នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
TOP STORY | សម្ដេចធិបតី បានចាត់វិធានការចាំបាច់​ជាបន្ត​បន្ទា​ប់ចំ​ពោះកា​រ​វិល​ត្រឡប់​ទ្រង់ទ្រាយ​ធំរ​បស់​ពលករ​ខ្មែរ និងជនភៀសសឹក
TOP STORY | សម្ដេចតេជោ៖ ពេលនេះ ខ្ញុំកំពុងតែរួមចំណែកបញ្ជាទ័ព តាមប្រព័ន្ធវីដេអូ និងប្រព័ន្ធផ្សេងទៀតជាមួយនាយករដ្ឋមន្ត្រី, រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់
TOP STORY |សម្ដេចធិបតី ហ៊ុន ម៉ាណែត ដាក់លិខិតស្នើសុំ​​កោះប្រជុំក្រុមប្រឹក្សាសន្តិសុខជាបន្ទាន់ ដើម្បី​សុំ​ការ​អន្ត​រាគមន៍​បញ្ចប់​ការ​ឈ្លាន​ពាន​របស់​កង​ទ័ព​ថៃមក​លើដែនអធិបតេយ្យភាពរបស់កម្ពុជា
TOP STORY | សម្ដេចធិបតី៖ កងទ័ពថៃបានបើកការ​វាយប្រហារ​មក​លើ​ទីតាំង​ឈរ​ជើង​របស់​កង​ទ័ព​កម្ពុជា​ នៅប្រាសាទតាមាន់ធំ តាក្របី និងបានពង្រីកភូមិសាស្ត្រវាយប្រហារទៅដល់តំបន់មុំបី

នយោបាយ​ និង ការអភិវឌ្ឍន៍

ទ័ពមួកខៀវកម្ពុជាចំនួន៥២នាក់ នៅប្រទេសម៉ាលី នឹងមកដល់កម្ពុជាវិញនៅល្ងាចនេះ

2023/10/27 02:57:12 pm        157
Facebook Telegram Linkin
ភ្នំពេញ៖ នៅល្ងាចថ្ងៃទី២៧ ខែតុលានេះ កម្លាំងទ័ពមួកខៀវកម្ពុជានាំមុខចំនួន៥២រូប ដែលបានបំពេញបេសកកម្មថែរក្សាសន្តិភាពអង្គការសហប្រជាជាតិ UN នៅប្រទេសម៉ាលី នឹងអញ្ជើញមកដល់មាតុប្រទេសវិញ ក្រោយពីUN ប្រកាសដកទ័ពមួកខៀវចេញពីម៉ាលី ដោយសារបញ្ហាអសន្តិសុខ សង្គ្រាមនៅទីនោះ។ បើតាមតំណាងក្រុមគ្រួសារដែលរង់ចាំសាច់ញ្ញាតិ មួយរូប បានថ្លែងប្រាប់BTV ព្រឹកថ្ងៃទី២៧ ខែតុលានេះថា ពួកគាត់មានការសប្បាយចិត្តជាខ្លាំង អង្គការសហប្រជាជាតិ UN បានប្រកាស​ជម្លៀស​កងទ័ពមួកខៀវចេញពីប្រទេសម៉ាលី ខណៈស្ថានភាពនៅក្នុងតំបន់បេសកកម្មរក្សា​សន្តិភាព​របស់អង្គការសហប្រជាជាតិ UN នៅក្នុងប្រទេសម៉ាលី​ បាននឹងកំពុងជួបបញ្ហាអសន្តិសុខធ្ងន់ធ្ងរ ប្រឈ​ម​ហានិភ័យ​ខ្ពស់ ដោយការរងបាញ់ប្រហារ​ញឹកញាប់​ពីក្រុមឧទ្ទាម ដែលនេះជា​បង្ការគ្រោះថ្នាក់​ និងការពារសុវត្ថិភាពដ៏សំខាន់។សូមបញ្ជាក់ថា នៅក្នុងឆ្នាំ២០២៣ ​ចុងក្រោយនេះ កម្ពុជា ​មានកម្លាំងទ័ពមួកខៀវប្រមាណ២៦៩នាក់ បំពេញបេសកកម្ម ​ការងារវិស្វកម្មថែទាំព្រលានយន្តហោះ និង ​ការងារកំទេចគ្រឿងផ្ទុះ ហើយ​នៅថ្ងៃទី២៧ ខែតុលានេះ គឺមានទ័ពមួកខៀវកម្ពុជានាំមុខ ចំនួន៥២រូបបានត្រឡប់មក​ដល់​មាតុប្រទេសមុន ​ហើយកងកម្លាំងមួកខៀវកម្ពុជា​ នៅតំបន់ផ្សេងៗទៀត ​នឹងត្រូវបានUN រៀបចំបញ្ជូនត្រឡប់មកកម្ពុជា វិញជាបន្តបន្ទាប់។នៅក្នុងពិធីជួបសំណេះសំណាលជាមួយកម្មករនិយោជិត នៅខេត្តកំពង់ចាម​ កាលពីពេលថ្មីៗនេះ សម្តេចធិបតី ហ៊ុន ម៉ាណែត ​បានថ្លែងពីការឯកភាពឲ្យដកកងទ័ព UN មួកខៀវរបស់ខ្លួន ដែលកំពុង​បំពេញបេសកកម្មនៅម៉ាលី ​ដោយសារអង្គការសហប្រជាជាតិ ​បាន​ជម្លៀសកងទ័ព (UN) ដែលក្នុងនោះ​ក៏មានមួកខៀវកម្ពុជាផងដែរ ចេញពីតំបន់បំពេញបេសកកម្មថែរក្សាសន្តិសុខ​នៅ​ប្រទេសម៉ាលីនោះ ដោយសាររងការវាយប្រហារពីក្រុមឧទ្ទាមនៅទីនោះ។សូមជម្រាបថា ដល់ឆ្នាំ២០២៣នេះ កម្ពុជាបានបញ្ជូលកងកម្លាំងជិត​ ៩ពាន់នាក់ ចេញបំពេញ​បេសកកម្មចំនួន១១ ក្នុងប្រទេសចំនួន៩ មានជាអាទិ៍៖ សាធារណ រដ្ឋស៊ូដង់ ស៊ូដង់ ខាងត្បូង ឆាដ អាហ្វ្រិក កណ្តាល លីបង់ ម៉ាលី ស៊ីរី ​សាយប្រឺស ​និងយេមែន ​លើជំនាញបោសសំអាតមីន វិស្វកម្ម សំណង់ផ្តេក-បញ្ឈរ អាវុធហត្ថ មន្ទីរពេទ្យកម្រិត២ វិស្វកម្ម ​ព្រលានយន្តហោះ ​កំទេចគ្រាប់ មិនទាន់ផ្ទុះ នាយទាហាន សេនាធិការ និងសង្កេតការណ៍យោធា។ ​បច្ចុប្បន្នកម្លាំងកម្ពុជាចំនួន ៨៧៤នាក់​ ក្នុងនោះនារី ចំនួន១៤១នាក់ កំពុងបំពេញបេសកកម្ម ​នៅប្រទេសចំនួន៤ រួមមាន៖ សាធារណរដ្ឋស៊ូដង់ខាងត្បូង លីបង់ អាហ្វ្រិកកណ្តាល និងម៉ាលី៕អត្ថបទ ស៊ុម សុខជា

រដ្ឋបាលខណ្ឌ៧មករា ទទួលទេយ្យទាន និងថវិកាឧបត្ថម្ភ​ពីចៅអធិការវត្តចំនួន៣ ដើម្បីយកទៅប្រើប្រាស់បន្តក្នុងការមនុស្សធម៌

2023/10/27 02:44:41 pm        92
Facebook Telegram Linkin
ភ្នំពេញ៖ ព្រះគ្រូចៅអធិការចំនួន៣វត្ត នៅក្នុងមូលដ្ឋានខណ្ឌ៧មករា បានឧបត្ថម្ភទេយ្យទាន និង ថវិកាមួយចំនួន ដល់អនុសាខាការកាកបាទក្រហមខណ្ឌ៧មករា សម្រាប់ការបន្តយកទៅទ្រទ្រង់​លើការ​ងារមនុស្សធម៌ ជួយដល់ប្រជាពលរដ្ឋមានជីវភាពខ្វះខាត ពលរដ្ឋរងគ្រោះដោយ​អគ្គិភ័យឆេះផ្ទះ ចាស់ជរាគ្មានទីពឹង ឬពលរដ្ឋរងគ្រោះដោយគ្រោះធម្មជាតិជាដើម ។ពិធីប្រគល់-ទទួល ទេយ្យទាន និង ថវិកាខាងលើ ធ្វើឡើងនៅវេលាម៉ោង០៨និង៣០នាទីព្រឹក ថ្ងៃទី២៧ ខែតុលា ឆ្នាំ២០២៣នេះ នៅក្នុងវត្តសំពៅមាស ខណ្ឌ៧មករា ក្រោមវត្តមានទទួល​ពី​សំណាក់លោក ថេង សុថុល អភិបាលខណ្ឌ៧មករា រួមទាំងក្រុមមន្ត្រី និងព្រះអធិបតីភាព ព្រះនាម ព្រះបិដកធម្ម ម៉ៅ នីម ព្រះរាជគណៈថ្នាក់ចត្វា ​ព្រះអនុគណខណ្ឌ៧មករា ព្រះគ្រូចៅអធិការវត្ត​ព្រះពុទ្ធមានបុណ្យ រួមទាំងចៅអធិការ នៃបណ្តាវត្តដទៃផ្សេងទៀត ដែលបានចូលរួមឧបត្ថម្ភផងដែរ ។លោក ថេង សុថុល អភិបាលខណ្ឌ៧មករា បានថ្លែងអំណរ​គុណ​ដល់ទឹកព្រះទ័យរបស់​ព្រះគ្រូចៅ​អធិការវត្តទាំង៣ ដែលជានិច្ចកាល​តែងតែចូលរួមចំណែកកិច្ចការងារ​មនុស្សធម៌ជួយ​ឧបត្ថម្ភ​ទេយ្យទាន និងថវិកា​ដល់រដ្ឋបាលខណ្ឌ សម្រាប់យកទៅប្រើប្រាស់បន្តលើការងារមនុស្សធម៌​ជួយដល់​ពលរដ្ឋក្នុងមូលដ្ឋាន​ ដែលជួបប្រទះការលំបាក ។លោកអភិបាលខណ្ឌ បញ្ជាក់ថា ជំនួយរបស់ព្រះគ្រូចៅអធិការវត្តទាំង៣នៅពេលនេះ គឺ​នឹង​ត្រូវយកទៅ​ប្រើប្រាស់​ឱ្យចំទិសដៅ​ ដោយនាំយកទៅបែងចែកជូនប្រជាពលរដ្ឋ​ដែលមាន​ជីវភាពខ្វះខាតពិតប្រាកដ ​ដោយមិនប្រកាន់និន្នាការ​នយោបាយ ​ជាតិ​សាសន៍ ​ឬ​ពណ៌សម្បុរ​ឡើយ ពោលគឺអនុវត្តតាមគោលការណែនាំរបស់ ​កាកបាទប្រហមកម្ពុជា ដែលមាន​សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែនជាប្រធាន។ទេយ្យទានឧបត្ថម្ភកាកបាទក្រហមកម្ពុជា ​តាមរយៈអនុគណខណ្ឌ៧មករា ​រួមមាន​ បច័្ចយចំនួន ៦លានរៀល, អង្ករ២៤បាវ, មី ៨១កេស,ទឹកសុទ្ធ២៧កេស ,ទឹកក្រូច២៧កេស ,ទឹកត្រី-ទឹកស៊ីអីវ ៩៥យួរ រួមទាំង ស្ករ-ស, តែ, ទឹកដោះគោ, ត្រីខ កំប៉ុង សរុបជិត ២០០០កំប៉ុង៕ អត្ថបទ៖ កុម្ភៈ

បក្សីត្រយងចំពុះស្លាបព្រា បង្ហាញខ្លួនជាថ្មីនៅកម្ពុជាចាប់តាំងពីការកត់ត្រា ចុងក្រោយក្នុងឆ្នាំ២០១៥

2023/10/27 02:19:44 pm        578
Facebook Telegram Linkin
ភ្នំពេញ៖ បក្សីត្រយងចំពុះស្លាបព្រា (Platalea Leucorodia) កាលពីថ្ងៃទី ២៣ខែតុលាកន្លងមកនេះ ត្រូវបានប្រទះឃើញនៅតំបន់អភិរក្សសត្វខ្សឹបជីក្រែង ដែលជាផ្នែកមួយនៃតំបន់ការពារទេសភាពទំនាប ទន្លេសាបខាង ជើង ដោយក្រុមអង្កេតតាមដានជីវចម្រុះប្រចាំតំបន់ទន្លេសាប នៃអង្គការ WCS។ នេះជាលើកទី៦ហើយ ដែលក្រុមអ្នកអភិរក្សបានប្រទះឃើញនិងកត់ត្រា។ កំណត់ត្រាទី១ ត្រូវបានប្រទះឃើញនៅតំបន់ការពារទេសភាពអាងត្រពាំងថ្ម ក្នុងឆ្នាំ២០០៣ កំណត់ត្រា ទី២ នៅតំបន់រ៉ាមសារព្រែកទ័ល ក្នុងឆ្នាំ២០០៤ របាយការណ៍មួយទៀត ត្រូវបានកត់ត្រានៅឆ្នាំ២០០៥ ហើយកំណត់ត្រាទី៤ គឺនៅក្បែតំបន់ភ្នំក្រោម ក្រុងសៀមរាប ក្នុងឆ្នាំ២០១២ និងលើកទី៥ នៅតំបន់ការពារ ទេសភាពអាងត្រពាំងថ្ម នៅឆ្នាំ២០១៥ ។ទាក់ទិននឹងគម្លាតឆ្នាំ នៃការប្រទះឃើញប្រភេទសត្វនេះ លោក ស៊ុម ភារុណ ប្រធានកម្មវិធី អង្គការ WCS ប្រចាំតំបន់ទេសភាពទំនាបទន្លេសាប បានឱ្យដឹងថា «តាមរយៈគម្រោងទន្លេសាបយើង ដែលគាំទ្រដោយ សហភាពអ៊ឺរ៉ុប និងមូលនិធិ Margaret A. Cargill Philanthropies ក្រុមការងារតាមដានជីវៈចម្រុះមូល ដ្ឋាន បានបញ្ជាក់អំពីវត្តមាន នៃសត្វត្រយងចំពុះស្លាបព្រានេះ អាចជាការវិលត្រឡប់មកកាន់ទីជម្រករកចំ ណីនៅតំបន់ដីសើមជុំវិញបឹងទន្លេសាប និងតំបន់ដីសណ្ដទន្លេមេគង្គក្រោម ការកត់ត្រាលើកដំបូង ចាប់តាំងពីឆ្នាំ២០១៥មក ។ ទោះយ៉ាងណាក៏ដោយ ដោយសារភាពកម្រ ឱកាសនៃការប្រទះឃើញ ប្រភេទសត្វនេះ គឺនៅមានកម្រិតទាប។ បញ្ហាប្រឈមមួយទៀត គឺថា សត្វនេះ តែងតែស្វែងរកចំណីរបស់ វាជាមួយនឹងប្រភេទសត្វផ្សេងទៀត ដូចជា រនៀលពណ៌ (Mycteria leucocephala) និង និងត្រយងខ្លួន ស (Threskiornis melanocéphalus) ជាដើម ដែលបង្កការលំបាកយ៉ាងខ្លាំងសម្រាប់ក្រុមនៅវាល ក្នុង ការអង្កេត និងការកំណត់អត្តសញ្ញាណ» ។សត្វត្រយងចំពុះស្លាបព្រា ត្រូវបានចុះក្នុងបញ្ជីក្រហមរបស់ IUCN ជាប្រភេទរងគ្រោះតិចតួចបំផុត ប៉ុន្តែវាកម្រមានណាស់នៅក្នុងតំបន់អាស៊ីអាគ្នេយ៍។ ប្រភេទសត្វនេះមានវត្តច្រើននៅក្នុងទ្វីបអឺរ៉ុប អាហ្រ្វិក និងអាស៊ី ហើយជាធម្មតាធ្វើទេសន្តរប្រវេសន៍ទៅកាន់តំបន់ដីសើម នៅអាស៊ីអាគ្នេយ៍ និងប្រទេសឥណ្ឌា។ ការមើលឃើញនេះបង្ហាញពីភាពសម្បូរបែបនៃឋានប្រព័ន្ធដ៏អស្ចារ្យនៃទីជម្រកតំបន់ដីសើមទឹកសាប និងការប្តេជ្ញាចិត្តរបស់សហគមន៍មូលដ្ឋានក្នុងការអភិរក្សតំបន់ដីសើមទាំងនេះសម្រាប់សត្វស្លាបទឹកធំៗ។ ដូច្នេះ វាមានសារៈសំខាន់ណាស់ក្នុងការការពារ និងអភិរក្សទីជម្រកនេះ ដើម្បីជាប្រយោជន៍ដល់ជីវចម្រុះ និងសហគមន៍ ៕

លោកអេរដូហ្គែនប្រាប់សម្តេចប៉ាប៖ ភាពស្ងៀមស្ងាត់របស់សហគមន៍អន្តរជាតិ ជុំវិញការវាយប្រហារនៅតំបន់ហ្គាហ្សា គឺជារឿងគួរឲ្យ«អាម៉ាស់»

2023/10/27 02:04:03 pm        111
Facebook Telegram Linkin
ប្រធានាធិបតីទួរគី លោក តាយីប អេរដូហ្គែន (Tayyip Erdogan) បានប្រាប់សម្តេចប៉ាប ហ្វ្រង់ស៊ីស នៅក្នុងការសន្ទនាតាមទូរស័ព្ទមួយ កាលពីថ្ងៃព្រហស្បតិ៍ថា ការវាយប្រហាររបស់អ៊ីស្រាអែលលើតំបន់ហ្គាហ្សា គឺជាការសម្លាប់រង្គាលមួយ ហើយថា ភាពស្ងៀមស្ងាត់របស់សហគមន៍អន្តរជាតិគឺជារឿង«គួរឲ្យអាម៉ាស់»។សេចក្តីថ្លែងការណ៍របស់ការិយាល័យប្រធានាធិបតីទួរគី បានឲ្យដឹងថា នៅក្នុងការអំពាវនាវនេះ លោក អេរដូហ្គែន បាននិយាយថា ប្រទេសទាំងអស់ ត្រូវតែបញ្ចេញសំឡេងប្រឆាំងនឹងវិបត្តិមនុស្សធម៌នៅក្នុងតំបន់ នេះ។ អ្នកនាំពាក្យរបស់បុរីវ៉ាទីកង់ បាននិយាយនៅក្នុងកំណត់ហេតុមួយថា ការអំពាវនាវនេះ ធ្វើឡើង នៅពេលព្រឹកនេះ បន្ទាប់ពីមានសំណើរបស់លោកអេរដូហ្គែន។អ្នកនាំពាក្យរូបនេះ បានបន្ថែមថា៖«សម្តេចប៉ាប បានសម្តែងនូវការឈឺចាប់របស់ព្រះអង្គចំពោះអ្វីដែលកំពុងកើតឡើង ហើយបានរំលឹកឡើងវិញនូវគោលជំហររបស់រដ្ឋាភិបាលរបស់បុរីវ៉ាទីកង់ (Holy See) ដោយសង្ឃឹមថា ដំណោះស្រាយរដ្ឋទាំងពីរ អាចឈានដល់ ក៏ដូចជាការទទួលស្គាល់ស្ថានភាពពិសេសមួយសម្រាប់ទីក្រុងហ្ស៊េរុយសាឡិម»។

ប្រមុខការទូតចិន ប្រាប់សមភាគីអាមេរិកថា ការសន្ទនាស៊ីជម្រៅអាចធ្វើឲ្យទំនាក់ទំនងប្រទេសទាំង២ មានស្ថិរភាព

2023/10/27 01:43:45 pm        107
Facebook Telegram Linkin
រដ្ឋមន្ត្រីការបរទេសចិន លោក Wang Yi បាននិយាយកាលពីថ្ងៃព្រហស្បតិ៍ អំឡុងដំណើរទស្សនកិច្ចដែលបានគ្រោងទុកទៅកាន់ទីក្រុងវ៉ាស៊ីនតោនថា សហរដ្ឋអាមេរិក និងចិនមានការខ្វែងគំនិតគ្នា ហើយត្រូវការកិច្ចសន្ទនា ស៊ីជម្រៅ និងទូលំទូលាយ ដើម្បីកាត់បន្ថយការយល់ច្រឡំ និងស្ថិរភាពទំនាក់ទំនង។ដោយឈរក្បែររដ្ឋមន្ត្រីការបរទេសអាមេរិក លោក Antony Blinken លោក Wang បាននិយាយថា ប្រទេសទាំងពីរត្រូវចែករំលែកផលប្រយោជន៍រួម និងបញ្ហាប្រឈមសំខាន់ៗដែលប្រទេសទាំង២ត្រូវដោះស្រាយជាមួយគ្នា។ លោក Wang បាននិយាយតាមរយៈអ្នកបកប្រែថា ដូច្នេះ ប្រទេសចិន និងសហរដ្ឋអាមេរិក ចាំបាច់ត្រូវមានការសន្ទនា។យើងមិនត្រឹមតែគួរបន្តការសន្ទនាប៉ុណ្ណោះ ការសន្ទនាក៏គួរតែស៊ីម្រៅ និងឲ្យបានកាន់តែទូលំទូលាយថែមទៀតផងដែរ ។ លោកបាននិយាយថា ការសន្ទនានឹងជួយកាត់បន្ថយការយល់ច្រលំ ជួយធ្វើឱ្យទំនាក់ទំនងមានស្ថេរភាព និង ត្រឡប់ទៅរកមាគ៌ានៃការអភិវឌ្ឍន៍ប្រកបដោយរលូន ស្ថិរភាព និងនិរន្តរភាព។ លោក Blinken បានឆ្លើយតបថា លោកយល់ស្របនឹងអ្វីដែលរដ្ឋមន្ត្រីការបរទេសបាន លើកឡើង ។មុនការថ្លែងបែបនេះរបស់លោក Wangលោក Blinken បាននិយាយថា លោកទន្ទឹងរង់ចាំកិច្ចពិភាក្សាប្រកបដោយស្ថាបនាជាមួយសមភាគីចិន។ គួរឲ្យដឹងថា ដំណើរទស្សនកិច្ចរយៈពេលបីថ្ងៃរបស់លោក Wang គឺជាដំណើរចុងក្រោយបង្អស់ក្នុងភាពចលាចលនៃទំនាក់ទំនងការទូតរវាងគូប្រជែងយុទ្ធសាស្ត្រទាំងពីរ ស្របពេលប្រទេសមហាអំណាចសេដ្ឋកិច្ចធំបំផុតទាំង២របស់ពិភពលោក ពួកគេព្យាយាមគ្រប់គ្រងការខ្វែងគំនិតគ្នា ដើម្បីជៀសវាងជម្លោះ។ ដំណើរទស្សនកិច្ចនេះផ្ដោតជាសំខាន់ក្នុងការរៀបចំសម្រាប់ជំនួបកំពូលដែលរំពឹងទុករវាងលោកប្រធានាធិបតី Joe Biden និងប្រធានាធិបតី Xi Jinping ក្នុងខែវិច្ឆិកា នៅសហរដ្ឋអាមេរិក ៕

សភាអាមេរិក ចោទសួរកងទ័ពជើងទឹក ជុំវិញការពន្យាពេលអនុវត្តន៍សម្រាប់ដំណើរការបញ្ជូនសព្វាវុធទៅកោះតៃវ៉ាន់

2023/10/27 01:28:25 pm        84
Facebook Telegram Linkin
គណៈកម្មាធិការសភាសហរដ្ឋអាមេរិក បានចោទសួរកងទ័ពជើងទឹកអាមេរិក កាលពីថ្ងៃព្រហស្បតិ៍ អំពីអ្វីដែលខ្លួនចាត់ទុកថាជា «ការពន្យារពេលដ៏គួរឱ្យព្រួយបារម្ភ» ក្នុងការដឹកជញ្ជូនសព្វាវុធទៅកាន់កោះតៃវ៉ាន់ ដោយសួរថាហេតុអ្វីបានជាការផលិត ពេលខ្លះធ្លាក់ចុះក្នុងរយៈពេលជាច្រើនខែឬច្រើនឆ្នាំមកនេះ បន្ទាប់ពីកិច្ចព្រមព្រៀងទិញ ត្រូវបានចុះហត្ថលេខា។ សភាតំណាងរាស្ត្រ បាននិយាយក្នុងលិខិតផ្ញើទៅកាន់មេបញ្ជាការកងទ័ពជើងទឹក លោក Carlos Del Toro ថា ពេលវេលាបានអស់ហើយ ដើម្បីរារាំងសកម្មភាពយោធារបស់ប្រទេសចិនមកលើកោះតៃវ៉ាន់ស្វ័យគ្រប់គ្រងតាមបែបលទ្ធិប្រជាធិបតេយ្យ ដែលទីក្រុងប៉េកាំងអះអាងថាជាដែនដីរបស់ខ្លួន។ សមាជិកសភាបានសរសេរថា ការពន្យាពេលក្នុងការអនុវត្តន៍នៅក្នុងកងទ័ពជើងទឹក កំពុងតែរារាំងដល់ការផលិត និងការដឹកជញ្ចូនសព្វាវុធសំខាន់ៗទៅកាន់កោះតៃវ៉ាន់ឲ្យទាន់ពេលវេលា រួមទាំងមីស៊ីលប្រឆាំងនាវាសំខាន់ៗ និងធ្វើឱ្យអន្តរាយដល់កិច្ចខិតខំប្រឹងប្រែងដើម្បីទប់ស្កាត់សង្គ្រាម។ពួកគេបានគូសបញ្ជាក់ពីតម្រូវការសម្រាប់មីស៊ីលប្រឆាំងនាវា Harpoon និងមីស៊ីល SLAM-ER ដែលទាំងពីរនេះ សហរដ្ឋអាមេរិក បានព្រមព្រៀងកាលពីឆ្នាំមុនដើម្បីលក់ទៅឱ្យកោះតៃវ៉ាន់។សមាជិកសភា បានសរសេរថា វាត្រូវចំណាយពេលរហូតដល់ខែមេសា ឆ្នាំ ២០២៣ សម្រាប់កងទ័ពជើងទឹកក្នុងការចុះកិច្ចសន្យាសម្រាប់ការផលិតមីស៊ីល Harpoon បាញ់ពីដីគោកចំនួន ៤០០គ្រាប់ ទៅឱ្យកោះតៃវ៉ាន់ ដោយកត់សម្គាល់ថានោះគឺ មានរយៈពេលជាង២ឆ្នាំ បន្ទាប់ពីការប្រកាសរបស់ក្រសួងការពារជាតិ កាលពីខែតុលា ឆ្នាំ ២០២០ នៃការលក់សព្វាវុធទៅឱ្យកោះតៃវ៉ាន់។ ការដឹកជញ្ចូនដែលបានដាក់ហានិភ័យលើសពីឆ្នាំ ២០២៧ ជាឆ្នាំដែលមន្ត្រីសហរដ្ឋអាមេរិកនិយាយថា គឺជាកាលបរិច្ឆេទដាក់គោលដៅរបស់ប្រទេសចិន ដើម្បីត្រៀមខ្លួនធ្វើការឈ្លានពាន ។

សម្តេចតេជោ៖ មរណភាពរបស់ឯកឧត្តម លី ខឺឈាង តំណាងឱ្យការបាត់បង់ដ៏ធំមួយសម្រាប់ប្រជាជនចិន និងបក្ស

2023/10/27 01:00:51 pm        193
Facebook Telegram Linkin
ភ្នំពេញ៖ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានចាត់ទុកថា ការបាត់បង់ជីវិតរបស់ឯក លី ខឺឈាង អតីតនាយករដ្ឋមន្រ្តីចិន កាលពីយប់មិញ គឺតំណាងឲ្យការបាត់បង់ដ៏ធំមួយសម្រាប់ប្រជាជនចិន និងគណបក្សកុម្មុយនីស្តចិន ហើយសម្តេចក៏បានចាត់ទុកឯកឧត្តមជាមិត្តល្អរបស់កម្ពុជាផងដែរ។តាមរយៈសាររំលែកទុក្ខជូនឯកឧត្តម ស៊ី ជិនពីង នាថ្ងៃទី២៧ ខែតុលា ឆ្នាំ២០២៣នេះ​ ចំពោះមរណភាព​របស់ឯកឧត្តម លី ខឺឈាង ​អតីតនាយករដ្ឋមន្ត្រីចិន ដែលបានទទួល​មរណភាពកាលពី​យប់មិញ​ក្នុងជន្មាយុ៦៨ឆ្នាំ ដោយបញ្ហាគាំងបេះដូងនោះសម្តេចតេជោ ហ៊ុន សែន បានលើកឡើងថា ​សម្តេចពិតជាមានសេចក្តីក្រៀមក្រំជាទីបំផុត ដោយបាន​ដឹងពី​មរណភាព​នៅក្រុងសៀងហៃ នៅព្រឹកមិញនេះរបស់ឯកឧត្តម លី ខឺឈាង សមាជិកគណៈកម្មាធិការ​អចិន្ត្រៃយ៍​នៃការិយាល័យនយោបាយនៃគណៈកម្មាធិការកណ្តាលទី១៧,១៨ និងទី១៩ នៃបក្សកុម្មុយនីស្តចិន និងជា​អតីតនាយករដ្ឋមន្រ្តីនៃក្រុមប្រឹក្សារដ្ឋ។សម្តេច បានសង្កត់ធ្ងន់ថា«មរណភាពរបស់ឯកឧត្តម (លី ខឺឈាង) តំណាងឲ្យការបាត់បង់ដ៏ធំមួយ​សម្រាប់​ប្រជាជនចិន និងបក្ស»។នៅក្នុងសាររំលែកទុក្ខនេះដែរសម្តេចតេជោ ហ៊ុន សែន ក្នុងនាមគណបក្សប្រជាជនកម្ពុជា បាន​ចាត់ទុកឯកឧត្តម លី ខឺឈាង «គឺជាមិត្តដ៏ល្អរបស់កម្ពុជា ​ហើយប្រជាជនកម្ពុជា​ នឹងចងចាំ​ជា​និច្ចនូវការរួមចំណែកដ៏មាន ​តម្លៃរបស់ឯកឧត្តមចំពោះទំនាក់ទំនងមិត្តភាពដ៏ស្និទ្ធរវាងប្រជាជាតិ និងប្រជាជន​នៃប្រទេសយើងទាំងពីរ ​ដែលត្រូវបាន​គូស​បញ្ជាក់​ដោយ​ទំនាក់ទំនង​នយោបាយ​ដ៏​រឹងមាំ​រវាងគណបក្សយើងទាំងពីរ (គណបក្សប្រជាជនកម្ពុជា និងគណបក្សកុម្មុយនីស្តចិន)»។សម្តេចតេជោ​ បានលើកឡើងទៀតថា ​ក្នុងនាមគណបក្សប្រជាជនកម្ពុជា សម្តេចសូមចូលរួមរំលែក​ទុក្ខដ៏ក្រៀមក្រំបំផុត ជូនចំពោះឯកឧត្តម​ក្រុមគ្រួសារនៃសព ​ប្រជាជនចិន ​និងបក្សកុម្មុយនីស្តចិន ចំពោះការបាត់បង់រដ្ឋ បុរសដ៏អស្ចារ្យម្នាក់។ សម្តេចតេជោ​ក៏សូមឲ្យ​វិញ្ញាណក្ខន្ធ​ឯកឧត្តម លី ខឺឈាង ​បានទៅកាន់សុគតិភពកុំបីឃ្លៀង ឃ្លាត​ឡើយផងដែរ៕អត្ថបទបាន ចក់

អាមេរិក៖ យន្តហោះចិន បានខិតមកជិតយន្តហោះទម្លាក់គ្រាប់បែក ក្នុងចម្ងាយ៣ម៉ែត្រដ៏គ្រោះថ្នាក់

2023/10/27 12:50:12 pm        93
Facebook Telegram Linkin
យោធាសហរដ្ឋអាមេរិក បាននិយាយកាលពីថ្ងៃព្រហស្បតិ៍ថា យន្តចម្បាំងចិន បានខិតមកជិតយន្តហោះទម្លាក់គ្រាប់បែកសហរដ្ឋអាមេរិកយ៉ាងគ្រោះថ្នាក់កាលពីដើមសប្តាហ៍នេះ នៅលើសមុទ្រចិនខាងត្បូង ជា អ្វីដែលទីក្រុងវ៉ាស៊ីនតោន និយាយថា ជាឥរិយាបថបង្កហានិភ័យខ្ពស់ដោយយន្តហោះយោធារបស់ចិន។ យោធាអាមេរិក និយាយកាលពីថ្ងៃអង្គារថា យន្តហោះចម្បាំងចិន J-11 បានចូលមកជិតយន្តហោះ B-52 ក្នុងចម្ងាយត្រឹមតែ៣ម៉ែត្រ។ សេចក្តីថ្លែងការណ៍របស់យោធាអាមេរិក និយាយថាអំឡុងការស្ទាក់ចាប់នៅពេលយប់ អាកាសយានិករបស់សាធារណៈរដ្ឋប្រជាមានិតចិន បានហោះហើរក្នុងលក្ខណៈគ្មានវិជ្ជាជីវៈ និងគ្មានសុវត្ថិភាព ដែលបង្ហាញថាអកាសយានិកខ្សោយ ដោយការខិតមកជិតក្នុងល្បឿនលឿនហួសពីការគ្រប់គ្រង ហោះនៅពីខាងក្រោម នៅពីខាងមុខ និងក្នុងចម្ងាយតែ៣ម៉ែត្រ ពីយន្តហោះ B-52 ដែលធ្វើឲ្យយន្តហោះទាំងពីគ្រឿងនេះ ស្ថិតក្នុងគ្រោះថ្នាក់នៃការប៉ះទង្គិចគ្នា។ កាលពីដើមខែនេះ មន្ទីរបញ្ចកោណបាននិយាយថាយន្តហោះយោធាចិន បានធ្វើសមយុទ្ធខិតមកជិតយន្តហោះអាមេរិក ជិត២០០ដង ចាប់តាំងពីឆ្នាំ២០២១។ កាលពីសប្តាហ៍មុន ក្រសួងការពារជាតិចិន បាននិយាយថាមន្ទីរបញ្ចកោណ បានចោទប្រកាន់យោធារបស់ខ្លួនពីបទស្ទាក់ចាប់នៅដែនអាកាសដែលមានហានិភ័យនិងបង្ខិតបង្ខំ គឺជាការបង្ខូចឈ្មោះដោយចេតនាមកលើប្រទេសចិនជាការជំរុញផ្នែកនយោបាយ ដែលលាក់កំបាំង។ ទំនាក់ទំនងរវាងប្រទេសចិន និងសហរដ្ឋអាមេរិក មានភាពតានតឹងដោយសារតែជម្លោះរវាងប្រទេសមានសេដ្ឋកិច្ចធំបំផុតទាំងពីររបស់ពិភពលោក ជុំវិញរឿងរ៉ាវមានចាប់ពីបញ្ហាកោះតៃវ៉ាន់ និងកំណត់ត្រាសិទ្ធមនុស្សរបស់ចិនរហូតដល់សកម្មភាពយោធារបស់ខ្លួន នៅសមុទ្រចិនខាងត្បូង។ រដ្ឋមន្ត្រីការបរទេសចិន លោក Wang Yi បានចាប់ផ្តើមដំណើរទស្សនកិច្ចដែលត្រូវបានរំពឹងទុកជាយូរ ទៅកាន់ទីក្រុងវ៉ាស៊ីនតោនកាលពីថ្ងៃព្រហស្បតិ៍ ខណៈសហរដ្ឋអាមេរិក និងចិន ស្វែងរកការរៀបចំដោះស្រាយភាពខ្វែងគំនិតគ្នាជាយុទ្ធសាស្ត្រដ៍ស៊ីជម្រៅ និងត្រួសត្រាយផ្លូវ សម្រាប់ជំនួបកំពូលដែលរំពឹងទុក រវាង ប្រធានាធិបតីលោក Joe Biden និងសមភាគីរបស់លោក លោក Xi Jinping។

តុលាការកូរ៉េខាងត្បូង បានអនុម័តច្បាប់ហាមប្រាមទំនាក់ទំនងភេទដូចគ្នា ក្នុងកងកម្លាំងប្រដាប់អាវុធ

2023/10/27 11:55:20 am        65
Facebook Telegram Linkin
តុលាការធម្មនុញ្ញរបស់កូរ៉េខាងត្បូង កាលពីថ្ងៃព្រហស្បតិ៍ (២៦ តុលា) បានអនុម័តយ៉ាងប្រផិតប្រផើយនូវច្បាប់ហាមឃាត់ទំនាក់ទំនងភេទដូចគ្នានៅក្នុងកងកម្លាំងប្រដាប់អាវុធ ដោយលើកឡើងពីហានិភ័យដែលអាចកើតមាន ចំពោះការត្រៀមខ្លួនប្រយុទ្ធរបស់យោធា នៅក្នុងសេចក្តីសម្រេចដែលត្រូវបានរិះគន់ដោយក្រុមសកម្មជនថា ជាជំហានថយក្រោយនៃសិទ្ធិស្រឡាញ់ភេទដូចគ្នា ។ស្ថិតក្រោមច្បាប់នៃអំពើឧក្រិដ្ឋកម្មយោធារបស់ប្រទេស សមាជិកនៃកងកម្លាំងប្រដាប់អាវុធ ត្រូវប្រឈមនឹងការជាប់ពន្ធនាគាររហូតដល់ពីរឆ្នាំ សម្រាប់ទំនាក់ទំនងភេទដូចគ្នា។ ច្បាប់នេះត្រូវបានបញ្ជូនទៅតុលាការ និងត្រូវបានអនុម័តចំនួនបួនដង ចាប់តាំងពីឆ្នាំ២០០២ មក។ នៅក្នុងសេចក្តីសម្រេច ដោយមានការគាំទ្រ ៥សំឡេងទល់នឹង ៤សំឡេង កាលពីថ្ងៃព្រហស្បតិ៍ តុលាការបាននិយាយថា ការអនុញ្ញាតឱ្យមានទំនាក់ទំនងភេទដូចគ្នា អាចបំផ្លាញវិន័យក្នុងជួរយោធា និងធ្វើឱ្យប៉ះពាល់ដល់សមត្ថភាពប្រយុទ្ធរបស់ខ្លួន។ក្រុមសិទ្ធិមនុស្ស បាននឹងកំពុងជំរុញឱ្យតុលាការលុបចោលនូវអ្វីដែលពួកគេហៅថា ច្បាប់ «ហួសសម័យកាល និងអាក្រក់» បន្ទាប់ពីតុលាការកំពូលកាលពីឆ្នាំមុន បានលុបចោលការកាត់ទោសរបស់តុលាការយោធា លើទាហានពីរនាក់ ដែលត្រូវបានកាត់ទោសឱ្យផ្អាកការជាប់ពន្ធនាគារ សម្រាប់ទំនាក់ទំនងផ្លូវភេទដូចគ្នា។ ក្រុមសកម្មជនបាននិយាយថា ច្បាប់នេះជំរុញឱ្យមានអំពើហិង្សា ព្រមទាំងការរើសអើងប្រឆាំង និងការមាក់ងាយចំពោះទាហានស្រឡាញ់ភេទដូចគ្នាផងដែរ៕

លោក Biden ព្រមានអ៊ីរ៉ង់ ប្រឆាំងនឹងការវាយប្រហារលើកងទ័ពអាមេរិក នៅមជ្ឈិមបូព៌ា

2023/10/27 11:48:15 am        106
Facebook Telegram Linkin
សេតវិមាន របស់សហរដ្ឋអាមេរិក បាននិយាយកាលពីថ្ងៃព្រហស្បតិ៍ (២៦ តុលា) បន្ទាប់ពីការវាយប្រហារភ្លាមៗជាបន្តបន្ទាប់លើកងកម្លាំងអាមេរិកក្នុងតំបន់មជ្ឈិមបូព៌ាថា លោកប្រធានាធិបតី Joe Biden បានផ្ញើសារដ៏កម្រមួយ ទៅកាន់មេដឹកនាំកំពូលរបស់អ៊ីរ៉ង់ លោក Ayatollah Ali Khamenei ដោយព្រមានទីក្រុង Tehran ប្រឆាំងនឹងការកំណត់គោលទៅលើកងកម្លាំងអាមេរិកនៅមជ្ឈិមបូព៌ា។ក្រុមមន្ត្រីអាមេរិក ចង់បញ្ចៀសជម្លោះកាន់តែទូលំទូលាយនៅមជ្ឈិមបូព៌ា បន្ទាប់ពីការវាយប្រហារកាលពីថ្ងៃទី៧ ខែតុលា ដោយក្រុមសកម្មប្រយុទ្ធហាម៉ាស លើប្រទេសអ៊ីស្រាអែល ដែលបានសម្លាប់ប្រជាជនអ៊ីស្រាអែលយ៉ាងហោចណាស់ ១.៤០០នាក់ ដែលភាគច្រើនជាជនស៊ីវិល។មន្ទីរបញ្ចកោណបាននិយាយថា ក្រុមទាហានអាមេរិកត្រូវបានវាយប្រហារយ៉ាងហោចណាស់ ១២ដង នៅក្នុងប្រទេសអ៊ីរ៉ាក់ និងចំនួន៤ដង ក្នុងប្រទេសស៊ីរី ក្នុងសប្តាហ៍កន្លងមក។ កាលពីថ្ងៃពុធ លោកប្រធានាធិបតី Biden បាននិយាយថា លោកបានព្រមានលោក Ayatollah ថា សហរដ្ឋអាមេរិកនឹងធ្វើការឆ្លើយតប ប្រសិនបើកងកម្លាំងអាមេរិក នៅតែបន្តជាគោលដៅ ហើយសកម្មភាពឆ្លើយតបនោះ គឺមិនពាក់ព័ន្ធជាមួយជម្លោះនៅអ៊ីស្រាអែលនោះទេ ប៉ុន្តែលោកមិនបាននិយាយពីមធ្យោបាយដែលសារទាំងនោះត្រូវបានទាក់ទងនោះទេ។ដោយឡែក ទីភ្នាក់ងារសារព័ត៌មានរដ្ឋរបស់អ៊ីរ៉ង់ IRNA បានដកស្រង់ប្រភពមិនបញ្ចេញឈ្មោះមួយ ដោយនិយាយថា សហរដ្ឋអាមេរិកបានបញ្ជូនសារព្រមានទៅអ៊ីរ៉ង់ ក៏ដូចជាសម្ព័ន្ធមិត្តអ៊ីរ៉ង់មួយចំនួនដូចជា ក្រុមសកម្មប្រយុទ្ធហេសបូឡា របស់លីបង់ ថា ខ្លួនចង់មានការពង្រីកសង្រ្គាមនោះទេ និងបានជំរុញឱ្យពួកគេអនុវត្តនូវការអត់ធ្មត់ផងដែរ៕

បណ្ដាញសង្គម

ព័ត៌មានថ្មីៗ

លោក Zelenskiy៖ រុស្ស៊ីពិតជាមិនអើពើនឹងនរណាម្នាក់ដែលព្យាយាមបញ្ចប់សង្រ្គាមនោះឡើយ
07/30/2025 06:07 PM
Facebook Telegram Linkin
រដ្ឋអាជ្ញាកូរ៉េខាងត្បូង ស្វែងរកដីកាថ្មី ដើម្បីសាកសួរអតីតប្រធានាធិបតី លោក Yoon
07/30/2025 06:07 PM
Facebook Telegram Linkin
TOP STORY | សម្ដេចតេជោ៖កោតសរសើរកងកម្លាំងប្រដាប់អាវុធគ្រប់ប្រភេទរបស់កម្ពុជាគោរពអនុវត្តកិច្ចព្រមព្រៀងឈប់បាញ់បានយ៉ាងល្អ
07/30/2025 06:07 PM
Facebook Telegram Linkin
ព្យុះត្រូវពិកបង្ខំឲ្យពលរដ្ឋ ២៨ម៉ឺននាក់ ជម្លៀសខ្លួន និងបិទសេវាកម្មដឹកជញ្ជូននៅក្រុងសៀងហៃ ប្រទេសចិន
07/30/2025 06:07 PM
Facebook Telegram Linkin
បារាំង និង ប្រទេសចំនួន ១៤ ផ្សេងទៀត ជំរុញឲ្យមានការទទួលស្គាល់រដ្ឋប៉ាឡេស្ទីន
07/30/2025 06:07 PM
Facebook Telegram Linkin
ជនប៉ាឡេស្ទីនព្យាយាមដណ្តើមជំនួយនៅទីក្រុង Beit Lahiya តំបន់ហ្កាហ្សាស្រ្ទីប
07/30/2025 06:07 PM
Facebook Telegram Linkin
រដ្ឋមន្រ្តីសុខាភិបាល «ក្នុងនាមសមាជិកគ្រួសារមួយ ជាមួយបងប្អូនប្រជាពលរដ្ឋទាំងអស់គ្នា និងសូមផ្តាំផ្ញើសួរសុខទុក្ខ ជូនបងប្អូនប្រជាពលរដ្ឋយើងទាំងអស់ក្នុងខេត្តបន្ទាយមានជ័យ»
07/30/2025 06:07 PM
Facebook Telegram Linkin
វ៉េណេស៊ុយអេឡា បានស្តីបន្ទោសមន្ត្រីអាមេរិក ពីការ «ចាប់ជំរិត» កុមារ
07/30/2025 06:07 PM
Facebook Telegram Linkin
អង្គភាពសង្រ្គោះបន្ទាន់យោធាអេស្ប៉ាញ ព្យាយាមពន្លត់ភ្លើងឆេះព្រៃនៅតំបន់ Caceres
07/30/2025 05:07 PM
Facebook Telegram Linkin
មនុស្សយ៉ាងតិច ៥នាក់ បានស្លាប់ នៅក្នុងការប៉ះទង្គិចគ្នារវាងកងកម្លាំងអ៊ូហ្គង់ដា និងខាងត្បូងខាងត្បូង
07/30/2025 05:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.