នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម
សម្ដេចតេជោ អំពាវនាវដល់រាជរដ្ឋាភិបាលយកចិត្តទុកដាក់សាងសង់កន្លែងស្នាក់នៅសម្រាប់សិស្សជាស្ត្រី
សម្ដេចធិបតី៖ មន្ត្រីជាអ្នកបម្រើរាស្ត្រ មិនមែនជាចៅហ្វាយរាស្ត្រទេ

នយោបាយ​ និង ការអភិវឌ្ឍន៍

សម្តេចធិបតី៖ ចក្ខុវិស័យរដ្ឋាភិបាលនឹងប្រែក្លាយកំពង់ផែស្វយ័តព្រះសីហនុ ជាមជ្ឈមណ្ឌលឡូជីស្ទិកតំបន់

2023/12/22 07:38:19 pm        233
Facebook Telegram Linkin
សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានស្នើឱ្យជប៉ុនជួយកម្ពុជា​រៀបចំ​ផែនការមេ ប្រែក្លាយតំបន់កំពង់ផែខេត្តព្រះសីហនុ ទៅជាមជ្ឈមណ្ឌលឡូជីស្ទិកតំបន់ ខណៈក្រោយ​បញ្ចប់គម្រោងសាងសង់កំពង់ផែ​ទឹកជ្រៅដំណាក់កាលទី១ កំណើនទំនិញនៅតាមផ្លូវទឹកនៅកំពង់ផែខេត្តព្រះសីហនុ នឹងមានកំណើនកាន់តែរីកចម្រើនបន្ថែមទៀត។ សម្ដេចធិបតី នាយករដ្ឋមន្រ្ដី មានប្រសាសន៍ក្នុងឱកាសអញ្ជើញជាអធិបតីដ៏ខ្ពង់ខ្ពស់ ចូលរួមពិធី «បើកការដ្ឋានសាងសង់ចំណតផែកុងតឺន័រទឹកជ្រៅថ្មី-ជំហានទី១ ប្រវែង ៣៥០ ម៉ែត្រ និងសម្ពោធបើកឱ្យប្រើប្រាស់ជាផ្លូវការគ្រឿងចក្រលើកដាក់ចល័តនៅគែមផែ ចំនួន២គ្រឿង ក្រោមឥណទានសម្បទាន និងជំនួយឥតសំណងពីរដ្ឋាភិបាលជប៉ុន» នៅព្រឹកថ្ងៃទី២២ ខែធ្នូ ឆ្នាំ ២០២៣នេះថា គម្រោងចំណតផែកុងតឺន័រទឹកជ្រៅថ្មី-ជំហានទី១ ប្រវែង ៣៥០ ម៉ែត្រនេះនឹងបង្កើនសមត្ថភាពផែដល់ ៤៥០ ០០០ TEUs ក្នុង១ឆ្នាំ និងនាំឱ្យសមត្ថភាពផែសរុបកើនដល់ ១ ២៥០ ០០០ TEUs ក្នុង១ឆ្នាំ ដោយអនុញ្ញាតឱ្យនាវាក្នុងតំបន់អាស៊ីប៉ាស៊ីហ្វិក ប្រមាណ ៩៣ ភាគរយ ចូលចតបាន ដើម្បីបង្កើនការប្រកួតប្រជែង។ ដូច្នេះកំណើននេះទាមទារឱ្យកម្ពុជាត្រូវរៀបចំផែនការមេឱ្យបានរួចរាល់ ជាមុនសម្រាប់ការទទួលកំណើនទំនិញចូលមកកម្ពុជា តាមរយៈកុងតឺន័រនាពេលខាងមុខ។សូមជម្រាបថា នាថ្ងៃអនាគតកម្ពុជា គ្រោងនឹងបន្តការពង្រីកនៃគម្រោងផែកុងតឺន័រថ្មី-ជំហានទី២ (ឆ្នាំ២០២៥-២០២៨) និងជំហានទី៣ (ឆ្នាំ២០២៦-២០២៩) ដើម្បីឱ្យកម្ពុជាអាចសម្រេចបាននូវគោលដៅ កម្ពុជាឆ្នាំ២០៣០ ក្លាយជាប្រទេសដែលមានចំណូលមធ្យមកម្រិតខ្ពស់ និងឈានទៅក្លាយជាប្រទេសដែលមានចំណូលខ្ពស់ ក្នុងឆ្នាំ២០៥០៕អត្ថបទ/ វ៉ន ដារ៉ា

មន្ត្រីខណ្ឌជលផល និងក្រុមអភិរក្សត្រីមេពូជដុតបំផ្លាញឧបករណ៍នេសាទខុសច្បាប់ និងបន្តស្រាវជ្រាវរកជនសង្ស័យ

2023/12/22 07:19:30 pm        247
Facebook Telegram Linkin
មងប្រវែង១២.៨៤០ម៉ែត្រ និងសន្ទូចរនង១២.០០០ផ្លែ ត្រូវបានមន្ត្រីខណ្ឌជលផល សហការ​ជា​មួយ​ក្រុម​អភិរក្សត្រីមេពូជ រួមនឹងប្រជាសហគមន៍នេសាទ ដក​ហូតបាន និង​ដុត​បំផ្លញ​ចោល​នៅនឹង​កន្លែង ដើម្បីរួមគ្នាទប់ស្កាត់បទល្មើសនេសាទ។មន្ត្រីខណ្ឌជលផលបានចុះល្បាត​តាមដងទន្លេក្នុងភូមិសាស្ត្រ ស្រុកសៀមបូក ចាប់ពីថ្ងៃទី១៩ ដល់ថ្ងៃទី២២ ខែធ្នូ ឆ្នាំ២០២៣នេះ មន្ត្រីខណ្ឌជលផលស្ទឹងត្រែងបានបញ្ជាក់ថា ក្នុងសកម្មភាព​ចុះប្រ​តិបត្តិការ កម្លាំងធ្វើការប្រមូលបានពីអន្លុងអភិរក្សត្រីមេពូជ និងអន្លុង​អភិរក្ស​សត្វ​ផ្សោត​មេគង្គ ជាតំបន់ហាមឃាត់ការនេសាទ ដែលជនសង្ស័យបានលួចយកទៅដាក់នៅពេលយប់ បង្ក​ផល​ប៉ះពាល់ដល់ប្រភេទធនធានជលផល ដែលកំពុងរងគ្រោះថ្នាក់ ដូចជាត្រីរាជ-ត្រីកន្ត្រប់ខ្លា -ត្រី​គល់រាំង និងសត្វផ្សោតជាដើម ។ល។លោកបន្តថា កិច្ចសហប្រតិបត្តិការនេះមានកម្លាំងឆ្មាំទន្លេអភិរក្សសត្វផ្សោតប៉ុសិ៍ត្បូងខ្លា -ប៉ុស្តិ៍​កោះជ្រឹម ប៉ុស្តិ៍សៀមបូក- ប៉ុស្ត៍កោះសំពាយ- សហការជាមួយប្រជាសហគមន៍នេសាទ -កោះ​សំពាយ​ -ស្រែក្រសាំង- កោះព្រះ- កោះជ្រឹម- អូរម្រះ- អូរច្រឡង់-និង ភ្ជុល ធ្វើសកម្មភា​ព​ចុះ​ល្បាត​ចាប់​ពី​កន្ទុយ​កោះសន្ទុករហូតដល់ភូមិអូរច្រឡង់ព្រំប្រទល់ខេត្តក្រចេះ ដែលជា​តំបន់​ស្នូល​ហាម​ឃាត់​ធ្វើនេសាទ។លោក ស្រី សំវិចិត្រ នាយខណ្ឌជលផលស្ទឹងត្រែង បានគាំទ្រចំណាត់ការនេះ ព្រោះនៅ​តាម​តំបន់​គ្រប់​គ្រង​ការពារត្រីមេពូជ និងសត្វផ្សោតទន្លេមេគង្គនិមួយៗ មន្ត្រីជំនាញនិងឆ្នាំទន្លេ បាន​បោះ​បង្គោល និងដាក់ពោង ស្លាកសញ្ញា ហាមឃាត់ ធ្វើនេសាទទាំងរដូវបិទនិងបើកធ្វើនេសាទ តែ​ប្រជា​អ្នក​នេសាទមួយចំនួន មិនទាន់ភ្ញាក់រឭកចូលរួមអភិរក្សធនធានរបស់ខ្លួននៅឡើយទេ។លោកទុំ នីរ៉ូ ប្រធានមន្ទីរកសិកម្មរុក្ខាប្រមាញ់ និងនេសាទខេត្ត បានបញ្ជាក់ថា សកម្មភាព​នេះ​បាន​បង្ហាញ​ពី​ភាព​ទទួលខុសត្រូវក្នុងការថែរក្សាធានធានជលផលឱ្យសម្បូរបែបឡើងវិញ ព្រោះវាជា​ធន​ធាន​របស់យើងទាំងអស់គ្នា ហើយប្រសិនបើធនធានទាំងនេះបាត់បង់ គឺបងប្អូន​ប្រជាពលរដ្ឋ​យើង​ដែល​កំពុងអាស្រ័យផល ជាអ្នករងផលប៉ះពាល់មុនគេ។សូមបញ្ជាក់ថា បេសកកម្មដែលបានធ្វើឡើងរួមគ្នានេះដកហូតបានមងចំនួន ១៤៣ត្បូង ស្មើនិងប្រវែង ១១.៤៤០ម៉ែត្រ ចាប់ពីក្រឡា ៧សង់ទី ដល់ទៅ១៦សង់ទីម៉ែត្រ និងដកហូត​សន្ទូច​រនងបាន ចំនួន១០៧ខ្សែ ប្រវែង១២.៨៤០ម៉ែត្រ ស្មើនឹង ១២.០០០ផ្លែ និងបានបំផ្លាញ​ចោល​នៅនឹង​កន្លែងភ្លាមៗតែម្តង៕ អត្ថបទ៖ មាស ផល្លា 

ការបោះឆ្នោតនៅUN ស្តីពីតំបន់ហ្កាហ្សា បានផ្អាកម្តងទៀត ខណៈអាមេរិក បង្ហាញសញ្ញាគាំទ្រ

2023/12/22 07:15:52 pm        121
Facebook Telegram Linkin
ប្រភពការទូត បាននិយាយកាលពីថ្ងៃព្រហស្បតិ៍ ទី ២១ ខែធ្នូ ថា ក្រុមប្រឹក្សាសន្តិសុខអង្គការសហប្រជាជាតិបានផ្អាកការបោះឆ្នោតជាថ្មី សម្រាប់សេចក្តីសម្រេចដែលបានពន្យារពេលជាច្រើនដង ស្តីពីសង្គ្រាមរវាងក្រុមហាម៉ាស និងអ៊ីស្រាអែល។ ការពន្យារពេលរហូតដល់ថ្ងៃសុក្រនេះ បានកើតឡើង ខណៈសហរដ្ឋអាមេរិក ដែលបានជំទាស់ទៅនឹងសំណើមួយចំនួនក្នុងអំឡុងពេលនៃសេចក្តីព្រាងសេចក្តីសម្រេច បាននិយាយថា ខ្លួនត្រៀមដើម្បីគាំទ្រសេចក្តីសម្រេច នៅក្នុងទម្រង់បច្ចុប្បន្ន។ បន្ទាប់ពីការពន្យារពេលជាច្រើនថ្ងៃ សេចក្តីព្រាងចុងក្រោយ ដែលត្រូវបានឃើញដោយសារព័ត៌មាន AFP អំពាវនាវឱ្យមាន «ចំណាត់ការបន្ទាន់ដើម្បីអនុញ្ញាតឱ្យផ្នែកមនុស្សធម៌ចូលមកដោយសុវត្ថិភាព និងគ្មានការរារាំង ហើយថែមទាំងបង្កើតលក្ខខណ្ឌសម្រាប់ការបញ្ឈប់អរិភាពដោយនិរន្តរភាព។ ប៉ុន្តែសេចក្តីសម្រេច មិនបានអំពាវនាវឲ្យមានការបញ្ចប់ការប្រយុទ្ធគ្នាភ្លាមៗនោះទេ។ លោកស្រី Linda Thomas-Greenfield ឯកអគ្គរដ្ឋទូតប្រចាំអង្គការសហប្រជាជាតិរបស់ទីក្រុងវ៉ាស៊ីនតោន បានប្រាប់អ្នកសារព័ត៌មានថា «ប្រសិនបើសេចក្តីសម្រេចនេះត្រូវបន្តទៅមុខ នោះយើងអាចគាំទ្រវាបាន»។ លោកស្រី បានបដិសេធថា សេចក្តីព្រាងសេចក្តីសម្រេចនេះមិនត្រូវបានដកចេញនោះទេ។ សេចក្តីព្រាងសេចក្តីសម្រេចនេះ គឺជាដំណោះស្រាយដ៏រឹងមាំ ដែលត្រូវបានគាំទ្រយ៉ាងពេញលេញដោយក្រុមប្រទេសអារ៉ាប់។ ជម្លោះការទូត នៅទីស្នាក់ការអង្គការសហប្រជាជាតិក្នុងទីក្រុង Manhattan បានបណ្តាលឱ្យការបោះឆ្នោត ត្រូវពន្យារពេលជាច្រើនដងក្នុងសប្តាហ៍នេះ ដែលបានប្រឆាំងទៅនឹងរូបភាពនៅខាងក្រោយនៃស្ថានភាពកាន់តែយ៉ាប់យ៉ឺននៅក្នុងតំបន់ហ្កាហ្សា ហើយបណ្តាលឲ្យចំនួនអ្នកស្លាប់កើនឡើង។ លោក Richard Gowan អ្នកវិភាគមកពី អង្គការ ក្រុមវិបត្តិអន្តរជាតិ(International Crisis Group) បាននិយាយថា វាហាក់ដូចជា សហរដ្ឋអាមេរិកបានទាញយកផលប្រយោជន៍ពេញលេញពីបំណងប្រាថ្នារបស់សមាជិកក្រុមប្រឹក្សាផ្សេងទៀត ដើម្បីបញ្ចៀសការប្រើសិទ្ធិវ៉េតូ។

នាយករដ្ឋមន្ត្រីហុងគ្រី និយាយថា មូលនិធិទៅអ៊ុយក្រែន មិនត្រូវបានយកមកពីថវិកាអឺរ៉ុបនោះទេ

2023/12/22 07:07:55 pm        90
Facebook Telegram Linkin
នាយករដ្ឋមន្ត្រីប្រទេសហុងគ្រី លោក Viktor Orban បាននិយាយកាលពីថ្ងៃព្រហស្បតិ៍ថា ការបែងចែកប្រាក់៥០ពាន់លានអឺរ៉ូ ទៅឲ្យប្រទេសអ៊ុយក្រែនពីក្នុងថវិកាសហភាពអឺរ៉ុប ក្នុងរយៈពេល ៥ ឆ្នាំ គឺជា «ការសម្រេចចិត្តដ៏លំបាក» ។ថ្លែងនៅក្នុងសន្និសីទសារព័ត៌មាន លោក Orban បានបញ្ជាក់ពីសំណើរបស់ប្រទេសហុងគ្រី ក្នុងការផ្តល់ជំនួយនៅខាងក្រៅថវិកាសហភាពអឺរ៉ុប តាមរយៈប្រាក់កម្ចីរួមគ្នា ប៉ុន្តែនឹងមិនព្រមព្រៀងលើការប្រើប្រាស់មូលនិធិដែលមានស្រាប់នោះទេ។មេដឹកនាំសហភាពអឺរ៉ុប មានផែនការពិនិត្យបញ្ហានេះឡើងវិញ នៅក្នុងកិច្ចប្រជុំកំពូលនៅថ្ងៃទី ១ ខែកុម្ភៈ។ ប្រទេសសមាជិករបស់ប្លុកអឺរ៉ុបចំនួន ២៦ប្រទេសផ្សេងទៀត អាចសម្របសម្រួលដ៏មានសក្តានុពលនូវកិច្ចព្រមព្រៀងរវាងពួកគេផ្ទាល់ ជាមួយទីក្រុងគីវ ដោយរំលងការយល់ព្រមពីសំណាក់ប្រទេសហុងគ្រី និងបដិសេធដំណើរការរបស់ទីក្រុង Budapest ចំពោះមូលនិធិសហភាពអឺរ៉ុបដែលពាក់ព័ន្ធ។លោក Orban ក៏បានបដិសេធរាល់កិច្ចព្រមព្រៀងរវាងប្រទេស «ហុងគ្រី និងទួរគី» ស្តីពីសមាជិកភាពសម្ព័ន្ធយោធាណាតូ របស់ប្រទេសស៊ុយអែតផងដែរ។ លោកបាននិយាយថា ការសម្រេចនេះ ស្ថិតនៅលើសភារបស់ប្រទេសហុងគ្រី ដែល «ពុំមានឆន្ទៈទូលំទូលាយ ក្នុងការសម្រេចបែបនេះនោះទេ»។

ប្រទះឃើញហ្វូងផ្សោតពណ៌ផ្កាឈូក ប្រមាណ១៥ ទៅ ២០ក្បាលនៅខេត្តកំពត

2023/12/22 06:54:11 pm        1840
Facebook Telegram Linkin
ក្រុមការងារល្បាតរបស់ខណ្ឌរដ្ឋបាលជលផលកំពត និងអង្គការអភិរក្សធនធានសមុទ្រកម្ពុជា (MCC) បានប្រទះឃើញវត្តមានហ្វូងផ្សោតពណ៍ផ្កាឈូក (Pink Dolphin) ប្រមាណ១៥ ទៅ២០ ក្បាលនៅតំបន់ឆ្នេរ នៃក្រុងបូកគោ ខេត្តកំពត។លោក ស សូរិន នាយខណ្ឌរដ្ឋបាលជលផលខេត្តកំពត បានឱ្យដឹងនៅព្រឹកថ្ងៃទី២២ ខែធ្នូ ឆ្នាំ​២០២៣​នេះ​ថា ក្រោមកិច្ចសហការរវាងក្រុមការងារល្បាតខណ្ឌរដ្ឋបាលជលផលកំពត និង​អង្គការ​អភិរក្សធនធានសមុទ្រកម្ពុជា (MCC) ដោយធ្វើ​ការ​តាម​ដាន​យ៉ាង​ដិត​ដល់​ចំពោះ​សត្វ​ផ្សោត​សមុទ្រ ដោយតាមដាននឹងពិនិត្យតាមហ្វូងផ្សោត រយៈពេលបីខែកន្លងមក សង្កេត​ឃើញ​ថា​ចំនួន​សត្វផ្សោតសមុទ្រមានការកើនឡើងគួឱ្យកត់សម្គាល់។ ដោយឡែកនៅថ្ងៃទី២២ ខែធ្នូ ក្រុម​ការងារ​បាន​រកឃើញហ្វូងផ្សោតពណ៍ផ្កាឈូក (Pink Dolphin) ប្រមាណ១៥ ទៅ២០ ក្បាល នៅ​ខេត្ត​កំពត ដោយមេហ្វូងផ្សោតទាំងអស់នេះមានអាយុប្រមាណ២០ឆ្នាំ ។ លោកនាយខណ្ឌបានបន្ថែមថា ហ្វូងសត្វផ្សោតសមុទ្រដែលមានវត្តមានក្នុងខេត្តកំពត មិន​ត្រឹម​តែ​ហ្វូង​ផ្សោត​ពណ៌ផ្កាឈូក (Pink Dolphin) នោះទេ គឺមាន​ទាំង​ហ្វូង​ផ្សោត​ប្រភេទ​ផ្សេង​ទៀត​មាន​ប្រមាណ​ពី ២០ ទៅ ៣០ក្បាល ដែលបានរស់​នៅ​ជា​អចិន្ត្រៃយ៍នៅ​ក្នុង​តំបន់​សហគមន៍​នេសាទ​ត្រពាំងរ​ពៅ សហគមន៍នេសាទព្រែកត្នោត និងសហគមន៍នេសាទចង្ហោន។លោកនាយខណ្ឌបានឱ្យដឹងបន្ថែមថាថា ខេត្តកំពត មានផែនការយុទ្ធសាស្ត្រ ក្នុង​ការ​បង្កើត​ជា​តំបន់​គ្រប់គ្រង​ជលផលថ្មីមួយ ដែលមានទំហំ ៧០០០ហិកតា ស្ថិតនៅតំបន់ឆ្នេរ ក្នុង​ភូមិសាស្ត្រ​ក្រុង​បូកគោ ដើម្បីរក្សភិរក្សព្រៃកោងកាង ផ្កាថ្ម ស្មៅសមុទ្រ សត្វកម្រ ពិសេស​អភិរក្ស​ផ្សោត​សមុទ្រ​ដែល​ជាប្រភេទសត្វកម្រជិតផុតពូជ។ជាមួយគ្នានេះដែរ ក្រោយរកឃើញចំពោះការកើនឡើងនៃចំនួនសត្វផ្សោតសមុទ្រនេះ លោក​នាយ​ខណ្ឌ​ក៏​បាន​ធ្វើការអំពាវនាវដល់ភាគីពាក់ព័ន្ធ ពិសេសបងប្អូន​ប្រជានេសាទ​ចូល​រួម​ថែ​រក្សា​ការពារ​សត្វ​ផ្សោត​សមុទ្រដ៏កម្រ និងជិតផុតពូជនេះទាំងអស់គ្នា។ យោងតាមអនុក្រឹត្តលេខ១២៣ បានកំណត់សត្វងាយរងគ្រោះ កំពុងរងគ្រោះ និង​ប្រភេទ​សត្វ​កម្រ ជិតផុតពូជ មានដូចជា ជ្រូកទឹក អណ្តើកសមុទ្រ សេះសមុទ្រ ឆ្លាមប្រភេទខ្លះ និង​សត្វ​ជា​ច្រើន​ទៀត សរុបចំនួន ២៥ប្រភេទ ដែលត្រូវអភិរក្ស ចំពោះសត្វផ្សោតសមុទ្រ ក៏ស្ថិតនៅ​ក្នុង​ចំណោម​សត្វទាំង ២៥ប្រភេទនោះដែរ៕

អ៊ីស្រាអែល ទទួលយកតួនាទីរបស់អាជ្ញាធរប៉ាឡេស្ទីន នៅតំបន់ហ្កាហ្សាក្រោយសង្រ្គាម ជាលើកដំបូងហើយ

2023/12/22 06:42:03 pm        116
Facebook Telegram Linkin
រដ្ឋាភិបាលអ៊ីស្រាអែល បានបង្ហាញពីឆន្ទៈរបស់ខ្លួនក្នុងការអនុញ្ញាតឲ្យអាជ្ញាធរប៉ាឡេស្ទីនគ្រប់គ្រងតំបន់ហ្កាហ្សាស្ទ្រីប បន្ទាប់ពីប្រតិបត្តិការយោធាប្រឆាំងនឹងក្រុមសកម្មប្រយុទ្ធហាម៉ាសត្រូវបានបញ្ចប់។នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ( Benjamin Netanyahu) បានទទូចម្តងហើយម្តងទៀតថា អាជ្ញាធរប៉ាឡេស្ទីន (PA) មិនអាចត្រឡប់ទៅតំបនហ្កាហ្សាវិញបានទេ ដោយសារតែអ្វីដែលលោកនិយាយថា គឺជាអំពើពុករលួយរបស់អង្គការនេះ និងការបរាជ័យក្នុងការថ្កោលទោសការវាយប្រហារភេរវកម្មថ្ងៃទី៧ ខែតុលា របស់ក្រុមសកម្មប្រយុទ្ធហាម៉ាសទៅលើអ៊ីស្រាអែលភាគខាងត្បូង។ ជំហររបស់លោកនេតាន់យ៉ាហ៊ូ បានធ្វើឲ្យលោកកាន់តែមានជម្លោះជាមួយរដ្ឋបាលរបស់ចូ បៃដិន ដែលបានចាប់ផ្តើមពិភាក្សារួចហើយជាមួយនឹងការដឹកនាំរបស់អាជ្ញាធរប៉ាឡេស្ទីន នៅក្នុងតំបន់វេសបែងអំពីតួនាទីក្រោយ សង្គ្រាមរបស់ខ្លួន។ប៉ុន្តែកាលពីថ្ងៃព្រហស្បតិ៍ ទីប្រឹក្សាសន្តិសុខជាតិរបស់លោកណេតាន់យ៉ាហ៊ូ បានគូសបញ្ជាក់អំពីការផ្លាស់ប្តូរជំហររបស់រដ្ឋាភិបាលអ៊ីស្រាអែល នៅក្នុងវិចារណកថាមួយ ដែលត្រូវបានបោះពុម្ពផ្សាយ នៅគេហទំព័រ Elaph ដែលជាគេហទំព័រព័ត៌មានភាសាអារ៉ាប់គ្រប់គ្រងដោយអារ៉ាប៊ីសាអ៊ូឌីត ដែលមានទីស្នាក់ការនៅទីក្រុងឡុងដ៍។ មន្ត្រីមជ្ឈិមបូព៌ា បានប្រាប់សារព័ត៌មាន Semafor ថា ការដាក់ចុះផ្សាយរបស់រដ្ឋាភិបាលអ៊ីស្រាអែល នៅក្នុងគេហទំព័រ Elaphនេះ គឺជាកិច្ចខិតខំប្រឹងប្រែង ដើម្បីទំនាក់ទំនងដោយផ្ទាល់ទៅ បណ្តារដ្ឋាភិបាលអារ៉ាប់ ដែលត្រូវបានគេរំពឹងថា នឹងដើរតួនាទីសំខាន់ ក្នុងការផ្តល់ហិរញ្ញប្បទាន ដល់ការកសាងឡើងវិញនូវតំបន់ហ្កាហ្សាបន្ទាប់ពីសង្គ្រាមត្រូវបញ្ចប់។

សហរដ្ឋអាមេរិក មើលមិនឃើញមានការផ្លាស់ប្តូរសំនៀងណាមួយពីប្រទេសចិន លើកោះតៃវ៉ាន់ទេ

2023/12/22 06:22:30 pm        193
Facebook Telegram Linkin
រដ្ឋមន្ត្រីក្រសួងពាណិជ្ជកម្មអាមេរិក លោកស្រី ជីណា រ៉ៃម៉ុនដូ (Gina Raimondo) បានប្រាប់សារព័ត៌មាន CNBC កាលពីថ្ងៃព្រហស្បតិ៍ (២១ ធ្នូ) នៅពេលត្រូវសាកសួរអំពីរបាយការណ៍ប្រព័ន្ធផ្សព្វផ្សាយ ដែលថាប្រធានាធិបតីចិន លោក ស៊ី ជីនពីង (Xi Jinping) បានប្រាប់ប្រធានាធិបតី ចូ បៃដិន (Joe Biden) ថាក្រុងប៉េកាំង នឹងបង្រួបបង្រួមកោះតៃវ៉ាន់ ជាមួយប្រទេសចិនឡើងវិញថា ទីក្រុងវ៉ាស៊ីនតោន មិនឃើញមានការផ្លាស់ប្តូរណាមួយនៃសម្លេងរបស់ចិន លើកោះតៃវ៉ាន់ទេ ។លោកស្រី រ៉ៃម៉ុនដូ បាននិយាយនៅក្នុងបទសម្ភាសន៍ CNBC ថា «ខ្ញុំមិនឃើញមានការផ្លាស់ប្តូរនោះទេ។ ខ្ញុំក៏នៅក្នុងកិច្ចប្រជុំនោះដែរ ហើយលោកប្រធានាធិបតី ស៊ី មិនបាននិយាយអ្វីមកកាន់ពួកយើង ដែលលោកមិនធ្លាប់បាននិយាយពីមុនមកនោះទេ»។ រដ្ឋមន្រ្តីពាណិជ្ជកម្មអាមេរិករូបនេះបានបន្ថែមថា «វាគឺជាការពិភាក្សាដ៏ល្អមួយរវាងមេដឹកនាំពិភពលោកទាំងពីរ។ ការពិភាក្សានោះជាការនិយាយដោយចំៗ ដោយវិជ្ជមាន និងដោយត្រង់ទៅត្រង់មក។ បញ្ហាកោះតៃវ៉ាន់ ក៏ត្រូវបានលើកមកពិភាក្សាដែរ ប៉ុន្តែមិនមានព័ត៌មានថ្មីទេ»។ លោក បៃដិន និងលោក ស៊ី បានព្រមព្រៀងគ្នាក្នុងអំឡុងពេលកិច្ចប្រជុំរបស់ពួកគេដើម្បីបើកខ្សែទូរស័ព្ទបន្ទាន់របស់ប្រធានាធិបតី ហើយបន្តទំនាក់ទំនងរវាងយោធានិងយោធា ដោយបង្ហាញពីវឌ្ឍនភាពជាក់ស្តែងមួយចំនួន។ ប្រព័ន្ធផ្សព្វផ្សាយរដ្ឋរបស់ចិនបាននិយាយនៅពេលនោះថា លោក ស៊ីi បានជំរុញឱ្យទីក្រុងវ៉ាស៊ីនតោន បញ្ឈប់ការបញ្ជូនអាវុធទៅកោះតៃវ៉ាន់ និងគាំទ្រដល់ «ការបង្រួបបង្រួម» ដោយសន្តិវិធីរបស់ចិនជាមួយតៃវ៉ាន់។លោក បៃដិន បាននិយាយថា លោកបានសង្កត់ធ្ងន់ពីតម្រូវការសម្រាប់សន្តិភាពនៅច្រកសមុទ្រកោះតៃវ៉ាន់។ មន្ត្រីអាមេរិកម្នាក់បានបន្ថែមថា លោក បៃដិន បានជំទាស់លើការបង្រួបបង្រួមនោះ ហើយឲ្យរក្សាស្ថានភាពដដែល និងឲ្យចិនគោរពដំណើរការបោះឆ្នោតរបស់កោះតៃវ៉ាន់៕

បីឆ្នាំទៀតកម្ពុជា អាចឲ្យកប៉ាល់ផ្ទុកទំនិញ៦ម៉ឺនតោន ចូលចតបានក្រោយសាងសង់ចំណតផែកុងតឺន័រទឹកជ្រៅរួចជំហានទី១

2023/12/22 06:01:10 pm        191
Facebook Telegram Linkin
នៅក្នុងរយៈពេលបីឆ្នាំទៀត ពោលគឺក្រោយបញ្ចប់ការសាងសង់ចំណតផែកុងតឺន័រទឹកជ្រៅរួច ជាជំហ៊ានទី១ហើយនោះ កម្ពុជាអាចឲ្យកប៉ាល់ផ្ទុកទំនិញគ្រប់ប្រភេទ មកពីបណ្តាប្រទេសនៅលើពិភពលោកចូលសំចតបានដោយគ្មានការព្រួយបារម្ភទៀតនោះឡើយ រួមទាំងកប៉ាល់ដែលដឹកទំនិញដែលមានទម្ងន់៦ម៉ឺនតោន ខណៈចប់ជាស្ថាពរនូវជំហ៊ានទី៣ទៀតនឹងអាចទទួលបាន១៦ម៉ឺនតោន។ក្នុងឱកាសអញ្ជើញជាអធិបតី ក្នុងពិធីបើកការដ្ឋានសាងសង់ចំណតផែកុងតឺន័រទឹកជ្រៅថ្មី ជំហានទី១ និងសម្ពោធបើកឱ្យប្រើប្រាស់ជាផ្លូវការគ្រឿងចក្រលើកដាក់ចល័តនៅគែមផែ ក្រោមឥណទានសម្បទាន និងជំនួយឥតសំណងពីរដ្ឋាភិបាលជប៉ុន នាថ្ងៃទី២២ ខែធ្នូ ឆ្នាំ២០២៣នេះនៅខេត្តព្រះសីហនុ សម្តេចធិបតី ហ៊ុន ម៉ាណែត បានសង្ឃឹមយ៉ាងម៉ុតមាំថា នៅឆ្នាំ២០២៩ខាងមុខនេះ សម្ដេចនឹងធ្វើឱ្យកំពង់ផែរបស់កម្ពុជា មានសមត្ថភាពអាចទទួលស្វាគមន៍កប៉ាល់គ្រប់ធន់ទាំងអស់ដែលដឹកទំនិញមកពីគ្រប់ប្រទេសមកកាន់កម្ពុជាដោយមិនឲ្យពួកគេទៅហួសមកហួសទៀតនោះឡើយ។សូមបញ្ជាក់ថា ចំណតផែទឹកជ្រៅ ស្ថិតនៅកំពង់ស្វយ័តក្រុងព្រះសីហនុ ខេត្តព្រះសីហនុ គម្រោងសាងសង់ជំហ៊ានទី១នេះ គ្រោងនឹងចំណាយថវិកាសាងសង់ប្រមាណ២៤៣លានដុល្លារអាមេរិក រួមបញ្ចូលទាំងថវិកាបដិភាគរបស់រាជរដ្ឋាភិបាលកម្ពុជាផងនោះ។ ចំណតផែកុងតឺន័រទឹកជ្រៅថ្មីនេះ មានប្រវែង ៣៥០ម៉ែត្រ ជម្រៅទឹកសាងសង់ ១៤,៥ម៉ែត្រ។ ផែកុងតឺន័រនេះ អាចអនុញ្ញាតឱ្យនាវាកុងតឺន័រមានចំណុះផ្ទុក ៦ម៉ឺនតោន ឬស្មើនឹង ៤ពាន់ TEUs ដែលមានផ្លូវដឹកជញ្ចូននៅក្នុងតំបន់អាស៊ីប៉ាស៊ីហ្វិក ទៅ-មកកំពង់ផែស្វយ័តក្រុងព្រះសីហនុ ហើយនឹងបង្កើនសមត្ថភាពកំពង់ផែសរុបកើនដល់ប្រមាណ១,២៥លាន TEUs ក្នុងមួយឆ្នាំៗ។គម្រោងនេះ អនុវត្តការសាងសង់ដោយក្រុមហ៊ុនជប៉ុនតូអា ខបផើរសិន(TOA Corporation) និងត្រួតពិនិត្យបច្ចេកទេសដោយសម្ព័ន្ធក្រុមហ៊ុន នីបផនខូអេ (Nippon Koei) និងក្រុមហ៊ុន OrientalConsultants Global។ បើតាមការលើកឡើងរបស់សម្តេចធិបតី នាយករដ្ឋមន្ត្រីក្រុមហ៊ុន នឹងប្រើប្រាស់រយៈពេលសាងសង់ចំនួន៣៦ខែ ពោលគឺនៅឆ្នាំ២០២៦៕អត្ថបទបាន ចក់

សម្តេចធិបតី៖ គម្រោងសាងសង់ព្រែកជីកហ្វូណន់តេជោ គ្មានអាថ៌កំបាំង​ដូចការលើកឡើងរបស់ក្រុមប្រឆាំងឡើយ

2023/12/22 05:12:05 pm        639
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា គម្រោងសាងសង់នូវ « ព្រែកជីកហ្វូនណន់តេជោ» គ្មានអ្វីអាថ៌កំបាំងដូចការលើកឡើងរបស់ក្រុមប្រឆាំងនោះឡើយ ផ្ទុយទៅវិញការសាងសង់នូវគម្រោងនេះ នឹងធ្វើឲ្យសក្តានុពលសេដ្ឋកិច្ចកម្ពុជា កាន់តែរីកចម្រើនបន្ថែមទៀត ជាពិសេសគឺការផ្លាស់ប្តូរនូវទំនិញតែម្តង។ក្នុងឱកាសអញ្ជើញជាអធិបតីក្នុងពិធីបើកការដ្ឋានសាងសង់ចំណតផែកុងតឺន័រទឹកជ្រៅថ្មី ជំហានទី១ និងសម្ពោធបើកឱ្យប្រើប្រាស់ជាផ្លូវការគ្រឿងចក្រលើកដាក់ចល័តនៅគែមផែ ក្រោមឥណទានសម្បទាន និងជំនួយឥតសំណងពីរដ្ឋាភិបាលជប៉ុន នាថ្ងៃទី២២ ខែធ្នូ ឆ្នាំ២០២៣នេះ សម្តេចធិបតី នាយករដ្ឋ មន្រ្តីបានលើកឡើងថា គ្មានហេតុផលណាមួយដែលត្រូវបានលាក់លៀមនោះទេ ចំពោះគម្រោងសាងសង់នូវផ្លូវនាវាចរណ៍ «ព្រែកជីកហ្វូណន់តេជោ» ខណៈគម្រោងនេះនឹងតភ្ជាប់ពីប្រព័ន្ធទន្លេ និងផ្លូវសមុទ្រ ដើម្បីបម្រើដល់ការដឹកជញ្ជូននៅប្រទេសកម្ពុជាឲ្យកាន់តែរីកចម្រើនខ្លាំងក្លាបន្ថែមទៀតនោះ។សូមបញ្ជាក់ថា គម្រោងផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់ «ព្រែកជីកហ្វូណនតេជោ» ត្រូវបានរាជរដ្ឋាភិបាលអនុម័តកាលពីថ្ងៃទី១៩ ឧសភា ឆ្នាំ២០២៣កន្លងទៅនេះ នៅក្នុងកិច្ចប្រជុំគណៈរដ្ឋមន្រ្តីពេញអង្គក្នុងវិមានសន្តិភាព។ គម្រោងដឹកជញ្ជូនទំនិញ និងអ្នកទេសចរតាមផ្លូវទឹករបស់កម្ពុជាមួយនេះ​នឹងត្រូវការទុនវិនិយោគប្រមាណ១ ៧០០លានដុល្លារអាម៉េរិក។ គម្រោង«ព្រែកជីកហ្វូណនតេជោ»នេះ នឹងផ្ដល់អត្ថប្រយោជន៍ជាច្រើនផ្សេងទៀតដល់ចរន្តសេដ្ឋកិច្ចកម្ពុជា ដូចជាការបង្កើតតំបន់ពាណិជ្ជកម្ម និងមជ្ឈមណ្ឌលភស្ដុភារកម្ម, ការអភិវឌ្ឍផែរណបថ្មីៗជាច្រើន, ការពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម និងចិញ្ចឹមសត្វ, ការជួយគាំទ្រដល់ការអភិវឌ្ឍប៉ូលសេដ្ឋកិច្ចទី៤ របស់កម្ពុជា, ការបង្កើតការងារបន្ថែមនៅកំពង់ផែស្វយ័តក្រុងព្រះសីហនុ កំពង់ផែស្វយ័តក្រុងភ្នំពេញ និងកំពង់ផែផ្សេងទៀត, ការជំរុញការអភិវឌ្ឍទីក្រុង និងនគរូបនីយកម្ម និងការជំរុញការរីកចម្រើនផ្នែកអចលនទ្រព្យជាដើម។ ដូច្នេះហើយគម្រោងនេះគ្មានអ្វីដែលត្រូវលាក់កំបាំងដូចការលើកឡើងរបស់ជនអគតិមួយក្តាប់តូចនោះឡើយ៕អត្ថបទបាន ចក់

ប្រសាសន៍សំខាន់ៗរបស់សម្តេចធិបតី ក្នុងឱកាសអញ្ជើញ “បើកការដ្ឋានសាងសង់ចំណតផែកុងតឺន័រទឹកជ្រៅថ្មីជំហានទី១ នៅក្រុងព្រះសីហនុ

2023/12/22 03:55:04 pm        260
Facebook Telegram Linkin
ព្រះសីហនុ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅព្រឹកថ្ងៃទី២២ ខែធ្នូ ឆ្នាំ២០២៣ បានអញ្ជើញជាអធិបតីក្នុងពិធី “បើកការដ្ឋានសាងសង់ចំណតផែកុងតឺន័រទឹកជ្រៅថ្មីជំហានទី១ ប្រវែង ៣៥០ម៉ែត្រ និងសម្ពោធបើកឱ្យប្រើប្រាស់ជាផ្លូវការគ្រឿងចក្រលើកដាក់ចល័តនៅគែមផែ នៃកំពង់ផែស្វយ័តក្រុងព្រះសីហនុ ចំនួន ០២គ្រឿង ក្រោមឥណទានសម្បទាន និងជំនួយឥតសំណង ពីរដ្ឋាភិបាលជប៉ុន” ។ប្រសាសន៍សំខាន់ៗរបស់សម្តេចមហាបវរធិបតី ហ៊ុន ម៉ាណែត ដែលមានខ្លឹមសារដូចខាងក្រោម៖-សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ថ្លែងអំណរគុណចំពោះរដ្ឋាភិបាល និងប្រជាជន ជប៉ុនដែលបានផ្ដល់គ្រឿងចក្រលើកដាក់ចល័តនៅគែមផែ ដែលមានតម្លៃជិតដប់បួនលានដុល្លារ និង ថវិកាសម្រាប់សាងសង់កំពង់ផែទឹកជ្រៅព្រះសីហនុជំហានទី១ ដែលមានតម្លៃពីររយសែសិបបីលាន ដុល្លារ។-សម្ដេចធិបតី៖ ផ្លូវទឹក នៅតែមានសារៈសំខាន់ សម្រាប់ការធ្វើចរាចរដឹកជញ្ជូនទំនិញពាណិជ្ជកម្ម ដែលការធ្វើពាណិជ្ជកម្មតាមផ្លូវទឹកនេះ បានកើតមានឡើងរាប់សតវត្សមកហើយ ។-សម្តេចធិបតី ហ៊ុន ម៉ាណែត៖ ការសាងសង់កំពង់ផែទឹកជ្រៅព្រះសីហនុជំ ហានទី១ នឹងបញ្ចប់នៅឆ្នាំ២០២៦។-សម្តេចធិបតី ហ៊ុន ម៉ាណែត នាយករដ្ឋមន្ត្រី៖ ឆ្នាំ២០២៣ ទំនាក់ទំនងកម្ពុជា-ជប៉ុន មានលក្ខណៈពិសេសចំនួន ២ នោះគឺ ខួប ៧០ ឆ្នាំនៃទំនាក់ទំនងការទូតកម្ពុជា-ជប៉ុន និងការលើកកម្ពស់ទំនាក់ទំនងការទូតកម្ពុជា-ជប៉ុន ទៅជាដៃគូយុទ្ធសាស្ត្រគ្រប់ជ្រុងជ្រោយ ដែលជាទំនាក់ទំនងខ្ពស់បំផុត មិនធ្លាប់មាននៅក្នុងប្រវត្តិសាស្ត្រនៃទំនាក់ទំនងប្រទេសទាំងពីរ។-សម្តេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជាឱ្យធ្វើការសិក្សាលម្អិតបន្ថែមទៀត លើការពង្រីកកំពង់ផែទឹកសាបរបស់កម្ពុជាបន្ថែមទៀត ជាពិសេសសិក្សាលើយុទ្ធសាស្រ្ដ និងបរិមាណនៃទំហំពាណិជ្ជកម្ម និងតម្រូវការរបស់កម្ពុជា។-សម្តេចធិបតី ហ៊ុន ម៉ាណែត បញ្ជាក់ថា ចំពោះការសិក្សាពង្រីកបន្ថែមកំពង់ផែទឹកសាបកម្ពុជា ត្រូវឱ្យមានការចូលរួមពីវិស័យឯកជនផងដែរ ដោយអនុវត្តស្របតាមរូបមន្ត ភាពជាដៃគូរវាងរដ្ឋាភិបាល និងវិស័យឯកជន (PPP)។-សម្តេចធិបតី ហ៊ុន ម៉ាណែត បានថ្លែងអំណរគុណដល់ប្រទេសជប៉ុន និងបណ្ដាប្រទេសដៃគូអភិវឌ្ឍន៍ផ្សេងទៀត ដែលកន្លងមកបានផ្ដល់ឥណទានដល់កម្ពុជា ក្នុងការអភិវឌ្ឍប្រទេសជាតិជាបន្តបន្ទាប់។-សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី៖ នៅប៉ុន្មានថ្ងៃខាងមុខឆាប់ៗនេះ នាវាវេស្ទើរ ដាម ដែលធ្លាប់កម្ពុជាអនុញ្ញាតឱ្យចូលចតនៅអំឡុងការរីករាលដាលនៃជំងឺកូវីដ នឹងមកដល់កម្ពុជា ដោយនាំទេសចរប្រមាណ ៤០០០ នាក់ដែលរស់នៅប្រទេសជាច្រើន មកកម្សាន្តទស្សនានៅកម្ពុជា។-សម្តេចធិបតី ហ៊ុន ម៉ាណែត ថ្លែងថា កំពង់ផែស្វយ័តក្រុងព្រះសីហនុ បាននិងកំពុងដើរតួនាទីយ៉ាងសំខាន់ ក្នុងការរួមចំណែកគាំទ្រដល់ការរីកចម្រើន និងការអភិវឌ្ឍរបស់ប្រទេសជាតិ។ ទំនិញឆ្លងកាត់នៅក្នុងកំពង់ផែនេះ គឺមានការកើនឡើងគួរឱ្យកត់សម្គាល់ពីមួយឆ្នាំទៅមួយឆ្នាំ ធ្វើឱ្យប្រាក់ចំណូលរបស់កំពង់ផែ ក៏ដូចជាប្រាក់ចំណូលរបស់ជាតិមានការកើនឡើងជាលំដាប់។-សម្តេចធិបតី បានបញ្ជាក់ថា រយៈពេល ១១ខែ ឆ្នាំ២០២៣ បរិមាណទំនិញឆ្លងកាត់កំពង់ផែព្រះសីហនុមានចំនួនជាង ៧ លានតោន កើនឡើង ១១,៣៤ ភាគរយ ដោយរកចំណូលអាជីវកម្មសរុបមានចំនួនជាង ៨៥ លានដុល្លារអាម៉េរិក កើនឡើង ២,៧១ ភាគរយ បើធៀបនឹងរយៈពេលដូចគ្នាឆ្នាំ២០២២។-សម្តេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បញ្ជាក់បន្ថែមថា រយៈពេល ១១ ខែ ឆ្នាំ ២០២៣នេះ បរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុ មានចំនួនសរុបជិត ៨០ ម៉ឺន TEUs (Twenty-food Equivalent Unit) ដោយមានកំណើនជាមធ្យម ១០,៨៣ ភាគរយក្នុងរយៈពេល ១២ ឆ្នាំចុងក្រោយ គិតចាប់ពីឆ្នាំ២០១០ ដល់ឆ្នាំ២០២២។-សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី៖ ក្រោយសាងសង់រួចកំពង់ផែទឹកជ្រៅព្រះសីហ នុ នឹងមាននាវាដែលផ្ទុកទំនិញបានប្រមាណ ៦០០០០ តោនចូលចតបាន និងមានសមត្ថភាពទទួល នាវាក្នុងតំបន់ប្រមាណ ៩៣ ភាគរយឱ្យចូលចត។-សម្តេចធិបតី ហ៊ុន ម៉ាណែត៖ កំពង់ផែកម្ពុជា គឺជាចំណុចកណ្ដាលនៃកំពង់ផែ ដ៏រវល់របស់ថៃ និងវៀតណាម ហេតុនេះត្រូវពង្រីកសក្ដានុពលឱ្យបានកាន់តែច្រើន ដើម្បីទទួលការ លើកដាក់ទំនិញឱ្យបានកាន់តែប្រសើរថែមទៀត។-សម្តេចធិបតី ហ៊ុន ម៉ាណែត ថ្លែងថា គម្រោងព្រែកជីកហ្វូណនតេជោ និងការពង្រីកកំពង់ផែខេត្តព្រះសីហនុ គឺដើម្បីបម្រើសក្ដានុពលសេដ្ឋកិច្ច លើកកម្ពស់សេដ្ឋកិច្ចជាតិ និងលើកកម្ពស់ជីវភាពប្រជាពលរដ្ឋឱ្យកាន់តែរីកច្រើនបន្ថែមទៀត ដោយគ្មានអ្វីដែលជាអាថ៍កំបាំងនោះទេ។-សម្តេចធិបតី ហ៊ុន ម៉ាណែត៖ គម្រោងព្រែកជីកហ្វូណនតេជោ ដែលភ្ជាប់ពី ទន្លេទៅតំបន់សមុទ្ទ គឺដើម្បីបម្រើសក្ដានុពលសេដ្ឋកិច្ច និងបម្រើដល់ការដឹកជញ្ជូន ហើយក៏មិនមាន អ្វីជាអាថ៌កំបាំងត្រូវលាក់លៀមនោះដែរ។-សម្តេចធិបតី ហ៊ុន ម៉ាណែត៖ ឆ្នាំ២០២៩ កម្ពុជានឹងស្វាគមន៍នាវាគ្រប់ប្រភេទ ទាំងអស់ឱ្យចូលចតកំពង់ផែរបស់កម្ពុជា។-សម្តេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ស្នើឯកឧត្តមអនុរដ្ឋមន្ត្រីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ជួយសម្របសម្រួលឱ្យមានកម្មវិធីផ្លាស់ប្ដូរបទពិសោធន៍រវាងមន្រ្ដីកម្ពុជា និងជប៉ុនលើកិច្ចការងារកសាងហេដ្ឋារចនាសម្ព័ន្ធ ផ្លូវ ស្ពាន ដើម្បីកម្ពុជាអាចទទួលបានបទពិសោធន៍បន្ថែមទៀត លើកិច្ចការងារសាងសង់ហេដ្ឋារចនាសម្ព័ន្ធនៅកម្ពុជា។-សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានស្នើដល់ប្រទេសជប៉ុន សូមជួយចែករំលែក ចំណេះដឹង និងបទពិសោធន៍នានាពាក់ព័ន្ធនឹងការងារបច្ចេកទេសសាងសង់​ប្រព័ន្ធហេដ្ឋារចនាសម្ព័ន្ធ ផ្លូវ ស្ពាន ដល់កម្ពុជា។

បណ្ដាញសង្គម

ព័ត៌មានថ្មីៗ

ឯកឧត្តម ហ៊ុន ម៉ានី អញ្ជើញបិទវគ្គបណ្ដុះបណ្ដាល «ជនបង្គោលលើការងារមហាជនក្រុង-ស្រុក-ឃុំ-សង្កាត់» ខេត្តកំពង់ស្ពឺ
08/15/2026 08:08 PM
Facebook Telegram Linkin
តុលាការកំពូលកម្ពុជាបង្ហាញលទ្ធផលនៃសន្និសីទតុលាការនៃបណ្តាខេត្តជាប់ព្រំដែន
08/15/2026 07:08 PM
Facebook Telegram Linkin
លោកជំទាវបណ្ឌិត ពេជ ចន្ទមុន្នី អញ្ជើញប្រគល់ផ្ទះថ្មីចំនួន ៧ខ្នង ជា​អំណោយ​ដ៏​ថ្លៃ​ថ្លា​របស់​សម្តេចធិបតី និងលោកជំទាវផ្ទាល់ ជូន​ដល់​ក្រុម​គ្រួសារ​នៃ​វីរកងទ័ពពលី រស់នៅ​ខេត្តព្រៃវែង និង​ខេត្តស្វាយរៀង​
08/15/2026 07:08 PM
Facebook Telegram Linkin
អ្នកជំនាញ៖ ប្រសិនបើការដឹកជញ្ជូនតាមសមុទ្រខ្មៅ ត្រូវបានផ្អាកយូរ សេដ្ឋកិច្ចអ៊ុយក្រែននឹងរងផលប៉ះពាល់ធ្ងន់ធ្ងរ
08/15/2026 07:08 PM
Facebook Telegram Linkin
លោក TRUMP៖ ប្រសិនបើអ៊ីរ៉ង់វាយប្រហារ ការឆ្លើយតបរបស់សហរដ្ឋអាមេរិក នឹងខ្លាំងជាង១០០ដង
08/15/2026 07:08 PM
Facebook Telegram Linkin
ប្រភព៖ មនុស្សយ៉ាងតិច ១៤ នាក់ បានស្លាប់ នៅក្នុងការវាយប្រហារនៅជិតរដ្ឋធានី El Obeid នៅកណ្តាលប្រទេសស៊ូដង់
08/15/2026 07:08 PM
Facebook Telegram Linkin
នាយករដ្ឋមន្ត្រីលីបង់ជំរុញឲ្យមានពេលវេលាច្បាស់លាស់សម្រាប់អ៊ីស្រាអែលដកកងទ័ពចេញពីភាគខាងត្បូង
08/15/2026 07:08 PM
Facebook Telegram Linkin
គេចវេសពីបាតុភូតអែល នីញ៉ូ បក្សីសមុទ្រអាមេរិកខាងត្បូង ផ្លាស់ទីជម្រកទៅកាន់ប៉ាណាម៉ា
08/15/2026 07:08 PM
Facebook Telegram Linkin
អេស្ប៉ាញបង្កើនវិធានការសន្តិសុខនៅតំបន់ Ceuta ខណៈមានការអំពាវនាវឲ្យជនអន្តោប្រវេសន៍ឆ្លងកាត់ព្រំដែនទ្រង់ទ្រាយធំជាថ្មី
08/15/2026 07:08 PM
Facebook Telegram Linkin
រដ្ឋមន្ត្រីការបរទេសប៉ាគីស្ថាន ជំរុញឲ្យប្រើការសន្ទនា ដើម្បីសន្តិភាពក្នុងតំបន់ ខណៈការចរចារវាងអាមេរិក និងអ៊ីរ៉ង់ នៅបន្តជាប់គាំង
08/15/2026 07:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.