នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
លោក ហ្សេឡិនស្គី៖ រុស្ស៊ីកំពុងត្រៀមទទួលកងទ័ពកូរ៉េខាងជើង ៣ម៉ឺននាក់ទៀត សម្រាប់សង្គ្រាមនៅអ៊ុយក្រែន
លោក ARGHCHI៖ អ៊ីរ៉ង់ត្រៀមជួយសម្របសម្រួលដោះស្រាយទំនាក់ទំនងរវាងអារ៉ាប៊ីសាអ៊ូឌីត និងក្រុមហ៊ូទី
លោក PUTIN៖ រុស្ស៊ីមិនដែលចង់ប្រឈមមុខដាក់គ្នានៅតំបន់អាកទិកឡើយ
អ្នកការទូតអាមេរិក៖ សហរដ្ឋអាមេរិកមានអាវុធគ្រប់គ្រាន់ ដើម្បីធ្វើសង្គ្រាមជាមួយអ៊ីរ៉ង់

ព័ត៌មានអន្តរជាតិ

កងឆ្មាំបដិវត្តន៍អ៊ីរ៉ង់ ប្រកាសអះអាងពីការវាយប្រហារមូលដ្ឋានយោធាអាមេរិកនៅគូវ៉ែត

2026/07/10 03:20:19 am        34
Facebook Telegram Linkin
កងកម្លាំងប្រដាប់អាវុធអ៊ីរ៉ង់ បានវាយប្រហារគោលដៅហេដ្ឋារចនាសម្ព័ន្ធយោធាសហរដ្ឋអាមេរិកនៅប្រទេសជិតខាងក្នុងតំបន់ឈូងសមុទ្រនាថ្ងៃព្រសហ្បតិ៍នេះ បន្ទាប់ពីការវាយប្រហាររបស់សហរដ្ឋអាមេរិកលើខេត្តតំបន់ឆ្នេរភាគខាងត្បូង និងខេត្តតំបន់ឆ្នេរភាគខាងកើតរបស់ពួកគេ ធ្វើឲ្យភាពជាប់គាំងកាន់តែខ្លាំងនៃកិច្ចព្រមព្រៀងឈប់បាញ់រយៈពេល ៣សប្តាហ៍ ។នៅក្នុងសារបង្ហោះលើបណ្តាញព័ត៌មានសង្គម Telegram កងឆ្មាំបដិវត្តន៍អ៊ីរ៉ង់និយាយថា ទីតាំងយោធាសហរដ្ឋអាមេរិក ត្រូវបានរងការវាយប្រហារនៅមូលដ្ឋាន Ar-Rifjan ជាទីដែលបន្ទាយ Camp Arifjan ស្ថិតនៅ និងមូលដ្ឋានយោធា Ali Al-Salem ស្ថិតក្នុងប្រទេសគូវ៉ែត ។យោធាសហរដ្ឋអាមេរិក និយាយកាលពីថ្ងៃពុធថា ការវាយប្រហារចុងក្រោយរបស់ខ្លួនលើអ៊ីរ៉ង់ មានគោលបំណង ដើម្បីបើកច្រកសមុទ្រ Hormuz ក្រោយពួកគេនិយាយថា កងកម្លាំងអ៊ីរ៉ង់ បានវាយប្រហារនាវាដឹកប្រេង ៣គ្រឿង នៅតំបន់នោះ ។ការវាយប្រហារនេះដែរ បានកើតមានឡើងរយៈពេលប៉ុន្មានម៉ោងប៉ុណ្ណោះ ក្រោយប្រធានាធិបតីសហរដ្ឋអាមេរិលោក Donald Trump និយាយថា លោកមានជំនឿថា បទឈប់បាញ់បណ្តោះអាសន្នជាមួយអ៊ីរ៉ង់ ត្រូវបានបញ្ចប់ហើយ ។ក្រុមមន្រ្តីអ៊ីរ៉ង់និយាយថា ការវាយប្រហាររបស់សហរដ្ឋអាមេរិក បានសម្លាប់មនុស្ស ១៤នាក់ និងមនុស្ស ៧៨នាក់ផ្សេងទៀត រងរបួសនៅទូទាំងខេត្តចំនួន ៥ អំឡុងថ្ងៃទី ៨ និងថ្ងៃទី ៩ ខែកក្កដានេះ ៕

អ្នកនេសាទ ៣នាក់ស្លាប់ និង ១៥នាក់រងរបួស ដោយសារ​ការវាយប្រហាររបស់អាមេរិក លើ​ផែននេសាទនៅ​អ៊ីរ៉ង់

2026/07/10 03:19:36 am        35
Facebook Telegram Linkin
អ្នកនេសាទយ៉ាង​តិច​ ៣នាក់ ត្រូវបានសម្លាប់ និង ១៥នាក់ផ្សេងទៀតរងរបួស ដោយសារ​ការវាយប្រហាររបស់សហរដ្ឋអាមេរិក លើផែនេសាទពាណិជ្ជកម្មមួយកន្លែង ​នៅ​ទីក្រុងឆ្នេរសមុទ្រ Sirik ក្នុងខេត្ត Hormozgan នៅភាគខាងត្បូងនៃប្រទេសអ៊ីរ៉ង់ នាថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦)។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានពាក់កណ្តាលផ្លូវការ ISNA ដោយដកស្រង់សម្តីអភិបាលរងខេត្ត លោក​ Ehsan Kamrani។មិនមានការអត្ថាធិប្បាយភ្លាមៗនៅ​ឡើយ​ទេ ពីអាជ្ញាធរអាមេរិក ជុំវិញការវាយប្រហារដែលត្រូវបានរាយការណ៍នេះ​។ សហរដ្ឋអាមេរិកបានធ្វើការវាយប្រហារលើអ៊ីរ៉ង់រយៈពេល ២ថ្ងៃជាប់ៗគ្នា បន្ទាប់ពីទីក្រុងតេអេរ៉ង់បានកំណត់គោលដៅលើនាវាធ្វើ​ដំណើរ​ឆ្លងកាត់ច្រកសមុទ្រ Hormuz ដែលជាផ្លូវទឹកយុទ្ធសាស្ត្រសម្រាប់ការផ្គត់ផ្គង់ថាមពលសកល​។កាលពី​ថ្ងៃទី១៧ ខែមិថុនា អ៊ីរ៉ង់ និងសហរដ្ឋអាមេរិកបានឈានដល់អនុស្សរណៈនៃការយោគយល់គ្នា (MOU) សម្របសម្រួលដោយប៉ាគីស្ថាន ដែលមានគោលបំណងបញ្ចប់ជម្លោះយោធារបស់ភាគីទាំង២ និងបើកផ្លូវឱ្យមាន​កិច្ចព្រមព្រៀងសន្តិភាពយូរអង្វែង។តែ​កាលពី​ថ្ងៃពុធ ប្រធានាធិបតីអាមេរិក លោក Donald Trump បាននិយាយថា កិច្ចព្រមព្រៀងនេះ «ចប់ហើយ» ដែលបង្កឱ្យមានការប្រឈមមុខដាក់គ្នាផ្នែកយោធាថ្មី​៕

លីបង់៖ គណៈប្រតិភូអាមេរិកនឹងត្រួតពិនិត្យការដកទ័ពរបស់អ៊ីស្រាអែលចេញពី «តំបន់សាកល្បង»

2026/07/10 03:19:11 am        33
Facebook Telegram Linkin
ដោយសំអាង​ដល់​សម្តីរបស់ឯកអគ្គរដ្ឋទូតអាមេរិក ការិយាល័យ​ប្រធានាធិបតីលីបង់ នៅថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦) នេះ បាន​រាយការណ៍​ឱ្យដឹងថា គណៈប្រតិភូអាមេរិក ត្រូវបានគេរំពឹងថា នឹង​ទៅ​ដល់ប្រទេសលីបង់ក្នុងពេលឆាប់ៗនេះ ដើម្បីត្រួតពិនិត្យការអនុវត្តដំណើរការដកទ័ពរបស់អ៊ីស្រាអែលចេញពី «តំបន់សាកល្បង» នៅភាគខាងត្បូង។ប្រភពការទូតដែលដឹង​ពី​ការចរចានេះ​ បានប្រាប់សារព័ត៌មាន​ AFP កាលពីថ្ងៃពុធថា លីបង់កំពុងទាមទារឱ្យអ៊ីស្រាអែលដកទ័ពចេញពីតំបន់ទាំងនេះ មុនពេលចូលរួមក្នុងការចរចាជុំថ្មីដែលគ្រោងធ្វើឡើងនៅថ្ងៃទី១៥ និងទី​ ១៦ ខែកក្កដា នៅទីក្រុងរ៉ូម ប្រទេស​អ៊ីតាលី។ប្រទេសទាំង២ បានឈានដល់កិច្ចព្រមព្រៀងក្របខ័ណ្ឌមួយកាល​ថ្ងៃទី២៦ ខែមិថុនា ដែលអំពាវនាវឱ្យមានការរំសាយអាវុធរបស់ក្រុម​ហេសបូឡា និងការដកទ័ពរបស់អ៊ីស្រាអែលបន្តិចម្តងៗចេញពីទឹកដីលីបង់ដែលត្រូវបាន​កាន់កាប់ ខណៈពេលដែលកងទ័ពលីបង់ដាក់ពង្រាយចូលទៅក្នុង «តំបន់សាកល្បង»។បើយោងតាមការិយាល័យ​ប្រធានាធិបតីលីបង់ បាន​ឱ្យដឹង​ថា ឯកអគ្គរដ្ឋទូតអាមេរិកប្រចាំប្រទេសលីបង់ លោក Michel Issa បានប្រាប់លោក​ប្រធានាធិបតី Joseph Aoun ថា៖ «គណៈប្រតិភូយោធាអាមេរិក នឹងមកដល់ទីក្រុងបេរូត ក្នុងរយៈពេលប៉ុន្មានថ្ងៃខាងមុខនេះ ដើម្បីកំណត់យន្តការសម្រាប់ការអនុវត្ត​នៅ​ទីតាំង​ជាក់ស្ដែង​»។កិច្ចព្រមព្រៀងនេះ ដែលត្រូវបានបដិសេធដោយក្រុមហេសបូឡា មិនបានកំណត់ពេលវេលា សម្រាប់ការដកទ័ពរបស់អ៊ីស្រាអែលទេ ហើយមន្ត្រីអ៊ីស្រាអែលក៏បានសន្យាផងដែរថា កងកម្លាំងរបស់ពួកគេនឹងនៅតែស្ថិតនៅក្នុង «តំបន់សន្តិសុខ» ដែលមានចម្ងាយ​ជ្រៅ​ ១០គីឡូម៉ែត្រ ដរាបណាក្រុមហេសបូឡានៅតែមានអាវុធ​៕

អ្នកវិភាគ៖ អាជ្ញាប័ណ្ណអាមេរិកឲ្យអ៊ុយក្រែនផលិតមីស៊ីល Patriot គ្រាន់តែជាជំហានដំបូងប៉ុណ្ណោះ

2026/07/10 03:18:36 am        42
Facebook Telegram Linkin
អ្នកវិភាគការពារជាតិ និងសន្តិសុខអាល្លឺម៉ង់លោក Christian Moelling និយាយនៅថ្ងៃព្រហស្បតិ៍នេះថា ការប្រកាសរបស់ប្រធានាធិបតីសហរដ្ឋអាមេរិកលោក Donald Trump ក្នុងការផ្តល់អាជ្ញាប័ណ្ណដល់អ៊ុយក្រែន ដើម្បីផលិតប្រព័ន្ធបាញ់ស្កាត់មីស៊ីល Patriot គ្រាន់តែជាជំហានដំបូងប៉ុណ្ណោះ ពោលគឺកិច្ចចរចាសំខាន់ចាំបាច់ជាច្រើនទៀត រវាងឧស្សាហកម្មសហរដ្ឋអាមេរិក និងឧស្សាហកម្មអ៊ុយក្រែន នៅត្រូវការបន្ថែមទៀត ។គួរឲ្យដឹងថា កាលពីថ្ងៃពុធម្សិលមិញ លោកប្រធានាធិបតី Donald Trump បាននិយាយថា សហរដ្ឋអាមេរិកនឹងផ្តល់អាជ្ញាប័ណ្ណដល់អ៊ុយក្រែន ដើម្បីផលិតប្រព័ន្ធស្ទាក់ចាប់មីស៊ីល Patriot ជាការជំរុញដ៏ធំមួយសម្រាប់ទីក្រុងគីវ ដែលបានស្វែងរកការអនុញ្ញាតជាយូរមកហើយ ក្នុងការផលិតអាវុធការពារខ្លួនប្រភេទនេះ ។លោក Trump ថ្លែងនៅក្នុងកិច្ចប្រជុំជាមួយប្រធានាធិបតីអ៊ុយក្រែនលោក Volodymyr Zelenskyy នៅឯកិច្ចប្រជុំកំពូលអង្គការណាតូ ក្នុងទីក្រុងអង់ការ៉ាថា ពួកយើងនឹងផ្តល់អាជ្ញាប័ណ្ណដល់អ្នក ដើម្បីផលិតប្រព័ន្ធបាញ់ស្កាត់មីស៊ីល Patriots ។លោក Moelling គឺជាប្រធានវិទ្យាស្ថានស្រាវជ្រាវ EDINA និយាយប្រាប់ទីភ្នាក់ងារព័ត៌មានរ៉យទ័រថា អ្វីដែលពួកយើងមានបច្ចុប្បន្ន គ្រាន់តែជាសេចក្តីថ្លែងការណ៍របស់ប្រធានាធិបតីសហរដ្ឋអាមេរិកប៉ុណ្ណោះ ដែលល្បីល្បាញណាស់សម្រាប់សេចក្តីថ្លែងការណ៍របស់លោក ប៉ុន្តែបច្ចុប្បន្ន អ្នកត្រូវការមានកិច្ចចរចារវាងឧស្សាហកម្មសហរដ្ឋអាមេរិក និងឧស្សាហកម្មអ៊ុយក្រែន ជាទីដែលពួកគេត្រូវផលិតប្រព័ន្ធបាញ់ស្កាត់មីស៊ីល Patriot ។លោកបន្តថា គេនៅមិនទាន់ដឹងច្បាស់ភ្លាមៗនោះទេ ថាតើប្រព័ន្ធបាញ់ស្កាត់មីស៊ីលណាមួយ នឹងត្រូវបញ្ជូនឲ្យទីក្រុងគីវ ក្នុងពេលដ៏ខ្លីខាងមុខនេះ ៕

ប្រព័ន្ធផ្សព្វផ្សាយ៖ សមាជិក IRGC ៣នាក់ ត្រូវបានសម្លាប់ អំឡុង​​ការវាយប្រហាររបស់អាមេរិក នៅខេត្ត Khuzestan

2026/07/10 02:57:02 am        37
Facebook Telegram Linkin
ទីភ្នាក់ងារសារព័ត៌មាន IRNA ដែលគ្រប់គ្រងដោយរដ្ឋ បានរាយការណ៍ថា សមាជិក ៣នាក់នៃកងឆ្មាំបដិវត្តន៍ឥស្លាមអ៊ីរ៉ង់ (IRGC) ត្រូវបានសម្លាប់ អំឡុង​ការវាយប្រហារតាមអាកាសរបស់សហរដ្ឋអាមេរិកដែលកំណត់គោលដៅខេត្ត Khuzestan ភាគនិរតីរបស់ប្រទេសអ៊ីរ៉ង់ នៅថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦) នេះ​។ដោយដកស្រង់សេចក្តីថ្លែងការណ៍មួយពីស្ថាប័ន​ទំនាក់ទំនងសាធារណៈ និងព័ត៌មានរបស់ IRGC នៅខេត្ត​ Khuzestan សារព័ត៌មាន IRNA បានឱ្យដឹង​ថា បុគ្គលិកទាំង ៣រូប​ត្រូវបានសម្លាប់ អំឡុង​ការវាយប្រហារដែលកំណត់គោលដៅតំបន់នានានៃខេត្តនេះ នា​ព្រឹកថ្ងៃព្រហស្បតិ៍។សហរដ្ឋអាមេរិកបានធ្វើការវាយប្រហារលើអ៊ីរ៉ង់ ដែល​ជា​ថ្ងៃទី២ ជាប់គ្នា បន្ទាប់ពីទីក្រុងតេអេរ៉ង់បានកំណត់គោលដៅលើ​នាវាឆ្លងកាត់ច្រកសមុទ្រ Hormuz ដែល​ជាផ្លូវទឹកយុទ្ធសាស្ត្រ សម្រាប់ការផ្គត់ផ្គង់ថាមពលសកល។អ៊ីរ៉ង់បានទទូចថា នាវានានា​ត្រូវសម្របសម្រួលជាមួយអាជ្ញាធររបស់ខ្លួន មុនពេលឆ្លងកាត់ច្រកសមុទ្រនេះ ហើយបានបដិសេធការឆ្លងកាត់តាមរយៈផ្លូវណាមួយក្រៅពីផ្លូវដែលខ្លួនបានកំណត់៕

​EU ស្នើវិធានការបង្កកទ្រព្យសម្បត្តិ និងបម្រាម​ធ្វើដំណើរ ដើម្បីប្រយុទ្ធប្រឆាំង​ការរត់ពន្ធជនអន្តោប្រវេសន៍

2026/07/10 02:47:15 am        30
Facebook Telegram Linkin
សហភាពអឺរ៉ុប (EU) នៅ​ថ្ងៃព្រហស្បតិ៍ (ទី​៩ ខែកក្កដា ឆ្នាំ២០២៦) នេះ បានលើក​ឡើង​នូវ​ក្របខ័ណ្ឌទណ្ឌកម្មថ្មីមួយ ដែលផ្តោតលើការរត់ពន្ធជនអន្តោប្រវេសន៍ ការជួញដូរមនុស្ស និងទម្រង់ផ្សេងទៀតនៃក្រុម​ឧក្រិដ្ឋកម្ម ដែលនឹងដាក់ការបង្កកទ្រព្យសម្បត្តិ និងហាមឃាត់ការធ្វើដំណើរលើជនល្មើស។ដោយសំដៅទៅលើការបង្ក្រាបលើអ្នករត់ពន្ធ និង​អ្នក​ជួញដូរ​ជនអន្តោប្រវេសន៍ ប្រធានគណៈកម្មការអឺរ៉ុប លោកស្រី Ursula von der Leyen បានឱ្យដឹង​នៅក្នុងសេចក្តីថ្លែងការណ៍មួយថា៖ «យើងទាំងអស់គ្នាមានគោលដៅរួម។ ដើម្បីធ្វើ​ឱ្យ​ជន​ទាំង​នោះ​មិន​ប្រកប​​អាជីវកម្មបែប​នេះ​។ ហើយ​ដើម្បីជួយសង្គ្រោះជីវិតមនុស្សរាប់ពាន់នាក់ដែលស្រមៃចង់បានជីវិតកាន់តែល្អ​ប្រសើរ។ យើងជាប្រជាជនអឺរ៉ុប ត្រូវតែជាអ្នកសម្រេចថា អ្នកណាត្រូវ​មកកាន់​ទីកន្លែង​របស់យើង​ ហើយ​មក​ក្នុងកាលៈទេសៈណា»។សំណើនេះតម្រូវឱ្យមានការយល់ព្រមជាឯកច្ឆ័ន្ទពីក្រុមប្រឹក្សាអឺរ៉ុប មុនពេលវាអាចត្រូវបាន​អនុវត្ត។ ការប្រកាសនេះកើតឡើងក្នុងពេល​មាន​ការជជែកដេញ​ដោល​យ៉ាង​តាន​តឹង​ ជុំវិញគោលនយោបាយទេសន្តរប្រវេសន៍ នៅ EU។កាលពីខែមុន សភាអឺរ៉ុបបានអនុម័តកំណែច្បាប់ទេសន្តរប្រវេសន៍ ដែលមានគោលបំណងធ្វើឱ្យការនិរទេសងាយស្រួល​ជាងមុន​ និងអនុញ្ញាតឱ្យមានមជ្ឈមណ្ឌលឃុំឃាំងនៅក្រៅដែន​ដី​របស់​តំបន់​៕

កោះភាគខាងត្បូង Ishigaki របស់ជប៉ុន ត្រៀមខ្លួន មុនការមកដល់របស់ព្យុះទីហ្វុង Bavi

2026/07/10 02:46:46 am        24
Facebook Telegram Linkin
នៅថ្ងៃព្រហស្បតិ៍នេះ ប្រជាពលរដ្ឋរស់នៅទូទាំងកោះភាគខាងត្បូង Ishigaki របស់ជប៉ុន បានរក្សាសុវត្ថិភាពផ្ទះសម្បែង និងហាងលក់ទំនិញរបស់ពួកគេ ជាការត្រៀមខ្លួនចំពោះការមកដល់របស់ព្យុះទីហ្វុង Bavi ។ ភ្លៀងធ្លាក់តិច និងសន្ទុះខ្យល់បក់ពុំទាន់សូវខ្លាំង បានកើតមាន មុនការមកដល់របស់ព្យុះដែលបច្ចុប្បន្ននៅចម្ងាយប្រហែល ១ពាន់គ.ម ។ យោងតាមការអះអាងរបស់ទីភ្នាក់ងារឧតុនិយមជប៉ុន បានឲ្យដឹងថា ព្យុះទីហ្វុងមួយនេះ គ្រោងនឹងបោកបក់ដល់ដីគោកនៅកោះ Ishigaki នាព្រឹកថ្ងៃសៅរ៍ខាងមុខ ។ លោក Hiroshi Nomura គឺជាម្ចាស់ហាងលក់កង់ និយាយថា ជាការពិតណាស់ថា លោកមានការព្រួយបារម្ភ លោកមានការព្រួយបារម្ភថាតើ ការត្រៀមខ្លួនរបស់ពួកយើងគ្រប់គ្រាន់ហើយឬនៅសម្រាប់មហាព្យុះមួយនេះ ។ លោកបន្តថា លោកមានគម្រោងបិទហាងរបស់លោកមុនពេលព្យុះ Bavi បោកបក់ដល់ដីគោក ។ ស្របពេលដែលអ្នកស្រុកនាំគ្នាស្តុកទំនិញមុនការមកដល់របស់ព្យុះ រានលក់ទំនិញក្នុងហាងមួយចំនួន លែងមានទំនិញទៀតហើយ ។ តំបន់ឆ្នេរសមុទ្រសាធារណៈមួយចំនួន សួនកម្សាន្តតំបន់ឆ្នេរ និងចំណតនាវាចម្លង គ្រោងនឹងបិទទ្វារផងដែរនៅថ្ងៃព្រហស្បតិ៍នេះ ដោយពួកគេលើកឡើងពីក្តីបារម្ភមុនការមកដល់របស់ព្យុះ ។ ក្រុមអាជ្ញាធរ បានព្រមានអ្នកស្រុកឲ្យមានការប្រុងប្រយ័ត្នខ្ពស់នៅថ្ងៃសុក្រ និងថ្ងៃសៅរ៍ សម្រាប់ខ្យល់បក់ខ្លាំង បំណាក់ដី ទឹកជំនន់ និងការកញ្ជ្រោលឡើងរបស់ព្យុះ ៕

រដ្ឋ​អាជ្ញាជាន់ខ្ពស់អ៊ុយក្រែន៖ គ្មាន​តម្រុយបង្ហាញថា ទីក្រុងគី​វនៅពីក្រោយការបំផ្ទុះបំពង់​បង្ហូរ Nord Stream

2026/07/10 02:33:17 am        25
Facebook Telegram Linkin
រដ្ឋអាជ្ញាអ៊ុយក្រែនបានបដិសេធនៅថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦) នេះថា មិន​មានការ​ជាប់ពាក់ព័ន្ធរបស់​ទីក្រុងគីវឡើយ​ ក្នុងការបំផ្ទុះបំពង់បង្ហូរឧស្ម័ន Nord Stream ក្នុងឆ្នាំ២០២២ ហើយបានស្នើឱ្យបង្កើតក្រុមស៊ើបអង្កេតរួមគ្នាជាមួយអាល្លឺម៉ង់ ដែលសង្ស័យថា អង្គភាពរដ្ឋអ៊ុយក្រែននៅពីក្រោយហេតុការណ៍​នោះ។ការផ្ទុះទាំងនេះ ដែល​បាន​កើត​ឡើង​​ក្រោយ​ប៉ុន្មាន​ខែបន្ទាប់ពីមាន​ការឈ្លានពានរបស់រុស្ស៊ី លើអ៊ុយក្រែនក្នុងខែកុម្ភៈ ឆ្នាំ២០២២ បានបំផ្លាញបំពង់បង្ហូរឧស្ម័ន Nord Stream 1 ដែលជាបណ្ដាញ​ដ៏​សំខាន់ សម្រាប់ការនាំចេញឧស្ម័នរបស់រុស្ស៊ីទៅកាន់តំបន់​អឺរ៉ុប ក៏ដូចជាធ្វើ​ឱ្យ​ខូចខាត​ដល់បំពង់​​ Nord Stream 2 ដែលមិនទាន់បានចាប់​ផ្ដើម​ដំណើរការនៅឡើយ។ការិយាល័យអគ្គរដ្ឋ​អាជ្ញាបាននិយាយនៅក្នុងសេចក្តីថ្លែងការណ៍មួយថា ដោយផ្អែកលើការស៊ើបអង្កេតរហូតមកដល់ពេលនេះ គ្មានភស្តុតាងណាមួយដែល​បង្ហាញថា អ៊ុយក្រែន អង្គភាពផ្លូវការរបស់ប្រទេស​ ឬមន្ត្រីណាម្នាក់​របស់​រដ្ឋាភិបាល​មានជាប់ពាក់ព័ន្ធនឹងការបំផ្ទុះកាល​ពី​ខែកញ្ញា ឆ្នាំ២០២២ នៅសមុទ្របាល់ទិក ឬបានចេញបញ្ជាពាក់ព័ន្ធណាមួយ តំណាង​ឱ្យ​អ៊ុយក្រែន។ការិយាល័យ​នេះ​បានបន្ថែម​ថា៖ «ក្នុងពេលជាមួយគ្នានេះ ការស៊ើបអង្កេតលើកាលៈទេសៈទាំងនេះ មិនទាន់បានបញ្ចប់នៅឡើយទេ ហើយភស្តុតាងចាំបាច់នៅតែត្រូវបានប្រមូល និងត្រួត​ពិនិត្យ»។គួរបញ្ជាក់ថា កាលពីសប្តាហ៍មុន រដ្ឋ​អាជ្ញាសហព័ន្ធអាល្លឺម៉ង់ បានចោទប្រកាន់អតីតមន្ត្រីកងទ័ពអ៊ុយក្រែនម្នាក់ ពីបទរួមគំនិតប្រព្រឹត្តឧក្រិដ្ឋកម្មសង្គ្រាម ជុំវិញការបំផ្ទុះនេះ ដោយចោទប្រកាន់រូប​គេ​ថា បានធ្វើសកម្មភាពតំណាង​អង្គភាពរដ្ឋអ៊ុយក្រែនដែលមិនត្រូវ​បានបញ្ជាក់៕

អ៊ីរ៉ង់និយាយថា កាំជ្រួចផ្លោងអាមេរិកត្រូវចំបរិវេណជុំវិញរោងចក្រថាមពលនុយក្លេអ៊ែរ Bushehr

2026/07/10 02:32:02 am        18
Facebook Telegram Linkin
អភិបាលរងខេត្ត Bushehr របស់អ៊ីរ៉ង់ និយាយប្រាប់ទីភ្នាក់ងារព័ត៌មានរ៉យទ័រនៅថ្ងៃព្រហស្បតិ៍នេះថា កាំជ្រួចផ្លោង ១គ្រាប់របស់សហរដ្ឋអាមេរិក ធ្លាក់លើបរិវេណជុំវិញរោងចក្រថាមពលនុយក្លេអ៊ែរ Bushehr នាថ្ងៃព្រហស្បតិ៍នេះ ។មន្រ្តីរូបនេះ និយាយថា ទីតាំងជាច្រើនកន្លែងនៅខេត្ត Bushehr រួមទាំងបរិវេណរោងចក្រនុយក្លេអ៊ែរ រងការវាយប្រហាររបស់សហរដ្ឋអាមេរិក ។ទីភ្នាក់ងារព័ត៌មានពាក់កណ្តាលផ្លូវការ Mehr រាយការណ៍ថា សំឡេងផ្ទុះជាច្រើន ត្រូវបានឮនាព្រឹកថ្ងៃព្រហស្បតិ៍នេះ នៅខេត្ត Bushehr ។នៅថ្ងៃព្រហស្បតិ៍នេះដែរ កងកម្លាំងប្រដាប់អាវុធអ៊ីរ៉ង់ បានវាយប្រហារហេដ្ឋារចនាសម្ព័ន្ធយោធាសហរដ្ឋអាមេរិកនៅតាមបណ្តាលរដ្ឋជិតខាងក្នុងតំបន់ឈូងសមុទ្រ បន្ទាប់ពីការវាយប្រហាររបស់សហរដ្ឋអាមេរិកលើខេត្តតំបន់ឆ្នេរភាគខាងត្បូង និងខេត្តតំបន់ឆ្នេរភាគខាងកើតរបស់ពួកគេ ធ្វើឲ្យភាពជាប់គាំងកាន់តែខ្លាំងនៃកិច្ចព្រមព្រៀងឈប់បាញ់រយៈពេល ៣សប្តាហ៍ ។អ៊ីរ៉ង់ត្រៀមនឹងបញ្ចុះសាកសពលោកអតីតមេដឹកនាំ Ayatollah Ali Khamenei នាថ្ងៃព្រហស្បតិ៍នេះ នៅទីសក្ការៈដ៏ពិសិដ្ឋបំផុត ស្ថិតក្នុងទីក្រុង Mashhad នៅភាគឦសានប្រទេសអ៊ីរ៉ង់ បន្ទាប់ពីពិធីបុណ្យទ្រង់ទ្រាយធំ ការដង្ហែរក្បួន និងពិធីកាន់ទុក្ខរយៈពេល ១សប្តាហ៍ ដែលជាប់ជួននឹងការផ្ទុះជម្លោះថ្មីជាមួយសហរដ្ឋអាមេរិក ក្រោយបទឈប់បាញ់រយៈពេលជាច្រើនសប្តាហ៍ ៕

អ៊ុយក្រែនប្រាប់​ថា បាន​វាយប្រហារនាវាដឹកប្រេងរបស់រុស្ស៊ីបន្ថែម​ ខណៈយុទ្ធនាការនៅតំបន់​គ្រីមៀ មាន​ខ្លាំងឡើង​ៗ​

2026/07/10 02:21:39 am        22
Facebook Telegram Linkin
យោធាអ៊ុយក្រែន បានឱ្យ​ដឹង​នៅ​ថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦) នេះ​ថា យានដ្រូន​របស់អ៊ុយក្រែនបានវាយប្រហារនាវាដឹកប្រេងរបស់រុស្ស៊ីចំនួន ១២គ្រឿងបន្ថែមទៀត នៅក្នុងសមុទ្រ Azov កាលពីយប់មិញ (ថ្ងៃពុធ) ជាព្រឹត្តិការណ៍​ចុងក្រោយបង្អស់នៅក្នុងយុទ្ធនាការមួយដែលមានគោលបំណងរំខានដល់ការផ្គត់ផ្គង់ប្រេងឥន្ធនៈដល់កងកម្លាំងរុស្ស៊ី និងធ្វើឱ្យតំបន់​គ្រីមៀកាន់កាប់ដោយទីក្រុងមូស្គូដាច់ទំនាក់​ទំនងពី​គេ​។អគ្គសេនាធិការយោធាអ៊ុយក្រែន បានឱ្យដឹង​នៅលើកម្មវិធី​ផ្ញើសារ​ Telegram ថា នាវាទាំងនោះត្រូវបានប្រើ ដើម្បីផ្គត់ផ្គង់ប្រេងឥន្ធនៈដល់យោធារុស្ស៊ី និងដើម្បីដឹកជញ្ជូនប្រេង និងផលិតផលប្រេងកាត គេចពីទណ្ឌកម្មអន្តរជាតិ​។ ជាមួយគ្នា​នេះ សា្ថប័ន​នេះ​បានបន្ថែមទៀត​ថា នាវាសណ្តោង ១គ្រឿង និងនាវាដឹកទំនិញស្ងួត ១គ្រឿង ក៏ត្រូវបានវាយប្រហារផងដែរ។ក្រសួងការពារជាតិអ៊ុយក្រែន បាន​បញ្ជាក់ថា ការវាយប្រហារទាំងនេះបានធ្វើឱ្យចំនួននាវាដែលត្រូវបានវាយប្រហារនៅក្នុងសមុទ្រ Azov និងសមុទ្រខ្មៅ (Black Sea) ក្នុងរយៈពេល ៤ថ្ងៃកន្លងមកនេះ កើនដល់ ៣៦គ្រឿងហើយ​។ នាវាទាំងនោះរួមមាននាវាដឹកប្រេង «កងនាវាស្រមោល" របស់រុស្ស៊ីចំនួន ៣២គ្រឿង និងនាវាដឹកទំនិញស្ងួត ២គ្រឿង។ ក្រសួងបានបន្ថែម​​ថា៖ «នាវា​ទាំងអស់គ្នាកំពុងព្យាយាមដឹកជញ្ជូនប្រេងឥន្ធនៈទៅកាន់តំបន់​គ្រីមៀ​»។មិនទាន់​មានការអត្ថាធិប្បាយពីទីក្រុងមូស្គូនៅ​ឡើយ​ទេ​។ អ៊ុយក្រែនបានបង្កើនការវាយប្រហារលើហេដ្ឋារចនាសម្ព័ន្ធដឹកជញ្ជូន និងថាមពលនៅតំបន់​គ្រីមៀ ក្នុងរយៈពេលប៉ុន្មានសប្តាហ៍ថ្មីៗនេះ ដែលរួមចំណែកធ្វើ​ឱ្យមាន​​ការខ្វះខាតប្រេងឥន្ធនៈ និងជំរុញឱ្យអាជ្ញាធរប្រកាសអាសន្ន នៅក្នុងឧបទ្វីប ដែលជាមជ្ឈមណ្ឌលដ៏សំខាន់ សម្រាប់កិច្ចប្រឹងប្រែងធ្វើសង្គ្រាមរបស់រុស្ស៊ី៕

បណ្ដាញសង្គម

ព័ត៌មានថ្មីៗ

លោក ហ្សេឡិនស្គី៖ រុស្ស៊ីកំពុងត្រៀមទទួលកងទ័ពកូរ៉េខាងជើង ៣ម៉ឺននាក់ទៀត សម្រាប់សង្គ្រាមនៅអ៊ុយក្រែន
07/27/2026 03:07 PM
Facebook Telegram Linkin
លោក ARGHCHI៖ អ៊ីរ៉ង់ត្រៀមជួយសម្របសម្រួលដោះស្រាយទំនាក់ទំនងរវាងអារ៉ាប៊ីសាអ៊ូឌីត និងក្រុមហ៊ូទី
07/27/2026 03:07 PM
Facebook Telegram Linkin
លោក PUTIN៖ រុស្ស៊ីមិនដែលចង់ប្រឈមមុខដាក់គ្នានៅតំបន់អាកទិកឡើយ
07/27/2026 03:07 PM
Facebook Telegram Linkin
អ្នកការទូតអាមេរិក៖ សហរដ្ឋអាមេរិកមានអាវុធគ្រប់គ្រាន់ ដើម្បីធ្វើសង្គ្រាមជាមួយអ៊ីរ៉ង់
07/27/2026 03:07 PM
Facebook Telegram Linkin
អ្នកការទូតរុស្ស៊ី៖ ការវាយប្រហាររបស់អ៊ុយក្រែនលើរថយន្តសង្គ្រោះ គឺជាឧក្រិដ្ឋកម្មសង្គ្រាម
07/27/2026 03:07 PM
Facebook Telegram Linkin
អ៊ីរ៉ង់ចោទសហរដ្ឋអាមេរិកថា បានវាយប្រហារលើនាវាស្វែងរកនិងជួយសង្គ្រោះរបស់ខ្លួន
07/27/2026 03:07 PM
Facebook Telegram Linkin
ប្រធានាធិបតីគុយបាចោទសហរដ្ឋអាមេរិកថា កំពុងព្យាយាមដណ្តើមគ្រប់គ្រងកោះនេះ
07/27/2026 03:07 PM
Facebook Telegram Linkin
លោក ARAGHCHI ៖ ការវាយប្រហាររបស់អ៊ុយក្រែនលើនាវាអ៊ីរ៉ង់នៅសមុទ្រកាសព្យែន ត្រូវតែមានការឆ្លើយតប
07/27/2026 02:07 PM
Facebook Telegram Linkin
ប្រភពពីក្រុមហ៊ូទីអះអាងថា ក្រុមនេះបានវាយប្រហារលើនាវាដឹកប្រេងអារ៉ាប៊ីសាអ៊ូឌីតចំនួន ៣គ្រឿង
07/27/2026 02:07 PM
Facebook Telegram Linkin
Kazuyoshi Miura កីឡាករបាល់ទាត់អាជីពវ័យចំណាស់បំផុតស៊ុតបញ្ចូលទីជាលើកដំបូងក្នុងរយៈពេលជិត ៤ឆ្នាំ នៅវ័យ ៥៩ឆ្នាំ
07/27/2026 02:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.