BTV NEWS

សម្ដេចធិបតី៖ មន្ត្រីជាអ្នកបម្រើរាស្ត្រ មិនមែនជាចៅហ្វាយរាស្ត្រទេ

សម្ដេចតេជោ ហ៊ុន សែន ចែករំលែកអត្ថបទអ្នកស្រាវជ្រាវថៃ ក្រោមចំណងជើងថា «មនុស្សធម៌ខ្វះការអាណិតអាសូរ»

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញប្រគេនទៀនព្រះវស្សា និងនាំយកទេយ្យវត្ថុ ប្រគេនវត្តចំនួន១២វត្ត និងចែកអំណោយដល់យាយជីតាជី នៅស្រុកក្រគរ និងស្រុកភ្នំក្រវាញ ខេត្តពោធិ៍សាត់

គណៈប្រតិភូធុរកិច្ចមកពីហុងកុង ក្វាងទុង និងម៉ាកាវ បង្ហាញចំណាប់អារម្មណ៍ក្នុងការស្វែងរកឱកាសវិនិយោគលើវិស័យសក្តានុពលនៅកម្ពុជា

ព័ត៌មានសំខាន់ៗ

កូរ៉េខាងជើងបាញ់មីស៊ីល ២លើកក្នុងរយៈពេលមិនដល់ ១សប្ដាហ៍ជាការផ្គើននឹងអាមេរិក

អាមេរិក៖ មន្ត្រីជាន់ខ្ពស់មួយរូបរបស់សហរដ្ឋអាមេរិក បាននិយាយប្រាប់ CNN ថា យោងតាមការវាយតម្លៃចារកិច្ចកូរ៉េខាងជើង បានបាញ់មីស៊ីលបាលីស្ទិក ២គ្រាប់នៅថ្ងៃព្រហស្បតិ៍នេះ ដែលជាការផ្គើននឹងទីក្រុងវ៉ាស៊ីងតោន។ ទោះបីជាយ៉ាងណាក៏ដោយ គេមិនទាន់ដឹងច្បាស់នោះទេថា តើវាជាប្រភេទមីស៊ីលរយៈចម្ងាយជិត មធ្យម ឬរយៈចម្ងាយឆ្ងាយ ដូចជាមីស៊ីលបាលីស្ទិកអន្តរទ្វីប ICBM នោះទេ។ក្រុមចារកិច្ច និងយោធាសហរដ្ឋអាមេរិក កំពុងវិភាគទិន្នន័យពីការបាញ់សាកល្បង ដើម្បីកំណត់ថា តើវាជាប្រភេទមីស៊ីលអ្វី និងហោះបានចម្ងាយប៉ុន្មានគីឡូម៉ែត្រ។ គួរឲ្យដឹងថា មីស៊ីលរយៈចម្ងាយជិតអាចហោះបានចម្ងាយតិចជាង ១ពាន់គីឡូម៉ែត្រ ខណៈដែលមីស៊ីលរយៈចម្ងាយមធ្យម អាចហោះបានចម្ងាយចន្លោះពី ១ពាន់គីឡូម៉ែត្រទៅ ៣ពាន់គីឡូម៉ែត្រ។ សហរដ្ឋអាមេរិកតាមដានការបាញ់សាកល្បងអាវុធ របស់កូរ៉េខាងជើងតាមរយៈរ៉ាដា និងផ្កាយរណប ដែលអាចចាប់ជាប់សញ្ញាកម្ដៅមីស៊ីល ពេលបាញ់ចេញភ្លាមៗ។នៅព្រឹកថ្ងៃនេះផងដែរ នាយសេនាធិការចម្រុះកូរ៉េខាងត្បូង បាននិយាយប្រាប់ក្រុមអ្នកសារព័ត៌មានថា កូរ៉េខាងជើងបានបាញ់មីស៊ីលគ្មានអត្តសញ្ញាណ ចូលទៅក្នុងសមុទ្រចន្លោះតំបន់ឧបទ្វីបកូរ៉េ និងប្រទេសជប៉ុន។ យោងតាមសេចក្ដីរាយការណ៍ ពីក្រសួងការពារជាតិជប៉ុនបានឲ្យដឹងថា មីស៊ីលនេះទំនងជាបានធ្លាក់នៅក្រៅដែនដីជប៉ុន និងតំបន់សេដ្ឋកិច្ចពិសេស។ ក្រុមឆ្មាំសមុទ្រជប៉ុនបានក្រើនរំឭកនាវា ពីការឃ្លាំមើលបំណែកធ្លាក់របស់មីស៊ីល។ កាលពីសប្ដាហ៍មុន កូរ៉េខាងជើងបានបាញ់សាកល្បងមីស៊ីល ២គ្រាប់ផងដែរ ដែលជាការបាញ់សាកល្បងជាលើកដំបូង ចាប់តាំងពីប្រធានាធិបតីសហរដ្ឋអាមេរិក លោក ចូ បៃដិន ឡើងកាន់តំណែង៕អត្ថបទ៖ សារ៉ាត់

ករណីស្លាប់ប្រចាំថ្ងៃដោយសារ COVID-19 នៅប្រេស៊ីលកើនឡើងជាង ៣ពាន់នាក់ជាលើកដំបូង

ប្រេស៊ីល៖ ករណីស្លាប់ប្រចាំថ្ងៃដោយសារជំងឺ COVID-19 នៅប្រទេសប្រេស៊ីលបានកើនឡើងជាង ៣ពាន់នាក់ជាលើកដំបូងកាលពីថ្ងៃអង្គារ ស្របពេលដែលប្រទេសរងផលប៉ះពាល់ខ្លាំងមួយនេះ ពិបាកក្នុងការទប់ស្កាត់ការហក់ឡើងខ្ពស់ករណីឆ្លង ដែលជំរុញឲ្យមន្ទីរពេទ្យជាច្រើន ធ្លាក់ក្នុងស្ថានការណ៍មិនអាចស្រោចស្រង់បាន។ក្រសួងសុខាភិបាលបានរាយការណ៍ ករណីស្លាប់ខ្ពស់បំផុតចំនួន ៣.២៥១នាក់ក្នុងរយៈពេល ២៤ម៉ោងចុងក្រោយ ធ្វើឲ្យករណីស្លាប់នៅប្រេស៊ីលកើនឡើងជិត ២៩៩.០០០នាក់ ដែលជាករណីស្លាប់ខ្ពស់ជាងគេបំផុតបន្ទាប់ពីសហរដ្ឋអាមេរិក។ ករណីស្លាប់ច្រើនបំផុតនេះដែរ បានកើតមានឡើងនៅថ្ងៃតែមួយ ដែលលោកប្រធានាធិបតី ជែ បូលសូណារ៉ូ លើកបន្តុរដ្ឋមន្ត្រីក្រសួងសុខាភិបាលទី៤ របស់លោក និងប្រឈមសំពាធខ្លាំងឲ្យផ្លាស់ប្ដូរ គោលនយោបាយរបស់លោក ក្រោយពេលរូបលោកនិយាយសម្រាលការឆ្លងជំងឺ COVID-19 និងមិនព្រមស្តាប់សេចក្តីណែនាំ របស់ក្រុមអ្នកជំនាញឲ្យទប់ស្កាត់វីរុស ដ៏កាចសាហាវមួយនេះ។ លោក ម៉ាសេលូ ក្វេរ៉ូហ្គាស័យ អ្នកឯកទេសខាងជំងឺបេះដូងបានបន្តវេនពីលោក អេឌូអាដូ ប៉ាហ្ស៊ូឡូ ជារដ្ឋមន្ត្រីក្រសួងសុខាភិបាលប្រេស៊ីល។លោក ប៉ាហ្ស៊ូឡូ នាយឧត្ដមសេនីយ៍កងទ័ព ដែលគ្មានបទពិសោធន៍ក្នុងវិស័យសុខាភិបាលនោះទេ ហើយការដោះស្រាយបញ្ហាជំងឺ COVID-19 របស់លោករងការរិះគន់ខ្លាំង។ បច្ចុប្បន្នលោកកំពុងប្រឈមនឹងការស៊ើបអង្កេត ករណីមិនធានាឲ្យបានការផ្គត់ផ្គង់អុកស៊ីហ្សែន ដល់ទីក្រុងភាគខាងជើង ម៉ាណូស ជាកន្លែងដែលមានអ្នកជំងឺ COVID-19 ថប់ដង្ហើមស្លាប់យ៉ាងច្រើនកាលពីអំឡុងខែមករា។ រដ្ឋមន្ត្រីក្រសួងសុខាភិបាល ២រូបដំបូងរបស់លោក បូលសូណារ៉ូ គឺលោកវេជ្ជបណ្ឌិត ល្វីស ហេនរីក និងលោកវេជ្ជបណ្ឌិត ណេលសុន ថេក។ ពួកគេទាំង ២នាក់បានបែកបាក់ជាមួយប្រធានាធិបតីរូបនេះ ពាក់ព័ន្ធនឹងភាពរឹងរូសរបស់លោកមិនស្ដាប់សេចក្តីណែនាំ របស់ក្រុមអ្នកជំនាញឲ្យទប់ស្កាត់ជំងឺ COVID-19៕អត្ថបទ៖ សារ៉ាត់

មនុស្ស ១៥នាក់ស្លាប់ និង ៤០០នាក់កំពុងបាត់ខ្លួនក្រោយអគ្គិភ័យនៅជំរំជនភៀសខ្លួនរ៉ូហ៊ីងយ៉ានៅបង់ក្លាដែស

បង់ក្លាដែស៖ អង្គការសហប្រជាជាតិ (UN) បាននិយាយកាលពីថ្ងៃអង្គារថា មនុស្ស ១៥នាក់បានស្លាប់ និងមនុស្ស ៤០០នាក់ផ្សេងទៀតកំពុងបាត់ខ្លួន ក្រោយអគ្គិភ័យដ៏ធំមួយបានបំផ្លិចបំផ្លាញផ្ទះសម្បែង ជនភៀសខ្លួនរ៉ូហ៊ីងយ៉ារាប់ម៉ឺននាក់ ក្នុងជំរំស្នាក់នៅធំបំផុតលើពិភពលោក នៅប្រទេសបង់ក្លាដែស។ជនមូស្លីមភាគតិចជិត ១លាននាក់ ដែលភាគច្រើននៃពួកគេរត់គេចចេញ ពីការបោសសំអាតយ៉ាងចាស់ដៃពីយោធាសហភាពមីយ៉ាន់ម៉ា នៅរដ្ឋរ៉ាឃីនកាលពីឆ្នាំ២០១៧ នោះ រស់នៅក្នុងស្ថានភាពក្រលំបាករួចទៅហើយក្នុងជំរំទីក្រុងខុកស៍បាសា ស្ថិតនៅភាគអាគ្នេយ៍ប្រទេសបង់ក្លាដែស។ អគ្គិភ័យនេះដែរបានឆាបឆេះឡើងឡើងកាលពីថ្ងៃចន្ទ បណ្ដាលឲ្យជនភៀសខ្លួនប្រហែល ៥ម៉ឺននាក់គ្មានផ្ទះសម្បែងរស់នៅ។ នេះគឺជាអគ្គិភ័យចុងក្រោយគេ ក្នុងរយៈពេលជាច្រើនសប្ដាហ៍កន្លងមកនេះ និងជាអគ្គិភ័យធំបំផុតចាប់តាំងពីឆ្នាំ២០១៧។ បច្ចុប្បន្នបង់ក្លាដែសបានបញ្ជាឲ្យបើកការស៊ើបអង្កេត លើមូលហេតុនាំឲ្យអគ្គិភ័យនេះកើតឡើង។លោក អាមីនុល ហាក់ ជាជនភៀសខ្លួនរ៉ូហ៊ីងយ៉ាមួយរូបបាននិយាយថា អ្នករាល់គ្នារត់រកតែប្រាស់អាយុរៀងៗខ្លួន ពេលដែលភ្លើងឆេះរាលយ៉ាងឆាប់រហ័ស។ មនុស្សជាច្រើនរងរបួស ហើយលោកបានមើលឃើញសាកសពមនុស្សយ៉ាងហោច ៤នាក់ដែរនៅលើគំនរភ្លើង។ លោក ចូហាណេស វ៉ាន់ដឺ ក្លាអូវ អ្នកតំណាងទីភ្នាក់ងារជនភៀសខ្លួន របស់អង្គការសហប្រជាជាតិប្រចាំនៅបង់ក្លាដែសបាននិយាយថា មកទល់នឹងពេលនេះមនុស្ស ១៥នាក់បានស្លាប់ និងមនុស្ស ៤០០នាក់កំពុងបាត់ខ្លួន ខណៈមនុស្ស ៥៦០នាក់រងរបួស និងទីជម្រកយ៉ាងហោច ១ម៉ឺនខ្នងរងការបំផ្លិចបំផ្លាញគ្មានសេសសល់។ សូមបញ្ជាក់ថា បង់ក្លាដែសបានផ្តល់ទីជម្រក ដល់ជនមូស្លីមរ៉ូហ៊ីងយ៉ាជាង ១លាននាក់ ដែលភាគច្រើននៃពួកគេបានរត់ភៀសខ្លួន ចេញពីប្រទេសមីយ៉ាន់ម៉ាកាលពីឆ្នាំ២០១៧ អំឡុងការបង្ក្រាបយ៉ាងចាស់ដៃពីយោធា។ អង្គការសហប្រជាជាតិបាននិយាយថា ការចាត់វិធានការបោសសំអាតនេះ មានបំណងប្រល័យពូជសាសន៍គឺជាការចោទប្រកាន់មួយ ដែលសហភាពមីយ៉ាន់ម៉ាបដិសេធន៍ចោលទាំងស្រុង៕អត្ថបទ៖ សារ៉ាត់

ក្មេងស្រីអាយុ ៧ឆ្នាំម្នាក់ត្រូវបានបាញ់សម្លាប់ដោយកងកម្លាំងសន្តិសុខមីយ៉ាន់ម៉ា

មីយ៉ាន់ម៉ា៖ ក្រុមអ្នកស្រុកអះអាងថា ក្មេងស្រីអាយុ ៧ឆ្នាំម្នាក់ត្រូវបានបាញ់សម្លាប់ដោយកងកម្លាំងសន្តិសុខ ធ្វើឲ្យក្មេងស្រីម្នាក់នេះក្លាយជាជនរងគ្រោះក្មេងជាងគេបំផុត អំឡុងការបង្ក្រាបយ៉ាងចាស់ដៃមកលើក្រុមបាតុករ បន្ទាប់ពីរដ្ឋប្រហារយោធាសហភាពមីយ៉ាន់ម៉ាកាលពីខែមុន។ សមាជិកគ្រួសារក្មេងរងគ្រោះបាននិយាយថា ក្មេងស្រីម្នាក់នេះត្រូវបានបាញ់សម្លាប់ នៅផ្ទះរបស់នាងក្នុងទីក្រុងម៉ាន់ដាឡេ។សារព័ត៌មានក្នុងស្រុក Myanmar Now បានរាយការណ៍ថា ទាហានបានបាញ់ឪពុករបស់នាង ប៉ុន្តែបែរជាត្រូវចំក្មេងស្រីទៅវិញ ពេលដែលនាងកំពុងអង្គុយនៅលើភ្លៅឪពុកក្នុងផ្ទះរបស់ពួកគេ។ ក្មេងស្រីរងគ្រោះម្នាក់នេះមានឈ្មោះ ឃីន ម្យ៉ូ ឈីត។ ក្រុមជំនួយអះអាងថា ក្រុមជួយសង្គ្រោះប្រញាប់ប្រញាល់យកនាងទៅព្យាបាល ប៉ុន្តែនៅមិនអាចសង្គ្រោះអាយុជីវិតនាងបានដដែល។ ដោយឡែកបងប្រុសរបស់នាងអាយុ ១៩ឆ្នាំត្រូវបានចាប់ខ្លួនផងដែរ។ ពាក់ព័ន្ធនឹងករណីបាញ់សម្លាប់ក្មេងស្រីអាយុ ៧ឆ្នាំនេះដែរ យោធាសហភាពមីយ៉ាន់ម៉ាមិនបានធ្វើសេចក្តីអធិប្បាយណាមួយនោះទេ។ គួរឲ្យដឹងថា សហភាពមីយ៉ាន់ម៉ាបានញាំញីដោយបាតុកម្មមិនលោះថ្ងៃ ចាប់តាំងពីយោធារឹបអូសអំណាចកាលពីថ្ងៃទី១ ខែកុម្ភៈ ឆ្នាំ២០២១ កន្លងទៅ។ក្រុមសង្គ្រោះកុមារបាននិយាយថា ក្មេងៗជាង ២០នាក់ស្ថិតនៅក្នុងចំណោមជនរងគ្រោះ ដែលត្រូវបានកងកម្លាំងសន្តិសុខមីយ៉ាន់ម៉ាបាញ់សម្លាប់។ យោធាអះអាងថា មនុស្ស ១៦៤នាក់បានស្លាប់នៅក្នុងបាតុកម្ម ខណៈដែលសមាគមជំនួយអ្នកទោសនយោបាយ ដែលជាក្រុមសកម្មជននៅសហភាពមីយ៉ាន់ម៉ានិយាយថា មនុស្សសរុប ២៦១នាក់បានស្លាប់ដោយសារអំពើហិង្សាមួយនេះ។ កាលពីព្រឹកថ្ងៃអង្គារ យោធាបានបង្ហាញពីក្តីក្រៀមក្រំ ចំពោះការស្លាប់របស់ក្រុមបាតុករ ប៉ុន្តែបានថ្កោលទោសពួកគេ ធ្វើឲ្យមានភាពអានាធិបតេយ្យនៅក្នុងប្រទេសមួយនេះ។ អ្នកនាំពាក្យយោធាបាននិយាយថា ក្រុមបាតុករប្រឆាំងនឹងរដ្ឋប្រហារយោធា ត្រូវតែទទួលខុសត្រូវចំពោះអំពើហិង្សា និងការដុតបំផ្លាញ៕អត្ថបទ៖ សារ៉ាត់

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ទទួលបានការឯកភាពដ៏ខ្ពង់ខ្ពស់ពីសម្ដេចតេជោបើកឱ្យដំណើរការជាបណ្តោះអាសន្ន

ស្ទឹងត្រង់-ក្រូចឆ្មារ៖ ស្ពានមិត្តភាពកម្ពុជា-ចិនប្រវែង ១១៣១ម៉ែត្រ ដែលតភ្ជាប់ទឹកដីនៃស្រុកស្ទឹងត្រង់ និងស្រុកក្រូចឆ្មារ ទទួលបានការឯកភាពដ៏ខ្ពង់ខ្ពស់ពីសម្ដេចតេជោ ហ៊ុន សែន នាយករដ្ឋមន្ត្រី បើកឱ្យដំណើរការជាបណ្តោះអាសន្ន ដើម្បីសម្រួលដល់ការដឹកជញ្ជូន និងការធ្វើដំណើររបស់បងប្អូនប្រជាពលរដ្ឋចាប់ពីថ្ងៃទី២៣ ខែមីនា ឆ្នាំ២០២១ តទៅ។ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូ និងអ្នកជំនាញបច្ចេកទេសក្រសួង នាព្រឹកថ្ងៃអង្គារ ១០កើត ខែចេត្រ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី២៣ ខែមីនា ឆ្នាំ២០២១ បានអញ្ជើញចុះពិនិត្យលទ្ធភាពសម្រាប់ដាក់ឱ្យដំណើរការជាបណ្តោះអាសន្នស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ដោយមានការចូលរួមពីថ្នាក់ដឹកនាំក្រសួង អភិបាលនៃគណៈអភិបាលខេត្តកំពង់ចាម អភិបាលនៃគណៈអភិបាលខេត្តត្បូងឃ្មុំ តំណាងក្រុមហ៊ុនសាងសង់ តំណាងក្រុមហ៊ុនទីប្រឹក្សាបច្ចេកទេស អាជ្ញាធរដែនដី និងភាគីពាក់ព័ន្ធផងដែរ។ស្ពាននេះ ឆ្លងកាត់ទន្លេមេគង្គតភ្ជាប់រវាងស្រុកក្រូចឆ្មារ ខេត្តត្បូងឃ្មុំ និងស្រុកស្ទឹងត្រង់ខេត្ត កំពង់ចាម សាងសង់ឡើង ដោយក្រុមហ៊ុនសាងសង់សំណង់សៀងហៃគ្រុប ខូអិលធីឌី ត្រួតពិនិត្យបច្ចេកទេសដោយក្រុមហ៊ុនក្វាងចូវវ៉ានអាន មានប្រវែងសរុបចំនួន ១១៣១ម៉ែត្រ ទទឹង ១៣,៥ ម៉ែត្រ (ក្នុងនោះមានគន្លងផ្លូវរថយន្ត ៣,៥មx២ គន្លងទោចក្រយានយន្ត ១,៩មx២ គន្លងផ្លូវថ្មើរជើង១,១មx២+០,២៥មx២ (បង្កាន់ដៃ) ជាប្រភេទស្ពានបេតុងសរសៃដែក ឬ បេតុងអាមេ មានបំពាក់ផ្លាក សញ្ញា ចរាចរណ៍ គំនូសចរាចរណ៍ និងបង្គោលភ្លើងបំភ្លឺស្ពាន មានសាងសង់រង្វង់មូលមួយកន្លែងនៅត្រើយខាងលិចផងដែរ។គម្រោងសាងសង់ស្ពានស្ទឹងត្រង់-ក្រូចឆ្មារដែលជាគម្រោងស្ពានមិត្តភាពកម្ពុជាចិនទី៨ ត្រូវបានបើកការដ្ឋានសាងសង់កាលពីថ្ងៃទី១ ខែធ្នូ ឆ្នាំ២០១៧ គ្រោងចំណាយថវិកាប្រមាណ៥៨,៤២លានដុល្លារអាមេរិក រយៈពេលសាងសង់ចំនួន៤២ខែ ជាគម្រោងហិរញ្ញប្បទានឥតសំណងពីរដ្ឋាភិបាលចិន និងថវិកាបដិភាគពីរាជរដ្ឋាភិបាលកម្ពុជា គិតរហូតមកទល់ពេលនេះការសាងសង់សម្រេចបាន១០០%ហើយ។គួរកត់សម្គាល់ផងដែរថា ស្ពាននេះ នឹងជួយទាញភូមិសាស្ត្ររវាងខេត្តកំពង់ចាម និងខេត្តត្បូងឃ្មុំឱ្យកាន់តែកៀកចូលជិតគ្នា ជួយសម្រួលដល់ការធ្វើដំណើររបស់បងប្អូនប្រជាពលរដ្ឋ បម្រើដល់ការដឹកជញ្ជូនទំនិញកសិផលទៅកាន់ទីផ្សារ ទាក់ទាញការវិនិយោគ លើកកម្ពស់ជីវភាពរស់នៅរបស់ប្រជាជន ជាពិសេសចូលរួមចំណែកដល់ការជំរុញកំណើនសេដ្ឋកិច្ចជាតិបានមួយកម្រិតថែមទៀត។នាឱកាសចុះពិនិត្យស្ពាននេះ ឯកឧត្តម ទេសរដ្ឋមន្ត្រីបានជម្រាបជូនថា តាមគម្រោងស្ពាននេះនឹងត្រូវបើកសម្ពោធឱ្យប្រើប្រាស់ជាផ្លូវការ នៅថ្ងៃទី២៤ ខែមីនា ឆ្នាំ២០២១ ក្រោមអធិបតីភាពដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃស្អែកនេះ ប៉ុន្តែដោយសារព្រឹត្តិការណ៍២០ កុម្ភៈ ទើបមានការលើកពេលវេលានៃការសម្ពោធបើកប្រើប្រាស់ជាផ្លូវការ។ឯកឧត្តម ទេសរដ្ឋមន្ត្រី បានជម្រាបជូនថា ការចុះពិនិត្យនេះធ្វើឡើងក្នុងគោលបំណងដើម្បីគោរពស្នើទៅសម្ដេចនាយករដ្ឋមន្ត្រី សុំបើកស្ពាននេះ ឱ្យប្រជាពលរដ្ឋប្រើប្រាស់ជាបណ្ដោះអាសន្នដើម្បីសម្រួលដល់ការដឹកជញ្ជូន និងការធ្វើដំណើររបស់បងប្អូនប្រជាពលរដ្ឋនៅក្នុងឱកាសពិធីបុណ្យចូលឆ្នាំខ្មែរប្រពៃណីជាតិខាងមុខ។ ជាការឆ្លើយតប សម្តេច នាយករដ្ឋមន្ត្រី បានឯកភាពបើកឱ្យបងប្អូនប្រជាពលរដ្ឋប្រើប្រាស់ស្ពាននេះ ជាបណ្ដោះអាសន្នចាប់ពីថ្ងៃនេះទៅ រង់ចាំពេលវេលាសមស្របណាមួយ ដើម្បីបើកសម្ពោធឱ្យប្រើប្រាស់ជាផ្លូវការ ៕អត្ថបទ ៖ តារាវុទ្ធី

អគ្គិភ័យឆាបឆេះផ្ទះសម្បែងរាប់ពាន់ខ្នងនៅក្នុងជំរំជនភៀសខ្លួនរ៉ូហ៊ីងយ៉ានៅបង់ក្លាដែស

បង់ក្លាដែស៖ ទីភ្នាក់ងារជនភៀសខ្លួនអង្គការសហប្រជាជាតិ (UNHCR) បានរាយការណ៍កាលពីថ្ងៃចន្ទថា អគ្គិភ័យដ៏ធំមួយបានឆាបឆេះផ្ទះសម្បែងរាប់ពាន់ខ្នង ក្នុងជំរំជនភៀសខ្លួនរ៉ូហ៊ីងយ៉ានៅទីក្រុងខុកបាហ្សា ប្រទេសបង់ក្លាដែស ដោយបានបំផ្លិចបំផ្លាញជម្រកស្នាក់នៅរបស់ពួកគេទាំងស្រុង និងធ្វើឲ្យអន្តរាយដល់ការរស់នៅរបស់ជនភៀសខ្លួនរាប់ម៉ឺននាក់។ក្រុមភ្នាក់ងារពន្លត់អគ្គីភ័យ ស្នងការជំនួយជនភៀសខ្លួន និងមាតុភូមិនិវត្តន៍បង់ក្លាដែស ក្រុមជួយសង្គ្រោះ និងក្រុមឆ្លើយតបរហ័ស បន្តនៅកន្លែងកើតហេតុកាលពីល្ងាចថ្ងៃចន្ទ ជាកន្លែងដែលពួកគេព្យាយាមគ្រប់គ្រងអគ្គិភ័យ មិនឲ្យរីករាលដាលបន្ថែមទៀត។ លោក អាន់តូនីញ៉ូ វីតូរីណូ អគ្គនាយកអង្គការអន្តោប្រវេសន៍អន្តរជាតិ (IOM) បាននិយាយថា ជនភៀសខ្លួនរ៉ូហ៊ីងយ៉ារាប់ម៉ឺននាក់បានរងផលប៉ះពាល់ ដោយសារអគ្គិភ័យមួយនេះ។ លោក វីតូនីណូ និយាយថា លោកពិតជាមានក្តីកង្វល់ខ្លាំងណាស់ ចំពោះផលប៉ះពាល់ដោយសារអគ្គិភ័យនៅថ្ងៃនេះ នៅជំរំខុកបាហ្សា ប្រទេសបង់ក្លាដែស។ លោកបន្តថា ក្រុមការងាររបស់ IOM និងដៃគូរជាច្រើនទៀតកំពុងធ្វើការរួមគ្នាដើម្បីឆ្លើយតបនឹងវិបត្តិ និងធានាឲ្យបានសុវត្ថិភាព និងសុខុមាលភាពរបស់ជនភៀសខ្លួនទាំងអស់។នៅមិនទាន់មានសេចក្តីរាយការណ៍ភ្លាមៗនោះទេពីគ្រោះថ្នាក់ ប៉ុន្តែក្តីកង្វល់កើតមានចំពោះអ្នកស្លាប់ និងរងរបួស ហើយមូលហេតុនាំឲ្យអគ្គិភ័យនេះឆាបឆេះឡើង ក៏គេមិនទាន់ដឹងនោះដែរ។ សូមបញ្ជាក់ថា បង់ក្លាដែសបានផ្តល់ទីជម្រកដល់ជនមូស្លីមរ៉ូហ៊ីងយ៉ាជាង ១លាននាក់ ដែលភាគច្រើននៃពួកគេបានរត់ភៀសខ្លួន ចេញពីប្រទេសមីយ៉ាន់ម៉ាកាលពីឆ្នាំ២០១៧ អំឡុងការបង្ក្រាបយ៉ាងចាស់ដៃពីយោធា។ អង្គការសហប្រជាជាតិបាននិយាយថា ការចាត់វិធានការបោសសំអាតនេះមានបំណងប្រល័យពូជសាសន៍ គឺជាការចោទប្រកាន់មួយដែលសហភាពមីយ៉ាន់ម៉ា បដិសេធន៍ចោលទាំងស្រុង៕អត្ថបទ៖ សារ៉ាត់

ខ្មាន់កាំភ្លើងម្នាក់បាញ់សម្លាប់មនុស្ស ១០នាក់នៅផ្សារទំនើបក្នុងរដ្ឋកូឡូរ៉ាដូ សហរដ្ឋអាមេរិក

អាមេរិក៖ ខ្មាន់កាំភ្លើងម្នាក់បានបាញ់សម្លាប់មនុស្ស ១០នាក់ដែលរួមទាំងមន្ត្រីនគរបាលម្នាក់ផងដែរនៅផ្សារទំនើប King Soopers ស្ថិតនៅក្នុងរដ្ឋកូឡូរ៉ាដូ សហរដ្ឋអាមេរិកកាលពីថ្ងៃចន្ទ។ ក្រុមអាជ្ញាធរអះអាងថា បុរសម្នាក់ត្រូវបានចាប់ខ្លួន និងស្ថិតក្រោមការឃុំឃាំង។អធិការនគរបាលស្រុកប៊ូលដឺ លោក ម៉ារីស ហេរ៉ូល បានប្រកាសដោយអួលដើមកពីចំនួនមនុស្សស្លាប់សរុប នៅក្នុងសន្និសីទសារព័ត៌មានកាលពីយប់ថ្ងៃចន្ទ។ ក្រុមអាជ្ញាធរបានបញ្ជាក់ថា ជនសង្ស័យកំពុងទទួលការព្យាបាល ហើយគ្មានការគំរាមកំហែងបន្ថែមទៀតនោះទេ ដល់សាធារណជន។ ក្រុមមន្ត្រីនគរបាលបាននាំបុរសអត់ពាក់អាវម្នាក់ ដែលមានឈាមហូរតាមជើងរបស់គាត់ចេញពីហាងទាំងដៃជាប់ខ្នោះ ប៉ុន្តែក្រុមអាជ្ញាធរមិនបាននិយាយថា តើគាត់គឺជាជនសង្ស័យនោះទេ។មន្ត្រីនគរបាលដែលបានស្លាប់មានឈ្មោះ អេរីក តាលី អាយុ ៥១ឆ្នាំ។ លោកបានធ្វើការនៅស្នងការនគរបាលក្រុងប៊ូលដឺ ចាប់តាំងពីឆ្នាំ២០១០ រហូតមក។ លោក ម៉ៃឃើល ឌូហ្គេធី មេធាវីស្រុកប៊ូលដឺបាននិយាយថា នេះគឺជាសោកនាដកម្ម និងហេតុការណ៍អាក្រក់បំផុតមួយសម្រាប់ស្រុករបស់លោក ហើយជាការឆ្លើយតបនឹងការបាញ់សម្លាប់នេះ ពួកយើងមាននូវកិច្ចសហប្រតិបត្តិការ និងជំនួយពីក្រុមអាជ្ញាធរក្នុងស្រុក រដ្ឋ និងសហព័ន្ធ។ បច្ចុប្បន្នក្រុមនគរបាលកំពុងបើការស៊ើបអង្កេត លើករណីបាញ់ប្រហារដ៏ឃោរឃៅមួយនេះ៕អត្ថបទ៖ សារ៉ាត់

បាតុករថៃរាប់សិបនាក់រងរបួស ក្រោយដង្ហែក្បួនតវ៉ានៅជិតព្រះបរមរាជវាំង

ថៃ៖ មជ្ឈមណ្ឌលវេជ្ជសាស្ត្របន្ទាន់ បាននិយាយកាលពីថ្ងៃអាទិត្យថា ជនស៊ីវិល និងមន្ត្រីនគរបាលជាង ៣០នាក់បានរងរបួសអំឡុងបាតុកម្មនៅទីក្រុងបាងកក ក្រោយពេលដែលក្រុមនគរបាលប្រើប្រាស់កាណុងបាញ់ទឹក ឧស្ម័នបង្ហូរទឹកភ្នែក និងគ្រាប់កាំភ្លើងជ័របំបែកក្បួនតវ៉ាកាលពីយប់ថ្ងៃសៅរ៍។វីដេអូដែលបានបង្ហោះនៅលើបណ្ដាញសង្គមព័ត៌មាន ឃើញក្រុមនគរបាលវាយប្រហារមកលើក្រុមបាតុករ ដែលព្យាយាមរត់ចោលទោចក្រយានយន្តរបស់ពួកគេ។ វីដេអូមួយផ្សេងទៀត ឃើញក្រុមបាតករ ព្យាយាមរត់គេចចេញពីឧស្ម័នបង្ហូរទឹកភ្នែក នៅជិតភោជនីយដ្ឋានម៉ាក់ដូណាល់។ ក្រុមនគរបាលបាននិយាយកាលពីថ្ងៃអាទិត្យថា វិធានការរបស់ពួកគេអនុវត្តន៍តាមស្តង់ដារអន្តរជាតិ ហើយក្រុមបាតុករ ២០នាក់ត្រូវបានចាប់ខ្លួន សម្រាប់ការបំពានលើច្បាប់ជួបជុំគ្នាតាមទីសាធារណៈ និងប្រមាថដល់ព្រះចេស្ដាព្រះមហាក្សត្រ។ លោក ភីយ៉ា តាវីឆៃ ស្នងការរងនគរបាលក្រុងបាងកក បាននិយាយប្រាប់ក្រុមអ្នកសារព័ត៌មានថា អំពើហិង្សាផ្តើមចេញពីភាគីក្រុមបាតុករ ហើយក្រុមនគរបាលត្រូវតែការពារច្បាប់ និងការពារទ្រព្យសម្បត្តិជាតិ។ដោយឡែកព្រះឆាយាល័ក្ខណ៍ព្រះមហាក្សត្រថៃ Maha Vajiralongkorn រងការបំផ្លិចបំផ្លាញផងដែរអំឡុងបាតុកម្មកាលពីថ្ងៃសៅរ៍ ដែលមានមនុស្សប្រហែលជាង ១ពាន់នាក់ចូលរួម។ គួរឲ្យដឹងថា បាតុកម្មដែលបានកើតឡើងកាលពីថ្ងៃទី២៨ ខែកុម្ភៈ ឆ្នាំ២០២១ កន្លងទៅ គេបានឃើញក្រុមបាតុករ និងក្រុមនគរបាលជាច្រើននាក់រងរបួសដូចគ្នា។ ចលនាបាតុកម្មយុវជននៅប្រទេសថៃបានផ្ទុះឡើងកាលពីឆ្នាំមុន ហើយវាបានក្លាយជាបញ្ហាប្រឈមធំបំផុតមួយ សម្រាប់រដ្ឋាភិបាលរបស់លោកនាយករដ្ឋមន្ត្រី Prayut Chan-o-cha ដែលជាឧត្តមសេនីយ៍កងទ័ពចូលនិវត្តន៍ រឹបអូសអំណាចពីរដ្ឋាភិបាលឈ្នះឆ្នោតកាលពីឆ្នាំ២០១៤៕អត្ថបទ៖ សារ៉ាត់

មនុស្សជាង ១ម៉ឺននាក់ត្រូវបានជម្លៀសខ្លួនចេញពីគ្រោះទឹកជំនន់នៅទីក្រុងស៊ីដនី

អូស្ត្រាលី៖ នៅថ្ងៃចន្ទនេះ ប្រជាពលរដ្ឋ ១៨.០០០នាក់ត្រូវបានក្រុមអាជ្ញាធរ បញ្ជាឲ្យជម្លៀសខ្លួនចេញពីផ្ទះសម្បែងរបស់ពួកគេ ស្របពេលដែលគ្រោះទឹកជំនន់នៅក្នុងទីក្រុងស៊ីដនី ប្រទេសអូស្ត្រាលី កាន់តែធ្ងន់ធ្ងរទៅ។ ភ្លៀងធ្លាក់ខ្លាំងឥតឈប់ឈរអស់រយៈពេលជាច្រើនថ្ងៃកន្លងមកនេះ នៅតាមតំបន់ជាច្រើនក្នុងរដ្ឋញូវសោតវែលស៍ បណ្ដាលឲ្យទឹកទន្លេ និងអាងស្តុបទឹកប្រៀបច្រាំង ធ្វើឲ្យខូចខាតដល់ផ្ទះសម្បែងប្រជាពលរដ្ឋជាច្រើនខ្នង។អភិបាលរដ្ឋញូវសោតវែលស៍បាននិយាយថា ប្រព័ន្ធអាកាសធាតុបណ្តាលឲ្យមានទឹកជំនន់ ដ៏អាក្រក់បំផុតក្នុងរយៈពេលជាច្រើនទសវត្សរ៍កន្លងមកនេះ នៅមិនទាន់ទៅណាឆ្ងាយនោះទេ ហើយប្រជាពលរដ្ឋគួរតែប្រុងប្រយ័ត្នខ្ពស់។ ខណៈពេលនោះដែរ នាយករដ្ឋមន្ត្រីអូស្ត្រាលី លោក ស្កុត ម៉ូរីសុន បានផ្តល់ថវិកាដល់ប្រជាពលរដ្ឋណា ដែលត្រូវបង្ខំជម្លៀសខ្លួនចេញពីទឹកជំនន់ផងដែរ។ មន្ទីរឧតុនិយមអូស្ត្រាលីបានព្យាករណ៍ថា ទឹកទន្លេហាវកេសប៊ូរី ស្ថិតនៅភាគពាយព្យទីក្រុងស៊ីដនី នឹងឡើងខ្ពស់បំផុតមិនធ្លាប់មាននៅថ្ងៃចន្ទនេះ ចាប់តាំងពីមានគ្រោះទឹកជំនន់ដ៏អាក្រក់បំផុតមួយកាលពីឆ្នាំ១៩៦១។ ដោយឡែកអាងស្តុបទឹកវ៉ារ៉ាហ្គាមបា ដែលជាប្រភពផ្គត់ផ្គង់ទឹកដ៏សំខាន់ដល់ទីក្រុងស៊ីដនី បានប្រៀបច្រាំងជាលើកដំបូងក្នុងរយៈពេល ជាច្រើនឆ្នាំកន្លងមកនេះ។លោក ដេវីដ លីតថលប្រោដ រដ្ឋមន្ត្រីក្រសួងកសិកម្មអូស្ត្រាលីបាននិយាយថា ស្ថានភាពទឹកជំនន់ពិតជាអាក្រក់ខ្លាំងណាស់។ លោក លីតថលប្រោដ បាននិយាយប្រាប់ទូរសទស្សន៍អូស្ត្រាលីថា ស្ថានភាពបែបនេះពិតជាគ្រោះថ្នាក់មែន។ អ្នករាល់គ្នាត្រូវតែយល់ពីទំហំនៃគ្រោះថ្នាក់ក្នុងរយៈពេល ២៤ម៉ោង ឬ ៤៨ម៉ោងខាងមុខ។ លោកបានបន្តថា ប្រជាពលរដ្ឋប្រហែល ៥៤.០០០នាក់អាចនឹងរងផលប៉ះពាល់ នៅតំបន់ភាគខាងលិចទីក្រុងស៊ីដនី បើសិនជាភ្លៀងនៅតែបន្តធ្លាក់នៅតំបន់ដែលរងផលប៉ះពាលស្រាប់៕អត្ថបទ៖ សារ៉ាត់

រាជរដ្ឋាភិបាលកម្ពុជា អនុញ្ញាតឲ្យឈប់សម្រាក៣ថ្ងៃ ក្នុងឱកាសបុណ្យចូលឆ្នាំខ្មែរ តែត្រូវអនុវត្តវិធានការសុខាភិបាល ដើម្បីការពារ និងទប់ស្កាត់ជំងឺកូវីដ-១៩

ភ្នំពេញ ៖ រដ្ឋាភិបាលកម្ពុជា បានសម្រេចឲ្យមន្ដ្រីរាជការ កម្មករនិយោជិត ឈប់សម្រាករយៈពេល៣ថ្ងៃ នៃពិធីបុណ្យចូលឆ្នាំខ្មែរ នៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២១ ខាងមុខនេះ តែត្រូវអនុវត្តវិធានសុខាភិបាល ដើម្បីការពារ និងទប់ស្កាត់ជំងឺកូវីដ-១៩។ បើតាមសារាចរណែនាំរបស់សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា ចេញផ្សាយនៅរសៀលថ្ងៃទី២១ ខែមីនានេះ បានថ្លែងថា ក្នុងបរិការណ៍នៃ «ព្រឹត្តិការណ៍សហគមន៍ ២០កុម្ភៈ ២០២១» ដែលប្រទេសជាតិបាន និងកំពុងបន្តជួបប្រឈមនឹងហានិភ័យខ្ពស់ នៃការឆ្លងរាលដាលជំងឺកូវីដ-១៩ និងក្នុងគោលបំណងធានាការពារអាយុជីវិតរបស់ប្រជាពលរដ្ឋ សុខភាពសាធារណៈ និងសណ្តាប់ធ្នាប់សាធារណៈ ព្រមទាំងកាត់បន្ថយឲ្យបានជាអតិបរមា នូវផលប៉ះពាល់ នៃការឆ្លងរាលដាលជំងឺនេះ ចំពោះវិស័យសង្គម និងសេដ្ឋកិច្ចនៅក្នុងកម្ពុជា រាជរដ្ឋាភិបាលសូមដាក់ចេញនូវវិធានការមួយចំនួន ពាក់ព័ន្ធនឹងការឈប់សម្រាកក្នុងពិធីបុណ្យចូលឆ្នាំខ្មែរប្រពៃណីជាតិ ពីថ្ងៃពុធ ៣កើត ខែពិសាខ ឆ្នាំឆ្លូវ ទោស័ក ព.ស ២៥៦៤ ដល់ថ្ងៃសុក្រ ៥កើត ខែពិសាខ ឆ្នាំឆ្លូវ ត្រីស័កព.ស ២៥៦៤ ត្រូវនឹងថ្ងៃទី ១៤ ដល់ថ្ងៃទី១៦ ខែមេសា ឆ្នាំ២០២១ អនុលោមតាមបទប្បញ្ញត្តិច្បាប់ និងលិខិតបទដ្ឋានជាធរមាន ៖ ទី១៖ អនុញ្ញាតឲ្យមន្ដ្រី បុគ្គលិក នៃស្ថាប័នរដ្ឋទាំងអស់ឈប់សម្រាករយៈពេល៣ថ្ងៃ តាមកាលបរិច្ឆេទដូចបញ្ជាក់ខាងលើ ស្របតាមអនុក្រឹត្យលេខ១៣១ អនក្រ.បក ចុះថ្ងៃទី២៦ ខែសីហា ឆ្នាំ២០២០ ស្ដីពីប្រតិទិនឈប់សម្រាកការងាររបស់មន្ដ្រីរាជការ និយោជិត កម្មករ ប្រចាំឆ្នាំ២០២១។ ទី២៖ ចំពោះបុគ្គលិក កម្មករ និយោជិត នៃវិស័យឯកជន ការឈប់សម្រាករយៈពេល៣ថ្ងៃនេះ អាចត្រូវធ្វើឡើងតាមជម្រើស២យ៉ាង អាស្រ័យទៅតាមការស្រុះស្រួលគ្នារវាងនិយោជក និងបុគ្គលិក កម្មករ និយោជិត នៃរោងចក្រ សហគ្រាសនីមួយៗ គឺ៖ ឈប់សម្រាកពីការងាររយៈពេល៣ថ្ងៃ នៅក្នុងឱកាសពិធីបុណ្យចូលឆ្នាំខ្មែរប្រពៃណីជាតិ តាមកាលបរិច្ឆេទដូចបានបញ្ជាក់ខាងលើ ស្របតាមអនុក្រឹត្យលេខ ១៣១ អនក្រ.បក ចុះថ្ងៃទី២៦ ខែសីហា ឆ្នាំ២០២០ ស្តីពីប្រតិទិនឈប់សម្រាកការងាររបស់មន្ត្រីរាជការ និយោជិត កម្មករ ប្រចាំឆ្នាំ២០២១។ និយោជកត្រូវពិភាក្សាជាមួយកម្មករ និយោជិតបន្តធ្វើការជាធម្មតា ហើយលើកការឈប់សម្រាករយៈពេល៣ថ្ងៃនេះ ទៅអនុវត្តរួមជាមួយការឈប់សម្រាក ក្នុងពិធីបុណ្យភ្ជុំបិណ្ឌ ឬថ្ងៃឈប់សម្រាកណាមួយនាពេលខាងមុខវិញ តាមការព្រមព្រៀងគ្នាស្របទៅតាមច្បាប់ស្តីពីការងារ។ ក្រសួងការងារ និងបណ្តុះបណ្តាលវិជ្ជាជីវៈត្រូវចេញសេចក្តីណែនាំបន្ថែមលើការអនុវត្តនេះស្របទៅតាមច្បាប់ស្តីពីការងារ។ ទី៣៖ ក្រសួង-ស្ថាប័នមានសមត្ថកិច្ចពាក់ព័ន្ធ និងអាជ្ញាធនដែនដីគ្រប់លំដាប់ថ្នាក់ត្រូវចាត់វិធានការចាំបាច់នានាសំដៅគ្រប់គ្រង និងធានាសន្តិសុខ សុវត្ថិភាព និងសណ្តាប់ធ្នាប់សាធារណៈឲ្យបានល្អប្រសើរ ព្រមទាំងធានានូវការគោរព និងអនុវត្តវិធានការសុខាភិបាលបង្ការ និងទប់ស្កាត់ការឆ្លងរាលដាល នៃជំងឺកូវីដ-១៩ ដោយម៉ត់ចត់ និងខ្ជាប់ខ្លួននៅតាមទីតាំងសាធារណៈនានា ពិសេសនៅតាមវត្តអារាម រមណីយដ្ឋាន និងទីតាំងផ្សេងទៀត ដែលអាចមានសភាពអ៊ូអរ និងមានមនុស្សជួបជុំគ្នាក្នុងចំនួនច្រើន។ ទី៤៖ នៅក្នុងរយៈពេលឈប់សម្រាក៣ថ្ងៃ នាឱកាសពិធីបុណ្យចូលឆ្នាំខ្មែរប្រពៃណីជាតិខាងមុខនេះ រាជរដ្ឋាភិបាលសូមអំពាវនាវដល់ ប្រជាពលរដ្ឋគ្រប់រូបទាំងអស់ ចូលរួមអនុវត្តនូវវិធានការ ដូចខាងក្រោម ៖ ត្រូវចៀសវាងនូវការធ្វើដំណើរមិនចាំបាច់ទៅកាន់ ឬចេញ-ចូល តំបន់ ឬទីកន្លែង ដែលមានហានិភ័យខ្ពស់ នៃការឆ្លងរាលដាលជំងឺកូវីដ-១៩ កំណត់ដោយក្រសួងសុខាភិបាល និងអាជ្ញាធរមានសមត្ថកិច្ចពាក់ព័ន្ធ។ ត្រូវចៀសវាងនូវការរៀបចំពិធីផ្សេងៗ រួមទាំងពិធីសាសនាផង ឬ ការជួបជុំគ្នាទាំងឡាយណាដែលមានសភាពអ៊ូអរ និងមានមនុស្សចូលរួមច្រើន និង អនុវត្តវិធានការ «៣ការពារ» និង «៣កុំ» ព្រមជាមួយនឹងវិធានការសុខាភិបាលចាំបាច់ផ្សេងទៀតឲ្យបានខ្ជាប់ខ្លួន និងគ្រប់ៗគ្នា។បន្ថែមពីនេះ សម្ដេចតេជោហ៊ុន សែន ប្រមុខរាជរដ្ឋាភិបាល បាន សូមអំពាវនាវដល់ ក្រុមហ៊ុន និងអាជីវករដឹកជញ្ជូនអ្នកដំណើរគ្រប់ប្រភេទមិនត្រូវដំឡើងថ្លៃសេវាដឹកជញ្ជូនអ្នកដំណើរឡើយ និងត្រូវយកចិត្តទុកដាក់អនុវត្តវិធានការសុខាភិបាលបង្ការ និងទប់ស្កាត់ការឆ្លងរាលដាល នៃជំងឺកូវីដ-១៩ ដោយម៉ត់ចង់ និងខ្ជាប់ខ្ជួនចំពោះអ្នកដំណើរលើយានយន្ដរបស់ខ្លួន៕

បណ្ដាញសង្គម

ព័ត៌មានថ្មីៗ

ក្រសួងពាណិជ្ជកម្ម បន្តលើកលែងការពិន័យចំពោះក្រុមហ៊ុនខកខានតម្កល់ប្រតិវេទន៍ប្រចាំឆ្នាំ បន្ថែមទៀត

មន្រ្ដីជំនាញក្រសួងឧស្សាហកម្ម៖ កម្មសិទ្ធិបញ្ញាជាមូលដ្ឋានគ្រឹះបង្កើនទំនុកចិត្ត និងទាក់ទាញអ្នកវិនិយោគ

វិចារណកថា៖ ខ្យល់ក្នុងខ្លួនខ្ញុំបានមកពីភពផែនដី «គ្រប់ដង្ហើមចេញចូលគឺជាជំនួបរវាងជីវិតរបស់ខ្ញុំ និងពិភពនៃជីវិតជុំវិញខ្លួន»

កម្ពុជាធ្វើជាម្ចាស់ផ្ទះសន្និសីទតុលាការតាមបណ្ដាខេត្តជាប់ព្រំដែនកម្ពុជា វៀតណាម ឡាវ លើកទី៨

ប្រជាជនប៉ាឡេស្ទីនត្រូវបានប្រាប់ឱ្យចាកចេញពីផ្ទះក្នុងភូមិដែលអ្នកតាំងលំនៅអ៊ីស្រាអែលបានឡោមព័ទ្ធផ្ទះ

CPL ចាត់ទុកសិក្ខាសាលាបាល់ទាត់អាជីព AFC ជាឱកាសមាសសម្រាប់ការអភិវឌ្ឍ និងពង្រឹងការអនុវត្តអាជ្ញាបណ្ណក្លិបនៅកម្ពុជា

UN៖ យេម៉ែនប្រឈមហានិភ័យខ្ពស់នៃការវិលត្រឡប់ទៅរកសង្គ្រាមវិញចាប់តាំងពីបទឈប់បាញ់ឆ្នាំ២០២២

មនុស្សរាប់លាននាក់ទូទាំងអឺរ៉ុបរងគ្រោះពីរលកកម្ដៅខ្លាំងជាថ្មីក្រោយមនុស្សជាង២ម៉ឺននាក់ស្លាប់

អ៊ីរ៉ង់ ច្រានចោលការអះអាងរបស់លោកTrump អំពីការគ្រប់គ្រងរបស់អាមេរិកលើច្រកសមុទ្រ Hormuz ថាជាការកុហក

អ៊ុយក្រែន ស្នើបទឈប់បាញ់ជាមួយរុស្ស៊ីនៅសមុទ្រខ្មៅ ខណៈព្រួយបារម្ភការផ្គត់ផ្គង់ស្បៀងកើនឡើង

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

កូរ៉េខាងជើងបាញ់មីស៊ីល ២លើកក្នុងរយៈពេលមិនដល់ ១សប្ដាហ៍ជាការផ្គើននឹងអាមេរិក

ករណីស្លាប់ប្រចាំថ្ងៃដោយសារ COVID-19 នៅប្រេស៊ីលកើនឡើងជាង ៣ពាន់នាក់ជាលើកដំបូង

មនុស្ស ១៥នាក់ស្លាប់ និង ៤០០នាក់កំពុងបាត់ខ្លួនក្រោយអគ្គិភ័យនៅជំរំជនភៀសខ្លួនរ៉ូហ៊ីងយ៉ានៅបង់ក្លាដែស

ក្មេងស្រីអាយុ ៧ឆ្នាំម្នាក់ត្រូវបានបាញ់សម្លាប់ដោយកងកម្លាំងសន្តិសុខមីយ៉ាន់ម៉ា

អគ្គិភ័យឆាបឆេះផ្ទះសម្បែងរាប់ពាន់ខ្នងនៅក្នុងជំរំជនភៀសខ្លួនរ៉ូហ៊ីងយ៉ានៅបង់ក្លាដែស

ខ្មាន់កាំភ្លើងម្នាក់បាញ់សម្លាប់មនុស្ស ១០នាក់នៅផ្សារទំនើបក្នុងរដ្ឋកូឡូរ៉ាដូ សហរដ្ឋអាមេរិក

បាតុករថៃរាប់សិបនាក់រងរបួស ក្រោយដង្ហែក្បួនតវ៉ានៅជិតព្រះបរមរាជវាំង

មនុស្សជាង ១ម៉ឺននាក់ត្រូវបានជម្លៀសខ្លួនចេញពីគ្រោះទឹកជំនន់នៅទីក្រុងស៊ីដនី

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានសំខាន់ៗ

កូរ៉េខាងជើង​បាញ់​មី​ស៊ី​ល​ ២​លើក​ក្នុង​រយៈពេល​មិន​ដល់​ ១​សប្ដាហ៍​ជា​ការ​ផ្គើន​នឹង​អាមេរិក​

ករណី​ស្លាប់​ប្រចាំថ្ងៃ​ដោយសារ​ COVID-19 ​នៅ​ប្រេ​ស៊ី​ល​កើន​ឡើង​ជាង ​៣​ពាន់​នាក់​ជា​លើក​ដំបូង​

ក្មេង​ស្រី​អាយុ ៧​ឆ្នាំ​ម្នាក់​ត្រូវ​បាន​បាញ់​សម្លាប់​ដោយ​កង​កម្លាំង​សន្តិសុខ​មី​យ៉ាន់​ម៉ា​

បាតុករ​ថៃ​រាប់​សិប​នាក់​រង​របួស ក្រោយ​ដង្ហែ​ក្បួន​តវ៉ា​នៅ​ជិត​ព្រះ​បរមរាជវាំង​

មនុស្ស​ជាង ១​ម៉ឺន​នាក់​ត្រូវ​បាន​ជម្លៀស​ខ្លួន​ចេញពី​គ្រោះ​ទឹក​ជំនន់​នៅ​ទីក្រុង​ស៊ីដនី

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

កូរ៉េខាងជើងបាញ់មីស៊ីល ២លើកក្នុងរយៈពេលមិនដល់ ១សប្ដាហ៍ជាការផ្គើននឹងអាមេរិក

ករណីស្លាប់ប្រចាំថ្ងៃដោយសារ COVID-19 នៅប្រេស៊ីលកើនឡើងជាង ៣ពាន់នាក់ជាលើកដំបូង

ក្មេងស្រីអាយុ ៧ឆ្នាំម្នាក់ត្រូវបានបាញ់សម្លាប់ដោយកងកម្លាំងសន្តិសុខមីយ៉ាន់ម៉ា

បាតុករថៃរាប់សិបនាក់រងរបួស ក្រោយដង្ហែក្បួនតវ៉ានៅជិតព្រះបរមរាជវាំង

មនុស្សជាង ១ម៉ឺននាក់ត្រូវបានជម្លៀសខ្លួនចេញពីគ្រោះទឹកជំនន់នៅទីក្រុងស៊ីដនី