BTV NEWS

ឆមាសទី១ឆ្នាំនេះ កម្ពុជានាំចេញគ្រាប់ស្វាយចន្ទី មានទឹកប្រាក់ជាង ១,១ ពាន់លានដុល្លារ

មូលនិធិអភិវឌ្ឍន៍ EDFមើលឃើញថា ធុរកិច្ចបណ្តុះបណ្ដាលថ្មី និងSME ជាក្បាលម៉ាស៊ីនជំរុញកំណើនសេដ្ឋកិច្ចកម្ពុជា

លំហូរទឹកប្រាក់វិនិយោគចូលកម្ពុជានៅឆមាសទី១ ឆ្នាំ២០២៦ មាន ៤.៣ ប៊ីលានដុល្លារ កើនឡើង ៧ដង

កម្ពុជាមានរោងចក្រ-សហគ្រាសក្នុងវិស័យកម្មន្តសាលកំពុងដំណើរការ បានកើនដល់ ៤៧,៧ ពាន់

សេដ្ឋកិច្ច និង កសិកម្ម

ក្រសួងពាណិជ្ជកម្មបើកកិច្ចប្រជុំលើកដំបូង ដើម្បីបង្ហាញសមាសភាពគណៈកម្មាធិការ ប្រកួតប្រជែងកម្ពុជា

ភ្នំពេញ៖ នៅទីស្តីការក្រសួងពាណិជ្ជកម្ម គណៈកម្មាធិការប្រកួតប្រជែងកម្ពុជា (គ.ប.ក) បានបើកកិច្ចប្រជុំលើកទី១របស់ខ្លួន ដើម្បីឱ្យសមាជិកទាំងអស់ បានជួបប្រជុំគ្នាជាលើកដំបូង និងបង្ហាញខ្លួន បន្ទាប់ពីរាជរដ្ឋាភិបាលបានចេញសេចក្តីសម្រេចកាលពីកន្លងទៅនេះ ស្តីពីការតែងតាំងសមាសភាពគណៈកម្មាធិការប្រកួតប្រជែងកម្ពុជា ព្រមទាំងដើម្បីពិនិត្យ និងពិភាក្សាលើបទបញ្ជាផ្ទៃក្នុងមួយចំនួន។នៅក្រោយចប់កិច្ចប្រជុំ កាលពីរសៀលថ្ងៃ២៦ កក្កដា ឆ្នាំ២០២២នេះ ប្រភពពីក្រសួងពាណិជ្ជកម្ម បានឲ្យដឹងថា កិច្ចប្រជុំនេះ ត្រូវបានរៀបចំឡើង ក្រោមការអញ្ជើញជាអធិបតីរបស់ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងជាប្រធានគណៈកម្មាធិការប្រកួតប្រជែងកម្ពុជា ព្រមទាំងមានការអញ្ជើញចូលរួមពីថ្នាក់ដឹកនាំ និងសមាជិក សមាជិកាជាច្រើនរូប។ក្នុងឱកាសនោះ ឯកឧត្តមរដ្ឋមន្រ្តី បានមានប្រសាសន៍ថា ច្បាប់ស្ដីពីការប្រកួតប្រជែងកម្ពុជា ត្រូវបានព្រះករុណាព្រះបាទសម្តេចព្រះនរោត្តម សីហមុនី ព្រះមហាក្សត្រនៃកម្ពុជា ឡាយព្រះហស្តលេខាប្រកាសដាក់ឱ្យប្រើ កាលពីខែតុលា ឆ្នាំ២០២១ និងបានធ្វើឱ្យបណ្ដារដ្ឋសមាជិកអាស៊ានទាំង១០ មានច្បាប់ស្ដីពីការប្រកួតប្រជែងទាំងអស់គ្នា ដូចបានកំណត់ក្នុងផែនការមេសហគមន៍សេដ្ឋកិច្ចអាស៊ាន២០២៥ ហើយការអនុម័តច្បាប់នេះធ្វើឱ្យកម្ពុជាបានបំពេញកាតព្វកិច្ចមួយរបស់កម្ពុជាសម្រាប់អាស៊ាន និងអង្គការពាណិជ្ជកម្មពិភពលោកផងដែរ។ ឯកឧត្តម បានឲ្យដឹងទៀតថា យោងតាមមាត្រា៤ នៃច្បាប់ស្ដីពីការប្រកួតប្រជែង តម្រូវឱ្យបង្កើតគណៈកម្មាធិការប្រកួតប្រជែងកម្ពុជាដែលជាអ្នកទទួលបន្ទុកដឹកនាំ និងត្រួតពិនិត្យការអនុវត្តច្បាប់ស្ដីពីការប្រកួតប្រជែង ហើយតាមការតម្រូវនេះ ប្រមុខរាជរដ្ឋាភិបាលសម្រេចចុះហត្ថលេខានៅខែកុម្ភៈកន្លងទៅ និងបានចេញសេចក្តីសម្រេចនៅខែកក្កដា នេះ ស្តីពីការតែងតាំងសមាសភាពនៃគណៈកម្មាធិការនេះ ដែលមានសមាសភាពសរុបចំនួន ១៥រូប ដែល ១០រូបជាតំណាងមកពីក្រសួង ស្ថាប័នពាក់ព័ន្ធ និង ៥រូប ជាបុគ្គលឯករាជ្យ ក្នុងនោះជាអតីតចៅក្រម ១រូប, អ្នកសេដ្ឋកិច្ច ២រូប និងអ្នកច្បាប់ ២រូប ដែលឆ្លងកាត់តាមការជ្រើសរើស ហើយមានអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» ជាសេនាធិការ ដើម្បីអនុញ្ញាតឱ្យគណៈកម្មាធិការប្រកួតប្រជែងកម្ពុជា ទទួលបាននូវសិទ្ធិពេលលេញក្នុងការអនុវត្តនូវតួនាទីនិងភារកិច្ចរបស់ខ្លួន។ឯកឧត្តមរដ្ឋមន្រ្តី បានបញ្ជាក់ថា សម្រាប់ការអនុវត្តច្បាប់ស្ដីពីការប្រកួតប្រជែង អគ្គនាយកដ្ឋាន ក.ប.ប. ដែលជាសេនាធិការ និងដើរតួនាទីជាអ្នកស៊ើបអង្កេត ខណៈដែលគណៈកម្មាធិការប្រកួតប្រជែងកម្ពុជា ជាអ្នកធ្វើសេចក្ដីសម្រេចក្នុងការកំណត់ថា បុគ្គលណាមួយបំពានច្បាប់ ដោយផ្អែកលើភស្ដុតាងដែលផ្ដល់ដោយមន្ត្រីនៃអគ្គនាយកដ្ឋាន ក.ប.ប.។ ដូចនេះ សមាសភាពខាងលើ តម្រូវឱ្យមានការចូលរួមពីបុគ្គលឯករាជ្យអតីតចៅក្រម អ្នកសេដ្ឋកិច្ច និងអ្នកច្បាប់ ដែលមានជំនាញច្បាស់លាស់ចូលរួមធ្វើសេចក្ដីសម្រេចក្នុងការកំណត់បទល្មើសក្រោមច្បាប់ស្ដីពីការប្រកួតប្រជែង ប្រកបដោយភាពត្រឹមត្រូវនិងពេញលេញ។ ឯកឧត្តម សង្កត់ធ្ងន់ថា ការអនុវត្តច្បាប់ស្តីពីការប្រកួតប្រជែងប្រកបដោយប្រសិទ្ធភាព នឹងបង្កើតនូវទីលានប្រកួតប្រជែងប្រកបដោយស្មើភាពក្នុងការធ្វើធុរកិច្ចនៅកម្ពុជា ដើម្បីប្រកួតប្រជែងគ្នាតាមរយៈមធ្យោបាយផ្សេងៗ រួមមាន នវានុវត្តន៍ គុណភាពខ្ពស់ និងតម្លៃទាបនៃផលិតផលនិងសេវា ដែលផ្តល់អត្ថប្រយោជន៍សម្រាប់អ្នកប្រើប្រាស់និងធើ្វឱ្យមានកំណើនសេដ្ឋកិច្ចជាតិទៀតផង៕ អត្ថបទ៖ ឈិត បូរ៉ាវី

ឯកឧត្តម រដ្ឋ សារ៉ាវុធ ដឹកនាំឧត្តមមន្រ្តីសេដ្ឋកិច្ចអាស៊ាន បំពេញបេសកកម្មស្វែងយល់ពីតថភាពក្នុងដំណើរការរៀបចំខ្លួនក្រោមសសរស្តម្ភសហគមន៍សេដ្ឋកិច្ចអាស៊ានរបស់ប្រទេសទីម័រខាងកើត

ភ្នំពេញ៖ កាលពីថ្ងៃទី១៩-២២ ខែកក្កដា ឆ្នាំ២០២២ ឯកឧត្តម រដ្ឋ សារ៉ាវុធ អគ្គនាយកពាណិជ្ជកម្មអន្តរជាតិ និងជាប្រធានកិច្ចប្រជុំឧត្តមមន្រ្តីសេដ្ឋកិច្ចអាស៊ានសម្រាប់ឆ្នាំ២០២២ បានដឹកនាំឧត្តមមន្រ្តីសេដ្ឋកិច្ចអាស៊ាន អមដំណើរដោយអគ្គលេខាធិការរងអាស៊ាននិងសហការី ទៅបំពេញបេសកកម្មស្វែងយល់ពីតថភាពក្នុងដំណើរការរៀបចំខ្លួនក្រោមសសរស្តម្ភសហគមន៍សេដ្ឋកិច្ចអាស៊ានរបស់ប្រទេសទីម័រខាងកើត។បេសកកម្មនេះ មានគោលបំណងវាយតម្លៃនូវវឌ្ឍនភាពរបស់ទីម័រខាងកើតក្នុងដំណើរការស្នើសុំចូលជាសមាជិកអាស៊ាន ក្រោមសសរស្តម្ភសហគមន៍សេដ្ឋកិច្ចអាស៊ាន ដោយពិនិត្យមើលគោលនយោបាយជាតិ បទប្បញ្ញត្តិ និងគំនិតផ្តួចផ្តើមនានា ដើម្បីឱ្យមានអនុលោមភាពស្របតាមគោលការណ៍អាស៊ាន។ភាគីទាំង២ ក៏បានពិភាក្សាផ្លាស់ប្តូរយោបល់ក៏ដូចជាចែករំលែកបទពិសោធន៍ទៅវិញទៅមក ជាពិសេសឱកាស បញ្ហាប្រឈម សក្តានុពល ក៏ដូចជាចំណុចខ្វះខាតនានារបស់ទីម័រខាងកើតដើម្បីអាចឱ្យអាស៊ានជួយកសាងសមត្ថភាព និងជំនួយបច្ចេកទេសផងដែរ។ ក្នុងនោះមានក្រសួងនិងស្ថាប័នរបស់ទីម័រខាងកើតចំនួន៨ ដែលដឹកនាំដោយឯកឧត្តម Domingos Lopes Antunes អនុរដ្ឋមន្រ្តីក្រសួងទេសចរ ពាណិជ្ជកម្ម និងឧស្សាហកម្ម ក្នុងនាមជាសហប្រធាននៃកិច្ចប្រជុំ បានចូលរួមធ្វើបទបង្ហាញជូនដល់គណៈប្រតិភូដើម្បីទទួលបានព័ត៌មានបន្ថែម។ក្រសួងនិងស្ថាប័នទាំងនោះមានដូចជា ក្រសួងហិរញ្ញវត្ថុ ក្រសួងកសិកម្មនិងនេសាទ ក្រសួងសាធារណការនិងទំនាក់ទំនង ក្រសួងប្រេងកាត និងរ៉ែ ក្រសួងទេសចរណ៍ ពាណិជ្ជកម្ម និងឧស្សាហកម្ម សភាពាណិជ្ជកម្មនិងឧស្សាហកម្ម អាជ្ញាធរគយ សមាគមសណ្ឋាគារ ព្រមទាំងវិស័យឯកជននានាផងដែរ។ឯកឧត្តមអគ្គនាយក ក៏បានដឹកនាំគណៈប្រតិភូអាស៊ានធ្វើទស្សនកិច្ច នៅមជ្ឈមណ្ឌលជាតិសម្រាប់ការងារនិងការបណ្តុះបណ្តាលជំនាញ កំពង់ផែឌីលី និងកំពង់ផែ Tibar Bay ដើម្បីពិនិត្យ និងវាយតម្លៃលើការបណ្តុះបណ្តាលកសាងធនធានមនុស្ស ក៏ដូចជាសក្តានុពលនៃការដឹកជញ្ជូនទំនិញរបស់ទីម័រខាងកើត ផងដែរ។ក្នុងអំឡុងបេសកកម្មនេះដែរ ឯកឧត្តមអគ្គនាយក ក៏បានជួបពិភាក្សាទ្វេភាគីជាមួយលោកជំទាវ Adaljiza Magno រដ្ឋមន្រ្តីក្រសួងការបរទេសទីម័រខាងកើត លោកស្រីទីប្រឹក្សាធនាគារ ADB និងលោកស្រី Maika Oshikawa ប្រធាននាយកដ្ឋានពិនិត្យនិងវាយតម្លៃការចូលជាសមាជិកអង្គការពាណិជ្ជកម្មពិភពលោក ដើម្បីជំរុញកិច្ចសហប្រតិបត្តិការតំបន់ បន្ថែមទៀត។បេសកកម្មរយៈពេល៤ថ្ងៃនេះ បានប្រព្រឹត្តទៅដោយទទួលបានផ្លែផ្កាគាប់ប្រសើរ។ ប្រទេសទីម័រខាងកើត បានប្តេជ្ញាបន្តផ្តល់កិច្ចសហប្រតិបត្តិការលើវិស័យពាក់ព័ន្ធជាមួយអាស៊ាន ដើម្បីពន្លឿននីតិវិធីក្នុងការស្នើសុំចូលជាសមាជិកអាស៊ាន៕

និយ័តករមូលបត្រកម្ពុជា ADB ជំរុញការអភិវឌ្ឍទីផ្សារសញ្ញាប័ណ្ណនិរន្តរភាពនៅកម្ពុជា

ភ្នំពេញ៖ និយ័តករមូលបត្រកម្ពុជា ធនាគារអភិវឌ្ឍន៍អាស៊ី (ADB) ជំរុញការអភិវឌ្ឍទីផ្សារសញ្ញាប័ណ្ណនិរន្តរភាព និងលើកកម្ពស់ការយល់ដឹងពាក់ព័ន្ធនឹងហិរញ្ញវត្ថុនិរន្តរភាព ជាពិសេសទីផ្សារមូលធននិរន្តរភាពក្នុងតំបន់អាស៊ានទៅដល់និយ័តករ និងតួអង្គពាក់ព័ន្ធសំខាន់ៗនៅក្នុងទីផ្សានៅកម្ពុជា ។និយ័តករមូលបត្រកម្ពុជា ជាប្រធាននៃវេទិកាទីផ្សារមូលធនអាស៊ាន (ACMF) ឆ្នាំ២០២២ និងជាសហ-ប្រធាននៃកម្មវិធីអភិវឌ្ឍន៍ទីផ្សាររបស់ ACMF ន.ម.ក. បានសហការជាមួយនឹងធនាគារអភិវឌ្ឍន៍អាស៊ី (ADB) រៀបចំសិក្ខាសាលាស្តីពី “ឥទ្ធិពលនៃការអភិវឌ្ឍទីផ្សារមូលធននិរន្តរភាពក្នុងតំបន់អាស៊ាន សម្រាប់ការអភិវឌ្ឍទីផ្សារសញ្ញាប័ណ្ណនិរន្តរភាពនៅកម្ពុជា”។សិក្ខាសាលានេះ ត្រូវបានរៀបចំឡើងកាលពីចុងសប្តាហ៍កន្លងទៅ ដោយផ្ទាល់ និងតាមប្រព័ន្ធអនឡាញ ក្រោមអធិបតីភាព ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា និងលោកស្រី Jyotsana Varma នាយក ADB ប្រចាំ ប្រទេស កម្ពុជា។សិក្ខាសាលានេះ ត្រូវបានរៀបចំឡើងក្នុងគោលបំណងដើម្បីលើកកម្ពស់ការយល់ដឹងពាក់ព័ន្ធនឹងហិរញ្ញវត្ថុនិរន្តរភាព ជាពិសេសទីផ្សារមូលធននិរន្តរភាពក្នុងតំបន់អាស៊ានទៅដល់និយ័តករ និងតួអង្គពាក់ព័ន្ធសំខាន់ៗនៅក្នុងទីផ្សារ និងកិច្ចគាំទ្រដែលផ្តល់ដោយ ADB ក៍ដូចជាដើម្បីជំរុញការអភិវឌ្ឍទីផ្សារសញ្ញាបណ្ណនិរន្តរភាពនៅកម្ពុជា។សិក្ខាសាលាខាងលើ មានអ្នកចូលរួមសរុបចំនួន ១៨៥ រូប ដែលក្នុងនោះមានសមាសភាពចូលរួមមកពី និយ័តករមូលបត្រកម្ពុជា. សមាជិក ACMF អគ្គលេខាធិការដ្ឋាននៃអាជ្ញាធរសេវាហិរញ្ញវត្ថុមិនមែនធនាគារ និយ័តករក្រោមឱវាទនៃអាជ្ញាធរសេវាហិរញ្ញវត្ថុមិនមែនធនាគារ ក្រសួងបរិស្ថាន ធនាគារជាតិនៃកម្ពុជា សមាគមធនាគារកម្ពុជា ក្រុមហ៊ុនផ្សារមូលបត្រកម្ពុជា ក្រុមហ៊ុនធានាទិញមូលបត្រ ក្រុមហ៊ុនទីប្រឹក្សាហិរញ្ញវត្ថុ ក្រុមហ៊ុនបោះផ្សាយសក្តានុពល និងភាគីពាក់ព័ន្ធ ។ ឯកឧត្តម ស៊ូ សុជាតិ មានប្រសាសន៍ថា និយតករ បាននិងកំពុងធ្វើការយ៉ាងសកម្មជាមួយ ADB ដើម្បីលើកកម្ពស់ការចេញមូលបត្របំណុលបៃតង សង្គម និងនិរន្តរភាពនៅក្នុងព្រះរាជាណាចក្រកម្ពុជា។ឯកឧត្តម បន្តថា និយ័តករមូលបត្រកម្ពុជា ចេញមូលធននិរន្តរភាពដ៏មានសក្តានុពលជាច្រើននៅក្នុងសេដ្ឋកិច្ចរបស់កម្ពុជា ដោយសង្ឃឹមថា នឹងឃើញអ្នកវិនិយោគក្នុងស្រុក និងបរទេសកាន់តែច្រើនមកវិនិយោគលើមូលធននិរន្តរភាពនៅក្នុងប្រទេសកម្ពុជា និងទូទាំងតំបន់៕ អត្ថបទ៖ វណ្ណៈ

រដ្ឋាភិបាល គ្រោងដាក់ឲ្យប្រើប្រាស់ការធានារ៉ាប់រងយានយន្តឯកជនជាកាតព្វកិច្ច

ភ្នំពេញ៖ រាជរដ្ឋាភិបាលកម្ពុជា នឹងដាក់ឲ្យប្រើប្រាស់នូវការធានារ៉ាបរងយានយន្តឯកជនជាកាតព្វកិច្ច ដែលជាការទទួលខុសត្រូវរបស់ប្រតិបត្តិករធានារ៉ាប់រង និងម្ចាស់យានយន្តចំពោះសង្គមជាតិ ក្នុងគោលបំណងលើកកម្ពស់វិស័យធានារ៉ាប់រងឲ្យមានការរីកចម្រើនថែមទៀត នៅពេលអនាគតខាងមុខ។ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអនុប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ កាលពីថ្ងៃទី២៥ កក្កដា ឆ្នាំ២០២២កន្លងទៅនេះ បានមានប្រសាសន៍ថា គម្រោងដាក់ឲ្យប្រើប្រាស់ការធានារ៉ាប់រងយានយន្តឯកជនជាកាតព្វកិច្ចនេះ គឺតាមរយៈការធានារ៉ាប់រងដល់ជនរងគ្រោះ ដែលបង្កដោយគ្រោះថ្នាក់ចរាចរណ៍នៅតាមដងផ្លូវក្នុងប្រទេសកម្ពុជា ជួយឲ្យពួកគាត់ទទួលបានសំណងសមស្របណាមួយសម្រាប់ការព្យាបាល និងដោះស្រាយបញ្ហាផ្នែកហិរញ្ញវត្ថុរបស់ខ្លួន។ឯកឧត្តម បានបន្តថា ផលប្រយោជន៍ក្នុងការដំណើរការប្រព័ន្ធធានារ៉ាប់រងខាងលើនេះ នឹងដើរតួនាទីយ៉ាងសំខាន់ក្នុងការពង្រឹង និងពង្រីកប្រព័ន្ធសំណាញ់សុវត្ថិភាពសង្គម ឲ្យដើរទន្ទឹមគ្នានឹងការដាក់ឲ្យអនុវត្តប្រព័ន្ធគាំពារសង្គមរបស់រដ្ឋាភិបាលផងដែរ។លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា បានបង្ហាញការគាំទ្រចំពោះគម្រោងការដាក់ឱ្យដំណើរការប្រព័ន្ធធានារ៉ាប់រងយានយន្តឯកជនជាកាតព្វកិច្ច ខណៈបច្ចុប្បន្នបានអនុវត្តជាអន្លើរតែទៅលើយានយន្តនៃក្រុមហ៊ុនដឹកជញ្ជូនអ្នកដំណើរ និងក្រុមហ៊ុនដឹកទំនិញប៉ុណ្ណោះ។ ឯកឧត្តម ប៊ូ ច័ន្ទភីរូ អគ្គនាយក នៃនិយ័តករធានារ៉ាប់រងកម្ពុជា បានបញ្ជាក់ថា ទីផ្សារធានារ៉ាប់រងកម្ពុជា នៅតែរក្សាបានកំណើនវិជ្ជមានក្នុងរង្វង់ប្រមាណ ៨% ក្នុងឆ្នាំ២០២០ និង១០% ក្នុងឆ្នាំ២០២១ ទោះក្នុងដំណាក់កាលវិបត្តិជំងឺកូវីដ-១៩ ក៏ដោយ។ បុព្វលាភដុលសរុបនៃទីផ្សារធានារ៉ាប់រងរបស់កម្ពុជា បានកើនឡើងដល់ប្រមាណ ៣០០លានដុល្លារអាម៉េរិក ក្នុងឆ្នាំ២០២១ និងមានកំណើនប្រមាណ២០%ជាមធ្យម ក្នុងរយៈពេល ៥ឆ្នាំចុងក្រោយនេះ។ទីផ្សារធានារ៉ាប់រងនៅកម្ពុជាក្នុងពេលបច្ចុប្បន្ន មានក្រុមហ៊ុនធានារ៉ាប់រងសរុប៣៩ ក្នុងនោះក្រុមហ៊ុនធានារ៉ាប់រងទូទៅមានចំនួន១៨ ក្រុមហ៊ុនធានារ៉ាប់រងអាយុជីវិតចំនួន១៤ និងក្រុមហ៊ុនធានារ៉ាប់រងខ្នាតតូចចំនួន៧ ព្រមទាំងមានក្រុមហ៊ុនធានារ៉ាប់រងបន្តចំនួន១៕ អត្ថបទ៖ ឈិត បូរ៉ាវី

នាវាដឹកភ្ញៀវទេសចរអន្តរជាតិ ចាប់ផ្តើមមកដល់ភ្នំពេញឡើងវិញលើកដំបូង ក្រោយជំរុញចលនាទេសចរណ៍

ភ្នំពេញ៖ នាវាទេសចរណ៍ដឹកភ្ញៀវទេសចរអន្តរជាតិទស្សនាតាមដងទន្លេមេគង្គកម្ពុជា វៀតណាម បានចាប់ផ្តើមមានមកដល់រាធានីភ្នំពេញ រួចបន្តទៅទស្សនាខេត្តសៀមរាប ជាលើកដំបូងឡើងវិញ ក្រោយរាជរដ្ឋាភិបាលកម្ពុជា និងរដ្ឋាភិបាលវៀតណាម សម្របសម្រួលគ្នាទៅវិញទៅមក ជម្រុញលំហូរចលនាទេសចរណ៍រវាងប្រទេសទាំងពីរ ឆ្ពោះទៅកាន់កម្ពុជាធ្វើម្ចាស់ផ្ទះរៀបចំកីឡា SEA GAME ឆ្នាំ២០២៣។បើតាមលោក Naidah Yazdanl អ្នកគ្រប់គ្រងនាវាទេសចរណ៍Croisi Europe បានថ្លែងប្រាប់ BTVនៅថ្ងៃទី២៥ ខែកក្កដានេះ ថ្លែងថា នេះលើកដំបូងហើយ ដែលនាវាទេសចរណ៍អន្តរជាតិរបស់លោក នៅក្នុងចំណោមនាវាទេសចរណ៍អន្តរជាតិនានាផ្សេងទៀត បានដឹកភ្ញៀវទេសចរអន្តរជាតិភាគច្រើនមកពីអាមេរិច អូស្ត្រាលី និងភ្ញៀវមកពីអឺរ៉ុប មកជិះនាវាទស្សនាកម្សាន្តតាមទន្លេមេគង្គឆ្លងដែនពីប្រទេសវៀតណាម ចូលមករាជធានីភ្នំពេញ រួចបន្តដំណើរទៅខេត្តសៀមរាប ទស្សនាប្រាសាទអង្គរ ក្រោយពីបានអាកខានរយៈពេលជាង២ឆ្នាំកន្លងមកនេះដោយសារវិបត្តិកូវីដ១៩។យ៉ាងណាក៏ដោយ លោក Naidah Yazdanl ក៏សូមសំដែងការដឹងគុណជាខ្លាំងចំពោះប្រមុខថ្នាក់ដឹកនាំរាជរដ្ឋាភិបាលកម្ពុជា ដែលជានិច្ចកាល បានយកចិត្តទុកដាក់ បានជួយអន្តរាគមន៍ និងជម្រុញបើកចលនាទេសចរណ៍ក្នុងតំបន់អាស៊ាន ជាពិសេសជម្រុញចលនាទេសចរណ៍កម្ពុជាវៀតណាមឡើងវិញ។សម្រាប់បណ្តាភ្ញៀវទេសចរអន្តរជាតិធ្វើដំណើរតាមនាវា បានថ្លែងថា តំបន់ទេសភាពតាមដងទន្លេមេគង្គនៅកម្ពុជា នៅកម្ពុជាមានសភាពស្រស់ស្អាត ហើយគេក៏បានឃើញរបៀបរស់នៅពលរដ្ឋខ្មែររស់នៅតាមដងទន្លេ ជាមួយនឹងគ្មានព្រួយបារម្ភបារម្ភអំពីបញ្ហាការរាតត្បាតកូវីដ១៩ ខណៈរាជរដ្ឋាភិបាលគ្រប់គ្រងបានល្អចំពោះទប់ស្កាត់ការរាតត្បាតនៃមេរោគកូវិដ១៩នេះ។សូមបញ្ជាក់ថា ក្នុងរយៈពេល ៦ខែដើមឆ្នាំ២០២២ នេះកម្ពុជាបានទទួលទេសចរអន្តរជាតិពីវៀតណាមកំណើនប្រមាណ១៥០% ហើយបើតាមឯកឧត្តម ថោង ខុន រដ្ឋមន្ត្រីក្រសួងទេសចរណ៍ ថ្លែងថា តាមរយៈការជម្រុញបើកទេសចរណ៍តាមផ្លូវទឹកនេះនឹងជម្រុញកម្ពុជាមានកំណើនទេសចរអន្តរជាតិមកទស្សនាកម្ពុជា កើនលើស ១លាននាក់នៅដំណាច់ឆ្នាំនេះ៕ អត្ថបទ ស៊ុម សុខជា

កម្ពុជាទទួលបានគម្រោងវិនិយោគមានទុនសរុបជិត៣ប៊ីលានដុល្លារ ក្នុងឆមាសទី១

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគថ្មី និងគម្រោងពង្រីកផលិតកម្មចំនួន ៩៨គម្រោង ក្នុងឆមាសទី១ ឆ្នាំ២០២២ កើនឡើង ១១គម្រោង មានទុនវិនិយោគសរុប ២ ៩៩៨ លានដុល្លារ។របាយការណ៍ក្រុមប្រឹក្សាអភិវឌ្ឍន៍កម្ពុជា បានបង្ហាញថាក្នុងចំណោមគម្រោងវិនិយោគថ្មីទាំងអស់ វិនិយោគទុនក្នុងស្រុក បានឈរនៅលេខរៀងទី១ មានទុនវិនិយោគតំណាង៥៣% នៃទុនវិនិយោគសរុបនៅកម្ពុជា។តាមទិន្នន័យនេះ វិនិយោគចិនដែលមានប្រមាណ ៤៣.០២% ឬស្មើនឹង១.២៩ពាន់លានដុល្លារ នៃការវិនិយោគសរុបនៅកម្ពុជា ក្នុងឆមាសទី១ ឆ្នាំនេះ ដែល នាំមុខវិនិយោគពីប្រទេស ថៃ, សាម័រ, ប្រីដធីស វីរជិនអាយលែន, កូរ៉េ, សិង្ហបុរី, ខេមិនអាយលែន, ម៉ាឡេស៊ី, ជប៉ុន និងអូស្រ្តាលី។ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា លើកឡើងថា ការកើនឡើងទាំងចំនួនគម្រោងវិនិយោគ និងទុនវិនិយោគ កើតចេញពីកិច្ចខិតខំប្រឹងប្រែងរបស់រាជរដ្ឋាភិបាល ទទួលជ័យជម្នះប្រយុទ្ធប្រឆាំងនឹងជំងឺកូវីដ-១៩ តាមរយៈប្រើប្រាស់វ៉ាក់សាំងជាដែលឈានដល់ ការបើដំណើរការសង្គមសេដ្ឋកិច្ច លើប់វិស័យឡើងវិញចាប់តាំងពីថ្ងៃទី១ ខែ វិច្ឆិកា ឆ្នាំ២០២១។តាមរបាយការណ៍ក្រុមប្រឹក្សាអភិវឌ្ឍន៍កម្ពុជា ក្នុងឆមាសទី១ ឆ្នាំ២០២២នេះ ការវិនិយោគលើវិស័យកសិកម្ម និងកសិ-ឧស្សាហកម្ម មានចំនួន៧គម្រោង ដែលមានទុនជាង ១០៤លានដុល្លារ, វិស័យឧស្សាហកម្ម មានចំនួន៨៥ គម្រោង មានទុនជាង១ពាន់លានដុល្លារ , វិស័យទេសចរណ៍មាន១គម្រោងវិនិយោគ ដោយទទួលបានទុនជាង ១២៩លានដុល្លារ និងហេដ្ឋារចនាសម្ព័ន្ធ និងផ្សេងៗមាន ៥ គម្រោង ទទួលបានទុន ជាង១.៧ពាន់លានដុល្លារ៕ អត្ថបទ៖ វណ្ណៈ

រាជរដ្ឋាភិបាល ប្រមូលចំណូលថ្នាក់ជាតិបានជាង ១៤ ពាន់ប៊ីលានរៀល

ភ្នំពេញ៖ លទ្ធផលនៃការអនុវត្តថវិការក្នុងឆមាសទី ១ ឆ្នាំ២០២២ រាជរដ្ឋាភិបាលប្រមូលចំណូលថ្នាក់ជាតិ សរុបបានចំនួនជាង ១៤ ពាន់ប៊ីលានរៀល ស្មើប្រមាណ ៥៧% នៃច្បាប់ហិរញ្ញវត្ថុ គឺខ្ពស់ជាង ១,២ ពិន្ទុភាគរយ ធៀបនឹងរយៈពេលដូចគ្នាក្នុងឆ្នាំ២០២១។លទ្ធផលនៃការអនុវត្តថវិកាឆមាសទី១ និងការវាយតម្លៃនៃការអនុវត្តច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២២ បង្ហាញថា ការអនុវត្តប្រមូលចំណូលថ្នាក់ជាតិរបស់រាជរដ្ឋាភិបាល សរុបបានចំនួនប្រមាណជាង ១៤ ពាន់ប៊ីលានរៀល ស្មើនឹង ៥៧% នៃច្បាប់ហិរញ្ញវត្ថុ គឺខ្ពស់ជាង ១,២ ពិន្ទុភាគរយ ធៀបនឹងរយៈពេលដូចគ្នាក្នុងឆ្នាំ ២០២១ ដែលអនុវត្តបាន ៥៥,៨% នៃច្បាប់ហិរញ្ញវត្ថុ, បើគិតចំណូលជាសាច់ប្រាក់ គឺកើនឡើង ២១,៥% ធៀបនឹងរយៈពេលដូចគ្នក្នុងឆ្នាំ ២០២១។ក្នុងនោះចំណូលចរន្តអនុវត្តបានចំនួនជាង ១២ ពាន់ប៊ីលានរៀល ស្មើនឹង ៥៧,៣% នៃច្បាប់ហិរញ្ញវត្ថុ គឺខ្ពស់ជាង ៣,៨ ពិន្ទុភាគរយ ធៀបនឹងរយៈពេលដូចគ្នាក្នុងឆ្នាំ ២០២១។ ចំណែកចំណូលសារពើពន្ធអនុវត្តបានចំនួនជាង ១២ពាន់ប៊ីលានរៀល ស្មើនឹង ៥៩,៤% នៃច្បាប់ហិរញ្ញវត្ថុ គឺខ្ពស់ជាង ៤,១% ពិន្ទុភាគរយ ធៀបនឹងរយៈពេលដូចគ្នាក្នុងឆ្នាំ ២០២១។ ដោយឡែកចំណូលមិនមែនសារពើពន្ធអនុវត្តបានចំនួនជាង ៦៧៦ ប៊ីលានរៀល ស្មើនឹង ៣៥,០% នៃច្បាប់ហិរញ្ញវត្ថុ គឺទាបជាង ៣,៩ ពិន្ទុភាគរយធៀបនឹងរយៈពេលដូចគ្នាក្នុងឆ្នាំ ២០២១ ។ចំណូលសារពើពន្ធរួមមាន ចំណូលពីគយ និងរដ្ឋាករកម្ពុជា និងចំណូលពីពន្ធដារ គឺអនុវត្តបានល្អប្រសើរ ពោលគឺខ្ពស់ជាងឆ្នាំ ២០២១ ធៀបនឹងរយៈពេល ៦ ខែដើមឆ្នាំដូចគ្នា។ ចំណែកចំណូលមិនមែនសារពើពន្ធរួមមាន ចំណូលទ្រព្យសម្បត្តិរដ្ឋ ការជួលទ្រព្យសម្បត្តិរដ្ឋ និងចំណូលកាតព្វកិច្ចកាស៊ីណូ និងឆ្នោត អនុវត្តបានទាប ដោយសារប្រភពចំណូលសារពើពន្ធសំខាន់ៗនៅទទួលរងនូវផលប៉ះពាល់ខ្លាំងពីជំងឺកូវីដ-១៩។ ទោះជាយ៉ាងនេះក្តី, តាមការប៉ាន់ប្រមាណរហូតដល់ដំណាច់ឆ្នាំ ២០២២, ចំណូលសារពើពន្ធ និងចំណូលមិនមែនសារពើពន្ធអាចនឹងសម្រេចបាន ១០៣,៥% នៃច្បាប់ហិរញ្ញវត្ថុឆ្នាំ ២០២២ គឺខ្ពស់ជាងច្បាប់ហិរញ្ញវត្ថុចំនួន ៣,៥% ។ តាមការវាយតម្លៃនេះ ចំណូលចរន្ត នឹងសម្រេចបានខ្ពស់ជាងផែនការ ១៩០ លានដុល្លារអាមេរិក ដោយសារចំណូលមិនមែនសារពើពន្ធនឹងសម្រេចខ្ពស់ជាងផែនការប្រមាណ ៥ លានដុល្លារអាម៉េរិក, ចំណូលពន្ធដារអាចសម្រេចបានខ្ពស់ជាងផែនការ២២៩ លានដុល្លារអាមេរិក ប៉ុន្តែចំណូលគយអាចទាបជាងផែនការ ៤៤ លានដុល្លារអាម៉េរិក៕ អត្ថបទ៖ សុន រ៉ាឌី

ការសាងសង់រោងចក្រផលិតទឹកស្អាតបាក់ខែង ជំហានទី១សម្រេចបាន៦៦% នឹងបញ្ចប់ក្នុងឆ្នាំ២០២៣

ភ្នំពេញ៖ គិតមកត្រឹមពាក់កណ្តាលខែកក្កដា ឆ្នាំ២០២២នេះ ការសាងសង់រោងចក្រផលិតទឹកស្អាតបាក់ខែង ជំហានទី១ សម្រេចបាន៦៦%ហើយ តាមផែនការគ្រោងទុក នឹងបញ្ចប់ក្នុងឆ្នាំ២០២៣ខាងមុខ ខណៈជំហានទី២សម្រេចបាន៤២%ផងដែរ ។ នេះបើតាមការឱ្យដឹងពីឯកឧត្តម ឡុង ណារ៉ូ អគ្គនាយករដ្ឋាករទឹកស្វយ័តភ្នំពេញ ក្នុងឱកាសដែលឯកឧត្ដមអញ្ជើញចុះទៅពិនិត្យមើលពីវឌ្ឍនភាពនៃការសាងសង់រោងចក្រផលិតទឹកស្អាតបាក់ខែង នេះ កាលពីថ្ងៃទី២០ ខែកក្កដា ឆ្នាំ២០២២។ឯកឧត្តម ឡុង ណារ៉ូ មានប្រសាសន៍ឱ្យដឹងថា រដ្ឋាករទឹកស្វយ័តក្រុងភ្នំពេញ បាននិងកំពុងជំរុញ ពន្លឿន ការសាងសង់រោងចក្រប្រព្រឹត្តិកម្មទឹកស្អាតបាក់ខែង ដែលមានសមត្ថភាពផលិតបាន ៣៩០,០០០ម៉ែត្រគូប ក្នុងមួយថ្ងៃ(ជំហានទី១ ១៩៥,០០០ម៉ែត្រគូប ក្នុងមួយថ្ងៃ និងជំហានទី២ ១៩៥,០០០ម៉ែត្រគូបក្នុងមួយថ្ងៃ) សម្រេចបានប្រមាណ៦៦% នៃគម្រោងសាងសង់ជំហានទី១ ដែលគ្រោងនឹងបញ្ចប់នៅក្នុងឆ្នាំ២០២៣ ខាងមុខនេះ ដើម្បីបំពេញសេចក្តីត្រូវការនិងការប្រើប្រាស់ របស់ប្រជាពលរដ្ឋក្នុងរាជធានីភ្នំពេញទំាងមូលឱ្យបានគ្រប់គ្រាន់។ឯកឧត្តម បានបន្តថា រោងចក្រប្រព្រឹត្តិកម្មទឹកស្អាតបាក់ខែងនេះ នឹងជួយបង្កើនសមត្ថភាពផលិតទឹកបាន៧០% នៅទូទាំងរាជធានីភ្នំពេញ និងក្រុងតាខ្មៅ ពោលគឺបន្ថែមលើសមត្ថភាពផលិតទឹកស្អាត បច្ចុប្បន្នពី៦០ម៉ឺនម៉ែត្រគូបក្នុងមួយថ្ងៃ ឲ្យឡើងរហូតដល់១លានម៉ែត្រគូបក្នុងមួយថ្ងៃ នៅឆ្នាំ២០២៥ និងនៅឆ្នាំ២០៣០ អាចមានរហូតទៅដល់១លាន៨សែនម៉ែត្រគូបក្នុងមួយថ្ងៃ។សូមជំរាបថា រោងចក្រផលិតទឹកស្អាយបាក់ខែងនេះ បានបើកការដ្ឋានការដ្ឋានសាងសង់ កាលពីខែមករា ឆ្នាំ២០២០ ពោលគឺចំពេលដែលកម្ពុជាកំពុងប្រឈមខ្លាំងជាមួយនឹងវិបត្តិកូវីដ-១៩ ក៏ប៉ុន្តែទោះជាយ៉ាងណាក៏ដោយ ជំងឺកូវីដ១៩ មិនមែនជាឧបសគ្គក្នុងការសាងសង់រោងចក្រប្រព្រឹត្តិកម្មទឹកស្អាតរបស់កម្ពុជាឡើយ គឺសកម្មភាពនៅតែបន្តជាប់ជាប្រចាំ ហើយសម្រេចបានលទ្ធផលគួរជាទីមោទនភាពនាពេលនេះ។ អគ្គនាយករដ្ឋាករទឹកស្វយ័តភ្នំពេញ រំពឹងថា ជាចុងឆ្នាំ២០២៣ ឬដើមឆ្នាំ២០២៤ រាជធានីភ្នំពេញ នឹងលែងខ្វះទឹកប្រើប្រាស់តទៅទៀតហើយ ពីព្រោះពេលនេះ ក្រុមការងារសាងសង់រោងចក្រផលិតទឹក បានពង្រីកបំពង់មេនាំទឹក ដែលដាក់បំពង់រហូតទៅដល់២ម៉ែត្រ ឆ្លងទៅបាតទន្លេសាប ហើយបាតទន្លេសាបនេះ គឺជាសំណង់ប្រវត្តិសាស្ត្រដែលយើងមិនដែលមានទេ គឺដាក់បំពង់ក្រោមបាតទន្លេសាបតែម្តង។លោក Cedric ROUDE នាយកគ្រប់គ្រងក្រុមហ៊ុនម៉ៅការសាងសង់នៃក្រុមហ៊ុនបារាំង VINCI ដែលទទួលសាងសង់រោងចក្រទឹកស្អាតបាក់ខែងនេះ បានដឹងថា ក្រុមហ៊ុនរបស់លោកបានធ្វើការជាមួយនឹងប្រទេសកម្ពុជា ជាពិសេសជាមួយនឹងរដ្ឋករទឹកស្វយ័តភ្នំពេញតាំងពីឆ្នាំ ២០១៣ មកម្ល៉េះ លោកក៏បានបង្ហាញអំពី ដំណើរ ក៏ដូចជាគុណភាព នៃការផលិតទឹកស្អាតនៅកម្ពុជាដែលអនុលោមទៅតាមស្តង់ដាពិភពលោក។ រដ្ឋាករទឹកស្វយ័តក្រុងភ្នំពេញ បង្ហាញសុទិដ្ឋិនិយមថា ចាប់ពីឆ្នាំ២០២៣តទៅ ខ្លួននឹងមានសមត្ថភាពផលិតទឹកស្អាតសរុប១ ០០០ ០០០ម៉ែត្រគូបក្នុងមួយថ្ងៃ ដើម្បីបិទបញ្ចប់នូវបញ្ហាកង្វះទឹកស្អាតនៅរាជធានីភ្នំពេញ និងក្រុងតាខ្មៅ៕

សកម្មភាពពលរដ្ឋទិញលក់មាស មានកំណើនខ្លាំង ខណៈហាងឆេងមាសកំពុងធ្លាក់ថ្លៃ

ភ្នំពេញ៖ បន្ទាប់ពីហាងឆេងមាសនៅលើទីផ្សារអន្តរជាតិ កំពុងធ្លាក់ថ្លៃ បណ្តាពលរដ្ឋនៅតាមបណ្តាទីផ្សារសាធារណៈ ក៏ដូចនៅតាមបណ្តាហាងលក់មាសនានា នៅរាជធានីភ្នំពេញ បាននិងកំពុងទទួលពលរដ្ឋជាអតិថិជនចូលទិញ និងលក់មាស ហាក់មានកំណើនឡើងជាបន្តបន្ទាប់ ជាពិសេសនៅថ្ងៃចុងសប្តាហ៍។នៅថ្ងៃទី២២ ខែកក្កដានេះ ដោយសារតម្លៃមាសហាក់កំពុងបន្តធ្លាក់ គេសំគាល់ឃើញថា មានពលរដ្ឋមួយចំនួន បានទិញគ្រឿងអលង្ការមាសទុកដើម្បីលំអរខ្លួន និងផលចំណេញរបស់គេ ហើយសម្រាប់ពលរដ្ឋដែលមានមាសនៅក្នុងដៃមួយចំនួន ក៏បានសម្រេចចិត្តលក់ចេញវិញដែរ ដោយសារគេបារម្ភខ្លាចមាសបន្តធ្លាក់ថ្លៃបន្តទៀត។អាជីវករជួញដូរមាសនៅផ្សារច្បារអំពៅ រាជធានីភ្នំពេញ បានថ្លែងថា សម្រាប់ការលក់មាសនៅទីនេះ មានការប្រែប្រួលទៅតាមតម្លៃទីផ្សារមាសអន្តរជាតិទាំងអស់ ហើយនៅខណៈដែលតម្លៃមាសបាននិងកំពុងធ្លាក់ថ្លៃនេះ សំគាល់ឃើញថា ទាំងអតិថិជនដែលចូលមកសាកសួរតម្លៃមាស ហើយអតិថិជនដែលមកទិញមាសទុក និងមកលក់មាសវិញ មានកំណើនឡើងច្រើន ជាពិសេសការលក់ទិញ នៅរៀងរាល់ថ្ងៃចុងសប្តាហ៍។សូមបញ្ជាក់ថា សម្រាប់តម្លៃមាសដែលកែច្នៃធ្វើគ្រឿងអលង្កាលក់ នៅផ្សារច្បារអំពៅនៅព្រឹកនេះ លក់ចេញតម្លៃក្នុងរង្វង់ ១ជី ២០៥ដុល្លាអាមេរិច មាសចិញ្ចៀនលាត ២០៧ដុល្លាអាមេរិច ដោយឡែកមាសគីឡូ លក់ចេញ តម្លៃ២០៩ដុល្លាអាមេរិច ក្នុង១ជី ទិញចូលតម្លៃរង្វង់១៩៩ដុល្លាអាមរិច៕ អត្ថបទ ស៊ុម សុខជា

ក្រសួងពាណិជ្ជកម្ម ចាត់វិធានការជាច្រើន ដើម្បីកាត់បន្ថយអតិផរណានៅតាមទីផ្សារ

ភ្នំពេញ៖ ក្រសួងពាណិជ្ជកម្មដាក់ចេញនូវវិធានការសំខាន់ៗមួយចំនួន ដើម្បីសម្រួលទំនិញដល់ទីផ្សារ ការសហការជាមួយវិស័យឯនជន, ជំរុញការលក់ឲ្យស្ថិតក្នុងតម្លៃមួយសមរម្យ និងការកំណត់ថ្លៃប្រេងឥន្ធនៈជាដើម ដែលជាការចូលចំណែកកាត់បន្ថយអតិផរណាថ្លៃម្ហូបអា ហារនៅកម្ពុជា។ឯកឧត្តម ប៉ែន សុវិជាតិ អ្នកនាំពាក្យ និងជាអនុរដ្ឋលេខាធិការក្រសួងពាណិជ្ជកម្ម នៅក្នុងសន្និសីទព័ត៌មានស្តីពីសមិទ្ធិផលសម្រេចបានរយៈពេល៥ឆ្នាំ របស់ក្រសួងពាណិជ្ជកម្ម នៅថ្ងៃទី ២១ ខែ កក្កដា ឆ្នាំ២០២២ថា ពិភពលោកបានប្រឈមនឹងបញ្ហាថ្មីៗ ដែលធ្វើឱ្យកំណើនសេដ្ឋកិច្ចពិភពលោកកើនឡើងយឺត ដោយសារការកើនឡើងខ្ពស់នៃអត្រាអតិផរណា ការប្រែប្រួលលំហូរមូលធន និងសម្ពាធលើតម្លៃរូបិយប័ណ្ណនានាជាដើម, កត្តាទាំងនេះកម្ពុជាក៏ទទួលផលជះនៃការកើនឡើងនៃអតិផរណាផងដែរ។ ឯកឧត្តម បន្តថា ជុំវិញបញ្ហាការកើនឡើងនៃអតិផរណានេះ ក្រសួងពាណិជ្ជកម្មបានធ្វើការតាមដានវិភាគ និងគណនាថ្លៃទំនិញប្រើប្រាស់សម្រាប់ជីវភាពសំខាន់ៗ, បញ្ហានេះ ក្រសួងក៏សង្កេតឃើញមានការកើនឡើងចន្លោះ ៤ ទៅ ៥%ផងដែរ នៅក្នុងដំណាក់កាលដំបូង ក្នុងនោះជាកាតព្វកិច្ចរបស់ក្រសួង គឺបានខិតខំប្រឹងប្រែងសម្រួលឲ្យប្រភពនៃទំនិញ និងភាពសំបូរបែបនៃទំនិញបានមកដល់ទីផ្សារ ជាពិសេសទំនិញចាំបាច់សម្រាប់បម្រើជីវភាពរួមមាន៖ សាច់ បន្លែ ត្រី អង្ករ ស្ករ ប៊ីចេងជាដើម និងទំនិញមួយចំនួនសម្រាប់បម្រើជីវភាព ដើម្បីឲ្យប្រភពទំនិញបានហូរពីចំណុចផ្គត់ផ្គង់ មកដល់អ្នកប្រើប្រាស់។ បញ្ហានេះ វិស័យឯកនក៏អាចរួមចំណែកជាមួយក្រសួង ក្នុងការកាត់បន្ថយថ្លៃ ដើម្បីធ្វើឲ្យតម្លៃលក់ស្ថិតនៅក្នុងលំដាប់មួយសមរម្យ ។ ក្រៅពីនេះ ក្រសួងក៏បានចូលរួមចំណែកផងដែរ គឺការកាត់ថ្លៃប្រេងឥន្ធនៈ, បច្ចុប្បន្នថ្លៃប្រេងបានធ្លាក់ចុះមកវិញជាបណ្តើរៗផងដែរ ដែលកត្តាមួយចំនួន គឺជាការគិតគូរដ៏ខ្ពង់ខ្ពស់ពីប្រមុខរាជរដ្ឋាភិបាល ដូចជាការឧបត្តម្ភធុន ដើម្បីជួយកាត់បន្ថយថ្លៃប្រេងឥន្ធនៈនេះជាដើម។ចំណែកប្រជាពលរដ្ឋអ្នកប្រើប្រាស់ ថ្លែងថា នៅក្នុងស្ថានភាព ២ ទៅ ៣ឆ្នាំចុងក្រោយនេះ ថ្លៃមុខទំនិញសម្រាប់ផ្គត់ផ្គង់ការហូបចុក បានមានកំណើនកើនឡើងបន្តិចម្តងៗ ចំពោះការកើនឡើងនេះ វាអាចនឹងប៉ះពាល់ដល់អ្នកប្រើប្រាស់ ជាពិសេសប្រជាពលរដ្ឋមានជីវភាពក្រីក្រ តែបញ្ហានេះ ពួកគាត់មានក្តីរំពឹងខ្ពស់លើរាជរដ្ឋាភិបាល នឹងអាចចូលរួមទប់ស្កាត់អំពីការកើនឡើងនេះបានល្អប្រសើរ ស្របពេលកន្លងមកនេះ រាជរដ្ឋាភិបាលបានដាក់ចេញវិធានការជាច្រើនផងដែរ ដើម្បីជួយទ្រទ្រង់ដល់ជីវភាពរស់នៅរបស់ប្រជាពលរដ្ឋ។សូមបញ្ជាក់ថា ពាក់ព័ន្ធអតិរណា ថ្មីៗនេះ ធនាគារជាតិនៃកម្ពុជា បានបង្ហាញថា ក្រោមឥទ្ធិពលនៃការកើនឡើងថ្លៃប្រេង និងម្ហូបអាហារពិភពលោក, បានធ្វើឲ្យអតិផរណានៅកម្ពុជា បានកើនឡើងជាបន្តបន្ទាប់ដល់ប្រមាណ ៧,២% នៅខែឧសភា ដែលជាកម្រិតខ្ពស់បំផុតក្នុងរយៈពេលជាង ១ ទសវត្សរ៍ចុងក្រោយ។ ក្នុងស្ថានភាពនេះ ធនាគារជាតិនៃកម្ពុជា បានថ្លឹងថ្លែងការអនុវត្តនយោបាយរូបិយវត្ថុ ដើម្បីគ្រប់គ្រងសម្ពាធអតិផរណាផង និងគាំទ្រការស្តារកំណើនសេដ្ឋកិច្ចផង ។ ដើម្បីរួមចំណែកគ្រប់គ្រងសម្ពាធអតិផរណា អត្រាប្តូរប្រាក់ត្រូវបានបន្តរក្សាឱ្យមានស្ថិរភាព សំដៅការពារអំណាចទិញរបស់ប្រាក់រៀល ក៏ដូចជាប្រាក់ចំណូលរបស់ប្រជាពលរដ្ឋងាយរងគ្រោះ។ សម្រាប់បញ្ហានេះ ដោយសារបញ្ហាដុល្លារូបនីយកម្ម ការប្រែប្រួល អត្រាប្តូរប្រាក់មានឥទ្ធិពលដោយផ្ទាល់ និងឆាប់រហ័សមកលើអតិផរណានៅកម្ពុជា ក្នុងនោះកាលណាតម្លៃប្រាក់រៀលធ្លាក់ចុះ នោះនឹងនាំឱ្យតម្លៃទំនិញ និងសេវានានាកើនឡើងភ្លាមផងដែរ៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

[UPDATE] ក្រសួងអេស្ប៉ាញ៖ ជនអន្តោប្រវេសន៍ជាង ២៥.០០០នាក់ បានវិលត្រឡប់ទៅម៉ារ៉ុកវិញពីដែនដី Ceuta

[UPDATE]ជនអន្តោប្រវេសន៍ប្រហែល ៦០.០០០នាក់ ចូលដែនដី Ceuta របស់អេស្ប៉ាញ ខណៈមានអ្នកស្លាប់ ៣៤នាក់

របាយការណ៍៖ ណាតូចង់ពង្រីកខែលការពារនុយក្លេអ៊ែរ នៅអឺរ៉ុប ក្នុងពេលមានការគំរាមកំហែងពីរុស្ស៊ី

មនុស្ស ២៥នាក់ស្លាប់ និង ៤៤នាក់រងរបួស ក្នុងគ្រោះថ្នាក់រថយន្តក្រុង នៅភាគខាងជើងអាល់ហ្សេរី

មន្រ្តី UN៖ អាមេរិកឡាទីន នឹងមើលឃើញបាតុភូតអែល នីញ៉ូដ៏ខ្លាំងកា្លបំផុត

អ្នកឡើងភ្នំ ១០នាក់ ដឹកនាំដោយអ្នកឡើងភ្នំដ៏ល្បីល្បាញម្នាក់របស់នេប៉ាល់ បាត់ខ្លួននៅលើភ្នំប៉ាគីស្ថាន

ភ្លើងឆេះព្រៃបំផ្លាញចម្ការផ្លែបឺរនៅអេស្ប៉ាញ និងគំរាមកំហែងដល់ការប្រមូលផលរយៈពេលច្រើនឆ្នាំ

BREAKING NEWS | ជនអន្តោប្រវេសន៍ប្រហែល ៦០.០០០នាក់ ចូលដែនដី Ceuta របស់អេស្ប៉ាញ ខណៈមានអ្នកស្លាប់ ៣៤នាក់

ជនប៉ាឡេស្ទីន មានមន្ទិលសង្ស័យ ក្រោយលោក Trump ប្រកាសកិច្ចព្រមព្រៀងរំសាយអាវុធក្រុមហាម៉ាស

កូរ៉េខាងត្បូងកត់ត្រាសីតុណ្ហភាពខ្ពស់បំផុតមិនធ្លាប់មាន ៤១,៤អង្សាសេ ខណៈរលកកម្ដៅកាន់តែខ្លាំង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877