BTV NEWS

រយៈពេល៤ខែឆ្នាំនេះ CDC ទទួលបានការវិនិយោគ ១៨៤ គម្រោង មានទុនសរុប ២,៦ ពាន់លានដុល្លារ

អនុប្រធានទី១ CDC ៖ វិស័យភស្ភុភារកម្មជាឆ្អឹងខ្នង នៃសេដ្ឋកិច្ច និងការទាក់ទាញវិនិយោគិនពីបរទេស

រាជរដ្ឋាភិបាលវាយតម្លៃសារជាថ្មីលើវិស័យចម្បងៗដែលទ្រទ្រង់កំណើនសេដ្ឋកិច្ចឆ្នាំ២០២៦

កម្ពុជានាំចេញបន្ទះសូឡាក្នុងត្រីមាសទី១ មានទឹកប្រាក់សរុបជាង ៥,៧លានដុល្លារ កើនជិត ៧៥%

សេដ្ឋកិច្ច និង កសិកម្ម

សិប្បកម្មធ្វើផើងដាំផ្កាកំពុងមានការចាប់អារម្មណ៍ពីមហាជន

កំពង់ធំ ៖ មុខរបរសិប្បកម្មធ្វើផើងសម្រាប់ដាំផ្កា កំពុងមានការចាប់អារម្មណ៍ពីមហាជនទូទៅសម្រាប់ដាក់ដាំលម្អរផ្កានៅតាមផ្ទះ កន្លែងធ្វើការ ភោជនីយដ្ឋានផ្សេងៗ និងកន្លែងលក់ផ្កាផងដែរ។លោក នួន ស៊ីណាត ជាម្ចាស់សិប្បកម្មធ្វើផើងផ្កា រស់នៅភូមិព្រេន ឃុំព្រៃគុយ ស្រុកកំពង់ស្វាយ ខេត្តកំពង់ធំប្រាប់ទូរទស្សន៍ BTV ឲ្យដឹងថា មុខរបរនេះលោកបានចាប់ផ្តើមអស់រយៈពេលជាង ៣ឆ្នាំមកហើយ និងមានការចាប់អារម្មណ៍ពីអ្នកប្រើប្រាស់ តាមរយៈម្ចាស់កន្លែងលក់ផ្កាផ្សេងៗក្នុងទីរួមខេត្តកំពង់ធំ ។ សិប្បកម្មធ្វើផើងនេះ កើតចេញពីការស្រាវជ្រាវ បណ្តាញសង្គមហ្វេបុក (Fcebook) និង (YouTube) ដែលកាលពីមុនមុខរបររបស់លោក គឺអ្នកធ្វើពាងសម្រាប់លក់ ។ ដោយសង្កេតឃើញមុខរបរនេះ មានភាពងាយស្រួសម្រាប់រូបលោក និងបានរស់នៅជួបជុំមួយក្រុមគ្រួសារ, រូបលោកក៏បានចាប់ផ្តើមពង្រីកមុខរបរនេះបន្តិចម្តងៗ។ដោយធ្វើការកែច្នៃបណ្តើរ ស្វែងយល់បន្ថែមបណ្តើរ និងបានផុសលក់តាមហ្វេសបុក (ស៊ីណាតកំពង់ធំ លក់ផើងដាំផ្កា) មានភ្ជាប់លេខទូរស័ព្ទ ០៧១ ៤០៣ ៣៣៨៨ / ០៩៦ ៨៣៧ ១១១៨ នៅផ្នែកខាងក្រោម ដែលទទួលបានការគាំទ្រពីអ្នកប្រើប្រាស់ ហៅទូរស័ព្ទមកសាកសួរ ការម៉ុងទិញ តាមរយៈលេខទូរស័ព្ទ និងហ្វេសបុកផងដែរ។ លោកបន្តថា បច្ចុប្បន្ននេះ សិប្បកម្មរបស់លោក បានកំពុងផលិតផើង ជាង១០ប្រភេទ មានទំហំពណ៌ផ្សេងៗគ្នា ទទួលការការម៉ុងផ្គត់ផ្គង់ដល់កន្លែងលក់ផ្កាសម្រាប់ដាំលម្អរចំនួន ៧ទីតាំងក្នុងខេត្តកំពង់ធំ។ ចំណូលមធ្យមប្រចាំខែទទួលបានប្រមាណពី៤លានរៀល ទៅ៦លានរៀល ដែលអាចទទួលប្រាក់ចំណេញក្រោមពីការចំណាយលើសម្ភារៈ និងកម្លាំងពលកម្មរួចចន្លោះពី ២លានរៀល ទៅ ២,៥០០,០០០រៀល។គម្រោងនៅថ្ងៃពេលបន្ទាប់រូបលោក នឹងពង្រីកការផលិតឲ្យបានច្រើនបន្ថែមកែច្នៃម៉ូដ ទំហំពង្រីកទីផ្សារទៅកាន់ខេត្តផ្សេងទៀត៕

រាជរដ្ឋាភិបាល ជំរុញវិស័យឯកជនវិនិយោគលើគម្រោងស្ថានីយសាកអគ្គិសនីដល់រថយន្តអគ្គិសនី

ភ្នំពេញ ៖ រាជរដ្ឋាភិបាល បានជំរុញវិស័យឯកជនចូលរួមវិនិយោគតាមទម្រង់ជាការវិនិយោគរវាងរដ្ឋ និងឯកជន លើការសាងសង់ហេដ្ឋារចនាសម្ព័ន្ធ នៃស្ថានីយសាកអគ្គិសនី ដល់រថយន្តប្រើអគ្គិសនីនៅកម្ពុជា។ថ្លែងនៅក្នុងកិច្ចពិភាក្សាលើប្រធានបទ "អគ្គិសនីភាវូបនីយកម្មនៃយានយន្តដើម្បីអនាគត បៃតងសម្រាប់កម្ពុជា” នៅថ្ងៃទី៤ខែវិច្ឆិកា ឯកឧត្តម ស៊ុន ចាន់ថុល ទេសរដ្ឋមន្រ្តី និងជារដ្ឋមន្រ្តីក្រសួងសាធារណការ និងដឹកជញ្ជូន មានប្រសាសន៍ថា ចំនួនរថយន្តអគ្គិសនី (EV) នឹងកើនឡើងនៅកម្ពុជានៅប៉ុន្មានឆ្នាំខាងមុខ។ឯកឧត្តម បញ្ជាក់ថា ការកើនឡើងនេះ គឺដោយសារ ប្រជាពលរដ្ឋមានការយល់ដឹងច្រើនពីអត្ថប្រយោជន៍នៃការប្រើប្រាស់រថយន្តអគ្គិសនី និងពន្ធនាំចូលរថយន្តអគ្គិសនីមានតម្លៃទាបជាងពាក់កណ្តាលនៃការនាំចូលរថយន្តធម្មតា និងការផ្គត់ផ្គង់ថាមពលស្អាតកានតែច្រើនឡើងក្នុងល្បាយថាមពល ជាពិសេសគឺកែច្នៃថ្មរថយន្តចាស់ៗ។ឯកឧត្តម ស៊ុន ចាន់ថុល ថ្លែងថា “នេះមិនមែនជាការទទួលខុសត្រូវរបស់ EDC រដ្ឋាភិបាលក្នុងកសាងស្ថានីយសាកអគ្គិសនីទេ។ វិស័យឯកជនគួរចូលរួមជាមួយរដ្ឋាភិបាល ឬគួរវិនិយោគលើការកសាងហេដ្ឋារចនាសម្ព័ន្ធគាំទ្រ ដល់រថយន្តអគ្គិសនី”។យោងតាមឯកឧត្តម ស៊ុន ចាន់ថុល បច្ចុប្បន្ន រថយន្តអគ្គិសនីចុះបញ្ជីនៅកម្ពុជាមានចំនួនតិចតួចនៅឡើយ បើធៀបនឹងរថយន្តធម្មតាចុះបញ្ជីមានរហូតដល់ជិត១លានគ្រឿង។ឯកឧត្តមថា ក្រសួងនឹងពិភាក្សាជាមួយវិនិយោគិននានា លើការវិនិយោគដំឡើងស្ថានីយសាកអាគុយ រថយន្តអគ្គិសនីនៅតាមទីតាំងសំខាន់ៗ តាមផ្លូវជាល្បឿនលឿន និងផ្លូវជាតិលេខ៥ជាដើម។វិស័យដឹកជញ្ជូនរួមចំណែក ៤៦% ស្មើនឹងជិតពាក់កណ្តាលនៃការប្រើប្រាស់ថាមពលសរុបរបស់កម្ពុជា។ ដើម្បីសម្រេចបានគោលដៅក្នុងការកាត់បន្ថយការបំភាយឧស្ម័ន អគ្គិសនីភាវូបនីយកម្មនៃយានយន្តគឺជាការចាំបាច់ សម្រាប់កម្ពុជា។កិច្ចពិភាក្សា (Panel Discussion) លើប្រធានបទ "អគ្គិសនីភាវូបនីយកម្មនៃយានយន្តដើម្បីអនាគត បៃតងសម្រាប់កម្ពុជា ក៏ចូលរួមពិភាក្សាដោយ ឯកឧត្តម កែវ រតន អគ្គនាយក EDC ឯកឧត្តម Pablo Kang អគ្គរដ្ឋទូតអូស្រ្តាលី ប្រចាំនៅកម្ពុជា និងលោកជំទាវ Tina Redshawអគ្គរាជទូតអង់គ្លេសប្រចាំនៅកម្ពុជា៕អត្ថបទ៖ វណ្ណៈ

១០ខែឆ្នាំនេះ កម្ពុជានាំស្រូវទៅលក់នៅប្រទេសវៀតណាម តាមច្រកខេត្តតាកែវ ចំនួនជាង៨០ម៉ឺនតោន

តាកែវ ៖ ក្នុងរយៈពេល១០ខែ ឆ្នាំ២០២១នេះ កម្ពុជាបាននាំស្រូវយកទៅលក់នៅប្រទេសវៀតណាម ដោយឆ្លងកាត់ច្រកព្រំដែនចំនួនបីរបស់ខេត្តតាកែវ ចំនួនជាង៨០ម៉ឺនតោន។ នេះបើយោងតាមរបាយការណ៍របស់មន្ទីរកសិកម្មរុក្ខាប្រមាញ់ និងនេសាទខេត្តតាកែវ។ប្រធានមន្ទីរកសិកម្មរុក្ខាប្រមាញ់ និងនេសាទខេត្តតាកែវ លោក ញិប ស្រ៊ន បានប្រាប់BTVថា គិតចាប់ពីខែដើមខែមករា រហូតដល់ដើមខែវិច្ឆិកា ឆ្នាំ២០២១នេះ ស្រូវចំនួនជាង៨៦ម៉ឺនតោន ត្រូវបានដឹកឆ្លងច្រកទ្វារព្រំដែនចំនួនបីរបស់ខេត្តតាកែវ ជាពិសេសដឹកឆ្លងកាត់តាមច្រកទ្វារព្រំដែនអន្តរជាតិភ្នំដិន យកទៅលក់នៅប្រទេសវៀតណាម ដែលភាគច្រើនជាប្រភេទស្រូវអ៊ីអ៊ែ ដោយលក់ក្នុងតម្លៃ១តោនបានជាង៨០ម៉ឺនរៀល។លោក បានបន្តថា ស្រូវទាំងអស់នោះ ត្រូវបាននាំយកមកពីតាមបណ្ដាខេត្តមួយចំនួនរបស់ប្រទេសកម្ពុជា ជាពិសេសខេត្តកំពង់ស្ពឺ កណ្ដាល ពោធិ៍សាត់ និងកំពង់ឆ្នាំងជាដើម។ បើប្រៀបធៀបនឹងឆ្នាំមុន ការនាំស្រូវយកទៅលក់នៅប្រទេសវៀតណាម ក្នុងឆ្នាំនេះ មានការកើនឡើងប្រមាណ៤០០ភាគរយ គឺកាលពីឆ្នាំ២០២០ ការនាំស្រូវយកទៅលក់នៅប្រទេសវៀតណាម ដោយឆ្លងកាត់ខេត្តតាកែវ គឺមានចំនួនជិត២សែនតោនតែប៉ុណ្ណោះ ។លោក ញិប ស្រ៊ន បានឱ្យដឹងទៀតថា ក្រៅពីស្រូវ កម្ពុជាក៏បាននាំផ្លែស្វាយ ប្រមាណ៣ម៉ឺនតោនយកទៅលក់នៅប្រទេសវៀតណាមផងដែរ ចំពោះតម្លៃស្វាយវិញ គឺក្រុមឈ្មួញវៀតណាមទិញក្នុងតម្លៃ១៧៥ដុល្លារ ឬ៧០ម៉ឺនរៀល ក្នុងមួយតោន។ តម្លៃនេះ គឺប្រហាក់ប្រហែលគ្នានឹងតម្លៃលក់នៅលើទីផ្សារក្នុងស្រុក របស់ប្រទេសកម្ពុជាដែរ៕អត្ថបទ៖ គុជ វិភាគ

អាកាសយានដ្ឋានអន្តរជាតិភ្នំពេញថ្មី បោះផ្សាយប័ណ្ណបំណុលមានការធានា១៥លានដុល្លារ

ភ្នំពេញ ៖ ក្រុមអាកាសយានដ្ឋានអន្តរជាតិភ្នំពេញថ្មី (CAIC) បានបោះផ្សាយប័ណ្ណបំណុលមានការធានា មានទឹកប្រាក់ ១៥លានដុល្លារ សម្រាប់យកទៅកសាង និងអភិវឌ្ឍន៍គម្រោងសាងសង់អាកាសយានដ្ឋានអន្តរជាតិភ្នំពេញថ្មី នៅក្នុងភូមិសាស្ត្រខេត្តកណ្តាល។បណ្ណបំណុលមានការធានារបស់ក្រុមហ៊ុននេះ គឺត្រូវបានវិនិយោគដោយធនាគារ Prince និងត្រូវបានធានាដោយក្រុមហ៊ុន Oversea Cambodia investment Corporation LTD (OCIC) ដែលជាក្រុមហ៊ុនមេ នៃក្រុមហ៊ុនអាកាសយានដ្ឋានអន្តរជាតិភ្នំពេញថ្មី។កិច្ចព្រមព្រៀងនៃការបោះផ្សាយ និងទិញបណ្ណបំណុលមានការធានានេះ ត្រូវបានចុះហត្ថលេខាដោយ លោកឧកញ្ញា Chales Van នាយកប្រតិបត្តិ ក្រុមហ៊ុន CIAC និងជានាយកប្រតិបត្តិក្រុមហ៊ុន OCIC និងលោក HONN Sorachna នាយកប្រតិបត្តិ នៃធនាគារPrince កាលពីថ្ងៃទី៣ ខែវិច្ឆិកា។ការវិនិយោគការបោះផ្សាយបណ្ណបំណុលមានការធានា ក្នុងទំហំទឹកប្រាក់ ១៥លានដុល្លារអាមេរិចនេះ ផ្តល់អាត្រាការប្រាក់ប្រមាណ ៥.៥ភាគរយ ក្នុងមួយឆ្នាំ ជាមួយនឹងរយៈពេល៣ឆ្នាំ ហើយត្រូវបានធានាដោយក្រុមហ៊ុន (OCIC)។សូមបញ្ជាក់ថា ប័ណ្ណបំណុលមានការធានា (Guaranteed Bond) គឺជាសញ្ញាប័ណ្ណដែលមានធានាទាំងការប្រាក់ និងប្រាក់ដើម ដោយភាគីទីបី ប្រសិនបើអ្នកបោះផ្សាយប័ណ្ណបំណុល ខកខានមិនបាន ដោយសារហេតុផលក្ស័យធន។ ប័ណ្ណបំណុលនេះ អាច អាចត្រូវធានាដោយក្រុមហ៊ុនធានារ៉ាប់រងមូលបត្របំណុល មូលនិធិ ឬអង្គភាពជាក្រុមហ៊ុនឯកជន អាជ្ញាធររដ្ឋាភិបាល ឬក្រុមហ៊ុនមេនៃក្រុមហ៊ុនបុត្រសម្ព័ន្ធ ឬក្រុមហ៊ុនបណ្តាក់ទុនរួមគ្នា។ គិតត្រឹមខែវិច្ឆកា គម្រោងសាងសង់អាកាសយានដ្ឋានអន្តរជាតិភ្នំពេញថ្មី នៅក្នុងភូមិសាស្ត្រខេត្តកណ្តាល បច្ចុប្បន្នដំណើរការសាងសង់សម្រេចបាន ២៦ភាគរយ ដែលត្រូវនឹងទឹកប្រាក់សរុប ជាង ៣៤៦លានដុល្លារ ដោយមិនរាប់បញ្ចូលថ្លៃដីដែលវិនិយោគរួច។បើតាមអ្នកឧកញ្ញា ពុង ឃាវសែ ប្រធានក្រុមប្រឹក្សាភិបាលនៃក្រុមហ៊ុន OCIC កន្លងមកធ្លាប់ថ្លែងប្រាប់ BTVថា បើមិនមានឧបសគ្គបង្កការរាំងស្ទះណានោះទេ អាកាសដ្ឋានអន្តរជាតិភ្នំពេញថ្មី លំដាប់ខ្នាត 4F ដែលកំពុងសាងសង់លើទំហំដីជាង២៥០០ហិចតា នៅស្រុកកណ្តាលស្ទឹង ខេត្តកណ្តាលនេះ នឹងសាងសង់ហើយរួចរាល់នៅក្នុងឆ្នាំ២០២៣ ដោយត្រូវប្រើប្រាស់ទុនសាងសង់ ១ ៥០០លានដុល្លាអាមេរិច។សូមបញ្ជាក់ថា ក្រុមហ៊ុនOCICក្រៅពីវិនិយោគសាងសង់អាកាសយានដ្ឋានអន្តរជាតិភ្នំពេញថ្មីនេះ ក្រុមហ៊ុន OCIC ក៏មានការវិនិយោគលើវិស័យអចលនទ្រព្យ រួមមាន សំណង់ ការគ្រប់គ្រងអចលនទ្រព្យ ការអប់រំ វេជ្ជសាស្ត្រ ផ្សារទំនើប សណ្ឋាគារ រោងម៉ាស៊ីនកិនស្រូវ សង្វាក់ផលិតកម្ម និងមានគម្រោងសំខាន់ៗទៀត ដូចជា គម្រោងទីក្រុងកោះពេជ្រ កោះនរា ទីក្រុងរណបជ្រោយចង្វារ និងទីក្រុងទំនើប Olympia ជាដើម ខណៈដែលធនាគារព្រីន ក៏ជាធនាគារដែលផ្តល់ដំណោះស្រាយហិរញ្ញវត្ថុ ដែលផ្តោតការរួមចំណែក ដល់ការអភិវឌ្ឍន៍ អាជីវកម្មរបស់សហគ្រាសខ្នាតតូច និងមធ្យម និងការបណ្តុះបណ្តាលបុគ្គលិកជំនាញ ជាដើមផងដែរ៕អត្ថបទ ស៊ុម សុខជា

គម្រោងបុរី អិមអិល ធារ៉ា (ML TIARA) ជ្រើសរើសកញ្ញា មាន សូនីតា ជាទូតសុឆន្ទៈ

ភ្នំពេញ៖ គម្រោង អិមអិល ធារ៉ា (ML TIARA) ដែលជាគម្រោងលំនៅដ្ឋានបែបទំនើបទាន់សម័យមានទីតាំងស្ថិតនៅតាមបណ្ដោយផ្លូវ៥០ម៉ែត្រ កាលពីសប្តាហ៍កន្លងទៅនេះ បានរៀបចំពិធីចុះហត្ថលេខាលើកិច្ចព្រមព្រៀងទូតសុឆន្ទៈជាមួយកញ្ញា មាន សូនីតា ដែលគ្រប់គ្នាស្គាល់គាត់ថាជា “រាជនីក្រម៉ា” ជាបុគ្គលសាធារណមួយរូប ដែលតែងតែចូលរួមសកម្មភាពសង្គមនានា និងជាតារាសម្តែងដ៏មានប្រជាប្រិយភាព។នៅក្នុងពិធីនាឱកាសនោះ លោកស្រី លី ធីតា នាយិការគ្រប់គ្រងធនធានមនុស្ស និងរដ្ឋបាល នៃក្រុមហ៊ុន អឹមអិល មង្គល រៀលធី ឯ.ក បានមានប្រសាន៍ថា មូលហេតុដែលក្រុមហ៊ុនសម្រេចចិត្តជ្រើសរើសយកកញ្ញា មាន សូនីតា ជាទូតសុឆន្ទៈ ដោយសារក្រុមហ៊ុនមើលឃើញថា កញ្ញាស្រឡាញ់ និងចូលចិត្តការរស់នៅក្នុងបរិបទថ្មី គឺការរស់នៅជាមួយធម្មជាតិ ការរស់នៅបែបស៊ីវិល័យ ប្រណិតភាព និងលក្ខណៈឯកជនភាព ស្របទៅនឹងទស្សនៈវិស័យរបស់គម្រោង ML TIARA ដែលបាននឹងកំពុងផ្តល់ជូនដល់អតិថិជនរបស់ខ្លួន។ក្នុងឱកាសនោះ កញ្ញា មាន សូនីតា ក៏បានបង្ហាញសេចក្តីសោមនស្សរីករាយជាខ្លាំងដែលបានក្លាយជាទូតសុឆន្ទៈរបស់គម្រោងបុរី និងបានលើកឡើងបន្តថា មូលហេតុដែលធ្វើឲ្យកញ្ញាមានមោទនៈភាព ចំពោះការក្លាយខ្លួនជាទូតសុឆន្ទៈរបស់គម្រោង ML TIARA គឺដោយមើលឃើញពីភាពច្នៃប្រឌិតខ្ពស់ ភាពស៊ីវិល័យ ប្រណិតភាពនៃម៉ូតផ្ទះ ក៏ដូចជាហេដ្ឋារចនាសម្ព័ន្ធដ៏សម្បូរបែបនៅក្នុងគម្រោងទាំងមូល និងសមស្របនឹងចំណូលចិត្ត និងអត្តចរិករបស់កញ្ញាផ្ទាល់។ សូមបញ្ជាក់ថា គម្រោងបុរីML TIARA សាងសង់លើផ្ទៃដីដ៏ធំទូលាយសរុបជាង ១៥ហិកតា ដែលជាគម្រោងលំនៅដ្ឋានបែបទំនើបទាន់សម័យ មានទីតាំងស្ថិតក្នុងតំបន់សក្ដានុពលអភិវឌ្ឍន៍ខ្ពស់ ក្បែរស្ដុបមហាវិថីសម្ដេចតេជោ ៦០ម៉ែត្រ ផ្សារទំនើបអ៊ីអន៣ និងព្រលានយន្តហោះអន្តរជាតិភ្នំពេញថ្មី ដែលកំពុងបន្តការសាងសង់យ៉ាងមមាញឹក។ គម្រោង មានអាជ្ញាបណ្ណសាងសង់ ដែលធានានូវលក្ខណៈបច្ចេកទេស គុណភាព និងសោភណ្ឌភាព ជាមួយហេដ្ឋារចនាសម្ព័ន្ធសម្បូរបែប រួមមានប្រព័ន្ធលូ ទឹក-ភ្លើង ផ្លូវថ្នល់ខ្វាត់ខ្វែងធំទូលាយ ដើមឈើ និងសួនច្បារធំៗ អមដោយធម្មជាតិបៃតងស្រស់បំព្រង អាងហែលទឹក ក្លិបហាត់ប្រាណ កន្លែងក្មេងលេងធំទូលាយ និងការរស់នៅជាមួយធម្មជាតិ៕ ដោយ៖ ឈិត បូរ៉ាវី

បារាំងលើកកម្ពស់សមត្ថភាព និងភាពទាក់ទាក់អ្នកទេសចរតាមផ្លូវអាកាសមកកម្ពុជា

ភ្នំពេញ ៖ រដ្ឋាភិបាលបារាំង នឹងផ្តល់ហិរញ្ញប្បទានឥតសំណងចំនួន៤៥០,០០០អឺរ៉ូ (ប្រមាណ៥០ម៉ឺនដុល្លារ) ដើម្បីអនុវត្តគម្រោងកសាងសមត្ថភាព ក្នុងវិស័យអាកាសចរស៊ីវិលកម្ពុជា សំដៅធ្វើឲ្យប្រសើឡើង និងលើកកម្ពស់ប្រព័ន្ធសុវត្ថិភាព និងបរិស្ថានអាកាសយានដ្ឋាននៅកម្ពុជា ក៏ដូចជាបង្កើនភាពទាក់ទាញ អ្នកទេសចរតាមផ្លូវអាកាសមកកម្ពុជា។កិច្ចព្រមព្រៀងកិច្ចព្រមព្រៀងជំនួយបច្ចេកទេស សម្រាប់គម្រោងកសាងសមត្ថភាព ក្នុងវិស័យអាកាសចរស៊ីវិ ត្រូវបានចុះហត្ថលេខាដោយ នាយឧត្តមសេនីយ៍បណ្ឌិត ម៉ៅ ហាវណ្ណាល រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល និងលោក Damien CAZE អគ្គនាយកនៃអាជ្ញាធរអាកាសចរណ៍ស៊ីវិលបារាំង (DGAC) និងលោកស្រី Ophelie BOURHIS នាយកទីភ្នាក់ងារបារាំងសម្រាប់ការអភិវឌ្ឍ (AFD) នៅថ្ងៃទី០២ ខែវិច្ឆិកា ឆ្នាំ២០២១នេះ។តាមរយៈកិច្ចព្រមព្រៀងនេះ រដ្ឋាភិបាលបារាំង នឹងជួយរដ្ឋលេខាធិការដ្ឋានអាកាសចរស៊ីវិល អនុវត្តបទប្បញ្ញត្តិ សុវត្ថិភាពអាកាសចរ និងពង្រឹងនូវលក្ខខណ្ឌសុវត្ថិភាព និងបរិស្ថាននៅក្នុងអាកាសយានដ្ឋានកម្ពុជា។គម្រោងនេះ ផ្តោតលើការងារអាទិភាពចំនួន៤ រួមមាន ៖ ពង្រឹងការគ្រប់គ្រងបរិស្ថានអាកាសយានដ្ឋាន, ផ្តល់ការ បណ្តុះបណ្តាល និងអភិវឌ្ឍសមត្ថភាព លើការថែទាំបច្ចេកទេសអាកាសយាន, ផ្តល់ការបណ្តុះបណ្តាល និងអភិវឌ្ឍ សមត្ថភាពពេទ្យអាកាសចរ, និងពង្រឹងសុវត្ថិភាពអាកាសយានដ្ឋាន។ រដ្ឋមន្ត្រី ម៉ៅ ហាវណ្ណាល់ បានវាយតម្លៃខ្ពស់ និងថ្លែងអំណរគុណយ៉ាងជ្រាលជ្រៅ ចំពោះប្រជាជន និងរាជរដ្ឋាភិបាលបារាំង ដែលបានផ្តល់ជំនួយឥតសំណងដ៏មានតម្លៃនេះ ដែលឆ្លើយតបនឹងសេចក្តីត្រូវការ និងការងារជាអាទិភាព នៃរដ្ឋលេខាធិការដ្ឋានអាកាសចរស៊ីវិល៕អត្ថបទ ៖ វណ្ណៈ

ក្រុមហ៊ុនអាម៉េរិក នឹងបន្តវិនិយោគនិងពង្រីកអាជីវកម្មនៅកម្ពុជា

ភ្នំពេញ ៖ ក្រុមហ៊ុនអាម៉េរិក បានសម្តែងសុទិដ្ឋិនិយមក្នុងការបន្តវិនិយោគ និងពង្រីកអាជីវកម្មរបស់ពួកគេនៅកម្ពុជា ជាពិសេសនោះគឺជួយគាំទ្រក្នុងការស្តារសេដ្ឋកិច្ចកម្ពុជាឡើងវិញ ក្រោយជំងឺកូវីដ១៩ ត្រូវបានបញ្ចប់។ នេះជាការលើកឡើងរបស់ក្រុមហ៊ុនអាមេរិកធំៗ ស្របពេលដែលទំនាក់ទំនងពាណិជ្ជកម្មទ្វេភាគីកម្ពុជាអាម៉េរិកបន្តកើនឡើង។គណៈប្រតិភូនៃក្រុមប្រឹក្សាធុរកិច្ចសហរដ្ឋអាម៉េរិក-អាស៊ាន ដឹកនាំដោយឯកអគ្គរដ្ឋទូត មៃឃើល មីចាឡាក់ Amb. Michalak អនុប្រធានជាន់ខ្ពស់ និងជានាយកគ្រប់គ្រងប្រចាំតំបន់ ដើម្បីពង្រឹងទំនាក់ទំនងពាណិជ្ជកម្ម និងជំរុញការវិនិយោគមកពីសហរដ្ឋអាម៉េរិក លើកឡើងបែបនេះ នៅក្នុងកិច្ចប្រជុំជាមួយ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម កាលពីល្ងាចថ្ងៃទី២ វិច្ឆិកា ឆ្នាំ២០២១កន្លងទៅ។កិច្ចប្រជុំនេះ មានការចូលរួមពីក្រុមប្រឹក្សាធុរកិច្ចសហរដ្ឋអាម៉េរិក-អាស៊ានប្រចាំកម្ពុជា មន្ត្រីស្ថានទូតអាម៉េរិកប្រចាំកម្ពុជា និងក្រុមហ៊ុនជាច្រើនទៀត រួមមាន ក្រុមហ៊ុន ConocoPhillips ក្រុមហ៊ុន FordMotor ក្រុមហ៊ុន Amazon ក្រុមហ៊ុន Walmart ក្រុមហ៊ុន Pernod Ricard ក្រុមហ៊ុន Visa និងក្រុមហ៊ុន Jhpiego ជាដើម។ក្នុងជំនួបនាឱកាសនោះ ភាគីអាម៉េរិកបានសម្ដែងនូវអំណរសាទរចំពោះកម្ពុជាដែលទទួលបាន ជោគជ័យក្នុង ការចាក់វ៉ាក់សាំង និងការបើកសកម្មភាពសេដ្ឋកិច្ចសង្គមឡើងវិញ។ ប្រភពដដែល បានបន្តថា តាមរយៈជំនួបនេះដែរ គណៈប្រតិភូនៃក្រុមប្រឹក្សាធុរកិច្ចសហរដ្ឋអាម៉េរិក-អាស៊ាន បានថ្លែងអំណរគុណយ៉ាងជ្រាលជ្រៅដល់រដ្ឋាភិបាលកម្ពុជា ជាពិសេសឯកឧត្តមរដ្ឋមន្ត្រីពាណិជ្ជកម្ម ដែលតែងតែយកចិត្តទុកដាក់សម្របសម្រួល និងផ្ដល់កិច្ចសហប្រតិបត្តិការដល់គណៈប្រតិភូនៃក្រុមប្រឹក្សាធុរកិច្ចសហរដ្ឋអាម៉េរិក-អាស៊ាននៅកម្ពុជា។នៅក្នុងជំនួបនេះ ឯកឧត្តមរដ្ឋមន្រ្តី ប៉ាន សូរស័ក្តិ បានលើកឡើងពីវឌ្ឍនភាពនៃកំណែទម្រង់ស៊ីជម្រៅរបស់ រដ្ឋាភិបាលកម្ពុជាទាំងក្នុងក្របខ័ណ្ឌស្ថាប័ន និងគតិយុត្ត ព្រមទាំងគោលនយោបាយផ្សេងៗ ដើម្បីស្តារនិងជំរុញសេដ្ឋកិច្ចកម្ពុជា ដែលមានដូចជា ៖ ក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជាឆ្នាំ២០២១-២០៣៥ ច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក ច្បាប់ស្តីពីការការពារអ្នកប្រើប្រាស់ ច្បាប់ស្តីពីការប្រកួតប្រជែង មុខងារ និងតួនាទីរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ពិសេសគឺការយកចិត្តទុកដាក់ដល់ការការពារកម្មសិទ្ធិបញ្ញា។ ទន្ទឹមនេះ ឯកឧត្តម បានលើកទឹកចិត្ត និងបន្តគាំទ្រសម្របសម្រួលក្រមហ៊ុនអាម៉េរិក ដែលមានសំណូមពរ និងចម្ងល់ផ្សេងៗ អាចទាក់ទងមកក្រសួងពាណិជ្ជកម្ម ឬ ឯកឧត្តមផ្ទាល់បាន ដើម្បីដោះស្រាយ និងសម្របសម្រួលជាមួយក្រសួង-ស្ថាប័នពាក់ព័ន្ធ។សូមជម្រាបជូនថា គិតត្រឹមរយៈពេល ៨ខែ ឆ្នាំ២០២១នេះ ទំហំពាណិជ្ជកម្មទ្វេភាគីរវាងកម្ពុជា-អាម៉េរិក សម្រេចបានក្នុងទំហំទឹកប្រាក់សរុបចំនួនប្រមាណជាង ៥,៥ពាន់លានដុល្លារ កើនឡើងប្រមាណ ២៨.៤៦ ភាគរយ បើធៀបនឹងរយៈពេលដូចគ្នាទៅនឹងឆ្នាំ២០២០៕អត្ថបទ ៖ បូរ៉ាវី

ពន្ធដារ នឹងចាត់វិធានការម៉ឺងម៉ាត់ ចំពោះបុគ្គលប្រព្រឹត្តបទល្មើសព្រហ្មទណ្ឌពន្ធដារ

ភ្នំពេញ ៖ មន្រ្តីជំនាញវិស័យពន្ធដារថា ការទប់ស្កាត់ និងការស៊ើបអង្កេតបទល្មើសពន្ធដារ គឺជាការលើកកម្ពស់អនុលោមភាពដោយស្ម័គ្រចិត្ត មានយុត្តិធម៌ដល់អ្នកជាប់ពន្ធដែលមានអនុលោមភាព ការជឿទុកចិត្ត ពីសាធារណៈជន និងការប្រមូលប្រាក់ពន្ធប្រកបដោយបរិយាប័ន្ន។លោក គង់ សុខហេង អនុប្រធាននាយកដ្ឋានស៊ើបអង្កេតបទល្មើសពន្ធដារ នៃអគ្គនាយកដ្ឋានពន្ធដារ លើកឡើងនៅក្នុងកម្មវិធីពន្ធដារ ស្តីពីបទល្មើសពន្ធដារ កាលពីថ្ងៃទី ២វិច្ឆិកា ម្សិលមិញនេះថា ការស៊ើបអង្កេតបទល្មើសពន្ធដែលបានអនុវត្តបច្ចុប្បន្ន ជាកត្តាសំខាន់ការតប់ស្កាត់បទល្មើសកុំឲ្យកើតមានឡើង ការស្រាវជ្រាវរកឲ្យឃើញនូវបទល្មើស និងការប្តឹងចោទប្រកាន់ទៅតុលាការជាដើម។ពាក់ព័ន្ធការអនុវត្តកាតព្វកិច្ចខាងលើនេះ, កត្តាសំខាន់ការលើកកម្ពស់អនុលោមភាពដោយស្ម័គ្រចិត្ត ដោយអ្នកជាប់ ពន្ធទាំងអស់ត្រូវបំពេញកាតព្វកិច្ចបង់ពន្ធដោយស្មើរភាព មានយុត្តិធម៌ដល់អ្នកជាប់ ពន្ធដែលមានអនុលោមភាព ការបង្កើននូវជឿទុកចិត្តពីសាធារណៈជន ចំពោះប្រព័ន្ធពន្ធដារ និងការប្រមូលប្រាក់ពន្ធតាមច្បាប់ឲ្យបានត្រឹមត្រូវមកវិញ។អគ្គនាយកដ្ឋានពន្ធដារ នឹងចាត់វិធានការម៉ឺងម៉ាត់ ចំពោះបុគ្គលដែលប្រព្រិត្តបទល្មើសព្រហ្មទណ្ឌ លើបទបញ្ញត្តិស្តីពីពន្ធដារ ដោយសហការជាមួយកងកំលំាងមានសមត្ថកិច្ច និងស្ថាប័នអនុវត្តដ៏ទៃទៀត សម្រាប់បទល្មើសនេះ ដើម្បីកោះហៅបុគ្គលដែលពាក់ព័ន្ធមកផ្តល់ចម្លើយ និងអាចឈានដល់ការឃាត់ខ្លួនផងដែរ។ពាក់ព័ន្ធបទល្មើសនេះ, ចំពោះករណីការគិចវេះពន្ធ ច្បាប់នឹងត្រូវផ្តន្ទាទោសពិន័យជាប្រាក់ ១០ លានរៀល ដល់ ២០ លានរៀល ឬជាប់ពន្ធធនាគារពី ១ឆ្នាំ ដល់ ៥ឆ្នាំ ឬទោសទាំងពីរ។ ចំណែកការធ្វើឲ្យរាំងស្ទុះដល់ការ អនុវត្តបទបញ្ញត្តិស្តីពីពន្ធដារ ត្រូវរងផ្តន្ទាទោសពិន័យជាប្រាក់ ៥ លានរៀល ទៅដល់ ១០លានរៀល ឬទោសទាំងពីរ ។សូមបញ្ជាក់ថា នៅក្នុងរយៈពេល ៩ខែ ឆ្នាំ ២០២១ នេះវិញ, ចំណូលពន្ធ-អាករ ដែលអគ្គនាយកដ្ឋានពន្ធដារ ប្រមូលបានតាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារ មានចំនួនជិត ៨ ៥៥០ ប៊ីលានរៀល ប្រមាណជាង ២ ១១១ លានដុល្លារអាមេរិក ស្មើជាង ៩៤% នៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០២១ ៕អត្ថបទ ៖ សុន រ៉ាឌី

តម្លៃប្រេងឥន្ធនៈឡើងថ្លៃ ធ្វើឱ្យប្រជាពលរដ្ឋមានចំណូលទាបព្រួយបារម្ភលើការចំណាយប្រចាំថ្ងៃ

ភ្នំពេញ ៖ ប្រជាពលរដ្ឋដែលប្រកបរបរសេដ្ឋកិច្ចក្រៅប្រព័ន្ធមួយចំនួន បានត្អូញត្អែរពីប្រាក់ចំណូលថយចុះ ជាពិសេសក្នុងអំឡុងវិបត្តិជំងឺកូវីដ១៩ ខណៈដែលតម្លៃប្រេងឥន្ធនៈនៅតែហក់ឡើងខ្ពស់ជាបន្តបន្ទាប់ ដែលធ្វើឲ្យប៉ះពាល់ និងធ្វើឱ្យចំណាយប្រចាំថ្ងៃកើនឡើង។ការត្អូញត្អែររបស់ប្រជាពលរដ្ឋ គឺក្រោយតម្លៃប្រេងឥន្ធនៈលក់រាយនៅតាមស្ថានីយនានាចាប់ពីថ្ងៃទី១ ដល់១៥ ខែវិច្ឆិកា ឆ្នាំ២០២១ មានការកើនឡើង ដោយប្រេងសាំងធម្មតាថ្លៃ ៤ ៥៥០រៀល ក្នុង១លីត្រ។ និងប្រេងម៉ាស៊ូតថ្លៃ ៤ ១០០រៀល ក្នុង១លីត្រ។ ដោយឡែក ប្រេងសាំងស៊ុបពែរកើនដល់ ៥ ០៥០រៀល ក្នុង១លីត្រ។ពលរដ្ឋប្រកបរបរផ្នែកដឹកជញ្ជូន កញ្ញា សុខ សុភ័ក្រ្ត បាននិយាយថា តម្លៃដឹកជញ្ជូនសព្វថ្ងៃនេះរក្សានៅដដែល ទោះបីជាតម្លៃប្រេងឡើងថ្លៃ ឬចុះថ្លៃក៏ដោយ។ កញ្ញាបានឲ្យដឹងទៀតថា ការចំណាយទៅលើថ្លៃចាក់ប្រេង ជាមធ្យម២ ឬ៣ថ្ងៃម្តង ដោយក្នុងមួយលើកចំណាយប្រាក់ប្រមាណជិត ២ម៉ឺនរៀល។អ្នកប្រកបរបររត់ម៉ូតូកង់បី (past app) មានស្រុកកំណើតនៅស្រុកកោះធំ ខេត្តកណ្តាល បាននិយាយថា រាល់ពេលប្រេងសាំងឡើងថ្លៃ តម្លៃហ្គាសក៏ឡើងតាមនឹងដូចគ្នា។ លោកបន្តថា តម្លៃហ្គាស៣ខែមុន ក្នុង១លីត្រតម្លៃតែជាង ១ពាន់រៀល ប៉ុន្តែពេលនេះកើនដល់ជិត ៣ពាន់រៀល ក្នុង១លីត្រ ខណៈដែលសព្វថ្ងៃនេះ ប្រាក់ចំណូលរកបានគិតជាមធ្យមរកបានប្រមាណ ២ ទៅ៣ម៉ឺនរៀល និងពេលខ្លះគ្មានភ្ញៀវក៏មាន។ជុំវិញតម្លៃប្រេងឥន្ទនៈឡើងថ្លៃនេះ ឯកឧត្តម ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានបញ្ជាក់ប្រាប់ទូរទស្សន៍ព័ត៌មាន ប៊ីធីវី នៅព្រឹកថ្ងៃទី២ ខែវិច្ឆិកា ឆ្នាំ២០២១នេះថា រដ្ឋពិបាកមិនអាចគ្រប់គ្រង ថ្លៃប្រេងឥន្ធនៈនេះទេ គឺតម្លៃកំណត់ដោយទីផ្សារអន្តរជាតិន ព្រោះកម្ពុជាមិនមែនជាប្រទេសផលិតប្រេងទេ ។សូមបញ្ជាក់ថា កម្ពុជា បច្ចុប្បន្ន ប្រទេសកម្ពុជា បាននាំចូលប្រេងឥន្ទនៈ និងឧស្ម័ន ពីក្រៅប្រទេស ដូចជា វៀតណាម ថៃ និងសឹង្ហបុរី។ តួលេខឆ្នាំពីក្រសួងរ៉ែ និងថាមពល កាលពីឆ្នាំ២០១៩ កម្ពុជា នាំចូលប្រេងឥន្ទនៈ ប្រមាណ ២,៥លានតោន កើនឡើង ១០ ភាគរយ ធៀបនឹងឆ្នាំ២០១៨៕ អត្ថបទ ៖ ឈិត បូរ៉ាវី

វិស័យជំរុញសេដ្ឋកិច្ចសំខាន់ៗ រំពឹងថា មានសកម្មភាព និងចរន្តវិនិយោគឡើងវិញ

ភ្នំពេញ ៖ អ្នកជំនាញសេដ្ឋកិច្ចថា ការបើកប្រទេសឡើងវិញ គឺជាការចាក់បញ្ចូលនូវមូលធននៃលំហូរសាច់ប្រាក់ មកទីផ្សារកម្ពុជា ជាពិសេស តាមរយៈវិស័យទេសចរណ៍ រួមជាមួយសកកម្មភាពក្នុងស្រុកមានភាពសស្រាក់សស្រាំ គ្រប់ជ្រុងជ្រោយ និងប្រទាក់ក្រឡា ដែលធ្វើឲ្យកម្ពុជា នឹងអាចស្របយកហិរញ្ញវត្ថុបរទេស សម្រាប់ការជំរុញសេដ្ឋកិច្ចឲ្យមានកំណើន។លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជា ថ្លែងប្រាប់ភ្នាក់ងារអ្នកយកព័ត៌មាន ស្តីពីការប្រកាសបើកដំណើរការប្រទេសឡើងវិញរបស់រាជរដ្ឋាភិបាល នៅថ្ងៃទី ២ ខែ វិច្ឆិកា ឆ្នាំ២០២១ នេះថា ការប្រកាសបើកប្រទេសរបស់រាជរដ្ឋាភិបាលនៅពេលនេះ គឺជាការប្រែក្លាយពីវិបត្តិ ឲ្យទៅជាសក្តានុពល ក្នុងនោះអ្វីដែលជាកត្តាសំខាន់ គឺកម្ពុជាត្រូវឈរក្នុងភាពរឹងមាំនៃសេដ្ឋកិច្ចជាមុន ទើបការស្តារ និងអភិវឌ្ឍន៍ប្រទេសជំរុញទៅដោយភាពរលូន។លោកបណ្ឌិត បន្តថា ទាក់ទងនឹងការបើកប្រទេសឡើងវិញនេះ កម្ពុជានឹងអាចស្រូបយកតាមរយៈនៃវិស័យ សំខាន់ៗមួយចំនួន ក្នុងការចាក់បញ្ចូលមូលធននៃលំហូរសាច់ប្រាក់ចូលក្នុងប្រទេស ក្នុងនោះវិស័យទេសចរណ៍ អាចនឹងជួយឲ្យមានកំណើន និងប្រាក់ចំណូលដល់ប្រជាជនបន្ថែម ប៉ុន្តែតិចឬច្រើន គឺវាអាស្រ័យទៅលើទឹក ប្រាក់ចរាចរក្នុងប្រទេស, ប្រសិនចន្តរសេដ្ឋកិច្ចវិលជុំ និងសស្រាក់សស្រាំ គ្រប់ជ្រុងជ្រោយ និងប្រទាក់ក្រឡា នោះទើបហិរញ្ញវត្ថុបរទេសជួយសេដ្ឋកិច្ចឲ្យមានកំណើន។លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា ថ្លែងថា ប្រទេសកម្ពុជារំពឹងថា នឹងទទួលបានភ្ញៀវទេសចរអន្តរជាតិ ចូលមកទស្សនា ខណៈរដ្ឋាភិបាល បើកដំណើរការប្រទេសឡើងវិញគ្រប់វិស័យរបស់រាជរដ្ឋាភិបាល។ពាក់ព័ន្ធវិស័យនេះផងដែរ បើតាមសេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០២២ រំពឹងថា អនុវិស័យសណ្ឋាគារ និងភោជនីយដ្ឋាន នឹងងើបឡើងវិញ ប៉ុន្តែស្ថិតក្នុងកម្រិតទាប ទាំងទំហំ និងអត្រាកំណើន, ដោយសារការរំពឹងទុកការងើបឡើងវិញក្នុងល្បឿនយឺតនៃភ្ញៀវទេសចរអន្តរជាតិ ខណៈដែលចំនួនភ្ញៀវទេសចរជាតិ ត្រូវរំពឹងថា នឹងងើបឡើងវិញក្នុងសន្ទុះលឿនជាង នៅពេលដែលការរាតត្បាតក្នុងសហគមន៍មានការស្រាកស្រាន្ត និងគ្រប់គ្រងបាន៕អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ក្រសួងអប់រំ ប្រកាសដាក់ឱ្យប្រើប្រាស់ជាផ្លូវការនូវ កម្មវិធីផ្សាយផ្ទាល់ការបង្រៀនបំប៉ន (Live Teaching) ឆ្នាំ២០២៦

ប្រាក់ចំណេញត្រីមាសទី១របស់ក្រុមហ៊ុនផលិតប្រេង Saudi Aramco កើនឡើង២៥% ខណៈមានវិបត្តិច្រកសមុទ្រ Hormuz

មេដឹកនាំកូរ៉េខាងជើង លោក Kim Jong-un សន្យាយកទំនាក់ទំនងជាមួយរុស្ស៊ីជាអាទិភាពកំពូល

អនុប្រធានសមាគមអតីតយុទ្ធជន អញ្ជើញជាអធិបតីសម្ពោធអគារទីស្នាក់សមាគមអតីតយុទ្ធជន និងនិវត្តជនកម្ពុជា ខេត្តត្បូងឃ្មុំ

ចិន ជំរុញឲ្យជប៉ុន និងហ្វីលីពីន បញ្ឈប់ការប្រឈមមុខដាក់គ្នា

ប្រធានក្រុមការងារគណបក្សប្រជាជនចុះមូលដ្ឋាន ប្រកាសបញ្ចូលសមាជិកគណបក្សថ្មីជាង ១៥០០នាក់នៃឃុំចំនួន៥ ក្នុងស្រុកកំពង់សៀម ខេត្តកំពង់ចាម

ប្រធានគណៈកម្មាធិការ ណបក្សប្រជាជនកម្ពុជា ខេត្តកំពង់ស្ពឺ លើកទឹកចិត្តឱ្យក្រុមការងារបន្តយកចិត្តទុកដាក់ដោះស្រាយរាល់សំណើរពលរដ្ឋ

អតីតសកម្មជនគណបក្សប្រឆាំង ៦៧នាក់ នៅស្រុកស្អាង ចូលរួមជីវភាពនយោបាយជាមួយគណបក្សប្រជាជនកម្ពុជា

ការបំផ្ទុះគ្រាប់បែកក្នុងរថយន្តនៅប៉ាគីស្ថាន បានសម្លាប់នគរបាលជាង១០នាក់ និងមួយចំនួនរងរបួស

ឃុំខ្លួនឧក្រិដ្ឋជនបរទេស ២២នាក់ ដាក់ពន្ធនាគារបណ្តោះអាសន្ន ពាក់ព័ន្ធនឹងបទល្មើស Online Scams

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

សេដ្ឋកិច្ច និង កសិកម្ម

សិប្បកម្មធ្វើផើងដាំផ្កាកំពុងមានការចាប់អារម្មណ៍ពីមហាជន

រាជរដ្ឋាភិបាល ជំរុញវិស័យឯកជនវិនិយោគលើគម្រោងស្ថានីយសាកអគ្គិសនីដល់រថយន្តអគ្គិសនី

១០ខែឆ្នាំនេះ កម្ពុជានាំស្រូវទៅលក់នៅប្រទេសវៀតណាម តាមច្រកខេត្តតាកែវ ចំនួនជាង៨០ម៉ឺនតោន

អាកាសយានដ្ឋានអន្តរជាតិភ្នំពេញថ្មី បោះផ្សាយប័ណ្ណបំណុលមានការធានា១៥លានដុល្លារ

គម្រោងបុរី អិមអិល ធារ៉ា (ML TIARA) ជ្រើសរើសកញ្ញា មាន សូនីតា ជាទូតសុឆន្ទៈ

បារាំងលើកកម្ពស់សមត្ថភាព និងភាពទាក់ទាក់អ្នកទេសចរតាមផ្លូវអាកាសមកកម្ពុជា

ក្រុមហ៊ុនអាម៉េរិក នឹងបន្តវិនិយោគនិងពង្រីកអាជីវកម្មនៅកម្ពុជា

ពន្ធដារ នឹងចាត់វិធានការម៉ឺងម៉ាត់ ចំពោះបុគ្គលប្រព្រឹត្តបទល្មើសព្រហ្មទណ្ឌពន្ធដារ

តម្លៃប្រេងឥន្ធនៈឡើងថ្លៃ ធ្វើឱ្យប្រជាពលរដ្ឋមានចំណូលទាបព្រួយបារម្ភលើការចំណាយប្រចាំថ្ងៃ

វិស័យជំរុញសេដ្ឋកិច្ចសំខាន់ៗ រំពឹងថា មានសកម្មភាព និងចរន្តវិនិយោគឡើងវិញ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សេដ្ឋកិច្ច និង កសិកម្ម

សិប្បកម្មធ្វើផើងដាំផ្កាកំពុងមានការចាប់អារម្មណ៍ពីមហាជន

រាជរដ្ឋាភិបាល ជំរុញវិស័យឯកជនវិនិយោគលើគម្រោងស្ថានីយសាកអគ្គិសនីដល់រថយន្តអគ្គិសនី

១០ខែឆ្នាំនេះ កម្ពុជានាំស្រូវទៅលក់នៅប្រទេសវៀតណាម តាមច្រកខេត្តតាកែវ ចំនួនជាង៨០ម៉ឺនតោន

អាកាសយានដ្ឋានអន្តរជាតិភ្នំពេញថ្មី បោះផ្សាយប័ណ្ណបំណុលមានការធានា១៥លានដុល្លារ

គម្រោងបុរី អិមអិល ធារ៉ា (ML TIARA) ជ្រើសរើសកញ្ញា មាន សូនីតា ជាទូតសុឆន្ទៈ

បារាំងលើកកម្ពស់សមត្ថភាព និងភាពទាក់ទាក់អ្នកទេសចរតាមផ្លូវអាកាសមកកម្ពុជា

ក្រុមហ៊ុនអាម៉េរិក នឹងបន្តវិនិយោគនិងពង្រីកអាជីវកម្មនៅកម្ពុជា

ពន្ធដារ នឹងចាត់វិធានការម៉ឺងម៉ាត់ ចំពោះ​បុគ្គល​ប្រព្រឹត្ត​បទល្មើស​ព្រហ្មទណ្ឌ​ពន្ធដារ

តម្លៃប្រេងឥន្ធនៈឡើងថ្លៃ ធ្វើឱ្យប្រជាពលរដ្ឋមានចំណូលទាបព្រួយបារម្ភលើការចំណាយប្រចាំថ្ងៃ

វិស័យជំរុញសេដ្ឋកិច្ចសំខាន់ៗ រំពឹងថា មានសកម្មភាព និងចរន្តវិនិយោគឡើងវិញ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ពន្ធដារ នឹងចាត់វិធានការម៉ឺងម៉ាត់ ចំពោះបុគ្គលប្រព្រឹត្តបទល្មើសព្រហ្មទណ្ឌពន្ធដារ