នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
TOP STORY | សម្ដេចធិបតី បានចាត់វិធានការចាំបាច់​ជាបន្ត​បន្ទា​ប់ចំ​ពោះកា​រ​វិល​ត្រឡប់​ទ្រង់ទ្រាយ​ធំរ​បស់​ពលករ​ខ្មែរ និងជនភៀសសឹក
TOP STORY | សម្ដេចតេជោ៖ ពេលនេះ ខ្ញុំកំពុងតែរួមចំណែកបញ្ជាទ័ព តាមប្រព័ន្ធវីដេអូ និងប្រព័ន្ធផ្សេងទៀតជាមួយនាយករដ្ឋមន្ត្រី, រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់
TOP STORY |សម្ដេចធិបតី ហ៊ុន ម៉ាណែត ដាក់លិខិតស្នើសុំ​​កោះប្រជុំក្រុមប្រឹក្សាសន្តិសុខជាបន្ទាន់ ដើម្បី​សុំ​ការ​អន្ត​រាគមន៍​បញ្ចប់​ការ​ឈ្លាន​ពាន​របស់​កង​ទ័ព​ថៃមក​លើដែនអធិបតេយ្យភាពរបស់កម្ពុជា
TOP STORY | សម្ដេចធិបតី៖ កងទ័ពថៃបានបើកការ​វាយប្រហារ​មក​លើ​ទីតាំង​ឈរ​ជើង​របស់​កង​ទ័ព​កម្ពុជា​ នៅប្រាសាទតាមាន់ធំ តាក្របី និងបានពង្រីកភូមិសាស្ត្រវាយប្រហារទៅដល់តំបន់មុំបី

នយោបាយ​ និង ការអភិវឌ្ឍន៍

មន្ដ្រីជាន់ខ្ពស់ក្រសួងមហាផ្ទៃ៖ កម្លាំង​ប្រជាការពារមានសិទ្ធិឃាត់ខ្លួនជនល្មើសជាក់ស្ដែង ​តែត្រូវបញ្ជូនឱ្យអាជ្ញាធរមានសមត្ថកិច្ច

2023/10/26 03:52:34 pm        123
Facebook Telegram Linkin
ព្រះវិហារ៖ ឯកឧត្តម អ៊ុំ ម៉ារ៉ា រដ្ឋលេខាធិការ ក្រសួងមហាផ្ទៃ និងជាប្រធានក្រុមការងារត្រួតពិនិត្យ និងជំរុញការអនុវត្តគោលនយោបាយ “ភូមិ ឃុំ សង្កាត់មានសុវត្ថិភាព” អញ្ជើញជាអធិបតីភាព ក្នុងកិច្ចប្រជុំបូក សរុបលទ្ធផលការងារអនុវត្តគោលនយោបាយ “ភូមិឃុំ សង្កាត់មានសុវត្ថិភាព” រយះពេល ០៩ខែ និងលើកទិសដៅអនុវត្តការងារត្រីមាសទី៤ ឆ្នាំ២០២៣ នៅសាលាខេត្តព្រះវិហារ កាលពីរសៀលថ្ងៃទី២៥ ខែតុលា ឆ្នាំ២០២៣នេះ។ ក្នុងកិច្ចប្រជុំនាឱកាសនេះក៏មានការអញ្ជើញចូលរួមពីសំណាក់ឯកឧត្តម គីម រិទ្ធី អភិបាល​នៃគណៈអភិបាលខេត្ត លោក លោកស្រី អភិបាលរងខេត្ត ថ្នាក់ដឹកនាំមន្ទីរអង្គភាពនានា​ជុំវិញខេត្ត ​កងកម្លាំងប្រដាប់អាវុធទាំង៣ប្រភេទ និងអាជ្ញាធរក្រុង-ស្រុក ឃុំ-សង្កាត់ជាច្រើនរូបទៀត។ឯកឧត្តម អ៊ុំ ម៉ារ៉ា បានគូសបញ្ជាក់ថា កម្លាំងប្រជាការពារ គឺមានការចាត់ចែងសម្រប សម្រួល​ពី​អាជ្ញាធរ​មានសមត្ថកិច្ចក្នុងមូលដ្ឋានសាមី មានភារកិច្ចចូលរួមប្រកបដោយវិន័យ និងសីលធម៌ ប្រកបដោយ​សេចក្ដីថ្លៃថ្នូ ​ជាមួយនឹងកងកម្លាំងនគរបាល កងរាជអាវុធហត្ថក្នុងការ យាមល្បាត ទប់ស្កាត់ និងចាប់ខ្លួនជនល្មើស។ បន្ថែមពីនេះកម្លាំងប្រជាការពារ មានភារកិច្ចក្រើន ​រំលឹកដល់បងប្អូនប្រជាពលរដ្ឋនៅក្នុងដែន​សមត្ថកិច្ចរបស់ខ្លួន ​ដើម្បីឱ្យប្រជាពលរដ្ឋមានការចូលរួម​ដោយ​ការ​ប្រុងប្រយ័ត្ន និងមានភារកិច្ច​រាយការណ៍​មុខសញ្ញាការប្រព្រឹត្តិបទល្មើស​ ឬបាតុភាព សង្ស័យទាក់ទងនឹងបញ្ហាសន្ដិសុខសណ្ដាប់​សាធារណៈទៅដល់អាជ្ញាធរមានសមត្ថកិច្ច។ឯកឧត្តម បានសង្កត់ធ្ងន់ថា របៀបរបបនៃការធ្វើការ របស់ប្រជាការពារ គឺស្ថិតនៅក្រោមផែនការ​សកម្មភាព ​នៃការចាត់ចែងរបស់អាជ្ញាធរភូមិ ឃុំ សង្កាត់ ​គឺមិនមែនស្ថិតនៅក្រោមការ ចាត់ចែង​ផ្ទាល់​របស់នគរបាលប៉ុស្ដិ៍ ឬក៏អធិការ ក្រុង-ស្រុក ឬស្នងការខេត្តនោះឡើយ ​ដូច្នេះ ហើយមេឃុំ ចៅសង្កាត់ ឬមេភូមិមិនអាចយករួចខ្លួនបាននោះទេ ហើយត្រូវចាត់ទុកកម្លាំងប្រជាការពារ​គឺជា​ជំនួយការ​ដ៏ពិសេស​របស់មូលដ្ឋានរបស់ខ្លួន។ឯកឧត្តមរដ្ឋលេខាធិការ បានបញ្ជាក់ទៀតថា ​កម្លាំង​ប្រជាការពារមិនមានសិទ្ធិ ឬតួនាទីជា​ មន្ដ្រី​នគរបាលយុត្តិធម៌ក្នុងការចងក្រងសំណុំរឿងបញ្ជូនទៅតុលាការដោយខ្លួនឯងនោះទេ ប៉ុន្ដែ កម្លាំង​ប្រជាការពារមានសិទ្ធិអាចឃាត់ខ្លួនជនល្មើស ​ដែលមានបទល្មើសជាក់ស្ដែងបាន ​តែត្រូវ បញ្ជូន​អោយអាជ្ញាធរមានសមត្ថកិច្ច ​ឬនគរបាលប៉ុស្ដិ៍រដ្ឋបាលឃុំសង្កាត់​ ឬអធិការក្រុងស្រុក ដែលមាន​សិទ្ធិ​សម្បទា​ជាមន្ដ្រីនគរបាលយុត្តិធម៌៕ 

ព្រឹកស្អែក សម្ដេចធិបតី ហ៊ុន ម៉ាណែត នឹងអញ្ជើញដឹកនាំប្រជុំពេញអង្គគណៈរដ្ឋមន្ត្រី​ពិនិត្យលើសេចក្ដីព្រាងច្បាប់ចំនួន ៣

2023/10/26 03:32:33 pm        450
Facebook Telegram Linkin
ភ្នំពេញ៖ នៅព្រឹកថ្ងៃទី២៧ ខែតុលា ឆ្នាំ២០២៣ស្អែកនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រី ដើម្បីពិនិត្យលើសេចក្ដីព្រាងច្បាប់ចំនួន ៣។ សេចក្ដីព្រាងច្បាប់ទាំងនោះរួមមាន ១-សេចក្តីព្រាងព្រះរាជក្រឹត្យស្តីពីការបង្កើត ការរៀបចំ និង​កិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ។ ២-សេចក្តីព្រាង​ច្បាប់​ស្តីពី​ហិរញ្ញវត្ថុ សម្រាប់ការគ្រប់គ្រង ឆ្នាំ២០២៤។ ៣- សេចក្តីព្រាងច្បាប់ ស្តីពីការ​ទូរទាត់​ថវិកា​ទូទៅ​របស់​រដ្ឋ​សម្រាប់ការគ្រប់គ្រង ឆ្នាំ២០២២។ក្រៅពីនេះ សម្ដេចធិបតី ក៏នឹងដឹកនាំប្រជុំពិនិត្យលើ បញ្ហាផ្សេងៗ ដូចជា សំណើ​សុំការ​យល់​ព្រម​ពី​គណៈរដ្ឋមន្រ្តី ដើម្បីសុំការអនុម័តពីស្ថាប័ននីតិបញ្ញត្តិលើ សេចក្តីព្រាង​ច្បាប់​ស្តីពីកា​រ​អនុម័ត​យល់​ព្រម​លើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ រវាងរាជរដ្ឋាភិបាល នៃ​ព្រះរាជា​ណា​ចក្រក​ម្ពុជា និងរដ្ឋាភិបាល នៃអេមីរ៉ាតអារ៉ាប់រួមផងដែរ៕

ក្រសួងពាណិជ្ជកម្ម បើកសិក្ខាសាលាផ្សព្វផ្សាយគោលនយោបាយជាតិ ស្តីពីស្វាយចន្ទីឆ្នាំ២០២៣-២០២៧

2023/10/26 03:28:35 pm        256
Facebook Telegram Linkin
ព្រះវិហារ៖ ក្រសួងពាណិជ្ជកម្ម សហការជាមួយមន្ទីរពាណិជ្ជកម្មខេត្តព្រះវិហារ នៅព្រឹកថ្ងៃទី២៦ ខែតុលា ឆ្នាំ២០២៣ បានរៀបចំសិក្ខាសាលាផ្សព្វផ្សាយស្តីពី «គោលនយោបាយជាតិស្តីពីស្វាយចន្ទីឆ្នាំ២០ ២៣-២០២៧» ក្រោមអធិបតីភាពលោកជំទាវ គង់ សិទ្ធិកា អនុរដ្ឋលេខាធិការក្រសួងពាណិជ្ជកម្ម លោក មិន ស៊ីថា អភិបាលរងខេត្ត និងមានការចូលរួមពីប្រធានមន្ទីរ អនុប្រធានមន្ទីរអង្គ ភាពពាក់ព័ន្ធ ។លោក មិន ស៊ីថា អភិបាលរងខេត្ត បានលើកឡើងអំពីគោលនយោបាយជាតិស្តីពីស្វាយចន្ទី បានរៀបចំឡើងតាមរយៈការចុះសិក្សាស្រាវជ្រាវទីតាំងដាំដុះកែច្នៃអ្នកនាំចេញ សិក្ខាសាលា ពិគ្រោះយោបល់ និងការផ្តល់ធាតុចូលពីបណ្តាក្រសួង-ស្ថាប័នដៃគូអភិវឌ្ឍន៍ និងវិស័យឯកជន ពាក់ព័ន្ធលើគ្រប់សកម្មភាពក្នុងខ្សែច្រវ៉ាក់តម្លៃ និងបានរំលេចពីភារកិច្ចជាមួយនឹងទំនួលខុស ត្រូវសំដៅធ្វើយ៉ាងណាឲ្យការអនុវត្តចំគោលដៅ និងប្រកបដោយប្រសិទ្ធភាព ។ ដើម្បីសម្រេច បាន​នូវចក្ខុវិស័យ និងគោលបំណងគោលនយោបាយជាតិស្តីពីស្វាយចន្ទី រាជរដ្ឋាភិបាលបាន ដាក់​ចេញនូវ​គោលដៅចម្បងចំនួន៣៖ ទី១. លើកកម្ពស់ទិន្នផលនៃការផលិត និងផលិតកម្ម ប្រកបដោយ​ភាព​ប្រកួតប្រជែង ទី២. ជំរុញការធ្វើឧស្សាហកម្មហូបនីយកម្ម ដើម្បីបង្កើនតម្លៃ បន្ថែមលើការប្រមូល​ផល និងការកែច្នៃអនុផលស្វាយចន្ទីឲ្យសម្រេចបាន ២៥% នៅឆ្នាំ២០២៧ និងយ៉ាងតិច ៥០% នៅ​ឆ្នាំ២០៣២ និងទី៣ ជំរុញការនាំចេញតាមរយៈការធ្វើពិពិធកម្មទីផ្សារ ការផ្សារភ្ជាប់អន្តរវិស័យក្នុងការ​នាំចេញ កិច្ចសម្រួលពាណិជ្ជកម្មការកាត់បន្ថយថ្លៃដើម និងការ លើកកម្ពស់ឧត្តមភាពលើទីផ្សារ ។នាឱកាសនោះ លោកជំទាវ គង់ សិទ្ធិកា អនុរដ្ឋលេខាធិការ ក្រសួងពាណិជ្ជកម្ម ​បានឲ្យដឹងថា សិក្ខាសាលានេះ ​មានគោលបំណងប្រែក្លាយកម្ពុជាឲ្យក្លាយទៅ ​ជាប្រទេសផលិត និងផ្គត់ផ្គង​ផលិតផងស្វាយចន្ទីដ៏សំខាន់មួយ សម្រាប់បម្រើទីផ្សារក្នុងស្រុក តំបន់ ​និងពិភពលោក ។ លោកជំទាវ បន្តទៀតថា ​គោលនយោបាយជាតិស្វាយចន្ទីផ្តោតសំខាន់ លើយុទ្ធសាស្រ្ត​ចំនួន៣រួមមាន៖១-ការផលិត ត្រូវយកចិត្តទុកដាក់ជំរុញលំអការប្រើប្រាស់បច្ចេក ទេសវិទ្យា​កសិកម្មថ្មីៗ ២-ការកែច្នៃ ត្រូវធ្វើពិពិធកម្មមុខទំនិញសម្រាប់បង្កើនតម្លៃបន្ថែមដល់ ផលិតផលស្វាយ​ចន្ទីដើម្បីអភិវឌ្ឍសេដ្ឋកិច្ចជនបទ ដោយប្រែក្លាយកសិករទៅជាពាណិជ្ជករ ៣-ការនាំចេញ ត្រូវពង្រីកវិសាលភាពកសិពាណិជ្ជកម្ម លើកទឹកចិត្តដល់ការប្រើប្រាស់ផលិតផល ស្វាយចន្ទី សម្រួលពាណិកម្មក្នុងការនាំចេញ និងកែលំអនីតិវិធីដែលមានស្រាប់ ៕

ជប៉ុន ផ្តល់ហិរញ្ញប្បទានឥតសំណងជាង ៩លានដុល្លារដល់កម្ពុជា ដើម្បីគាំទ្រដល់វិស័យដីធ្លី

2023/10/26 02:59:55 pm        514
Facebook Telegram Linkin
នៅថ្ងៃនេះ រដ្ឋាភិបាលជប៉ុនបានផ្ដល់ហិរញ្ញប្បទានឥតសំណងចំនួនប្រមាណ ៩,៧លានដុល្លារ ដើម្បី​ពន្លឿនការអង្កេតវាស់វែងសុរិយោដី ព្រមទាំងពង្រឹង​សេវា​រដ្ឋបាល​ពាក់ព័ន្ធ​នឹង​ការ​ចុះ​បញ្ជី​ដីធ្លី​នៅ​កម្ពុជា។ការផ្តល់ហិរញ្ញប្បទានឥតសំណងនេះធ្វើឡើង នៅថ្ងៃទី២៦ ខែតុលា ឆ្នាំ២០២៣ តាមរយៈ​ពិធី​ចុះហត្ថ​លេខា​រវាងឯកឧត្តម សុខ ចិន្តាសោភា ឧបនាយករដ្ឋមន្រ្តី រដ្ឋមន្រ្តីការបរទេស និង​សហ​ប្រតិបត្តិការ​អន្តរជាតិ និងឯកឧត្តម UENO Atsushi ឯកអគ្គរាជទូតជប៉ុនប្រចាំកម្ពុជា ។តាងនាមរាជរដ្ឋាភិបាល និងប្រជាជនកម្ពុជា ឯកឧត្តមឧបនាយករដ្ឋមន្ត្រី បានថ្លែង​អំណរ​គុណ​ចំពោះ​រដ្ឋាភិបាល និងប្រជាជនជប៉ុន សម្រាប់ការបន្តជំនួយអភិវឌ្ឍន៍ផ្លូវការដល់កម្ពុជា។ ឯកឧត្តម​ឧបនាយករដ្ឋមន្រ្តី បន្តថា រាល់ជំនួយជប៉ុនគ្របដណ្ដប់លើកិច្ចសហប្រតិបត្តិការយ៉ាងទូលំទូលាយ ដូចជា ការអភិវឌ្ឍហេដ្ឋារចនាសម្ព័ន្ធ សុខាភិបាល អប់រំ ការផ្គត់ផ្គង់ទឹកស្អាត និងការដោះមីន ជា​ដើម​។ ឯកឧត្តមឧបនាយករដ្ឋមន្រ្តី បញ្ជាក់ថា នេះឆ្លុះបញ្ចាំងពីតួនាទីដ៏សំខាន់របស់ជប៉ុន ក្នុងការ​រួម​ចំណែក​ដល់​ការអភិវឌ្ឍសេដ្ឋកិច្ច-សង្គមរបស់កម្ពុជា។គោលបំណង នៃគម្រោងផ្តល់ហិរញ្ញប្បទាននេះ គឺដើម្បីពន្លឿនការអង្កេតវាស់វែងសុរិយោដី ព្រម​ទាំង​ពង្រឹងសេវារដ្ឋបាលពាក់ព័ន្ធនឹងការចុះបញ្ជីដីធ្លី តាមរយៈ​ការ​ដំឡើង​ស្ថានីយ​វាស់​វែង​អចិន្រ្តៃយ៍​ដោយ​ផ្កាយរណប ដើម្បីរួមចំណែក​ដល់​ការ​លើក​កម្ពស់​គម្រោង​ហេដ្ឋា​រចនា​សម្ព័ន្ធ​នានា​។លើសពីនេះ ការផ្តល់ហិរញ្ញប្បទានឥតសំណងនេះ ចាត់ទុកកាយវិការដ៏សប្បុរសនេះ បង្ហាញ​ពី​ការ​ប្តេជ្ញា​ចិត្ត​ឥតងាករេរបស់ជប៉ុន ក្នុងការជួយដល់​កិច្ចខិតខំ​ប្រឹងប្រែង​ជា​បន្ត​បន្ទាប់​របស់​រាជ​រដ្ឋាភិបាល​កម្ពុជា ក្នុងការជំរុញការអភិវឌ្ឍសេដ្ឋកិច្ច និងសង្គម។ ជំនួយនេះ រួម​ចំណែក​ពង្រីក​កិច្ច​សហ​ប្រតិបត្តិការលើគ្រប់វិស័យ និងពង្រឹង “ភាពជាដៃគូយុទ្ធសាស្ត គ្រប់ជ្រុងជ្រោយ” រវាង​ប្រទេស​ទាំងពីរ ដែលកំពុងប្រារព្ធខួបអនុស្សាវរីយ៍លើកទី៧០ នៃទំនាក់ទំនងការទូត៕ អត្ថបទ សេក ឧត្តមគម្រោងនេះមានគោលបំណងគការអង្កេតពស់វែងសុរិយោដើម និងពង្រឹងសេវារដ្ឋបាល ពាក់ព័ន្ធនិងការចុះបញ្ជីដីធ្លី, តារយៈការដំឡើងស្ថានីយវាស់វែងអចិន្ត្រៃយ៍ដោយផ្កាយដោយ ដើម្បីរួម ចំណែកដល់ការលើកកម្ពស់គម្រោងហេដ្ឋារចនាសម្ព័ន្ធ៣៣។ ខណៈដែលប្រទេសកម្ពុជាកំពុងមានការ អភិវឌ្ឍហេដ្ឋារចនាសម្ព័ន្ធក្នុងដីធ្លីយ៉ាងឆាប់រហ័ស ការដំឡើងស្ថានីយវាស់វែងអចិន្ត្រៃយ៍រំដោយផ្កាយ ដោយនៅទូទាំងប្រទេសកម្ពុជាពិតជាមានសារៈសំខាន់ខ្លាំងណាស់។

ប្រទេសចិន បានបាញ់បង្ហោះយានអវកាសស៊ិនចូវ-១៧ សម្រាប់បេសកកម្មថ្មីនៅក្នុងស្ថានីយអវកាស

2023/10/26 02:01:00 pm        306
Facebook Telegram Linkin
នៅថ្ងៃព្រហស្បតិ៍ (២៦ តុលា) នេះ ប្រទេសចិន បានបាញ់បង្ហោះយានអវកាស ស៊ិនចូវ-១៧ (Shenzhou-17) ហើយអវកាសយានិកបីនាក់នៅលើយានអវកាសនោះ នឹងត្រូវបញ្ជូនឱ្យស្នាក់នៅក្នុងគន្លងតារាវិថីរយៈពេលប្រហែលប្រាំមួយខែ ក្នុងបេសកកម្មស្ថានីយអវកាសមួយ។ យោងតាមទីភ្នាក់ងារអវកាសចិន (CMSA) បានឱ្យដឹងថា យានអវកាស ដែលស្ថិតនៅពីលើយានចម្លងឈ្មោះ Long March-2F នេះ បានហោះចេញពីមជ្ឈមណ្ឌលបាញ់បង្ហោះផ្កាយរណប ជីវឈ័ន (Jiuquan) នៅភាគពាយ័ព្យប្រទេសចិន។អវកាសយានិកទាំងបីរបស់យានស៊ិនចូវ-១៧ មានឈ្មោះ លោក ថាង ហុងប៉ូ (Tang Hongbo) លោក ថាង សឹងជៀ (Tang Shengjie) និងលោក ជាំង ស៊ីនលីន (Jiang Xinlin) គឺជាក្រុមអវកាសយានិកក្មេងជាងគេ ចាប់តាំងពីការសាងសង់ស្ថានីយ៍អវកាស ធានកុង របស់ចិនបានចាប់ផ្តើមមក។ លោក លីន ស៊ីឈាំង (Lin Xiqiang) នាយករងនៃទីភ្នាក់ងារអវកាស CMSA បានប្រកាសនៅក្នុងសន្និសីទសារព័ត៌មានមួយកាលពីថ្ងៃពុធថា អវកាសយានិកទាំងបីរូបនោះ នឹងធ្វើបេសកកម្មវិទ្យាសាស្ត្រអវកាសក្នុងគន្លង និងការធ្វើតេស្តបន្ទុកកម្មវិធី ព្រមទាំងការពិសោធន៍ផ្សេងៗទៀត។លោក លីន បានបន្ថែមថា អវកាសយានិកទាំងនោះ ក៏នឹងបន្តវាយតម្លៃមុខងារ និងដំណើរការរបស់ស្ថានីយ៍អវកាស និងសាកល្បងការសម្របសម្រួល ព្រមទាំងភាពស្របគ្នានៃមជ្ឈមណ្ឌលទ្រទ្រង់ដី ក្នុងការអនុវត្តការងារ និងការគ្រប់គ្រងស្ថានីយអវកាស ដើម្បីបង្កើនប្រសិទ្ធភាពប្រតិបត្តិការ និងសមត្ថភាពកែតម្រូវកំហុសរបស់ស្ថានីយអវកាសនេះផងដែរ៕

អ៊ីស្រាអែល នឹងបដិសេធមិនផ្តល់ទិដ្ឋាការដល់មន្ត្រីUN បន្ទាប់ពីប្រមុខអង្គការអន្តរជាតិនេះ រិះគន់លើសង្រ្គាមហ្កាហ្សា

2023/10/26 01:56:35 pm        263
Facebook Telegram Linkin
ឯកអគ្គរដ្ឋទូតរបស់អ៊ីស្រាអែល ប្រចាំអង្គការសហប្រជាជាតិ បាននិយាយថា អ៊ីស្រាអែល នឹងបដិសេធមិនផ្តល់ទិដ្ឋាការដល់បណ្ដាមន្ត្រីអង្គការសហប្រជាជាតិ ខណៈជម្លោះរបស់អ៊ីស្រាអែល ជាមួយអង្គការអន្តរជាតិមួយនេះកាន់តែស៊ីជម្រៅ។ យោងតាមប្រព័ន្ធផ្សព្វផ្សាយអ៊ីស្រាអែល បានឲ្យដឹងថា លោក Gilad Erdan បានធ្វើសេចក្តីថ្លែងការណ៍បែបនេះកាលពីថ្ងៃពុធ (២៥ តុលា) ខណៈជម្លោះជុំវិញសុន្ទរកថារបស់ប្រធានអង្គការសហប្រជាជាតិ នៅមុខក្រុមប្រឹក្សាសន្តិសុខកាលពីថ្ងៃមុននោះ នៅតែបន្ត។អគ្គលេខាធិការអង្គការសហប្រជាជាតិ លោក Antonio Guterres បានរិះគន់ដោយប្រយោលទៅលើអ៊ីស្រាអែល ចំពោះការបញ្ជាឱ្យមានការជម្លៀសជនស៊ីវិលពីភាគខាងជើងទៅភាគខាងត្បូងនៃតំបន់ហ្កាហ្សា ស្ទ្រីប។ លោកក៏បាននិយាយផងដែរថា ការវាយប្រហាររបស់ពួកហាម៉ាស លើអ៊ីស្រាអែល កាលពីថ្ងៃទី៧ ខែតុលា មិនបានកើតឡើង «ដោយគ្មានហេតុផលនោះទេ» ខណៈពលរដ្ឋប៉ាឡេស្ទីន ត្រូវបាន «ទទួលរងនូវការគៀបសង្កត់អស់រយៈពេល ៥៦ឆ្នាំមកហើយ»។សារព័ត៌មាន Al Jazeera បានរាយការណ៍ថា ប្រទេសជាច្រើនបានស្វាគមន៍ «ការលើកឡើងប្រកបដោយតុល្យភាព» របស់លោក Guterres នេះ ប៉ុន្តែទោះយ៉ាងណាក៏ដោយ អ៊ីស្រាអែល មានការ «ខឹងសម្បារយ៉ាងខ្លាំង» ហើយក្រុមមន្ត្រីរបស់ខ្លួន បានអំពាវនាវឱ្យប្រធានអង្គការសហប្រជាជាតិរូបនេះ លាលែងពីតំណែងផងដែរ៕

ប្រមុខUN ច្រានចោលការចោទប្រកាន់របស់អ៊ីស្រាអែលដែលថា រូបលោកផ្តល់ភាពស្របច្បាប់ ដល់ការវាយប្រហាររបស់ក្រុមហាម៉ាស

2023/10/26 01:32:16 pm        123
Facebook Telegram Linkin
ប្រមុខអង្គការសហប្រជាជាតិលោក Antonio Guterres កាលពីថ្ងៃពុធបានច្រានចោលការចោទប្រកាន់ពីសំណាក់អ៊ីស្រាអែល នៅក្នុងសេចក្ដីថ្លែងការណ៍មួយ ទៅកាន់ក្រុមប្រឹក្សាសន្តិសុខអង្គការសហប្រជាជាតិដែលថា លោកបានបញ្ជាក់ពីភាពស្របច្បាប់ចំពោះការវាយប្រហារនានាដោយក្រុមសកម្មប្រយុទ្ធហាម៉ាសលើអ៊ីស្រាអែល។ លោកបានប្រាប់ក្រុមអ្នកសារព័ត៌មាន ដោយពុំបានបញ្ជាក់ចំឈ្មោះអ៊ីស្រាអែលថា លោកតក់ស្លត់ណាស់ចំពោះការបកស្រាយខុសក្នុងចំណុចមួយចំនួននៃសេចក្ដីថ្លែងការណ៍របស់លោក ដូចជាបើ លោកបញ្ជាក់ពីសកម្មភាពនៃភេរវកម្មដោយក្រុមហាម៉ាស រឿងនោះពិតជាខុសគឺវាផ្ទុយគ្នា។ កាលពីថ្ងៃអង្គារលោក Guterres បានទទូច ឲ្យមានការការពារជនស៊ីវិល ក្នុងសង្រ្គាមរវាងអ៊ីស្រាអែល និងក្រុមហាម៉ាស ដោយបង្ហាញក្ដីបារម្ភពី អំពីការបំពានយ៉ាងច្បាស់លើច្បាប់មនុស្សធម៌អន្តរជាតិក្នុងតំបន់ហ្កាហ្សា។ លោកបានប្រាប់ក្រុមប្រឹក្សាសន្តិសុខអង្គការសហប្រជាជាតិថាបញ្ហាសំខាន់ត្រូវបញ្ជាក់ឲ្យច្បាស់ថា សង្រ្គាមមានច្បាប់ដោយចាប់ផ្ដើមដោយគោលការណ៍ជាមូលដ្ឋាននៃការគោរពនិងការការពារជនស៊ីវិល។ប្រមុខអង្គការសហប្រជាជាតិរូបនេះនិយាយថាវាជារឿងសំខាន់ដែលត្រូវទទួលស្គាល់ផងដែរថា ការវាយប្រហារដោយស្នាដៃក្រុមហាម៉ាស ពុំមានជាប់ពាក់ព័ន្ធនឹងភាគីណាផ្សេងទៀតទេ។ប្រជាជនប៉ាឡេស្ទីន ត្រូវបានក្លាយជាគោលដៅរយៈពេល៥៦ឆ្នាំនៃការគ្រប់គ្រងប្រកបដោយការគាបសង្កត់។លោកបាននិយាយថា ប៉ុន្តែទុក្ខសោករបស់ប្រជាជនប៉ាឡេស្ទីនមិនអាចបង្ហាញអំពីភាពត្រឹមត្រូវនៃការវាយប្រហារដ៏គួរឱ្យរន្ធត់ដោយក្រុមហាម៉ាស នោះទេ។ ហើយការវាយប្រហារដ៏គួរឱ្យភ័យខ្លាចទាំងនោះមិនអាចបញ្ជាក់អំពីភាពត្រឹមត្រូវដោយដាក់ទណ្ឌកម្មរួមលើប្រជាជនប៉ាឡេស្ទីននោះដែរ។គួររម្លឹកថា ឯកអគ្គរដ្ឋទូតអង្គការសហប្រជាជាតិរបស់អ៊ីស្រាអែលលោក Gilad Erdan បានហៅសុន្ទរកថារបស់លោក Guterres ថា គួរឱ្យភ្ញាក់ផ្អើល ហើយបានអំពាវនាវឱ្យលោក Guterres លាលែងពីតំណែងភ្លាមៗ ខណៈរដ្ឋមន្ត្រីការបរទេសអ៊ីស្រាអែលលោក Eli Cohen បាននិយាយថា លោកនឹងមិនជួបជាមួយលោក Guterres នៅថ្ងៃអង្គារតាមការគ្រោងទុកនោះទេ៕

ពលរដ្ឋរងគ្រោះដោយទឹកជំនន់ចំនួន១៣០ គ្រួសាររស់នៅខណ្ឌព្រែកព្នៅ ទទួលអំណោយសង្រ្គោះបន្ទាន់

2023/10/26 01:20:45 pm        209
Facebook Telegram Linkin
នៅព្រឹកថ្ងៃទី ២៦ ខែតុលា ឆ្នាំ២០២៣នេះ កាកបាទក្រហមកម្ពុជា ដែលមាន ហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន បានចាត់ឱ្យលោកជំទាវ ម៉ែន នារីសោភ័គ អគ្គលេខាធិការរងទី១ ​កាកបាទក្រហមកម្ពុជា សហការ​ជាមួយសាខា​ និងអនុសាខា​ ចុះសំណេះសំណាលសួរសុខទុក្ខ ​និងចែកអំណោយមនុស្សធម៌ ជួយសម្រាលការលំបាក​ ជូនប្រជាពលរដ្ឋរងគ្រោះដោយទឹកជំនន់ចំនួន១៣០គ្រួសារ រស់នៅខណ្ឌព្រែកព្នៅ រាជធានីភ្នំពេញ។ក្នុងឱកាសជួបសំណេះសំណាលនោះ លោកជំទាវ ម៉ែន នារីសោភ័គ បានពាំនាំមកនូវព្រះរាជបន្ទូល និងប្រសាសន៍ផ្តាំផ្ញើសួរសុខទុក្ខ ពីសំណាក់ព្រះអង្គរទាំងទ្វេ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដោយក្តីនឹករលឹក​ និងមនោសញ្ចេតនាជាប់ជានិច្ច ជាមួយប្រជានុរាស្ត្រកូនចៅ និងប្រជាពលរដ្ឋគ្រប់ពេលវេលា។ ទន្ទឹមនឹងនេះលោកជំទាវ បានពាំនាំផ្តាំផ្ញើ នូវសារសុខភាពមួយចំនួន ជូនដល់បងប្អូនឱ្យចេះថែទាំ​សុខភាពឱ្យបានល្អ ជាពិសេសនៅក្នុងពេលមានទឹកជំនន់នេះ ត្រូវសម្អាតបរិស្ថានជុំវិញផ្ទះឱ្យ​បានស្អាត កំចាត់ចោលនូវជម្រកសត្វមូសដែលមានជុំវិញផ្ទះ ​និងត្រូវយកចិត្តទុកដាក់ខ្ពស់ ចំពោះ មនុស្សចាស់ ​និងកុមារតូចៗ​ ជៀសវាងគ្រោះថ្នាក់កើតមានឡើងជាយថាហេតុ។ លើសពីនេះទៀតសូមចូលរួមសម្អាតបរិស្ថាន និងកាត់បន្ថយការប្រើប្រាស់ប្លាស្ទិក។ទាក់ទិននិងការផ្តល់អំណោយសង្រ្គោះបន្ទាន់នេះ ​លោកជំទាវ ម៉ែន នារីសោភ័គ បានឱ្យដឹងថា នៅក្នុងខែតុលា​ ឆ្នាំ២០២៣នេះ កាកបាទក្រហមកម្ពុជា​ ដែលមាន ហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានផ្តល់​អំណោយ​មនុស្សធម៌ជូន ប្រជាពលរដ្ឋរងគ្រោះដោយទឹកជំនន់​សរុបចំនួន ៧.៥១៦ គ្រួសារ (ក្នុងនោះថ្នាក់កណ្តាល ​បានឆ្លើយតបចំនួន ៦.២១០គ្រួសារ ​និងថ្នាក់សាខាឆ្លើយតបបាន ១.៣០៦គ្រួសារ) ​នៅតាមបណ្តារាជធានី-ខេត្តចំនួន ៩ រួមមាន រាជធានីភ្នំពេញ, ខេត្តពោធិ៍សាត់, ខេត្តកំពង់ស្ពឺ, ខេត្តបាត់ដំបង, ខេត្តបន្ទាយមានជ័យ, ខេត្តសៀមរាប, ខេត្តកណ្តាល, ខេត្តព្រះវិហារ និងខេត្តតាកែវ។សូមបញ្ជាក់ថា គ្រួសាររងគ្រោះ ដែលទទួលអំណោយនាពេលនេះ ក្នុងមួយគ្រួសារទទួលបាន៖ អង្ករ ២៥ គីឡូក្រាម, មី ១កេស, ត្រីខ ១០កំប៉ុង និងឃីត (មុង ភួយ សារុង ក្រមា) ១កញ្ចប់។ ​ដោយឡែក ទឹកត្រី ៦ដប, ទឹកបរិសុទ្ធ ១កេស និងថវិកា ​៣ម៉ឺនរៀល ​ជាអំណោយរបស់ ​ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ ​និង​ជាប្រធានគណៈកម្មាធិការសាខាកាក​បាទ​ក្រហម​កម្ពុជា រាជធានីភ្នំពេញ៕អត្ថបទ៖ លោក សំ ងីម 

សម្តេចធិបតី ហ៊ុន ម៉ាណែត៖ ការសម្រេចចិត្តពង្រីកការវិនិយោគរបស់ក្រុមហ៊ុន Minebea ពិតជាបានស្តែងឱ្យឃើញនូវទំនុកចិត្តចំពោះស្ថិរភាពរបស់ប្រទេសកម្ពុជា

2023/10/26 01:13:46 pm        168
Facebook Telegram Linkin
ភ្នំពេញ៖ នាព្រឹកថ្ងៃទី២៦ ខែតុលា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យលោក កៃនុម៉ា យ៉ូស៊ីហ៊ីសា អគ្គនាយកក្រុមហ៊ុន Minebea ចូលជួបសម្តែងការគួរសម និងពិភាក្សាការងារ នៅវិមានសន្តិភាព ។ក្នុងកិច្ចជំនួបនេះ លោក កៃនុម៉ា យ៉ូស៊ីហ៊ីសា បានថ្លែងអំណរគុណចំពោះ សម្តេចធិបតី ដែលបានឆ្លៀតពេលវេលាដ៏​មមាញឹក​អនុញ្ញាត​ឱ្យរូបលោក និ​ងសហការី ចូលជួបសម្តែងការគួរសម និងពិភាក្សាការងារ ព្រមទាំងបានចូលរួមអបអរសាទរចំពោះ សម្តេចធិបតី ក្នុងឱកាសនៃការចូល​កាន់មុខ​តំណែងជានាយករដ្ឋមន្រ្តី នៃព្រះរាជាណាចក្រកម្ពុជា ក្នុងនីតិកាលទី៧ នៃរដ្ឋសភា ។ ក្នុងឱកាសនោះផងដែរ លោកអគ្គនាយក ​បានជម្រាបជូន សម្តេចធិបតីនាយករដ្ឋមន្ត្រីអំពីការរីក​ចម្រើនលូតលាស់យ៉ាងឆាប់រហ័សរបស់ក្រុមហ៊ុន Minebea ក្នុងនាមជារោងចក្រផលិតគ្រឿងបង្គុំ ហើយបន្តបោះជំហានទៅមុខឥតឈប់ឈរឆ្ពោះទៅការប្រែក្លាយជាក្រុមហ៊ុនបៃតង (Green Transformation GX) ដោយព្យាយាមកាត់បន្ថយនូវការបំភាយឧស្ម័នកាបូនិច ក្នុងខ្សែសង្វាក់ផលិតកម្មទាំងមូល ហើយបានប្រែក្លាយខ្លួនឱ្យទៅជាអព្យាក្រឹត្យកាបូន តាមរយៈការជម្រុញនូវការលក់ផលិតផលបៃតង និងផលិតផលផ្សេងៗទៀត ដែលមានលក្ខណៈសន្សំសំចៃថាមពល រួមទាំងផែនការអនាគតក្នុងបង្កើតកសិដ្ឋានផលិតថាមពលដោយពន្លឺព្រះអាទិត្យ និងការបង្កើតរោងចក្រថ្មីនៅក្នុងប្រទេសកម្ពុជា ផងដែរ ។ជាការឆ្លើយតប សម្តេចធិបតី បានស្វាគមន៍ចំពោះជំនួបជាមួយលោក កៃនុម៉ា យ៉ូស៊ីហ៊ីសា និងថ្នាក់ដឹកនាំក្រុមហ៊ុន Minebea នាឱកាសនេះ និងបានរំឭកផងដែរអំពីជំនួបនៅទីក្រុងតូក្យូ កាលពីឆ្នាំ២០២២ កន្លងទៅ ក្នុងឱកាសនៃដំណើរទស្សនកិច្ចផ្លូវការក្នុងនាមមេបញ្ជាការកងទ័ពជើងគោក នៃកងយោធពលខេមរភូមិន្ទ ។ បន្ថែមពីលើនេះ សម្តេចធិបតី ក៏បានចូលរួមអបអរសាទរចំពោះជោគជ័យនៃការវិនិយោគរបស់ក្រុមហ៊ុន Minebea នៅកម្ពុជា ដោយចាប់ផ្តើមពីដើមទុនប្រមាណ ២៣ លានដុល្លារ រហូតបានកើនដល់ ៦០០ លានដុល្លារ ហើយការសម្រេចចិត្តពង្រីកការវិនិយោគនេះ ពិតជាបានស្តែងឱ្យឃើញនូវទំនុកចិត្តរបស់ក្រុមហ៊ុនចំពោះស្ថិរភាពរបស់ប្រទេសកម្ពុជា ។ ជាមួយគ្នានេះ សម្តេចធិបតី ក៏បានវាយតម្លៃខ្ពស់ចំពោះការចូលរួមចំណែករបស់ក្រុមហ៊ុន Minebea នៅក្នុងដំណើរអភិវឌ្ឍរបស់កម្ពុជា តាមរយៈការជំរុញកំណើនសេដ្ឋកិច្ច និងការបង្កើតការងារសម្រាប់ប្រជាជន ក៏ដូចជាការបង្កើតនូវគំរូស្តង់ដារល្អនៃលក្ខខណ្ឌការងារសម្រាប់កម្មករ-និយោជិត ព្រមជាមួយនឹងការសង្កត់ធ្ងន់ថា រាជរដ្ឋាភិបាលកម្ពុជានឹងបន្តគាំទ្រ និងលើកទឹកចិត្តដល់ការវិនិយោគរបស់ក្រុមហ៊ុន Minebea ពីព្រោះជោគជ័យរបស់ Minebea ក៏ជាជោគជ័យរបស់កម្ពុជា ដូចគ្នា ៕

សហរដ្ឋអាមេរិកបន្តកិច្ចសហការគាំទ្រកម្ពុជា លើវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ

2023/10/26 01:04:29 pm        210
Facebook Telegram Linkin
ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៥ តុលា ឆ្នាំ២០២៣ បានជួបពិភាក្សាការងារជាមួយ ឯកឧត្តម Patrick Murphy ឯកអគ្គរដ្ឋទូតអាមេរិក​ប្រចាំ​នៅកម្ពុជា ដើម្បីពិភាក្សាការងារពាក់ព័ន្ធមួយចំនួននៅកម្ពុជា។ប្រភពក្រសួងការងារ និងបណ្តុះបណ្តាលវិជ្ជាជីវៈ នៅក្រោយចប់ជំនួបការងារនេះ បានឲ្យដឹងថា ក្នុងកិច្ចពិភាក្សានេះ ប្រព្រឹត្តទៅដោយភាពជិតស្និទ្ធ ​និងត្រង់ទៅត្រង់មក។ នាឱកាសនោះ ឯកឧត្តមរដ្ឋមន្ត្រី បានជម្រាបអគ្គរដ្ឋទូតអាមេរិក ពីចក្ខុវិស័យរួមរបស់ក្រសួងការងារ ក្នុងអាណត្តិទី៧នេះ ដែលក្រសួងផ្ទាល់ ​ក៏ដូចជារាជរដ្ឋាភិបាលកម្ពុជា ដែលដឹកនាំដោយ​សម្តេចធិបតី ហ៊ុន ម៉ាណែត ចង់សម្រេចបាន​ គឺវិស័យការងារដែលមានបរិយាកាស និងលក្ខខណ្ឌការងារកាន់តែល្អប្រសើរ និងមានសុខដុមនីយកម្មក្នុងទំនាក់ទំនងវិជ្ជាជីវៈ ដែលភាគីនិយោជក និងកម្មករនិយោជិតអាចរក្សាបាននូវឧត្តមប្រយោជន៍​របស់ខ្លួនតាមរយៈការពង្រឹងសមត្ថភាព និងចំណេះដឹងពាក់ព័ន្ធនឹងច្បាប់ការងារ។ ឯកឧត្តមរដ្ឋមន្ត្រី បានគូសបញ្ជាក់ពីកម្មវិធីជាអាទិភាពសំខាន់ៗមួយចំនួនទៀត ដែលរាជរដ្ឋាភិបាល​ក្នុងអាណត្តិទី៧នេះ​ បានដាក់ចេញលើការបណ្តុះបណ្តាលបច្ចេកទេស​វិជ្ជាជីវៈជូនយុវជន​មកពីគ្រួសារក្រ១ ក្រ២ និងងាយរងគ្រោះចំនួន១,៥លាននាក់ដោយឥតគិតថ្លៃ ហើយទទួលបានប្រាក់ឧបត្ថម្ភបន្ថែម។ បន្ថែមពីនេះ រាជរដ្ឋាភិបាលកម្ពុជា ក៏គ្រោងនឹងផ្តល់របប​សន្តិសុខ​សង្គមផ្នែកថែទាំសុខភាពតាមគោលការណ៍ស្ម័គ្រចិត្តដល់អ្នកក្នុងបន្ទុកសមាជិក ប.ស.ស. ចំពោះកម្មករនិយោជិតតាមរយៈភាគទានស្ម័គ្រចិត្តចំនួន១៥, ៦០០រៀល ដែលអាចទទួលបានការ​ថែទាំ​សុខភាពដោយឥតគិតថ្លៃ ដែលជាយុទ្ធសាស្ត្រកាត់បន្ថយចំណាយ និងបង្កើនការសន្សំដល់​កម្មករនិយោជិត។ប្រភពខាងលើ បានលើកឡើងទៀតថា ក្រោយបានយល់ពីចក្ខុវិស័យរួមរបស់ក្រសួងការងារ និង​បណ្តុះបណ្តាលវិជ្ជាជីវៈនៅអាណត្តិទី៧នេះ ​ឯកអគ្គរដ្ឋទូតអាមេរិកប្រចាំនៅកម្ពុជា បានវាយ​តម្លៃខ្ពស់​ចំពោះគោលនយោបាយ និងចក្ខុវិស័យរបស់ក្រសួងក្នុងការពង្រឹងវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ។ មុននឹងបញ្ចប់កិច្ចពិភាក្សាប្រកបដោយភាពស្និទ្ធស្នាលនោះ ភាគីទាំងពីរបានឯកភាពបន្ត​កិច្ចសហប្រតិបត្តិការ​ និងពង្រឹងភាពជាដៃគូលើវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ដើម្បីពង្រឹងបរិយាកាស និងផលិតភាពការងារកាន់តែប្រសើរ ដែលជាចន្ទល់ដ៏សំខាន់សម្រាប់ការអភិវឌ្ឍក៏ដូចជារក្សាកំណើនសេដ្ឋកិច្ចជាតិ៕

បណ្ដាញសង្គម

ព័ត៌មានថ្មីៗ

ស្លូវេនីក្លាយជាប្រទេស EUលើកដំបូងគេដាក់ទណ្ឌកម្មអាវុធលើអ៊ីស្រាអែល
08/01/2025 09:08 PM
Facebook Telegram Linkin
អំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ត្រូវបាន ឯកឧត្តម ទេសរដ្ឋមន្រ្តី គន់ គីម នាំយកប្រគល់ជូនគ្រួសារកងទ័ពជួរមុខ
08/01/2025 08:08 PM
Facebook Telegram Linkin
លោក Zelensky ទាមទារឲ្យមានទណ្ឌកម្មកាន់តែតឹងរ៉ឹង ក្រោយការវាយប្រហាររបស់រុស្ស៊ី សម្លាប់មនុស្ស ៣១នាក់ នៅទីក្រុងគីវ
08/01/2025 08:08 PM
Facebook Telegram Linkin
ប្រធានាធិបតីហ្វាំងឡង់ប្រាប់ថា ត្រៀមរួចជាស្រេច ក្នុងការទទួលស្គាល់រដ្ឋប៉ាឡេស្ទីន
08/01/2025 08:08 PM
Facebook Telegram Linkin
ចិន៖ ក្រុមហ៊ុន Nvidia ត្រូវតែផ្តល់ «ភស្តុតាងសុវត្ថិភាព» ដើម្បីទទួលបានទំនុកចិត្តឡើងវិញ
08/01/2025 08:08 PM
Facebook Telegram Linkin
លោក Putin សង្ឃឹមថា កិច្ចចរចាសន្តិភាពរុស្ស៊ី-អ៊ុយក្រែន នឹងបន្តប្រព្រឹត្តទៅ
08/01/2025 08:08 PM
Facebook Telegram Linkin
ព្រះសង្ឃ និងប្រតិភូក្រសួងធម្មការ នាំយកអំណោយជូនប្រជាពលរដ្ឋស្នាក់នៅបណ្តោះអាសន្នពីជម្លោះព្រំដែន
08/01/2025 07:08 PM
Facebook Telegram Linkin
អាហ្វ្រិកខាងត្បូងរងការដំឡើងពន្ធអាមេរិក ៣០ភាគរយ ក្រោយពុំបានឈានដល់កិច្ចព្រមព្រៀងពាណិជ្ជកម្ម
08/01/2025 07:08 PM
Facebook Telegram Linkin
មនុស្សយ៉ាងហោច ៣៣នាក់ ត្រូវបានសម្លាប់នៅទីក្រុងគីវ ស្របពេលរលកនៃការវាយប្រហាររបស់រុស្ស៊ី
08/01/2025 07:08 PM
Facebook Telegram Linkin
បារាំងចាប់ផ្តើមទម្លាក់ជំនួយមនុស្សធម៌ នៅតំបន់ហ្កាហ្សា
08/01/2025 07:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.