នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានាធិបតីគុយបាចោទសហរដ្ឋអាមេរិកថា កំពុងព្យាយាមដណ្តើមគ្រប់គ្រងកោះនេះ
លោក ARAGHCHI ៖ ការវាយប្រហាររបស់អ៊ុយក្រែនលើនាវាអ៊ីរ៉ង់នៅសមុទ្រកាសព្យែន ត្រូវតែមានការឆ្លើយតប
ប្រភពពីក្រុមហ៊ូទីអះអាងថា ក្រុមនេះបានវាយប្រហារលើនាវាដឹកប្រេងអារ៉ាប៊ីសាអ៊ូឌីតចំនួន ៣គ្រឿង
អ៊ីរ៉ង់ ព្រមានអ៊ីស្រាអែលអំពីផលវិបាកធ្ងន់ធ្ងរប្រសិនបើបន្តការប្រយុទ្ធ

ព័ត៌មានអន្តរជាតិ

អាមេរិក-អ៊ីរ៉ង់ កំពុងបន្តវាយប្រហារដាក់គ្នា ខណៈទីក្រុងតេអេរ៉ង់ប្រារព្ធពិធីបញ្ចុះសពលោក Khamenei

2026/07/10 03:08:46 pm        160
Facebook Telegram Linkin
សហរដ្ឋអាមេរិក និងអ៊ីរ៉ង់ កំពុងបើកការវាយប្រហារដាក់គ្នាម្តងទៀត ដែលបានបន្តរហូតដល់ថ្ងៃព្រហស្បតិ៍ ៩ កក្កដា សប្ដាហ៍នេះ ខណៈក្រុមអ្នកសង្កេតការណ៍បានរាយការណ៍ពីការធ្លាក់ចុះយ៉ាងខ្លាំងនៃចំនួននាវាដែលធ្វើដំណើរឆ្លងកាត់ច្រកសមុទ្រ Hormuz។កងកម្លាំងប្រដាប់អាវុធអ៊ីរ៉ង់បានបើកការវាយប្រហារលើហេដ្ឋារចនាសម្ព័ន្ធយោធារបស់សហរដ្ឋអាមេរិកនៅក្នុងរដ្ឋឈូងសមុទ្រកាលពីថ្ងៃព្រហស្បតិ៍ បន្ទាប់ពីការវាយប្រហាររបស់អាមេរិកលើខេត្តនានាតាមបណ្ដោយឆ្នេរសមុទ្រភាគខាងត្បូង និងភាគខាងកើតរបស់អ៊ីរ៉ង់ ដែលធ្វើឲ្យបទឈប់បាញ់រយៈពេលបីសប្តាហ៍កាន់តែរិចរិល។ ក្រោយមក ប្រព័ន្ធផ្សព្វផ្សាយអ៊ីរ៉ង់បានរាយការណ៍ពីការផ្ទុះជាច្រើននៅទូទាំងភាគខាងត្បូងអ៊ីរ៉ង់ រួមទាំងទីក្រុង Bushehr ដែលជាទីតាំងមួយនៃរោងចក្រនុយក្លេអ៊ែររបស់ប្រទេសនេះ ព្រមទាំង ទីក្រុង Konarak ទីក្រុង Choghadak និងទីក្រុង Bandar Abbas។អាមេរិកនិយាយថា ខ្លួនបានវាយប្រហារគោលដៅយោធាចំនួន៩០កន្លែង ដែលមួយចំនួននៅជិតច្រកសមុទ្រ ខណៈអ៊ីរ៉ង់និយាយថា មនុស្ស ១៤នាក់បានស្លាប់ក្នុងរយៈពេលពីរថ្ងៃកន្លងមកនេះ។ ប្រព័ន្ធផ្សព្វផ្សាយរដ្ឋក៏បានរាយការណ៍ផងដែរថា គោលដៅនៅជិតរោងចក្រថាមពលនុយក្លេអ៊ែរ Bushehr ត្រូវបានវាយប្រហារ ដោយដកស្រង់សម្តីអភិបាលរងខេត្ត។ សហរដ្ឋអាមេរិកពុំបានធ្វើអត្ថាធិប្បាយលើការវាយប្រហារចុងក្រោយបំផុតនោះទេ។ប្រព័ន្ធផ្សព្វផ្សាយដែលមានទំនាក់ទំនងជាមួយរដ្ឋ បានរាយការណ៍ថាអ៊ីរ៉ង់បាននិយាយថា ខ្លួនបានកំណត់គោលដៅលើទ្រព្យសម្បត្តិរបស់សហរដ្ឋអាមេរិកនៅក្នុងប្រទេសកូវ៉ែត បារ៉ែន និងកាតា ជាការឆ្លើយតប។ ក្រោយមកនៅថ្ងៃព្រហស្បតិ៍ដដែល ទីក្រុងតេអេរ៉ង់បានបើកការវាយប្រហារបន្ថែមទៀតទៅលើទីតាំងនានានៅក្នុងប្រទេសកូវ៉ែត ហ្ស៊កដានី និងអ៊ីរ៉ាក់ ។ ដោយឡែក ហ្វូងមនុស្សយ៉ាងច្រើនបានប្រមូលផ្តុំគ្នា ខណៈសពរបស់អតីតមេដឹកនាំកំពូលអ៊ីរ៉ង់ លោក Ayatollah Ali Khamenei ត្រូវបានបញ្ចុះបន្ទាប់ពីពិធីបុណ្យសពរយៈពេលប្រាំមួយថ្ងៃ។ហ្វូងមនុស្សបានប្រមូលផ្តុំគ្នានៅតាមដងផ្លូវនៃទីក្រុង Mashhad នៅភាគឦសាននៃប្រទេសអ៊ីរ៉ង់ ដោយគ្រវីទង់ជាតិអ៊ីរ៉ង់ ខណៈមួយចំនួនកាន់ស្លាកសញ្ញាគំរាមសម្លាប់លោកប្រធានាធិបតីអាមេរិក លោក Donald Trump។គួររម្លឹកថា លោក Khamenei ត្រូវបានសម្លាប់នៅថ្ងៃទី២៨ ខែកុម្ភៈ ២០២៦ ក្នុងអំឡុងពេលម៉ោងដំបូងនៃការវាយប្រហាររបស់អាមេរិក និងអ៊ីស្រាអែល លើអ៊ីរ៉ង់៕

ការសិក្សា៖ ស្វាឪ និងមនុស្សលោក បានចែករំលែកការសើចអស់រយៈពេល ១៥លានឆ្នាំមកហើយ

2026/07/10 04:10:31 am        56
Facebook Telegram Linkin
យោងតាមការសិក្សាមួយដែលក្រុមអ្នកស្រាវជ្រាវនិយាយថា អាចផ្តល់ជាគន្លឹះសម្រាប់ប្រភពដើមវិវត្តនៃការនិយាយស្តីថា មនុស្សលោក និងសត្វស្វាឪដទៃទៀត អាចនឹងចែករំលែកការសើចស្រដៀងគ្នានេះ អស់រយៈពេលយ៉ាងហោចណាស់ក៏ ១៥លានឆ្នាំដែរ ។ការសិក្សាដែលចុះផ្សាយដោយកាសែត Communications Biology បានវិភាគលើការថតសំឡេងសើចឯកឯងរបស់ស្វាអូរ៉ង់អ៊ូតង់ ស្វាហ្គោរីឡា ស្វាបូណូបូស ស្វាឪ និងមនុស្ស ។    ក្រុមអ្នកស្រាវជ្រាវរួមមានទាំងក្រុមអ្នកវិទ្យាសាស្រ្តមកពីសាកលវិទ្យាល័យ Warwick បានពិនិត្យមើលស្វីតសើចចំនួន ១៤០ របស់ស្វាអូរ៉ង់អ៊ូតង់ ៤ក្បាល ស្វាហ្គោរីឡា ២ក្បាល ស្វាបូណាបូស ៣ក្បាល ស្វាឪ ៤ក្បាល និងក្មេង ៤នាក់ ដែលមានអាយុចន្លោះពី ៦ខែ ដល់ ៧ឆ្នាំ ។ លោកស្រីវេជ្ជបណ្ឌិត Chiara De Gregorio គឺជាសហការីស្រាវជ្រាវកិត្តិយសផ្នែកចិត្តវិទ្យានៅសាកលវិទ្យា Warwick និយាយប្រាប់ទីភ្នាក់ងារព័ត៌មានរ៉យទ័រថា គំនិតនាំឲ្យមានការពិនិត្យមើលការសើចរបស់ស្វាឪ និងមនុស្ស គឺដើម្បីហេតុផលសំខាន់ៗចំនួន ២ ។ ហេតុផលទី ១ យល់ឲ្យច្រើនបន្តិចពីការសើចរបស់វា ថាតើវាផ្លាស់ប្តូរការវិវត្តដោយរបៀបណា ហើយហេតុផលទី ២ ពួកយើងចង់ប្រើសំណើចជាតំណាងសម្រាប់ការយល់ដឹងកាន់តែច្រើនពីការវិវត្តភាសារបស់មនុស្ស ។ ក្រុមអ្នកស្រាវជ្រាវ ផ្តោតសំខាន់លើពេលវេលានៃការផ្ទុះសំឡេងជាបន្តបន្ទាប់ ជាជាងកម្រិតសំឡេង ឬអាំងតង់ស៊ីតេសំឡេង ។ ពួកគេបានរកឃើញថា ក្រុមទាំង ៥ បានបង្កើតសំណើចជាមួយនឹងចន្លោះពេល ចង្វាក់ស្មើគ្នា ។ ក្រុមអ្នកស្រាវជ្រាវនិយាយថា លំនាំចង្វាក់ជាមូលដ្ឋាននេះ មាននូវនៅក្នុងបុព្វបុរសស្វាឪមានជីវិតចុងក្រោយ រួមទាំងមនុស្សផងដែរ ដែលបានរស់នៅកាលពីរយៈពេលប្រហែល ១៥លានឆ្នាំមុន ៕

កុមារកំព្រាកុងហ្គោតស៊ូកសាងជីវិតឡើងវិញក្រោយឪពុកម្តាយស្លាប់ដោយសារជំងឺអេបូឡា

2026/07/10 03:40:34 am        41
Facebook Telegram Linkin
នៅទីក្រុង Bunia របស់សាធារណរដ្ឋប្រជាធិបតេយ្យកុងហ្គោ យុវតី La Joie Kahindo វ័យ ១៨ឆ្នាំ កំពុងព្យាយាមកសាងជីវិតរបស់នាងឡើងវិញក្រោយបាត់បង់ឪពុកម្តាយដោយសារជំងឺអេបូឡា ។ ទីក្រុង Bunia ស្ថិតក្នុងចំណោមទីក្រុងនៅចំណុចកណ្តាលនៃការរីករាលដាលឆ្លងជំងឺអេបូឡាកាលពីពេលកន្លងទៅដែលត្រូវបានប្រកាសដោយអង្គការសុខភាពពិភពលោក(WHO) កាលពីខែឧសភាឆ្នាំ ២០២៦ ។ យុវតី Kahindo នៅចាំបានយ៉ាងច្បាស់ មុនពេលដែលឪពុកម្តាយរបស់នាងស្លាប់ ។ នាងរំឭកថាស្ថានភាពម្តាយរបស់នាង ពិតជាធ្ងន់ធ្ងរខ្លាំងណាស់ ។ ម្តាយរបស់នាង បានឆ្លងជំងឺពេលដែលគាត់មានផ្ទៃពោះ ។ អ្នកជិតខាងដឹងច្បាស់ពីស្ថានភាពជំងឺរបស់ម្តាយនាងហើយបានទូរស័ព្ទហៅរថយន្តគិលានសង្គោះ និងណែនាំឲ្យឪពុករបស់នាងទៅមន្ទីរពេទ្យផងដែរហើយចាប់តាំងពីពេលនោះមក ឪពុករបស់នាង ក៏ធ្លាក់ខ្លួនឈដូចគ្នា ។ យុវតី Kahindoនិយាយទៀតថា ឪពុកម្តាយរបស់នាងទៅមន្ទីរពេទ្យនៅថ្ងៃចន្ទ ហើយប្រហែលជាវេលាម៉ោង៣រសៀលថ្ងៃអង្គារ ពួកយើងទទួលដំណឹងដ៏អកុសលមួយ គឺទាំង ឪពុក និងទាំងម្តាយរបស់នាងបានស្លាប់បាត់ទៅហើយ ។យោងតាមទិន្នន័យពីរដ្ឋាភិបាលបានឲ្យដឹងថាមនុស្សយ៉ាងហោច ៦០០នាក់ នៅសាធារណរដ្ឋប្រជាធិបតេយ្យកុងហ្គោ ត្រូវបានសម្លាប់ដោយសារជំងឺអេបូឡាខណៈករណីឆ្លងបានបញ្ជាក់ កើនឡើងដល់ ១.៧៥៩នាក់ ។ចំនួនសរុបដែលបានបញ្ចេញកាលពីថ្ងៃពុធនេះត្រូវបានបញ្ជាក់គិតត្រឹមថ្ងៃអង្គារ ខណៈករណីឆ្លងថ្មី ៥១នាក់ និងករណីស្លាប់ថ្មី២០នាក់ ត្រូវបានរកឃើញ ក្នុងរយៈពេល ២៤មោងចុងក្រោយ ៕

លោកអធិការបតី​ Merz៖ សហរដ្ឋអាមេរិកអនុម័តលក់មីស៊ីល Tomahawk ឱ្យអាល្លឺម៉ង់

2026/07/10 03:24:34 am        45
Facebook Telegram Linkin
លោកអធិការបតី Friedrich Merz បាននិយាយនៅ​ថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦) នេះ​ថា សហរដ្ឋអាមេរិកបានអនុម័តលក់មីស៊ីលតម្រង់គោល​ដៅ​រយៈចម្ងាយឆ្ងាយ Tomahawk ឱ្យប្រទេស​អាល្លឺម៉ង់ ទោះបីជាមានភាព​មិន​ច្បាស់លាស់​ នៅ​មុននេះ អំពីការដាក់ពង្រាយដែលបានគ្រោងទុកក៏ដោយ។ក្នុងសេចក្តីថ្លែងការណ៍មួយទៅកាន់រដ្ឋ​សភា លោក Merz បានប្រាប់សមាជិកសភាថា៖ «នៅក្រៅកិច្ចប្រជុំអង្គការ​ណាតូ (NATO) ក្នុង​ទីក្រុងអង់ការ៉ា ប្រទេសទួរគី យើងបានយល់ព្រមជាមួយរដ្ឋាភិបាលអាមេរិកថា យើងនឹង​ទិញ​មីស៊ីល Tomahawk របស់អាមេរិក ហើយ​ដាក់ពង្រាយនៅក្នុងប្រទេសអាល្លឺម៉ង់»។លោកបានបន្ត​ថា ចំណាត់ការ​នេះនឹង «បិទចន្លោះប្រហោង​យុទ្ធសាស្ត្រដ៏សំខាន់ នៅក្នុងការការពាររបស់យើង ហើយ​ក្នុងពេលជាមួយគ្នានេះ យើងនឹងធ្វើការលើការអភិវឌ្ឍប្រព័ន្ធអឺរ៉ុបផ្ទាល់ខ្លួនរបស់យើង និងដាក់ពង្រាយវានៅតំបន់​អឺរ៉ុប»។ យ៉ាង​ណាក្ដី លោក Merz មិនបានបញ្ជាក់​ថា ​ពេលណាដែលលោករំពឹងថា មីស៊ីល Tomahawk នឹងត្រូវបានដឹកជញ្ជូននោះទេ។គួរបញ្ជាក់​ថា មីស៊ីលនេះភាគច្រើនត្រូវបានបាញ់ចេញពីនាវាមុជទឹក និងនាវាចម្បាំង ហើយអាចហោះហើរ​បានចម្ងាយជាង ១.៦០០គីឡូម៉ែត្រ។ប្រភពពីរដ្ឋាភិបាលអាល្លឺម៉ង់ បានឱ្យដឹង​ថា រដ្ឋមន្ត្រីការពារជាតិនៃប្រទេសទាំង២ បានចុះហត្ថលេខាលើលិខិតបង្ហាញ​ចេតនា សម្រាប់កិច្ចព្រមព្រៀងមីស៊ីល Tomahawk កាលពីថ្ងៃអង្គារ បន្ទាប់ពីមាន​ការចរចាពីមុន រវាងលោក Merz និងប្រធានាធិបតីអាមេរិក លោក​ Donald Trump និងមន្ត្រីសន្តិសុខជាន់ខ្ពស់មកពីភាគី​ទាំង២៕

កងឆ្មាំបដិវត្តន៍អ៊ីរ៉ង់ ប្រកាសអះអាងពីការវាយប្រហារមូលដ្ឋានយោធាអាមេរិកនៅគូវ៉ែត

2026/07/10 03:20:19 am        34
Facebook Telegram Linkin
កងកម្លាំងប្រដាប់អាវុធអ៊ីរ៉ង់ បានវាយប្រហារគោលដៅហេដ្ឋារចនាសម្ព័ន្ធយោធាសហរដ្ឋអាមេរិកនៅប្រទេសជិតខាងក្នុងតំបន់ឈូងសមុទ្រនាថ្ងៃព្រសហ្បតិ៍នេះ បន្ទាប់ពីការវាយប្រហាររបស់សហរដ្ឋអាមេរិកលើខេត្តតំបន់ឆ្នេរភាគខាងត្បូង និងខេត្តតំបន់ឆ្នេរភាគខាងកើតរបស់ពួកគេ ធ្វើឲ្យភាពជាប់គាំងកាន់តែខ្លាំងនៃកិច្ចព្រមព្រៀងឈប់បាញ់រយៈពេល ៣សប្តាហ៍ ។នៅក្នុងសារបង្ហោះលើបណ្តាញព័ត៌មានសង្គម Telegram កងឆ្មាំបដិវត្តន៍អ៊ីរ៉ង់និយាយថា ទីតាំងយោធាសហរដ្ឋអាមេរិក ត្រូវបានរងការវាយប្រហារនៅមូលដ្ឋាន Ar-Rifjan ជាទីដែលបន្ទាយ Camp Arifjan ស្ថិតនៅ និងមូលដ្ឋានយោធា Ali Al-Salem ស្ថិតក្នុងប្រទេសគូវ៉ែត ។យោធាសហរដ្ឋអាមេរិក និយាយកាលពីថ្ងៃពុធថា ការវាយប្រហារចុងក្រោយរបស់ខ្លួនលើអ៊ីរ៉ង់ មានគោលបំណង ដើម្បីបើកច្រកសមុទ្រ Hormuz ក្រោយពួកគេនិយាយថា កងកម្លាំងអ៊ីរ៉ង់ បានវាយប្រហារនាវាដឹកប្រេង ៣គ្រឿង នៅតំបន់នោះ ។ការវាយប្រហារនេះដែរ បានកើតមានឡើងរយៈពេលប៉ុន្មានម៉ោងប៉ុណ្ណោះ ក្រោយប្រធានាធិបតីសហរដ្ឋអាមេរិលោក Donald Trump និយាយថា លោកមានជំនឿថា បទឈប់បាញ់បណ្តោះអាសន្នជាមួយអ៊ីរ៉ង់ ត្រូវបានបញ្ចប់ហើយ ។ក្រុមមន្រ្តីអ៊ីរ៉ង់និយាយថា ការវាយប្រហាររបស់សហរដ្ឋអាមេរិក បានសម្លាប់មនុស្ស ១៤នាក់ និងមនុស្ស ៧៨នាក់ផ្សេងទៀត រងរបួសនៅទូទាំងខេត្តចំនួន ៥ អំឡុងថ្ងៃទី ៨ និងថ្ងៃទី ៩ ខែកក្កដានេះ ៕

អ្នកនេសាទ ៣នាក់ស្លាប់ និង ១៥នាក់រងរបួស ដោយសារ​ការវាយប្រហាររបស់អាមេរិក លើ​ផែននេសាទនៅ​អ៊ីរ៉ង់

2026/07/10 03:19:36 am        35
Facebook Telegram Linkin
អ្នកនេសាទយ៉ាង​តិច​ ៣នាក់ ត្រូវបានសម្លាប់ និង ១៥នាក់ផ្សេងទៀតរងរបួស ដោយសារ​ការវាយប្រហាររបស់សហរដ្ឋអាមេរិក លើផែនេសាទពាណិជ្ជកម្មមួយកន្លែង ​នៅ​ទីក្រុងឆ្នេរសមុទ្រ Sirik ក្នុងខេត្ត Hormozgan នៅភាគខាងត្បូងនៃប្រទេសអ៊ីរ៉ង់ នាថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦)។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានពាក់កណ្តាលផ្លូវការ ISNA ដោយដកស្រង់សម្តីអភិបាលរងខេត្ត លោក​ Ehsan Kamrani។មិនមានការអត្ថាធិប្បាយភ្លាមៗនៅ​ឡើយ​ទេ ពីអាជ្ញាធរអាមេរិក ជុំវិញការវាយប្រហារដែលត្រូវបានរាយការណ៍នេះ​។ សហរដ្ឋអាមេរិកបានធ្វើការវាយប្រហារលើអ៊ីរ៉ង់រយៈពេល ២ថ្ងៃជាប់ៗគ្នា បន្ទាប់ពីទីក្រុងតេអេរ៉ង់បានកំណត់គោលដៅលើនាវាធ្វើ​ដំណើរ​ឆ្លងកាត់ច្រកសមុទ្រ Hormuz ដែលជាផ្លូវទឹកយុទ្ធសាស្ត្រសម្រាប់ការផ្គត់ផ្គង់ថាមពលសកល​។កាលពី​ថ្ងៃទី១៧ ខែមិថុនា អ៊ីរ៉ង់ និងសហរដ្ឋអាមេរិកបានឈានដល់អនុស្សរណៈនៃការយោគយល់គ្នា (MOU) សម្របសម្រួលដោយប៉ាគីស្ថាន ដែលមានគោលបំណងបញ្ចប់ជម្លោះយោធារបស់ភាគីទាំង២ និងបើកផ្លូវឱ្យមាន​កិច្ចព្រមព្រៀងសន្តិភាពយូរអង្វែង។តែ​កាលពី​ថ្ងៃពុធ ប្រធានាធិបតីអាមេរិក លោក Donald Trump បាននិយាយថា កិច្ចព្រមព្រៀងនេះ «ចប់ហើយ» ដែលបង្កឱ្យមានការប្រឈមមុខដាក់គ្នាផ្នែកយោធាថ្មី​៕

លីបង់៖ គណៈប្រតិភូអាមេរិកនឹងត្រួតពិនិត្យការដកទ័ពរបស់អ៊ីស្រាអែលចេញពី «តំបន់សាកល្បង»

2026/07/10 03:19:11 am        33
Facebook Telegram Linkin
ដោយសំអាង​ដល់​សម្តីរបស់ឯកអគ្គរដ្ឋទូតអាមេរិក ការិយាល័យ​ប្រធានាធិបតីលីបង់ នៅថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦) នេះ បាន​រាយការណ៍​ឱ្យដឹងថា គណៈប្រតិភូអាមេរិក ត្រូវបានគេរំពឹងថា នឹង​ទៅ​ដល់ប្រទេសលីបង់ក្នុងពេលឆាប់ៗនេះ ដើម្បីត្រួតពិនិត្យការអនុវត្តដំណើរការដកទ័ពរបស់អ៊ីស្រាអែលចេញពី «តំបន់សាកល្បង» នៅភាគខាងត្បូង។ប្រភពការទូតដែលដឹង​ពី​ការចរចានេះ​ បានប្រាប់សារព័ត៌មាន​ AFP កាលពីថ្ងៃពុធថា លីបង់កំពុងទាមទារឱ្យអ៊ីស្រាអែលដកទ័ពចេញពីតំបន់ទាំងនេះ មុនពេលចូលរួមក្នុងការចរចាជុំថ្មីដែលគ្រោងធ្វើឡើងនៅថ្ងៃទី១៥ និងទី​ ១៦ ខែកក្កដា នៅទីក្រុងរ៉ូម ប្រទេស​អ៊ីតាលី។ប្រទេសទាំង២ បានឈានដល់កិច្ចព្រមព្រៀងក្របខ័ណ្ឌមួយកាល​ថ្ងៃទី២៦ ខែមិថុនា ដែលអំពាវនាវឱ្យមានការរំសាយអាវុធរបស់ក្រុម​ហេសបូឡា និងការដកទ័ពរបស់អ៊ីស្រាអែលបន្តិចម្តងៗចេញពីទឹកដីលីបង់ដែលត្រូវបាន​កាន់កាប់ ខណៈពេលដែលកងទ័ពលីបង់ដាក់ពង្រាយចូលទៅក្នុង «តំបន់សាកល្បង»។បើយោងតាមការិយាល័យ​ប្រធានាធិបតីលីបង់ បាន​ឱ្យដឹង​ថា ឯកអគ្គរដ្ឋទូតអាមេរិកប្រចាំប្រទេសលីបង់ លោក Michel Issa បានប្រាប់លោក​ប្រធានាធិបតី Joseph Aoun ថា៖ «គណៈប្រតិភូយោធាអាមេរិក នឹងមកដល់ទីក្រុងបេរូត ក្នុងរយៈពេលប៉ុន្មានថ្ងៃខាងមុខនេះ ដើម្បីកំណត់យន្តការសម្រាប់ការអនុវត្ត​នៅ​ទីតាំង​ជាក់ស្ដែង​»។កិច្ចព្រមព្រៀងនេះ ដែលត្រូវបានបដិសេធដោយក្រុមហេសបូឡា មិនបានកំណត់ពេលវេលា សម្រាប់ការដកទ័ពរបស់អ៊ីស្រាអែលទេ ហើយមន្ត្រីអ៊ីស្រាអែលក៏បានសន្យាផងដែរថា កងកម្លាំងរបស់ពួកគេនឹងនៅតែស្ថិតនៅក្នុង «តំបន់សន្តិសុខ» ដែលមានចម្ងាយ​ជ្រៅ​ ១០គីឡូម៉ែត្រ ដរាបណាក្រុមហេសបូឡានៅតែមានអាវុធ​៕

អ្នកវិភាគ៖ អាជ្ញាប័ណ្ណអាមេរិកឲ្យអ៊ុយក្រែនផលិតមីស៊ីល Patriot គ្រាន់តែជាជំហានដំបូងប៉ុណ្ណោះ

2026/07/10 03:18:36 am        42
Facebook Telegram Linkin
អ្នកវិភាគការពារជាតិ និងសន្តិសុខអាល្លឺម៉ង់លោក Christian Moelling និយាយនៅថ្ងៃព្រហស្បតិ៍នេះថា ការប្រកាសរបស់ប្រធានាធិបតីសហរដ្ឋអាមេរិកលោក Donald Trump ក្នុងការផ្តល់អាជ្ញាប័ណ្ណដល់អ៊ុយក្រែន ដើម្បីផលិតប្រព័ន្ធបាញ់ស្កាត់មីស៊ីល Patriot គ្រាន់តែជាជំហានដំបូងប៉ុណ្ណោះ ពោលគឺកិច្ចចរចាសំខាន់ចាំបាច់ជាច្រើនទៀត រវាងឧស្សាហកម្មសហរដ្ឋអាមេរិក និងឧស្សាហកម្មអ៊ុយក្រែន នៅត្រូវការបន្ថែមទៀត ។គួរឲ្យដឹងថា កាលពីថ្ងៃពុធម្សិលមិញ លោកប្រធានាធិបតី Donald Trump បាននិយាយថា សហរដ្ឋអាមេរិកនឹងផ្តល់អាជ្ញាប័ណ្ណដល់អ៊ុយក្រែន ដើម្បីផលិតប្រព័ន្ធស្ទាក់ចាប់មីស៊ីល Patriot ជាការជំរុញដ៏ធំមួយសម្រាប់ទីក្រុងគីវ ដែលបានស្វែងរកការអនុញ្ញាតជាយូរមកហើយ ក្នុងការផលិតអាវុធការពារខ្លួនប្រភេទនេះ ។លោក Trump ថ្លែងនៅក្នុងកិច្ចប្រជុំជាមួយប្រធានាធិបតីអ៊ុយក្រែនលោក Volodymyr Zelenskyy នៅឯកិច្ចប្រជុំកំពូលអង្គការណាតូ ក្នុងទីក្រុងអង់ការ៉ាថា ពួកយើងនឹងផ្តល់អាជ្ញាប័ណ្ណដល់អ្នក ដើម្បីផលិតប្រព័ន្ធបាញ់ស្កាត់មីស៊ីល Patriots ។លោក Moelling គឺជាប្រធានវិទ្យាស្ថានស្រាវជ្រាវ EDINA និយាយប្រាប់ទីភ្នាក់ងារព័ត៌មានរ៉យទ័រថា អ្វីដែលពួកយើងមានបច្ចុប្បន្ន គ្រាន់តែជាសេចក្តីថ្លែងការណ៍របស់ប្រធានាធិបតីសហរដ្ឋអាមេរិកប៉ុណ្ណោះ ដែលល្បីល្បាញណាស់សម្រាប់សេចក្តីថ្លែងការណ៍របស់លោក ប៉ុន្តែបច្ចុប្បន្ន អ្នកត្រូវការមានកិច្ចចរចារវាងឧស្សាហកម្មសហរដ្ឋអាមេរិក និងឧស្សាហកម្មអ៊ុយក្រែន ជាទីដែលពួកគេត្រូវផលិតប្រព័ន្ធបាញ់ស្កាត់មីស៊ីល Patriot ។លោកបន្តថា គេនៅមិនទាន់ដឹងច្បាស់ភ្លាមៗនោះទេ ថាតើប្រព័ន្ធបាញ់ស្កាត់មីស៊ីលណាមួយ នឹងត្រូវបញ្ជូនឲ្យទីក្រុងគីវ ក្នុងពេលដ៏ខ្លីខាងមុខនេះ ៕

ប្រព័ន្ធផ្សព្វផ្សាយ៖ សមាជិក IRGC ៣នាក់ ត្រូវបានសម្លាប់ អំឡុង​​ការវាយប្រហាររបស់អាមេរិក នៅខេត្ត Khuzestan

2026/07/10 02:57:02 am        37
Facebook Telegram Linkin
ទីភ្នាក់ងារសារព័ត៌មាន IRNA ដែលគ្រប់គ្រងដោយរដ្ឋ បានរាយការណ៍ថា សមាជិក ៣នាក់នៃកងឆ្មាំបដិវត្តន៍ឥស្លាមអ៊ីរ៉ង់ (IRGC) ត្រូវបានសម្លាប់ អំឡុង​ការវាយប្រហារតាមអាកាសរបស់សហរដ្ឋអាមេរិកដែលកំណត់គោលដៅខេត្ត Khuzestan ភាគនិរតីរបស់ប្រទេសអ៊ីរ៉ង់ នៅថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦) នេះ​។ដោយដកស្រង់សេចក្តីថ្លែងការណ៍មួយពីស្ថាប័ន​ទំនាក់ទំនងសាធារណៈ និងព័ត៌មានរបស់ IRGC នៅខេត្ត​ Khuzestan សារព័ត៌មាន IRNA បានឱ្យដឹង​ថា បុគ្គលិកទាំង ៣រូប​ត្រូវបានសម្លាប់ អំឡុង​ការវាយប្រហារដែលកំណត់គោលដៅតំបន់នានានៃខេត្តនេះ នា​ព្រឹកថ្ងៃព្រហស្បតិ៍។សហរដ្ឋអាមេរិកបានធ្វើការវាយប្រហារលើអ៊ីរ៉ង់ ដែល​ជា​ថ្ងៃទី២ ជាប់គ្នា បន្ទាប់ពីទីក្រុងតេអេរ៉ង់បានកំណត់គោលដៅលើ​នាវាឆ្លងកាត់ច្រកសមុទ្រ Hormuz ដែល​ជាផ្លូវទឹកយុទ្ធសាស្ត្រ សម្រាប់ការផ្គត់ផ្គង់ថាមពលសកល។អ៊ីរ៉ង់បានទទូចថា នាវានានា​ត្រូវសម្របសម្រួលជាមួយអាជ្ញាធររបស់ខ្លួន មុនពេលឆ្លងកាត់ច្រកសមុទ្រនេះ ហើយបានបដិសេធការឆ្លងកាត់តាមរយៈផ្លូវណាមួយក្រៅពីផ្លូវដែលខ្លួនបានកំណត់៕

​EU ស្នើវិធានការបង្កកទ្រព្យសម្បត្តិ និងបម្រាម​ធ្វើដំណើរ ដើម្បីប្រយុទ្ធប្រឆាំង​ការរត់ពន្ធជនអន្តោប្រវេសន៍

2026/07/10 02:47:15 am        30
Facebook Telegram Linkin
សហភាពអឺរ៉ុប (EU) នៅ​ថ្ងៃព្រហស្បតិ៍ (ទី​៩ ខែកក្កដា ឆ្នាំ២០២៦) នេះ បានលើក​ឡើង​នូវ​ក្របខ័ណ្ឌទណ្ឌកម្មថ្មីមួយ ដែលផ្តោតលើការរត់ពន្ធជនអន្តោប្រវេសន៍ ការជួញដូរមនុស្ស និងទម្រង់ផ្សេងទៀតនៃក្រុម​ឧក្រិដ្ឋកម្ម ដែលនឹងដាក់ការបង្កកទ្រព្យសម្បត្តិ និងហាមឃាត់ការធ្វើដំណើរលើជនល្មើស។ដោយសំដៅទៅលើការបង្ក្រាបលើអ្នករត់ពន្ធ និង​អ្នក​ជួញដូរ​ជនអន្តោប្រវេសន៍ ប្រធានគណៈកម្មការអឺរ៉ុប លោកស្រី Ursula von der Leyen បានឱ្យដឹង​នៅក្នុងសេចក្តីថ្លែងការណ៍មួយថា៖ «យើងទាំងអស់គ្នាមានគោលដៅរួម។ ដើម្បីធ្វើ​ឱ្យ​ជន​ទាំង​នោះ​មិន​ប្រកប​​អាជីវកម្មបែប​នេះ​។ ហើយ​ដើម្បីជួយសង្គ្រោះជីវិតមនុស្សរាប់ពាន់នាក់ដែលស្រមៃចង់បានជីវិតកាន់តែល្អ​ប្រសើរ។ យើងជាប្រជាជនអឺរ៉ុប ត្រូវតែជាអ្នកសម្រេចថា អ្នកណាត្រូវ​មកកាន់​ទីកន្លែង​របស់យើង​ ហើយ​មក​ក្នុងកាលៈទេសៈណា»។សំណើនេះតម្រូវឱ្យមានការយល់ព្រមជាឯកច្ឆ័ន្ទពីក្រុមប្រឹក្សាអឺរ៉ុប មុនពេលវាអាចត្រូវបាន​អនុវត្ត។ ការប្រកាសនេះកើតឡើងក្នុងពេល​មាន​ការជជែកដេញ​ដោល​យ៉ាង​តាន​តឹង​ ជុំវិញគោលនយោបាយទេសន្តរប្រវេសន៍ នៅ EU។កាលពីខែមុន សភាអឺរ៉ុបបានអនុម័តកំណែច្បាប់ទេសន្តរប្រវេសន៍ ដែលមានគោលបំណងធ្វើឱ្យការនិរទេសងាយស្រួល​ជាងមុន​ និងអនុញ្ញាតឱ្យមានមជ្ឈមណ្ឌលឃុំឃាំងនៅក្រៅដែន​ដី​របស់​តំបន់​៕

បណ្ដាញសង្គម

ព័ត៌មានថ្មីៗ

ប្រធានាធិបតីគុយបាចោទសហរដ្ឋអាមេរិកថា កំពុងព្យាយាមដណ្តើមគ្រប់គ្រងកោះនេះ
07/27/2026 03:07 PM
Facebook Telegram Linkin
លោក ARAGHCHI ៖ ការវាយប្រហាររបស់អ៊ុយក្រែនលើនាវាអ៊ីរ៉ង់នៅសមុទ្រកាសព្យែន ត្រូវតែមានការឆ្លើយតប
07/27/2026 02:07 PM
Facebook Telegram Linkin
ប្រភពពីក្រុមហ៊ូទីអះអាងថា ក្រុមនេះបានវាយប្រហារលើនាវាដឹកប្រេងអារ៉ាប៊ីសាអ៊ូឌីតចំនួន ៣គ្រឿង
07/27/2026 02:07 PM
Facebook Telegram Linkin
Kazuyoshi Miura កីឡាករបាល់ទាត់អាជីពវ័យចំណាស់បំផុតស៊ុតបញ្ចូលទីជាលើកដំបូងក្នុងរយៈពេលជិត ៤ឆ្នាំ នៅវ័យ ៥៩ឆ្នាំ
07/27/2026 02:07 PM
Facebook Telegram Linkin
អ្នកនាំពាក្យក្រសួងការងារ លើកទឹកចិត្តសិស្សវិទ្យាល័យចុះទស្សនកិច្ចសាលា TVET ដើម្បី​ស្វែង​យល់​ពី​សក្តានុ​ពលខ្លួ​នឯង ការបណ្តុះបណ្តាលជំនាញ និងឱកាសការងារនាពេលអនាគត
07/27/2026 02:07 PM
Facebook Telegram Linkin
សម្តេចបវរធិបតី និង លោកជំទាវបណ្ឌិត បានឧបត្ថម្ភគ្រឿងឧបភោគបរិភោគមួយចំនួន ជូនតំបន់ប្រតិបត្តិការសឹករងកំពង់ឆ្នាំង
07/27/2026 02:07 PM
Facebook Telegram Linkin
រដ្ឋាភិបាលបាន​ចាប់ឆ្នោតផ្តល់លេខដីឡូតិ៍ និងផ្ទះនៃកម្មវិធីផ្តល់ដីការពារព្រៃ ដើម្បី​រួមគ្នា​អភិវឌ្ឍ​ដោយ​ចីរភាព
07/27/2026 02:07 PM
Facebook Telegram Linkin
វីរបុរស World Cup របស់កាប់វែរ Vozinha ព្រមព្រៀងផ្ទេរទៅកាន់ក្លិប Colo-Colo របស់ស៊ីលី
07/27/2026 02:07 PM
Facebook Telegram Linkin
សម្ដេចធិបតី៖ កម្ពុជា-ចិន នឹងរៀបចំកិច្ចប្រជុំ នៃ «យុទ្ធសាស្ត្រ ៣+៣» ជាមួយគ្នានៅឆ្នាំក្រោយ
07/27/2026 01:07 PM
Facebook Telegram Linkin
ទេសាភិបាល៖ សេដ្ឋកិច្ចកម្ពុជានឹងអាចចាត់ទុកមានភាពធន់ ដែលសម្រេចបានក្នុងរង្វង់ ៣% ទៅ ៤%
07/27/2026 12:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.