នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
គណៈកម្មាធិការវិនិយោគ ពិនិត្យសំណើសុំចុះបញ្ជីចំនួនគម្រោងវិនិយោគចំនួន ៨ មានទុន ៤៩០លានដុល្លារ
ក្នុងត្រីមាសទី១ ឆ្នាំ២០២៦ កម្ពុជានាំចេញមុខទំនិញ​ស្ទើរ​គ្រប់​ប្រភេទ​មាន​កំណើន​កើន​ឡើង​ល្អ​ប្រសើរ
ត្រីមាសទី១ឆ្នាំនេះ CDC ចុះបញ្ជីគម្រោងវិនិយោគចំនួន ១៤៦ មានទុនប្រមាណ ២,៥ ប៊ីលានដុល្លារ
រយៈពេល៣ខែឆ្នាំ២០២៦នេះ ទីផ្សារអាមេរិកស្រូបយកទំនិញកម្ពុជា មានទឹកប្រាក់ជាង ៣,៣ ពាន់លានដុល្លារ

សេដ្ឋកិច្ច និង កសិកម្ម

ប្រធាន​សមាគម​អ្នក​ចិញ្ចឹមសត្វ៖ តម្រូវការផ្គត់ផ្គង់ជ្រូករស់ក្នុងឱកាសចូលឆ្នាំចិន-វៀតណាម​នឹង​ហក់​​ឡើង​​ដល់ ១,២ម៉ឺនក្បាលក្នុងមួយថ្ងៃ

2026/02/17 04:03:18 pm        341
Facebook Telegram Linkin
នៅក្នុងរដូវបុណ្យចូលឆ្នាំថ្មីប្រពៃណីចិន-វៀតណាម ក្នុងឆ្នាំនេះ តម្រូវការផ្គត់ផ្គង់ជ្រូករស់លើទីផ្សារ នឹងហក់ឡើងពីប្រមាណ ១ម៉ឺនដល់ ១,២ពាន់ក្បាលក្នុងមួយថ្ងៃ កើនឡើងប្រមាណ ២០ភាគរយ ខណៈ​ដែលតម្លៃសាច់ជ្រូកនៅលើទីផ្សារ នឹងអាចហក់ឡើងបន្តិចបន្ទូច បើធៀបទៅនិងថ្ងៃធម្មតា។លោក ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជា បាន​ថ្លែង​ប្រាប់​ភ្នាក់ងារ​អ្នក​យក​ព័ត៌មាន ​ស្តីពីកា​រចិញ្ចឹម និងការផ្គត់ផ្គង់ជ្រូករស់ មាន់ និង​ការ​ផ្គត់ផ្គង់​សាច់​នៅ​ក្នុង​ឱកាស​បុណ្យ​ចូល​ឆ្នាំថ្មី​ប្រពី​ណៃចិន-វៀតណាម នេះថា ជុំវិញមុខរបរចិញ្ចឹមសត្វឃើញថា នៅ​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយនេះ ការចិញ្ចឹមជ្រូកមានការវិវត្តន៍រីកចម្រើនយ៉ាងខ្លាំង ក្នុង​នោះ​ក្រៅ​ពី​ការ​ចិញ្ចឹម​ជា​លក្ខណៈ​គ្រួសារ កម្ពុជាក៏មានកសិដ្ឋានចិញ្ចឹមបែបឧស្សាហកម្មជាច្រើនកន្លែង ប្រកប​ដោយ​ស្តង់​ដារ ឆ្លើយតបដល់ការផ្គត់ផ្គង់ក្នុងស្រុក និងនាំចេញ។លោកបន្តថា ចំពោះការផ្គត់ជ្រូករស់ និងសាច់ជ្រូកលើទីផ្សារវិញឃើញថា នៅប៉ុន្មាន​ឆ្នាំ​ចុង​ក្រោយ​នេះ ​កម្ពុជាបានផ្គត់ផ្គង់តម្រូវ សាច់លើទីផ្សារ ជាពិសេសសាច់ជ្រូក និងមាន់ជាដើម បាន​ឆ្លើយ​តប​គ្រប់​គ្រាន់​ទៅ​និងតម្រូវការទីផ្សារ គឺបានជំនួសការនាំចូលទាំងស្រុង ជាក់ស្តែងការ​ផ្គត់​ផ្គង់​ជ្រូក​រស់​ថ្ងៃ​ធម្មតា​ មានតម្រូវការក្នុងរង្វង់ ៩ពាន់ទៅ ១ម៉ឺនក្បាល ដោយ​ឡែក​នៅ​ក្នុង​រដូវ​បុណ្យ​ចូល​ឆ្នាំ​ថ្មី​ប្រពៃណី ចិន និងវៀតណាម នៅក្នុងឆ្នាំ២០២៦ តម្រូវការជ្រូករស់អាចហក់ឡើងពី ១ ម៉ឺន ដល់ ១,២ ម៉ឺនក្បាល ចំណែកតម្លៃសាច់នៅលើទីផ្សារ អាចប្រែប្រួលបន្តិចបន្ទួច ស្រប​ពេល​តម្លៃ​មាន់​កសិកម្ម ​លក់ទៅឱ្យឈ្មួញកណ្តាល (មាន់រស់) បានធ្លាក់ថ្លៃយ៉ាងគំហុក ដោយក្នុង១គីឡូ ក្រាម មាន​តម្លៃមិ​នដល់ ៤ ពាន់រៀលនោះឡើយ។ឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គ​នាយក​ដ្ឋាន​សុខភាព​សត្វ និងផលិតកម្មសត្វ លើកឡើងឱ្យដឹងក្នុងពេលថ្មីៗនេះថា ក្នុងឆ្នាំ២០២៥, កម្ពុជា​មាន​សត្វសរុបចំនួនជិត ៦៩ លានក្បាល ក្នុងនោះជ្រូកមានចំនួនជាង ៤,៦ លានក្បាល កើន​ឡើង​ជាង ១៤% ធៀបនឹងឆ្នាំ២០២៤ ចំណែកបក្សី មានចំនួនជិត ៦១ លានក្បាល ថយចុះ ១,៣% ធៀបនឹង ឆ្នាំ២០២៤។ ទន្ទឹមនឹងនេះ កម្ពុជាអាចផ្គត់ផ្គង់សាច់បានចំនួន ៩៨% ស្មើនឹង ៣៣១ ពាន់តោន ដែលតម្រូវការជាក់ស្តែងចំនួន ៣៣៨ ពាន់តោន។ តាមការគណនាតម្លៃសត្វ និង​ផលិត​ផលសត្វនេះ មានតម្លៃប្រមាណជា ១ ៨០៦ លានដុល្លារ ក្នុងនោះតម្លៃផលិតផលសត្វ នៅ​សត្តឃាតដ្ឋាន ប្រមាណជា ១ ៣៦០ លានដុល្លា ស៊ុតបក្សី និងទឹកដោះប្រមាណជា ២០៣ លាន​ដុល្លារ និងបាននាំចេញសត្វ និង ផលិតផលសត្វបានប្រមាណជា ២៤៣ លានដុល្លារ៕ អត្ថបទ៖ សុន រ៉ាឌី

អ្នកជំនាញជាតិ-អន្តរជាតិ លើកទឹកចិត្តដល់សហគ្រិនក្នុងស្រុកចាប់យក AI ប្រើ​ប្រាស់​ក្នុង​អាជីវកម្ម

2026/02/16 02:28:13 pm        289
Facebook Telegram Linkin
អ្នកជំនាញជាតិ-អន្តរជាតិ ជំរុញលើកទឹកចិត្តដល់សហគ្រិនក្នុងស្រុក ចាប់​យក​បញ្ញា​សិប្ប​និម្មិត​(Ai)​ ប្រើប្រាស់ក្នុងការងារ និងអាជីវកម្ម ដើម្បីបង្កើនផលិតភាពលើផលិតកម្មឱ្យអស់សក្តានុពល និង​ជំរុញដោយនវានុវត្តន៍ ស្របពេលទីផ្សារក្នុងស្រុកកំពុងមាន តម្រូវការ។លោក​បណ្ឌិត កែន បៃ (Ken Bay) អ្នកជំនាញអន្តរជាតិ និងជានាយកដៃគូយុទ្ធសាស្រ្ត Cell Entrust Bio លើកឡើងក្នុងការចូល រួមជាវាគ្មិន ក្នុង​វេទិកា​ជំនួប​សហគ្រិន​ជំរុញ​សេដ្ឋកិច្ច​ឆ្នាំ​២០២៦​ ក្រោម​ប្រធានបទ៖ (ភាពជាអ្នកដឹកនាំសហគ្រិនសម័យឌីជីថល ២០២៦) (រៀបចំ​ដោយ​​សមាគម​សហគ្រិនវីម៉ូកម្ពុជា) នៅចុងសប្តាហ៍កន្លងមកថា ពិភព​លោក​បាន​កំពុង​ដើរ​តាម​បរិបថ​ ៤.០ និង បានប្តូរផ្លាស់បច្ចេវិទ្យាឌីជីថលសម្រាប់សេដ្ឋកិច្ច-សង្គម ដើម្បី​បម្រើ​ដល់​មនុស្ស​ជាតិ​ទូទៅ​ដូចជា សម្រាប់អ្នកសិក្សាស្រាវជ្រាវ សម្រួល ក្នុងវិស័យការងារ និងការទំនាក់ទំនង អាជីវកម្ម និងពាណិជ្ជកម្មជាដើម។លោកបណ្ឌិត បន្តថា ក្នុងរបត់ឧស្សាហកម្ម៤.០នេះ បាននិងកំពុងបន្តវិវត្តន៍រីកម្រើនឥតឈប់ឈរ ជាក់​ស្តែងនៅក្នុងរយៈពេល ប៉ុន្មានឆ្នាំចុងក្រោយនេះ បច្ចេកវិទ្យាបញ្ញាសិប្បនិម្មិត Ai បាន​កំពុង​ពុះកញ្ជោល​ឡើង, ដោយបច្ចេកវិទ្យា Ai នេះ ចាត់ទុកជាអ្នកជំនួយ ការដ៏ពិសេស ជួយសម្រួល​ដល់​ការ​ងារ ការគ្រប់គ្រង និងការជួយរៀបចំផែនការអភិវឌ្ឍន៍ជាដើម ខណៈបច្ចុប្បន្ន​ពិភព​លោក​កំពុង​ត្រូវ​ការប្រព័ន្ធដ៏ឆ្លាតវៃមួយនេះ។លោកបណ្ឌិត ខាត់ បូរ៉ា អ្នកជំនាញក្នុងស្រុក លើកឡើងផងដែរថា ជុំវិញបច្ចេកវិទ្យាឌីជីថលនេះ សម្រាប់​កម្ពុជាបាននិងកំពុងក្តោប យកប្រើប្រាស់ទាំងស្ថាប័នរដ្ឋនិងវិស័យឯកជន ហើយលោក​បណ្ឌិត​រំពឹង​ថានៅថ្ងៃខាងមុខ ការប្រើប្រាស់បច្ចេកវិទ្យាឌីជីថល ជាពិសេស បញ្ញាសិប្បនិម្មិត Ai កាន់​តែរី​កចម្រើនថែមទៀត ជួយសម្រួលដល់ប្រតិបតិការផ្សេងៗស្រួលជាងមុន។ ចំណែក​ទាក់​ទង​ធុរកិច្ច​វិញ, វិស័យនេះនឹងសម្រួលគ្រប់ដំណោះស្រាយនៅការអាជីកម្ម ពាណិជ្ជកម្ម និង​ការ​វិនិយោគ​ តែទោះបីយ៉ាងណាប្រព័ន្ធបច្ចេកវិទ្យាក៏អាច បង្កជាហានីភ័យមកវិញផងដែរ ដែលទាម​ទារ​ឱ្យ​មានការប្រុងប្រយ័ត្នខ្ពស់ លើការទប់ស្កាត់ដែលកើតឡើយដោយប្រការណាមួយ។លោក​បណ្ឌិត សួន ម៉ិ ប្រធានសមាគមសហគ្រិនវីម៉ូកម្ពុជា លើកឡើងថា ទាក់ទិនការធ្វើអាជីវកម្ម សហគ្រិនក្នុងស្រុកបាននិងកំពុង ចាប់យកបច្ចេកវិទ្យាឌីជីថល នៅក្នុងការងារអាជីវកម្មរបស់គាត់ ប៉ុន្តែ​ការប្រើប្រាស់បញ្ញាសិប្បនិម្មិត Ai ឃើញថា នៅមានកម្រិតនៅ ឡើយ ដែលបញ្ហា​នេះ​សូម​ឱ្យ​ម្ចាស់​អាជីវកម្ម និងសហគ្រិនក្នុងស្រុកទាំងអស់ ក្តោបយកបញ្ញាសិប្បនិម្មិត Ai បន្ថែមទៀត នៅ​ក្នុង​កិច្ច​ដំណើរការអាជីវកម្ម ដើម្បីឈានទៅរកភាពប្រកួតប្រជែង និងភាពរីក​ចម្រើន​ក្នុង​អាជីវកម្ម​។ដោយឡែកបណ្ឌិត ចូណាថាន់ ជូ (Jonathon Chua) នាយក​ប្រតិបត្តិ​នៃ​ការ​តភ្ជាប់​អាជីវ​កម្ម​អាស៊ី ​លើកឡើងផងដែថា ប្រព័ន្ធបច្ចេកវិទ្យាបានធ្វើឱ្យពិភពលោកនៅក្នុងចង្កោមតែមួយ នៃ​សុខ​ដុម​រមនីយ៍​កម្មក្នុងប្រតិបត្តិការឆ្លងដែន ដោយមិនត្រឹមតែនៅក្នុង ប្រតិបត្តិការ​ពាណិជ្ជក​ម្ម​ប៉ុណ្ណោះ​ទេ បច្ចុប្បន្នប្រទេសមួយចំនួនបាននិងកំពុងតភ្ជាប់នៃការទូទាត់រូបិយប័ណ្ណ ដែល​ផ្តល់​ភាព​កាន់តែ​ងាយ​ស្រួលដល់លំហូរសាច់ប្រាក់ ជាពិសេស​ការ​ផ្តល់​ភាព​ងាយ​ស្រួល​ក្នុង​វិស័យ​ទេសចរណ៍​ជា​ដើម​៕ ​អត្ថបទ៖ សុន រ៉ាឌី

៤ឆ្នាំចុងក្រោយនេះក្រុមហ៊ុនធ្វើអាជីវកម្មរ៉ែមាសចម្រាញ់មាសបាន ១៨តោន ខណៈ​រ៉ែផ្សេងៗ​កំពុង​ក្លាយ​ជាប្រភពចំណូលថ្មី

2026/02/15 01:21:16 pm        200
Facebook Telegram Linkin
គិតត្រឹមរយៈពេល៤ឆ្នាំចុងក្រោយនេះ ក្រុមហ៊ុនធ្វើអាជីវកម្មចម្រាញ់រ៉ែមាសនៅកម្ពុជា ចម្រាញ់​មាស​បាន​ប្រមាណ ១៨តោន ដោយវិស័យនេះកំពុងដើរយ៉ាងសំខាន់ ខណៈ​ដែល​វិស័យ​រ៉ែ​ផ្សេង​ៗ​ទៀត ​បាននិងកំពុងជាប្រភពចំណូលថ្មីរបស់ជាតិ តាមរយៈការបង្កើន ចំណូលចូលថវិកាជាតិ និង​ការ​បង្កើតការងារជូនប្រជាពលរដ្ឋជាដើម។  ឯកឧត្តម អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែ ក្រសួងរ៉ែ និងថាមពល លើក​ឡើង​នៅ​ក្នុង​ពិព័រណ៍ផលិតផល រ៉ែឆ្នាំ២០២៦ នេះថា ជុំវិញវិស័យរ៉ែនេះ កម្ពុជាកំពុង​ទទួល​បាន​ការ​ធ្វើ​អាជីវកម្ម​ធន​ធានរ៉ែគ្រប់ប្រភេទរួមមាន រ៉ែមាស រ៉ែដែក ស៊ីម៉ងត៍ ថ្មសំណង់ ថ្មអារ ខ្សាច់ ដីក្រហម អាចម៍ដី និងរ៉ែផ្សេងៗទៀត ក្នុងនោះគិតត្រឹមបំណាច់ឆ្នាំ២០២៥, វិស័យនេះ​មាន​ទុន​វិនិយោគ​សរុបជិត ៣ពាន់លានដុល្លារអាម៉េរិក និងបានបង្កើតការងារដោយផ្ទាល់ប្រមាណ ១២ពាន់កន្លែង ដោយ​ប្រជាពលរដ្ឋខ្មែរប្រមាណ ១១ ពាន់កន្លែង ស្មើនឹង ៩៥%។ចំណែកទាក់ទិនចំណូលវិញ, កម្ពុជាបានប្រមូលចំណូលមិនមែន​សារ​ពើ​ពន្ធ​ពី​វិស័យ​រ៉ែ​នៅ​ក្នុង​រយៈ​ពេល​១០​ឆ្នាំ​ចុងក្រោយនេះ មានការកើនឡើងគួរឱ្យកត់សម្គាល់ ក្នុងនោះការប្រមូល​ចំណូល​ពី​វិស័យ​នេះ ​បានកំណើនពីជាង ១៣ លានដុល្លារអាម៉េរិក នៅក្នុងឆ្នាំ ២០១៦ ដល់ជាង ១៣៥ លាន​ដុល្លារអាម៉េរិក នៅក្នុងឆ្នាំ២០២៥ ខណៈដែលរ៉ែមាសបាននិងកំពុងលេចធ្លាជាងគេ ជាក់​ស្តែង​គិត ត្រឹមរយៈពេល៤ឆ្នាំចុងក្រោយនេះ ក្រុមហ៊ុនដែលធ្វើអាជីវកម្មចម្រាញ់រ៉ែមាសនៅកម្ពុជា ចម្រាញ់​មាសបានប្រមាណ ១៨ តោន ពោល គឺវិស័យរ៉ែ បានចូលរួម​យ៉ាង​សកម្ម​ក្នុង​ការ​អភិវឌ្ឍ​ប្រទេស ដែលបានលើកកម្ពស់ខឿនសេដ្ឋកិច្ចក្លាយជាប្រភពចំណូលថ្មីរបស់ជាតិ។ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល លើកឡើងថា ប្រតិបត្តិការធនធានរ៉ែ បាន​ចូល​រួម​ចំណែក​អភិវឌ្ឍន៍ សហគមន៍មូលដ្ឋាន តាមរយៈមូល​និធិ​រ៉ែសម្រាប់​ទ្រទ្រង់​កិច្ច​អភិវឌ្ឍន៍​សហគមន៍​មូលដ្ឋាន ដែលផ្ដួចផ្ដើមបង្កើតឡើងដោយក្រសួងរ៉ែ និង ថាមពល ក្នុងគោលបំណង​បង្កើត​ឱ្យ​មានសុខដុមនីយកម្មក្នុងតំបន់ប្រតិបត្តិការធនធានរ៉ែ ក្នុងនោះចាប់ពីឆ្នាំ២០១៥ រហូត​ដល់​ឆ្នាំ២០២៥ គម្រោងអភិវឌ្ឍន៍សហគមន៍មូលដ្ឋាន មានចំនួន ១១៧ គម្រោង (រួមមាន​សាលា​រៀន​ ផ្លូវដីក្រហម ផ្លូវបេតុង ស្ពាន ប្រព័ន្ធធារាសាស្ត្រ អំពូលសូឡា ស្រះទឹកសហគមន៍ អណ្ដូង​ទឹក​ជា​ដើម​)។ គម្រោងទាំងនេះត្រូវបានអនុវត្តបញ្ចប់តាមបណ្តាឃុំ/សង្កាត់ ដែលមានប្រតិបត្តិការ​ធន​ធាន​រ៉ែ​ទូទាំង​ប្រទេស និងគម្រោងចំនួន២០ កំពុងបន្តអនុវត្តដែលប្រើប្រាស់​ថវិកា​មូល​និធិ​រ៉ែ​ប្រមាណ ​១០ លានដុល្លារអាម៉េរិក៕ អត្ថបទ៖ សុន រ៉ាឌី

ក្រុមសហគ្រិន សាទរចំពោះ«យុទ្ធនាការផលិតផលជាតិ»​ស្របពេលមានសន្ទុះគាំទ្រ និង​ប្រើ​ប្រាស់​ផលិត​ផលជាតិ

2026/02/15 09:43:02 am        143
Facebook Telegram Linkin
ក្រុមសហគ្រិន បានអបអរសាទរចំពោះ «យុទ្ធនាការផលិតផលជាតិ #MadeInCambodia» របស់​ក្រសួងពាណិជ្ជកម្ម ដែលត្រូវបានសម្ពោធបើក នៅព្រឹកថ្ងៃទី១៤ ខែកុម្ភៈ ឆ្នាំ២០២៦នេះ។ កម្មវិធី​នេះរៀបចំឡើង នៅផ្សារទំនើប ជីបម៉ុង២៧១ មេហ្គាម៉ល រាជធានីភ្នំពេញ។ តាម​រយៈ​យុទ្ធ​នាកា​រ​នេះ ក្រុមសហគ្រិន រំពឹងថា ផលិតផលរបស់ពួក​គាត់​នឹង​កាន់​តែ​មាន​សន្ទុះ​គាំទ្រ​ខ្លាំង​ឡើង ​ស្រប​ពេលមានសន្ទុះកើនឡើងយ៉ាងខ្លាំងពីសំណាក់ប្រជាជន ងាកមកគាំទ្រ ប្រើប្រាស់ និង​ផ្តល់​តម្លៃ​ដល់​ផលិតផលជាតិ។ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានប្រកាសបើកសម្ពោធ «យុទ្ធ​នាកា​រ​ផលិត​ផល​ជាតិ​ #MadeInCambodia» នៅព្រឹកនេះថា យុទ្ធនាការនេះ នឹងរៀបចំ​ឡើង​មាន​រយៈ​ពេល​មួយ​ឆ្នាំ​ពេញ ក្នុងគោលបំណង​ផ្សព្វ​ផ្សាយ​ឱ្យ​បាន​កាន់​តែទូ​លំទូលាយ​បន្ថែម​ទៀត​នូវ​ភាព​សម្បូរ​បែប​នៃ​ ផលិតផលជាតិ ជូនដល់អតិថិជន និងអ្នកប្រើប្រាស់ និងធ្វើឱ្យម៉ាក​ផលិត​ផល​ជាតិ​មាន​ភាព​លេច​ធ្លោ។លោកជំទាវ ចម និម្មល ថ្លែងទៀតថា «យុទ្ធនាការផលិតផលជាតិ #MadeInCambodia» នឹង​រុញ​ច្រាន​នូវស្មារតីស្រលាញ់ផលិតផលជាតិកាន់តែខ្លាំងក្លាឡើង ជាពិសេស ការជំរុញ​ការ​នាំ​ចេញ​ផលិត​ផល​នៅនឹងកន្លែង ដើម្បីរកទីផ្សារជូនម្ចាស់សហគ្រាស និងប្រជាកសិករ។សហគ្រិន​ដែល​បានចូលរួមតាំងបង្ហាញផលិតផលនៅក្នុងកម្មវិធី «យុទ្ធនាការផលិតផលជាតិ #MadeInCambodia» នៅព្រឹកនេះ បានគាំទ្រយ៉ាងពេញទំហឹងចំពោះយុទ្ធនាការនេះ ដោយ​ពួក​គាត់រំពឹងថា នឹងជួយផ្សព្វ​ផ្សាយ​ផលិត​ផល​របស់​ពួក​គាត់​កាន់​តែ​ទូលំ​ទូលាយ​ទៅ​កាន់​អ្នក​ប្រើ​ប្រាស់​។ក្រុមសហគិ្រនទាំងនោះ បានលើកឡើងថា សព្វថ្ងៃនេះ ផលិតផលក្នុងពិតជាមានការគាំទ្រជាខ្លាំង បន្ទាប់​ពីប្រជាពលរដ្ឋធ្វើពិហកាទំនិញថៃ។ ការគាំទ្រនេះ ក៏ព្រោះតែ រាជរដ្ឋាភិបាល ក៏ដូចជា ក្រសួង​-ស្ថាប័នពាក់ព័ន្ធ បានជួយជ្រោមជ្រែងក្នុងការជួយរកទីផ្សារ និងបង្កើន​ការ​ផ្សព្វ​ផ្សាយ​ផលិត​ផលរបស់​ទៅកាន់ប្រជាពលរដ្ឋ។ ឆ្លៀតក្នុងឱកាសនេះ ពួកគាត់ អំពាវនាវដល់ប្រជាពលរដ្ឋ ឱ្យ​បន្តគាំផលិតផលរបស់ពួកគាត់ឱ្យបន្ថែមទៀត ដើម្បីបង្កើតការងារ និងរក​ប្រាក់​ជូន​ប្រជា​កសិករ​។ក្រសួងពាណិជ្ជកម្ម ក្នុងនាមជាសេនាធិការរបស់រាជរដ្ឋាភិបាល បានខិតខំ​ចូល​រួម​អនុវត្ត​យុទ្ធ​សាស្ត្រ​បញ្ច​កោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា និង​កម្ម​វិធី​នយោបាយ​សម្រាប់ការកសាង និងការពារមាតុភូមិឆ្នាំ២០២៣-២០២៨ ជាពិសេស ក្នុង​ការ​បន្ត​ពង្រឹង ​ការគ្រប់គ្រងទីផ្សារ ការអភិវឌ្ឍខ្សែច្រវាក់តម្លៃ និងផ្គត់ផ្គង់ ការជំរុញការ​ប្រើ​ប្រាស់​ផលិត​ផល​​ខ្មែរ​នៅទីផ្សារ ក្នុងស្រុក ដើម្បីផ្សារភ្ជាប់រវាងអ្នកដាំដុះ អ្នកផលិត អ្នកកែច្នៃ អ្នកប្រមូលទិញ៕ អត្តបទ៖ ធូ វិរៈ

មន្រ្តីជាន់ខ្ពស់នៃអគ្គនាយកដ្ឋានគយ៖ ការបន្តបិទព្រំដែនដោយឯកតោភាគីរបស់ថៃ មិន​បង្កឱ្យ​កម្ពុជា​ខ្វះខាតស្បៀងនោះទេ

2026/02/13 01:31:47 pm        217
Facebook Telegram Linkin
គិតចាប់ពីខែមិថុនា ឆ្នាំ២០២៥ រហូតមកដល់បច្ចុប្បន្ននេះ ការ​បន្ត​បិទ​ព្រំដែន​ដោយ​ឯក​តោ​ភាគី​របស់​ថៃ មិនបង្ក​ឱ្យ​កម្ពុជាខ្វះខាតស្បៀងនោះទេ ជាពិសេសការបិទមិនឱ្យនាំចូលប្រេងឥន្ធនៈ និង​ឧស្ម័ន​ពី​ប្រទេស​ថៃ​ក៏កម្ពុជាអាចនាំចូលពីប្រទេសដទៃអាចផ្គត់ផ្គង់ទីផ្សារកម្ពុជាបានជាធម្មតា។ នេះ​បើ​តាម​ការបញ្ជាក់របស់មន្រ្ដីជាន់ខ្ពស់នៃអគ្គនាយកដ្ឋានគយ និងរដ្ឋាករកម្ពុជា។ ថ្លែងនៅក្នុងសន្និសីទសារព័ត៌មាន ក្រោយចប់​កិច្ច​ប្រជុំ​បូកស​រុប​លទ្ធផល​ការ​ងារ​របស់​អគ្គ​នាយក​ដ្ឋាន​គយ ​និងរដ្ឋាករកម្ពុជា ប្រចាំឆ្នាំ២០២៥ និងលើកទិសដៅការងារឆ្នាំ២០២៦ នៅថ្ងៃទី១២ ខែ​កុម្ភៈ​នេះ ​ឯកឧត្តមបណ្ឌិត គុណ ញឹម រដ្ឋមន្ដ្រីប្រតិភូអមនាយករដ្ឋមន្ដ្រី និងជាអគ្គនាយក នៃ​អគ្គ​នាយក​ដ្ឋា​​នគយ និងរដ្ឋាករកម្ពុជា មានប្រសាសន៍ថា ការបិទព្រំដែនផ្លូវគោកជាមួយប្រទេសថៃ គឺ​មិន​បាន​បង្ក​ផលប៉ះពាល់ដល់ការផ្គត់ផ្គង់ទំនិញក្នុងប្រទេសកម្ពុជាទេ ជាការពិតទំនិញ​ដែល​នាំ​ចូល​ពី​ប្រទេស​ថៃ​មក​កាន់កម្ពុជា បន្តមានការធ្លាក់ចុះខ្លាំង។ទាក់ទងនឹងការលើកឡើងរបស់មហាជន ជុំវិញការបន្តមាននាំចូល​ផលិត​ផល​ថៃ​មក​​ទីផ្សារ​ប្រទេស​កម្ពុជា ​ឯកឧត្តមបណ្ឌិត គុណ ញឹម បានឱ្យដឹងថា ភាគច្រើននៃទំនិញទាំងនោះ គឺជា​ទំនិញ​ប្រភេទ​ឧបករណ៍ បរិក្ខា ដែលបម្រើដល់ឧស្សាហកម្ម និងកសិកម្ម រួមប្រភេទគ្រឿង​ចក្រ​កសិកម្ម ដូចជាត្រាក់ទ័រ និងម៉ាស៊ីនច្រូតជាដើម។ ព្រម​ទាំង​ទំនិញ​មួយ​ចំនួន​ទៀត​ដែល​ជា​ធាតុ​ចូលរ​បស់​ឧស្សាហកម្មធុនធំមួយចំនួន សម្រាប់បម្រើផលិតកម្មរបស់ក្រុមហ៊ុនជប៉ុន និង​ទំនិញ​មួយ​ចំនួន​ទៀត គឺប្រភេទគ្រឿងបង្គុំសម្រាប់ថែទាំផលិតកម្មរបស់ក្រុមហ៊ុនដំឡើងរថយន្ត និង​ម៉ូតូ​មួយ​ចំ​នួន។ឯកឧត្តមបណ្ឌិត គុណ ញឹម បានបញ្ជាក់ថា ទំនិញដែលនាំចូលសម្រាប់ការប្រើប្រាស់ប្រចាំថ្ងៃ គឺ​មាន​ការ​ថយចុះប្រមាណ ៦០ ភាគរយ ស្របពេលទំនិញដែលហាមឃាត់ដូចជា ប្រេងឥន្ទនៈ បន្លែ ផ្លែ​ឈើ បានធ្លាក់ចុះដល់សូន្យភាគរយដោយសារចលនាពហិការ បាន​ធ្វើ​ឱ្យ​ទំនិញ​ដែ​ល​នាំ​ចូល​មក​ហើយ ​លក់មិនចេញត្រូវបាននាំចេញទៅវិញ ហើយទំនិញខ្លះទៀត នឹងត្រូវដុតកម្ទេចចោល ដោយ​សារ​ហួសសុពលភាពប្រើប្រាស់។យោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា គិតត្រឹមឆ្នាំ២០២៥ ការ​ប្រមូលចំណូលពន្ធរបស់កម្ពុជា សម្រេចបានលើសផែនការគ្រោងទុក ដែលគិតជា​ទឹក​ប្រាក់​ចំនួន​សរុប ១២,៧៦១ ប៊ីលានរៀល (១២ ៧៦០ ៥០៥លានរៀល) ស្មើនឹងប្រមាណ ៣,១៨១​លាន​ដុល្លារ មានការកើនឡើងចំនួន ២១ភាគរយ ប្រៀបធៀបទៅនឹងឆ្នាំ២០២៤ សម្រេច​បាន​ចំនួន​ ១០,៥៤២ ប៊ីលានរៀល (១០ ២៤៨ ៥៦៩លានរៀល) ស្មើនឹងប្រមាណ ២,៥៩០​លាន​ដុល្លារ​៕ អត្ថបទ៖ ឈិត បូរ៉ាវី 

ឆ្នាំ២០២៥ អគ្គនាយកដ្ឋានសុខភាពសត្វ និង​ផលិតកម្ម​សត្វ​ប្រមូល​ចំណូល​បាន​ជិត ២០​ពាន់​លាន​រៀល

2026/02/13 12:56:07 pm        167
Facebook Telegram Linkin
អគ្គនាយកដ្ឋានសុខភាពសត្វ និងផលិតកម្មសត្វ ក្នុងឆ្នាំ២០២៥ បាន​ប្រមូល​ចំណូល​សរុប​បាន​ចំនួន​ជិត ២០ពាន់លានរៀល ក្នុងនោះ ចំណូលបានពីអគ្គនាយដ្ឋានសុខភាពសត្វ និង​ផលិត​កម្ម​សត្វជិត ១៣ពាន់លានរៀល និងការិយាល័យផលិតកម្ម និងបសុព្យាបាលរាជធានី ខេត្តជាង ៦,៥ ពាន់លានរៀល។ឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃ​អគ្គ​នាយក​ដ្ឋាន​សុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រម៉ាញ់ និងនេសាទ លើកឡើង​ក្នុង​ពិធី​បិទ​កិច្ចប្រជុំបូកសរុបការងារសុខភាពសត្វ និងផលិតកម្មសត្វប្រចាំឆ្នាំ២០២៥ និង​ទិស​ដៅ​ការងារ​ឆ្នាំ២០២៦ នៅថ្ងៃទី១២ ខែកុម្ភៈ ឆ្នាំ២០២៦នេះថា ក្នុងឆ្នាំ២០២៥ ជុំវិញបញ្ហា​សុខ​ភាព​សត្វ ​និងផលិតកម្មសត្វនេះ នៅក្នុងឆ្នាំ២០២៥ កន្លងមក អគ្គនាយកដ្ឋាន​បាន​ប្រមូល​ចំណូល​សរុប​ចំនួន​ជិត ២០ពាន់លានរៀល ក្នុងនោះចំណូលបានពីអគ្គនាយដ្ឋាន សុខភាពសត្វ និង​ផលិត​កម្ម​សត្វ មានចំនួនជិត ១៣ ពាន់លានរៀល ដោយបានកើន ១១៥% និង​ការិយាល័យ​ផលិត​កម្ម ​និងបសុព្យាបាល រាជធានី-ខេត្ត ប្រមូលបានជាង ៦,៥ ពាន់លានរៀល កើនជិត ៣៨% បើធៀបរយៈពេលដូចគ្នាឆ្នាំ២០២៤។ដោយ​ឡែកការអនុវត្តថវិកាកម្មវិធី សម្រេចបាន ១១ ១៤៧ លានរៀល ស្មើជាង ៩៨% ធៀប​នឹង​ច្បាប់​ថ​វិកាចំនួន ១១ ៣២៨ លានរៀល។ ការអនុវត្តសម្រេចបានលទ្ធផលល្អ លើសពី​ការ​រំពឹង​ទុក​ត្រឹមតែ ៩៥% នៃច្បាប់ថវិកា ដោយសារការខិតខំប្រឹងប្រែងរបស់មន្ត្រី ទទួលបន្ទុក​គ្រប់​លំដាប់​ថ្នាក់​ មានការទទួលខុសត្រូវខ្ពស់ ព្រមទាំងមានការ​សម្រប​សម្រួល​របស់​ថ្នាក់​ដឹក​នាំ​គ្រប់​លំដាប់​ថ្នាក់ ជាពិសេស ឯកឧត្តម ឌីត ទីណា រដ្ឋមន្ត្រីក្រសួងកសិកម្ម រុក្ខាប្រម៉ាញ់ និងនេសាទ ដែ​ល​តែងតែយកចិត្តទុកដាក់ខ្ពស់។លោកជំទាវ ហោ ម៉ាលីន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ក៏បាន​ជំរុញ​ឱ្យ​អគ្គនាយក​ដ្ឋានសុខភាពសត្វ ផលិតកម្មសត្វ ការអភិវឌ្ឍអនុវិស័យសុខភាពសត្វ និងផលិត​កម្ម​សត្វ​ឱ្យ​កាន់តែរីកចម្រើនថែមទៀត និងបន្តរក្សាបាននូវតុល្យភាព រវាងការ អភិរក្ស និងការ​អភិវឌ្ឍ​ដូច​ជា ធ្វើឱ្យសម្រេចបាននូវលទ្ធផលការងារចែងក្នុងយុទ្ឋសាស្រ្តបញ្ចកោណដំណាក់កាលទី១ រាជ​រដ្ឋាភិបាលកម្ពុជា បានដាក់ចេញគោលនយោបាយអាទិភាពរួមមាន ការលើក​ស្ទួយ​ផលិត​កម្ម​កសិកម្ម​ រកទីផ្សារ រក្សាលំនឹងថ្លៃកសិផល តាមរយៈកម្មវិធីហិរញ្ញ ប្បទាន និងការដាក់​ពង្រាយ​មន្ត្រី​កសិកម្ម​ឃុំ-សង្កាត់ និងការអភិវឌ្ឍសហគមន៍កសិកម្មទំនើប៕ អត្ថបទ៖ សុន រ៉ាឌី

អ្នកជំនាញ៖ សហគ្រិន​ក្នុង​ស្រុក​កំពុង​ផ្លាស់ប្តូរ​ទម្លាប់​ចាប់​យក​បច្ចេក​វិទ្យា​ឌីជីថល​បម្រើ​ក្នុង​អាជីវកម្ម

2026/02/13 12:37:10 pm        139
Facebook Telegram Linkin
អ្នកជំនាញក្នុងវិស័យបច្ចេកវិទ្យាឌីជីថល មើលឃើញថា ល្បឿន​នៃ​ឌីជីថល​ភាវូប​នីយកម្ម​នៅ​កម្ពុជា ​កំពុងមានភាពយ៉ាងសកម្ម ខណៈដែលម្ចាស់អាជីវកម្ម និងអ្នកធ្វើធុរកិច្ច បាន​និង​កំពុង​ផ្លាស់​ប្តូរ​ទម្លាប់របស់ខ្លួន តាមរយៈការចាប់យកបច្ចេកវិទ្យាឌីជីថលបម្រើក្នុង​ចលនាអាជីវកម្ម និង​ពាណិជ្ជកម្ម ដើម្បីបង្កើនការងារ និងប្រាក់ចំណូល។ឧកញ៉ាបណ្ឌិត ឈិន កេន ប្រធានសមាគមបច្ចេកវិទ្យាឌីជីថលនៃកម្ពុជា លើកឡើង​ក្នុង​កិច្ច​សម្ភាសន៍​ជា​មួយ BTV ស្តីពីការ ប្រព័ន្ធបច្ចេកវិទ្យាឌីជីថល និងការប្រើប្រាស់​បច្ចេក​វិទ្យា​ក្នុង​ពេល​បច្ចុប្បន្ន​នេះថា នៅក្នុងរយៈពេល ២៥ឆ្នាំ​តទៅមុខយុទ្ធសាស្រ្តបញ្ចកោណរបស់រាជរដ្ឋាភិបាល នឹង​ជំរុញ​ឱ្យ​កាន់តែមានភាពប្រទាក់ក្រឡា​ក្នុងនោះការអភិវឌ្ឍធនធានមនុស្ស គឺជាលក្ខ​ខណ្ឌ​ចាំ​បាច់​មិន​អាចខ្វះបាន ដើម្បីជំរុញពិពិធកម្ម និងកំណើនសេដ្ឋកិច្ច, មូលធនមនុស្សមានគុណភាពខ្ពស់ និង​មាន​សុខភាពល្អ គឺជាទ្រព្យសកម្មជាតិដ៏រឹងមាំ សម្រាប់បង្កើនតម្លៃសេដ្ឋកិច្ច លើក​កម្ពស់​តម្លៃ​វប្បធម៌ និងបង្កើតគំនិតថ្មីៗ សំដៅធានាចីរភាពកំណើនសេដ្ឋកិច្ចរយៈពេលវែង នៅលើការ​អភិវឌ្ឍ​សេដ្ឋកិច្ច​-សង្គម។ឧកញ៉ាបណ្ឌិតបន្តថា ទាក់ទិនបច្ចេកវិទ្យានេះឃើញថា នៅក្នុងរយៈពេលជាង​២​ទស្សវត្ស​ចុង​ក្រោយ​នេះ បច្ចេកវិទ្យាឌីជីថល បានក្លាយជាផ្នែក​មួយ​យ៉ាង​សំខាន់​នៅ​ក្នុង​សកម្ម​ភាព​សេដ្ឋកិច្ច និង​សង្គម និងបានផ្តល់នូវកាលានុវត្តន៍ថ្មីៗជាច្រើន និងបាននាំមកនូវគំរូ ធុរកិច្ច​ប្រកប​ដោយ​នវា​នុវត្តន៍​, ការបង្កើនប្រសិទ្ធភាព និងប្រសិទ្ធផល, និងការធ្វើឱ្យ​បរិយាកាស​ប្រកួត​ប្រជែង​មាន​ភាព​កាន់​តែប្រ​សើរ​ ជាក់ស្តែងក្នុងពេលបច្ចុប្បន្នឃើញថា ម្ចាស់អាជីវកម្មបាន និងកំពុងផ្លាស់ប្តូរទម្លាប់ នៃកា​រ​ចាប់យកបច្ចេកវិទ្យាឌីជីថល បម្រើក្នុងខ្សែ ច្រវាក់ផលិតកម្មរបស់ខ្លួន តាមរយៈ​ការ​ទំនាក់​ទំនង​ ការផ្សព្វផ្សាយ និងកាលក់ផលិតផលនានាជាដើម។សូមបញ្ជាក់ថា ឆ្លើយតបតាមបរិបថនៃការប្តូរផ្លាស់វិស័យបច្ចេវិទ្យាសម្រាប់សេដ្ឋកិច្ច-សង្គម នេះថា ពិភព​លោកបានកំពុងដើរតាមបរិបថ ៤.០ ដែលបរិបថនេះកំពុងឈានចូលបរិបថថ្មីមួយទៀត គឺ ៥.០ ខណៈដែលមុននឹងការផ្លាស់ប្តូរសម័យកាលនេះ ឃើញថា នៅចុង បរិបថ ៤.០ បាន​កំពុង​ពុះ​កញ្ជោល​យ៉ាងខ្លាំង គឺការប្រើប្រាស់ប្រព័ន្ធបច្ចេកវិទ្យា Ai ឬហៅថា បញ្ញាសិប្បនិម្មិត Ai ។ Ai នេះ​បាន​កំពុង ចាត់ទុកជាទីប្រឹក្សាដ៏សំខាន់មួយ សម្រាប់ជា​ជំនួយ​ក្នុង​ការ​អភិវឌ្ឍ​តាម​ផែន​ការ​សកម្មភាព ការងារ និងអាជីវកម្ម និងបានកំពុងក្លាយជា ប្រធានបទយ៉ាងសំខាន់ នៃការស្វែង​រក​ដំណោះ​ស្រាយ ការផ្លាស់ប្តូរបទពិសោធន៍ ការជជែកវែកញ៉ែក លើបច្ចេកវិទ្យាបញ្ញា សិប្បនិម្មិត AI ក្នុង​បរិវត្តកម្មវិស័យអប់រំ ទំនើបកម្មអាជីវកម្ម ការអភិវឌ្ឍឧស្សាហកម្ម និង AI សម្រាប់​ជំរុញ​ពិពិ​ធ​កម្ម​សេដ្ឋ​កិច្ច។ ជុំវិញប្រព័ន្ធ បច្ចេកវិទ្យាឌីជីថលនេះដែរ បាននិងកំពុង​ជំរុញ​បណ្តុះ​គំនិត​ច្នៃ​ប្រឌិត​ដល់​ធុរកិច្ច តាមរយៈការចាប់យកបច្ចេកវិទ្យា សម្រាប់ដំណោះ ស្រាយក្នុងអាជីវកម្ម (អាជីវកម្ម​ជំនាន់​ថ្មី​) ដែលបានចូលរួមចំណែកគាំទ្រគោលនយោបាយរបស់រាជរដ្ឋាភិបាលផង និង​បំពេញ​សេចក្តី​ ត្រូវការក្នុងសង្គមផង ក្នុងគោលបំណងរុញសេដ្ឋកិច្ចជាតិឱ្យមានកំណើនកាន់តែប្រសើរ៕ អត្ថបទ៖ សុន រ៉ាឌី

ប្រតិភូក្រុមហ៊ុនចំនួនពីរ ធ្វើបទបង្ហាញលើគម្រោងបង្កើតសួនកែច្នៃកាកសំណល់ និងការផលិតថាមពល

2026/02/13 08:41:22 am        238
Facebook Telegram Linkin
ប្រតិភូក្រុមហ៊ុន Vinci Construction និងក្រុមហ៊ុន SUEZ ធ្វើបទបង្ហាញ អំពីរបាយការណ៍នៃការសិក្សាសមិទ្ធិលទ្ធភាពគម្រោង “សួនកែច្នៃកាកសំណល់-ការជ្រើសរើសបច្ចេកវិទ្យាសម្រាប់ប្រព្រឹត្តកម្មសំណល់រឹងក្នុងទីក្រុង និងការផលិតថាមពល”ជូនថ្នាក់ដឹកនាំ នៃក្រុមប្រឹក្សាអភិវឌ្ឍន៍កម្ពុជា។ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) នៅថ្ងៃទី១២ ខែកុម្ភៈ ឆ្នាំ២០២៦ បានអនុញ្ញាតជូនគណៈប្រតិភូក្រុមហ៊ុន Vinci Construction និងក្រុមហ៊ុន SUEZ ដឹកនាំដោយលោក Thomas CHAUVEAU នាយកគ្រប់គ្រងផ្នែកប្រតិបត្តិការថាមពល និងអាជីវកម្មថ្មីៗ នៃក្រុមហ៊ុន Vinci Construction ចូលជួបសម្តែងការគួរ សម និងពិភាក្សាការងារ។ជំនួបនោះគណៈប្រតិភូក្រុមហ៊ុននៃក្រុមហ៊ុនទាំងពីរ បានធ្វើបទបង្ហាញជូនឯកឧត្តមឧបនាយករដ្ឋមន្ត្រី អំពីរបាយការណ៍ នៃ ការសិក្សាសមិទ្ធិលទ្ធភាពគម្រោង “សួនកែច្នៃកាកសំណល់-ការជ្រើសរើសបច្ចេកវិទ្យាសម្រាប់ប្រព្រឹត្តកម្មសំណល់រឹងក្នុងទីក្រុង និងការ ផលិតថាមពល” ដែលត្រូវបានសហការសិក្សាដោយ អ្នកជំនាញពីក្រុមហ៊ុន Vinci Construction និងក្រុមហ៊ុន SUEZ Company។ តាមរយៈបទបង្ហាញនេះដែរ អ្នកជំនាញបានជម្រាបអំពីព័ត៌មានជាអាទិ៍៖ ទិន្នន័យពាក់ព័ន្ធដែលប្រមូលបាន បច្ចុប្បន្នភាព នៃការសិក្សា គម្រោង និងបច្ចេកវិទ្យានានាសម្រាប់ការធ្វើប្រព្រឹត្តកម្មរោងចក្រកាកសំណល់ និងបំប្លែងជាថាមពលសម្រាប់ប្រើប្រាស់បន្តទៀត។សូមជម្រាបថា ទាក់ទងគម្រោងខាងលើនេះ ក្រុមហ៊ុនទាំងពីរបានសហការសិក្សាគ្នា ក្នុងគោលបំណងរួមមាន៖ (១)- បង្កើតថាមពល ស្អាត និងតម្លៃសមរម្យ ដោយបំប្លែងកាកសំណល់ប្លាស្ទិកទៅជាអគ្គិសនី, (២)- បង្កើនអាយុកាលនៃទីលានចាក់សំរាម, (៣)- លើក កម្ពស់សុខភាព និងសុខុមាលភាពរបស់ប្រជាពលរដ្ឋ, (៤)- លើកកម្ពស់វិស័យឧស្សាហកម្ម នវានុវត្តន៍ និងហេដ្ឋារចនាសម្ព័ន្ធពាក់ព័ន្ធ តាមរយៈការសាងសង់រោងចក្រកែច្នៃកាកសំណល់ ជាមួយនឹងបច្ចេកវិទ្យាចុងក្រោយ និង (៥)- ពង្រឹងការគ្រប់គ្រងការចំណាយ ក្នុង ការកែច្នៃកាកសំណល់ក្នុងទីក្រុង៕អត្ថបទ៖ សុន រ៉ាឌី

កម្ពុជាទទួលបានការចុះបញ្ជីវិនិយោគតាមថ្នាលជាតិ មានទុនសរុបជិត ២២ ប៊ីលានដុល្លារ

2026/02/13 08:30:53 am        230
Facebook Telegram Linkin
គិតត្រឹមថ្ងៃទី៣១ ខែមករា ឆ្នាំ២០២៦, កម្ពុជាទទួលបានក្រុមហ៊ុនចុះបញ្ជី តាមប្រព័ន្ធចុះបញ្ជីអាជីវកម្មនៃថ្នាលបច្ចេកវិទ្យាព័ត៌មាន ដែលបានអនុម័ត មានចំនួនសរុបជាង ៥៤ ពាន់ក្រុមហ៊ុន-សហគ្រាស មានដើមទុនវិនិយោគចំនួនប្រមាណជាង ៩០ ទ្រីលានរៀល ត្រូវជិត ២២ ប៊ីលានដុល្លាអាមេរិក។យោងតាមសេចក្ដីប្រកាសព័ត៌មានរួម នៃប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ហៅកាត់ថា CamDX ជាថ្នាល បច្ចេកវិទ្យាឌីជីថលមួយ សម្រាប់សម្រួលដល់កិច្ចការវិនិយោគរបស់រាជរដ្ឋាភិបាល, គិតមកថ្ងៃទី៣១ ខែមករា ឆ្នាំ២០២៦ កម្ពុជាទទួល បានការចុះបញ្ជីតាមថ្នាលជាតិ មានចំនួនជាង ៥៤ ពាន់ក្រុមហ៊ុន/សហគ្រាស ដែលមានដើមទុនវិនិយោគប្រមាណជិត ៩០ ទ្រីលាន រៀល ត្រូវប្រមាណជិត ២២ ប៊ីលានដុល្លារអាមេរិក ដែលការចុះបញ្ជីនេះឃើញថា មានកំណើនកើនឡើងជាលំដាប់ ដោយប្រការទាំង នេះបានកំពុងបង្ហាញឲ្យឃើញពីវឌ្ឍនភាពនៃការរីកចម្រើន សម្រាប់ការធ្វើអាជីវកម្ម ពាណិជ្ជកម្ម ក្នុងការប្រកួតប្រជែងប្រកបដោយ បរិយាបន្នរបស់ធុរកិច្ចគ្រប់ៗនៅកម្ពុជា។ជាក់ស្តែងគិតមកដល់រយៈពេលនេះ កម្ពុជាទទួលបានការចុះបញ្ជីតាមថ្នាលបច្ចេកវិទ្យាព័ត៌មានរួមមាន៖ សកម្មភាពអចលន- ទ្រព្យ ដោយប្រើប្រាស់អចលនទ្រព្យផ្ទាល់ខ្លួន ឬជួលពីគេ មានទឹកប្រាក់វិនិយោគប្រមាណ ១,៩២ ប៊ីលានដុល្លារ, សកម្មភាពសេវាកម្ម ស្នាក់នៅ ១,៦៤ ប៊ីលានដុល្លារ, ការសាងសង់អគារ ១,៥៥ ប៊ីលានដុល្លារ, កម្មន្តសាលសម្លៀកបំពាក់លើកលែងសម្លៀកបំពាក ធ្វើពីរោម ១,១៣ ប៊ីលានដុល្លារ, សកម្មភាពពិគ្រោះយោបល់ផ្នែកគ្រប់គ្រង ៩៤៨ លានដុល្លារ និងការចុះបញ្ជីរបស់ក្រុមហ៊ុនអាជីវកម្ម ផ្សេងៗទៀត មានចំនួនប្រមាណជាង ១៤ ប៊ីលានដុល្លារ។ចំពោះក្រុមហ៊ុន និងសហគ្រាសដែលទទួលបានចុះបញ្ជីច្រើនជាងគេរួមមាន៖ សកម្មភាពសេវាភោជនីយដ្ឋាន និងសេវាផ្គត់ ផ្គង់សេវាចល័ត មានចំនួន ៤,៨៨៣ សហគ្រាស, ការលក់ដុំឯកទេសផ្សេងៗ ជាង ៣,០០០ សហគ្រាស, ការលក់ដុំទំនិញសម្រាប់ការ ប្រើប្រាស់ក្នុងផ្ទះ ២,៥៧៥ សហគ្រាស, ការសាងសង់អគារ ២,១៧១ ក្រុមហ៊ុន, ការលក់រាយទំនិញផ្សេងៗនៅក្នុងហាងឯកទេស ២,១១០ សហគ្រាស និងអាជីវកម្មផ្សេងៗមានចំនួនជិត ៤០ ក្រុមហ៊ុន-សហគ្រាស៕អត្ថបទ៖ សុន រ៉ាឌី

អ្នកជំនាញ៖ ការដោះដូរពាណិជ្ជកម្មកម្ពុជាឆ្នាំនេះ​នឹងបន្តហក់ឡើង​ ខណៈរដ្ឋាភិបាល​កំពុងត្រៀមខ្លួន​ទប់ទល់ផលប៉ះពាល់

2026/02/12 12:25:30 pm        90
Facebook Telegram Linkin
អ្នកជំនាញ រំពឹងថា ការដោះដូរពាណិជ្ជកម្មអន្តរជាតិរបស់កម្ពុជាឆ្នាំ២០២៦ នឹងបន្តហក់ឡើង ខណៈកម្ពុជាបាននិងកំពុងពង្រឹងខ្លួន និងត្រៀមលក្ខណៈសមស្របទប់ទល់នឹងផលប៉ះពាល់ ក្នុងការប្រែក្លាយបញ្ហាប្រឈមទៅជាកាលានុវត្តភាព តាមរយៈការពង្រឹងទាក់ ទាញការរវិនិយោគ និងពង្រីកទីផ្សារបន្ថែមជាដើម។ ទាក់ទិនបញ្ហាសេដ្ឋកិច្ចនេះ, រាជរដ្ឋាភិបាលកម្ពុជាបានដាក់ចេញនូវវិធានការចាំបាច់នានា ជាកញ្ចប់កម្មវិធីគាំទ្រកំណើនតាម វិស័យ ដើម្បីដោះស្រាយនូវបញ្ហាជាឧបសគ្គរាំងស្ទះទាំងឡាយ និងចំគោលដៅសម្រាប់កំណើនសេដ្ឋកិច្ច ជាពិសេសវិស័យដែលរំពឹង ទុក ដែលមានកំណើនយឺតនិងថមថយ, ការរក្សាបាននូវលំនឹងជីវភាពប្រជាជន ការលើកកម្ពស់ផលិតភាព និងជំរុញដល់ការចាយវាយ របស់ប្រជាជនទូទៅ ជាពិសេសការបន្តកម្មវិធីលើកកម្ពស់ភាពប្រកួតប្រជែង បង្កើនពិពិធកម្មនិងពង្រីកភាពធន់ ដើម្បីកំណើនសេដ្ឋកិច្ច ក្នុងបរិការណ៍សកលដែលមិនមានភាពប្រាកដប្រជា។ តាមរយៈការដាក់វិធានការខាងលើ, លោកបណ្ឌិត សួន ម៉ិ ប្រធានសមាគមសហគ្រិនវីម៉ូកម្ពុជា ថ្លែងថា តាមទស្សនវិស័យ សេដ្ឋកិច្ចសកលឃើញថា នៅតែបន្តហ៊ុមព័ន្ធដោយហានីភ័យនិងភាពមិនប្រាកដប្រជាខ្ពស់ ដែលធ្វើឱ្យចលនាកំណើនសេដ្ឋកិច្ចសកល អាចថមថយ។ ចំណែកសម្រាប់កម្ពុជាគឺបានបំពេញកាតព្វកិច្ច ត្រៀមខ្លួននៃការប្រែក្លាយបញ្ហាប្រឈមទៅជាកាលានុវត្តភាព ដោយប្រើ ប្រាស់លក្ខខណ្ឌអំណោយផល ដើម្បីលើកកម្ពស់ប្រសិទ្ធភាពនិងភាពប្រកួតប្រជែងសេដ្ឋកិច្ច និងកែលម្អបរិស្ថានវិនិយោគដើម្បីទាញ ការវិនិយោគនិងធុរកិច្ចបន្ថែម ដែលនឹងហូរពីតំបន់មានជម្លោះចូលមកកម្ពុជា។ លោកបណ្ឌិត បន្ថែមថា ជាក់មកដល់ពេលនេះ ចលនា នៃសកម្មភាពអាជីវកម្មក្នុងស្រុកបាននិងកំពុងកើតឡើងយ៉ាងផុលផុស ស្របពេលពាណិជ្ជកម្មអន្តរជាតិរបស់កម្ពុជា ក្នុងខែដំបូងឆ្នាំ ២០២៦នេះ បានបង្ហាញនូវនិន្នាការកើនឡើង គាំទ្រដល់ការរីកលូតលាស់ក្នុងសេដ្ឋកិច្ច។ជុំវិញកំណើនសេដ្ឋកិច្ចនេះដែរ, ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ ជនបទ និងកសិកកម្ម លើកឡើងថា ដើម្បីកសាងជាតិមួយ អ្នកនយោបាយត្រូវមានទស្សនៈវិស័យ និងចក្ខុវិស័យមិនក្រោម៥០ឆ្នាំ នោះឡើយ ក្នុងនោះបើមានចក្ខុវិស័យរយៈពេលខ្លី គឺមិនអាចកសាងប្រទេសបានតាមការរំពឹងទុកឡើយ ជាក់ស្តែងការដាក់ចេញនូវ ចក្ខុវិស័យឆ្នាំ២០៥០ ដែលជាបំណងប្រាថ្នារបស់រាជរដ្ឋាភិបាល ក្នុងគោលដៅជំរុញកសាងជាតិឱ្យរីកចម្រើនទៅមុខ និងជាប្រទេស មានចំណូលខ្ពស់ ហើយប្រសិនសម្រេចបានតាមការគ្រោងទុក អ្វីៗទំាងអស់និងដើរតាមនោះផងដែរ។យោងតាមច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ កម្ពុជាមានការចាំបាច់ទប់ទល់នឹងផលប៉ះពាល់ពីកត្តាខាងក្រៅប្រទេស មានជាអាទិ៍ ការកើនឡើងនូវភាពតានតឹងភូមិសាស្ត្រនយោបាយក្នុងតំបន់ និងសកល, ជាពិសេសការអូសបន្លាយនៃសង្គ្រាមរវាងរុស្ស៊ី និងអ៊ុយក្រែន, សង្គ្រាមរវាងអ៊ីស្រាអែលនិងក្រុមហាម៉ាស, រួមទាំងការរីករាលដាលនៃសង្គ្រាម នៅតំបន់មជ្ឈិមបូព៌ា ដែលអាចធ្វើឱ្យប៉ះ ពាល់ដល់ច្រវាក់ផ្គត់ផ្គង់សកល និងរុញច្រានថ្លៃទំនិញអន្តរជាតិឱ្យហក់ឡើងវិញជាដើម បញ្ហានេះកម្ពុជាក៏បានត្រៀមជាស្រាច់ផងដែរ។ចំណែកការធ្វើពាណិជ្ជកម្មជាអន្តរជាតិ, ក្នុងខែដំបូងក្នុងឆ្នាំ២០២៦នេះ ការដោះដូរពាណិជ្ជកម្មលើទីផ្សារអន្តរជាតិរបស់កម្ពុជា មាន ទំហំទឹកប្រាក់សរុបប្រមាណជាង ៦ លានដុល្លារ កើនឡើងជិត ១៩ ភាគរយ បើធៀបរយៈពេលដូចគ្នាឆ្នំា២០២៥ (មានទឹកប្រាក់ ប្រមាណជាង ២ ៣០០ លានដុល្លារប៉ុណ្ណោះ)៕ អត្ថបទ៖សុន រ៉ាឌី

បណ្ដាញសង្គម

ព័ត៌មានថ្មីៗ

តើ Manchester City ក្លាយជាបេក្ខភាពប្រជែងជើងឯកឈានមុខរឺទេក្រោយឈ្នះ Arsenal?
04/21/2026 05:04 PM
Facebook Telegram Linkin
ទូរទស្សន៍រដ្ឋអ៊ីរ៉ង់៖ មិនមានគណៈប្រតិភូអ៊ីរ៉ង់ធ្វើដំណើរទៅប៉ាគីស្ថានទេ សម្រាប់កិច្ចចរចាជុំទី២ ជាមួយអាមេរិក
04/21/2026 04:04 PM
Facebook Telegram Linkin
បេសកជនចិនអំពាវនាវឱ្យបន្ធូរបន្ថយស្ថានការណ៍នៅអ៊ុយក្រែនឱ្យបានឆាប់តាមដែលអាចធ្វើទៅបាន
04/21/2026 04:04 PM
Facebook Telegram Linkin
ប្រធានាធិបតីបារាំងជំរុញឲ្យអ៊ីរ៉ង់ និងអាមេរិក បន្ថយភាពតានតឹងនៅច្រកសមុទ្រហ័រមូស
04/21/2026 04:04 PM
Facebook Telegram Linkin
មនុស្ស ២១នាក់សា្លប់ ហើយ ៦១នាក់រងរបួស ក្រោយរថយន្តក្រុងរអិលធ្លាក់ជម្រាលភ្នំ នៅតំបន់ Kashmir
04/21/2026 04:04 PM
Facebook Telegram Linkin
ប្រមុខ ECB ព្រមានថា អឺរ៉ុបប្រឈមនឹងផលវិបាកយូរអង្វែង ដោយសារវិបត្តិនៅច្រកសមុទ្រ Hormuz
04/21/2026 04:04 PM
Facebook Telegram Linkin
UN ព្រមានថា សង្គ្រាមអ៊ុយក្រែន អាចនឹងកាន់តែអាក្រក់ទៅៗយ៉ាងឆាប់រហ័សហួសពីការគ្រប់គ្រងបាន
04/21/2026 04:04 PM
Facebook Telegram Linkin
នាយករដ្ឋមន្ត្រីជប៉ុន អាចធ្វើឲ្យចិនមានកំហឹងកាន់តែខ្លាំង ដោយការថ្វាយតង្វាយទីសក្ការៈ Yasukuni
04/21/2026 04:04 PM
Facebook Telegram Linkin
ត្រឹមសប្តាហ៍ទី៣ ខែមេសានេះ ក្រសួងបរិស្ថានបានបន្តបណ្តុះកូនឈើចម្រុះបានប្រមាណ ៣លានដើម សម្រាប់ចែកជូនសាធារណជនយកទៅដាំ ក្នុងគោលដៅបង្កើនគម្របបៃតងនៅកម្ពុជា
04/21/2026 04:04 PM
Facebook Telegram Linkin
មន្ត្រីអាមេរិកជំរុញឲ្យប្រជាជនគុយបាធ្វើកំណែទម្រង់ នៅក្នុងកិច្ចប្រជុំឡាហាវ៉ាន
04/21/2026 04:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.