នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម
សម្ដេចតេជោ អំពាវនាវដល់រាជរដ្ឋាភិបាលយកចិត្តទុកដាក់សាងសង់កន្លែងស្នាក់នៅសម្រាប់សិស្សជាស្ត្រី
សម្ដេចធិបតី៖ មន្ត្រីជាអ្នកបម្រើរាស្ត្រ មិនមែនជាចៅហ្វាយរាស្ត្រទេ

នយោបាយ​ និង ការអភិវឌ្ឍន៍

អាមេរិកមើលមិនឃើញផលប៉ះពាល់ដល់ទំនាក់ទំនងជាមួយវៀតណាម ពីសម្ព័ន្ធភាពហាណូយ-ប៉េកាំង នោះទេ

2023/12/19 08:09:40 pm        370
Facebook Telegram Linkin
មន្ត្រីអាមេរិកមួយរូបបាននិយាយថា សហរដ្ឋអាមេរិកនឹងបន្តកិច្ចសហប្រតិបត្តិការយ៉ាងជិតស្និទ្ធជាមួយវៀតណាម បន្ទាប់ពីទីក្រុងហាណូយ បានប្រកាសកាលពីសប្តាហ៍មុនថាបានពង្រឹងទំនាក់ទំនងជាមួយប្រទេសចិន រួមទាំងលើវិស័យការពារជាតិ និងសន្តិសុខ ខណៈដែលមហាអំណាចទាំងពីរកំពុងប្រកួតប្រជែងដណ្តើមឥទ្ធិពល។បណ្ដាមេដឹកនាំវៀតណាម បានធ្វើឱ្យប្រសើរឡើងនូវទំនាក់ទំនងជាមួយទីក្រុងប៉េកាំង ក្នុងអំឡុងពេលដំណើរទស្សនកិច្ចរបស់ប្រធានាធិបតីចិនលោក ស៊ី ជីនពីង (Xi Jinping) ទៅកាន់ទីក្រុងហាណូយ កាលពីសប្តាហ៍មុន រយៈពេលបីខែបន្ទាប់ពីពួកគេបានបង្កើនទំនាក់ទំនងជាមួយទីក្រុងវ៉ាស៊ីនតោន នៅពេលដែលលោកប្រធានាធិបតី ចូ បៃដិន (Joe Biden) បានធ្វើដំណើរទៅកាន់ប្រទេសនេះនៅក្នុងអ្វីដែលត្រូវបានគេមើលឃើញថាជាជោគជ័យសម្រាប់វិធានការ «ការទូតដើមឫស្សី» របស់វៀតណាម។ទោះបីជាមានភាសានៅក្នុងសេចក្តីថ្លែងការណ៍ចិន-វៀតណាម ដែលអាចត្រូវបានគេមើលឃើញថាជាទិសដៅប្រឆាំងនឹងសហរដ្ឋអាមេរិកក៏ដោយ ក៏ក្តីបារម្ភដែលអាចរារាំងដល់ផែនការរបស់ទីក្រុងវ៉ាស៊ីនតោន ក្នុងការធ្វើឱ្យទំនាក់ទំនងកាន់តែស៊ីជម្រៅជាមួយទីក្រុងហាណូយ រហូតមកដល់ពេលនេះនៅមានកម្រិតនៅឡើយ។លោក ខាល ថាយើ (Carl Thayer) អ្នកជំនាញជាន់ខ្ពស់ផ្នែកសន្តិសុខវៀតណាមនៅបណ្ឌិតសភាកងកម្លាំងការពារអូស្ត្រាលីនៅទីក្រុង កង់បេរ៉ា (Canberra) បាននិយាយថា «គោលដៅដែលចង់បាន» ទាំងនោះរបស់វៀតណាមជាមួយប្រទេសចិន ទំនងជាមិនប៉ះពាល់ដល់កិច្ចសហប្រតិបត្តិការការពារជាតិជាមួយទីក្រុងវ៉ាស៊ីនតោននោះទេ៕

សម្ដេចធិបតី ៖«ការអភិវឌ្ឍធនធានមនុស្សចាំបាច់ត្រូវផ្អែកលើកត្តាចំណេះដឹង សមត្ថភាព និងសុខភាព»

2023/12/19 08:00:43 pm        517
Facebook Telegram Linkin
នាព្រឹកថ្ងៃទី១៩ ខែធ្នូ ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃ​ព្រះរាជាណាចក្រកម្ពុជា បានអនុញ្ញាតឱ្យ លោក កាត្សឹណារី ម៉ាត្សឹដា (Katsunari Matsuda) នាយក​ក្រុមហ៊ុន Meiji Co., Ltd ចូលជួបស​ម្តែង​ការ​គួរសម​ក្នុង​ឱកាស​នៃ​ការ​ចូល​រួម​កិច្ច​ប្រជុំ​កំពូល​រំឭក​ខួបអនុស្សាវរីយ៍អាស៊ាន-ជប៉ុន លើកទី៥០ ចាប់ពីថ្ងៃទី១៥-១៩ ខែធ្នូ ឆ្នាំ២០២៣ នៅ​ទីក្រុងតូក្យូ ប្រទេសជប៉ុន ។ក្នុងឱកាសនៃជំនួបនេះ លោក កាត្សឹណារី ម៉ាត្សឹដា បានថ្លែងអំណរគុណចំពោះសម្តេចធិបតី ដែល​បាន​ឆ្លៀតពេលវេលាដ៏មមាញឹកអនុញ្ញាតឱ្យរូបលោក និងសហការីចូលជួបសម្តែងការគួរសម ព្រម​ទាំង​បានជម្រាបអំពីវឌ្ឍនភាពរីកចម្រើននៃសកម្មភាពអាជីវកម្មរបស់ក្រុមហ៊ុន និងអំពី​គម្រោង​នៃ​ការវិនិយោគរបស់ខ្លួនទាំងលើភាពសម្បូរបែបនៃផលិតផល និងទាំង​លើ​បច្ចេក​វិទ្យា​ទំនើប ​នៅក្នុងប្រទេសកម្ពុជានាពេលខាងមុខ។ នៅក្នុងជំនួបនេះលោកអគ្គនាយក ក្រុមហ៊ុន Meiji ក៏បាន​សម្តែង​នូវ​ការ​អរគុណ​ចំពោះ​រាជរ​ដ្ឋាភិបាល​កម្ពុជា​ដែល​បាន​បង្ក​លក្ខណៈ​គ្រប់​បែប​យ៉ាង​ចំពោះដំ​ណើរការអាជីវកម្មរបស់ក្រុមហ៊ុនឱ្យដំណើរការដោយរលូន ។ជាការឆ្លើយតប សម្តេចធិបតី បានស្វាគមន៍ចំពោះជំនួបជាមួយលោក កាត្សឹណារី ម៉ាត្សឹដា  និង​សហការី ព្រមទាំងបានសម្តែងនូវការអរគុណ និងសេចក្តីសោមនស្សរីករាយចំពោះក្រុមហ៊ុន Meiji ដែល​បានបង្ហាញពីចំណាប់អារម្មណ៍ និងគ្រោងវិនិយោគនៅកម្ពុជានាពេលអនាគតខាងមុខ ដោយ សម្តេច បានគូសបញ្ជាក់ថា រាជរដ្ឋាភិបាលកម្ពុជា បាននិង​កំពុង​យក​ចិត្ត​ទុកដាក់​លើការ​អភិវឌ្ឍ​ធនធានមនុស្ស ដែលចាំបាច់ត្រូវផ្អែកលើកត្តាចំណេះដឹង សមត្ថភាព និងសុខភាព ដូច្នេះ​ការ​ផ្គត់ផ្គង់​ចំណីអាហារប្រកបដោយគុណភាព និងសុវត្ថិភាព ជាកត្តាអទិភាពចម្បង។ សម្តេច​នាយករដ្ឋមន្ត្រី បានលើកទឹកចិត្តឱ្យក្រុមហ៊ុនធ្វើការបណ្តាក់ទុនវិនិយោគលើវិស័យកសិកម្ម ដោយ​ធ្វើ​ការផលិតផ្ទាល់ ដើម្បីលក់នៅទីផ្សារកម្ពុជា និងនាំចេញទៅប្រទេសជិតខាង និង​ប្រទេស​ក្នុង​តំបន់ដែលកំពុងមានតម្រូវការខ្ពស់ចំពោះផលិតផលទាំងអស់នេះ ព្រម​ទាំង​លើក​ទឹក​ចិត្ត​ឱ្យ​ក្រុម​ហ៊ុន​ជួយបណ្តុះបណ្តាលធនធានមនុស្សកម្ពុជាលើជំនាញកសិកម្ម ដើម្បី​ចូល​រួម​លើក​កម្ពស់​ផលិត​ភាព​ក្នុងវិស័យនេះឱ្យកាន់តែខ្លាំងក្លាថែមទៀត។ លើសពីនេះ សម្តេចមហាបវរធិបតី ក៏ធ្វើការគូសបញ្ជាក់ថែមទៀតថា រាជរដ្ឋាភិបាលកម្ពុជា បាន និង​កំពុងយកចិត្តទុកដាក់នៅក្នុងការធានានិរន្តរភាពនៃបរិយាកាសអំណោយផលសម្រាប់ធុរកិច្ច និង​វិនិយោគ តាមរយៈការដាក់ចេញនូវគោលនយោបាយ យន្តការអនុវត្ត និង​ក្រប​ខ័ណ្ឌ​គតិ​យុត្តថ្មី​ៗ ​ដើម្បីជួយសម្រួល និងផ្តល់នូវការលើកទឹកចិត្តប្រកបដោយភាពអនុគ្រោះ និង​ភាព​ទាក់​ទាញ​ដល់​វិនិយោគិនដែលមកវិនិយោគនៅក្នុងប្រទេសកម្ពុជា៕

ប្រធានចារកម្មអាមេរិក CIA បានជួបមន្ត្រីអ៊ីស្រាអែល និងកាតា សម្រាប់ការពិភាក្សាកិច្ចព្រមព្រៀងចំណាប់ថ្នូរថ្មី

2023/12/19 07:58:48 pm        358
Facebook Telegram Linkin
នាយកទីភ្នាក់ងារស៊ើបការណ៍ចារកម្មសម្ងាត់ CIA របស់អាមេរិកលោក ប៊ីល ប៊ឺនស៍ (Bill Burns) កាលពីថ្ងៃច័ន្ទ (១៨ ធ្នូ) បានជួបជាមួយនាយករដ្ឋមន្ត្រីកាតា លោក ម៉ូហាម៉េដ ប៊ីនអាបឌូលរ៉ាហ្វម៉ាន អាល់ថានី (Mohammed bin Abdulrahman Al Thani) និងប្រធានទីភ្នាក់ងារចារកម្ម ម៉ូសាដ (Mossad) របស់អ៊ីស្រាអែលនៅរដ្ឋធានីវ៉ាសូវី (Warsaw) របស់ប្រទេសប៉ូឡូញ ដើម្បីពិភាក្សាអំពីលទ្ធភាពកិច្ចព្រមព្រៀងថ្មីក្នុងការធានាការដោះលែងចំណាប់ថ្នូរអ៊ីស្រាអែល ដែលបានចាប់ខ្លួនដោយក្រុមហាម៉ាស នៅតំបន់ហ្កាហ្សា នេះបើយោងតាមមន្ត្រីអាមេរិក និងអ៊ីស្រាអែលពីររូបបានប្រាប់សារព័ត៌មាន អាស៊ីអូស (Axios)។លោក ប៊ឺនស៍ បានដើរតួយ៉ាងសំខាន់ក្នុងការសម្របសម្រួលកិច្ចព្រមព្រៀងលើកមុន ដែលនាំទៅដល់ការដោះលែងចំណាប់ថ្នូរជាង ១០០នាក់ កាលពីខែមុន ដែលក្នុងនោះមានជនជាតិអាមេរិកជាច្រើននាក់។ ក្រុមមន្ត្រីអ៊ីស្រាអែលនិយាយថា ការបន្តចូលរួមរបស់លោក ប៊ឺនស៍ នៅក្នុងការចរចាមានសារៈសំខាន់ខ្លាំងណាស់ក្នុងការសម្រេចបានកម្មកិច្ចព្រមព្រៀងថ្មីមួយ។កិច្ចប្រជុំនៅទីក្រុង វ៉ាសូវី បានធ្វើឡើងរយៈពេលបីថ្ងៃបន្ទាប់ពីនាយករដ្ឋមន្ត្រីកាតា និងនាយកទីភ្នាក់ងារចារកម្ម ម៉ូសាដ លោក ដេវីដ ប៉ានៀ (David Barnea) បានជួបប្រជុំគ្នានៅរដ្ឋធានីអឺរ៉ុបមួយផ្សេងទៀត ដើម្បីព្យាយាមចាប់ផ្តើមការពិភាក្សាដោយប្រយោលឡើងវិញរវាងអ៊ីស្រាអែល និងក្រុមហាម៉ាស ដែលកំពុងសម្របសម្រួលដោយប្រទេសកាតា។មន្ត្រីអ៊ីស្រាអែលបាននិយាយថា ពួកគេរំពឹងថាវានឹងកាន់តែលំបាកក្នុងការយល់ព្រមលើលក្ខខណ្ឌនៃលទ្ធភាពកិច្ចព្រមព្រៀងថ្មីនាពេលនេះ។ ប្រតិបត្តិការយោធារបស់អ៊ីស្រាអែល នៅតំបន់ហ្កាហ្សា ឥឡូវនេះផ្តោតលើការដាក់សម្ពាធលើមេដឹកនាំក្រុមហាម៉ាសនៅហ្កាហ្សា លោកយ៉ាហា ស៊ីនវ៉ា (Yahya Sinwar) ហើយក្រុមសកម្មប្រយុទ្ធមួយនេះ កំពុងស្វះស្វែងរកបទឈប់បាញ់ ដោយទុកឱកាសតិចតួចប៉ុណ្ណោះសម្រាប់ការចរចាចំណាប់ថ្នូរ៕

សម្ដេចធិបតី ហ៊ុន ម៉ាណែត លើកទឹកចិត្ត​តំណាង​សហព័ន្ធ​សេដ្ឋកិច្ច​តំបន់កាន់សៃ​ជួយផ្សព្វផ្សាយ​ពីសក្តានុពល​កម្ពុជាដល់វិនិយោគិនជប៉ុន

2023/12/19 07:55:19 pm        990
Facebook Telegram Linkin
នាព្រឹកថ្ងៃទី១៩ ខែធ្នូ ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃ​ព្រះរា​ជា​ណាចក្រកម្ពុជាបានអនុញ្ញាតឱ្យលោក អូបាយ៉ាស៊ី តាកេអុ (OBAYASHI TAKEO) ប្រធាន​ផ្នែ​កទំនាក់ទំនងអន្តរជាតិ តំណាងសហព័ន្ធសេដ្ឋកិច្ចតំបន់កាន់សៃ និងជាប្រធានក្រុមហ៊ុន OBAYASHI​ CORPORATION ចូលជួបសម្តែងការគួរសម ក្នុងឱកាស​នៃ​ការ​ចូលរួម​កិច្ច​ប្រជុំ​កំពូល​រំឭក​ខួបអនុស្សាវរីយ៍អាស៊ាន-ជប៉ុន លើកទី៥០ ចាប់ពីថ្ងៃទី១៥-១៩ ខែធ្នូ ឆ្នាំ២០២៣ នៅ​ទីក្រុងតូក្យូ ប្រទេសជប៉ុន ។ក្នុងឱកាសនៃជំនួបនេះលោក អូបាយ៉ាស៊ី តាកេអុ បានថ្លែងអំណរគុណចំពោះ សម្តេចធិបតី ដែល​បាន​ឆ្លៀត​ពេលវេលាដ៏មមាញឹកអនុញ្ញាតឱ្យរូបលោក និងសហការីចូលជួបសម្តែងការគួរសម ព្រម​ទាំងបាន​ជម្រាបអំពីសកម្មភាពអាជីវកម្មរបស់សហព័ន្ធសេដ្ឋកិច្ចតំបន់កាន់សៃ ជាពិសេស​សកម្មភាព​ការងារ​មួយចំនួនដែលបានអនុវត្តនៅក្នុងប្រទេសកម្ពុជា តួយ៉ាងដូចជា ការជួលជុល​ស្ពាន​មិត្ត​ភាពកម្ពុជា-ជប៉ុនជ្រោយចង្វារ ជាដើម។ ទន្ទឹមនេះលោកប្រធានបានជម្រាបផងដែរ អំពី​បំណង​ពង្រីក​វិនិយោគ​របស់​ខ្លួន​ក៏​ដូច​ជា​ជំរុញ​ទឹក​ចិត្ត​ក្រុម​ហ៊ុន​ជប៉ុន​ដទៃ​ឱ្យ​ទៅ​វិនិយោគ​នៅ​ប្រទេស​កម្ពុជា។ លោកប្រធានក៏ជម្រាបជូន សម្តេចធិបតី ផងដែរ   អំពីគម្រោង​ពិព័រណ៍​សាកល​នៅ​ក្នុង​សហព័ន្ធសេដ្ឋកិច្ចតំបន់កាន់សៃ នាឆ្នាំ២០២៤ ខាងមុខនេះ ជាមួយក្តីសង្ឃឹម​ថា​កម្ពុជា​នឹង​ចូល​រួម​ក្នុងព្រឹត្តិការណ៍ដ៏សំខាន់នេះ។ ជាការឆ្លើយ​តបសម្តេចធិបតី បានស្វាគមន៍ចំពោះជំនួបជាមួយលោក អូបាយ៉ាស៊ី តាកេអុ  និង​សហការី ព្រមទាំង​បាន​សម្តែង​នូវ​សេចក្តី​សោមនស្ស​រីករាយ​ចំពោះ​សហព័ន្ធ​សេដ្ឋកិច្ច​តំប​ន់​កាន់សៃ ដែលប្រមូលផ្តុំនូវក្រុមហ៊ុន ឬសហគ្រាសជាច្រើនក្នុងតំបន់កាន់សៃ មា​ន​បំណង​បោះទុន​វិនិយោគ​នៅ​កម្ពុជា ព្រមជាមួយនេះ សម្តេចបាន​លើក​ទឹក​ចិត្ត​ឱ្យ​បន្ត​ជួយ​ផ្សព្វផ្សាយ​អំពី​សក្តានុពល​របស់កម្ពុជាទៅដល់វិនិយោគិនជប៉ុន ដើម្បីទទួលបាននូវការចាប់អារម្មណ៍ និង​ឱកាស​ក្នុង​ការ​ពង្រីកវិនិយោគរបស់ខ្លួននៅកម្ពុជា។ ក្នុងឱកាសនោះសម្តេចធិបតីបានជ្រាបជូនផងដែរថា ក្រសួង​ពាណិជ្ជកម្ម​កម្ពុជា​នឹង​រៀបចំ​ក្នុង​ការ​ចូលរួម​ព្រឹត្តិការណ៍ពិព័រណ៍សាកលក្នុងសហព័ន្ធសេដ្ឋកិច្ចតំបន់កាន់សៃនាពេលខាងមុខនេះ។ លើស​ពី​នេះសម្តេចនាយករដ្ឋមន្ត្រី បានគូសបញ្ជាក់ទៀតថា រាជរដ្ឋា​ភិបាល​កម្ពុជា​បាន​និង​កំពុង​យក​ចិត្ត​ទុកដាក់នៅក្នុងការធានានិរន្តរភាពនៃបរិយាកាសអំណោយផលសម្រាប់ធុរកិច្ច និង​វិនិយោគ​តាមរយៈការដាក់ចេញនូវគោលនយោបាយ យន្តការអនុវត្ត និងក្របខ័ណ្ឌគតិយុត្តថ្មីៗ ព្រម​ជាមួយនឹងការអភិវឌ្ឍហេដ្ឋារចនាសម្ព័ន្ធតភ្ជាប់ និងឡូជីស្ទីកសំខាន់ៗ ដូចជា ផ្លូវលឿន ផ្លូវដែក និងកំពង់ផែ ជាដើម។ ទន្ទឹមនឹងនេះរាជរដ្ឋាភិបាល ក៏កំពុង​ពិនិត្យ​លទ្ធភាព​ក្នុង​ការ​បង្កើត​សួន​ឧស្សាហកម្មកម្ពុជា-ជប៉ុន និងការកសាងផែនការមេក្នុងវិស័យឡូជីស្ទីក ដើម្បីប្រែ​ក្លាយ​កំពង់​ផែ​ស្វយ័ត​ក្រុងព្រះសីហនុ​ទៅ​ជាកំ​ពង់​ផែ​ស្នូល​ដ៏​សំខាន់​មួយ​នៅ​ក្នុង​តំបន់​។ បរិយាកាស​ទាំង​នេះ​ជាកា​រ​ជួយសម្រួល និងផ្តល់នូវការលើកទឹកចិត្តប្រកបដោយភាពអនុគ្រោះ និងភាព​ទាក់​ទាញ​ដល់​វិនិយោគិន​ដែល​មកវិនិយោគនៅក្នុងប្រទេសកម្ពុជា។សូមបញ្ជាក់ថា សហព័ន្ធសេដ្ឋកិច្ចតំបន់កាន់សៃ ប្រមូលផ្តុំនូវក្រុមហ៊ុន ឬសហគ្រាស​ខ្នាត​យក្ស​ដែល​មា​នទីតាំងក្នុងតំបន់កាន់សៃ នៅភាគខាងលិចនៃប្រទេសជប៉ុន ក្នុងនោះរួមមានចំនួន ៧ ខេត្ត ដូចជា ខេត្តអូសាកា, ខេត្តក្យូតុ, ខេត្តហ្យូហ្កុ, ខេត្តណារ៉ា, ខេត្តស៊ីហ្កា, ខេត្តមិអិ និង​ខេត្ត​វ៉ាកាយ៉ាម៉ា ដោយក្រុមហ៊ុនយក្សទាំងអស់នោះ សុទ្ធសឹង​មាន​ឥទ្ធិពល​ដល់​ការ​អភិវឌ្ឍ​សេដ្ឋកិច្ច​របស់​ប្រទេស​ជប៉ុន៕

គណបក្សនយោបាយចំនួនបួនចូលរួមការបោះឆ្នោតជ្រើសរើសសមាជិកព្រឹទ្ធសភានាខែកុម្ភៈខាងមុខ

2023/12/19 07:43:09 pm        598
Facebook Telegram Linkin
អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា គណបក្ស​នយោបាយ​ចំនួនបួននឹងចូលរួមការបោះឆ្នោតជ្រើសរើសសមាជិកព្រឹទ្ធសភា នាខែកុម្ភៈ ឆ្នាំ ២០២៤ ខាងមុខ។ឯកឧត្តម ហង្ស ពុទ្ធា សមាជិក និងជាអ្នកនាំពាក្យ គ.ជ.ប បានប្រាប់ BTV នៅថ្ងៃទី១៩ ខែធ្នូ ឆ្នាំ​២០២៣​ថា ក្នុងដំណើរ​ឆ្ពោះទៅ​រក​ការ​រៀបចំ​បោះឆ្នោត​ជ្រើសតាំង​សមាជិក​ព្រឹទ្ធសភា​ដែល​នៅ​សល់​រយៈ​ពេល២ខែទៀតប៉ុណ្ណោះ គ.ជ.ប បានកំពុងរៀបចំជ្រើសរើស​មន្រ្តី​រៀបចំ​ការ​បោះឆ្នោត​សមាជិក​ព្រឹទ្ធសភាតាមបណ្តារាជធានី-ខេត្ត។ ឯកឧត្តមបន្តថា គិតមកដល់ពេលនេះ គ.ជ.ប សម្រេច​ទទួលយកគណបក្សនយោបាយចំនួនបួន ដើម្បី​ចូលរួមប្រកួត​ប្រជែង​ការ​បោះឆ្នោត​នា​ពេល​ខាង​មុខ ក្នុងនោះរួមមាន គណបក្សប្រជាជនកម្ពុជា, គណបក្សឆន្ទះខ្មែរ, គណបក្សកម្លាំងជាតិ និងគណបក្សហ្វ៊ុនស៊ិនប៉ិច។ឯកឧត្តម ហង្ស ពុទ្ធា បានបញ្ជាក់ទៀតថា ចំពោះ​អង្គ​បោះឆ្នោត​នឹង​ចូលរួម​ការ​បោះឆ្នោត​ជ្រើស​តាំង​សមាជិក​ព្រឹទ្ធសភា ជាសមាជិកក្រុមប្រឹក្សាឃុំ-សង្កាត់ ក្នុងមុខតំណែង និងតំណាង​រាស្រ្ត​ក្នុង​នីតិកាលទី៧​។ឯកឧត្តមបញ្ជាក់ថា បន្ទាប់ពីដំណាក់កាលចុះបញ្ជីគណបក្សនយោបាយ និង​បេក្ខជន​ឈរ​ឈ្មោះ​ប្រកួត​ប្រជែង គ.ជ.ប នឹងឆ្ពោះទៅដំណាក់កាលឃោសនាបោះឆ្នោត ដែលនឹង​ប្រព្រឹត្ត​ទៅ​ពី​ថ្ងៃ​ទី១០ ដល់ថ្ងៃទី២៣ ខែកុម្ភៈ ឆ្នាំ២០២៣ ខណៈ​ការ​បោះឆ្នោត​ជ្រើសតាំង​សមាជិក​ព្រឹទ្ធសភា​នឹង​ប្រព្រឹត្ត​ទៅ​នាថ្ងៃ​ទី២៥ ខែកុម្ភៈ ឆ្នាំ២០២៤៕ អត្ថបទ៖ សេក ឧត្តម

សម្ដេចធិបតី ហ៊ុន ម៉ាណែត បន្តជួបពិភាក្សាការងារជាមួយម្ចាស់ក្រុមហ៊ុន និងវិនិយោគិនជប៉ុនជាច្រើននាក់ព្រឹកនេះ

2023/12/19 07:31:27 pm        459
Facebook Telegram Linkin
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានាព្រឹកថ្ងៃទី១៩ ខែធ្នូ ឆ្នាំ២០២៣នេះ នៅទីក្រុង តូក្យូ ប្រទេសជប៉ុន បាន​អញ្ជើញ​ចូលរួ​មសិក្ខា​សាលា​វិនិយោគ​កម្ពុជា​ឆ្នាំ​២០២៣ ស្តីពីបរិយាកាសវិនិយោគ និងសក្តានុពលនៃការធើ្វធុរកិច្ចនៅកម្ពុជា និង​បន្ត​ជួប​ជាមួយ​បណ្ដាម្ចាស់ក្រុមហ៊ុន និងវិនិយោគិនជប៉ុនជាច្រើនរូប ដើម្បីពិភាក្សាការងារ និ​ង​ផ្សព្វ​ផ្សាយ​ពី​សក្តានុពលវិនិយោគនៅកម្ពុជាដល់បណ្តាវិនិយោគិនជប៉ុន។សម្ដេចធិបតីនាយករដ្ឋមន្រ្ដី បានអញ្ជើញ​ចូលរួម​សិក្ខាសាលា​វិនិយោគកម្ពុជាឆ្នាំ ២០២៣ ស្តីពី​បរិយាកាស​វិនិយោគ និងសក្តានុពលនៃការធើ្វធុរកិច្ចនៅកម្ពុជា។ សិក្ខាសាលានេះ បានដើរ តួ​សំខាន់​ក្នុង​ការជំរុញលំហូរពាណិជ្ជកម្ម និងវិនិយោគ, កិច្ចសហប្រតិបត្តិការធុរកិច្ច និងនវានុវត្តន៍, ការ​យោគយល់គ្នាទៅវិញទៅមក និងមិត្តភាពរវាងប្រទេសទាំងពីរកម្ពុជា-ជប៉ុន។ សិក្ខា​សាលានេះមានវិនិយោគិនចូលរួមសរុបចំនួនប្រមាណជិត ៧០០ នាក់ ក្នុងនេះវិនិយោគិន​ជប៉ុន​ចូល​រួមដោយផ្ទាល់ និងតាមអនទ្បាញមានចំនួនប្រមាណជាង ៦០០ នាក់ និងវិនិយោគិន​កម្ពុជា​ចំនួន​ប្រមាណជាង៨០នាក់។ សិក្ខាសាលាវិនិយោគកម្ពុជាឆ្នាំ២០២៣ មានការ​សហការ​រៀបចំ​ដោយសភាពាណិជ្ជកម្មកម្ពុជា អង្គការពាណិជ្ជកម្មក្រៅ ប្រទេសជប៉ុន​ក្រុម​ប្រឹក្សា​អភិវឌ្ឍន៍​កម្ពុជា និងធនាគារមិស៊ូហ៊ុ (Mizuho) ដោយមាន ការចូលរួមដោយលោក អ៊ីស៊ីហ្គូរ៉ូ ណូរីហ៊ីគូ (ISHIGURO Norihiko) ប្រធាន និងជានាយកប្រតិបត្តិអង្គការពាណិជ្ជកម្មក្រៅប្រទេសជប៉ុន ព្រម​ទាំង​សមាជិកសភាពាណិជ្ជកម្មកម្ពុជា និងពាណិជ្ជករនៃប្រទេសជប៉ុនផងដែរ។ក្នុងឱកាស​នេះ​ដែរ​សម្តេច​ធិបតី ហ៊ុន ម៉ាណែត បានថ្លែងប្រាប់ដល់វិនិយោគិនជប៉ុនថា កម្ពុជា​មាន​សក្តានុពល​ច្រើន រាជរដ្ឋាភិបាលបានរៀបចំ ហេដ្ឋារចនាសម្ព័ន្ធផ្លូវល្បឿនលឿន ព្រលានយន្តហោះ កំពង់ផែ តំបន់សេដ្ឋកិច្ចពិសេស និងបាន​បង្ក​លក្ខណៈងាយ​ស្រួល​សម្រាប់​អ្នក​វិនិយោគ​នៅ​កម្ពុជា​។សម្តេចធិបតី​បានលើកឡើងពីការយកចិត្តទុកដាក់ដល់វិស័យឯកជន ដែលរាជរដ្ឋាភិបាល​បាន​ចាត់​ទុក​វិស័យឯកជនជាដៃគូរជាមួយនឹងរាជរដ្ឋាភិបាល។ សម្តេចធិបតីបានថ្លែងថា រាជរដ្ឋាភិ​បាល​ក៏​នឹង​ពង្រឹងកិច្ច សន្ទនាជាមួយវិស័យឯកជនឱ្យកាន់តែខ្លាំងឡើងតាមរយៈការរៀបចំ វេទិកា​រាជ​រដ្ឋាភិបាល និងវិស័យឯកជនឱ្យបានទៀងទាត់ ដោយ​សម្តេច​អញ្ជើញ​ធ្វើ​ជា​អធិបតី​ដោយ​ផ្ទាល់​ផង​ដែរ​។សម្តេចនាយករដ្ឋមន្ត្រីបានលើកទឹកចិត្តឱ្យអ្នកវិនិយោគ និងអ្នកធ្វើធុរកិច្ចជប៉ុនចូលមកសិក្សា និង​វិនិយោគ​នៅ​កម្ពុជា។ សម្តេចធិបតី បានបញ្ជាក់ថា រាជរដ្ឋាភិបាលកម្ពុជានឹងផ្តល់ការគាំទ្រ និង​កិច្ច​សម្រប​សម្រួល​គ្រប់រូបភាព ដើម្បីឱ្យធុរជន និងអ្នកវិនិយោគបរទេស អាចធ្វើធុរកិច្ច និងវិនិយោគ​នៅ​កម្ពុជា​ប្រកប​ដោយ​ផ្លែផ្កា និងរីកចម្រើន។បន្ទាប់ពីបានចូលរួម​សិក្ខាសាលាវិនិយោគកម្ពុជា ឆ្នាំ២០២៣ ស្តីពីបរិយាកាសវិនិយោគ និង​សក្តានុពល​នៃការធើ្វធុរកិច្ចនៅកម្ពុជា សម្ដេចធិបតី​នាយករដ្ឋ​មន្ដ្រី​បាន​បន្ត​អនុញ្ញាត​ឲ្យ​បណ្ដា​ម្ចាស់​ក្រុម​ហ៊ុន និងវិនិយោគិនជប៉ុនជាច្រើនរូបចូលជួបសម្ដែងការគួរសម និងពិភាក្សាការងារ។ សូម​ជម្រាបថា ឆ្នាំ២០២៣ គឺជាខួបលើកទី ៧០ឆ្នាំ នៃទំនាក់ទំនង ការទូត រវាងកម្ពុជា និង​ជប៉ុន​។ ប្រទេស​ទាំងពីរ​បាន​លើក​កម្ពស់​ទំនាក់ទំនង​ទ្វេភាគី​ទៅ​ជាភាព​ជាដៃគូ​យុទ្ធ​សាស្ត្រ​គ្រប់​ជ្រុង​ជ្រោយ ដែលឆ្លុះបញ្ចាំងពីជម្រៅ និងវិសាលភាពនៃកិច្ចសហប្រតិបត្តិការ និ​ង​ជំនឿ​ទុក​ចិត្ត​គ្នា​ទៅ​វិញ​ទៅ​មកដែលត្រូវបានកសាង អស់រយៈពេលជាច្រើនឆ្នាំមកនេះ។ ជប៉ុនគឺដៃគូពាណិជ្ជកម្ម និង​វិនិយោគដ៏ធំជាងគេបង្អស់មួយរបស់កម្ពុជាហើយក៏ជាប្រទេសផ្តល់ជំនួយដ៏ធំជាងគេមួយផងដែរ ដែល​បានចូលរួមចំណែកយ៉ាងសំខាន់ដល់ការអភិវឌ្ឍ សេដ្ឋកិច្ច សង្គម កម្ពុជា ចាប់តាំង​ពី​ការ​កសាង​ប្រទេសឡើងវិញដំបូង៕

រដ្ឋមន្រ្ដីសុខាភិបាល៖ សាកលវិទ្យាល័យវិទ្យាសាស្រ្តសុខាភិបាលបណ្តុះបណ្តាលនិស្សិត​ប្រកបដោយគុណភាព

2023/12/19 07:23:21 pm        319
Facebook Telegram Linkin
ឯកឧត្តមសាស្រ្តាចារ្យ ឈាង រ៉ា រដ្ឋមន្រី្តក្រសួងសុខាភិបាល បានអះអាងថា សាកលវិទ្យាល័យ​វិទ្យាសាស្រ្ត​សុខាភិបាល ទទួលបានការទុកចិត្តពីនិសិ្សត អាណាព្យាបាល និងសាធារណជន​លើ​ការ​បណ្តុះ​បណ្តាលស្រាវជ្រាវ និងការបម្រើសេវាផ្សេងៗប្រកបដោយគុណភាព។ឯកឧត្តមសាស្រ្តាចារ្យ ឈាង រ៉ា បានថ្លែង​បញ្ជាក់​បែប​នេះ​ក្នុង​ឱកាស​ពិធី​បើក​បវេសន​កាល​ឆ្នាំ​សិក្សា​២០២៣-២០២៤ ទីតាំងទី២ នៃសាកលវិទ្យាល័យវិទ្យាសាស្ត្រសុខាភិបាល នាព្រឹក​ថ្ងៃទី១៩ ខែធ្នូ ឆ្នាំ២០២៣នេះ។ ឯកឧត្តមសាស្រ្តាចារ្យថ្លែងថា នៅក្នុងយុទ្ធសាស្រ្តបញ្ចកោណដំណាក់កាលទី១ របស់​រាជ​រដ្ឋាភិបាល ក្នុងនោះបញ្ចកោណទី១ គឺផ្តោត​សំខាន់​ទៅ​លើ​ការ​អភិវឌ្ឍ​មូល​ធន​មនុស្ស​ឲ្យ​មាន​គុណភាព និងសុខភាពល្អ។ ជាពិសេស គឺផ្តោត​សំខាន់​ទៅ​លើ​ការ​អភិវឌ្ឍ​មូល​ធន​មនុស្ស​ឲ្យ​មាន​គុណភាព និងសុខភាពល្អ ដែលជាគន្លឹះសំខាន់បំផុតសម្រាប់ការជំរុញពិពិធកម្ម និង​កំណើត​សេដ្ឋកិច្ច ប្រកបដោយបរិយាប័ន្ន និងភាពធន។ បើតាមឯកឧត្តមសាស្រ្តាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និង​ជា​សាកល​វិទ្យា​ធិការ នៃសាកលវិទ្យាល័យវិទ្យាសាស្រ្តសុខាភិបាល បានឲ្យដឹងថា សាកលវិទ្យាល័យ​វិទ្យា​សាស្រ្ត​សុខាភិបាលនៅក្នុងឆ្នាំ២០២៣នេះ បាននិងកំពុងដំណើរការកម្មវិធីបណ្តុះបណ្តាលចំនួន ៤៧ កម្មវិធី ដោយមាន និស្សិតសរុបចំនួន ៧.៣៧០ នាក់ក្នុងនោះជានិស្សិតស្រីចំនួន ៤,៤០៩នាក់។ ឯកឧត្តមបញ្ជាក់ថា ក្នុងចំណោមនិស្សិតទាំងនោះ មាននិស្សិត ៦៨៦ នាក់​បាន​ទទួល​អាហា​រូបករណ៍​បង់ថ្លៃជំនួសដោយរាជរដ្ឋាភិបាលកម្ពុជា និងនិស្សិតថ្នាក់វេជ្ជបណ្ឌិតឯកទេសចំនួន ៨៦ នាក់​ទទួលអាហារូបករណ៍ពីសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិបណ្ឌិត ប៊ុន រ៉ានី ហ៊ុនសែន។ ឯកឧត្តមបញ្ជាក់ថា សាកលវិទ្យាល័យបានបន្តពង្រឹងគុណភាពបណ្តុះបណ្តាល ដោយ​ផ្តោត​លើ​សមត្ថភាព​ស្នូល ជាគោល និងលើការងារស្រាវជ្រាវ សាកលវិទ្យាល័យ បានសហការ​ជា​មួយ​ដៃ​គូរ​ជាតិ និងអន្តរជាតិ អនុវត្តនូវគម្រោងសិក្សាស្រាវជ្រាវ ចំនួន ២៧ គម្រោងថែមទៀត៕ អត្ថបទ ៖ រដ្ឋា

ចិនជំរុញឱ្យចក្រភពអង់គ្លេសបញ្ឈប់ការញុះញង់ប្រឆាំងប្រទេសចិន និងជួយអ្នកបង្កអស្ថិរភាពនៅទីក្រុងហុងកុង

2023/12/19 06:06:28 pm        404
Facebook Telegram Linkin
ស្ថានទូតចិនប្រចាំនៅចក្រភពអង់គ្លេស កាលពីថ្ងៃចន្ទ បានច្រានចោលការលើកឡើងរបស់អ្នកនយោបាយចក្រភពអង់គ្លេស ដែលទាក់ទងនឹងតំបន់រដ្ឋបាលពិសេសហុងកុង។ លោក David Cameron រដ្ឋមន្ត្រីការបរទេសអង់គ្លេសទទួលបន្ទុកកិច្ចការបរទេស និងអភិវឌ្ឍន៍ ថ្មីៗនេះបានចេញសេចក្តីថ្លែងការណ៍មួយ ដោយបន្តមួលបង្ខូចច្បាប់សន្តិសុខជាតិក្នុងទីក្រុងហុងកុង និងអំពាវនាវឱ្យអាជ្ញាធរហុងកុង បញ្ចប់ការកាត់ទោស និងដោះលែងមហាសេដ្ឋីប្រព័ន្ធផ្សព្វផ្សាយលោក ជីមីឡៃ (Jimmy Lai)។ ឆ្លើយតបទៅនឹងសំណួរចំពោះទង្វើរបស់លោក Cameron អ្នកនាំពាក្យស្ថានទូតមួយរូប បាននិយាយថា យើងប្រឆាំងយ៉ាងដាច់ខាត និងជំទាល់យ៉ាងដាច់អហង្ការចំពោះទង្វើដ៏គួរឱ្យរន្ធត់របស់អ្នកនយោបាយចក្រភពអង់គ្លេសចំពោះការគាំទ្រលើលោក Jimmy Lai។យោងតាមសេចក្តីប្រកាសព័ត៌មានដែលដកស្រង់សម្តីអ្នកនាំពាក្យ លោក ឡៃ គឺជាអ្នកប្រឆាំងចិនដ៏ល្បីល្បាញបំផុតមួយរូប ដែលចង់ធ្វើឱ្យហុងកុងជួបអស្ថិរភាព និងជ្រៀតជ្រែកដល់នីតិរដ្ឋនៅក្នុងទីក្រុងហុងកុង ។ ការចេញផ្សាយនៅលើគេហទំព័ររបស់ស្ថានទូតបាននិយាយថា មេគំនិត និងជាអ្នកញុះញង់ឱ្យមានកុបកម្មប្រឆាំងចិនដែលបានកើតឡើងនៅហុងកុង លោក ឡៃ បានឃុបឃិតគ្នាយ៉ាងម៉ឺងម៉ាត់ជាមួយកងកម្លាំងខាងក្រៅ ដើម្បីបង្កគ្រោះថ្នាក់ដល់សន្តិសុខជាតិ ទាមទារការគាំទ្រពីបរទេស និងទទួលខុសត្រូវចំពោះអំពើដ៏អាក្រក់ផ្សេងៗ៕

បារាំងនឹងចាត់វិធានការប្រឆាំងនឹងអ្នកតាំងទីលំនៅអ៊ីស្រាអែលជ្រុលនិយម និងជំរុញឲ្យបន្ថយភាពតានតឹងនៅប្រទេសលីបង់

2023/12/19 06:00:23 pm        459
Facebook Telegram Linkin
រដ្ឋមន្ត្រីការបរទេសរបស់ខ្លួន បាននិយាយកាលពីថ្ងៃចន្ទថា ប្រទេសបារាំង នឹងចាត់វិធានការទៅលើអ្នកតាំងទីលំនៅអ៊ីស្រាអែល ដែលបានវាយប្រហារជនជាតិប៉ាឡេស្ទីននៅតំបន់វេសបែង ដែលគ្រប់គ្រង ដោយអ៊ីស្រាអែល មួយថ្ងៃបន្ទាប់ពីបានជួបកសិករប៉ាឡេស្ទីន នៅទីក្រុងរ៉ាម៉ាឡា(Ramallah) ដែលត្រូវបានកំណត់គោលដៅ ក្នុងប៉ុន្មានសប្តាហ៍ថ្មីៗនេះ។តួលេខរបស់អង្គការសហប្រជាជាតិ បង្ហាញថា ការវាយប្រហាររបស់អ្នកតាំងទីលំនៅប្រចាំថ្ងៃ បានកើនឡើងទ្វេដង ចាប់តាំងពីការវាយប្រហារដ៏គួរឲ្យភ្ញាក់ផ្អើលរបស់ក្រុមហាម៉ាសលើអ៊ីស្រាអែល កាលពីថ្ងៃទី៧ ខែតុលា និងការវាយលុកជាបន្តបន្ទាប់ទៅលើតំបន់ហ្កាហ្សារបស់ប៉ាឡេស្ទីន។ ជនជាតិប៉ាឡេស្ទីនជាង ២០០ នាក់ត្រូវបានសម្លាប់ នៅក្នុងអំពើហិង្សាក្នុងឆ្នាំនេះ រួមទាំងការវាយប្រហារពីអ្នកតាំងទីលំនៅផងដែរ។លោកស្រី Catherine Colonna បានប្រាប់សន្និសីទសារព័ត៌មាន នៅទីក្រុងបេរូត ក្រោយពីដំណើរទស្សនកិច្ចរយៈពេលពីរថ្ងៃ នៅអ៊ីស្រាអែល ទីក្រុងរ៉ាម៉ាឡា និងប្រទេសលីបង់ថា៖«យើងនឹងមិនទទួលយកទង្វើទាំងនេះទេ។ ប្រទេសបារាំង នឹងមិនរង់ចាំទៀត។ យើងបានស្នើឲ្យអាជ្ញាធរអ៊ីស្រាអែល បញ្ចប់រឿងនេះ ហើយខ្លួននឹងចាត់វិធានការជាតិប្រឆាំងនឹងអ្នកតាំងទីលំនៅអ៊ីស្រាអែលជ្រុលនិយមមួយចំនួន។ សហភាពអឺរ៉ុប កំពុងសិក្សាពីលទ្ធភាពនៃការដាក់ទណ្ឌកម្មប្រឆាំងនឹងអ្នកតាំងទីលំនៅជ្វីហ្វ ដែលបង្កអំពើ ហិង្សា។លោកស្រី បាននិយាយថា៖ «ដីនេះ គឺដីរបស់ប្រជាជនជាតិប៉ាឡេស្ទីន ហើយនឹងក្លាយជាផ្នែកនៃរដ្ឋប៉ាឡេស្ទីន។

ចិននិងកូរ៉េខាងជើង បានបើកកិច្ចប្រជុំកម្រិតខ្ពស់ ស្របពេលមានការបាញ់មីស៊ីល

2023/12/19 05:48:58 pm        513
Facebook Telegram Linkin
រដ្ឋមន្ត្រីការបរទេសចិនលោក វ៉ាង យី (Wang Yi) បានជួបពិភាក្សាជាមួយមន្ត្រីជាន់ខ្ពស់កូរ៉េខាងជើងនៅទីក្រុងប៉េកាំង កាលពីថ្ងៃច័ន្ទ (១៨ ធ្នូ) ស្របពេលដែលទីក្រុងព្យុងយ៉ាង បានបាញ់មីស៊ីលដែលមានសមត្ថភាពទៅដល់គ្រប់ទីកន្លែងក្នុងសហរដ្ឋអាមេរិក។ប្រទេសចិនតែងតែចាត់ទុកទំនាក់ទំនងរបស់ខ្លួនជាមួយកូរ៉េខាងជើងតាមទស្សនៈយុទ្ធសាស្ត្រ និងរយៈពេលវែង នេះបើយោងតាមក្រសួងការបរទេសបាននិយាយនៅក្នុងសេចក្តីថ្លែងការណ៍មួយដោយដកស្រង់ប្រសាសន៍របស់លោក វ៉ាង ក្នុងជំនួបជាមួយអនុរដ្ឋមន្ត្រីក្រសួងការបរទេសកូរ៉េខាងជើង លោក ផាក យ៉ុងហូ (Pak Myong Ho)។លោក វ៉ាង បានបន្ថែមថា ទីក្រុងប៉េកាំងមានឆន្ទៈក្នុងការពង្រឹងទំនាក់ទំនងទ្វេភាគី និងការសម្របសម្រួល ខណៈពេលដែលធ្វើឱ្យការផ្លាស់ប្តូរ និងកិច្ចសហប្រតិបត្តិការកាន់តែស៊ីជម្រៅ។ លោក វ៉ាង និងលោក ផាក បានផ្លាស់ប្តូរទស្សនៈលើបញ្ហានៃ «ក្តីបារម្ភរួម» ដែលក្រសួងមិនបានបកស្រាយលម្អិត។កូរ៉េខាងជើងជាសម្ព័ន្ធមិត្តផ្លូវការតែមួយគត់របស់ចិន។ ប្រទេសទាំងពីរត្រូវបានចងភ្ជាប់ដោយសន្ធិសញ្ញាដែលបានចុះហត្ថលេខានៅឆ្នាំ១៩៦១ ដើម្បីចាត់វិធានការចាំបាច់ទាំងអស់ រួមទាំងជំនួយផ្នែកយោធា ដើម្បីជួយគ្នាទៅវិញទៅមកក្នុងករណីមានការវាយប្រហារឬការប៉ុនប៉ងវាយប្រហារដោយប្រទេសទីបី៕

បណ្ដាញសង្គម

ព័ត៌មានថ្មីៗ

ឯកឧត្តម ហ៊ុន ម៉ានី អញ្ជើញបិទវគ្គបណ្ដុះបណ្ដាល «ជនបង្គោលលើការងារមហាជនក្រុង-ស្រុក-ឃុំ-សង្កាត់» ខេត្តកំពង់ស្ពឺ
08/15/2026 08:08 PM
Facebook Telegram Linkin
តុលាការកំពូលកម្ពុជាបង្ហាញលទ្ធផលនៃសន្និសីទតុលាការនៃបណ្តាខេត្តជាប់ព្រំដែន
08/15/2026 07:08 PM
Facebook Telegram Linkin
លោកជំទាវបណ្ឌិត ពេជ ចន្ទមុន្នី អញ្ជើញប្រគល់ផ្ទះថ្មីចំនួន ៧ខ្នង ជា​អំណោយ​ដ៏​ថ្លៃ​ថ្លា​របស់​សម្តេចធិបតី និងលោកជំទាវផ្ទាល់ ជូន​ដល់​ក្រុម​គ្រួសារ​នៃ​វីរកងទ័ពពលី រស់នៅ​ខេត្តព្រៃវែង និង​ខេត្តស្វាយរៀង​
08/15/2026 07:08 PM
Facebook Telegram Linkin
អ្នកជំនាញ៖ ប្រសិនបើការដឹកជញ្ជូនតាមសមុទ្រខ្មៅ ត្រូវបានផ្អាកយូរ សេដ្ឋកិច្ចអ៊ុយក្រែននឹងរងផលប៉ះពាល់ធ្ងន់ធ្ងរ
08/15/2026 07:08 PM
Facebook Telegram Linkin
លោក TRUMP៖ ប្រសិនបើអ៊ីរ៉ង់វាយប្រហារ ការឆ្លើយតបរបស់សហរដ្ឋអាមេរិក នឹងខ្លាំងជាង១០០ដង
08/15/2026 07:08 PM
Facebook Telegram Linkin
ប្រភព៖ មនុស្សយ៉ាងតិច ១៤ នាក់ បានស្លាប់ នៅក្នុងការវាយប្រហារនៅជិតរដ្ឋធានី El Obeid នៅកណ្តាលប្រទេសស៊ូដង់
08/15/2026 07:08 PM
Facebook Telegram Linkin
នាយករដ្ឋមន្ត្រីលីបង់ជំរុញឲ្យមានពេលវេលាច្បាស់លាស់សម្រាប់អ៊ីស្រាអែលដកកងទ័ពចេញពីភាគខាងត្បូង
08/15/2026 07:08 PM
Facebook Telegram Linkin
គេចវេសពីបាតុភូតអែល នីញ៉ូ បក្សីសមុទ្រអាមេរិកខាងត្បូង ផ្លាស់ទីជម្រកទៅកាន់ប៉ាណាម៉ា
08/15/2026 07:08 PM
Facebook Telegram Linkin
អេស្ប៉ាញបង្កើនវិធានការសន្តិសុខនៅតំបន់ Ceuta ខណៈមានការអំពាវនាវឲ្យជនអន្តោប្រវេសន៍ឆ្លងកាត់ព្រំដែនទ្រង់ទ្រាយធំជាថ្មី
08/15/2026 07:08 PM
Facebook Telegram Linkin
រដ្ឋមន្ត្រីការបរទេសប៉ាគីស្ថាន ជំរុញឲ្យប្រើការសន្ទនា ដើម្បីសន្តិភាពក្នុងតំបន់ ខណៈការចរចារវាងអាមេរិក និងអ៊ីរ៉ង់ នៅបន្តជាប់គាំង
08/15/2026 07:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.