នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឯកឧត្តម សរ សុវណ្ណ៖ សម្ដេចធិបតីបង្កើតកម្មវិធីផ្ដល់ដីការពារព្រៃ ដើម្បីរួមគ្នាអភិវឌ្ឍ​ដោយចីរភាព និងផ្ដល់ដីដល់ពលរដ្ឋក្រីក្រពិតប្រាកដ
សង្គមស៊ីវិល សហជីព និងពលរដ្ឋចាត់ទុកកម្មវិធី«ផ្តល់ដី ការពារព្រៃ​ដើម្បីរួមគ្នាអភិវឌ្ឍ​ដោយ​ចីរភាព» ​គឺជាយន្តការដោះស្រាយបញ្ហាដីធ្លីជូនគ្រួសារក្រីក្រ​យ៉ាងពិតប្រាកដ
ឧប នេត សាវឿន អញ្ជើញប្រកាសដាក់ឲ្យអនុវត្តជាផ្លូវការនូវប្រព័ន្ធលក់សំបុត្រ និងការត្រួតពិនិត្យសំបុត្រ ចូលទស្សនារមណីដ្ឋានអង្គរ
សម្តេចធិបតី នាយករដ្ឋមន្ត្រី ឆ្មក់ចុះពិនិត្យកិច្ចអន្តរាគមន៍បូមទឹកដាក់ស្រែប្រជាពលរដ្ឋ នៅស្រុកបាទី ខេត្តតាកែវ

នយោបាយ​ និង ការអភិវឌ្ឍន៍

សមាជិកសមាជិក និងប្រជាពលរដ្ឋខ្មែររស់នៅ រដ្ឋផេនស៊ីលវេនញ៉ា និងរដ្ឋញ៉ូជឺស៊ី ប្រារព្ធទិវា ៧មករា

2025/01/13 11:37:54 am        69
Facebook Telegram Linkin
កាលពីថ្ងៃទី១១ ខែមករា ឆ្នាំ២០២៥ ប្រជាពលរដ្ឋខ្មែរសរុបចំនួន ៣២០នាក់ មកពី​រដ្ឋ​ផេន​ស៊ីលវេ​នញ៉ា និង រដ្ឋញ៉ូជឺស៊ី តំបន់ឆ្នេរខាងកើត នៃសហរដ្ឋអាមរិក បានជួបជុំគ្នា​អបអរ​សាទរ​ខួប​លើក​ទី៤៦ នៃទិវាជ័យជម្នះ៧មករា ក្រោមអធិបតីភាពឯកឧត្តម កែវ ឈា អគ្គរាជទូត និង​ជា​ប្រធាន​បក្សនៅសហរដ្ឋអាមេរិក លោក នង គន្ធាវី ប្រធានក្រុមការងារទទួលបន្ទុក ក្រុម​ការងារ​រៀបចំ​អង្គការចាត់តាំងយុវជន គណបក្សប្រជាជនកម្ពុជា នៅសហរដ្ឋអាមេរិក។ ពិធី​នេះ​រៀប​ចំ​ធ្វើ​ឡើង​នៅក្នុង ទីក្រុងហ្វីឡា រដ្ឋផេនស៊ីលវេនញ៉ា។ក្នុងឱកាសនេះលោក នង គន្ធាវី ប្រធានក្រុមការងាររៀបចំអង្គការចាត់តាំងយុវជន គណបក្ស​ប្រជាជន​កម្ពុជា នៅសហរដ្ឋអាមេរិក បានពាំនាំការផ្តាំផ្ញើសួរសុខទុក្ខពី សំណាក់​សម្តេច​អគ្គ​មហា​សេនា​បតី​តេជោ ហ៊ុន សែន ប្រធានគណបក្សប្រជា ជនកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ចំពោះសុខទុក្ខរបស់បងប្អូនប្រជាពលខ្មែរ និងសមាជិក សមាជិកា​បក្ស​ទាំង​អស់នៅ សហរដ្ឋអាមេរិក។ លោក គន្ធាវី ក៏សូមអរគុណថ្លែងអំណរគុណ ចំពោះ​ទឹក​ចិត្ត​របស់​បងប្អូន ប្រជាពលរដ្ឋខ្មែរទាំងពីររដ្ឋនេះ ដែលស្រឡាញ់គាំទ្រ និងចំណាយពេលវេលា អញ្ជើញ​ចូល​រួ​ម​ប្រារព្ធខួបលើកទី៤៦ នៃទិវាជ័យជំនះ៧មករា ដែលជាថ្ងៃកំណើតទី២របស់យើងទាំងអស់ ទោះ​បងប្អូនស្ថិតនៅទីណាក៏ដោយ។ឯកឧត្តម កែវ ឈា អគ្គរាជទូត និងជាប្រធានបក្សប្រជាជនកម្ពុជានៅសហរដ្ឋអាមេរិក បានគូស​បញ្ជាក់​ថា ការរៀបចំខួបអបអរសាទរខួបអនុស្សាវរីយ៍លើកទី៤៦ នៃទិវាបុណ្យ​ជាតិ​ជ័យ​ជម្នះ​៧​មករា ជាមួយបងប្អូនសហគមន៍ខ្មែរនៅ ទីក្រុងហ្វីឡា រដ្ឋផេនស៊ីលវេនញ៉ា នាពេលនេះ គឺជា​ការ​ដឹងគុណនឹករលឹកដល់គុណូបការៈដ៏ថ្លៃថ្លាបំផុតរបស់វីរយុទ្ធជន យុទ្ធនារី នៃរណសិរ្ស​សាមគ្គី​សង្គ្រោះ​ជាតិកម្ពុជា ដែលបានសង្គ្រោះជាតិខ្មែរ ឱ្យរស់រានមានជីវិតឡើងវិញទាន់ពេលវេលា ពី​របប​ប្រល័យពូជសាសន៍ ប៉ុល ពត ដោយទទួលបានជ័យជម្នះ នាថ្ងៃទី៧មករា ឆ្នាំ១៩៧៩។ ឯកឧត្តម បន្តថាបើគ្មានថ្ងៃរំដោះ៧មករា យើងទាំង អស់គ្នា ក៏គ្មានថ្ងៃនេះដែរ ដូច្នេះ​សូម​អរគុណ​ថ្ងៃ​៧មករា។ប្រជាពលរដ្ឋខ្មែរ និង សមាជិកសមាជិកា មកពី រដ្ឋផេនស៊ីលវេនញ៉ា និង រដ្ឋញ៉ូជឺស៊ី ក៏បាន​លើក​ឡើង​ថា ថ្ងៃទី៧មករា ឆ្នាំ១៩៧៩ ជាថ្ងៃកំណើតទី២ ប្រសិនបើគ្មានថ្ងៃទី៧មករា ក៏គ្មានអ្វី​ៗ​ដូច​សព្វ​ថ្ងៃ​នេះដែរ។ ផ្តើមចេញពីថ្ងៃជ័យជម្នះ៧មករា និងការដាក់ចេញនយោបាយ ឈ្នះឈ្នះ ដាក់​ចេញ​ដោយ​អគ្គមគ្គុទេសក៏ឯក សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា បាននាំមកនូវសុខសន្តិភាព និងការឯកភាពជាតិពេញលេញ ជូនជាតិមាតុភូមិកម្ពុជា រហូតបានធ្វើឱ្យកម្ពុជាមានការអភិវឌ្ឍ និងរីកចម្រើនលើគ្រប់វិស័យ ប្រជាជនរស់នៅក្នុងសុខសន្តិភាព យ៉ាងសុខដុមរមនាទាំងក្នុងគ្រួសារ សហគមន៍ និងសង្គមជាតិទាំងមូល។ លើសពីនេះទៀត ប្រជាពលរដ្ឋសម្តែងការអបអរសាទរ និងគាំទ្រពេញទំហឹង ចំពោះរាជរដ្ឋាភិបាលនីតិកាលទី៧ ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕ អត្ថបទៈ សំ ងីម 

ឯកឧត្តមកិត្តិសេដ្ឋាបណ្ឌិត ជាម យៀប អញ្ជើញជាអធិបតីក្នុងពិធីអបអរសាទរខួបលើកទី៤៦ នៃទិវាជ័យជម្នះ៧មករា(១៩៧៩-២០២៥) នៅស្រុកពាមរក៍ ខេត្តព្រៃវែង

2025/01/13 10:27:52 am        69
Facebook Telegram Linkin
ឯកឧត្តមកិត្តិសេដ្ឋាបណ្ឌិត ជាម យៀប អនុប្រធាន ទី១រដ្ឋសភា នៅព្រឹកថ្ងៃទី១១ ខែមករា ឆ្នាំ២០២៥ បានអញ្ជើញជាអធិបតីក្នុងពិធីអបអរសាទរខួបលើកទី៤៦ នៃទិវាជ័យជម្នះ ៧ មករា (១៩៧៩-២០២៥) នៅស្រុកពាមរក៍ ខេត្តព្រៃវែងដែលមានប្រជាពលរដ្ឋចូលរួមជាង៦០០នាក់មកពីស្រុកចំនួនបីគឺស្រុកពាមរក៍ សុកពាមជរ និងស្រុកបាភ្នំ។ឯកឧត្តម ពេជ្រ ជីវ័ន តំណាងរាស្រ្តមណ្ឌលខេត្តព្រៃវែង បានឡើងអានសុន្ទរកថាសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ ដែលបានថ្លែងនៅក្នុងពីធីអបអរសាទរខួបអនុស្សាវរីយ៍លើកទី៤៦នៃទិវាជ័យជម្នះ៧មករា(១៩៧៩-២០២៥) នៅកោះពេជ្រ រាជធានីភ្នំពេញ កាលពីថ្ងៃទី៧ ខែមករា ឆ្នាំ២០២៥ កន្លងមក។ឯកឧត្តមកិត្តិសេដ្ឋាបណ្ឌិត ជាម យៀប បានមានប្រសាសន៍ថា តាមរយៈរូបឯកឧត្តមផ្ទាល់នាថ្ងៃនេះ ថ្នាក់ដឹកនាំកំពូលៗ នៃស្ថាប័នជាតិ មានសម្តេចអគ្គមហាសេនាបតីតេជោ ហ៊ុន សែន សម្តេចអគ្គមហាពញាចក្រី ហេង សំរិន សម្តេចក្រឡាហោម ស ខេង សម្តេចវិបុលសេនាភក្តី សាយ ឈុំ សម្តេចពិជ័យសេនា ទៀ បាញ់ សម្តេចកិត្តិសង្គហបណ្ឌិត ម៉ែន សំអន និងសម្តេចមហាបវរធិបតី ហ៊ុន ម៉ាណែត បានផ្តាំផ្ញើការសួរសុខទុក្ខ និងក្ដីនឹករលឹកប្រកបដោយភាពកក់ក្តៅបំផុត ជូន ឯកឧត្តម លោកជំទាវ លោក លោកស្រី ព្រមទាំងបងប្អូនជនរួមជាតិទាំងអស់ និងសូមគោរពជូនពរដល់ជនរួមជាតិទាំងអស់ ទទួលបានសុខភាពល្អ និងជោគជ័យគ្រប់ភារកិច្ច។ឯកឧត្តម បានបន្តថា យើងជួបជុំគ្នានាពេលនេះ ជាការជួបជុំជាប្រពៃណីដែលយើងធ្លាប់បានរៀបចំឡើងជារៀងរាល់ឆ្នាំ ក្នុងគោលបំណងអបអរសាទរទិវាជ័យជម្នះ៧មករា ឆ្នាំ១៩៧៩។ ថ្ងៃទី៧ មករា ឆ្នាំ២០២៥ នេះ ជាថ្ងៃគម្រប់ខួបទី ៤៦ឆ្នាំ នៃទិវាជ័យជម្នៈជាប្រវត្តិសាស្ត្រ ដែលបានផ្តួលរំលំរបបប្រល័យពូជសាសន៍ ប៉ុល ពត ដ៏សាហាវយង់ឃ្នងបំផុត។  ជ័យជម្នះ ៧មករា បានបិទទំព័រសករាជដ៏ខ្មៅងងឹតបំផុតរបស់កម្ពុជា ហើយបានបើកឡើងនូវសករាជថ្មី គឺឯករាជ្យ សេរីភាព ប្រជាធិបតេយ្យ និងវឌ្ឍនភាពសង្គម។ ប្រជាជនកម្ពុជាចងចាំជានិច្ចថា “ថ្ងៃជ័យជម្នះ ៧មករា ឆ្នាំ១៩៧៩ ជាថ្ងៃកំណើតទី២ របស់ខ្លួន។ បើគ្មានជ័យជម្នះ ៧មករា យើងក៏គ្មានអ្វីៗដូចថ្ងៃនេះដែរ”។ លើសពីនេះទៀតការជួបជុំគ្នានេះ ក្រៅពីការសំណេះសំណាលសួរសុខទុក្ខដល់បងប្អូនជនរួមជាតិទាំងអស់ ឯកឧត្តមកិត្តិសេដ្ឋាបណ្ឌិត ក៏បានធ្វើការផ្សព្វផ្សាយនូវសមិទ្ធផលរបស់រដ្ឋសភា ដែលដឹកនាំដោយ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងសមិទ្ធផលរបស់រាជរដ្ឋភិបាលកម្ពុជា ដែលដឹកនាំដោយសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី សម្រេចបានក្នុងរយៈពេលៈជាង១៧ខែកន្លងមកនេះផងដែរ។ឯកឧត្តម បានមានប្រសាសន៍លើកឡើងពីការខិតខំរបស់សម្តេចតេជោ ហ៊ុន សែន និងថ្នាក់ដឹកនាំ ដទៃទៀត ដែលបានដឹកនាំកសាងប្រទេសកម្ពុជា ឱ្យចេញពីស្ថានភាពក្រីក្រលំបាក ខ្វះខាត ដែលមជ្ឍដ្ឋានអន្តរជាតិធ្លាប់ល្បីថា កម្ពុជា ជាតំបន់អសន្តិសុខ មានសង្គ្រាមផ្ទៃក្នុង តែឥឡូវត្រូវបានប្រែក្លាយទៅជាសម្បូរសប្បាយ ជាកោះសន្តិភាព និងជាប្រទេសដែលទទួលបានប្រជាប្រិយភាពការទូត ទាំងក្នុងតំបន់ និងសកលលោក៕

បើគ្មានការប្រែប្រួលទេ ស្ពានឆ្លងកាត់ទន្លេមេគង្គខេត្តក្រចេះ អាចនឹងបើកឲ្យ​ពលរដ្ឋ​ធ្វើ​ដំណើរ​បណ្តោះ​អាសន្នបាននៅកំឡុងខែកញ្ញាខាងមុខ ខណៈសម្រេចបានជិត ៨០%ហើយ

2025/01/10 04:14:21 pm        152
Facebook Telegram Linkin
បើគ្មានការប្រែប្រួលទេ ស្ពានឆ្លងកាត់ទន្លេមេគង្គខេត្តក្រចេះ អាច​នឹង​បើក​ឱ្យ​ប្រជាពលរដ្ឋ​ធ្វើ​ដំណើរ​ឆ្លង​កាត់​បណ្តោះ​អាសន្ន នៅកំឡុងខែកញ្ញា ឆ្នាំ២០២៥ខាងមុខនេះ។ នេះបើតាមការ​បញ្ជាក់​របស់ឯកឧត្ដម ផន រឹម អ្នកនាំពាក្យក្រសួងសាធារណការ និងដឹកជញ្ជូន​ នារសៀលថ្ងៃទី​១០ ខែមករា ឆ្នាំ២០២៥។តាមរយៈបណ្ដាញសង្គមហ្វេសប៊ុកឯកឧត្ដមអ្នកនាំពាក្យបានឲ្យដឹងថា​ គិតត្រឹមដើមខែមករា ឆ្នាំ២០២៥នេះ គម្រោង​សាង​សង់​ស្ពាន​ឆ្លង​កាត់​ទន្លេមេគង្គខេត្តក្រចេះសម្រេចលទ្ធផល ៧៩,២២% ខណៈ​ដែល​គម្រោង​ទាំង​មូល​រួម​មាន៖ គម្រោងសាងសង់ស្ពានឆ្លងកាត់ទន្លេមេគង្គខេត្តក្រចេះប្រវែង ១.៧៦១ម៉ែត្រ, ផ្លូវ​មេ​តភ្ជាប់​មាន​ប្រវែងសរុប ១៥,៤៩០ គ.ម (ផ្លូវមេតភ្ជាប់ត្រើយខាងកើតប្រវែង ៧,៦៨៤គ.ម និង​ត្រើយ​ខាង​លិចប្រវែង ៧,៨០៦គ.ម) និងផ្លូវខ្នែងមានចំនួន៤ខ្សែ ប្រវែងសរុប ១៦,២០៨ គ.ម សម្រេ​ច​លទ្ធផល ៥៥,២៧%។ឯកឧត្ដម ផន រឹម បានញ្ជាក់ថា បើគ្មានការប្រែប្រួលទេ ស្ពានឆ្លងកាត់ទន្លេមេគង្គខេត្តក្រចេះ អាច​នឹង​បើក​ឱ្យ​ប្រជាពលរដ្ឋធ្វើដំណើរឆ្លងកាត់បណ្តោះអាសន្ន នៅកំឡុងខែកញ្ញា ឆ្នាំ​២០២៥​ខាង​មុខ​នេះ។​គម្រោងស្ពាន និងផ្លូវតភ្ជាប់នេះ គឺជាគម្រោង​យុទ្ធសាស្រ្តមួយ​ដ៏សំខាន់​សម្រាប់​ការ​តភ្ជាប់​ទំនាក់​ទំនង​ និងជាក្តីសង្ឃឹមរវាងប្រជាពលរដ្ឋដែលរស់នៅត្រើយខាងកើត និង​ប្រជាពលរដ្ឋ​ដែល​រស់​នៅ​ត្រើយ​ខាង​លិច ទាំងការតភ្ជាប់តំបន់ដាច់ស្រយាលនៅភូមិភាគឦសាន មកកាន់ទីប្រជំជន។គម្រោង​នេះ​គឺជាផ្នែកមួយនៃផ្លូវជាតិលេខ ៦០B តភ្ជាប់ពីខេត្តក្រចេះ ទៅខេត្តកំពង់ធំ​ដែល​មាន​ភាព​​ប្រទាក់​ក្រឡាគ្នាជាមួយផ្លូវជាតិសំខាន់ៗ ដូចជាត្រើយខាងលិចតភ្ជាប់ផ្លូវជាតិលេខ៦ ត្រង់​ផ្លូវ​បំបែក​កំពង់​ថ្ម កំពង់ធំ ឆ្ពោះទៅកាន់ខេត្តសៀមរាប និងតភ្ជាប់តាមរយៈផ្លូវខេត្តលេខ២៧៩ ឆ្ពោះ​ទៅ​កាន់​ខេត្ត​កំពង់ចាម ចំណែកឯត្រើយខាងកើតវិញនោះ គឺតភ្ជាប់ផ្លូវជាតិលេខ៧ ឆ្ពោះ​ទៅ​កាន់​ខេត្ត​ស្ទឹងត្រែង ខេត្តរតនគិរី ខេត្តមណ្ឌលគិរី និងតភ្ជាប់ជាមួយផ្លូវជាតិលេខ៧៣ ដោយឆ្លង​កាត់​ស្រុក​ឆ្លូង ស្រុកតំបែ ឆ្ពោះទៅកាន់ខេត្តត្បូងឃ្មុំ រួចតភ្ជាប់ទៅកាន់​ផ្លូវជាតិ​លេខ​៧​ឆ្ពោះ​ទៅ​កាន់​ខេត្ត​កំពង់ចាម ឬខេត្តព្រៃវែង រួចបន្តឆ្ពោះទៅរាជធានីភ្នំពេញ៕

អ្នកវិភាគ និងអ្នកឃ្លាំមើល៖ ក្រុមប្រឆាំងនៅកម្ពុជាកំពុងធ្វើអាជីវកម្មលើការស្លាប់របស់លោក លិម គិមយ៉ា ដើម្បីទម្លាក់កំហុសមករដ្ឋាភិបាល

2025/01/10 12:32:46 pm        114
Facebook Telegram Linkin
អ្នកវិភាគបញ្ហានយោបាយ និងអ្នកតាមដានស្ថានការណ៍សង្គម បានលើកឡើងថា ក្រុម​ប្រឆាំង​នៅ​កម្ពុជា​កំពុងធ្វើអាជីវកម្មលើការស្លាប់របស់លោក លិម គិមយ៉ា អតីតតំណាងរាស្ត្រ នៃ​អតីត​គណបក្ស​សង្គ្រោះជាតិ ដើម្បីទម្លាក់កំហុសមកលើរាជរដ្ឋាភិបាលកម្ពុជា។លោក ថុង ម៉េងដាវិត អ្នកវិភាគភូមិសាស្រ្តនយោបាយ និងសន្ដិសុខបានថ្លែង​ថា៖ «បើយើង​សង្កេត​មើល​ឱ្យជាក់លាក់ទៅ គឺឃាតកម្មលើលោក លិម គិមយ៉ានេះ គឺអតីតគណបក្ស​ប្រឆាំង​ជា​អ្នក​ទទួល​បានផលចំនេញច្រើនជាងគេ ដើម្បីទាញទម្លាក់ ឬក៏រុញទោសកំហុសទាំង​អស់​មក​លើ​រាជ​រដ្ឋាភិបាលកម្ពុជា និងធ្វើឱ្យបក្សកាន់អំណាចកម្ពុជាធ្លាក់ប្រជាប្រិយភាព»។លោកបញ្ជាក់ថា៖«បើចឹងយើងឃើញថា ការធ្វើឃាតទៅលើនរណាម្នាក់ សួរថាតើ​នរណា​ជា​អ្នក​ទទួល​បាន​ផលចំនេញច្រើនជាងគេ? អ៊ីចឹងយើងអាចយល់បានថា នេះជាយុទ្ធសាស្រ្ត​មួយ​ដែល​យើង​និយម​ហៅថា ស្វាស៊ីបាយ យកមកលាបមាត់ពពែ ឬក៏យុទ្ធសាស្ត្រស្បែកម្មរបស់ក្រុមលោក សម រង្ស៊ី»។អ្នកវិភាគរូបនេះបានបន្ថែមថា លោក លិម គិមយ៉ា មិនមែនបុគ្គល​ដែល​មានឥទ្ធិពល​អ្វី​នៅ​ក្នុង​វិស័យ​នយោបាយនៅក្នុងប្រទេសកម្ពុជានោះទេ ហើយក៏មិនមែន​ជា​បុគ្គល​ដែល​មាន​ប្រជា​ប្រិយ​ភាព និងមានប្រជាពលរដ្ឋខ្មែរស្គាល់គ្រប់គ្នានោះដែរ។ ដូច្នេះបក្សកាន់អំណាចនៅកម្ពុជា គ្មាន​ហេតុ​ផល​អ្វី ឬក៏ទទួលបានផលចំនេញអ្វីពីការធ្វើឃាតលោក លិម គិមយ៉ាដែរ។លោក អ៊ុន ដារ៉ា អ្នកឃ្លាំមើលការអភិវឌ្ឍន៍សង្គម និងនយោបាយ បានលើកឡើងថា ករណី​ឃាតកម្ម​លើ​លោក លិម គិមយ៉ា គឺជាការប្រឌិតឡើងដោយក្រុមអតីតបក្សប្រឆាំង ហើយមាន​ចេតនា​ទម្លាក់ភាពស្មុគស្មាញដល់រដ្ឋាភិបាលថៃ ហើយបង្កអរិភាពជុំវិញទំនាក់ទំនងកម្ពុជា និង​ថៃ​ឱ្យ​មាន​ភាពល្អក់កកនឹងគ្នា។លោក អ៊ុន ដារ៉ា បានទាញការសន្និដ្ឋានថា សម រង្ស៊ី និង កឹម សុខា ទំនងជាកំពុង​ចិញ្ចឹម​កម្លាំង​សម្ងាត់​ផ្សេង​ៗទៀតនៅក្រៅប្រទេស ដើម្បីធ្វើឃាតបុគ្គលណាមួយ​ក្នុង​ការ​រក​លេសទម្លាក់​កំហុស​មក​លើ​រាជរដ្ឋាភិបាលកម្ពុជាក្នុងរឿងនយោបាយ«ស្វាស៊ីបាយ លាបមាត់ពពែ»។ក្នុងន័យនេះ​លោកបញ្ជាក់ថា៖«ខ្ញុំគិតថា វាមិនមានអ្វីគួរឱ្យសង្ស័យទេ ព្រោះអាជ្ញាធរកម្ពុជា​ក៏​បាន​សហការ​ជាមួយអាជ្ញាធរថៃ ដើម្បីធ្វើកិច្ចការនេះដែរ។ អ៊ីចឹង ការទម្លាក់កំហុសទាំង​ឡាយ​មក​លើ​រាជ​រដ្ឋាភិបាលកម្ពុជា គឺជារឿងដែលមិនត្រឹមត្រូវ ហើយគ្មានមូលដ្ឋានច្បាស់លាស់នោះទេ។ ចំពោះ​ការស៊ើបអង្កេតផ្សេងៗ យើងទុកលទ្ធភាពនេះឱ្យទៅខាងភាគីអាជ្ញាធរថៃគេធ្វើការងារទៅ ព្រោះ​ករណីនេះកើតឡើងនៅទីនោះ»។អ្នកឃ្លាំមើល​រូប​នេះបន្ថែមថា ចំណែកឯការផ្សាយរបស់វិទ្យុអាស៊ីសេរី និងសារព័ត៌មានខេមរភាសា​ផ្សេង​ទៀត​នៅក្រៅស្រុកជុំវិញរឿងចោទប្រកាន់អំពើឃាតកម្មលើលោក លិម គិមយ៉ា នៅទឹក​ដី​ថៃ​នោះ គឺជារឿងនយោបាយ ដើម្បីលាបពណ៌អាក្រក់ ដាក់បន្ទុកមកលើរាជរដ្ឋាភិបាលកម្ពុជា ព្រោះ​តែ​គំនុំបុគ្គលរបស់ក្រុម សម រង្ស៊ី ប៉ុណ្ណោះ។គួររំឭកថា លោក លិម គិមយ៉ា អតីតតំណាងរាស្ត្រនៃអតីតគណបក្សសង្គ្រោះជាតិ ត្រូវបាន​ខ្មាន់​កាំ​ភ្លើង​បាញ់សម្លាប់កាលពីថ្ងៃទី០៧ ខែមករា ឆ្នាំ២០២៥ នៅទីក្រុងបាងកកប្រទេសថៃ។ មួយ​ថ្ងៃ​ក្រោយ​មក ខ្មាន់កាំភ្លើងជាជនជាតិថៃដែលជាអតីតទាហានជើងទឹកថៃ ត្រូវបានអាជ្ញាធរ​ខ្មែរ​ចាប់​ខ្លួន បន្ទាប់ពីបានរត់គេចចូលខេត្តបាត់ដំបង ប្រទេសកម្ពុជា។ ចំណែកជន​សង្ស័យទី២ ត្រូវបានសមត្ថកិច្ចថៃកំណត់អត្តសញ្ញាណថា ជាជនជាតិខ្មែរ ដែលពាក់​ព័ន្ធ​​នឹងឃាតកម្មលោក លិម គិមយ៉ា។ ហេតុការណ៍​បាញ់​ប្រហារ​នេះ​បាន​ក្លាយ​ជា​ប្រធាន​បទ​ដ៏​ក្តៅ​គគុក​សម្រាប់​បក្សប្រឆាំងនៅក្នុងប្រទេសថៃ ក្នុងការដាក់សម្ពាធ​ទៅ​លើ​កាន់​អំណាច​ដឹក​នាំ​រដ្ឋាភិបាល​ថៃ​៕ 

សម្ដេចធិបតី នាយករដ្ឋមន្រ្ដី អញ្ជើញជួបពិភាក្សាការងារជាមួយ ឯកឧត្តមរដ្ឋមន្ត្រីក្រសួងហិរញ្ញវត្ថុជប៉ុន

2025/01/10 11:18:20 am        87
Facebook Telegram Linkin
នៅព្រឹកថ្ងៃទី១០ ខែមករា ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បានអញ្ជើញជួបជាមួយ ឯកឧត្តម KATO Katsunobu រដ្ឋមន្ត្រីក្រសួងហិរញ្ញវត្ថុ និងជារដ្ឋមន្ត្រីទទួលបន្ទុកសេវាកម្មហិរញ្ញវត្ថុជប៉ុន ក្នុងជំនួបសម្តែងការគួរសម និងពិភាក្សាការងារនៅវិមានសន្តិភាព។សូមជម្រាបថាកម្ពុជា-ជប៉ុន មានកិច្ចសហប្រតិបត្តិការតាំងពីរទសវត្សទី១៧មកម្ល៉េះ។ សម្រាប់ទំនាក់ទំនងផ្លូវការរបស់ប្រទេសទាំងពីរត្រូវបានបង្កើតជាផ្លូវការ កាលពីថ្ងៃទី៩ ខែមករា ឆ្នាំ១៩៥៣ មុនពេលកម្ពុជា ប្រកាសឯករាជ្យរបស់ខ្លួនរយៈពេល១០ខែ។ ប្រទេសជប៉ុនបានជួយគាំទ្រកម្ពុជាក្នុងការថែរក្សាសន្តិភាពគាំទ្រលើការស្តារឡើងវិញ ក្រោយពីបិទបញ្ចប់នូវសង្គ្រាមស៊ីវិល ដែលជំនួយទាំងនោះមានកម្មវិធីគាំទ្រលើការអភិវឌ្ឍលទ្ធិប្រជាធិតេយ្យ, ការអភិវឌ្ឍសេដ្ឋកិច្ច-សង្គម ព្រមទាំងការសាសង់ស្ពានសំខាន់ ផ្លូវថ្នល់ ហេដ្ឋារចនាសម្ព័ន្ធ មូលដ្ឋានសុខាភិបាល សាលារៀន និងប្រព័ន្ធធារាសាស្ត្រ ជាច្រើនទៀត ដើម្បីលើកម្ពស់ជីវភាពប្រជាពលរដ្ឋកម្ពុជា។ពាក់ព័ន្ធនឹងផ្នែកសេដ្ឋកិច្ចរវាងកម្ពុជា-ជប៉ុន មានចំនួន ១.៦ ពាន់លានយ៉េន កាលពីឆ្នាំ១៩៨១ បច្ចុប្បន្ននេះបានកើនឡើងរហូតដល់ ជាង២០០ដង នៅឆ្នាំ២០២២។ សម្រាប់ក្រុមជប៉ុននៅកម្ពុជាក៏មានការកើនឡើងខ្ពស់ផងដែរហើយក្រុមហ៊ុនជប៉ុន បានចូលរួមយ៉ាងសំខាន់ក្នុងការវិនិយោគនៅកម្ពុជា។ ខណៈមានក្រុមជប៉ុនធំៗមួយចំនួនបានបើកដំណើរនៅកម្ពុជា ហើយនៅឆ្នាំ២០២៣ មានគម្រោងវិនិយោគខ្នាតធំជាច្រើនត្រូវបានដាក់ចេញ រួមទាំងការដាក់ឱ្យដំណើរការផ្សារទំនើបអ៊ីអន៣ ការផ្លាស់ប្តូរទេសចរណ៍រវាងគ្នាទៅវិញទៅមក ការបញ្ជូននិស្សិតឱ្យចេញទៅសិក្សានៅប្រទេសជប៉ុន។ភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា-ជប៉ុន មិនមែនត្រឹមតែជាទំនាក់ទំនងរវាងកម្ពុជា-ជប៉ុន តែប៉ុណ្ណឹងទេ គឺប្រទេសទាំងពីរធ្វើការរួមគ្នាក្នុងនាមជាសមភាគី ក្នុងការឆ្លើយតបទៅនឹងបញ្ហាប្រឈម ទាំងកម្រិតតំបន់ និងសកលលោករួមគ្នាផងដែរ។ តាមរយៈភាពជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ជប៉ុន បានបង្កើនកិច្ចសហប្រតិបត្តិការបន្ថែមទៀតសម្រាប់វិបុលភាពក្នុងតំបន់ និងសហគមន៍អន្តរជាតិ៕

សម្ដេចតេជោ ហ៊ុន សែន អញ្ជើញដឹកនាំកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា នីតិកាលទី៥

2025/01/10 09:10:32 am        100
Facebook Telegram Linkin
នៅព្រឹកថ្ងៃសុក្រ ១២កើត ខែបុស្ស ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១០ ខែមករា ឆ្នាំ២០២៥ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអញ្ជើញដឹកនាំកិច្ចប្រជុំ គណៈកម្មាធិការអចិន្ត្រៃយ៍ព្រឹទ្ធសភា នីតិកាលទី៥ លើរបៀបវារៈដូចខាងក្រោម៖១- ពិនិត្យ និងសម្រេចលើសំណើរបស់គណៈកម្មការទី៦ ព្រឹទ្ធសភា សុំដាក់សេចក្ដីស្នើ វិសោធនកម្មបទបញ្ជាផ្ទៃក្នុងព្រឹទ្ធសភានៃព្រះរាជាណាចក្រកម្ពុជា ទៅក្នុងរបៀបវារៈ សម័យប្រជុំព្រឹទ្ធសភាជាវិសាមញ្ញ នីតិកាលទី៥។២-ពិនិត្យសំណើរបស់សមាជិកព្រឹទ្ធសភា ស្នើសុំកោះប្រជុំព្រឹទ្ធសភាជាវិសាមញ្ញ។ ៣- កំណត់កាលបរិច្ឆេទ របៀបវារៈ និងសមាសភាពលេខាធិការសម័យប្រជុំព្រឹទ្ធសភាជា វិសាមញ្ញ នីតិកាលទី៥។៤- ផ្សេងៗ៕

ឯកឧត្តម កែប ជុតិមា៖ សម្តេចធិបតី ហ៊ុន ម៉ាណែត ប្តេជ្ញាដោយឆន្ទៈមោះមុត កសាងផ្លូវក្រវាត់ព្រំដែនឱ្យបានរួចរាល់ចប់សព្វគ្រប់

2025/01/09 12:41:52 pm        88
Facebook Telegram Linkin
គណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃរដ្ឋសភា ដឹកនាំដោយឯកឧត្តម កែប ជុតិមា ប្រធានគណៈកម្មការ កាលពីថ្ងៃទី៥ ខែមករា ឆ្នាំ២០២៥ បានដឹកនាំប្រតិភូអញ្ជើញចុះជួបសំណេះសំណាល សួរសុខទុក្ខ និងបាននាំយកអំណោយរបស់សម្តេចមហារដ្ឋសភាធិការបតី ឃួន សុដារី ប្រធានរដ្ឋសភា ជូនកងកម្លាំងវិស្វកម្មនៃកងយោធពលខេមរភូមិន្ទ ដែលកំពុងឈរជើងកសាងស្ថាបនាផ្លូវតាមក្រវាត់ព្រំដែនកម្ពុជា-វៀតណាមក្នុងភូមិសាស្រ្តស្រុក ពេជ្រាដា ច្រកព្រំដែនទ្វេភាគីណាមលៀខេត្តមណ្ឌលគិរី ។ក្រៅពីការសួរសុខទុក្ខកងកម្លាំងវិស្វកម្មដែលកំពុងស្ថាបនាផ្លូវតាមក្រវាត់ព្រំដែនកម្ពុជា-វៀតណាម ក្នុងភូមិសាស្រ្ត ខេត្តមណ្ឌលគិរី គណៈប្រតិភូគណៈកម្មការទី៤នៃរដ្ឋសភាក៏នឹងពិនិត្យមើលពីស្ថានភាពបង្គោលព្រំដែន វឌ្ឍនភាពនៅព្រំដែន និងស្ថានភាពរស់នៅរបស់ប្រជាពលរដ្ឋផងដែរ។ថ្លែងក្នុងពិធីសំណេះសំណាលជាមួយអាជ្ញាធរមូលដ្ឋាន កងកម្លាំងវិស្វកម្ម និងប្រជាពលរដ្ឋ នៅទីនោះ ឯកឧត្តម កែប ជុតិមា មានប្រសាសន៍ថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានប្តេជ្ញាដោយឆន្ទៈមោះមុតនិងផែនការច្បាស់លាស់ដើម្បីកសាងផ្លូវក្រវាត់ព្រំដែនឱ្យបានរួចរាល់ចប់សព្វគ្រប់។ ការកសាងផ្លូវក្រវាត់ព្រំដែនគឺជាគម្រោងហេដ្ឋារចនាសម្ព័ន្ធយុទ្ធសាស្ត្រដ៏មានសារៈសំខាន់ក្នុងគោលបំណងពង្រឹងបូរណភាពទឹកដី និងជំរុញការអភិវឌ្ឍន៍ក្នុងតំបន់។ ឯកឧត្តមគូសបញ្ជាក់ថា គំនិតផ្តួចផ្តើមមូលនិធិកសាងហេដ្ឋារចនាសម្ព័ន្ធតាមព្រំដែននេះបានឆ្លុះបញ្ចាំងពីការយកចិត្តទុកដាក់របស់រាជរដ្ឋាភិបាលក្នុងការការពារ អធិបតេយ្យភាពជាតិនិងបង្កើតឱកាសសម្រាប់ធ្វើឱ្យមានកំណើនសេដ្ឋកិច្ចនៅតាមតំបន់ព្រំដែនដាច់ស្រយាល។ ផ្លូវក្រវាត់ព្រំដែន គឺជារបងការពារដ៏សំខាន់មួយទៀតសម្រាប់ បូរណភាពទឹកដី អធិបតេយ្យជាតិកម្ពុជា។ គោលដៅរបស់រាជរដ្ឋាភិបាល គឺកសាងខ្សែបន្ទាត់ព្រំដែនឲ្យទៅជាព្រំដែន សន្ដិភាព មិត្ដភាព សហប្រតិបត្ដិការ និងការអភិវឌ្ឍ។ក្នុងឱកាសនោះ ឯកឧត្តមបានលើកទឹកចិត្តដល់ប្រជាពលរដ្ឋ សូមមកមើលតំបន់ព្រំដែនដើម្បីលើកទឹកចិត្តកងកម្លាំងវិស្វកម្ម និងមកស្វែងយល់ជាក់ស្តែងពីស្ថានភាពព្រំដែន និងការស្ថាបនាផ្លូវក្រវាត់ព្រំដែន ជាពិសេសលើកទឹកចិត្តឱ្យប្រជាពលរដ្ឋមករស់នៅតំបន់ព្រំដែននេះ ព្រោះប្រជាពលរដ្ឋជាជញ្ជាំងការពារព្រំដែនដ៏រឹងមាំ។លោក វណ្ណា ម៉ាប់ អភិបាលស្រុកពេជ្រាដា មានប្រសាសន៍ថា ស្រុកពេជ្រាដា មានព្រំប្រទល់ជាប់ជាមួយប្រទេសវៀតណាម ប្រវែង១១០គីឡូម៉ែត្រ និងមានបង្គោល ព្រំដែនសរុបទាំងអស់ ចំនួន ៥០បង្គោល។ច្រកទ្វារព្រំដែនទ្វេរភាគីណាមលៀរ មានប្រវែង ២៧ គីឡូម៉ែត្រ ពីទីរួមស្រុកពេជ្រាដា និងមានប្រវែង ៦៧ គីឡូម៉ែត្រ ពីទីរួមខេត្តមណ្ឌលគិរី។លោកឧត្តមសេនីយ៍ទោ ជុំ ហុន តំណាងកងវិស្វកម្ម បានឱ្យដឹងថា កងឯកភាពចំនួន៦នៅក្នុងខេត្តមណ្ឌលគិរី បាននិងកំពុងស្ថាបនាផ្លូវព្រំដែននេះ ដោយប្រើប្រាស់មធ្យោបាយគ្រឿងចក្រគ្រប់ប្រភេទចំនួន១៤៨គ្រឿងសម្រាប់ធ្វើផ្លូវ១៣៣គីឡូម៉ែត្រ ក្នុងនេះផ្លូវខ្សែក្រវាត់ព្រំដែនមានប្រវែង៨៤គីឡូម៉ែត្រ និងផ្លូវតភ្ជាប់ប្រវែង៤៩គ.ម។ច្រកទ្វាព្រំដែនទ្វេភាគីណាមលៀរ មានចម្ងាយផ្លូវប្រវែង៦០គីឡូម៉ែត្រពីក្រុងសែនមនោរម្យ និងមានចម្ងាយផ្លូវប្រវែង ២៦គីឡូម៉ែត្រ ពីទីរួមស្រុកពេជ្រាដា មានទីតាំងស្ថិតនៅក្នុងភូមិពូលុ ឃុំប៊ូស្រា ស្រុកពេជ្រាដា ខេត្តមណ្ឌលគិរី ជាប់ជាមួយនឹង ច្រកទ្វារព្រំដែនទ្វេភាគីដាក់ប័រ ស្ថិតនៅក្នុងភូមិធន់ហាញ់ ឃុំធុនអាន ស្រុកដាក់មីល ខេត្តដាក់ណុង ប្រទេសវៀតណាម។ប្រតិភូគណៈកម្មការទី៤នៃរដ្ឋសភាក៏បាននាំយកនូវអំណោយរបស់សម្តេចមហារដ្ឋសភាធិការបតី ឃួន សុដារី ប្រធានរដ្ឋសភា មានគ្រឿងឧបភោគ បរិភោគជូនកងកម្លាំងវិស្វកម្មរួមមាន ទឹកសុទ្ធ៣០កេស ត្រីខ១៥កេស ថ្នាំពេទ្យ២៥ ប្រអប់ គុយទាវ និងមីសួ៣០កេស ត្រីងៀត១៥គីឡូក្រាម និងថវិកា៣លានរៀល។ ដោយឡែករដ្ឋបាលខេត្តមណ្ឌលគិរី បានឧបត្ថម្ភអង្ករ២តោន ថវិកា៥០០ដុល្លារ និងថ្នាំប៉ារ៉ា២កេស៕

សកម្មជនបក្សប្រឆាំងភូមិគ្រាំងគរ និងជ្រៃត្នោត គោរពស្នើសម្តេចតេជោសុំចូលរួមរស់ជាមួយ​គណបក្សប្រជាជនកម្ពុជា

2025/01/09 12:16:24 pm        94
Facebook Telegram Linkin
ដោយមើលឃើញកាន់តែច្បាស់អំពីទង្វើដែលតែងតែញុះញង់ ចិញ្ចឹមចិត្តបង្កអស្ថិរភាព អសន្តិសុខ ចង់បំផ្លាញនូវសន្តិភាពដ៏សុខសាន្តដែលបាននិងកំពុងកើតមាននៅសព្វថ្ងៃពីក្រុមជ្រុលនិយមមួយក្តាប់តូចនៅក្រៅប្រទេស សកម្មជនគណបក្សភ្លើងទៀនភូមិគ្រាំងគរនិងភូមិជ្រៃត្នោត ស្រុកត្រាំកក់ នៃខេត្តតាកែវបានប្រកាសផ្តាច់ខ្លួនពីគណបក្សរបស់ខ្លួន ដោយគោរពស្នើសម្តេចតេជោប្រធានគណបក្សប្រជាជនកម្ពុជាសុំចូលមករួមរស់ក្នុងជីវភាពនយោបាយជាមួយគណបក្សប្រជាជនកម្ពុជាវិញ។នេះជាសកម្មភាពដែលគេតែងតែមើលឃើញស្ទើរជារៀងរាល់ថ្ងៃដែលមានបងប្អូនមកពីគណបក្សប្រឆាំង ជាពិសេសបេក្ខជនមកពីគណបក្សភ្លើងទៀន អស់ជំនឿលើការដឹកនាំរបស់គណបក្សខ្លួនហើយក៏បានប្រកាសផ្តាច់ខ្លួនចេញមករួមក្នុងជីវភាពនយោបាយជាមួយគណបក្សប្រជាជនកម្ពុជាជាហូរហែ ព្រោះពួកគាត់កាន់តែមើលឃើញច្បាស់អំពីសារធាតុពិត សារធាតុពិសពុលរបស់គណបក្សខ្លួនដែលមានមេក្លោងក្រុមជ្រុលនិយម ក្បត់ជាតិ៣ជំនាន់នៅក្រៅស្រុកតែងតែបំផុសញុះញង់ចង់ផ្តួលរំលំរាជរដ្ឋាភិបាលស្របច្បាប់ ខណៈដែលប្រទេសនិងប្រជាជនកម្ពុជាបាននិងកំពុងទទួលនូវនូវមនុញ្ញផល ពីសុខសន្តិភាព។ដោយខួបលើកទី៤៦នៃទិវាជ័យជម្នះ៧មករា(៧មករា១៩៧៩-៧មករា២០២៥)ទើបកន្លងផុតទៅរយៈពេល២ថ្ងៃនោះ សកម្មជនមកពីគណបក្សភ្លើងទៀនភូមិគ្រាំងគរនិងជ្រៃត្នោត ស្រុកត្រាំកក់ ដែលគោរពស្នើសម្តេចអគ្គមហាសេនាតីតេជោ ប្រធានគណបក្ស ប្រជាជនកម្ពុជាសុំចូលមករួមរស់ក្នុងជីវភាពនយោបាយជាមួយគណបក្សប្រជាជនកម្ពុជាវិញទាំងចំនួន១៧រូបសុទ្ធតែយល់ឃើញដូចគ្នាថា ថ្ងៃ៧មករា បានធ្វើឱ្យយើងរស់រានមានជីវិតឡើងវិញ ជាថ្ងៃកំណើតទី២របស់យើងទាំងអស់គ្នា ពោល បើគ្មានថ្ងៃ៧មករា គឺយើងមិនមានអ្វីៗទាំងអស់ដូចសព្វថ្ងៃនេះឡើយ។គួរបញ្ជាក់ថា សកម្មភាពនៃការចុះចូលបែបនេះបាននិងកំពុងកើត មានអស់រយៈពេលជាច្រើនខែមកហើយៗសកម្មជន បេក្ខជនក្រុមប្រឹក្សាគណបក្សភ្លើងទៀនដែល ប្រកាសផ្តាច់ខ្លួនចេញពីបក្សប្រឆាំងនិងគោរពស្នើសម្តេចតេជោ សុំចូលរួមជីវភាពនយោបាយ ជាមួយគណបក្សប្រជាជនកម្ពុជានេះ មិនមែនជាការបង្ខិតបង្ខំឡើយហើយពួកគាត់ក៏បានប្រកាសគាំទ្រ រាជរដ្ឋាភិបាលកម្ពុជា ដែលបាននិងកំពុងបង្កើតច្បាប់ដាក់ក្រុមជ្រុលនិយម ជាក្រុមភេរវកម្ម៕ អត្ថបទ៖ មុត សុទ្ធ

សម្តេចមហាបវរធិបតី ហ៊ុន ម៉ាណែត៖ ដំណាំស្រូវនៅតែជាដំណាំយុទ្ធសាស្ត្រ យូរអង្វែងរបស់កម្ពុជា

2025/01/08 04:19:45 pm        165
Facebook Telegram Linkin
នាព្រឹកថ្ងៃទី០៨ ខែមករា ឆ្នាំ២០២៥, សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជណាចក្រកម្ពុជា បានអនុញ្ញាតឱ្យប្រតិភូសហព័ន្ធស្រូវអង្ករកម្ពុជា ចូលជួបសម្ដែងការគួរសម និងពិភាក្សាការងារ នៅវិមានសន្ដិភាព។ ក្នុងឱកាសនៃជំនួប, អ្នកឧកញ៉ា ហ៊ុន ឡាក់ ប្រធានក្រុមប្រឹក្សាភិបាលគោលនយោបាយស្រូវអង្ករ នៃសហព័ន្ធស្រូវអង្ករកម្ពុជា បានគោរពជម្រាបជូនសម្តេចបវរធិបតី អំពីវឌ្ឍនភាព និងសកម្មភាពការងាររបស់សហព័ន្ធស្រូវអង្ករកម្ពុជា ក្នុងការចូលរួមចំណែកជំរុញការនាំចេញស្រូវអង្ករកម្ពុជា ទៅកាន់ទីផ្សារអន្តរជាតិ។ អ្នកឧកញ៉ាក៏បានលើកឡើងអំពីកិច្ចខិតខំប្រឹងប្រែង និងការយកចិត្តទុកដាក់លើគុណភាពស្រូវអង្ករកម្ពុជា, ការប្រមូលទិញស្រូវពីប្រជាកសិករ, ការរៀបចំសម្ងួត, ការស្ដុកទុក និងការនាំចេញស្រូវអង្ករទៅកាន់ទីផ្សារអន្តរជាតិ។ សម្ដេចបវរធិបតីបានវាយតម្លៃខ្ពស់ចំពោះសហព័ន្ធស្រូវអង្ករកម្ពុជា ដែលបានចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍវិស័យស្រូវ អង្ករ និងបានគូសបញ្ជាក់ថា វិស័យកសិកម្មបានដើរតួនាទីយ៉ាងសំខាន់ក្នុងការលើកកម្ពស់ជីវភាពរបស់ប្រជាពលរដ្ឋ និងការអភិវឌ្ឍសង្គម-សេដ្ឋកិច្ចកម្ពុជា។ សម្ដេចបវរធិបតីបានសង្កត់ធ្ងន់ថា រាជរដ្ឋាភិបាលនៅតែផ្ដល់អាទិភាពលើដំណាំស្រូវ ដែលជាដំណាំយុទ្ធសាស្ត្រ យូរអង្វែងរបស់កម្ពុជា និងបានគូសបញ្ជាក់អំពីការដាក់ចេញគោលនយោបាយចាំបាច់ ដើម្បីគាំទ្រដំណាំស្រូវ និងធានាបាននូវភាពប្រកួតប្រជែងរបស់វិស័យស្រូវអង្ករកម្ពុជា តាមរយ:ការកសាងហេដ្ឋារចនាសម្ព័ន្ធតភ្ជាប់, ការសម្រួលការដឹកជញ្ជូន និងការកាត់បន្ថយថ្លៃដើមផលិតកម្ម ក៏ដូចជាជំរុញភាពម្ចាស់ការលើខ្សែច្រវាក់ផ្គត់ផ្គង់ក្នុងស្រុក និងការនាំចេញទៅកាន់ទីផ្សារអន្តរជាតិ។ ក្នុងឱកាសនោះដែរ, សម្ដេចបវរធិបតី បានលើកទឹកចិត្តឱ្យសហព័ន្ធស្រូវអង្ករកម្ពុជា បន្តសហការឱ្យកាន់តែជិតស្និទ្ធិថែមទៀតជាមួយក្រសួង-ស្ថាប័នពាក់ព័ន្ធនៃរាជរដ្ឋាភិបាល ដើម្បីជំរុញការនាំចេញផ្ទាល់ឱ្យកាន់តែទូលំទូលាយទៅកាន់ទីផ្សារអន្តរជាតិ ជាមួយតម្លៃបន្ថែមខ្ពស់, ក៏ដូចជាការចូលរួមផ្តល់ការបណ្ដុះបណ្ដាលជំនាញបច្ចេកទេសដល់ប្រជាកសិករ សំដៅលើកកម្ពស់គុណភាពផលិតផល និងបង្កើនផលិតភាព ព្រមទាំងជំរុញការផ្សព្វផ្សាយអំពីការវិវឌ្ឍរីកចម្រើននៃផលិតកម្មស្រូវអង្ករកម្ពុជា ឱ្យបានទូលំទូលាយ៕

អ្នកនយោបាយ និងអ្នកវិភាគ៖ ច្បាប់ដាក់ក្រុមជ្រុលនិយមជាភេរវករ ដើម្បីការពារសន្ដិភាព ដែលរកយ៉ាងលំបាកនៅកម្ពុជា

2025/01/08 03:32:03 pm        99
Facebook Telegram Linkin
អ្នកនយោបាយនៃគណបក្សក្រៅរដ្ឋាភិបាល និងអ្នកវិភាគភូមិសាស្រ្តនយោបាយ និងសន្ដិសុខ បានអះអាងថា ច្បាប់ដាក់ក្រុមជ្រុលនិយមជាភេរវករ ដើម្បីការពារសន្ដិភាពដែលរកបានយ៉ាងលំបាកនៅកម្ពុជា ខណៈដែលក្រុមឧទ្ទាមជ្រុលនិយមក្រៅច្បាប់តែងតែកៀរគរបង្កើតចលនាខុសច្បាប់នានាធ្វើឱ្យប៉ះពាល់ដល់សន្តិសុខជាតិ និងសណ្តាប់ធ្នាប់សាធារណៈ។លោក គុជ លី ប្រធានគណបក្សខ្មែរតែមួយបានស្នើទៅសម្តេចមហាបវរធិបតី ហ៊ុន ម៉ាណែត ពិនិត្យពីលទ្ធភាពក្នុងការពន្លឿនរៀបចំតាក់តែងច្បាប់ភេរវកម្ម សម្រាប់ការពារសន្ដិភាពដែលរកបានយ៉ាងលំបាកនៅកម្ពុជា ដើម្បីដាក់ក្រុមឧទ្ទាមជ្រុលនិយមក្រៅច្បាប់ទៅជាក្រុមភេរវករឱ្យបានឆាប់បំផុត។លោកបានថ្លែងថា ការចូលរួមថែរក្សាសន្ដិភាព និងការអភិវឌ្ឍន៍ប្រទេស គឺជាការចាំបាច់ តែមានក្រុមជ្រុលនិយមនៅក្រៅប្រទេសមួយក្ដាប់តូចកំពុងធ្វើសកម្មភាពទុច្ចរិតគ្រប់រូបភាព។ ដូច្នេះក្នុងនាមលោកជាអ្នកនយោបាយ និងជាពលរដ្ឋផង សូមប្រកាសគាំទ្រឱ្យមានច្បាប់ភេរវកម្មនៅកម្ពុជា ហើយសូមសម្ដេចបវរធិបតី ហ៊ុន ម៉ាណែត ពិចារណាពីលទ្ធភាពក្នុងការបង្កើតច្បាប់នេះ»។លោកបន្តថា «ក្រុមជ្រុលនិយមបានបង្កើតអង្គការចាត់តាំងប្រកាសកៀរគរបង្កើតនូវចលនាខុសច្បាប់នានា ព្រមទាំងព្យាយាមបង្កើតព័ត៌មានញុះញង់បំភ្លៃការពិត បង្កជាព្យសនកម្មធ្ងន់ធ្ងរ ប៉ះពាល់ដល់សន្តិសុខជាតិ និងសណ្តាប់ធ្នាប់សាធារណៈ»។លោក គុជ លី បានចាប់ទុកក្រុមជ្រុលនិយមទាំងអស់នោះជាមេរោគចង្រៃ ចង់ឱ្យមានភាពវឹកវរ ចលាចលដល់ប្រជាពលរដ្ឋដែលជាអំពើខុសច្បាប់ទាំងស្រុង និងព្យាយាមបំផ្លាញប្រទេសជាតិខ្លួនឯង។ ក្រុមនេះបានដុតរោលប្រជាជាតិ ហើយព្យាយាមរុញច្រានកម្ពុជាឱ្យធ្លាក់ចូលទៅក្នុងភ្លើងសង្គ្រាម និងអស្ថេរភាពនយោបាយជាដើម។ចំណែកលោក ថុង ម៉េងដាវីត អ្នកវិភាគភូមិសាស្រ្តនយោបាយ និងសន្ដិសុខបានថ្លែងថា៖«ខ្ញុំគាំទ្រឱ្យមានច្បាប់ភេរវកម្មនេះ ដើម្បីដាក់ក្រុមជ្រុលនិយម ឬហៅថា ក្រុមឧទ្ទាមក្រៅច្បាប់ ទៅជាក្រុមភេរវករ។ គោលបំណង គឺយើងចង់ធានាដល់ការទប់ស្កាត់សកម្មភាពទាំងឡាយណាដែលប៉ុនប៉ងធ្វើរដ្ឋប្រហារផ្តួលរំលំរាជរដ្ឋាភិបាលកម្ពុជាស្របច្បាប់»។អ្នកវិភាគរូបនេះបន្ថែមថា វាជាផ្នែកមួយក្នុងការលើកកម្ពស់លទ្ធិប្រជាធិបតេយ្យសេរី ពហុបក្ស ធានាសិទ្ធិមនុស្ស ការគោរពច្បាប់ យុត្តិធម៌សង្គម និងពង្រឹងសាមគ្គីជាតិ ដើម្បីមានឱកាសកសាងកម្ពុជាទាំងសេដ្ឋកិច្ច និងនយោបាយដែលជាប្រទេសមួយមានឯករាជ្យ សន្តិភាព សេរីភាព អព្យាក្រឹត និងវឌ្ឍនភាពសង្គម។ក្នុងន័យនេះ អ្នកនយោបាយក្រៅរដ្ឋាភិបាល និងអ្នកវិភាគ បានប្តេជ្ញាចូលរួមជាមួយរាជរដ្ឋាភិបាល ដើម្បីការពារឯករាជ្យ អធិបតេយ្យ និងបូរណភាពទឹកដីឱ្យបានគង់វង្ស ការពារសន្តិភាព ស្ថិរភាពនយោបាយ និងសន្តិសុខសណ្តាប់ធ្នាប់សង្គម ដើម្បីធានាដំណើរការអភិវឌ្ឍសង្គម សេដ្ឋកិច្ច ដោយចីរភាព និងលើកកម្ពស់ជីវភាពរស់នៅរបស់ប្រជាជនគ្រប់រូបប្រកបដោយភាពសុខដុមរមនាក្នុងសង្គម។ពួកគាត់បានប្រកាសប្រឆាំងដាច់ខាតចំពោះឧបាយកល និងសកម្មភាពរបស់មជ្ឈដ្ឋានណាក៏ដោយ ដែលព្យាយាមបំផ្លាញឯកភាពជាតិ បង្កអស្ថិរភាពក្នុងសង្គម បំផ្លាញលទ្ធិប្រជាធិបតេយ្យ ប៉ុនប៉ងធ្វើឱ្យមានការផ្លាស់ប្តូរណាមួយ ដែលផ្ទុយពីរដ្ឋធម្មនុញ្ញ និងច្បាប់ជាធរមាន។សម្តេចតេជោ ហ៊ុន សែន ប្រធានគណបក្សប្រជាជនកម្ពុជាបានថ្លែងក្នុងឱកាសប្រារព្ធពិធីអបអរសាទរខួប៤៦ឆ្នាំ ថ្ងៃជ័យជម្នះ៧មករា នៅថ្ងៃទី៧ ខែមករា ឆ្នាំ២០២៥ថា វាដល់ពេលហើយដែលត្រូវកសាងច្បាប់ដែលនឹងកំណត់ចំពោះជនណា ឬក្រុមណាដែលមានគម្រោងការ ឬអំពើឃុបឃិតបង្កើតចលនាប្រឆាំងជ្រុលនិយម បង្កភាពវឹកវរ អសន្តិសុខក្នុងសង្គម បង្កឱ្យមានជម្លោះជាមួយរដ្ឋដទៃ និងប៉ុនប៉ងផ្ដួលរំលំរាជរដ្ឋាភិបាលស្របច្បាប់ គឺជាភេរវករ ដែលត្រូវតែនាំខ្លួនយកមកវិនិច្ឆ័យទោស ដើម្បីការពារសន្តិភាព។សម្តេចបានថ្លែងថា កម្ពុជាបច្ចុប្បន្នកំពុងពុះពារឈានទៅមុខទៀតលើមាគ៌ាសន្តិភាព ប្រជាធិបតេយ្យ នីតិរដ្ឋ និងអភិវឌ្ឍន៍ ដើម្បីកសាងអនាគតរបស់ខ្លួនឱ្យក្លាយជាអរិយប្រទេសមួយ ដូចបណ្តាប្រទេសលើពិភពលោក ដោយគ្មានការកើតមានជាថ្មីទៀតនូវសង្គ្រាម និងគ្មានអំពើប្រល័យពូជសាសន៍ទៀតនោះទេ៕

បណ្ដាញសង្គម

ព័ត៌មានថ្មីៗ

រដ្ឋមន្រី្តក្រសួងសុខាភិបាល « ណែនាំដល់ថ្នាក់ដឹកនាំគ្រប់កម្រិត ត្រូវបន្តយកចិត្តទុកដាក់ដល់ការអនុវត្តផែនការយុទ្ធសាស្រ្តអាទិភាពរបស់ក្រសួង »
01/30/2025 09:01 PM
Facebook Telegram Linkin
ក្រុមហាម៉ាសផ្ដល់សេរីភាពដល់ជនជាតិអ៊ីស្រាអែលម្នាក់ទៀត ដោយនាំឲ្យការដោះលែងចំណាប់ថ្នូរសរុបឡើងដល់ ៨នាក់
01/30/2025 08:01 PM
Facebook Telegram Linkin
ប្រព័ន្ធផ្សព្វផ្សាយក្នុងស្រុក៖ គណបក្សរិះគន់អឺរ៉ុប នឹងចាកចេញពីរដ្ឋាភិបាលចម្រុះ
01/30/2025 08:01 PM
Facebook Telegram Linkin
លោកជំទាវ ពុំ ចន្ទីនី អញ្ជើញសួរសុខទុក្ខអតីតមន្រ្តីសាខាខេត្តកំពង់ធំកំពុងមានជំងឺប្រចាំកាយ
01/30/2025 08:01 PM
Facebook Telegram Linkin
បុរសម្នាក់ត្រូវបានបាញ់សម្លាប់ នៅស៊ុយអែត មុនសាលក្រម ជុំវិញការដុតគម្ពីរគូរ៉ាន ខណៈមនុស្ស ៥នាក់ ត្រូវបានចាប់ខ្លួន
01/30/2025 07:01 PM
Facebook Telegram Linkin
កុងហ្គោ៖ រដ្ឋមន្ត្រីការបរទេសបារាំង ទៅដល់ទីក្រុង Kinshasa ប៉ុន្មានថ្ងៃក្រោយក្រុមឧទ្ទាមគ្រប់គ្រងក្រុងធំភាគខាងកើត
01/30/2025 07:01 PM
Facebook Telegram Linkin
មនុស្សរាប់ពាន់នាក់ ត្រូវជម្លៀសចេញ ខណៈមានភ្លៀងធ្លាក់ខ្លាំង នៅរដ្ឋរបស់ម៉ាឡេស៊ី
01/30/2025 06:01 PM
Facebook Telegram Linkin
ប្រធានាធិបតីហ្វីលីពីន មានគម្រោងជួបលោក Trump ដើម្បីពិភាក្សាគោលនយោបាយអន្តោប្រវេសន៍
01/30/2025 06:01 PM
Facebook Telegram Linkin
អ៊ីស្រាអែលផ្តាច់ទំនាក់ទំនងជាមួយទីភ្នាក់ងារជំនួយរបស់ UN ដែលគាំទ្រប៉ាឡេស្ទីន
01/30/2025 06:01 PM
Facebook Telegram Linkin
អ្នកម៉ៅការរាប់រយរបស់ USAID ត្រូវបានឲ្យសម្រាក និងបញ្ឈប់ ចំពេលអាមេរិកផ្អាកជំនួយជាសកល
01/30/2025 06:01 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.