នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី៖គិតត្រឹមខែមេសាឆ្នាំនេះយុវជនមកពីគ្រួសារក្រីក្រ និងងាយរងហានិភ័យចំនួន ២៧,១ម៉ឺននាក់ទទួលបានការបណ្ដុះបណ្ដាលជំនាញវិជ្ជាជីវៈ
សម្ដេ​ចតេជោ ហ៊ុន សែន៖«២០ មិថុនា ១៩៧៧ ជីវិតរបស់ខ្ញុំ និងភរិយាពេលនោះជួបជាមួយគ្រោះថ្នាក់ និងលំបាកវេទនាខ្លាំងណាស់»
សម្តេចតេជោ ហ៊ុន សែន ថ្លែងថា អាវក្រោះ និងសម្ភារយោធាម៉ាក DSS សុទ្ធតែមានគុណភាពហើយអាវការពារនេះនាយករដ្ឋមន្រ្តីបានសាករួចហើយ
សម្ដេចតេជោ ហ៊ុន សែន អញ្ជើញពិនិត្យមើលរោងចក្រ ផលិតសម្ភារៈយោធា DSS និងសំណេះសំណាលជាមួយកម្មករ កម្មការិនី

នយោបាយ​ និង ការអភិវឌ្ឍន៍

កំណើនកម្រិតកាហ្វេអ៊ីន ជំរុញឱ្យមានការហាមឃាត់លក់ភេសជ្ជៈប៉ូវកម្លាំងដល់កុមារនៅសហរដ្ឋអាមេរិក

2023/08/31 01:43:37 pm        291
Facebook Telegram Linkin
អាមេរិក៖ ពេទ្យកុមារ និងក្រុមឪពុកម្តាយ កំពុងអំពាវនាវឱ្យសហរដ្ឋអាមេរិក ចាត់ទុកភេសជ្ជៈប៉ូវកម្លាំងដែលមានជាតិកាហ្វេអ៊ីនខ្ពស់ដូចជា អាល់កុល និងបារី ហើយហាមឃាត់មិនឲ្យលក់ទំនិញទាំងនេះដល់អនីតិជន ដោយសារការផឹកភេសជ្ជៈទាំងនេះតែមួយមុខ អាចមានជាតិកាហ្វេអ៊ីនច្រើនដូចកូកាកូឡាចំនួន៦កំប៉ុងដែរ។ដោយសារបរិមាណជាតិកាហ្វេអ៊ីននៅក្នុងភេសជ្ជៈប៉ូវកម្លាំងបានកើនឡើងក្នុងប៉ុន្មានឆ្នាំមកនេះ រួមទាំងភេសជ្ជៈ Prime Energy ភេសជ្ជៈ Ghost ភេសជ្ជៈ Monster Energy និងភេសជ្ជៈជាច្រើនប្រភេទពីប្រ៊េន Kimade ផងនោះ ប្រទេសមួយចំនួន និងអ្នកលក់រាយបានហាមឃាត់ផលិតផលទាំងនេះ ខណៈដែលប្រទេសមួយចំនួនទាមទារភស្តុតាងអាយុសម្រាប់ការទិញទំនិញប្រទេសនេះ។ នៅសហរដ្ឋអាមេរិក និងចក្រភពអង់គ្លេស គ្មាននិយ័តកម្មជាតិហាមឃាត់ការលក់ភេសជ្ជៈប៉ូវកម្លាំង ដែលមានជាតិកាហ្វេអ៊ីនខ្ពស់នោះទេ។លោកស្រីវេជ្ជបណ្ឌិត Holly Benjamin សាស្ត្រាចារ្យផ្នែកជំងឺកុមារ និងវះកាត់ឆ្អឹងនៅសាកលវិទ្យាល័យ Chicago សហរដ្ឋអាមេរិក បាននិយាយថា បើគ្មានច្បាប់កំណត់អាយុដូចការកំណត់សម្រាប់ការទិញស្រា និងបារីទេ អ្នកលក់រាយទំនងជាមិនដាក់កម្រិតលើការទិញភេសជ្ជៈទាំងនោះទេ។ យោងតាមបណ្ឌិតសភាចិត្តវិទ្យាកុមារ និងវ័យជំទង់អាមេរិក បានឲ្យដឹងថា មិនមានការបញ្ជាក់កម្រិតនៃជាតិកាហ្វេអ៊ីនសុវត្ថិភាពចំពោះកុមារនោះទេ៕

នាយករដ្ឋមន្ត្រីជប៉ុន ប្តេជ្ញាដោះស្រាយការហាមប្រាមរបស់ចិនលើអាហារសមុទ្រជប៉ុន

2023/08/31 01:41:19 pm        249
Facebook Telegram Linkin
ជប៉ុន៖ នាយករដ្ឋមន្ត្រីជប៉ុនលោក Fumio Kishida បាននិយាយនៅថ្ងៃព្រហស្បតិ៍ (៣១ សីហា) នេះថា លោកនឹងចងក្រងវិធានការដើម្បីជួយឧស្សាហកម្មនេសាទ ដែលរងគ្រោះដោយបម្រាមរបស់ប្រទេសចិនលើអាហារសមុទ្រជប៉ុន បន្ទាប់ពីបានទៅពិនិត្យទីផ្សារត្រីដ៏ធំបំផុតរបស់ទីក្រុងតូក្យូ ហើយបានប្តេជ្ញាលុបចោលការរឹតបន្តឹងការនាំចូល ដែលលោកបាននិយាយថា «គ្មានមូលដ្ឋានវិទ្យាសាស្រ្តត្រឹមត្រូវ»។ប្រទេសជប៉ុន បានចាប់ផ្តើមបញ្ចេញសំណល់ទឹកវិទ្យុសកម្ម ដែលធ្វើប្រព្រិត្តកម្មរួចពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដែលបានបំផ្លាញ ចូលទៅក្នុងមហាសមុទ្រប៉ាស៊ីហ្វិកកាលពីថ្ងៃព្រហស្បតិ៍ (២៤ សីហា) ដោយជំរុញឱ្យប្រទេសចិនដែលជាដៃគូពាណិជ្ជកម្មធំបំផុតរបស់ជប៉ុន ដាក់បម្រាមលើការនាំចូលផលិតផលអាហារសមុទ្រជប៉ុន។រដ្ឋមន្ត្រីក្រសួងជលផលជប៉ុន លោក Tetsuro Nomura បាននិយាយកាលពីថ្ងៃសុក្រសប្តាហ៍មុន (២៥ សីហា) ថា រដ្ឋាភិបាលនឹងចាត់វិធានការដើម្បីធ្វើពិពិធកម្មការនាំចេញត្រីរបស់ប្រទេសជប៉ុន សម្រាប់ផលិតផលដែលពឹងផ្អែកលើប្រទេសចិនដូចជា ងាវយក្សសមុទ្រជាដើម។ ប្រទេសចិនបាននាំចូលច្រើនជាងពាក់កណ្តាលនៃការនាំចេញងាវយក្សសមុទ្ររបស់ជប៉ុនក្នុងឆ្នាំ២០២២៕

ការបោះឆ្នោតរបស់UNលើកងកម្លាំងរក្សាសន្តិភាពលីបង់ ត្រូវបានពន្យារពេល ខណៈបារាំង អាមេរិក និងអារ៉ាប់រួម ជជែកតវ៉ា

2023/08/31 01:38:59 pm        219
Facebook Telegram Linkin
UN៖ បណ្ដាអ្នកការទូតបាននិយាយថា ការបោះឆ្នោតរបស់អង្គការសហប្រជាជាតិ ដែលបានគ្រោងទុកកាលពីថ្ងៃពុធ (៣០សីហា) ដើម្បីបន្តការអនុម័តសម្រាប់បេសកកម្មរក្សាសន្តិភាពនៅក្នុងប្រទេសលីបង់ ត្រូវបានពន្យារពេល ខណៈដែលប្រទេសបារាំង សហរដ្ឋអាមេរិក និងអារ៉ាប់រួមបានជជែកតវ៉ាជុំវិញសេរីភាពនៃចល័តទីរបស់កងទ័ពអង្គការសហប្រជាជាតិ។កងកម្លាំងបណ្តោះអាសន្នរបស់អង្គការសហប្រជាជាតិនៅលីបង់ (UNIFIL) ដែលត្រូវបានបង្កើតឡើងក្នុងឆ្នាំ១៩៧៨ កំពុងធ្វើការល្បាតព្រំដែនភាគខាងត្បូងនៃប្រទេសលីបង់ជាមួយអ៊ីស្រាអែល។ អាណត្តិសម្រាប់ប្រតិបត្តិការនេះ ត្រូវបានបន្តជារៀងរាល់ឆ្នាំ ហើយការអនុញ្ញាតបច្ចុប្បន្នរបស់វានឹងផុតកំណត់នៅថ្ងៃព្រហស្បតិ៍ (៣១សីហា) នេះ។ភាពជាប់គាំងរបស់ក្រុមប្រឹក្សាសន្តិសុខ កើតឡើងស្របពេលមានសង្គ្រាមពាក្យសម្តីកាន់តែខ្លាំងឡើងរវាងអ៊ីស្រាអែល និងក្រុមហេបូឡា ដែលគាំទ្រដោយអ៊ីរ៉ង់នៅក្នុងប្រទេសលីបង់ ដោយម្នាក់ៗបានប្តេជ្ញាថា នឹងបញ្ជូនគ្នាទៅវិញទៅមកទៅកាន់សម័យកាល«យុគថ្ម» វិញ ព្រមទាំងរៀបចំសម្រាប់ជម្លោះដែលអាចកើតមាន ទោះបីជាពួកគេព្យាយាមមិនបង្កើតជម្លោះក៏ដោយ។ប្រទេសបារាំងបានព្រាងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដើម្បីបន្តបេសកកម្មរក្សាសន្តិភាពរយៈពេលមួយឆ្នាំទៀត ប៉ុន្តែសហរដ្ឋអាមេរិក និងអារ៉ាប់រួម ប្រកែកថា សេចក្តីសម្រេចនោះបានធ្វើឲ្យចុះខ្សោយលើសមត្ថភាពរបស់កងទ័ពអង្គការសហប្រជាជាតិក្នុងការផ្លាស់ទីដោយសេរី៕

សហរដ្ឋអាមេរិកបានទប់ស្កាត់ការនាំចេញបន្ទះឈីប AI ទៅកាន់ប្រទេសមួយចំនួននៅមជ្ឈិមបូព៌ា

2023/08/31 01:36:46 pm        213
Facebook Telegram Linkin
អាមេរិក៖ សហរដ្ឋអាមេរិក បានពង្រីកការរឹតបន្តឹងលើការនាំចេញបន្ទះឈីបបច្ចេកវិទ្យាប្រាជ្ញាសិប្បនិម្មិតAI ពីក្រុមហ៊ុន Nvidia និងក្រុមហ៊ុនបច្ចេកវិទ្យា AMD លើសពីប្រទេសចិនទៅកាន់តំបន់ផ្សេងៗទៀត រួមទាំងប្រទេសមួយចំនួននៅមជ្ឈិមបូព៌ាផងដែរ។ ក្រុមហ៊ុន Nvidia បាននិយាយនៅក្នុងឯកសារនិយ័តកម្មនៅសប្តាហ៍នេះថា ការទប់ស្កាត់នេះនឹងមិនមាន «ផលប៉ះពាល់ភ្លាមៗ» លើលទ្ធផលរបស់ខ្លួននោះទេ។ ក្រុមហ៊ុន AMD ក៏បានទទួលលិខិតជូនដំណឹងជាមួយនឹងការរឹតបន្តឹងស្រដៀងគ្នានេះផងដែរ ដោយអ្នកដែលដឹងពីបញ្ហានេះបានប្រាប់សារព័ត៌មាន រ៉យទ័រ និងបន្ថែមថា ចំណាត់ការនេះមិនមានផលប៉ះពាល់ជាសំខាន់លើប្រាក់ចំណូលរបស់ខ្លួននោះទេ។ជាធម្មតា ក្រុមមន្ត្រីអាមេរិកដាក់ការត្រួតពិនិត្យការនាំចេញសម្រាប់ហេតុផលសន្តិសុខជាតិ។ វិធានការស្រដៀងគ្នានេះ ដែលបានប្រកាសកាលពីឆ្នាំមុនបានបង្ហាញពីកំណើននៃការបង្រ្កាបរបស់សហរដ្ឋអាមេរិក លើសមត្ថភាពបច្ចេកវិទ្យារបស់ប្រទេសចិន ប៉ុន្តែគេមិនច្បាស់ភ្លាមៗថា តើហានិភ័យអ្វីខ្លះដែលបង្កឡើងដោយការនាំចេញទៅកាន់មជ្ឈិមបូព៌ានេះ។នៅក្នុងសេចក្តីថ្លែងការណ៍ដាច់ដោយឡែកមួយ ក្រុមហ៊ុន Nvidia បាននិយាយថា តម្រូវការអាជ្ញាប័ណ្ណថ្មី «មិនប៉ះពាល់ដល់ប្រាក់ចំណូលរបស់យើងទេ ហើយយើងកំពុងធ្វើការជាមួយរដ្ឋាភិបាលសហរដ្ឋអាមេរិកដើម្បីដោះស្រាយបញ្ហានេះ»។ ក្រសួងពាណិជ្ជកម្មសហរដ្ឋអាមេរិក ដែលជាធម្មតាគ្រប់គ្រងតម្រូវការអាជ្ញាប័ណ្ណថ្មីលើការនាំចេញ មិនបានឆ្លើយតបភ្លាមៗនូវសំណើសុំការអត្ថាធិប្បាយនោះទេ៕

មានប្រតិកម្មជាច្រើនពីពិភពលោក ចំពោះក្រុមមន្ត្រីកងទ័ពប្រទេសហ្គាបុង ដែលប្រកាសធ្វើរដ្ឋប្រហារ

2023/08/31 01:34:29 pm        229
Facebook Telegram Linkin
ហ្គាបុង៖ មន្ត្រីយោធាជាន់ខ្ពស់មួយក្រុមនៅក្នុងប្រទេសហ្គាបុងបាននិយាយថា ពួកគេបានដណ្តើមអំណាចកាលពីព្រឹកព្រលឹមថ្ងៃពុធ (៣០សីហា) ប៉ុន្មាននាទីបន្ទាប់ពីស្ថាប័នបោះឆ្នោតរបស់រដ្ឋអាហ្រ្វិកកណ្តាលបានប្រកាសថាលោកប្រធានាធិបតី Ali Bongo បានឈ្នះឆ្នោតអាណត្តិទីបី។ មានប្រតិកម្មជាច្រើនពីជុំវិញអ្វីដែលទំនងជារដ្ឋប្រហារយោធាលើកទី៨នៅអាហ្វ្រិកខាងលិច និងកណ្តាលចាប់តាំងពីឆ្នាំ២០២០មក។គណៈកម្មាធិការសហភាពអាហ្រ្វិកបាននិយាយថា «ប្រធានគណៈកម្មការសហភាព អាហ្វ្រិក AU គឺលោក Moussa Faki Mahamat កំពុងតាមដានដោយមានការព្រួយបារម្ភយ៉ាងខ្លាំងអំពីស្ថានភាពនៅសាធារណរដ្ឋហ្គាបុង ហើយថ្កោលទោសយ៉ាងដាច់អហង្ការចំពោះការរៀបចំផែនការធ្វើរដ្ឋប្រហារនៅក្នុងប្រទេសនេះថា ជាផ្លូវចេញពីវិបត្តិក្រោយការបោះឆ្នោតបច្ចុប្បន្នរបស់ខ្លួន។អ្នកនាំពាក្យរដ្ឋាភិបាលបារាំង លោក Olivier Veran បាននិយាយថា «យើងថ្កោលទោសរដ្ឋប្រហារយោធាប្រទេសនេះ ហើយរំលឹកឡើងវិញនូវការប្តេជ្ញាចិត្តរបស់យើងចំពោះការបោះឆ្នោតដោយសេរី និងតម្លាភាព»។ អ្នកនាំពាក្យសេតវិមានសហរដ្ឋអាមេរិក លោក John Kirby បាននិយាយថា «បញ្ហានោះមានការពាក់ព័ន្ធយ៉ាងខ្លាំងចំពោះពួកយើង។ យើងនឹងនៅតែជាអ្នកគាំទ្រប្រជាជនក្នុងតំបន់ ហើយយើងគាំទ្រប្រជាជនហ្គាបុង និងជាការពិតណាស់ យើងក៏គាំទ្រលើការទាមទាររបស់ប្រជាជនហ្គាបុង សម្រាប់អភិបាលកិច្ចប្រជាធិបតេយ្យផងដែរ»។បន្ថែមពីលើនោះ អគ្គលេខាធិការបណ្ដារដ្ឋសហធន លោកស្រី Patricia Scotland អ្នកនាំពាក្យក្រសួងការបរទេសចិន លោក Wang Wenbin តំណាងជាន់ខ្ពស់របស់សហភាពអឺរ៉ុបសម្រាប់កិច្ចការបរទេស និងគោលនយោបាយសន្តិសុខ លោក Josep Borris អ្នកនាំពាក្យក្រសួងការបរទេសរុស្ស៊ី លោស្រី Maria Zakharova និងអគ្គលេខាធិការអង្គការសហប្រជាជាតិ លោក Antonio Guterres ក៏បានលើកឡើងពីកង្វល់អំពីការរៀបចំផែនការធ្វើរដ្ឋប្រហារ ដែលហាក់ដូចជារដ្ឋប្រហារយោធាលើកទី៨នៅអាហ្វ្រិកខាងលិច និងកណ្តាល មួយនេះផងដែរ៕

ប្រទេសម៉ិកស៊ិក ដាក់ពង្រាយទាហាននៅទីក្រុងជាប់ព្រំដែនក្នុងបំណងជំរុញការការពារសន្តិសុខ

2023/08/31 01:31:57 pm        265
Facebook Telegram Linkin
ម៉ិកស៊ិក៖ កាលពីថ្ងៃអង្គារ (២៩ សីហា) រដ្ឋាភិបាលម៉ិកស៊ិកបានដាក់ពង្រាយកងកម្លាំងប្រដាប់អាវុធឆ្លងកាត់ទីក្រុងព្រំដែន Ciudad Juarez ( ស៊ីអ៊ូដាដ វ៉ារ៉េស) ដើម្បីប្រយុទ្ធប្រឆាំងនឹងក្រុមឧក្រិដ្ឋកម្មដែលមានអង្គការចាត់តាំង។ ក្រុមទាហានបានចុះចតនៅអាកាសយានដ្ឋានអន្តរជាតិនៃទីក្រុង Ciudad Juarez រដ្ឋ Chihuahua (ឈី វ៉ាវ៉ា) ហើយបានដើរដង្ហែតាមដងផ្លូវក្នុងបេសកកម្មដើម្បីការពារមនុស្សឃាត និងការជួញដូរជនអន្តោប្រវេសន៍ផងដែរ។អត្រាឃាតកម្មបានធ្លាក់ចុះកាលពីឆ្នាំមុន ប៉ុន្តែរដ្ឋាភិបាលរបស់ប្រធានាធិបតីប្រទេសម៉ិកស៊ិក លោក Andres Manuel Lopez Obrador នៅតែបន្តចុះឈ្មោះចំនួនសរុបនៃឃាតកម្ម សម្រាប់រដ្ឋបាលរយៈពេល៦ឆ្នាំ។ កាលពីឆ្នាំមុន បញ្ជីឈ្មោះអ្នកបាត់ខ្លួនជាផ្លូវការរបស់អាជ្ញាធរមានលើសពី១០ម៉ឺននាក់ ហើយឥឡូវនេះមានចំនួនប្រមាណជាង១១២.០០០នាក់។ តួលេខនោះបានកើនឡើង បន្ទាប់ពីសង្គ្រាមរបស់អតីតប្រធានាធិបតីម៉ិកស៊ិក លោកFelipe Calderon ទៅលើក្រុមជួញដូរគ្រឿងញៀនដ៏មានឥទ្ធិពលរបស់ប្រទេសនេះមក៕

ស្ថានទូតអាមេរិកប្រចាំប្រទេសហៃទី ជំរុញឲ្យពលរដ្ឋខ្លួនចាកចេញពីប្រទេសនេះឲ្យឆាប់បំផុតតាមដែលអាចធ្វើទៅបាន

2023/08/31 01:28:23 pm        107
Facebook Telegram Linkin
ហៃទី៖ កាលពីថ្ងៃពុធ (៣០សីហា) ស្ថានទូតអាមេរិកក្នុងប្រទេសហៃទី បានជំរុញឱ្យពលរដ្ឋរបស់ខ្លួននៅក្នុងប្រទេសសមុទ្រការ៉ាអ៊ីបមួយនេះ ចាកចេញ «ឱ្យបានឆាប់បំផុតតាមដែលអាចធ្វើបាន» ដោយលើកឡើងពីបញ្ហាប្រឈមផ្នែកសន្តិសុខ និងហេដ្ឋារចនាសម្ព័ន្ធ ដោយសារកំណើននៃអំពើហិង្សា បានធ្វើឱ្យមនុស្សរាប់ពាន់នាក់ផ្លាស់ប្ដូរទីលំនៅ និងបញ្ហាមនុស្សឃាតកើនឡើងយ៉ាងខ្លាំង។ ស្ថានទូតនវបាននិយាយនៅក្នុងសេចក្តីថ្លែងការណ៍មួយថា «ពលរដ្ឋអាមេរិកនៅក្នុងប្រទេសហៃទី គួរតែចាកចេញពីប្រទេសហៃទីឱ្យបានឆាប់តាមដែលអាចធ្វើទៅបាន តាមរយៈការដឹកជញ្ជូនពាណិជ្ជកម្ម ឬឯកជន» ដោយជំរុញឱ្យមានការប្រុងប្រយ័ត្នបំផុត។សង្គ្រាមក្រុមជនអន្ធពាលដែលកំពុងកើនឡើងនៅក្នុងប្រទេសហៃទី បានបណ្តាលឱ្យមានវិបត្តិមនុស្សធម៌ដ៏បំផ្លិចបំផ្លាញ ដែលបានជម្លៀសប្រជាជនប្រហែល២០០.០០០នាក់នៅទូទាំងប្រទេស ហើយបានធ្វើឱ្យមនុស្សប្រហែល៥.២លាននាក់ ដែលជាចំនួនជិតពាក់កណ្តាលនៃចំនួនប្រជាជនរបស់ប្រទេសហៃទី ត្រូវការជំនួយមនុស្សធម៌ នេះបើយោងតាមអង្គការសហប្រជាជាតិ។ កាលពីដើមខែនេះ ស្ថានទូតអាមេរិកក្នុងរដ្ឋធានី Port-au-Prince បានបិទជាបណ្តោះអាសន្ន ដោយសារតែមានការបាញ់កាំភ្លើងនៅក្នុងបរិវេណនោះផងដែរ៕

កូរ៉េខាងជើងចាប់ផ្តើមសមយុទ្ធវាយប្រហារនុយក្លេអ៊ែរតាក់ទិចដើម្បីប្រឆាំងនឹងសមយុទ្ធអាមេរិក-កូរ៉េខាងត្បូង

2023/08/31 01:24:52 pm        77
Facebook Telegram Linkin
កូរ៉េខាងជើង៖ ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃព្រហស្បតិ៍ (៣១សីហា) នេះថា ប្រទេសកូរ៉េខាងជើងបានធ្វើការវាយប្រហារនុយក្លេអ៊ែរនិមិត្ត «កម្ទេចឲ្យក្លាយជាគំនរផះផង់» លើគោលដៅនានាទូទាំងប្រទេសកូរ៉េខាងត្បូង ជាប្រតិកម្មតបទៅនឹងសមយុទ្ធសម្ព័ន្ធមិត្តអាមេរិក-កូរ៉េខាងត្បូង ដែលខ្លួនបាននិយាយថា ស្មើនឹងផែនការសម្រាប់ការវាយប្រហារនុយក្លេអ៊ែរជាមុនដោយសហរដ្ឋអាមេរិក។អគ្គសេនាធិការនៃកងទ័ពប្រជាជនកូរ៉េខាងជើង (KPA) បាននិយាយនៅក្នុងសេចក្តីថ្លែងការណ៍មួយ ដែលធ្វើឡើងដោយទីភ្នាក់ងារសារព័ត៌មាន KCNA ថា អង្គភាពមីស៊ីលបានបាញ់មីស៊ីលបាលិស្ទិកចំនួនពីរគ្រាប់ និងអនុវត្តយ៉ាងត្រឹមត្រូវនូវ «បេសកកម្មវាយប្រហារនុយក្លេអ៊ែរ» របស់ខ្លួន។ យោធាកូរ៉េខាងត្បូងបាននិយាយថា កូរ៉េខាងជើងបានបាញ់មីស៊ីលបាលិស្ទិករយៈចម្ងាយខ្លីចំនួនពីរគ្រាប់ចូលទៅក្នុងសមុទ្រកាលពីថ្ងៃពុធ ប៉ុន្មានម៉ោងបន្ទាប់ពីសហរដ្ឋអាមេរិកបានបញ្ជូនយន្តហោះទម្លាក់គ្រាប់បែក B-1B សម្រាប់សមយុទ្ធដែនអាកាសសម្ព័ន្ធមិត្តនោះ។ ការបាញ់បង្ហោះចុងក្រោយនេះបានកើតឡើងមួយថ្ងៃ មុនពេលកូរ៉េខាងត្បូង និងសហរដ្ឋអាមេរិកបញ្ចប់សមយុទ្ធយោធារួមគ្នារយៈពេល១១ថ្ងៃរបស់ខ្លួន ដែលទីក្រុងព្យុងយ៉ាងបានរិះគន់ជាយូរមកហើយថា ជាលំហាត់សមសង្គ្រាម។ទីភ្នាក់ងារ KCNA រាយការណ៍ថា មេដឹកនាំកូរ៉េខាងជើង លោក គីម ជុងអ៊ុន កាលពីថ្ងៃអង្គារ បានសង្កេតឃើញផ្នែកនៃសមយុទ្ធដែលពាក់ព័ន្ធនឹងក្រុមមន្ត្រីបញ្ជាការ ព្រមទាំងផ្នែកបុគ្គលិកនៃកងទ័ពទាំងមូល ក្នុងគោលបំណងរៀបចំពួកគេសម្រាប់សង្រ្គាមទាំងស្រុងជាមួយកូរ៉េខាងត្បូង។ របាយការណ៍នោះបាននិយាយថា សមយុទ្ធនេះបាននិមិត្តទប់ទល់នឹងការឈ្លានពានភ្លាមៗ បន្ទាប់មកចាប់ផ្តើមការវាយប្រហារតបតដើម្បីកាន់កាប់ «ទឹកដីទាំងមូលនៃតំបន់ពាក់កណ្តាលភាគខាងត្បូង»។ ជាមួយគ្នានេះដែរ ជប៉ុន បានតវ៉ាជុំវិញបញ្ហានេះ ចំណែកឯសហរដ្ឋអាមេរិក បានថ្កោលទោសកូរ៉េខាងជើងចំពោះការបាញ់មីស៊ីលបាលិស្ទិកចំនួន២គ្រាប់នេះ ដោយសារតែវាបំពានសេចក្ដីសម្រេចជាច្រើនរបស់ក្រុមប្រឹក្សាសន្តិសុខអង្គការសហប្រជាជាតិ៕

គ្រូពេទ្យស្ម័គ្រចិត្តខ្មែរ និងម៉ាឡេស៊ី ចុះអប់រំអំពីការថែទាំសុខភាពដល់ពលរដ្ឋនៅក្រុងតាខ្មៅ

2023/08/31 01:21:11 pm        36
Facebook Telegram Linkin
កណ្ដាល៖ ដោយមានការជួយសម្របសម្រួលពីសមាគមន៍សម្ព័ន្ធយុវជនមូស្លីមកម្ពុជា ក្រុម​គ្រូពេទ្យស្ម័គ្រចិត្តខ្មែរ ​និងមកពីប្រទេសម៉ាឡេស៊ី ​ចំនួនជាង៤០នាក់ ​បានចុះជួយអប់រំផ្សព្វផ្សាយ អំពីការថែទាំសុខភាព ដល់ប្រជាពលរដ្ឋ នៅក្នុងមូលដ្ឋានក្រុងតាខ្មៅ រួមទាំងបានផ្ដល់នូវសម្ភារមួយចំនួនដល់កុមារផងដែរ ។នៅក្នុងពិធីផ្សព្វផ្សាយអប់រំពីសុខភាព ក្នុងសង្កាត់ដើមមៀន ក្រុងតាខ្មៅ នៅថ្ងៃទី៣១ ខែសីហា នេះ ឯកឧត្តម ណាសៀត អូស្មាន ទីប្រឹក្សារាជរដ្ឋាភិបាល និងជាប្រធានសមាគមន៍សម្ព័ន្ធយុវជន​មុស្លីម​កម្ពុជា បានលើកឡើងថា ការអប់រំអំពីបញ្ហាសុខភាព​ គឺធ្វើយ៉ាងណាឲ្យពលរដ្ឋចេះអនាម័យ រស់នៅស្អាត ​ដើម្បីឲ្យមានសុខភាពល្អ ​ហើយសកម្មភាពអប់រំផ្សព្វផ្សាយនេះ​ តែងតែធ្វើរឿយៗ នៅទូទាំងប្រទេស ។ឯកឧត្តម បានបន្តថា ចំពោះសកម្មភាពចូលរួមជាមួយរាជរដ្ឋាភិបាលកម្ពុជា ​លើវិស័យសុខាភិបាល​នេះ ក្រៅពីការអប់រំផ្សព្វផ្សាយ ​ក៏មានការចុះជួយពិនិត្យព្យាបាលជំងឺ ​ដោយស្ម័គ្រចិត្ត ​ដល់ពលរដ្ឋ នៅ​តាមសហគមន៍ ជាមួយនឹងការផ្ដល់នូវសម្ភារៈ ឬថ្នាំព្យាបាលជំងឺ​ ហើយឯកឧត្ដម ក៏បានថ្លែង​អំណរគុណដល់រាជរដ្ឋាភិបាល ​ដែលបានផ្ដល់ឱកាស​ដល់សាសនិកឥស្លាម​នៅកម្ពុជា និង​មកពីក្រៅប្រទេសបាន ចូលរួមសកម្មភាពមនុស្សធម៌ ​ដោយគ្មានការរើសអើង ។តំណាងក្រុមគ្រូពេទ្យស្ម័គ្រចិត្ត ​នៃប្រទេសម៉ាឡេស៊ី ​បានលើកឡើងថា ពួកគេពិតជាសប្បាយចិត្ត ក្នុងការ​ចូលរួមលើវិស័យសុខុមាលភាពនៅក្នុងប្រទេសកម្ពុជា និងអរគុណផងដែរដល់អ្នក​ពាក់ព័ន្ធ​ទាំងអស់ ក្នុងការសម្របសម្រួលលើការងារអប់រំសុខភាពនេះ ​បានប្រព្រឹត្តិទៅដោយរលូន ។គួរបញ្ជាក់ថា ​នៅថ្ងៃស្អែក ថ្ងៃទី១ ខែកញ្ញា ឆ្នាំ២០២៣ ​ក្រុមគ្រូពេទ្យស្ម័គ្រចិត្តខ្មែរ និងម៉ាឡេស៊ី ​នឹង បន្តទៅ​អប់រំផ្សព្វផ្សាយ ​អំពីការថែទាំសុខភាព ​ដល់ប្រជាពលរដ្ឋ ​នៅស្រុកបុរីជលសា ខេត្តតាកែវ ផងដែរ៕អត្ថបទ៖ បាន សុខរិទ្ធិ 

ថ្នាក់ដឹកនាំកម្ពុជាជាច្រើនរូបចូលរួមអបអរសាទរខួបលើកទី៧៨ នៃទិវាបុណ្យឯករាជ្យជាតិរបស់វៀតណាម

2023/08/31 01:12:17 pm        157
Facebook Telegram Linkin
ភ្នំពេញ៖ ស្ថានទូតវៀតណាមប្រចាំព្រះរាជាណាចក្រកម្ពុជា នៅល្ងាចថ្ងៃទី៣០ ខែសីហា ឆ្នាំ២០២៣នេះ ​បានរៀបចំ បានប្រារព្ធពិធីអបអរសាទរខួបលើកទី៧៨ នៃទិវាបុណ្យឯករាជ្យជាតិ នៃសាធារណរដ្ឋសង្គមនិយមវៀតណាម​ (ថ្ងៃទី២ ខែកញ្ញា ឆ្នាំ១៩៤៥ ដល់ថ្ងៃទី២ ​ខែកញ្ញា ឆ្នាំ២០២៣)។ ពិធីនេះបានធ្វើនៅសណ្ឋាគារសូហ្វីតែល រាជធានីភ្នំពេញ។កម្មវិធីនេះមានការអញ្ជើញចូលរួមពីសំណាក់សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សា​ផ្ទាល់​ព្រះមហាក្សត្រ, លោកជំទាវកិត្តិសង្គហបណ្ឌិត ឃួន សុដារី ប្រធានរដ្ឋសភាកម្ពុជា, ឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីក្រសួងការបរទេស ​និងសហប្រតិបត្តិការអន្តរជាតិ, ទេសរដ្ឋមន្ត្រី រដ្ឋមន្ត្រី ​អគ្គមេបញ្ជាការនៃកងយោធពលខេមរភូមិន្ទ ព្រមទាំងឥស្សរជនជាន់​ខ្ពស់កម្ពុជាជាច្រើនរូបទៀត។លោក NGUYEN HUY TANG ឯកអគ្គរដ្ឋទូតវៀតណាម​ ប្រចាំកម្ពុជា បានសូមចូលរួមអបអរសាទរ​យ៉ាងក្លៀវក្លា ​ចំពោះលទ្ធផល ​នៃការបោះឆ្នោតជ្រើសតាំង ​តំណាងរាស្ត្រនីតិកាលទី៧ កាល​ពីថ្ងៃទី២៣ ខែកក្កដា ឆ្នាំ២០២៣កន្លងមក​ និងមានជំនឿជឿជាក់ថា ​ក្រោមព្រះរាជកិច្ចដឹកនាំប្រកប​ដោយ​សុភវិនិច្ឆ័យ​របស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណចក្រកម្ពុជា ​កិច្ចដឹកនាំដ៏ឈ្លាសវៃរបស់ព្រឹទ្ធសភា រដ្ឋសភា ជាពិសេសការ​ប្រតិបត្តិប្រកបដោយមានប្រសិទ្ធភាពនៃរាជរដ្ឋាភិបាលថ្មី ដែលមាន​ឯកឧត្តមកិត្តិទេសាភិបាល​បណ្ឌិត ហ៊ុន ម៉ាណែត នាយករដ្ឋមន្ត្រីជាប្រមុខ ប្រទេសកម្ពុជា​នឹងឈានចូលក្នុងសម័យកាលរីក​ចម្រើន​ថ្មីមួយ ​អត្តភាពនិងកិត្យានុភាព របស់ប្រទេសកម្ពុជាត្រូវបានលើកកម្ពស់នៅក្នុងតំបន់ និងលើឆាកអន្តរជាតិដោយឥតឈប់ឈរ។ ឆ្លៀតឱកាស​ដ៏​មហោឡារិក​នេះ ឯកអគ្គរដ្ឋទូតវៀតណាម សូមសំដែងនូវការដឹងគុណដ៏ស្មោះសរ ជូនចំពោះ​ ថ្នាក់ដឹកនាំ​ និងប្រជាជនកម្ពុជាគ្រប់ជំនាន់​ ព្រមទាំង​មិត្តភ័ក្ដិ​អន្តរជាតិ ដែល​បានផ្ដល់នូវការគាំទ្រ ​និងកិច្ចសហប្រតិបត្តិការដ៏ថ្លៃថ្លា ដល់ប្រជាជនវៀតណាម​ទាំងមូលក្នុងបុព្វហេតុនៃការតស៊ូដណ្តើមឯករាជជាតិកាលពីមុន ​ក៏ដូចជាក្នុងកិច្ចការ កសាង អភិវឌ្ឍប្រទេសជាតិ នាពេលបច្ចុប្បន្ននេះ។នាឱកាសនោះដែរ ឯកឧត្តមឧបនាយករដ្ឋមន្ត្រី សុខ ចិន្តាសោភា បានអបអរសាទរចំពោះសមិទ្ធផលជាច្រើនឥតគណនាដែលបក្សរដ្ឋ ​និងប្រជាជន នៃសាធារណរដ្ឋសង្គមនិយមវៀតណាម ​សម្រេចបានក្នុងរយៈពេល៧៨ឆ្នាំ កន្លងមកនេះគួរ​ជាទីមោទនៈ និងគួរឱ្យ​ស្ញប់ស្ញែង​យ៉ាង​ក្រៃលែង​ ដែលបានបង្ហាញក្តីសង្ឃឹមយ៉ាងមុតមាំថា ក្រោម​ការដឹកនាំរបស់ គណបក្សកម្មុយនីស្តវៀតណាម នឹងបន្តទទួល​បាន​ជោគជ័យយ៉ាង​ត្រចះត្រចង់​បន្ថែមទៀតក្នុងការអភិវឌ្ឍប្រទេស ​ប្រកបដោយសុខសន្តិភាព ​ស្ថិរភាពរឹងមាំរៀងរហូតទៅ។នៅក្នុងឱកាសចូលរួមកម្មវិធីនេះថ្នាក់ដឹកនាំកម្ពុជា បាន​ជួប​ប្រាស្រ័យ​សន្ទនា​ជាមួយបណ្តា​ឯកអគ្គរាជទូត-រដ្ឋទូត ​និងបណ្តាអង្គការដៃគូអន្តរជាតិ​ ជាច្រើនក្នុងការ​ពង្រឹងពង្រីក​ចំណងមិត្តភាព សាមគ្គីភាព ​កិច្ចសហប្រតិបត្តិការលើគ្រប់វិស័យ​ ទាំងស្ថាប័ននីតិប្បញ្ញត្តិ និងនីតិប្រតិបត្តិ ឱ្យកាន់តែរឹងមាំថែមទៀត៕អត្ថបទបាន ចក់

បណ្ដាញសង្គម

ព័ត៌មានថ្មីៗ

រដ្ឋបាលលោក Trump ការពារកិច្ចព្រមព្រៀងអ៊ីរ៉ង់ប្រឆាំងការរិះគន់របស់គណបក្សសាធារណរដ្ឋ
06/19/2026 11:06 AM
Facebook Telegram Linkin
ទេសចរជាតិ-អន្ដរជាតិ៖ អាកាសយានដ្ឋានតេជោ ស័ក្ដិសមនឹងចំណាត់ថ្នាក់​អាកាស​យានថ្មី​ល្អ​លំដាប់​ពិភពលោក
06/19/2026 11:06 AM
Facebook Telegram Linkin
មូលនិធិកសាងឡើងវិញប្រទេសអ៊ីរ៉ង់៣០០ពាន់លានដុល្លារក្នុង MoU ក្លាយជាចំណុចចម្រូងចម្រាស់ខាងនយោបាយនៅអាមេរិក
06/19/2026 11:06 AM
Facebook Telegram Linkin
កម្ពុជា-រុស្ស៊ី ចុះអនុស្សរណៈនៃការយោគយល់គ្នា ពង្រឹងកិច្ចសហប្រតិបត្តិការក្នុងវិស័យកសិកម្ម
06/19/2026 11:06 AM
Facebook Telegram Linkin
គូប្រជែងលោក Starmer ឈ្នះការបោះឆ្នោតសភាដ៏សំខាន់នៅអង់គ្លេស ដែលអាចបង្កឱ្យមានការប៉ុនប៉ងផ្តួលរំលំនាយករដ្ឋមន្ត្រី
06/19/2026 11:06 AM
Facebook Telegram Linkin
បណ្ដាមេដឹកនាំសហភាពអឺរ៉ុប ជំរុញឱ្យប្លុកនេះអះអាងខ្លួនឯងលើជំហរចរចាសន្តិភាពរបស់រុស្ស៊ីនៅអ៊ុយក្រែន
06/19/2026 10:06 AM
Facebook Telegram Linkin
សម្តេចធិបតី នាយករដ្ឋមន្រ្ដី អញ្ជើញនិវត្តន៍ដល់កម្ពុជាវិញ បន្ទាប់ពីចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-រុស្ស៊ី នៅរុស្ស៊ី
06/19/2026 10:06 AM
Facebook Telegram Linkin
លោក Vance ព្រមានអ្នករិះគន់អ៊ីស្រាអែលពីកិច្ចព្រមព្រៀងអ៊ីរ៉ង់ ហើយលោកTrump គឺជាសម្ព័ន្ធមិត្តតែមួយគត់របស់លោកNetanyahu
06/19/2026 10:06 AM
Facebook Telegram Linkin
អ៊ុយក្រែន វាយប្រហាររោងចក្រចម្រាញ់ប្រេងនៅទីក្រុងមូស្គូ ខណៈលោក Zelenskyy ស្វែងរកការគាំទ្រពីលោកTrump ដើម្បីបញ្ចប់សង្គ្រាម
06/19/2026 09:06 AM
Facebook Telegram Linkin
អាមេរិក ដាក់ទណ្ឌកម្មលើមន្ត្រីមានសម្ព័ន្ធភាពជាមួយក្រុមហេសបូឡា ពីការរារាំងដំណើរការសន្តិភាព
06/19/2026 09:06 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.