នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម
សម្ដេចតេជោ អំពាវនាវដល់រាជរដ្ឋាភិបាលយកចិត្តទុកដាក់សាងសង់កន្លែងស្នាក់នៅសម្រាប់សិស្សជាស្ត្រី

នយោបាយ​ និង ការអភិវឌ្ឍន៍

ថ្នាក់ដឹកនាំកម្ពុជាជាច្រើនរូបចូលរួមអបអរសាទរខួបលើកទី៧៨ នៃទិវាបុណ្យឯករាជ្យជាតិរបស់វៀតណាម

2023/08/31 08:12:17 pm        166
Facebook Telegram Linkin
ភ្នំពេញ៖ ស្ថានទូតវៀតណាមប្រចាំព្រះរាជាណាចក្រកម្ពុជា នៅល្ងាចថ្ងៃទី៣០ ខែសីហា ឆ្នាំ២០២៣នេះ ​បានរៀបចំ បានប្រារព្ធពិធីអបអរសាទរខួបលើកទី៧៨ នៃទិវាបុណ្យឯករាជ្យជាតិ នៃសាធារណរដ្ឋសង្គមនិយមវៀតណាម​ (ថ្ងៃទី២ ខែកញ្ញា ឆ្នាំ១៩៤៥ ដល់ថ្ងៃទី២ ​ខែកញ្ញា ឆ្នាំ២០២៣)។ ពិធីនេះបានធ្វើនៅសណ្ឋាគារសូហ្វីតែល រាជធានីភ្នំពេញ។កម្មវិធីនេះមានការអញ្ជើញចូលរួមពីសំណាក់សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សា​ផ្ទាល់​ព្រះមហាក្សត្រ, លោកជំទាវកិត្តិសង្គហបណ្ឌិត ឃួន សុដារី ប្រធានរដ្ឋសភាកម្ពុជា, ឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីក្រសួងការបរទេស ​និងសហប្រតិបត្តិការអន្តរជាតិ, ទេសរដ្ឋមន្ត្រី រដ្ឋមន្ត្រី ​អគ្គមេបញ្ជាការនៃកងយោធពលខេមរភូមិន្ទ ព្រមទាំងឥស្សរជនជាន់​ខ្ពស់កម្ពុជាជាច្រើនរូបទៀត។លោក NGUYEN HUY TANG ឯកអគ្គរដ្ឋទូតវៀតណាម​ ប្រចាំកម្ពុជា បានសូមចូលរួមអបអរសាទរ​យ៉ាងក្លៀវក្លា ​ចំពោះលទ្ធផល ​នៃការបោះឆ្នោតជ្រើសតាំង ​តំណាងរាស្ត្រនីតិកាលទី៧ កាល​ពីថ្ងៃទី២៣ ខែកក្កដា ឆ្នាំ២០២៣កន្លងមក​ និងមានជំនឿជឿជាក់ថា ​ក្រោមព្រះរាជកិច្ចដឹកនាំប្រកប​ដោយ​សុភវិនិច្ឆ័យ​របស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណចក្រកម្ពុជា ​កិច្ចដឹកនាំដ៏ឈ្លាសវៃរបស់ព្រឹទ្ធសភា រដ្ឋសភា ជាពិសេសការ​ប្រតិបត្តិប្រកបដោយមានប្រសិទ្ធភាពនៃរាជរដ្ឋាភិបាលថ្មី ដែលមាន​ឯកឧត្តមកិត្តិទេសាភិបាល​បណ្ឌិត ហ៊ុន ម៉ាណែត នាយករដ្ឋមន្ត្រីជាប្រមុខ ប្រទេសកម្ពុជា​នឹងឈានចូលក្នុងសម័យកាលរីក​ចម្រើន​ថ្មីមួយ ​អត្តភាពនិងកិត្យានុភាព របស់ប្រទេសកម្ពុជាត្រូវបានលើកកម្ពស់នៅក្នុងតំបន់ និងលើឆាកអន្តរជាតិដោយឥតឈប់ឈរ។ ឆ្លៀតឱកាស​ដ៏​មហោឡារិក​នេះ ឯកអគ្គរដ្ឋទូតវៀតណាម សូមសំដែងនូវការដឹងគុណដ៏ស្មោះសរ ជូនចំពោះ​ ថ្នាក់ដឹកនាំ​ និងប្រជាជនកម្ពុជាគ្រប់ជំនាន់​ ព្រមទាំង​មិត្តភ័ក្ដិ​អន្តរជាតិ ដែល​បានផ្ដល់នូវការគាំទ្រ ​និងកិច្ចសហប្រតិបត្តិការដ៏ថ្លៃថ្លា ដល់ប្រជាជនវៀតណាម​ទាំងមូលក្នុងបុព្វហេតុនៃការតស៊ូដណ្តើមឯករាជជាតិកាលពីមុន ​ក៏ដូចជាក្នុងកិច្ចការ កសាង អភិវឌ្ឍប្រទេសជាតិ នាពេលបច្ចុប្បន្ននេះ។នាឱកាសនោះដែរ ឯកឧត្តមឧបនាយករដ្ឋមន្ត្រី សុខ ចិន្តាសោភា បានអបអរសាទរចំពោះសមិទ្ធផលជាច្រើនឥតគណនាដែលបក្សរដ្ឋ ​និងប្រជាជន នៃសាធារណរដ្ឋសង្គមនិយមវៀតណាម ​សម្រេចបានក្នុងរយៈពេល៧៨ឆ្នាំ កន្លងមកនេះគួរ​ជាទីមោទនៈ និងគួរឱ្យ​ស្ញប់ស្ញែង​យ៉ាង​ក្រៃលែង​ ដែលបានបង្ហាញក្តីសង្ឃឹមយ៉ាងមុតមាំថា ក្រោម​ការដឹកនាំរបស់ គណបក្សកម្មុយនីស្តវៀតណាម នឹងបន្តទទួល​បាន​ជោគជ័យយ៉ាង​ត្រចះត្រចង់​បន្ថែមទៀតក្នុងការអភិវឌ្ឍប្រទេស ​ប្រកបដោយសុខសន្តិភាព ​ស្ថិរភាពរឹងមាំរៀងរហូតទៅ។នៅក្នុងឱកាសចូលរួមកម្មវិធីនេះថ្នាក់ដឹកនាំកម្ពុជា បាន​ជួប​ប្រាស្រ័យ​សន្ទនា​ជាមួយបណ្តា​ឯកអគ្គរាជទូត-រដ្ឋទូត ​និងបណ្តាអង្គការដៃគូអន្តរជាតិ​ ជាច្រើនក្នុងការ​ពង្រឹងពង្រីក​ចំណងមិត្តភាព សាមគ្គីភាព ​កិច្ចសហប្រតិបត្តិការលើគ្រប់វិស័យ​ ទាំងស្ថាប័ននីតិប្បញ្ញត្តិ និងនីតិប្រតិបត្តិ ឱ្យកាន់តែរឹងមាំថែមទៀត៕អត្ថបទបាន ចក់

យ៉ាងហោចណាស់មនុស្ស ៥២នាក់បានស្លាប់ ដោយអគ្គិភ័យឆេះផ្ទះនៅទីក្រុង Johannesburg អាហ្វ្រិកខាងត្បូង

2023/08/31 08:02:35 pm        91
Facebook Telegram Linkin
[BREAKING NEWS] ក្រុមអាជ្ញាធរនិយាយថា មនុស្សយ៉ាងហោចណាស់ ៥២នាក់បានស្លាប់ បន្ទាប់ពីអគ្គិភ័យមួយបានផ្ទុះឡើងនៅក្នុងប្លុកផ្ទះល្វែងមួយកន្លែងនៅទីក្រុង Johannesburg ប្រទេសអាហ្វ្រិកខាងត្បូង៕

ចិនចេញការព្រមានកម្រិតខ្ពស់បំផុតពីព្យុះទីហ្វុង ខណៈព្យុះ Saola បក់ឆ្ពោះទៅកាន់ក្រុងហុងកុង

2023/08/31 07:44:23 pm        108
Facebook Telegram Linkin
ចិន៖ ប្រទេសចិន បានចេញការព្រមានពីព្យុះទីហ្វុងកម្រិតខ្ពស់បំផុតនៅថ្ងៃព្រហស្បតិ៍នេះ ខណៈព្យុះទីហ្វុង Saola បានរំកិលចូលមកកាន់តែកៀកនៅឆ្នេរភាគអាគ្នេយ៍ ដែលនឹងគំរាមកំហែងដល់ក្រុងហុងកុង និងមជ្ឈមណ្ឌលផលិតធំៗដ៏ទៃទៀត នៅក្នុងខេត្ត Guangdong ដែលនៅជិតខាង។ ការរិយាល័យព្យាករណ៍របស់ចិន បានចេញការព្រមានព័ណ៌ក្រមហមអំពីព្យុះទីហ្វុងនៅព្រឹកម៉ោង៦ ម៉ោងក្នុងតំបន់។ មជ្ឈមណ្ឌលឧត្តុនិយមជាតិប្រទេសចិន បាននិយាយថា ព្យុះ Saola ដែលបច្ចុប្បន្នស្ថិតនៅចម្ងាយប្រមាណ២៩៥គីឡូម៉ែត្រភាគអាគ្នេយ៍ខេត្ត Guangdong នឹងបក់ឆ្ពោះទៅភាគពាយព្យឆ្លងកាត់សមុទ្រចិនខាងត្បូង ក្នុងល្បឿន១០គីឡូម៉ែត្រក្នុងមួយម៉ោងដែលកំពុងខិតទៅជិតជាលំដាប់ទៅរកឆ្នេរ ខេត្ត Guangdong ដែលក្រោយមកបានចុះខ្សោយកម្លាំងយ៉ាងយឺត។មជ្ឈមណ្ឌលនិយាយថា ព្យុះទីហ្វុង Saola នឹងបោកបក់ដល់ដីគោកតាមបណ្តោយឆ្នេរ នៅកន្លែងមួយចំនួនមកពីតំបន់Huilai ខេត្ត Guangdong ទៅកាន់ទីក្រុងហុងកុង នៅពេលរសៀលដល់យប់ថ្ងៃទី១ ខែកញ្ញា។យោងតាមប្រព័ន្ធផ្សព្វផ្សាយក្នុងតំបន់ បានឲ្យដឹងថា ស្ថានីយ៍រថភ្លើងរបស់ប្រទេសចិន បានផ្អាករថភ្លើងសំខាន់ៗជាច្រើនខ្សែ ហើយទីក្រុងសៀងហៃ បានបញ្ឈប់រថភ្លើងទៅកាន់ខេត្ត Guangdong ។ស្ថានីយ៍អង្កេតនៅក្រុងហុងកុងបានកត់សំគាល់ថា ព្យុះទីហ្វុង saola នឹងនាំមកនូវព្យុះកើនឡើង ទៅកាន់តំបន់ទំនាបតំបន់ឆ្នេរ ដែលតាមការប៉ាន់ប្រមាណព្យុះ Saola បច្ចុប្បន្នមានចម្ងាយប្រមាណ៤៤០គីឡូម៉ែត្រពីទីប្រជុំជនទីក្រុង៕

ប្រទេសជប៉ុនមើលឃើញការធ្វើកូដកម្មដ៏កម្រ ខណៈបុគ្គលិកនៅហាងទំនិញតវ៉ាការលក់តាមផែនការ

2023/08/31 07:42:09 pm        151
Facebook Telegram Linkin
ជប៉ុន៖ បុគ្គលិកនៅហាងទំនិញធំមួយនៅទីក្រុងតូក្យូ បានធ្វើកូដកម្មនៅថ្ងៃព្រហស្បតិ៍នេះ បន្ទាប់ពីកិច្ចពិភាក្សាជាមួយគណៈគ្រប់គ្រង ជុំវិញការលក់តាមផែនការរបស់ក្រុមហ៊ុន បានបរាជ័យ ដែលបណ្តាលឲ្យមានការធ្វើកូដកម្មទ្រង់ទ្រាយធំលើកដំបូង ដែលប្រទេសនេះពុំបានមើលឃើញក្នុងរយៈពេលជាច្រើនទសវត្សរ៍មកនេះ។  បុគ្គលិកប្រមាណ៩០០នាក់ នៅហាងទំនិញ Seibu ដ៏ធំមួយនៅក្នុងសង្កាត់ Ikebukuro ដ៏ច្របូកច្របល់ កំពុងតវ៉ាការលក់តាមផែនការរបស់ក្រុមហ៊ុន Sogo & Seibu។ពួកគេកំពុងស្វែងរកការងារ និងការធានាការបន្តអាជីវកម្ម ដែលមិនសប្បាយចិត្តជាមួយផែនការដែលបានរាយការណ៍សម្រាប់ក្រុមហ៊ុន Yodobashi Holdings លក់រាយគ្រឿងអេឡិចត្រូនិកបញ្ចុះតម្លៃ ដើម្បីធ្វើឲ្យមានចំនួនលើសពាក់កណ្តាលរបស់ហាង។ការធ្វើកូដកម្មនានា ពិតជាកម្រកើតមាននៅក្នុងប្រទេសជប៉ុន ជាកន្លែងដែលការចរចាជុំវិញប្រាក់ឈ្នួល និងលក្ខខណ្ឌការងារ បានព្រមព្រៀងជាធម្មតា។ ការធ្វើកូដកម្មរយៈពេល១ថ្ងៃនេះគឺជាលើកដំបូងនៅហាងទំនិញជប៉ុនដ៏ធំ ក្នុងរយៈពេល៦១ឆ្នាំមកនេះ បន្ទាប់ពីជាច្រើនខែនៃការចរចារវាងគណៈគ្រប់គ្រងក្រុមហ៊ុន Sogo & Seibu និងសហជីពបុគ្គលិក។នៅព្រឹកថ្ងៃព្រហស្បតីនេះ បុគ្គលិកក្រុមហ៊ុន Seibu បានតវ៉ានៅខាងមុខហាងខណៈសមាជិកនៃសហជីពផ្សេងៗ បានចែកខិត្តប័ណ្ណ ក្នុងការគាំទ្រ ទោះបីជាមានកម្តៅខ្លាំងនៅរដូវក្តៅក៏ដោយ ដែលមានការប្រមូលផ្តុំដោយអ្នកថតរូប និងបុគ្គលិកទូរទស្សន៍៕

សមយុទ្ធយោធាអាមរិក-កូរ៉េខាងត្បូង ធ្វើព្រងើយចំពោះការព្រមានរបស់កូរ៉េខាងជើង

2023/08/31 07:39:15 pm        146
Facebook Telegram Linkin
អាមេរិក៖ យោធារបស់ប្រទេសកូរ៉េខាងត្បូង នៅថ្ងៃព្រហស្បតិ៍នេះ បាននិយាយថា ខ្លួនកំពុងធ្វើសមយុទ្ធយុទ្ធសាស្ត្រនៅទីវាលទ្រង់ទ្រាយធំ ជាផ្នែកនៃសមយុទ្ធខែលការពារសេរីភាព Ulchi ដែលកងទ័ពកូរ៉េខាងត្បូង និងសហរដ្ឋអាមេរិក បានចាប់ផ្តើមកាលពីសប្តាហ៍មុន។ នៅក្នុងវីដេអូ ដែលបានផ្តល់ឲ្យដោយកងទ័ព បានឲ្យដឹងថា រថក្រោះយោធាជាច្រើនគ្រឿង ត្រូវបានគេឃើញធ្វើសមយុទ្ធបាញ់នៅទីវាលខាងក្រៅ អំឡុងការបណ្តុះបណ្តាលនៅលើទីលាន។កងទ័ពនិយាយថា ខ្លួនបានដាក់ពង្រាយទាហានប្រមាណ១៦០០នាក់ និងយុទ្ធោបករណ៍៤៥០គ្រឿង រួមមាន រថក្រោះK1A2 និងកាំភ្លើងធំផ្លោងស្វ័យកម្មK9A1 នៅក្នុងតំបន់ Pocheon និងតំបន់ Choerwon នៅជិតព្រំដែនជាមួយប្រទេសកូរ៉េខាងជើង អំឡុងការបណ្តុះបណ្តាលរយៈពេល៥ថ្ងៃ ដែលបានចាប់ផ្តើមកាលពីថ្ងៃចន្ទ។ប្រទេសកូរ៉េខាងត្បូង និងសហរដ្ឋអាមេរិក បានកំណត់ពេលបញ្ចប់សមយុទ្ធរដូវក្តៅខែលការពារសេរីភាព Ulchi ដែលបានរៀបចំឡើងដើម្បីពង្រីកការឆ្លើយតបរួមរបស់ពួកគេ ចំពោះការគំរាមមីស៊ីល និងនុយក្លេអ៊ែររបស់ប្រទេសកូរ៉េខាងជើងនៅថ្ងៃព្រហស្បតិ៍នេះ។ ទីក្រុងព្យុងយ៉ាង បានរិះគន់ជាយូរមកហើយចំពោះសមយុទ្ធនេះ ថាជាការហាត់សមសម្រាប់សង្គ្រាម៕

កសិករពេញចិត្តក្រសួងជំនាញ ប្រកាសប្រើលេខទូរសព្ទ១២៨៩ ផ្តល់ដំណោះស្រាយលើបច្ចេកទេសកសិកម្ម

2023/08/31 07:39:08 pm        159
Facebook Telegram Linkin
ភ្នំពេញ៖ នៅពេលនេះ ក្រសួងប្រៃសណីយ៍ និងទូរគមនាគមន៍ និងក្រសួងកសិកម្ម រុក្ខាប្រមាញ់ និង​នេសាទ ប្រកាសផ្លាស់ប្តូរ ​និងប្រើប្រាស់លេខទូរសព្ទ១២៨៩ ​ដើម្បីឲ្យកសិករនានា​ ទូរសព្ទហៅសួរ ទៅមន្ត្រីជំនាញកសិកម្ម ​ជួយដោះស្រាយផ្នែកបច្ចេកទេសកសិកម្ម ​ការផ្តល់ប្រឹក្សារបៀបដាំដំណាំ និងការចិញ្ចឹមសត្វជាដើម​។លោក ម៉ៅ មីនា​ ប្រធាននាយកដ្ឋានផ្សព្វផ្សាយកសិកម្ម រុក្ខាប្រមាញ់ ​និងនេសាទ ​នៃក្រសួងកសិកម្ម បានប្រាប់BTV នៅថ្ងៃទី៣១ ​ខែសីហានេះថា នៅពេលនេះ​ ក្រសួងកសិកម្ម បាន​សម្រេច​ផ្លាស់ប្តូរប្រព័ន្ធលេខទូរសព្ទពីលេខ ១៨០០ ២០១៥ ៦៨ មកប្រើប្រាស់ ប្រព័ន្ធលេខទូរសព្ទ ១២៨៩ វិញ ដើម្បីឲ្យប្រជាកសិករ ងាយស្រួលចងចាំ និងអាចខលហៅសួរមន្ត្រីជំនាញកសិកម្ម ដោយមិនគិតថ្លៃ​សេវាទូរសព្ទ អំពីការផ្តល់ដោះស្រាយ ​និងការផ្តល់ប្រឹក្សាយោបល់ជូនកសិករ លើ​ផ្នែកបច្ចេកទេសកសិកម្ម និងទីផ្សារកសិផលជាដើម។លោក ម៉ៅ មីនា ថ្លែងថា ចំពោះទូរសព្ទលេខ ១២៨៩ ថ្មីនេះ គឺគ្រប់កសិករអាចខលហៅសួរ មន្ត្រីជំនាញ​កសិកម្មដោយផ្ទាល់ ​ចាប់ពីថ្ងៃច័ន្ទដល់ថ្ងៃសុក្រ ​និងចាប់ពីម៉ោង ​៨:៣០ព្រឹក​ រហូតម៉ោង ១១:៣០ថ្ងៃត្រង់ ហើយរសៀលចាប់ពីម៉ោង១:៣០នាទី ដល់ម៉ោង៤ល្ងាច។បណ្តាកសិករ នៅសង្កាត់សិត្បូ ក្រុងតាខ្មៅ ខេត្តកណ្តាល បានថ្លែងការពេញចិត្តជាខ្លាំងចំពោះ ការប្រកាស​ប្រើប្រាស់លេខទូរសព្ទងាយស្រួលចងចាំ ​និងខលហៅសួរ ទាក់ទងបច្ចេកទេស​កសិកម្មដោយមិនគិតថ្លៃសេវាទូរសព្ទ។សូមបញ្ជាក់ថា ទន្ទឹមនឹងការប្រើប្រាស់ប្រព័ន្ធលេខទូរសព្ទបួនលេខ ដើម្បីបម្រើសេវាអតិថិជន និង​កសិករនេះដែរ ក្រសួងកសិកម្ម រុក្ខាប្រមាញ់ និងនេសាទ​ ក៏បានរៀបចំមន្ត្រីជំនាញកសិកម្ម នៅ​តាមខេត្តប្រមាណជាង១០០នាក់ ​ដែលក្នុងមួយខេត្ត មានមន្ត្រី៤រូប រង់ចាំចុះជួបកសិករដោយផ្ទាល់​ផងដែរ ប្រសិនបើនៅពេលកសិករ ​ខលហៅសួរនោះ ​មានតម្រូវការ ​និងស្នើសុំមន្ត្រីជំនាញកសិកម្ម ចុះទៅជួប និងពិនិត្យស្ថានភាពកសិកម្មដោយផ្ទាល់ នៅតាមមូលដ្ឋានកសិករ៕អត្ថបទ ស៊ុម សុខជា

លោក Zelenskyy ទទូចឲ្យមានការពិនិត្យឡើងវិញការសម្រេចស្តីពីអំពើពុករលួយ លើការកែណ្ឌទ័ព

2023/08/31 07:36:19 pm        91
Facebook Telegram Linkin
អ៊ុយក្រែន៖ ប្រធានាធិបតីអ៊ុយក្រែន លោក Volodymyr Zelenskiy កាលពីថ្ងៃពុធ បានអំពាវនាវឲ្យមានការពិនិត្យឡើងវិញការសម្រេចស្តីពីអំពើពុករលួយ ដែលលោកបាននិយាយថា ត្រូវបានបង្កើតឡើងដោយគណៈកម្មការវេជ្ជសាស្ត្រ ដែលដំណើរការលើបញ្ហាថាតើការកែណ្ឌទ័ពសមស្របសម្រាប់អង្គភាពសេវា នៅក្នុងយោធាអ៊ុយក្រែនឬទេ។ ថ្លែងអំឡុងពេលសុន្ទរកថាពេលយប់ លោក Zelenskiy បាននិយាយថាការលើកលែងផ្នែកវេជ្ជសាស្ត្រជាច្រើន ពីអង្គភាពយោធាត្រូវបានផ្តល់ នៅក្នុងតំបន់មួយចំនួន ដែលបានបង្កើនចំនួន១០ដង ហើយការអនុវត្តន៍ច្បាប់នោះបានផ្តល់ឯកសារ គំរូនៃមន្ត្រីដែលទទួលសំណូកមានតម្លៃរាប់ពាន់ដុល្លារ។ប្រទេសអ៊ុយក្រែន បានណែនាំការកែណ្ឌកងទ័ពជាទូទៅ បន្ទាប់ពីការវាយលុកទ្រង់ទ្រាយធំកាលពីខែកុម្ភះឆ្នាំ២០២២របស់រុស្ស៊ី និងទាហានបម្រុង មានអាយុចន្លោះ១៨ឆ្នាំដល់៦០ឆ្នាំ ដែលមានលក្ខណៈគ្រប់គ្រាន់សម្រាប់ការកែណ្ឌទ័ព។យោធាទទួលនូវរឿងអាស្រូវជាច្រើនពាក់ព័ន្ធទៅនឹងអំពើពុករលួយ ឬយុទ្ធសាស្ត្រជ្រើសរើសទ័ព។ លោក Zelenskyy បានចុះហត្ថលេខាលើក្រិតមួយកាលពីដើមខែសីហា ដោយធ្វើឲ្យមានសេចក្តីសម្រេចជាផ្លូវការដើម្បីបណ្តេញចេញប្រធានការិយាល័យជ្រើសរើសប្រចាំតំបន់ទាំងអស់ បន្ទាប់ពីការស៊ើបអង្កេតនៅទូទាំងប្រទេស ដែលត្រូវបានរកឃើញករណីជាច្រើនជាប់ពាក់ព័ន្ធទៅនឹងអំពើពុករលួយ ឬការបំពាន៕

សហរដ្ឋអាមេរិក៖ ប្រទេសរុស្ស៊ីនិងកូរ៉េខាងជើងកំពុងធ្វើឲ្យរីកចម្រើនទៅមុខយ៉ាងសកម្ម ក្នុងការចរចាកិច្ចព្រមព្រៀងអាវុធ

2023/08/31 07:08:57 pm        90
Facebook Telegram Linkin
អាមេរិក៖ ប្រទេសរុស្ស៊ី និងកូរ៉េខាងជើង កំពុងធ្វើឲ្យរីកចម្រើនទៅមុខយ៉ាងសកម្មការនូវចរចារបស់ពួកគេលើកិច្ចព្រមព្រៀងសព្វាវុធដ៏សំខាន់ ដែលនឹងផ្តល់គ្រាប់រំសេវសំខាន់ៗសម្រាប់ប្រភេទផ្សេងៗនៃប្រព័ន្ធសព្វាវុធ រួមទាំងកាំភ្លើងធំដែលជាសញ្ញាចុងក្រោយបង្អស់ ដែលវិមានក្រឹមឡាំងអស់សង្ឃឹមក្នុងការទទួលបានសម្ភារៈបន្ថែមទៀតសម្រាប់ការលុកលុយទៅលើអ៊ុយក្រែនដែលកំពុងធ្លាក់ចុះ នេះបើតាមការចុះផ្សាយរបស់ទីភ្នាក់ងារស៊ើបការណ៍សហរដ្ឋអាមេរិក។ព័ត៌មានអំពីកិច្ចព្រមព្រៀងដ៏មានសក្ដានុពលនេះ កើតឡើង បើទោះបីជាប្រទេសកូរ៉េខាងជើងអះអាងជាសាធារណៈផ្ទុយពីនេះក្តី។រដ្ឋបាលលោកបៃដិន (Biden) បាននិយាយកាលពីថ្ងៃពុធថា ពួកគេនៅតែមានការព្រួយបារម្ភថា រដ្ឋឯកោទាំងពីរ កំពុងស្ថិតក្នុងការចរចារផ្នែកសព្វាវុធ ហើយថា បន្ទាប់ពីដំណើរទស្សនកិច្ចរបស់រដ្ឋមន្ត្រីការពារជាតិរុស្ស៊ី លោក Sergei Shoigu ទៅកាន់ប្រទេសកូរ៉េខាងជើង កាលពីខែមុន គណៈប្រតិភូទីពីរនៃមន្ត្រីរុស្ស៊ីបានទៅបំពេញទស្សនកិច្ចនៅទីក្រុងព្យុងយ៉ាង ដើម្បីពិភាក្សាបន្ថែមអំពីកិច្ចព្រមព្រៀងដ៏សំខាន់នេះ។បន្ថែមពីលើគណៈប្រតិភូទីពីរ ប្រធានាធិបតីរុស្ស៊ី លោក វ្ល៉ាឌីមៀ ពូទីន និងមេដឹកនាំកូរ៉េខាងជើង លោក គីម ជុងអ៊ុន បានផ្ញើលិខិតជូនគ្នាទៅវិញទៅមក ដោយសន្យាបង្កើនកិច្ចសហប្រតិបត្តិការទ្វេភាគី នេះបើយោងតាមអ្នកសម្របសម្រួលទំនាក់ទំនងយុទ្ធសាស្ត្រនៃក្រុមប្រឹក្សាសន្តិសុខជាតិ លោក ចន ឃើប៊ី (John Kirby)៕

ពិព័រណ៍ការងារ និងផលិតភាពជាតិ ឆ្នាំ២០២៣ នឹងនាំយកឱកាសការងាររាប់ម៉ឺនកន្លែងសម្រាប់យុវជន

2023/08/31 06:58:59 pm        127
Facebook Telegram Linkin
ភ្នំពេញ៖ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១០ និង១១ ខែវិច្ឆិកា ឆ្នាំ២០២៣ គ្រោងនឹងរៀបចំពិព័រណ៍ការងារ និងផលិតភាពជាតិ ដោយមានកិច្ចសហការជាមួយសហភាពសហព័ន្ធយុវជនកម្ពុជា (UYFC) រាជធានីភ្នំពេញ, សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) និងគាំទ្រដោយដៃគូពាក់ព័ន្ធជាច្រើនទៀត។នៅក្នុងបណ្តាញសង្គម នៅព្រឹកថ្ងៃទី៣១ ខែសីហានេះ ទីភ្នាក់ងារជាតិមុខរបរ និងការងារ បានឲ្យដឹងថា ពិព័រណ៍ការងារថ្នាក់ជាតិដ៏ធំនេះ នឹងអាចទាក់ទាញ និងកៀរគរអ្នកចូលរួមទស្សនា​យ៉ាងច្រើនកុះករ និងនំាមកនូវក្រុមហ៊ុន ​សហគ្រាស គ្រឹះស្ថានអប់រំបណ្តុះបណ្តាលល្បីឈ្មោះ អង្គការជាតិ-អន្ដរជាតិ ព្រមទាំងក្រសួង ស្ថាប័នរដ្ឋាភិបាល ចូលរួមដាក់តាំងបង្ហាញអំពីតម្រូវការ​ជ្រើសរើសកម្លាំង​ពលកម្មប្រមាណជាង ២ម៉ឺនកន្លែង ដែលនឹងចូលរួមតាំងបង្ហាញអំពីតម្រូវការ​ជ្រើសរើស​កម្លាំងពលកម្ម មគ្គទេសក៍ និងបទពិសោធន៍សម្រាប់ឈានចូលទីផ្សារការងារព្រមទាំង​ឱកាសបណ្តុះបណ្តាលជំនាញ។ កម្មវិធីនេះ ក៏នឹងមានរួមបញ្ចូលនូវសិក្ខាសាលាស្តីពី ផលិតភាពថ្នាក់ជាតិក្នុងគោលបំណង​ដើម្បី​លើកកម្ពស់ការយល់ដឹង​ និងបំផុសគំនិតទាក់ទងនឹងផលិតភាព​ តាមរយៈការចែករំលែកចំណេះដឹង បទពិសោធន៍ល្អៗ និង​គន្លឹះសំខាន់ៗ ​ពីសំណាក់វាគ្មិនជំនាញៗ និងផ្សព្វផ្សាយលើកកម្ពស់ការយល់​ដឹង​ពីសារសំខាន់នៃការបង្កើនផលិតភាពការងារ។គិតចាប់តាំងពីឆ្នាំ២០១១មក ទីភ្នាក់ងារជាតិមុខរបរ និងការងារ បានរៀបចំពិព័រណ៍​ការងារថ្នាក់ជាតិ​ដែលជាព្រឹត្តិការណ៍ដ៏ធំប្រចាំឆ្នាំរបស់ខ្លួនចំនួន ១២លើករួចមកហើយ ​ប្រកបដោយភាពជោគជ័យ និងផ្ដល់អត្ថប្រយោជន៍ដ៏ធំធេងដល់ការអភិវឌ្ឍទីផ្សារការងារកម្ពុជា។ ជាការរំពឹងទុក ពិព័រណ៍ការងារ និងផលិតភាពជាតិឆ្នាំ២០២៣ ​នឹងមានក្រុមហ៊ុន សហគ្រាស ក្រសួង ស្ថាប័ន និងគ្រឹះស្ថានអប់រំ​បណ្តុះបណ្តាលចំនួនប្រមាណ១៥០ ដោយនាំយកឱកាសការងារប្រមាណជាងប្រមាណ ២ម៉ឺនកន្លែង ហើយនឹងទាក់ទាញ អ្នកចូលរួមទស្សនាប្រមាណ ៣ម៉ឺននាក់៕

ស្រមោលរបស់សហរដ្ឋអាមេរិក នៅតែគ្របសង្កត់លើអាហ្វហ្គានីស្ថានពីរឆ្នាំ ក្រោយការដកទ័ពចេញ

2023/08/31 06:49:47 pm        87
Facebook Telegram Linkin
អាមេរិក៖ រយៈពេលពីរឆ្នាំបានកន្លងផុតទៅចាប់តាំងពីកងកម្លាំងចម្រុះដឹកនាំដោយសហរដ្ឋអាមេរិកបានចាកចេញពីប្រទេសអាហ្វហ្គានីស្ថាន ប៉ុន្តែផលប៉ះពាល់នៃសង្គ្រាម និងការដាក់ទណ្ឌកម្មរបស់សហរដ្ឋអាមេរិកបានធ្វើឱ្យប្រទេសនេះ មិនអាចដើរចេញពីជម្លោះបាន ជាមួយនឹងដំណែលដ៏គួរឱ្យរន្ធត់។ ក្រុមអ្នកជំនាញនិយាយថា សហរដ្ឋអាមេរិក ដែលប្រញាប់ប្រញាល់ដកខ្លួនចេញពីអាហ្វហ្គានីស្ថាន ដោយមិនយកចិត្តទុកដាក់លើការទទួលខុសត្រូវ និងកាតព្វកិច្ចរបស់ខ្លួន សមនឹងទទួលការស្តីបន្ទោសច្រើនចំពោះភាពចលាចលនេះ បង្កឲ្យវិបត្តិមនុស្សធម៌កាន់តែអាក្រក់ វិបត្តិសេដ្ឋកិច្ចធ្ងន់ធ្ងរ និងការវាយប្រហារភេរវកម្ម ដែលអាមេរិក បានបន្សល់ទុកឲ្យ។នៅចុងខែសីហាឆ្នាំ ២០២១ ទាហានអាមេរិក បានចាកចេញពីអាហ្វហ្គានីស្ថានចុងក្រោយ ប៉ុន្តែវត្តមានរបស់សហរដ្ឋអាមេរិកនៅតែមានឥទ្ធិពលអវិជ្ជមានលើសេដ្ឋកិច្ចរបស់ប្រទេសនេះ។ ក្រុមអ្នកជំនាញនិយាយថា ការលុកលុយ និងការកាន់កាប់របស់សហរដ្ឋអាមេរិកបានបង្កើត ប្រហោងខ្មៅ នៅក្នុងសេដ្ឋកិច្ចរបស់ប្រទេសអាហ្វហ្គានីស្ថាន ដែលបានបំផ្លិចបំផ្លាញទ្រព្យសម្បត្តិជាច្រើនដែលឥឡូវនេះនៅតែមិនអាចគណនាបាន។យោងតាមរបាយការណ៍ចុងក្រោយរបស់ក្របខណ្ឌយុទ្ធសាស្ត្ររបស់អង្គការសហប្រជាជាតិសម្រាប់អាហ្វហ្គានីស្ថានដែលបានចេញផ្សាយកាលពីដើមខែកក្កដា សេដ្ឋកិច្ចរបស់ប្រទេសអាហ្វហ្គានីស្ថានបានធ្លាក់ចុះប្រហែល៣០ ភាគរយនៅចន្លោះឆ្នាំ ២០២០ ដល់ឆ្នាំ ២០២២ ។ ប្រជាជនអាហ្វហ្គានីស្ថានចំនួន ២៤.៤ លាននាក់ត្រូវការជំនួយមនុស្សធម៌ជាចាំបាច់ ហើយមនុស្សចំនួន ៩នាក់ ក្នុងចំណោម ១០ នាក់រស់នៅក្នុងភាពក្រីក្រ។គណៈកម្មាធិការអន្តរជាតិនៃកាកបាទក្រហមបានចង្អុលបង្ហាញថា កុមារគឺជាជនរងគ្រោះដែលងាយរងគ្រោះបំផុតដោយសារគ្រឿងផ្ទុះ ដោយគូសបញ្ជាក់ក្នុងរបាយការណ៍របស់ខ្លួនថា កុមារចំនួន ៦៤០នាក់បានស្លាប់ ឬរងរបួសនៅក្នុងឧប្បត្តិហេតុចំនួន ៥៤១ ដែលពាក់ព័ន្ធនឹងការបំផ្ទុះគ្រាប់មីន និងសំណល់ជាតិផ្ទុះនៅចន្លោះខែមករា ឆ្នាំ ២០២២ ដល់ខែមិថុនា ឆ្នាំ ២០២៣នេះ ជិត ៦០ ភាគរយ នៃចំនួនជនស៊ីវិលសរុបដែលស្លាប់ដោយគ្រាប់មិនទាន់ផ្ទុះ។យោងតាមរបាយការណ៍មួយបពីសាកលវិទ្យាល័យប្រោន (Brown University)របស់សហរដ្ឋអាមេរិក មនុស្សជាង១៧៤.០០០នាក់ បានស្លាប់ក្នុងសង្គ្រាមនៅអាហ្វហ្គានីស្ថាន៕

បណ្ដាញសង្គម

ព័ត៌មានថ្មីៗ

សម្ដេច​ធិបតី៖ បើប្រជាពលរដ្ឋដែលអត់ដីពិតប្រាកដសូមចុះឈ្មោះជាមួយអជ្ញាធរមូលដ្ឋានដើម្បីទទួលបានដី ចៀសវាងការកាប់ទន្ទ្រានដីព្រៃដែលជាទ្រព្យសម្បត្តិរបស់រដ្ឋ
08/17/2026 09:08 AM
Facebook Telegram Linkin
ស្ពានមិត្តភាពកម្ពុជា-ចិន មេគង្គក្រចេះ បាននិងកំពុងរួមចំណែកពង្រឹងបណ្តាញដឹកជញ្ជូនជាតិ និងការតភ្ជាប់រវាងតំបន់កណ្តាល និងភូមិភាគឦសាននៃប្រទេសកម្ពុជា
08/17/2026 09:08 AM
Facebook Telegram Linkin
រដ្ឋមន្រ្តីក្រសួងសាធារណការ ចុះពិនិត្យវឌ្ឍនភាពស្ថានីយប្រព្រឹត្តកម្មទឹកកខ្វក់ខេត្តកំពត
08/17/2026 08:08 AM
Facebook Telegram Linkin
បេសកជនលោក Trump លោក Kushner ជួបជាមួយមេដឹកនាំហាម៉ាស ដើម្បីជំរុញផែនការសន្តិភាពហ្កាហ្សា
08/17/2026 08:08 AM
Facebook Telegram Linkin
លោកTrump៖ អាមេរិកកាត់បន្ថយទំហំសមយុទ្ធយោធាជាមួយកូរ៉េខាងត្បូង ដោយលើកឡើងពីទំនាក់ទំនងល្អជាមួយលោក Kim Jong Un
08/17/2026 08:08 AM
Facebook Telegram Linkin
ប្រជាពលរដ្ឋមានបញ្ហាជំងឺភ្នែកមកពីខេត្តកំពង់ធំ ទទួលបានការពិនិត្យ និងព្យាបាលឥតគិតថ្លៃ នៅមន្ទីរពេទ្យរុស្ស៉ី
08/17/2026 08:08 AM
Facebook Telegram Linkin
រដ្ឋមន្រ្តីកសិកម្មរម្លឹកជាថ្មីដល់មន្រ្តីកសិកម្មឃុំឱ្យបន្តជួយដោះស្រាយបញ្ហាផ្នែកបច្ចេកទេសដល់កសិករដើម្បីទទួលផលចំណេញខ្ពស់
08/17/2026 08:08 AM
Facebook Telegram Linkin
មន្រ្តីជាន់ខ្ពស់ក្រសួងសង្គ្រាមអាមេរិកទៅទស្សនាប្រាសាទអង្គវត្ត បង្ហាញអំពីការគោរពគ្នាទៅវិញទៅមកចំពោះអធិបតេយ្យភាព និងបេតិកភណ្ឌវប្បធម៌កម្ពុជា និងអាមេរិក
08/17/2026 08:08 AM
Facebook Telegram Linkin
ករណីលិចទូកនៅកោះប្រាក់៖ មនុស្ស ៣នាក់បាត់ខ្លួន រកមិនទាន់ឃើញ
08/16/2026 05:08 PM
Facebook Telegram Linkin
ប្រធានក្រុមការងារចុះមូលសង្កាត់ដង្កោ ជំរុញដល់អាជ្ញាធរមូលដ្ឋាន ផ្ដល់​សេវា​ឱ្យ​បាន​ល្អ​ដល់​ប្រជាពលរដ្ឋ
08/16/2026 04:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.