BTV NEWS

ខែមករាឆ្នាំនេះ កម្ពុជានាំទំនិញទៅចិនមានទឹកប្រាក់ជាង ១៦៤លានដុល្លារ កើនជាង ៥៩ភាគរយ

ឆ្នាំ២០២៥ ការវិនិយោគបរទេសផ្ទាល់នៅកម្ពុជា មានទុនសរុបប្រមាណជិត ៥ ១០០ លានដុល្លារ

ប្រធានសមាគមអ្នកចិញ្ចឹមសត្វ៖ តម្រូវការផ្គត់ផ្គង់ជ្រូករស់ក្នុងឱកាសចូលឆ្នាំចិន-វៀតណាមនឹងហក់ឡើងដល់ ១,២ម៉ឺនក្បាលក្នុងមួយថ្ងៃ

អ្នកជំនាញជាតិ-អន្តរជាតិ លើកទឹកចិត្តដល់សហគ្រិនក្នុងស្រុកចាប់យក AI ប្រើប្រាស់ក្នុងអាជីវកម្ម

សេដ្ឋកិច្ច និង កសិកម្ម

ម្រេចកម្ពុជាត្រូវបានអនុញ្ញាតឱ្យនាំចេញទៅកាន់ប្រទេសចិន

ភ្នំពេញ៖ នាថ្ងៃទី១១ខែឧសភា រដ្ឋបាលគយនៃប្រទេសចិនបានបង្ហាញពីបញ្ជីឈ្មោះក្រុមហ៊ុនសហគ្រាសដែលបានចុះបញ្ជីនាំចេញគ្រឿងទេសកម្ពុជាទៅកាន់ប្រទេសចិន។ ទីតាំងដាំម្រេចចំនួន២៨កន្លែង និងរោងចក្រវេចខ្ចប់ចំនួន៧កន្លែង ត្រូវបានចុះបញ្ជីនិងទទួលបានការអនុញ្ញាតពីភាគីចិនក្នុងការនាំចេញ។ ដើម្បីពន្លឿនការអនុវត្តពិធីសារស្តីពីលក្ខខណ្ឌតម្រូវភូតគាមអនាម័យសម្រាប់ការនាំចេញម្រេចពីកម្ពុជាទៅប្រទេសចិន ដែលបានចុះហត្ថលេខារួមគ្នារវាងភាគីទាំងពីរចិន និងកម្ពុជាកាលពីខែវិច្ឆិកា ឆ្នាំ២០២២ រដ្ឋបាលគយ ស្ថានទូតចិនប្រចាំកម្ពុជា និងក្រសួងកសិកម្មរុក្ខាប្រមាញ់ និងនេសាទកម្ពុជា កាលពីថ្ងៃទី១០-១១ខែមេសាថ្មីៗនេះ បានធ្វើការពិនិត្យទីតាំងដាំម្រេច និងរោងចក្រវេចខ្ចប់ម្រេច ដោយតាមរយៈVideo Conference។ ដំណាំម្រេចគឺជាកសិផលដំបូងគេរបស់កម្ពុជា ដែលត្រូវបានអនុញ្ញាតឱ្យនាំចេញទៅប្រទេសចិនក្នុងឆ្នាំ២០២៣នេះ ហើយក៏ជាដំណាំគ្រឿងទេសដំបូងគេដែលត្រូវបានអនុញ្ញាតឱ្យនាំចេញទៅកាន់ទីផ្សារចិនផងដែរ៕

ប្រទេសអេហ្ស៊ីប បានសម្រេចមិនយកពន្ធនាំចូលមាសរយៈពេល៦ខែ

អេហ្ស៊ីប៖ប្រទេសអេហ្ស៊ីប កាលពីថ្ងៃព្រហស្បតិ៍ បានប្រកាសលើកលែងការនាំចូលមាសមិនបង់ពន្ធគយ និងការចំណាយផ្សេងទៀតសម្រាប់ពន្ធបន្ថែម ដែលនឹងរក្សាធ្វើឲ្យមានស្ថិរភាពលើទីផ្សារមាសខណៈមើលឃើញតម្លៃកើនឡើងខ្ពស់។ គណៈរដ្ឋមន្ត្រី និយាយនៅក្នុងសេចក្តីថ្លែងការណ៍ថានាយករដ្ឋមន្ត្រីអេហ្ស៊ីបលោក Mostafa Madbouly បានធ្វើការសម្រេចដូច្នេះ ដែលនឹងអនុវត្តក្នុងរយៈពេល៦ខែចំពោះអ្នកដំណើរដែលនាំយកផលិតផលមាសមកពីបរទេស ប៉ុន្តែគជ់ខ្យង និងត្បូង ពុំរាប់បញ្ចូលនោះទេនៅក្នុងចំណាត់ការថ្មីនេះ។សេចក្តីថ្លែងការណ៍ ពុំបានបញ្ជាក់ច្បាស់ពីចំនួនមាសដែលត្រូវបានលើកលែងពន្ធនោះទេ។ ប្រព័ន្ធផ្សព្វផ្សាយក្នុងតំបន់ បានរាយការណ៍ថា ប្រជាជនអេហ្ស៊ីប អាចចូលមកអាកាសយានដ្ឋាន ឬកំពង់ផែ ជាមួយមាសមិនយកពន្ធចំនួនរហូតដល់១៥០ក្រាម។ លោក Nady Naguid អគ្គលេខាធិការ វិស័យមាស នៅក្នុងសភាពាណិជ្ជកម្មទីក្រុងគែរ បាននិយាយថា សេចក្តីសម្រេចថ្មីនេះ គឺជាការល្អ ដើម្បីទាញយកបរិមាណមាសបន្ថែមទៀតនៅក្នុងទីផ្សារដើម្បីកាត់បន្ថយតម្លៃ ក្នុងពេលមានការរំខានចំពោះការលក់មាសនៅក្នុងប្រទេសអេហ្ស៊ីប ក្នុងពេលលើកមកពិចារណាពីកង្វះខាតប្រាក់ដុល្លារអាមេរិក។លោកនិយាយថា ការសាកល្បង នឹងចាប់ផ្តើម ដើម្បីនាំយកលទ្ធផលជាផ្លែផ្កាក្នុងរយៈពេល២ខែខាង មុខ។ អ្នកជំនាញនិយាយថា បច្ចុប្បន្ននេះ មានការកើនឡើងតម្លៃមាសដែលពុំធ្លាប់មានពីមុនមក ដោយសារតែតម្រូវការខ្ពស់របស់ប្រជាជនអេហ្ស៊ីប ដែលគិតថាវាជាការវិនិយោគមានសុវត្ថិភាព ខណៈរូបីយប័ណ្ណក្នុងស្រុករបស់អេហ្ស៊ីប កំពុងមើលឃើញការធ្លាក់ចុះខ្លាំងទល់នឹងប្រាក់ដុល្លារ។

លោក Elon Musk និយាយថាលោករកបាននាយកប្រតិបត្តិថ្មីរបស់ក្រុមហ៊ុន Twitter ហើយ

អាមេរិក៖ លោក Elon Musk បាននិយាយកាលពីថ្ងៃព្រហស្បតិ៍ថា លោករកបាននាយកប្រតិបត្តិថ្មីសម្រាប់ក្រុមហ៊ុនបណ្ដាញសង្គម Twitter ឬ X Corp ហើយ។ គេគឺមនុស្សស្រី ។ លោកពុំបានបញ្ជាក់ឈ្មោះរបស់ស្ត្រីរូបនេះទេ ប៉ុន្តែបាននិយាយថា ស្ត្រីរូបនោះ នឹងចាប់ផ្ដើមការងារក្នុងពេល៦សប្ដាហ៍ទៀត ។ លោក Musk ដែលបានទិញយកក្រុមហ៊ុន Twitter កាលពីរដូវស្លឹកឈើជ្រុះឆ្នាំមុននិងដឹកនាំរហូតមកដល់បច្ចុប្បន្ន បានទទូចជាយូរមកហើយថា លោកពុំមែនជានាយកប្រតិបត្តិអចិន្ត្រៃយ៍របស់ក្រុមហ៊ុននេះទេ។ មហាសេដ្ឋីម្ចាស់ក្រុមហ៊ុនផលិតរថយន្តអគ្គិសនី Tesla រូបនេះ បាននិយាយនៅតាមបណ្ដាញសង្គម Twitter កាលពីថ្ងៃព្រហស្បតិ៍សប្ដាហ៍នេះថា តួនាទីរបស់លោកនឹងប្រគល់ទៅឲ្យនាយប្រតិបត្តិរបស់ក្រុមហ៊ុន Twitter និង ប្រធានបច្ចេកវិទ្យា។ កាលពីពាក់កណ្ដាលខែវិច្ឆិកា ត្រឹមតែប៉ុន្មានសប្ដាហ៍បន្ទាប់ពីការទិញយកក្រុមហ៊ុនបណ្ដាញសង្គមមួយនេះ ក្នុងតម្លៃ៤៤ពាន់លានដុល្លារអាមេរិក លោកបានប្រាប់តុលាការរដ្ឋ Delaware សហរដ្ឋអាមេរិកថា លោកមិនចង់ធ្វើជានាយកប្រតិបត្តិរបស់ក្រុមហ៊ុនណាមួយឡើយ។ លោក Muskបាននិយាយខណៈកំពុងផ្ដល់សក្ខីកម្មថា ខ្ញុំរំពឹងថានឹងកាត់បន្ថយពេលវេលារបស់ខ្ញុំនៅក្រុមហ៊ុន Twitter និង ស្វែងរកនរណាម្នាក់ដើម្បីគ្រប់គ្រងក្រុមហ៊ុននេះរហូតតទៅ។ ជាងមួយខែក្រោយមក លោកបានសរសេរនៅលើបណ្ដាញ Twitter ថា ខ្ញុំនឹងលាលែងពីតួនាទី ជានាយកប្រតិបត្តិក្រុមហ៊ុនភ្លាមៗ នៅពេលដែលខ្ញុំរកបានបុគ្គដែលមានសមត្ថភាពគ្រប់គ្រាន់គ្រប់គ្រងការងារនេះ។ ការសន្យារបស់លោកបានកើតឡើង បន្ទាប់ពីអ្នកប្រើប្រាស់បណ្ដាញសង្គមនេះ រាប់លាននាក់ បានស្នើឲ្យលោកចុះចេញពីតំណែង នៅក្នុងការស្ទង់មតិតាមTwitterដែលលោកបានបង្កើតដោយខ្លួនឯង និងបានសន្យាទទួលយកលទ្ធផលនេះ ៕

ពាណិជ្ជកម្មអន្តរជាតិរបស់កម្ពុជាមានទំហំជាង ១៥ ពាន់លានដុល្លារអាម៉េរិក ក្នុងរយៈពេល៤ខែ

ភ្នំពេញ៖ ពាណិជ្ជកម្មអន្តរជាតិរបស់កម្ពុជា គិតត្រឹមរយៈពេល៤ខែដើមឆ្នាំ ២០២៣ នេះ មានទំហំទឹកប្រាក់សរុបប្រមាណជាង១៥ ពាន់លានដុល្លារអាម៉េរិក ក្នុងនោះកម្ពុជាបាននាំចេញ មានចំនួនជាង ៧ពាន់លានដុល្លារ ខណៈការនាំចូលមានទឹកប្រាក់ជាង ៨ពាន់លានដុល្លារ។អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បានបង្ហាញស្ថិតិការធ្វើពាណិជ្ជកម្មទំនិញសំខាន់ៗ ជាមួយប្រទេសសំខាន់ៗ ការធ្វើពាណិជ្ជកម្មទ្វេរភាគីរវាងកម្ពុជា-ចិន មានទំហំទឹកប្រាក់ជាង ៣ ៨៩៤ លានដុល្លារ ថមថយចុះប្រមាណជិត ១ ភាគរយ ទោះបីមានការថមថយចុះបន្តិចបន្ទួចក៏ដោយ តែការនាំចេញរបស់កម្ពុជាទៅ កាន់ទីផ្សារចិន បានបន្តកើនឡើងប្រមាណជិត ៤ភាគរយ ។ ចំណែកការធ្វើពាណិជ្ជកម្មកម្ពុជា និងសហរដ្ឋអាមេរិកវិញ មានទំហំទឹក ប្រាក់ជាង ២ ៥២៤លានដុល្លារ ថមថយជាង ១៦ភាគរយ ខណៈការធ្វើពាណិជ្ជកម្មជាមួយប្រទេសវៀតណាម មានទំហំទឹកជាង ២ ៤៣០ លានដុល្លារ កើនឡើងជាង ៥ ភាគរយ។ ចំណែកការធ្វើពាណិជ្ជកម្មទ្វេរភាគីរវាងកម្ពុជា-ថៃ វិញ នៅក្នុងរយៈពេល ៤ ខែ នេះដែរ មានទំហំទឹកប្រាក់ជាង ១ ៣៥២ លាន ដុល្លារ បានថមថយចុះជាង ៩ ភាគរយ ក្នុងនោះការនាំចេញរបស់កម្ពុជា បានកើនជាង ៣ ភាគរយ ។ ចំពោះពាណិជ្ជកម្មទ្វេរភាគី កម្ពុជា និងសិង្ហបុរី មានទឹកប្រាក់ជាង ៤៨០ លានដុល្លារ ក្នុងនោះកម្ពុជាក៏បាននំាចេញកើនឡើងជាង ៣៤៥ ភាគរយ, ខណៈការធ្វើពាណិជ្ជកម្មជាមួយឥណ្ឌូនេស៊ី មានទំហំទឹកប្រាក់ជាង ៣៩២ លានដុល្លារ ដោយក្នុងនោះការនាំចេញរបស់កម្ពុជា ក៏មានការកើនឡើង ជាង ៦០ ភាគរយផងដែរ។សូមបញ្ជាក់ថា ក្រៅពីទីផ្សារសំខាន់ៗខាងលើ កម្ពុជាក៏មានការធ្វើពាណិជ្ជកម្មជាអន្តរជាតិ ទៅកាន់ប្រទេសផ្សេងៗជាច្រើនទៀតដូចជា ប្រទេសជប៉ុន, អាល្លឺម៉ង់, តៃវ៉ាន់, កាណាដា, កូរ៉េខាងត្បូង, ចក្រភពអង់គ្លេស, អេស្បាញ, ម៉ាឡេស៊ី, ប៊ែលហ្សិក, បារាំង, អូស្រ្តាលី, ឥណ្ឌា, ហូឡង់, ហុងកុង និងទៅកាន់ប្រទេសជាច្រើនផ្សេងទៀត ជាពិសេសជាមួយអេមីរ៉ាតអារ៉ាប់រួម ខណៈដែលកម្ពុជា-អេមីរ៉ាតអារ៉ាប់ រួម នឹងឈានទៅចុះហត្ថលេខាលើកិច្ចព្រមព្រៀង នាពេលឆាប់ៗខាងមុខនេះ ស្របពេលដែលក្រុមការងារចរចារបស់កម្ពុជា បានកំពុង ខិតខំយ៉ាងសកម្ម ក្នុងការរៀបចំ គាំទ្រដល់ដំណើរការនៃការចរចាកិច្ចព្រមព្រៀងនេះ៕អត្ថបទ៖ សុន រ៉ាឌី

អគ្គនាយកដ្ឋានពន្ធដារ ប្រមូលចំណូលអាករលើតម្លៃបន្ថែមបានជិត ២១ លានដុល្លារ

ភ្នំពេញ៖ អគ្គនាយកដ្ឋានពន្ធដារ ប្រមូលចំណូលអាករលើតម្លៃបន្ថែម ពីប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក បានចំនួនជាង ៨៤ ប៊ីលានរៀល ត្រូវប្រមាណជិត ២១ លានដុល្លារ នៅក្នុងត្រីមាស ទី១ ដោយចំណូលប្រភេទនេះ បានរួមចំណែកយ៉ាងសំខាន់ ដល់ការប្រមូលចំណូលពន្ធរបស់អគ្គនាយកដ្ឋានពន្ធដារ។អគ្គនាយកដ្ឋានពន្ធដារ, ក្នុងព្រឹត្តិបត្រព័ត៌មានប្រចាំសប្ដាហ៍ នៅថ្ងៃទី ៤ ខែឧសភា ឆ្នាំ ២០២៣ បានបង្ហាញឲ្យដឹងថា ទាក់ទងប្រតិបត្តិការពាណិជ្ជកម្មតាមប្រព័ន្ធអេឡិចត្រូ ក្នុងនោះមានសហគ្រាសក្នុងវិស័យ e-Commerce ចំនួន ៧២ បានចុះបញ្ជីអាករលើតម្លៃបន្ថែមសាមញ្ញ នៅអគ្គនាយកដ្ឋានពន្ធដារ និងមានសហគ្រាសចំនួន ២ផ្សេងទៀត ស្ថិតក្នុងដំណើរការស្នើសុំចុះបញ្ជី។និន្នាការកើនឡើង នៃការចុះបញ្ជីអាករលើតម្លៃបន្ថែមសាមញ្ញ ដោយបុគ្គលអនិវាសនជនដែលធ្វើការផ្គត់ផ្គង់ទំនិញ ឬសេវាឌីជីថលតាមប្រព័ន្ធអេឡិចត្រូនិកចូលមកក្នុងព្រះរាជាណាចក្រកម្ពុជា។ នេះបានបង្ហាញពីភាពរីកចម្រើននៃវិស័យ e-Commerce ដែលទាមទារឱ្យអគ្គនាយកដ្ឋានពន្ធដារ ចាំបាច់ពង្រឹងការអនុវត្តអាករលើតម្លៃបន្ថែមចំពោះវិស័យនេះ ស្របតាមច្បាប់ និងបទប្បញ្ញត្តិជាធរមាន ដើម្បីកៀរគរចំណូលពន្ធដារឱ្យកាន់តែកើនឡើងបន្ថែមទៀត។ដោយឡែកទាក់ទងការចុះបញ្ជីសហគ្រាសវិញ, ទោះបីជាស្ថានភាពសេដ្ឋកិច្ចសកលមានភាពមិនប្រាកដប្រជាបញ្ហាសង្គ្រាមនៅប្រទេសមួយចំនួន ការកើនឡើងនៃអតិផរណា ដែលប៉ះពាល់យ៉ាងខ្លាំងចំពោះសេដ្ឋកិច្ចសកល ក៏ដូចជាប្រទេសកម្ពុជាយ៉ាងណាក្តី ក្នុងនោះចំពោះចំនួនសហគ្រាសដែលបានចុះបញ្ជី នៅតែមានកំណើនគួរឱ្យកត់សម្គាល់។ជាក់ស្តែងរយៈពេល ៣ ខែដើមឆ្នាំ២០២៣ សហគ្រាសថ្មីដែលបានចុះបញ្ជីពន្ធដារដោយជោគជ័យ មានចំនួន ៣ ៥៦៦ សហគ្រាស កើនឡើង ៣៣ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២២ ក្នុងនោះសហគ្រាសដែលស្នើសុំចុះបញ្ជីតាមរយៈថ្នាលបច្ចេកវិទ្យា CamDX មានចំនួន ៣ ១៧៩ សហគ្រាស និងសហគ្រាសដែលបានចុះបញ្ជីដោយផ្ទាល់នៅអគ្គនាយកដ្ឋានពន្ធដារមានចំនួន ៣៨៧ សហគ្រាស។សូមបញ្ជាក់ថា នៅក្នុងរយៈពេល ៣ខែ ដើមឆ្នាំ ២០២៣ នេះ អគ្គនាយកដ្ឋានពន្ធដារ ប្រមូលចំណូលពន្ធ-អាករគ្រប់ប្រភេទបានចំនួន ៥ ៤៤២ ប៊ីលានរៀល ត្រូវជិត ១ ៣៤៤ លានដុល្លារ ស្មើជាង ៣៧ ភាគរយ នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣ ក្នុងនោះបើប្រៀបធៀបនឹងចំណូលពន្ធ-អាករ ក្នុងរយៈពេលដូចគ្នា ឆ្នាំ២០២២ ឃើញថា កើនឡើងចំនួនជិត ៣២៧ ប៊ីលានរៀល ត្រូវប្រមាណជា ៨០ លានដុល្លារ ៕អត្ថបទ៖ សុន រ៉ាឌី

គម្រោងសាងសង់កំពង់ផែពហុបំណងក្នុងខេត្តកំពត មានតម្លៃ ១៥០០លានដុល្លារ ឈានដល់ដំណាក់កាលចុះកិច្ចសន្យាឱ្យក្រុមហ៊ុនធ្វើការសាងសង់ហើយ

ភ្នំពេញ៖ នាព្រឹកថ្ងៃទី០៥ ខែឧសភា ឆ្នាំ២០២៣នេះ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីចុះហត្ថលេខាលើកិច្ចសន្យាសាងសង់មជ្ឈមណ្ឌលភស្តុភារកម្ម និងកំពង់ផែពហុបំណងកំពត រវាងក្រមហ៊ុន កំពត ឡូជីស្ទីក អេន ផត ឯ.ក និងក្រុមហ៊ុន ឆាយណា ហាបើរ អេនជីនារីង ខមភេនី អិលធីឌី( China Harbour Cambodia) ដើម្បីអនុញ្ញាតឱ្យក្រុមឆាយណា ហាបើរ ចាប់ផ្តើមធ្វើការសាងសង់នូវកំពង់ផែដ៏ថ្មីសន្លាងមួយនេះ។ពីធីនេះដែរបានធ្វើនៅសណ្ឋាគារ Hyatt Regency Phnom Penh ដែលបានធ្វើការចុះហត្ថលេខាដោយអ្នកឧកញ៉ា មាស ធំ អគ្គនាយកក្រុមហ៊ុនកំពត ឡូជីស្ទីក អេន ផត ឯ.ក និងលោកស្រី LAN QIULI នាយកគ្រប់គ្រងនៃការិយាល័យ China Harbour Cambodia រួមទាំងមានអ្នកចូលរួមជាច្រើនទៀតផងដែរ។គួរជម្រាបថា កំពង់ផែពហុបំណងកំពត បានបើកការដ្ឋានក្រោមអធិបតីភាពឧបនាយករដ្ឋមន្ដ្រី ជា សុផារ៉ា រដ្ឋមន្ដ្រីក្រសួងដែនី នគរូបនីយកម្ម និងសំណង់តំណាងសម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា កាលពីថ្ងៃទី០៥ ខែឧសភា ឆ្នាំ២០២២។ កំពង់ទឹកជ្រៅកម្រិតអន្តរជាតិដ៏ថ្មីសន្លាងនៅក្នុងខេត្តកំពតនេះ ត្រូវបានបើកការដ្ឋានជាផ្លូវការជាមួយទុនវិនិយោគដ៏សន្ធឹកសន្ធាប់ ១,៥០០លានដុល្លារអាមេរិក ដែលបានវិនិយោគដោយក្រុមហ៊ុន «កំពត ឡូជីស្ទីក អេន ផត» នៅលើមានផ្ទៃដីរហូតដល់ទៅ ៦០០ហិកតា មានទីតាំងនៅភូមិចង្ហោន សង្កាត់ព្រែកត្នោត ក្រុងបូកគោ ខេត្តកំពត។កំពង់ផែនេះជាកំពង់ផែសមុទ្រទឹកជ្រៅតែមួយគត់របស់ក្រុមហ៊ុន កំពត ឡូជីស្ទីក អន ផត ឯ.ក ដែលមានលទ្ធភាពឱ្យនាវាផ្ទុកទំនិញទម្ងន់ចាប់ពី ៦០,០០០តោន ដល់ ១០០,០០០តោនអាចចូលសំចតបាន។ក្នុងការប្រតិបត្តិការអាជីវកម្មងាយស្រួលដល់អ្នកវិនិយោគទុនដូចជា ការនាំទំនិញចេញចូលក្នុងប្រទេស និងក្រៅប្រទេស ឬនាំទំនិញឆ្លងកាត់ទៅប្រទេសទីបីផងដែរ ដែលអាចឲ្យធ្វើចំណេញទាំងពេលវេលា និងថវិកាដល់អ្នកវិនិយោគទុនទូទៅគ្រប់ប្រភេទ។បើតាមលោក Eddie k. Abbas ទីប្រឹក្សាអន្តរជាតិរបស់ក្រុមហ៊ុន កំពត ឡូជីស្ទីក អេន ផត ឯ.ក បានឱ្យដឹងថា ការសម្រេចចិត្តក្នុងការធ្វើការវិយោគនៅកម្ពុជា ដោយសារតែក្រុមហ៊ុន បានមើលឃើញពីការរីកចំរើនយ៉ាងឆាប់រហ័សនៃសេដ្ឋកិច្ចរបស់ប្រទេសកម្ពុជា ទោះបីជាប្រទេសកម្ពុជាបានរងនូវសំពាធនៃជំងឺកូវីដ តែស្ថេរភាពនៃសេដ្ឋកិច្ចនៅតែអាចដំណើរការបាន ដែលនេះជាកត្តាយ៉ាងសំខាន់ក្នុងទាក់ទាញអ្នកវិនិយោគ។លោក Eddie k. Abbas បានឱ្យដឹងទៀតថា ការដែលក្រុមហ៊ុនសម្រេចចិត្តក្នុងការធ្វើការវិនិយោគលើវិស័យដឹកជញ្ជូន និងទីតាំងស្តុកទំនិញនៅកម្ពុជានោះ ដោយសារក្រុមហ៊ុនមើលឃើញថា វិស័យដឹកជញ្ជូន និងទីតាំងស្តុកទំនិញនៅកម្ពុជា នៅមិនទាន់មានភាពល្អប្រសើរនៅឡើយ ហើយក្រុមហ៊ុនក៏ចង់ឃើញវិស័យដឹកជញ្ជូននៅកម្ពុជា មានលក្ខណៈល្អប្រសើរដូចក្នុងប្រទេសដ៏ទៃទៀត ជាពិសេសអាចធ្វើការប្រកួតប្រជែងជាមួយប្រទេសនៅក្នុងរតំបន់អាស៊ានបានផងដែរ។សូមបញ្ជាក់ដែរថា ក្រុមហ៊ុន កំពត ឡូជីស្ទីក អេន ផត ឯ.ក មានកំពង់ផែសមុទ្រទឹកជ្រៅតែមួយគត់ដែលជួយ សម្រួលដល់ការដឹកជញ្ជូនតាមសមុទ្រ ដែលទទួលបានភាពអនុគ្រោះពីធម្មជាតិ ដូចជា៖ កំពង់ផែមានជម្រៅទឹកជជាងគេ មានកោះជារបាំងខ្យល់ និងទឹករលកធំៗ ហើយមានទីតាំងស្ថិតនៅជិតក្នុងការដឹកជញ្ជូនចេញចូលក្នុងប្រទេស និងក្រៅប្រទេស ឬទំនិញឆ្លងកាត់ជាដើម។ក្រុមហ៊ុន បានសាងសង់ឡើងចាប់តាំងពីដើមឆ្នាំ២០២១ ហើយបាននឹងកំពុងពង្រីកជាបន្តបន្ទាប់។ បច្ចុប្បន្ននេះកំពង់ផែបានត្រៀមចំណតនាវាមួយចំនួនដែលនឹងបំពាក់ទៅដោយឧបករណ៍លើកដាក់ទំនើបៗ និងទាន់សម័យក្នុងការប្រតិបត្តិការការងារ។ ក្រុមហ៊ុនក៏បាននឹងកំពុងខិតខំប្រឹងប្រែងយ៉ាងខ្លាំងក្នុងការលើកកម្ពស់គុណភាពសេវាកម្មតាមរយៈការបំពាក់ដោយគ្រឿងម៉ាស៊ីនទំនើបៗ និងបច្ចេកវិទ្យាថ្មីៗដើម្បីបង្កើនសម្ថភាពនិងបន្តពង្រឹងសមត្ថភាពដល់កម្មករនិងបុគ្គលិកជំនាញៗក៏ដូចជាការប្រើប្រាស់ប្រព័ន្ធស្វ័យប្រវត្តិកម្មដើម្បីពន្លឿនប្រតិបត្តិការការងារដើម្បីកាត់បន្ថយពេលវេលាប្រើប្រាស់សម្រាប់អតិថិជន និងអ្នកប្រើប្រាស់កំពង់ផែផងដែរ៕

កម្ពុជានាំចេញកង់មានតម្លៃ ២៧៨លានដុល្លារ ក្នុងត្រីមាសទី១ឆ្នាំ២០២៣

ភ្នំពេញ៖ កម្ពុជាបាននាំចេញកង់តម្លៃ ២៧៨លានដុល្លារទៅកាន់ទីផ្សារបរទេសក្នុងត្រីមាសទី១ ឆ្នាំ ២០២៣ពោលគឺកើនឡើងជិត ២០ ភាគរយ ធៀបនឹងរយៈពេលដូចគ្នាកាលពីឆ្នាំមុន។របាយការណ៍របស់ក្រសួងពាណិជ្ជកម្មបានបង្ហាញថា កង់ផលិតនៅប្រទេសកម្ពុជា ត្រូវបាននាំចេញទៅកាន់សហភាពអឺរ៉ុប ចក្រភពអង់គ្លេស សហរដ្ឋអាមេរិក កាណាដា ជប៉ុន និងចិន ។បច្ចុប្បន្ននេះ រោងចក្រកង់ចំនួនប្រាំកំពុងដំណើរការនៅក្នុងប្រទេសកម្ពុជា ដែលមានទីតាំងនៅតំបន់សេដ្ឋកិច្ចពិសេសក្នុងក្រុងបាវិតភាគអាគ្នេយ៍នៃខេត្តស្វាយរៀង។កម្ពុជា បានក្លាយជាអ្នកផ្គត់ផ្គង់កង់ដ៏ធំបំផុតសម្រាប់ទីផ្សារសហភាពអឺរ៉ុបចាប់តាំងពីឆ្នាំ ២០១៧ ដោយនាំមុខកោះតៃវ៉ាន់របស់ប្រទេសចិន ដែលបានកាន់កាប់តំណែងលេខមួយអស់រយៈពេលពីរទសវត្សរ៍។កង់ក្លាយជាផលិតផលមិនមែនសំលៀកបំពាក់ដ៏សំខាន់មួយដែលការនាំចេញ មានការកើនឡើងគួរឲ្យកត់សម្គាល់។ នេះបើតាម ឯកឧត្តម ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ឯកឧត្តម លើកឡើងថា ការកើនឡើងនៃការនាំចេញកង់ ឆ្លុះបញ្ចាំងឱ្យឃើញពីការធ្វើពិពិធកម្មក្នុងវិស័យឧស្សាហកម្ម ពីការប្រើកម្លាំងពលកម្មដល់ការផលិតកម្លាំងជំនាញ៕ អត្ថបទ៖ វណ្ណៈ

អូស្ត្រាលី ជួយកម្ពុជា បង្កើតសួនកសិ-ឧស្សាហកម្ម ដើម្បីរួមចំណែកការកែច្នៃកសិផល

ភ្នំពេញ៖ រដ្ឋាភិបាលអូស្រ្តាលី កំពុងជួយកម្ពុជា ក្នុងការបង្កើតសួនកសិ-ឧស្សាហកម្ម ដើម្បីចូលរួមចំណែក លើកកម្ពស់ការកែច្នៃកសិផលផ្ទាល់ខ្លួន បង្កើនការប្រកួតប្រជែង សម្រាប់ទីផ្សារទាំងក្នុងស្រុក និងនាំចេញ។ស្ថានទូតអូស្រ្តាលី ប្រចាំនៅកម្ពុជា លើកឡើងថា ដើម្បីបង្កើនការប្រកួតប្រជែងកែច្នៃ និងបន្ថែមតម្លៃដល់ដំណាំសំខាន់ៗរបស់ខ្លួន ដូចជា ស្វាយចន្ទី ដំឡូងមី អង្ករ ស្វាយ ចេក និងបន្លែ សម្រាប់ទីផ្សារទាំងក្នុងស្រុក និងនាំចេញ កម្ពុជាចាំបាច់ត្រូវមានកន្លែងកែច្នៃកសិផលផ្ទាល់ខ្លួន។អូស្ត្រាលីកំពុងធ្វើការជាមួយកម្ពុជា ដើម្បីបង្កើតសួនកសិ-ឧស្សាហកម្ម (AIP) ដំបូងគេ ។ សួនកសិ-ឧស្សាហកម្មនេះ នឹងផ្តល់នូវ កន្លែងកែច្នៃកសិ-អាហារ ការស្រាវជ្រាវនិងអភិវឌ្ឍន៍ ការកសាងសមត្ថភាព ព្រមទាំងកន្លែងធ្វើការនិងបរិស្ថានប្រកបដោយសុវត្ថិភាពនិងបរិយាបន្ន ជាពិសេសសម្រាប់បុគ្គលិកជាស្ត្រី និងបុគ្គលិកដែលខ្វះខាត។យោងតាមការសិក្សាលទ្ធភាពឆ្នាំ ២០២២ របស់រដ្ឋាភិបាលកម្ពុជា សួនកសិ-ឧស្សាហកម្ម ត្រូវបានគេរំពឹងថា នឹងរួមចំណែកចំនួន ៥,១ពាន់លានដុល្លាអាមេរិច ដល់សេដ្ឋកិច្ចកម្ពុជា នៅឆ្នាំ២០៤៥ និងបង្កើតការងារថ្មីរហូតដល់ ១០០ ០០០កន្លែង ដែលជាងពាក់កណ្តាលការងារនេះនឹងជារបស់ស្ត្រី។ថ្មីៗនេះ កម្មវិធីអភិវឌ្ឍន៍សេដ្ឋកិច្ចឈានមុខរបស់ប្រទេសអូស្ត្រាលី ហៅថា CAPRED បានរៀបចំដំណើរទស្សនកិច្ចសិក្សានៅប្រទេសអូស្ត្រាលី សម្រាប់គណៈកម្មាធិការ និងសមាជិកលេខាធិការដ្ឋាន សួនកសិ-ឧស្សាហកម្ម។ ពួកគេបានសិក្សាអំពីការគាំទ្ររបស់រដ្ឋាភិបាល ទំនាក់ទំនងសាធារណៈ ឧស្សាហកម្ម និងការស្រាវជ្រាវ សម្រាប់ការកសាងប្រព័ន្ធអេកូឡូស៊ី និងបញ្ហាប្រឈមនានាក្នុងការបង្កើត សួនកសិ-ឧស្សាហកម្ម។យោងតាមការសិក្សាដដែល កសិផលកម្ពុជា ៩៥% ត្រូវបានលក់ទៅតាមបណ្តាប្រទេសជិតខាងក្នុងអាស៊ាន ជាកសិផលដើមមិនទាន់កែច្នៃ? ប្រទេសទាំងនោះ បន្ទាប់ពីទិញកសិផលយកទៅ បានកែច្នៃវាទៅជាផលិតផលមានតម្លៃជាងកសិផលដើម ដូចជាធ្វើទៅជា តំណាប់និងទឹកផ្លែឈើ នំស្រួយ អាហារទារក ម្សៅ និងជីវឥន្ធនៈជាដើម។អត្ថបទ៖ វណ្ណៈ

ទំហំពាណិជ្ជកម្មរវាងកម្ពុជា និងជប៉ុន សម្រេចបានក្នុងទឹកប្រាក់ជាង ២ ៤០០លានដុល្លារ

ភ្នំពេញ៖ គិតក្នុងឆ្នាំ២០២២ ការដោះដូរពាណិជ្ជកម្មទ្វេភាគី រវាងកម្ពុជា-ជប៉ុន សម្រេចបានក្នុងទំហំទឹកប្រាក់សរុបប្រមាណជាង ២ ៤៥៤លានដុល្លារ ក្នុងនោះការនាំចេញពីកម្ពុជាទៅជប៉ុន មានទឹកប្រាក់ប្រមាណ ៥១៥លានដុល្លារ។ ចំណែកការនាំចូលពីជប៉ុន មកកម្ពុជាវិញ មានទឹកប្រាក់ប្រមាណជិត ២ ០០០លានដុល្លារ។ ផេកផ្លូវការរបស់ក្រសួងពាណិជ្ជកម្ម បានលើកឡើងថា តាមរយៈការចូលរួមរបស់កម្ពុជា ក្នុងព្រឹត្តិការណ៍ពិព័រណ៍កម្ពុជា និងពិព័រណ៍ពិភពលោក២០២៥ នៅក្នុងទីក្រុងតូក្យូ ប្រទេសជប៉ុន កាលពីនៅថ្ងៃទី៣ ឧសភា ឆ្នាំ២០២៣នេះ បានរំពឹងទុកថា កិច្ចសហប្រតិបត្តិការវិស័យពាណិជ្ជកម្ម វិនិយោគ និងទេសចរណ៍រវាងកម្ពុជា-ជប៉ុន នឹងកាន់តែមានវឌ្ឍភាពល្អឡើងថែមទៀត។តាមឯកឧត្តម ឈួន ដារ៉ា រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងពាណិជ្ជកម្ម បានចាត់ទុកការចូលរួមពិព័រណ៍កម្ពុជានៅពេលនេះ ជាការរួមចំណែកដ៏មានសារៈសំខាន់បំផុតក្នុងការផ្សព្វផ្សាយ និងជំរុញផលិតផលខ្មែរ សេវាកម្ម គម្រោងវិនិយោគ និងវិស័យទេសចរណ៍កម្ពុជា ឱ្យកាន់តែមានការទទួលស្គាល់ក្នុងទីផ្សារជប៉ុន និងទីផ្សារអន្តរជាតិ។ ជាមួយគ្នានេះ ឯកឧត្តម បានជម្រាបជូនអង្គពិធី អំពីការត្រៀមលក្ខណៈរបស់កម្ពុជា ក្នុងការចូលរួម “ពិព័រណ៍ពិភពលោក ២០២៥” រយៈពេល ០៦ខែ នៅទីក្រុងអូសាកា ដែលតាមរយៈការចូលរួមពិព័រណ៍ពិភពលោកនេះ ធ្វើឱ្យកម្ពុជាមានសិទ្ធិ ស្មើមុខស្មើមាត់ នៅលើឆាកអន្តរជាតិ ហើយទំនាក់ទំនងការទូតរវាងកម្ពុជានិងប្រទេសម្ចាស់ផ្ទះ ក៏ដូចជារវាងបណ្តាប្រទេសអ្នកចូលរួម នឹងត្រូវបានពង្រឹង និងពង្រីកថែមទៀត។ លើសពីនេះទៀត ពិព័រណ៍ពិភពលោក ក៏នឹងផ្តល់ឱកាសឱ្យពាណិជ្ជករ ក្រុមហ៊ុន សហគ្រាសកម្ពុជា បានជួបចរចាផ្លាស់ប្តូរពាណិជ្ជកម្ម វិនិយោគ និងទេសចរណ៍ទៅវិញទៅមក ជាអន្តរជាតិផងដែរ។ ក្រសួងពាណិជ្ជកម្ម បានបញ្ជាក់ថា នៅក្នុងពិព័រណ៍កម្ពុជាឆ្នាំ២០២៣នេះ មានរៀបចំកម្មវិធីសម្តែងសិល្បៈបុរាណខ្មែរ និងតន្រ្តីសម័យ ហើយមានស្តង់ប្រមាណ ១០០ស្តង់ បានដាក់តាំងបង្ហាញឯកសារផ្សព្វផ្សាយអំពីវិស័យពាណិជ្ជកម្ម វិនិយោគ វប្បធម៌ប្រពៃណីខ្មែរ និងទេសចរណ៍ ព្រមទាំងផលិតផលកសិកម្ម និងសិប្បកម្មខ្មែរ ដូចជា៖ អង្ករ ម្រេច ស្ករត្នោត កាហ្វេ នំស្រួយ សូត្រខ្មែរ ក្រម៉ាខ្មែរ ម្ហូបអាហារ និងវត្ថុអនុស្សាវរីយ៍ជាច្រើនទៀត ដើម្បីបង្ហាញដល់ភ្ញៀវជាតិ និងអន្តរជាតិ មកចូលរួមទស្សនា។ ក្នុងនោះ ទំនិញអង្ករ ម្រេច និងសូត្រខ្មែរ គឺជាផលិតផលដែលទទួលបានការចាប់អារម្មណ៍ខ្ពស់ និងការបញ្ជាទិញជាបន្តបន្ទាប់ ពីភ្ញៀវទេសចរ និងប្រជាជនជប៉ុន៕

ក្រសួងពាណិជ្ជកម្មបើកកិច្ចប្រជុំផ្ទៃក្នុង ដើម្បីពិនិត្យសេចក្តីព្រាងច្បាប់ ស្តីពីវិធានដើមកំណើតទំនិញ

ភ្នំពេញ៖ ឯកឧត្តម ប៉ាន សូរស័ក្តិ រដ្ឋមន្ត្រីក្រសួពាណិជ្ជកម្ម បានដឹកនាំកិច្ចប្រជុំផ្ទៃក្នុង ដើម្បីពិនិត្យពិភាក្សាលើសេចក្តីព្រាងច្បាប់ស្តីពី វិធានដើមកំណើតទំនិញ ដើម្បីស្តាប់នូវសេចក្តីរាយការណ៍អំពីវឌ្ឍន៍ភាពនៃការរៀបចំ ក៏ដូចជាផ្តល់អនុសាសន៍នានា ដើម្បីឱ្យសេចក្តីព្រាងច្បាប់នេះ កាន់តែមានភាពគ្រប់ជ្រុងជ្រោយ ដើម្បីត្រៀមសម្រាប់កិច្ចប្រជុំពិនិត្យចុងក្រោយ។នៅក្នុងកិច្ចប្រជុំ កាលពីរសៀលថ្ងៃទី២ ខែឧសភានេះ ឯកឧត្តមរដ្ឋមន្ត្រី បានកោតសរសើរ និងវាយតម្លៃខ្ពង់ចំពោះកិច្ចខិតខំប្រឹងប្រែងរបស់ក្រុមការងារក្រសួងពាណិជ្ជកម្ម ក្នុងការរៀបចំសេចក្តីព្រាងច្បាប់ស្តីពីវិធានដើមកំណើតទំនិញ និងការពារបានជោគជ័យក្នុងកិច្ចប្រជុំជាបន្តបន្ទាប់ តាមនីតិវិធី និងបែបបទរបស់ទីស្តីការគណៈរដ្ឋមន្ត្រី និងកិច្ចប្រជុំជាមួយក្រសួងយុត្តិធម៌ពាក់ព័ន្ធលើទោសប្បញ្ញត្តិមួយចំនួន។បន្ទាប់ពីបានពិនិត្យ និងពិភាក្សាតាមមាត្រានីមួយៗរួចមក ឯកឧត្តមរដ្ឋមន្ត្រី បានផ្តល់អនុសាសន៍ណែនាំដល់ក្រុមការងារឱ្យកែសម្រួល និងបន្ថែមខ្លឹមសារសំខាន់ៗមួយចំនួនឱ្យស្របទៅតាមស្មារតីនៃអង្គប្រជុំ ព្រមទាំងផ្តល់គោលការណ៍មួយចំនួនទៀតជូនក្រុមការងារ ដើម្បីមានមូលដ្ឋានក្នុងការចូលរួមកិច្ចប្រជុំពិនិត្យចុងក្រោយលើសេចក្តីព្រាងច្បាប់នេះនៅទីស្តីការគណៈរដ្ឋមន្ត្រី ដែលនឹងប្រព្រឹត្តិទៅនៅថ្ងៃទី៣ ខែឧសភានា ឆ្នាំ២០២៣នេះ៕

បណ្ដាញសង្គម

ព័ត៌មានថ្មីៗ

រុស្ស៊ី៖ អាមេរិកចាប់អារម្មណ៍ក្នុងការដកទណ្ឌកម្មលើក្រុងមូស្គូ ដោយសារគម្រោងដែលរកប្រាក់ចំណេញបានច្រើន

អតីតនាយករដ្ឋមន្ត្រីអ៊ុយក្រែន៖ អនាគតរបស់លោក ZELENSKYY អាស្រ័យលើភស្តុតាងអំពើពុករលួយ

ព្រឹត្តិការណ៍ជិះកង់ភ្នំពេញ-តាកែវ នឹងត្រឡប់មកវិញ នាដើមខែមីនា ក្រោមប្រធានបទ «ទេសចរណ៍រីកលូតលាស់ក្នុងសន្ដិភាព»

ប្រព័ន្ធផ្សព្វផ្សាយ៖ សហរដ្ឋអាមេរិកកំពុងថ្លឹងថ្លែងពីការវាយប្រហារលើអ៊ីរ៉ង់ នៅចុងសប្តាហ៍នេះ

បេសកជន UN ព្រមានថា ប្រព័ន្ធតុលាការដែលបែកបាក់របស់ប្រទេសលីប៊ី គំរាមកំហែងដល់ឯកភាពជាតិ

Newcastle, Leverkusen, Bodo/Glimt សុទ្ធតែឈ្នះជើងទីមួយខណៈ Club Bruges និង Atletico Madrid ស្មើគ្នា

BREAKING NEWS អតីតប្រធានាធិបតីកូរ៉េខាងត្បូង លោក Yoon ត្រូវបានកាត់ទោសជាប់ពន្ធនាគារមួយជីវិតពីបទបះបោរ

និស្សិតទំនាក់ទំនងអន្តរជាតិមានសុទិដ្ឋិនិយមចំពោះសម្តេចធិបតីបង្ហាញឆន្ទៈដោះស្រាយព្រំដែនទៅកាន់ពិភពលោក

សាលារៀនជាច្រើនទទួលបានអគារសិក្សាស្តង់ដារតេជោ និងបណ្តុះបណ្តាលជំនាញវិជ្ជាជីវៈស្របទីផ្សារការងារ

ស្ថានីយផលិតថាមពលអគ្គិសនីដើរដោយពន្លឺព្រះអាទិត្យនៅខេត្តកំពង់ឆ្នាំងរួមចំណែកធានាសន្តិសុខថាមពល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877