នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមហ៊ុន TH Automotive Manufacturing Co., Ltd​ នឹង​សម្ពោធជាផ្លូវការ​ រោងចក្រផ្គុំ និងដំឡើងរថយន្តរបស់ខ្លួន​នៅកម្ពុជា​ ក្នុងឆ្នាំ២០២៦នេះ
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម

នយោបាយ​ និង ការអភិវឌ្ឍន៍

សម្តេចតេជោ ហ៊ុន សែន៖ ប្រជាធិបតេយ្យដែលគ្មានការគោរពច្បាប់ នឹងក្លាយជាអនាធិបតេយ្យ

2023/06/06 05:14:21 pm        248
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងថា ពីមួយថ្ងៃទៅមួយថ្ងៃរាជរដ្ឋាភិបាល បានកំពុងដំណើរការប្រជាធិបតេយ្យ និងនីតិរដ្ឋ ប៉ុន្តែមានប្រជាធិបតេយ្យដែលគ្មានការគោរពច្បាប់ ក៏វានឹងក្លាយទៅជាអនាធិបតេយ្យផងដែរ ដូច្នេះរវាងប្រជាធិបតេយ្យ និងនីតិរដ្ឋត្រូវតែដើររួមគ្នា។ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារថ្មីនៃបណ្ឌិត្យសភាភូមិន្ទយុត្តិធម៌កម្ពុជា និងពិធីប្រគល់សញ្ញាបត្រដល់សិស្សវិស័យយុត្តិធម៌ ថ្ងៃទី០៦ ខែមិថុនា ឆ្នាំ២០២៣នេះ សម្តេចតេជោ ហ៊ុន សែន បានបញ្ជាក់ថា«យើងកំពុងតែដំណើរការលទ្ធិប្រជាធិបតេយ្យ នីតិរដ្ឋ ត្រូវចាំឲ្យច្បាស់អាពីរហ្នឹង…ប្រជាធិបតេយ្យដែលគ្មានការគោរពច្បាប់ គឺអនាធិបតេយ្យ។ បើគិតតែពីការអនុវត្តច្បាប់ ដោយមិនបើកសេរីភាពគឺវាផ្តាច់ការ ដូច្នេះវាត្រូវអមដំណើរជាមួយគ្នា​រវាង​ប្រជាធិបតេយ្យនីតិរដ្ឋ»។សម្តេចតេជោ ​បានបន្ថែមទៀតថា«នៅលើពិភពលោកក៏គេធ្វើបែបហ្នឹងដែរ​ ត្រូវឲ្យមានការគោរព ច្បាប់ពិភពលោកគឺគោរពច្បាប់​ បើមិនផ្អែកលើច្បាប់ ទៅផ្អែកលើកម្លាំង​វានឹងវាយគ្នាពេញ​ពិភពលោក ហើយ នៅក្នុងប្រទេសនីមួយៗ​បើមិនមាន​ច្បាប់​គ្រប់គ្រងទេ? អ្នកខ្លាំងនឹងទៅ​បំពាន​អ្នកខ្សោយ​វានឹងកើតមានឡើង ​ដូច្នេះត្រូវតែដើរជាមួយគ្នា ​ជាមួយនឹងការរក្សានូវសុខសន្តិភាព​ឲ្យខាង​តែបានផងដែរ»។ សម្តេចតេជោ ​បានលើកឡើងទៀតថា រហូតមក​ដល់​ប៉ុណ្ណេះ​គឺ​កម្ពុជាពិបាកណាស់​ដូច្នេះត្រូវតែរក្សា​សុខសន្តិភាពនេះឲ្យខាងតែបាន៕អត្ថបទ៖ បាន ចក់

បេសកជនអឺរ៉ុប និងអាមេរិក ចាប់ផ្តើមកិច្ចពិភាក្សាដ៏ពិបាករយៈពេលយូរ ជាមួយនាយករដ្ឋមន្ត្រីកូសូវ៉ូ

2023/06/06 05:12:47 pm        104
Facebook Telegram Linkin
អឺរ៉ុប៖ អ្នកការទូតមកពីសហភាពអឺរ៉ុប និងសហរដ្ឋអាមេរិក បានមកដល់ទីក្រុង Pristina ប្រទេសកូសូវ៉ូកាលពីថ្ងៃចន្ទទី៥ ខែមិថុនា ជាផ្នែកនៃកិច្ចប្រឹងប្រែងដើម្បីបន្ធូរបន្ថយភាពតានតឹងរវាងប្រទេសកូសូវ៉ូ និងស៊ែរប៊ី បន្ទាប់ពីភាពចលាចលកាលពីសប្តាហ៍កន្លងទៅនេះនៅក្នុងតំបន់ភាគខាងជើងរបស់ប្រទស។ បេសកជនពិសេសសហភាពអឺរ៉ុបទទួលបន្ទ្កកកិច្ចសន្ទនារវាងប្រទេសស៊ែរប៊ី និងកូសូវ៉ូលោក Miroslav Lajcak បានប្រាប់ក្រុមអ្នកសារព័ត៌មានបន្ទាប់ពីជំនួបជាមួយនាយករដ្ឋមន្ត្រីកូសូវ៉ូ លោក Albin Kurti ថា យើងបានវិលត្រលប់មកកាន់ទីក្រុង Pristina វិញដើម្បីដោះស្រាយការគ្រប់គ្រងវិបត្តិជំនួសឲ្យការធ្វើប្រក្រតីភាពនៃទំនាក់ទំនង ហើយកិច្ចពិភាក្សាមានការលំបាករយៈពេលយូរ និងដោយស្មោះត្រង់។ កិច្ចពិភាក្សា រួមមានទាំងអ្នកការទូតជាន់ខ្ពស់សហរដ្ឋអាមេរិកទទួលបន្ទុកតំបន់បាល់កង់ភាគខាងលិចលោក Gabriel Escobar ដែលបានបញ្ជាក់ពីការគោរពលិខិត្តគតិយុត្តិ និងការព្រមព្រៀងរវាងក្រុមជនជាតិភគតិច។វិបត្តិផ្នែកនយោបាយដែលបានធ្លាក់ចូលទៅក្នុងអំពើហិង្សា នៅភាគខាងជើងប្រទេសកូសូវ៉ូ បានកើនឡើងខ្លាំង ចាប់តាំងពីអភិបាលក្រុងជនជាតិភាគតិចអាល់បានី បានចូលកាន់តំណែង នៅក្នុងតំបន់ដែលមានពលរដ្ឋស៊ែរប៊ីរស់នៅច្រើននៅក្នុងតំបន់នេះ ជាចំណាត់ការមួយបណ្តាលឲ្យសហរដ្ឋអាមេរិកនិងសម្ព័ន្ធមិត្តស្តីបន្ទោសទីក្រុង Pristina។ ការប៉ះទង្គិចគ្នា បានធ្វើឲ្យរងរបួសសមាជិកកងកម្លាំងរក្សាសន្តិភាពអង្គការ NATO ដែលគេស្គាល់ថា KFOR ព្រមទាំងក្រុមអ្នកតវ៉ាជនជាតិស៊ែរប៊ី៥២នាក់។ សម្ព័ន្ធមិត្តបាននិយាយកាលពីថ្ងៃចន្ទថា ការបន្ថែមកម្លាំងសម្រាប់កងកម្លាំងរក្សាសន្តិភាពNATO បានចាប់ផ្តើមមកដល់ប្រទេសកូសូវ៉ូ ។ សម្ព័ន្ធយោធាNATO បានសម្រេចដាក់ពង្រាយកងរក្សាសន្តិភាពបន្ថែម៧០០នាក់ទៅកាន់ប្រទេសកូសូវ៉ូ ដែលបន្ថែមកម្លាំងលើក្រុមដែលមានកម្លាំង៤ពាន់នាក់ ក្នុងការឆ្លើយតបទៅនឹងវិបត្តិហើយអគ្គលេខាធិការសម្ព័ន្ធយោធានេះ បាននិយាយកាលពីសប្តាហ៍មុនថា សម្ព័ន្ធយោធានេះ បានត្រៀមខ្លួនជាស្រេចដើម្បីបញ្ជូនកងកម្លាំងបន្ថែម។ នៅថ្ងៃអង្គារនេះលោក Lajcak និងលោក Escobar នឹងធ្វើដំណើរទៅកាន់ទីក្រុង Belgrade ដើម្បីជួបជាមួយប្រធានាធិបតីស៊ែរប៊ី លោក Aleksandar Vucic៕

សម្តេចតេជោ៖ មិនចាំបាច់ថ្នាក់ថ្មមដើម្បីរកសន្លឹកឆ្នោត ចំពោះជនឱកាសនិយមដែលទន្រ្ទានដីរដ្ឋ

2023/06/06 04:56:40 pm        213
Facebook Telegram Linkin
ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសដាច់ណាត់ថា ចាប់ពីពេលនេះទៅ អត់មានថ្នាក់ថ្នមដើម្បីសន្លឹកឆ្នោតចំពោះបុគ្គលខិលខូច ដែលកាប់ទន្រ្ទានដីរដ្ឋនោះទេ ត្រូវតែចាប់ពួកទាំងនោះមកដាក់គុកឲ្យបាន មិនចាំបាច់ឲ្យទៅបោះឆ្នោតអ្វីនោះឡើយ។សម្តេចតេជោ បញ្ជាឲ្យគ្រប់ភាគីពាក់ព័ន្ធជាពិសេសបណ្តាខេត្តទាំងអស់ត្រូវតែចាត់វិធានការជាបន្ទាន់ ចង់អ្នកណាថតបង្ហោះ ដោយចោទប្រកាន់គណបក្សប្រជាជនកម្ពុជា​យ៉ាងម៉េច ក៏ត្រូវតែធ្វើដែរ​ពីព្រោះវាបំពានលើដីរដ្ឋ។ថ្លែងក្នុងឱកាសអញ្ជើញជាអធិបតីភាពសម្ពោធដាក់ឱ្យប្រើប្រាស់ជាផ្លូវការនូវអគារថ្មី នៃបណ្ឌិត្យសភាភូមិន្ទយុត្តិធម៌កម្ពុជា និងប្រគល់សញ្ញាបត្រជូនដល់សិស្សវិជ្ជាជីវៈតុលាការ ដែលបានបញ្ចប់ការសិក្សាសរុបចំនួន ១,៨៣៥នាក់ នាព្រឹកថ្ងៃទី៦ ខែមិថុនា ឆ្នាំ២០២៣នេះ សម្តេចតេជោ ហ៊ុន សែន បានលើកឡើងថា ឱ្យតែដល់រដូវបោះឆ្នោតប្រាំឆ្នាំម្តងគឺរដូវវិវាទដីធ្លីមក​ដល់ដែរ ​ប៉ុន្តែទោះជាយ៉ាងណាករណីនេះត្រូវ​ បានកំណត់មុខសញ្ញារួចហើយ ដូច្នេះត្រូវតែ​បញ្ជូន​កម្លាំង​ទៅបង្រ្កាបភ្លាមៗកុំគិតថា​ អ្នកមាន​ ឬអ្នកក្រអ្វី ទាំងអស់ត្រូវតែចាត់វិធានការទៅ​តាមច្បាប់​ជាធរមាន។ជាមួយគ្នានោះដែរសម្តេចតេជោ ហ៊ុន សែន នាយករដ្ឋមន្រ្តីក៏បានផ្តាំទៅក្រុមអង្គការសិទ្ធិមនុស្ស និងក្រុមប្រជាធិបតេយ្យមួយចំនួនសូមមើលព្រៃទាំងមូល ​កុំមើលឈើមួយដើមៗ ខណៈបញ្ហានេះ​រាជរដ្ឋាភិបាលមានកតព្វកិច្ចចាំបាច់ ដើម្បីការពារសណ្តាប់ធ្នាប់ ការពារនូវ​ធនធាន​ធម្មជាតិ។ សម្តេច ក៏បានសម្តែងការហួសចិត្តផងដែរ ចំពោះជនខិលខូចមួយចំនួនបានកែនគ្នា​ទៅលួចធ្វើ​ផ្ទះនៅពេលយប់រហូតដល់បានប្រាំរយខ្នងក្នុងពេលមួយរាត្រី ដល់ពេលអាជ្ញាធរ​ទៅ​រុះរើនាំគ្នា​ថតបង្ហាញ និងចោទប្រកាន់គណបក្សប្រជាជនកម្ពុជា ទៅបំពានដី និងរុះរើផ្ទះប្រជាពលរដ្ឋទៅវិញ។ ប៉ុន្តែទោះជាយ៉ាងណាករណីនេះ បានកើតយូរហើយជាពិសេសគឺកើតនៅជុំវិញតំបន់ប្រាសាទអង្គរ។នៅក្នុងឱកាសនោះដែរ សម្តេចតេជោ ហ៊ុន សែន ក៏បានព្រមានដកមន្រ្តីទាំងឡាយណាដែល​មាន​ការជាប់ពាក់ព័ន្ធលើករណីនេះផងដែរ ​ដោយសម្តេច បានបញ្ជាក់ថា «សូមកុំឲ្យកើតមាន ហើយ​ប្រសិន​មន្រ្តីនានាជាប់ពាក់ព័ន្ធរឿងនេះ​សូមកុំបន្ទោស​ ហ៊ុន សែន ឲ្យសោះ យើងមិនអាចទុក​នៅ​ក្របខណ្ឌរដ្ឋ ក្របខណ្ឌយោធា ក្របខណ្ឌនគរបាល ឬក្របខណ្ឌអ្វីនោះទេ មិនត្រូវបណ្តោយ​ឲ្យស៊ីប្រាក់ខែរដ្ឋបានទៀតនោះឡើយ»៕អត្ថបទ៖ បាន ចក់

រុស្ស៊ីនិយាយថាខ្លួនបានទប់ស្កាត់ការវាយប្រហារដ៏ធំមួយផ្សេងទៀតក្នុងទឹកដីអ៊ុយក្រែន ធ្វើឲ្យខាតបង់យ៉ាងធ្ងន់ធ្ងរ

2023/06/06 04:47:49 pm        298
Facebook Telegram Linkin
រុស្ស៊ី់៖ រុស្ស៊ីបាននិយាយនៅថ្ងៃអង្គារនេះថា ខ្លួនបានរារាំងការវាយលុករបស់អ៊ុយក្រែនដ៏សំខាន់មួយទៀតនៅតំបន់ Donetsk ដោយធ្វើឲ្យមានការខាតបង់យ៉ាងធ្ងន់ធ្ងរ ខណៈអ៊ុយក្រែនសាទរចំពោះវឌ្ឍនភាពក្នុងការប្រយុទ្ធនៅភាគខាងកើត ទោះបីជាមិនច្បាស់ថាតើបង្ហាញពីការចាប់ផ្តើមនៃការវាយបករបស់អ៊ុយក្រែនដែលរំពឹងទុកជាយូរមកហើយក៏ដោយ។ កាលពីថ្ងៃចន្ទ ប្រទេសរុស្ស៊ីបាននិយាយថា កងកម្លាំងអ៊ុយក្រែនកាលពីចុងសប្តាហ៍បានចាប់ផ្តើមការវាយលុកដ៏ធំមួយនៅតំបន់ភាគខាងត្បូងនៃតំបន់ Donetsk ដែលខ្លួនក៏បានរារាំងបានសម្រេចផងដែរ។ក្រុមមន្ត្រីអ៊ុយក្រែនមិនបាននិយាយពីយុទ្ធនាការថ្មីដ៏ទូលំទូលាយណាមួយឡើយ ទោះបីជានៅក្នុងសុន្ទរកថាពេលយប់របស់លោកកាលពីថ្ងៃចន្ទក៏ដោយ ដោយលោកប្រធានាធិបតីអ៊ុយក្រែន Volodymyr Zelenskiy មានភាពស្រពិចស្រពិលដោយសាទរ"ព័ត៌មានដែលយើងកំពុងរង់ចាំ" និងការឆ្ពោះទៅមុខនៅទីក្រុង Bakhmut ក្នុងតំបន់Donetsk ។លោកប្រធានាធិបតីរុស្ស៊ី Vladimir Putin បានបញ្ជូនកងទ័ពចូលទៅក្នុងប្រទេសអ៊ុយក្រែនកាលពីថ្ងៃទី ២៤ ខែកុម្ភៈឆ្នាំមុន ជាអ្វីដែលវិមានក្រឹមឡាំងរំពឹងថាជាប្រតិបត្តិការដ៏ឆាប់រហ័ស ប៉ុន្តែកងកម្លាំងរបស់ខ្លួនបានរងបរាជ័យជាបន្តបន្ទាប់ និងបានប្រមូលផ្តុំឡើងវិញនៅភាគខាងកើតរបស់ប្រទេសនេះ។ទាហានរុស្ស៊ីរាប់ម៉ឺននាក់នាក់ បានជីកលេនដ្ឋាននៅរដូវរងា ដោយឡោមព័ទ្ធទីក្រុង Bakhmut រយៈពេលជាច្រើនខែ និងត្រៀមសម្រាប់ការវាយបកពីអ៊ុយក្រែន ក្នុងការព្យាយាមកាត់ផ្ដាច់ស្ពានឆ្លងកាត់ ដែលហៅថាស្ពានដីគោករបស់ទាហានរុស្ស៊ីតភ្ជាប់ទៅកាន់ឧបទ្វីបគ្រីម៉េ (Crimea។  សេចក្ដីថ្លែងការណ៍ចុងក្រោយបំផុតរបស់ក្រសួងការពារជាតិរុស្ស៊ី បាននិយាយថា កងកម្លាំងរុស្ស៊ី បានធ្វើឲ្យអ៊ុយក្រែន បាត់បង់កងទ័ពយ៉ាងច្រើន ក្នុងការវាយប្រហារនោះ និងបានកម្ទេច រថក្រោះ២៨គ្រឿង រួមទាំងរថក្រោះប្រយុទ្ធដ៏សំខាន់ ឡេភើត ៨គ្រឿង និង រថពាសដែកចំនួន១០៩គ្រឿង ។ ក្រសួងនេះ បាននិយាយថាអ៊ុយក្រែន បានបាត់បង់ទាហានសរុបប្រមាណ ១.៥០០នាក់៕

ប្រមុខការទូតសហភាពអឺរុប បាននិយាយថា ប្រទេសចិន អាចដើរតួនាទីបញ្ចប់សង្គ្រាមអ៊ុយក្រែន ខណៈដែលប្រទេសនេះ មានឥទ្ធិពលខ្លាំងលើប្រទេសរុស្ស៊ី

2023/06/06 02:28:51 pm        126
Facebook Telegram Linkin
សហភាពអឺរុប៖ តំណាងជាន់ខ្ពស់របស់សហភាពអឺរុបទទួលបន្ទុកគោលនយោបាយបរទេស និងសន្តិសុខ បាននិយាយបែបនេះ ទៅកាន់អ្នកសារព័ត៌មាន បន្ទាប់ពីរូបលោក បានជួបពិភាក្សាជាមួយរដ្ឋមន្ត្រីការពារជាតិចិន លោក Li Shangfu នៅថ្ងៃចុងក្រោយនៃកិច្ចសន្ទនា Shangri-La ក្នុងជំនួបកម្រិតខ្ពស់ទ្វេភាគីដ៏គួរឲ្យភ្ញាក់ផ្អើលរវាងគណៈប្រតិភូទាំងពីរ។  ប្រមុខការទូតសហភាពអឺរុប បាននិយាយកាលពីថ្ងៃអាទិត្យថា ក្រុងប៉េកាំង ដើរតួនាទីបញ្ចប់សង្គ្រាមអ៊ុយក្រែនបាន ដោយសារតែឥទ្ធិពលដ៏ខ្លាំងក្លារបស់ខ្លួនលើទីក្រុងមូស្គូ។លោក Josep Borrell តំណាងជាន់ខ្ពស់របស់សហភាពអឺរុប ទទួលបន្ទុកគោលនយោបាយបរទេសនិងសន្តិសុខ បានជួបពិភាក្សាជាមួយរដ្ឋមន្ត្រីការពារជាតិចិន លោក Li Shangfu នៅថ្ងៃចុងក្រោយនៃកិច្ចសន្ទនា Shangri-La ក្នុងជំនួបកម្រិតខ្ពស់ទ្វេភាគីដ៏គួរឲ្យភ្ញាក់ផ្អើលរវាងគណៈប្រតិភូទាំងពីរ។ នេះជាលើដំបូងដែលភាគីទាំងពីរ បានជួបទល់មុខគ្នា បន្ទាប់ពីលោកឧត្តមសេនីយ៍ Li បានទទួលតំណែងរដ្ឋមន្ត្រីក្រសួងការពារជាតិរបស់ប្រទេសចិន កាលពីពីរខែកន្លងទៅ។ លោក Borrell បានប្រាប់អ្នកសារព័ត៌មានប៉ុន្មានម៉ោងបន្ទាប់ពីជំនួបនោះថា" ប្រទេសចិនមានឥទ្ធិពលខ្លាំងលើប្រទេសរុស្ស៊ី។បើមានអ្នកណាម្នាក់ប្រាប់លោកប្រធានាធិបតី Putin ថាអ្នកបានសាងកំហុសធំធេងណាស់ ប្រសិនបើនរណាម្នាក់អាចនិយាយបែបនោះទាំងមានឥទ្ធិពលខ្លាំងជាមួយលោក Putin ...ហើយអ្នកនិយាយនោះគឺចិនពុំមែនខ្ញុំទេ"។ដោយត្រូវរៀបចំឡើងជារៀងរាល់ឆ្នាំនៅក្នុងប្រទេសសិង្ហបុរី កិច្ចសន្ទនា Shangri-La គឺជាកិច្ចប្រជុំកំពូលសន្តិសុខដ៏ធំបំផុតប្រចាំតំបន់អាស៊ី ជាទីដែលបណ្តារដ្ឋមន្ត្រីការពារជាតិរបស់ពិភពលោកមកជួបជុំគ្នាដើម្បីផ្លាស់ប្តូរទស្សនៈទាំងក្នុងកិច្ចប្រជុំជាសាធរណៈទាំងកិច្ចប្រជុំបិទទ្វារ។កិច្ចប្រជុំឆ្នាំនេះត្រូវបានបង្ហាញពីលក្ខណៈខុសប្លែកដោយការបដិសេធរបស់លោកឧត្តមសេនីយ៍Li មិនព្រមជួបជាមួយសមភាគីរបស់លោក គឺរដ្ឋមន្ត្រីក្រសួងការពារជាតិសហរដ្ឋអាមេរិក លោក Lloyd Austin។គណៈប្រតិភូចិន បាននិយាយថា ការច្រានចោលនូវការអញ្ជើញពីអាមេរិកដោយសារតែការដាក់ទណ្ឌកម្មដ៏អយុត្តិធម៌របស់ទីក្រុងវ៉ាស៊ីនតោនលើលោកឧត្តមសេនីយ៍ Li កាលពីឆ្នាំ២០១៨ ដោយជាប់ព័ន្ធនឹងប្រទេសចិនដែលទិញគ្រឿងយុទ្ធោបករណ៍ពីប្រទេសរុស្ស៊ីនាកាលនោះ។លោកបាននិយាយថា សហភាពអឺរុប មិនចង់ជ្រៀតជ្រែកកិច្ចការរបស់ប្រទេសចិនទេ និងថា"គោលនយោបាយចិនតែមួយនៅតែមានន័យសម្រាប់យើងគឺថាកោះតៃវ៉ាពុំមែនជារដ្ឋឯករាជ្យមានលក្ខណៈពេញលេញនោះទេ"៕

សម្ដេចតេជោ អគុណដល់បណ្ដាមេដឹកនាំប្រទេសអាស៊ាន ដែលបញ្ជូនអត្តពលិកមកចូលរួមប្រកួតនៅកម្ពុជា

2023/06/05 08:23:52 pm        89
Facebook Telegram Linkin
ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃកម្ពុជា បានថ្លែងអំណរគុណដល់បណ្ដាមេដឹកនាំប្រទេសអាស៊ានទាំងអស់ដែលបានបញ្ជូនកីឡាករ កីឡាការិនីឱ្យមកចូលរួមប្រកួតក្នុងព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ​ដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣នេះ។ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍បែបនេះ ក្នុងឱកាសអញ្ជើញជាអធិបតីភាពក្នុងពិធីប្រគល់សញ្ញាបត្រ ជូននិស្សិតបញ្ចប់ការសិក្សា ពីសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ចសរុបជិត ៦ពាន់នាក់ នាថ្ងៃ៥ ខែមិថុនា ឆ្នាំ២០២៣ ​នៅមជ្ឍមណ្ឌលកោះពេជ្រ រាជធានីភ្នំពេញ។សម្តេចតេជោ បាន​ស្ងើច​សរសើរ​ដល់ការបើកព្រឹត្តិការណ៍កីឡាអាស៊ានប៉ារ៉ាហ្គេមលើកទី១២ កាលពីថ្ងៃទី៣ ខែមិថុនា ឆ្នាំ២០២៣ កន្លងទៅនេះដែលទស្សនីយភាពមិនចាញ់ពិធីបើកស៊ីហ្គេម។ សម្ដេចតេជោ បញ្ជាក់ថា កេរ្តិ៍ឈ្មោះនៃការរៀបចំព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ នៅកម្ពុជានឹងបន្សល់ទុករាប់រយឆ្នាំដល់ កូនចៅជំនាន់ក្រោយ។ ព្រឹត្តិការណ៍ទាំងនេះក៏នឹងត្រូវ​ឆ្លាក់​នៅក្នុងវិមាន ឈ្នះ ឈ្នះផងដែរ។ ក្រោមពាក្យស្លោក «កីឡារស់ក្នុងសន្ដិភាព» សម្ដេចតេជោ ហ៊ុន សែន នាយករដ្ឋមន្រ្ដីនៃកម្ពុជា បានចាត់ការប្រកួតកីឡាស៊ីហ្គេម​ និងអាស៊ានប៉ារ៉ាហ្គេមនៅប្រទេសកម្ពុជា​នាពេលនេះ គឺជា​ឱកាសក្នុង​ការរឹតចំណងមិត្តភាព​ និងទំនាក់ទំនង​បន្ថែមទៀតរវាង​ប្រទេសក្នុងតំបន់អាស៊ាន ជាពិសេសរវាងក្រុមកីឡាករ ​កីឡាការិនីមកពីបណ្ដាប្រទេសនានា​ដែលបានជួបជុំ​គ្នា​តាមរយៈការប្រកួត៕អត្ថបទ៖ វ៉ន ដារ៉ា

អាជ្ញាធររៀបចំការបោះឆ្នោត៖ គណបក្សរបស់ប្រធានាធិបតីម៉ិកស៊ិក នឹងឈ្នះ នៅរដ្ឋ Mexico

2023/06/05 07:50:50 pm        115
Facebook Telegram Linkin
ម៉ិកស៊ិក៖ គណបក្សរបស់ប្រធានាធិបតីម៉ិកស៊ិកលោក Andres Manuel Lopez Obrador ត្រូវបានប៉ាន់ស្មានថា នឹងដណ្តើមបានមូលដ្ឋានសំខាន់ៗចុងក្រោយលើអ្នកគ្រប់គ្រងវ័យចំណាស់របស់ប្រទេសនេះ បន្ទាប់ពីការបោះឆ្នោតតាមរដ្ឋ នៅថ្ងៃអាទិត្យ (ទី៤ ខែមិថុនា) ខណៈដែលប្រធានាធិបតី កំពុងស្វះស្វែងឲ្យមានការបើកផ្លូវឲ្យអ្នកស្នងតំណែងរូបលោក នាឆ្នាំក្រោយ។ដោយការិយាល័យបោះឆ្នោតបានបិទ នៅក្នុងរដ្ឋ Mexico គណបក្សចលនាសង្គ្រោះជាតិឆ្វេងនិយម (MORENA) របស់ Lopez Obrador ត្រូវបានគេរំពឹងថា នឹងបន្ថែមចំនួនអភិបាលរដ្ឋទៅក្នុងតំណែងរដ្ឋាភិបាលតំបន់ចំនួន២១ ដែលខ្លួនគ្រប់គ្រងរួចហើយ ដោយមានចំនួនពីរភាគបីនៃចំនួនសរុប។វិទ្យាស្ថានបោះឆ្នោត បានឲ្យដឹងបន្ទាប់ពីការបោះឆ្នោតកាលពីថ្ងៃអាទិត្យថា ការប៉ាន់ស្មានបឋម នៅថ្ងៃអាទិត្យនោះ បានបង្ហាញថា បេក្ខជនលោកស្រី Delfina Gomez របស់គណបក្ស MORENA កំពុងស្ថិតនៅលើផ្លូវនៃជ័យជម្នះដែលនឹងទទួលបានសំឡេងគាំទ្រចំនួនពី ៥២,១ ទៅ ៥៤,២ភាគរយ ខណៈពេលដែលគូប្រជែងគណបក្សប្រឆាំងលោកស្រី Alejandra del Moral ត្រូវបានរំពឹងថា នឹងបានទទួលសំឡេងឆ្នោតចន្លោះពី ៤៣ ទៅ ៤៥,២ភាគរយ។ទាំងលោកស្រី Gomez ដែលដឹកនាំសម្ព័ន្ធការបោះឆ្នោត Juntos Hacemos Historia របស់គណបក្ស MORENA និងគណបក្សបដិវត្តន៍ស្ថាប័នកណ្តាលនិយមដែលកំពុងកាន់អំណាច (PRI) ដែលជាផ្នែកមួយនៃសម្ព័ន្ធការបោះឆ្នោត Va por el Estado de Mexico លោកស្រី Alejandra del Moral បានឡើងលើវេទិកា ដើម្បីនិយាយសសើរខ្លួនឯងថា ជាអ្នកឈ្នះ ទោះបីជាមិនមានលទ្ធផលចុងក្រោយពីវិទ្យាស្ថានជាតិរៀបចំការបោះឆ្នោតក៏ដោយ ខណៈការរាប់សន្លឹកឆ្នោត កំពុងបន្តដំណើរការ។តំបន់ដែលមានប្រជាជនច្រើនជាងគេបំផុតរបស់ប្រទេសម៉ិកស៊ិក រដ្ឋ Mexico ហ៊ុព័ទ្ធទៅដោយទីក្រុងធំៗជាច្រើន ហើយជាតំបន់សេដ្ឋកិច្ច និងកំពែងការពារនៃការបោះឆ្នោតរបស់គណបក្ស PRI ដែលបានគ្រប់គ្រងនៅទីនោះ តាំងពីឆ្នាំ១៩២៩ មក។ការបោះឆ្នោតនេះកើតឡើងមួយឆ្នាំ មុនការបោះឆ្នោតជ្រើសរើសប្រធានាធិបតីបន្ទាប់របស់ប្រទេសម៉ិកស៊ិក ហើយការស្ទង់មតិបង្ហាញថា MORENA គឺជាគណប្ស ដែលពិបាកនឹងយកឈ្នះដោយគណបក្សផ្សេងទៀត៕

កងទ័ពប្រទេសទួរគី មកដល់ប្រទេសកូសូវ៉ូបន្ទាប់ពីការស្នើសុំរបស់NATO

2023/06/05 06:58:51 pm        207
Facebook Telegram Linkin
ទួរគី៖ ក្រសួងការពារជាតិប្រទេសទួរគី បាននិយាយថា ការដាក់ពង្រាយក្រុមកម្មង់ដូ ទៅកាន់ប្រទេសកូសូវ៉ូ បានបញ្ចប់កាលពីល្ងាចថ្ងៃអាទិត្យទី៤ ខែមិថុនា បន្ទាប់ពីមានសំណើពីសម្ព័ន្ធយោធាណាតូ។ក្រសួងបានប្រកាសថាក្បួនក្រុមកម្មង់ដូដំបូងនៃទីបញ្ជាការ កងពលទាហានជើងគោកនៃកងពលតូចថ្មើរជើងយន្តកម្មទី៦៥ បានបញ្ចប់ការផ្ទេររបស់ខ្លួនទៅកាន់ប្រទេសកូសូវ៉ូ។ យើងបន់ស្រន់ឲ្យបេសកកកម្មទទួលបានជោគជ័យចំពោះទាហានជាវីរបុរសរបស់យើងក្នុងប្រទេសកូសូវ៉ូ សម្រាប់ការរក្សាសន្តិភាព និងភាពស្ងប់ស្ងាត់។ កងទ័ពនេះនឹងចូលរួមក្នុងកងកម្លាំងរក្សាសន្តិភាពកងកម្លាំងកូសូវ៉ូរបស់សម្ព័ន្ធយោធាណាតូ បន្ទាប់ពីភាពចលាចលនៅភាគខាងជើងប្រទេស។វិបត្តិនយោបាយ ដែលបានធ្លាក់ចូលក្នុងអំពើហិង្សានៅភាគខាងជើងប្រទេសកូសូវ៉ូ បានកើនឡើងខ្ពស់ចាប់តាំងពីអភិបាលក្រុងជនជាតិភាគតិចអាល់បានី ចូលកាន់តំណែងនៅក្នុងតំបន់ដែលមានពលរដ្ឋស៊ែរប៊ីរស់នៅច្រើននៅតំបន់នេះ ដែលបាននាំឲ្យសហរដ្ឋអាមេរិក និងសម្ព័ន្ធមិត្តរបស់ខ្លួនស្តីបន្ទោសលើទីក្រុង Pristina របស់កូសូវ៉ូ។ប្រជាជនស៊ែរប៊ីភាគច្រើន បានធ្វើពហិការការបោះឆ្នោតកាលពីខែមេសា ដែលអនុញ្ញាតឲ្យជនជាតិភាគតិចអាល់បានី បានជាប់ឆ្នោត។ ក្នុងអំពើហិង្សាកាលពីថ្ងៃចន្ទ កងរក្សាសន្តិភាព៣០នាក់ និងពលរដ្ឋស៊ែរប៊ី៥២នាក់ ដែលបានតវ៉ាប្រឆាំងការតែងតាំងអភិបាលក្រុង បានរងរបួស។អំពើហិង្សាបានជំរុញឲ្យអង្គការNATO ប្រកាសថាខ្លួននឹងបញ្ជូនកងទ័ពបន្ថែមទៀតជាង៧០០នាក់ដែលមានស្រាប់ ទៅកាន់ប្រទេសតំបន់បាល់កង់មួយនេះដើម្បីពង្រឹងបេសកកម្មមានកងកម្លាំង៤ពាន់នាក់៕

អារ៉ាប៊ីសាអ៊ូឌីត សន្យាកាត់បន្ថយការផលិតប្រេងហើយក្រុមOPECបូក បន្ថែមពេលកិច្ចព្រមព្រៀងដល់ឆ្នាំ២០២៤

2023/06/05 06:47:49 pm        147
Facebook Telegram Linkin
អារ៉ាប៊ីសាអ៊ូឌីត៖ ប្រទេសអារ៉ាប៊ីសាអ៊ូឌីត នឹងកាត់ការផលិតប្រេងដ៏ច្រើន នៅក្នុងខែកក្កដា ជាផ្នែកនៃកិច្ចព្រមព្រៀងអង្គការOPECបូកដែលកំណត់ទិន្នផលកាន់តែទូលំទូលាយ ខណៈក្រុមនេះប្រឈមមុខការធ្លាក់ចុះតម្លៃប្រេង និងការផ្គត់ផ្គង់អាចលើសតម្រូវការ។ រដ្ឋមន្ត្រីថាមពលអារ៉ាប៊ីសាអ៊ូឌីត ព្រះអង្គម្ចាស់ Abdulaziz មានបន្ទូល ថា ការកាត់បន្ថយការផលិត១លានបារ៉ែលក្នុងមួយថ្ងៃ ដោយទីក្រុងរីយ៉ាត អាចបន្ថែមពេលហួសពីខែកក្កដា ប្រសិនបើចាំបាច់។ ក្រុមប្រទេសOPECបូក ជាក្រុមអង្គការនៃបណ្តាប្រទេសនាំចេញប្រេងនាំចេញ និងសម្ព័ន្ធមិត្ត ដឹកនាំដោយប្រទេសរុស្ស៊ី បានឈានដល់កិច្ចព្រមព្រៀងមួយលើគោលការទិន្នផល បន្ទាប់ពីរយៈពេល៧ម៉ោងនៃកិច្ចពិភាក្សា និងបានសម្រេចកាត់បន្ថយគោលដៅផលិតទាំងអស់ពីឆ្នាំ២០២៤ ដោយចំនួនសរុបបន្ថែមចំនួន១,៤ លានបារ៉ែលក្នុងមួយថ្ងៃ។ ចាប់តាំងពីការឈ្លានពានរបស់រុស្ស៊ីលើអ៊ុយក្រែន បានចាប់ផ្តើមកាលពីខែកុម្ភៈ ឆ្នាំកន្លងទៅនេះ ប្រទេសលោកខាងលិច បានចោទប្រកាន់អង្គការOPEC ពីការរៀបចំតម្លៃប្រេង និងធ្វើឲ្យអន្តរាយដល់សេដ្ឋកិច្ចសកលតាមរយៈតម្លៃថាមពលហក់ឡើងខ្ពស់។ ប្រទេសលោកខាងលិច ក៏បានចោទប្រកាន់អង្គការOPEC ពីការនៅខាងភាគីរុស្ស៊ី។ ជាការឆ្លើយតប ក្រុមប្រទេសក្នុងអង្គការOPEC បាននិយាយថាការបង្កើនការបោះពុម្ពលុយរបស់ប្រទេសលោកខាងលិច កាលពី១ទសវត្សរ៍មុន បានជំរុញឲ្យមានអតិផរណា និងបានបង្ខំឲ្យប្រទេសផលិតប្រេងមានចំណាត់ការដើម្បីរក្សាតម្លៃនៃការនាំចេញដ៏សំខាន់របស់ពួកគេ។ ក្រុមអ្នកវិភាគនិយាយថា ការសម្រេចចិត្តរបស់អង្គការOPECបូក កាលពីថ្ងៃអាទិត្យ បានបញ្ជូនសញ្ញាដ៏ច្បាស់លាស់ដល់ក្រុមនេះ ដែលមានឆន្ទះគាំទ្រម្លៃ និងបំណងរារាំងក្រុមអ្នកវិនិយោគ។ ក្នុងការបន្ថែមលើការពង្រីកការកាត់បន្ថយចំនួន៣,៦៦លានបារ៉ែលក្នុងមួយថ្ងៃរបស់អង្គារOPECបូក ដែលមានស្រាប់ ក្រុមនេះក៏បានព្រមព្រៀងកាលពីថ្ងៃអាទិត្យដើម្បីកាត់បន្ថយគោលដៅផលិតទាំងអស់ចាប់ពីខែមករាឆ្នាំ២០២៤ ចំនួន១,៤លានបារ៉ែលបន្ថែមទៀតទល់នឹងគោលដៅបច្ចុប្បន្នចំពោះចំនួនសរុប៤០,៤៥លានបារ៉ែលក្នយុងមួយថ្ងៃ៕

លោកស្រី Jacinda Ardern ទទួលបានងារកិត្តិយសជាន់ខ្ពស់ប្រទេសនូវ៉ែលហ្សេឡង់ សម្រាប់ភាពជាអ្នកដឹកនាំអំឡុងជំងឺCovid

2023/06/05 05:59:01 pm        153
Facebook Telegram Linkin
នូវ៉ែលហ្សេឡង់៖ អតីតនាយករដ្ឋមន្ត្រីលោកស្រី Jacinda Ardern បានទទួលបានងារកិត្តិយសជាន់ខ្ពស់មួយរបស់ប្រទេសនូវ៉ែលហ្សេឡង់ ដែលទទួស្គាល់កិច្ចប្រឹងប្រែងរបស់លោកស្រី សម្រាប់ការដឹកនាំប្រទេស ឆ្លងកាត់វិបត្តិជំងឺCovid-19 ការវាយប្រហារភេរវកម្មលើព្រះវិហារចំនួន២នៅទីក្រុង Christchurch (ក្រៃឈើច) និងបន្ទុះភ្នំភ្លើង White Island ។លោកស្រី Ardern ត្រូវបានផ្តល់ងារ «Dame Grand Companion» ជាងារកិត្តិយសខ្ពស់បំផុតទី២ក្នុងប្រទេសនូវ៉ែលហ្សេឡង់ នៅថ្ងៃឈប់សម្រាកចម្រើនព្រះជន្មមហាក្សត្រឆាលស៍ ដែលត្រូវបានប្រទេសនេះប្រារព្ធឡើងនៅថ្ងៃទី៥ ខែមិថុនានេះ ហើយលោកស្រីត្រូវបានផ្តល់ងារក្នុងបញ្ជីកិត្តិយសសម្រាប់ឆ្នាំនេះ។ អ្នកទទួលងារនេះ ជាធម្មតាត្រូវបានជ្រើសរើសក្នុងប្រទេសនូវ៉ែលហ្សេឡង់ ដោយនាយករដ្ឋមន្ត្រី ហើយបន្ទាប់មកត្រូវបានអនុម័តដោយព្រះមហាក្សត្រអង់គ្លេស ទ្រង់ព្រះប្រមុខរដ្ឋ។នាយករដ្ឋមន្ត្រីលោក Chris Hipkins បាននិយាយថា លោកស្រី Ardern ត្រូវបានទទួលស្គាល់សម្រាប់ការបម្រើការងាររបស់លោកស្រីអំឡុងភាពប្រឈមខ្លាំងបំផុតមួយចំនួនដែលប្រទេសនូវ៉ែលហ្សេឡង់បានជួបប្រទះ នៅក្នុងសម័យកាលទំនើប។ លោក Hipkins និយាយថា ការឆ្លើយតបរបស់ប្រទេសនូវ៉ែលហ្សេឡង់ដែលនាំមុខ ចំពោះការវាយប្រហារភេរវកម្មឆ្នំ២០១៩ និងចំពោះការឆ្លងរាលដាលជំងឺCovid-19 បានបង្ហាញពីអំឡុងពេលនៃភាពប្រឈមដ៏តានតឹងចំពោះប្រទេសនូវ៉ែលហ្សេឡង់៕

បណ្ដាញសង្គម

ព័ត៌មានថ្មីៗ

រយៈពេលពីរថ្ងៃ សមត្ថកិច្ចខេត្តព្រះសីហនុ ឃាត់ខ្លួនអ្នកប្រើប្រាស់គ្រឿងញៀនជាង ៨០នាក់បញ្ជូនទៅមណ្ឌលកែប្រែ
08/19/2026 04:08 PM
Facebook Telegram Linkin
សមត្ថកិច្ចផាកពិន័យម្ចាស់ និងអ្នកគ្រប់គ្រងទីតាំងល្មើសអនុក្រឹត្យ០៣ ជាង៧ប៊ីលានរៀល ឬជិត២លានដុល្លារ ក្នុងឆមាសទី១ ឆ្នាំ២០២៦
08/19/2026 04:08 PM
Facebook Telegram Linkin
ស្ថានទូតរុស្ស៊ីលើកឡើងអំពីការរំលោភច្បាប់អន្តរជាតិខាងច្បាប់សមុទ្រដោយអ៊ីតាលី
08/19/2026 04:08 PM
Facebook Telegram Linkin
មន្រ្ដីជាន់ខ្ពស់ក្រសួងវប្បធម៌៖ ការធ្វើជំរឿនមន្ត្រីជាក់ស្តែង គឺជាយន្តការគន្លឹះក្នុងការពង្រឹងអភិបាលកិច្ច និងបង្កើនផលិតភាពការងារ ឆ្ពោះទៅសម្រេចចក្ខុវិស័យកម្ពុជា
08/19/2026 04:08 PM
Facebook Telegram Linkin
UN៖ ការវាយប្រហារលើបុគ្គលិកជំនួយមនុស្សធម៌បានកើនឡើងដល់កម្រិតខ្ពស់បំផុតមិនធ្លាប់មាន ក្នុងឆ្នាំ ២០២៥
08/19/2026 04:08 PM
Facebook Telegram Linkin
រដ្ឋមន្ត្រីការបរទេសរុស្ស៊ី៖ ចក្រភពអង់គ្លេសប្រឈមក្លាយ​ជាភាគីនៃសង្គ្រាមអ៊ុយក្រែន
08/19/2026 04:08 PM
Facebook Telegram Linkin
អគ្គស្នងការដ្ឋាននគរបាលជាតិបើកកិច្ចប្រជុំពង្រឹងលើការអនុវត្តរឹតបន្តឹងច្បាប់ស្ដីពីចរាចរណ៍ផ្លូវគោក
08/19/2026 04:08 PM
Facebook Telegram Linkin
សមយុទ្ធយោធាអាមេរិក-កូរ៉េខាងត្បូង នឹងបញ្ចប់មុនកាលកំណត់ បន្ទាប់ពីលោក TRUMP បញ្ជាឲ្យកាត់បន្ថយទំហំ
08/19/2026 04:08 PM
Facebook Telegram Linkin
លោក Putin ធ្វើជាម្ចាស់ផ្ទះទទួលស្វាគមន៍​មេដឹកនាំមីយ៉ាន់ម៉ា និងពិភាក្សា អំពីគម្រោងថាមពល
08/19/2026 04:08 PM
Facebook Telegram Linkin
រដ្ឋមន្រ្ដីធនធានទឹកចុះពិនិត្យគម្រោងអភិវឌ្ឍន៍ធនធានទឹកស្ទឹងឃ្លៀច ខណៈក្រោយសាងសង់រួចស្ទឹងនេះ មានសមត្ថភាពស្ដុកទឹកបានប្រមាណ ១១៥លានម៉ែត្រគូប និងធានាសន្ដិសុខទឹក ការពារទឹកជំនន់
08/19/2026 04:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.