នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម
សម្ដេចតេជោ អំពាវនាវដល់រាជរដ្ឋាភិបាលយកចិត្តទុកដាក់សាងសង់កន្លែងស្នាក់នៅសម្រាប់សិស្សជាស្ត្រី
សម្ដេចធិបតី៖ មន្ត្រីជាអ្នកបម្រើរាស្ត្រ មិនមែនជាចៅហ្វាយរាស្ត្រទេ

នយោបាយ​ និង ការអភិវឌ្ឍន៍

ការចរចាស្តីពីតំបន់ហ្កាហ្សាជាប់គាំងម្តងទៀត ជប៉ុនពិចារណាការបន្តផ្តល់មូលនិធិសម្រាប់ទីភ្នាក់ងារ UNRWA

2024/03/27 09:07:26 pm        107
Facebook Telegram Linkin
ការចរចា រវាងអ៊ីស្រាអ៊ែល និងក្រុមហាម៉ាស កាន់តែមានភាពមិនច្បាស់លាស់ ដោយភាគីទាំងពីរពុំអាចព្រមព្រៀងលើលក្ខខណ្ឌនៃបទឈប់បាញ់ និងការដោះលែងចំណាប់ថ្នូរ។ កិច្ចពិភាក្សា បានបន្តនៅក្នុងប្រទេសកាតា ដែលជាអ្នកសម្របសម្រួលសម្រាប់ការចរចា ចាប់តាំងពីថ្ងៃទី ១៨ ខែមីនា។ក្រុមហាម៉ាស បាននិយាយកាលពីថ្ងៃចន្ទថា ខ្លួនបានផ្តល់ព័ត៌មានដល់អ្នកសម្របសម្រួលថា ខ្លួននឹង ប្រកាន់ខ្ជាប់នូវជំហរដើម នៃការទាមទារបទឈប់បាញ់ជាអចិន្ត្រៃយ៍ និងការដកកងទ័ពអ៊ីស្រាអែល ចេញពីតំបន់ហ្កាហ្សា។ ប្រព័ន្ធផ្សព្វផ្សាយអ៊ីស្រាអែល បានរាយការណ៍ថា ក្រុមហាម៉ាស បានច្រានចោលសំណើរបស់អ៊ីស្រាអែល និងក្រុមអ្នកសម្របសម្រួល។ការិយាល័យនាយករដ្ឋមន្ត្រីអ៊ីស្រាអែល បាននិយាយកាលពីថ្ងៃអង្គារថា ក្រុមហាម៉ាស បានច្រានចោលសំណើសម្របសម្រួលរបស់សហរដ្ឋអាមេរិកម្តងទៀត ហើយបាននិយាយដដែលនូវការទាមទាររបស់ខ្លួន។ ប្រព័ន្ធផ្សព្វផ្សាយនិយាយថា អ៊ីស្រាអែល កំពុងធ្វើឈានទៅរកបំពេញតាមការទាមទាររបស់ក្រុមហាម៉ាស ទាក់ទងទៅនឹងចំនួនប្រជាជនប៉ាឡេស្ទីន ដែលត្រូវដោះលែងពីពន្ធនាគាររបស់អ៊ីស្រាអែល ជាថ្នូរនឹងការដោះលែងចំណាប់ថ្នូរ។រដ្ឋាភិបាលប្រទេសជប៉ុន កំពុងរៀបចំការការបន្តផ្តល់មូលនិធិឡើងវិញដែលអាចធ្វើទៅបាន ដល់ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន(UNRWA) នៅតំបន់ដើមបូព៌ា នៅដើមខែមេសា។ ប្រទេសជប៉ុន បានផ្អាកការផ្តល់មូលនិធិដល់ទីភ្នាក់ងារ UNRWA កាលពីខែមករា បន្ទាប់ពីមានការសង្ស័យថា បុគ្គលិកមួយចំនួនរបស់ទីភ្នាក់ងារអង្គការសហប្រជាជាតិ មានជាប់ពាក់ព័ន្ធទៅនឹងការវាយប្រហាររបស់ក្រុមហាម៉ាសលើអ៊ីស្រាអែល កាលពីខែតុលា។

លោកហ្សេឡិនស្គី បណ្តេញទីប្រឹក្សាសន្តិសុខជាតិ នៅក្នុងការរុះរើមួយគួរឲ្យភ្ញាក់ផ្អើល

2024/03/27 09:04:38 pm        137
Facebook Telegram Linkin
ប្រធានាធិបតីអ៊ុយក្រែនលោក វ៉ូឡូមៀ ហ្សេឡិនស្គី (Volodymyr Zelensky) បានបណ្តេញលោក Oleksiy Danilov លេខាធិការក្រុមប្រឹក្សាសន្តិសុខអ៊ុយក្រែន នៅក្នុងការរុះរើមួយគួរឲ្យភ្ញាក់ផ្អើល។លោក Danilov ដែលបានកាន់មុខតំណែង តាំងពីខែតុលា ឆ្នាំ ២០១៩ ប៉ុន្មានខែ បន្ទាប់ពីប្រធានាធិបតីចូលកាន់តំណែង ត្រូវបានជំនួសដោយលោក Oleksandr Lytvynenko ដែលជាប្រធានសេវាចារកម្ម បរទេស ក្រោមក្រិត្យដែលបានចេញផ្សាយនៅលើគេហទំព័ររបស់ប្រធានាធិបតី។ ពុំមានហេតុផលត្រូវបានផ្តល់ឲ្យសម្រាប់ការផ្លាស់ប្តូរនេះទេ។ក្រុមប្រឹក្សាសន្តិសុខ និងការពារជាតិរបស់អ៊ុយក្រែន សម្របសម្រួលសន្តិសុខជាតិ និងមានប្រធានផ្នែកនយោបាយ សន្តិសុខ និងការពារជាតិសំខាន់ៗរបស់ប្រទេស។ការសម្រេចនេះ កើតឡើង នៅពេលដែលលោកហ្សេឡិនស្គី បន្តផ្លាស់ប្តូរមន្ត្រីសន្តិសុខ និងការពារជាតិជាន់ខ្ពស់ ជាមួយនឹងការបណ្តេញឧត្តមសេនីយ៍ជាន់ខ្ពស់របស់អ៊ុយក្រែន កាលពីខែមុន បង្ហាញពីការបោសសម្អាតយ៉ាងទូលំទូលាយនៅក្នុងជួរកងទ័ពរបស់ខ្លួន។

ការវាយប្រហារនៅមូស្គូ៖ រុស្ស៊ីដាក់កំហុសលោកខាងលិច និងក្រុងគីវ ចំពោះការសម្លាប់រង្គាល

2024/03/27 08:21:12 pm        154
Facebook Telegram Linkin
មន្ត្រីជាន់ខ្ពស់រុស្ស៊ី បានចោទប្រកាន់ដោយផ្ទាល់ លើប្រទេសអ៊ុយក្រែន និងប្រទេសលោកខាងលិច ថាបានជាប់ពាក់ព័ន្ធក្នុងការវាយប្រហារនៅសាលប្រគំតន្ត្រីនៅទីក្រុងមូស្គូដ៏ឃោឃៅ បន្ទាប់ពីការវាយប្រហារនេះ ត្រូវបានអះអាងដោយក្រុមរដ្ឋឥស្លាម (IS)។ក្រុមរដ្ឋឥស្លាម បានបញ្ចេញវីដេអូនៃអំពើឃោរឃៅនេះ ប៉ុន្តែលោក វ្ល៉ាឌីមៀ ពូទីន និងសម្ព័ន្ធមិត្តជិតស្និទ្ធចំនួនពីរ បានអះអាងថា ក្រុមជីហាដ ត្រូវបានជួយដោយក្រុមចារកម្មប្រទេសលោកខាងលិច និងអ៊ុយក្រែន ប៉ុន្តែអ៊ុយក្រែនបានច្រានចោលពាក្យនិយាយកុហករបស់រុស្ស៊ី។សេណារីយ៉ូនេះ មិនទំនងនោះទេ ព្រោះអាមេរិក បានព្រមានរុស្ស៊ីពីការវាយប្រហារដែលនឹងជិតមកដល់ កាលពី១៥ ថ្ងៃមុនការវាយប្រហារ។ ប្រទេសរុស្ស៊ីបាននិយាយថា មនុស្សចំនួន ១៣៩ នាក់ ត្រូវបានសម្លាប់ នៅពេលដែលជនប្រដាប់អាវុធ ៤ នាក់បានសម្រុកចូលទៅក្នុងសាលប្រគំតន្ត្រី Crocus City កាលពីល្ងាចថ្ងៃសុក្រ សប្តាហ៍មុន។ មន្ត្រីបាននិយាយថា មនុស្ស ២២ នាក់ទៀតស្ថិតក្នុងស្ថានភាពធ្ងន់ធ្ងរ រួមមានកុមារពីរនាក់។ពលរដ្ឋប្រទេសតាហ្ស៊ីគីស្ថាន បួននាក់បានបង្ហាញខ្លួននៅតុលាការដែលត្រូវបានចោទប្រកាន់ពីបទប្រព្រឹត្តការសម្លាប់រង្គាលនេះ។ ជនសង្ស័យបួននាក់ផ្សេងទៀត ត្រូវបានចោទប្រកាន់ពីបទជួយដល់សកម្មភាពភេរវកម្ម។ ទីប្រឹក្សាប្រធានាធិបតីអ៊ុយក្រែន លោក មីកហៃឡូ ប៉ូដូលយ៉ាក(Mykhailo Podolyak) បាននិយាយថា ការពិតអំពីអ្នកប្រព្រឹត្ត និងភាពអសមត្ថភាពរបស់អង្គភាពសេវាសន្តិសុខរុស្ស៊ី គឺមិនអាចប្រកែកបាន។ ប្រទេសលោកខាងលិច ក៏បានចំអកដល់ការនិទានរឿងរបស់វិមានក្រឹមឡាំងផងដែរ។មេដឹកនាំរុស្ស៊ី បានទទួលស្គាល់ក្នុងអំឡុងពេលកិច្ចប្រជុំតាមទូរទស្សន៍ថា យើងដឹងថាឧក្រិដ្ឋកម្មនេះត្រូវបានប្រព្រឹត្តឡើងដោយស្នារដៃរបស់ក្រុមអ៊ីស្លាមជ្រុលនិយម យើងចង់ដឹងថាអ្នកណាជាអ្នកបញ្ជាវា។ លោកបានអះអាងថា សំណួរជាច្រើននៅតែគ្មានចម្លើយ ដោយនិយាយឡើងវិញនូវការអះអាង គ្មានមូលដ្ឋានថា អ្នកវាយប្រហារបានព្យាយាមរត់គេចខ្លួនពីភាគខាងត្បូង ទៅកាន់ប្រទេសអ៊ុយក្រែន។ លោកបាននិយាយថា សហរដ្ឋអាមេរិកកំពុងព្យាយាមបញ្ចុះបញ្ចូលពិភពលោក ថាទីក្រុងគីវ ពុំមានជាប់ពាក់ព័ន្ធក្នុងការវាយប្រហារនេះទេ ប៉ុន្តែលោកបានបន្តចង្អុលទៅកាន់ប្រទេសលោកខាងលិច ដោយលោកបាននិយាយថា កំពុងប្រើប្រាស់អ៊ុយក្រែន ដើម្បីប្រយុទ្ធប្រឆាំងរុស្ស៊ី។

យោធាមីយ៉ាន់ម៉ា ប្រារព្ធទិវាកងកម្លាំងប្រដាប់អាវុធ ក្នុងពេលមានអំពើហិង្សានៅតែបន្ត

2024/03/27 08:18:23 pm        189
Facebook Telegram Linkin
សហភាពមីយ៉ាន់ម៉ា កំពុងជួបបញ្ហាប្រឈមជាច្រើន ខណៈសហភាពនេះ ប្រារព្ធទិវាកងកម្លាំងប្រដាប់អាវុធ នៅថ្ងៃពុធនេះ មានពិធីចាប់ពីការការពារការវាយប្រហារដោយយានដ្រូនរបស់ក្រុមឧទ្ទាម រហូតដល់តម្រូវការក្នុងការបង្កើនសព្វាវុធនិងបង្កើនចំនួនកងទ័ព។ ពិធីនេះកើតឡើង ខណៈយោធាចាប់ផ្តើមជ្រើសរើសជនស៊ីវិលឲ្យចូលជាយោធានៅខែក្រោយ ។តាមធម្មតា នៅថ្ងៃទិវាកងកម្លាំងប្រដាប់អាវុធ មីយ៉ាន់ម៉ាបង្ហាញនូវសព្វាវុធទំនើបៗ និងសមត្ថភាពយុទ្ធសាស្ត្ររបស់ខ្លួន ហើយមានអំនួតពីសមត្ថភាពរបស់ខ្លួនក្នុងការគ្រប់គ្រងការគំរាមកំហែងពីខាងក្រៅ។ ទោះជាយ៉ាងណា ប្រទេសនេះនៅតែបន្តទប់ទល់ជាមួយអំពើហិង្សាក្នុងស្រុក។ នៅថ្ងៃទិវាកងកម្លាំងប្រដាប់អាវុធក្នុងឆ្នាំ ២០២១ រយៈពេលជិតពីរខែបន្ទាប់ពីរដ្ឋប្រហារ អំពើហិង្សាបានឈានដល់កម្រិតខ្ពស់នៅក្នុងសហភាពមីយ៉ាន់ម៉ា។ កងទ័ពត្រូវបានចោទប្រកាន់ថា បានសម្លាប់មនុស្សប្រហែល ១០០នាក់នៅទូទាំងប្រទេសនៅថ្ងៃនោះ។ យោធាមីយ៉ាន់ម៉ា និងក្រុមប្រដាប់អាវុធជនជាតិភាគតិច ក៏បានចូលរួមនៅក្នុងអំពើហិង្សា ដែលនាំឱ្យជនស៊ីវិលមួយចំនួនភៀសខ្លួនចូលទៅក្នុងប្រទេសថៃ ជាប្រទេសជិតខាង។នៅឆ្នាំបន្ទាប់ មេដឹកនាំរបបយោធាមីយ៉ាន់ម៉ា លោក មីន អ៊ុងឡាំង(Min Aung Hlaing) បានប្តេជ្ញាថានឹង កម្ទេចក្រុមភេរវករ។ ក្នុងអំឡុងពេលទិវាកងកម្លាំងប្រដាប់អាវុធកាលពីឆ្នាំមុន លោកបានរំលឹកឡើងវិញពីការព្រមានដើម្បីដោះស្រាយជាមួយក្រុមអ្នកប្រឆាំងលោក។ ផែនការរបស់កងទ័ពមីយ៉ាន់ម៉ា តែងតែអភិវឌ្ឍសមត្ថភាពយោធារបស់ខ្លួន រួមទាំងការទិញសព្វាវុធកាន់តែប្រសើរ និងជ្រើសរើសទាហានបន្ថែមទៀត។កងកម្លាំងសរុបរបស់កងទ័ព ត្រូវបានគេប៉ាន់ប្រមាណថាមានប្រហែលពី ២០០.០០០ ទៅ ៣០០.០០០នាក់។ ប៉ុន្តែចំនួនកងទ័ព កំពុងថមថយដោយសារការស្លាប់និងរងរបួសក្នុងសមរភូមិ និងតាមរយៈការរត់ចោលជួរ។

សហគ្រាសឧស្សាហកម្មធំៗ ១៧ របស់ចិន បានបង្ហាញពីចំណាប់អារម្មណ៍ និងបំណងពង្រីក​ការវិនិយោគ បន្ថែមទៀតនៅកម្ពុជា

2024/03/27 08:14:01 pm        141
Facebook Telegram Linkin
នាព្រឹកថ្ងៃទី២៧ ខែមីនា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃ​ព្រះរាជា​ណាចក្រកម្ពុជា បានអនុញ្ញាតឱ្យលោក ស៊ិន មីងរ៉ុង (Shen Mingrong ) ប្រធាន​ក្រុមហ៊ុន​ Zhenjiang Zhoung Chao New Material Co,Ltd. និងប្រតិភូ​សហគ្រាស​ឧស្សាហ​កម្ម​ធំៗ ចំនួន១៧ របស់ប្រទេសចិន ចូលជួបសម្តែងការគួរសម និងពិភាក្សាការងារ។ ក្នុងឱកាសនៃជំនួប លោក ស៊ិន មីងរ៉ុង ប្រធានក្រុមហ៊ុន បានថ្លែង​អំណរ​គុណ​យ៉ាង​ជ្រាល​ជ្រៅ​ចំពោះ សម្តេចធិបតី ដែលបានចំណាយពេលដ៏មមាញឹកអនុញ្ញាតឱ្យរូបលោក និងប្រតិភូ​សហគ្រា​ស​ឧស្សាហកម្ម ចូលជួបសម្ដែងការគួរសម និងពិភាក្សាការងារ ព្រមទាំងបាន​អរគុណ​ជូន​ចំពោះ​រដ្ឋាភិបាល​កម្ពុជា និងក្រសួង-ស្ថាប័នពាក់ព័ន្ធ ដែលតែងតែយកចិត្តទុកដាក់ក្នុងការគាំទ្រ និង​សម្រប​សម្រួល​ដល់​កិច្ច​ដំណើរការ​វិនិយោគ​របស់​សហ​គ្រាស​ឧស្សាហកម្ម​នៅ​ក្នុង​ព្រះរាជា​ណា​ចក្រ​កម្ពុជា​នាពេលកន្លងមក។ លោកប្រធានក្រុមហ៊ុនក៏បានបង្ហាញនូវការប្ដេជ្ញាចិត្តក្នុងការជំរុញ និង​ពង្រីកការវិនិយោគ ក៏ដូចជាការទាក់ទាញនូវវិនិយោគិនថ្មីៗបន្ថែមទៀត មកកម្ពុជា ដើម្បី​រួម​ចំណែក​ក្នុង​ការអភិវឌ្ឍសង្គម-សេដ្ឋកិច្ចកម្ពុជា ស្របតាមគោលនយោបាយ និង​យុទ្ធសាស្ត្រ​ដែល​រាជ​រដ្ឋាភិបាល​បានដាក់ចេញ ជាពិសេស គឺសំដៅប្រែក្លាយខេត្តព្រះស៊ីហនុទៅជា “តំបន់​សេដ្ឋកិច្ច​ពិសេស​គំរូ​ពហុបំណង” ស្របតាមចក្ខុវិស័យរបស់រាជរដ្ឋាភិបាល។ បន្ថែមលើនេះ លោក​ប្រធាន​ក្រុមហ៊ុន ក៏បានគោរពជម្រាបជូនសម្ដេចធិបតី អំពីបណ្តាសហគ្រាសឧស្សាហកម្ម ដែល​បាន​អញ្ជើញ​ចូលរួមក្នុងដំណើរទស្សនកិច្ចនេះ ដែលរួមមានក្រុមហ៊ុនចំនួន១៧ ដែលមានជំនាញ និង​ប្រកប​អាជីវកម្មលើវិស័យជាច្រើន រួមមាន ដូចជា៖ វិស័យវាយនភ័ណ្ឌ, បច្ចេកវិទ្យាព័ត៌មាន, ឧស្សាហកម្ម, ហិរញ្ញវត្ថុ និងធនាគារ, ថាមពល, ការគ្រប់គ្រងសំណល់ និងទឹកស្អាត, អចលន​ទ្រព្យ, គម្រោងអភិវឌ្ឍជនបទ, ធានារ៉ាប់រង, បរិស្ថាន, ក៏ដូចជា​ក្រុមហ៊ុន​វិនិយោគ​ដែល​ផលិត​នូវ​ផលិត​ផល​ផ្សេងៗ ដូចជា ក្រដាស និងដែក ជាដើម។ លោកប្រធានក្រុមហ៊ុន ក៏បានគោរព​ស្នើ​សុំការ​ស្វែង​យល់បន្ថែមអំពីគោលនយោបាយ និងយុទ្ធសាស្ត្រ​ក្នុង​ការ​ទាក់​ទាញ​ការ​វិនិយោគ​របស់​រាជ​រដ្ឋាភិបាល, គោលនយោបាយក្នុងការគ្រប់គ្រង និងការបង្វិលប្រាក់វិនិយោគ, គោល​នយោបាយ​នៃ​ការគ្រប់គ្រងកំលាំងពលកម្មទាំងក្នុងស្រុក និងពលករជំនាញបរទេស, និង​គោល​នយោបាយ​ផ្នែក​ថាមពលបៃតង និងហេដ្ឋារចនាសម្ព័ន្ធតភ្ជាប់។ជាការឆ្លើយតប សម្តេចធិបតី បានអរគុណ និងវាយតម្លៃខ្ពស់ចំពោះបណ្តាក្រុមហ៊ុន ឧស្សាហកម្ម​ដែល​បាន​បោះទុនវិនិយោគ និងធ្វើអាជីវកម្មនៅក្នុងព្រះរាជាណាចក្រកម្ពុជា ដែលនេះ​បង្ហាញ​ពី​ការ​ជឿជាក់​មកលើការដឹកនាំរបស់រាជរដ្ឋាភិបាលកម្ពុជា។ ចំពោះគោលនយោបាយ និង​យុទ្ធ​សាស្ត្រ​របស់រាជរដ្ឋាភិបាលក្នុងការទាក់ទាញការវិនិយោគ សម្ដេចធិបតី បានបញ្ជាក់​ជូន​ដល់​លោក​ប្រធាន​ក្រុមហ៊ុន និងគណៈប្រតិភូថា រាជរដ្ឋាភិបាលកម្ពុជា​តែងតែ​ប្រកាន់​ភ្ជាប់​នូវ​គោល​នយោបាយ​​បើក​ចំហ ប្រកបដោយភាពបត់បែន និង​ជាក់ស្តែងនិយម ដោយរក្សាភ្ជាប់​នូវ​ទំនាក់​ទំនង និងកិច្ចសហប្រតិបត្តិការជាមួយគ្រប់បណ្ដាប្រទេសទាំងអស់ នៅក្នុងតំបន់ និងពិភពលោក ដើម្បី​ធានាបាននូវការប្រកួតប្រជែង និងការផ្ដល់នូវបរិយាកាសវិនិយោគល្អប្រសើរ។ បន្ថែមលើនេះ សម្តេចធិបតី បានគូសរំលេចថា រាជរដ្ឋាភិបាល ក៏បាន និង កំពុង​តែ​ដាក់​ចេញ​នូវ​គោល​នយោបាយ​អាទិភាពលើការបណ្ដុះបណ្ដាលធនធានមនុស្ស តាមរយៈ​ការ​ធ្វើ​ការ​កែ​ទម្រង់​វិស័យ​អប់រំ ​និងការលើកកម្ពស់ការបណ្តុះបណ្តាលវិជ្ជាជីវៈ និងបច្ចេកទេស ក៏ដូចជា​បន្ត​ពង្រឹង​កម្ម​វិធី​ការ​បង្កើន​ជំនាញ (Upskilling) និង ការផ្លាស់ប្តូរជំនាញ (Reskilling) ដើម្បី​ធានា​បាន​នូវ​ធន​ធាន​មនុស្ស ជាពិសេសកម្លាំងពលកម្មជំនាញ ដែលអាចឆ្លើ​យ​តប​ទៅ​តាម​តម្រូវ​ការ​ជាក់ស្តែង​របស់​ក្រុម​ហ៊ុន​ឧស្សាហកម្ម និងទីផ្សារការងារ។ ចំពោះគោលនយោបាយនៃការគ្រប់គ្រង និងការបង្វិល​ប្រាក់​វិនិយោគ រាជរដ្ឋាភិបាលកម្ពុជាបានដាក់ចេញនូវគោលនយោបាយលំហូរមូលធន ដោយ​មាន​ភាព​សេរី ហើយវិនិយោគិនអាចមានលទ្ធភាពក្នុងការផ្ទេរមូលធនវិនិយោគចេញ និងចូល តាម​ប្រព័ន្ធ​ទូទាត់​ប្រាក់ឆ្លងដែន ដែលនេះជាការផ្ដល់នូវភាពងាយស្រួល និងការគាំទ្រ​ដល់​ដំណើរ​ការ​វិនិយោគ​នៅ​ក្នុងកម្ពុជា។ សម្ដេចធិបតី ក៏បានបន្ថែមទៀតថា នាពេលបច្ចុប្បន្ន កម្ពុជាកំពុង​ប្រើប្រាស់​ថាមពលស្អាត ប្រមាណជាង ៦០% និងបានកំពុង​បន្ត​ជំរុញ​ការ​ប្រើប្រាស់​ថាមពល​ស្អាត​នេះ ឱ្យឈានទៅដល់៧០% ត្រឹមឆ្នាំ២០៣០។ មុននឹងបញ្ចប់ សម្ដេចធិបតី បានបញ្ជាក់​ជូន​លោក​ប្រធា​នក្រុមហ៊ុន និងគណៈប្រតិភូអំពី​ការ​បន្ត​យក​ចិ​ត្តទុកដាក់​របស់​រាជ​រដ្ឋាភិបាល​ក្នុង​ការ​វិនិយោគ​ទៅ​លើការអភិវឌ្ឍហេដ្ឋារចនាសម្ព័ន្ធតភ្ជាប់សំខាន់ៗដូចជា ផ្លូវលឿន អាកាស​យានដ្ឋាន​អន្តរជាតិ និងហេដ្ឋារចនាសម្ព័ន្ធដទៃទៀត ដើម្បីតភ្ជាប់កម្ពុជាទៅតំបន់ និងសកលលោក៕

ប្រេស៊ីល និងបារាំង ចាប់ផ្តើមកម្មវិធីថវិកា ១,១ ពាន់លានដុល្លារដើម្បីការពារព្រៃជប់ភ្លៀងអាម៉ាហ្សូន

2024/03/27 07:53:25 pm        146
Facebook Telegram Linkin
ប្រទេសប្រេស៊ីល និងបារាំង កាលពីថ្ងៃអង្គារ បានចាប់ផ្តើមកម្មវិធីវិនិយោគមួយដើម្បីការពារព្រៃជប់ភ្លៀងអាម៉ាហ្សូនរបស់ប្រទេសប្រេស៊ីល និងហ្គីយ៉ាន ដោយមានមូលនិធិឯកជន និងសាធារណៈចំនួន ១ ពាន់លានអឺរ៉ូ ឬ១,១ ពាន់លានដុល្លារ ក្នុងរយៈពេល ៤ ឆ្នាំខាងមុខ។សេចក្តីប្រកាសនេះ ត្រូវបានធ្វើឡើងក្នុងអំឡុងពេលដំណើរទស្សនកិច្ចរយៈពេលបីថ្ងៃរបស់ប្រធានាធិបតីបារាំង លោក Emmanuel Macron ទៅកាន់ប្រទេសអាមេរិកខាងត្បូង ជាកន្លែងដែលលោកបានចុះចតកាលពីថ្ងៃអង្គារ នៅទីក្រុង Belem ជិតតំបន់ព្រៃជប់ភ្លៀង Amazon ហើយបានជួបជាមួយប្រធានាធិបតីប្រេស៊ីល លោក Luiz Inacio Lula da Silva ។លោក Macron និងលោក Lula បានជិះទូកតាមទន្លេទៅពិនិត្យមើលគម្រោងអភិវឌ្ឍន៍ប្រកបដោយនិរន្តរភាពសម្រាប់ការផលិតសូកូឡា នៅលើកោះមួយនៅជិតទីក្រុង Belem ហើយបានជួបជាមួយមេដឹកនាំជនជាតិដើមភាគតិចនៅទីនោះ។នៅក្នុងព្រឹត្តិការណ៍នេះ លោក Macron បានគោរពមេដឹកនាំជនជាតិដើមភាគតិច និងអ្នកធ្វើយុទ្ធនាការបរិស្ថាន។អ្នកធ្វើយុទ្ធនាការ លោក Raoni ជាមួយតន្ត្រីករម្នាក់ បានប្រគល់ឯកសារដល់លោក Macron ដែលរិះគន់ពីផលប៉ះពាល់បរិស្ថាន ដែលគម្រោងផ្លូវរថភ្លើងគាំទ្រដោយកសិករដាំសណ្តែកសៀង ធ្វើឲ្យប៉ះពាល់ដល់ជនជាតិដើមភាគតិច ដែលបាននិយាយថា ពុំត្រូវបានពិភាក្សាយោបល់ដោយសេរីឡើយ។

រដ្ឋមន្ត្រីការបរទេសវៀតណាម៖ ការលាលែងពីតំណែងរបស់ប្រធានាធិបតី មិនប៉ះពាល់ដល់គោលនយោបាយទេ

2024/03/27 06:41:30 pm        277
Facebook Telegram Linkin
រដ្ឋមន្ត្រីការបរទេសវៀតណាម លោក បួយ ថាញ់សឺន (Bui Thanh Son) បាននិយាយកាលពីថ្ងៃអង្គារ (២៦ មីនា) ថា ការលាលែងពីតំណែងរបស់ប្រធានាធិបតីទីពីររបស់ប្រទេស ដែលគ្រប់គ្រងដោយកុម្មុយនិស្ត ក្នុងរយៈពេលតិចជាងមួយឆ្នាំនេះ មិនបានប៉ះពាល់ដល់គោលនយោបាយការបរទេស និងសេដ្ឋកិច្ចរបស់ទីក្រុងហាណូយនោះទេ ដោយសារខ្លួនមានការដឹកនាំរួម និងការបង្កើតគោលនយោបាយរបស់ខ្លួន។ដោយត្រូវបានសាកសួរក្នុងអំឡុងដំណើរទស្សនកិច្ចនៅសហរដ្ឋអាមេរិក អំពីការលាលែងពីតំណែងរបស់លោក វ៉ូ វ៉ាន់ធឿង (Vo Van Thuong) កាលពីសប្តាហ៍មុន លោក សឺន បានប្រាប់ស្ថាប័នស្រាវជ្រាវ ប្រ៊ុកឃីងស៍ (Brookings) របស់ទីក្រុង វ៉ាស៊ីនតោន ថា ប្រទេសវៀតណាម កំពុងដំណើរការយុទ្ធនាការប្រឆាំងអំពើពុករលួយដែលត្រូវបានស្វាគមន៍ដោយសហគមន៍អន្តរជាតិ និងអាជីវកម្ម។ការលាលែងពីតំណែងរបស់លោក ធឿង បានចោទជាសំណួរអំពីស្ថិរភាពក្នុងប្រទេសវៀតណាម ដោយសារលោកទើបតែជាប់ឆ្នោតកាលពីឆ្នាំមុន បន្ទាប់ពីការបណ្តេញចេញភ្លាមៗពីអ្នកកាន់តំណែងពីមុនរបស់លោក។ក្រុមអ្នកវិភាគបាននិយាយថា ស្ថិរភាពដែលត្រូវបានធានាអស់ជាច្រើនទសវត្សរ៍ដោយរដ្ឋ ដែលគ្រប់គ្រងយ៉ាងតឹងរ៉ឹងដោយបក្សកុម្មុយនិស្ត ឥឡូវនេះមើលទៅហាក់មិនសូវប្រាកដប្រជាទេ បើទោះបីជាពួកគេយល់ស្របថាការផ្លាស់ប្តូរអ្នកដឹកនាំបច្ចុប្បន្ន នឹងមិនប៉ះពាល់ដល់គោលនយោបាយសំខាន់ៗរបស់ប្រទេសក៏ដោយ៕

ប្រមុខការពារជាតិអាមេរិកនិងអ៊ីស្រាអែលជួបពិភាក្សា ខណៈភាពតានតឹងកើនឡើងជុំវិញសង្គ្រាមហ្កាហ្សា

2024/03/27 05:57:31 pm        149
Facebook Telegram Linkin
ខណៈភាពតានតឹងកើនឡើងរវាងប្រទេសទាំងពីរ រដ្ឋមន្ត្រីការពារជាតិអាមេរិក លោក ឡយអូស្ទីន ( Lloyd Austin) បានជួបសមភាគីអ៊ីស្រាអែល លោក យ៉ាវ ហ្គាឡិន (Yoav Gallant)កាលពីថ្ងៃអង្គារមួយថ្ងៃបន្ទាប់ពីសហរដ្ឋអាមេរិកបានអនុបវាទនៅក្នុងការបោះឆ្នោតក្រុមប្រឹក្សាសន្តិសុខអង្គការសហប្រជាជាតិដែលអំពាវនាវឱ្យមានបទឈប់បាញ់ជាបន្ទាន់នៅក្នុងតំបន់ហ្កាហ្សា។ បន្ទាប់ពីការបដិសេធជាប្រវត្តិសាស្ត្រដោយសម្ព័ន្ធមិត្តជិតស្និទ្ធបំផុតរបស់ខ្លួន អ៊ីស្រាអែលបានលុបចោលភ្លាមៗនូវដំណើរទស្សនកិច្ចរបស់គណៈប្រតិភូជាន់ខ្ពស់ទៅកាន់ទីក្រុងវ៉ាស៊ីនតោនក្នុងសប្តាហ៍នេះ។ ប៉ុន្តែលោក Gallant ដែលបានទៅដល់សហរដ្ឋអាមេរិកកាលពីថ្ងៃចន្ទបានស្នាក់នៅក្នុងរដ្ឋធានីនេះ ហើយបានជួបរដ្ឋមន្ត្រីការបរទេស លោក Antony Blinken និងទីប្រឹក្សាសន្តិសុខជាតិលោក Jake Sullivan ទៀតផង ។ អ្នកនាំពាក្យក្រសួងការពារជាតិ លោកឧត្តមសេនីយ៍ ផាត រ៉ៃឌ័រ (Pat Ryder) បាននិយាយថា កិច្ចប្រជុំកាលពីថ្ងៃអង្គារ គឺជា សក្ខីកម្មមួយចំពោះការគាំទ្រឥតងាករេ របស់សហរដ្ឋអាមេរិកសម្រាប់សន្តិសុខរយៈពេលវែងរបស់អ៊ីស្រាអែល ខណៈសមភាគីទាំងពីរ បានបញ្ជាក់ពីផលប្រយោជន៍រួមរបស់ខ្លួនក្នុងការកម្ចាត់ក្រុមហាម៉ាស។ ប៉ុន្តែប្រធានបទធំបំផុតនៃរបៀបវារៈនោះដែរ គឺផែនការរបស់អ៊ីស្រាអែលក្នុងការបើកការវាយលុកនៅទីក្រុងរ៉ាហ្វា ភាគខាងត្បូងនៃតំបន់ហ្កាហ្សា ដែលមនុស្សជាង ១ លាននាក់បានភៀសខ្លួនពីកន្លែងផ្សេងៗកំពុងស្វែងរកទីជម្រកនៅទីនោះ។ លោក Ryder បាននិយាយនៅក្នុងសេចក្តីថ្លែងការណ៍មួយថា លោក Austin និងលោក Gallant បានពិភាក្សាអំពីសារៈសំខាន់នៃការផ្តល់អាទិភាពដល់ការការពារជនស៊ីវិលនៅក្នុងព្រឹត្តិការណ៍នៃប្រតិបត្តិការយោធានៅទីក្រុង Rafah ស្ថានភាពមនុស្សធម៌ដ៏ធ្ងន់ធ្ងរនៅទូទាំងតំបន់ហ្កាហ្សា និងការគំរាមកំហែងដល់សន្តិសុខក្នុងតំបន់៕

អ៊ុយក្រែន ប្រើមីស៊ីលNeptune ដើម្បីវាយប្រហារលើនាវាចម្បាំងរបស់ខ្លួនដែលរុស្ស៊ីលួចកាលពីមួយទសវត្សរ៍មុន

2024/03/27 05:28:44 pm        357
Facebook Telegram Linkin
អ៊ុយក្រែន បានបាញ់មីស៊ីលទៅលើនាវាចម្បាំងដែលរុស្ស៊ីបានលួចពីប្រទេសនេះ កាលពីមួយទសវត្សរ៍មុន ដោយបានបង្ហាញពីព័ត៌មានលម្អិតថ្មីអំពីការវាយប្រហារទ្រង់ទ្រាយធំលើកងនាវាសមុទ្រខ្មៅរបស់ក្រុងទីមូស្គូ ដែលបានលាតត្រដាង កាលពីចុងសប្តាហ៍។ក្រសួងការពារជាតិអ៊ុយក្រែន បាននិយាយកាលពីថ្ងៃអង្គារថា កងកម្លាំងរបស់ខ្លួន បានប្រើប្រាស់មីស៊ីល ប្រឆាំងនាវា Neptune ផលិតក្នុងស្រុក ដើម្បីវាយប្រហារលើនាវា Konstantin Olshansky ។ រុស្ស៊ីបានរឹបអូសយកនាវាចុះចត ដែលមានអាយុកាលរាប់ទសវត្សរ៍នេះ រួមជាមួយនឹងកងទ័ពជើងទឹកជាច្រើនរបស់ក្រុងគីវ ក្នុងអំឡុងការបញ្ចូលឧបទ្វីបគ្រីម៉ាជាឧបសម្ព័ន្ធរបស់ខ្លួនដោយខុសច្បាប់ ក្នុងឆ្នាំ២០១៤។ក្រសួងការពារជាតិអ៊ុយក្រែន បានសរសេរនៅលើប្រព័ន្ធផ្សព្វផ្សាយសង្គមថា៖«យុត្តិធម៌ ត្រូវបានស្ដារឡើងវិញ»។អ្នកនាំពាក្យកងទ័ពជើងទឹកអ៊ុយក្រែន លោក Dmytro Pletenchuk បាននិយាយកាលពីថ្ងៃអង្គារថា អស់ រយៈពេលជាច្រើនឆ្នាំហើយ នាវា Konstantin Olshansky ត្រូវបានចតនៅឈូងសមុទ្រ Sevastopol ភាគនិរតីនៅឧបទ្វីបគ្រីម៉េ ខណៈដែលរុស្ស៊ី បានរុះរើវាសម្រាប់ផ្នែកខ្លះៗ។ ប៉ុន្តែនៅទីបំផុត ទីក្រុងមូស្គូ បានសម្រេចចិត្តយកនាវានេះមកប្រើឡើងវិញ ព្រោះខ្លួនអស់នាវាសម្រាប់ប្រើប្រាស់។ក្រសួងការពារជាតិរបស់ទីក្រុងគីវ បាននិយាយថា រុស្ស៊ីគ្រោងនឹងប្រើប្រាស់នាវា Konstantin Olshanskyនេះប្រឆាំងនឹងអ៊ុយក្រែន។សារព័ត៌មាន Ukrainska Pravda បានរាយការណ៍ថា លោក Pletenchuk បាននិយាយថា៖«ហេតុដូច្នេះហើយ យើងបានសម្រេចចិត្តវាយប្រហារនាវានេះដោយមីស៊ីលNeptune របស់យើង» ។ «វាច្បាស់ជាខូច។ ទោះយ៉ាងណាក៏ដោយ វាមិនមែនជាការប្រយុទ្ធទេ នាពេលនេះ។

ប្រធានក្រុមសកម្មប្រយុទ្ធស៊ុននីលីបង់៖ ការសម្របសម្រួលជាមួយក្រុមហេសបូឡា គឺសំខាន់ដើម្បីប្រយុទ្ធនឹងអ៊ីស្រាអែល

2024/03/27 05:25:11 pm        420
Facebook Telegram Linkin
ប្រធានក្រុមនយោបាយ និងសកម្មប្រយុទ្ធនិកាយស៊ុននីលីបង់ ដែលបានចូលរួមជាមួយក្រុមសកម្មប្រយុទ្ធនិកាយស៊ីអ៊ីតហេសបូឡា(Hezbollah) ក្នុងការប្រយុទ្ធប្រឆាំងនឹងអ៊ីស្រាអែល នៅតាមព្រំដែននៃប្រទេសលីបង់ បាននិយាយកាលពីថ្ងៃអង្គារថា ជម្លោះបានជួយពង្រឹងកិច្ចសហប្រតិបត្តិការរវាងក្រុមទាំងពីរ។អគ្គលេខាធិការនៃក្រុម al-Jamaa al-Islamiya ឬក្រុមឥស្លាម លោកសៀក ម៉ូហាមេដ តាក់គូស (Sheikh Mohammed Takkoush) បាននិយាយថា បក្ខពួករបស់ខ្លួន បានសម្រេចចិត្តចូលរួមការប្រយុទ្ធ នៅតាមព្រំដែនលីបង់-អ៊ីស្រាអែល ដោយសារតែការវាយលុករបស់អ៊ីស្រាអែលលើតំបន់ហ្កាហ្សាស្ទ្រីប និងការវាយលុកលើទីប្រជុំជនលីបង់ និងភូមិ ដែលសម្លាប់ជនស៊ីវិល រួមទាំងអ្នកសារព័ត៌មាន ចាប់តាំងពីសង្រ្គាមអ៊ីស្រាអែល និងហាម៉ាស បានចាប់ផ្តើមនៅថ្ងៃទី៧ ខែតុលា។លោកតាក់គូស បានប្រាប់សារព័ត៌មានAP នៅទីស្នាក់ការកណ្តាលរបស់ក្រុមរបស់ខ្លួន ក្នុងទីក្រុងបេរូតថា៖«យើងបានសម្រេចចិត្តចូលរួម (សមរភូមិ) ជាកាតព្វកិច្ចជាតិ សាសនា និងសីលធម៌។ យើងបានធ្វើដូច្នេះ ដើម្បីការពារដី និងភូមិរបស់យើង»។ លោកបាននិយាយថា៖«យើងក៏បានធ្វើដូច្នេះដែរ ក្នុងការគាំទ្រដល់បងប្អូនរបស់យើង នៅតំបន់ហ្កាហ្សា» ជាទីដែលលោក បានបញ្ជាក់ថា អ៊ីស្រាអែល កំពុងធ្វើការសម្លាប់រង្គាលជាចំហ។ក្រុមហាម៉ាស បានដឹកនាំការវាយប្រហារដ៏គួរឲ្យភ្ញាក់ផ្អើលមួយនៅប្រទេសអ៊ីស្រាអែលភាគខាងត្បូង កាលពីថ្ងៃទី៧ ខែតុលា ដែលបានសម្លាប់មនុស្សប្រហែល ១.២០០នាក់ និងចាប់ចំណាប់ថ្នូរចំនួន ២៥០នាក់ទៀត។ ការទម្លាក់គ្រាប់បែកជាបន្តបន្ទាប់របស់អ៊ីស្រាអែល និងការវាយលុកជើងគោក នៅតំបន់ហ្កាហ្សាស្ទ្រីប បានសម្លាប់ជនជាតិប៉ាឡេស្ទីនជាង ៣២.០០០ នាក់នៅទីនោះ នេះបើយោងតាមមន្ត្រីសុខាភិបាលក្នុងតំបន់។ ចាប់តាំងពីពេលនោះមក អំពើហិង្សានៅតាមបណ្តោយព្រំដែន លីបង់-អ៊ីស្រាអែល កាន់តែខ្លាំងឡើង ធ្វើឲ្យមនុស្សរាប់ម៉ឺននាក់ ភៀសខ្លួនទាំងសងខាង។លោក តាក់គូស បាននិយាយថា ខ្លួនជឿថា អ៊ីស្រាអែលមានមហិច្ឆតា ក្នុងការដណ្តើមយកទឹកដីបន្ថែមទៀត «មិនត្រឹមតែនៅក្នុងប៉ាឡេស្ទីនប៉ុណ្ណោះទេ ថែមទាំងនៅក្នុងប្រទេសលីបង់ផងដែរ»។

បណ្ដាញសង្គម

ព័ត៌មានថ្មីៗ

អ៊ីរ៉ង់បញ្ជាក់ថា ខ្លួនបានបាញ់ទម្លាក់យានដ្រូន MQ-9 ផលិតនៅអាមេរិក នៅខេត្ត Hormozgan
08/14/2026 08:08 PM
Facebook Telegram Linkin
សមាជិកសភាកោះ​តៃវ៉ាន់ អនុម័តថវិកាឆ្នាំ២០២៦ ក្រោយ​ពន្យារពេលយ៉ាង​យូរ​បំផុត​
08/14/2026 08:08 PM
Facebook Telegram Linkin
ចៅក្រមសម្រេចឃុំខ្លួនបណ្ដោះអាសន្នស្ដ្រីដែលជេរប្រមាថកងទ័ព
08/14/2026 08:08 PM
Facebook Telegram Linkin
អ្នកបើកបាត់​បង់ជីវិត បន្ទាប់​ពី​​ឧទ្ធម្ភាគចក្រធ្លាក់​នៅភាគខាងកើតអាល្លឺម៉ង់
08/14/2026 08:08 PM
Facebook Telegram Linkin
មន្ត្រី៖ អាមេរិកចង់ឱ្យលោក Netanyahu ថ្កោលទោសការឡោម​ព័ទ្ធ​របស់​អ្នកតាំងលំនៅ ក្នុងភូមិប៉ាឡេស្ទីន
08/14/2026 08:08 PM
Facebook Telegram Linkin
ការលេចធ្លាយឧស្ម័នពុល បណ្ដាល​ឱ្យ​កម្មករយ៉ាងតិច​ ៨នាក់ស្លាប់ នៅរោងចក្រ​រុះរើ​​នាវារបស់​បង់ក្លាដែស
08/14/2026 07:08 PM
Facebook Telegram Linkin
រុស្ស៊ីច្រានចោលគំនិតឱ្យ​មាន​បទឈប់បាញ់ នៅសមុទ្រខ្មៅ ក្រោយ​អ៊ុយក្រែន​លើកឡើង​
08/14/2026 07:08 PM
Facebook Telegram Linkin
លោក Marcos មើលឃើញលទ្ធភាពមាន​កិច្ចព្រមព្រៀងប្រេង និងឧស្ម័នរួមជាមួយចិន តែ​មិនផ្តល់ពេលវេលាជាក់លាក់​
08/14/2026 07:08 PM
Facebook Telegram Linkin
រយៈពេល២ឆ្នាំ បទល្មើសឆ្លងដែនពីវៀតណាម ឡាវ មកកម្ពុជាមាន ១៣៥៥ករណី និងឃាត់ខ្លួនជនល្មើសជាង ២ពាន់នាក់
08/14/2026 07:08 PM
Facebook Telegram Linkin
មជ្ឈមណ្ឌលបណ្តុះធុរកិច្ចថ្មីតេជោ ដាក់ឱ្យដំណើរការកម្មវិធីរដូវកាលទី៦ ដើម្បីប្រកួតប្រជែងប្រាក់លាន
08/14/2026 07:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.