BTV NEWS

ក្រសួងពាណិជ្ជកម្ម៖ កម្ពុជាទទួលបានចម្លើយជាវិជ្ជមានពីភាគីអាមេរិកលើសំណើសុំបើកការចរចាស្វែងរកដំណោះស្រាយរួម ខណៈឯកឧត្តម ស៊ុន ចាន់ថុល នឹងដឹកនាំលើការចរចានាពេលឆាប់ៗខាងមុខនេះ

ADB៖ សេដ្ឋកិច្ចកម្ពុជានៅឆ្នាំ២០២៥ នឹងកើនឡើង ៦,១ភាគរយ និង ៦,២ភាគរយ នៅឆ្នាំ២០២៦

វិស័យឧស្សាហកម្មកំពុងមានភាពមមាញឹកក្នុងដំណើរការផលិតកម្ម បម្រើទីផ្សារនាំចេញ

អគ្គលេខាធិការ CDC ស្នើដល់ក្រុមហ៊ុនចិនបោះទុនវិនិយោគក្នុងវិស័យឧស្សាហកម្មស្វាយចន្ទី

សេដ្ឋកិច្ច និង កសិកម្ម

គយ និងរដ្ឋាករប្រមូលចំណូលបានជាង ២,៥៩០លានដុល្លារ ក្នុងឆ្នាំ២០២៤

អគ្គនាយកដ្ឋានគយនិងរដ្ឋាករកម្ពុជា នៅក្នុងបំណាច់ឆ្នាំ២០២៤ ប្រមូលចំណូលពន្ធនិងអាករ បានចំនួនសរុបជាង ១០ ពាន់ប៊ី លានរៀល ត្រូវប្រមាណជាង ២,៥៩០ លានដុល្លារអាមេរិក កើនឡើងជិត១៤ ភាគរយ ធៀបនឹងចំណូលប្រមូលបានក្នុងឆ្នាំ២០២៣។ ឯកឧត្ដមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លើកឡើង នៅក្នុងកិច្ចប្រជុំបូកសរុបការងារប្រចាំឆ្នាំ ២០២៤ និងទិសដៅអនុវត្តបន្តរបស់អគ្គនាយកដ្ឋានគយនិងរដ្ឋាករកម្ពុជា នៅថ្ងៃទី ១០ ខែ កុម្ភៈ ម្សិលមិញនេះថា បញ្ហាប្រមូលចំណូលនៅក្នុងឆ្នាំ ២០២៤ កន្លងមកនេះ អគ្គនាយកដ្ឋាន ជួបប្រទះនឹងបញ្ហាប្រឈមធំៗមួយ ចំនួនមានជាអាទិ៍៖ កំណើនជាបន្តបន្ទាប់ ទាំងវិសាលភាព និងភាពស៊ីជម្រៅ នៃការអនុវត្តកិច្ចព្រមព្រៀងពាណិជ្ជកម្មសេរី, ការរីកលូត លាស់នៃផលិតកម្មក្នុងស្រុកជំនួសការនាំចូល, ការអនុគ្រោះពន្ធនិងអាករកាន់តែធំទូលាយដើម្បីទាក់ទាញការវិនិយោគ, និន្នាការកើន ឡើងនៃការប្រើប្រាស់រថយន្តដែលមានទំហំស៊ីឡាំងតូច និងរថយន្តអគ្គិសនី, និងការបន្តមាននូវសកម្មភាពរត់គេចពន្ធក្នុងរូបភាពថ្មីៗ កាន់តែស្មុគស្មាញ។ជាក់ស្តែងការប្រមូលចំណូលតាមប្រភេទពន្ធ និងអាករ ធៀបនឹងចំណូលសរុបអាករលើតម្លៃបន្ថែមមានប្រមាណ ៤១,៣%, អាករពិសេសមាន ៣២,១%, ពន្ធគយ ១៨%, អាករបន្ថែមលើផលិតផលប្រេងកាត ៤,៤% និងអាករនាំចេញនិងកម្រៃផ្សេងៗមាន ប្រមាណ ៤,២% ។ ចំពោះសមាសភាគនៃចំណូលតាមក្រុមទំនិញវិញ បើធៀបនឹងចំណូលសរុបក្រុមទំនិញចម្រុះមានប្រមាណ ៣៤,៧%, យានយន្តនិងគ្រឿងចក្រមានប្រមាណ ៣១,១%, ប្រេងឥន្ធនៈនិងថាមពល ២៦,៩%, និងសម្ភារសំណង់ និងកម្រៃ ផ្សេងៗមានប្រមាណ ៧,៣%។ចំណែកទំហំពាណិជ្ជកម្មនាំចូល នៅក្នុងឆ្នាំ ២០២៤ មានចំនួនសរុបប្រមាណ ២៨ ពាន់លានដុល្លារអាមេរិក កើនឡើង ប្រមាណ ១៨% ធៀបនឹងឆ្នាំ ២០២៣ ដែលក្នុងនោះទំនិញនាំចូលសំខាន់ៗរួមមាន៖ ផលិតផលតេលសិលា, វត្ថុធាតុដើមនិងគ្រឿង ម៉ាស៊ីនបម្រើដល់គម្រោងវិនិយោគ, គ្រឿងសំណង់, យានយន្តនិងគ្រឿងចក្រ, គ្រឿងឧបភោគបរិភោគ និងទំនិញចម្រុះផ្សេងទៀត។ ដោយឡែកទំហំពាណិជ្ជកម្មនៃការនាំចេញ មានចំនួនសរុប ២៦ ពាន់លានដុល្លារអាម៉េរិក កើនឡើងប្រមាណ ១៥,៨% ធៀបនឹងឆ្នាំ ២០២៣ ដែលក្នុងនោះផលិតផលវិនិយោគកាត់ដេរមានកំណើន ២៣,៣%, ផលិតផលវិនិយោគមិនមែនកាត់ដេរដូចជា (សំបកកង់ រថយន្ត, គ្រឿងបំណែកអេឡិចត្រូនិក, បង្គុំខ្សែភ្លើង, ផលិតផលពីឈើ, កង់, ផលិតផលប្លាស្ទិច, អំពូល, ស្បែកសត្វកែច្នៃ, គ្រឿង បន្លាស់រថយន្ត និងផលិតផលឧស្សាហកម្មផ្សេងៗទៀត) មានកំណើន ២,៦%, និងកសិផល (មានស្រូវ, កៅស៊ូ, ដំឡូងមី, អង្ករ, ចេក, គ្រាប់ស្វាយចន្ទី និងកសិផលផ្សេងៗទៀត) មានកំណើន ១១,៦% ផងដែរ។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីគយ និងរដ្ឋាករគ្រប់ជាន់ថ្នាក់ ក្នុងការសម្រេចបាននូវលទ្ធផលប្រសើរលើការ ប្រមូលចំណូល និងលើការដ្ឋានការងារផ្សេងទៀត ទោះបីជួបប្រទះនូវបញ្ហាប្រឈមមួយចំនួនរួមមាន ការងើបឡើងយឺតនូវស្ថានភាព សេដ្ឋកិច្ចជាសកល, ការបន្តអូសបន្លាយសង្គ្រាមរុស្សី-អ៊ុយក្រែន, បញ្ហាសង្គ្រាមអ៊ីស្រាអែល-ក្រុមហាម៉ាស់, បញ្ហានៅមជ្ឈឹមបូព៌ា, ភាព តានតឹងនៃភូមិសាស្ត្រនយោបាយជាដើម៕ អត្ថបទ៖ សុន រ៉ាឌី

សហគមន៍កសិកម្មទំនើប «បន្លែផ្ទះសំណាញ់ត្រាំកក់» បន្តបែងចែកប្រាក់ចំណេញភាគលាភប្រចាំខែជូនដល់សមាជិករបស់ខ្លួនជាលើកទី៤

តាកែវ៖ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា គិតជាមធ្យម ក្នុងខែកុម្ភៈនេះ សមាជិកម្នាក់ៗមានផ្ទះសំណាញ់២ខ្នង និងទទួលបានប្រាក់ចំណេញក្នុងរង្វង់ ៧៥ម៉ឺនរៀល ដែលក្នុងនោះ ៧០% បានមកពីប្រាក់រង្វាន់លើការថែទាំបន្លែ និង៣០% ទៀតទទួលបានបន្ថែមពីសហគមន៍ក្រោយការទូទាត់ចំណាយប្រចាំខែរួចរាល់។ឯកឧត្តមបន្តថា ទោះបីជាប្រាក់ភាគលាភក្នុងខែនេះទាបជាងកាលពីខែមុនបន្តិច ដោយសារទទួលរងសម្ពាធពីការធ្លាក់ចុះនៃថ្លៃបន្លែលើទីផ្សារ តែសហគមន៍កសិកម្មទំនើបនៅតែបន្តធានាបាននូវប្រាក់ចំណេញសមរម្យជាប្រចាំដែលមានស្ថិរភាព និងអាចលក់ចេញបន្លែក្នុងរង្វង់ ១៥០០៛/គីឡូក្រាម ខណៈពេលដែលកសិករនៅក្រៅសហគមន៍ភាគច្រើនកំពុងរងការខាតបង់ពីការទទួលបានថ្លៃត្រឹមតែ ៥០០៛ប៉ុណ្ណោះ៕

ស្ថានភាពតម្លៃស្រូវបានវិលមកធម្មតាឡើងវិញ ក្រោយចប់រដូវបុណ្យចូលឆ្នាំចិន-វៀតណាម

អ្នកជំនាញក្នុងវិស័យស្រូវ អង្ករ បានឲ្យដឹងថា គិតមកដល់ពេលនេះ ពោលក្រោយចប់រដូវបុណ្យចូលឆ្នាំចិន-វៀតណាម ស្ថានភាពនៃការនាំចេញ ក៏ដូចជាតម្លៃស្រូវ បានវិលត្រឡប់មកជាធម្មតាឡើងវិញហើយ និងត្រៀមពង្រីកទីផ្សារនាំចេញស្រូវរបស់កម្ពុជាទៅកាន់ទីផ្សារអន្តរជាតិថែមទៀត។ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ប្រាប់ព័ត៌មាន ប៊ីធីវី ឲ្យដឹងថា ជាទូទៅ ការប្រមូលផលស្រូវមិនមានការខុសប្លែកគ្នាប៉ុន្មានទេ ពីព្រោះពាក់ព័ន្ធការដាំដុះ ផ្ទុយទៅវិញអ្វីគឺមើលឃើញថា មានការប្រែប្រួលច្រើន គឺពាក់ព័ន្ធទៅនឹងការនាំចេញស្រូវពីប្រទេសកម្ពុជា ដែលឃើញកន្លងមក កាលពេលដែលថ្លៃស្រូវមានបញ្ហាខ្លាំងកាលពីដើមខែនោះ គឺទំហំនៃការនាំចេញតិចដែលបានដាក់សំពាធខ្លាំងទៅលើថ្លៃស្រូវ។ ឯកឧត្តមអនុរដ្ឋលេខាធិការ បានឲ្យដឹងទៀតថា ផ្ទុយទៅវិញក្រោយពីមានវិធានការណ៍មួយចំនួនពីការកៀគរជួយប្រមូលទិញពីរោងម៉ាស៊ីនក្នុងស្រុក ពីអ្នកប្រើប្រាស់ក្នុងស្រុក ក៏ដូចជាការអំពាវនាវ និងវិធានការណ៍ផ្សេងៗនោះ គឺឃើញថាការនាំចេញស្រូវប្រចាំថ្ងៃមានការកើនឡើងគួរឲ្យកត់សម្គាល់ លើកលែងតែចន្លោះពេលចូលឆ្នាំចិន-វៀតណាម ដែលចំនួននេះមានការធ្លាក់ចុះបន្តិច តែបច្ចុប្បន្ននេះ គឺបានកើនឡើងមកក្នុងកម្រិតជាធម្មតាវិញហើយ។លោកឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា នៅព្រឹកថ្ងៃទី១០ ខែកុម្ភៈ ឆ្នាំ២០២៥នេះ បានឲ្យ ប៊ីធីវី ដឹងដែរថា ជុំវិញបញ្ហាស្រូវក្នុងពេលនេះ គឺមានស្ថានភាពប្រសើរជាងមុន ហើយតម្លៃក៏ល្អជាងមុនដែរ ដែលឥឡូវនេះនៅក្នុងចន្លោះ ៨៦០រៀល ក្នុងមួយគីឡូក្រាម សម្រាប់ស្រូវពូជប្រភេទ អូអិម (OM) ។ រីឯប្រភេទស្រូវស្រង៉ែ តម្លៃចន្លោះ ១,០៣០ ទៅ ១,០៥០រៀល ក្នុងមួយគីឡូ។ លោកឧកញ៉ា បានបន្តថា ដោយឡែក ការនាំចេញស្រូវមកដល់ពេលនេះ កត់សម្គាល់ឃើញដែរថា ក៏មានការវិលត្រឡប់មកប្រក្រតីឡើងវិញហើយ។ លោកឧកញ៉ាប្រធានបានបញ្ជាក់ថា ក្នុងពេលនេះ សហព័ន្ធស្រូវអង្ករកម្ពុជាកំពុងជំរុញអភិវឌ្ឍកម្មវិធី អេសអាភី (SRP) ឬហៅថាជាប្រភេទស្រូវមាននិរន្ត៍រភាព ជាស្តង់ដារមួយថ្មី ដើម្បីឲ្យប្រជាកសិករទទួលបាននូវតម្លៃស្រូវមួយដែលល្អ ហើយថ្លៃ។ជុំវិញបញ្ហាស្រូវអង្ករនេះដែរ រដ្ឋាភិបាលកម្ពុជា បានបន្តលើកទឹកចិត្តដល់ប្រជាកសិករឲ្យងាកមកដាំពូជយុទ្ធសាស្រ្តរបស់កម្ពុជាដែលជាអង្ករក្រអូប ក៏ដូចជាការធ្វើផលិតកម្មកសិកម្មតាមកិច្ចសន្យា ពីព្រោះដើម្បីធានាថា មានភាពច្បាស់លាស់ តម្លៃល្អ ទទួលបានព័ត៌មានមុននឹងធ្វើការសម្រេចចិត្តដាំ ហើយអ្វីដែលចង់លើកទឹកចិត្តបន្ថែមទៀតនោះ គឺការចងក្រងទៅជាសហគមន៍កសិកម្មទំនើប ដើម្បីជួយឱ្យកសិករទទួលបានផលចំណេញច្រើន តាមរយៈការកាត់បន្ថយថ្លៃដើមផលិត, ការទទួលបានទុនកម្ចីក្នុងអត្រាការប្រាក់ទាប, ការទទួលបានទីផ្សារ និងការគាំទ្រផ្នែកបច្ចេកទេសជាដើម។ សូមជំរាបជូនទៀតថា សហគមន៍កសិកម្មទំនើប បង្កើតឡើងដោយក្រសួងកសិកម្ម រុក្ខាប្រមាញ់ និងនេសាទ ក្នុងគោលបំណង ដើម្បីប្រែក្លាយវិស័យកសិកម្មកម្ពុជា ពីលក្ខណៈគ្រួសារឱ្យទៅជាសហគ្រាស សេដ្ឋកិច្ចកសិកម្មដ៏រឹងមាំ មានសមាហរណកម្មខ្ពស់ មានសេដ្ឋកិច្ចមាត្រដ្ឋាន និងមានសមត្ថភាពប្រកួតប្រជែងទាំងបរិមាណ តម្លៃ និងគុណភាព។ ចំពោះលក្ខខណ្ឌក្នុងការចូលជាសហគមន៍កសិកម្មទំនើប គឺត្រូវមានសមាជិកចាប់ពី៥០គ្រួសារឡើង។ ដោយឡែក ចំពោះ ការចុះបញ្ចី, ការផ្សព្វផ្សាយ, ការៀបចំធ្វើផែនការអាជីវកម្ម និងនីតិវិធីផ្សេងៗទៀត ក្រសួងកសិកម្ម ធានាសម្របសម្រួលជូន៕ អត្ថបទ៖ ឈិត បូរ៉ាវី

វិនិយោគិនថៃទទួលបានជោគជ័យលើការធ្វើអាជីវកម្ម ក្រោមបរិយាកាសអំណោយផលនៃកម្ពុជា

ប្រធានសមាគមពាណិជ្ជកម្មថៃ ថ្លែងថា វិនិយោគិនថៃដែលរកស៊ីទទួលទាន បានកំពុងទទួលជោគជ័យនៅលើការអាជីវកម្មរបស់ ខ្លួន ក្រោមបរិយាកាសអំណោយផលនៃព្រះរាជាណាចក្រកម្ពុជា និងបានចូលរួមចំណែកដល់ការស្តារឡើងវិញនៃការធ្វើពាណិជ្ជកម្មទ្វេ ភាគី និងភាពរីកចម្រើននៃសេដ្ឋកិច្ចប្រទេសទាំងពីរ។លោកស្រី ជីរ៉ាណាន់ វង្សមង្គល ប្រធានសមាគមពាណិជ្ជកម្មថៃប្រចាំនៅកម្ពុជា លើកឡើងនៅក្នុងកម្មវិធីជួបជុំពិសារអាហារ សាមគ្គី លើកទី១ ក្នុងឆ្នាំ ២០២៥ នៅចុងសប្តាហ៍កន្លងមកថា កម្ពុជា-ថៃ គឺជាប្រទេសដែលមានកិច្ចសហប្រតិបត្តិការទាំងផ្នែកការទូត ពាណិជ្ជកម្ម និងការវិនិយោគ ចំណែកការធ្វើពាណិជ្ជកម្មទ្វេរភាគីកម្ពុជា-ថៃ នៅមុនវិបត្តិជំងឺកូវីដ-១៩ ការធ្វើពាណិជ្ជកម្មប្រទេស ទាំងពីរ បានបន្តកំណើនហក់ឡើងគួរជាទីកត់សម្គាល់ ហើយបច្ចុប្បន្ននេះ, ការធ្វើពាណិជ្ជកម្មទ្វេរភាគី ក៏បានកំពុងបន្តងើបឡើង ប៉ុន្តែ នៅក្នុងកម្រិតទាបនៅឡើយ។ ដោយឡែកការជួបជុំគ្នានេះ, សមាគមថៃបានបង្កើតកម្មវិធីនេះជាច្រើនលើករួចមកហើយ ដើម្បីជួបជុំរវាង វិនិយោគិនដែល កំពុងធ្វើអាជីវកម្ម និងពាណិជ្ជកម្មថៃនៅលើទឹកដីកម្ពុជា ដើម្បីជួបសន្ទនាអំពីសុខទុក្ខ ការចែករំលែក ការផ្លាស់ប្តូរបទពិសោធន៍គ្នាទៅ វិញទៅមក នៅលើការធ្វើអាជីវកម្ម និងពាណិជ្ជកម្មជាដើម, ដើម្បីជំរុញការធ្វើអាជីវកម្មរបស់ពួកគាត់ឱ្យទទួលបានជោគជ័យកាន់តែ ខ្លាំងក្លា នៅក្រោមបរិយាកាសអំណោយផល និងការលើកទឹកចិត្តគ្រប់បែបយ៉ាងរបស់រាជរដ្ឋាភិបាលកម្ពុជា និងជាផ្នែកមួយនៃការចូល រួមចំណែកការស្តារឡើងវិញនៃការធ្វើពាណិជ្ជកម្មទ្វេភាគី និងដើម្បីភាគរីកចម្រើននៃសេដ្ឋកិច្ចនៃប្រទេសទាំងពីរ។ទាក់ទិនការធ្វើអាជីវកម្មវិញ, លោកស្រី ជីរ៉ាណាន់ វង្សមង្គល លើកឡើងបន្ថែមថា ស្របពេលស្ថានភាពពិភពលោកបង្ហាញនូវ សញ្ញាណវិជ្ជាមានជាបណ្តើរៗ និងស្របស្ថានភាពសេដ្ឋកិច្ចកម្ពុជាកំពុងរើបឡើងវិញ, ធុរកិច្ចថៃនៅតែបន្តសម្លឹងអំពីឱកាសវិនិយោគ របស់ខ្លួននៅកម្ពុជា ដោយបានហូរចូលមកជាបន្តយបន្ទាប់ តាមរយៈការជួយគៀងគរបស់សមាគម ចំពោះក្រុមធុរកិច្ច និងវិនិយោគិន ពីប្រទេសថៃផ្សេងៗ មកសិក្សាស្វែងពីបរិយាកាសវិនិយោគនៅកម្ពុជា ដើម្បីមកវិនិយោគឲ្យបានកាន់តែច្រើន ជំរុញពាណិជ្ជកម្មទ្វេភាគី នៃប្រទេសទាំងពីរ ឲ្យមានកំណើនកាន់តែល្អប្រសើរឡើងវិញ៕ អត្ថបទ៖ សុន រ៉ាឌី

សមាគមក្នុងស្រុកជំរុញឲ្យម្ចាស់ SME ដើរឲ្យទាន់បច្ចេកវិទ្យាឌីជីថល ដើម្បីភាពរីកចម្រើនលើអាជីវកម្ម

ប្រធានសមាគមសហគ្រិនវីម៉ូនៅកម្ពុជា បានជំរុញឲ្យម្ចាស់អាជីវកម្មទាំងតូច និងមធ្យមទាំងអស់ ត្រូវតែដើរឲ្យទាន់នូវសម័យកាល នៃបច្ចេកវិទ្យាឌីជីថល ដើម្បីពង្រឹងនិងពង្រីកអាជីវកម្មរបស់ខ្លួន និងធ្វើយ៉ាងណាកសាងប្រេនឌីងឲ្យខ្លួនឯង ដើម្បីឲ្យអតិថិជនកាន់តែ ស្គាល់ពីសេវាកម្មរបស់យើង។លោក សួន ម៉ិ សមាគមសហគ្រិនវីម៉ូនៅកម្ពុជា លើកឡើងនៅក្នុងជំនួបសហគ្រិន ផ្គូផ្គងអាជីវកម្មសម្រាប់សហគ្រាសតូច និងមធ្យមនៅកម្ពុជា ក្រោមប្រធានបទ៖ សហគ្រិនកសាងប្រេនឌីង ក្នុងសម័យឌីជីថលសម្រាប់សហគ្រាសធុនតូច និងមធ្យមនៅ កម្ពុជា២០២៥ នេះថា ជុំវិញការរៀបចំជំនួបសហគ្រិន ការផ្គូផ្គងអាជីវកម្ម និងកម្មវិធីផ្សេងៗទៀត កន្លងមកសមាគមបានជួយម្ចាស់ អាជីវកម្មជាច្រើនដូចជា តាមរយៈការជួយគ្នាទៅវិញទៅមក ការផ្លាស់ប្តូរចំណេះដឹង និងបទពិសោធន៍ល្អនៅលើការធ្វើអាជីវកម្ម ពិសេសជាងនេះទៀត គឺការផ្លាស់ប្តូរឥរិយាបទលើការធ្វើអាជីវកម្មតាមទម្លាប់ មកចាប់យកការធ្វើអាជីកម្មតាមស្តង់ដារ និងផលិតដើម្បី ផ្គត់ផ្គង់សម្រាប់ទីផ្សារក្នុងស្រុក និងការនាំចេញជាដើម។លោកបន្តថា សម្រាប់នៅក្នុងឆ្នាំ២០២៥ នេះ សមាគមបានដាក់ចេញនូវផែនការជាច្រើន ដើម្បីជួយលើកកម្ពស់សហគ្រិនខ្មែរ ដែលកំពុងរកស៊ីទទួលទាន ជាក់ស្តែងជំនួបសហគ្រិននៅពេលនេះ គឺចង់ឱ្យម្ចាស់អាជីវកម្មកសាងប្រេនឌីង ប្រកបដោយប្រសិទ្ធភាព របស់ពួកគាត់ ការទទួលបានទំនាក់ទំនងកាន់តែច្រើន និងការពង្រីកឱកាសនៅក្នុងការធ្វើអាជីវកម្ម ជាពិសេសជំនួបជាមួយដៃគូជាតិ និងអន្តរជាតិ និងការបង្ហាញផ្លូវជំរុញដើរតាមគោលនយោបាយរបស់រាជរដ្ឋាភិបាល ដែលបានកំពុងខិតខំ និងលើកកម្ពស់ដល់វិស័យ ឯកជន និងបានចាត់ទុកវិស័យឯកជនជាដៃគូរដែលមិនអាចខ្វះបាន។ឯកឧត្តម ង៉ូវ ប៉ូរីណា រដ្ឋលេខាធិការក្រសួងបរិស្ថាន បានថ្លែងនូវការកោតសរសើរ ចំពោះសមាគមសហគ្រិនវីម៉ូនៅកម្ពុជា ដែលបាន បន្តបេសកម្មរបស់ខ្លួន ជួយដល់សហគ្រិន ដើម្បីពង្រីងនិងពង្រីកចំណេះដឹងថ្មីៗបន្ថែម ជាពិសេសការផ្សព្វផ្សាយផលិតផល និងការ ស្វែងរកដៃគូរអាជីវកម្ម ដើម្បីអាចតោងថ្ពក់ចាប់ដៃគូពាណិជ្ជកម្មផ្សេងៗ និងការផ្គត់ផ្គង់ផលិតផលចូលទីផ្សារឱ្យបានច្រើន។ ជុំវិញការ ធ្វើអាជីវកម្មនេះដែរ, ឯកឧត្តម ក៏បានអំពាវនាដល់ម្ចាស់អាជីវកម្មទាំង ដែលផលិតនិងផ្គត់ផ្គង់ទំនិញផ្សេងៗ ក្រៅពីការរគិតគូរ ប្រយោជន៍ខ្លួន សូមគិតគូរដល់បរិស្ថាន ព្រោះបរិស្ថានគឺជាតម្រូវការគ្រប់គ្នា៕ អត្ថបទ៖ សុន រ៉ាឌី

ថ្នាក់ដឹកនាំអន្តរក្រសួងបើកកិច្ចពិភាក្សាសេចក្តីព្រាងការរៀបចំ និងការប្រព្រឹត្តទៅរបស់ក្រសួងកសិកម្ម

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នារសៀលថ្ងៃទី៧ ខែកុម្ភៈ ឆ្នាំ២០២៥បានអញ្ជើញចូលរួមកិច្ចប្រជុំពិភាក្សាអន្តរក្រសួងលើសេចក្តីព្រាងអនុក្រឹត្យស្តីពី ការរៀបចំនិងការប្រព្រឹត្តទៅរបស់ក្រសួងកសិកម្ម រុក្ខាប្រមាញ់ និងនេសាទ នៅសាលាភូមិន្ទរដ្ឋបាល។កិច្ចប្រជុំពិភាក្សានេះ ធ្វើឡើងក្រោមការសម្របសម្រួលពីឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងមានការអញ្ជើញចូលរួមពីថ្នាក់ដឹកនាំក្រសួងអភិវឌ្ឍន៍ជនបទ ក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រសួងបរិស្ថាន និងក្រសួងធនធានទឹក និងឧតុនិយម។កិច្ចប្រជុំនេះធ្វើឡើងក្នុងគោលបំណងពិនិត្យ និងផ្តល់យោបល់រៀបចំមុខងារ រចនាសម្ព័ន្ធ លើសេចក្តីព្រាងអនុក្រឹត្យស្តីពី ការរៀបចំនិងការប្រព្រឹត្តទៅរបស់ក្រសួងកសិកម្ម រុក្ខាប្រមាញ់ និងនេសាទ ឱ្យបានសមស្របជាមួយនឹងគោលដៅរួមរបស់រាជរដ្ឋាភិបាល។នៅចំពោះមុខអង្គពិធី ឯកឧត្តមរដ្ឋមន្ត្រី ឌិត ទីណា បានលើកឡើងថា ក្រសួងកសិកម្មបានដាក់ចេញការងារស្នូលចំនួន ១១ចំណុច លើការវិភាគមុខងាររួមមាន ១)វិធានការសេដ្ឋកិច្ច ក្នុងការដាក់ពង្រាយមន្ត្រីកសិកម្មឃុំ ការសម្រួលខ្សែច្រវាក់តម្លៃរក្សាស្ថិរភាពថ្លៃ និងតម្រង់ទិសដល់កសិករ ២)ការផ្តល់បច្ចេកទេសកសិកម្ម និងការប្រមូលផល ៣)តម្រង់ទិសសម្រួលខ្សែច្រវាក់តម្លៃ ៤)ការស្រាវជ្រាវធាតុចូលកសិកម្ម ៥)ការគ្រប់គ្រងធាតុចូលកសិកម្ម ៦)ការគ្រប់គ្រងអនាម័យ និងភូតគាមអនាម័យ ៧)ការផ្តល់សេវាពិសោធន៍ធាតុចូលកសិកម្មផ្សេងៗ ៨)ការផ្តល់បច្ចេកទេសកែច្នៃបឋម ៩)ការគ្រប់គ្រងធនធានធម្មជាតិកសិកម្ម រួមមានធនធានដី ព្រៃឈើ សត្វព្រៃ និងបរិស្ថាន ១០)ការស្រាវជ្រាវ និងបណ្តុះបណ្តាលអភិវឌ្ឍន៍ធនធានមនុស្ស និងជំនាញវិជ្ជាជីវៈកសិកម្ម និង១១)ការគ្រប់គ្រងផលិតកម្មដៃគូ និងវិស័យឯកជន ។ឯកឧត្តមរដ្ឋមន្ត្រី បានបង្ហាញសុទិដ្ឋិនិយមខ្ពស់ ចំពោះសេចក្តីព្រាងអនុក្រឹត្យនេះនឹងចេញជាផ្លូវការ ហេីយក្រសួងកសិកម្ម រុក្ខាប្រមាញ់ និងនេសាទ ប្តេជ្ញាក្នុងការអនុវត្តឱ្យបានម៉ឺងម៉ាត់ ក្នុងស្មារតីទទួលខុសត្រូវខ្ពស់ សំដៅលើកស្ទួយវិស័យកសិកម្មឱ្យកាន់តែរីកចម្រើន និងអភិវឌ្ឍទៅមុខបន្ថែមទៀត និងជាគំរូមួយដ៏ល្អសម្រាប់ក្រសួងស្ថាប័នពាក់ព័ន្ធ៕

ឯកឧត្ដម គួច ចំរើន ចុះពិនិត្យទីតាំងកាបូមទឹកជួយសង្គ្រោះស្រូវប្រាំងរបស់ប្រជាកសិករ នៅស្រុកខ្សាច់កណ្ដាល

ខេត្តកណ្ដាល៖ ព្រឹកថ្ងៃទី០៦ ខែកុម្ភៈ ឆ្នាំ២០២៥ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត បានដឹកនាំមន្ទីរជំនាញពាក់ព័ន្ធ និងអាជ្ញាធរស្រុកខ្សាច់កណ្ដាល ចុះពិនិត្យការបូមទឹកជួយសង្គ្រោះស្រូវប្រាំងរបស់ប្រជាកសិករ និងបន្តពិនិត្យប្រឡាយទឹកដែលត្រូវស្ដារ នៅឃុំជ័យធំ និងឃុំរកាជន្លឹង ស្រុកខ្សាច់កណ្ដាល ខេត្តកណ្ដាល ព្រមទាំងជួបសំណេះសំណាល ជាមួយប្រជាកសិករ ដែលប្រឈមក្នុងការខ្វះខាតទឹកស្រោចស្រពស្រូវប្រាំងផងដែរ។ ក្នុងឱកាសចុះពិនិត្យនេះដែរ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល និងក្រុមការងារ បានធ្វើការចុះពិនិត្យនៅតាមប្រឡាយទឹកនានានៅក្នុងឃុំ ដែលជាប្រភពដ៏សំខាន់ក្នុងការរុញច្រើនទឹក អោយដល់ស្រែរបស់ប្រជាកសិករ និងបន្តពិនិត្យស្រូវប្រាំងរបស់ប្រជាកសិករ ដែលកន្លងមកជួបការប្រឈមនឹងការខ្វះខាតទឹក ជាក់ស្ដែងបន្ទាប់ពីបានទទួលការអន្តរាគមន៍ដោយយល់ចិត្តទុកដាក់ពីរាជរដ្ឋាភិបាល រដ្ឋបាលខេត្តកណ្ដាល និងអាជ្ញាធរពាក់ព័ន្ធគ្រប់លំដាប់ថ្នាក់ ជាក់ស្ដែងនៅតាមប្រឡាយនានា មានទឹកសម្រាប់ឱ្យប្រជាកសិករបូមស្រោចស្រពស្រែប្រាំងរបស់ពួកគាត់ក្នុងរដូវប្រាំងនេះ។ ក្នុងឱកាសចុះពិនិត្យនេះដែរ ឯកឧត្តមអភិបាលខេត្ត មានប្រសាសន៍ថា៖ បញ្ហាខ្វះទឹកសម្រាប់ស្រោចស្រពស្រូវប្រាំងរបស់បងប្អូនប្រជាកសិករនៅពេលនេះ សម្ដេចមហាបវរធិបតី ហ៊ុន ម៉ាណែត មានការយកចិត្តទុកដាក់ខ្ពស់ ព្រមទាំងបានចាត់តាំងដល់អាជ្ញាធរមូលដ្ឋានគ្រប់លំដាប់ថ្នាក់ ចុះពិនិត្យ តាមដាន និងដោះស្រាយជូនប្រជាពលរដ្ឋឱ្យបានទាន់ពេលវេលា និងមានប្រសិទ្ធភាពខ្ពស់។ ជាមួយគ្នានេះដែរ ឯកឧត្តមអភិបាលខេត្ត បានជម្រាបជូនបងប្អូនប្រជាពលរដ្ឋ ដែលជាប្រជាកសិករកំពុងប្រឈមនឹងការខ្វះខាតទឹក ថា៖ សម្រាប់ស្រូវប្រាំងរបស់បងប្អូនប្រជាពលរដ្ឋដែលកំពុងប្រឈមនេះ អាជ្ញាធរបានធ្វើការដោះស្រាយជូនអោយមានទឹកគ្រប់គ្រាន់សម្រាប់ការស្រោចស្រព។ ទន្ទឹមនឹងនេះ ឯកឧត្តមអភិបាលខេត្ត បានសំណូមពរដល់ប្រជាកសិករទាំងអស់ សូមឱ្យធ្វើស្រែតែម្តង ព្រោះបើសិនជាបងប្អូនប្រជាពលរដ្ឋបន្តធ្វើនៅលើកទី២ គឺអាចប្រឈមនឹងការខ្វះទឹកប្រើប្រាស់តែម្តង មិនថាតែស្រោចស្រពដំណាំទេ សូម្បីតែមនុស្ស និងសត្វក៏មិនមានទឹកសម្រាប់ ផឹក និងបរិភោគផងដែរ។ ជាមួយគ្នានេះផងដែរ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល បានណែនាំដល់អាជ្ញាធរពាក់ព័ន្ធគ្រប់លំដាប់ថ្នាក់ សូមពិនិត្យ និងតាមដានជាប្រចាំចំពោះបញ្ហាទឹកស្រោចស្រពជូនប្រជាកសិករ ធ្វើយ៉ាងណាឱ្យស្រូវរបស់ប្រជាកសិករមានទឹកគ្រប់គ្រាន់សម្រាប់ការស្រោចស្រាព ហើយមិនត្រូវឱ្យស្រូវរបស់ប្រជាកសិករខូចខាតដោយការខ្វះខាតទឹកស្រោចស្រពនៅក្នុងភូមិសាស្ត្រខេត្តកណ្ដាលឡើយ។ លោក ប៊ុនទួន ស៊ីម៉ូណា ប្រធានមន្ទីរកសិកម្មរុក្ខាប្រមាញ់ និងនេសាទខេត្តកណ្ដាល បានឱដឹងថា៖ ទូទាំងខេត្តកណ្ដាលមានផ្ទៃដីស្រូវប្រាំងរបស់ប្រជាកសិករប្រមាណជាង៦ពាន់ហិតា ដែលប្រឈមក្នុងការខ្វះខាតទឹកស្រោចស្រព។ ក្នុងនោះស្រុកខ្សាច់កណ្ដាល មានផ្ទៃដីស្រែប្រាំងប្រមាណ ជាង៣រយហិចតា ដែលប្រឈមក្នុងការខ្វះការទឹកស្រោចស្រព។ លោកប្រធានមន្ទីរបន្ថែមថា៖ ដោយមានការយកចិត្តទុកដាក់ពីប្រមុខរាជរដ្ឋាភិបាល រដ្ឋបាលខេត្តកណ្ដាល និងអាជ្ញាធរគ្រប់លំដាប់ថ្នាក់ បានធ្វើការចុះអន្តរាគមន៍បូមទឹកសង្គ្រោះស្រូវប្រាំងរបស់ប្រជាពលរដ្ឋ ដោយគិតមកដល់ពេលនេះ មិនទាន់មានស្រូវប្រាំងរបស់ប្រជាពលរដ្ឋមួយគ្រួសារណាក្នុងខេត្តកណ្ដាល រងការខូចខាតដោយខ្វះខាតទឹកស្រោចស្របឡើយ។

CDC អនុម័តគម្រោងវិនិយោគចំនួន ៦៨ គម្រោង មានទុនប្រមាណ ៧៤៨ លានដុល្លារអាមេរិក

ក្រុមប្រឹក្សាអភិវឌ្ឍន៍កម្ពុជា នៅក្នុងខែមករា ឆ្នាំ២០២៥នេះ បានអនុម័តគម្រោងវិនិយោគសរុបចំនួន ៦៨ គម្រោង មានទុនវិនិយោគ ប្រមាណ ៧៤៨ លានដុល្លារអាមេរិក ក្នុងនោះគម្រោងវិនិយោគថ្មីមានចំនួន ៦៤ គម្រោង និងគម្រោងពង្រីកផលិតកម្មចំនួន ៤ គម្រោង។ក្រុមប្រឹក្សាអភិវឌ្ឍន៍កម្ពុជា ចេញសេចក្តីប្រកាសព័ត៌មាន ដែលបានអនុម័ត ក្នុងខែ មករា ឆ្នាំ ២០២៥ មានគម្រោងវិនិយោគ សរុបចំនួន ៦៨ គម្រោង មានទុនវិនិយោគសរុបប្រមាណ ៧៤៨ លានដុល្លារអាមេរិក និងអាចបង្កើតការងារបានប្រមាណជិត ៤៦ ពាន់កន្លែង, ចំពោះគម្រោងវិនិយោគទាំងអស់នេះ ក្នុងនោះគម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេស មាន ចំនួន ៣៩ គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេស មានចំនួន ២៩ គម្រោង។ជុំវិញកម្ពុជាទទួលបានខាងលើនេះ បើប្រៀបធៀបនឹងខែមករា ឆ្នាំ២០២៤ ដែលបានអនុម័តដោយក្រុមប្រឹក្សាអភិវឌ្ឍន៍កម្ពុជា ទទួលបានគម្រោងវិនិយោគសរុបចំនួន ៣២ គម្រោង មានទុនវិនិយោគសរុបប្រមាណ ១៨៧ លានដុល្លារអាមេរិកប៉ុណ្ណោះ ក្នុងនោះ បើធៀបនិងខែមករា ឆ្នាំ២០២៥ នេះ ឃើញថា បានកើនឡើងចំនួន ៣៦ គម្រោង ខណៈទុនវិនិយោគក៏បានកើនឡើងប្រមាណ ៥៦១ លានដុល្លារអាមេរិក ស្មើនឹងប្រមាណ ៣០០ ភាគរយ។ គម្រោងវិនិយោគទាំង ៦៨ គម្រោង សុទ្ធសឹងជាការវិនិយោគក្នុងវិស័យ ឧស្សាហកម្មទាំងអស់។ចំណែកគម្រោងក្រៅតំបន់សេដ្ឋកិច្ចពិសេស ដែលមានភាពលេចធ្លោក្នុងខែ មករា រួមមាន៖ គម្រោងវិនិយោគបង្កើតរោងចក្រ កែច្នៃលោហៈ មានទុនវិនិយោគចំនួន ៣៤ លានដុល្លារ មានទីតាំងនៅខេត្តបន្ទាយមានជ័យ, គម្រោងវិនិយោគបង្កើតរោងចក្រផលិត ផលិតផលគ្រប់ប្រភេទពីប្លាស្ទិក មានទុន ១៥ លានដុល្លារ វិនិយោគនៅខេត្តកំពង់ស្ពឺ, គម្រោងវិនិយោគបង្កើតរោងចក្រឧបករណ៍ សម្រាប់ក្នុងយានដ្ឋាន ចំនួន ១២ លានដុល្លារ នៅខេត្តកំពង់ស្ពឺ និងគម្រោងវិនិយោគបង្កើតរោងចក្រផលិតសម្ភារៈជាង មានទុន ១០ លានដុល្លារ មានទីតាំងនីខេត្តស្វាយរៀង។ដោយឡែកនៅក្រៅតំបន់សេដ្ឋកិច្ចពិសេសរួមមាន៖ គម្រោងវិនិយោគបង្កើតរោងចក្រផលិតសំបកកង់គ្រប់ប្រភេទ មានទុន ១៩៥ លានដុល្លារ វិនិយោគនៅតំបន់សេដ្ឋកិច្ចពិសេស ស៊ីន បាវិត ខេត្តស្វាយរៀង, គម្រោងបន្ថែមទុនវិនិយោគតំបន់សេដ្ឋកិច្ចពិសេស កោះកុង ចេជាង ខេត្តកោះកុង មានទុនវិនិយោគ ៥០ លានដុល្លារ, គម្រោងបង្កើតរោងចក្រផ្គុំនិងតម្លើងរថយន្ត នៅតំបន់សេដ្ឋកិច្ច ពិសេស ខេត្តព្រះសីហនុ មានទុន ៣២ លានដុល្លារ, គម្រោងបង្កើតរោងចក្រកែច្នៃអាលុយមីញ៉ូម នៅតំបន់សេដ្ឋកិច្ចពិសេស ហាយ ផាក មានទុន ១៦ លានដុល្លារ និងគម្រោងវិនិយោគបង្កើតរោងចក្រផលិតសម្ភារៈប្រើប្រាស់ក្នុងនិងក្រៅផ្ទះ មានទុន ១៥ លានដុល្លារ នៅតំបន់សេដ្ឋកិច្ចពិសេស ហាយផាកផងដែរ៕ អត្ថបទ៖ ស៊ុន រ៉ាឌី

កម្ពុជាដាក់ចេញយុទ្ធសាស្ត្រកៀរគរចំណូល នៃការទំនើបរដ្ឋបាលសារពើពន្ធ ដើម្បីឆ្លើយតបការអភិវឌ្ឍ

យុទ្ធសាស្ត្រកៀរគរចំណូលរបស់រាជរដ្ឋាភិបាលនីតិកាលទី៧ នៃរដ្ឋសភា, មានចក្ខុវិស័យចូលរួមប្រែក្លាយប្រព័ន្ធចំណូលរដ្ឋឱ្យកាន់ តែទំនើប មានប្រសិទ្ធភាពខ្ពស់ និងប្រកបដោយសុភបរមា ដែលអាចឆ្លើយតបទៅនឹងតម្រូវការអភិវឌ្ឍ និងការវិវឌ្ឍនៃរចនាសម្ព័ន្ធ សង្គម-សេដ្ឋកិច្ចកម្ពុជា។រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា, រាជរដ្ឋាភិបាលបានដាក់ចេញនូវយុទ្ធសាស្ត្របញ្ចកោណ-ដំណាក់កាលទី១ ដើម្បីធានាបាននូវកំណើន ការងារ សមធម៌ ប្រសិទ្ធភាពនិងចីរភាព សំដៅបន្តរក្សាឱ្យបានរឹងមាំនូវចលនការនៃសុខសន្តិភាព និងជំរុញសន្ទុះនៃការអភិវឌ្ឍប្រទេស ជាតិក្នុងរយៈពេលមធ្យម និងវែងទៅមុខ តាមរយៈការកែទម្រង់មុតស្រួចលើគ្រប់វិស័យ ឆ្ពោះទៅសម្រេចបាននូវចក្ខុវិស័យរយៈពេល វែងរបស់កម្ពុជា ពោលគឺក្លាយជាប្រទេសដែលមានចំណូលខ្ពស់នៅឆ្នាំ២០៥០។ក្នុងន័យនេះ, រាជរដ្ឋាភិបាលកម្ពុជាបានសម្រេចដាក់ចេញនូវយុទ្ធសាស្តកៀរគរចំណូល របស់រាជរដ្ឋាភិបាលនីតិកាលទី ៧ នៃរដ្ឋសភា ដោយបានកំណត់ចក្ខុវិស័យ គោលបំណង គោលដៅ និងអភិក្រមច្បាស់លាស់ ស្របជាមួយនឹងការដាក់ចេញនូវវិធានការ គន្លឹះ សម្រាប់ការធ្វើទំនើបភាវូបនីយកម្មរដ្ឋបាលសារពើពន្ធ និងរដ្ឋបាលចំណូលមិនមែនសារពើពន្ធ និងការធ្វើវិចារណកម្មគោល- នយោបាយពន្ធដោយកំណត់នូវសូចនាករសមិទ្ធកម្ម និងសកម្មភាពគន្លឹះសម្រាប់ការតាមដាននិងវាយតម្លៃ ដើម្បីធានាឱ្យបាននូវ ប្រសិទ្ធភាព និងស័ក្ដិសិទ្ធិភាពក្នុងការអនុវត្តយុទ្ធសាស្ត្រនេះ។ ក្រៅពីនេះ, យុទ្ធសាស្ត្រកៀរគរចំណូលរបស់រាជរដ្ឋាភិបាលនីតិកាលទី៧ នៃរដ្ឋសភា ក៏មានចក្ខុវិស័យចូលរួមប្រែក្លាយប្រព័ន្ធ ចំណូលរដ្ឋឱ្យកាន់តែទំនើប មានប្រសិទ្ធភាពខ្ពស់ និងប្រកបដោយសុភបរមា ដែលអាចឆ្លើយតបទៅនឹងតម្រូវការអភិវឌ្ឍ និងការវិវឌ្ឍ នៃរចនាសម្ព័ន្ធសង្គម-សេដ្ឋកិច្ចកម្ពុជា។ ក្នុងន័យនេះ យុទ្ធសាស្រ្តកៀរគរចំណូល នឹងក្លាយជាឧបករណ៍គោលនយោបាយមួយយ៉ាង សំខាន់ ក្នុងការកៀរគរចំណូលរដ្ឋប្រកបដោយប្រសិទ្ធភាព និងស័ក្ដិសិទ្ធិភាពខ្ពស់ តាមរយៈការដាក់ចេញនូវគោលបំណងនិងគោលដៅ ព្រមទាំងវិធានការមុតស្រួចនានា សម្រាប់អនុវត្តក្នុងរយៈពេល ៥ឆ្នាំ នៃអាណត្តិរាជរដ្ឋាភិបាលនីតិកាលទី៧ នៃរដ្ឋសភា។ចំណែកគោលបំណង និងគោលដៅ, យុទ្ធសាស្ត្រកៀរគរចំណូលនេះ មានគោលបំណង ពង្រឹងការប្រមូលចំណូលឱ្យកាន់តែ ប្រសើរ តាមរយៈការបន្តធ្វើទំនើបកម្មរដ្ឋបាល និងគោលនយោបាយសារពើពន្ធ និងមិនមែនសារពើពន្ធ ដោយថ្លឹងថ្លែង បន្តរក្សាឱ្យបាន នូវចលនការ និងសន្ទុះនៃសេដ្ឋកិច្ច ផ្ដល់នូវភាពត្រឹមត្រូវ តម្លាភាព និងភាពយុត្តិធម៌ដល់អ្នកជាប់ពន្ធ ដោយផ្តោតលើចំណូលដែលជា សក្តានុពល និងមិនបង្កឱ្យមានវិការភាពសេដ្ឋកិច្ច។ ស្របនឹងគោលបំណងខាងលើ យុទ្ធសាស្ត្រនេះមានគោលដៅចំនួន ៣ ដែលមាន ចរិតសុទិដ្ឋិនិយមប្រកបដោយភាពច្បាស់លាស់ និងការប្ដេជ្ញាខ្ពស់របស់រាជរដ្ឋាភិបាលរួមមាន៖ រក្សា និងជំរុញចំណូលចរន្តឱ្យបានក្នុង រង្វង់ ១៦% នៃ ផ.ស.ស នៅពេលកំណើនសេដ្ឋកិច្ចត្រឡប់មកកាន់គន្លងសក្តានុពលវិញ ពោលគឺ មានកំណើនពិន្ទុភាគរយជាមធ្យម ប្រចាំឆ្នាំប្រមាណ ០,៤៣ ឬ កំណើនមធ្យមប្រចាំឆ្នាំ ១២,៥% (២០២៥-២០២៨) ដែលក្នុងនោះចំណូលសារពើពន្ធ នឹងត្រូវកើន ឡើងដល់ក្នុងរង្វង់ ១៤% នៃ ផ.ស.ស., ធានាឱ្យបាននូវភាពច្បាស់លាស់ និងភាពត្រឹមត្រូវនៃប្រព័ន្ធពន្ធ និងភាពអាចព្យាករបាននៃការ ផ្លាស់ប្តូរ, និងបន្តពង្រីកវិសាលភាព និងពង្រឹងគុណភាពប្រព័ន្ធចំណូលមិនមែនសារពើពន្ធ៕ អត្ថបទ៖ សុន រ៉ាឌី

សមាគមមីក្រូហិរញ្ញវត្ថុកម្ពុជា ប្តេជ្ញាគាំពារ និងការបន្តផ្តល់សេវាដល់ពលរដ្ឋដែលមានតម្រូវការ

សមាគមមីក្រូហិរញ្ញវត្ថុកម្ពុជា (CMA) ប្តេជ្ញាសហការជាមួយដៃគូជាតិ និងអន្តរជាតិ ដើម្បីគាំពារប្រជាពលរដ្ឋដែលងាយរងគ្រោះ ការបន្តផ្តល់សេវាដែលមានតម្រូវការ និងការរក្សាឱ្យបាននូវតួនាទីដ៏សំខាន់នៃវិស័យមីក្រូហិរញ្ញវត្ថុ ដើម្បីជំរុញកំណើនសេដ្ឋកិច្ច។លោកជំទាវ ឌិត នីតា ប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា លើកឡើងនៅក្នុងកិច្ចពិគ្រោះយោបល់ ដើម្បីដោះស្រាយបញ្ហាប្រឈមសំខាន់ៗក្នុងវិស័យមីក្រូហិរញ្ញវត្ថុនៅកម្ពុជា ជាមួយដៃគូជាតិ-អន្តរជាតិ នៅថ្ងៃទី៥ ខែកុម្ភៈ ឆ្នាំ២០២៥ នេះថា សមាគមមីក្រូហិរញ្ញវត្ថុកម្ពុជា ប្តេជ្ញាធ្វើការជិតស្និតជាមួយដៃគូ ដើម្បីធានាឱ្យបានថា វិស័យមីក្រូហិរញ្ញវត្ថុនៅកម្ពុជា នឹងនៅតែ បន្តផ្តល់សេវាដល់ពលរដ្ឋដែលមានតម្រូវការ។ បញ្ហាប្រឈមនេះ, សមាគមក៏បានដឹងអ្នកខ្ចីប្រាក់កំពុងជួបប្រទះ ហើយសមាគមបាន កំពុងខិតខំប្រឹងប្រែងយ៉ាងសកម្ម ដើម្បីកែលម្អប្រតិបត្តិការផ្តល់ឥណទាន និងពង្រឹងកិច្ចគាំពារអតិថិជន។ កិច្ចខិតខំប្រឹងប្រែងនេះ មាន គោលបំណងលើកកម្ពស់អតិថិជន អាចមានលទ្ធភាពធ្វើការសម្រេចចិត្តប្រកបដោយការទទួលបានព័ត៌មានច្បាស់លាស់ និងកិច្ច ការពារសិទ្ធិរបស់ពួកគាត់។បច្ចុប្បន្នសមាគមមីក្រូហិរញ្ញវត្ថុកម្ពុជា កំពុងធ្វើកិច្ចការសំខាន់ៗមួយចំនួន រួមទាំងការពង្រឹងស្តង់ដារប្រតិបត្តិការឥណទាន ផងដែរ។ ចំណែកកិច្ចសហការជាមួយធនាគារជាតិនៃកម្ពុជា និងអង្គការសហប្រជាជាតិ សមាគមកំពុងគាំទ្រដល់ការធ្វើកំណែ ទម្រង់នានា ដើម្បីធានាថា ការផ្តល់ឥណទានត្រូវបានធ្វើឡើងដោយផ្អែកលើសមត្ថភាពសងត្រលប់របស់អតិថិជន ជាជាងការពឹងផ្អែក តែលើទ្រព្យធានា។ វិធានការដ៏សំខាន់មួយទៀត គឺហាមឃាត់ការប្រើប្រាស់ដីសហគមន៍របស់ជនជាតិដើម មកធ្វើជាទ្រព្យធានា ដែល នឹងជួយការពារសហគមន៍ងាយរងគ្រោះពីហានិភ័យនៃការបាត់បង់ដីធ្លី។លើសពីនេះ សមាគមមីក្រូហិរញ្ញវត្ថុកម្ពុជាកំពុងគាំទ្រការបង្កើតមជ្ឈមណ្ឌលអតិថិជនក្នុងវិស័យហិរញ្ញវត្ថុ (FCC) ដែលស្ថិត ក្រោមសមាគមធនាគារនៅកម្ពុជា (ABC) ។ មជ្ឈមណ្ឌលនេះ ផ្តល់សេវាដោះស្រាយបណ្តឹងអតិថិជនក្នុងវិស័យហិរញ្ញវត្ថុ និងពង្រឹង កិច្ចការពារអតិថិជន។ សមាគមក៏កំពុងពង្រឹងកម្មវិធីអប់រំចំណេះដឹងហិរញ្ញវត្ថុផងដែរ ដោយផ្តោតលើស្ត្រី និងសហគមន៍ជនបទ តាមរយៈគម្រោងសុវត្ថិភាពហិរញ្ញវត្ថុនៅសហគមន៍ ដើម្បីជួយអតិថិជនក្នុងវិស័យហិរញ្ញវត្ថុ។លោកជំទាវ ឌិត នីតា បន្ថែមថា តាមរយៈកិច្ចសហការជាមួយដៃគូ សមាគមកំពុងប្រឹងប្រែងកសាងវិស័យហិរញ្ញវត្ថុប្រកបដោយ បរិយាបន្ន និងផ្តល់ឱកាសជូនប្រជាពលរដ្ឋដែលងាយរងគ្រោះបំផុត ដើម្បីផ្តល់ជូនអតិថិជននូវសេវា និងផលិតផលហិរញ្ញវត្ថុផ្លូវការ ដែលមានភាពចាំបាច់តាមតម្រូវការ ដើម្បីពួកគាត់ទទួលបានភាពជោគជ័យផ្នែកហិរញ្ញវត្ថុ និងការពារពួកគាត់ពីហានិភ័យហិរញ្ញវត្ថុ។ កិច្ចខិតខំប្រឹងប្រែងទាំងនេះ ស្របគ្នាទៅនឹងគោលដៅអភិវឌ្ឍន៍ប្រកបដោយនិរន្តរភាព របស់អង្គការសហប្រជាជាតិ ជាពិសេសក្នុងការ កាត់បន្ថយភាពក្រីក្រ សមភាពយេនឌ័រ និងបរិយាបន្នហិរញ្ញវត្ថុ ដោយធានាថា វិស័យមីក្រូហិរញ្ញវត្ថុកម្ពុជា នៅតែជាចលករដ៏សំខាន់ សម្រាប់ជំរុញកំណើនសេដ្ឋកិច្ច និងបង្កើតឱកាសអាជីវកម្ម៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

គណៈកម្មការផ្សារអូរឬស្សី រៀបចំពិធីសូត្រមន្តចម្រើនព្រះបរិត្ត ប្រសិទ្ធពរជ័យ សិរីមង្គល ក្នុងឱកាសឆ្នាំថ្មីប្រពៃណីជាតិខ្មែរ

គិតពីឆ្នាំ២០១៨ មកដល់ពេលនេះ រាជរដ្ឋាភិបាលបានសន្សំថវិកាជូនពលរដ្ឋបានប្រមាណជាង ៧លានដុល្លារ តាមរយៈការផ្ដល់រថយន្តក្រុងជិះដោយឥតគិតថ្លៃ

លោក Macron៖ បារាំង អាចនឹងទទួលស្គាល់រដ្ឋប៉ាឡេស្ទីន នៅក្នុងខែមិថុនា ខាងមុខនេះ

ចិន ព្រមានពលរដ្ឋខ្លួនអំពីការធ្វើដំណើរ និងការសិក្សានៅអាមេរិក ស្របពេលជម្លោះពាណិជ្ជកម្ម

[UPDATE] ពន្ធសងសឹក ៨៤% របស់ប្រទេសចិន លើទំនិញអាមេរិក បានចូលជាធរមាន ខណៈជម្លោះពាណិជ្ជកម្មកាន់តែធំ

អ៊ីស្រាអែល បញ្ជាឱ្យបិទសាលារៀនដែលដំណើរការដោយទីភ្នាក់ងារ UNRWA នៅក្រុងហ្សេរុយសាឡឹមខាងកើត

ប្រជាជនឥណ្ឌា ព្យាយាមរកភាពត្រជាក់ ខណៈរលកកម្ដៅនៅរដូវក្តៅ ចូលមកដល់មុនពេលកំណត់

សាច់ញាតិ រង់ចាំព័ត៌មានអ្នកបាត់ខ្លួនក្នុងការបាក់រលំដំបូលក្លឹបរាត្រីនៅដូមីនីក ដែលបានឆក់យកជីវិតមនុស្សជិត២០០នាក់

ពលរដ្ឋអាមេរិកនិយាយពីជំហានកែប្រែការដំឡើងពន្ធរបស់លោក Trump ថាការផ្អាក៩០ថ្ងៃ គ្មានភាពខុសប្លែកគ្នាទេ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877