BTV NEWS

លោក Macron អំពាវនាវឱ្យមានកិច្ចប្រជុំវិបត្តិភ្លើងឆេះព្រៃ និងរលកកម្ដៅ ខណៈអេស្ប៉ាញជួបប្រទះចំហេះព្រៃថ្មី

ប្រមុខអង្គការសហប្រជាជាតិ ជំរុញឱ្យលុបចោលទណ្ឌកម្មទាំងអស់លើប្រទេសស៊ីរីជាបន្ទាន់

អ្នកតាំងលំនៅឋានអ៊ីស្រាអែល ដុតវិហារអ៊ីស្លាមនៅតំបន់ West Bank បន្ទាប់ពីការប៉ះទង្គិចគ្នាដ៏បង្ហូរឈាម

មនុស្សមួយចំនួនបានស្លាប់ក្នុងការវាយប្រហារដាក់គ្នារវាងរុស្ស៊ី និងអ៊ុយក្រែនដោយមីស៊ីល និងយានដ្រូន

ព័ត៌មានអន្តរជាតិ

ប្រព័ន្ធផ្សព្វផ្សាយអ៊ីរ៉ង់៖ មនុស្សប្រមាណ៤៣លាននាក់បានចូលរួមក្នុងពិធីបុណ្យសពរបស់មេដឹកនាំ

ប្រព័ន្ធផ្សព្វផ្សាយអ៊ីរ៉ង់រាយការណ៍ថា មនុស្សចន្លោះពី ៤១ ទៅ ៤៣ លាននាក់បានចូលរួមក្នុងពិធីបុណ្យសពរយៈពេល៦ថ្ងៃសម្រាប់មេដឹកនាំកំពូលអ៊ីរ៉ង់ លោក Ali Khamenei ដែលត្រូវបានសម្លាប់។ទូរទស្សន៍ Press TV របស់អ៊ីរ៉ង់ បានចាត់ទុកពិធីបុណ្យសពរបស់លោក Khamenei ថាមាន «ក្បួនដង្ហែ ធំបំផុតដែលពិភពលោកធ្លាប់បានឃើញ»។ ពិធីនេះ បានធ្វើឡើងនៅទូទាំងទីក្រុងចំនួនប្រាំ មានទីក្រុងតេអេរ៉ង់ ទីក្រុងQom ទីក្រុងNajaf ទីក្រុងKarbala និងទីក្រុងMashhad ។ពិធីដង្ហែសពសាធារណៈជាផ្លូវការបានចាប់ផ្តើមកាលពីថ្ងៃសៅរ៍សប្តាហ៍មុន នៅពេលដែលពលរដ្ឋអ៊ីរ៉ង់រាប់ម៉ឺននាក់បានប្រមូលផ្តុំគ្នានៅឯបរិវេណសាសនា Grand Mosalla ក្នុងទីក្រុងតេអេរ៉ង់ ជាកន្លែងដែលមឈូសរបស់លោក Khamenei ត្រូវបានដាក់ឲ្យគោរព។គណៈប្រតិភូមកពីសម្ព័ន្ធមិត្តក្នុងតំបន់របស់អ៊ីរ៉ង់ មានក្រុមហាម៉ាស ក្រុមជីហាតអ៊ិស្លាមមកពីតំបន់ហ្កាហ្សា ក្រុមហេសបូឡាមកពីប្រទេសលីបង់ និងក្រុមហ៊ូទីមកពីប្រទេសយេម៉ែនបានចូលរួម។ លោក Khamenei ត្រូវបានបញ្ចុះនៅទីសក្ការៈដ៏ពិសិដ្ឋបំផុតរបស់ប្រទេស រយៈពេលជាងបួនខែបន្ទាប់ពីលោកត្រូវបានសម្លាប់ក្នុងការវាយប្រហាររបស់សហរដ្ឋអាមេរិក-អ៊ីស្រាអែលលើបរិវេណរបស់លោកនៅទីក្រុងតេអេរ៉ង់ភាគកណ្តាល។

សមាជិកសភា៖ អ៊ីរ៉ង់អាចវាយកម្ទេចអាមេរិក និងអ៊ីស្រាអែល ទោះបីមានណាតូចូលរួមក្នុងជម្លោះក៏ដោយ

លោក Alaeddin Boroujerdi សមាជិកគណៈកម្មាធិការសន្តិសុខជាតិ និងគោលនយោបាយការបរទេសនៃសភាអ៊ីរ៉ង់ បានប្រាប់សារព័ត៌មាន TASSថា អ៊ីរ៉ង់ ដូចជារុស្ស៊ីដែរ បានប្រឈមនឹងការបង្កហេតុរបស់លោកខាងលិចជាយូរមកហើយ ប៉ុន្តែកងកម្លាំងប្រដាប់អាវុធរបស់ខ្លួន អាចបំផ្លិចបំផ្លាញសហរដ្ឋអាមេរិក និងអ៊ីស្រាអែលបាន ទោះបីជាមានឧបសគ្គយ៉ាងណាក៏ដោយ។ លោក Borujerdi ជឿជាក់ថា៖«រុស្ស៊ីបានប្រឈមនឹងសកម្មភាពបង្កហេតុដោយសហរដ្ឋអាមេរិក និងបណ្តាប្រទេសលោកខាងលិច នៅអ៊ុយក្រែនជាយូរមកហើយ ហើយក្នុងរយៈពេលប៉ុន្មានឆ្នាំចុងក្រោយនេះ ជាមួយនឹងសង្គ្រាម។ ជនជាតិអាមេរិកយល់ឃើញថា វាជាគោលដៅរបស់ពួកគេ ក្នុងការជ្រៀតជ្រែកក្នុងកិច្ចការរបស់ប្រទេសឯករាជ្យនីមួយៗ និងនាំមកនូវសង្គ្រាមដល់ប្រទេសរុស្ស៊ី។ ពួកគេបានធ្វើរឿងស្រដៀងគ្នានេះ នៅក្នុងប្រទេសអ៊ីរ៉ង់ ប៉ុន្តែប្រជាជនអ៊ីរ៉ង់ និងកងកម្លាំងប្រដាប់អាវុធរបស់យើង បានវាយកម្ទេច សហរដ្ឋអាមេរិក ទោះបីជាពួកគេមានរបបជ្វីហ្វនិយម នៅខាងពួកគេ និងបានប្រើប្រាស់សក្តានុពលពេញលេញរបស់អង្គការណាតូក៏ដោយ ប៉ុន្តែជាក់ស្តែង ពួកគេបានចាញ់ទៅហើយ»៕

ការផ្ទុះឡើងជំងឺ Ebola កំពុង «កើនឡើងលឿនបំផុត» ខណៈមានអ្នកស្លាប់យ៉ាងតិច ៦០០នាក់

អាជ្ញាធរសុខាភិបាលអាហ្វ្រិក កាលពីថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦) បានលើកឡើងថា ការផ្ទុះឡើងនៃជំងឺ Ebola នៅសាធារណរដ្ឋប្រជាធិបតេយ្យកុងហ្គោ គឺជា «ការកើនឡើងលឿនបំផុត» ដែលមិនធ្លាប់មាន ខណៈដែលអង្គការសុខភាពពិភពលោក (WHO) បានឱ្យដឹងថា មនុស្សយ៉ាងតិច ៦០០នាក់ហើយ បានបាត់បង់ជីវិត ដោយសារជំងឺនេះ។តួលេខដែលត្រូវបានធ្វើបច្ចុប្បន្នភាពចេញដោយទីភ្នាក់ងារសុខភាពរបស់អង្គការសហប្រជាជាតិ (UN) មួយនេះ បានបង្ហាញថា មានការឆ្លងចំនួន ១.៧៥៩ករណី នៅកុងហ្គោ ចាប់តាំងពីការផ្ទុះឡើងនៃជំងឺនេះ ត្រូវបានប្រកាសកាលពីពាក់កណ្តាលខែឧសភា ក្នុងនោះរួមទាំងការស្លាប់ចំនួន ៦០០នាក់។លោក Wessam Mankoula ប្រធានផ្នែកត្រៀមបង្ការ និងឆ្លើយតបបន្ទាន់ សម្រាប់មជ្ឈមណ្ឌលគ្រប់គ្រង និងបង្ការជំងឺអាហ្វ្រិក (Africa CDC) បានប្រាប់អ្នកសារព័ត៌មានថា៖ «នេះគឺជាការផ្ទុះឡើងនៃជំងឺ Ebola ដែលកើនឡើងលឿនបំផុតមិនធ្លាប់មាន មិនត្រឹមតែក្នុងចំណោមការផ្ទុះឡើងនៃវីរុសប្រភេទ Bundibugyo ពីមុនប៉ុណ្ណោះទេ ប៉ុន្តែថែមទាំងវីរុសផ្សេងៗទាំងអស់ដែលបង្កជំងឺអេបូឡាផងដែរ»។លោកបានបញ្ជាក់ថា ការផ្ទុះឡើងនៃជំងឺ Ebola ដែលបណ្ដាលឱ្យមានអ្នកស្លាប់ច្រើនបំផុត ក្នុងឆ្នាំ២០១៣-២០១៦ នៅអាហ្វ្រិកខាងលិច មានករណីឆ្លងចំនួន ៩៩៤ករណី ក្នុងរយៈពេល ៦សប្តាហ៍ដំបូង បើប្រៀបធៀបទៅនឹង ១.៥៩៦ករណី នាពេលបច្ចុប្បន្ននេះ៕

លោក Xi បង្ហាញក្ដីបារម្ភ អំពីសុវត្ថិភាពកន្លែងធ្វើការ ក្រោយឆេះរោងចក្រស្បែកជើង សម្លាប់មនុស្ស ២៨នាក់

ប្រធានាធិបតីចិន លោក Xi Jinping បានសបង្ហាញក្ដីបារម្ភ អំពីគ្រោះថ្នាក់នៅកន្លែងធ្វើការដែលបណ្ដាលឱ្យមានអ្នកស្លាប់ម្តងហើយម្តងទៀត បន្ទាប់ពីអគ្គិភ័យនៅរោងចក្រស្បែកជើងមួយកន្លែង បានឆក់យកមនុស្សយ៉ាងតិច ២៨នាក់។ទូរទស្សន៍មជ្ឈិមចិន បានរាយការណ៍ថា អគ្គិភ័យកាលពីថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦) បានកើតមានឡើងនៅទីក្រុងឆ្នេរសមុទ្រ Quanzhou ដែលមានប្រជាជន ៧,៧លាននាក់ ដោយបន្ថែមថា មនុស្ស ២នាក់ បានបាត់បង់ជីវិតនៅមន្ទីរពេទ្យ ហើយ ២៦នាក់ផ្សេងទៀតត្រូវបានបញ្ជាក់ថា ស្លាប់ នាពេលក្រោយមក។ទូរទស្សន៍ CCTV បានផ្សាយថា ហេតុការណ៍នេះបានកើតឡើងនៅក្នុងកន្លែងធ្វើការមួយដែលមានសម្ភារៈងាយឆាបឆេះ។ ប្រព័ន្ធផ្សព្វផ្សាយរដ្ឋនេះ បានឱ្យដឹងទៀតថា ថ្នាក់ដឹកនាំក្រុមហ៊ុនត្រូវបានឃុំខ្លួន ហើយគណនីរបស់ក្រុមហ៊ុនត្រូវបានបង្កក។ទីភ្នាក់ងារសារព័ត៌មានផ្លូវការ Xinhua បានរាយការណ៍ថា ដោយគូសបញ្ជាក់ពីក្ដីបារម្ភកាន់តែខ្លាំងឡើងរបស់ថ្នាក់ដឹកនាំចិន អំពីបញ្ហាសុវត្ថិភាពនៅកន្លែងធ្វើការ លោក Xi បានមានប្រសាសន៍ថា៖ «ចាប់តាំងពីដើមឆ្នាំនេះមក គ្រោះថ្នាក់សុវត្ថិភាពផលិតកម្មធំៗជាច្រើន បានកើតឡើង»។ លោកបានបន្ថែមថា៖ «គ្រប់តំបន់ និងស្ថាប័នពាក់ព័ន្ធទាំងអស់ត្រូវតែរៀនសូត្រយ៉ាងស៊ីជម្រៅពីមេរៀនទាំងនេះ ហើយដោះស្រាយបញ្ហា»។កាលពីខែឧសភា ប្រទេសនេះបានកើតមានហេតុការណ៍ផ្ទុះអណ្តូងរ៉ែធ្យូងថ្មដ៏អាក្រកបំផុតជាលើកដំបូង ចាប់តាំងពីឆ្នាំ២០០៩ នៅពេលដែលមនុស្សប្រមាណជា ៨២នាក់បានស្លាប់ នៅក្នុងខេត្ត Shanxi ភាគខាងជើង ជាឧប្បត្តិហេតុមួយដែលជំរុញឱ្យលោក Xi អំពាវនាវឱ្យមានវិធានការសុវត្ថិភាពកាន់តែល្អប្រសើរ។ ប៉ុន្មានថ្ងៃក្រោយមក មនុស្ស ៥នាក់ បានបាត់បង់ជីវិត អំឡុងបំណាក់អណ្តូងរ៉ែមួយកន្លែង នៅខេត្ត Yunnan នៅភាគនិរតី។ នៅខែដដែលនោះ ការផ្ទុះនៅរោងចក្រផលិតកាំជ្រួចភ្ញីមួយកន្លែង ក្នុងទីក្រុង Changsha ភាគកណ្តាល បានបណ្ដាលឱ្យមនុស្សយ៉ាងហោចណាស់ ៣៧នាក់ស្លាប់៕

IMF ព្យាករសេដ្ឋកិច្ចសកលកើនឡើងត្រឹម ៣% នៅឆ្នាំនេះ ដោយសារសង្គ្រាមអ៊ីរ៉ង់ តែ AI ជួយទប់

មូលនិធិរូបិយវត្ថុអន្តរជាតិ (IMF) នៅសប្ដាហ៍នេះ បានទម្លាក់ទស្សនវិស័យរបស់ខ្លួន សម្រាប់សេដ្ឋកិច្ចពិភពលោកនៅឆ្នាំនេះ ដោយលើកឡើងពីផលរំខានថាមពលដែលបណ្តាលមកពីសង្គ្រាមអ៊ីរ៉ង់។ ប៉ុន្តែផលវិបាកពីជម្លោះនេះ កំពុងត្រូវបានប៉ះប៉ូវដោយផ្នែក ដោយសារការរីកចម្រើននៃការវិនិយោគ លើបញ្ញាសិប្បនិម្មិត (AI) និងបច្ចេកវិទ្យាផ្សេងទៀត។ឥឡូវនេះ IMF រំពឹងថា សេដ្ឋកិច្ចពិភពលោក នឹងកើនឡើងក្នុងល្បឿនដ៏យឺតត្រឹម ៣ភាគរយ នៅឆ្នាំ២០២៦ ដោយធ្លាក់ចុះពីកម្រិត ៣,៥ភាគរយ កាលពីឆ្នាំមុន និងថយចុះពី ៣,១ភាគរយដែលខ្លួនបានព្យាករកាលពីខែមេសា សម្រាប់ឆ្នាំនេះ។ ហើយមូលនិធិនេះ ជឿថា កំណើនសេដ្ឋកិច្ចទូទាំងពិភពលោក នឹងងើបឡើងវិញដល់កម្រិត ៣,៤ភាគរយ នៅឆ្នាំក្រោយ។គួរបញ្ជាក់ថា អ៊ីរ៉ង់បានឆ្លើយតបទៅនឹងការវាយប្រហាររបស់សហរដ្ឋអាមេរិក និងអ៊ីស្រាអែល កាលពីថ្ងៃទី២៨ ខែកុម្ភៈ ដោយការបិទច្រកសមុទ្រ Hormuz ជាផ្លូវដែលប្រេងឆៅ និងឧស្ម័នធម្មជាតិ ១ភាគ៥ របស់ពិភពលោកឆ្លងកាត់។ តម្លៃថាមពលបានហក់ឡើងយ៉ាងខ្លាំង ដែលធ្វើឱ្យអាជីវកម្ម និងអ្នកប្រើប្រាស់កាន់តែជួបការលំបាកខ្លាំងឡើងៗ។ នាពេលនេះ IMF រំពឹងថា តម្លៃប្រេងនឹងឡើងជិត ៣២ភាគរយ នៅឆ្នាំនេះ ហើយសម្រាប់តម្លៃទំនិញប្រើប្រាស់សកលទាំងមូល នឹងឡើងខ្ពស់ ៤,៧ភាគរយ នៅឆ្នាំ២០២៦។យ៉ាងណាក្ដី ការព្យាកររបស់ IMF សន្មតថា ច្រកសមុទ្រ Hormuz នឹងបើកឡើងវិញនៅចុងខែនេះ ពោលគឺបើទោះបីជាការវាយប្រហាររបស់សហរដ្ឋអាមេរិក លើអ៊ីរ៉ង់ បានចាប់ផ្តើមឡើងវិញ ហើយលោកប្រធានាធិបតី Donald Trump បានប្រកាសកាលពីថ្ងៃពុធថា បទឈប់បាញ់ជាមួយអ៊ីរ៉ង់ បានបញ្ចប់ក៏ដោយ។ ស្ថាប័ននេះក៏សន្មតផងដែរថា ពាណិជ្ជកម្មឆ្លងកាត់ច្រកសមុទ្រនេះ នឹងវិលត្រឡប់ទៅរកសភាពប្រក្រតីវិញ នៅខែមីនាឆ្នាំក្រោយ៕

មនុស្សរាប់រយនាក់ចេញពីលំនៅឋាន នៅតៃវ៉ាន់ ហើយភាគនិរតីជប៉ុនប្រុងប្រយ័ត្នខ្ពស់ ខណៈព្យុះ Bavi ជិតទៅដល់

មនុស្សរាប់រយនាក់ នៅកោះតៃវ៉ាន់ ត្រូវបានជម្លៀសចេញពីផ្ទះសម្បែងរបស់ពួកគេ ហើយសាលារៀន និងការិយាល័យជាច្រើន បានបិទទ្វារ ខណៈដែលព្យុះទីហ្វុងដ៏ធំបំផុតជាលើកដំបូង ក្នុងរយៈពេលជាច្រើនទសវត្សរ៍នេះ បោកបក់ឆ្ពោះទៅតំបន់នេះ នៅថ្ងៃសុក្រ (ទី១០ ខែកក្កដា ឆ្នាំ២០២៦) នេះ។ព្យុះទីហ្វុង Bavi ត្រូវបានគេរំពឹងថា នឹងវាយប្រហារភាគខាងជើង និងភាគខាងកើតរបស់កោះតៃវ៉ាន់ ក៏ដូចជាកោះដាច់ស្រយាលភាគនិរតីរបស់ប្រទេសជប៉ុន នៅថ្ងៃទី១០ និងទី១១ ខែកក្កដា មុនពេលបក់បោកទៅដល់ប្រទេសចិន ដែលបានរងគ្រោះដោយសារព្យុះដ៏កំណាចនៅសប្តាហ៍នេះ។ប្រជាជននៅក្នុងទីក្រុងកំពង់ផែគីលុង (Keelung) ដែលត្រូវបានគេរំពឹងថា នឹងក្លាយជាតំបន់មួយ ក្នុងចំណោមតំបន់ដែលប៉ះពាល់ខ្លាំងបំផុតនោះ បានស្តុកទុកអាហារ បិទបង្អួច និងដាក់ស្បោងច្រកខ្សាច់ នៅច្រកចូលហាងអាជីវកម្មតាមដងផ្លូវ ដោយស្តាប់តាមការព្រមានពីអាជ្ញាធរឱ្យចាត់វិធានការបង្ការ។ សាលារៀន និងការិយាល័យជាច្រើន ត្រូវបានបិទទ្វារនៅថ្ងៃទី១០ ខែកក្កដានេះ នៅទូទាំងភាគខាងជើង និងភាគខាងកើតនៃកោះតៃវ៉ាន់ រួមទាំងទីក្រុងតៃប៉ិផងដែរ។ជាមួយគ្នានេះ ព្យុះទីហ្វុងនេះ បានធ្វើដំណើរជិតទៅដល់កោះដាច់ស្រយាលមួយនៅភាគនិរតីរបស់ជប៉ុននៅថ្ងៃទី១០ ខែកក្កដានេះ ដែលជំរុញឱ្យអាជ្ញាធរព្រមានអំពីការមានខ្យល់ខ្លាំង ភ្លៀងធ្លាក់ខ្លាំង បំណាក់ដី និងទឹកជំនន់ ដែលនេះអាចជាព្យុះដ៏បំផ្លិចបំផ្លាញបំផុត នៅក្នុងតំបន់ ក្នុងរយៈពេលជាច្រើនឆ្នាំ។នៅព្រឹកថ្ងៃទី១០ ខែកក្កដានេះ ព្យុះទីហ្វុងនេះបានបក់បោកជិតដល់កោះ Sakishima របស់ជប៉ុន ជាកោះដាច់ស្រយាលមួយ នៅជិតកោះតៃវ៉ាន់ ដោយមានល្បឿនខ្យល់បក់អតិបរមា ១៦២គីឡូម៉ែត្រ ក្នុងមួយម៉ោង ដែលជំរុញឱ្យប្រជាជនក្នុងតំបន់ រកវិធីការពារផ្ទះសម្បែង និងហាងរបស់ខ្លួន។ ក្រុមហ៊ុនអាកាសចរណ៍បានលុបចោលជើងហោះហើររាប់សិបជើង នៅក្នុងតំបន់ រួមទាំងជើងហោះហើរ សម្រាប់ថ្ងៃទី១១ ខែកក្កដាផងដែរ៕

ចិនបញ្ជាក់ឡើងវិញការជំទាស់សាលក្រមខុសច្បាប់ឆ្នាំ ២០១៦ របស់តុលាការមជ្ឈត្តកម្ម នៅសមុទ្រចិនខាងត្បូង

នៅថ្ងៃសុក្រនេះ ចិនបានបញ្ជាក់ឡើងវិញពីការជំទាស់របស់ខ្លួនចំពោះសេចក្តីសម្រេចរបស់តុលាការមជ្ឈត្តកម្មអចិន្រ្តៃយ៍ដែលបានសម្រេចថា ការទាមទារសិទ្ធិនៅដែនសមុទ្រដ៏ទូលំទូលាយរបស់ចិននៅសមុទ្រចិនខាងត្បូង គ្មានសុពលភាពនោះទេ ក្រោមច្បាប់អន្តរជាតិ ។អ្នកនាំពាក្យក្រសួងការបរទេសចិនអ្នកស្រី Mao Ning និយាយថា ចិនបានបញ្ជាក់ម្តងហើយម្តងទៀតថា សាលក្រមសម្រេចបែបនេះ គឺខុសច្បាប់ គ្មានសុពលភាព ហើយគ្មានកាតព្វកិច្ចស្របច្បាប់ ។ អ្នកស្រីបន្តថា ចិនពុំទទួលយក ឬទទួលស្គាល់ការសម្រេចចិត្តមួយនេះឡើយ ហើយពួកយើងក៏មិនទទួលយកអំណះអំណាងណាមួយ ឬវិធានការណាមួយផ្អែកលើការសម្រេចមួយនេះឡើយ ។នៅចុងសប្តាហ៍នេះ គឺជាខួបគម្រប់ ១០ឆ្នាំនៃជ័យជំនះដ៏សំខាន់ជាប្រវតិ្តសាស្រ្តរបស់ហ្វីលីពីប្រឆាំងនឹងការទាមទារសិទ្ធិរបស់ចិននៅសមុទ្រចិនខាងត្បូង ប៉ុន្តែប្រជានេសាទក្នុងស្រុកហ្វីលីពីន ពុំហ៊ានធ្វើដំណើរទៅនេសាទត្រីនៅជិតតំបន់ថ្មប៉ប្រះទឹក Scarborough និងដែនទឹកនេសាទដ៏មានតម្លៃរបស់ពួកគេ ដោយសារក្តីបារម្ភពីការយាយីរបស់នាវាចិន ។តុលាការមជ្ឈត្តកម្មអចិន្រ្តៃយ៍ និយាយថា ដែនទឹកនៅតំបន់ថ្មប៉ប្រះទឹក Scarborough ដែលចិនហៅឈ្មោះថា Huangyan Dao គឺជាដែននេសាទបែបប្រពៃណីចែករំលែកដោយប្រទេសជាច្រើន រួមទាំងហ្វីលីពីន ចិន និងវៀតណាម ។ ទោះបីជាយ៉ាងណាក៏ដោយ ពួកគេពុំបានសម្រេចថា តើប្រទេសណាមួយ មានអធិបតេយ្យភាពលើតំបន់ថ្មប៉ប្រះទឹកមួយនេះឡើយ ៕

អ្នកការទូតជាន់ខ្ពស់ជប៉ុននិយាយថា ពុំមានផែនការជាក់លាក់ណាមួយសម្រាប់ទំនាក់ទំនងនយោបាយជាមួយរុស្ស៊ីទេ

លោក Takeshi Akahori អនុរដ្ឋមន្ត្រីការបរទេសជាន់ខ្ពស់ជប៉ុន បានឆ្លើយតបទៅនឹងសំណួររបស់អ្នកយកព័ត៌មាន TASS ថា ប្រទេសនេះ មិនមានគម្រោងធ្វើទំនាក់ទំនងនយោបាយជាមួយភាគីរុស្ស៊ីទេ រួមទាំងនៅខាងក្រៅព្រឹត្តិការណ៍អាស៊ាន នាពេលខាងមុខនៅទីក្រុងម៉ានីល នៅពាក់កណ្តាលខែកក្កដាទេ។ លោកបានថ្លែងនៅក្នុងសន្និសីទសារព័ត៌មានមួយដែលពិភាក្សាអំពីលទ្ធផលនៃកិច្ចប្រជុំកំពូល G7 នៅប្រទេសបារាំងថា៖«ទាក់ទងនឹងការចូលរួមដែលអាចធ្វើទៅបានជាមួយរុស្ស៊ីក្នុងឱកាសរដ្ឋមន្ត្រីការបរទេសអាស៊ាន និងឱកាសស្រដៀងគ្នានេះ នៅពេលនេះ មិនមានផែនការជាក់លាក់ណាមួយសម្រាប់ការចូលរួមរបស់ជប៉ុន និងរុស្ស៊ី នៅកម្រិតនយោបាយទេ»។កាលពីខែឧសភា លោក Muneo Suzuki សមាជិកនៃគណបក្សប្រជាធិបតេយ្យសេរីកំពុងកាន់អំណាចរបស់ជប៉ុន បានធ្វើទស្សនកិច្ចនៅទីក្រុងមូស្គូ។ បន្ទាប់ពីជួបជាមួយអនុរដ្ឋមន្ត្រីការបរទេសរុស្ស៊ី លោក Andrey Rudenko លោកបានប្រាប់អ្នកយកព័ត៌មានថា រដ្ឋមន្ត្រីការបរទេសនៃភាគីទាំងពីរ អាចនឹងជួបគ្នានៅឯកិច្ចប្រជុំកំពូលអាស៊ាននៅទីក្រុងម៉ានីល នៅខែកក្កដា ប្រសិនបើភាគីជប៉ុនស្នើសុំកិច្ចប្រជុំបែបនេះ។ ដោយធ្វើអត្ថាធិប្បាយអំពីការលើកឡើងរបស់លោក Suzuki រដ្ឋមន្ត្រីការបរទេសជប៉ុន លោក Toshimitsu Motegi បានសង្កត់ធ្ងន់ថា បច្ចុប្បន្នប្រទេសជប៉ុន មិនមានផែនការជាក់លាក់ណាមួយសម្រាប់ទំនាក់ទំនងជាមួយរុស្ស៊ី នៅកម្រិតរដ្ឋមន្ត្រីការបរទេសទេ ខណៈដែលលោកបានបន្ថែមថា «ទីក្រុងតូក្យូបើកចំហសម្រាប់ការចរចាជាមួយទីក្រុងមូស្គូ»។ក្រោយមក អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយថា ទោះបីជាទីក្រុងមូស្គូមិនបានទទួលសំណើសុំរៀបចំកិច្ចប្រជុំកម្រិតខ្ពស់ នៅខាងក្រៅព្រឹត្តិការណ៍អន្តរជាតិពីទីក្រុងតូក្យូក៏ដោយ ក៏ខ្លួនបានត្រៀមខ្លួនរួចជាស្រេចដើម្បីពិចារណាលើលទ្ធភាពបែបនេះដែរ៕

មន្ត្រី៖ សហរដ្ឋអាមេរិកនឹងណែនាំការដកទ័ពរបស់អ៊ីស្រាអែលចេញពីតំបន់លីបង់ និងដឹកនាំកិច្ចចរចាថ្មី

មន្ត្រីលីបង់ និងអាមេរិក កាលពីថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦) បានប្រាប់ឱ្យដឹងថា សហរដ្ឋអាមេរិកនឹងត្រួតពិនិត្យដំណើរការដកទ័ពរបស់អ៊ីស្រាអែលចេញពី «តំបន់សាកល្បង» នៅភាគខាងត្បូង ដោយតំបន់ដំបូងនឹងចាប់ផ្តើមក្នុងរង្វង់រយៈពេលប៉ុន្មានថ្ងៃខាងមុខ។មន្ត្រីអាមេរិកមួយរូបបាននិយាយថា កិច្ចចរចាថ្មី រវាងអ៊ីស្រាអែល និងលីបង់ នឹងចាប់ផ្ដើមបន្តនៅសប្តាហ៍ក្រោយ បន្ទាប់ពីប្រភពការទូត បានប្រាប់សារព័ត៌មាន AFP នៅមុននេះថា លីបង់បានទាមទារឱ្យអ៊ីស្រាអែលដកទ័ពចេញពីតំបន់ទាំងនោះ មុនពេលចូលរួមដំណើរការនេះ។គួរបញ្ជាក់ថា ក្រោមកិច្ចព្រមព្រៀងក្របខ័ណ្ឌដែលសម្រេចបាន កាលពីថ្ងៃទី២៦ ខែមិថុនា អ៊ីស្រាអែលនឹងដកទ័ពបន្តិចម្តងៗចេញពីតំបន់ភាគខាងត្បូងលីបង់ ជាកន្លែងដែលខ្លួនបានបញ្ជូនកងទ័ពចូលទៅ ជាផ្នែកនៃយុទ្ធនាការយោធា ប្រឆាំងនឹងក្រុមហេសបូឡា ដែលជាចលនាស៊ីអ៊ីតគាំទ្រដោយអ៊ីរ៉ង់ និងដែលបានប្រយុទ្ធជាមួយអ៊ីស្រាអែលជាយូរមកហើយ។ជាផ្នែកនៃកិច្ចព្រមព្រៀងនេះ យោធាលីបង់ដែលបាត់បង់អំណាចជាយូរមកហើយ នឹងគ្រប់គ្រងទាំងស្រុងលើតំបន់តូចៗចំនួន ២ ដែលហៅថា ជាតំបន់សាកល្បង។ នៅទីក្រុងវ៉ាស៊ីនតោន មន្ត្រីអាមេរិកមួយរូបបានប្រាប់ថា «យើងបានឈានដល់ដំណាក់កាលអនុវត្តនៃក្របខ័ណ្ឌនេះហើយ»។មន្ត្រីរូបនេះបាននិយាយក្នុងលក្ខខណ្ឌមិនបញ្ចេញឈ្មោះថា «តំបន់សាកល្បងដំបូងនឹងចាប់ផ្តើមក្នុងរយៈពេលប៉ុន្មានថ្ងៃទៀត ហើយតំបន់សាកល្បងបន្ថែមទៀត កំពុងត្រូវបានគូសផែនទី និងរៀបចំផែនការ»។ លោកបានបន្ថែមថា បញ្ជាការកណ្តាលសហរដ្ឋអាមេរិក នឹងសម្របសម្រួលនៅតំបន់ទាំងនេះ ជាមួយប្រទេសទាំង២៕

លោក Trump បានប្រាប់លោក Netanyahu ពីចំណាត់ការរបស់អាមេរិក នៅតំបន់ឈូងសមុទ្រ

ការិយាល័យនាយករដ្ឋមន្ត្រីអ៊ីស្រាអែល បានឱ្យដឹងថា ប្រធានាធិបតីអាមេរិក លោក Donald Trump បានប្រាប់ព័ត៌មានទៅលោក Benjamin Netanyahu កាលពីថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦) អំពីប្រតិបត្តិការរបស់សហរដ្ឋអាមេរិក នៅតំបន់ឈូងសមុទ្រ បន្ទាប់ពីអ៊ីរ៉ង់បានរាយការណ៍ពីការវាយប្រហារថ្មីៗរបស់អាមេរិក។ការិយាល័យរបស់លោក Netanyahu បានឱ្យដឹងតាមរយៈសារនៅលើបណ្ដាញសង្គម X ថា «ជាផ្នែកមួយនៃទំនាក់ទំនងជាបន្តបន្ទាប់» រវាងប្រទេសទាំង២ «លោកប្រធានាធិបតី Trump បានធ្វើបច្ចុប្បន្នភាពប្រាប់ទៅលោកនាយករដ្ឋមន្ត្រី (Netanyahu) អំពីចំណាត់ការរបស់អាមេរិក នៅតំបន់ឈូងសមុទ្រ»។ មន្ត្រីអាមេរិកមួយរូបក៏បានបញ្ជាក់ផងដែរថា ការជជែកតាមទូរស័ព្ទនេះ បានកើតឡើង តែមិនបានផ្តល់ព័ត៌មានលម្អិតបន្ថែមឡើយ។ជាមួយគ្នានេះ យោងតាមសារនៅលើបណ្ដាញសង្គម X នោះ បានឱ្យដឹងទៀតថា មេដឹកនាំអ៊ីស្រាអែលក៏បានបង្ហាញក្ដីបារម្ភផងដែរទៅកាន់សេតវិមាន ពាក់ព័ន្ធនឹងប្រទេសទួរគី ដោយចោទប្រកាន់ប្រធានាធិបតីទួរគី លោក Recep Tayyip Erdogan ថា បានធ្វើសេចក្តីថ្លែងការណ៍ «ប្រឆាំងនឹងអត្ថិភាពនៃរដ្ឋអ៊ីស្រាអែល ក៏ដូចជាតម្រូវការ សម្រាប់តំបន់សន្តិសុខ តាមបណ្តោយព្រំដែនអ៊ីស្រាអែល»៕កាលពីថ្ងៃទី៧ ខែកក្កដា លោក Erdogan បានបដិសេធការអះអាងរបស់អ៊ីស្រាអែលថា ជា «ព័ត៌មានមិនពិត» ដែលថា ការលក់យន្តហោះចម្បាំង F-35 របស់សហរដ្ឋអាមេរិក និងគ្រឿងបន្លាស់ទៅឱ្យទីក្រុងអង់ការ៉ា នឹងធ្វើឱ្យប៉ះពាល់ដល់តុល្យភាពអំណាចក្នុងតំបន់។ នៅថ្ងៃទី៦ ខែកក្កដា លោក Netanyahu បានជំរុញឱ្យសហរដ្ឋអាមេរិកកុំលក់យន្តហោះទាំងនោះទៅឱ្យសម្ព័ន្ធមិត្តក្នុងអង្គការណាតូ (NATO) គឺទួរគី៕

បណ្ដាញសង្គម

ព័ត៌មានថ្មីៗ

កម្ពុជា បន្ដជួបក្រុមម្ចាស់ផ្ទះឥណ្ឌូនេស៊ី ក្នុងប្រកួតទី២ នៃពានបាល់ទាត់អាស៊ាន រាត្រីនេះ

កម្ពុជា និងវៀតណាម ត្រូវបានចារក្នុងប្រវត្តិសាស្ដ្រពាន SEA V.Cup 2026

មន្ត្រី៖ អ៊ីស្រាអែល នឹងអនុញ្ញាតឱ្យកងកម្លាំងអន្តរជាតិចូលទៅក្នុងតំបន់ហ្កាហ្សា

ប្រេងធ្លាក់ចុះ ៥% បន្ទាប់ពីសហរដ្ឋអាមេរិក និងអ៊ីរ៉ង់ ផ្អាកការប្រយុទ្ធគ្នាកាលពីចុងសប្តាហ៍មុន

កម្ពុជាកំពុងជាមូលដ្ឋានផលិតកម្មថ្មីសម្រាប់ឧស្សាហកម្មយានយន្ត រួមចំណែកក្នុងខ្សែច្រវាក់តម្លៃសកល

ប្រទះឃើញសត្វផ្សោតស្លាប់មួយក្បាលនៅសង្កាត់ស្វាយជ្រុំ ក្រុងអរិយក្សត្រ ខេត្តកណ្តាល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានអន្តរជាតិ

ប្រព័ន្ធផ្សព្វផ្សាយអ៊ីរ៉ង់៖ មនុស្សប្រមាណ៤៣លាននាក់បានចូលរួមក្នុងពិធីបុណ្យសពរបស់មេដឹកនាំ

សមាជិកសភា៖ អ៊ីរ៉ង់អាចវាយកម្ទេចអាមេរិក និងអ៊ីស្រាអែល ទោះបីមានណាតូចូលរួមក្នុងជម្លោះក៏ដោយ

ការផ្ទុះឡើងជំងឺ Ebola កំពុង «កើនឡើងលឿនបំផុត» ខណៈមាន​អ្នកស្លាប់​យ៉ាង​តិច​ ៦០០នាក់

IMF ព្យាករ​សេដ្ឋកិច្ចសកលកើនឡើងត្រឹម ៣% នៅឆ្នាំនេះ ដោយសារសង្គ្រាមអ៊ីរ៉ង់ តែ AI ជួយ​ទប់ ​

មនុស្សរាប់រយនាក់​ចេញពីលំនៅឋាន នៅតៃវ៉ាន់ ហើយ​ភាគនិរតីជប៉ុនប្រុងប្រយ័ត្នខ្ពស់ ខណៈព្យុះ Bavi ជិត​ទៅ​ដល់