BTV NEWS

ជនប៉ាឡេស្ទីនជម្លៀសខ្លួនស្វាគមន៍កងកម្លាំងអន្តរជាតិនៅហ្កាហ្សា និងអំពាវនាវឲ្យកសាងផ្ទះសម្បែងរបស់ពួកគេឡើងវិញ

ពលរដ្ឋវិលត្រឡប់ទៅកាន់តំបន់ភាគខាងត្បូងលីបង់វិញ ក្រោយការដកទ័ពរបស់អ៊ីស្រាអែល

ប្រធានាធិបតីហ្វីលីពីន លោក Marcos ប្រាប់ថា ប្រហែលដល់ពេលត្រូវពិនិត្យថាមពលនុយក្លេអ៊ែរឡើងវិញ

EU បញ្ចូនយន្តហោះ និងអ្នកពន្លត់អគ្គិភ័យទៅជួយទប់ទល់ចំហេះព្រៃ នៅបារាំង និងអេស្ប៉ាញ

ព័ត៌មានអន្តរជាតិ

រដ្ឋមន្ត្រី៖ ស៊ែរប៊ីកំពុងប្រឈមនឹងសម្ពាធ ដោយសារតែការបដិសេធមិនដាក់ទណ្ឌកម្មប្រឆាំងនឹងរុស្ស៊ី

លោក Nenad Popovic រដ្ឋមន្ត្រីដែលមិនមានតួនាទីជាក់លាក់នៅក្នុងរដ្ឋាភិបាលស៊ែរប៊ី បានប្រាប់សារព័ត៌មានTASS នៅខាងក្រៅពិធីតាំងពិព័រណ៍ Innoprom លើកទី ១៦ថា ស៊ែរប៊ីមិនបានដាក់ទណ្ឌកម្មណាមួយប្រឆាំងនឹងរុស្ស៊ីទេ ហើយនឹងមិនដាក់ទណ្ឌកម្មណាមួយប្រឆាំងនឹងប្រទេសនេះឡើយ ហើយកំពុងប្រឈមនឹងសម្ពាធដ៏ធំសម្បើម ហើយថែមទាំងទទួលបានការគំរាមកំហែង ដោយសារតែរឿងនេះ។ លោកបាននិយាយថា៖«ស៊ែរប៊ីមិនបានដាក់ទណ្ឌកម្មប្រឆាំងនឹងរុស្ស៊ីទេ ហើយនឹងមិនដែលធ្វើបែបនេះទេ ទោះបីជាមានសម្ពាធ និងការគំរាមកំហែងដ៏ធំសម្បើមបែបណាដែលជួនកាលប៉ះពាល់ដល់សេដ្ឋកិច្ចរបស់យើងក៏ដោយ»។ «ពីព្រោះមានកម្លាំងដែលកំពុងស្វែងរកការបំបែកទំនាក់ទំនងរបស់យើងជាមួយរុស្ស៊ី។ ប៉ុន្តែស៊ែរប៊ីដឹងថា រុស្ស៊ីគឺជាបងប្អូន និងជាមិត្តរបស់យើង»។ យោងតាមលោក Popovic នេះមិនមែនជាស្ថានភាពសព្វថ្ងៃនេះទេ វាមានរយៈពេលយូរមកហើយ » ហើយជនជាតិស៊ែរប៊ី និងរុស្ស៊ី គឺជាប្រជាជនពីរដែលជិតស្និទ្ធបំផុតនៅក្នុងពិភពលោក ដែលជាមូលហេតុដែលប្រជាជននៅស៊ែរប៊ីដឹងថា ទណ្ឌកម្មទាំងនេះ គឺអយុត្តិធម៌។ លោកបានសង្កត់ធ្ងន់ថា៖«ទណ្ឌកម្ម គឺជាវិធានការអយុត្តិធម៌មួយ។ យើងផ្ទាល់ក៏ជាជនរងគ្រោះនៃទណ្ឌកម្មដែរ ហើយដឹងថា វាមិនផ្តល់ផលល្អដល់នរណាម្នាក់ឡើយ។ នោះហើយជាមូលហេតុដែលប្រទេសស៊ែរប៊ីមិនបានដាក់ទណ្ឌកម្មប្រឆាំងនឹងប្រទេស រុស្ស៊ី ហើយនឹងមិនដាក់ទណ្ឌកម្មណាមួយឡើយ។ នេះគឺជាការសម្រេចចិត្តរបស់ប្រធានាធិបតីរបស់យើង និងរដ្ឋាភិបាលរបស់យើង»៕

ទូរទស្សន៍៖ សហរដ្ឋអាមេរិកដាក់ពង្រាយនាវាចម្បាំង និងនាវាជំនួយប្រហែល ២០គ្រឿង នៅសមុទ្រអារ៉ាប់

ទូរទស្សន៍ Fox News បានចុះផ្សាយដោយដកស្រង់ប្រភពថា នាវាចម្បាំង និងនាវាជំនួយរបស់សហរដ្ឋអាមេរិកប្រហែល ២០ គ្រឿង ត្រូវបានដាក់ពង្រាយទៅកាន់សមុទ្រអារ៉ាប់។ យោងតាមទូរទស្សន៍នេះ ក្រុមនេះរួមមាននាវាវាយប្រហារ USS Abraham Lincoln និង USS George H.W. Bush និងក្រុមការងារពិសេសរបស់កងទ័ពជើងទឹកនិងកងម៉ារីនសហរដ្ឋអាមេរិកមានមូលដ្ឋាននៅសមុទ្រនិងចល័ត(ARG) ដែលមាននាវិក និងទាហានជើងទឹកសរុបប្រហែល ២០.០០០នាក់។សរុបមក នាវាចម្បាំងអាមេរិកចំនួន ២៤ គ្រឿង ក្នុងនោះមាននាវាពិឃាតចំនួន ៤គ្រឿង ដែលបំពាក់ដោយមីស៊ីលតម្រង់គោលដៅ ត្រូវបានដាក់ពង្រាយទៅកាន់តំបន់នេះ៕

ប្រភពការទូត៖ លីបង់នឹងចូលរួមកិច្ចចរចានៅទីក្រុងរ៉ូម បើអ៊ីស្រាអែលដកកងទ័ពចេញពីតំបន់សាកល្បងចំនួនពីរ

ប្រភពការទូតដែលដឹងអំពីកិច្ចចរចា បានប្រាប់សារព័ត៌មាន AFP កាលពីថ្ងៃពុធថា លីបង់ទាមទារឲ្យអ៊ីស្រាអែលដកកងទ័ពចេញពី «តំបន់សាកល្បង» ចំនួនពីរ នៅភាគខាងត្បូង ជាលក្ខខណ្ឌមួយសម្រាប់ចូលរួមក្នុងការចរចាដោយផ្ទាល់ជុំបន្ទាប់ នៅទីក្រុងរ៉ូម នាសប្តាហ៍ក្រោយ។ ភាគីទាំងពីរធ្លាប់បានជួបគ្នាសម្រាប់កិច្ចចរចាចំនួន ៥ជុំ ដែលឧបត្ថម្ភដោយសហរដ្ឋអាមេរិកនៅទីក្រុងវ៉ាស៊ីនតោន ដែលមានគោលបំណងបញ្ចប់សង្គ្រាមរវាងអ៊ីស្រាអែល និងក្រុមសកម្មប្រយុទ្ធហេសបូឡានៅលីបង់ ដែលគាំទ្រដោយអ៊ីរ៉ង់ និងបើកផ្លូវសម្រាប់សន្តិភាព។នាពេលថ្មីៗនេះ ពួកគេបានឈានដល់កិច្ចព្រមព្រៀងក្របខណ្ឌមួយ ដែលអំពាវនាវឲ្យមានការរំសាយអាវុធរបស់ក្រុមហេសបូឡា និងការដកទ័ពរបស់អ៊ីស្រាអែលបន្តិចម្តងៗចេញពីទឹកដីលីបង់ ខណៈពេលដែលកងទ័ពលីបង់ដាក់ពង្រាយចូលទៅក្នុង «តំបន់សាកល្បងទាំងនោះ»។ទោះជាយ៉ាងណាក៏ដោយ កិច្ចព្រមព្រៀងនេះដែលត្រូវបានក្រុមហេសបូឡាបដិសេធ មិនបានកំណត់ពេលវេលាសម្រាប់ការដកទ័ពរបស់អ៊ីស្រាអែលទេ ហើយមន្ត្រីអ៊ីស្រាអែលក៏បានប្តេជ្ញាថា កងកម្លាំងរបស់ពួកគេនឹងបន្តនៅក្នុង «តំបន់សន្តិសុខ» ជម្រៅ១០ គីឡូម៉ែត្រ (៦ម៉ាយ) ដរាបណាក្រុមហេសបូឡានៅតែមានអាវុធ៕

បេសកកជនអារ៉ាប៊ីសាអ៊ូឌីតប្រចាំUN ថ្កោលទោសអំពើហិង្សាផ្លូវភេទក្នុងសង្គ្រាម និងរំលោភបំពាននៅប៉ាឡេស្ទីន

លោក Abdulaziz Alwasil តំណាងអចិន្ត្រៃយ៍របស់ប្រទេសអារ៉ាប៊ីសាអ៊ូឌីតប្រចាំអង្គការសហប្រជាជាតិ បានប្រាប់ក្រុមប្រឹក្សាសន្តិសុខកាលពីថ្ងៃពុធថា អំពើហិង្សាផ្លូវភេទនៅតែបន្តប្រើប្រាស់ក្នុងជម្លោះប្រដាប់អាវុធជាអាវុធនៃការគាបសង្កត់ ការបំភិតបំភ័យ និងការបង្ខំឲ្យផ្លាស់ទីលំនៅ ដោយកំណត់គោលដៅលើជនស៊ីវិល ជាពិសេសស្ត្រី និងកុមារ។ ថ្លែងនៅក្នុងកិច្ចប្រជុំក្រុមប្រឹក្សាកម្រិតខ្ពស់ស្តីពីអំពើហិង្សាផ្លូវភេទទាក់ទងនឹងជម្លោះ និងរបៀបវារៈស្ត្រី សន្តិភាព និងសន្តិសុខ លោក Alwasil បាននិយាយថា ទង្វើបែបនេះ គឺជាការរំលោភយ៉ាងធ្ងន់ធ្ងរលើច្បាប់មនុស្សធម៌ និងសិទ្ធិមនុស្សអន្តរជាតិ។ លោកបានកត់សម្គាល់ថា តាមរយៈសេចក្តីសម្រេចលេខ ១៨២០ ដែលត្រូវបានអនុម័តក្នុងឆ្នាំ ២០០៨ និងសេចក្តីសម្រេចជាបន្តបន្ទាប់ដែលពាក់ព័ន្ធ ក្រុមប្រឹក្សានេះបានបញ្ជាក់ជាថ្មីថា អំពើហិង្សាផ្លូវភេទទាក់ទងនឹងជម្លោះបង្កការគំរាមកំហែងយ៉ាងធ្ងន់ធ្ងរដល់សន្តិភាព និងសន្តិសុខអន្តរជាតិ ជាមូលហេតុដែលជនល្មើសនៃទង្វើទាំងនេះ ត្រូវតែទទួលខុសត្រូវ។ លោក Alwasil បាននិយាយថា៖«ការដោះស្រាយឧក្រិដ្ឋកម្មនេះ គឺជាការទទួលខុសត្រូវរួមគ្នាសម្រាប់សហគមន៍អន្តរជាតិទាំងមូល និងរដ្ឋពាក់ព័ន្ធទាំងអស់» ដោយអំពាវនាវឲ្យមានកិច្ចខិតខំប្រឹងប្រែងសម្របសម្រួល ដើម្បីដោះស្រាយមូលហេតុដើមរបស់វា និងការពារជនស៊ីវិល និងជនរងគ្រោះ៕

លោកPUTIN៖ អ៊ុយក្រែនមិនអាចធ្វើឲ្យរុស្ស៊ីរង្គោះរង្គើតាមរយៈការវាយប្រហារថាមពលបានទេ

លោកប្រធានាធិបតី វ្ល៉ាឌីមៀ ពូទីន បានថ្លែងក្នុងអំឡុងពេលជួបជាមួយមន្ត្រីរដ្ឋាភិបាលកាលពីថ្ងៃពុធថា ការវាយប្រហាររបស់អ៊ុយក្រែនទៅលើហេដ្ឋារចនាសម្ព័ន្ធថាមពលរបស់រុស្ស៊ី នឹងមិនធ្វើឲ្យសេដ្ឋកិច្ចរបស់ប្រទេសនេះរង្គោះរង្គើ ឬបង្កើតការភ័យស្លន់ស្លោជាសាធារណៈឡើយ។ អ៊ុយក្រែនបានបង្កើនការវាយប្រហារចម្ងាយមធ្យម និងចម្ងាយឆ្ងាយទៅលើគោលដៅជ្រៅ នៅក្នុងប្រទេស រុស្ស៊ី ដោយវាយប្រហាររោងចក្រចម្រាញ់ប្រេង បណ្តាញបំពង់បង្ហូរឧស្ម័ន ហេដ្ឋារចនាសម្ព័ន្ធស៊ីវិល និងយានយន្ត រួមទាំងយានយន្តដែលធ្វើដំណើររវាងដីគោករុស្ស៊ី និងគ្រីម៉េ។ ការវាយប្រហារទាំងនេះ បានរំខានដល់ភស្តុភារ ប៉ះពាល់ដល់ការផ្គត់ផ្គង់ប្រេងឥន្ធនៈក្នុងស្រុក និងបណ្តាលឲ្យមានអ្នកស្លាប់ និងរបួសជាច្រើននាក់។ លោក ពូទីន បាននិយាយក្នុងអំឡុងពេលកិច្ចប្រជុំនិម្មិតថា៖«វាច្បាស់ណាស់ថា សត្រូវកំពុងស្វែងរកការបំផ្លាញសេដ្ឋកិច្ចរបស់យើង ប៉ុន្តែលើសពីនេះទៅទៀត គឺបង្កើតបរិយាកាសនៃការថប់បារម្ភនៅក្នុងសង្គម។ យើងយល់ថា គោលដៅនេះ មិនអាចសម្រេចបានទេ»។ លោកបានបន្ថែមថា៖«ប្រព័ន្ធថាមពលរបស់រុស្ស៊ីមានភាពធន់កម្រិតខ្ពស់បំផុតក្នុងពិភពលោក» ដោយជំរុញឲ្យមន្ត្រីធ្វើការយ៉ាងជិតស្និទ្ធជាមួយក្រុមហ៊ុនថាមពល ដើម្បីដោះស្រាយការខ្វះខាតប្រេងឥន្ធនៈក្នុងស្រុកយ៉ាងឆាប់រហ័ស៕

UN ចាប់ផ្តើមអំពាវនាវរកជំនួយជិត ៣០០ លានដុល្លារសម្រាប់ជំនួយសង្គ្រោះគ្រោះរញ្ជួយដីនៅវ៉េណេ ស៊ុយអេឡា

អង្គការសហប្រជាជាតិកាលពីថ្ងៃពុធ បានចាប់ផ្តើមអំពាវនាវជាបន្ទាន់សម្រាប់ជំនួយជិត ៣០០ លានដុល្លារសម្រាប់ប្រតិបត្តិការសង្គ្រោះគ្រោះរញ្ជួយដីនៅប្រទេសវ៉េណេស៊ុយអេឡា បន្ទាប់ពីចំនួនអ្នកស្លាប់ដោយសារគ្រោះមហន្តរាយនេះ បានកើនឡើងដល់ជាង ៣.៦០០នាក់។មានតម្រូវការមនុស្សធម៌យ៉ាងច្រើនបន្ទាប់ពីគ្រោះមហន្តរាយរញ្ជួយដីដ៏អាក្រក់បំផុតមួយនៅអាមេរិកឡាទីន បានធ្វើឲ្យមនុស្សរាប់ពាន់នាក់គ្មានផ្ទះសម្បែង និងរាប់ពាន់នាក់ទៀត នៅតែបាត់ខ្លួន។ នៅក្នុងទីក្រុង La Guaira ដែលរងការខូចខាតយ៉ាងធ្ងន់ធ្ងរ ក្រុមគ្រួសារនៅបន្តជីកកកាយរកសាកសពមនុស្សជាទីស្រឡាញ់ នៅក្នុងគំនរបាក់បែក។លោក Tom Fletcher ប្រធានមនុស្សធម៌អង្គការសហប្រជាជាតិ បានថ្លែងក្នុងអំឡុងពេលកិច្ចប្រជុំស្តីពីគ្រោះមហន្តរាយថា៖«អ្នកបរិច្ចាគកំពុងបង្កើនការផ្តល់មូលនិធិ ហើយខ្ញុំសូមគោរពដល់ពួកគេ ហើយខ្ញុំ សូមអរគុណពួកគេ»។ លោកបាននិយាយថា មន្ត្រីកំពុងអំពាវនាវរកជំនួយចំនួន ២៩៦ លានដុល្លារ ដើម្បីផ្តល់ជំនួយដែលត្រូវការជាបន្ទាន់សម្រាប់មនុស្ស ១,៣ លាននាក់ ក្នុងរយៈពេល ៦ខែ៕

ទីភ្នាក់ងារអាកាសចរណ៍ EU ប្រាប់ប្រតិបត្តិករឲ្យជៀសវាងដែនអាកាសអ៊ីរ៉ង់ អ៊ីរ៉ាក់ និងលីបង់ រហូតដល់ថ្ងៃទី៣១ ខែសីហា

ទីភ្នាក់ងារសុវត្ថិភាពអាកាសចរណ៍សហភាពអឺរ៉ុប (EASA) បាននិយាយកាលពីថ្ងៃពុធថា ក្រុមហ៊ុនអាកាសចរណ៍ មិនគួរធ្វើប្រតិបត្តិការ នៅក្នុងដែនអាកាសអ៊ីរ៉ង់ អ៊ីរ៉ាក់ និងលីបង់ទេ ស្របពេលមានភាពតានតឹងដែលកំពុងបន្ត និងសក្តានុពលសម្រាប់សកម្មភាពយោធាបន្ថែមទៀត ខណៈដែលសហរដ្ឋអាមេរិក និងអ៊ីរ៉ង់បានវាយប្រហារគ្នាថ្មីៗនេះ។ EASA បាននិយាយថា សេចក្តីជូនដំណឹងរបស់ខ្លួនសម្រាប់ដែនអាកាសអ៊ីរ៉ង់ អ៊ីរ៉ាក់ និងលីបង់មានសុពលភាពរហូតដល់ថ្ងៃទី ៣១ ខែសីហា។ទីភ្នាក់ងារនេះបានបញ្ជាក់ថា ខ្លួនបានដកសេចក្តីជូនដំណឹងមុនរបស់ខ្លួន ដែលបានស្នើសុំឲ្យក្រុមហ៊ុនអាកាសចរណ៍ប្រុងប្រយ័ត្ន នៅពេលធ្វើប្រតិបត្តិការនៅក្នុងដែនអាកាសបារ៉ែន កូវ៉ែត អ៊ីស្រាអែល ហ្ស៊កដានី កាតា អូម៉ង់ អេមីរ៉ាតអារ៉ាប់រួម និងអារ៉ាប៊ីសាអ៊ូឌីត។ពុំមិនច្បាស់ថាតើ EASA នឹងចេញសេចក្តីជូនដំណឹងថ្មីសម្រាប់ប្រទេសទាំងនោះឬអត់នោះទេ។សេចក្តីជូនដំណឹងចុងក្រោយរបស់ទីភ្នាក់ងារនេះ បានកើតឡើង បន្ទាប់ពីឆ្មាំបដិវត្តន៍អ៊ីរ៉ង់បាននិយាយថា ពួកគេបានកំណត់គោលដៅទីតាំងយោធាអាមេរិកនៅបារ៉ែន និងកូវ៉ែតកាលពីថ្ងៃពុធ៕

មេដឹកនាំហេសបូឡានិយាយថា ក្រុមនេះនៅតែបន្តប្រយុទ្ធ ខណៈបដិសេធកិច្ចព្រមព្រៀងលីបង់-អ៊ីស្រា អែល

អគ្គលេខាធិការហេសបូឡា លោក Naim Qassem បាននិយាយកាលពីថ្ងៃពុធថា ក្រុមនេះនឹងនៅតែបន្តប្រតិបត្តិការនៅក្នុងសមរភូមិ ដើម្បីទប់ទល់នឹងអ៊ីស្រាអែល ខណៈពេលដែលបដិសេធកិច្ចព្រមព្រៀងក្របខណ្ឌដែលសម្របសម្រួលដោយសហរដ្ឋអាមេរិករវាងលីបង់ និងអ៊ីស្រាអែល។នៅក្នុងការថ្លែងសុន្ទរកថាតាមទូរទស្សន៍នៅលើទូរទស្សន៍ Al-Manar របស់ក្រុមហេសបូឡា លោក Qassem បាននិយាយថា ហេសបូឡាបានរារាំងកិច្ចខិតខំប្រឹងប្រែងដើម្បីលុបបំបាត់អ្វីដែលក្រុមនេះហៅថា «ការតស៊ូ» ហើយនឹងបន្តប្រយុទ្ធរហូតដល់អ៊ីស្រាអែលកងទ័ពចេញពីប្រទេសលីបង់ទាំងស្រុង។ ដោយពណ៌នាអំពីកិច្ចព្រមព្រៀងក្របខណ្ឌនេះថា «ខុសច្បាប់» និង «មិនស្របតាមរដ្ឋធម្មនុញ្ញ» លោក Qassem បាននិយាយថា ការចរចាបានរំលោភលើគោលការណ៍រដ្ឋធម្មនុញ្ញ និងច្បាប់របស់ប្រទេស លីបង់។លោកបាននិយាយថា កិច្ចព្រមព្រៀងនេះ នឹងមិនអនុម័ត ហើយអាជ្ញាធរលីបង់ នឹងមិនអាចអនុវត្តបទប្បញ្ញត្តិណាមួយរបស់វាបានទេ។នៅថ្ងៃទី ២៦ ខែមិថុនា លីបង់ និងអ៊ីស្រាអែល បានចុះហត្ថលេខាលើកិច្ចព្រមព្រៀងក្របខណ្ឌសម្របសម្រួលដោយសហរដ្ឋអាមេរិកនៅទីក្រុងវ៉ាស៊ីនតោន ដែលមានគោលបំណងបញ្ចប់អរិភាពតាមបណ្តោយព្រំដែន៕

ព្យុះទីហ្វុង បាវី (Bavi) បោកបក់ទៅកាន់កោះតៃវ៉ាន់ ខណៈចិនត្រៀមទប់ទល់

ព្យុះទីហ្វុងបាវី (Typhoon Bavi) បានបោកបក់ទៅកាន់ភាគខាងត្បូងកោះតៃវ៉ាន់ ក្នុងមហាសមុទ្រប៉ាស៊ីហ្វិក នៅថ្ងៃព្រហស្បតិ៍នេះ ដោយកម្លាំងព្យុះនេះ បានធូរស្រាលបន្តិចកាលពីយប់ជ្រៅ មកនៅត្រឹម២០០គីឡូម៉ែត្រ ក្នុងមួយម៉ោង ខណៈក្រុមអាជ្ញាធរបានជំរុញប្រជាពលរដ្ឋឲ្យស្តុកទុកការផ្គត់ផ្គង់ និងត្រៀមសម្រាប់អ្វីដែលអាចជាព្យុះទីហ្វុងដ៏មានឥទ្ធិពលបំផុតចាប់តាំងពីឆ្នាំ២០២៤មក។ យោងតាមមជ្ឈមណ្ឌលឧតុនិយមជាតិចិនព្យុះBavi បច្ចុប្បន្នមានចម្ងាយប្រហែល១.០០០ គីឡូម៉ែត្រគិតត្រឹមចំណុចទទឹងឆ្ងាយបំផុតឬប្រហែលមួយចំណែកនៃប្រទេសបារាំង ត្រូវបានព្យាករណ៍ថា រំកិលខ្លួនទៅភាគខាងជើងផុតនៃកោះតៃវ៉ាន់ មុនបោកបក់បដល់ដីគោកក្នុងខេត្ត Fujian ភាគខាងកើតប្រទេសចិននៅល្ងាចថ្ងៃសៅរ៍សប្ដាហ៍នេះ ហើយក៏អាចប៉ះពាល់ហ្វីលីពីនដែរ។ លោក Jason Chang អ្នកព្យាករណ៍អាកាសធាតុកណ្តាលរបស់កោះតៃវ៉ាន់ បានប្រាប់សារព័ត៌មាន Reuters ថា ព្យុះ Bavi ត្រូវគេរំពឹងថានឹងក្លាយជាព្យុះធំបំផុតតាមទំហំដែលបានវាយប្រហារកោះតៃវ៉ាន់ចាប់តាំងពីឆ្នាំ១៩៨៧ ដោយបន្ថែមថាព្យុះដែលមានទំហំបែបនេះ កម្រមានណាស់ក្នុងប៉ុន្មានឆ្នាំថ្មីៗនេះ។ ប្រទេសចិន រួមជាមួយជប៉ុន និងកោះតៃវ៉ាន់ជិតខាង កំពុងប្រឈមនឹងព្រឹត្តិការណ៍អាកាសធាតុបំផ្លិចបំផ្លាញកាន់តែខ្លាំង ដែលក្រុមអ្នកវិទ្យាសាស្ត្រភ្ជាប់ទៅនឹងការប្រែប្រួលអាកាសធាតុ។ ឆ្នាំនេះគឺជាការព្រួយបារម្ភជាពិសេស ព្រោះការលេចចេញនូវបាតុភូត El Nino អាចជំរុញឱ្យសីតុណ្ហភាពកើនឡើង និងជួយជំរុញឱ្យមានព្យុះទីហ្វុងញឹកញាប់ និងខ្លាំងក្លាជាងមុន។ យោងតាម AccuWeather ដែលជាសេវាកម្មព្យាករណ៍អាកាសធាតុពាណិជ្ជកម្ម បានឲ្យដឹងថា ប្រសិនបើព្យុះ Bavi រក្សាអាំងតង់ស៊ីតេនៃការព្យាករណ៍របស់វា វានឹងក្លាយជាព្យុះទីហ្វុងដ៏មានឥទ្ធិពលបំផុត ជាព្យុះសង្ឃរាត្រូវបានគេស្គាល់នៅក្នុងតំបន់អាស៊ី-ប៉ាស៊ីហ្វិក ចាប់តាំងពីព្យុះទីហ្វុង Kong-rey ក្នុងឆ្នាំ ២០២៤ ៕

កុមារ៨នាក់ស្លាប់ក្នុងបំណាក់ដីនៅជំរំជនភៀសខ្លួនរ៉ូហ៊ីងយ៉ា ប្រទេសបង់ក្លាដែស

មន្ត្រីបាននិយាយថា ភ្លៀងមូសុងធ្លាក់ខ្លាំង បានបង្កឱ្យមានបំណាក់ដីនៅសាលារៀនមួយកន្លែងក្នុងជំរំជនភៀសខ្លួនរ៉ូហ៊ីងយ៉ានៅភាគអាគ្នេយ៍ប្រទេសបង់ក្លាដែសកាលពីថ្ងៃពុធ ទី៨ ខែកក្កដា បានបណ្តាលឲ្យកុមារ៨នាក់ស្លាប់ និងរងរបួសប្រាំនាក់ផ្សេងទៀត។ អ្នកស្ម័គ្រចិត្តជួយសង្គ្រោះ លោក Abdul Bashet បាននិយាយនៅពេលស្វែងរកនិងជួយសង្គ្រោះថា «ដីភ្នំបានបាក់ បំផ្លាញជញ្ជាំងដោយគ្របទៅលើគ្រឹះស្ថានអប់រំរបស់ក្មេងស្រី។ ក្រោយមក ក្រុមជួយសង្គ្រោះបានជួយសង្គ្រោះកុមារចំនួន១៣នាក់ពីសាលារៀន ដែលក្នុងនោះ៨នាក់បានស្លាប់ ខណៈអ្នកដែលនៅសល់ត្រូវបានបញ្ជូនទៅមន្ទីរពេទ្យនៅក្នុងជំរំដើម្បីព្យាបាល។ ករណីស្លាប់ បានកើតឡើងបន្ទាប់ពីបំណាក់ដីបង្កឡើងដោយភ្លៀងដាច់ដោយឡែកពីគ្នាកាលពីដើមសប្តាហ៍នេះ បានបណ្តាលឲ្យជនភៀសខ្លួនរ៉ូហ៊ីងយ៉ាចំនួនប្រាំបីនាក់ស្លាប់ជាអ្នកដែលជ្រកកោននៅក្នុងជំរំ។ ជនភៀសខ្លួនរ៉ូហ៊ីងយ៉ាជាង១,២លាននាក់រស់នៅក្នុងជំរំដែលមានមនុស្សច្រើនកកុញនៅតំបន់ Cox's Bazar ជាកន្លែងតាំងលំនៅជនភៀសខ្លួនធំបំផុតរបស់ពិភពលោក បន្ទាប់ពីបានភៀសខ្លួនចេញពីការបង្ក្រាបរបស់យោធាក្នុងឆ្នាំ២០១៧នៅក្នុងសហភាពមីយ៉ាន់ម៉ា។

បណ្ដាញសង្គម

ព័ត៌មានថ្មីៗ

ប្រធានាធិបតីអ៊ុយក្រែន ធ្វើដំណើរទៅដល់អង់គ្លេស សម្រាប់ជំនួបជាមួយលោកនាយករដ្ឋមន្រ្តី Burnham

ទីក្រុងប៉េកាំងជំរុញឱ្យសហរដ្ឋអាមេរិកឈប់គំរាមកំហែងដាក់ទណ្ឌកម្ម លើក្រុមហ៊ុន AI របស់ចិន

កងកម្លាំងអ៊ីស្រាអែល វាយប្រហារទីក្រុងជាច្រើននៅតំបន់វ៉េសប៊ែង ខណៈអំពើហិង្សាកាន់តែអាក្រក់ទៅ

អ្នកស្ម័គ្រចិត្តដំបូងទទួលវ៉ាក់សាំងបង្ការជំងឺអេបូឡា ជាផ្នែកមួយនៃការសាកល្បងរបស់សាកលវិទ្យាល័យ Oxford

សម្តេចរដ្ឋសភាធិបតី ឃួន សុដារី អញ្ជើញបំពេញទស្សនកិច្ចផ្លូវការ និងមិត្តភាពនៅសាធារណរដ្ឋសង្គមនិយមវៀតណាម

នគរបាលទីក្រុងប៊ែរឡាំង បាញ់សម្លាប់ជនសង្ស័យសំខាន់ ក្នុងការវាយប្រហារដ៏សាហាវ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877