BTV NEWS

រលកកម្ដៅនៅកូរ៉េខាងត្បូង នឹងបន្តមានរហូតដល់ដើមខែសីហា

ប្រមុខ UN ធ្វើដំណើរទៅកាន់អតីតពន្ធនាគាររបស់លោក Assad ស្ថិតនៅទីក្រុង Sednaya ប្រទេសស៊ីរី

អាមេរិកផ្អាកការវាយប្រហារអ៊ីរ៉ង់ ប៉ុន្តែជម្លោះរីករាលដាលដល់សមុទ្រក្រហម និងសមុទ្រកាសព្យែន

ប្រភព៖ កងទ័ពស៊ូដង់ដណ្តើមកាន់កាប់ផ្លូវហាយវេរបស់រដ្ឋធានីបានវិញ ដែលតភ្ជាប់ទៅទីក្រុងប្រយុទ្ធគ្នាខ្លាំង al-Obeid

ព័ត៌មានអន្តរជាតិ

ទូរទស្សន៍រដ្ឋ៖ មានអ្នកស្លាប់ និងរបួស ក្រោយអគ្គិភ័យនៅរោងចក្រស្បែកជើង ក្នុងខេត្ត Fujian របស់ចិន

ទូរទស្សន៍រដ្ឋ CCTV បានរាយការណ៍ថា អគ្គិភ័យ នៅរោងចក្រស្បែកជើងមួយកន្លែង នៅភាគអាគ្នេយ៍នៃប្រទេសចិន បានបណ្តាលឱ្យមានអ្នកស្លាប់ និងរបួស នៅថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦) នេះ ខណៈដែលក្រុមអ្នកពន្លត់អគ្គិភ័យ បានប្រឹងប្រែងពន្លត់អណ្ដាតភ្លើង និងជួយសង្គ្រោះមនុស្សដែលជាប់នៅខាងក្នុង។ទូរទស្សន៍ CCTV បានឱ្យដឹងថា អគ្គិភ័យនេះបានឆាបឆេះឡើងនៅប្រហែលម៉ោងថ្ងៃត្រង់ តាមពេលវេលាក្នុងស្រុក (ត្រូវម៉ោង ៤:០០ ម៉ោងសកល) នាថ្ងៃព្រហស្បតិ៍នេះ នៅទីក្រុង Jinjiang ក្នុងខេត្ត Fujian ដោយមានមនុស្សមួយចំនួនជាប់នៅលើដំបូល។ គេមិនទាន់ដឹងច្បាស់នៅឡើយទេថា តើមានមនុស្សប៉ុន្មាននាក់បានបាត់់បង់ជីវិត ឬរងរបួស។មន្ត្រីពន្លត់អគ្គិភ័យ ក្នុងតំបន់ បានប្រាប់ប្រព័ន្ធផ្សព្វផ្សាយ CCTV ថា កិច្ចប្រឹងប្រែងពន្លត់អគ្គិភ័យ នៅតែមាន ទោះបីជាអណ្តាតភ្លើងភាគច្រើន ត្រូវបានពន្លត់នៅម៉ោងប្រហែល ៥:៤០នាទីល្ងាច ម៉ោងក្នុងស្រុក(ត្រូវនឹងម៉ោង ៩:៤០ ម៉ោងសកល) ក៏ដោយ។ ក្រុមពន្លត់អគ្គិភ័យ និងជួយសង្គ្រោះ បានបញ្ជូនមនុស្ស ១៨៣នាក់ និងរថយន្ត ៣៥គ្រឿង ទៅកាន់កន្លែងកើតហេតុនោះ។វីដេអូដែលចេញផ្សាយដោយទូរទស្សន៍ CCTV បានបង្ហាញថា អណ្តាតភ្លើងអាចត្រូវបានគេមើលឃើញកំពុងឆាបឆេះពេញអគាររោងចក្រកម្ពស់ច្រើនជាន់ ដោយផ្សែងខ្មៅដ៏ក្រាស់ឃ្មឹកកំពុងហុយទ្រលោមឡើងទៅលើអាកាស។ មនុស្សជាច្រើនដែលទំនងជាជាប់នៅក្នុងអគ្គិភ័យនេះ អាចត្រូវបានគេមើលឃើញស្ថិតនៅលើដំបូល ខណៈដែលមានផ្សែងហុយជុំវិញពួកគេ៕

ហ្វីលីពីនបដិសេធការអះអាងសិទ្ធិដោយបញ្ញវន្តចិន លើខេត្តកោះរបស់ខ្លួន នៅជិតតៃវ៉ាន់

នៅថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦) នេះ រដ្ឋមន្ត្រីក្រសួងការពារជាតិហ្វីលីពីន បានបដិសេធថា ជាការលើកឡើង «គ្មានមូលដ្ឋាន» និង «មិនសមហេតុផល» ដោយបញ្ញវន្តចិន ដែលថា ខេត្តកោះភាគខាងជើងបំផុតរបស់ខ្លួន ជាកម្មសិទ្ធិរបស់ទីក្រុងប៉េកាំង ដោយចាត់ទុកអះអាងនេះថា ជារឿងគួរឱ្យបារម្ភ និងស័ក្តិសមឱ្យមានការជំទាស់តវ៉ា។គេហទំព័រសារព័ត៌មានរដ្ឋចិន GDDoday បានរាយការណ៍កាលពីថ្ងៃទី២ ខែកក្កដាថា បញ្ញវន្តមកពីស្ថាប័នសិក្សានានា ក្នុងនោះរួមទាំងសាកលវិទ្យាល័យ Nanjing University ផងដែរ បានលើកឡើងនៅក្នុងសិក្ខាសាលាមួយ នៅថ្ងៃទី៣០ ខែមិថុនាថា ខេត្ត Batanes គឺជាផ្នែកលាតសន្ធឹងដោយធម្មជាតិរបស់កោះតៃវ៉ាន់ ហើយដូច្នេះ ជាកម្មសិទ្ធិរបស់ប្រទេសចិន។ ទីក្រុងប៉េកាំងមិនទាន់បានគាំទ្រជំហរនោះជាផ្លូវការនៅឡើយទេ។ការអះអាងទាំងនេះអាចបន្ថែមវិមាត្រថ្មីមួយដល់ភាពតានតឹងជាយូរមកហើយ រវាងទីក្រុងម៉ានីល និងប៉េកាំង ដែលកំពុងជាប់ពាក់ព័ន្ធនឹងជម្លោះជាច្រើន ទាក់ទងនឹងកោះ និងតំបន់ភូមិសាស្ត្រជាច្រើន នៅក្នុងសមុទ្រចិនខាងត្បូង។រដ្ឋមន្ត្រីក្រសួងការពារជាតិ លោក Gilberto Teodoro បានប្រាប់អ្នកសារព័ត៌មានថា៖ «ខ្ញុំយល់ឃើញថា ជាថ្មីម្ដងទៀត នេះគឺប្រហែលជាសញ្ញានៃចេតនាដែលបានគិតទុកជាមុន។ វាមិនមែនជារឿងមិនអាចទៅរួចនោះទេ ក្នុងការគិតថា នេះជាផ្នែកមួយនៃផែនការរបស់ពួកគេរួចហើយ។ ហើយវាក៏បញ្ជាក់ពីអ្វីដែលយើងបាននិយាយថា ពួកគេមានផែនការគ្រប់គ្រងមហាសមុទ្រប៉ាស៊ីហ្វិកទាំងមូល»។លោកបានបន្ថែមថា៖ «ហើយយើងដឹងថា ការលើកឡើងនេះគឺគ្មានមូលដ្ឋាន។ នេះជារឿងមិនសមហេតុផលឡើយ។ ដូច្នេះ នេះគឺជារឿងគួរឲ្យបារម្ភ ហើយវាជាអ្វីដែលត្រូវតែជំទាស់តវ៉ា»។ស្ថានទូតចិន ប្រចាំទីក្រុងម៉ានីល មិនបានឆ្លើយតបភ្លាមៗឡើយ ចំពោះសំណើរបស់សារព័ត៌មាន Reuters ដើម្បីសុំការអត្ថាធិប្បាយ ជុំវិញការកត់សម្គាល់របស់លោក Teodoro៕

លោក Modi អំពាវនាវឲ្យមានកិច្ចសហប្រតិបត្តិការជាប្រវត្តិសាស្រ្តរវាងឥណ្ឌា និងអូស្រ្តាលី

នាយករដ្ឋមន្រ្តីឥណ្ឌាលោក Narendra Modi និយាយនៅថ្ងៃព្រហស្បតិ៍នេះថា ទំនាក់ទំនងប្រទេសរបស់លោកជាមួយអូស្រ្តាលី តំណាងឲ្យឱកាសជាប្រវតិ្តសាស្រ្ត សម្រាប់ឲ្យប្រទេសទាំង ២ សហប្រតិបត្តិការលើវិស័យថាមពលនុយក្លេអ៊ែរ និងកកើតឡើងវិញ វិ័ស័យរ៉ែសំខាន់ និងអ៊ីដ្រូសែនបៃតង ។លោកថ្លែងបែបនេះ នៅក្នុងព្រឹត្តការណ៍ធុរកិច្ចផែនទីផ្លូវសេដ្ឋកិច្ចអូស្រ្តាលី-ឥណ្ឌា ក្រោយធ្វើដំណើរទៅដល់ទីក្រុង Melbourne កាលពីយប់ថ្ងៃពុធ ។ដំណើរទស្សនកិច្ចនេះ បានកើតមានឡើង ស្របពេលប្រទេសទាំង ២ ព្យាយាមពង្រឹងទំនាក់ទំនងសេដ្ឋកិច្ច ក្នុងនោះឥណ្ឌាចង់បានទុនបម្រុងអ៊ុយរ៉ានីញ៉ូមរបស់អូស្រ្តាលី ដើម្បីជួយសម្រេចគោលដៅសមត្ថភាពថាមពលនុយក្លេអ៊ែរកម្លាំង ១០០ជីហ្គាវ៉ាត់ នៅឆ្នាំ ២០៤៧ ហើយអូស្រ្តាលី សំឡឹងមើលការធ្វើពិពិធកម្មពាណិជ្ជកម្ម លើសពីការពឹងផ្អែកលើចិន ដែលជាដៃគូសំខាន់របស់ខ្លួន ។លោក Modi និយាយថា ពួកយើងមានឱកាសជាប្រវត្តិសាស្រ្ត ដើម្បីសហប្រតិបត្តិការលើវិស័យមួយនេះ ហើយលោកបានជំរុញផងដែរឲ្យសហគមន៍ធុរកិច្ចអូស្រ្តាលី វិនិយោគរយៈពេលវែងលើគម្រោងផ្លូវថ្នល់ កំពង់ផែ ផ្លូវរថភ្លើង និងហេដ្ឋារចនាសម្ព័ន្ធទីក្រុង នៅប្រទេសឥណ្ឌា ។កាសែត Australian Financial Review រាយការណ៍កាលពីថ្ងៃពុធថា កិច្ចព្រមព្រៀងលើការនាំចេញសារធាតុអ៊ុយរ៉ានីញ៉ូម ទៅកាន់ប្រទេសឥណ្ឌា អាចនឹងត្រូវបញ្ចប់ ។ បើទោះបីជាប្រទេសទាំង ២ ឈានដល់កិច្ចព្រមព្រៀងកិច្ចសហប្រតិបត្តិការនុយក្លេអ៊ែរ កាលពីឆ្នាំ ២០១៤ យ៉ាងណាក្តី ការនាំចេញសារធាតុអ៊ុយរ៉ានីញ៉ូម នៅមានដែនកំណត់នៅឡើយ ដោយសារក្តីបារម្ភចំពោះការធានាប្រេងឥន្ធនៈនុយក្លេអ៊ែរ ត្រូវបានប្រើប្រាស់ម្យ៉ាងគត់សម្រាប់គោលបំណងសន្តិភាព ដូចជាការបង្កើតថាមពល ៕

នាយករដ្ឋមន្ត្រីកូរ៉េខាងជើង លោក Pak Thae Song នឹងទៅបំពេញទស្សនកិច្ចនៅចិន

ទីក្រុងប៉េកាំងបានប្រកាសនៅថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦) នេះថា នាយករដ្ឋមន្ត្រីកូរ៉េខាងជើង លោក Pak Thae Song នឹងបំពេញទស្សនកិច្ចនៅប្រទេសចិន នាសប្តាហ៍នេះ។អ្នកនាំពាក្យក្រសួងការបរទេស លោកស្រី Mao Ning បានបញ្ជាក់ឱ្យដឹងថា ដំណើរទស្សនកិច្ចនេះ កើតមានឡើងតាមការអញ្ជើញរបស់គណៈកម្មាធិការមជ្ឈិមបក្សកុម្មុយនីស្តចិន និងរដ្ឋាភិបាលចិន។លោកស្រី Mao បាននិយាយថា លោក Pak នឹងដឹកនាំគណៈប្រតិភូបក្ស និងរដ្ឋាភិបាល ក្នុងដំណើរទស្សនកិច្ចជាផ្លូវការ ចាប់ពីថ្ងៃសុក្រ ដល់ថ្ងៃអាទិត្យ ហើយនិងចូលរួមព្រឹត្តិការណ៍ដែលប្រារព្ធខួបលើកទី៦៥ នៃសន្ធិសញ្ញាមិត្តភាព សហប្រតិបត្តិការ និងជំនួយទៅវិញទៅមក រវាងប្រទេសចិន និងកូរ៉េខាងជើង។ សន្ធិសញ្ញានេះត្រូវបានចុះហត្ថលេខាកាលពីថ្ងៃទី១១ ខែកក្កដា ឆ្នាំ១៩៦១។ដំណើររបស់លោក Pak នេះ បានកើតឡើងប៉ុន្មានសប្តាហ៍ បន្ទាប់ពីប្រធានាធិបតីចិន លោក Xi Jinping បានបំពេញទស្សនកិច្ចផ្លូវរដ្ឋ នៅកូរ៉េខាងជើង កាលពីខែមុន។ចិនគឺជាដៃគូពាណិជ្ជកម្មដ៏សំខាន់របស់កូរ៉េខាងជើង ជាប្រទេសមួយក្នុងចំណោមប្រទេសដែលរងទណ្ឌកម្មច្រើនបំផុត នៅលើពិភពលោក ដោយសារតែកម្មវិធីនុយក្លេអ៊ែររបស់ខ្លួន៕

ការវាយប្រហាររបស់រុស្ស៊ីបានសម្លាប់មនុស្ស ៤នាក់ នៅទូទាំងអ៊ុយក្រែន ខណៈបង្កើនសម្ពាធលើទីក្រុងគីវ

ការវាយប្រហារដោយយានដ្រូននិងមីស៊ីលរបស់រុស្ស៊ីមុនពេលថ្ងៃរះ និងនៅពេលថ្ងៃត្រង់ បានសម្លាប់មនុស្ស ៤នាក់ នៅទូទាំងអ៊ុយក្រែន ខណៈដែលទីក្រុងមូស្គូបានបន្តសម្ពាធរបស់ខ្លួនលើរដ្ឋធានីគីវ ក្នុងដំណាក់កាលចុងក្រោយនៃសង្គ្រាមដែលមានអាយុកាលជាង ៤ឆ្នាំ។យោងតាមលោកប្រធានាធិបតី វ្ល៉ូឌីមី ហ្សេឡិនស្គី ដែលកំពុងស្ថិតនៅប្រទេសទួរគី ដើម្បីជួបជាមួយប្រធានាធិបតីអាមេរិក លោក ដូណាល់ ត្រាំ នៅខាងក្រៅកិច្ចប្រជុំកំពូលណាតូ បានឲ្យដឹងថា អ៊ុយក្រែនបានវាយប្រហាររោងចក្រចម្រាញ់ប្រេងនៅក្នុងតំបន់ Saratov និង Tatarstan របស់រុស្ស៊ី។សំឡេងផ្ទុះជាច្រើន ត្រូវបានឮភ្លាមៗបន្ទាប់ពីពាក់កណ្តាលអធ្រាត្រនៅទីក្រុងគីវ មុនពេលអាជ្ញាធរអាចចេញសេចក្តីជូនដំណឹងអំពីការវាយប្រហារតាមអាកាស ដើម្បីផ្តល់ពេលវេលាឲ្យជនស៊ីវិលស្វែងរកជម្រកសុវត្ថិភាព។ ។យោងតាមប្រធានរដ្ឋបាលទីក្រុង លោក Tymur Tkachenko បានឲ្យដឹងថា ការវាយប្រហាររបស់រុស្ស៊ីនៅព្រឹកព្រលឹម បានសម្លាប់ស្ត្រីម្នាក់ និងរបួសពីរនាក់ទៀត នៅទីក្រុងគីវ ។ សេវាសង្គ្រោះបន្ទាន់រដ្ឋ បាននិយាយថា ការវាយប្រហារនេះ បានបំផ្លាញអគាររដ្ឋបាល និងឃ្លាំងជាច្រើន រួមទាំងអគារយានដ្ឋាន និង រថភ្លើងជាច្រើនខ្សែផងដែរ៕

ប្រព័ន្ធផ្សព្វផ្សាយរដ្ឋ៖ អ៊ីរ៉ង់កោះអញ្ជើញឯកអគ្គរដ្ឋទូតអង់គ្លេសប្រចាំទីក្រុងតេអេរ៉ង់ជុំវិញការចោទប្រកាន់គ្មានមូលដ្ឋាន

ប្រព័ន្ធផ្សព្វផ្សាយរដ្ឋបាននិយាយនៅថ្ងៃព្រហស្បតិ៍នេះថា អ៊ីរ៉ង់បានកោះអញ្ជើញឯកអគ្គរដ្ឋទូតអង់គ្លេសប្រចាំទីក្រុងតេអេរ៉ង់ ដើម្បីតវ៉ាប្រឆាំងនឹងអ្វីដែលខ្លួនហៅថា «ការចោទប្រកាន់គ្មានមូលដ្ឋាន» បន្ទាប់ពីតុលាការទីក្រុងឡុងដ៍មួយបានកាត់ទោសមនុស្សពីរនាក់ពីបទវាយប្រហារដោយកាំបិត ដែលខ្លួននិយាយថា ត្រូវបានអនុវត្តតាមការបញ្ជារបស់អ៊ីរ៉ង់។ទីភ្នាក់ងារសារព័ត៌មានផ្លូវការ IRNA បានចេញផ្សាយនៅថ្ងៃព្រហស្បតិ៍នេះថា៖«បន្ទាប់ពីការចោទប្រកាន់មិនពិត និងគ្មានមូលដ្ឋានដដែលៗដោយមន្ត្រីអង់គ្លេសប្រឆាំងនឹងសាធារណរដ្ឋឥស្លាមអ៊ីរ៉ង់ ឯកអគ្គរដ្ឋទូតរបស់ប្រទេសនេះប្រចាំទីក្រុងតេអេរ៉ង់ ត្រូវបានកោះហៅទៅកាន់ក្រសួង ហើយការតវ៉ារបស់សាធារណរដ្ឋឥស្លាមអ៊ីរ៉ង់ប្រឆាំងនឹងវិធីសាស្រ្តមិនសមរម្យរបស់រដ្ឋាភិបាលអង់គ្លេសចំពោះប្រទេសអ៊ីរ៉ង់ ត្រូវបានបញ្ជូនទៅកាន់លោក»។ជនជាតិរ៉ូម៉ានីពីរនាក់ ដែលត្រូវបានកាត់ទោសពីបទវាយប្រហារដោយកាំបិតក្នុងឆ្នាំ ២០២៤ ទៅលើអ្នកកាសែតអ៊ីរ៉ង់ម្នាក់នៅខាងក្រៅផ្ទះរបស់ខ្លួន នៅទីក្រុងឡុងដ៍ ក្នុងនាមអ៊ីរ៉ង់ ត្រូវបានកាត់ទោសកាលពីសប្តាហ៍មុនឲ្យជាប់ពន្ធនាគារ ១២ ឆ្នាំ និង ៨ឆ្នាំ រៀងៗខ្លួន៕

មនុស្ស ៤នាក់ស្លាប់ ក្នុងហេតុការណ៍បាក់អគារក្នុងទីក្រុងដែលី ខណៈភ្លៀងធ្លាក់បង្កជាបំណាក់ដីនៅឥណ្ឌា

មនុស្សយ៉ាងហោច ៤នាក់ បានស្លាប់ នៅក្នុងហេតុការណ៍បាក់រលំអគារនៅរដ្ឋធានីញូវដែលី ប្រទេសឥណ្ឌា ស្របពេលភ្លៀងមូសុងវស្សាបង្កឲ្យកើតមានបំណាក់ដី និងធ្វើឲ្យអាក់ខានដល់ការធ្វើដំណើរនៅទូទាំងប្រទេសមួយនេះ ។ការិយាល័យអាកាសធាតុឥណ្ឌា បានចេញប្រកាសអាសន្នកម្រិតពណ៌ក្រហមនៅតាមតំបន់ជាច្រើននៅក្នុងរដ្ឋធានីដែលី ហើយនិងរដ្ឋជិតខាង Haryana ដោយពួកគេព្យាករពីភ្លៀងធ្លាក់ខ្លាំងនៅថ្ងៃព្រហស្បតិ៍នេះ ។ដើមឈើត្រូវបានរំលើងគល់ ផ្លូវត្រូវបានបិទ ហើយនិងបង្កើនហានិភ័យ ធ្វើឲ្យឧបទ្ទេវហេតុកើតឡើង ។នៅក្នុងរដ្ឋភាគខាងត្បូង Kerala ចំនួនមនុស្សស្លាប់សរុបដោយសារបំណាក់ដីនៅទីក្រុង Wayanad កើនឡើងដល់ ៥នាក់ ។នៅទីក្រុង Pune ស្ថិតក្នុងរដ្ឋ Maharashtra បរិមាណសំរាមដ៏ច្រើនសន្ធឹកសន្ធាប់ បានបាក់សង្កត់លើស្ថានីយប្រព្រឹត្តកម្មកាកសំណល់រាវ ក្នុងនោះមនុស្ស ៧នាក់ ត្រូវបានគេសង្ស័យថា ជាប់ខ្លួន ។ដោយឡែក នៅរដ្ឋភាគខាងជើង Uttar Pradesh ផ្លូវថ្នល់បន្តរងការជន់លិច ក្នុងនោះអ្នកស្រុកនាំគ្នាដើរលុកទឹកត្រឹមជង្គង់ ៕

ឯកអគ្គរដ្ឋទូតអាមេរិកប្រចាំលីបង់រំពឹងថា អ៊ីស្រាអែលនឹងដកកងទ័ពចេញពីប្រទេសនេះ

ប្រធានាធិបតីលីបង់ លោក Joseph Aoun បានជួបជាមួយឯកអគ្គរដ្ឋទូតសហរដ្ឋអាមេរិកប្រចាំទីក្រុង បេរូត លោក Michel Issa ដើម្បីពិភាក្សាអំពីដំណើរទស្សនកិច្ចផ្លូវការរបស់លោកទៅកាន់សហរដ្ឋអាមេរិក តាមការអញ្ជើញរបស់ប្រធានាធិបតីអាមេរិក លោក ដូណាល់ ត្រាំ រួមទាំងស្ថានភាពបច្ចុប្បន្ន នៅក្នុងប្រទេសលីបង់ និងតំបន់ទាំងមូល។ក្នុងអំឡុងពេលនៃកិច្ចប្រជុំ លោកប្រធានាធិបតី Aoun បានសង្កត់ធ្ងន់លើសារៈសំខាន់នៃការពង្រឹងបទឈប់បាញ់នៅភាគខាងត្បូងប្រទេសលីបង់ និងបង្កើនសម្ពាធលើអ៊ីស្រាអែលឲ្យបញ្ឈប់ប្រតិបត្តិការយោធារបស់ខ្លួន និងអនុវត្តតាមកិច្ចព្រមព្រៀងក្របខណ្ឌដែលបានប្រកាស បន្ទាប់ពីការចរចាលីបង់-អាមេរិក-អ៊ីស្រាអែល ដែលបានធ្វើឡើងនៅទីក្រុងវ៉ាស៊ីនតោន។លោកក៏បានអំពាវនាវឲ្យបញ្ចប់អរិភាពដែលបង្កឡើងដោយកងកម្លាំងអ៊ីស្រាអែលនៅក្នុងទីក្រុង និងភូមិជាច្រើនដែលខ្លួនបានកាន់កាប់។បន្ទាប់ពីកិច្ចប្រជុំ លោកឯកអគ្គរដ្ឋទូត Issa បាននិយាយថា ដំណើរទស្សនកិច្ចរបស់លោកប្រធានាធិបតី Aoun ទៅកាន់ទីក្រុងវ៉ាស៊ីនតោន គឺមានសារៈសំខាន់ជាពិសេសក្រោមកាលៈទេសៈបច្ចុប្បន្ន និងឆ្លុះបញ្ចាំងពីកម្រិតនៃការយកចិត្តទុកដាក់របស់លោកប្រធានាធិបតី ត្រាំ ចំពោះប្រទេសលីបង់ ក៏ដូចជាកិច្ចខិតខំប្រឹងប្រែងរបស់លោកក្នុងការលើកកម្ពស់សន្តិសុខ និងស្ថិរភាពនៅក្នុងប្រទេសនេះ និងកាត់បន្ថយទុក្ខវេទនារបស់ប្រជាជនរបស់ខ្លួន៕

ក្រុមជួយសង្រ្គោះប៉ាគីស្ថាន រកឃើញបំណែកយន្តហោះដឹកទំនិញបាត់ការទាក់ទង និងកំពុងរុករកយានិកបាត់ខ្លួន

ក្រុមអាជ្ញាធរនិយាយថា ក្រុមជួយសង្រ្គោះប៉ាគីស្ថាន បានរកឃើញបំណែកយន្តហោះដឹកទំនិញ Boeing 737 នៅក្នុងសមុទ្រអារ៉ាប់ រយៈពេល ១២ម៉ោង ក្រោយវាបាត់ខ្លួននៅជិតតំបន់ឆ្នេរទីក្រុង Karachi ក្នុងនោះប្រតិបត្តិការរុករកនៅបន្ត សម្រាប់សមាជិកយានិក ៥នាក់ ដែលកំពុងបាត់ខ្លួន ។អាជ្ញាធរអាកាសយានដ្ឋានប៉ាគីស្ថាននិយាយថា បំណែកយន្តហោះដឹកទំនិញរបស់ក្រុមហ៊ុនអាកាសចរណ៍ K2 Airways ត្រូវបានរកឃើញនៅចម្ងាយ ៩៨គ.ម ភាគខាងត្បូងកំពង់ផែ Ormara ហើយកងទ័ពជើងទឹក និងទីភ្នាក់ងារសន្តិសុខសមុទ្រប៉ាគីស្ថាន បានដាក់ពង្រាយនាវា និងយន្តហោះរបស់ពួកគេ ដើម្បីចុះប្រតិបត្តិការរុករកមនុស្សបាត់ខ្លួន ។ពួកគេបាននិយាយនៅក្នុងសេចក្តីថ្លែងការណ៍បង្ហោះលើបណ្តាញព័ត៌មានសង្គម Facebookថា យន្តហោះអាយុកាល ២៧ឆ្នាំ ដែលប្រតិបត្តិការដោយក្រុមហ៊ុន K2 Airways មួយគ្រឿងនេះ រាយការណ៍បញ្ហាប្រព័ន្ធកំណត់ទិសដៅធ្វើដំណើរ កាលពីវេលាម៉ោង ២១និង ១៨នាទីយប់ ម៉ោងក្នុងស្រុកថ្ងៃអង្គារ ខណៈពេលកំពុងហោះហើរឆ្ពោះទៅកាន់ទីក្រុង Karachi ។ពួកគេបន្តថា ការគ្រប់គ្រងចរាចរណ៍ផ្លូវអាកាសក្នុងស្រុក ព្យាយាមនាំផ្លូវយន្តហោះ ប៉ុន្តែ ៣នាទីក្រោយមក ប្រព័ន្ធរ៉ាដាបង្ហាញថា យន្តហោះ បានហោះចុះយ៉ាងឆាប់រហ័ស ហើយការទំនាក់ទំនងក៏បានបាត់បង់ ។យោងតាមសេចក្តីថ្លែងការណ៍ បានឲ្យដឹងថា ជើងហោះហើរមួយនេះស្ថិតនៅចម្ងាយ ២៨៧គ.ម ភាគខាងលិចទីក្រុង Karachi នៅពេលបាត់ការទាក់ទងនោះ ហើយសេវាកម្មតាមដានជើងហោះហើរ Flightradar24 និយាយនៅលើបណ្តាញព័ត៌មានសង្គម Xថា ទិន្នន័យបឋម បង្ហាញពីលទ្ធភាពដែលយន្តហោះធ្លាក់ចូលក្នុងសមុទ្រ ស្ថិតនៅតំបន់ភាគនិរតីទីក្រុង Karachi ។ខណៈពេលនោះដែរ នាយករដ្ឋមន្រ្តីប៉ាគីស្ថានលោក Shehbaz Sharif បានសម្តែងនូវភាពក្រៀមក្រំជាពន់ពេកទៅដល់ក្រុមគ្រួសារអាកាសយានិក ៥នាក់ ដែលរួមមានអ្នកបើកបរយន្តហោះ ២នាក់ វីស្វករ ២នាក់ និងបុគ្គលិកជំនួយការម្នាក់ ៕

រដ្ឋមន្ត្រីក្រសួងការពារជាតិអ៊ីស្រាអែល បដិសេធការកត់សម្គាល់របស់លោក Trump ពីការដកទ័ព នៅលីបង់

រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz នៅថ្ងៃព្រហស្បតិ៍ (ទី៩ ខែកក្កដា ឆ្នាំ២០២៦)នេះ បានបដិសេធការកត់សម្គាល់របស់ប្រធានាធិបតីអាមេរិក លោក Donald Trump ដែលបានលើកឡើងថា អ៊ីស្រាអែលនឹងដកទ័ពចេញពីលីបង់ ក្រោមកិច្ចព្រមព្រៀងក្របខ័ណ្ឌ រវាងទីក្រុង Tel Aviv និងទីក្រុងបេរូត ដោយបញ្ជាក់ថា អ៊ីស្រាអែល «មិនចាំបាច់ត្រូវការការអនុញ្ញាត ដើម្បីបន្តនៅក្នុងប្រទេសលីបង់» នោះទេ។ នេះបើយោងតាមសារព័ត៌មានចុះផ្សាយប្រចាំថ្ងៃរបស់អ៊ីស្រាអែល គឺ Yedioth Ahronoth។លោក Katz បាននិយាយថា៖ «យើងមិនបានសុំការអនុញ្ញាតពីភាគីណាមួយ ដើម្បីចូលទៅក្នុងប្រទេសលីបង់ឡើយ ហើយយើងមិនចាំបាច់ត្រូវការការអនុញ្ញាត ដើម្បីបន្តនៅក្នុងប្រទេសលីបង់នោះទេ»។លោកបានបន្ថែមថា៖ «ដូចដែលខ្ញុំ និងលោកនាយករដ្ឋមន្ត្រី Benjamin Netanyahu បានបញ្ជាក់យ៉ាងច្បាស់លាស់អ៊ីចឹង យើងនឹងបន្តវត្តមាននៅក្នុងតំបន់សន្តិសុខ ក្នុងប្រទេសលីបង់ ហើយធ្វើប្រតិបត្តិការពីតំបន់នោះឱ្យបានយូរតាមដែលចាំបាច់ រហូតដល់ក្រុមហេសបូឡាត្រូវបានរំសាយអាវុធ» ។ការអត្ថាធិប្បាយរបស់លោកបែបនេះ បានកើតឡើងបន្ទាប់ពីលោក Trump ត្រូវបានសួរកាលពីថ្ងៃពុធនៅក្រៅកិច្ចប្រជុំកំពូលរបស់អង្គការណាតូ (NATO) ក្នុងទីក្រុង Ankara ប្រទេសទួរគី អំពីថា តើលោកជឿថាអ៊ីស្រាអែលគួរតែដកទ័ពរបស់ខ្លួនចេញពីភាគខាងត្បូងប្រទេសលីបង់ដែរ ឬយ៉ាងណា។នាពេលនោះ លោក Trump បាននិយាយថា បន្ទាប់ពីបានជជែកជាមួយលោក Netanyahu លោកជឿថា អ៊ីស្រាអែលចង់ដកទ័ពចេញ។ លោកក៏បានលើកឡើងផងដែរថា អ៊ីស្រាអែល និងលីបង់ កំពុងធ្វើការជាមួយគ្នាយ៉ាងល្អ ហើយនិងចុះហត្ថលេខាលើកិច្ចព្រមព្រៀងជាលើកដំបូង៕

បណ្ដាញសង្គម

ព័ត៌មានថ្មីៗ

រលកកម្ដៅនៅកូរ៉េខាងត្បូង នឹងបន្តមានរហូតដល់ដើមខែសីហា

ឧបនាយករដ្ឋមន្រ្ដី ស៊ុន ចាន់ថុល៖ប្រទេសកម្ពុជា និងប្រទេសចំនួន ៣ទៀតទទួលបានអត្រាពន្ធកូតាសូន្យ (TRQ) ពីអាមេរិក

អ៊ុយក្រែន និងរុស្ស៊ីរាយការណ៍ដូចគ្នាពីការស្លាប់របស់ជនស៊ីវិលនៅក្នុងការវាយប្រហាររបស់ពួកគេ

ចិន និងវៀតណាមបន្តរកអ្នកបាត់ខ្លួន ១៥នាក់ ក្រោយនាវាដឹកទំនិញវៀតណាមលិចនៅសមុទ្រចិនខាងត្បូង

នាយករដ្ឋមន្រ្តីអ៊ីរ៉ាក់ជួបសមភាគីលីបង់សម្រាប់កិច្ចប្រជុំទ្វេភាគីនៅទីក្រុងបាកដាដ

ឧបនាយករដ្ឋមន្ត្រី ស៊ុន ចាន់ថុល៖អត្រាពន្ធគយថ្មីដែលអាមេរិកដាក់មកលើកម្ពុជា គឺអត្រា១០% មិនមែនបន្ថែម១០% លើ ១៩% នោះទេ

អ៊ីរ៉ង់និយាយថា សហរដ្ឋអាមេរិកមិនបានចូលរួមក្នុងកិច្ចពិភាក្សាជាមួយអូម៉ង់អំពីច្រកសមុទ្រហ័រមូសទេ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877