BTV NEWS

ក្រុមហ៊ុនហ្វីលីពីន បង្ហាញការចាប់អារម្មណ៍ខ្ពស់ក្នុងការស្វែងរកកាលានុវត្តភាពវិនិយោគនៅកម្ពុជា

កម្ពុជា-ម៉ាឡេស៊ី ប្ដេជ្ញាជំរុញកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅ និង ទូលំទូលាយបន្ថែមទៀត

សម្តេចធិបតីនាយករដ្ឋមន្ត្រី អនុញ្ញាតជូន ប្រធានសភាពាណិជ្ជកម្ម និងឧស្សាហកម្មហ្វីលីពីន ចូលជួបសំដែងការគួរសម និងពិភាក្សាការងារ

កម្ពុជា-ឡាវ-វៀតណាម ឯកភាពបន្តជំរុញកិច្ចសហប្រតិបត្តិការលើគ្រប់វិស័យឱ្យកាន់តែជិតស្និទ្ធ

នយោបាយ និង ការអភិវឌ្ឍន៍

ប្រទេសចិន អនុញ្ញាតឲ្យហ្វីលីពីន ផ្គត់ផ្គង់ទាហាននៅតំបន់ថ្មប៉ប្រះទឹកដែលមានជម្លោះ

កងឆ្មាំល្បាតឆ្នេរចិនបាននិយាយថា ខ្លួនបានធ្វើ «ការរៀបចំពិសេសបណ្តោះអាសន្ន» ដើម្បីអនុញ្ញាតឱ្យហ្វីលីពីន ដឹកជញ្ជូនការផ្គត់ផ្គង់ដល់កងទ័ពនៅលើនាវាសម័យសង្គ្រាមលោកលើកទី២ ដែលត្រូវបានចុះចតនៅតំបន់ថ្មប៉ប្រះទឹកដែលមានជម្លោះ។ឆ្មាំល្បាតឆ្នេរចិន កាលពីមុនបានដាក់ពង្រាយនាវាដើម្បីរារាំងបេសកកម្មរបស់ហ្វីលីពីន ក្នុងការផ្គត់ផ្គង់កងទ័ពនៅលើនាវាដឹកជញ្ជូននោះ ដែលបានក្លាយជាបន្ទាយយោធានៅឯតំបន់ប៉ប្រះទឹក ថូម៉ាស សូល (Thomas Shoal) ទីពីរដែលមានចម្ងាយ ១៩០ គីឡូម៉ែត្រពីកោះប៉ាឡាវ៉ាន់ (Palawan) របស់ប្រទេសហ្វីលីពីន។នៅក្នុងសេចក្តីថ្លែងការណ៍មួយនៅលើគណនីបណ្ដាញសង្គម វី ឆែត (WeChat) ផ្លូវការរបស់ខ្លួនកាលពីល្ងាចថ្ងៃសៅរ៍ ឆ្មាំល្បាតឆ្នេរចិនបាននិយាយថា ខ្លួនបានអនុញ្ញាតឱ្យមានការផ្គត់ផ្គង់ចាំបាច់ ប៉ុន្តែក៏និយាយថាខ្លួននឹងការពារយ៉ាងម៉ឺងម៉ាត់ចំពោះអធិបតេយ្យភាព និងសិទ្ធិដែនសមុទ្រ និងផលប្រយោជន៍របស់ចិននៅឯតំបន់ប៉ប្រះទឹក ថូម៉ាស សូល ទីពីរ និងដែនទឹកដែលនៅជិតនោះផងដែរ។ប្រទេសចិន ដែលទាមទារអធិបតេយ្យភាពលើស្ទើរតែទាំងមូលលើសមុទ្រចិនខាងត្បូង បានបង្ហាញបន្ទាត់នៅលើផែនទីរបស់ខ្លួន ដែលកាត់ចូលទៅក្នុងតំបន់សេដ្ឋកិច្ចផ្តាច់មុខរបស់វៀតណាម ហ្វីលីពីន ម៉ាឡេស៊ី ប្រ៊ុយណេ និងឥណ្ឌូនេស៊ី៕

លោកBiden ប្ដេជ្ញាឆ្លើយតបក្រោយការវាយប្រហារដោយដ្រូនរបស់ក្រុមគាំទ្រដោយអ៊ីរ៉ង់ សម្លាប់ទាហានអាមេរិក៣នាក់ នៅហ្ស៊ដានី

លោកប្រធានាធិបតី Joe Biden និងក្រុមមន្ត្រីអាមេរិកបាននិយាយកាលពីថ្ងៃអាទិត្យ ២៨ មករា ថា ទាហានអាមេរិក៣នាក់បានស្លាប់ និងរាប់សិបនាក់បានរងរបួស អំឡុងពេលការវាយប្រហារដោយយានដ្រូនលើកងកម្លាំងអាមេរិកដែលឈរជើងនៅភាគឦសានប្រទេសហ្ស៊កដានីក្បែរព្រំដែន ស៊ីរី។ លោក Biden បានស្តីបន្ទោសក្រុមគាំទ្រដោយអ៊ីរ៉ង់ចំពោះការវាយប្រហារនេះ ដែលជាការវាយប្រហារដ៏សាហាវលើកដំបូងប្រឆាំងនឹងកងកម្លាំងសហរដ្ឋអាមេរិក ចាប់តាំងពីសង្គ្រាមអ៊ីស្រាអែល និងក្រុមហាម៉ាស បានផ្ទុះឡើងកាលពីខែតុលា ដោយបានបញ្ជូនរលកដ៏រន្ធត់នៅទូទាំងមជ្ឈិមបូព៌ា។លោក Biden បាននិយាយនៅក្នុងសេចក្តីថ្លែងការណ៍មួយថា ស្របពេលយើងនៅតែកំពុងប្រមូលការពិតនៃការវាយប្រហារនេះនៅឡើយ យើងដឹងថាសកម្មភាពនេះត្រូវបានបង្កឡើងដោយក្រុមសកម្មប្រយុទ្ធ គាំទ្រដោយអ៊ីរ៉ង់ដែលកំពុងប្រតិបត្តិការនៅក្នុងប្រទេសស៊ីរី និងអ៊ីរ៉ាក់។លោកបានបញ្ជាក់ថា កុំមានការសង្ស័យ យើងនឹងចាប់អ្នកទទួលខុសត្រូវទាំងអស់ក្នុងពេលណាមួយ និងតាមរបៀបនៃការជ្រើសរើសរបស់យើង។ ក្រោយមកលោក Biden បានស្នើសុំឱ្យមានភាពស្ងៀមស្ងាត់មួយរយៈសម្រាប់ទាហានដែលត្រូវបានសម្លាប់ទាំងបីនាក់ក្នុងអំឡុងព្រឹត្តិការណ៍យុទ្ធនាការមួយនៅរដ្ឋ South Carolina ដោយបន្ថែមថា យើងនឹងឆ្លើយតបវិញ។ចំណែករដ្ឋមន្ត្រីការពារជាតិអាមេរិក លោកឡយអូស្ទីន(Lloyd Austin)បន្ទរការគំរាមកំហែងនោះ។ លោក និងមន្ត្រីជាន់ខ្ពស់ផ្សេងទៀតបានផ្ដល់របាយការណ៍ដល់លោក Biden នៅមុនថ្ងៃនៃការវាយប្រហារនេះ។មន្ត្រីអាមេរិកម្នាក់បានប្រាប់សារព័ត៌មាន Reuters ដោយសុំមិនបញ្ចេញឈ្មោះថា យ៉ាងហោចណាស់ទាហាន៣៤នាក់ត្រូវបានវាយតម្លៃសម្រាប់របួសខួរក្បាលដែលអាចកើតមាន។ មន្ត្រីពីរនាក់ផ្សេងគ្នាបាននិយាយថា កងកម្លាំងអាមេរិកដែលរងរបួសមួយចំនួនត្រូវបានជម្លៀសចេញពីមូលដ្ឋាននោះ ដើម្បីព្យាបាលបន្ថែមទៀត។ មន្ត្រីម្នាក់បាននិយាយថា អ្នករបួសមួយចំនួនតូចស្ថិតក្នុងស្ថានភាពធ្ងន់ធ្ងរ ប៉ុន្តែមានស្ថេរភាពនឹងនរហើយ៕

កូរ៉េខាងជើង សាកល្បងមីស៊ីលតម្រង់គោលដៅដែលបាញ់ចេញពីនាវាមុជទឹក

ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃចន្ទ (២៩ មករា) នេះថាប្រទេសកូរ៉េខាងជើង បានសាកល្បងមីស៊ីលតម្រង់គោលដៅយុទ្ធសាស្ត្រថ្មីរបស់ខ្លួនជាលើកទីពីរក្នុងរយៈពេលមួយសប្តាហ៍កាលពីថ្ងៃអាទិត្យ ដោយបានហៅវាថាជាមីស៊ីលតម្រង់គោលដៅដែលបាញ់ចេញពីនាវាមុជទឹក (SLCM) ដែលជាការបង្កើនល្បឿននៃអាវុធនុយក្លេអ៊ែររបស់កងទ័ពជើងទឹករបស់ខ្លួន។មេដឹកនាំកូរ៉េខាងជើង លោក គីម ជុងអ៊ុន បានត្រួតពិនិត្យការសាកល្បងមីស៊ីលនេះ ដែលមានឈ្មោះថា «ភូលវ៉ាសាល-៣-៣១» (Pulhwasal-3-31) ដែលមានលក្ខណៈដូចគ្នាបេះបិទទៅនឹងមីស៊ីលតម្រង់គោលដៅ ដែលកូរ៉េខាងជើងបាននិយាយកាលពីសប្តាហ៍មុនថា កំពុងស្ថិតក្រោមការអភិវឌ្ឍន៍។ប្រព័ន្ធផ្សព្វផ្សាយ KCNA បាននិយាយថា លោក គីម បានហៅការសាកល្បងនេះថាជាភាពជោគជ័យមួយ «ដែលមានសារៈសំខាន់ជាយុទ្ធសាស្រ្តក្នុងការអនុវត្តផែនការសម្រាប់ការធ្វើទំនើបកម្មកងទ័ព ដែលមានបំណងកសាងកម្លាំងទ័ពជើងទឹកដ៏មានឥទ្ធិពល»។ យោធាកូរ៉េខាងត្បូង បាននិយាយកាលពីថ្ងៃអាទិត្យថា កូរ៉េខាងជើង បានបាញ់មីស៊ីលតម្រង់គោលដៅជាច្រើនគ្រាប់ចេញពីឆ្នេរសមុទ្ររបស់ខ្លួន ប៉ុន្តែមិនបានផ្តល់ព័ត៌មានលម្អិតទេ។កាលពីសប្តាហ៍មុន កូរ៉េខាងជើងបាននិយាយថា ខ្លួនបានសាកល្បងមីស៊ីលតម្រង់គោលដៅយុទ្ធសាស្ត្រថ្មីមួយ ដោយបង្ហាញថាវាត្រូវបានរចនាឡើងដើម្បីបំពាក់ក្បាលគ្រាប់នុយក្លេអ៊ែរ ប៉ុន្តែនៅពេលនោះមិនបាននិយាយពីថាមីស៊ីលនេះកំពុងត្រូវបានបង្កើតឡើងសម្រាប់ការបាញ់បង្ហោះពីនាវាមុជទឹកនោះទេ៕

លោកជំទាវបណ្ឌិត ពេជ ចន្ទមុន្នី ដឹកនាំក្រុមគ្រូពេទ្យ TYDA ចុះព្យាបាលជំងឺទូទៅជូនពលរដ្ឋនៅស្រុកជុំគិរី

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្ដេចតេជោ (TYDA) បានដឹកនាំក្រុមការងារ និងកម្លាំងស្ម័គ្រចិត្តចុះពិនិត្យព្យាបាលជំងឺទូទៅ ជំងឺមាត់ធ្មេញ សន្លាក់ ភ្នែក បេះដូង សួត ជូនដល់ប្រជាពលរដ្ឋ ចំនួន ៣៥១២នាក់ ស្មើនិង ៥៣៨៤ករណី រស់នៅក្នុងស្រុកជុំគិរី ខេត្តកំពត ស្ថិតនៅក្នុងបរិវេណអនុវិទ្យាល័យខ្ជាយ ដោយមានការចូលរួមពីថ្នាក់ដឹកនាំក្រុមការងារកម្លាំងស្ម័គ្រចិត្តនៃសមាគម TYDA និងអាជ្ញាធរ យុវជន និងផ្នែកដែលពាក់ព័ន្ធផ្សេងទៀត។មានប្រសាសន៍សំណេះសំណាលជាមួយប្រជាពលរដ្ឋនាឱកាសនោះ លោកជំទាវបណ្ឌិតបានឱ្យដឹងថា សម្ដេចតេជោ ហ៊ុន សែន សម្ដេចកិត្តិព្រឹទ្ធបណ្ឌិត និងសម្តេចធិបតី លោកតែងតែយកចិត្តទុកដាក់គិតគូរអំពីសុខភាព របស់បងប្អូនប្រជាពលរដ្ឋ ជាពិសេសស្ថានភាពប្រជាពលរដ្ឋក្នុងសហគមន៍ក្រីក្រ តាមរយៈការបង្ខិតសេវាព្យាបាលជូនប្រជាពលរដ្ឋដោយឥតគិតថ្លៃ និងបានគិតគូរពីសុខទុក្ខ រួមសុខរួមទុក្ខជាមួយប្រជាពលរដ្ឋ។ជាក់ស្ដែង សមាគមគ្រូពេទ្យស្ម័គ្រចិត្តយុវជនសម្ដេចតេជោ (TYDA) បានចុះព្យាបាលបងប្អូនប្រជាពលរដ្ឋនៅតាមបណ្ដាខេត្ត សហគមន៍ អង្គការ មជ្ឈមណ្ឌលកុមារកំព្រា និងសាលារៀនជាដើម។ ប្រជាពលរដ្ឋដែលអញ្ជើញមកទទួលសេវាពិនិត្យ និងព្យាបាលសុខភាព បានអោយដឹងថា ពួកគាត់សប្បាយរីករាយណាស់ ដែលលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ដឹកនាំក្រុមគ្រូពេទ្យជំនាញៗចុះមកព្យាបាលសុខភាពពួកគាត់ស្ទើរតែដល់ខ្នងផ្ទះ និងមិនអស់ថ្លៃទៀតផង។លោកជំទាវបណ្ឌិតបញ្ជាក់ថា នេះជាសកម្មភាពមនុស្សធម៌ ក្នុងការចុះពិនិត្យព្យាបាលដល់ប្រជាពលរដ្ឋ ដោយបេះដូង ដោយទឹកចិត្ត និងស្នាមញញឹមរបស់ក្រុមគ្រូពេទ្យ កម្លាំងស្ម័គ្រចិត្ត និងក្រុមការងារ ដោយសកម្មភាពនេះបានបង្កើតឡើងជាង១០ឆ្នាំមកហើយ។សូមបញ្ជាក់តាមរបាយការណ៍បានឱ្យដឹងថា ក្រុមការងារគ្រូពេទ្យ និងកម្លាំងស្ម័គ្រចិត្តនៃសមាគម TYDA បានព្យាបាលអ្នកជំងឺបានចំនួន៣៥១២នាក់ ក្នុងនោះករណីបញ្ជូនមកព្យាបាលបន្តនៅភ្នំពេញ មានចំនួន៥៣ករណី ដែលការចំណាយទាំងអស់ក្រោមការឧបត្ថម្ភដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចបវរធិបតី ហ៊ុនម៉ានណែត និងលោកជំទាវ៕ អត្ថបទ៖ សំ ងីម

សម្តេចធិបតី៖ គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព គឺជាគោលការណ៍ចម្បងរបស់រាជរដ្ឋាភិបាលកម្ពុជា នីតិកាលទី៧នេះ

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានបញ្ជាក់អះអាងជាថ្មីថា គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព គឺជាគោលការណ៍ចម្បងរបស់រាជរដ្ឋាភិបាលកម្ពុជា នីតិកាលទី៧ នេះ ខណៈការប្រឡងជ្រើសរើសមន្រ្តីឲ្យចូលបម្រើការងារក្នុងរាជការត្រូវតែតម្លាភាព យុត្តិធម៌ពោលគឺ«ចេះគឺជាប់» «ជាប់ដោយមោទនៈ និងធ្លាក់ដោយអស់ចិត្ត»។តាមរយៈតេលេក្រាមនាល្ងាចថ្ងៃទី២៨ ខែមករា ឆ្នាំ២០២៤នេះ សម្តេចធិបតី នាយករដ្ឋមន្រ្តីបាន លើកឡើងថា «គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព គឺជាគោលការណ៍ចម្បងរបស់រាជរដ្ឋាភិបាលកម្ពុជា នីតិកាលទី៧ ក្នុងការពង្រឹងសមត្ថភាពរដ្ឋបាលសាធារណៈ ពិសេស គឺការអនុវត្តប្រព័ន្ធជ្រើសរើសមន្ត្រីចូលបម្រើការងារ ដែលនឹងក្លាយជាមូលធនមនុស្សដ៏សំខាន់ សម្រាប់ការអភិវឌ្ឍសេដ្ឋកិច្ច-សង្គម ឆ្ពោះទៅកាន់ចក្ខុវិស័យកម្ពុជា២០៣០»។ តាមរយៈតេលេក្រាមនេះដែរ សម្តេចធិបតី ក៏បានថ្លែងកោតសរសើរ និងវាយតម្លៃខ្ពស់ដល់គណៈកម្មការរៀបចំការប្រឡងប្រជែង រួមមាន៖ ក្រសួងមុខងារសាធារណៈ និងក្រសួងអប់រំ យុវជន និងកីឡា ព្រមទាំងអង្គភាពពាក់ព័ន្ធ ដែលបានសិក្សាគ្រប់ជ្រុងជ្រោយនូវលទ្ធភាពរៀបចំការប្រឡងប្រជែងនាថ្ងៃអាទិត្យ ទី២៨ ខែមករា ឆ្នាំ២០២៤ នេះ ទាំងការតាក់តែងវិញ្ញាសាច្រើនជាងមួយជម្រើស ដោយជ្រើសយកជម្រើសតែមួយ មុនការប្រឡងប្រព្រឹត្តទៅ ក៏ដូចជាសណ្តាប់ធ្នាប់មណ្ឌលប្រឡង ពោរពេញដោយភាពហ្មត់ចត់ សុក្រឹតភាព និងសង្គតិភាព ដោយឈរលើស្មារតី "ចេះ គឺជាប់" "ជាប់ដោយមោទនៈ និងធ្លាក់ដោយអស់ចិត្ត" ដើម្បីជ្រើសរើសគ្រូបង្រៀនឯកទេសអប់រំកាយ និងកីឡា ចំនួន ១០០នាក់ ចេញពីបេក្ខជនប្រឡង ១ ៨៩២នាក់ (ស្រី្ត ៥៧៩នាក់) ឱ្យចូលបម្រើការងារក្នុងក្របខណ្ឌក្រសួងអប់រំ យុវជន និងកីឡា។ក្នុងសំណេរនេះដែរ សម្តេចធិបតី នាយករដ្ឋមន្រ្តី ក៏បានលើកឡើង ដោយអំពាវនាវដល់បេក្ខជនប្រឡងប្រជែង ខិតខំឱ្យអស់ពីសមត្ថភាព ទាំងវិញ្ញាសាសរសេរនាថ្ងៃនេះ និងវិញ្ញាសាអនុវត្តន៍កីឡា នៅថ្ងៃបន្តបន្ទាប់ ដោយមិនត្រូវធ្វេសប្រហែសលើវិញ្ញាសាណាមួយឡើយ៕ អត្ថបទ៖ បាន ចក់

និស្សិតខ្មែររៀនជំនាញវិស្វកម្មអវកាស និងបច្ចេកវិទ្យា នៅសកលវិទ្យាល័យបច្ចេកវិទ្យាហាប៊ីន ប្រទេសចិន សន្យាយកជំនាញខ្លួនបម្រើដល់ប្រទេសជាតិ ក្រោយបញ្ចប់ការសិក្សា

និស្សិតខ្មែរពីររូបរៀនជំនាញនៅសកលវិទ្យាល័យបច្ចេកវិទ្យាហាប៊ីន (Harbin Institute of Technology (HIT) ប្រទេសចិន ក្នុងនោះម្នាក់រៀនជំនាញវិទ្យាសាស្រ្ត និងវិស្វកម្មអវកាស និងម្នាក់ទៀតរៀនជំនាញវិទ្យាសាស្រ្តកុំព្យូទ័រ និងបច្ចេកវិទ្យា សន្យានឹងយកចំណេះជំនាញរបស់ពួកគេបម្រើដល់ប្រទេសជាតិ ក្រោយបញ្ចប់ការសិក្សាជាអនុបណ្ឌិត នៃសកលវិទ្យាល័យដ៏ល្បីមួយនេះ។យុវជន ទា ប៉េងស៊ាង ជានិស្សិតឆ្នាំទី៣ លើជំនាញវិទ្យាសាស្ត្រ និងវិស្វកម្មអវកាស ហើយក៏ជានិស្សិតខ្មែរដំបូងផងដែរ ដែលបានចាប់ជំនាញមួយនេះនៅសកលវិទ្យាល័យបច្ចេកវិទ្យាហាប៊ីន ដោយប្អូនប្រុសសន្យាថា នឹងយកនូវជំនាញមួយនេះមកបម្រើដល់ប្រទេសជាតិ ជាមួយនឹងក្តីរំពឹង មុតមាំថា កម្ពុជានឹងអាចបង្ហោះនូវផ្កាយរណបបានដោយខ្លួនឯងនាពេលអនាគតផងដែរ។ និស្សិត ទា ប៉េងស៊ាង បានបញ្ជាក់បន្ថែមថា ជំនាញវិទ្យាសាស្ត្រ និងវិស្វកម្មអវកាសគឺសិក្សាចម្បងទៅលើមូលដ្ឋាន នៃវិទ្យាសាស្ត្រអវកាស បរិស្ថានអវកាស និងការរុករកថ្មី ក្នុងលំហអវកាស ហើយជំនាញនេះគឺសិក្សាជំនាញសំខាន់បីបញ្ចូលគ្នាដូចជា ជំនាញមេកានិច អគ្គិសនី និងវិទ្យាសា្រស្តកុំទ្យូទ័រ ហើយបច្ចេកវិទ្យាទាំងនេះ គឺប្រើក្នុងវិស័យអវកាសដូចជាវិស្វកម្មអវកាស វិស្វកម្មរុករកថ្មីលើភពព្រះចន្ទ និងផ្កាយរណបជាដើម។ដោយឡែកយុវជន ពិន ប្រាកដ ដែលជានិស្សិតឆ្នាំទី៤ សិក្សាលើជំនាញវិទ្យាសាស្ត្រកំព្យូទ័រ និងបច្ចេកវិទ្យា ក៏បានសន្យាថានឹងយកចំណេះដឹងរបស់ខ្លួនមកបម្រើដល់ប្រទេសជាតិផងដែរ ទាំងវិស័យឯកជន និងវិស័យរដ្ឋ ខណៈការសិក្សាលើជំនាញមួយនេះ គឺជាក្តីប្រាថ្នារបស់ប្អូនតាំងពីប្អូនរៀននៅសាលាបឋមភូមិមកម្លេះ។បើតាមការបញ្ជាក់របស់យុវជន ពិន ប្រាកដ សាកលវិទ្យាល័យបច្ចេកវិទ្យាហាប៊ីន ដែលហៅកាត់ថា HIT គឺជាសាកលវិទ្យាល័យកំពូលទីមួយរបស់ចិនខាងអវកាស ដែលត្រូវបានបង្កើតឡើងក្នុងឆ្នាំ១៩២០ មានទីតាំងស្ថិតនៅទីក្រុងហាប៊ីន ខេត្តហៃឡុងជាំង សាធារណរដ្ឋប្រជាមានិតចិន។ សព្វថ្ងៃ HIT មានសាខាចំនួនបី នៅទីក្រុងហាប៊ីន ទីក្រុងវៃហាយ និងទីក្រុងសិនជិន។ សកលវិទ្យាល័យបច្ចេកវិទ្យាហាប៊ីន ជាសមាជិកមួយនៃលីគ C9 (C9 League) ដែលជាលីគប្រជុំដោយសកលវិទ្យាល័យកំពូលៗទាំង 9 របស់ប្រទេសចិន។ នេះបើយោងតាមរបាយការណ៍ពិភពលោក U.S. News ឆ្នាំ ២០២៣ ហើយHIT ទទួលបានចំណាត់ថ្នាក់ លេខ ៥ទៅលើជំនាញវិស្វកម្ម, លេខ ៦ទៅលើជំនាញ AI, លេខ ៧ទៅលើជំនាញវិស្វកម្មអគ្គិសនី និងអេឡិចត្រូនិក និងលេខ ៨ទៅលើជំនាញវិស្វកម្មមេកានិក។យុវជន ពិន ប្រាកដ បានឲ្យដឹងទៀតថា ចំណុចពិសេសរបស់សកលវិទ្យាល័យបច្ចេកវិទ្យាហាប៊ីន គឺភាពឈានមុខគេក្នុងវិស័យអវកាស អាចនិយាយបានថា ជាសកលវិទ្យាល័យតែមួយគត់ក្នុងប្រទេសចិនដែលមានសមត្ថភាព រចនា ផលិត និងបាញ់បង្ហោះផ្កាយរណបដោយខ្លួនឯង គិតត្រឹមឆ្នាំ២០២៣ សកលវិទ្យាល័យនេះ បានបង្ហោះដោយជោគជ័យនូវផ្កាយរណបចំនួន ២២ គ្រឿង លើសពីនេះ បានគាំទ្រជាបច្ចេកវិទ្យាស្នូលដល់គ្រប់ការបង្ហោះយានអវកាសរបស់រដ្ឋាភិបាលចិនកន្លងមក។ ទាំងអស់នេះបង្ហាញពីភាពស្ទាត់ជំនាញទៅលើជំនាញទាំងឡាយដែលគាំទ្រឱ្យវិស័យអវកាសដូចគ្នា រួមមានវិស្វកម្ម មេកានិក អគ្គិសនី បច្ចេកវិទ្យា។ល។ជាដើម។ ប្អូនប្រុសបានបន្ថែមទៀតថា បច្ចុប្បន្ន មាននិស្សិតខ្មែរជាង៤០នាក់ បានកំពុងសិក្សានៅសកលវិទ្យាល័យដ៏ល្បីមួយនេះ ហើយការសិក្សានេះសុទ្ធតែទទួលបានអាហារូបករណ៍ ពីរដ្ឋាភិបាលចិន និងសកលវិទ្យាល័យហាប៊ីនទាំងអស់ តាមរយៈសមាគមអតីតនិស្សិតកម្ពុជា។ជាមួយគ្នានោះដែរយុវជន ពិន ប្រាកដ និងយុវជន ទា ប៉េងស៊ាង ក៏បានថ្លែងអំណរគុណចំពោះរាជរដ្ឋាភិបាលកម្ពុជា និងរដ្ឋាភិបាលចិន ដែលបានគាំទ្រ និងផ្តល់ឱកាសដល់ពួកគេ ក៏ដូចជានិស្សិតខ្មែរគ្រប់រូបដែលសិក្សានៅប្រទេសចិន ជាពិសេសគឺនៅសកលវិទ្យាល័យបច្ចេកវិទ្យាហាប៊ីននេះតែម្តង។តាមរយៈកិច្ចសម្ភាសន៍ជាមួយទូរទស្សន៍BTVនេះដែរ និស្សិតខ្មែរទាំងពីរូបក៏បានឲ្យដឹងផងដែរថា សកលវិទ្យាល័យបច្ចេកវិទ្យាហាប៊ីន ក៏បានប្រកាសបន្តផ្តល់អាហារូបករណ៍ដល់និស្សិតខ្មែរបន្តទៀតផងដែរ នូវលើមុខជំនាញជាច្រើន ជាពិសេសខាងបច្ចេកវិទ្យាអវកាស និងកុំព្យូទ័រ ជាដើមនោះ៕ អត្ថបទ៖ បាន ចក់

អ្នកនាំពាក្យ៖ «រាជរដ្ឋាភិបាលគណបក្សប្រជាជនកម្ពុជា សម្លឹងឆ្ពោះទៅគោលដៅប្រកបដោយមោទនភាព!»

កម្ពុជាដែលបានចាកចេញពីស្ថានភាពប្រទេសចំណូលទាបមកជាប្រទេសដែលមានចំណូលមធ្យមកម្រិតទាប គឺជាលទ្ធផល នៃកិច្ចខិតខំប្រឹងប្រែង និងការដឹកនាំប្រកបដោយភាពប៉ិនប្រសប់របស់រាជរដ្ឋាភិបាលគណបក្សប្រជាជនកម្ពុជា ក្នុងការអភិវឌ្ឍប្រទេសចេញពីភាពខ្ទេចខ្ទាំ នៃភ្លើងសង្គ្រាម និងរបបប្រល័យពូជសាសន៍។ពេលនេះ រាជរដ្ឋាភិបាលកំពុងបោះជំហានឆ្ពោះទៅសម្រេចគោលដៅធំៗពីរទៀតគឺ នៅឆ្នាំ២០៣០ ក្លាយជាប្រទេសដែលមានចំណូលមធ្យមកម្រិតខ្ពស់ និងឆ្នាំ២០៥០ ក្លាយជាប្រទេសដែលមានចំណូលខ្ពស់។ ដើម្បីសម្រេចគោលដៅនេះ សម្តេចធិបតី ហ៊ុន ម៉ាណែត បានដាក់ចេញយុទ្ធសាស្ត្រ បញ្ចកោណដំណាក់កាលទី១ បន្តពីយុទ្ធសាស្ត្រចតុកោណទាំង៤ដំណាក់កាលរបស់សម្តេចតេជោ ហ៊ុន សែន អតីតនាយករដ្ឋមន្ត្រីដ៏ខ្លាំងពូកែរបស់កម្ពុជា។ ចំណុចខ្លាំងរបស់រាជរដ្ឋាភិបាលគណបក្សប្រជាជនកម្ពុជានៅគ្រប់ដំណាក់កាល គឺការសម្លឹងឆ្ពោះទៅសម្រេចគោលដៅបើទោះបីជានៅតាមផ្លូវមានអ្នកចាំរារាំងដំណើរយ៉ាងណាក្តី។ សម្តេចធិបតីនាយករដ្ឋមន្ត្រីធ្លាប់លើកយកទ្រឹស្តីអតីតមេដឹកនាំលោកខាងលិចមួយរូបមកបញ្ជាក់ថា «បើរវល់តែរើសដុំថ្មគប់ឆ្កែដែលព្រុសយើងនៅតាមផ្លូវ យើងមិនអាចដើរដល់គោលដៅបានឡើយ»។ នៅកម្ពុជា ការស្តារប្រទេសចេញពីគំនរផេះនៃភ្នក់ភ្លើងសង្គ្រាម និងសោកនាដកម្មប្រល័យពូជសាសន៍ គឺជាវិញ្ញាសាដ៏លំបាកលំបិនពេកទៅហើយ។ ប៉ុន្តែ បន្ថែមពីលើនេះ នៅមានក្រុមអគតិជ្រុលនិយមមួយក្តាប់តូចដែលជ្រកក្រោមស្លាក «ប្រជាធិបតេយ្យនិងសិទ្ធិមនុស្សក្លែងក្លាយ» រង់ចាំរារាំងផ្លូវ ដើម្បីបំផ្លិចបំផ្លាញគ្រប់ដំណាក់កាល។ ទោះជាយ៉ាងនេះក្តី រាជរដ្ឋាភិបាលគណបក្សប្រជាជនកម្ពុជាមិនដែលងាកចេញពីគោលដៅរបស់ខ្លួនឡើយ។ដោយមានមេដឹកនាំខ្លាំងពូកែ មានការគាំទ្រដ៏រឹងមាំពីប្រជាពលរដ្ឋម្ចាស់ឆ្នោត និងទទួលបានកិច្ចសហការយ៉ាងពេញទំហឹងពីសហគមន៍អន្តរជាតិ រាជរដ្ឋាភិបាលកម្ពុជាពិតជាមានថាមពលដ៏ខ្លាំងក្លាក្នុងការឈានឆ្ពោះទៅសម្រេចគោលដៅឆ្នាំ២០៣០ និង២០៥០ របស់ខ្លួន។ ការរក្សាបានសុខសន្តិភាព ស្ថិរភាពនយោបាយ និងប្រក្រតីភាពនៃការអភិវឌ្ឍប្រទេស គឺជាអាទិភាពចម្បងទី១ និងជាមូលដ្ឋានគ្រឹះដ៏រឹងមាំសម្រាប់ឈានឆ្ពោះទៅសម្រេចគោលដៅនេះ។ ប្រជាពលរដ្ឋខ្មែរគ្រប់រូបកំពុងចូលរួមយ៉ាងសកម្មជាមួយរាជរដ្ឋាភិបាលដឹកនាំដោយសម្តេចធិបតី ហ៊ុន ម៉ាណែត ដើម្បីសម្រេចគោលដៅប្រកបដោយមោទនភាពនេះក្នុងរយៈពេលមិនយូរប៉ុន្មានខាងមុខ៕

យុវជនក្រីក្រ និងរងហានីភ័យជិត ៣០០នាក់ នៅទីក្រុងតេជោសែន រុនតាឯក បានចុះឈ្មោះរៀនជំនាញវិជ្ជាជីវៈ ជំហ៊ានទីមួយ

យុវជនក្រីក្រ និងរងហានីភ័យជិត ៣០០នាក់ នៅទីក្រុងតេជោសែន រុនតាឯក បានចុះឈ្មោះរៀនជំនាញបច្ចេកទេសវិជ្ជាជីវៈ ដោយមិនគិតថ្លៃ ក្នុងជំហ៊ានទីមួយ ដែលការចុះឈ្មោះនេះ បានចាប់ផ្ដើមចូលរៀនជាបណ្ដើរៗ នៅអាគារអនុវិទ្យាល័យ ក្រុងតេជោសែន រុនតាឯក ខេត្ដសៀមរាប។លោក រ៉ាត រតនៈ នាកយករង វិទ្យាស្ថានជាតិពហុបច្ចេកទេសអង្គរ មានប្រសាសន៍ថា យុវជនចំនួន ២៧២នាក់នោះបានចុះក្នុងបញ្ជីឈ្មោះរួចរាល់ ដោយរៀនមុខជំនាញ ឆុងកាហ្វេ ផលិតនំ ការតបណ្ដាញអគ្គិសនីក្នុងអាគារ ការជួសជុល និងថែទាំរថយន្ដ និងបរិស្ថានម៉ាស៊ីត្រជាក់ ។ លោកបានបន្ដថា ក្នុងនោះយុវជនមានប័ណ្ណក្រីក្រ នឹងទទួលបានប្រាក់ឧបត្ថម្ភ ២៨ម៉ឺនក្នុងមួយខែថែមទៀតផង ហើយបានចាប់ផ្ដើមបណ្ដុះបណ្ដាលបណ្ដើរៗ សម្រាប់ថ្ងៃសៅរិ៍ និងថ្ងៃអាទិត្យ។ ការបណ្ដុះបណ្ដាលជំនាញវិជ្ជាជីវៈដល់យុវជននេះ ទៅតាមអនុសាសន៍សម្ដេចបវរធិបតី ហ៊ុន ម៉ាណែត នាយករដ្ឋមន្ដ្រី ដែលធ្វើយ៉ាងណាផ្ដល់ជំនាញដល់ពួកគាត់ក្នុងតំបន់អភិវឌ្ឍន៍រុនតាឯក។ លោកបន្ដថា ការផ្ដល់ជំនាញវិជ្ជាជីវៈដល់យុវជននេះ មិនមែនមានតែយុវជននៅក្រុងតេជោសែន រុនតាឯកនោះទេ គឺធ្វើឡើងទាំង១២ក្រុងស្រុក នៃខេត្ដសៀមរាប។ កន្លែងបណ្ដុះបណ្ដាលមានពីរទីតាំង គឺធ្វើឡើងនៅវិទ្យាស្ថានជាតិពហុបច្ចេកទេសអង្គរ និងនៅអគារសិក្សាអនុវិទ្យាល័យតេជោសែនរុនតាឯក។ លោកថា ក្រោយពីពួកគាត់បានបញ្ចប់ការសិក្សានឹងទទួលបានចុះកម្មសិក្សាផ្ទាល់ជាមួយក្រុមហ៊ុនវិស័យឯកជន ឬសហគ្រាស យ៉ាងតិចរយៈពេល២សប្ដាហ៍ ហើយអាចជួយសម្របសម្រួលការងារដល់ពួកគាត់ផងដែរ។កាសិក្សាមានបីវេន ដែលវេនទីមួយពេលថ្ងៃ ចាប់ពីថ្ងៃចន្ទ ដល់ថ្ងៃសុក្រ មានរយៈពេល៤ខែ ។វេនទី២ សិក្សានៅថ្ងៃសៅរ និងថ្ងៃអាទិត្យ មានរយៈពេល១០ខែ និងវេនទី៣ពេលយប់ ចាប់ពីថ្ងៃចន្ទដល់ថ្ងៃសុក្រ មានរយៈពេល៨ខែ។លោក រ៉ាត រតនៈ បានបន្ថែមថា ក្នុងការអនុវត្ដន៍គម្រោងបណ្ដុះបណ្ដាលជំនាញដល់យុវជនក្រីក្រ និងរងហានីភ័យចំនួន១.៥លាន់ ក្នុងរយៈពេល៥ឆ្នាំរបស់រាជរដ្ឋាភិបាល ក្នុងខេត្ដសៀមរាប នឹងទទួលចុះឈ្មោះយុវជនក្រីក្រ និងរងហារនីភ័យ មានប្រមាណជាង៦ពាន់នាក់ ប៉ុន្ដែសម្រាប់ជំហ៊ានទី១នេះ វិទ្យាស្ថានជាតិពហុបច្ចេកទេសអង្គរ បានទទួលចុះឈ្មោះរួចរាល់ជាង៦០០នាក់ ក្នុងនៅតំបន់អភិវឌ្ឍន៍រុនតាឯក២៧២នាក់៕

សប្តាហ៍ក្រោយនេះស្ពានអាកាសតេជោថ្មីនឹងធ្វើពិធីតភ្ជាប់ក្នុងដំណាក់កាលទី១

នៅថ្ងៃចន្ទដើមសប្តាហ៍ក្រោយនេះ ស្ពានអាកាសតេជោថ្មីនឹងធ្វើពិធីតភ្ជាប់ និងគ្រោងបញ្ចប់ការសាងសង់ដំណាក់កាលទី១ នៅចុងខែមីនា។នៅថ្ងៃទី២៩ ខែមករា ឆ្នាំ២០២៤ស្អែកនេះ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ នឹងអញ្ជើញជាគណៈអធិបតីក្នុងពិធីភ្ជាប់ស្ពានអាកាសតេជោថ្មី ស្ថិតនៅចំណុចប្រសព្វរវាងមហាវិថីព្រះមុនីវង្ស មហាវិថីសម្តេចតេជោ ហ៊ុន សែន និងមហាវិថីយោធពលខេមរភូមិន្ទ ឬហៅផ្លូវលេខ ២៧១។ នេះបើយោងតាមលោក កើត ឆែ អភិបាលរងរាជធានីភ្នំពេញបានឱ្យដឹង តាមរយៈហ្វេសប៊ុករបស់លោកនៅល្ងាចថ្ងៃទី២៧ ខែមករា ឆ្នាំ២០២៤។លោក កើត ឆែ បន្ថែមថា ក្នុងដំណាក់កាលទី១ ការសាងសង់ស្ពានអាកាសតេជោថ្មី ដែលជាស្ពានអាកាសជាន់ទី២ បច្ចុប្បន្នសាងសង់សម្រេចបានប្រមាណ ៨០% ហើយតាមផែនការគ្រោងនឹងត្រូវបញ្ចប់នៅចុងខែមីនា ឆ្នាំ២០២៤ ខាងមុខនេះ។ ចំណែកដំណាក់កាលទី២ គ្រោងនឹងបញ្ចប់មុនចូលឆ្នាំប្រពៃណីជាតិខ្មែរ ឆ្នាំ២០២៥។ សមិទ្ធផលថ្មីបន្តបន្ទាប់ទៀតនឹងលេចរូបរាងឡើង ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។សូមជម្រាបថា ការសាងសង់ស្ពានអាកាសតេជោ គឺដើម្បីសម្រួលការធ្វើចរាចរណ៍ក្នុងរាជធានីភ្នំពេញ ដែលមានកំណើនយានយន្ត និងការធ្វើចរាចរណ៍កាន់តែច្រើនឡើងពីមួយឆ្នាំទៅមួយឆ្នាំ។ ស្ពានអាកាសនេះ សាងសង់ដោយក្រុមហ៊ុនវិនិយោគទុនអាណិកជនកម្ពុជា OCIC គ្រោងចំណាយថវិកាជាង ៣៦លានដុល្លារ និងចំណាយពេលវេលាសាងសង់ ៣៦ខែ។គម្រោងស្ពានអាកាសតេជោ មានសាងសង់ផ្លូវផ្ទាល់ដី ដែលមានរង្វង់មូលបែងចែកទិស និងផ្លូវតភ្ជាប់រវាងមហាវិថីព្រះមុនីវង្ស មហាវិថីសម្តេចតេជោ ហ៊ុន សែន មហាវិថីកងយោធពលខេមរភូមិន្ទ ឆ្ពោះទៅស្ពានព្រះមុនីវង្ស និងផ្លូវជាតិលេខ២។ បន្ទាប់មកសាងសង់ស្ពានអាកាសចំនួនពីរជាន់។ ស្ពានអាកាសជាន់ទី១ ជាស្ពានរង្វង់មូល នៅត្រង់ចំណុចប្រសព្វ ដែលបំបែកខ្នែងជាបួនទិសផ្សេងគ្នា ទៅកាន់មហាវិថីសម្តេចតេជោ ហ៊ុន សែន ស្ពានព្រះមុនីវង្ស មហាវិថីព្រះមុនីវង្ស និងមហាវិថីកងយោធពលខេមរភូមិន្ទ។ ស្ពានអាកាសជាន់ទី២ ជាផ្លូវទ្វេទិស មានទិសដៅទៅមក រវាងមហាវិថីព្រះមុនីវង្ស និងមហាវិថីសម្តេចតេជោ ហ៊ុន សែន។ ក្រៅពីស្ពានអាកាសតេជោ រដ្ឋបាលរាជធានីភ្នំពេញក៏បានត្រៀមដំណើរការការដ្ឋានសាងសង់ស្ពានអាកាសមួយកន្លែងទៀតស្ថិតនៅចំណុចប្រសព្វមហាវិថីសហព័ន្ធរុស្ស៉ី ជាមួយមហាវិថីសម្ដេចចៅហ្វាវាំងវរវៀងជ័យអធិបតីស្រឹង្គារ គង់ សំអុល ហៅផ្លូវលេខ២០០៤ ក្នុងខណ្ឌពោធិ៍សែនជ័យ។បច្ចុប្បន្ននៅក្នុងរាជធានីភ្នំពេញ មានស្ពានអាកាសចំនួន៧ ដែលបានសាងសង់រួចរាល់ និងកំពុងប្រើប្រាស់ រួមមាន ស្ពានអាកាសក្បាលថ្នល់ ស្ពានអាកាស៧មករា ស្ពានអាកាសស្ទឹងមានជ័យ ស្ពានអាកាស៥មករា ស្ពានអាកាសមិត្តភាពកម្ពុជា-ចិន សែនសុខ ឬហៅថា ស្ពានអាកាសផ្សារដីហ៊ុយ ស្ពានអាកាសចោមចៅ និងស្ពានអាកាសលើផ្លូវជាតិលេខ៥ ឫស្សីកែវ៕ អត្ថបទ៖ ប្រាក់ វ៉ាន់ដា

អាជ្ញាធរខេត្តព្រះវិហារ បើកសន្និសីទសារព័ត៌មាន បកស្រាយអំពីបញ្ហា ទំនាស់ដីធ្លីរវាងប្រជាពលរដ្ឋ ជាមួយក្រុមហ៊ុនស្ករអំពៅចិន ស្រុកឆែប

អាជ្ញាធរខេត្តព្រះវិហារ បានបើកសន្និសីទសារព័ត៌មានមួយ ដើម្បីបកស្រាយអំពី បញ្ហាដែលកើតឡើង និងបានចុះផ្សាយពីទំនាស់ដីធ្លី រវាងប្រជាពលរដ្ឋ ជាមួយក្រុមហ៊ុន ស្ករអំពៅចិន នៅស្រុកឆែប។សន្និសីទនេះ បានរៀបចំឡើងនៅរសៀលថ្ងៃទី២៦ ខែមករា ឆ្នាំ២០២៤ ក្រោមវត្តមាន លោក ណុប វុធ្ធី អភិបាលរងខេត្ត តំណាងឯកឧត្តម គីម រិទ្ធី អភិបាលនៃគណៈអភិបាលខេត្ត ដោយមានការចូលរួមពីសំណាក់ លោកស្រី ហែម សុគុណពិសី ប្រធានមន្ទីរព័ត៌មានខេត្ត ព្រម ទាំងមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្ត តំណាងមន្ទីរកសិកម្ម រុក្ខាប្រមាញ់ និងនេសាទខេត្ត លោកអភិបាលស្រុកឆែប និងមន្ត្រីពាក់ព័ន្ធជាច្រើនរូបទៀត។លោក ស សាវេត អនុប្រធានមន្ទីររៀបចំដែនដី នគរូបនីយកម្ម សំណង់ និងសូរិយោដី ខេត្តព្រះវិហារ បានថ្លែងថា ក្រុមហ៊ុនអំពៅចិនចំនួន៥ ជាសម្ព័ន្ធក្រុមហ៊ុនចិនតែមួយ ក្នុងកិច្ចសហការចុះកិច្ចសន្យាជួលដីរដ្ឋដែលបានចុះបញ្ជីរួច រយៈពេល៥០ឆ្នាំ សម្រាប់ធ្វើការ វិនិយោគទៅលើដំណាំអំពៅ និងអាកាស្យា នៅលើផ្ទៃដីចំនួនជាង ២០,១៧៨ហិកតា ស្ថិតក្នុង ភូមិសាស្ដ្រត្បែងមានជ័យ ស្រុកឆែប និងស្រុកជ័យសែន។ទាក់ទិនទៅនឹងការចុះផ្សាយរបស់វិទ្យុ VOD Khmer ដែលមានខ្លឹមសារថា “ក្រុមហ៊ុនអំពៅ ចិនទៅទន្ទ្រានឈូសឆាយលើដីចំការរបស់ប្រជាពលរដ្ឋដែលជាជនជាតិដើមភាគតិច បានប្រើ ប្រាស់ និងអាស្រ័យផលជាយូរណាស់មកហើយ” នោះ លោកថា គឺជាការបំភ្លើសទាំងស្រុង ខណៈដីទាំង ៦០ហិកតានោះ ស្ថិតក្នុងទំហំផ្ទៃដីទាំង ៦,៦៦៤ហិកតាជាង ដែលបានចុះបញ្ជី ទៅឱ្យក្រុមហ៊ុនរួយហ្វេង ដែលជាក្រុមហ៊ុនមួយក្នុងចំណោមក្រុមហ៊ុនទាំង៥ ពោលគឺជាដីរបស់ រដ្ឋដែលបានចុះបញ្ជីរួច ដែលមានក្រសួងកសិកម្ម រុក្ខាប្រមាញ់ និងនេសាទជាតំណាងនីតិបុគ្គល ហើយក៏ត្រូវ បានចេញវិញ្ញាបនបត្រសម្គាល់សិទ្ធសម្បទានសេដ្ឋកិច្ច ជូនក្រុមហ៊ុនរួយហ្វេងរួច រាល់ហើយដែរ។លោក ស្រ៊ុន បូរិន អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្ត ក៏បានបញ្ជាក់ ឱ្យដឹងថា នៅមុនអំឡុងពេលរាតត្បាតជំងឺកូវីដ-១៩ ក្រុមហ៊ុនស្ករអំពៅចិនបានបន្ថយសកម្មភាព របស់ខ្លួនមួយចំនួន និងអំឡុងពេលកូវីដ-១៩ ក្រុមហ៊ុនក៏បានផ្អាកសកម្មភាពបណ្ដោះអាសន្ន ជាហេតុធ្វើឱ្យបងប្អូនប្រជាពលរដ្ឋយើងមួយចំនួន បានចូលអាស្រ័យផលដំដំណាំផ្សេងៗ ប៉ុន្តែ ដោយការយោគយល់របស់អាជ្ញាធរខេត្តព្រះវិហារ គឺបានឱ្យបងប្អូនប្រជាពលរដ្ឋយើង ធ្វើកិច្ច សន្យា ពេលដែលប្រមូលផលរួចត្រូវបញ្ឈប់ការដាំដុះលើដីវិនិយោគនេះតទៅទៀត តែពីមួយឆ្នាំ ទៅមួយឆ្នាំ ពីមួយរដូវទៅមួយរដូវ បងប្អូននៅតែបន្តដាំដំណាំលើដីនេះដដែល។លោកថា អ្វីដែលសំខាន់គឺក្រុមហ៊ុនបានបង់ពន្ធជូនរដ្ឋជារៀងរាល់ឆ្នាំ គឺផ្ទុយពីការចុះ ផ្សាយកន្លងទៅថ្មីៗ ថាក្រុមហ៊ុនស្ករអំពៅចិននៅស្រុកឆែប ខេត្តព្រះវិហារបានក្ស័យធន់ ក៏ដូចជាមិនដំណើរការ ។ ជាក់ស្ដែងនៅឆ្នាំ២០២៤នេះ ក្រុមហ៊ុនស្ករអំពៅចិនមានគម្រោង ស្នើសុំច្បាប់អនុញ្ញាតក្នុងការផ្លាស់ប្ដូរប្រភេទដំណាំពីដំណាំកសិឧស្សាហកម្ម មានអំពៅ និងអាកា ស្យា ដែលបានចុះបញ្ជីកន្លងទៅ ប្ដូរមកវិនិយោគដំណាំបែបសាកវប្បកម្ម មានម្រេច ដំឡូង និង ស្រូវជាដើម។ក្នុងឱកាសនោះ លោក ណុប វុធ្ធី អភិបាលរងខេត្តព្រះវិហារ បានមានប្រសាសន៍ថា ដោយអនុវត្តតាមអនុសាសន៍របស់ ឯកឧត្តម គីម រិទ្ធី អភិបាលខេត្តព្រះវិហារ គឺយកយន្តការ ដោះស្រាយក្រៅប្រព័ន្ធតុលាការ ដោយអាជ្ញាធរខេត្ត មិនចង់ឃើញបងប្អូនមានទោសទ័ណ្ឌ នោះទេ តែងព្យាយាមដោះស្រាយសម្របសម្រួល ក៏ដូចជាការអំពាវនាវឱ្យបងប្អូនប្រជាពលរដ្ឋ យើងត្រូវគោរពច្បាប់ ដើម្បីផ្តល់ឱកាសឱ្យក្រុមហ៊ុនធ្វើការអភិវឌ្ឍតទៅទៀត។លោកអភិបាលរងខេត្ត ក៏បានបញ្ជាក់ច្បាស់ៗថា ដីសម្បទានសេដ្ឋកិច្ច ចំនួនជាង ២០,៧៧៨ ហិកតា របស់ក្រុមហ៊ុនស្ករអំពៅចិននេះ គឺជាដីឯកជនរបស់រដ្ឋ ក្រុមហ៊ុនគ្រាន់តែទទួលសិទ្ធ វិនិយោគ ដោយប្រើប្រាស់អាស្រ័យផល តាមកិច្ចសន្យាដែលបានកំណត់ជាក់លាក់ ក្រោយចប់ កិច្ចសន្យា ដីនោះហ្នឹងក្លាយជាដីរដ្ឋដដែល។

បណ្ដាញសង្គម

ព័ត៌មានថ្មីៗ

ផ្ទះទេវតា១ ខ្នងដោយមានភ្ជាប់ប្រព័ន្ធទឹកស្អាត និងភ្លើងសូឡា ជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ត្រូវបានប្រគល់ជូនពលរដ្ឋខ្វះខាតជីវភាពនៅខេត្តកំពង់ធំ

ក្រុមហេសបូឡាអះអាងពីការវាយប្រហារថ្មី ដែលកំណត់គោលដៅលើមូលដ្ឋាន យោធានៅអ៊ីស្រាអែល

សហភាពអឺរ៉ុបនឹងរៀបចំកិច្ចប្រជុំកម្រិតខ្ពស់ចំនួន ២ ជាមួយអាជ្ញាធរអន្តរកាលស៊ីរី នៅទីក្រុងប្រ៊ុចសែល

កងទ័ពអ៊ីស្រាអែលអំពាវនាវប្រជាជនឲ្យជម្លៀសចេញពីភូមិចំនួន ៩ នៅភាគខាងត្បូងប្រទេសលីបង់

ប្រមុខការទូតរុស្ស៊ី និងអារ៉ាប៊ីសាអ៊ូឌីតអំពាវនាវឲ្យស្តារឡើងវិញនូវការធ្វើនាវាចរណ៍ដោយសេរី នៅច្រកសមុទ្រហ័រមូស

ក្រសួងសុខាភិបាលចេញសេចក្តីប្រកាសព័ត៌មានស្តីពីការការពារខ្លួនពីការឆ្លងវីរុសហាន់តា (Hantavirus)

ស្លូវ៉ាគី៖ អឺរ៉ុបបង្ខូចប្រវត្តិសាស្ត្រ និងខ្វះការគោរពចំពោះព្រឹត្តិការណ៍សង្គ្រាមលោកលើកទី២

លោក TRUMP រំពឹងថា នឹងទទួលបានការឆ្លើយតបពីអ៊ីរ៉ង់ចំពោះសំណើរបស់អាមេរិក ក្នុងរយៈពេលប៉ុន្មានម៉ោងខាងមុខនេះ

អាមេរិកវាយប្រហារទូកដឹកគ្រឿងញៀននៅភាគខាងកើតមហាសមុទ្រប៉ាស៊ីហ្វិក បានសម្លាប់មនុស្សយ៉ាងតិច ២នាក់

ប្រមុខUN ជំរុញឲ្យមានការអត់ធ្មត់អតិបរមា ដើម្បីជៀសវាងការកើនឡើងភាពតានតឹងបន្ថែមទៀត នៅច្រកសមុទ្រហ័រមូស

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍