នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម
សម្ដេចតេជោ អំពាវនាវដល់រាជរដ្ឋាភិបាលយកចិត្តទុកដាក់សាងសង់កន្លែងស្នាក់នៅសម្រាប់សិស្សជាស្ត្រី

នយោបាយ​ និង ការអភិវឌ្ឍន៍

កម្ពុជា-ព្រុយណេឯកភាពបង្កើនកិច្ចសហប្រតិបត្តិការទប់ស្កាត់ឧក្រិដ្ឋកម្មឆ្លងដែន និងផ្សារភ្ជាប់វិស័យឯកជន

2023/09/06 10:33:03 pm        161
Facebook Telegram Linkin
ភ្នំពេញ៖ សម្តេចធិបតី និងព្រះចៅ ស៊ុលតង់ បានឯកភាព ក្នុងការបង្កើនកិច្ចសហប្រតិបត្តិការ​លើការ​ទប់ស្កាត់ឧក្រិដ្ឋកម្មឆ្លងដែន, ការផ្សារភ្ជាប់វិស័យឯកជន តាមរយៈសភាពាណិជ្ជកម្ម, និងការគាំទ្រ​អនុវត្តយន្តការសន្ទនាទ្វេភាគីរវាងរដ្ឋមន្រ្តីការបរទេសនៃប្រទេសទាំងពីរ។ ប្រទេសទាំងពីរបានប្រកាសឯកភាពគ្នាបែបនេះ ក្នុងជំនួបសម្ដែងការគួរសមរវាង​សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានជួបសម្តែងការគួរសមជាមួយ ព្រះចៅស៊ុលតង់ ហាជី ហាសសាណាល់ ​បុលគីយ៉ាស់ មុយអ៊ីហ្សាឌីន វ៉ាឌូឡាហ៍ (His Majesty Sultan Haji Hassanal Bolkiah Mu’izzadin Waddaulah) ព្រះមហាក្សត្រនៃព្រុយណេដារូស្សាឡាម ថ្ងៃទី៦ ខែកញ្ញា ឆ្នាំ២០២៣ នៅទីក្រុងហ្សាការតា នៃសាធារណរដ្ឋឥណ្ឌូណេស៊ី។ ជាកិច្ចចាប់ផ្តើមនៃជំនួបនេះ សម្តេចធិបតី បានបង្ហាញនូវការស្វាគមន៍ចំពោះជំនួបនេះ និង​បានពាំនាំ​ការសួរសុខទុក្ខយ៉ាងកក់ក្តៅពីសំណាក់សម្តេចតេជោ ប្រធានឧត្តមក្រុមប្រឹក្សាផ្ទាល់​ព្រះមហាក្សត្រថ្វាយ​ជូនចំពោះព្រះចៅស៊ុលតង់ផងដែរ។ សម្តេចធិបតី បានលើកឡើងអំពីទំនាក់ទំនងដ៏ល្អរវាងកម្ពុជា និងព្រុយណេ ជាពិសេស ក្នុងទិដ្ឋភាព​នៃវិស័យការពារជាតិ ដែលសម្តេចធិបតី ​បានធ្វើទស្សនកិច្ចមកកាន់ព្រុយណេ កាលពីសម្តេចធិបតី នៅជាមេបញ្ជាការកងទ័ពជើងគោក។ ជាកិច្ចឆ្លើយតប, ព្រះចៅស៊ុលតង់ សម្តែងនូវអំណរគុណយ៉ាងជ្រាលជ្រៅជូនចំពោះ ​សម្តេចធិបតី និងបានរំលឹកអំពីមិត្តភាពដ៏​ជិតស្និទ្ធរវាង ព្រះចៅស៊ុលតង់ ​និង​សម្តេចតេជោ ប្រធាន​ឧត្តមក្រុមប្រឹក្សាផ្ទាល់ព្រះមហាក្សត្រ ។ នៅក្នុងជំនួបនេះ, សម្តេចធិបតី ​និងព្រះចៅស៊ុលតង់ បានពិភាក្សាទៅលើទិសដៅអនាគត​នៃការបង្កើន​កិច្ចសហប្រតិបត្តិការរវាងកម្ពុជា និងព្រុយណេដែលផ្តោតជាពិសេសទៅ​លើ​វិស័យការពារជាតិ, សន្តិសុខ, អប់រំ និង ​បណ្តុះបណ្តាលធនធានមនុស្ស, កសិកម្មក៏ដូចជាការផ្សារ​ភ្ជាប់ទំនាក់ទំនងរវាងប្រជាជន និងប្រជាជន នៃប្រទេសទាំងពីរ។ ជាកិច្ចបញ្ចប់, ព្រះចៅស៊ុលតង់ ​បានអញ្ជើញ ​សម្តេចធិបតី​ មកបំពេញទស្សនកិច្ចផ្លូវការ​នៅព្រុយណេ ​នាពេលខាងមុខនេះ ​។ ​សម្តេចធិបតី បានឆ្លើយតបដោយវិជ្ជមាន​ចំពោះការ​អញ្ជើញ​នេះ និងបានអញ្ជើញព្រះចៅស៊ុលតង់ ​មកបំពេញទស្សនកិច្ចផ្លូវការនៅកម្ពុជាវិញផងដែរ នាថ្ងៃ​អនាគត ៕

វគ្គបណ្ដុះបណ្ដាលស្ដីពីការជំរុញ និងពន្លឿនស្ថានភាពបញ្ចប់ការបន្ទោបង់ពាសវាលពាសកាល

2023/09/06 09:27:26 pm        66
Facebook Telegram Linkin
នៅព្រឹកថ្ងៃទី០៦ ខែកញ្ញា ឆ្នាំ២០២៣នេះ មន្ទីរអភិវឌ្ឍន៍ជនបទខេត្តព្រះវិហារ បានរៀបចំវគ្គ បណ្ដុះបណ្ដាលស្ដីពី ការជំរុញ និងពន្លឿនស្ថានភាពបញ្ចប់ការបន្ទោបង់ពាសវាលពាសកាល រយៈ ពេល៣ថ្ងៃ ចាប់ពីថ្ងៃទី០៦ ដល់ថ្ងៃទី០៨ ខែកញ្ញា ឆ្នាំ២០២៣ នៅសាលប្រជុំភោជនីយដ្ឋានលីហួត ស្ថិតនៅក្នុងក្រុងព្រះវិហារ ក្រោមវត្តមានលោក អ៊ុក គឹមសាន្ត អភិបាលរងខេត្ត និងមានការ អញ្ជើញចូលរួមពីសំណាក់ លោក លោកស្រី អភិបាលក្រុង/ស្រុកទាំង៨ មន្ទីរ-អង្គភាពពាក់ព័ន្ធ និង អង្គការដៃគូរជាច្រើនរូប។យោងតាមរបាយការណ៍របស់លោកស្រី ឆាយ សុវណ្ណា អនុប្រធានមន្ទីរអភិវឌ្ឍន៍ជនបទខេត្តព្រះវិហារ បានឲ្យដឹងថា គិតត្រឹមខែសីហារ ឆ្នាំ២០២៣នេះ អត្រាគ្របដណ្ដប់អនាម័យទូទាំងខេត្តស្មើ និង៦៨% ក្នុងនោះភូមិនិងឃុំ ដែលបញ្ចប់ការបន្ទោបង់ពាសវាលពាសកាល មាន៤៦ភូមិ ក្នុង២៣២ ភូមិ និងឃុំមាន ៤ឃុំ ក្នុងចំណោម៥១ឃុំសង្កាត់ទូទាំងខេត្តព្រះវិហារ។ ក្នុងនោះស្រុកជ័យ សែនមានអត្រាគ្របដណ្ដប់អនាម័យ ស្មើនិង៧៦% ស្រុកឆែប៦៨% ស្រុកជាំក្សាន្ត៧០% ស្រុកគូលែន៦៧% ស្រុករវៀង៦៨% ស្រុកសង្គមថ្មី៥៣% ស្រុកត្បែងមានជ័យ៧៤% និងក្រុង ព្រះវិហារ៨០%។ ដោយផ្អែកលើទិន្ន័យនេះទូទាំងខេត្តព្រះវិហារភាគរយនៃខ្នងផ្ទះ ដែលគ្មានបង្គន់ អនាម័យប្រើប្រាស់៣២%។នាឱកាសនោះ លោក អ៊ុក គឹមសាន្ត បានថ្លែងអំណរគុណទៅដល់អង្គការ UNICEF ដែលបាន​សហការ​ជាមួយមន្ទីរអភិវឌ្ឍន៍ជនបទខេត្ត ក៏ដូចជាមន្ទីរពាក់ព័ន្ធមួយចំនួន រួមជា មួយអាជ្ញាធរដែនដី​គ្រប់លំដាប់ថ្នាក់ ដែលបានបើកវគ្គបណ្ដុះបណ្ដាលស្ដីពីការពន្លឿនស្ថានភាព​បញ្ចប់ ការបន្ទោបង់​ពាសវាលពាសកាលនាថ្ងៃនេះ។ លោកក៏បានផ្ដល់ក្ដីសង្ឃឹមថា វគ្គបណ្ដុះបណ្ដាលនាថ្ងៃ នេះ គឺជាធាតុចូលដ៏សំខាន់ក្នុងការផ្ដល់នូវ​បទពិសោធន៍ ​និងចំណេះដឹងល្អៗ ក៏ដូចជាគន្លឹះសំខាន់ៗ ទៅដល់សិក្ខាកាមទាំងអស់ដែលបាន​ចូលរៀននៅក្នុងវគ្គនេះ។ លោកក៏បានជម្រុញទៅដល់សិក្ខាកាម ទាំងអស់ត្រូវយកចិត្តទុកដាក់​ខ្ពស់​ក្នុងការស្ដាប់ និងតាមដាននូវការពន្យល់របស់គ្រូឧទ្ទេស​ ដែលមាន បទពិសោធន៍ក្នុងការងារ​ជំរុញ​បំផុសប្រជាពលរដ្ឋលើការសាងសង់ និងប្រើប្រាស់បង្គន់អនាម័យ។ លោកសង្ឃឹមថា លោក លោកស្រី ដែលជាសិក្ខាកាមទាំងអស់ និងយកចំណេះដឹងពីវគ្គបណ្ដុះ បណ្ដាល​នា​ថ្ងៃនេះទៅដឹកនាំបំផុស និងផ្សព្វផ្សាយដល់ប្រជាពលរដ្ឋនៅតាមមូលដ្ឋាន​ដើម្បី​ឲ្យពួកគាត់ ចូលរួមអនុវត្តន៍លើ​ការសាងសង់ និងប្រើប្រាស់បង្គន់អនាម័យ​នៅតាមមូលដ្ឋាន​របស់​ពួកគាត់ ដើម្បីឲ្យខេត្តយើងក្លាយទៅជាខេត្តទទួលបាន​ ការបញ្ចប់ការបន្ទោបង់ពាសវាលពាស​កាលក្នុងឆ្នាំ២០២៥ ​ខាងមុខឆាប់ៗនេះ៕ 

សម្តេចធិបតី ហ៊ុន ម៉ាណែត៖ គំនិតផ្តួចផ្តើមខ្សែក្រវាត់ និងផ្លូវផ្តល់ផលប្រយោជន៍ច្រើនដល់កម្ពុជា

2023/09/06 09:06:17 pm        405
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា គំនិតផ្តួចផ្តើមខ្សែក្រវាត់ និងផ្លូវ (BRI) បានផ្ដល់ផលប្រយោជន៍ជាច្រើនដល់កម្ពុជា ជាពិសេសក្នុងវិស័យដឹកជញ្ជូន និងឡូជីស្ទីក ដូចមានផ្លូវលឿនភ្នំពេញ-ព្រះសីហនុ ដែលជាសមិទ្ធផលនៃគំនិតផ្តួចផ្តើមនេះ ជាឧទាហរណ៍ស្រាប់។ការលើកឡើងរបស់សម្តេចធិបតី ហ៊ុន ម៉ាណែត គឺបានធ្វើឡើងនៅក្នុងប្រជុំអាស៊ាន-ចិន លើកទី២៦ នៅទីក្រុងហ្សាការតា នៃសាធារណរដ្ឋឥណ្ឌូនេស៊ី នាថ្ងៃទី៦ ខែកញ្ញា ឆ្នាំ២០២៣នេះ ដោយមានការ​ចូលរួមពីឯកឧត្តម លី ឈាង នាយករដ្ឋមន្ត្រី នៃសាធារណរដ្ឋប្រជាមានិតចិន ប្រមុខរដ្ឋ និងប្រមុខរាជរដ្ឋាភិបាល នៃប្រទេសក្នុងតំបន់អាស៊ានទាំង១១ប្រទេស។សម្ដេចធិបតី បានបញ្ជាក់ថា កម្ពុជាទទួលស្គាល់ផលប្រយោជន៍រួម ​នៃទំនាក់ទំនងល្អ ក្នុងអំឡុង​ពេលជិត៣​ទស្សវត្សរ៍​រវាងចិន និងអាស៊ាន។ ចំពោះប្រទេសកម្ពុជា, ​គំនិតផ្តួចផ្តើមខ្សែក្រវាត់​ និងផ្លូវ (BRI) បានផ្ដល់ប្រយោជន៍ជាច្រើនដល់កម្ពុជា ​ជាពិសេសក្នុងវិស័យដឹកជញ្ជូន​ និងឡូជីស្ទីក ដូចមានផ្លូវលឿន ភ្នំពេញ-ព្រះសីហនុ ដែលជាសមិទ្ធផលនៃគំនិតផ្តួចផ្តើមនេះ ជា​ឧទាហរណ៍ស្រាប់។សម្ដេចធិបតី បានកត់សម្គាល់អំពីសារៈសំខាន់​នៃវិស័យទេសចរណ៍​ ដែលជាក្បាលម៉ាស៊ីន​ដ៏សំខាន់នៃកំណើនសេដ្ឋកិច្ច ​នៅមានកម្រិតទាបនៅឡើយ បើធៀបនឹងកម្រិតមុនពេលមាន​វិបត្តិកូវីដ-១៩។ ក្នុងន័យនេះ,សម្ដេចធិបតី បានសង្កត់ធ្ងន់​ពី​ភាពចាំបាច់ដែលអាស៊ាន​ត្រូវជំរុញ​ការអនុវត្តប្រកបដោយប្រសិទ្ធភាព ​នៃសេចក្ដីថ្លែងការណ៍អាស៊ាន- ចិន ស្ដីពីកិច្ច​សហប្រតិបត្តិការទេសចរណ៍។ សម្ដេចធិបតី ក៏បានបញ្ជាក់ជូនកិច្ចប្រជុំកំពូលអាស៊ាន-ចិន អំពីដំណើរទស្សនកិច្ចរបស់សម្ដេចធិបតី ទៅកាន់ទីក្រុងណាននីង ​ដើម្បីចូលរួមពិព័រណ៍ចិន-អាស៊ាន ​លើកទី២០ (CAEXPO ) និង​ដំណើរ​ទស្សនកិច្ចនៅទីក្រុងប៉េកាំង ​ដើម្បីចូលរួមកិច្ចប្រជុំកំពូលស្តីពីគំនិតផ្តួចផ្តើមខ្សែក្រវាត់ និងផ្លូវ (BRI)ផងដែរ។បើតាមលទ្ធផលនៃកិច្ចប្រជុំខាងលើនេះ បានឲ្យដឹងផងដែរថា ​កិច្ចប្រជុំកំពូលអាស៊ាន-ចិន លើកទី២៦នេះ ​បណ្តាថ្នាក់ដឹកនាំ​អាស៊ានប្រាថ្នាចង់ឃើញ​ទំនាក់ទំនង​រវាង​កំពូល​មហាអំណាចចិន និង​សហរដ្ឋអាមេរិក​ ប្រព្រឹត្តទៅប្រកបដោយសុខដុមរមនា ដើម្បីបន្តផ្តល់ប្រយោជន៍សេដ្ឋកិច្ច និង​ពាណិជ្ជកម្ម ដល់តំបន់ទាំងមូលផងដែរ៕អត្ថបទ៖ បាន ចក់

អាជ្ញាធរខណ្ឌចំការមន បន្តយកចិត្តទុកដាក់ជាមួយប្រជាពលរដ្ឋដែលមានជីវភាពខ្វះខាត

2023/09/06 08:31:21 pm        109
Facebook Telegram Linkin
ភ្នំពេញ៖ លោក កៀង ល័ក្ស អភិបាលនៃគណៈអភិបាលខណ្ឌចំការមន ​បានជួប​សំណេះសំណាល និងចែកអំណោយអង្ករ​ ជូនប្រជាពលរដ្ឋ​ដែលមានជីវភាពខ្វះខាតរស់នៅក្នុងសហគមន៍ សាមគ្គីរុងរឿង និងរស់នៅតាមខ្នងប្រឡាយ១០៥ ចំនួន១១៣គ្រួសារ។នៅព្រឹកថ្ងៃទី០៦ ខែកញ្ញា ឆ្នាំ២០២៣ លោក កៀង ល័ក្ស អភិបាលខណ្ឌចំការមន បានជួបសំណេះសំណាល ជាមួយប្រជាពលរដ្ឋ ក្នុងសហគមន៍ ​សាមគ្គីរុងរឿង និងរស់នៅតាមខ្នងប្រឡាយ១០៥ ភូមិ៥ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ សរុប១១៣គ្រួសារ និងបាននាំយកអំណោយរបស់សម្ដេចតេជោ ហ៊ុន សែន និង​សម្ដេចកិត្តិព្រឹទ្ធបណ្ឌិត តាមរយៈឯកឧត្តម ឃួង ស្រេង ​អភិបាលរាជធានីភ្នំពេញ ចែកជូនប្រជាពលរដ្ឋ ក្នុងមួយគ្រួសារ អង្ករ មួយប៉ាវ។ក្នុងឱកាសន លោក កៀង ល័ក្ស បានអរគុណ​ដល់​សមាជិក​សមាជិការ​របស់​គណបក្ស​ប្រជាជនទាំងអស់គ្នា ដែលបានចូលរួម​ទៅបោះឆ្នោតទាំងអស់គ្នា ​សម្រាប់នីតិកាលទី៧នេះ។ ជាពិសេសទៀតនោះ ​លោក អភិបាលបានណែនាំដល់បងប្រជាពលរដ្ឋទាំងអស់ជួយ​សហការ​រាយការណ៍ជូនអាជ្ញាធរ ពីបញ្ហា ​សន្តិសុខសណ្ដាប់ធ្នាប់សាធារណៈ បញ្ហាក្មេងទំនើង ​ជាងដើម ដើម្បីឲ្យអាជ្ញាធរជួយអន្តរាគមន៍​បានទាន់ពេលវេលា។ជាចុងក្រោយលោក កៀង ល័ក្ស អំពាវនាវដល់ប្រជាពលរដ្ឋ រស់នៅអមសងខាងប្រឡាយ១០៥ សូមកុំនាំគ្នាចោលសំរាម​ចូលទៅក្នុងប្រឡាយ ត្រូវ​វិចខ្ចប់​ទុក​ដាក់ឲ្យបានត្រឹមត្រូវ ដើម្បីរក្សា​បរិស្ថានអនាម័យ​បានល្អប្រសើរទាំងអស់គ្នា៕ អត្ថបទ ៖ កុម្ភៈ

ការហាមប្រាមរបស់អ៊ីស្រាអែលលើកិច្ចព្រមព្រៀងការនាំចេញនៃតំបន់កាហ្សា ធ្វើឱ្យប៉ះពាល់ដល់សេដ្ឋកិច្ចនៅតំបន់នេះ

2023/09/06 07:53:22 pm        113
Facebook Telegram Linkin
ប៉ាឡេស្ទីន៖ កាលពីថ្ងៃអង្គារ (៥ កញ្ញា) ប្រជាជនប៉ាឡេស្ទីន បានទាមទារឱ្យអ៊ីស្រាអែលលុបចោលបម្រាមលើការនាំចេញពីតំបន់កាហ្សា ដែលបានដាក់ ជុំវិញអ្វីដែលអ៊ីស្រាអែលហៅថា ការប៉ុនប៉ងរត់ពន្ធគ្រឿងផ្ទុះ ដោយនិយាយថា វានឹងប៉ះពាល់ដល់ប្រជាជនរាប់ពាន់នាក់ និងបំផ្លាញជីវភាពរស់នៅមិនច្បាស់លាស់នៅក្នុងតំបន់ហ៊ុមព័ទ្ធមួយនេះ។អ៊ីស្រាអែលបាននិយាយកាលពីថ្ងៃចន្ទ (៤ កញ្ញា) ថា ខ្លួនកំពុងបញ្ឈប់ជាបណ្តោះអាសន្ននូវទំនិញពាណិជ្ជកម្មមិនឲ្យចេញពីតំបន់កាហ្សា បន្ទាប់ពីអ្នកត្រួតពិនិត្យបានរកឃើញ «គ្រឿងផ្ទុះគុណភាពខ្ពស់» ជាច្រើនគីឡូក្រាមនៅក្នុងការដឹកជញ្ជូនមួយ ដែលលាក់នៅក្នុងស្រទាប់សម្លៀកបំពាក់។ជនជាតិប៉ាឡេស្ទីនប្រហែល២លាននាក់ រស់នៅក្នុងតំបន់កាហ្សាស្ទ្រីបតូចចង្អៀត ដែលភាគច្រើននៃពួកគេជាកូនចៅរបស់ជនភៀសខ្លួន ឬត្រូវបានបណ្តេញចេញពីតំបន់ ដែលពេលនេះជាប្រទេសអ៊ីស្រាអែល បន្ទាប់ពីត្រូវបានបង្កើតឡើងនៅឆ្នាំ១៩៤៨មក។ ការនាំចេញរបស់តំបន់កាហ្សា ត្រូវបានប៉ាន់ប្រមាណថាមានចំនួន១៣៤លានដុល្លារក្នុងមួយឆ្នាំ ដោយនាំចេញភាគច្រើនទៅកាន់ប្រទេសអ៊ីស្រាអែល និងតំបន់វេស ប៊ែង នេះបើតាមក្រសួងសេដ្ឋកិច្ចរបស់តំបន់កាហ្សា៕

ស្ថាប័នជាតិទទួលកិច្ចការព័ត៌មានជាយន្តការពង្រីកលំហូរនៃការទទួលព័ត៌មានកាន់តែច្បាស់លាស់​របស់រដ្ឋាភិបាល

2023/09/06 07:52:35 pm        290
Facebook Telegram Linkin
ភ្នំពេញ៖ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល បញ្ជាក់ថា ការបង្កើតគណៈកម្មាធិការជាតិសម្របសម្រួលកិច្ចការព័ត៌មាន និងសាធារណមតិ ជាយន្តការពង្រីកលំហូរនៃការទទួលព័ត៌មានកាន់តែច្បាស់លាស់របស់រាជរដ្ឋាភិបាល។មួយថ្ងៃក្រោយពីរាជរដ្ឋាភិបាល ចេញសេចក្តីសម្រេចបង្កើតគណៈកម្មាធិការជាតិ​សម្របសម្រួល​កិច្ចការព័ត៌មាន ​និងសាធារណមតិ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល ថ្លែងប្រាប់ BTV News ឲ្យដឹងនៅថ្ងៃទី៦ ខែកញ្ញានេះថា គោលបំណងនៃការបង្កើតស្ថាប័នជាតិថ្មីមួយនេះឡើង រាជរដ្ឋាភិបាលមានទិសដៅធ្វើយ៉ាងណាផ្តល់រាល់លំហូរព័ត៌មានទៅកាន់ប្រជាពលរដ្ឋ ទាំង​គោលនយោបាយរបស់រាជរដ្ឋាភិបាល សមិទ្ធផលនានា និងកិច្ចការអនុវត្តកន្លងទៅ​ដែលបម្រើដល់​ផលប្រយោជន៍ជូនប្រជាពលរដ្ឋ។ ឯកឧត្តមបន្តថា ស្ថាប័ននេះមានតួនាទីសម្របសម្រួលជំរុញឲ្យលំហូរព័ត៌មានទាំងអស់​នោះ​ជួ្រតជ្រាប​ដល់ប្រជាពលរដ្ឋគ្រប់រូប។ ស្ថាប័ននេះ ក៏បង្កើតឡើងប្រៀបនឹងយន្តការច្រកចេញតែមួយ ដើម្បីឲ្យការប្រមូលព័ត៌មាន ​និងការផ្តល់ព័ត៌មានតែមួយ ហើយច្បាស់លាស់​ជូនប្រជាពលរដ្ឋ។ ឯកឧត្តម បញ្ជាក់ថា ស្ថាប័ននេះបានផ្សារភ្ជាប់ជាមួយ​នឹងសាធារណមតិ គឺក្រុមការងារក្នុងស្ថាប័ន​មានគោលដៅលើកកម្ពស់ព័ត៌មានទៅសាធារណមតិ ​និងចាត់វិធានការ ឬបន្សាបព័ត៌មានក្លែងក្លាយ បំពុលសង្គមដែលតែងកើតមាន។ សូមជម្រាបថាកាលពីថ្ងៃទី៥ ខែកញ្ញា ម្សិលមិញនេះ រាជរដ្ឋាភិបាលបានចេញអនុក្រឹត្យ​សម្រេចបង្កើត​គណៈកម្មាធិការជាតិសម្របសម្រួលកិច្ចការព័ត៌មាន​ និងសាធារណមតិ ដែលសរសេរជាអក្សរកាត់ថា គ.ស.ព.ស.។គណៈកម្មាធិការជាតិនេះ មានតួនាទី និងភារកិច្ចធ្វើកិច្ចការលើការងារពង្រឹង​សាធារណមតិ តាមរយៈការតាមដានក្ដាប់គ្រប់សភាពការណ៍ ឃោសនា​ ពន្យល់ និងការពាររូបភាពវិជ្ជមាន​របស់ព្រះរាជាណាចក្រកម្ពុជា​ ការពារអធិបតេយ្យជាតិ ផ្សព្វផ្សាយសមិទ្ធផលរបស់រាជរដ្ឋាភិបាល និងកសាងរូបភាពវិជ្ជមាន និងលើកកម្ពស់កិត្យានុភាពរបស់ព្រះរាជាណាចក្រកម្ពុជា​ទាំងក្នុងស្រុក និងលើឆាកអន្តរជាតិ៕ អត្ថបទ សេក ឧត្តម

ព្យុះត្រូពិចលី( Lee) អាចក្លាយទៅជាខ្យល់ព្យុះដ៏គ្រោះថ្នាក់ខ្លាំងសម្រាប់សហរដ្ឋអាមេរិក

2023/09/06 07:51:12 pm        128
Facebook Telegram Linkin
អាមេរិក៖ មជ្ឈមណ្ឌលព្យុះព្យុះសង្ឃរាជាតិរបស់សហរដ្ឋអាមេរិកបាននិយាយនៅក្នុងសេចក្ដីណែនាំមួយកាលពីល្ងាចថ្ងៃអង្គារ (៥កញ្ញា) ថា ព្យុះត្រូពិចលី (Lee) កំពុងតែបង្កជាកម្លាំងខ្យល់នៅភាគខាងកើតនៃ ប្រជុំកោះ Lesser Antilles ហើយត្រូវបានគេរំពឹងថានឹងកើនឡើងយ៉ាងឆាប់រហ័សទៅជាព្យុះសង្ឃរាដ៏គ្រោះថ្នាក់បំផុតនៅចុងសប្តាហ៍នេះ។ព្យុះនេះបានបង្កើតខ្លួនឡើងនៅតំបន់ត្រូពិចអាត្លង់ទិកកណ្តាល ហើយបានក្លាយជាព្យុះត្រូពិចលី ក្នុងរយៈពេលប្រាំមួយម៉ោង។ លក្ខខណ្ឌបរិស្ថាន គឺអំណោយផលសម្រាប់ការវិវត្តន៍យ៉ាងឆាប់រហ័ស និងការកើនឡើងនៃព្យុះលី នេះ ខណៈពេលដែលវាផ្លាស់ទីជាលំដាប់ពីទិសខាងលិច ទៅទិសពាយ័ព្យក្នុងប៉ុន្មានថ្ងៃខាងមុខនេះ។ នៅពាក់កណ្តាលសប្តាហ៍នេះ ព្យុះលី ត្រូវបានគេព្យាករណ៍ថានឹងឈានដល់កម្រិតកម្លាំងព្យុះសង្ឃរាប្រភេទ១ ហើយព្យុះដ៏គ្រោះថ្នាក់នេះត្រូវបានគេព្យាករណ៍ថានឹងកើនឡើងបន្ថែមទៀត។ដំណឹងនេះកើតឡើងតិចជាងមួយសប្តាហ៍បន្ទាប់ពីព្យុះសង្ឃរាអ៊ីដាលីយ៉ា ដែលជាព្យុះសង្ឃរាប្រភេទទី៤ បានវាយលុករដ្ឋហ្វ្លរីដា ក៏ដូចជាបង្កការបំផ្លិចបំផ្លាញនៅក្នុងរដ្ឋ Georgia និងរដ្ឋ Carolina ហើយយ៉ាងហោចណាស់មានការស្លាប់ចំនួន២ករណី ដែលជាប់ទាក់ទងនឹងព្យុះនេះផងដែរ៕

អ្នកវិភាគ៖ កង្វះអាវុធពីចិន ជំរុញឲ្យរុស្ស៊ីងាកទៅរកកូរ៉េខាងជើង

2023/09/06 07:48:35 pm        118
Facebook Telegram Linkin
ចិន៖ កាលពីថ្ងៃអង្គារ (៥ កញ្ញា) អ្នកជំនាញឈានមុខផ្នែកសន្តិសុខអន្តរជាតិម្នាក់បាននិយាយថា កិច្ចប្រជុំនាពេលខាងមុខ ដែលគេជឿថានឹងប្រព្រឹត្តទៅរវាងរុស្ស៊ី និងកូរ៉េខាងជើង គឺដោយសារតែកង្វះអាវុធដែលត្រូវបានផ្គត់ផ្គង់ដោយប្រទេសចិន។របាយការណ៍មួយនៅក្នុងសារព័ត៌មាន New York Times បាននិយាយដោយសំអាងដល់ប្រភពពីសហរដ្ឋអាមេរិក និងសម្ព័ន្ធមិត្តថា មេដឹកនាំកូរ៉េខាងជើងលោក គីម ជុងអ៊ុន គ្រោងនឹងធ្វើដំណើរទៅកាន់ប្រទេសរុស្ស៊ីក្នុងខែនេះ ដើម្បីជួបជាមួយប្រធានាធិបតីរុស្ស៊ី លោក វ្លាឌីមៀរ ពូទីន ដើម្បីពិភាក្សាអំពីលទ្ធភាពនៃការផ្គត់ផ្គង់អាវុធសម្រាប់សង្គ្រាមនៅអ៊ុយក្រែន។លោកស្រី Patricia Lewis ប្រធានកម្មវិធីសន្តិសុខអន្តរជាតិ Chatham House របស់អង់គ្លេសបាននិយាយាថា រុស្ស៊ីមិនទទួលបានអ្វីដែលខ្លួនត្រូវការពីប្រទេសចិនទេ ដូច្នេះហើយបានសម្លឹងរកមើលប្រភពការផ្គត់ផ្គង់គ្រាប់រំសេវដ៏មានសក្តានុពលផ្សេងទៀត។ដំណើរទស្សនកិច្ចដែលគ្រោងទុកនោះ នឹងធ្វើឡើងខណៈរុស្ស៊ីពិភាក្សាអំពីការធ្វើសមយុទ្ធយោធារួមជាមួយកូរ៉េខាងជើង និងបន្ទាប់ពីរដ្ឋមន្ត្រីការពារជាតិរុស្ស៊ី លោក Sergei Shoigu បានព្យាយាមធ្វើដំណើរទៅកូរ៉េខាងជើង ដើម្បីបញ្ចុះបញ្ចូលក្រុងព្យុងយ៉ាងឱ្យលក់គ្រាប់កាំភ្លើងធំទៅឱ្យរុស្ស៊ី។កន្លងមក សហរដ្ឋអាមេរិកបានព្រមានថា កូរ៉េខាងជើងអាចផ្តល់សព្វាវុធបន្ថែមទៀតដល់រុស្ស៊ី ដែលកងកម្លាំងរបស់ពួកគេបានឈ្លានពានអ៊ុយក្រែនក្នុងខែកុម្ភៈ ឆ្នាំ២០២២ ហើយជាសង្រ្គាមដែលសហរដ្ឋអាមេរិក និងសម្ព័ន្ធមិត្តអឺរ៉ុបរបស់ខ្លួន ប្រឆាំងយ៉ាងខ្លាំង ដែលទីក្រុងម៉ូស្គូហៅថា «ប្រតិបត្តិការយោធាពិសេស»៕

សំណង់មិនរៀបរយជាច្រើននៅឥណ្ឌាត្រូវបានកម្ទេចចោល មុនកិច្ចប្រជុំG20 ដែលធ្វើឲ្យប្រជាជនគ្មានផ្ទះសម្បែង

2023/09/06 07:44:26 pm        136
Facebook Telegram Linkin
ឥណ្ឌា៖ ក្រុមអ្នកស្រុកនៃតំបន់សំណង់លំនៅឋានមិនរៀបរយក្នុងទីក្រុង ញ៉ូវ ដេលី ប្រទេសឥណ្ឌារំពឹងថា នឹងទទួលបានអត្ថប្រយោជន៍ពីកិច្ចប្រជុំកំពូលក្រុមប្រទេសទាំង២០ ឬហៅថា កិច្ចប្រជុំG20 ដែលធ្វើឡើងនៅចម្ងាយជិត៥០០ម៉ែត្រពីលំនៅឋានរបស់ពួកគេ ប៉ុន្តែផ្ទុយទៅវិញ ពួកគេបែរជាក្លាយជាមនុស្សគ្មានផ្ទះសម្បែងទៅវិញ។ អ្នករស់នៅក្នុងតំបន់សំណង់លំនៅឋានមិនរៀបរយមួយចំនួន បានទៅកាន់តុលាការជាន់ខ្ពស់របស់ទីក្រុង ដេលី ដើម្បីបញ្ឈប់ការបណ្តេញចេញពីតំបន់នោះ ប៉ុន្តែតុលាការបានចាត់ទុកថាមនុស្សទាំងនោះធ្វើការតាំងទីលំនៅដោយខុសច្បាប់ ហើយបន្ទាប់មកក្រុមអាជ្ញាធរក្រុងបានបញ្ជាឱ្យពួកគេចាកចេញត្រឹមថ្ងៃទី៣១ ឧសភា។ទាំងសកម្មជន និងអ្នកស្រុកនិយាយថា នេះជាផ្នែកនៃការងារកែលម្អសម្រាប់កិច្ចប្រជុំកំពូល ដែលចាប់ផ្តើមនៅថ្ងៃទី៩ ខែកញ្ញា ខាងមុខនេះ។ ទោះជាយ៉ាងណាក៏ដោយ មន្ត្រីរដ្ឋាភិបាលរបស់នាយករដ្ឋមន្ត្រីឥណ្ឌា លោក Narendra Modi និយាយថា លំនៅឋានទាំងនោះត្រូវបានសាងសង់ដោយខុសច្បាប់នៅលើដីរបស់រដ្ឋាភិបាល ហើយការរុះរើចេញគឺជាសកម្មភាពកំពុងបន្ត។ការវាយកម្ទេចនេះ បានចាប់ផ្តើមកាលពី៤ខែមុន។ រដ្ឋមន្ត្រីក្រសួងលំនៅឋានម្នាក់បាននិយាយថា គិតត្រឹមខែកក្កដា ដីរដ្ឋាភិបាលជិត១០០ហិចតា ត្រូវបានយកមកវិញ។ លំនៅឋាននៅតំបន់សំណង់លំនៅឋានមិនរៀបរយទាំងនោះដូចជាតំបន់ជំរំមិនរៀបរយ ត្រូវបានសាងសង់ក្នុងរយៈពេលជាច្រើនឆ្នាំមកហើយ ដូចជាការងារជួសជុលជាដើម។ ក្នុងឆ្នាំ២០២១ ក្រុមមន្ត្រីបាននិយាយថា ប្រជាជនប្រមាណ១៣,៥លាននាក់ រស់នៅក្នុងតំបន់អាណានិគមដែលគ្មានការអនុញ្ញាតក្នុងទីក្រុងដេលី៕

ស្ពានឆ្លងទន្លេ “កោះពេជ្រ-កោះនរា” នឹងធ្វើពិធីភ្ជាប់នៅសប្ដាហ៍ក្រោយ

2023/09/06 07:44:00 pm        666
Facebook Telegram Linkin
ភ្នំពេញ៖ ស្ពានបេតុងខ្សែកាបឆ្លងកាត់ទន្លេបាសាក់ ភ្ជាប់តំបន់កោះពេជ្រ និងតំបន់អភិវឌ្ឍន៍កោះនរា នឹងត្រូវធ្វើ ពិធីភ្ជាប់នៅសប្ដាហ៍ក្រោយនេះ ខណៈដែលបច្ចុប្បន្ន ការសាងសង់សម្រេចបាន៩២ភាគរយហើយ ។លោក កើត ឆែ អភិបាលរងរាជធានីភ្នំពេញ បានឱ្យដឹងថា តាមផែនការគម្រោង ស្ពានខ្សែកាបនេះ​ នឹងត្រូវបញ្ចប់ការសាងសង់១០០ភាគរយ នៅពាក់កណ្តាលខែវិច្ឆិកា ឆ្នាំ២០២៣ នេះ ពោលគឺ​នៅ​មុនព្រះរាជពិធីបុណ្យអុំទូកចូលមកដល់ ហើយនៅថ្ងៃ​ទី​១២ ខែកញ្ញា សប្ដាហ៍ក្រោយនេះ រដ្ឋបាលរាជធានីភ្នំពេញ នឹងប្រារព្ធធ្វើពិធីភ្ជាប់ស្ពានបេតុងខ្សែកាប ដោយមានការ​អញ្ជើញ​ចូលរួមជាអធិបតីភាពពីសំណាក់ឯកឧត្តម ឃួង ស្រេង អភិបាលរាជធានីភ្នំពេញ ។ ប្រជាពលរដ្ឋអ្នកដំណើរ​ បានសាទរចំពោះដំណឹងដែលថា ស្ពានថ្មីឆ្លងកាត់ទន្លេមួយនេះ ​ជិតតភ្ជាប់ និងជិតបើកឱ្យធ្វើចរាចរណ៍ ​ព្រោះថា​វត្តមានស្ពាននេះ​ អាចជួយឱ្យពលរដ្ឋទូទៅ ប្រើប្រាស់​សម្រាប់ការធ្វើដំណើរទៅមក ឆ្លងពីតំបន់មួយទៅតំបន់មួយ​ បានយ៉ាងងាយស្រួល មិនចំណាយ​ពេលវេលាយូរ និងកាត់បន្ថយការកកស្ទះ ។សូមបញ្ជាក់ផងដែរថា ស្ពានតភ្ជាប់កោះពេជ្រ និងកោះនរានេះ ​ត្រូវបានបើកការដ្ឋានដំណើរការ សាងសង់​កាលពីចុងខែតុលា ឆ្នាំ២០២០ ។ ​ស្ពាននេះ ​មានប្រវែងជាង៨០០ម៉ែត្រ ទទឹង២៤ម៉ែត្រកន្លះ ​និងចំណាយថវិកាចំនួន៣៨លានដុល្លារ ក្នុងការសាងសង់ ៕ អត្ថបទ៖ លីហេង

បណ្ដាញសង្គម

ព័ត៌មានថ្មីៗ

ករណីលិចទូកនៅកោះប្រាក់៖ មនុស្ស ៣នាក់បាត់ខ្លួន រកមិនទាន់ឃើញ
08/16/2026 05:08 PM
Facebook Telegram Linkin
ប្រធានក្រុមការងារចុះមូលសង្កាត់ដង្កោ ជំរុញដល់អាជ្ញាធរមូលដ្ឋាន ផ្ដល់​សេវា​ឱ្យ​បាន​ល្អ​ដល់​ប្រជាពលរដ្ឋ
08/16/2026 04:08 PM
Facebook Telegram Linkin
ប្រជានេសាទអេក្វាឌ័រ ប្រឈមគ្រោះថ្នាក់២ គឺក្រុមជួយដូរគ្រឿងញៀន និងការវាយប្រហាររបស់អាមេរិក
08/16/2026 04:08 PM
Facebook Telegram Linkin
បញ្ជូនជនជាតិចិន ៤នាក់ទៅសាលាដំបូងខេត្តព្រះសីហនុ ពាក់ព័ន្ធករណី ONLINE SCAMS
08/16/2026 04:08 PM
Facebook Telegram Linkin
ចំនួនមនុស្សស្លាប់សរុបដោយសារគ្រោះមហន្តរាយលិចនាវាចម្លងនៅហ្ស៊ីមបាវ៉េ កើនឡើងដល់ ៧២នាក់
08/16/2026 04:08 PM
Facebook Telegram Linkin
យន្តហោះចម្បាំងរបស់អង្គការណាតូបាញ់ទម្លាក់យានដ្រូនដែលរំលោភលើដែនអាកាសរបស់ប្រទេសរ៉ូម៉ានី
08/16/2026 04:08 PM
Facebook Telegram Linkin
កាតាច្រានចោលការអះអាងរបស់ទីក្រុងតេអេរ៉ង់ថា ពួកគេបានឃាត់ខ្លួនអ្នកបើកបរយន្តហោះទម្លាក់គ្រាប់បែកអ៊ីរ៉ង់
08/16/2026 04:08 PM
Facebook Telegram Linkin
មេដឹកនាំក្រុមហាម៉ាស ធ្វើដំណើរទៅកាន់ទីក្រុងគែ ប្រទេសអេហ្ស៊ីប សម្រាប់កិច្ចប្រជុំស្តីពីតំបន់ហ្កាហ្សា
08/16/2026 03:08 PM
Facebook Telegram Linkin
សម្ដេចតេជោ ហ៊ុន សែន សរសើរ​លោកស្រី កឹម មនោវិទ្យា ថាពិតជាធនធានដ៏ល្អសម្រាប់ជាតិ
08/16/2026 03:08 PM
Facebook Telegram Linkin
នាយករដ្ឋមន្រ្តីជប៉ុន សន្យាមិនឲ្យកើតមានម្តងទៀតជាដាច់ខាតសោកនាដកម្មសង្រ្គាម
08/16/2026 02:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.