BTV NEWS

ទំហំពាណិជ្ជកម្មរវាងកម្ពុជាជាមួយប្រទេសដៃគូ RCEP មានទំហំទឹកប្រាក់ជាង ៣,៧៦ ពាន់លានដុល្លារកើនជិត ១៥ភាគរយក្នុងខែមករាឆ្នាំនេះ

ក្នុងខែមករាឆ្នាំនេះ ប្រទេសអាស៊ានចំនួន៥ ស្រូបយកទំនិញពីកម្ពុជា មានទឹកប្រាក់សរុបជាង ៤៣៣លានដុល្លារ

ឧស្សាហកម្មកៅស៊ូកម្ពុជា រីកចម្រើនលឿននាំឱ្យតម្រូវការផ្គត់ផ្គងកៅស៊ូក្នុងស្រុកកើនឡើងខ្ពស់ចន្លោះពី ២០ទៅ២៥ម៉ឺនតោនក្នុងមួយឆ្នាំ

ខែមករាឆ្នាំនេះ កម្ពុជានាំទំនិញទៅចិនមានទឹកប្រាក់ជាង ១៦៤លានដុល្លារ កើនជាង ៥៩ភាគរយ

សេដ្ឋកិច្ច និង កសិកម្ម

ប្រភិភូកម្ពុជាជាង ៣០ក្រុមហ៊ុន អញ្ជើញចូលរួមប្រជុំនៃគម្រោងតភ្ជាប់ផ្លូវរថភ្លើងល្បឿនលឿនក្នុងអាស៊ាន

ភ្នំពេញ៖ ប្រតិភូកម្ពុជានៅក្នុងវិស័យឡូជីស្ទិកប្រមាណជាង ៣០ ក្រុមហ៊ុន នឹងអញ្ជើញចូលរួមប្រជុំនៅប្រទេសឡាវ លើគម្រោងពិភាក្សា នៃការតភ្ជាប់ផ្លូវរថភ្លើងល្បឿនលឿនរួមមាន៖ ប្រទេសចិន វៀតណាម ឡាវ ថៃ និងកម្ពុជា ដើម្បីសម្រួលដល់ការដឹកជញ្ជូន ក្នុងប្រទេសជាប់តំបន់ទន្លេមេគង្គ។លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា ថ្លែងប្រាប់ភ្នាក់ងារអ្នកយកព័ត៌មាន BTV ឱ្យដឹងថា នៅថ្ងៃទី២១ ខែមិថុនា ឆ្នាំ២០២២នេះ ប្រតិភូក្នុងវិស័យឡូជីស្ទិកនៃវិស័យឯកជននៅកម្ពុជា មានជាង ៣០ ក្រុមហ៊ុន ដែលដឹកនាំដោយលោកឧកញ៉ាផ្ទាល់ បានអញ្ជើញទៅចូលប្រជុំនៅប្រទេសឡាវ ដោយក្នុងកិច្ចប្រជុំនោះ មានការចូលរួមពីប្រតិភូប្រាទេសវៀតណាម ថៃ និងប្រទេសឡាវ ខ្លួនឯងដោយផ្ទាល់ ដើម្បីប្រជុំពិភាក្សា នៃគម្រោងការតភ្ជាប់ផ្លូវរថភ្លើងល្បឿនលឿន (ប្រទេសជាប់តំបន់ទន្លេមេគង្គ) រវាងប្រទេសចិន វៀតណាម ឡាវ ថៃ និងកម្ពុជា។លោកឧកញ៉ា បន្តឲ្យថា ជុំវិញការប្រជុំពិភាក្សានៃគម្រោងតភ្ជាប់ផ្លូវរថភ្លើងឆ្លងកាត់អាស៊ាននេះ ពិតជាមានសារៈសំខាន់ណាស់ ប្រសិនការអនុវត្តប្រព្រឹត្តិទៅដោយរលូន វានឹងផ្តល់ផលប្រយោជន៍ នឹងសម្រួលដល់ការដឹកជញ្ជូន ជាពិសេសការដឹកជញ្ជូនទំនិញឆ្លងកាត់ពីកម្ពុជាទៅកាន់ប្រទេសចិន, ខណៈបច្ចុប្បន្នការដឹកជញ្ជូនតាមផ្លូវទឹករវាងកម្ពុជា-ចិន បានប្រើប្រាស់រយៈពេលយូរ ចន្លោះពី ១០ ថ្ងៃ ទៅ១៥ថ្ងៃ ។ ចំណែកជុំវិញការដឹកជញ្ជូនតាមផ្លូវរថភ្លើងនេះ បើយើងគិតរយៈពេលនៃការដឹកជញ្ជូន ពីគុណមិញប្រទេសចិន មកដលប្រទេសឡាវ គឺប្រើប្រាស់រយៈពេលត្រឹម ៧២ ម៉ោងប៉ុណ្ណោះ ដែលបញ្ហានេះ យើងត្រូវពិភាក្សាឲ្យបានច្បាស់លាស់សម្រាប់ការតភ្ជាប់ ជាពិសេសតម្លៃនៃការដឹកជញ្ជូនតែម្តង។សូមបញ្ជាក់ថា ជុំវិញវិស័យដឹកជញ្ជូន, បច្ចុប្បន្នផលប៉ះពាល់បានកើតឡើង គឺការរឹតត្បិតនៃការទប់ស្កាត់នៃការរីករាលដាលជម្ងឺកូវីដ១៩, ការឡើងថ្លៃប្រេង ដោយសារសង្គ្រាមនៅរុស្សី-អ៊ុយក្រែនជាដើម ដែលការងារនេះបានជះឥទ្ធិពលដល់ការឡើងថ្លៃនៃសេវាដឹកជញ្ជូន ក្នុងនោះចំពោះថ្លៃសេវាដឹកជញ្ជូនតាមកប៉ាល់វិញ បានប្រែប្រួលយ៉ាងខ្លាំងផងដែរ ខណៈតម្លៃនៃការដឹកជញ្ជូនពីមុន ថ្លៃមួយកុងតេន័រ ចន្លាះពី ២ ៥០០ ទៅ ៣ ០០០ ដុល្លារអាមេរិក បច្ចុប្បន្នបានហក់ជាង ៨ ០០០ ដុល្លារក្នុងមួយទូរ ៕ អត្ថបទ៖ សុន រ៉ាឌី

មជ្ឈមណ្ឌលពាណិជ្ជកម្មឯកជនកម្ពុជានៅជប៉ុន នឹងចូលរួមផ្សព្វផ្សាយសក្តានុពលវិនិយោគ និងធុរកិច្ចនៅកម្ពុជា

ភ្នំពេញ៖ មជ្ឈមណ្ឌលពាណិជ្ជកម្មឯកជនកម្ពុជា (Cambodia Private Commercial Center) នៅទីក្រុង Atsugi នៃខេត្ត Kanagawa ប្រទេសជប៉ុន ត្រូវបានសម្ពោធជាផ្លូវការ ដែលនឹងក្លាយជាស្ពានសម្រាប់ផ្សារភ្ជាប់កាន់តែល្អប្រសើរថែមទៀតនូវទំនាក់ទំនងការទូត សេដ្ឋកិច្ច ពាណិជ្ជកម្ម ទេសចរណ៍ នៃប្រទេសទាំងពីរ។ក្រសួងពាណិជ្ជកម្ម បានបញ្ជាក់ថា កាលពីល្ងាចថ្ងៃទី២០ មិថុនា ឆ្នាំ២០២២ ពិធីសម្ពោធជាផ្លូវការ នេះ មានការចូលរួមជាភ្ញៀវកត្តិយសដោយផ្ទាល់ និងផ្ញើរសារជូនពរពីឥស្សរជនជាន់ខ្ពស់ជាច្រើនរូបពីភាគីជប៉ុន ព្រមទាំងភ្ញៀវកិត្តិយសជាឥស្សរជន នយោបាយ, សមាជិករដ្ឋសភា, សមាជិកសភាខេត្ត, អ្នកការទូត, អភិបាលក្រុង ស្រុក តំណាងស្ថាប័នគាំទ្រពាណិជ្ជកម្ម សភាពាណិជ្ជកម្ម សមាគមអាជីវកម្ម ក្រុមហ៊ុនជាច្រើនផ្សេងទៀត។ក្នុងឱកាសនោះ ឯកឧត្តម ទុយ រី ឯកអគ្គរាជទូតវិសាមញ្ញ និងពេញសមត្ថភាពព្រះរាជាណាចក្រកម្ពុជា ប្រចាំប្រទេសជប៉ុន មានប្រសាសន៍ថា ការបង្កើតមជ្ឈមណ្ឌលពាណិជ្ជកម្មឯកជនកម្ពុជា នៅប្រទេសជប៉ុន គឺជាសមិទ្ធផលថ្មីស្រឡាង បានមកពីការរួមសហការរបស់វិស័យឯកជននៅជប៉ុន និងស្ថាប័នជំនាញនៅកម្ពុជា ដោយមានស្ថានទូតនៃប្រទេសទាំងពីរ ជាស្ពានសម្របសម្រួល។មជ្ឈមណ្ឌលនេះ គឺជាស្ពាន និងជាកន្លែងសម្រាប់ពាណិជ្ជករ វិនិយោគិនជប៉ុន និងសាធារណជនទូទៅមកទំនាក់ទំនងដោយផ្ទាល់ ពិនិត្យផលិតផលសក្តានុពលកម្ពុជា ដែលមានតាំងបង្ហាញ សាកសួរព័ត៌មានច្បាប់បញ្ញត្តិ និងស្រាយចម្ងល់នានា ដើម្បីមានមូលដ្នានសម្រេចធ្វើពាណិជ្ជកម្ម វិនិយោគរវាងកម្ពុជា-ជប៉ុន។ឯកឧត្តម បានជម្រាបជូនអង្គពិធី អំពីសមិទ្ធិផលថ្មីៗដែលកម្ពុជាសម្រេចបាន ក្នុងការលើកកម្ពស់បរិយាកាសធុរកិច្ច និងការស្ដារសេដ្ចកិច្ចឡើងវិញ ក្រោយពីវិបត្តិនៃជំងឺកូវីដ-១៩ រួមមាន៖ ភាពជោគជ័យលើការគ្រប់គ្រងកូវីដ១៩ តាមការចាក់វ៉ាក់សាំងការពារបានយ៉ាងទូលំទូលាយជូនប្រជាពលរដ្ឋទូទាំងប្រទេសក្រោមការដឹកនាំរបស់សម្តេចតេជោ នាយករដ្ឋមន្ត្រី, ការសម្រេចបានសមិទ្ធផលថ្មីៗបន្ថែមទៀតក្នុងកាលៈទេសៈកូវីដ១៩ គឺការសាងសង់ព្រលានយន្តហោះថ្មីចំនួន៣ (ភ្នំពេញថ្មី សៀមរាប និងកោះកុង) និងការសាងសង់ផ្លូវល្បឿនលឿនថ្មី១ខ្សែភ្នំពេញ-ខេត្តព្រះសីហនុ។ឯកឧត្តម ក៏បានលើកឡើងពីច្បាប់ស្តីពីការវិនិយោគថ្មី ដែលត្រូវបានអនុម័ត នាខែតុលា ឆ្នាំ២០២១ និងការចូលជាធរមាននៃកិច្ចព្រមព្រៀងដៃគូពាណិជ្ជកម្មតំបន់គ្រប់ជ្រុងជ្រោយ (RCEP) ដែលជប៉ុនជាសមាជិកដ៏សំខាន់មួយ, និងចំណងមិត្តភាពភាតរភាព និងកិច្ចសហប្រតិបត្តិការរវាងកម្ពុជា និងជប៉ុន នៅតែស្ថិតស្ថេរ និងបន្តរីកចម្រើន ដោយសារការប្តេជ្ញាចិត្តយ៉ាងមុតមាំរបស់ប្រទេសកម្ពុជា និងជប៉ុន ក្នុងការអភិវឌ្ឍបន្ថែមទៀតនូវទំនាក់ទំនងទ្វេភាគី ទោះបីជាមានការរាតត្បាតនៃជំងឺកូវីដ-១៩ ក៏ដោយ។ឆ្លៀតក្នុងឱកាសនោះ ឯកឧត្តម បានថ្លែងអំណគុណចំពោះ ក្រុមហ៊ុន Kojima Holding Co., Ltd សហគមន៍ខ្មែរនៅជប៉ុន, ក្រសួងស្ថាប័នជំនាញ បានគាំទ្រជាកំលាំងកាយ កំលាំងចិត្ត ស្មារតី ឯកសារ សម្ភារៈ និងការសម្របសម្រួលគ្រប់ទំរង់ រួមចំណែកធ្វើឲ្យកើតជារូបរាងឡើង មជ្ឈមណ្ឌលពាណិជ្ជកម្មឯកជនកម្ពុជាដ៏ស្រស់ល្អ ដំបូងគេលើទឹកដីជប៉ុននៅពេលនេះ៕ អត្ថបទ៖ បូរ៉ាវី

តម្លៃប្រេងម៉ាស៊ូតឡើងបន្ថែម ២០០រៀល ខណៈប្រេងសាំងធម្មតារក្សាតម្លៃដដែល រហូតដល់បំណាច់ខែមិថុនា

ភ្នំពេញ៖ ក្រសួងពាណិជ្ជកម្មប្រកាសពីតម្លៃលក់រាយប្រេងឥន្ធនៈ តាមស្ថាបនីយនានាទូទាំងប្រទេស ចាប់ពីថ្ងៃទី២១-៣០ ខែមិថុនា ឆ្នាំ២០២២ ដោយប្រេងសាំងធម្មតាត្រូវលក់តម្លៃ ៥.៨០០រៀល/លីត្រ(តម្លៃដដែល) និងប្រេងម៉ាស៊ូតត្រូវលក់តម្លៃ ៦.៣០០រៀល/លីត្រ(ឡើង ២០០រៀល)។

អ្នកជំនាញសេដ្ឋកិច្ច ជំរុញការផលិតក្នុងស្រុក ជំនួសការប្រើប្រាស់ទំនិញនាំចូល ដើម្បីទប់ទល់នឹងអតិផរណា

ភ្នំពេញ៖ តម្លៃប្រេងកើនឡើងខ្ពស់ បានជះឥទ្ធិពលទៅលើតម្លៃមុខទំនិញជាទូទៅឡើង ដែលបង្កទៅជាអតិផរណានៃមុខទំនិញ។ អ្នកជំនាញសេដ្ឋកិច្ច លើកឡើងថា វិស័យរដ្ឋ និងឯកជន អាចបង្កើនការគ្រប់គ្រង ផលិត និងបង្កើនខ្សែច្រវ៉ាក់ផលិតកម្មក្នុងស្រុកផ្គត់ផ្គង់ទីផ្សារ និងកាត់បន្ថយការនាំចូលទំនិញអតិបរមា ដើម្បីចូលរួមកាត់បន្ថយអតិផរណានៃការកើនថ្លៃម្ហូបអាហារ។លោកបណ្ឌិត ហុង វណ្ណៈ អ្នកជំនាញសេដ្ឋកិច្ច នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជា លើកឡើងក្នុងកិច្ច សម្ភាសន៍ជាមួយភ្នាក់ងារអ្នកយកព័ត៌មាន នៅថ្ងៃទី ២១ ខែមិថុនា ឆ្នាំ ២០២២ នេះថា វិបត្តិជំងឺកូវីដ ១៩ និងវិបត្តិសកលថ្មីរវាងរុស្សី-អ៊ុយក្រែន បាននិងកំពុងធ្វើថ្លៃទំនិញជាទូទៅកើនឡើង។លោកបណ្ឌិត បន្តថា ដើម្បីរក្សាអតិផរណាក្នុងកម្រិតមួយអាចគ្រប់គ្រងបាន អ្នកពាក់ព័ន្ធទាំងក្នុងវិស័យរដ្ឋ និងឯកជន ត្រូវចូលរួមសហការគ្រប់គ្រង ផលិត និងបង្កើនខ្សែច្រវ៉ាក់ផលិតកម្មក្នុងស្រុកជំនួសការនាំចូលឲ្យបានជាអតិបរមា។ចំណែក លោក មៀវ សុខទ្រី ប្រធានសមាគមអ្នកផលិតចំណីអាហារកម្ពុជា លើកឡើងថា នៅកម្ពុជា វិស័យម្ហូបអាហារនេះ មានការប្រែប្រួលបន្តិចបន្ទួចផងដែរ តែចំពោះស្រូវ-អង្ករ ដែលជាចំណែកនៃការផ្គត់ផ្គង់ធំជាងគេ មិនទាន់មានការប្រែប្រួលគួរឱ្យកត់សម្គាល់ឡើយ។ លោករំពឹងថា នៅក្នុងរយៈពេលខ្លីឆ្នាំ២០២២-២០២៣ កម្ពុជានឹងអាចទប់ស្កាត់បាន។សូមបញ្ជាក់ថា ជុំវិញអតិផរណាថ្លៃម្ហូបអាហារនៅកម្ពុជា ថ្មីៗនេះ មន្រ្តីជំនាញហិរញ្ញវត្ថុ ធនាគារជាតិនៃកម្ពុជា បានបង្ហាញនូវការព្រួយបារម្មណ៍ផងដែរ ចំពោះបញ្ហាកើតឡើងជាសកល នៃភាពមិនច្បាប់លាស់រុស្សី-អ៊ុយក្រែន និងការអូសបន្លាយនៃវិបត្តិកូវីដ ១៩ ដែលអាចនឹងធ្វើឲ្យមានការប៉ះពាល់ដល់អតិផរណាថ្លៃម្ហូបអាហារ និងមុខទំនិញផ្សេងៗ ប្រសិនវិបត្តិទាំងនេះនៅតែអូសបន្លាយ៕អត្ថបទ៖ សុន រ៉ាឌី

ទុនបម្រុងអន្តរជាតិ ធានាឱ្យកម្ពុជានាំចូលទំនិញ សម្រាប់គ្រាបន្ទាប់បានដល់ជាង ៨ខែ

ភ្នំពេញ៖ ប្រឈមនឹងសម្ពោធសេដ្ឋកិច្ចពីជំងឺកូវីដ-១៩ និងសង្គ្រាមនៅអ៊ុយក្រែនក៏ពិតមែន ទុនបម្រុងអន្តរជាតិរបស់កម្ពុជា នៅតែមានកម្រិតខ្ពស់ ដែលអាចធានាការនាំចូលទំនិញ និងសេវាសម្រាប់គ្រាបន្ទាប់បានរហូតដល់ ៨ខែ។នេះជាការលើកឡើងរបស់លោកជំទាវ ជា សិរី ឧបការី និងជាអគ្គនាយកបច្ចេកទេសធនាគារជាតិនៃកម្ពុជាក្នុងសិក្ខាសាលាស្តីពី «ការផ្សព្វផ្សាយរបាយការណ៍ស្ថិរភាពហិរញ្ញវត្ថុឆ្នាំ ២០២១» ដែលរៀបចំដោយធនាគារជាតិនៃកម្ពុជា ក្នុងថ្ងៃទី ១៧ខែមិថុនា ឆ្នាំ២០២២ នៅទីស្នាក់ការធនាគាជាតិនៃកម្ពុជា។លោកជំទាវ ជា សិរី បាននិយាយថា សកម្មភាពសេដ្ឋកិច្ចក្នុងស្រុកនិងពិភពលោកនៅក្នុងឆ្នាំ២០២១ បានបន្តងើបឡើង បើទោះជាប្រឈមនឹងការលេចឡើងនូវប្រភេទមេរោគបំប្លែងថ្មីនៃជំងឺកូវីដ-១៩ និងការកើនឡើងនៃអត្រាអ្នកឆ្លងក៏ដោយ។ ប៉ុន្តែ ការងើបឡើងវិញនេះមានភាពខុសគ្នាទៅតាមប្រទេសនីមួយៗ និងនៅមានភាពផុយស្រួយនៅឡើយ។ចំពោះកម្ពុជា ភាពអំណោយផលនៃស្ថានភាពសេដ្ឋកិច្ចពិភពលោក គួបផ្សំនឹងជោគជ័យនៃយុទ្ធនាការចាក់វ៉ាក់សាំងបង្ការជំងឺកូវីដ-១៩ទូទាំងប្រទេស បានជំរុញដល់ការងើបឡើងវិញនៃកំណើនសេដ្ឋកិច្ច ជាមួយនឹងអត្រាកំណើន ៣ភាគរយ នៅឆ្នាំ២០២១ បន្ទាប់ពីបានធ្លាក់ចុះ -៣,១ភាគរយក្នុងឆ្នាំ២០២០។បើតាមលោកជំទាវ ជា សិរី កំណើននេះត្រូវបានគាំទ្រជាចម្បងដោយកំណើននាំចេញសំលៀកបំពាក់ និងផលិតផលកសិកម្ម និងផលិតផលកម្មន្តសាលមិនមែនកាត់ដេរ ក៏ដូចជាពាណិជ្ជកម្មលក់ដុំនិងរាយ។លោកជំទាវ ជា សិរី បានបន្តនិយាយថា ទុនបម្រុងអន្តរជាតិមានកម្រិតខ្ពស់គ្រប់គ្រាន់ ដែលអាចធានាការនាំចូលទំនិញ និងសេវាសម្រាប់គ្រាបន្ទាប់បានប្រមាណជាង៨ខែ ខ្ពស់ជាងកម្រិតអប្បបរមា ៣ខែដែលប្រទេសកំពុងអភិវឌ្ឍន៍គួរមាន។តាមអ្នកជំនាញ ទុនបម្រុងអន្តរជាតិដែលកម្ពុជាកំពុងមានបច្ចុប្បន្ន បើធៀបនឹងស្តង់ដារអន្តរជាតិ គឺមានទំហំខ្ពស់ ខណៈកន្លងមកកម្ពុជាប្រើប្រាស់ទុននេះភាគច្រើន ទៅលើការសង់ម្ចាស់បំណុលនៅតាមបណ្តាលប្រទេសផ្សេងៗប៉ុណ្ណោះ។រាជរដ្ឋាភិបាល បានដាក់ចេញនូវគោលនយោបាយម៉ាក្រូប្រុងប្រយ័ត្ន រូបិយវត្ថុ និងសារពើពន្ធ ប្រកបដោយប្រសិទ្ធភាព ដើម្បីស្តារសេដ្ឋកិច្ចឡើងវិញ ជាពិសេសវិធានការអន្តរាគមន៍ ដើម្បីជួយដល់គ្រួសារក្រីក្រ និងអាជីវកម្មដែលងាយរងគ្រោះ ដោយសារវិបត្តិជំងឺកូវីដ ១៩។យោងតាមធនាគារជាតិនៃកម្ពុជា សេដ្ឋកិច្ចកម្ពុជាត្រូវបានរំពឹងថា នឹងកើនឡើងក្នុងរង្វង់ ៥ ភាគរយ នៅឆ្នាំ ២០២២ ដែលគាំទ្រជាចម្បងដោយការនាំចេញនៃផលិតផលកម្មន្តសាល កសិកម្ម ការដឹកជញ្ជូន ទូរគមនាគមន៍ និងភាពប្រសើរឡើងនៃលំហូរវិនិយោគ និងប្រាក់បង្វែររបស់ពលករពីក្រៅប្រទេស៕ អត្ថបទ៖ វណ្ណៈ

កិច្ចសហប្រតិបត្តិការល្អលើផ្នែកពាណិជ្ជកម្មកម្ពុជា-អាមេរិក ធ្វើឲ្យការនាំចេញរបស់កម្ពុជា ហក់ឡើងខ្ពស់

ភ្នំពេញ៖ មន្រ្តីជាន់ខ្ពស់ក្រសួងពាណិជ្ជកម្ម លើកឡើងថា កិច្ចសហប្រតិបត្តិការល្អលើផ្នែកពាណិជ្ជកម្ម ជាពិសេសការអនុគ្រោះពន្ធរបស់សហរដ្ឋអាមេរិក សម្រាប់កម្ពុជា បានផ្តល់ផលប្រយោជន៍យ៉ាងច្រើន ទៅដល់អ្នកវិនិយោគទាំងក្នុងស្រុក និងបរទេស និងជំរុញទំហំពាណិជ្ជកម្មនៃការនាំចេញរបស់កម្ពុជា បានកំពុងហក់ឡើងខ្ពស់គួរទីកត់សម្គាល់។ឯកឧត្តម ឈួន ដារ៉ា រដ្ឋលេខាធិការក្រសួងពាណិជ្ជកម្ម លើកឡើងនៅក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន ស្តីពីការអនុគ្រោះពន្ធ និងការនាំចេញទៅកាន់សហរដ្ឋអាមេរិក ថា ពាណិជ្ជកម្មរវាងកម្ពុជា-អាមេរិក គឺជាកិច្ចសហប្រតិបត្តិការមួយយ៉ាងល្អ ដែលបច្ចុប្បន្នកំពុងបង្ហាញពីភាពជោគជ័យនៃការនាំចេញទំនិញរបស់កម្ពុជា ជាពិសេសបានផ្តល់នូវអត្ថប្រយោជន៍ដល់អ្នកវិនិយោគទាំងអ្នកវិនិយោគខ្មែរ និងបរទេស ដោយពួកគេមកវិនិយោគនៅព្រះរាជាណាចក្រកម្ពុជា ហើយអាចនាំចេញទៅកាន់ទីផ្សារអាមរិក។ចំណែកទីផ្សារនាំចេញ, ឯកឧត្តម បន្តថា ក្រោយពីមានកិច្ចសហប្រតិបត្តិការល្អ, ជាពិសេសមានការអនុគ្រោះពន្ធរបស់សហរដ្ឋអាមេរិកសម្រាប់កម្ពុជា ទំហំពាណិជ្ជកម្មទ្វេរភាគីកម្ពុជា-អាមេរិក ក្នុងឆ្នាំ ២០២១ សរុបមានចំនួនជិត ៨ ០០០ លានដុល្លារអាមេរិក ដោយឡែកកនៅក្នុងរយៈពេល ៥ ខែ ដើមឆ្នាំ ២០២២ នេះ ការនាំចេញទៅកាន់សហរដ្ឋអាមេរិក មានកំណើនជាង ៥៧ ភាគរយ ដែលជាកំណើនធំបំផុតនៃការធ្វើពាណិជ្ជកម្មរវាងប្រទេសទាំងពីរ។យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា កម្ពុជាបាននាំចេញទំនិញ ក្នុងអំឡុងខែមករា ដល់ខែ ឧសភា ឆ្នាំ ២០២២ នេះ មានតម្លៃជាង ៩ ៤១២ លានដុល្លារ កើនឡើង ៣៤,៥ ភាគរយ បើធៀបនឹងរយៈពេលដូចគ្នាកាលពីឆ្នាំមុន ក្នុងនោះ សម្រាប់ការនាំចេញ ផលិតកម្មសំលៀកបំពាក់ស្បែកជើង និងកាបូបធ្វើដំណើរមានតម្លៃសរុបចំនួន ៤ ៤៨៣ ដុល្លារ ស្មើនឹង ៤៧,៧ ភាគរយនៃតម្លៃនាំចេញសរុប។សហរដ្ឋអាមេរិក នៅតែជាទីផ្សារធំបំផុត សម្រាប់ផលិតផលរបស់កម្ពុជា ដែលក្នុងរយៈពេលប្រាំខែនេះ មានទឹកប្រាក់សរុប ៣ ៧២៩ លានដុល្លារ ឬ ស្មើនឹង៥៧,៧ ភាគរយ នៃការនាំចេញសរុបរបស់កម្ពុជា ចំណែការនាំចេញទៅវៀតណាម និងចិនជាប់ចំណាត់ថ្នាក់លេខ២ និងទី៣ ជាមួយនឹងបរិមាណនាំចូលពីកម្ពុជា ១ ០៧៩លានដុល្លារ និង ៥១៩លានដុល្លារ៕ អត្ថបទ៖ សុន រ៉ាឌី

កសិករ សង្កាត់សំរោង កំពុងមមាញឹកប្រមូលផលបន្លែសុវត្ថិភាព ខណៈតម្លៃមានទីផ្សារល្អ

ឧត្ដរមានជ័យ៖ កសិករភូមិអូរឬក្សី សង្កាត់សំរោង ក្រុងសំរោង ឧត្ដរមានជ័យ ប្រកបរបរដាំដុះបន្លែសុវត្ថិភាព កំពុងមមាញឹកក្នុងការប្រមូលផល ដើម្បីតម្រូវការលើទីផ្សារ ខណៈតម្លៃបន្លែមានទីផ្សារល្អ។កសិករឈ្មោះ ថុង ដែលប្រកបមុខរបរដាំដំណាំបន្លែ បានឲ្យដឹងថា ការដាំដំណាំបន្លែ គឺវាតម្រូវឲ្យមានការធ្វើដីពូនរោង មើលថែដាក់ជីធម្មជាតិឲ្យបានទៀងទាត់ នឹងត្រូវមានការពិនិត្យមើលបាញ់ថ្នាំសម្លាប់សត្វល្អិតនៅលើបន្លែឲ្យបានគ្រប់ពេល ដើម្បីឲ្យបន្លែមានសុខភាពរីកលូតលាស់បានល្អប្រកបដោយសុវត្ថិភាព មានគុណភាពល្អ សំរាប់អ្នកបរិភោគ។កសិកររូបនេះ បានបន្តថា បន្លែខ្លះការរីកលូតលាស់មានរយៈពេលខ្លីអាចប្រមូលផលបានលឿន រីឯបន្លែខ្លះទៀត ការលូតលាស់របស់វាមានរយៈពេលយូរចាប់ពីរខែទៅបីខែ ទើបអាចកាត់បេះប្រមូលផលបាន ប៉ុន្តែការប្រមូលផលនេះដែរ នៅពេលបន្លែទាំងអស់នេះដុះលូតលាស់ធំស្មើរៗគ្នាហើយនោះ គឺយើងអាចបេះកាត់យកបានជាបន្តបន្ទាប់ ដើម្បីទាន់តម្រូវការផ្គត់ផ្គង់លក់លើទីផ្សារបានដោយស្រួលផងដែរ។លោក សូត្រ ស៊ីសុខឃាង ប្រធានមន្ទីរកសិកម្មរុក្ខាប្រមាញ់ នឹងនេសាទខេត្តឧត្តរមានជ័យ បានបញ្ជាក់ថា បច្ចុប្បន្ន ការដាំដំណាំរួមផ្សំរបស់បងប្អូនប្រជាកសិករ នៅតាមមូលដ្ឋានជាលក្ខណៈបណ្តុំអាជីវកម្មរបស់ពួកគាត់ខាងមន្ទីរ ក៏ដូចអង្គការនានា បានយកចិត្តទុកដាក់ជួយផ្តល់នូវគ្រប់ពូជក៏ដូចជាស្បៃមុងសុវត្ថិភាព នឹងផ្តល់ការប្រឹក្សាយោបល់ពីវិធីសាស្រ្តផ្សេងៗ ក្នុងការដាំដុះបន្លែធម្មជាតិដល់ពួកគាត់ដើម្បីឲ្យការធ្វើកសិកម្មទទួលជោគជ័យផងដែរ។លោក បន្តទៀតថា បច្ចុប្បន្ននេះ តម្លៃបន្លែនៅលើទីផ្សារហាក់បីដូចជាមានតម្លៃហក់ឡើងខ្ពស់ជាងមុននឹងមានតម្រូវការច្រើននៅលើទីផ្សារច្រើន ដោយសារតែមិនសូវមានក្រុមឈ្មួញនាំបន្លែចូលពីក្រៅប្រទេសជិតខាងនោះឡើយ ធ្វើឲ្យកសិករយើងប្រកបមុខរបរដាំបន្លែមានជីវភាពធូរធារបានប្រសើរច្រើនជាងមុន ៕ អត្ថបទ៖ ឃិន សារិទ្ធ

រដ្ឋមន្ត្រីពាណិជ្ជកម្ម និងក្រុមហ៊ុននៅប្រទេសស្វីស ពិភាក្សាឱកាសវិនិយោគបន្ថែមនៅកម្ពុជា

ភ្នំពេញ៖ តាមរយៈការអញ្ជើញរបស់ក្រុមហ៊ុន ណេសស្លេ ស្វីសហ្សឺឡេន (Nestlé Switzerland) ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានដឹកនាំគណៈប្រតិភូធ្វើទស្សនកិច្ចផ្ទាល់នៅក្រុមហ៊ុន ដែលមានទីតាំងនៅទីក្រុង Vevey ប្រទេសស្វីស ដើម្បីពិភាក្សាការងារ ផ្លាស់ប្ដូរព័ត៌មាន និងស្តាប់នូវបទបង្ហាញរបស់ក្រុមហ៊ុន ក្នុងការធ្វើប្រតិបត្តិការអាជីវកម្ម លើទីផ្សារលើពិភពលោក ក៏ដូចជាទីផ្សារកម្ពុជា ព្រមទាំងដើម្បីស្វែងរកឱកាសវិនិយោគបន្ថែមទៀតនៅកម្ពុជា។ក្រសួងពាណិជ្ជកម្ម កាលល្ងាចថ្ងៃទី១៧ មិថុនា ឆ្នាំ២០២២នេះ បានឲ្យដឹងនៅក្រោយបញ្ចប់ទស្សនកិច្ចថា ឯកឧត្តមរដ្ឋមន្រ្តីបានជម្រាបជូនភាគីជំនួប អំពីវឌ្ឍនភាព និងការអភិវឌ្ឍរបស់ប្រទេសកម្ពុជាក្រោមការដឹកនាំរបស់សម្តេចនាយករដ្ឋមន្រ្តីតេជោ ហ៊ុន សែន ដែលបានដាក់ចេញនូវយុទ្ធនាការស្រោចវ៉ាក់សាំងជូនប្រជាពលរដ្ឋទូទាំងប្រទេស រហូតសម្រេចបានប្រមាណ ៩៥% នៃប្រជាពលរដ្ឋទាំងអស់ និងបានប្រកាសបើកប្រទេសសារជាថ្មីតាំងដើមខែវិច្ឆិកា ឆ្នាំ២០២១មកម្លេះ។ ឯកឧត្តម បានជម្រាបជូនបន្ថែម អំពីសក្ដានុពលវិនិយោគនៅកម្ពុជា ដោយបានលើកឡើងថា ថ្មីៗនេះ កម្ពុជាសម្រេចបានកិច្ចព្រមព្រៀងពាណិជ្ជកម្មសេរីទ្វេភាគី កម្ពុជា-ចិន, កម្ពុជា-កូរ៉េ និងកិច្ចព្រមព្រៀងដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់ ដែលមានប្រទេសអាស៊ាន១០ និងដៃគូមាន៖ ចិន ជប៉ុន កូរ៉េ អូស្ត្រាលី និងណូវ៉ែលហ្សេឡង់។ឯកឧត្តម បន្តទៀតថា កម្ពុជាបានខិតខំប្រឹងប្រែងក្នុងការងារកសាងបទដ្ឋានគតិយុទ្ធ និងធ្វើវិសោធនកម្មច្បាប់សំខាន់ៗជាច្រើន ដើម្បីធានាបាននូវបរិយាកាសធុរកិច្ច និងវិនិយោគ ប្រកបដោយសុច្ចរិតភាព និងកាន់តែល្អប្រសើបន្ថែមទៀត ជាក់ស្ដែងដូចជា៖ ច្បាប់ស្តីពីការគ្រប់គ្រងគុណភាព សុវត្ថិភាព ផលិតផលទំនិញ និងសេវា, ច្បាប់ស្តីកិច្ចការពារ អ្នកប្រើប្រាស់, ច្បាប់ស្តីពីកិច្ចការប្រកួតប្រជែង, និងច្បាប់ស្តីសុវត្ថិភាពម្ហូបអាហារ ដែលច្បាប់ទាំងនេះ នឹងចូលរួមចំណែកយ៉ាងសំខាន់ក្នុងការបង្កើនទំនុកចិត្តរបស់អ្នកវិនិយោគបន្ថែមទៀតនៅកម្ពុជា។ឆ្លៀតក្នុងឱកាសនោះ ឯកឧត្តមរដ្ឋមន្ត្រី បានស្នើឱ្យក្រុមហ៊ុនសហការជាមួយអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប.) ដើម្បីរួមគ្នាដោះស្រាយអំពីក្ដីព្រួយបារម្ភរបស់ប្រជាពលរដ្ឋលើបញ្ហាអាហាររូបត្ថម្ភ និងការដាក់សារធាតុអាហាររូបត្ថម្ភក្នុងអាហារ បញ្ហាសុវត្ថិភាពម្ហូបអាហារ និងការក្លែងបន្លំផលិតផលជាដើម។បន្ថែមពីនេះ ឯកឧត្តមបានណែនាំឱ្យភាគីក្រុមហ៊ុន និងអគ្គនាយកដ្ឋាន ក.ប.ប. ពិនិត្យលទ្ធភាពក្នុងការរៀបចំជាអនុស្សានៈនៃការយោគយល់គ្នា (MOU) នាពេលខាងមុខផងដែរ។ជាការឆ្លើយតប ភាគីតំណាងក្រុមហ៊ុន Nestlé Switzerland បានសម្ដែងនូវការស្វាគមន៍យ៉ាងកក់ក្ដៅ និងថ្លែងអំណរគុណចំពោះវត្តមានរបស់ ឯកឧត្តមរដ្ឋមន្ត្រី និងគណៈប្រតិភូក្រសួងពាណិជ្ជកម្ម ចំពោះដំណើរទស្សនកិច្ចនេះ ព្រមទាំងបានបង្ហាញពីការប្ដេជ្ញាចិត្តសហការយ៉ាងជិតស្និតជាមួយក្រសួងពាណិជ្ជកម្ម ក្នុងការដោះស្រាយបញ្ហាខាងលើ ឱ្យមានប្រសិទ្ធភាពបំផុត៕អត្ថបទ៖ ឈិត បូរ៉ាវី

ទីផ្សារដំឡូងមីបច្ចុប្បន្នមានតម្លៃល្អប្រសើរជាងឆ្នាំកន្លងទៅ

ភ្នំពេញ៖ មន្រ្តីជាន់ខ្ពស់នៃក្រសួងពាណិជ្ជកម្ម អះអាងថា តម្លៃដំឡូងមីក្នុងឆ្នាំ២០២២នេះ សម្រាប់ដំឡូងមីស្រស់ មានតម្លៃចន្លោះពី ២០០-២៨០រៀល ក្នុង១គីឡូ និងដំឡូងមីក្រៀម តម្លៃចន្លោះពី ៧០០-៧៨០រៀល ក្នុង១គីឡូដែលតម្លៃទំាងនេះ មានលក្ខណៈល្អប្រសើរ ធៀបនឹងឆ្នាំកន្លងទៅ។នៅក្នុងបណ្តាញសង្គម ក្រោយសិក្ខាសាលា ស្តីពីការផ្សព្វផ្សាយគោលនយោបាយជាតិស្តីពីដំឡូងមី២០២០-២០២៥ កាលពីថ្ងៃទី១៧ មិថុនា ឆ្នាំ២០២២កន្លងទៅនេះ ឯកឧត្តម រាជ រ៉ា រដ្ឋលេខាធិការក្រសួងពាណិជ្ជកម្ម និងជាអនុប្រធានក្រុមការងារអចិន្ត្រៃយ៍នៃក្រុមការងារអន្តរស្ថាប័ន សម្រាប់ពិនិត្យតាមដាន វាយតម្លៃការអនុវត្តន៍គោលនយោបាយជាតិស្តីពីដំឡូងមី២០២០-២០២៥ បានលើកឡើងថា កាលពីខែកុម្ភៈកន្លងទៅ ឯកឧត្តមរដ្ឋមន្ត្រី បានចុះកិច្ចព្រមព្រៀងជាមួយរដ្ឋបាលស្វយ័តខេត្តក្វាងស៊ី នៃសាធារណរដ្ឋប្រជាមានិតចិន ដើម្បីជំរុញការនាំចេញដំឡូងមីក្រៀមឱ្យបាន ៤០ម៉ឺនតោន ក្នុងមួយឆ្នាំ និងផ្តល់នូវកិច្ចសម្រួលពាណិជ្ជកម្ម ពន្លឿននីតិវិធីនៃការនាំចេញ មិនធ្វើ ស៊ីអូ (CO) បើប្រទេសនាំចូលមិនត្រូវការវិមជ្ឈការឱ្យមន្ទីរពាណិជ្ជកម្ម នៅតាមបណ្តាខេត្តជាប់ព្រំដែនអាចចេញ CO ទម្រង់ D នាំចេញទំនិញកសិផលបាន។ឯកឧត្តម បានបញ្ជាក់ថា ទាក់ទងនិងដំណាំដំឡូងមី នៅក្នុងខេត្តបាត់ដំបង និងខេត្តសៀមរាប មានផ្ទៃដីដាំដុះសរុបទំហំប្រមាណជាង ២១ម៉ឺនហិចតា ជាមួយនិងបរិមាណផលប្រមាណជាង ១៨,៩តោន។ ឯកឧត្តម បានឲ្យដឹងថា នៅឆ្នាំ២០២១ កន្លងទៅ កម្ពុជានាំចេញដំឡូងមីស្រស់ ក្រៀម ម្សៅដំឡូងមី និងកាកសំណល់ដំឡូងមីបានជិត ៣លានតោន ទៅកាន់ទីផ្សារអន្តរជាតិ ជាពិសេសប្រទេសថៃ និងវៀតណាម។សូមបញ្ជាក់ថា កាលពីដើមឆ្នាំ២០២១ រាជរដ្ឋាភិបាលកម្ពុជា បានដាក់ឲ្យអនុវត្តនូវគោលនយោបាយជាតិ ស្តីពីដំឡូងមី២០២០-២០២៥ ដោយបានបង្កើតបន្ថែមនូវក្រុមការងារអន្តរស្ថាប័ន សម្រាប់ពិនិត្យ តាមដាន និងវាយតម្លៃការអនុវត្តគោលនយោបាយនេះឲ្យកាន់តែមានប្រសិទ្ធិភាព។ លើសពីនេះទៀត ជំរុញឲ្យប្រទេសកម្ពុជា ក្លាយជាទីតាំងផលិតកែច្នៃ និងជាអ្នកផ្គត់ផ្គង់ផលិតផលដំឡូងមីមួយ ប្រកបដោយភាពជឿទុកចិត្តសម្រាប់ជំរុញការនាំចេញទៅទីផ្សារពិភពលោក៕ អត្ថបទ៖ ឈិត បូរ៉ាវី

លោក ហ៊ុន ម៉ាណែត៖ រាជរដ្ឋាភិបាលកម្ពុជា ទទួលស្វាគមន៍ និងផ្តល់កិច្ចសហប្រតិបត្តិការជានិច្ចចំពោះគម្រោងវិនិយោគិនទាំងអស់

ពោធិ៍សាត់៖ លោក ហ៊ុន ម៉ាណែត បានអំពាវនាវដល់វិនិយោគិនទាំងអស់ ឱ្យជ្រើសរើសយកកម្ពុជា ជាគោលដៅសម្រាប់ការវិនិយោគ ដោយយោងទៅលើអំណោយផល នៃសុខសន្តិភាព ស្ថិរភាពនយោបាយ និងម៉ាក្រូសេដ្ឋកិច្ចរបស់កម្ពុជា។លោក ហ៊ុន ម៉ាណែត បានអះអាងបន្ដថា រាជរដ្ឋាភិបាលកម្ពុជាទទួលស្វាគមន៍ និងផ្តល់កិច្ចសហប្រតិបត្តិការជានិច្ច ចំពោះគម្រោងវិនិយោគទាំងអស់ ជាពិសេសគម្រោងវិនិយោគ ដែលនឹងជួយជំរុញកំណើនសេដ្ឋកិច្ចកម្ពុជាប្រកបដោយភាពធន់, ចីរភាព និងបរិយាបន្ន ដើម្បីសម្រេចបាននូវចក្ខុវិស័យកម្ពុជា ឆ្នាំ២០៣០ និងឆ្នាំ២០៥០នាពេលអនាគត។លោក ហ៊ុន ម៉ាណែត តំណាងសម្តេចតេជោ ហ៊ុន សែន នាយករដ្ឋមន្ត្រី ថ្លែងបែបនេះ ក្នុងពិធីបើកសម្ពោធជាផ្លូវការនៃ រោងចក្រដំឡើងរថយន្ត FORD ដំបូងគេបង្អស់នៅព្រះរាជាណាចក្រកម្ពុជា ដែលស្ថិតនៅក្នុងខេត្តពោធិ៍សាត់ នៅថ្ងៃទី១៦ ខែមិថុនាឆ្នាំ២០២២នេះ។ក្នុងឱកាសនោះ លោក ហ៊ុន ម៉ាណែត ថ្លែងអរគុណចំពោះក្រុមហ៊ុនអន្តរជាតិ RMA Group ជាក្រុមហ៊ុននាំមុខមួយក្នុងការផ្គត់ផ្គង់ផលិតផល និងសេវាកម្មជូនដល់ប្រជាពលរដ្ឋកម្ពុជា និងក្រុមហ៊ុន Ford Motor Company ជាក្រុមហ៊ុនដ៏ធំរបស់សហរដ្ឋអាម៉េរិក ដែលបានផ្តល់ទំនុកចិត្តជ្រើសរើសប្រទេសកម្ពុជា ជាទីតាំងវិនិយោគក្នុងវិស័យឧស្សាហកម្មដំឡើងរថយន្តដើម្បីចែកចាយនៅលើទីផ្សារក្នុងស្រុកប្រកបដោយសក្តានុពល ដោយយោងទៅលើស្ថានភាពនៃការអភិវឌ្ឍរីកចម្រើនរបស់ប្រទេសកម្ពុជា និងកំណើនជីវភាពរបស់ប្រជាពលរដ្ឋដូចពេលបច្ចុប្បន្ន។លោកបានបញ្ជាក់ថា ការបង្កើតរោងចក្រដំឡើងរថយន្ត Ford នៅក្នុងទឹកដីនៃខេត្តពោធិ៍សាត់ ប្រទេសកម្ពុជាជាពេលនេះ គឺជាមោទនភាពមួយសម្រាប់អ្នកមូលដ្ឋាននៅទីនេះ ក៏ដូចជាប្រជាជននៅទូទាំងប្រទេស ក្នុងការទទួលស្វាគមន៍វត្តមានរបស់ឧស្សាហកម្មធុនធ្ងន់ដ៏ទំនើបមួយនេះ ដែលពិតជាបានចូលរួមបង្កើនឱកាសការងារ និងកំណើនប្រាក់បៀវត្សរ៍, ការអភិវឌ្ឍធនធានមនុស្សតាមរយៈការបណ្តុះបណ្តាលជំនាញ និងបែបបទស្តង់ការងារលើគ្រប់កម្រិត ព្រមទាំងការផ្ទេរបច្ចេកវិទ្យាដោយការអនុវត្តការងារផ្ទាល់នៅក្នុងខ្សែច្រវាក់ផលិតកម្ម ដោយមិនមែនត្រឹមតែជាការជំរុញកំណើនសេដ្ឋកិច្ចជាតួលេខមួយមុខនោះឡើយ ហើយទាំងនេះក៏សុទ្ធសឹងជាមូលដ្ឋាន ដើម្បីជាការត្រៀមខ្លួនចូលរួមប្រកួតប្រជែង ទាញយកផលប្រយោជន៍ពីដំណើរការសេដ្ឋកិច្ចទីផ្សារសេរី នៅក្នុងចរន្តសាកលភាវូបនីយកម្ម និងការអភិវឌ្ឍសម្រាប់រយៈពេលវែងទៅមុខ ។លោក បានរំលេចផងដែរថា រោងចក្រនេះ គឺជាគំរូនៃឱកាសជោគជ័យមួយ ដែលនឹងដើរតួនាទីជាអ្នកត្រួសត្រាយផ្លូវ និងលើកទឹកចិត្តដល់ការវិនិយោគទ្រង់ទ្រាយធំជាបន្តបន្ទាប់ទៀត ជាពិសេសការវិនិយោគនៅក្នុងវិស័យយានយន្ត ក្នុងពេលអនាគតទៀត។អគ្គនាយកក្រុមហ៊ុន RMA Cambodia លោក ងន សាំង បានលើកឡើងថា រោងចក្រដំឡើងរថយន្ត FORD នេះ នឹងចូលរួមចំណែកអភិវឌ្ឍន៍វិស័យឧសហ្សាកម្មយានយន្ត និងជំរុញសេដ្ឋកិច្ចជាតិតាមរយៈការបង្កើនខ្សែច្រវាក់ផលិតកម្មក្នុងស្រុក ស្របតាមស្តង់ដារអន្តរជាតិ ក្នុងសម័យសាកលភាវូបនីយកម្មបច្ចេកវិទ្យា។ ក្រុមហ៊ុន RMA Cambodia មិនត្រឹមតែផ្ដល់នូវឱកាសការងារជូនប្រជាពលរដ្ឋមូលដ្ឋានប្រមាណជាង ៥០០ កន្លែងប៉ុណ្ណោះទេ ប៉ុន្តែវត្តមានរបស់រោងចក្រនេះ ក៏បានចូលរួមចំណែកលើកកម្ពស់សេដ្ឋកិច្ចក្នុងតំបន់ តាមរយៈការជំរុញសន្ទុះអាជីវកម្ម និងការបង្កើតឱកាសការងារដោយប្រយោលផងដែរ៕

បណ្ដាញសង្គម

ព័ត៌មានថ្មីៗ

ឯកឧត្តម ហ៊ុន ម៉ានី៖ ក្នុងនាមជាយុវជនជំនាន់ក្រោយ ខ្ញុំពិតជាមានមោទនភាពចំពោះគំរូវីរភាព និងការលះបង់របស់ថ្នាក់ដឹកនាំជំនាន់មុន ក្នុងបុព្វហេតុស្វែងរកសុខសន្តិភាព ស្ថិរភាព និងការអភិវឌ្ឍជូនជាតិមាតុភូមិ

សំរាមប្រមាណបួនពាន់មួយរយតោនត្រូវបានប្រមូលក្នុងមួយថ្ងៃនៅភ្នំពេញ

មន្រ្តីជាន់ខ្ពស់ គ.ជ.គ.ម អញ្ជើញចុះសួរសុខទុក្ខជនភៀសសឹក នៅខេត្តបន្ទាយមានជ័យ

អ្នកនាំពាក្យ៖ បេសកកម្មការទូតរបស់សម្តេចធិបតីនៅអាម៉េរិក និងអឺរ៉ុបផ្សារភ្ជាប់កាតព្វកិច្ចការពារបូរណភាពទឹកដី និងប្រជាពលរដ្ឋ

ឆ្នាំនេះ កម្ពុជា-ចិន នឹងរួមគ្នារៀបចំព្រឹត្តិការណ៍ទេសចរណ៍ថ្មីៗ ដើម្បីទាញភ្ញៀវទេសចរចិនមកលេងកម្ពុជាកាន់តែច្រើន

ជនអន្តោប្រវេសន៍ដែលត្រូវបានជួយសង្រ្គោះបានចុះនៅកំពុងផែកោះ Crete របស់ក្រិក ក្រោយទូកពួកគេលិច

មនុស្សរាប់ពាន់នាក់ជួបជុំគ្នានៅទីក្រុង Lyon ក្រោយសកម្មជនស្នាំនិយមជ្រុលបារាំងម្នាក់ ត្រូវបានសម្លាប់

ប្រធានសភា៖វេណេស៊ុយអេឡា ទទួលបានសំណើជាង ១.៥៥០ ក្រោមច្បាប់លើកលែងទោសថ្មី

ការវាយប្រហារអ៊ីស្រាអែលលើលីបង់សម្លាប់មនុស្ស ១០នាក់ រួមទាំងមន្រ្តីជាន់ខ្ពស់ហេសបូឡាម្នាក់ផងដែរ

«ផែនទីបង្ហាញផ្លូវ ស.ស.យ.ក. ២.០ គឺជាឧបករណ៍ដ៏សំខាន់ ក្នុងការកំណត់ទិសដៅរួមសម្រាប់ការពង្រឹង ស.ស.យ.ក. ឱ្យកាន់តែមានភាពរឹងមាំ ធន់ និងធានាបាននូវនិរន្តរភាព ឆ្លើយតបទៅនឹងបរិការណ៍ពិភពលោកដែលកំពុងវិវត្តន៍យ៉ាងឆាប់រហ័ស»

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877