BTV NEWS

របាយការណ៍៖ លោក Trump ហាក់កាន់តែទោរទៅរកលោក Zelenskyy ជាងលោក Putin

[UPDATE] ការផ្ទុះនៅផ្សារទំនើបក្នុងខេត្ត Kumamoto របស់ជប៉ុន ធ្វើឱ្យមនុស្សជាប់ក្នុងនោះ ក្រោយមានរញ្ជួយដីខ្លាំង

ឯកអគ្គរដ្ឋទូត៖ រុស្ស៊ី និងឥណ្ឌូនេស៊ីពិចារណាឱកាសសហការលើវិស័យធនធានលោហៈកម្រ

[BREAKING NEWS] មនុស្សជាប់នៅក្នុងផ្សារទំនើប ក្នុងប្រទេសជប៉ុន បន្ទាប់ពីមានរញ្ជួយដី

ព័ត៌មានអន្តរជាតិ

លោក ហ្សេឡិនស្គី និយាយថា ការប្រយុទ្ធគ្នានៅបន្ត ដើម្បីដណ្តើមគ្រប់គ្រងទីក្រុង Kostyantynivka

ប្រធានាធិបតីអ៊ុយក្រែន លោក វ្ល៉ូឌីមី ហ្សេឡិនស្គី បាននិយាយកាលពីថ្ងៃអាទិត្យថា កងទ័ពរបស់ទីក្រុងគីវ និងទីក្រុងមូស្គូ នៅបន្តប្រយុទ្ធគ្នា ដើម្បីដណ្តើមយកទីក្រុងសំខាន់នៅភាគខាងកើត Kostyantynivka ដែលវិមានក្រឹមឡាំងបានអះអាងថា ខ្លួនបានដណ្តើមយកបានហើយនោះ។មេបញ្ជាការយោធារុស្ស៊ី បានប្រាប់លោកប្រធានាធិបតី វ្ល៉ាឌីមៀ ពូទីន កាលពីថ្ងៃសុក្រថា កងកម្លាំងរបស់ទីក្រុងមូស្គូ បានគ្រប់គ្រងទីក្រុង Kostiantynivka ទោះបីជាអ៊ុយក្រែន បានបដិសេធការអះអាងនេះក៏ដោយ ដោយនិយាយថា កងកម្លាំងរបស់ខ្លួននៅតែគ្រប់គ្រងទីក្រុងនេះដដែល។លោក ហ្សេឡិនស្គី បាននិយាយនៅក្នុងសុន្ទរកថាពេលល្ងាចប្រចាំថ្ងៃរបស់លោកថា៖«ការប្រយុទ្ធគ្នាក៏កំពុងបន្តដើម្បីដណ្តើមទីក្រុង Kostyantynivka ដែលមេដឹកនាំរុស្ស៊ី លោក វ្ល៉ាឌីមៀ ពូទីន បានអះអាងរួចហើយថា ជារបស់ខ្លួន ប៉ុន្តែវាច្បាស់ណាស់ថា លោកនឹងមិនហ៊ានបង្ហាញខ្លួននៅទីនោះទេ»។ទីក្រុង Kostyantynivka មានប្រជាជនប្រហែល ៧៨.000នាក់ មុនពេលរុស្ស៊ីឈ្លានពាននៅឆ្នាំ ២០២២។លោក ហ្សេឡិនស្គី ក៏បានព្រមានផងដែរថា រុស្ស៊ីកំពុងរៀបចំការវាយប្រហារទ្រង់ទ្រាយធំថ្មី មុនកិច្ចប្រជុំកំពូលណាតូ នៅសប្តាហ៍នេះ នៅប្រទេសទួរគី ជាកន្លែងដែលលោកត្រូវបានគេរំពឹងថា នឹងធ្វើកិច្ចចរចាជាមួយប្រធានាធិបតីអាមេរិក លោក ដូណាល់ ត្រាំ អំពីសង្គ្រាមនេះ៕

មន្ត្រីប៉ាឡេស្ទីនចោទអ៊ីស្រាអែលថា កំពុងស្វះស្វែងគ្រប់គ្រងទីតាំងបុរាណវត្ថុជាង ៣.៧៥០កន្លែង នៅវេសបែង

មន្ត្រីប៉ាឡេស្ទីនម្នាក់កាលពីថ្ងៃអាទិត្យ បានចោទប្រកាន់អ៊ីស្រាអែលថា កំពុងជំរុញផែនការមួយ ដើម្បីគ្រប់គ្រងទីតាំងបុរាណវត្ថុជាង ៣.៧៥០កន្លែង នៅតំបន់វេសបែង ( West Bank) ដោយពណ៌នាថា វាជាផ្នែកមួយនៃគោលនយោបាយទូលំទូលាយជាងមុន ក្នុងការរឹតបន្តឹងការគ្រប់គ្រងរបស់អ៊ីស្រាអែលលើទីតាំងបេតិកភណ្ឌ និងគាំទ្រដល់ការពង្រីកការតាំងទីលំនៅ។លោក Saleh Tawafsha អនុរដ្ឋមន្ត្រីក្រសួងទេសចរណ៍ និងវត្ថុបុរាណរបស់ប៉ាឡេស្ទីន បានប្រាប់វិទ្យុសំឡេងប៉ាឡេស្ទីន ( Voice of Palestine) ផ្លូវការថា ដោយមានការគាំទ្រពីរដ្ឋាភិបាល អង្គការតាំងទីលំនៅរបស់អ៊ីស្រាអែល កំពុងស្វែងរកការផ្ទេរការគ្រប់គ្រងទីតាំងទាំងនោះទៅឲ្យអ្នកតាំងឋាន ដែលបានពង្រីកវត្តមានរបស់ពួកគេដោយបង្កើតកន្លែងតាំងទីលំនៅ នៅជិតទីតាំងបុរាណវត្ថុជាច្រើន។លោក Tawafsha បានបន្ថែមថា ទីតាំងគោលដៅភាគច្រើននៅក្នុងតំបន់ C នៃតំបន់វេសបែង គឺស្ថិតនៅក្រោមការគ្រប់គ្រងសន្តិសុខ និងរដ្ឋបាលរបស់អ៊ីស្រាអែលយ៉ាងពេញលេញក្រោមកិច្ចព្រមព្រៀង Oslo។ លោកបាននិយាយថា វិធានការទាំងនេះ មានគោលបំណងលុបបំបាត់អត្តសញ្ញាណប្រវត្តិសាស្ត្រ និងវប្បធម៌របស់ប៉ាឡេស្ទីន និងផ្លាស់ប្តូរលក្ខណៈប្រវត្តិសាស្ត្រនៃទីតាំងបុរាណវត្ថុ និងសាសនា»៕

ប៉ាគីស្ថាន ទំនងជានឹងធ្វើជាម្ចាស់ផ្ទះជុំបន្ទាប់នៃកិច្ចពិភាក្សាបច្ចេកទេសរវាងអាមេរិក និងអ៊ីរ៉ង់

របាយការណ៍ប្រព័ន្ធផ្សព្វផ្សាយបាននិយាយកាលពីថ្ងៃអាទិត្យ៥កក្កដា ថា រដ្ឋធានី Islamabadរបស់ប៉ាគីស្ថានកំពុងលេចចេញជាទីតាំងឈានមុខគេសម្រាប់ជុំថ្មីនៃការចរចាកម្រិតបច្ចេកទេស រវាងអាមេរិក និងអ៊ីរ៉ង់។ ការចារកម្រិតបច្ចេកទេស ត្រូវគេរំពឹងថានឹងធ្វើឡើងនៅថ្ងៃទី១១កក្កដា ទោះបីជាការសម្រេចចុងក្រោយ លើទីតាំងច្បាស់លាស់នៅតែមិនទាន់ត្រូវបានប្រកាសក៏ដោយ។ អាមរិក និងអ៊ីរ៉ង់ បានចុះហត្ថលេខាលើអនុសារណៈនៃការយោគយល់ (MoU) កាលពីថ្ងៃ១៨មិថុនា ក្នុងបំណងស្ដារសន្តិភាពក្នុងតំបន់អាស៊ីខាងលិចមួយនេះ។មានការចរចាកម្រិតបច្ចេកទេសមួយក្នុងប្រទេសស្វីស កាលពីថ្ងៃទី២១ខែមិថុនា ដោយមានប្រទេសប៉ាគីស្ថាន និងកាតាជាអ្នកសម្របសម្រួល។ ការបន្តការចរចាទាំងនេះ គឺជាផ្នែកមួយនៃកិច្ចចខិតខំប្រឹងប្រែងដែលនៅតែបន្ត ក្នុងគោលបំណងរក្សាដំណើរការផ្លូវការទូត និងដោះស្រាយជម្លោះអូសបន្លាយជាយូរ រវាងទីក្រុង វ៉ាស៊ីនតោន និង តេអេរ៉ង់ ។ អ្នកការទូតមួយរូបបាននិយាយថា អាចមានទីតាំងចំនួន២ សម្រាប់ការចរចាបច្ចេកទេស គឺ ទីក្រុង Islamabad និងរមណីយដ្ឋាន Burgenstock ក្នុងប្រទេសស្វីស យ៉ាងណាទីក្រុង Islamabad ទំនងជាអាចក្លាយជាជម្រើសច្រើនជាង។ ការចចារនានាត្រូវបានផ្អាកជាបណ្ដោះអាសន្ន ដោយសារអ៊ីរ៉ង់ជាប់រវល់រយៈពេលច្រើនថ្ងៃនៃពិធីបុណ្យសពផ្លូវរដ្ឋសម្រាប់អតីតមេដឹកនាំកំពូល លោក Ayatollah Ali Khamenei។ ក្រុមមន្ត្រីអ៊ីរ៉ង់បង្ហើបថា ការរៀបចំគណៈប្រតិភូរបស់ទីក្រុងតេអេរ៉ង់ នឹងត្រូវប្រកាស ក្រោយចប់ពិធីបុណ្យសព៕

ប្រទេសអូស្ត្រាលី និងហ្វីជី ចុះហត្ថលេខាបង្កើតសម្ព័ន្ធភាពការពារជាតិថ្មី

ប្រទេសអូស្ត្រាលី និងប្រទេសហ្វីជី នៅថ្ងៃចន្ទ ទី៦ ខែកក្កដានេះ បានចុះហត្ថលេខាលើសម្ព័ន្ធភាពការពារជាតិដ៏សំខាន់មួយ ដោយប្តេជ្ញាថាប្រទេសនីមួយៗនឹងមកជួយគ្នាទៅវិញទៅមក ប្រសិនបើប្រទេសណាមួយត្រូវបានវាយប្រហារ។ សម្ព័ន្ធភាពមហាសមុទ្រនៃសន្តិភាព គឺជាសម្ព័ន្ធភាពដំបូងគេរបស់ប្រទេសហ្វីជី ខណៈប្រទេសនៅតំបន់ប៉ាស៊ីហ្វិកមួយនេះ នឹងក្លាយជាសម្ព័ន្ធមិត្តផ្លូវការទីបួនរបស់ប្រទេសអូស្ត្រាលី បន្ទាប់ពីសហរដ្ឋអាមេរិក នូវែលសេឡង់ និងប្រទេសប៉ាពួញូហ្គីណេ។ កតិកាសញ្ញាការពារជាតិនេះ បានធ្វើឡើង ខណៈប្រទេសចិនពង្រីកឥទ្ធិពលសេដ្ឋកិច្ចរបស់ខ្លួន និងពង្រឹងទំនាក់ទំនងសន្តិសុខនៅក្នុងតំបន់ប៉ាស៊ីហ្វិក និងប៉ុន្មានថ្ងៃបន្ទាប់ពីប្រទេសអូស្ត្រាលី បានចុះហត្ថលេខាលើកិច្ចព្រមព្រៀងសន្តិសុខជាមួយប្រទេសវ៉ានូអាទូ។ ប្រទេសអូស្ត្រាលី និងហ្វីជី ក៏បានចុះហត្ថលេខាដើម្បីពង្រីកកិច្ចសហប្រតិបត្តិការសេដ្ឋកិច្ច និងសន្តិសុខរវាងប្រទេសទាំងពីរផងដែរ។

បេសកជនអ៊ីរ៉ង់ប្រចាំប្រទេសចិន សន្យាប្រព្រឹត្តយ៉ាងពិសេសចំពោះប្រទេសជាមិត្តនៅច្រកសមុទ្រ Hormuz

ឯកអគ្គរដ្ឋទូតអ៊ីរ៉ង់ប្រចាំប្រទេសចិននិយាយថា នាវាដែលឆ្លងកាត់ច្រកសមុទ្រ Hormuz នឹងត្រូវបង់ថ្លៃសេវាថ្មី ប៉ុន្តែបាននិយាយបន្ថែមថា ប្រទេសចិននិងប្រទេសជាមិត្តផ្សេងទៀតនឹងត្រូវបានផ្តល់ «ការពិចារណាពិសេស»។ កិច្ចព្រមព្រៀងដំបូងដែលត្រូវបានចុះហត្ថលេខាដោយអ៊ីរ៉ង់ និងសហរដ្ឋអាមេរិកកាលពីខែមុនដើម្បីបញ្ឈប់អរិភាពបានចែងថា នាវាពាណិជ្ជកម្មនឹងឆ្លងកាត់ផ្លូវទឹកដ៏សំខាន់នេះដោយមិនបង់ប្រាក់រយៈពេល ៦០ ថ្ងៃ ប៉ុន្តែវានៅតែមិនច្បាស់ថា គោលនយោបាយអ្វីខ្លះដែលនឹងត្រូវអនុវត្តបន្ទាប់ពីរយៈពេលនោះ។ ខណៈការចរចាលើការដោះស្រាយជាអចិន្ត្រៃយ៍កំពុងដំណើរការ សហរដ្ឋអាមេរិកបាននិយាយថា អ៊ីរ៉ង់នឹងមិនត្រូវបានអនុញ្ញាតឱ្យទាមទារការបង់ថ្លៃសេវា ឬថ្លៃសេវាសម្រាប់នាវាដែលឆ្លងកាត់ច្រកសមុទ្រក្រោមកិច្ចព្រមព្រៀងចុងក្រោយណាមួយឡើយ។ ថ្លែងទៅកាន់វេទិកាសន្តិភាពពិភពលោកនៅទីក្រុងប៉េកាំង ឯកអគ្គរដ្ឋទូត លោក Abdolreza Rahmani Fazli បាននិយាយថា អ៊ីរ៉ង់កំពុងធ្វើការក្នុង «កិច្ចសហការ និងសហប្រតិបត្តិការ» ជាមួយប្រទេសអូម៉ង់លើ «ការរៀបចំថ្មី» សម្រាប់ច្រកសមុទ្រនេះ។

ក្រុមឧទ្ទាមហ៊ូទី សម្លាប់កងទ័ពរដ្ឋាភិបាលយេម៉ែន១៦នាក់ក្នុងការប៉ះទង្គិចគ្នាដ៏បង្ហូរឈាមបំផុត

មន្ត្រី និងគ្រូពេទ្យនិយាយថា កងទ័ពរដ្ឋាភិបាលចំនួន ១៦ នាក់ត្រូវបានសម្លាប់ដោយក្រុមឧទ្ទាមហ៊ូទីនៅក្នុងខេត្ត Hodeidah ភាគខាងលិចប្រទេសយេម៉ែន ជាការប៉ះទង្គិចគ្នាដ៏ហិង្សាបំផុតក្នុងរយៈពេលជាច្រើនឆ្នាំមកនេះ។ លោក Walid al-Qudaimi រដ្ឋមន្ត្រីប្រចាំរដ្ឋ និងជាសមាជិកគណៈរដ្ឋមន្ត្រីមានទំនាក់ទំនងជាមួយរដ្ឋាភិបាលយេម៉ែនដែលត្រូវបានទទួលស្គាល់ជាអន្តរជាតិ បាននិយាយថា ទាហានមកពីតំបន់ Tihama បានស្លាប់ក្នុងអំឡុងពេលប្រយុទ្ធគ្នានៅក្នុងតំបន់ Jabal Dabbas ខណៈអំពើហិង្សាកើនឡើងតាមបណ្តោយឆ្នេរសមុទ្រភាគខាងលិចរបស់ប្រទេស។ នៅក្នុងការបង្ហោះសារនៅលើបណ្តាញ X លោក al-Qudaimi បាននិយាយថា កងទ័ពត្រូវបានសម្លាប់ «ក្នុងការការពារដីធ្លី និងសេចក្តីថ្លៃថ្នូររបស់ពួកគេ» ក្នុងអំឡុងពេលប្រយុទ្ធ។ ប្រភពផ្នែកវេជ្ជសាស្ត្របានប្រាប់សារព័ត៌មាន AFP ថា មន្ទីរពេទ្យនៅក្នុងតំបន់នៅឆ្នេរសមុទ្រក្រហមបានទទួលអ្នកស្លាប់ចំនួន ១៦ នាក់ពីកងកម្លាំងគាំទ្ររដ្ឋាភិបាល និង ២២នាក់បានរងរបួស។ មន្ត្រីម្នាក់នៃកងកម្លាំងជាសម្ព័ន្ធមិត្តរដ្ឋាភិបាលនៅក្រុង Jabal Dubas បាននិយាយថា ក្រុមហ៊ូទីបានដណ្តើមយកបានទីតាំងដែលគាំទ្ររដ្ឋាភិបាលមួយរយៈពេលខ្លីក្រោយពីបានបើកការវាយប្រហារនៅយប់កាលពីថ្ងៃសុក្រសប្តាហ៍កន្លងទៅនេះ មុនពេលកងកម្លាំងសម្ព័ន្ធមិត្តរដ្ឋាភិបាលបានបើកការវាយប្រហារតបត និងដណ្តើមយកបានទីតាំងទាំងនោះមកវិញកាលពីព្រឹកថ្ងៃសៅរ៍។

ភ្លៀងមូសុង បានផ្តួលរលំដើមឈើ និងជន់លិចទីក្រុងជាច្រើននៅក្នុងប្រទេសឥណ្ឌា

ភ្លៀងមូសុង និងព្យុះដ៏ខ្លាំងក្លាបានផ្តួលរលំដើមឈើ និងធ្វើឲ្យជន់លិចតំបន់ជាច្រើននៅក្នុងប្រទេសឥណ្ឌា ដោយបានជន់លិចលំនៅឋាន និងផ្លូវថ្នល់ រំខានដល់ការដឹកជញ្ជូនដោយការធ្វើឲ្យខូចខាតយានយន្តកាលពីថ្ងៃអាទិត្យ ទី៥ ខែកក្កដា។ នៅក្នុងទីក្រុង Mumbai និង Pune នៃរដ្ឋ Maharashtra ដើមឈើរាប់សិបដើមត្រូវបានផ្តួលរលំដោយសារខ្យល់បក់ និងភ្លៀងធ្លាក់ខ្លាំង។ អ្នកស្រុក Pune ម្នាក់បាននិយាយថា «យើងបានហៅរថយន្តពន្លត់អគ្គិភ័យ ហើយពួកគេមិនបានទៅទាន់ពេលទេ។ កុមារតូចៗបានជាប់គាំងនៅខាងក្នុង ហើយយើងបានទប់ទល់ដើម្បីជួយសង្គ្រោះពួកគេ ខណៈមែកឈើដែលបាក់បានរារាំង។ ភ្លៀងធ្លាក់នៅខែកក្កដា មានសារៈសំខាន់ខ្លាំង ព្រោះវាមានចំនួនភាគច្រើននៃទឹកភ្លៀងក្នុងរដូវមូសុងរយៈពេលបួនខែ ហើយកសិករភាគច្រើនសាបព្រួសដំណាំរដូវក្តៅក្នុងអំឡុងខែនេះ។ ភ្លៀងធ្លាក់ខ្លាំងកើតឡើងទោះបីជាប្រទេសឥណ្ឌាកត់ត្រាកាលពីខែមិថុនាមានភាពរាំងស្ងួតបំផុតលើកទីប្រាំរបស់ខ្លួនចាប់តាំងពីកំណត់ត្រាចាប់ផ្តើមនៅឆ្នាំ១៩០១ ក៏ដោយ។

តៃវ៉ាន់និយាយថាខ្លួនកំពុងតាមដាន ទំនោរកើនឡើង ក្នុងសកម្មភាពកងទ័ពជើងទឹករបស់ចិន

មន្ត្រីសន្តិសុខជាន់ខ្ពស់របស់កោះតៃវ៉ាន់ម្នាក់បាននិយាយនៅថ្ងៃចន្ទ ៦កក្កដានេះ ថា តៃវ៉ាន់កំពុងតាមដានទំនោរកើនឡើង នៅក្នុងសកម្មភាពកងទ័ពជើងទឹករបស់ចិនក្នុងអំឡុងពេលរដូវកាលសមយុទ្ធយោធាចំណុចខ្ពស់ រួមទាំងសមយុទ្ធរួមគ្នាជាមួយរុស្ស៊ី ហើយនឹងកំពុងវិភាគយុទ្ធសាស្ត្រថ្មីណាមួយ។ តំបន់តៃវ៉ាន់គ្រប់គ្រងដោយប្រជាធិបតេយ្យ ដែលចិនអះអាងថាជាទឹកដីរបស់ខ្លួន តាមដានយ៉ាងដិតដល់នូវសកម្មភាពយោធាចិនប្រចាំថ្ងៃនៅជុំវិញកោះនេះ ហើយនិយាយថាពេលវេលាព្រមានសម្រាប់ការវាយប្រហារណាមួយកាន់តែខើចទៅហើយ។ កោះតៃវ៉ាន់ជំទាស់យ៉ាងខ្លាំងចំពោះការអះអាងសិទ្ធិរបស់ចិនលើកោះនេះ ហើយនិយាយថាមានតែប្រជាជនរបស់ខ្លួនទេដែលអាចសម្រេចចិត្តអនាគតរបស់ពួកគេបាន។ លោក Tsai Ming-yen អគ្គនាយកការិយាល័យសន្តិសុខជាតិតៃវ៉ាន់បានប្រាប់ក្រុមអ្នកសារព័ត៌មាននៅក្នុងសភាថា ខែកក្កដាដល់ខែកញ្ញា គឺជារដូវកាលកំពូលសម្រាប់សមយុទ្ធរបស់ចិន ហើយរដ្ឋាភិបាលកំពុងប្រៀបធៀបបេសកកម្មកន្លងមកដើម្បីមើលថាតើគំរូថ្មី អ្វីខ្លះលេចចេញមក។ លោកបានបន្ថែមថា បច្ចុប្បន្នមានកងនាវាចិនចំនួនបួនគ្រឿង កំពុងប្រតិបត្តិការនៅក្នុងតំបន់ប៉ាស៊ីហ្វិកខាងលិច។ កាលពីថ្ងៃអាទិត្យ៥ កក្កដា ក្រសួងការពារជាតិចិន និងប្រព័ន្ធផ្សព្វផ្សាយរដ្ឋរុស្ស៊ីបាននិយាយថា កងទ័ពជើងទឹកចិន និងរុស្ស៊ី នឹងធ្វើសមយុទ្ធរួមគ្នានៅក្នុងដែនទឹក និងដែនអាកាសក្បែរទីក្រុង Qingdao ប្រទេសចិននៅសប្តាហ៍នេះ៕

មនុស្សជាង១០០នាក់ត្រូវបានឃុំខ្លួន ខណៈក្រុមឆ្វេងនិយមធ្វើបាតុកម្មប្រឆាំងNATO នៅទួរគី

អាជ្ញាធរប្រទេសទួរគីបានឃុំខ្លួនមនុស្សជាង ១០០ នាក់ដែលចូលរួមក្នុងការដង្ហែក្បួនតវ៉ាប្រឆាំងសម្ព័ន្ធយោធាណាតូដែលរៀបចំដោយគណបក្សកុម្មុយនិស្តទួរគី (TKP) កាលពីថ្ងៃអាទិត្យ ទី ៥ ខែកក្កដា នៅមុនពេលកិច្ចប្រជុំកំពូលសម្ព័ន្ធមិត្តនេះនៅទីក្រុងអង់ការ៉ា។ ប្រទេសទួរគីនឹងធ្វើជាម្ចាស់ផ្ទះទទួលមេដឹកនាំមកពីប្រទេសសម្ព័ន្ធមិត្តចំនួន៣២ប្រទេស ព្រមទាំងមន្ត្រីមកពីដៃគូរបស់អង្គការណាតូនៅទីក្រុងអង់ការ៉ាសម្រាប់កិច្ចប្រជុំកំពូលនៅថ្ងៃអង្គារ និងថ្ងៃពុធ។ អាជ្ញាធរបានបង្កើនវិធានការសន្តិសុខនៅទូទាំងរដ្ឋធានីទួរគីនៅមុនកិច្ចប្រជុំ ដោយហាមឃាត់ការធ្វើបាតុកម្ម ការបិទផ្លូវធំៗ និងការរាំងនៅផ្នែកធំៗក្នុងទីក្រុង។នៅក្នុងសេចក្តីថ្លែងការណ៍ គណបក្សTKP បាននិយាយថា ខ្លួនបានរៀបចំការដង្ហែក្បួនតវ៉ានៅទីលាន Kizilay ភាគកណ្តាលទីក្រុងអង់ការ៉ា ដោយសមាជិកគណបក្សជាង ១០០ នាក់ រួមទាំងអ្នកគ្រប់គ្រង ត្រូវបានឃុំខ្លួន។ នៅក្នុងការតវ៉ាដាច់ដោយឡែកមួយដែលរៀបចំដោយ គណបក្សTKP មនុស្សរាប់រយនាក់បានដើរក្បួនពីទីលាន Taksim នៃទីក្រុងអ៊ីស្តង់ប៊ុលទៅកាន់ក្រុង Dolmabahce ហើយក៏មានការតវ៉ាដាច់ដោយឡែកពីរទៀតដែលរៀបចំដោយក្រុមឆ្វេងនិយមនៅក្នុងក្រុង Kadikoy។ លោក Kemal Okutan អគ្គលេខាធិការគណបក្សTKP បាននិយាយនៅទីក្រុងអ៊ីស្តង់ប៊ុលថា «យើងបានប្រមូលផ្តុំគ្នានៅថ្ងៃនេះក្នុងតំបន់ជាច្រើនរបស់ប្រទេសទួរគីដើម្បីតវ៉ាប្រឆាំងអង្គការ NATO»។ «យើងបាននិយាយថាយើងនឹងមិនប្រគល់ទីក្រុងអង់ការ៉ាទៅឱ្យអ្នកគាំទ្រអង្គការ NATO ទេ ហើយយើងនឹងមិនអនុញ្ញាតឱ្យទីក្រុងអង់ការ៉ានៅស្ងៀមឡើយ»។

អង្គការ OPEC បូក អនុម័តការបង្កើនទិន្នផលប្រេង ខណៈការនាំចេញនៅច្រកសមុទ្រ Hormuz ចាប់ផ្តើមឡើងវិញ

នៅក្នុងសេចក្តីថ្លែងការណ៍មួយកាលពីថ្ងៃអាទិត្យ ទី៥ ខែកក្កដា បានឲ្យដឹងថា អង្គការ OPEC បូក បានព្រមព្រៀងបង្កើនបន្ថែមទៀតលើគោលដៅទិន្នផលប្រេងចាប់ពីខែសីហាដោយបន្ថែមទៅលើការផ្គត់ផ្គង់សកលនៅពេលដែលតម្លៃប្រេងកំពុងធ្លាក់ចុះដោយសារតែការបើកច្រកសមុទ្រ Hormuz ឡើងវិញកាន់តែទូលំទូលាយសម្រាប់ការនាំចេញប្រេង។ ក្រុមប្រទេសផលិតប្រេង បានព្រមព្រៀងគ្នាក្នុងអំឡុងពេលកិច្ចប្រជុំតាមអ៊ីនធឺណិតដើម្បីបង្កើនកូតាចំនួន ១៨៨.០០០បារ៉ែលក្នុងមួយថ្ងៃចាប់ពីខែសីហា បន្ថែមលើការកើនឡើងស្រដៀងគ្នាសម្រាប់ខែមិថុនា និងខែកក្កដា។ សមាជិកស្នូលទាំងប្រាំពីររបស់អង្គការ OPECបូក ជាក្រុម OPEC និងប្រទេសផលិតជាសម្ព័ន្ធមិត្ត រួមមានទាំងរុស្ស៊ី បានបង្កើនកូតាទិន្នផលរបស់ពួកគេចាប់ពីខែមេសា ដល់ខែកក្កដា ជិត ៨០០.០០០បារ៉ែលក្នុងមួយថ្ងៃ។ ទោះជាយ៉ាងណា ការបង្កើននេះភាគច្រើន មានតែនៅលើក្រដាសដោយសារតែសង្គ្រាមរបស់សហរដ្ឋអាមេរិក និងអ៊ីស្រាអែល លើអ៊ីរ៉ង់ ដែលបានបិទច្រកសមុទ្រ Hormuz សម្រាប់ការធ្វើចរាចរណ៍នាវាដឹកប្រេងចំពោះសមាជិក OPECបូក សំខាន់បំផុតមួយចំនួន រួមមានប្រទេសអារ៉ាប៊ីសាអ៊ូឌីត កូវ៉ែត និងអ៊ីរ៉ាក់។ ទោះបីជាមានការរំខានដល់ការផ្គត់ផ្គង់ជាបន្តបន្ទាប់ក៏ដោយ តម្លៃប្រេងបានវិលត្រឡប់ទៅរកកម្រិតមុនសង្គ្រាមវិញ ដោយរងសម្ពាធពីការការនាំចូលរបស់ចិនកាន់តែតិច និងការនាំចេញច្រើនពីក្រុមហ៊ុនផលិតពុំមែននៅតំបន់មជ្ឈិមបូព៌ា និងការបញ្ចេញស្តុកជាយុទ្ធសាស្ត្រសកលដែលត្រូវបានសម្របសម្រួលដោយទីភ្នាក់ងារថាមពលអន្តរជាតិ។

បណ្ដាញសង្គម

ព័ត៌មានថ្មីៗ

របាយការណ៍៖ លោក Trump ហាក់កាន់តែទោរទៅរកលោក Zelenskyy ជាងលោក Putin

អ្នកការទូត៖ រុស្ស៊ីអំពាវនាវឲ្យជប៉ុនត្រឡប់ទៅរកផ្លូវអភិវឌ្ឍប្រកបដោយសន្តិភាពវិញ

កងនាវារបស់កងនាវាចរប៉ាស៊ីហ្វិករុស្ស៊ីបានទៅដល់កំពង់ផែ Cam Ranh របស់វៀតណាម ដើម្បីធ្វើសមយុទ្ធរួមគ្នា

រដ្ឋមន្ត្រីការបរទេសអ៊ីរ៉ង់ពិភាក្សាជាមួយសមភាគីអារ៉ាប៊ីសាអ៊ូឌីត និងអូម៉ង់ អំពីសន្តិសុខច្រកសមុទ្រ Hormuz

ក្រសួងកសិកម្ម និងអាជ្ញាធរមីន ចុះអនុស្សរណៈនៃការយោគយល់គ្នាស្តីពី «កិច្ចសហប្រតិបត្តិការក្នុងការជំរុញ និងអភិវឌ្ឍវិស័យកសិកម្មលើដីបោសសម្អាតមីនរួច ដើម្បីលើកកម្ពស់ជីវភាពរស់នៅរបស់សហគមន៍មូលដ្ឋាន»

វិទ្យាស្ថានពហុបច្ចេកទេសភូមិភាគតេជោសែនតាកែវ ផ្តល់ឱកាសស្វែងយល់ពីមុខជំនាញ បរិក្ខារសិក្សាទំនើប និងការអនុវត្តជាក់ស្តែង ដល់សិស្សវិទ្យាល័យជិត១ពាន់នាក់

កម្ពុជា និងវៀតណាមបញ្ជាក់ពីការពង្រឹងកិច្ចសហប្រតិបត្តិការដើម្បីការអភិវឌ្ឍរួមគ្នា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877