នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមហ៊ុន TH Automotive Manufacturing Co., Ltd​ នឹង​សម្ពោធជាផ្លូវការ​ រោងចក្រផ្គុំ និងដំឡើងរថយន្តរបស់ខ្លួន​នៅកម្ពុជា​ ក្នុងឆ្នាំ២០២៦នេះ
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម

នយោបាយ​ និង ការអភិវឌ្ឍន៍

ជនស៊ីវិល ១៦នាក់ បានស្លាប់នៅក្នុងការវាយប្រហារលើក្រុងអូមឌើម៉ានរបស់ប្រទេសស៊ូដង់

2023/07/26 07:18:01 pm        116
Facebook Telegram Linkin
ស៊ូដង់៖ គណៈកម្មាធិការរបស់អង្គភាពតស៊ូមតិមួយ បានឲ្យដឹងថា យ៉ាងហោចណាស់ជនស៊ីវិល ១៦នាក់ ត្រូវបានសម្លាប់ កាលពីថ្ងៃអង្គារ (ទី២៥ ខែកក្កដា) ក្នុងការវាយប្រហារតាមផ្លូវអាកាស និងការបាញ់កាំភ្លើងធំ នៅឯសង្កាត់មួយ ក្នុងទីក្រុងអូមឌើម៉ាន (Omdurman) នៅភាគខាងលិចនៃរដ្ឋធានីខាទូម (Khartoum) របស់ប្រទេសស៊ូដង់។ជាមួយគ្នានេះ គណៈកម្មាធិការតស៊ូមតិរបស់អង្គភាព Ombada ដែលជាក្រុមយុវជនដ៏មានប្រជាប្រិយនេះ ក៏បានប្រាប់ផងដែរថា មានជនរងគ្រោះផ្សេងទៀត នៅផ្សារ Souk Libya ដែលជាផ្សារមូលដ្ឋាន ក្នុងក្រុងអូមឌើម៉ាន ដោយសារការវាយប្រហារនេះ។ទន្ទឹមនឹងនេះ លោកស្រី ក្លេម៉ុនទីន អិនក្វេតា-សាឡាមី (Clementine Nkweta-Salami) អ្នកសម្របសម្រួលរបស់អង្គការសហប្រជាជាតិ (UN) ប្រចាំប្រទេសស៊ូដង់ នៅថ្ងៃអង្គារនោះ បាននិយាយក្នុងសេចក្តីថ្លែងការណ៍ថា ស្ថានភាពមនុស្សធម៌ ក្នុងប្រទេសស៊ូដង់ បានប្រែកា្លយទៅជាមហន្តរាយទាំងស្រុងហើយ។យោងតាមសេចក្តីថ្លែងការណ៍នោះ បានឲ្យដឹងថា ទីកន្លែងមនុស្សធម៌ ក៏ត្រូវបានវាយប្រហារផងដែរ ដោយឃ្លាំងស្តុកសម្ភារៈមនុស្សធម៌យ៉ាងហោចណាស់៥០កន្លែង ត្រូវបានចូលលួច ហើយការិយាល័យចំនួន ៨២កន្លែង ត្រូវបានចូលទៅរុករើ។សូមបញ្ជាក់ថា ប្រទេសស៊ូដង់បាន និងកំពុងកើតមានការប្រយុទ្ធគ្នាយ៉ាងធ្ងន់ធ្ងរ រវាងកងទ័ពស៊ូដង់ និងកងកម្លាំងគាំទ្ររហ័សប៉ារ៉ាយោធា នៅទីក្រុងខាទូម (Khartoum) និងតំបន់ផ្សេងទៀត ចាប់តាំងពីថ្ងៃទី១៥ ខែមេសាមក ហើយយោងតាមតួលេខដែលចេញផ្សាយដោយក្រសួងសុខាភិបាលស៊ូដង់ បានឲ្យដឹងថា មនុស្សជាង ៣.០០០នាក់ បានបាត់បង់ជីវិត និងជាង ៦.០០០នាក់ រងរបួស៕

គ.ជ.ប នឹងបើកសវនាការបណ្តឹងញុះញង់គូសបំផ្លាញសន្លឹកឆ្នោត ខណៈ៣០បណ្តឹងដោះស្រាយរួចរាល់

2023/07/26 07:16:42 pm        172
Facebook Telegram Linkin
ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃស្អែកនេះ នឹងបើកសវនាការ​លើបណ្តឹងញុះញង់​​ឲ្យគូសបំផ្លាញសន្លឹកឆ្នោតចំនួន ​៥ បណ្តឹងទៀត ខណៈបណ្ដឹងចំនួន ៣០ បណ្តឹងផ្សេងទៀត​សម្រេច​ផ្តន្ទាទោសពិន័យជាប្រាក់​ និងដកសិទ្ធិឈរឈ្មោះឲ្យគេបោះឆ្នោត។ ឯកឧត្តម ហង្ស ពុទ្ធា សមាជិក និងជាអ្នកនាំពាក្យ គ.ជ.ប នៅថ្ងៃទី២៦ ​ខែកក្កដា ឆ្នាំ២០២៣ បានឲ្យដឹងថា អំឡុងពេល ​និងក្រោយពេលបោះឆ្នោតជ្រើសតាំងតំណាងរាស្រ្ត ​នីតិកាលទី៧ បានបញ្ចប់ និងបានប្រកាសលទ្ធផលបឋមក្តី ប៉ុន្តែគណៈកម្មការឃុំ-សង្កាត់រៀបចំការ​បោះឆ្នោត បាន​ទទួលបណ្តឹងសរុបចំនួន៣៥​ បណ្តឹង​ពី​តាមបណ្តារាជធានី-ខេត្ត ​ដែលពាក់ព័ន្ធនឹងករណីញុះញង់​គូស​បំផ្លាញ​សន្លឹកឆ្នោត។ ឯកឧត្តមបន្តថា ក្នុងចំណោមទាំង៣៥បណ្តឹងនោះ មាន ៣០ បណ្តឹងបានសម្រេចផ្តន្ទាទោស ដោយមានទាំងការផាក​ពិន័យ​ជាប្រាក់ ​រួមទាំងលុប​ឈ្មោះក្នុង​បញ្ជីឈ្មោះបោះឆ្នោត និង​ដកសិទ្ធិមិនឲ្យឈរឈ្មោះបោះឆ្នោត ​ខណៈបណ្ដឹង​ចំនួន ៥ បណ្តឹងផ្សេងទៀតនឹងត្រូវ​លើក​ក្នុង​សវនាការជម្រះនៅថ្ងៃទី ២៧ កក្កដា ស្អែកនេះ។ឯកឧត្តម ហង្ស ពុទ្ធា ថ្លែងថា ក្នុងចំណោមបណ្តឹងពាក់ព័ន្ធនឹង​ការញុះញង់គូសបំផ្លាញ​សន្លឹកឆ្នោត​នេះ ភាគច្រើនប្តឹងដោយតំណាងរបស់​គណបក្សប្រជាជនកម្ពុជា​ និង​ប្រជាពលរដ្ឋមួយចំនួន ខណៈបណ្តឹងទាំង៥ នឹងលើកទៅក្នុងសវនាកានោះមកពីខេត្តត្បូងឃ្មុំ​ ២បណ្តឹង ប៉ៃលិន ២បណ្តឹង និងកំពង់ចាម ១ បណ្តឹង។ ឯកឧត្តមបន្តថា ពាក់ព័ន្ធនឹងបណ្តឹងទាំង៥ខាងលើ បន្ទាប់ពី គ.ជ.ប​ ចេញសេចក្តីសម្រេច តំណាង​ដើមចោទ ឬចុងចោទអាចបន្តប្តឹងជំទាស់ទៅក្រុមប្រឹក្សាធម្មនុញ្ញ ក្នុងរយៈពេល៧២ម៉ោង។ សូមជម្រាបថា ​ក្រោយការដោះស្រាយបណ្តឹង​បញ្ចប់ជាស្ថាពរ គ.ជ.ប នឹងធ្វើការប្រកាសលទ្ធផល​បណ្តោះអាសន្ន នាថ្ងៃទី៥ សីហា និងលទ្ធផលផ្លូវការប្រកាសនាថ្ងៃទី៩ សីហាខាងមុខ៕ អត្ថបទ សេក ឧត្តម

ក្រសួងការបរទេស៖ អាមេរិកដឹងថា អតីតទាហានម៉ារីន បានរងរបួសនៅពេលប្រយុទ្ធនៅអ៊ុយក្រែន

2023/07/26 07:11:38 pm        124
Facebook Telegram Linkin
អាមេរិក៖ អ្នកនាំពាក្យរងក្រសួងការបរទេស លោក វីដានធ៍ ប៉ាតែល (Vedant Patel) បាននិយាយកាលពីថ្ងៃអង្គារ (ទី២៥ កក្កដា)ថា ក្រសួងការបរទេសសហរដ្ឋអាមេរិកដឹងថា លោក ទ្រីវ័រ រីដ (Trevor Reed) អតីតទាហានម៉ារីនអាមេរិក ដែលត្រូវបានឃុំខ្លួនក្នុងប្រទេសរុស្ស៊ី ហើយបន្ទាប់មកត្រូវបានដោះលែងនៅក្នុងការដោះដូរអ្នកទោសកាលពីឆ្នាំមុន បានរងរបួសក្នុងពេលកំពុងប្រយុទ្ធនៅក្នុងប្រទេសអ៊ុយក្រែន។ លោកប៉ាតែល ក៏បាននិយាយផងដែរថា គាត់មិនបានដឹងពីការទំនាក់ទំនងណាមួយ ដែលផ្តល់ជូនរដ្ឋាភិបាលសហរដ្ឋអាមេរិកអំពីផែនការធ្វើដំណើររបស់លោកទ្រីវ័រ រីដ ទៅកាន់អ៊ុយក្រែននោះទេ។លោកប៉ាតែល បាននិយាយទៀតថា លោករីដ ត្រូវបានដឹកជញ្ជូនដោយមានការជំនួយពីអង្គការក្រៅរដ្ឋាភិបាលមួយទៅកាន់ប្រទេសអាល្លឺម៉ង់សម្រាប់ការថែទាំសុខភាព។សហរដ្ឋអាមេរិក បានព្រមានម្តងហើយម្តងទៀត មិនឲ្យជនជាតិអាមេរិកធ្វើដំណើរទៅអ៊ុយក្រែន ឬចូលរួមក្នុងការប្រយុទ្ធគ្នា ហើយទីប្រឹក្សាផ្នែការធ្វើដំណើររបស់ក្រសួងការបរទេសសម្រាប់អ៊ុយក្រែន ព្រមានថាមានរបាយការណ៍អំពីជនជាតិរុស្សី បានដាក់គោលដៅលើពលរដ្ឋអាមេរិកនៅក្នុងតំបន់ដែលកាន់កាប់ដោយរុស្ស៊ីនៅក្នុងប្រទេសអ៊ុយក្រែន សម្រាប់ការឃុំខ្លួន ការសួរចម្លើយឬ ការបៀតបៀន៕

ក្រុមវេជ្ជបណ្ឌិតអ៊ីស្រាអែល ចេញធ្វើកូដកម្មតវ៉ាប្រឆាំង ទៅនឹងការអនុម័តច្បាប់កំណែទម្រង់ប្រព័ន្ធតុលាការ

2023/07/26 07:06:47 pm        171
Facebook Telegram Linkin
អ៊ីស្រាអែល៖ ក្រុមវេជ្ជបណ្ឌិតអ៊ីស្រាអែលបានចាប់ផ្ដើមធ្វើកូដកម្មរយៈពេល២៤ម៉ោងកាលពីថ្ងៃអង្គារ ទី២៥ខែកក្កដា ឆ្លើយតបទៅនឹង ការផ្ដល់សច្ចាប័នរបស់រដ្ឋាភិបាលស្ដាំនិយមប្រកាន់តឹង ដំណាក់កាលដំបូងរបស់ច្បាប់កំណែទម្រង់ប្រព័ន្ធតុលាការ ដែលក្រុមអ្នករិះគន់ បារម្ភពីគ្រោះថ្នាក់ដល់ឯករាជភាពរបស់តុលាការ។ ច្បាប់មិនសមហេតុផលនេះ នឹងកំណត់អំណាចរបស់តុលាការកំពូលក្នុងការប្រឆាំងសេចក្ដីសម្រេចរបស់រដ្ឋាភិបាល និងការតែងតាំងរដ្ឋមន្ត្រី ដែលខ្លួនមើលឃើញថាជារឿងមិនសមហេតុផល។ ពង្រាងច្បាប់នេះ បានឆ្លងផុតអំណានទី២និងទី៣ កាលពីថ្ងៃចន្ទ ដោយសំឡេងភាគច្រើន ចំនួន៦៤ ក្នុងចំណោមសមាជិកសភា សរុប១២០ រូប ទោះបីជាផ្ទុះការតវ៉ាប្រឆាំងទូទាំងប្រទេស និងការតវ៉ាបានឈានចូលដល់សប្ដាហ៍ទី២៩ ក៏ដោយ។ ក្រុមអ្នកប្រឆាំងមួយចំនួនបានចោទប្រកាន់លោកនាយករដ្ឋមន្ត្រី Benjamin Netanyahu ពីបទរុញអ៊ីស្រាអែលទម្លាក់ចូលក្នុងរបបដឹកនាំផ្ដាច់ការ។សមាគមន៍វេជ្ជសាស្ត្រអ៊ីស្រាអែល បានបញ្ជឲ្យក្រុមវេជ្ជបណ្ឌិតធ្វើកូដកម្មរយៈពេល២៤ម៉ោង នៅទូទាំងប្រទេសលើកលែងតែទីក្រុងហ្ស៊េរ៉ុយសាឡឹម ។នគរបាលបាញ់ទឹកដើម្បីបំបែកក្រុមអ្នកតវ៉ា  និងមនុស្សមួយចំនួនត្រូវបានទាញចេញដោយនគរបាល ។ នគរបាលអ៊ីស្រាអែលនិយាយថា មនុស្សយ៉ាងហោចណាស់២២នាក់ ត្រូវបានចាប់ខ្លួនកាលពីថ្ងៃចន្ទ ៕

មន្រី្តសុខាភិបាល ស្នើពលរដ្ឋកុំធ្វេសប្រហែស មកពិគ្រោះព្យាបាលជំងឺជាមួយគ្រូពេទ្យជំនាញ

2023/07/26 07:05:07 pm        939
Facebook Telegram Linkin
ភ្នំពេញ៖ លោកឱសថការី ថៃ កុសល​ នាយផ្នែកមនី្ទរពិសោធន៍ នៃមនី្ទរពេទ្យមិត្តភាពខ្មែរ-សូវៀត តាមរយៈBTV ព័ត៌មាន បានស្នើដល់បងប្អូនប្រជាពលរដ្ឋ កុំធ្វេសប្រហែស និងអញ្ជើញមកពិគ្រោះព្យាបាលជំងឺជាមួយគ្រូពេទ្យជំនាញ ទទួលបានការវិភាគពិនិត្យឈាមរកមេរោគប្រកបដោយគុណភាព។លោកឱសថការី ថៃ កុសល នាយផ្នែកមនី្ទរពិសោធន៍ បានបន្តថា ប្រជាពលរដ្ឋគ្រប់រូប ត្រូវតែមក​ពិគ្រោះ ពិនិត្យសុខភាពតាមរយៈការពិនិត្យឈាម និងពិនិត្យមើលទៅលើវត្ថុភាគផ្សេងៗទៀត​ឲ្យបានទៀងទាត់ យ៉ាងហោចណាស់១ឆ្នាំ​ ឲ្យបាន២ដង។ ​ពិព្រោះថាការពិនិត្យឈាមនេះ ជួយបានច្រើនណាស់ ​អាចឲ្យយើងរកឃើញនូវជំងឺ​ ដែលយើងមិនបានដឹងខ្លួនពីមុន បានទាន់​ពេលវេលា ហើយទទួលបានរោគ​វិនិច្ឆ័យ​ត្រឹមត្រូវ ក៏ដូចជាទទួលបានការព្យាបាល​ជំងឺទាន់​ពេលវេលាផងដែរ។ ​ជាមួយគ្នានេះមនី្ទរពេទ្យមិត្តភាពខ្មែរ-សូវៀត បានខិតខំបំពាក់ឧបករណ៍​វេជ្ជសាស្រ្តទំនើប​ចុងក្រោយ​ ដើម្បីឲ្យការវិភាគកាន់តែមានសុក្រឹតភាព ត្រឹមត្រូវប្រកបដោយ​គុណភាពរហ័សទាន់ពេលវេលាផងដែរ។លោកឱសថការី បានលើកឡើងទៀតថា ផ្នែកមនី្ទរពិសោធន៍មួយនេះ រួមផ្សំជាមួយនឹងមនី្ទរ​ពិសោធន៍​ចំនួន​៥បន្ថែមទៀត ​ដែលផ្តល់សេវាវិភាគឈាមគ្រប់ប្រភេទដល់អ្នកជំងឺដែលមកទទួល​សេវានៅក្នុងមនី្ទរពេទ្យ ជាមធ្យមអ្នកជំងឺដែលមកទទួលសេវានៅផ្នែកខាងលើនេះ ​ចន្លោះពី៣០០ ទៅ៤០០នាក់ក្នុងមួយថ្ងៃ គ្រប់ប្រភេទនៃអ្នកជំងឺ ដូចជា៖ ពិគ្រោះព្យាបាល ឬក៏ប្រភេទអ្នកជំងឺដែល​មកសម្រាកព្យាបាលក្នុងមនី្ទរពេទ្យផ្ទាល់។ មនី្ទរពេទ្យផ្តល់សេវាជូនអ្នកជំងឺមានជីវភាពខ្វះខាត អ្នកជំងឺប្រើប្រាស់បណ្ណមូលនិធិសមធម៌ ​និងអ្នកជំងឺប្រើប្រាស់បណ្ណ ប.ស.ស.ផងដែរ។ ជាមួយគ្នានោះដែរ លោកឱសថការី ក៏សូមគោរពថ្លែងអំណរគុណ​ជូន​ចំពោះ​សម្តេច​អគ្គមហាសេនា​បតី​តេជោ ហ៊ុន សែន ជាប្រមុខនៃរាជរដ្ឋាភិបាល ​លោកតែងតែគិតគូរដល់សុខមាលភាព របស់បងប្អូន​ប្រជាពលរដ្ឋយើងទូទាំងប្រទេស។ដោយឃើញនូវតម្រូវការនៃការកើនឡើងនូវអ្នកជំងឺដ៏ច្រើនក្នុងមនី្ទរពេទ្យ តាមរយៈក្រសួង​សុខាភិបាល ​ដែលមានឯកឧត្តម សាស្រ្តាចារ្យ ម៉ម ប៊ុនហេង ជារដ្ឋមន្រី្ត លោកបានផ្តល់អគារថ្មី ដែលមានកំពស់៤ជាន់ ​ហើយអគារមួយនេះ ​ជាហេដ្ឋារចនាសម្ព័ន្ធសំខាន់ណាស់ សម្រាប់អ្នក​ជំងឺចូលមកសម្រាកព្យាបាល ​ក៏ដូចជាអនុញ្ញាតឲ្យផ្នែកធំៗ​ ទាំង៣​ បានចូលរួមអភិវឌ្ឍ បំពាក់នូវ​សម្ភារៈបរិក្ខារវេជ្ជសាស្រ្ត ម៉ាស៊ីនថ្មីៗ សម្រាប់ឆ្លើយតបទៅ​នឹងសេចកី្តត្រូវការរបស់បងប្អូន​ប្រជាពលរដ្ឋ ​សមិទ្ធផលទាំងអស់នេះ ​អាចឲ្យក្រុមការងារគ្រូពេទ្យទាំងអស់ ផ្តល់សេវាកម្ម កាន់​តែកៀកខិតជិតជូនបងប្អូនប្រជាពលរដ្ឋ ​ដែលខ្វះខាតរកកន្លែងសម្រាកព្យាបាល និងសូមថ្លែង​អំណរគុណឯកឧត្តមសាស្រ្តាចារ្យ ងី ម៉េង ​នាយកមនី្ទរពេទ្យមិត្តភាពខ្មែរ-សូវៀត តែងតែយកចិត្តទុកដាក់ ​និងផ្តល់ឱកាស​ឲ្យក្រុមគ្រូពេទ្យ​អភិវឌ្ឍន៍​ និងរីកចម្រើន។ ​សុខសន្តិភាព គឺជាគ្រឹះដ៏សំខាន់ក្នុងការអភិវឌ្ឍ ក្នុងនោះវិស័យសុខាភិបាល ​បានដើរតួនាទីយ៉ាងសំខាន់ ដើម្បីបម្រើសុខមាលភាព សុខភាពជូនប្រជាជន៕អត្ថបទ រដ្ឋា

ទេសាភិបាលធនាគារកណ្តាលនីហ្សេរីយ៉ាដែលត្រូវបានព្យួរការងារ បដិសេធការចោទប្រកាន់ជុំវិញការកាន់កាប់អាវុធនិងគ្រាប់រំសេវខុសច្បាប់

2023/07/26 06:56:48 pm        85
Facebook Telegram Linkin
នីហ្សេរីយ៉ា៖ លោក ហ្គ្រដវីន អ៊ីមេហ្វីល (Godwin Emefiele) ទេសាភិបាលធនាគារកណ្តាលនីហ្សេរីយ៉ា ដែលត្រូវបានព្យួរការងារ បានបង្ហាញខ្លួននៅតុលាការ ដោយបដិសេធថា មិនបានកាន់កាប់អាវុធ និងគ្រាប់រំសេវដោយខុសច្បាប់ នេះបើតាមការរាយការណ៍របស់ប្រព័ន្ធផ្សព្វផ្សាយក្នុងស្រុក ជាលើកដំបូងហើយដែលរូបលោក ត្រូវបានគេឃើញជាសាធារណៈក្នុងរយៈពេលជាងមួយខែ។ទូរទស្សន៍ Channels TV បានរាយការណ៍កាលពីថ្ងៃអង្គារថា លោកអ៊ីមេហ្វីល បានផ្តល់ចម្លើយពីភាពគ្មានទោសចំពោះបទល្មើសចំនួនពីរនៃការកាន់កាប់អាវុធ និងគ្រាប់រំសេវដោយខុសច្បាប់។លោកត្រូវបានចាប់ខ្លួនដោយនគរបាលសម្ងាត់របស់រដ្ឋកាលពីថ្ងៃទី ១០ ខែមិថុនា មួយថ្ងៃ បន្ទាប់ពីប្រធានាធិបតីថ្មីលោក បូឡា ទីនូប៊ូ ( Bola Tinubu ) បានព្យួរការងាររបស់លោក។ កាលពីដើមខែនេះ ចៅក្រម បានបញ្ជាឲ្យទីភ្នាក់ងារនេះ ធ្វើការចោទប្រកាន់ ឬត្រូវដោះលែង។លោក បានជំទាស់នឹងការឃុំខ្លួន ហើយបានដាក់ពាក្យសុំនៅក្រៅឃុំ៕

សម្តេចកិត្តិសង្គហបណ្ឌិត ម៉ែន សំអន៖ រាជរដ្ឋាភិបាលគិតគូដល់ជនមានពិការភាព​ឱ្យបានចូលបម្រើការងារនៅតាមស្ថាប័នរដ្ឋ និងឯកជន

2023/07/26 06:55:17 pm        157
Facebook Telegram Linkin
ភ្នំពេញ៖ សម្តេចកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង​ជាមួយរដ្ឋសភា-ព្រឹទ្ធសភា និងអធិការកិច្ច បានអញ្ជើញចុះសួរសុខទុក្ខ និងសំណេះសំណាល​ជាមួយក្មួយៗកុមារ គ ថ្លង់ និង ពិការភ្នែកនៅ លោកគ្រូអ្នកគ្រូចំនួន​ ជិត ៥០០នាក់ ដែលមកពី​វិទ្យាល័យ​អប់រំពិសេសច្បារអំពៅ និងវិទ្យាល័យអប់រំពិសេសភ្នំពេញថ្មី ដែលបានរៀបចំ​ឡើងនៅវិទ្យាល័យអប់រំពិសេសភ្នំពេញថ្មី ស្ថិតក្នុខណ្ឌសែនសុខ រាជធានីភ្នំពេញ នាព្រឹកថ្ងៃទី២៦ ខែកក្កដា ឆ្នាំ២០២៣។ថ្លែងក្នុងឱកាសនោះសម្តេចកិត្តិសង្គហបណ្ឌិត បានសម្តែងការ​អាណិតអាសូរ ចំពោះក្មួយៗ​កុមារគថ្លង់ និង ពិការភ្នែក ពីកំណើតដែលត្រូវបានទទួលការអប់រំ រៀនសូត្រ នៅ តាមមជ្ឈមណ្ឌល នូវចំណេះដឹងទូទៅ និង បច្ចេកទេស ​ក្រោមការយកចិត្តទុកដាក់ពីលោកគ្រូ អ្នកគ្រូដែលជាម្តាយទី២​របស់ក្មួយៗ ហើយទាំងនេះក៏ត្រូវបានយកចិត្តទុកដាក់ពីប្រមុខរាជរដ្ឋាភិបាលកម្ពុជា ក្រោមការដឹកនាំ​ប្រកបដោយកិត្តិបណ្ឌិតរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ដែលតែងតែគិតគូដល់កូនៗ ចៅៗ មានពិការភាពពីកំណើត ​ឲ្យមានចំណេះដឹង មុខជំនាញ​ដូចអ្នកមិនពិការ ​បានទៅបម្រើការនៅតាមបណ្តាក្រុមហ៊ុនឯកជន​ ដែល​មិនមានភាព​រើសអើង​ចំពោះជនពិការ ពីព្រោះថា​មនុស្សយើងគ្រប់រូបកើតមក គឺមានទេពកោសល្យទៅតាម​ចំណង់ចំណូលចិត្តរៀងៗខ្លួន​ មិនថា​ជាជនពិការ ​ឬមិនពិការឡើយ ។សម្តេចកិត្តិសង្គហបណ្ឌិត ក៏បានធ្វើការកោតសរសើរចំពោះ ​លោកគ្រូ អ្នកគ្រូ ដែលបានខិតខំបង្ហាត់ បង្រៀនដល់ក្មួយៗ​ទាំងអស់ ​រហូតបានរកនូវការងារជូនដល់សិស្សគ​ ថ្លង់ និង ពិការភ្នែកបានធ្វើការ​នៅតាមបណ្តាក្រុមហ៊ុនឯកជន​ ក្នុងការរកនូវកម្រៃដោះស្រាយជីវភាពប្រចាំថ្ងៃរបស់ខ្លួន ។ សម្តេច ក៏បាន ​ក្រើនរំលឹកដល់ក្មួយៗ ​កុមារគ ថ្លង់ និង​ ពិការភ្នែកទាំងអស់ ត្រូវគោរពត្រង់ត្រាប់ស្តាប់​នូវដំបូន្មានរបស់លោកគ្រូ អ្នកគ្រូ នឹង ​ចេះជួយនូវទុក្ខធុរៈ​មិត្តភ័ក្ត ​ចេះស្រឡាញ់​សាមគ្គីគ្នាឲ្យបានល្អ នៅក្នុងមជ្ឈមណ្ឌល ​ព្រមទាំងត្រូវខិតខំសិក្សារៀនសូត្រ​ និង​ ត្រូវជៀសឲ្យឆ្ងាយពីគ្រឿងញៀន ដែលសង្គមស្អប់ខ្ពើម ។សម្តេចកិត្តិសង្គហបណ្ឌិត បានមានប្រសាសន៍លើកទឹកចិត្តដល់កុមារជនពិការគ ថ្លង់ទាំង​អស់កុំបាក់ទឹកចិត្ត ​និងភាពពិការរបស់ខ្លួន ​ត្រូវតស៊ូអត់ធ្មត់ប្រឹងប្រែងរៀន​សូត្រឲ្យបានពូកែ មាន​ចំណេះដឹងខ្ពស់ ​ដើម្បីចូលរួមអភិវឌ្ឍន៍​ប្រទេសនៅថ្ងៃអនាគត ​ពីព្រោះជនពិការក៏មានសិទ្ធិធ្វើអ្វីៗ​បានដូច​មនុស្សដែលមានកាយសម្បទានធម្មតាដែរ ​។ ហើយបច្ចុប្បន្នរាជរដ្ឋាភិបាលកម្ពុជា បានផ្តល់​ឱកាសជាច្រើនដល់ជនពិការដែលមានចំណេះដឹង ​ឲ្យបានចូលបម្រើការងារនៅ តាម ស្ថាប័នរដ្ឋ និងឯកជន ។ ​ជាក់ស្តែងកុមារពិការដែលរស់នៅក្នុងសាលាកុមារគថ្លង់ ​និងពិការភ្នែកទាំង​វិទ្យាល័យ​ទាំង​ពីរក៏បានទទួលការងារនៅក្នុងស្ថាប័នរដ្ឋ​ និង ក្រុមហ៊ុនឯកជនបន្តបន្ទាប់ផងដែរ ​។ក្នុងនោះផងដែរសម្តេចកិត្តិសង្គហបណ្ឌិតបានឧបត្ថម្ភ​ដល់វិទ្យាល័យទាំងពីរ​ រួមមាន ​៖ អង្ករ ៥០០​គីឡូក្រាម, មី ៣០កេស, ទឹកត្រី ១០យួរ, ទឹកស៊ីអ៊ីវ១០យួរ, ទឹកសុទ្ធ ៣០កេស, ត្រីខ ៣កេស, និងផ្លែឈើ ៦កេស និងថវិកាមួយចំនួន ៕

ក្រុមអន្ធពាលប្រដាប់អាវុធ បានសម្លាប់មនុស្ស៣៤នាក់ ក្នុងការវាយប្រហារនៅប្រទេសនីហ្ស៊េរីយ៉ាភាគពាយ័ព្យ

2023/07/26 06:53:39 pm        183
Facebook Telegram Linkin
នីហ្ស៊េរីយ៉ា៖ សារព័ត៌មាន Reuters  បានរាយការណ៍ដោយសំអាងប្រភពពីប្រធានក្រុមអ្នកស្ម័គ្រចិត្តបង្ក្រាបអំពើឧក្រឹដ្ឋកម្ម និងប្រជាពលរដ្ឋថា មនុស្សយ៉ាងហោចណាស់៣៤នាក់ រួមទាំងទាហាន៧នាក់ បានស្លាប់ ក្នុងការវាយប្រហារមួយដោយក្រុមអន្ធពាលប្រដាប់អាវុធ នៅក្នុងរដ្ឋ ហ្សាំហ្វារ៉ា ភាគពាយ័ព្យរបស់ប្រទេសនីហ្ស៊េរីយ៉ា ។លោក អ៊ីស្មាអ៊ីល ម៉ាហ្គាជី (Ismail Magaji) ប្រធានក្រុមខាងលើ បានប្រាប់សារព័ត៌មាន Reutersថា ការវាយប្រហារនៅក្នុងស្រុក ដាច់ស្រយាល ដាន ហ្គាល់ប៊ី (Dan Gulbi)  នៃទីប្រជុំជន              ម៉ារ៉ូ (Maru)របស់រដ្ឋនេះ បានកើតឡើង កាលពីរសៀលថ្ងៃចន្ទ ។  លោក ឡាវ៉ាលី ហ្ស៊ូណៃ (Lawali Zonai) បាននិយាយថា អ្នកភូមិចំនួន២៧នាក់ បានស្លាប់ក្នុងការវាយប្រហារនេះ ខណៈកងទ័ពចំនួន៧នាក់ ត្រូវបាន បញ្ជូន ពីកន្លែងវាយប្រហារដ៏រន្ធត់បំផុត ទៅសង្រ្គោះនៅសហគមន៍ ។អ្នកនាំពាក្យនគរបាលប្រចាំរដ្ឋហ្សាំហ្វារ៉ា ពុំបានឆ្លើយតបភ្លាមៗទេ ចំពោះការហៅទូរស័ព្ទសុំការបញ្ជាក់ពីឧបទ្ទវហេតុនេះ។ក្រុមអន្ធពាលប្រដាប់អាវុធជាបុរស ដែលតំបន់នេះហៅថាជាក្រុមចោរប្លន់ បានលុកលុយទូទាំងភាគពាយ័ព្យរបស់នីហ្ស៊េរីយ៉ា កាលពី៣ឆ្នាំកន្លងទៅ ដោយបានចាប់ជំរិតមនុស្សរាប់ពាន់នាក់ សម្លាប់មនុស្សរាប់រយនាក់ និងបង្កអសុវត្ថិភាព ក្នុងការធ្វើដំណើរតាមផ្លូវឬ ការធ្វើស្រែចម្ការនៅក្នុងតំបន់មួយចំនួន៕

ចំនួនអ្នកស្លាប់ ដោយសារអំពើហិង្សាក្នុងពន្ធនាគារ នៅអេក្វាឌ័រ កើនដល់ ៣១នាក់

2023/07/26 06:49:38 pm        126
Facebook Telegram Linkin
អេក្វាឌ័រ៖ រដ្ឋមន្ត្រីក្រសួងយុត្តិធម៌របស់ប្រទេសអេក្វាឌ័រ បានដំឡើងតួលេខចំនួនអ្នកស្លាប់ ដោយសារអំពើហិង្សាក្នុងពេលតែមួយ កាលពីចុងសប្តាហ៍ នៅឯពន្ធនាគារដ៏គ្រោះថ្នាក់បំផុតមួយរបស់ប្រទេសនេះ កើនដល់ ៣១នាក់ហើយ កាលពីល្ងាចថ្ងៃអង្គារ (ទី២៥ ខែកក្កដា) បន្ទាប់ពីរដ្ឋាភិបាល នៅមុននេះ បានប្រកាសដាក់ប្រទេស ក្នុងច្បាប់គ្រាអាសន្នរយៈពេល ៦០ថ្ងៃ សម្រាប់ពន្ធនាគាររបស់ប្រទេស។រដ្ឋាភិបាល បានប្រកាសនៅក្នុងសេចក្តីថ្លែងការណ៍មួយថា សេចក្តីប្រកាសគ្រាអាសន្ន ហាក់ដូចជាបានបញ្ឈប់អំពើហិង្សា នៅក្នុងទីក្រុង Esmeraldas ដែលនៅទីនោះ ឆ្មាំពន្ធនាគារចំនួន ១៥នាក់ និងបុគ្គលិក ២នាក់ផ្សេងទៀត ត្រូវបានចាប់ធ្វើជាចំណាប់ខ្មាំង នៅឯពន្ធនាគារមួយកន្លែង។នៅទីក្រុង Guayaquil ឯណោះវិញ ទាហាន និងនគរបាលយ៉ាងហោចណាស់ ២.៧០០នាក់ ដែលបំពាក់ដោយអាវុធគ្រប់ដៃ បានចូលទៅក្នុងពន្ធនាគារ Penitenciaaria del Litoral បន្ទាប់ពីមានការប្រកាសច្បាប់គ្រាអាសន្នរយៈពេល ៦០ថ្ងៃនេះ ដោយអាចគ្រប់គ្រងអាគារចំនួន៣ ជាមួយនឹងការបំផ្ទុះ ដែលគ្រប់គ្រងបាន។ ការប៉ះទង្គិចគ្នារវាងក្រុមក្មេងទំនើង បានចាប់ផ្តើមកើតមាន កាលពីថ្ងៃសៅរ៍ (ថ្ងៃទី២២ ខែកក្កដា) នៅពន្ធនាគារ ដែលជាការប៉ះទង្គិចដ៏គ្រោះថ្នាក់បំផុតមួយ នៅក្នុងប្រទេសអេក្វាឌ័រ។ការិយាល័យរដ្ឋអាជ្ញា បានដំឡើងចំនួនអ្នកស្លាប់ដល់ ៣១នាក់ ពីចំនួន ១៨នាក់ ក្នុងការបង្ហោះលើបណ្ដាញសង្គម X ដែលពីមុនគេស្គាល់ថា ជាបណ្ដាញសង្គម Twitter។ ជាមួយគ្នានេះ ចំនួនអ្នករងរបួស ក៏ត្រូវបានដំឡើងដល់ ១៤នាក់ផងដែរ ខណៈរដ្ឋាភិបាល បានឲ្យដឹងថា មន្ត្រីពន្ធនាគារប្រហែល ១២០នាក់ ត្រូវបានដោះលែង បន្ទាប់ពីត្រូវបានចាប់ធ្វើជាចំណាប់ខ្មាំង ក្នុងពន្ធនាគារចំនួន៦ នៅទូទាំងប្រទេស៕

ចៅក្រមសហរដ្ឋអាមេរិក រារាំងការរឹតបន្តឹងសិទ្ធិជ្រកកោនតាមព្រំដែនថ្មីរបស់លោក Biden

2023/07/26 06:45:58 pm        104
Facebook Telegram Linkin
អាមេរិក៖ ចៅក្រមសហព័ន្ធអាមេរិកមួយរូបកាលពីថ្ងៃអង្គារបានរារាំងបទប្បញ្ញត្តិថ្មីរបស់លោកប្រធានាធិបតី Joe Biden ដែលរឹតបន្តឹងសិទ្ធិជ្រកកោននៅតាមព្រំដែនអាមេរិក-ម៉ិកស៊ិក ដោយលើកកម្ពស់គោលការណ៍សំខាន់នៃផែនការរបស់លោកក្នុងការទប់ស្កាត់ការធ្វើអន្តោប្រវេសន៍បន្ទាប់ពីការរឹតបន្តឹងមាត្រា ៤២ បានបញ្ចប់កាលពីខែឧសភាឆ្នាំនេះ ។  លោក Jon Tigar ចៅក្រមសហប្រចាំតំបន់របស់សហរដ្ឋអាមេរិក ដែលមានមូលដ្ឋាននៅរដ្ឋកាលីហ្វ័រនីញ៉ា (California)បានបន្តបទបញ្ជានេះរយៈពេល១៤ថ្ងៃ ដោយបន្សល់ទុកការរឹតត្បិតរហូតដល់ពេលនេះ។ រដ្ឋបាលលោក Biden ក្នុងរយៈពេលប៉ុន្មានម៉ោង បានប្តឹងទៅតុលាការឧទ្ធរណ៍ទី៩ របស់សហរដ្ឋអាមេរិក។ លោក Biden ដែលជាអ្នកប្រជាធិបតេយ្យបានចូលកាន់តំណែងកាលពីឆ្នាំ ២០២១ ដោយសន្យាថានឹងផ្លាស់ប្តូរគោលនយោបាយប្រកាន់តឹងជាច្រើនរបស់អតីតប្រធានាធិបតី Donald Trump មកពីគណបក្សសាធារណរដ្ឋ ប៉ុន្តែបានអនុម័តវិធានការព្រំដែនមួយចំនួនដូចលោក Trump ខណៈមានជនអន្តោប្រវេសន៍មួយចំនួនត្រូវបានចាប់ខ្លួនដោយខុសច្បាប់។    បទប្បញ្ញត្តិសិទ្ធិជ្រកកោនថ្មីរបស់លោក Biden ដែលចូលជាធរមាននៅពេលមាត្រា ៤២ បានបញ្ចប់កាលពីថ្ងៃទី១១ ខែឧសភា សន្មតិថាជនអន្តោប្រវេសន៍ភាគច្រើនមិនមានសិទ្ធិជ្រកកោនទេ ប្រសិនបើពួកគេឆ្លងកាត់ប្រទេសផ្សេងទៀតដោយមិនស្វែងរកការការពារពីកន្លែងផ្សេងទៀតជាមុន ឬប្រសិនបើពួកគេបរាជ័យក្នុងការប្រើប្រាស់ផ្លូវច្បាប់សម្រាប់ការចូលទៅក្នុងសហរដ្ឋអាមេរិក។ ចំនួនជនអន្តោប្រវេសន៍ ដែលចាប់ខ្លួន ពេលឆ្លងកាត់ព្រំដែនដោយខុសច្បាប់បានធ្លាក់ចុះក្នុងរយៈពេលប៉ុន្មានខែថ្មីៗនេះ បន្ទាប់ពីបទប្បញ្ញត្តិថ្មីចូលជាធរមាន។ គេនៅតែមិនច្បាស់នៅឡើយ ថាតើនិន្នាការនេះនឹងបន្តឬយ៉ាងណា ប្រសិនបើការរឹតត្បិតសិទ្ធិជ្រកកោនថ្មីត្រូវបានរារាំង ៕

បណ្ដាញសង្គម

ព័ត៌មានថ្មីៗ

ជនជាតិអាមេរិកប៉ាឡេស្ទីចំណាយពេលពេញមួយយប់ជាមួយគ្រួសារក្នុងផ្ទះដែលឡោមព័ទ្ធដោយក្រុមតាំងលំនៅនិគមន៍អ៊ីស្រាអែល
08/18/2026 09:08 PM
Facebook Telegram Linkin
កាតានិយាយថា កិច្ចព្រមព្រៀងច្រកសមុទ្រ Hormuz អាចនឹងជួយឲ្យវិលត្រឡប់ទៅរកកិច្ចប្រជុំអាមេរិក-អ៊ីរ៉ង់
08/18/2026 08:08 PM
Facebook Telegram Linkin
ប្រធានាធិបតីចិន លោក Xi ជំរុញកុំ​ឱ្យ​ «បំផ្លាញ» ឋានៈជា «តំបន់សន្តិភាព» របស់អាមេរិកឡាទីន
08/18/2026 08:08 PM
Facebook Telegram Linkin
បេសកជន៖ អាមេរិក​បារម្ភយ៉ាងខ្លាំង ចំពោះការវាយប្រហារតាមអាកាសរបស់អ៊ីស្រាអែលលើមូលដ្ឋានទ័ពអាកាសស៊ីរី
08/18/2026 08:08 PM
Facebook Telegram Linkin
មនុស្សយ៉ាង​តចិច​ ២៥នាក់ ត្រូវបានសម្លាប់ អំឡុង​ការវាយប្រហារនៅរដ្ឋ​ Plateau របស់នីហ្សេរីយ៉ា
08/18/2026 07:08 PM
Facebook Telegram Linkin
មនុស្ស ៣នាក់ រងរបួស ហើយអគាររងការខូចខាតក្នុងការរញ្ជួយដីនៅភាគខាងត្បូងអេស្ប៉ាញ
08/18/2026 07:08 PM
Facebook Telegram Linkin
ពលរដ្ឋរស់នៅទីក្រុងម៉ានីល ដើរលុកទឹកតាមផ្លូវ ស្របពេលភ្លៀងវស្សាវាយប្រហារដ្ឋធានីហ្វីលីពីនមួយនេះ
08/18/2026 07:08 PM
Facebook Telegram Linkin
ទឹកជំនន់បង្ខំឲ្យមនុស្សរាប់ម៉ឺននាក់ជម្លៀសខ្លួននៅរដ្ឋ Odisha និងរដ្ឋ Assam ប្រទេសឥណ្ឌា
08/18/2026 07:08 PM
Facebook Telegram Linkin
មនុស្សម្នាក់ស្លាប់ និងច្រើននាក់ទៀតជាប់ខ្លួន ក្រោយផ្ទះចាស់បាក់រលំនៅទីក្រុង Kolkata ប្រទេសឥណ្ឌា
08/18/2026 07:08 PM
Facebook Telegram Linkin
សាកសពជនអន្តោប្រវេសន៍ ៩នាក់ ត្រូវបានរកឃើញនៅជិតតំបន់ឆ្នេរភាគខាងកើតទីក្រុង Tripoli ប្រទេសលីប៊ី
08/18/2026 07:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.