BTV NEWS

លោក Trump ប្រាប់ពីកិច្ចចរចា «ល្អ» ជាមួយអ៊ីរ៉ង់ និងបញ្ជាក់ជាថ្មីពីការគំរាមវាយប្រហារគោលដៅនានា

ក្រុមគ្រួសារអ្នកដំណើរនៃជើងហោះហើរ MH370 ចង់បានការពិត ខណៈតុលាការចិនបើកសវនាការបណ្តឹងឧទ្ធរណ៍

ជប៉ុនស្នើឱ្យអ៊ីរ៉ង់អនុវត្ត «ភាពបត់បែនជាអតិបរិមា» ដើម្បីបន្ថយភាពតានតឹងនៅមជ្ឈិមបូព៌ាឱ្យបានឆាប់

រដ្ឋមន្ត្រីការពារជាតិអ៊ីស្រាអែល៖ យន្តហោះចម្បាំងអាមេរិកហោះចេញពីអ៊ីស្រាអែលទៅវាយប្រហារអ៊ីរ៉ង់

ព័ត៌មានអន្តរជាតិ

ទួរគីហៅអ៊ីស្រាអែលថា ជា «បញ្ហាសម្រាប់ពិភពលោកទាំងមូល»

រដ្ឋមន្ត្រីការបរទេសទួរគី លោក Hakan Fidan បាននិយាយថា អ៊ីស្រាអែលបានក្លាយជាបញ្ហាសម្រាប់សហគមន៍អន្តរជាតិទាំងមូល។ លោក Fidan បានថ្លែងនៅលើទូរទស្សន៍ CNN Turk ថា៖«យើងមិនមានបំណងដកថយពីជំហររបស់យើងទេ។ អ៊ីស្រាអែលមិនត្រឹមតែជាបញ្ហាសម្រាប់ទួរគីប៉ុណ្ណោះទេ ប្រទេសនេះបានក្លាយជាបញ្ហាសម្រាប់ពិភពលោកទាំងមូល។ អាជ្ញាធរអ៊ីស្រាអែលបានក្លាយជាបន្ទុកដែលមនុស្សជាតិមិនអាចទ្រាំទ្របានទៀតទេ»។លោកបាននិយាយថា ទួរគីគឺជាប្រទេសដំបូងគេដែលឈប់ធ្វើពាណិជ្ជកម្មជាមួយអ៊ីស្រាអែល ដោយសារតែការឈ្លានពាននៅក្នុងតំបន់ហ្កាហ្សា។លោក Fidan បានបញ្ជាក់ថា៖«ប្រធានាធិបតីរបស់យើង បានបញ្ឈប់ការធ្វើពាណិជ្ជកម្មចំនួន ១០ ពាន់លានដុល្លារជាមួយអ៊ីស្រាអែលទាំងយប់។ នេះគឺជារឿងសំខាន់ក្នុងការប្រកាន់ជំហររឹងមាំ ហើយចាប់ផ្តើមធ្វើអ្វីមួយទៀត»។ទួរគីតែងតែចេញសេចក្តីថ្លែងការណ៍ខ្លាំងៗប្រឆាំងនឹងអ៊ីស្រាអែល ដោយចោទប្រកាន់ថា បានប្រព្រឹត្តបទឧក្រិដ្ឋសង្គ្រាម និងអំពើប្រល័យពូជសាសន៍នៅក្នុងតំបន់ហ្កាហ្សា។ ទួរគីបានបញ្ចប់ទំនាក់ទំនងពាណិជ្ជកម្មទាំងអស់ជាមួយរដ្ឋជ្វីហ្វ ចាប់តាំងពីខែឧសភា ឆ្នាំ ២០២៤៕

រដ្ឋមន្ត្រីការបរទេសស៊ីរីនិយាយថា ស៊ីរីមិនមានបំណងធ្វើអន្តរាគមន៍យោធានៅប្រទេសលីបង់ទេ

រដ្ឋមន្ត្រីការបរទេសស៊ីរីដែលកំពុងបំពេញទស្សនកិច្ច លោក Asaad al-Shaibani បាននិយាយកាលពីថ្ងៃព្រហស្បតិ៍ថា ស៊ីរីមិនមានបំណងធ្វើអន្តរាគមន៍យោធានៅក្នុងប្រទេសលីបង់ទេ ដោយសង្កត់ធ្ងន់ថា អាជ្ញាធរស៊ីរីស្វែងរកការកសាងទំនាក់ទំនង ដោយផ្អែកលើការគោរពគ្នាទៅវិញទៅមក និងការគាំទ្រដល់ស្ថិរភាពរបស់ប្រទេសនេះ។លោក al-Shaibani បាននិយាយក្នុងអំឡុងពេលចរចាជាមួយប្រធានាធិបតីលីបង់ លោក Joseph Aoun នៅវិមានប្រធានាធិបតី ក្នុងទីក្រុង Baabdaថា៖«គណៈប្រតិភូស៊ីរីចង់បញ្ជាក់អំពីការភាន់ច្រឡំជុំវិញរបាយការណ៍អំពីអន្តរាគមន៍យោធាស៊ីរីដែលអាចកើតមាននៅលីបង់»។ «ស៊ីរីមិនមានបំណងចាត់វិធានការបែបនេះទេ»។លោកបានបញ្ជាក់ថា អាជ្ញាធរស៊ីរីគាំទ្រការសម្រេចចិត្តរបស់លីបង់ ប្តេជ្ញាពង្រឹងទំនាក់ទំនងទ្វេភាគី និងសង្កត់ធ្ងន់ថា ស្ថិរភាពរបស់លីបង់ស្របតាមផលប្រយោជន៍របស់ស៊ីរី។មន្ត្រីរូបនេះបានបន្ថែមថា ថ្នាក់ដឹកនាំស៊ីរីមានគោលបំណងបញ្ចប់ការជ្រៀតជ្រែកគ្នាទៅវិញទៅមកកន្លងមក បង្កើនកិច្ចសហប្រតិបត្តិការជាមួយភាគីលីបង់ទាំងអស់ និងពង្រឹងទំនាក់ទំនងទ្វេភាគីលើគ្រប់វិស័យ។លោក al-Shaibani ក៏បានស្នើឲ្យកសាងភាពជាដៃគូសេដ្ឋកិច្ចលីបង់-ស៊ីរីជាមួយបណ្តាប្រទេសឈូងសមុទ្រដែលបើកចំហសម្រាប់កិច្ចសហប្រតិបត្តិការបែបនេះ ហើយបានគូសបញ្ជាក់ពីតួនាទីរបស់គណៈកម្មាធិការចម្រុះដែលទើបបង្កើតថ្មីក្នុងការជំរុញកិច្ចសហប្រតិបត្តិការសេដ្ឋកិច្ច ថាមពល និងវិស័យផ្សេងៗ ទៀត៕

ជនអន្តោប្រវេសន៍ប្រមាណ ៦០០.០០០នាក់នៅអេស្ប៉ាញ បានដាក់ពាក្យសុំឋានៈស្របច្បាប់

មន្ត្រីរដ្ឋាភិបាលបាននិយាយកាលពីថ្ងៃព្រហស្បតិ៍ថា ជនអន្តោប្រវេសន៍ប្រមាណ ៦០៩.៧៣៧ នាក់ ក្នុងចំណោមជនអន្តោប្រវេសន៍ចំនួន ១,១៧ លាននាក់ នៅក្នុងប្រទេសអេស្ប៉ាញ ដែលបានដាក់ពាក្យសុំឋានៈស្របច្បាប់ នៅក្នុងយុទ្ធនាការសម្របសម្រួលថ្មីៗ បានទទួលលិខិតអនុញ្ញាតធ្វើការបណ្តោះអាសន្ន ដែលអនុញ្ញាតឲ្យពួកគេចាប់ផ្តើមធ្វើការនៅក្នុងសេដ្ឋកិច្ចផ្លូវការ ខណៈពេលដែលពាក្យសុំរបស់ពួកគេ កំពុងស្ថិតក្រោមការពិនិត្យ។យុទ្ធនាការសម្របសម្រួលនេះ ផ្តល់លិខិតអនុញ្ញាតស្នាក់នៅរយៈពេលមួយឆ្នាំដល់ជនអន្តោប្រវេសន៍ដែលគ្មានឯកសារដែលបានរស់នៅក្នុងប្រទេសអេស្ប៉ាញយ៉ាងហោចណាស់ ៥ខែ មុនចុងឆ្នាំ ២០២៥ ហើយមិនមានប្រវត្តិឧក្រិដ្ឋកម្ម ត្រូវបានបើកឲ្យដាក់ពាក្យសុំ ចាប់ពីថ្ងៃទី ១៦ ខែមេសា ដល់ថ្ងៃទី ៣០ខែមិថុនា។ព័ត៌មានលម្អិតបន្ថែមត្រូវផ្តល់ជូនកាលថ្ងៃព្រហស្បតិ៍ដោយរដ្ឋលេខាធិការទទួលបន្ទុកអន្តោប្រវេសន៍លោក Pilar Cancela និងរដ្ឋលេខាធិការទទួលបន្ទុកសន្តិសុខសង្គមលោក Borja Suárez។ ចំនួនសរុបនៃពាក្យស្នើសុំ គឺច្រើនជាងទ្វេដងនៃការប៉ាន់ស្មានដំបូងរបស់រដ្ឋាភិបាល គឺចំនួន ៥០០.០០០នាក់ ដែលភាគច្រើនមកពីប្រទេសអាមេរិកឡាទីន។ អ្នកដាក់ពាក្យស្នើសុំ ត្រូវបានផ្តល់លិខិតអនុញ្ញាតធ្វើការបណ្ដោះអាសន្ន ខណៈពេលដែលពាក្យសុំរបស់ពួកគេ កំពុងត្រូវបានដំណើរការ៕

ក្រសួងការពារជាតិ៖ កងកម្លាំងប្រដាប់អាវុធរុស្ស៊ីបានវាយប្រហារគោលដៅយោធាអ៊ុយក្រែនជាង ១៥០កន្លែង

ក្រសួងការពារជាតិរុស្ស៊ីបាននិយាយកាលពីថ្ងៃព្រហស្បតិ៍ថា កងកម្លាំងប្រដាប់អាវុធរុស្ស៊ីបានវាយប្រហារហេដ្ឋារចនាសម្ព័ន្ធដឹកជញ្ជូនរបស់អ៊ុយក្រែន ទីតាំងបាញ់បង្ហោះយានដ្រូនរយៈចម្ងាយឆ្ងាយ និងគោលដៅយោធាផ្សេងទៀតនៅក្នុងទីតាំងចំនួន ១៥៣កន្លែង។ ក្រសួងបាននិយាយថា ការវាយប្រហារទាំងនេះ ត្រូវបានធ្វើឡើង ដោយប្រើយន្តហោះប្រតិបត្តិការ-យុទ្ធសាស្ត្រ យានដ្រូនវាយប្រហារ កងកម្លាំងមីស៊ីល និងកាំភ្លើងធំ។ប្រព័ន្ធការពារដែនអាកាសរបស់រុស្ស៊ី បានបាញ់ទម្លាក់គ្រាប់បែកតម្រង់គោលដៅចំនួន ១១គ្រាប់ និងយានដ្រូនមានស្លាបថេរចំនួន ៦៣១គ្រឿង។ យោងតាមក្រសួង កងកម្លាំងនៃកងនាវាសមុទ្រខ្មៅ ក៏បានបំផ្លាញនាវាគ្មានមនុស្សបើកអ៊ុយក្រែនមួយគ្រឿង នៅភាគឦសានសមុទ្រខ្មៅផងដែរ។ក្រសួងបានបន្ថែមថា កងកម្លាំងរុស្ស៊ីបានគ្រប់គ្រងកន្លែងតាំងទីលំនៅ Piskunovka នៅក្នុងតំបន់ Donbas៕

UNICEF៖ កុមារលីបង់ប្រហែល ១០ម៉ឺននាក់ ប្រឈមនឹងការខកខានមិនចូលរៀនក្នុងឆ្នាំសិក្សាថ្មី

មូលនិធិកុមាររបស់អង្គការសហប្រជាជាតិ (UNICEF) កាលពីថ្ងៃព្រហស្បតិ៍ បាននិយាយនៅក្នុងសេចក្តីថ្លែងការណ៍មួយថា កុមារលីបង់ប្រហែល ១០០.០០០នាក់ ប្រឈមនឹងការខកខានឆ្នាំសិក្សាថ្មី ប្រសិនបើសាលារៀនដែលរងការខូចខាតដោយសង្គ្រាម មិនត្រូវបានជួសជុល នៅក្នុងខែកញ្ញានោះទេ។ ការព្រមាននេះ បានកើតឡើង បន្ទាប់ពីការស្ទង់មតិទូទាំងប្រទេសដោយ UNICEF និងក្រសួងអប់រំ និងឧត្តមសិក្សាលីបង់ បានរកឃើញការខូចខាតយ៉ាងទូលំទូលាយនៅទូទាំងវិស័យអប់រំរបស់ប្រទេសនេះ ពីជម្លោះមជ្ឈិមបូព៌ាថ្មីៗនេះ។ការវាយតម្លៃនេះ បានកំណត់អត្តសញ្ញាណស្ថាប័នអប់រំចំនួន ៣៤០ ដែលរងផលប៉ះពាល់ រួមទាំងសាលារៀន និងមជ្ឈមណ្ឌលវិជ្ជាជីវៈ ដោយមានសាលារៀនចំនួន ១៧ ត្រូវបានបំផ្លាញ និងជាច្រើនទៀត ត្រូវការការជួសជុលយ៉ាងច្រើន មុនពេលបើកដំណើរការឡើងវិញដោយសុវត្ថិភាព។UNICEF បានព្រមានថា ការអវត្តមានពីសាលារៀនរយៈពេលយូរ អាចបង្កើនហានិភ័យដូចជាពលកម្មកុមារ និងការរៀបអាពាហ៍ពិពាហ៍មុនអាយុ។ទីភ្នាក់ងារនេះបាននិយាយថា ខ្លួនកំពុងធ្វើការជាមួយអាជ្ញាធរមូលដ្ឋាន ដើម្បីស្តារឡើងវិញសាលារៀនដែលរងការខូចខាត និងរក្សាការសិក្សា ខណៈពេលដែលអំពាវនាវឲ្យមានមូលនិធិបន្ថែម៕

អង្គការWFP៖ ភាពអត់ឃ្លាននៅភាគខាងជើងប្រទេសនីហ្សេរីយ៉ា ឈានដល់កម្រិតអាក្រក់បំផុត

ទីភ្នាក់ងារស្បៀងអាហាររបស់អង្គការសហប្រជាជាតិ បាននិយាយកាលពីថ្ងៃព្រហស្បតិ៍ ទី២ ខែកក្កដា ថា មនុស្សជាង១៧លាននាក់នៅទូទាំងរដ្ឋចំនួន៩ដែលរងគ្រោះដោយជម្លោះនៅភាគខាងជើងប្រទេសនីហ្សេរីយ៉ា កំពុងប្រឈមភាពអត់ឃ្លានធ្ងន់ធ្ងរ និងបានព្រមានថាអំពើហិង្សា និងការកាត់បន្ថយមូលនិធិកំពុងជំរុញឱ្យមានអសន្តិសុខស្បៀងដល់កម្រិតអាក្រក់បំផុតក្នុងរយៈពេលជិតមួយទសវត្សរ៍កន្លងទៅនេះ។ កម្មវិធីស្បៀងអាហារពិភពលោក (WFP) បាននិយាយនៅក្នុងសេចក្តីថ្លែងការណ៍ថា ការវិភាគសន្តិសុខស្បៀងចុងក្រោយបានបង្ហាញថា មនុស្សជាច្រើនប្រឈមនឹងវិបត្តិ ភាពអាសន្ន ឬភាពអត់ឃ្លានដ៏មហន្តរាយ បានកើនឡើងជិតពីរលាននាក់ពីការព្យាករណ៍កាលពីពេលមុន។ ការរកឃើញនេះ បញ្ជាក់ពីការចំណាយផ្នែកមនុស្សធម៌កាន់តែច្រើនឡើងនៃភាពអសន្តិសុខនៅក្នុងប្រទេសដែលមានប្រជាជនច្រើនបំផុតនៅទ្វីបអាហ្វ្រិក ជាកន្លែងដែលក្រុមបះបោឥស្លាមនិយមនៅភាគឦសាន និងក្រុមជនអន្ធពាលប្រដាប់អាវុធស្ថិតនៅក្នុងតំបន់មួយចំនួននៅភាគខាងជើង បានឲ្យប្រជាជនជម្លៀសចេញពីសហគមន៍ រារាំងកសិករពីវាលស្រែចំការរបស់ពួកគេ និងរឹតត្បិតការនាំចូលជំនួយ។ អង្គការWFP បាននិយាយថា រដ្ឋ Borno ដែលជាចំណុចកណ្តាលនៃការបះបោរឥស្លាមនិយមជាយូរអង្វែងមក មនុស្សជាង៣លាននាក់ជួបអសន្តិសុខស្បៀង រួមទាំងជាង៧៥០.០០០នាក់កំពុងប្រឈមទៅនឹងស្ថានភាពអត់ឃ្លានធ្ងន់ធ្ងរ។

សារព័ត៌មានរដ្ឋស៊ីរី៖ ការផ្ទុះនៅហាងកាហ្វេក្នុងទីក្រុងដាម៉ាស បណ្តាលឲ្យមនុស្សស្លាប់និងរបួសច្រើននាក់

យោងតាមប្រព័ន្ធផ្សព្វផ្សាយរដ្ឋស៊ីរីបានឲ្យដឹងថា ក្រុមជួយសង្គ្រោះ និងសមាជិកកងកម្លាំងសន្តិសុខរបស់ប្រទេសស៊ីរី បានទៅដល់កន្លែងកើតហេតុនៃហេតុការផ្ទុះគ្រាប់បែកនៅហាងកាហ្វេមួយកន្លែងដែលមានមនុស្សច្រើននៅទីក្រុងដាម៉ាសភាគកណ្តាលកាលពីថ្ងៃព្រហស្បតិ៍ ទី ២ ខែកក្កដា ដែលបានសម្លាប់មនុស្សយ៉ាងហោចណាស់ប្រាំនាក់ និងរងរបួស ១៦ នាក់ផ្សេងទៀត។ ទូរទស្សន៍រដ្ឋស៊ីរីបាននិយាយថា គ្រាប់បែកមួយគ្រាប់ត្រូវបានបង្កប់នៅហាងកាហ្វេនៅជិតវិមានយុត្តិធម៌នៅកណ្តាលរដ្ឋធានីប្រទេសស៊ីរី។ ពុំមានព័ត៌មានលម្អិតផ្សេងទៀតអំពីការវាយប្រហារជាក់ស្តែងនោះទេ ហើយក៏ពុំមានការអះអាងទទួលខុសត្រូវភ្លាមៗចំពោះហេតុការណ៍នេះដែរ។ ទីភ្នាក់ងារសារព័ត៌មានរដ្ឋ SANA បានរាយការណ៍ពីចំនួនអ្នកស្លាប់ និងអ្នករងរបួស ដោយដកស្រង់សម្តីប្រធានសេវាសុខភាពសង្គ្រោះបន្ទាន់របស់ប្រទេសស៊ីរី។ ទីក្រុងដាម៉ាស បានរងការវាយប្រហារច្រើនលើកចាប់តាំងពីការផ្តួលរំលំប្រធានាធិបតី លោក Bashar al-Assad កាលពីចុងឆ្នាំ ២០២៤។ កាលពីថ្ងៃទី ១៩ ខែឧសភា គ្រាប់បែកបង្កប់ក្នុងរថយន្តមួយគ្រឿង បានសម្លាប់ទាហានស៊ីរីម្នាក់ និងរបួសយ៉ាងហោចណាស់ ១៨ នាក់ផ្សេងទៀត នៅខាងក្រៅអគារក្រសួងការពារជាតិ ក្នុងទីក្រុងដាម៉ាស។

ប្រទេសបារ៉ែន ថ្កោលទោសការវាយប្រហាររបស់អ៊ីរ៉ង់ នៅមុនកិច្ចប្រជុំក្រុមប្រឹក្សាសន្តិសុខ

ដោយថ្លែងនៅមុនកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ រដ្ឋមន្ត្រីការបរទេសបារ៉ែន បានថ្កោលទោសប្រទេសអ៊ីរ៉ង់កាលពីថ្ងៃព្រហស្បតិ៍ ទី២ ខែកក្កដា ជុំវិញអ្វីដែលលោកបាននិយាយថា ជាការវាយប្រហារដោយមីស៊ីលបាលីស្ទិក និងយានដ្រូនជាថ្មីទៅលើប្រទេសរបស់លោក។ លោក Abdullatif bin Rashid Al Zayani បាននិយាយថា ប្រទេសបារ៉ែនបានស្នើកិច្ចប្រជុំមួយបន្ទាប់ពីអ៊ីរ៉ង់ បានបាញ់មីស៊ីលបាលីស្ទិក និងយានដ្រូនប្រដាប់អាវុធជាថ្មីម្តងទៀតទៅលើតំបន់ស៊ីវិល ជាអ្វីដែលលោកបានពិពណ៌នាថាជាការរំលោភលើការប្តេជ្ញាចិត្តក្រោមអនុស្សរណៈនៃការយោគយល់របស់ទីក្រុងអ៊ីស្លាម៉ាបាដ ដែលបានព្រមព្រៀងគ្នាកាលពីថ្ងៃទី១៧ ខែមិថុនា។ លោកបាននិយាយថា ប្រទេសបារ៉ែន បានរងការវាយប្រហារដោយមីស៊ីល និងយានដ្រូនរាប់រយលើកចាប់តាំងពីថ្ងៃទី២៨ ខែកុម្ភៈ ដោយកំណត់គោលដៅលើសង្កាត់លំនៅឋាន និងហេដ្ឋារចនាសម្ព័ន្ធស៊ីវិល។ លោកបាននិយាយថា ការវាយប្រហារទាំងនោះ បានសម្លាប់មនុស្សច្រើននាក់ និងរងរបួសរាប់រយនាក់ រួមមានទាំងស្ត្រីនិងកុមារ ហើយរដ្ឋក្រុមប្រឹក្សាសហប្រតិបត្តិការឈូងសមុទ្រផ្សេងទៀតក៏បានរងផលប៉ះពាល់ផងដែរ។ លោកបាននិយាយថា ទាំងនេះពុំមែនជាគោលដៅយោធាទេ ហើយប្រទេសបារ៉ែន នៅតែប្តេជ្ញាចិត្តចំពោះសន្តិភាព ការសន្ទនា និងស្ថិរភាព ប៉ុន្តែនឹងរក្សាសិទ្ធិក្នុងការការពារខ្លួនក្រោមមាត្រា៥១នៃធម្មនុញ្ញអង្គការសហប្រជាជាតិ។

មនុស្សរាប់ពាន់នាក់ត្រូវបានជម្លៀសចេញ ខណៈចំហេះព្រៃឆេះរាលដាលនៅជិតកំពង់ផែ ប្រទេសបារាំង

ប្រព័ន្ធផ្សព្វផ្សាយក្នុងស្រុកបានរាយការណ៍ថា មនុស្សជាង២.០០០នាក់ដែលស្នាក់នៅក្នុងជំរំជុំវិញទីក្រុង Canet-en-Roussillon ភាគខាងត្បូងប្រទេសបារាំងត្រូវបានជម្លៀសចេញ ខណៈចំហេះព្រៃកាលពីថ្ងៃព្រហស្បតិ៍ ទី២ ខែកក្កដា បានឆេះរាលដាលនៅជិតកំពង់ផែមួយកន្លែង ដោយបានឆេះទូកចតទុកជាច្រើនគ្រឿង។ អ្នកពន្លត់អគ្គិភ័យជាង២០០នាក់ត្រូវបានដាក់ឲ្យចល័តដើម្បីពន្លត់ភ្លើងព្រៃ ដែលបានចាប់ផ្តើមនៅម៉ោងប្រហែល២ រសៀលម៉ោងក្នុងស្រុកនៅតំបន់ក្បែរទីក្រុង Perpignan។ អ្នកពន្លត់អគ្គិភ័យកំពុងប្រយុទ្ធទប់ស្កាត់នឹងចំហេះព្រៃជាច្រើនកន្លែងដែលបានឆេះរាលដាលដោយវាយបក់ដោយខ្យល់ខ្លាំងនៅភាគខាងត្បូងប្រទេសបារាំងកាលពីថ្ងៃព្រហស្បតិ៍ ខណៈប្រទេសនេះកំពុងទប់ទល់ជាមួយនឹងស្ថានភាពស្ងួតហួតហែងបន្ទាប់ពីរលកកម្តៅកាលពីពេលថ្មីៗនេះនៅអឺរ៉ុប។ រដ្ឋមន្ត្រីក្រសួងមហាផ្ទៃ លោក Laurent Nunez បាននិយាយថា ចំហេះព្រៃបីកន្លែង ដែលពីរកន្លែងបានឆេះរាលដាលនៅជាយខាងលិចទីក្រុងកំពង់ផែ Marseille នៃសមុទ្រមេឌីទែរ៉ាណេ បានឆេះបំផ្លាញផ្ទៃដីសរុបចំនួន១.២១០ហិកតា។ នាយករដ្ឋមន្ត្រី លោក Sebastien Lecornu បាននិយាយថា ផ្ទៃដីចំនួន ៨.៧០០ហិកតាត្រូវបានឆេះនៅក្នុងប្រទេសបារាំងរហូតមកដល់ពេលនេះក្នុងរដូវកាលនេះ រួមទាំង ១.២០០ហិកតាកាលពីថ្ងៃពុធ ទី១ ខែកក្កដា តែមួយថ្ងៃ ហើយក្រុមអ្នកពន្លត់អគ្គិភ័យសរុបចំនួន២.០០០នាក់ត្រូវបានចល័ត។

របៀបធ្វើសង្គ្រាមអាមេរិក-អ៊ីរ៉ង់ អាចជំរុញឱ្យប្រទេសឈូងសមុទ្រធ្វើពិពិធកម្មសម្ព័ន្ធភាពសន្តិសុខ

អ្នកវិភាគនិយាយថា បណ្តាប្រទេសឈូងសមុទ្រ ទំនងជានឹងពន្លឿនការជំរុញធ្វើពិពិធកម្មភាពជាដៃគូសន្តិសុខរបស់ខ្លួនបន្ទាប់ពីសង្គ្រាមរបស់សហរដ្ឋអាមេរិក-អ៊ីស្រាអែលលើអ៊ីរ៉ង់ ខណៈតំបន់នេះកំពុងទប់ទល់ផលប៉ះពាល់ជម្លោះយូរអង្វែង។ ខណៈទីក្រុងតេអេរ៉ង់ និងទីក្រុងវ៉ាស៊ីនតោន បើកការចរចាឈានឆ្ពោះទៅរកកិច្ចព្រមព្រៀងយូរអង្វែង ប្រទេសក្រុមប្រឹក្សាសហប្រតិបត្តិការឈូងសមុទ្រ (GCC) ដែលស្ថិតនៅក្រោមការវាយប្រហាររបស់អ៊ីរ៉ង់ក្នុងអំឡុងពេលសង្គ្រាម កំពុងពង្រីកទំនាក់ទំនងរបស់ពួកគេក្នុងពេលមានភាពមិនប្រាកដប្រជា។ សូម្បីតែនៅមុនពេលសង្គ្រាម ប្រទេសអារ៉ាប៊ីសាអ៊ូឌីត បានចុះហត្ថលេខាលើកតិកាសញ្ញាការពារជាតិជាមួយប្រទេសប៉ាគីស្ថាន ដែលសម្ព័ន្ធភាពអាចពង្រីកដល់ប្រទេសដទៃទៀតនៅក្នុងតំបន់។ អ្នកជំនាញនិយាយថា រយៈពេលជាច្រើនឆ្នាំមកហើយ រដ្ឋឈូងសមុទ្របានទិញប្រព័ន្ធការពារជាតិពីប្រទេសអឺរ៉ុបមួយចំនួន ខណៈរក្សាទំនាក់ទំនងជាមិត្តភាពជាមួយប្រទេសរុស្ស៊ី និងចិន ជាវិធីសាស្រ្តមួយដែលទំនងជាត្រូវបានពង្រឹងដោយជម្លោះ ។ អ្នកស្រាវជ្រាវនៅវិទ្យាស្ថានរដ្ឋឈូងសមុទ្រអារ៉ាប់ បាននិយាយថា ការស្វះស្វែងរកដៃគូសន្តិសុខថ្មី ពុំមែនមានបំណងជំនួសសហរដ្ឋអាមេរិកនោះទេ។ ការផ្តោតសំខាន់សម្រាប់ប្រទេសនានាដូចជាអារ៉ាប៊ីសាអ៊ូឌីត គឺតុល្យភាពអំណាចក្នុងតំបន់ និងការរុញច្រានទាំងអ៊ីរ៉ង់ និងអ៊ីស្រាអែល។ នេះពុំមានន័យថាជំនួសសហរដ្ឋអាមេរិកដោយប៉ាគីស្ថានទេ វាមានន័យថាធ្វើពិពិធកម្មភាពជាដៃគូ និងបង្កើតវេទិកាដូចជាក្រុមដែលគេហៅថាក្រុមប្រទេសបួន មានអារ៉ាប៊ីសាអ៊ូឌីត ទួរគី អេហ្ស៊ីប និងប៉ាគីស្ថាន។ វាក៏មានន័យថា អភិវឌ្ឍសមត្ថភាពការពារជាតិក្នុងស្រុករបស់ខ្លួន និងអភិវឌ្ឍស្វ័យភាពប្រចាំតំបន់បន្ថែមទៀត។

បណ្ដាញសង្គម

ព័ត៌មានថ្មីៗ

អ៊ូហ្គង់ដាប្រកាសគ្មានជំងឺអេបូឡា បន្ទាប់ពីអ្នកជំងឺចុងក្រោយចេញពីមន្ទីរពេទ្យ

ក្រុមអ្នកសង្កេតការណ៍អាស៊ានប្រចាំប្រទេសកម្ពុជា និង ប្រធានបេសកកម្មក្រុមអ្នកសង្កេតការណ៍អាស៊ាន (HOM AOT) ហ្វីលីពីនប្រចាំកម្ពុជា ធ្វើបទបង្ហាញ «ស្តីពីវឌ្ឍនភាពនៃការងារខណ្ឌសីមា និងបោះបង្គោលព្រំដែនរវាងកម្ពុជានិងថៃ»

កូរ៉េខាងត្បូងចេញការជូនដំណឹងបន្ទាន់ អំពីការសង្ស័យលេចធ្លាយផូស្វ័រ នៅមូលដ្ឋានទ័ពអាកាសអាមេរិក

វិមានក្រឹមឡាំង៖ ការវាយប្រហាររបស់អ៊ុយក្រែន លើនាវាអ៊ីរ៉ង់ គួរត្រូវបានចាត់ទុកថា ជាការវាយប្រហារលើអ៊ីរ៉ង់

រញ្ជួយដីកម្រិត ៥,៧រ៉ិចទ័រ ធ្វើឱ្យញ័រខេត្ត Qinghai របស់ប្រទេសចិន

របាយការណ៍៖ លោក Trump ហាក់កាន់តែទោរទៅរកលោក Zelenskyy ជាងលោក Putin

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877