើសមយុទ្ធយោធាជាច្រើនជាមួយបណ្តាប្រទេសក្នុងតំបន់ស្ទើរតែទាំងអស់។ចិននឹងព្យាយាមបង្រួមគម្លាតដោយធ្វើឱ្យទំនាក់ទំនងសមយុទ្ធរបស់ខ្លួនកាន់តែស៊ីជម្រៅជាមួយដៃគូក្នុងតំបន់មួយចំនួនតូច។ កាន់តែទូលំទូលាយថែមទៀត ការដាក់ពង្រាយយោធានៅទូទាំងតំបន់បានកើនឡើងជាច្រើនឆ្នាំ មកនេះ ខណៈមានភាពតានតឹងលើកោះតៃវ៉ាន់ ដែលចិនអះអាងថាជាកម្មសិទ្ធិខ្លួន និងជម្លោះដែនទឹកនៅក្នុងផ្លូវទឹកពាណិជ្ជកម្មដ៏សំខាន់នៃសមុទ្រចិនខាងកើត និងខាងត្បូង។ ចិន កូរ៉េខាងជើង និងរុស្ស៊ី សុទ្ធតែបានត្អូញត្អែរថា ការកើនឡើងនៃសមយុទ្ធរបស់សហរដ្ឋអាមេរិក ដោយមាន និងគ្មានសម្ព័ន្ធមិត្ត កំពុងជំរុញឱ្យមានភាពតានតឹងនៅក្នុងតំបន់ និងបង្កឱ្យមានការរត់ប្រណាំងគ្រឿងសព្វាវុធ៕

សម្ដេចតេជោ ហ៊ុន សែន បើកកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា

2024/05/31 04:01:35 pm        200
Facebook Telegram Linkin
នៅវេលាម៉ោង ៨.៣០នាទីព្រឹក ថ្ងៃសុក្រ ៩ រោច ខែពិសាខ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៣១ ខែឧសភា ឆ្នាំ២០២៤ នេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បាននិងកំពុងអញ្ជើញដឹកនាំកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា នីតិកាលទី៥ ដោយមានរបៀបវារៈដូច ខាងក្រោម៖១- ការពិនិត្យ និងសម្រេចអំពីការបង្កើតក្រុមមិត្តភាពព្រឹទ្ធសភា នៃព្រះរាជាណាចក្រ កម្ពុជា ជាមួយព្រឹទ្ធសភា-រដ្ឋសភា នៃបណ្តាប្រទេសជាមិត្ត។២- ការពិនិត្យ និងសម្រេចអំពីការចាត់តាំងក្រុមសមាជិកព្រឹទ្ធសភានៃព្រះរាជាណាចក្រ កម្ពុជា ដែលទទួលបន្ទុកសហប្រតិបត្តិការជាមួយអង្គការអន្តរសភា។៣- ការពិនិត្យ និងសម្រេចអំពីការចាត់តាំងក្រុមសមាជិកព្រឹទ្ធសភានៃព្រះរាជាណាចក កម្ពុជា សម្រាប់ត្រៀមសហការនិងចូលរួមជាមួយរដ្ឋសភាក្នុងកិច្ចប្រជុំនៃអង្គការអន្តរសភា។៤- បញ្ហាផ្សេងៗ៕

ក្រុមហាម៉ាស ត្រៀមខ្លួនរួចរាល់សម្រាប់កិច្ចព្រមព្រៀងពេញលេញ បើអ៊ីស្រាអែល បញ្ឈប់សង្គ្រាម

2024/05/31 03:56:50 pm        159
Facebook Telegram Linkin
ក្រុមហាម៉ាស បាននិយាយកាលពីថ្ងៃព្រហស្បតិ៍ (៣០ ឧសភា) ថា ខ្លួនបានប្រាប់អ្នកសម្រុះសម្រួលថាក្រុមនេះនឹងមិនចូលរួមក្នុងការចរចាបន្ថែមទៀតទេក្នុងអំឡុងពេលការឈ្លានពានដែលកំពុងបន្ត ប៉ុន្តែបានត្រៀមខ្លួនរួចជាស្រេចសម្រាប់ «កិច្ចព្រមព្រៀងពេញលេញមួយ» រួមទាំងការផ្លាស់ប្តូរចំណាប់ថ្នូរ និងអ្នកទោស ប្រសិនបើអ៊ីស្រាអែល បញ្ឈប់សង្គ្រាម។កិច្ចពិភាក្សា ដែលសម្របសម្រួលដោយប្រទេសអេហ្ស៊ីប និងកាតា ដើម្បីរៀបចំបទឈប់បាញ់រវាងអ៊ីស្រាអែល និងចលនាអ៊ីស្លាមនិយមមួយនេះនៅក្នុងសង្គ្រាមហ្កាហ្សា បានជាប់គាំងម្តងហើយម្តងទៀត ដោយភាគីទាំងពីរបានបន្ទោសគ្នាទៅវិញទៅមកចំពោះដំណើរការដ៏យឺតយ៉ាវនេះ។សេចក្តីថ្លែងការណ៍ចុងក្រោយរបស់ក្រុមហាម៉ាស នេះបានកើតឡើងនៅពេលដែលអ៊ីស្រាអែល បានបន្តការវាយលុកលើទីក្រុងរ៉ាហ្វា (Rafah) ភាគខាងត្បូងនៃតំបន់ហ្កាហ្សា ទោះបីជាមានដីកាពីតុលាការយុត្តិធម៌អន្តរជាតិ (ICJ) ដែលជាតុលាការកំពូលរបស់អង្គការសហប្រជាជាតិ ឱ្យបញ្ឈប់ការវាយប្រហារនេះក៏ដោយ។ សេចក្តីថ្លែងការណ៍នោះបាននិយាយថា «យើងបានជូនដំណឹងដល់អ្នកសម្រុះសម្រួលអំពីជំហររបស់យើងថា បើអ៊ីស្រាអែលបញ្ឈប់សង្គ្រាម នោះយើងត្រៀមខ្លួនដើម្បីសម្រេចបាននូវកិច្ចព្រមព្រៀងពេញលេញ ដែលរួមបញ្ចូលទាំងកិច្ចព្រមព្រៀងផ្លាស់ប្តូរដ៏ទូលំទូលាយមួយ»។ អ៊ីស្រាអែល បានច្រានចោលការផ្តល់ជូនរបស់ក្រុមហាម៉ាស កន្លងមកថាមិនគ្រប់គ្រាន់ និងបាននិយាយថាខ្លួនប្តេជ្ញាថានឹងលុបបំបាត់ក្រុមដែលប្រកាន់យកការបំផ្លិចបំផ្លាញមួយនេះ៕

កងទ័ពជើងទឹកអាហ្សង់ទីន និងអាមេរិក ធ្វើសមយុទ្ធយោធារួមគ្នា ក្នុងការបង្ហាញភាពជាសម្ព័ន្ធមិត្ត

2024/05/31 03:50:25 pm        152
Facebook Telegram Linkin
ប្រទេសអាហ្សង់ទីន និងសហរដ្ឋអាមេរិក បានធ្វើសមយុទ្ធកងទ័ពជើងទឹកនៅឆ្នេរសមុទ្រភាគខាងត្បូងរបស់ប្រទេសអាហ្សង់ទីន កាលពីថ្ងៃព្រហស្បតិ៍ នៅក្នុងសញ្ញាថ្មីមួយនៃទំនាក់ទំនងជិតស្និទ្ធ ដែលរដ្ឋាភិបាលសេរីនិយមជ្រុល របស់លោក ចាវីយឺ មីឡេ(Javier Milei) កំពុងស្វែងរកការបង្កើតទំនាក់ទំនងនេះជាមួយសហរដ្ឋអាមេរិក។នាវាផ្ទុកយន្តហោះដើរដោយថាមពលនុយក្លេអ៊ែរ USS George Washington របស់សហរដ្ឋអាមេរិក បានចូលរួមក្នុងសមយុទ្ធនេះ រួមជាមួយនាវា នាវាពិឃាត និងឧទ្ធម្ភាគចក្រ របស់ប្រទេសអាហ្សង់ទីន ដែលធ្វើឡើងនៅចម្ងាយ៣០០គីឡូម៉ែត្រ ពីទីក្រុងរមណីយដ្ឋាន Mar del Plata ។មេបញ្ជាការ លោក អាឡិចស៊ីស វ៉កឃឺ(Alexis Walker) បាននិយាយក្នុងអំឡុងពេលបណ្តុះបណ្តាលដែលមានការចូលរួមពីរដ្ឋមន្ត្រីប្រទេសអាហ្សង់ទីនពីររូប និងឯកអគ្គរដ្ឋទូតសហរដ្ឋអាមេរិក លោក ម៉ាក ស្ទេនលី(Marc Stanley) ថា ការធ្វើសមយុទ្ធនេះ គឺដើម្បីបង្ហាញពីមិត្តភាពរបស់យើង សម្ព័ន្ធមិត្ត និងភាពជាដៃគូរបស់យើង ព្រមទាំងការពិតដែលថាយើងគាំទ្រសម្ព័ន្ធមិត្ត នៅទូទាំងពិភពលោក។បន្ទាប់ពីចូលកាន់តំណែងកាលពីខែធ្នូ លោក ចាវីយឺ មីឡេ(Javier Milei) បានប្រកាសខ្លួនឯងថាជាសម្ព័ន្ធមិត្តសកល របស់ប្រទេសខាងលិច ជាពិសេសជាមួយសហរដ្ឋអាមេរិក។

ចិន រិះគន់ សហរដ្ឋអាមេរិក ចំពោះការដាក់ពង្រាយប្រព័ន្ធមីស៊ីលរយៈចម្ងាយមធ្យម នៅហ្វីលីពីន

2024/05/31 03:46:34 pm        202
Facebook Telegram Linkin
អ្នកនាំពាក្យក្រសួងការពារជាតិចិន កាលពីថ្ងៃព្រហស្បតិ៍ទី៣០ ឧសភា សប្ដាហ៍នេះបានរិះគន់ ការដាក់ពង្រាយប្រព័ន្ធមីស៊ីលរយៈចម្ងាយមធ្យមដោយសហរដ្ឋអាមេរិក នៅក្នុងប្រទេសហ្វីលីពីន ដោយនិយាយថា ទង្វើរបស់ប្រទេសទាំងពីរ បានធ្វើឱ្យតំបន់អាស៊ីប៉ាស៊ីហ្វិកទាំងមូល ស្ថិតនៅក្រោមការគំរាមកំហែងដោយសារតែអាវុធរបស់សហរដ្ឋអាមេរិក។ អ្នកនាំពាក្យលោក វូ ជៀន (Wu Qian) បានឆ្លើយតបទៅនឹងសំណួរប្រព័ន្ធផ្សព្វផ្សាយទាក់ទងនឹងការដាក់ពង្រាយប្រព័ន្ធមីស៊ីល ថៃហ្វុន មីដ រ៉េង កាផាប៊ីលីរី (Typhon Mid-Range Capability) របស់សហរដ្ឋអាមេរិក នៅក្នុងប្រទេសហ្វីលីពីន ក្រោមលេសសមយុទ្ធយោធា ថា ភាគីចិនមានការប្រុងប្រយ័ត្នខ្ពស់ និងប្រឆាំងយ៉ាងម៉ឺងម៉ាត់ចំពោះសកម្មភាពនេះ។លោក វូ បានធ្វើសេចក្ដីអត្ថាធិប្បាយថា នេះគឺជាលើកទីមួយហើយ ដែលសហរដ្ឋអាមេរិកបានដាក់ពង្រាយប្រព័ន្ធមីស៊ីលរយៈចម្ងាយមធ្យមនៅក្រៅប្រទេស និងក្នុងតំបន់អាស៊ី-ប៉ាស៊ីហ្វិក ចាប់តាំងពីការបញ្ចប់សង្គ្រាមត្រជាក់មក។អ្វីដែលអាមេរិក និងហ្វីលីពីន បានធ្វើបានបង្កឱ្យមានហានិភ័យនៃសង្គ្រាមយ៉ាងខ្លាំង ហើយនឹងប៉ះពាល់យ៉ាងធ្ងន់ធ្ងរដល់ស្ថាបត្យកម្មសន្តិសុខ និងបំផ្លាញសន្តិភាព និងស្ថិរភាពក្នុងតំបន់។ដោយការគូសបញ្ជាក់ ថា ប្រព័ន្ធមីស៊ីលរយៈចម្ងាយមធ្យមនេះ គឺជាអាវុធយុទ្ធសាស្ត្រ និងវាយលុកបានធ្វើឲ្យគេនឹកឃើញដល់សង្គ្រាមត្រជាក់ ។លោកនិយាយថា សហរដ្ឋអាមេរិកព្យាយាមបង្វិលកង់ប្រវត្តិសាស្ត្រ រុញឲ្យមានការប្រឈមដាក់គ្នា ពង្រឹងសម្ព័ន្ធភាពយោធា និងបិទផ្លូវលំហសន្តិសុខរបស់ប្រទេសផ្សេងៗ។ លោកបានបន្ថែមថា ចេតនានេះ នឹងបំបែកសមតុល្យយុទ្ធសាស្ត្រនៅក្នុងតំបន់ និងដុតបញ្ឆេះភាពតានតឹងថ្មី ៕

ប្រភព៖ លោក Biden បានអនុញ្ញាតដោយសម្ងាត់ក្នុងការឱ្យអ៊ុយក្រែន វាយប្រហារចូលក្នុងរុស្ស៊ី

2024/05/31 03:28:12 pm        279
Facebook Telegram Linkin
សារព័ត៌មាន ផូលីធីកខូ (Politico) បានរាយការណ៍កាលពីថ្ងៃព្រហស្បតិ៍ (៣០ ឧសភា) ដោយដកស្រង់សម្តីមន្ត្រីអាមេរិកម្នាក់ និងប្រភពចំនួនពីរផ្សេងទៀត ដែលដឹងពីផែនការនេះថា ប្រធានាធិបតីសហរដ្ឋអាមេរិក លោក ចូ បៃដិន (Joe Biden) បានផ្តល់ឱ្យដោយសម្ងាត់នូវការអនុញ្ញាតឱ្យអ៊ុយក្រែន ធ្វើការវាយប្រហារនៅក្នុងប្រទេសរុស្ស៊ី នៅជិតតំបន់ ខាគីវ (Kharkiv) ដោយប្រើប្រាស់អាវុធរបស់សហរដ្ឋអាមេរិក។សារព័ត៌មាននេះបានរាយការណ៍ដោយដកស្រង់សម្តីមន្ត្រីអាមេរិកម្នាក់ថា «ថ្មីៗនេះលោកប្រធានាធិបតីបានបញ្ជាក្រុមរបស់លោកឱ្យធានាថា អ៊ុយក្រែន អាចប្រើប្រាស់អាវុធរបស់សហរដ្ឋអាមេរិក សម្រាប់គោលបំណងប្រឆាំងការបាញ់ប្រហារនៅទីក្រុង ខាគីវ ដូច្នេះអ៊ុយក្រែន អាចវាយបកវិញលើកងកម្លាំងរុស្ស៊ី ដែលវាយពួកគេ ឬត្រៀមខ្លួនវាយពួកគេ»។ ដោយបន្ថែមថា គោលនយោបាយនៃការអនុញ្ញាតឱ្យមានការវាយប្រហាររយៈចម្ងាយឆ្ងាយនៅក្នុងប្រទេសរុស្ស៊ី «មិនបានផ្លាស់ប្តូរទេ» ប៉ុន្តែសារព័ត៌មាននេះមិនបាននិយាយថាតើលោក បៃដិន ផ្តល់ការអនុញ្ញាតនោះនៅពេលណាទេ។ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានព្រមានពីជម្លោះសកល បើសម្ព័ន្ធមិត្តលោកខាងលិចរបស់ទីក្រុងគីវ អនុញ្ញាតឱ្យប្រើប្រាស់អាវុធដែលពួកគេបានផ្គត់ផ្គង់ដើម្បីវាយប្រហារនៅក្នុងរុស្ស៊ី ដោយនោះជាអ្វីដែលរដ្ឋាភិបាលអ៊ុយក្រែន កំពុងជំរុញឱ្យដៃគូខ្លួនអនុញ្ញាត។អាមេរិក បាននិយាយថា ខ្លួនមិនបានលើកទឹកចិត្ត ឬបើកដៃឱ្យប្រើប្រាស់អាវុធរបស់អាមេរិក សម្រាប់ការវាយប្រហារដោយផ្ទាល់លើរុស្ស៊ីទេ ប៉ុន្តែរដ្ឋមន្ត្រីការបរទេស លោក អង់តូនី ប្លីងខិន (Antony Blinken) បាននិយាយនៅពេលត្រូវសាកសួរអំពីជំហរបច្ចុប្បន្នរបស់ទីក្រុងវ៉ាស៊ីនតោន លើបញ្ហានេះកាលពីថ្ងៃពុធថា គោលការណ៍នោះនឹងត្រូវ «កែសម្រួល និងសម្រប» តាមស្ថានភាពបច្ចុប្បន្ន៕

[UPDATE] លោក Donald Trump ត្រូវបានរកឃើញថា មានទោសគ្រប់ករណីទាំងអស់នៅឯសវនាការកាត់ក្តីករណីបង់ប្រាក់បំបិទមាត់

2024/05/31 03:10:20 pm        351
Facebook Telegram Linkin
លោក Donald Trump បានក្លាយជាប្រធានាធិបតីសហរដ្ឋអាមេរិកដំបូងគេដែលត្រូវបានកាត់ទោសពីបទព្រហ្មទណ្ឌកាលពីថ្ងៃព្រហស្បតិ៍ ៣០ ឧសភា នៅពេលគណៈវិនិច្ឆ័យនៅទីក្រុងញូវយ៉កបានរកឃើញថារូបលោកមានទោសពីបទក្លែងបន្លំឯកសារដើម្បីបិទបាំងការបង់ប្រាក់បំបិទមាត់តារាអាសអាភាសម្នាក់ គឺនាង Stormy Daniels នៅមុនការបោះឆ្នោតឆ្នាំ ២០១៦។លោក Trump វ័យ ៧៧ ឆ្នាំបានបដិសេធ ថាលោកពុំបានធ្វើខុសទេ ហើយគេរំពឹងថា លោកនឹងប្តឹងទៅឧទ្ធរណ៍បន្ថែមទៀត។បន្ទាប់ពីការជំនុំជម្រះក្ដីរយៈពេលពីរថ្ងៃ គណៈវិនិច្ឆ័យដែលមានសមាជិក ១២ រូប បានប្រកាសថាលោក Trump មានទោសលើសំណុំរឿងចំនួន៣៤ករណី ដែលបានប្រឈម។លោក Trump បានចោលក្រសែភ្នែកមើលទៅក្រុមចៅក្រមទាំងមិនសប្បាយចិត្ត នៅពេលពួកគេគ្រោងមូលមតិគ្នាបញ្ជាក់ពីសាលក្រមជាឯកច្ឆ័ន្ទ។ចៅក្រម លោក ជូនអាន ម៊ើឈិន (Juan Merchan) បានកំណត់ការផ្ដន្ទាទោសនៅថ្ងៃទី១១ កក្កដា ប៉ុន្មានថ្ងៃមុនគណបក្សសាធារណរដ្ឋត្រូវគេរំពឹងថានឹងតែងតាំងលោក Trump ជាបេក្ខភាពប្រធានាធិបតី មុនការបោះឆ្នោតថ្ងៃទី ៥ ខែវិច្ឆិកាឆ្នាំ២០២៤ខាងមុខនេះ។ លោក Trump ប្រឈមការផ្ទន្ទាទោសជាប់ពន្ធនាគារអតិបរមាចំនួន ៤ ឆ្នាំ ទោះបីជាអ្នកផ្សេងទៀតដែលត្រូវបានកាត់ទោសពីបទព្រហ្មទណ្ឌនោះ ជារឿយៗបានទទួលទម្ងន់ទោសរយៈខ្លីជាងលោកTrump ការផាកពិន័យតិចជាង ឬការព្យួរទោសក៏ដោយ។ ការជាប់ឃុំនឹងមិនរារាំងរូបលោកពីការឃោសនាបោះឆ្នោត ឬចូលកាន់តំណែងនោះទេ ប្រសិនបើលោកឈ្នះឆ្នោត។ យ៉ាងណា អតីតប្រធានាធិបតីអាមេរិករូបនេះ នឹងមិនជាប់ពន្ធនាគារមុនការកាត់ទោសនោះទេ។លោកម៊ើឈិន បានថ្លែងអំណរគុណដល់គណៈវិនិច្ឆ័យសម្រាប់សេវាកម្មរបស់ពួកគេ ហើយប្រាប់ពួកគេថាពួកគេមានសេរីភាពក្នុងការនិយាយអំពីបទពិសោធន៍របស់ពួកគេនៅក្នុងគណៈវិនិច្ឆ័យ ប្រសិនបើពួកគេចង់បាន។ គ្មាននរណាម្នាក់អាចបញ្ជាឲ្យអ្នកធ្វើអ្វីដែលអ្នកមិនចង់ធ្វើនោះទេ។ ជម្រើសគឺជារបស់អ្នក។ សាលក្រមនេះបានទាញទម្លាក់សហរដ្ឋអាមេរិកចូលទៅក្នុងពិភពអាថ៌កំបាំងនៅមុនការបោះឆ្នោតប្រធានាធិបតីថ្ងៃទី ៥ ខែវិច្ឆិកា នៅពេល លោក Trump បេក្ខជនមកពីគណបក្សសាធារណរដ្ឋព្យាយាមដណ្ដើមកៅអីសេតវិមានមកវិញពីលោកប្រធានាធិបតីប្រជាធិបតេយ្យ Joe Biden៕

បណ្ដាញសង្គម

ព័ត៌មានថ្មីៗ

ប្រធានាធិបតីសាធារណរដ្ឋរវ៉ាន់ដា អញ្ជើញមកដល់អាកាសយានដ្ឋានអន្តរជាតិតេជោ ដើម្បីបំពេញទស្សនកិច្ចផ្លូវរដ្ឋនៅកម្ពុជា
11/12/2026 01:11 PM
Facebook Telegram Linkin
អាកាសយានដ្ឋានអន្តរជាតិតេជោប្រគល់រង្វាន់លើកទី២ ដល់​អ្នក​ឈ្នះឆ្នោត​ផ្សង​សំណាង​អបអរ​ខួប​ ១ឆ្នាំ
11/12/2026 01:11 PM
Facebook Telegram Linkin
ភាសាបារាំង នៅតែពេញនិយមសម្រាប់សិស្ស ជ្រើសរើសសិក្សានៅគ្រឹះស្ថានសាធារណៈ
11/12/2026 01:11 PM
Facebook Telegram Linkin
សម្ដេចប្រធានរដ្ឋសភា នឹងអញ្ជើញដឹកនាំគណៈប្រតិភូជាន់ខ្ពស់សភាកម្ពុជា ចូលរួមមហាសន្និបាត AIPA លើកទី៤៧ នៅប្រទេសហ្វីលីពីន នៅដើមសប្តាហ៍ក្រោយ
11/12/2026 01:11 PM
Facebook Telegram Linkin
ការបោះឆ្នោតឃុំ-សង្កាត់ ឆ្នាំ២០២៧ អ្នកមានឈ្មោះបោះឆ្នោតកើនដល់ជាង១០លាន ៥សែននាក់ ខណៈចុះឈ្មោះថ្មីជាង៤០ម៉ឺននាក់
11/12/2026 12:11 PM
Facebook Telegram Linkin
អ្នកនាំពាក្យ៖​ ទោះបទឈប់បាញ់​នៅ​ជា​ធរមាន​តែ​ជនភៀស​សឹក​កម្ពុជា​ជាង​២​ម៉ឺន​នាក់​មិន​ទាន់​អាច​វិល​ទៅ​ផ្ទះវិ​ញបានឡើយ
11/12/2026 12:11 PM
Facebook Telegram Linkin
អ៊ីរ៉ង់ ចាត់ទុកកងទ័ពជើងទឹក និងកងទ័ពអាកាសអាហ្សង់ទីន ជាអង្គការភេរវកម្ម
11/12/2026 12:11 PM
Facebook Telegram Linkin
អ្នកបើករថយន្តដឹកទំនិញនៅប្រទេសឈីលី បិទផ្លូវដើម្បីតវ៉ាការឡើងថ្លៃប្រេងឥន្ធនៈ
11/12/2026 12:11 PM
Facebook Telegram Linkin
មេដឹកនាំពិភពលោកបង្ហាញពីគោលដៅអាកាសធាតុនៅក្នុងកិច្ចប្រជុំ COP31
11/12/2026 12:11 PM
Facebook Telegram Linkin
អ្នកនាំពាក្យ៖ ស្របពេលធ្វើជាម្ចាស់ផ្ទះកិច្ចប្រជុំហ្វ្រង់កូហ្វូនីកម្ពុជា​ក៏ទទួល​ដំណើរ​ទស្សន​កិច្ច​ផ្លូវ​រដ្ឋ​ចំនួន​២ និងទស្សនកិច្ចផ្លូវការ១
11/12/2026 12:11 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.