នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម
សម្ដេចតេជោ អំពាវនាវដល់រាជរដ្ឋាភិបាលយកចិត្តទុកដាក់សាងសង់កន្លែងស្នាក់នៅសម្រាប់សិស្សជាស្ត្រី

នយោបាយ​ និង ការអភិវឌ្ឍន៍

កម្ពុជាប្រកាសស្វាគមន៍ប្រទេសលើពិភពលោកជួយដល់កម្ពុជា លើការសង្រ្គោះរងគ្រោះថ្នាក់ដោយសារមីន

2023/10/16 09:12:52 pm        124
Facebook Telegram Linkin
ភ្នំពេញ៖ ក្នុងនាមសម្តេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ឯកឧត្តមទេសរដ្ឋមន្រ្តី លី ធុជ បានស្វាគមន៍ចំពោះការជួយ​ឧបត្ថម្ភ​គាំទ្រប្រកបដោយទឹកចិត្តសប្បុរសពីដៃគូអភិវឌ្ឍន៍ និងប្រទេសជាមិត្ត ដល់ការប្រព្រឹត្តិទៅនិងដំណើរការរៀបចំសន្និសីទត្រួតពិនិត្យឡើងវិញលើកទី៥ ឬកិច្ចប្រជុំកំពូលស្តីពីពិភពលោកដែលគ្មានមីន ដែលកម្ពុជាធ្វើជាម្ចាស់ផ្ទះ សម្រាប់ឆ្នាំ ២០២៤ខាងមុខនេះ។ការថ្លែងបែបនេះ ខណៈឯកឧត្តម ទេសរដ្ឋមន្រ្តី លី ធុជ អនុប្រធានទី១ ​អាជ្ញាធរមីន អញ្ជើញចូលរួម​កិច្ច​ប្រជុំត្រៀមយុទ្ធសាស្រ្តសម្រាប់ជំរុញសកលភាវូបនីយកម្មសកម្មភាពមីន ដែលមានការចូលរួម​ពីព្រះអង្គម្ចាស់ Mired Raad Zeid Al-Hussein ប្រេសិតពិសេសនៃអនុសញ្ញាអូតាវ៉ា, ឯកឧត្តម Igor Driesman ប្រធានជ្រើសតាំងនៃសហភាពអ៊ឺរ៉ុប, ឯកឧត្តម អ៊ូអ៊ិណូ អាតស៊ូហ្ស៊ី UENO Atsushi ឯកអគ្គរាជទូតជប៉ុនប្រចាំកម្ពុជា​ និងជាប្រធានជ្រើសតាំងអនុសញ្ញាអូតាវ៉ាសម្រាប់ឆ្នាំ២០២៥, ឯកឧត្តម Msserer ឯកអគ្គរដ្ឋទូតអាល្លឺម៉ង់ប្រចាំកម្ពុជា, តំណាងស្ថានទូតប្រចាំកម្ពុជា, តំណាងUNDP ប្រចាំកម្ពុជា លោក Juan Carlos Ruan នាយកអង្គភាពគាំទ្រការអនុវត្តអនុសញ្ញាអូតាវ៉ា​ និងអង្គការ ICRC នៅនិវេសនដ្ឋានសហភាពអឺរ៉ុបប្រចាំកម្ពុជានាថ្ងៃទី១៦ ខែតុលា ឆ្នាំ២០២៣នេះ។ឯកឧត្តម ទេសរដ្ឋមន្រ្តី លី ធុជ ក្នុងនាមសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាប្រធានអាជ្ញាធរមីន បានថ្លែងអំណរគុណចំពោះសហភាពអឺរ៉ុប និងអង្គភាព ISU-APMBC ដែលបានជួយគាំទ្រដល់ការធ្វើជាម្ចាស់ផ្ទះនៃសន្និសីទសកលលើកទី៣ ស្តីពីកិច្ចសង្រ្គោះរង​គ្រោះថ្នាក់ដោយសារមីន និងសំណល់ជាតិផ្ទុះពីសង្រ្គាម​ដែលប្រព្រឹត្តឡើងពី​ថ្ងៃទី១៧ដល់១៩តុលា២០២៣នេះ។ឯកឧត្តមបានបញ្ជាក់ផងដែរថា ចំពោះការធ្វើជាម្ចាស់ផ្ទះរបស់កម្ពុជាសម្រាប់សន្និសីទ​ត្រួតពិនិត្យ​ឡើងវិញ​លើកទី៥ ឬកិច្ចប្រជុំកំពូលស្តីពីពិភព​លោក​ដែលគ្មានមីន នៃអនុសញ្ញាអូតាវ៉ា​សម្រាប់​ឆ្នាំ​២០២៤ កម្ពុជាត្រៀមលើកយកនូវរបៀបវរៈ ​និងផែនការសកម្មភាពអាទិភាពចំនួន ៤ មកពិភាក្សា ទី១ ការផ្សព្វផ្សាយ​ជំរុញការ​អនុវត្តអនុសញ្ញាអូតាវ៉ា ​ទី២ជំរុញការងារបោសសម្អាតមីន​ដើម្បី​ឆ្ពោះទៅរកពិភពលោកគ្មានមីន ទី៣ជំរុញភាពជាដៃគូ និងកិច្ចសហប្រតិបត្តិការត្បូង-ត្បូង និងទី៤នោះគឺកិច្ចសង្រ្គោះជនមានពិការភាពដោយសារគ្រប់មីន ​សហគមន៍រងគ្រោះ និងសិទ្ធិជនមានពិការភាព។ជាការគាំទ្រដល់កម្ពុជានៅក្នុងកិច្ចប្រជុំនោះ ​ឯកឧត្តម Msserer ​ ឯកអគ្គរដ្ឋទូតអាល្លឺម៉ង់ប្រចាំកម្ពុជា​បានលើកឡើងអំពីលទ្ធផលការងារសម្រេចបានបញ្ហាប្រឈម​ និងបញ្ហានៅសេសសល់មួយចំនួន ដែលប្រទេសអាល្លឺម៉ង់​បានបំពេញក្នុងក្របខណ្ឌ​អនុសញ្ញា​អូតាវ៉ានិងក្នុងនាមជាប្រធាន​កិច្ចប្រជុំរដ្ឋ​ភាគី​លើកទី២១នៃអនុសញ្ញាអូតាវ៉ា ​ឯកឧត្តមបានស្វាគមន៍ ​និងត្រៀមខ្លួនដើម្បីចូលរួមគាំទ្រ​កម្ពុជាក្នុងនាមជាប្រធាន ​និងធ្វើម្ចាស់ផ្ទះនៃសន្និសីទត្រួតពិនិត្យឡើងវិញលើកទី៥ សម្រាប់​ឆ្នាំ២០២៤។ដោយឡែកឯកឧត្តម អ៊ូអ៊ិណូ អាតស៊ូហ្ស៊ី (UENO Atsushi)វិញក្នុងនាមជាប្រធានជ្រើសតាំង​អនុសញ្ញាអូតាវ៉ាសម្រាប់ឆ្នាំ២០២៥ ​ បានសម្តែងនូវការគាំទ្រកម្ពុជា និងត្រៀមជួយកម្ពុជា ដើម្បី​ទទួលបានជោគជ័យក្នុងការធ្វើជាប្រធាននៃកិច្ចប្រជុំសម្រាប់ឆ្នាំ២០២៤ ហើយប្រទេសជប៉ុន​បានត្រៀមខ្លួចរួចជាស្រេចសម្រាប់ការធ្វើជាប្រធាន ​និងម្ចាស់ផ្ទះនៃកិច្ចប្រជុំរដ្ឋភាគីលើកទី២២ នៃអនុសញ្ញាអូតាវ៉ា។ឯកឧត្តម អាត់ស៊ូហ្ស៊ី Atsushi ក៏បានវាយតម្លៃខ្ពស់ផងដែរចំពោះសមិទ្ធ ផលបោសសម្អាតមីន​នៅ​កម្ពុជា និងកោតសរសើរចំពោះការធ្វើជាម្ចាស់របស់កម្ពុជា ក្នុងសន្និសីទសកលលើកទី៣ ស្តីពីកិច្ច​សង្រ្គោះជនរងគ្រោះថ្នាក់ដោយសារមីន។បន្ថែមពីនេះ ឯកឧត្តមក៏​ស្នើសុំឱ្យអង្គប្រជុំទាំងមូល​យកប្រទេសកម្ពុជាជាគំរូ ពីព្រោះប្រទេសកម្ពុជា​ទទួលបានជោគជ័យគ្រប់បែបយ៉ាងទាំងកិច្ចការនយោបាយការបញ្ចប់សង្រ្គាម ​ការស្វែងរកសន្តិភាព និង កិច្ចការបោសសម្អាតមីនជាដើម៕អត្ថបទ ភារម្យ

ឯកឧត្តម ចាយ បូរិន និងលោកជំទាវ បានបន្តនាំយកអំណោយសម្តេចធិបតី និងលោកជំទាវប្រគេនព្រះសង្ឃចំនួន១២វត្ត នៅមូលដ្ឋានខេត្តកំពង់ធំ

2023/10/16 08:14:43 pm        321
Facebook Telegram Linkin
កំពង់ធំ៖ បន្ទាប់ពីបានអញ្ជើញនាំយកអំណោយដែលជាសទ្ធាជ្រះថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រគេនដល់ព្រះសង្ឃចំនួន១៥ វត្តនៅមូលដ្ឋានខេត្តកំពង់ឆ្នាំង និងខេត្តពោធិ៍សាត់រួចមក នៅព្រឹកថ្ងៃទី១៦ ខែតុលា ឆ្នាំ២០២៣នេះ ឯកឧត្តម ចាយ បូរិន រដ្ឋមន្រ្តីក្រសួងធម្មការ និងសាសនា​និងលោកជំទាវ សូ ភត្រ្តា ព្រមទាំងថ្នាក់ដឹកនាំក្រសួង បានបន្តសហការជាមួយ អាជ្ញាធរខេត្តកំពង់ធំ ព្រះមេគណខេត្ត និងអាជ្ញាធរពាក់ព័ន្ធ អញ្ជើញចុះពិនិត្យមើលស្ថានភាពទូទៅ នៅតាមទីអារាម ក្នុងមូលដ្ឋានខេត្តកំពង់ធំ ក្រោយពេលរដូវបុណ្យភ្ជុំបិណ្ឌរួច តាមអនុសាសន៍ណែនាំដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដើម្បីចូលរួមលើកស្ទួយវិស័យព្រះពុទ្ធសាសនា ដែលជាកេរ្តិ៍តំណែលរបស់ពុទ្ធបរិស័ទគោរពប្រតិបត្តិតរៀងមក ។ឯកឧត្តម រដ្ឋមន្រ្តីក្រសួងធម្មការនិងសាសនា ​បានអញ្ជើញសួរសុខទុក្ខព្រះសង្ឃ ប្រជាពុទ្ធបរិស័ទ និងប្រគេនទេយ្យទាន គ្រឿងឧបភោគបរិភោគ និងបច្ច័យដល់ ​ព្រះសង្ឃគ្រប់ព្រះអង្គ​នៅ​វត្តឥន្រ្ទីយ៍សំវរៈ ហៅវត្តកំពង់ធំ ព្រមទាំងពិនិត្យមើលស្ថានភាពទូទៅនៅតាមទីអារាមក្រោយ​ពិធីបុណ្យភ្ជុំបិណ្ឌ ។ឯកឧត្តម ចាយ បូរិន បានលើកឡើងថា ព្រះពុទ្ធសាសនាបានដើរតួនាទីយ៉ាងសំខាន់​ ក្នុងការអប់រំ និងចូលរួមចំណែកអភិវឌ្ឍន៍​សង្គមជាតិ​ជាមួយរាជរដ្ឋាភិបាលកម្ពុជា ​ជំរុញឱ្យប្រជាពលរដ្ឋ​ប្រកាន់​ភ្ជាប់​នូវសីលធម៌ ​ចរិយាធម៌​ និងគុណធម៌ល្អប្រសើរក្នុងការរស់នៅ។ឯកឧត្តម ចាយ បូរិន បានបញ្ជាក់ថា ​រាជរដ្ឋាភិបាលអាណត្តិទី៧ ក្រោមការដឹកនាំដ៏ឈ្លៀសវៃរបស់ សម្តេចធិបតី ហ៊ុន ម៉ាណែត ដែលបានដឹកនាំបន្ត ពីរាជរដ្ឋាភិបាលអាណត្តិទី៦ ក្រោមការដឹកនាំ​របស់​សម្តេចអគ្គមហាសេនាបតីតេជោ ​ហ៊ុន សែន តែងតែគិតគូរពីសុខទុក្ខ ​ទុក្ខលំបាក ​ការខ្វះខាត ទាំងវិស័យពុទ្ធចក្រ និងអាណាចក្រពិសេសប្រជាជនងាយរងគ្រោះ ដោយមិនប្រកាន់និន្នាការ​នយោបាយ​ ជាតិសាសន៍​ពណ៌ សម្បុរ​អ្វីឡើយ​ ពោលទីណាមានទុក្ខ ទីនោះមានប្រមុខ​រាជរដ្ឋាភិបាល​កម្ពុជា ជាអ្នកដោះស្រាយ ។នៅក្នុងឱកាសប្រកបដោយបីតិសោមនស្សជ្រះថ្លានេះដែរ ឯកឧត្តម ​ចាយ បូរិន និងលោកជំទាវ សូ ភត្រ្តា បានប្រគេននូវទេយ្យទាន គ្រឿងឧបភោគ បរិភោគ រួមមានអង្ករសរុប​ ៥៥០០គីឡូក្រាម មី ២៧៥កេស ​និងបច្ច័យ ដែលជាសទ្ធាជ្រះថ្លារបស់សម្តេចធិបតី ហ៊ុន ម៉ាណែត និងលោកជំទាវ​បណ្ឌិត ពេជ ចន្ទមុន្នី ហ៊ុនម៉ាណែត ដល់វត្តចំនួន១២ ក្នុងមូលដ្ឋានខេត្តកំពង់ធំ ដើម្បីចូលរួមចំណែ​កទ្រទ្រង់វិស័យព្រះពុទ្ធសាសនានៅខេត្តកំពង់ធំ កាន់តែរីកចម្រើនទ្វេរឡើងថែមទៀត៕ អត្ថបទ រដ្ឋា

ប្រទេសអាល្លឺម៉ង់ប្តេជ្ញា «ធ្វើអ្វីគ្រប់យ៉ាង»ដើម្បីការពារប្រជាជនជាតិជ្វីហ្វ

2023/10/16 07:34:24 pm        299
Facebook Telegram Linkin
ប្រទេសអាល្លឺម៉ង់ បាននិយាយថា ខ្លួននឹងប្រើប្រាស់ «គ្រប់មធ្យោបាយផ្លូវច្បាប់» ដើម្បីនិរទេសអ្នកគាំទ្រក្រុមហាម៉ាស ខណៈដែលខ្លួនកំពុងប្រឈមមុខនឹងការកើនឡើងនៃការប្រឆាំងប្រជាជនជ្វីហ្វ ចំពេលមានសង្គ្រាមរបស់អ៊ីស្រាអែលជាមួយក្រុមភេរវកម្ម។រដ្ឋមន្ត្រីមហាផ្ទៃលោកស្រី Nancy Faeser បានថ្លែងប្រាប់ប្រជាជនជ្វីហ្វថា រដ្ឋាភិបាល «នឹងធ្វើអ្វីគ្រប់យ៉ាងដើម្បីការពារអ្នក» បន្ទាប់ពីឧក្រិដ្ឋកម្មស្អប់ខ្ពើមជាច្រើន ត្រូវបានរាយការណ៍នៅទូទាំងប្រទេសអាល្លឺម៉ង់ក្នុងរយៈពេលប៉ុន្មានថ្ងៃថ្មីៗនេះ។ លោកស្រី Faeser បាននិយាយថា លោកស្រី នឹងរួមបញ្ចូលគ្នានូវធនធានរក្សាសណ្តាប់ធ្នាប់ និងចារកម្ម ដើម្បីការពារសហគមន៍ ដែលមានប្រជាជនប្រមាណ ២៧៥.០០០នាក់ ដោយសន្យាថា ទីក្រុងប៊ែរឡាំង ក៏នឹង «ប្រើគ្រប់មធ្យោបាយផ្លូវច្បាប់ ដើម្បីបណ្តេញអ្នកគាំទ្រក្រុមហាម៉ាស ចេញពីប្រទេសនេះ។ការអធិប្បាយរបស់លោកស្រី បានកើតឡើងនៅពេលដែលមានការព្រួយបារម្ភកាន់តែខ្លាំងឡើងអំពីថាតើការសម្រេចចិត្តរបស់ទីក្រុងប៊ែរឡាំងឆ្នាំ២០១៥ ក្នុងការបើកទ្វាររបស់ប្រទេសអាល្លឺម៉ង់ទទួលជនអន្តោប្រវេសន៍ និងជនភៀសខ្លួន ដែលភៀសខ្លួនចេញពីសង្គ្រាមស៊ីវិល នៅក្នុងប្រទេសស៊ីរី និងផ្នែកផ្សេងទៀតនៃមជ្ឈិមបូព៌ាក្នុងកម្រិតខ្ពស់នៃវិបត្តិជនភៀសខ្លួន បច្ចុប្បន្ន កំពុងធ្វើឲ្យខូចគោលការណ៍ណែនាំរបស់ប្រទេសអាល្លឺម៉ង់សម័យទំនើបដែលមិនទទួលយកការធ្វើទុក្ខបុកម្នេញដល់ជនជាតិជ្វីហ្វទៀតទេ។

កូរ៉េខាងត្បូងដាក់គោលដៅលើក្រុមហ៊ុនសាងសង់នាវាមុជទឹករបស់កោះតៃវ៉ាន់ ខណៈបារម្ភពីការសងសឹកសេដ្ឋកិច្ចរបស់ចិន

2023/10/16 07:08:30 pm        159
Facebook Telegram Linkin
ក្រុមអាជ្ញាធរកូរ៉េខាងត្បូង បានលើកឡើងពីហានិភ័យនៃការសងសឹកសេដ្ឋកិច្ចរបស់ចិន នៅពេលដែលពួកគេបានចោទប្រកាន់ក្រុមហ៊ុនបច្ចេកវិទ្យាសមុទ្រ SI Innotec កាលពីឆ្នាំមុន ពីបទបំពានច្បាប់ពាណិជ្ជកម្ម សម្រាប់ការងាររបស់ខ្លួនលើកម្មវិធីនាវាមុជទឹកយោធាថ្មីរបស់កោះតៃវ៉ាន់ នេះបើយោងតាមឯកសាររបស់នគរបាលបានឃើញដោយសារព័ត៌មាន រ៉យទ័រ និងមនុស្សពីរនាក់ដែលដឹងពីបញ្ហានេះ។នៅក្នុងលិខិតបញ្ជាក់មួយ កាលពីថ្ងៃទី១៧ ខែកុម្ភៈ ឆ្នាំ២០២២ ទៅកាន់ចៅក្រម ដែលព្យាយាមចេញដីការចាប់ខ្លួននាយកប្រតិបត្តិក្រុមហ៊ុន SI Innotec លោក ផាក ម៉ាលស៊ីក (Park Mal-sik) នគរបាលបាននិយាយថា ក្រុមអាជ្ញាធរមានការភ័យខ្លាចម្តងទៀតនៃទណ្ឌកម្មដ៏ធំទូលាយ ដែលដាក់ដោយទីក្រុងប៉េកាំងក្នុងឆ្នាំ២០១៦ បន្ទាប់ពីទីក្រុងសេអ៊ូល បានសម្រេចចិត្តដំឡើងកម្មវិធី THAAD ដែលជាប្រព័ន្ធប្រឆាំងមីស៊ីលរបស់សហរដ្ឋអាមេរិក ហើយចិនបានយល់ព្រមដកវិធានការទាំងនោះចេញ កាលពីចុងឆ្នាំ២០១៧។លិខិតបញ្ជាក់នោះបាននិយាយថា និយតករនៃរដ្ឋបាលគ្រប់គ្រងកម្មវិធីការពារជាតិ (DAPA) បានប្រាប់ក្រុមហ៊ុនម៉ៅការបន្ត ដែលមិនស្គាល់អត្តសញ្ញាណថា រដ្ឋាភិបាលមាន «ការព្រួយបារម្ភអំពីការនាំចេញ» ទាក់ទងនឹងកោះតៃវ៉ាន់ ហើយ «ប្រកាន់ជំហរប្រុងប្រយ័ត្នបំផុត» លើការអនុម័តបែបនេះ។នៅក្នុងលិខិតបញ្ជាក់ត្រាបិទនោះបានឲ្យដឹងថា នគរបាលបានលើកឡើងពីប្រតិកម្មដ៏ខឹងសម្បាររបស់ប្រទេសចិន នៅក្នុងរបាយការណ៍របស់សារព័ត៌មាន រ៉យទ័រ ឆ្នាំ២០២១ អំពីក្រុមហ៊ុនម៉ៅការគ្រឿងយុទ្ធោបករណ៍ការពារជាតិ ព្រមទាំងក្រុមអ្នកជំនាញមកពីកូរ៉េខាងត្បូង និងប្រទេសចំនួនប្រាំមួយផ្សេងទៀត ដែលកំពុងធ្វើការលើកម្មវិធីនាវាមុជទឹករបស់តៃវ៉ាន់។ ក្រុមហ៊ុនបច្ចេកវិទ្យា SI Innotec ដែលត្រូវបានពិន័យ កាលពីខែសីហា ឆ្នាំ២០២២ និងលោក ផាក ដែលបានទទួលការផ្អាកការកាត់ទោសជាប់ពន្ធនាគារ បានបដិសេធថាមិនបានប្រព្រឹត្តខុសនោះទេ ព្រមទាំងបានបន្តប្តឹងឧទ្ធរណ៍ផងដែរ៕

អ៊ីរ៉ង់ព្រមានអ៊ីស្រាអែល អំពីកំណើនភាពតានតឹងនៃសង្រ្គាមក្នុងតំបន់ ប្រសិនបើការឈ្លានពានមិនបញ្ឈប់

2023/10/16 07:04:53 pm        197
Facebook Telegram Linkin
ទីភ្នាក់ងារសារព័ត៌មានពាក់កណ្តាលផ្លូវការ Fars បានរាយការណ៍កាលពីថ្ងៃអាទិត្យ (១៥ តុលា) ថា ប្រទេសអ៊ីរ៉ង់ បានព្រមានអ៊ីស្រាអែល ពីកំណើនភាពតានតឹងនៃសង្គ្រាម ប្រសិនបើខ្លួនបរាជ័យក្នុងការបញ្ចប់ការឈ្លានពានប្រឆាំងនឹងប៉ាឡេស្ទីន ដោយរដ្ឋមន្ត្រីការបរទេសរបស់អ៊ីរ៉ង់ គឺលោក Hossein Amirabdollahian បាននិយាយថា ភាគីផ្សេងទៀតនៅក្នុងតំបន់បានត្រៀមខ្លួនរួចជាស្រេចដើម្បីធ្វើសកម្មភាពប្រឆាំងនឹងអ៊ីស្រាអែល។នាយករដ្ឋមន្ត្រីអ៊ីស្រាអែល លោក Benjamin Netanyahu បានប្តេជ្ញាកាលពីថ្ងៃអាទិត្យថា នឹង «"កម្ទេចក្រុមហាម៉ាស ចោល» ខណៈដែលយោធារបស់លោក បានត្រៀមខ្លួនដើម្បីចល័តចូលទៅក្នុងតំបន់ហ្គហ្សា ស្រ្ទីប ក្នុងការស្វែងរកក្រុមសកម្មប្រយុទ្ធអ៊ីស្លាម ដែលការវាយលុកដ៏សាហាវតាមរយៈទីក្រុងព្រំដែនអ៊ីស្រាអែលរបស់ពួកគេ បានធ្វើឱ្យពិភពលោកមានការភ្ញាក់ផ្អើលយ៉ាងខ្លាំង។មេដឹកនាំជាន់ខ្ពស់នៃប្រទេសអ៊ីរ៉ង់ លោក Ayatollah Ali Khamenei បាននិយាយកាលពីថ្ងៃអង្គារថា ទីក្រុងតេអេរ៉ង់ មិនមានជាប់ពាក់ព័ន្ធក្នុងការវាយប្រហាររបស់ក្រុមសកម្មប្រយុទ្ធហាម៉ាស ទៅលើអ៊ីស្រាអែលនោះទេ ប៉ុន្តែបានសាទរចំពោះអ្វីដែលលោកហៅថា ការបរាជ័យផ្នែកយោធា និងស៊ើបការណ៍សម្ងាត់របស់អ៊ីស្រាអែល «ដែលមិនអាចជួសជុលបាន»។អ៊ីស្រាអែល បានចោទប្រកាន់មេដឹកនាំរបស់អ៊ីរ៉ង់ ជាយូរមកហើយថា បានបង្កអំពើហិង្សាដោយការផ្គត់ផ្គង់អាវុធដល់ក្រុមហាម៉ាស។ ទីក្រុងតេអេរ៉ង់ និយាយថា ខ្លួនផ្តល់ការគាំទ្រផ្នែកសីលធម៌ និងហិរញ្ញវត្ថុដល់ក្រុមដែលគ្រប់គ្រងតំបន់ហ្គាហ្សា ស្ទ្រីប ហើយលោក Amiabdollahian ដែលកាលពីសប្តាហ៍មុនបានចោទប្រកាន់អ៊ីស្រាអែលថា បានបង្ក «អំពើប្រល័យពូជសាសន៍» ដោយការអនុវត្តការឡោមព័ទ្ធប្រឆាំងនឹងតំបន់ហ្គាហ្សា ស្ទ្រីប បាននិយាយថា ការវាយប្រហារលើហ្គាហ្សានឹង «បើករណសិរ្សថ្មីនៃការតស៊ូ» នៅមជ្ឈិមបូព៌ាផងដែរ៕

ហ្វីលីពីន រិះគន់ប្រទេសចិនចំពោះសកម្មភាព «គ្រោះថ្នាក់ និងវាយលុក» នៅសមុទ្រចិនខាងត្បូង

2023/10/16 06:49:17 pm        201
Facebook Telegram Linkin
យោធាប្រទេសហ្វីលីពីន បានអំពាវនាវឱ្យប្រទេសចិនបញ្ឈប់សកម្មភាពដ៏គ្រោះថ្នាក់នៅសមុទ្រចិនខាងត្បូង បន្ទាប់ពីនាវាកងទ័ពជើងទឹកចិនបានផ្លាស់ទីបន្តិចម្តង និងព្យាយាមកាត់ផ្តាច់នាវាកងទ័ពជើងទឹកហ្វីលីពីនដែលកំពុងបំពេញបេសកកម្មផ្គត់ផ្គង់ឡើងវិញកាលពីចុងសប្តាហ៍កន្លងទៅនេះ។ យោងតាមមេបញ្ជាការកងកម្លាំងប្រដាប់អាវុធ លោក Romeo Brawner បានឲ្យដឹងថានាវាកងទ័ពជើងទឹករំដោះប្រជាជនចិន (PLAN) បានចូលមកជិតក្នុងចម្ងាយ ៣៥០យ៉ាត ខណៈនាវាព្យាយាមឆ្លងកាត់ពីមុខនាវាហ្វីលីពីន នៅជិតកោះ Thitu ជាប៉ុស្តិ៍ជួរមុខសំខាន់ជាយុទ្ធសាស្ត្រ និងធំបំផុត របស់ទីក្រុងម៉ានីល នៅសមុទ្រចិនខាងត្បូង ។លោក Brawner បាននិយាយនៅក្នុងសេចក្តីថ្លែងការណ៍ កាលពីថ្ងៃអាទិត្យថា សមយុទ្ធដ៏គ្រោះថ្នាក់ និងការវាយលុកទាំងនេះដោយផែនការរបស់ប្រទេសចិនមិនត្រឹមតែជាការប៉ះទង្គិចដ៏គ្រោះថ្នាក់ប៉ុណ្ណោះទេ ប៉ុន្តែថែមទាំងបង្កគ្រោះថ្នាក់ដោយផ្ទាល់ដល់អាយុជីវិតរបស់បុគ្គលិកដែនសមុទ្រពីភាគីទាំងសងខាងផងដែរ។ ស្ថានទូតចិននៅទីក្រុងម៉ានីល មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេនៅថ្ងៃចន្ទនេះ។ វាគឺជាការប៉ុនប៉ងចុងក្រោយរបស់ប្រទេសចិន ដើម្បីតាមដាន និងរារាំងបេសកកម្មផ្គត់ផ្គង់របស់ហ្វីលីពីនឡើងវិញទៅដល់បុគ្គលិកនៅក្នុងលក្ខណៈពិសេសដែលគ្រប់គ្រងដោយទីក្រុងម៉ានីល នៅក្នុងតំបន់សេដ្ឋកិច្ចផ្តាច់មុខរបស់ហ្វីលីពីននៅសមុទ្រចិនខាងត្បូង។ទំនាក់ទំនងរវាងទីក្រុងម៉ានីល និងទីក្រុងប៉េកាំង បានធ្លាក់ចុះចាប់តាំងពីប្រធានាធិបតីហ្វីលីពីន លោក Ferdinand Marcos បានបន្តទំនាក់ទំនងកាន់តែជិតស្និទ្ធជាមួយទីក្រុងវ៉ាស៊ីនតោន រួមទាំងការបង្កើនសិទ្ធិចូលទៅកាន់មូលដ្ឋានយោធាហ្វីលីពីនបន្ថែមទៀត។

ច្បាប់ស្តីពីការបង្កើតរដ្ឋលេខាធិការដ្ឋានអាកាសចរណ៍ស៊ីវិល នឹងជួយបំពេញកង្វះចន្លោះ នៃទេសចរណ៍នៅកម្ពុជា

2023/10/16 05:03:43 pm        161
Facebook Telegram Linkin
ភ្នំពេញ៖ ព្រឹទ្ធសភាជាតិ នៃព្រះរាជាណាចក្រកម្ពុជា បានបង្ហាញការរំពឹងយ៉ាងមុតមាំថា សេចក្តី​ព្រាង​ច្បាប់ស្តីពីការបង្កើតរដ្ឋលេខាធិការដ្ឋានអាកាសចរណ៍ស៊ីវិល នឹងជួយ​បំពេញ​នូវ​ចំណុច​ខ្វះ​ចន្លោះ​ផ្នែក​ទេសចរណ៍ នៅក្នុងប្រទេសកម្ពុជា ដែលបានរក​ឃើញ​ដោយ​អង្គការ​អាកាសចរណ៍​ស៊ីវិល​អន្តរជាតិ ។បន្ទាប់ពីកិច្ចប្រជុំ នៃគណៈកម្មាធិការអចិន្ត្រៃយ៍ព្រឹទ្ធសភា ក្រោមអធិបភាពសម្ដេចវិបុលសេនាភក្តី សាយ ឈុំ ប្រធានព្រឹទ្ធភាជាតិ នៅថ្ងៃទី១៦ ខែតុលា ឆ្នាំ២០២៣ ឯកឧត្តម ម៉ម ប៊ុននាង អ្នក​នាំ​ពាក្យ​ព្រឹទ្ធសភា មានប្រសាសន៍ថា វិស័យអាកាសចរណ៍ស៊ីវិល បានដើរតួនាទីយ៉ាងសំខាន់ ក្នុង​ការ​អនុវត្ត​សង្គមសេដ្ឋកិច្ចជាតិ តាមរយៈការបង្កើនការងារដោយផ្ទាល់ និងដោយប្រយោល ការ​គាំទ្រ និងជំរុញវិស័យទេសចរណ៍ពាណិជ្ជកម្ម ការទាក់ទាញ និងជំរុញ​ដល់​ការ​វិនិយោគ​ផ្ទាល់​ពី​បរទេស​ និងធុរកិច្ចក្នុងស្រុកប្រកបដោយទំនុកចិត្ត និងមានលក្ខណៈសេដ្ឋកិច្ចផងដែរ ។ឯកឧត្តមបានបន្តថា តាមរយៈសេចក្តីព្រាងច្បាប់នេះ នឹង​បង្កើត​ឲ្យ​មាន​ស្ថាប័ន​អាកាសចរណ៍​ស៊ីវិល​មួយ​ មានលក្ខណៈអចិន្ត្រៃយ៍ ដែលមានរចនាសម្ព័ន្ធ និងសមត្ថកិច្ច​ពេញ​លេញ​ក្នុង​ការ​លើក​កម្ពស់​ និងធានាដល់ដំណើរការគ្រប់គ្រងចាត់ចែង និងអភិវឌ្ឍន៍វិស័យអាកាសចរណ៍ស៊ីវិល នៃ​ប្រទេស​កម្ពុជាស្របតាមស្ថានភាពជាក់ស្ដែង នាពេលបច្ចុប្បន្ន ។ឯកឧត្តម ម៉ម ប៊ុននាង បានបន្ថែមថា ជាពិសេសទៀតនេះ សេចក្តីព្រាងច្បាប់ស្តីពី ការ​បង្កើត​រដ្ឋ​លេខាធិការដ្ឋានអាកាសចរណ៍ស៊ីវិល ឆ្លើយតបទៅនឹងតម្រូវការ និងចំណុចខ្វះចន្លោះ ដែល​បាន​តម្រូវ ​និងរកឃើញដោយអង្គការអាកាសចរណ៍ស៊ីវិលអន្តរជាតិ ។អ្នកនាំពាក្យព្រឹទ្ធសភា បានបញ្ជាក់ថា បន្ទាប់ពីបានស្ដាប់របាយការណ៍ របស់គណៈកម្មការទី៩ ព្រឹទ្ធសភា និងបានពិនិត្យពិភាក្សាលើសេចក្តីព្រាងច្បាប់ខាងលើយ៉ាងល្អិតល្អន់ គណៈ​កម្មាធិការ​អចិន្ត្រៃយ៍​ព្រឹទ្ធ​សភាយល់ឃើញថា សេចក្តីព្រាងច្បាប់នេះ មានលក្ខណៈត្រឹមត្រូវ តាមទម្រង់ច្បាប់ និង​គតិច្បាប់ និងសម្រេចដាក់នូវសេចក្តីព្រាងនេះ ចូលក្នុងរបៀបវារៈសម័យប្រជុំលើកទី១១ ព្រឹទ្ធ​សភា​នីតិកាល​ទី៤ ហើយត្រូវព្រឹទ្ធសភាជាតិ នឹងធ្វើការពិនិត្យ ហើយឲ្យយោបល់នៅថ្ងៃទី១៧ ខែតុលា ឆ្នាំ២០២៣ស្អែកនេះ ៕ អត្ថបទ បាន សុខរិទ្ធិ

ច្រកព្រំដែនតំបន់ហ្គាហ្សា គ្រោងនឹងបើកឡើងវិញ ខណៈទាហានអ៊ីស្រាអែល រៀបចំការវាយលុកតាមដីគោក

2023/10/16 03:44:19 pm        185
Facebook Telegram Linkin
អ៊ីស្រាអែល៖ ច្រកព្រំដែនឆ្លងកាត់ ដែលគ្រប់គ្រងដោយប្រទេសអេហ្ស៊ីប ទៅកាន់តំបន់ហ្គាហ្សា ត្រូវបានគេរំពឹងថានឹងបើកឡើងវិញ ស្របពេលមានកិច្ចខិតខំប្រឹងប្រែងការទូត ដើម្បីទទួលបានជំនួយចូលទៅក្នុងតំបន់គ្រប់គ្រងដោយក្រុមហាម៉ាស ដែលស្ថិតនៅក្រោមការទម្លាក់គ្រាប់បែកយ៉ាងខ្លាំងក្លារបស់អ៊ីស្រាអែល ចាប់តាំងពីការផ្ទុះឡើងនៃជម្លោះរវាងរបស់ក្រុមហាម៉ាស ដែលបានសម្លាប់ពលរដ្ឋអ៊ីស្រាអែលជាង ១.៣០០នាក់ កាលពីថ្ងៃទី៧ ខែតុលា។ដោយមានការតក់ស្លុតពីការវាយលុកលើបណ្ដាទីក្រុង និងភូមិនានាពីក្រុមហាម៉ាស អ៊ីស្រាអែលកំពុងធ្វើការទម្លាក់គ្រាប់បែកយ៉ាងខ្លាំងក្លាបំផុតមិនធ្លាប់មានពីមុនមកលើតំបន់ហ្គាហ្សា ហើយបានដាក់ការបិទផ្លូវយ៉ាងតឹងរ៉ឹង និងកំពុងរៀបចំការវាយលុកតាមដីគោកផងដែរ។ជំនួយរាប់រយតោនពីបណ្ដាប្រទេសជាច្រើន ត្រូវបានជាប់គាំងនៅឧបទ្វីបស៊ីណៃ របស់ប្រទេសអេហ្ស៊ីបអស់រយៈពេលជាច្រើនថ្ងៃ ដោយរង់ចាំកិច្ចព្រមព្រៀងសម្រាប់ការចែកចាយជំនួយប្រកបដោយសុវត្ថិភាពរបស់ខ្លួនទៅកាន់តំបន់ហ្គាហ្សា និងការជម្លៀសអ្នកកាន់លិខិតឆ្លងដែនបរទេសមួយចំនួនតាមរយៈច្រកព្រំដែនរ៉ាហ្វាស (Rafah)។សារព័ត៌មាន NBC បានរាយការណ៍ដោយដកស្រង់សម្តីមន្ត្រីប៉ាឡេស្ទីនម្នាក់ថា ច្រកព្រំដែនរ៉ាហ្វាស នឹងបើកនៅម៉ោង ៩ព្រឹក (ម៉ោងក្នុងស្រុក) នៅថ្ងៃចន្ទ (១៦ តុលា) នេះ ហើយសារព័ត៌មាន ABC បានរាយការណ៍ដោយដកស្រង់ប្រភពសន្តិសុខថា ច្រកឆ្លងកាត់នោះ នឹងបើកត្រឹមតែរយៈពេលប៉ុន្មានម៉ោងប៉ុណ្ណោះនៅថ្ងៃចន្ទនេះ ដោយមិនបានផ្តល់ព័ត៌មានលម្អិតឡើយ។អ៊ីស្រាអែល បានជំរុញឱ្យពលរដ្ឋតំបន់ហ្គាហ្សា ដែលកំពុងរងផលប៉ះពាល់ ឱ្យជម្លៀសខ្លួនចេញតាមភាគខាងត្បូង ដែលមនុស្សរាប់សែននាក់បានជម្លៀសខ្លួនរួចមកហើយនៅក្នុងតំបន់ហ៊ុមព័ទ្ធ ដែលជាផ្ទះរបស់មនុស្សជាង ២លាននាក់នោះ។ ក្រុមហាម៉ាស ដែលគ្រប់គ្រងតំបន់ហ្គាហ្សា បានប្រាប់ប្រជាជនឱ្យព្រងើយកន្តើយនឹងសារព្រមានជម្លៀសរបស់អ៊ីស្រាអែលមួយនោះផងដែរ៕

សហរដ្ឋអាមេរិក និងអ៊ីស្រាអែល ពិភាក្សាអំពីលទ្ធភាពនៃដំណើរទស្សនកិច្ចរបស់លោក បៃដិន

2023/10/16 03:20:31 pm        210
Facebook Telegram Linkin
អាមេរិក៖ ក្រុមមន្ត្រីសហរដ្ឋអាមេរិក និងអ៊ីស្រាអែល កំពុងពិភាក្សាគ្នាអំពីលទ្ធភាពនៃដំណើរទស្សនកិច្ចទៅកាន់ប្រទេសអ៊ីស្រាអែល ក្នុងពេលឆាប់ៗនេះ ដោយប្រធានាធិបតីសហរដ្ឋអាមេរិក លោក ចូ បៃដិន តាមការអញ្ជើញរបស់នាយករដ្ឋមន្ត្រីអ៊ីស្រាអែល លោក Benjamin Netanyahu នេះបើយោងតាមប្រភពដែលដឹងអំពីបញ្ហានេះបាននិយាយកាលពីថ្ងៃអាទិត្យ (១៥ តុលា)។ដំណើរទស្សនកិច្ចរបស់លោក បៃដិន ដើម្បីបង្ហាញការគាំទ្រដល់សម្ព័ន្ធមិត្តដ៏ធំបំផុតរបស់សហរដ្ឋអាមេរិកនៅមជ្ឈិមបូព៌ា នឹងធ្វើតាមដំណើរទស្សនកិច្ចស្រដៀងគ្នានេះ ដោយរដ្ឋមន្ត្រីការបរទេសសហរដ្ឋអាមេរិក លោក Antony Blinken ដែលបច្ចុប្បន្នកំពុងស្ថិតនៅក្នុងតំបន់មួយនេះ។ប្រភពដែលនិយាយក្នុងលក្ខខណ្ឌមិនបញ្ចេញឈ្មោះ បានបញ្ជាក់ពីរបាយការណ៍របស់សារព័ត៌មានអ៊ីស្រាអែលជាច្រើន ដែលលោក Netanyahu បានអញ្ជើញលោក បៃដិន ទៅកាន់ប្រទេសខ្លួនក្នុងអំឡុងពេលការហៅទូរសព្ទថ្មីៗអំពីការឆ្លើយតបចំពោះការវាយប្រហារលើអ៊ីស្រាអែល ដោយក្រុមសកម្មប្រយុទ្ធហាម៉ាស។សេតវិមានបានបដិសេធមិនធ្វើអត្ថាធិប្បាយជុំវិញបញ្ហានេះនោះទេ។ អ្នកនាំពាក្យក្រុមប្រឹក្សាសន្តិសុខជាតិអាមេរិក លោក Adrienne Watson បាននិយាយថា «យើងមិនមានការធ្វើដំណើរទស្សនកិច្ចថ្មីដើម្បីប្រកាសនោះទេ»៕

សម្តេចធិបតី ហ៊ុន ម៉ាណែត និងលោកជំទាវដឹកនាំគណៈប្រតិភូចូលរួមវេទិកាខ្សែក្រវាត់ និងផ្លូវលើកទី៣សម្រាប់កិច្ចសហប្រតិបត្តិការអន្តរជាតិនៅចិន

2023/10/16 03:04:43 pm        273
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានដឹកនាំគណៈប្រតិភូរាជរដ្ឋាភិបាលកម្ពុជា អញ្ជើញចូលរួមវេទិកាខ្សែក្រវាត់ និងផ្លូវលើកទី៣ សម្រាប់កិច្ចសហប្រតិបត្តិការអន្តរជាតិ នៅព្រឹកថ្ងៃទី ១៦ ខែតុលា ឆ្នាំ ២០២៣នេះ។សេចក្ដីប្រកាសព័ត៌មានរបស់ក្រសួងការបរទេសបានឲ្យដឹងថា តបតាមការអញ្ជើញរបស់លោកស៊ី ជីនពីង ប្រធានាធិបតីចិន សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នឹងអញ្ជើញដឹកនាំគណៈប្រតិភូជាន់ខ្ពស់ ចូលរួមវេទិកាខ្សែក្រវាត់ និងផ្លូវលើកទី ៣ សម្រាប់កិច្ចសហប្រតិបត្តិការអន្តរជាតិ ដែលនឹងប្រព្រឹត្តពីថ្ងៃទី ១៧ ដល់ថ្ងៃទី ១៨ ខែតុលាឆ្នាំ ២០២៣ នៅរដ្ឋធានីប៉េកាំង។ មូលបទ នៃកិច្ចប្រជុំនេះ គឺ «កិច្ចសហប្រតិបត្តិការខ្សែក្រវាត់និងផ្លូវ ប្រកបដោយគុណភាពខ្ពស់៖ រួមគ្នាដើម្បីការ អភិវឌ្ឍ និងវិបុលភាពរួម»។

បណ្ដាញសង្គម

ព័ត៌មានថ្មីៗ

ប្រធានក្រុមការងារចុះមូលសង្កាត់ដង្កោ ជំរុញដល់អាជ្ញាធរមូលដ្ឋាន ផ្ដល់​សេវា​ឱ្យ​បាន​ល្អ​ដល់​ប្រជាពលរដ្ឋ
08/16/2026 04:08 PM
Facebook Telegram Linkin
ប្រជានេសាទអេក្វាឌ័រ ប្រឈមគ្រោះថ្នាក់២ គឺក្រុមជួយដូរគ្រឿងញៀន និងការវាយប្រហាររបស់អាមេរិក
08/16/2026 04:08 PM
Facebook Telegram Linkin
បញ្ជូនជនជាតិចិន ៤នាក់ទៅសាលាដំបូងខេត្តព្រះសីហនុ ពាក់ព័ន្ធករណី ONLINE SCAMS
08/16/2026 04:08 PM
Facebook Telegram Linkin
ចំនួនមនុស្សស្លាប់សរុបដោយសារគ្រោះមហន្តរាយលិចនាវាចម្លងនៅហ្ស៊ីមបាវ៉េ កើនឡើងដល់ ៧២នាក់
08/16/2026 04:08 PM
Facebook Telegram Linkin
យន្តហោះចម្បាំងរបស់អង្គការណាតូបាញ់ទម្លាក់យានដ្រូនដែលរំលោភលើដែនអាកាសរបស់ប្រទេសរ៉ូម៉ានី
08/16/2026 04:08 PM
Facebook Telegram Linkin
កាតាច្រានចោលការអះអាងរបស់ទីក្រុងតេអេរ៉ង់ថា ពួកគេបានឃាត់ខ្លួនអ្នកបើកបរយន្តហោះទម្លាក់គ្រាប់បែកអ៊ីរ៉ង់
08/16/2026 04:08 PM
Facebook Telegram Linkin
មេដឹកនាំក្រុមហាម៉ាស ធ្វើដំណើរទៅកាន់ទីក្រុងគែ ប្រទេសអេហ្ស៊ីប សម្រាប់កិច្ចប្រជុំស្តីពីតំបន់ហ្កាហ្សា
08/16/2026 03:08 PM
Facebook Telegram Linkin
សម្ដេចតេជោ ហ៊ុន សែន សរសើរ​លោកស្រី កឹម មនោវិទ្យា ថាពិតជាធនធានដ៏ល្អសម្រាប់ជាតិ
08/16/2026 03:08 PM
Facebook Telegram Linkin
នាយករដ្ឋមន្រ្តីជប៉ុន សន្យាមិនឲ្យកើតមានម្តងទៀតជាដាច់ខាតសោកនាដកម្មសង្រ្គាម
08/16/2026 02:08 PM
Facebook Telegram Linkin
ប្រជាពលរដ្ឋមានបញ្ហាជំងឺភ្នែកមកពីខេត្តកំពង់ធំ ទទួលបានការពិនិត្យ និងព្យាបាលឥតគិតថ្លៃ នៅមន្ទីរពេទ្យរុស្ស៉ី
08/16/2026 02:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.