នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម
សម្ដេចតេជោ អំពាវនាវដល់រាជរដ្ឋាភិបាលយកចិត្តទុកដាក់សាងសង់កន្លែងស្នាក់នៅសម្រាប់សិស្សជាស្ត្រី

នយោបាយ​ និង ការអភិវឌ្ឍន៍

ក្រុមការងារចុះស្រង់ទិន្នន័យអ្នកធ្វើការសេវាកម្សាន្តក្រៅប្រព័ន្ធ ដើម្បីឈានទៅសម្ភាសន៍ផ្ដល់ប័ណ្ណសមធម៌

2023/08/17 07:14:24 pm        613
Facebook Telegram Linkin
ភ្នំពេញ៖ បច្ចុប្បន្នក្រុមការងារ ដោយមានភាគីពាក់ព័ន្ធជាច្រើន កំពុងបន្តចុះស្រង់ទិន្នន័យ ក្រុមគោលដៅធ្វើការសេវាកម្សាន្តក្រៅប្រព័ន្ធ ដើម្បីឈានទៅសម្ភាសន៍ផ្ដល់ប័ណ្ណសមធម៌។ នេះជាការបញ្ជាក់របស់ឯឧត្តម កែវ អ៊ូលី ប្រធាននាយកដ្ឋានអត្តសញ្ញាណកម្មគ្រួសារក្រីក្រ នៃក្រសួងផែនការ។មន្រ្តីពាក់ព័ន្ធ និងក្រុមបណ្ដាញនៅតាមរាជធានី-ខេត្ត គឺកំពុងបន្តធ្វើការងារ ស្រង់ទិន្នន័យអ្នកមាន​ជីវភាពក្រលំបាកធ្វើការ សេវាកម្សាន្តទេសចរណ៍ក្រៅប្រព័ន្ធនៅតាមរង្គសាល ឌីស្កូតែត ខារ៉ាអូខេ បៀរហ្កាឌិន កន្លែងម៉ាស្សា និងស្ប៉ា ដើម្បីឈានទៅសម្ភាសន៍ផ្ដល់ប័ណ្ណសមធម៌ជូន។ នេះជាការបញ្ជាក់របស់ ឯកឧត្តម កែវ អ៊ូលី ប្រធាននាយកដ្ឋានអត្តសញ្ញាណកម្មគ្រួសារក្រីក្រ នៃក្រសួងផែនការ។ឯកឧត្តមបន្តថា សម្រាប់រាជធានី-ខេត្ត ដែលធ្វើការស្រង់ទិន្នន័យក្រុមគោលដៅរួចរាល់ អាចនឹង​ចាប់​ផ្ដើមការសម្ភាសន៍ ក្នុងកំឡុងចុងខែសីហា រឺក្នុងខែ កញ្ញាខាងមុខ ដើម្បីឱ្យពលរដ្ឋគោលដៅ ទទួលបានអត្ថប្រយោជន៍ដែលរាជរដ្ឋាភិបាលផ្ដល់ជូន។អត្ថប្រយោជន៍ ដែលទទួលបានក្នុងពេលបច្ចុប្បន្ននេះ គឺប័ណ្ណសមធម៌នឹងផ្ដល់ជូនការពិនិត្យព្យាបាល នៅតាមមន្ទីរពេទ្យរដ្ឋ ដោយមិនគិតថ្លៃ សម្រាប់បុគ្គលដែលទទួលបានប័ណ្ណ ក៏ដូចជាសមាជិកគ្រួសាររបស់គាត់ ដែលបានចុះក្នុងបញ្ជីប័ណ្ណសមធម៌នោះ។មុននឹងឈានដល់ការសម្ភាសន៍ផ្ដល់ប័ណ្ណសមធម៌ជូនក្រុមគោលដៅថ្មីនេះ ឯកឧត្តមណែនាំទៅក្រុមគោលដៅត្រូវត្រៀមឯកសារចាំបាច់ ដូចជាអត្តសញ្ញាប័ណ្ណ ក៏ដូចជាសៀវភៅ រឺលិខិតបញ្ជាក់ការស្នាក់នៅឱ្យរួចរាល់ និងត្រូវមានជីវភាពក្រលំបាក។ ចំពោះអ្នកមានជីវភាពប្រសើរ អាចប្រើប្រាស់យន្តការផ្សេង ​ដោយបង្វែទៅទទួលយក ប័ណ្ណមូលនិធិសមធម៌​សុខាភិបាលជំនួសវិញ។គួរបញ្ជាក់ថា ក្រុមគោលដៅដែលទទួលបានប័ណ្ណសមធម៌ អាចប្រើប្រាស់ប័ណ្ណនេះបានភ្លាមៗ សម្រាប់​ការទទួលសេវានៅគ្រប់មន្ទីរពេទ្យរដ្ឋដោយមិនគិតថ្លៃ។ ​ក្នុងការចាប់ផ្ដើមយុទ្ធនាការពីរថ្ងៃ នៅរមណីយដ្ឋាន​ប្រវត្តិសាស្រ្តវត្តភ្នំកន្លងទៅ ​គឺមានក្រុមគោលដៅប្រមាណជិត១០០នាក់ ទទួលបានប័ណ្ណសមធម៌៕អត្ថបទ៖ គឹមហុក 

ក្រុមប្រឹក្សាសន្តិសុខអង្គការសហប្រជាជាតិ ថ្កោលទោសការបិទដែនដីជម្លោះ ណាហ្គ័រណូ-ការ៉ាបាក់

2023/08/17 07:14:21 pm        144
Facebook Telegram Linkin
UN៖ ក្រុមប្រឹក្សាសន្តិសុខអង្គការសហប្រជាជាតិបានពិភាក្សាកាលពីថ្ងៃពុធ (១៦ សីហា) អំពីការបិទដែនដីជម្លោះ ណាហ្គ័រណូ-ការ៉ាបាក់ (Nagorno-Karabakh) បន្ទាប់ពីអតីតរដ្ឋអាជ្ញានៃតុលាការព្រហ្មទណ្ឌអន្តរជាតិ ក្នុងខែនេះ បាននិយាយថា ការបិទតំបន់នេះអាចឈានទៅរក «អំពើប្រល័យពូជសាសន៍» លើប្រជាជនអាមេនីក្នុងស្រុក។រដ្ឋមន្ត្រីការបរទេសអាមេនី លោក Ararat Mirzoyan(អារ៉ារ៉ាត មៀហ្សូយ៉ាន) បានប្រាប់ក្រុមប្រឹក្សាសន្តិសុខថា ការការពារមហន្តរាយនៅក្នុងតំបន់ គឺជាកាតព្វកិច្ចស្នូលរបស់អង្គការសហប្រជាជាតិ។ ទន្ទឹមនឹងនេះ តំណាងរបស់ប្រទេសអាស៊ែបៃហ្សង់ ប្រចាំអង្គការសហប្រជាជាតិ លោក Yashar Aliyev បានចាត់ទុកការអះអាងរបស់លោក Mirzoyan ថាជា«ការចោទប្រកាន់គ្មានភស្តុតាង និងគ្មានមូលដ្ឋានត្រឹមត្រូវ»។មន្ត្រីជំនួយជាន់ខ្ពស់របស់អង្គការសហប្រជាជាតិ លោកស្រី Edem Wosornu បានប្រាប់ក្រុមប្រឹក្សាថា ការផ្តល់ជំនួយមនុស្សធម៌ដោយគណៈកម្មាធិការអន្តរកាកបាទក្រហមអន្តរជាតិ (ICRC) ត្រូវតែអនុញ្ញាតឱ្យបន្តឡើងវិញតាមរយៈបណ្ដាញផ្លូវដែលដំណើរការ។ដែនដីការ៉ាបាក់ ត្រូវបានទទួលស្គាល់ជាអន្តរជាតិថាជាផ្នែកមួយនៃប្រទេសអាស៊ែបៃហ្សង់ ប៉ុន្តែប្រជាជនរបស់តំបន់នេះចំនួន១២០.០០០នាក់ គឺជាជនជាតិភាគតិចអាមេនីច្រើនលើសលប់ ហើយទឹកដីដែលនៅសេសសល់មួយរបស់តំបន់នេះភ្ជាប់ទៅនឹងប្រទេសអាមេនី គឺច្រករបៀងឡាឈីន (Lachin) ដែលត្រូវបានគ្រប់គ្រងដោយកងរក្សាសន្តិភាពរុស្ស៊ី ត្រូវបានរំខានជាលើកដំបូងនៅកាលពីខែធ្នូ៕

ក្រុមអ្នកនេសាទកូរ៉េខាងត្បូង ប្រមូលផ្តុំគ្នាប្រឆាំងនឹងផែនការបញ្ចេញទឹកសំណល់វិទ្យុសកម្មរបស់ជប៉ុន

2023/08/17 07:11:53 pm        131
Facebook Telegram Linkin
កូរ៉េខាងត្បូង៖ ក្រុមអ្នកនេសាទកូរ៉េខាងត្បូងជាង១.០០០នាក់នៅតំបន់ឆ្នេរភាគខាងត្បូងនៃតំបន់ហ្គោវ៉្យុង (Goheung) បានប្រមូលផ្តុំគ្នាកាលពីថ្ងៃពុធ ដែលជាផ្នែកមួយនៃការប្រមូលផ្តុំតវ៉ានាពេលថ្មីៗនេះក្នុងចំណោមអ្នកនេសាទក្នុងស្រុក ដើម្បីប្រឆាំងនឹងគម្រោងការរបស់ប្រទេសជប៉ុន ក្នុងការការបញ្ចេញទឹកសំណល់វិទ្យុសកម្មទៅក្នុងមហាសមុទ្រ។ក្រុមអ្នកតវ៉ាបានសង្កត់ធ្ងន់ថា ប្រសិនបើទឹកសំណល់វិទ្យុសកម្មត្រូវបានបញ្ចេញទៅក្នុងមហាសមុទ្រ ការខូចខាតនឹងកើតឡើងចំពោះប្រព័ន្ធអេកូឡូស៊ីទាំងអស់នៅក្នុងមហាសមុទ្រប៉ាស៊ីហ្វិក និងអ្នកនេសាទទាំងអស់ដែលរស់នៅពឹងផ្អែកលើការរកស៊ីក្នុងសមុទ្រផងដែរ។ យោងតាមការស្ទង់មតិលើមនុស្សពេញវ័យជនជាតិកូរ៉េខាងត្បូងចំនួន១.០០០នាក់ ក្នុងខែឧសភា មនុស្សចំនួន៨៥,៤ភាគរយបានប្រឆាំងនឹងការបញ្ចេញទឹកសំណល់វិទ្យុសកម្មរបស់ប្រទេសជប៉ុននេះ ខណៈដែលមនុស្ស៧២ភាគរយបាននិយាយថា ពួកគេនឹងកាត់បន្ថយការប្រើប្រាស់ផលិតផលសមុទ្រ ប្រសិនបើទឹកសំណល់ត្រូវបានបង្ហូរទៅក្នុងមហាសមុទ្រ។ស្របពេលមានការរិះគន់យ៉ាងទូលំទូលាយពីក្នុងប្រទេស និងក្រៅប្រទេស រដ្ឋាភិបាលជប៉ុនបាននិងកំពុងជំរុញឱ្យបញ្ចេញទឹកសំណល់មានមេរោគនុយក្លេអ៊ែរ នៅរដូវក្តៅនេះ ពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដៃអ៊ីឈី ដែលរងការវាយប្រហារដោយការរញ្ជួយដីដ៏ធំ និងរលកយក្សស៊ូណាមិកាលពីខែមីនា ឆ្នាំ២០១១៕

ចំហេះព្រៃនៅកាណាដា គំរាមដល់ទីក្រុងនានា ខណៈរដ្ឋាភិបាលចេញបទបញ្ជាជម្លៀសពលរដ្ឋ

2023/08/17 07:08:59 pm        127
Facebook Telegram Linkin
កាណាដា៖ ក្រុមមន្ត្រីប្រទេសកាណាដា បានចេញបទបញ្ជាជម្លៀសពលរដ្ឋ នៅរដ្ឋធានី Yellowknife ដែនដីភាគពាយព្យ និងសហគមន៍តូចៗជាច្រើនកាលពិថ្ងៃពុធ ខណៈចំហេះព្រៃទ្រង់ទ្រាយធំ បានគំរាមកំហែងដល់ទីក្រុងទន្លេ Hay កាលពីពេលយប់។ ក្រុមជាច្រើនកំពុងធ្វើការជម្លៀស នៅតំបន់ទន្លេ Hay ជាសហគមន៍មួយមានពលរដ្ឋប្រមាណ៣.០០០នាក់ នៅលើបឹងធំ Great Slave Lake ដឹកជញ្ជូនដោយរថយន្តក្រុង ឬយន្តហោះ កាលពីយប់ថ្ងៃពុធខណៈអគ្គិភ័យខិតជិតមកដល់។ មន្ត្រីព័ត៌មានអគ្គិភ័យ លោក Mike Westwick បាននិយាយនៅក្នុងសន្និសីទសារព័ត៌មានកាលពីល្ងាចថ្ងៃពុធថា នៅតំបន់ទន្លេHay បានឃើញអគ្គិភ័យ នៅភាគខាងត្បូងសហគមន៍របស់ពួកគេកើនឡើង ដែលខិតកាន់តែកៀកទីក្រុងនៅថ្ងៃនេះ។ យើងបានមើលឃើញអគ្គិភ័យមានសកម្មភាពខ្ពស់នៅក្នុងតំបន់នោះ ហើយវាកំពុងរាលដាលយ៉ាងឆាប់រហ័ស។ លោក Westwick និយាយថា អណ្តាតភ្លើង នឹងទៅដល់ទីក្រុង Yellowknife នៅចុងសប្តាហ៍នេះដោយពុំមានភ្លៀងធ្លាក់ ហើយពលរដ្ឋនៅរដ្ឋធានី កំពុងត្រូវបានស្នើសុំឲ្យចាកចេញ ជាផ្នែកមួយនៃ ការជម្លៀសតាមដំណាក់កាល ដោយចាប់ផ្តើមជាមួយសហគមន៍ដែលមានការគំរាមកំហែងខ្លាំងបំផុត។អង្គភាពអគ្គិភ័យនៅដែនដីភាពពាយព្យ បាននិយាយថា មានហានីភ័យដល់ទីក្រុង Yellowknife ។ ក្រុមរបស់យើង រួមជាមួយទីក្រុង Yellowknife កំពុងធ្វើអ្វីគ្រប់យ៉ាងដែលអាចធ្វើទៅបានដើម្បីពន្យឿតការកើនឡើងអគ្គិភ័យ និងការពារសហគមន៍។ ដែនដីភាគពាយព្យ បានប្រកាសរដ្ឋក្នុងគ្រាអាសន្នកាលពីល្ងាចថ្ងៃអង្គារ ហើយយោធានាកាណាដា ត្រូវបានដាក់ពង្រាយដើម្បីជួយទប់ទល់អណ្តាតភ្លើង និងដឹកជញ្ជូនពលរដ្ឋមួយចំនួនតាមយន្តហោះទៅកាន់ទីសុវត្ថិភាព៕

អ្នកស្រាវជ្រាវវ័យក្មេងមើលឃើញថា គណៈរដ្ឋមន្រ្តីថ្មីជាក្តីសង្ឃឹមរបស់ប្រជាជនខ្មែរ

2023/08/17 07:07:42 pm        239
Facebook Telegram Linkin
ភ្នំពេញ៖ អ្នកស្រាវជ្រាវវ័យក្មេងនៅក្នុងប្រទេសកម្ពុជា លោក ប៊ិន យ៉ាន បានបង្ហាញទស្សនៈវិជ្ជមាន និងក្ដីសង្ឃឹមថា ​គណៈរដ្ឋមន្រ្ដីថ្មីដែលដឹកនាំដោយឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត គឺជាក្ដីសង្ឃឹមរបស់ប្រជាជនខ្មែរ ក្នុងការដឹកនាំប្រទេសកម្ពុជាឱ្យមានការអភិវឌ្ឍ​រីកចម្រើន​បន្ថែមទៀត។លោក ប៊ិន យ៉ាន សង្កេតឃើញថា គណៈរដ្ឋមន្រ្ដីថ្មីក្នុងអាណត្តិទី៧នេះអ្វីដែលជាភាពលេចធ្លោ​ក្រោម​ការ​ដឹកនាំ​របស់ឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត ជានាយករដ្ឋមន្រ្ដីថ្មីនៃកម្ពុជា គឺមានភាពវិជ្ជមានជាច្រើន ដោយសារតែឥស្សរជននៃគណៈរដ្ឋមន្រ្ដីថ្មីនេះ ​បានរៀនសូត្រចេះ​ដឹង​ខ្ពង់ខ្ពស់ពី​បច្ឆិម​ប្រទេសទាំងផ្នែកសេដ្ឋកិច្ច យោធា ​និងផ្នែកនយោបាយ។ ដូច្នេះសម្រាប់ការដឹកនាំប្រទេសកម្ពុជា​ដោយគណៈរដ្ឋមន្រ្ដីថ្មីនេះ នឹងបង្កើតនូវសមិទ្ធផលថ្មីៗ​ជាច្រើន​បន្ថែមទៀតសម្រាប់ប្រទេសកម្ពុជា។លោក ប៊ិន យ៉ាន យល់ឃើញថា​ បើទោះពីជាបច្ចុប្បន្ននេះពិភពលោកកំពុង​មាន​វិបត្តិសាកល និង​អតិផរណាសេដ្ឋកិច្ចមិនច្បាស់លាស់ក៏ដោយ។ ​ប៉ុន្ដែក្រោមការ​ដឹកនាំ​របស់​គណៈរដ្ឋមន្រ្ដីថ្មី​សេដ្ឋកិច្ចរបស់​ប្រទេសកម្ពុជា​នឹងមានការរីក​លូតលាស់​បន្ថែមទៀត ​ក្រោមការដឹកនាំរបស់​ឯកឧត្តមកត្តិទេសាភិបាលបណ្ឌិត ហ៊ុន ម៉ាណែត និងគណបក្សប្រជាជនកម្ពុជា​ បានធ្វើឱ្យប្រទេស​កម្ពុជាមានស្ថិរភាព​ លំនឹងផ្នែកនយោបាយ និងសង្គម។សូមបញ្ជាក់ថា ​អាណត្តិថ្មីនៃរាជរដ្ឋាភិបាលកម្ពុជា នឹងមានសុពលភាពចាប់ពីថ្ងៃទី២២​ ខែសីហា តទៅ ​ដោយក្នុងនោះមានការផ្លាស់ប្តូរក្បាលម៉ាស៊ីនដឹកនាំថ្មីស្ទើរតែទាំងស្រុង ដោយ​ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ជានាយករដ្ឋមន្ត្រី ដែលការផ្លាស់ប្តូរ​ជាប្រវត្តិសាស្ត្រ​នៃការដឹកនាំប្រទេសមកពីគណបក្សប្រជាជនកម្ពុជា។ ខណៈការផ្លាស់ប្ដូរនេះត្រូវបាន​សម្តេចតេជោ​ ហ៊ុន សែន ​ចាត់ទុកជាការផ្លាស់ប្តូរ ដើម្បីធានានូវ​ស្ថិរភាពសង្គម ​និងការអភិវឌ្ឍមួយយូរអង្វែង៕អត្ថបទ៖ វ៉ន ដារ៉ា

ទាហាននីហ្សេជាង១០នាក់ ត្រូវបានសម្លាប់ក្នុងការវាយប្រហារនៅជិតព្រំដែនប្រទេសម៉ាលី

2023/08/17 07:05:38 pm        163
Facebook Telegram Linkin
នីហ្សេ៖ ក្រសួងការពារជាតិរបស់ប្រទេសបាននិយាយថា ទាហាននីហ្សេ យ៉ាងហោចណាស់១៧នាក់ត្រូវបានសម្លាប់នៅក្នុងការវាយប្រហារដោយក្រុមប្រដាប់អាវុធ នៅជិតព្រំដែនជាមួយប្រទេសម៉ាលី។ យោងតាមសេចក្តីថ្លែងការណ៍ ដែលបានចេញផ្សាយកាលពីល្ងាចថ្ងៃអង្គារបានឲ្យដឹងថា ការផ្តាច់ខ្លួនរបស់កងកម្លាំងប្រដាប់អាវុធនីហ្សេ ដែលកំពុងធ្វើសកម្មភាពរវាងតំបន់ Boni និង Torodi គឺជាជនរងគ្រោះនៃការពួនស្ទាក់វាយប្រហារដោយក្រុមភេរវកម្ម នៅជិតទីក្រុង Koutougou មានចម្ងាយ៥២គីឡូម៉ែត្រភាគនិរតី តំបន់ Torodi។ សេចក្តីថ្លែងការណ៍បានបន្ថែមថា ទាហាន២០នាក់ផ្សេងទៀត បានរងរបួស ដោយពួកគេទាំងអស់ត្រូវបានជម្លៀសទៅកាន់ទីក្រុង Naimey ជារដ្ឋធានី។ ទាហាននិយាយថា អ្នកវាយប្រហារជាង១០០នាក់ ត្រូវបានរារាំងអំឡុងប្រតិបត្តិការរបស់ពួកគេ។ កាលពីទសវត្សរ៍មុន តំបន់ព្រំដែន នៅកន្លែងមានការប្រសព្វគ្នាប្រទេសម៉ាលីភាគកណ្តាល ប្រទេសបួរគីណាហ្វាសូ និងប្រទេសនីហ្សេភាគខាងលិច បានក្លាយជាចំណុចកណ្តាលនៃអំពើហិង្សាដោយក្រុមប្រដាប់អាវុធ ទាក់ទងទៅនឹងក្នុងអាល់កៃដា និងក្រុមរដ្ឋអ៊ីស្លាមអ៊ីរ៉ាក់ និងឡេវ៉ាន នៅក្នុងតំបន់សាហ៊ែល(Sahel) ។ កំហឹងនៅក្នុងការបង្ហូរឈាម បានបង្កឲ្យមានការដណ្តើមអំណាចយោធា នៅក្នុងប្រទេសចំនួន៣ ចាប់តាំងពីឆ្នាំ២០២០ ដោយប្រទេសនីហ្សេ ចុងក្រោយធ្លាក់ចូលក្នុងរដ្ឋប្រហារកាលពីថ្ងៃទី២៦ ខែកក្កដា នៅពេលនោះប្រធានាធិបតីលោក Mohamed Bazoum ត្រូវបានបណ្តេញចេញ។ ប្រទេសនីហ្សេ ភាកអាគ្នេយ៍ ក៏ជាគោលដៅរបស់ក្រុមប្រដាប់អាវុធដែលកំពុងឆ្លងកាត់ពីប្រទេសនីហ្សេរីយ៉ា ភាគឦសាន ជាប្រភពនៃយុទ្ធនាការដែលផ្តើមឡើងដោយក្រុម Boko Haram នៅក្នុងឆ្នាំ២០១០។ មេដឹកនាំរដ្ឋប្រហារ បាននិយាយថាការបណ្តេញចេញលោក Bazoum ដោយសារតែភាពអសន្តិសុខនៅក្នុងប្រទេសនិងការធ្លាក់ចុះកាន់តែយ៉ាប់យ៉ឺនស្ថានភាពសន្តិសុខ និងអភិបាលកិច្ចខ្សោយ។ ប៉ុន្តែអ្នករាយការណ៍ព័ត៌មានរបស់សារព័ត៌មាន Al Jazeera ដែលរាយការណ៍ពី ទីក្រុង Abuja នៅជិតប្រទេសនីហ្សេរីយ៉ា បាននិយាយថា ការលុបចោលកិច្ចព្រមព្រៀងរបស់រដ្ឋាភិបាលយោធារបស់ប្រទេសនីហ្សេ ជាមួយយោធាបារាំង និងការផ្អាកការផ្តល់ជំនួយដោយដៃគូផ្សេងទៀតរបស់ទីក្រុង Niamey ធ្វើឲ្យជីវិតកាន់តែលំបាក៕

កុមារជាច្រើនស្ថិតក្នុងចំណោមអ្នកដែលត្រូវបានជួយសង្គ្រោះ ខណៈទូកតូចមួយគ្រឿង បានមកដល់អង់គ្លេសភាគខាងត្បូង

2023/08/17 07:02:49 pm        84
Facebook Telegram Linkin
បារាំង៖ កុមារតូចៗជាច្រើននាក់ ស្ថិតក្នុងចំណោមជនអន្តោប្រវេសន៍រាប់សិបនាក់ ត្រូវបានជួយសង្គ្រោះនិងនាំយកទៅកាន់ឆ្នេរសមុទ្រពីព្រែកជីកអង់គ្លេសកាលពីថ្ងៃពុធ ប៉ុន្មានថ្ងៃបន្ទាប់ពីមនុស្ស៦នាក់បានស្លាប់ដែលកំពុងព្យាយាមឆ្លងកាត់រវាងប្រទេសបារាំង និងចក្រភពអង់គ្លេស។ ផ្លូវទឹកអង់គ្លេស គឺជាផ្លូវដឹកជញ្ជូនដ៏មមាញឹកបំផុតមួយរបស់ពិភពលោក ដោយមានអាកាសធាតុពុំអាចព្យាករណ៍ទុកជាមុនបានធ្វើឲ្យការឆ្លងកាត់តាមទូកតូចៗមានគ្រោះថ្នាក់។ ស្ថានភាពអាកាសធាតុកាន់តែមានអំណោយផលច្រើនក្នុងប៉ុន្មានសប្តាហ៍ថ្មីៗនេះ។ តួលេខរបស់រដ្ឋាភិបាលអង់គ្លេស បានបង្ហាញថាចំនួនជនអន្តោប្រវេសន៍ដែលឆ្លងកាត់ផ្លូវទឹកនេះរហូតមកដល់ពេលនេះនៅឆ្នាំនេះ មានចំនួនជាង១៦.០០០នាក់ ដោយជាង១.១០០នាក់ បានមកដល់កាលពីសប្តាហ៍មុនតែមួយ។ ក្នុងរយៈពេល៣ខែដំបូងនៃឆ្នាំនេះ ភាគច្រើននៃជនអន្តោប្រវេសន៍នៅលើទូកតូចៗ មានមកពីប្រទេសអាហ្វហ្គានីស្ថាន ឥណ្ឌា អ៊ីរ៉ង់ ឬអ៊ីរ៉ាក់។ កាលពីឆ្នាំមុន ក្នុងខែសីហា បានបង្ហាញពីចំនួនខ្ពស់បំផុតនៃការមកដល់នៅលើទូកតូចៗសម្រាប់ខែនេះមានចំនួនខ្ពស់បំផុត ខណៈពាក់កណ្តាលនៃជនអន្តោប្រវេសន៍ទាំងអស់ បានមកដល់ក្នុងអំឡុងខែសីហា រហូតដល់អំឡុងខែតុលា៕

ចំនួនអ្នកស្លាប់បន្ទាប់ពីបំណាក់ដីនៅតំបន់ភ្នំហិម៉ាល័យប្រទេសឥណ្ឌាកើនឡើងដល់៧១នាក់

2023/08/17 06:59:46 pm        79
Facebook Telegram Linkin
ឥណ្ឌា៖ ក្រុមមន្ត្រី បានពិនិត្យឡើងវិញពីការកើនឡើងចំនួនអ្នកស្លាប់ ដោយបំណាក់ដីកាលពីចុងសប្តាហ៍ក្នុងក្រុង Shimla តំបន់ភ្នំហិម៉ាល័យប្រទេសឥណ្ឌាមានចំនួនពី៥៧ ដល់៧១នាក់ កាលពីថ្ងៃពុធ ប៉ុន្តែការស្វែងរកសាកសពនៅតែបន្តខណៈរហូតមកដល់ពេលនេះសាកសពមួយចំនួនប៉ុណ្ណោះត្រូវបានរកឃើញ។មនុស្សប្រមាណ២.៥០០នាក់ ត្រូវបានជម្លៀសខ្លួននៅក្នុងរដ្ឋ Himachal Pradesh ហើយរដ្ឋមន្ត្រីគ្រប់គ្រងគ្រោះមហន្តរាយ លោក Onkar Chand Sharmaបាននិយាយថា តម្លៃនៃការខាតបង់អាចមានរហូតដល់រាប់លាន់ ខណៈភ្លៀងធ្លាក់ខ្លាំង ទឹកជំនន់ភ្លាមៗ និងបំណាក់ដីនៅក្នុងតំបន់ភ្នំ បានបំផ្លាញលំនៅឋាន អគារ បណ្តាញដឹកជញ្ជូន និងបណ្តាលឲ្យមានការកាត់ផ្តាច់ផ្លូវរថភ្លើង និងអគ្គិសនី។ ក្រុមអ្នកជួយសង្គ្រោះ បានជីកកកាយក្នុងដីល្បប់ ដើមឈើ និងកម្ទេចកម្ទី ចាប់តាំងពីថ្ងៃចន្ទ នៅជិតទីតាំងវិហារមួយកន្លែងដែលបានបាក់រលំដោយបំណាក់ដី។ កាលពីថ្ងៃអង្គារ សាកសពន្ថែមចំនួន៣នាក់ ត្រូវបានទាញចេញពីទីតាំងនោះក្នុងក្រុង Shimla ជាកន្លែងដែលមានមនុស្សយ៉ាងហោចណាស់ ១៤នាក់បានស្លាប់ នៅក្នុងឧបទ្ទវហេតុទាក់ទងទៅនឹងភ្លៀងធ្លាក់៕

គ្រូបង្រៀន និងសិស្សគាំទ្រគម្រោងបង្កើតមជ្ឈមណ្ឌលបច្ចេកវិទ្យាសហគមន៍នៅតាមវិទ្យាល័យ

2023/08/17 06:57:39 pm        86
Facebook Telegram Linkin
ភ្នំពេញ៖ គ្រូបង្រៀន និងសិស្សានុសិស្ស បានបង្ហាញការគាំទ្រ នូវគម្រោងបង្កើតមជ្ឈមណ្ឌលបច្ចេកវិទ្យាសហគមន៍ នៅតាមវិទ្យាល័យ របស់ក្រសួងប្រៃសណីយ៍ និងទូរគមនាគមន៍ ដែលពួកគេបានចាត់ទុកថា គម្រោងនេះ នឹងកាន់តែធ្វើឲ្យវិស័យឌីជីថល នៅកម្ពុជាកាន់តែមានភាពរីកចម្រើន ដើរទាន់សម័យកាល ។លោក អុក ព្រីង នាយកវិទ្យាល័យ ហ៊ុន សែន សិរីដីដុះ ស្ថិតក្នុងឃុំកំពង់ស្វាយ ស្រុកកៀនស្វាយ ខេត្តកណ្ដាល ​បានលើកឡើងថា ក្រសួងអប់រំ យុវជន និងកីឡា ​មានការយកចិត្តទុកដាក់ មានផែនការ​ត្រឹមត្រូវ និងកំពុងជំរុញជាខ្លាំងលើការបង្រៀន ​និងរៀនតាមបែបឌីជីថល ដែលជាតម្រូវការចាំបាច់មួយ ក្នុងពេលបច្ចុប្បន្ន ។លោកនាយកបានបន្តថា ចំពោះគម្រោងរបស់ក្រសួងប្រៃសណីយ៍ បង្កើតមជ្ឈមណ្ឌលបច្ចេកវិទ្យា​សហគមន៍ នៅតាមវិទ្យាល័យ ពិតជាផ្ដល់នូវអត្ថប្រយោជន៍ជាខ្លាំង ដល់គ្រូបង្រៀន​ និងសិស្ស អាចបង្កើន​ចំណេះដឹងលើវិស័យឌីជីថល ក៏ដូចជាសិក្សាស្រាវជ្រាវបន្ថែមលើមេរៀន ពិសេសទៀតនោះ ក៏បានផ្ដល់ឱកាសដល់ពលរដ្ឋទូទៅ ​បានចូលរៀនវគ្គបណ្ដុះបណ្ដាល លើផ្នែកឌីជីថលនេះ ​អាចប្រើប្រាស់តាមតម្រូវការរបស់ពួកគាត់ ​ខណៈវិទ្យាល័យនេះ ក៏បានត្រៀមដី​សម្រាប់កសាងនូវមជ្ឈមណ្ឌលនេះហើយដែរ ។សម្រាប់សិស្សានុសិស្ស កំពុងសិក្សាក្នុងវិទ្យាល័យនេះ បានបង្ហាញនូវការគាំទ្រ និងសប្បាយរីករាយ​ជាខ្លាំង នៅពេលទទួលបានព័ត៌មាន ​នៃគម្រោងបង្កើតមជ្ឈមណ្ឌលបច្ចេកវិទ្យាសហគមន៍នេះ ដែលនឹងអាចជួយពួកគេ អាចពង្រីកនូវចំណេះដឹង ​ហើយបានជួយដល់សិស្សក្រីក្រ ដែលពុំមាន​លទ្ធភាពបង់ថ្លៃសិក្សា លើការរៀនសូត្រជំនាញឌីជីថលនេះ ។គួរបញ្ជាក់ថា ក្រសួងប្រៃសណីន៍ និងទូរគមនាគមន៍ កំពុងអនុវត្តគម្រោងបង្កើត​មជ្ឈមណ្ឌល​បច្ចេកវិទ្យា​សហគមន៍ នៅតាមវិទ្យាល័យ ​ដែលគម្រោងរបស់ក្រសួងនឹងបង្កើតឲ្យបានគ្រប់វិទ្យាល័យ​ទាំង៥៥៨ នៅទូទាំងប្រទេស​ ខណៈនេះកំពុងសាងសង់​ដំបូងគេនៅក្នុងវិទ្យាល័យហ៊ុនសែន​ ១មិថុនា ស្ថិតក្នុងឃុំពារាម ស្រុកបាទី ខេត្តតាកែវ ៕អត្ថបទ បាន សុខរិទ្ធិ

ទីភ្នាក់ងារអវកាស និយាយថា យានអវកាស Luna-25 របស់រុស្ស៊ី ចូលដល់គន្លងភពព្រះចន្ទហើយ

2023/08/17 06:48:44 pm        78
Facebook Telegram Linkin
រុស្ស៊ី៖ យានអវកាស Luna-25 នឹងធ្វើដំណើរវិលជុំវិញព្រះចន្ទ ដែលជាផ្កាយរណបធម្មជាតិតែមួយគត់របស់ផែនដី ក្នុងរយៈពេលប្រហែល ៥ ថ្ងៃ បន្ទាប់មកផ្លាស់ប្តូរទិសដៅសម្រាប់ការចុះចតដែលមានការគ្រប់គ្រងក្នុងសម្ពាធស្រាល នៅលើប៉ូលខាងត្បូងភពព្រះចន្ទដែលគ្រោងធ្វើនៅថ្ងៃទី២១ ខែសីហា សប្ដាហ៍ក្រោយនេះ។ក្រុមហ៊ុនអវកាសរុស្ស៊ី Roskosmos បាននិយាយថាយានអវកាស Luna-25 បានចូលទៅក្នុងគន្លងរបស់ភពព្រះចន្ទនៅម៉ោង ១១:៥៧ ព្រឹកម៉ោងក្នុងតំបន់។  យានអវកាស Luna-25 នឹងធ្វើដំណើរវិលជុំវិញព្រះចន្ទ ដែលជាផ្កាយរណបធម្មជាតិតែមួយគត់របស់ផែនដី ក្នុងរយៈពេលប្រហែល ៥ ថ្ងៃ បន្ទាប់មកផ្លាស់ប្តូរទិសដៅសម្រាប់ការចុះចតដែលមានការគ្រប់គ្រងក្នុងសម្ពាធស្រាល នៅលើប៉ូលខាងត្បូងភពព្រះចន្ទដែលគ្រោងធ្វើនៅថ្ងៃទី២១ ខែសីហា សប្ដាហ៍ក្រោយនេះ។  យានអវកាស ចន្ត្រាយាន -៣ (Chandrayaan-3) របស់ឥណ្ឌាបានចូលទៅក្នុងគន្លងភពព្រះចន្ទនៅដើមខែនេះ មុនពេលចុះចតដែលបានគ្រោងទុកនៅលើប៉ូលខាងត្បូងភពព្រះចន្ទនៅចុងខែនេះ។  យានអវកាស Luna-25 ដែលមានទំហំប៉ុនរថយន្តតូចមួយគ្រឿង នឹងមានបំណងដំណើរការរយៈពេលមួយឆ្នាំនៅលើប៉ូលខាងត្បូង ជាទីដែលក្រុមអ្នកវិទ្យាសាស្ត្រអង្គការ NASA និងទីភ្នាក់ងារអវកាសផ្សេងទៀតក្នុងប៉ុន្មានឆ្នាំថ្មីៗនេះបានរកឃើញដាននៃទឹកកកនៅក្នុងរណ្ដៅមួយចំនួន។ វត្តមានទឹកនៅលើភពព្រះចន្ទ បានផ្ដល់ភាពស្មុគស្មាញដល់មហាអំណាចអវកាសធំៗ ដែលអនុញ្ញាតឲ្យមានការធ្វើដំណើររបស់មនុស្សបានយូរជាងមុននៅលើភពនេះ ដែលអាចឲ្យមានការជីកយករ៉ែធនធានតាមនៅភពព្រះចន្ទ។ យោងតាមលោកអាណាតូលីហ្សាក ( Anatoly Zak) ដែលជាអ្នកបង្កើតនិងផ្សព្វផ្សាយ ដែលបានតាមដានកម្មវិធីអវកាសរបស់រុស្ស៊ី គ្មានយានអវកាសរុស្ស៊ីណាមួយបានចូលក្នុងគន្លងភពព្រះចន្ទទេ ចាប់តាំងពី យានអវកាស Luna-24 ដែលជាបេសកកម្មទៅកាន់ភពព្រះចន្ទ កាលពីឆ្នាំ ១៩៧៦ របស់សហភាពសូវៀត មកនោះ ៕

បណ្ដាញសង្គម

ព័ត៌មានថ្មីៗ

កំណើនសេដ្ឋកិច្ចរបស់ថៃ គឺ​ទាបបំផុត ក្នុងចំណោមប្រទេសធំៗ នៅតំបន់​អាស៊ីអាគ្នេយ៍
08/18/2026 05:08 PM
Facebook Telegram Linkin
ក្រសួងការបរទេសអាមេរិក៖ ទីក្រុងវ៉ាស៊ីនតោនត្រៀមរួចជាស្រេចដើម្បីគាំទ្រកិច្ចសន្ទនាស៊ូដង់ដឹកនាំដោយជនស៊ីវិល
08/18/2026 05:08 PM
Facebook Telegram Linkin
របាយការណ៍៖ នាយករដ្ឋមន្ត្រីអ៊ីស្រាអែល និងទីប្រឹក្សារបស់លោក Trump ខ្វែង​គំនិត​គ្នា ជុំវិញ​​ការសម្លាប់ នៅហ្កាហ្សា
08/18/2026 05:08 PM
Facebook Telegram Linkin
អ្នកតវ៉ាប្រឆាំងអន្តោប្រវេសន៍ ទាមទារឱ្យមានចំណាត់ការក្នុងតំបន់នៅអាហ្វ្រិកខាងត្បូង
08/18/2026 05:08 PM
Facebook Telegram Linkin
កងទ័ពសូម៉ាលី វាយរុញច្រានកងជីវពលប្រឆាំងចេញពីទីក្រុង Baidoa បន្ទាប់ពីការប៉ះទង្គិចគ្នា
08/18/2026 05:08 PM
Facebook Telegram Linkin
នាយករដ្ឋមន្ត្រីកាណាដា រំពឹងថានឹងជួបជាមួយលោក Trump នៅមុនថ្ងៃផុតកំណត់ដំឡើងពន្ធ ទី១៩ ខែសីហា
08/18/2026 05:08 PM
Facebook Telegram Linkin
បទបញ្ជារបស់​លោក Trump ឱ្យ​បង្រួម​សមយុទ្ធជាមួយកូរ៉េខាងត្បូង ធ្វើឱ្យអ្នកជំនាញ និងអ្នកវិភាគបារម្ភ
08/18/2026 05:08 PM
Facebook Telegram Linkin
គណៈប្រតិភូជាន់ខ្ពស់នៃកម្ពុជា-សហភាពអឺរ៉ុប​ អញ្ជេីញចុះទស្សនកិច្ចសិប្បកម្មកែច្នៃគ្រាប់ស្វាយចន្ទី​ និងសហគមន៍កសិកម្ម នៅខេត្តស្ទឹងត្រែង
08/18/2026 05:08 PM
Facebook Telegram Linkin
កម្ពុជា​ធ្វើសិក្ខាសាលាថ្នាក់តំបន់ស្តីពីការផ្លាស់ប្ដូរទស្សនកិច្ចសហគ្រិនស្រ្តីអាស៊ាន-ចិន ក្រោមមូលបទ “ការដោះស្រាយបញ្ហាប្រឈម និងជំរុញភាពជាអ្នកដឹកនាំក្នុងការអភិវឌ្ឍសហគ្រាសធុនមីក្រូ តូច និងមធ្យម”
08/18/2026 05:08 PM
Facebook Telegram Linkin
UN ជំរុញឱ្យអ៊ីរ៉ង់ និងអាមេរិក បន្តការចរចា និងបន្ថយវោហាសាស្ត្រ ខណៈកាលកំណត់៦០ថ្ងៃខិតមកដល់
08/18/2026 05:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.