BTV NEWS

ក្រុមហ៊ុន TH Automotive Manufacturing Co., Ltd នឹងសម្ពោធជាផ្លូវការ រោងចក្រផ្គុំ និងដំឡើងរថយន្តរបស់ខ្លួននៅកម្ពុជា ក្នុងឆ្នាំ២០២៦នេះ

ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្តទុកដាក់បម្រើពលរដ្ឋ

សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ

សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម

នយោបាយ និង ការអភិវឌ្ឍន៍

ការប្រុងប្រយ័ត្នត្រូវបានណែនាំ ចំពោះភ្លៀងធ្លាក់ខ្លាំង នៅប្រទេសជប៉ុន

ជប៉ុន៖ ព្យុះត្រូពិកដ៏មានឥទ្ធិពល Khanun កំពុងបក់ឆ្ពោះទៅកាន់ភាគខាងកើត ដោយកំពុងនៅព័ទ្ធជុំវិញតំបន់ Amami របស់ខេត្ត Kagoshima និងតំបន់ដ៏ទៃទៀតក្នុងតំបន់ព្យុះ។ មន្ត្រីអាកាសធាតុកំពុងជំរុញឲ្យមានការប្រុងប្រយ័ត្នខ្ពស់ ខណៈក្រុមពពកភ្លៀងសកម្ម អាចវិវឌ្ឍទៅភាគខាងត្បូងតំបន់គ្យូស៊ូ(Kyushu) និងតំបន់ Amami រហូតដល់ព្រឹកថ្ងៃអង្គារ។ ភ្លៀងធ្លាក់ខ្លាំងពុំធ្លាប់មានក្នុងកំណត់ត្រា ដែលលើសខ្លាំងពីទឹកភ្លៀងធ្លាក់ជាប្រចាំកម្រិតមធ្យម អាចធ្លាក់នៅតំបន់ Kyushu និងតំបន់ជាច្រើនទៀតនៅផ្នែកសមុទ្រប៉ាស៊ីហ្វិកនៅប្រទេសជប៉ុនភាគខាងកើតនិងភាគខាងលិច រហូតដល់អំឡុងថ្ងៃព្រហស្បតិ៍។ ទោះជាយ៉ាងណា ពលរដ្ឋនៅក្នុងតំបន់ជាច្រើននៅឆ្ងាយពីព្យុះ ត្រូវបានណែនាំឲ្យមានការប្រុងប្រយ័ត្នជាមុន ដូចជា ពិនិត្យមើលផែនទីនៃគ្រោះថ្នាក់។ ទីភ្នាក់ងារឧតុនិយមជប៉ុន និយាយថា ព្យុះKhanun កំពុងបក់យឺតៗទៅភាគឦសាននៅលើទឹកមានចម្ងាយ១៨០គីឡូម៉ែត្រភាគអាគ្នេយ៍ ទីក្រុង Amami ក្នុងខេត្ត Kagoshima ខណៈនៅម៉ោង១០ព្រឹកថ្ងៃចន្ទនេះ ម៉ោងក្នុងតំបន់។ព្យុះទីហ្វុង Khanun ត្រូវបានគេរំពឹងថា នឹងផ្លាស់ប្តូរទិសដៅរបស់វាទៅភាគខាងជើង និងខិតទៅជិតខ្លាំងតំបន់ Kyushu នៅថ្ងៃពុធ។ ភ្លៀងធ្លាក់២៤ម៉ោងរហូតដល់ព្រឹកថ្ងៃអង្គារ ត្រូវបានព្យាករណ៍ថា នឹងឈានដល់កម្រិត ៣០០មីលីម៉ែត្រ នៅទីក្រុង Amami និងតំបន់ Kyushu ភាគខាងត្បូង និង២៥០មីលីម៉ែត្រ នៅក្នុងតំបន់ Shikoku(ស៊ីកូគុ) និងតំបន់ Tokai៕

ការិយាល័យប្រធានាធិបតីអ៊ុយក្រែនចាត់ទុកកិច្ចប្រជុំលើសំណើសន្តិភាពថាមានផ្លែផ្កា

អ៊ុយក្រែន៖ ការិយាល័យប្រធានាធិបតីអ៊ុយក្រែន បានចាត់ទុកសន្និសីទអន្តរជាតិលើសំណើសន្តិភាពរបស់ប្រទេសនេះថា មានផ្លែផ្កាច្រើន។ កិច្ចពិភាក្សារយៈពេលពីរថ្ងៃបានបញ្ចប់ទៅកាលពីថ្ងៃអាទិត្យ។ មន្ត្រីជាន់ខ្ពស់នៃប្រទេសជាង ៤០ និងអង្គការអន្តរជាតិ បានចូលរួមក្នុងកិច្ចប្រជុំនៅទីក្រុង Jeddah ប្រទេសអារ៉ាប៊ីសាអូឌីត។ អ្នកចូលរួម រួមមានក្រុមប្រទេសG7 ព្រមទាំងប្រទេសឥណ្ឌា ប្រេស៊ីល និងប្រទេសកំពុងអភិវឌ្ឍន៍សកលខាងផ្សេងទៀត ដែលគេហៅ Global South ។ ប្រទេសចិនក៏បានចូលរួមជាលើកដំបូងផងដែរ។ក្រុមអ្នកចូលរួមបានពិភាក្សាពីសំណើសន្តិភាពចំនួន១០ចំណុច រួមមានទាំងការដកខ្លួនចេញរបស់កងកម្លាំងរុស្ស៊ី និងការស្តារឡើងវិញទឹកដីអ៊ុយក្រែន។ កិច្ចប្រជុំដំបូងបានធ្វើឡើងកាលពីខែមិថុនា។ ការិយាល័យប្រធានាធិបតីអ៊ុយក្រែន នៅក្នុងសេចក្តីថ្លែងការណ៍បាននិយាយថាចំនួនអ្នកចូលរួមដែលបានកើនឡើង បង្ហាញពីចំណាប់អារម្មណ៍ខ្លាំងរបស់ពិភពលោកក្នុងការបង្កើតសន្តិភាពប្រកបដោយនិរន្តរភាពនិងយូរអង្វែង។ សេចក្តីថ្លែងការណ៍និយាយថា អ្នកចូលរួមទាំងអស់បានបង្ហាញពីការប្តេជ្ញាចិត្តរបស់ប្រទេសរបស់ពួកគេចំពោះគោលការណ៍នៃធម្មនុញ្ញអង្គការសហប្រជាជាតិ ច្បាប់អន្តរជាតិ និងការគោរពចំពោះអធិបតេយ្យភាព និងភាពមិនអាចរំលោភបំពានបាននៃបូរណភាពទឹកដីរបស់រដ្ឋនានា។លោក Andriy Yermak ប្រធានការិយាល័យប្រធានាធិបតីអ៊ុយក្រែនបាននិយាយនៅក្នុងសេចក្តីថ្លែងការណ៍ថា យើងមានការពិគ្រោះយោបល់ប្រកបដោយផ្លែផ្កាច្រើន លើគោលការណ៍សំខាន់ៗដែលសន្តិភាពយូរអង្វែងគួរត្រូវបានបង្កើតឡើង៕

គណបក្សហ៊្វុនស៊ិនប៉ិច ប្ដេជ្ញាសហការធ្វើការងារជាមួយបក្សកាន់អំណាច ស្របតាមតម្រូវការពលរដ្ឋ

ភ្នំពេញ៖គណបក្សហ្វុនស៊ិនប៉ិចដែលជាគណបក្សមួយទទួលបានសំឡេងគាំទ្រច្រើនជាងគេបន្ទាប់ពីគណបក្សប្រជាជនកម្ពុជានៅក្នុងរដ្ឋសភាជាតិ បានប្ដេជ្ញាសហការធ្វើការងារជាមួយបក្សកាន់អំណាច និងរាជរដ្ឋាភិបាលថ្មី ស្របទៅតាមតម្រូវការ និងមតិយោបល់របស់ពលរដ្ឋដែលចង់បាន។ លោក ញឿន រ៉ាដែន អ្នកនាំពាក្យ គណបក្សហ៊្វុនស៊ិនប៉ិច បានផ្ដល់កិច្ចសម្ភាសន៍ជាមួយ BTV នាថ្ងៃទី៧ ខែសីហា ឆ្នាំ ២០២៣នេះថា គណបក្សហ្វុនស៊ិនប៉ិច ដែលជាគណបក្សរាជានិយមនៅកម្ពុជា ទទួលបានការបោះឆ្នោតគាំទ្រពីប្រជាពលរដ្ឋជាង ៧០ ម៉ឺននាក់ ក្នុងនោះអាសនៈដែលគណបក្សហ៊្វុនស៊ិនប៉ិចទទួលបានរួមមាន រាជធានីភ្នំពេញ ខេត្តកំពង់ចាម កំពង់ធំ កណ្តាល និងខេត្តព្រៃវែង។ លោកបន្តថា តាមរយៈការគាំទ្រដ៏លើសលុបរបស់ប្រជាពលដ្ឋនាពេលនេះ គណបក្សហ៊្វុនស៊ិនប៉ិច ប្ដេជ្ញាសហការជាមួយរាជរដ្ឋាភិបាលថ្មី ដែលដឹកនាំដោយឯកឧត្ដមបណ្ឌិត ហ៊ុន ម៉ាណែត ដើម្បីបម្រើផលប្រយោជន៍ប្រជាជន និងប្រទេសកម្ពុជាឱ្យមានការអភិវឌ្ឍរីកចម្រើនទៅមុខបន្ថែមទៀត។លោក ញឿន រ៉ាដែន បានបន្តថា បច្ចុប្បន្ន គណបក្សហ៊្វុនស៊ិនប៉ិច កំពុងសម្រង់មតិយោបល់ពីប្រជាពលរដ្ឋ អំពីតម្រូវការ និងការចង់បានរបស់ប្រជាពលរដ្ឋ ដើម្បីរៀបចំជាគោលនយោបាយ និងយុទ្ធសាស្រ្ដបន្ថែមទៀត សម្រាប់ដាក់ស្នើទៅរាជដ្ឋាភិបាលកាន់អំណាច អនុវត្តឱ្យបានល្អ និងទៅដល់ប្រជាពលរដ្ឋគោលដៅតាមបណ្ដារាជធានី ខេត្ត។ សូមជម្រាបថាសម្រាប់បេក្ខជនចំនួន ៥រូបរបស់គណបក្សហ៊្វុន ស៊ិនប៉ិចដែលបានជាប់ឆ្នោតតំណាងរាស្រ្តក្នុងរដ្ឋសភា សម្រាប់នីតិកាលទី៧នេះ រួមមាន ១.ព្រះអង្គម្ចាស់ នរោត្តម ចក្រាវុធ ២. លោក ភឹម រ៉ិង ៣.លោក គង់ ចំណូល ៤. នាង ចាន់ណាក់ និង៥.លោក ញឿន រ៉ាដែន។ ក្រៅពីសមាជិកសភាគណបក្សហ៊្វុនស៊ិនប៉ិចទាំងនេះ អាសនៈទាំងអស់ គឺសុទ្ធតែសមាជិកសភាមកពីគណបក្សប្រជាជនកម្ពុជាចំនួន ១២០ អាសនៈ៕អត្ថបទ៖វ៉ន ដារ៉ា

លោក ដូណាល់ ត្រាំ នឹងស្វែងរកចៅក្រមថ្មី នៅក្នុងការកាត់ក្តីពីបទឃុបឃិតក្នុងការបោះឆ្នោត

អាមេរិក៖ អតីតប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយកាលពីថ្ងៃអាទិត្យថា លោកនឹងដាក់ញត្តិសុំឱ្យមានចៅក្រមផ្សេងទៀត ពិនិត្យមើលការកាត់ក្តីបទឧក្រិដ្ឋ ជាប្រវត្តិសាស្ត្ររបស់លោក និងសម្រាប់សំណុំរឿងនេះដែលនឹងត្រូវផ្លាស់ចេញពីទីក្រុងវ៉ាស៊ីនតោន។ សមាជិកគណបក្សសាធារណរដ្ឋដែលត្រូវបានចោទប្រកាន់ចំនួនពីរលើករូបនេះ បានរៀបចំសកម្មភាពរិះគន់ជាបន្តបន្ទាប់ប្រឆាំងអ្នកទាំងឡាយណាដែលកាត់ទោសលោកឬកំពុងដំណើរការរឿងក្តី ដែលលោកប្រឈមមុខនឹងការចោទប្រកាន់ពីបទប៉ុនប៉ងលុបចោលលទ្ធផលបោះឆ្នោតឆ្នាំ ២០២០ និងក្លែងបន្លំនៅសហរដ្ឋអាមេរិក។គោលដៅចុងក្រោយរបស់លោក ចៅក្រមសហព័ន្ធប្រចាំតំបន់របស់សហរដ្ឋអាមេរិក លោកស្រី Tanya Chutkan ជាអ្នកដែលត្រូវបានតែងតាំងដោយអតីតប្រធានាធិបតីគណបក្សប្រជាធិបតេយ្យ លោក Barack Obama ដែលត្រូវបានចាត់តាំងដោយចៃដន្យក្នុងសំណុំរឿងនៅទីក្រុងវ៉ាស៊ីនតោន។ លោក Trump ដោយប្រើអក្សរធំទាំងអស់បានបង្ហោះនៅលើបណ្តាញ Truth Social របស់លោកថា ពុំមានវិធីណាដែលខ្ញុំអាចទទួលបានការកាត់ក្តីដោយយុត្តិធម៌ជាមួយចៅក្រមដែលត្រូវបានចាត់តាំង ចំពោះករណីសេរីភាពនៃការបញ្ចេញមតិការបោះឆ្នោតដោយយុត្តិធម៌ដែលគួរឱ្យអស់សំណើចនោះទេ។ គេគ្រប់គ្នាដឹងពីបញ្ហានេះ ហើយលោកស្រីក៍ដឹងដែរ។ លោក Trump បាននិយាយបន្តថា យើងនឹងស្នើសុំឱ្យមានការបដិសេធភ្លាមៗពីចៅក្រមនេះ ដោយផ្អែកលើហេតុផលដ៏មានឥទ្ធិពល ហើយដូចគ្នានេះដែរសម្រាប់ការផ្លាស់ប្តូរទីកន្លែងចេញពីទីក្រុងវ៉ាស៊ីនតោន ជាទីក្រុងខ្មៅភាគច្រើនដែលមាននិន្នាការប្រជាធិបតេយ្យខ្លាំង។លោកស្រី Chutkan អាយុ ៦១ ឆ្នាំ គឺជាចៅក្រមម្នាក់ក្នុងចំណោមចៅក្រមជាង១០នាក់នៅលើកៅអីតុលាការសហព័ន្ធទីក្រុងវ៉ាស៊ីនតោន។ ការតែងតាំងរបស់លោកស្រីឡើងកាន់តួនាទីក្នុងឆ្នាំ២០១៤ ត្រូវបានព្រឹទ្ធសភាអនុម័តជាឯកច្ឆ័ន្ទ៕

ជនអន្តោប្រវេសន៍១០នាក់ដែលស្លាប់ អណ្តែតមកដល់ច្រាំងសមុទ្រនៅទុយនីស៊ី

ទុយនីស៊ី៖ អាជ្ញាធរបាននិយាយកាលពីថ្ងៃអាទិត្យថា សាកសពជនអន្តោប្រវេសន៍១០នាក់ ត្រូវបានរកឃើញនៅលើឆ្នេរមួយកន្លែងក្នុងប្រទេសទុយនីស៊ី ក្បែរទីក្រុង Sfax ដែលបានឃើញការកើនឡើងនៅឆ្នាំនេះក្នុងការឆ្លងកាត់សមុទ្រឆ្ពោះទៅអឺរ៉ុប។ ប្រទេសទុយនីស៊ី បានក្លាយជាច្រកផ្លូវដ៏សំខាន់សម្រាប់ជនអន្តោប្រវេសន៍មិនទៀងទាត់ និងអ្នកស្វែងរកសិទ្ធិជ្រកកោនជាចម្បងមកពីផ្នែកផ្សេងៗនៃទ្វីបអាហ្រ្វិក ដោយប៉ុនប៉ងធ្វើដំណើរដោយគ្រោះថ្នាក់ជាញឹកញាប់តាមទូកគ្មានសុវត្ថិភាព ក្នុងក្តីសង្ឃឹមពីជីវិតកាន់តែប្រសើរ។ កងឆ្មាំជាតិ បាននិយាយនៅក្នុងសេចក្តីថ្លែងការណ៍ថា សាកសព១០នាក់ ត្រូវបានរកឃើញក្នុងរយៈពេល ៤៨ម៉ោងកន្លងទៅនេះដោយអង្គភាពឆ្មាំឆ្នេរសមុទ្រ នៅភាគខាងជើងទីក្រុង Sfax នៅភាគខាងកើត ប្រទេសទុយនីស៊ី។ អ្នកនាំពាក្យតុលាការទីក្រុង Sfax លោក Faouzi Masmoudi បានប្រាប់សារព័ត៌មាន AFP ថា តុលាការត្រូវបានគេជូនដំណឹងអំពីការរកឃើញសាកសពប្រាំបីនាក់ ដែលជាក់ស្តែងជាជនជាតិអាហ្វ្រិកនៅអនុតំបន់សាហារ៉ាហើយក្រុមអ្នកស៊ើបអង្កេតកំពុងធ្វើការដើម្បីកំណត់អត្តសញ្ញាណពួកគេ។ លោក Masmoudi បាននិយាយថា ជនអន្តោប្រវេសន៍ដែលបានស្លាប់ត្រូវបានគេរកឃើញនៅចន្លោះថ្ងៃសុក្រ និងថ្ងៃសៅរ៍ ក្នុងអំឡុងពេលមានព្យុះ ដែលអាចពន្លិចទូករបស់ពួកគេ ប៉ុន្តែបានកត់សម្គាល់ថាពុំមានការរាយការណ៍ពីបំណែកទូកលិចនៅជិតក្រុង Sfax នោះទេ។ អ្នកនាំពាក្យរូបនេះបាននិយាយថា ពួកគេប្រហែលជាបានចាប់ផ្តើមចេញពីតំបន់ផ្សេងទៀតតាមបណ្តោយឆ្នេរប្រទេសទុយនីស៊ី។ យោងតាមក្រសួងមហាផ្ទៃរបស់ប្រទេសអាហ្រ្វិកខាងជើងបានឲ្យដឹងថា សាកសពចំនួន ៩០១នាក់ ត្រូវបានរកឃើញនៅឆ្នាំនេះគិតត្រឹមថ្ងៃទី ២០ ខែកក្កដា បន្ទាប់ពីមានឧបទ្ទវហេតុ នៅសមុទ្រមេឌីទែរ៉ាណេ ហើយ ៣៤,២៩០នាក់ផ្សេងទៀតត្រូវបានជួយសង្គ្រោះ ឬត្រូវបានស្ទាក់ចាប់។ ក្រសួងនិយាយថាភាគច្រើននៃជនអន្តោប្រវេសន៍គឺមកពីបណ្តាប្រទេសអនុតំបន់សាហារ៉ាអាហ្វ្រិក។ យោងតាមតួលេខរបស់អង្គការសហប្រជាជាតិ បានឲ្យដឹងថា ជនអន្តោប្រវេសន៍ជិត ៩០.០០០ នាក់បានមកដល់ប្រទេសអ៊ីតាលីនៅឆ្នាំនេះ។ ទីភ្នាក់ងារជនភៀសខ្លួនរបស់អង្គការសហប្រជាជាតិ UNHCR បាននិយាយថា ភាគច្រើននៃជនអន្តោប្រវេសន៍បានចាប់ផ្តើមពីប្រទេសទុយនីស៊ី ឬប្រទេសជិតខាងលីប៊ី៕

លោក Zelenskiy ពិនិត្យមីស៊ីល និងប្រព័ន្ធការពារដែនអាកាសផ្គត់ផ្គង់ដោយលោកខាងលិចនៅថ្ងៃទិវាកងទ័ពអាកាស

អ៊ុយក្រែន៖ ប្រធានាធិបតីអ៊ុយក្រែន លោក Volodymyr Zelenskiy បានធ្វើទស្សនកិច្ចនៅព្រលានយន្តហោះមួយកន្លែងនៅទីតាំងដែលពុំបានបញ្ជាក់ឈ្មោះកាលពីថ្ងៃអាទិត្យ ដើម្បីអបអរដល់អាកាសយានិកទាំងបុរសនិងស្ត្រីដែលកំពុងប្រយុទ្ធប្រឆាំងការឈ្លានពានរបស់រុស្ស៊ី និងដើម្បីពិនិត្យមើលយន្តហោះផលិតនៅសូវៀត បំពាក់នូវអ្វីដែលទំនងជាមីស៊ីល Anglo-French Storm Shadow ។ លោក Zelenskiy បានពិនិត្យមើលប្រព័ន្ធការពារដែនអាកាសដែលផ្គត់ផ្គង់ដោយប្រទេសលោកខាងលិចចំនួនពីរគ្រឿងគឺប្រព័ន្ធដែនអាកាសប៉ាទ្រីយ៉ូតនិង Iris T-SLM ដែលត្រូវបានដាក់តាំងបង្ហាញនៅព្រលានយន្តហោះមួយកន្លែងដែលមិនបានបញ្ជាក់ឈ្មោះឱ្យដឹង។ ទីភ្នាក់ងារសារព័ត៌មាន RIA របស់រុស្ស៊ី បានដកស្រង់សម្តីលោក Sergei Aksyonov ប្រធានតំបន់គ្រីម៉េដែលលើកបន្តុបដោយទីក្រុងមូស្គូបាននិយាយថា ដំណើរទស្សនកិច្ចនេះ ធ្វើឡើងខណៈរុស្ស៊ីបាននិយាយថា ការវាយប្រហារដោយមីស៊ីលរបស់អ៊ុយក្រែនបានបំផ្លាញស្ពាននៅផ្លូវ Chonhar ដែលតភ្ជាប់ពីដីគោកអ៊ុយក្រែនទៅកាន់តំបន់គ្រីម៉េ កាលពីថ្ងៃអាទិត្យ ទី៦ ខែសីហា ។ សារព័ត៌មាន RIA បានដកស្រង់សម្តីអភិបាលក្រុង Kherson ស្តីទី លោក Vladimir Saldo ជាអ្នកត្រូវបានលើកបន្តុបដោយទីក្រុងមូស្គូម្នាក់ទៀត ដោយនិយាយថា ការវាយប្រហារទៅលើស្ពាន ជាផ្លូវមួយក្នុងចំណោមផ្លូវតភ្ជាប់ទាំងបីរវាងតំបន់គ្រីម៉េនិងអ៊ុយក្រែនដីគោក ពាក់ព័ន្ធនឹងមីស៊ីល Anglo-French Storm Shadow ប៉ុន្តែលោកពុំបានផ្តល់ភស្តុតាងណាមួយឡើយ៕

អាជ្ញាធរ និងពលរដ្ឋប្រកាសគាំទ្រឯកឧត្តម ហ៊ុន ម៉ាណែត ជានាយករដ្ឋមន្ត្រីអាណត្តិទី៧

ភ្នំពេញ៖ អាជ្ញាធរមូលដ្ឋាន និងប្រជាពលរដ្ឋ នៅក្នុងមូលដ្ឋានរាជធានីភ្នំពេញ បានបង្ហាញការគាំទ្រយ៉ាងពេញទំហឹងចំពោះឯកឧត្តមបណ្ឌិត ហ៊ុន ម៉ាណែត ដែលនឹងត្រូវចូលកាន់តំណែង ជានាយករដ្ឋមន្ត្រី នៅក្នុងអាណត្តិទី៧ ជាមួយនឹងការសង្ឃឹមជឿជាក់ថា ឯកឧត្តមនឹងដឹកនាំប្រទេសជាតិឲ្យកាន់តែរីកចម្រើន ។លោកស្រី វ៉ា សុរិន ចៅសង្កាត់ព្រែកថ្មី ខណ្ឌច្បារអំពៅ បានបង្ហាញនូវការមើលឃើញពីចំណេះដឹង ខ្ពស់គុណធម៌ សីលធម៌ ប្រជាប្រិយភាព និងសមត្ថភាពគ្រប់គ្រាន់ របស់ឯកឧត្តមបណ្ឌិត ហ៊ុន ម៉ាណែត ពិតជាស័ក្តិសមអង្គុយលើកៅអីនាយករដ្ឋមន្ត្រី ។ប្រជាពលរដ្ឋមូលដ្ឋានេះដែរ ក៏បាននិយាយថា ពួកគេមានការពេញចិត្តជាខ្លាំងចំពោះ ឯកឧត្តមបណ្ឌិត ហ៊ុន ម៉ាណែត និងគាំទ្រពេញទំហឹង ដែលឯកឧត្តម នឹងឡើងកាន់តំណែងនាយករដ្ឋមន្ត្រី នៅក្នុងអាណត្តិថ្មីនេះ ហើយសង្ឃឹមជឿជាក់ថា ឯកឧត្តម នឹងដឹកនាំប្រទេសជាតិឲ្យកាន់តែរីកចម្រើនបន្ថែមទៀត និងថែរក្សានូវសុខសន្តិភាព ឲ្យប្រជាពលរដ្ឋបានរស់នៅសុខសាន្តជារៀងរហូត ។ជាមួយគ្នានេះ អាជ្ញាធរ និងប្រជាពលរដ្ឋ ក្នុងសង្កាត់ព្រែកថ្មី ក៏បានគាំទ្រចំពោះលទ្ធផលផ្លូវការ នៃ ការបោះឆ្នោតជ្រើសតាំងតំណាងរាស្ត្រ នីតិកាលទី៧នេះ ដែលគណបក្សប្រជាជនកម្ពុជា បានទទួលសំឡេងគាំទ្រយ៉ាងច្រើនលើសលប់ ដែលលទ្ធផលនេះ គឺពិតជាបានឆ្លើយតបនឹងការខិតខំប្រឹងប្រែងរបស់រាជរដ្ឋាភិបាលកម្ពុជា ដឹកនាំដោយគណបក្សប្រជាជនកម្ពុជា និងឆ្លើយតបទៅនឹងឆន្ទៈរបស់ប្រជាពលរដ្ឋ ជាម្ចាស់ឆ្នោតពិតប្រាកដ ៕អត្ថបទ៖ បាន សុខរិទ្ធិ

មនុស្សយ៉ាងហោចណាស់២៤នាក់ បានស្លាប់ក្នុងគ្រោះថ្នាក់ចរាចរណ៍រថយន្តក្រុងនៅប្រទេសម៉ារ៉ុក

ម៉ារុក៖ មនុស្សយ៉ាងហោចណាស់២៤នាក់ បានស្លាប់ បន្ទាប់ពីរថយន្តមួយគ្រឿងបានក្រឡាប់នៅក្នុងប្រទេសម៉ារុក ក្នុងឧបទ្ទវហេតុមួយក្នុងចំណោមគ្រោះថ្នាក់សាហាវបំផុតជាច្រើនក្នុងរយៈពេលជាច្រើនឆ្នាំនៅក្នុងប្រទេសនេះ ។ ក្រុមអាជ្ញាធរបានប្រាប់ទីភ្នាក់ងារសារព័ត៌មានរដ្ឋ MAP ថា រថយន្តក្រុងធន់តូចមួយគ្រឿងដែលធ្វើដំណើរទៅផ្សារប្រចាំសប្ដាហ៍នៅក្នុងទីប្រជុំជន ឌឹមណេត (Demnate) ក្នុងខេត្តអាហ្ស៊ីឡាល (Azilal) បានប្រឡាប់ ខណៈពេលកំពុងដឹកអ្នកដំណើរនៅតាមផ្លូវកាលពីថ្ងៃអាទិត្យ ។ ប្រភពខាងលើនិយាយថា ពេលទទួលបានដំណឹងភ្លាមៗ ក្រុមអាជ្ញាធរប្រចាំតំបន់ កងកម្លាំងអាវុធហត្ថ និងអង្គភាពការពារជនស៊ីវិល បានទៅដល់កន្លែងកើតហេតុដើម្បីចាត់វិធានការចាំបាច់នានា។ ប្រភពដដែលបន្ថែមថា ក្រុមអាជ្ញាធរកំពុងធ្វើការស៊ើបអង្កេតពីមូលហេតុនាំឲ្យមានឧបទ្ទវហេតុនេះកើតឡើង។ ។ គ្រោះថ្នាក់ចរាចរណ៍ កាលពីថ្ងៃអាទិត្យ គឺជាឧបទ្ទវហេតុតាមផ្លូវដ៏ធ្ងន់ធ្ងរចុងក្រោយបំផុតជាច្រើននៅក្នុងប្រទេសនៅអាមេរិកខាងជើងមួយនេះ។ កាលពីរដូវក្ដៅឆ្នាំមុន មនុស្ស២៣នាក់ បានស្លាប់នៅពេលរថយន្តក្រុងមួយគ្រឿង បានក្រឡាប់នៅលើផ្លូវរថយន្តមួយនៅភាគខាងកើត រដ្ឋធានីសេដ្ឋកិច្ច កាសាប្លង់កា(Casablanca) របស់ប្រទេសនេះ ៕

ក្រុមប្រឆាំងនឹងលោក Lukashenko រួបរួមគ្នារៀបចំផែនការធ្វើលិខិតឆ្លងដែនបេឡារុសថ្មី

បេឡារុស៖ ក្រុមប្រឆាំងដែលនិរទេសខ្លួនរបស់ប្រធានាធិបតី អាឡិចសាន់ឌឺ លូកាសិនកូ ( Alexander Lukashenko) បានជួបប្រជុំគ្នានៅប្រទេសប៉ូឡូញ កាលពីថ្ងៃអាទិត្យនៅមុនថ្ងៃគម្រប់ខួបលើកទី៣ នៃការតវ៉ាក្រោយការបោះឆ្នោតដែលមិនបានជោគជ័យរបស់ពួកគេ ដើម្បីបង្ហាញពីការរួបរួម និងផែនការយុទ្ធសាស្រ្តរួមទាំងការចេញលិខិតឆ្លងដែន«បេឡារុសថ្មី»។ដោយត្រូវបានបង្កើតឡើងក្នុងខែសីហា ឆ្នាំ ២០២២ ដោយលោក ស្រី ស្វីអាតឡាណា ទីខាណូស្កាយ៉ា (Sviatlana Tsikhanouskaya) រដ្ឋាភិបាលស្វ័យប្រកាសដែលនិរទេសខ្លួន បានបើកស្ថានទូតជំនួសជាង២០ និងមជ្ឈមណ្ឌលព័ត៌មាន នៅបរទេស។លោកស្រី ទីខាណូស្កាយ៉ា មានវ័យ៤០ឆ្នាំ ជាអតីតគ្រូបង្រៀនភាសាអង់គ្លេស ដែលបានរត់គេចខ្លួនបន្ទាប់ពីបានធ្វើការប្រឆាំងនឹងលោក លូកាសិនកូ នៅក្នុងការបោះឆ្នោតឆ្នាំ ២០២០ ដែលក្រុមអ្នករិះគន់បានហៅថា មានការលួចបន្លំ បាននិយាយថា គណបក្សប្រឆាំងនឹងស្វែងរកការទទួលស្គាល់ពីអន្តរជាតិសម្រាប់លិខិតឆ្លងដែនជំនួសនោះ។ថ្លែងនៅឯសណ្ឋាគារមួយក្នុងទីក្រុងវ៉ាសូវី ( Warsaw ) ទៅកាន់សកម្មជនរាប់រយនាក់ រួមទាំងប្រព័ន្ធផ្សព្វផ្សាយឯករាជ្យ និងក្រុមពលរដ្ឋ លោកស្រី ទីខាណូស្កាយ៉ា បានជំរុញឲ្យកងកម្លាំងប្រឆាំងនៅក្រៅប្រទេសរួបរួមគ្នា និងគាំទ្រការបង្កើតចលនា«បេឡារុសថ្មី»នេះ៕

ប្រទេសចិន បានចេញផ្សាយភាពយន្តឯកសារចំនួន៨ដែលបង្ហាញពីសមត្ថភាពរបស់ខ្លួនក្នុងការវាយប្រហារកោះតៃវ៉ាន់

តៃវ៉ាន់៖ ប្រទេសចិន បានចេញផ្សាយភាពយន្តឯកសារចំនួន៨អំពីការត្រៀមខ្លួនរបស់យោធារបស់ខ្លួន ក្នុងការវាយប្រហារកោះតៃវ៉ាន់ដែលបង្ហាញពីទាហានដែលសន្យាថានឹងស្លាប់ក្នុងការក្រសោបយកកោះនេះ ប្រសិនបើចាំបាច់។វគ្គដំបូងនៃភាពយន្តឯកសារឈ្មោះថា ការដេញតាមក្តីសុបិន «Chasing Dreams» ត្រូវបានចាក់ផ្សាយដោយទូរទស្សន៍រដ្ឋ CCTV កាលពីថ្ងៃអង្គារ ដើម្បីប្រារព្ធខួបលើកទី៩៥នៃកងទ័ពរំដោះប្រជាជនចិនដែលជាយោធារបស់ប្រទេសចិន។ភាពយន្តឯកសារនោះ បង្ហាញពីរូបភាពវីដេអូនៃសមយុទ្ធយោធា ជាពិសេសនៅជុំវិញកោះតៃវ៉ាន់ និងការបញ្ជាក់យ៉ាងលាស់ពីទាហានរាប់សិបនាក់។អ្នកខ្លះនិយាយថា ពួកគេសុខចិត្តលះបង់ជីវិត ដើម្បីបុព្វហេតុដណ្តើមយកកោះនេះ។បុរសដែលត្រូវបានគេស្គាល់ថា លី ប៉េង (Li Peng) អ្នកបើកយន្តហោះពីក្រុមទ័ពសេះវ៉ាង ហៃ (Wang Hai)នៅក្រោមទីបញ្ជាការយុទ្ធសាស្ត្រភាគខាងកើតរបស់យោធាដែលទទួលខុសត្រូវក្នុងការធ្វើប្រតិបត្តិការនៅច្រកសមុទ្រតៃវ៉ាន់ បាននិយាយថា៖«យន្តហោះចម្បាំងរបស់ខ្ញុំ នឹងក្លាយជាមីស៊ីលចុងក្រោយរបស់ខ្ញុំ ដោយប្រញាប់ប្រញាល់រត់ឆ្ពោះទៅរកសត្រូវ ប្រសិនបើនៅក្នុងសមរភូមិពិត ខ្ញុំបានប្រើគ្រាប់ទាំងអស់ របស់ខ្ញុំ»៕

បណ្ដាញសង្គម

ព័ត៌មានថ្មីៗ

ជនជាតិអាមេរិកប៉ាឡេស្ទីចំណាយពេលពេញមួយយប់ជាមួយគ្រួសារក្នុងផ្ទះដែលឡោមព័ទ្ធដោយក្រុមតាំងលំនៅនិគមន៍អ៊ីស្រាអែល

កាតានិយាយថា កិច្ចព្រមព្រៀងច្រកសមុទ្រ Hormuz អាចនឹងជួយឲ្យវិលត្រឡប់ទៅរកកិច្ចប្រជុំអាមេរិក-អ៊ីរ៉ង់

ប្រធានាធិបតីចិន លោក Xi ជំរុញកុំឱ្យ «បំផ្លាញ» ឋានៈជា «តំបន់សន្តិភាព» របស់អាមេរិកឡាទីន

បេសកជន៖ អាមេរិកបារម្ភយ៉ាងខ្លាំង ចំពោះការវាយប្រហារតាមអាកាសរបស់អ៊ីស្រាអែលលើមូលដ្ឋានទ័ពអាកាសស៊ីរី

មនុស្សយ៉ាងតចិច ២៥នាក់ ត្រូវបានសម្លាប់ អំឡុងការវាយប្រហារនៅរដ្ឋ Plateau របស់នីហ្សេរីយ៉ា

មនុស្ស ៣នាក់ រងរបួស ហើយអគាររងការខូចខាតក្នុងការរញ្ជួយដីនៅភាគខាងត្បូងអេស្ប៉ាញ

ពលរដ្ឋរស់នៅទីក្រុងម៉ានីល ដើរលុកទឹកតាមផ្លូវ ស្របពេលភ្លៀងវស្សាវាយប្រហារដ្ឋធានីហ្វីលីពីនមួយនេះ

ទឹកជំនន់បង្ខំឲ្យមនុស្សរាប់ម៉ឺននាក់ជម្លៀសខ្លួននៅរដ្ឋ Odisha និងរដ្ឋ Assam ប្រទេសឥណ្ឌា

មនុស្សម្នាក់ស្លាប់ និងច្រើននាក់ទៀតជាប់ខ្លួន ក្រោយផ្ទះចាស់បាក់រលំនៅទីក្រុង Kolkata ប្រទេសឥណ្ឌា

សាកសពជនអន្តោប្រវេសន៍ ៩នាក់ ត្រូវបានរកឃើញនៅជិតតំបន់ឆ្នេរភាគខាងកើតទីក្រុង Tripoli ប្រទេសលីប៊ី

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ​ និង ការអភិវឌ្ឍន៍