BTV NEWS

ទំហំពាណិជ្ជកម្មរវាងកម្ពុជាជាមួយប្រទេសដៃគូ RCEP មានទំហំទឹកប្រាក់ជាង ៣,៧៦ ពាន់លានដុល្លារកើនជិត ១៥ភាគរយក្នុងខែមករាឆ្នាំនេះ

ក្នុងខែមករាឆ្នាំនេះ ប្រទេសអាស៊ានចំនួន៥ ស្រូបយកទំនិញពីកម្ពុជា មានទឹកប្រាក់សរុបជាង ៤៣៣លានដុល្លារ

ឧស្សាហកម្មកៅស៊ូកម្ពុជា រីកចម្រើនលឿននាំឱ្យតម្រូវការផ្គត់ផ្គងកៅស៊ូក្នុងស្រុកកើនឡើងខ្ពស់ចន្លោះពី ២០ទៅ២៥ម៉ឺនតោនក្នុងមួយឆ្នាំ

ខែមករាឆ្នាំនេះ កម្ពុជានាំទំនិញទៅចិនមានទឹកប្រាក់ជាង ១៦៤លានដុល្លារ កើនជាង ៥៩ភាគរយ

សេដ្ឋកិច្ច និង កសិកម្ម

កម្ពុជារំពឹង នឹងទទួលបានភ្ញៀវទេសចរណ៍ផ្ទៃក្នុង១៤ លាននាក់នៅឆ្នាំក្រោយ

ភ្នំពេញ៖ រដ្ឋមន្រ្តីក្រសួងទេសចរណ៍ រំពឹងថា នៅក្នុងឆ្នាំ ២០២៣ កម្ពុជានឹងទទួលបានភ្ញៀវទេសចរណ៍ផ្ទៃក្នុងប្រមាណ ១៤ លាននាក់ តាមផែនការដែលបានដាក់ចេញ និងភ្ញៀវទេសចរអន្តរជាតិប្រមាណ ៣ លាននាក់ រហូតដល់ឆ្នាំ ២០២៧។ឯកឧត្តមបណ្ឌិត ថោង ខុន រដ្ឋមន្រ្តីក្រសួងទេសចរណ៍ លើកឡើងនៅក្នុងពិធីបិទ «វេទិកាជាតិអេកូទេសចរណ៍លើកទី៣» នៅថ្ងៃទី២២ ខែវិច្ឆិកា ឆ្នាំ២០២២ នេះថា កម្ពុជាត្រូវបានទទួលស្គាល់ជាលក្ខណៈអន្តរជាតិលើការងារសហគមន៍ និងអេកូទេសចរណ៍ ពិសេសក្នុងក្របខណ្ឌអាស៊ាន តាមរយៈការអនុវត្តគំរូអភិវឌ្ឍន៍សហគមន៍ទេសចរណ៍ ក្រោមរូបភាពជាដៃគូរ រដ្ឋ និងប្រជាជន ក្នុងការផ្តល់សិទ្ធអំណាចដល់សហគមន៍ ដល់ជាប្រយោជន៍អតិប្បរមាក្នុងមូលដ្ឋាន កាត់បន្ថយភាពក្រីក្រ និងគោរពតាមគោលការណ៍ជាជំហាន និងទទួលខុសត្រូវស្របតាមទស្សនទាន ការអភិរក្សបម្រើដល់ការអភិវឌ្ឍ និងស្របតាមគៅលការណ៍នៃការបែងចែកផលប្រយោជន៍ ប្រកបដោយសមធម៌។ឈរលើមូលដ្ឋានទាំងអស់នេះ រាជរដ្ឋាភិបាលបានអនុវត្តដាក់ឲ្យប្រើប្រាស់ផែនទីចង្អុលផ្លូវ ស្តីពីផែនការស្តារ និងលើកស្ទួយវិស័យទេសចរណ៍ កម្ពុជាក្រោយវិបត្តិជំងឺកូវីដ ១៩ ដោយក្នុងនោះអនុវិស័យអេកូទេសចេណ៍ គឺជាសរស្តម្ភមួយ ក្នុងចំណោមសរស្តម្ភទាំង៤ គឺទេសចរណ៍វប្បធម៌, ទេសចរណ៍ឆ្នេរ, អេកូទេសចរណ៍ និងភាពជាខ្មែរ ក្នុងការស្តារ និងលើកស្ទួយវិស័យទេសចរណ៍កម្ពុជ។ បញ្ហានេះ ឯកឧត្តមរំពឹងថា កម្ពុជានឹងទទួលបានភ្ញៀវទេសចរណ៍ផ្ទៃក្នុង ប្រមាណ ១៤ លាននាក់ នៅក្នុងឆ្នាំ២០២៣ តាមផែនការដែលបានដាក់ចេញ និងភ្ញៀវទេសចរអន្តរជាតិប្រមាណ ៣លាននាក់ រហូតដល់ឆ្នាំ ២០២៦ ឬឆ្នាំ២០២៧ ជាមួយភាពប្រកដប្រជានៃវិបត្តិកូវីដ ១៩ និងវិបត្តិសកលលោកនានា ខណៈដែល ១០ ខែ ឆ្នាំ ២០២២ នេះ កម្ពុជាទទួលបានភ្ញៀវទេសចរណ៍ ប្រមាណ ១,៥ លាននាក់រួចហើយ និងរំពឹងថា ក្នុងឆ្នាំនេះ នឹងទទួលបានភ្ញៀវទេសចរណ៍ប្រមាណ ២ លាននាក់ផងដែរ។ទាក់ទងបញ្ហាទេសចរណ៍នេះ, លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា លើកឡើងថា ជុំវិញការរំពឹងទុក នៃការកើនឡើងភ្ញៀវទេសចរណ៍នេះ បើយើងក្រឡែកមើលបច្ចុប្បន្ន ភ្ញៀវទេសចរណ៍បានចេញកម្សាន្តជាហូរហែរ បន្ទាប់ពីវិបត្តិនៃជំងឺកូវីដ ១៩ បានធូរស្រាល ដែលក្នុងនោះអនុវិស័យអេកូទេសចរណ៍ រួមជាមួយសេវាកម្មសហគមន៍ភ្ញៀវទេសចរណ៍បានកំពុងទាក់ទាញផងដែរ ខណៈវិបត្តិនៃជំងឺកូវីដ ១៩ ហាក់ដូចជាបណ្តុះគំនិតឲ្យពួកគាត់កាន់តែស្រឡាញ់ និងគាំទ្រ អភិរក្សធនធានធម្មជាតិ អេកូទេសចរណ៍កាន់តែខ្លាំង ដូច្នេះរបត់នៃការកើនឡើងភ្ញៀវទេសចរណ៍នេះ កម្ពុជានឹងអាចសម្រេចបានតាមការគ្រោងទុក។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានសម្តែងនូវការគាំទ្រយ៉ាងពេញទំហឹង ចំពោះការបន្តអភិវឌ្ឍសហគមន៍ទេសចរណ៍ និងអេកូទេសចរណ៍ ប្រកបដោយចីរភាព និងបរិយាប័ន្ន សម្រាប់វិស័យទេសចរណ៍ទាំងមូល សម្រាប់បញ្ហានេះ ឯកឧត្តមស្នើរបន្តពង្រឹង និងពង្រីកសក្តានុពលនៃការអភិវឌ្ឍសហគមន៍ទេសចរណ៍ និងអេកូទេសចរណ៍ជាច្រើនទៀត ជាពិសេសការដោះស្រាយបញ្ហាក្នុងសហគមន៍ដូចជា ការកសាងហេដ្ឋរចនាសម្ព័ន្ធតភ្ជាប់ និងការផ្តល់សេវាសាធារណៈនានា, ការបន្តសិក្សារៀបចំបញ្ជីសហគមន៍អាទិភាព ដើម្បីដាក់បញ្ចូលក្នុងផែនការអាទិភាពរបស់ក្រសួង-ស្ថាប័នពាក់ព័ន្ធ និងការគាំទ្រឱ្យមានការរៀបចំពិធីបុណ្យអេកូទេសចរណ៍ប្រចាំឆ្នាំ នៅតាមតំបន់អេកូទេសចរណ៍អាទិភាពជាដើម៕អត្ថបទ៖ សុន រ៉ាឌី

គម្រោងសហហិរញ្ញប្បទានលើវិស័យទេសចណ៍ នៅមានកញ្ចប់ថវិការជាច្រើនសម្រាប់គាំទ្រអាជីវកម្ម

ភ្នំពេញ៖ គម្រោងសហហិរញ្ញប្បទានរវាងធនាគារដៃគូរ និងធនាគារសហគ្រាសធុនតូច និងមធ្យមកម្ពុជា សម្រាប់ការស្តារ និងជំរុញកំណើនក្នុងវិស័យទេសចរណ៍ គិតមកដល់ពេលនេះ បានបញ្ចេញឥណទានក្នុងរង្វង់ ២២ ភាគរយ នៃទំហំថវិការសហហិរញ្ញប្បទានសរុប ដោយនៅមានកញ្ចប់ថវិកាជាច្រើនទៀត សម្រាប់គាំទ្រ និងជួយជ្រោមជ្រែងដល់ម្ចាស់អាជីវកម្ម។លោក នៀវ សុគន្ធ នាយកប្រតិបត្តិនៃធនាគារសហគ្រាសធុនតូច និងមធ្យមកម្ពុជា លើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV ស្តីពីបង្ហាញ ស្តីពីការផ្តល់កម្ចីក្នុងគម្រោងសហហិរញ្ញប្បទាន សម្រាប់ការស្តារ និងជម្រុញកំណើនក្នុងវិស័យទេសចរណ៍ នៅថ្ងៃទី ២២ ខែ វិច្ឆិកា ឆ្នាំ ២០២២ នេះថា រាជរដ្ឋាភិបាល បានសម្រេចដាក់អនុវត្តគម្រោងសហហិរញ្ញប្បទាន សម្រាប់វិស័យទេសចរណ៍នេះ គឺជួយដោះស្រាយបញ្ហាប្រឈម នៃការកង្វះហិរញ្ញប្បទាន សម្រាប់អាជីវកម្មក្នុងវិស័យទេសចរណ៍ ដែលទទួលរងផលប៉ះពាល់ ការរៀបចំដំណើរការអាជីវកម្មឡើងវិញ និងធ្វើទំនើបកម្ម ពិពិធកម្ម សេវាកម្ម និងផលិតផលផ្សេងៗ គិតមកដល់ពេលនេះ គម្រោងជួយជ្រោមជ្រែងក្នុងវិស័យទេសចរណ៍ បានដំណើរជិតកន្លះឆ្នាំហើយ ក្នុងនោះបើធៀបទៅគម្រោងទី ១ និង ២ ឃើញថា មានល្បឿនយឺតយ៉ាវបន្តិចបន្តួច។ជាក់ស្តែងគិតមកដល់ពេលនេះ គម្រោងសហហិរញ្ញប្បទានសម្រាប់ការស្តារ និងជំរុញកំណើនក្នុងវិស័យទេសចរណ៍ ទើបទម្លាក់ថវិការអស់ប្រមាណ ២២ ភាគរយ ក្នុងទំហំសហហិរញ្ញប្បទានសរុប ១៥០ លានដុល្លារ ដោយនៅមានកញ្ចប់ថវិកាជាច្រើនទៀត ក្នុងនោះប្រសិនម្ចាស់អាជីវកម្ម សេវាកម្ម មានតម្រូវការ អាចទាក់ទងមកធនាគារដៃគូរ ឬធនាគារសហគ្រាសធុនតូច និងមធ្យមកម្ពុជាផ្ទាល់ ដែលមានលក្ខណៈងាយៗ និងមានអត្រាការប្រាក់សមរម្យ។សូមបញ្ជាក់ថា រាជរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុ ដែលសហការជាមួយធនាគារជាដៃគូរ បានបង្កើតគម្រោងសហហិរញ្ញប្បទានជំហានបន្ទាប់នេះឡើង ដើម្បីផ្តល់ជូននូវអត្រាការប្រាក់ពិសេស ជូនដល់សហគ្រាស ឬអាជីវកម្មដែលកំពុងរងនូវផលប៉ះពាល់ ដោយបានសម្រេចផ្តល់ការប្រាក់អតិបរមា ៦.៥ ភាគរយ ក្នុងមួយឆ្នាំ ក្នុងនោះម្ចាស់អាជីវកម្មអាចកម្ចីទំហំឥណទានត្រឹម ៤០ ម៉ឺនដុល្លារ សម្រាប់ជាទុកបង្វឹលក្នុងអាជីវកម្ម ។ចំណែកការការសង់ត្រឡប់ឥណទានមកវិញ រាជរដ្ឋាភិវបាលបានកំណត់ការកម្ចីមានរយៈពេល ៧ឆ្នាំ, ចំពោះគោលដៅដែលផ្តល់ជូន គឺផ្តោតទៅលើអាជីវកម្មដែលទាក់ទងទៅលើវិស័យទេសចរណ៍ដូចជា៖ វិស័យសណ្ឋាគារ, ផ្ទះសំណាក់, ភោជនីយដ្ឋាន ក្រុមហ៊ុនទីភ្នាក់ងារទេសចរណ៍ជាដើម ក្នុងនោះចំពោះអាជីវកម្មបើកថ្មីក្នុងវិស័យទេសចរណ៍ គឺមិនអនុញ្ញាតផ្តល់គម្រោងនេះជូនឡើយ៕អត្ថបទ៖ សុន រ៉ាឌី

កម្ពុជារកចំណូលបាន ៣ ពាន់លានដុល្លារពីការនាំចេញកសិផលក្នុងរយៈពេល ១០ ខែដំបូង

ភ្នំពេញ៖ កម្ពុជាបាននាំចេញកសិផលសរុបចំនួន ៧,៦២ លានតោនក្នុងរយៈពេល ១០ ខែដំបូងនៃឆ្នាំ ២០២២ ដោយទទួលបានប្រាក់ចំណូលចំនួន ៣,០៧ ពាន់លានដុល្លារអាមេរិក។យោងតាមរបាយការណ៍ចេញផ្សាយដោយក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃសៅរ៍ទី១៩ ខែវិច្ឆិកានេះ បានឱ្យដឹងថា ផលិតផលសំខាន់ៗដែលកម្ពុជានាំចេញរួមមាន អង្ករ ចេក ស្វាយ ដំឡូងមី គ្រាប់ស្វាយចន្ទី ពោត ប្រេងដូង ម្រេច និងថ្នាំជក់ ក្នុងចំណោមផលិតផលផ្សេងទៀត។ របាយការណ៍ បានបន្ថែមថា ប្រទេសចិនគឺជាអ្នកទិញដ៏សំខាន់មួយនៃផលិតផលរបស់ព្រះរាជាណាចក្រកម្ពុជា។ឯកឧត្តម ងិន ឆាយ អគ្គនាយកនៃអគ្គនាយកដ្ឋានកសិកម្ម លើកឡើងកាលពីថ្មីៗនេះថា កំណើននៃការនាំចេញកសិផលកម្ពុជាទៅកាន់ទីផ្សារក្រៅប្រទេស មានការកើនឡើងគួរឱ្យកត់សម្គាល់។ឯកឧត្តម បន្តថា ក្រៅពីការអនុវត្តវិធានការអនាម័យ និងភូតគាមអនាម័យ នៅមានបញ្ហាប្រឈមសំខាន់ៗមួយចំនួនដូចជា កង្វះហេដ្ឋារចនាសម្ព័ន្ធគាំទ្រសម្រាប់មន្ទីរពិសោធន៍ការពាររុក្ខជាតិ និងភូតគាមអនាម័យ ស្ថានីយពិសោធន៍ស្រាវជ្រាវ ហេដ្ឋារចនាសម្ព័ន្ធកសាងទិន្នន័យវិទ្យាសាស្ត្រ វិទ្យាស្ថានការពាររុក្ខជាតិ និងភូតគាមអនាម័យជាដើម។ កសិកម្មគឺជាសសរស្តម្ភមួយក្នុងចំណោមសសរស្តម្ភទាំងបួនដែលជួយដល់សេដ្ឋកិច្ចកម្ពុជា។ យោងតាមក្រសួង បានឱ្យដឹងថា វិស័យនេះបានរួមចំណែក ២៤,៤ ភាគរយដល់ផលិតផលក្នុងស្រុកសរុប ក្នុងឆ្នាំ២០២១ ។ស្រូវគឺជាដំណាំសាច់ប្រាក់ដ៏សំខាន់នៅក្នុងប្រជាជាតិអាស៊ីអាគ្នេយ៍ ដែលអង្ករប្រហែល ១២,២ លានតោនត្រូវបានផលិតនៅឆ្នាំ ២០២១ កើនឡើង ១១,៦ ភាគរយពីមួយឆ្នាំទៅមួយឆ្នាំ៕ អត្ថបទ៖ វណ្ណៈ

ប្រធានសមាគមម្រេចកំពត រំពឹងថា ការនាំចេញម្រេចមានកំណើនល្អនៅឆ្នាំក្រោយ

ភ្នំពេញ៖ ប្រធានសមាគមលើកស្ទួយម្រេចកំពត រំពឹងថា នៅក្នុងឆ្នាំ ២០២៣ ការនាំចេញផលិតផលម្រេចនឹងងើបឡើងល្អប្រសើរវិញ ដោយការរំពឹងទុកនៃការប្រមូលផលម្រេចឆ្នាំក្រោយ នឹងទទួលបានទិន្នផលខ្ពស់ជាងឆ្នាំនេះ ព្រមទាំងមានទីផ្សារថ្មីៗបន្ថែមទៀត ជួយគាំទ្រដល់ការនាំចេញម្រេចកម្ពុជា។លោក ងួន ឡាយ ប្រធានសមាគមលើកស្ទួយម្រេចកំពត លើកឡើងនៅថ្ងៃទី ២១ ខែ វិច្ឆិកានេះថា នៅក្នុងឆ្នាំនេះ ការប្រមូលផលម្រេចរបស់កសិករទទួលបានទិន្នផលទាបជាងឆ្នាំ ២០២១ ចំណែកទីផ្សារនាំចេញក៏ជួបបញ្ហាខ្លះៗផងដែរ ដោយសារការកើនឡើងនៃប្រាក់ដុល្លារ ខណៈការនាំចេញម្រេចភាគច្រើនគិតជាតម្លៃអឺរ៉ូ ហើយបច្ចុប្បន្នអត្រាប្តូរប្រាក់អឺរ៉ូនេះកំពុងធ្លាក់ចុះ ដែលបញ្ហាទាំងនេះ ធ្វើឲ្យអ្នកបញ្ជាទិញមានការស្ទាក់ស្ទើរ។ទោះបីឆ្នាំនេះមានការធ្លាក់ចុះ តែនៅឆ្នាំ ២០២៣ លោក រំពឹងថា ទីផ្សារនាំចេញម្រេចរបស់កម្ពុជា នឹងអាចងើបល្អប្រសើរឡើងវិញ និងស្របពេលកម្ពុជាក៏មានទីផ្សារថ្មីខ្លះៗបន្ថែម ដែលជាការរួមចំណែកដល់ការនាំចេញ លើទីផ្សារដែលមានស្រាប់ផងដែរ។ ជុំវិញការនាំចេញម្រេច, ក្រសួងកសិកម្ម រុក្ខាប្រមាញ់ និងនេសាទ បង្ហាញឲ្យដឹងថា នៅក្នុងរយៈពេល ១០ ឆ្នាំ២០២២ នេះ ការនាំចេញ ម្រេច សម្រេចបានមានចំនួនជាង ៧,៧ ពាន់តោន ថយចុះ ៧២ ភាគរយ ក្នុងនោះនាំចេញទៅប្រទេសវៀតណាមជាង ៦,៦ ពាន់តោន៕អត្ថបទ៖ សុន រ៉ាឌី

ឯកឧត្តម ជា ចាន់តូ ដឹកនាំគណៈប្រតិភូកម្ពុជាសន្និសីទអន្តរជាតិលើកទី៣នៅប្រទេសឥណ្ឌា

ភ្នំពេញ៖ សន្និសីទអន្តរជាតិលើកទី៣ ស្តីពី ការប្រឆាំងការផ្តល់ហិរញ្ញប្បទានភេរវកម្មដែលប្រារព្ធធ្វើនៅរដ្ឋធានីញូវដេលី នៃសាធារណរដ្ឋឥណ្ឌាមានគណៈប្រតិភូមកពីបណ្តាប្រទេស និងអង្គការអន្តរជាតិនានាជាង ១០០ ប្រទេសចូលរួមក្នុងនោះក៏វត្តមានរបស់ប្រតិភូប្រទេសកម្ពុជាផងដែរ។នៅថ្ងៃទី១៧ ខែវិច្ឆិកា ឆ្នាំ២០២២ ឯកឧត្តម ជា ចាន់តូ ទេសាភិបាល ធនាគារជាតិនៃកម្ពុជា និងជាអនុប្រធានប្រចំាការគណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ ហៅកាត់ថា៖ (គ.ស.ហ.) តំណាងដ៏ខ្ពង់ខ្ពស់របស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធាន គ.ស.ហ. បានដឹកនាំគណៈប្រតិភូអញ្ជើញទៅចូលរួមសន្និសីទអន្តរជាតិលើកទី៣ ស្តីពី ការប្រឆាំងការផ្តល់ហិរញ្ញប្បទានភេរវកម្ម “No Money for Terro” ។មន្ត្រីជាន់ខ្ពស់ក្នុងគណៈប្រតិភូប្រទេសកម្ពុជាដែលត្រូវទៅចូលរួមសន្និសីទអន្តរជាតិលើកទី៣ ស្តីពី ការប្រឆាំងការផ្តល់ហិរញ្ញប្បទានភេរវកម្ម “No Money for Terro” នេះបានឲ្យដឹងថា សន្និសីទ្ធនេះនឹងចាប់ដំណើររយៈពេល២ថ្ងៃគឺនៅថ្ងៃទី១៨ និងថ្ងៃទី១៩ ខែវិច្ឆិកា ឆ្នាំ២០២២ នៅក្នុងរដ្ឋធានីញូវដេលី នៃសាធារណរដ្ឋឥណ្ឌា។មន្រ្តីរូបនេះ បានឲ្យដឹងទៀតថា តាមការគ្រោងទុកសន្និសីទអន្តរជាតិលើកទី៣ ស្តីពី ការប្រឆាំងការផ្តល់ហិរញ្ញប្បទានភេរវកម្ម “No Money for Terro”នេះ នឹងមានគណៈប្រតិភូមកពីបណ្តាប្រទេស និងអង្គការអន្តរជាតិនានាសរុបចំនួនប្រមាណជាង ១០០ ប្រទេស៕អត្ថបទ៖ ធនាគារជាតិ

វិស័យសេវាកម្មនៅឆ្នាំ២០២៣ រំពឹងនឹងហក់ឡើងខ្ពស់លើសការរំពឹងទុក

ភ្នំពេញ៖ វិស័យសេវាកម្មកម្ពុជា រំពឹងថានឹងហក់ឡើងខ្ពស់លើសការរំពឹងទុករបស់រាជរដ្ឋាភិបាល នៅឆ្នាំ២០២៣ ដោយគាំទ្រដល់សេវាដឹកជញ្ជូន ការងើបឡើងវិញនៃវិស័យសេវាកម្មទេសចរ សណ្ឋាគារ និងភោជនីយដ្ឋាន។ឯកឧត្តមបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា ថ្លែងលើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV ស្តីពីវិស័យសេវាកម្ម ឆ្នាំ ២០២៣ នៃព្រះរាជាណាចក្រកម្ពុជាថា វិស័យសេវាកម្ម ដែលរំពឹងជួយជ្រោមជ្រែង ដល់ការងើបឡើងវិញនៅឆ្នាំ ២០២៣ មានអនុវិស័យឡូជីស្ទិក បានកំពុងរីកលូតលាស់ដូចជា ការសាងសង់កំពង់ផែទឹកជ្រៅបានជិតរួចរាល់, ការបង្កើតនូវប្រព័ន្ធឡូជីស្ទិកនៃក្រវ៉ាត់ក្រុងទី៣ ជាការតភ្ជាប់ពីតំបន់នានាចូលមករាជធានីភ្នំពេញ, គម្រោងបង្កើតផ្លូវល្បឿនលឿនបន្ថែមរបស់រាជរដ្ឋាភិបាល ដែលធ្វើឲ្យសេវាកម្មលើផ្នែកនេះនឹងរីកចម្រើន។ ចំណែកសេវាកម្មទេសចរ បន្ទាប់ពីកម្ពុជាបានបើកដំណើការជាងមួយឆ្នាំមកនេះ ភ្ញៀវទេសចរបរទេសចូលមកកម្ពុជានៅមានកម្រិតក៏ពិតមែន តែភ្ញៀវទេសចរក្នុងស្រុកបានកើនឡើងវិញ ស្របពេលអាជីវកម្ម សេវាកម្មជាច្រើនក៏បានដំណើរជាប្រក្រតីផងដែរ។ លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា លើកឡើងកាលពីពេលថ្មីៗនេះថា ស្របពេលជំងឺកូវីដ ១៩ មានស្ថានភាពល្អប្រសើរ និងស្របពេលកម្ពុជាបើកឲ្យប្រើប្រាស់ផ្លូវល្បឿនលឿនពីភ្នំពេញ-ព្រះសីហុន មិនត្រឹមតែមានការចាប់អារម្មណ៍ភ្ញៀវទេសចរក្នុងស្រុកប៉ុណ្ណោះទេ ចំពោះភ្ញៀវទេសចរបរទេស ក៏បានចាប់អារម្ភណ៍យ៉ាងខ្លាំងផងដែរ លើការកក់សំបុត្របន្តទៅទស្សនាកម្សាន្តនៅខេត្តព្រះសីហុន និងតំបន់ផ្សេងៗនៅព្រះរាជាណាចក្រកម្ពុជា។សូមបញ្ជាក់ថា៖ វិស័យសេវាកម្ម ត្រូវបានរាជរដ្ឋាភិបាល ព្យាករថា នឹងបន្តកើនឡើងក្នុងអត្រា ៦,៦% ក្នុងឆ្នាំ២០២៣ ពីកំណើន ៤,៣% ក្នុងឆ្នាំ ២០២២ ដោយសារការបន្តងើបឡើងនូវសកម្មភាពសេដ្ឋកិច្ចក្នុងស្រុកសណ្ឋាគារ និងភោជនីយដ្ឋាន និងវិស័យគាំទ្រទេសចរណ៍ផ្សេងៗទៀត៕ អត្ថបទ៖ សុន រ៉ាឌី

ក្រុមហ៊ុនចុះបញ្ជីតាមថ្នាលជាតិ មានទុនវិនិយោគសរុប ៥.៥១ ទ្រីលានដុល្លារ

ភ្នំពេញ៖ កម្ពុជាទទួលបានក្រុមហ៊ុននិងសហគ្រាសដែលបានចុះបញ្ជីតាមប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន ដែលអនុម័តរួច មានចំនួនជិត ២០ ពាន់ក្រុមហ៊ុន គិតជាដើមទុនសរុប មានចំនួន ៥.៥១ ទ្រីលានដុល្លារអាមេរិក គិតត្រឹមពាក់កណ្តាល ខែ វិច្ឆិកា ឆ្នាំ២០២២ នេះ ។ប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន របស់រាជរដ្ឋាភិបាល បានបង្ហាញទូរលេខនៃប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន គិតត្រឹមថ្ងៃទី ១៥ ខែ វិច្ឆិកា ឆ្នាំ២០២២ នេះ ក្រុមហ៊ុនដែលបានចុះបញ្ជីប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន របស់រាជររដ្ឋាភិបាល ទទួលបានអនុម័តរួចជាផ្លូវការ មានចំនួនជិត ២០ ពាន់ក្រុមហ៊ុន ដោយមានដើមទុនក្នុងរង្វង់ប្រមាណ ជាង ៥.៥១ ទ្រីលានដុល្លារអាមេរិក និងនាមករណ៍បម្រុងទុកប្រមាណជាង ១២ ពាន់ក្រុមហ៊ុន សហគ្រាសផ្សេងទៀត ដែលនឹងធ្វើការអនុម័តជាបន្តបន្ទាប់។សកម្មភាពអាជីវកម្មធំៗចំនួន ៥ ប្រភេទ ទទួលបានការចុះបញ្ជី និងមានដើមទុនច្រើនជាងគេរួមមាន៖ ការវិនិយោគលើការសាងសង់អគារ សកម្មភាពអចលនទ្រព្យ ដោយប្រើប្រាស់អចលនទ្រព្យផ្ទាល់ខ្លួន សកម្មភាពពិគ្រោះយោបល់ផ្នែកគ្រប់គ្រង កម្មន្តសាលសំលៀកបំពាក់ (លើកលែងសំលៀកបំពាក់ធ្វើពីរោមសត្វ) អន្តរការីរូបិយវត្ថុ និងការចុះបញ្ជីរបស់ក្រុមហ៊ុនផ្សេងៗទៀត។ សូមរំលឹកថា ការបើកប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មានរបស់រាជរដ្ឋាភិបាល ក្នុងជំហានទី១ បានដាក់ឲ្យប្រើប្រាស់ កាលពីថ្ងៃទី ១៥ ខែ មិថុនា ឆ្នាំ ២០២០ រួមមានក្រសួងពាណិជ្ជកម្ម, អគ្គនាយកដ្ឋានពន្ធដារ, ក្រសួងការងារ និងបណ្តុះបណ្តាលវិជ្ជាជីវៈ, ក្រសួងមហាផ្ទៃ, និងក្រុមប្រឹក្សាអភិវឌ្ឍន៍កម្ពុជា ។ ចំណែកជំហានទី២ បានអនុវត្តនៅថ្ងៃទី ១៥ ខែកញ្ញា ឆ្នាំ២០២១ ប្រព័ន្ធនេះបានពង្រីកវិសាលភាពដល់ការស្នើសុំអាជ្ញាបណ្ណ ឬលិខិតអនុញ្ញាតផ្សេងៗតាមអនឡាញ ទៅតាមសកម្មភាពអាជីវកម្ម ពីក្រសួង-ស្ថាប័នជំនាញរួមមាន៖ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍, ក្រសួងទេសចរណ៍, ក្រសួងប្រៃសណីយ៍និងទូរគមនាគមន៍ និងនិយ័តករអាជីវកម្មអចលនវត្ថុ និងបញ្ចាំនៃអាជ្ញាធរសេវាហិរញ្ញវត្ថុមិនមែនធនាគារ៕អត្ថបទ៖ សុន រ៉ាឌី

កសិករក្នុងខេត្តក្រចេះបំបៅដើមត្រប់ជាមួយដើមប៉េងប៉ោះ ទទួលបានទិន្នផលល្អ

ក្រចេះ៖ ក្រចេះកសិករ ក្នុងខេត្តក្រចេះ បានអនុវត្តវិធីសាស្ត្របំបៅដើមត្រប់ជាមួយដើមប៉េងប៉ោះ ទទួលបានជោគជ័យ និងទទួលបានទិន្នផលល្អ។ ស្ត្រីជាកសិករម្នាក់ឈ្មោះ សាន្ត ទេវី នៅភូមិកំបោរ ឃុំគោលាប់ ស្រុកចិត្របុរី ខេត្តក្រចេះ បានចាប់យករបរដាំបន្លែធម្មជាតិ និងបន្លែហូបផ្លែ អស់រយៈពេលជិត១០ឆ្នាំមកហើយ ក្រៅពីធ្វើស្រែ ដោយអនុវត្តតាមរបៀបធម្មតា គឺពុំមានបច្ចេកទេស ធ្វើឱ្យការដាំដុះប្រឈម នឹងជំងឺជាច្រើន និងពុំទទួលបានផលល្អ។នៅក្នុងឆ្នាំ២០១៦ ក្រោយទទួលបានការបណ្ដុះបណ្ដាលជំនាញបច្ចេកទេស ពីគម្រោង ឆេន និងកម្មវិធី អាស្ពាយ ធ្វើឲ្យគាត់មានចំណេះដឹងថ្មីក្នុងការដាំដុះដំណាំបែបថ្មី ប្តូរពីការដាំដុះបន្លែហូបផ្លែ តាមបែបទម្លាប់ចាស់បុរាណ មកជាបច្ចេកទេសបំបៅដើមត្រប់ ជាមួយដើមប៉េងប៉ោះ រហូតទទួលបានជោគជ័យ ដែលធន់ទៅនឹងអាកាសធាតុ ជំងឺហ៊្វុយសារ៉ាយូម (ស្រពោន) និងទទួលបានទិន្នផលច្រើន ។ បច្ចេកទេសយុទ្ធសាស្ត្រដាំដុះដំណាំប៉េងប៉ោះបែបថ្មីនេះ ធ្វើឲ្យទិន្នផលទទួលបានច្រើនជាងមុន ជាពិសេសកាត់បន្ថយការស្រោចស្រពទឹក ហើយអាចរកប្រាក់ចំណូល ចន្លោះពី១លាន ៦សែនរៀល ទៅ២លានរៀល ក្នុង១ខែ ។ឆ្លើយតបទៅនឹងទំនុកចិត្តរបស់កសិករអ្នកដាំដុះ និងអ្នកទទួលទិញលក់បន្ត ជាពិសេសអ្នកទទួល ទាន មន្ទីរកសិកម្មរុក្ខាប្រមាញ់ និងនេសាទ មានមន្ទីរពិសោធន៍បឋម ១ន្លែង ដើម្បីពិសោធន៍ ស្រាវជ្រាវរកសារធាតុគីមី ដែលអាចផ្តល់សញ្ញាឲ្យដឹងពីកម្រិតសារធតុគីមី ដែលប្រើប្រាស់មកលើបន្លែ ទៅតាមកម្រិត និងអនុលោម អាចឲ្យប្រជាពលរដ្ឋ យកទៅបរិភោគ និងប្រើប្រាស់បានប្រកបដោយសុវត្ថិភាព ៕អត្ថបទ៖ សេង ម័រ

កសិករក្នុងខេត្តបាត់ដំបង នៅតែប្រមូលផលស្រូវបានច្រើន បើទោះរងផលប៉ះពាល់ដោយទឹកជំនន់

បាត់ដំបង៖ ការប្រមូលផលស្រូវវស្សាលើកទី២ក្នុងខេត្តបាត់ដំបងនៅឆ្នាំនេះ ទទួលបានទិន្នផលខ្ពស់គួរសម ប៉ុន្តែកំពុងប្រឈមបញ្ហាតម្លៃចុះថោកជាបន្តបន្ទាប់ ខណៈជី ថ្នាំកសិកម្ម មានតម្លៃខ្ពស់។ ឆ្លើយតបនឹងកង្វល់របស់ប្រជាកសិករ ក្រសួងកសិកម្ម រុក្ខាប្រមាញ់ និងនេសាទ បានអះអាងពីការចាត់បញ្ជូនមន្រ្តី និងក្រុមការងារ នៃអគ្គនាយកដ្ឋានកសិកម្ម ដើម្បីចុះពិនិត្យជាក់ស្ដែង និងរកដំណោះស្រាយសមស្របនៅនឹងកន្លែងជូនប្រជាកសិករ។កសិករក្នុងភូមិអង្រ្គង ឃុំជ្រៃ ស្រុកមោងឫស្សី ខេត្តបាត់ដំបង បានថ្លែងឱ្យដឹងថា ការបង្កបង្កើន ផលស្រូវឆ្នាំនេះ មានលក្ខណៈងាយស្រួលជាងបណ្ដាឆ្នាំមុនៗ ដោយសារកត្តាអាកាសធាតុអំណោយផលមានភ្លៀងធ្លាក់ច្រើន មានទឹកធ្វើស្រែគ្រប់គ្រាន់ ប៉ុន្តែព្រួយបារម្ភយ៉ាងខ្លាំងចំពោះបញ្ហាតម្លៃស្រូវធ្លាក់ចុះជាបន្តបន្ទាប់។ឆ្លើយតបការព្រួយបារម្ភរបស់ប្រជាកសិករ ក្រសួងកសិកម្ម កាលពីរាត្រីថ្ងៃទី១៥ ខែវិច្ឆិកា នេះ បាន ចេញសេចក្ដីប្រកាសព័ត៌មាន អំពាវនាវដល់ប្រជាកសិករ ដែលជួបបញ្ហាជាក់ស្ដែងទាក់ទងទៅផ្ទាល់ក្រុមការងាររបស់ក្រសួង តាមរយៈលេខទូរសព្ទ ០៩៥ ៩៥ ១១១១ សម្រាប់ខេត្តបាត់ដំបង ដើម្បីឱ្យក្រុមការងារក្រសួង អាចទទួលបានព័ត៌មានពេញលេញ និងធ្វើការសម្របសម្រួលជាមួយរោងម៉ាស៊ីនកិនស្រូវក្នុងតំបន់។សូមបញ្ជាក់ថា តម្លៃស្រូវសើម ក្នុងស្រុកមោងឫស្សី បច្ចុប្បន្នប្រភេទស្រូវសែនក្រអូប ដែលពីមុន មានតម្លៃចន្លោះពី១២០០រៀលទៅ១៣០០រៀល បានធ្លាក់ចុះមកនៅត្រឹមចន្លោះ១០០០រៀល ទៅ ១១០០រៀល ចំណែកស្រូវប្រភេទស្រងែ ពីមុន តម្លៃចន្លោះពីជាង ១០០០រៀល បានធ្លាក់ចុះមកនៅត្រឹម ជាង៨០០រៀល ទៅដល់ក្រោម ១០០០រៀល ក្នុងមួយគីឡូក្រាម ៕អត្ថបទ៖ នឿត សុភក្ត្រ

១០ខែឆ្នាំ២០២២ខេត្តកំពត ស្រូបទាញភ្ញៀវទេសចរប្រមាណជាង ១លាន៥សែននាក់

កំពត៖ មន្ត្រីជំនាញបានប្រាប់ឲ្យដឹងថា នៅក្នុងរយៈពេល១០ខែ ឆ្នាំ២០២២នេះ បន្ទាប់ពីបើកប្រទេសឡើងវិញ ចំនួនភ្ញៀវទេសចរ ដែលបានទៅសម្រាកកម្សាន្តនៅខេត្តកំពត សរុបប្រមាណជាង ១លាន ៥សែននាក់។ មន្ត្រីនិងអ្នកជំនាញ បានធ្វើការព្យាករណ៍ថា សម្ទុះភ្ញៀវទេសចរ នឹងបន្តកើនឡើងច្រើន អាចប្រហាក់ប្រហែល ឬលើសពេលមិនទាន់មានជំងឺកូវីដ១៩ផ្ទុះឡើង ។ ប្រធានមន្ទីរទេសចរណ៍ខេត្តកំពតលោក សយ ស៊ីណុល បានឲ្យដឹងថា ក្រោយពេលបើកប្រទេស ឡើងវិញ ចំនួនភ្ញៀវទេសចរ ចាប់ផ្តើមកើនឡើងជាបន្តបន្ទាប់ពីមួយសប្តាហ៍ទៅមួយសប្តាហ៍។ ហើយនៅក្នុងរយៈពេល ១០ខែក្នុងឆ្នាំ២០២២នេះ ខេត្តកំពត បានស្រូបទាញភ្ញៀវទេសចរជាតិ និងអន្តរជាតិ ចំនួនជាង១.៥លាននាក់ មានការកើនឡើង ១០៧.១៧% ធៀបនឹងរយៈពេលដូចគ្នានៅឆ្នាំ២០២១ ដែលភ្ញៀវទេសចរមានចំនួនតែជាង៧៤ម៉ឺននាក់។លោកប្រធានមន្ទីរបានធ្វើការព្យាករណ៍ថា ចំនួនភ្ញៀងនឹងបន្តកើនឡើង ដោយសារកិច្ចខិតខំ របស់ ប្រមុខរាជរដ្ឋាភិបាល ក៏ដូចជាក្រសួងទេសចរណ៍ ក្នុងការផ្សព្វផ្សាយសក្តានុពលវិស័យទេសចរណ៍ ការអភិវឌ្ឍ សន្តិភាព ស្ថិរភាព និងភាពសុខដុមរម្យនារបស់ពលរដ្ឋកម្ពុជា ទៅកាន់ឆាកអន្តរជាតិ តាមរយៈការធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាន ជាដើម។អ្នកគ្រប់គ្រង់ទូទៅ នៃ ម៉ូលី រីស៊ត ស្ថិតនៅក្នុងក្រុងកំពត លោក គឹម សាន បានប្រាប់ឲ្យដឹងថា ចាប់ តាំងពីបើកសេដ្ឋកិច្ចប្រទេសឡើងវិញ ចំនួនភ្ញៀវបានកើនឡើងច្រើន វិលត្រឡប់មករកភាពប្រក្រតីឡើងវិញហើយ ។ លោកព្យាករថា ចំនួនភ្ញៀវទេសចរ នឹងបន្តកើនឡើងទ្វេរដង នៅឆ្នាំ២០២៣ ព្រោះស្ថានភាព កូវីដ-១៩ក៏ល្អប្រសើរសមិទ្ធផលទេសចរណ៍ក្នុងខេត្ត ក៏ចាប់ផ្តើមបើកដំណើរការ ការផ្សព្វផ្សាយ ក៏បានទូលំទូលាយ។ បើតាមរបាយការណ៍របស់មន្ទីរទេសចរណ៍ខេត្តកំពត ចំនួនភ្ញៀវទេសចរឆ្នាំនេះ អាចប្រហាក់ប្រហែល ឬច្រើនជាងពេលមិនទាន់មានការផ្ទុះជំងឺកូវីដ-១៩ ព្រោះនៅឆ្នាំ២០១៨ ចំនួនភ្ញៀវទេសចរ មាន ជាង១លាន៦សែន ២ម៉ឺននាក់ ហើយនៅឆ្នាំ២០១៩ មានចំនួនជាង ១លាន ៦សែន ៦ម៉ឺននាក់ ៕អត្ថបទ៖ អន សារឹម

បណ្ដាញសង្គម

ព័ត៌មានថ្មីៗ

អនុរដ្ឋមន្ត្រីការបរទេសសហរដ្ឋអាម៉េរិក៖ អាម៉េរិកកំពុងស្វែងរកកាលានុវត្តភាពផ្នែកពាណិជ្ជកម្ម និងសេដ្ឋកិច្ច បន្ថែមទៀត ដើម្បីបន្តពង្រឹង និងពង្រីកភាពជាដៃគូសេដ្ឋកិច្ចជាមួយកម្ពុជា

អាមេរិកកំពុងចរចាជាមួយឥណ្ឌា រឿងនាំចេញប្រេងវេណេស៊ុយអេឡាទៅកាន់ទីនោះ

ការរកឃើញផ្លូវរូងក្រោមដីសម្ងាត់ផ្តល់ពន្លឺពីទីផ្សារប្រេងងងឹងរបស់ម៉ិកស៊ិក

វិចិត្រករខ្មែរនិងបរទេសគូរផ្ទាំងគំនូរបង្ហាញពីសោកនាដកម្មដោយសារសង្គ្រាមព្រំដែនកម្ពុជា-ថៃ

ទីក្រុងគីវ៖ គម្រោងផែនការសម្លាប់មន្ត្រីជាន់ខ្ពស់រៀបចំដោយរុស្ស៊ី ត្រូវបានបំផ្លាញ

លោក Trumpបញ្ជាឲ្យទីភ្នាក់ងារកំណត់អត្តសញ្ញាណ និងបញ្ចេញឯកសាររដ្ឋាភិបាលស្តីពីមនុស្សពិភពផ្កាយ

រដ្ឋមន្ត្រីការបរទេសអង់គ្លេស នឹងជួបលោក Rubio អំឡុងភាពតានតឹង ជុំវិញមូលដ្ឋានទ័ពអាកាសរួមគ្នា

មនុស្ស ៨នាក់ ត្រូវបានបារម្ភថា ស្លាប់ ក្រោយរថយន្តក្រុងដឹកអ្នកទេសចរចិនលិចក្នុងបឹង នៅរុស្ស៊ី

UNលម្អិតករណីប្រហារជីវិតស្រ្តីនៅស៊ូដង់ និងជំរុញឲ្យមានវិធានការបន្ទាន់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877