នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជាប្រារព្ធពិធីអបអរសាទរទិវាបរិស្ថានជាតិ និងបរិស្ថានពិភពលោក ៥ មិថុនា ឆ្នាំ២០២៦ ក្រោមប្រធានបទ “សំណល់សូន្យ”
មន្ត្រីជាន់ខ្ពស់ក្រសួងអភិវឌ្ឍន៍ ចាត់ទុកការថែទាំផ្លូវជារឿងចាំបាច់ សម្រួលការធ្វើដំណើរ និងការប្រកបមុខរបរផ្សេងៗ
សាខាសមាគមសិស្សនិស្សិតបញ្ញវន្តក្មេងវត្តខណ្ឌព្រែកព្នៅ បានចូលរួមផ្សព្វផ្សាយផែនការអាជីព និងការជ្រើសរើសជំនាញសិក្សា
យុវជន០២នាក់ជាសិស្សរងរបួសធ្ងន់ធ្ងរ ក្រោយគ្រោះថ្នាក់ចរាចរណ៍ រថយន្តបុកពីមុខយ៉ាងពេញទំហឹង

ព័ត៌មានជាតិ

កម្ពុជាប្រារព្ធពិធីអបអរសាទរទិវាបរិស្ថានជាតិ និងបរិស្ថានពិភពលោក ៥ មិថុនា ឆ្នាំ២០២៦ ក្រោមប្រធានបទ “សំណល់សូន្យ”

2026/06/05 09:58:33 pm        45
Facebook Telegram Linkin
ក្រសួងបរិស្ថាន បានរៀបចំប្រារព្ធ “ទិវាបរិស្ថានជាតិ និងបរិស្ថានពិភពលោក” ៥ មិថុនា ឆ្នាំ២០២៦ ក្រោមប្រធានបទ “សំណល់សូន្យ” នារសៀលថ្ងៃទី ៥ ខែមិថុនា ឆ្នាំ២០២៦ នាទីស្តីការក្រសួងបរិស្ថាន ក្រោមអធិបតីភាព ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងមានការចូលរួម ពីថ្នាក់ដឹកនាំ មន្រ្តីរាជការ ក្រសួង ស្ថាប័នពាក់ព័ន្ធ អង្គទូត តំណាងរដ្ឋបាលថ្នាក់ក្រោមជាតិ អង្គការសង្គមស៊ីវិល ដៃគូអភិវឌ្ឍន៍ កងកម្លាំងប្រដាប់អាវុធ យុវជន លោកគ្រូអ្នកគ្រូនិងសិស្សានុសិស្ស ជាច្រើនរូប។ ឯកឧត្តមរដ្ឋមន្រ្តី មានប្រសាសន៍ថា ការគ្រប់គ្រងសំណល់ឱ្យបានសមស្របទៅតាមលក្ខណៈបច្ចេកទេស ការកែច្នៃ និងប្រើប្រាស់ឡើងវិញ សំដៅទទួលបាន «សំណល់សូន្យ (Zero Waste)» គឺជាកិច្ចការចាំបាច់។ ឯកឧត្តមបានថ្លែងបន្ថែមថា សំណល់សូន្យ គឺការធ្វើយ៉ាងណាឱ្យមានបរិមាណសំណល់តិចបំផុត ដោយត្រូវអនុវត្តនូវគោលគំនិតសេដ្ឋកិច្ចចក្រា និងលើកទឹកចិត្តដល់ប្រជាជនអនុវត្តគោលការណ៍ ៤ក ឬ 4R (ការបដិសេធ ការកាត់បន្ថយ ការប្រើប្រាស់ឡើងវិញ និងការកែច្នៃឡើងវិញ) ដើម្បីកាត់បន្ថយបរិមាណសំណល់ឱ្យបានជាអប្បបរមា។ក្នុងឱកាសនេះ ឯកឧត្តមបណ្ឌិត អ៊ាង សុផល្លែត បានស្នើសុំការចូលរួមសាមគ្គីគ្នា បន្តគាំទ្រ ចូលរួមអនុវត្តរួមគ្នាអនុវត្តគោលនយោបាយនិងយុទ្ធសាស្រ្ត របស់រាជរដ្ឋាភិបាលកម្ពុជា ក្នុងនោះមានយុទ្ធសាស្រ្តចក្រាវិស័យបរិស្ថាន ពីគ្រប់ក្រសួង ស្ថាប័នរដ្ឋ សមត្ថកិច្ចគ្រប់ប្រភេទ រដ្ឋបាលថ្នាក់ក្រោមជាតិ អាជ្ញាធរមូលដ្ឋាន វិស័យឯកជន ប្រជាពលរដ្ឋ ជាពិសេសគឺស្រទាប់យុវជន សិស្សានុសិស្ស ដើម្បីឈានទៅ សម្រេចបាននូវសមិទ្ធផល កម្ពុជាមានភាពស្អាត ភាពបៃតង និងធានាបាននូវសុខុមាលភាព សម្រាប់ប្រជាជនគ្រប់ជំនាន់។ទិវាបរិស្ថានជាតិ និងបរិស្ថានពិភពលោក ត្រូវបានប្រារព្ធឡើងជារៀងរាល់ឆ្នាំនៅ ថ្ងៃទី៥ ខែមិថុនា។ នៅកម្ពុជាទិវានេះ បានចាប់ផ្តើមអនុវត្តតាំងពី ឆ្នាំ១៩៩៦ ដើម្បី លើកកម្ពស់ការយល់ដឹងជាសាធារណៈ អំពីបរិស្ថាន ចលនាឱ្យមហាជនគ្រប់ស្រទាប់វណ្ណៈចូលរួម សម្អាតអនាម័យតាមគេហដ្ឋាន តាមផ្លូវជាតិ និងតាមទីសាធារណៈ និងដើម្បីជំរុញ និងលើកទឹកចិត្តឱ្យមានការចូលរួមពីគ្រប់ស្ថាប័នពាក់ព័ន្ធក្នុងការធ្វើសកម្មភាពលើកកម្ពស់កិច្ចគាំពារបរិស្ថាន កិច្ចការពារនិងអភិរក្សធនធានធម្មជាតិ៕

មន្ត្រីជាន់ខ្ពស់ក្រសួងអភិវឌ្ឍន៍ ចាត់ទុកការថែទាំផ្លូវជារឿងចាំបាច់ សម្រួលការធ្វើដំណើរ និងការប្រកបមុខរបរផ្សេងៗ

2026/06/05 09:32:44 pm        23
Facebook Telegram Linkin
ក្រសួងអភិវឌ្ឍន៍ជនបទ ចាត់ទុកការស្ថាបនាផ្លូវ ស្តារ ថែទំា និងការកែលម្អហេដ្ឋរចនាសម្ព័ន្ធតាមជនបទ ជារឿងដ៏ចាំបាច់ ដើម្បីសម្រួល ដល់ការធ្វើដំណើរ និងការប្រកបមុខរបរផ្សេងៗ ដែលនេះជាការចូលរួមលើកកម្ពស់កម្រិតជីវភាពរស់នៅប្រជាពលរដ្ឋឱ្យកាន់តែប្រសើរ ស្របតាមប្រសាសន៍ដ៏ខ្ពង់ខ្ពស់បំផុតរបស់សម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី «មានផ្លូវ មានសង្ឃឹម»។ឯកឧត្តម ឈឹម សៅគី រដ្ឋលេខាធិការប្រចាំការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ លើក ឡើងក្នុងការចុះត្រួតពិនិត្យ និងវាយតម្លៃបញ្ចប់សុពលភាព លើការងារថែទាំខួបផ្លូវដោយក្រាលកៅស៊ូ DBST បន្ថែមពីលើ (Reseal DBST) ចំនួន១កំណាត់ ប្រវែងជាង ៩ គីឡូម៉ែត្រ ទទឹង ៥,៥ ម៉ែត្រ និងគូសគំនូសចរាចរណ៍ទំហំ ១ ៨៥៤ ម៉ែត្រការ៉េ ស្ថិតនៅក្នុង ឃុំពង្រ ឃុំបន្ទាយព្រាល និងឃុំក្រាំងស្គារ ស្រុករលាប្អៀរ ខេត្តកំពង់ឆ្នាំង នៅថ្ងៃទី៥ ខែមិថុនា ឆ្នាំ២០២៦នេះថា ក្រសួងអភិវឌ្ឍន៍ជនបទ ក្នុងនាមជាសេនាធិការផ្ទាល់របស់រាជរដ្ឋាភិបាលកម្ពុជា បាននិងកំពុងជំរុញការងារសាងសង់ ស្ដារឡើងវិញ កែលម្អ ពង្រីក ថែទាំ និងជួស ជុលផ្លូវជនបទក្រាលកៅស៊ូពីរជាន់ ឬបេតុង ដើម្បីបង្កភាពងាយស្រួលក្នុងការធ្វើដំណើររបស់ប្រជាពលរដ្ឋ កាត់បន្ថយពេលវេលា និងការ ចំណាយលើការដឹកជញ្ជូនកសិផល និងទំនិញផ្សេងៗជាដើម។ឯកឧត្តមរដ្ឋលេខាធិការប្រចាំការ បន្តថា ជុំវិញការអភិវឌ្ឍហេដ្ឋារចនាសម្ព័ន្ធជនបទនេះ, ឯកឧត្តម ឆាយ ឫទ្ធិសែន រដ្ឋមន្ត្រីក្រសួង អភិវឌ្ឍន៍ជនបទ បានយកចិត្តទុកដាក់យ៉ាងខ្លាំង ដោយឯកឧត្តមតែងតែអញ្ជើញចុះពិនិត្យមើលជាប្រចាំ លើការងារស្ថាបនា ការស្តារ ការថែទាំ និងការកែលម្អហេដ្ឋារចនាសម្ព័ន្ធ ដើម្បីធ្វើឱ្យប្រសើរឡើង ជាពិសេសការស្ថាបនាផ្លូវជនបទនេះជាដើម ធ្វើយ៉ាងណាឱ្យឆ្លើយតប ទៅនឹងតម្រូវការជូនប្រជាពលរដ្ឋ។ ឯកឧត្តមបានថ្លែងនូវការកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងនាយកដ្ឋាន ផ្លូវលំជនបទ នៅលើការងារថែទាំខួបផ្លូវដោយក្រាលកៅស៊ូ DBST ខាងលើនេះផងដែរ។នៅក្នុងការសំណេះសំណាលជាមួយប្រជាពលរដ្ឋ, ឯកឧត្តមរដ្ឋលេខាធិការប្រចាំការ ក៏បានលើកឡើងពីគុណបំណាច់របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធាន ព្រឹទ្ធសភា និងជាប្រមុខរដ្ឋស្តីទី នៃព្រះរាជាណាចក្រកម្ពុជា, និងបន្តដឹកនាំដោយសម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី, សម្តេចទាំងទ្វេបានខិតខំប្រឹងប្រែងយ៉ាងខ្លាំង នៅលើការងារជំរុញអភិវឌ្ឍន៍ប្រទេស ជាក់ស្តែងប្រជាពលរដ្ឋដែលរស់នៅមូលដ្ឋានខាងលើ នេះ គឺបានបង្ហាញឱ្យឃើញអំពីការរស់នៅប្រកបដោយសុខុដុមរមនានៅក្នុងសង្គម ពោលគឺមានផ្លូវល្អ មិនត្រឹមតែសម្រួលដល់ការធ្វើ ដំណើរប៉ុណ្ណោះទេ គឺបានផ្តល់ភាពងាយស្រួលនៅក្នុងការរកស៊ីទទួលទាននានាផងដែរ៕អត្ថបទ៖ សុន រ៉ាឌី

សាខាសមាគមសិស្សនិស្សិតបញ្ញវន្តក្មេងវត្តខណ្ឌព្រែកព្នៅ បានចូលរួមផ្សព្វផ្សាយផែនការអាជីព និងការជ្រើសរើសជំនាញសិក្សា

2026/06/05 06:50:00 pm        71
Facebook Telegram Linkin
សាខាសមាគមសិស្សនិស្សិតបញ្ញវន្តក្មេងវត្តខណ្ឌព្រែកព្នៅ បានចូលរួមផ្សព្វផ្សាយផែនការអាជីព និងការជ្រើសរើសជំនាញសិក្សា ជូនសិស្សថ្នាក់ទី១២ នៅតាមវិទ្យាល័យចំនួន ៤ ក្នុងខណ្ឌព្រែកព្នៅ ដើម្បីរួមចំណែកដល់ការអនុវត្តយុទ្ធសាស្ត្របញ្ចកោណ-ដំណាក់កាល ទី១ របស់រាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្ស និងលើកកម្ពស់គុណភាពអប់រំនៅកម្ពុជា។លោក ប៊ូ វេងហុក តំណាងសាខាសមាគមសិស្សនិស្សិតបញ្ញវន្តក្មេងវត្តខណ្ឌព្រែកព្នៅ លើកឡើងនៅក្នុង “ការរៀបចំផែនការ អាជីព និងការជ្រើសរើសជំនាញសិក្សា” ជូនសិស្សថ្នាក់ទី១២ នៅវិទ្យាល័យ ជា ស៊ីម ឈូកវ៉ា នៅថ្ងៃទី៥ ខែមិថុនា ឆ្នាំ២០២៦ នេះថា ជុំវិញការងារសង្គមនេះ កន្លងមកនេះសាខាសមាគមបានចូលរួមយ៉ាងសកម្ម រួមជាមួយការចូលរួមអនុវត្តគោលនយោបាយរបស់ រាជរដ្ឋាភិបាល ជាក់ស្តែងការរៀបចំផែនការអាជីព និងការជ្រើសរើសជំនាញសិក្សានេះជាដើម សាខាសមាគមបានកំពុងជួយដល់ សិស្ស និងនិស្សិត ដើម្បីតម្រង់ទិសឱ្យបានយល់ដឹងបន្ថែមអំពីតម្រូវការលើវិស័យការងារ និងជំនាញផ្សេងៗ ដើម្បីឱ្យពួកគាត់អភិវឌ្ឍន៍ ជំនាញត្រូវនិងតម្រូវការទាំងនោះ ទៅតាមចំណង់ចំណូលចិត្ត សមត្ថភាព និងតម្រូវការទីផ្សារការងារនៅពេលអនាគត។លោក សាម៉េន សុខា អនុប្រធានទីភ្នាក់ងារជាតិមុខរបរ និងការងាររ (NEA) នៃក្រសួងការងារ និងបណ្តុះបណ្តាលវិជ្ជាជីវៈ លើកឡើងថា ការរៀបចំផែនការអាជីព និងការជ្រើសរើសជំនាញសិក្សា គឺជាមូលដ្ឋានគ្រឹះសម្រាប់អនាគតរបស់យុវជនកម្ពុជា និងក៏ជា សក្ខីភាពបញ្ជាក់ពីការយកចិត្តទុកដាក់ខ្ពស់ ចំពោះការអភិវឌ្ឍធនធានមនុស្សវ័យក្មេង ក្នុងមូលដ្ឋានខណ្ឌព្រែកព្នៅ ក្រោមកិច្ចសហការ យ៉ាងជិតស្និទ្ធរវាង NEA, សហភាពសហព័ន្ធយុវជនកម្ពុជា (UYFC) និងសាខាសមាគមសិស្សនិស្សិតបញ្ញវន្តក្មេងវត្តខណ្ឌព្រែកព្នៅ។ លោកបន្តថា ការរៀបចំសិក្ខាសាលានេះដែរ ក៏មានគោលបំណងចម្បង ក្នុងការជួយសិស្សានុសិស្សបានយល់ច្បាស់ ពីតម្រូវ ការទីផ្សារ ការងារ, ការវាយតម្លៃសមត្ថភាពខ្លួនឯង, ការកំណត់គោលដៅជីវិត, និងការត្រៀមខ្លួនសម្រាប់អនាគតការងារ ក្នុងបរិបទសេដ្ឋកិច្ច ដែលកំពុងផ្លាស់ប្តូរយ៉ាងឆាប់រហ័ស ភាពជោគជ័យមិនមែនមានតែមួយផ្លូវនោះទេ មិនថាការសិក្សានៅសាកលវិទ្យាល័យ, ការបណ្ដុះ បណ្ដាលបច្ចេកទេស និងវិជ្ជាជីវៈ ឬការបង្កើតអាជីវកម្មផ្ទាល់ខ្លួន សុទ្ធតែជាមាគ៌ាទៅរកភាពជោគជ័យ។លោកបណ្ឌិត ហាន បូរិន ប្រធានសាខាសមាគមសិស្សនិស្សិតបញ្ញវន្តក្មេងវត្តខណ្ឌព្រែកព្នៅ លើកឡើងថា សមាគមបាននិង កំពុងចូលរួមអនុវត្តយុទ្ធសាស្ត្របញ្ចកោណ-ដំណាក់កាលទី១របស់រាជរដ្ឋាភិបាលកម្ពុជា ក្នុងការអភិវឌ្ឍធនធានមនុស្សនិងលើកកម្ពស់ គុណភាពអប់រំ ជាក់ស្តែងសិក្ខាសាលាខាងលើដែលបានរៀបចំឡើងជូនសិស្សថ្នាក់ទី១២ នៅតាមវិទ្យាល័យចំនួន៤ នៅក្នុងព្រែកព្នៅ ដោយសិក្ខាសាលានេះពិតជាបានឆ្លុះបញ្ចាំងពីការយកចិត្តទុកដាក់របស់រាជរដ្ឋាភិបាលកម្ពុជា ក្នុងការតម្រង់ទិសយុវជនឱ្យមានចក្ខុ វិស័យច្បាស់លាស់លើការសិក្សា និងអាជីពស្របតាមតម្រូវការទីផ្សារការងារ និងការអភិវឌ្ឍប្រទេសជាតិ។ កម្មវិធីនេះក៏ជាការអនុវត្ត ជាក់ស្តែងនូវគោលនយោបាយអភិវឌ្ឍធនធានមនុស្ស ក្រោមការដឹកនាំប្រកបដោយចក្ខុវិស័យវែងឆ្ងាយ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានផ្តោតសំខាន់លើការកសាងសមត្ថភាពយុវជន ឱ្យក្លាយជាកម្លាំងចលករនៃការអភិវឌ្ឍជាតិ។លោកបណ្ឌិត ក៏បានផ្តាំផ្ញើដល់យុវជនដែលគ្រប់អាយុបំពេញកាតព្វកិច្ចយោធា សូមចូលរួមបំពេញកាតព្វកិច្ចស្របតាមច្បាប់ និងគោលនយោបាយរបស់រាជរដ្ឋាភិបាល ដើម្បីរួមចំណែកការពារបូរណភាពទឹកដី សន្តិសុខ និងសន្តិភាពជាតិ។ ទន្ទឹមនឹងនេះ លោក ក៏បានអំពាវនាវដល់សិស្សានុសិស្ស និងយុវជនទាំងអស់ ឱ្យចូលរួមទប់ស្កាត់ និងរាយការណ៍ជូនសមត្ថកិច្ច នូវរាល់សកម្មភាពបទល្មើស អនឡាញ ជាពិសេសអំពើឆបោកតាមប្រព័ន្ធបច្ចេកវិទ្យា (Online Scam) ដើម្បីរួមគ្នាបង្កើតសង្គមឌីជីថលប្រកបដោយសុវត្ថិភាព៕អត្ថបទ៖ សុន រ៉ាឌី

យុវជន០២នាក់ជាសិស្សរងរបួសធ្ងន់ធ្ងរ ក្រោយគ្រោះថ្នាក់ចរាចរណ៍ រថយន្តបុកពីមុខយ៉ាងពេញទំហឹង

2026/06/05 06:45:47 pm        489
Facebook Telegram Linkin
ភ្នំពេញ៖ យុវជនប្រុសស្រី០២នាក់ជាសិស្សរងរបួសធ្ងន់ធ្ងរ ក្រោយគ្រោះថ្នាក់ចរាចរណ៍ រថយន្តបើកបរបុកពីមុខយ៉ាងពេញទំហឹង ក្រោយកើតហេតុម្ចាស់រថយន្តត្រូវបាននគរបាលឃាត់ខ្លួនបណ្ដោះអាសន្នរងចាំដោះស្រាយតាមក្រោយ។ហេតុការណ៍គ្រោះថ្នាក់ចរាចរណ៍នេះបានកើតឡើង កាលពីវេលាម៉ោង០៧និង៤៥នាទី ព្រឹកថ្ងៃទី០៥ ខែមិថុនា ឆ្នាំ២០២៦ នៅចំណុចវិថីអភិវឌ្ឍន៍ កែង វិថីភូមិដើមគ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។តាមប្រភពព័ត៌មានបានឲ្យដឹងថា នៅមុនពេលកើតហេតុ មានបុរសម្នាក់ បានបើករថយន្តម៉ាកBMW ពណ៌ខ្មៅ ពាក់ផ្លាកលេខ 2BQ-8882 បើកតាមវិថី អភិវឌ្ឍន៍ ពីជើងមកត្បូង និងមានយុវជនប្រុសស្រី០២នាក់ បានជិះម៉ូតូមួយគ្រឿង ម៉ាកScoopy ពណ៌ស ពាក់ស្លាកលេខ កំពង់ធំ1R-1032 បើកម៉ូតូឌុបគ្នា តាមវិថីអភិវឌ្ឍន៍ ពីត្បូង មកជើង លុះមកដល់ចំណុចកើតហេតុ រថយន្តបានរ៉េចង្កូតបុកបុកគ្នាម៉ូតូយ៉ាងពេញទំហឹង បណ្ដាលឲ្យយុវជនប្រុសស្រី ជិះម៉ូតូរងរបួសធ្ងន់ធ្ងរ ដោយបាក់ជើង បែកក្បាល។តាមនគរបាលបានបញ្ជាក់ថា ម្ចាស់រថយន្តឈ្មោះ ជឹម ធនវិរះសក្តា ភេទប្រុស អាយុ១៩ឆ្នាំ មុខរបរសិស្ស ស្នាក់នៅ ផ្ទះលេខ៥៤ ផ្លូវភូមិ ក្បាលដំរី២ សង្កាត់កាកាប២ ខណ្ឌពោធិសែនជ័យ រាជធានីភ្នំពេញ (ពុំមានរបួស) ខូចរថយន្តផ្នែកខាងមុខ។ ចំណែកភាគីម៉ូតូ បើកដោយ ឈ្មោះ អុី លីអិន ភេទ ប្រុស អាយុ១៥ឆ្នាំ មុខរបរ សិស្ស ស្នាក់នៅ ផ្ទះសង់ថ្មី វិថីអភិវឌ្ឍន៍ ក្រុម៧ ភូមិដើមគ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ(របួសបាក់ជើងស្តាំ និងក្បាល) អ្នកជិះពីក្រោយ ឈ្មោះ ម៉ក់ គន្ធាមុន្នីរ័ត្ន ភេទស្រី អាយុ១២ឆ្នាំ មុខរបរ សិស្ស ត្រូវជាប្អូន (បាក់ជើងស្តាំ)។ក្រោយពេលកើតហេតុ ជនរងគ្រោះទាំង០២នាក់ បានបញ្ជូនទៅសង្គ្រោះនៅមន្ទីរពេទ្យគន្ធបុប្ផា ។ ចំណែកម្ចាស់រថយន្តត្រូវបាននគរបាលចរាចរណ៍នៃអធិការដ្ឋាននគរបាលខណ្ឌជ្រោយចង្វាត បញ្ជូនទៅករិយាល័យចរាចរណ៍ផ្លូវគោករាជធានីភ្នំពេញ ដើម្បីបន្តនិតិវិធី៕អត្ថបទ៖ កុម្ភៈ

ផ្លូវបេតុងអាមេ ១ខ្សែ ប្រវែង ១០០០ម៉ែត្រ នៅក្រុងតាខ្មៅ ត្រូវបានបើកការដ្ឋានសាងសង់

2026/06/05 06:20:09 pm        92
Facebook Telegram Linkin
ផ្លូវបេតុងអាមេ ១ខ្សែ ប្រវែង ១០០០ម៉ែត្រ ទទឹង ១០ម៉ែត្រកម្រាស់ ០.២ម៉ែត្រ រួចនឹងបន្តអ៊ុតកៅស៊ូAC កម្រាស់ ០.០៥ម៉ែត្រពីលើទៀត ស្ថិតនៅក្នុងភូមិលេខ២ សង្កាត់ស្វាយរលំ ក្រុងតាខ្មៅ ត្រូវបានបើកការដ្ឋានសាងសង់ នៅព្រឹកថ្ងៃទី៥ ខែមិថុនា ឆ្នាំ២០២៦នេះ ក្រោមអធិបតី លោកជំទាវ អ៊ុក ម៉ាលី សមាជិកគណៈកម្មការទី២ ព្រឹទ្ធសភា ឯកឧត្ដម នូ សាខន ប្រធានក្រុមប្រឹក្សាខេត្តកណ្ដាល និងឯកឧត្ដម គួច ចំរើន អភិបាល នៃគណ:អភិបាលខេត្តកណ្ដាល មន្ទីរជុំវិញខេត្ត និងបងប្អូនប្រជាពលរដ្ឋជាច្រើនរូបទៀត។មានប្រសាសន៍ក្នុងពិធីបើកការដ្ឋានសាងសង់ ផ្លូវបេតុងអាមេ ១ខ្សែ នេះផងដែរ ឯកឧត្តម គួច ចំរើន អភិបាលខេត្តកណ្ដាល បានសម្តែងនូវកាត្រេកអរ សប្បាយរីករាយ ជាមួយបងប្អូនប្រជាពលរដ្ឋ ក្នុងសង្កាត់ស្វាយរលំ ក្រុងតាខ្មៅ ដែលទទួលបានសមិទ្ធផលថ្មីមួយបន្ថែមទៀត។ ឯកឧត្តមអភិបាលខេត្ត បានមានប្រសាសន៍ថា ផ្លូវមួយខ្សែនេះគឺពិតជាមានសារៈសំខាន់ណាស់ សម្រាប់ជួយជំរុញឱ្យមានការអភិវឌ្ឍឈានឡើង និងផ្តល់សារៈសំខាន់សម្រាប់បម្រើឱ្យផលប្រយោជន៍ ជីវភាពប្រចាំថ្ងៃរបស់ប្រជាពលរដ្ឋ ក្នុងការធ្វើដំណើរចេញចូល ឆ្លងកាត់ បានយ៉ាងងាយស្រួល និងមានសុវត្ថិភាព។ ឯកឧត្តមអភិបាលខេត្ត បានបន្ថែមថា៖ ផ្លូវមួយខ្សែនេះគឺពិតជាមានសារៈសំខាន់ខ្លាំងណាស់ សម្រាប់ប្រជាពលរដ្ឋរស់នៅក្នុងតំបន់ផ្ទាល់ និងជុំវិញតំបន់នេះផងដែរ នៅពេលផ្លូវនេះបានស្ថាបនារួចរាល់ជាស្ថាពរ នឹងធ្វើឱ្យសេដ្ឋកិច្ចក្នុងតំបន់នេះ កាន់តែរីកចម្រើនបានមួយកម្រិតថែមទៀត ទាក់ទាញអ្នកវិនិយោគ បង្កភាពងាយស្រួលដល់បងប្អូនប្រជាពលរដ្ឋក្នុងការប្រកបអាជីវកម្មផ្សេងៗ បង្កើតឱ្យមានសុខដុមរូបនីយកម្មកាន់តែល្អប្រសើរឡើងថែមទៀត។ ឯកឧត្តមអភិបាល ក៏បានជំរុញដល់អាជ្ញាធរក្រុងតាខ្មៅ មន្ទីរពាក់ព័ន្ធ ត្រូវចុះមកត្រួតពិនិត្យបន្ថែមទៀតដើម្បីសិក្សាអំពីគម្រោងធ្វើផ្លូវក្នុងតំបន់នេះ ឱ្យកាន់តែច្រើនខ្វាត់ខ្វែងថែមទៀត ពីព្រោះផ្លូវកាន់តែច្រើនគឺកាន់តែល្អ ដើម្បីជួយជំរុញដល់សេដ្ឋកិច្ចផង ជួយកាត់បន្ថយពេលវេលាដល់ការធ្វើដំណើររបស់ប្រជាពលរដ្ឋបានកាន់តែល្អប្រសើរឡើង បញ្ជៀសការកកស្ទះ ជាពិសេសជួយសម្រួលក្នុងករណីមានគ្រោះអាសន្នផ្សេងៗ ដូចជាគ្រោះអគ្គីភ័យជាដើម។ នាឱកាសនោះដែរ ឯកឧត្តមអភិបាលខេត្ត បានអំពាវនាវដល់បងប្អូនប្រជាពលរដ្ឋទាំងអស់ សូមមានការប្រុងប្រយ័ត្នខ្ពស់ ចំពោះករណី scam online ជាពិសេសបងប្អូនប្រជាពលរដ្ឋដែលមានផ្ទះជួលអគារជួលផ្សេងៗ មុនពេលដាក់ជួលសូមពិនិត្យឯកសារបានត្រឹមត្រូវត្រូវរាយការណ៍ទៅកាន់សមត្ថកិច្ចឱ្យបានដឹងឮ ចៀសវាងជាប់ពាក់ព័ន្ធជាមួយនឹងបទល្មើស scam online ដោយមិនដឹងខ្លួន មួយវិញទៀតសូមឧស្សាទៅត្រួតពិនិត្យអំពីស្ថានភាពកន្លែងដែលជួល ករណីសង្ស័យត្រូវរាយការណ៍មកកាន់សមត្ថកិច្ចឱ្យបានទាន់ពេលវេលា។

អ្នកវិនិយោគចិន គ្រោងពង្រីកសាខាក្រុមហ៊ុន និងបណ្តុះបណ្តាលវិស្វករជំនាញ ក្នុងភូមិសាស្ត្រខេត្តកំពង់ស្ពឺ

2026/06/05 05:23:19 pm        113
Facebook Telegram Linkin
កំពង់ស្ពឺ៖ លោក វ៉ាង ហាយ ឆិន (WANG HAI CHEN) សមាជិកនៃក្រុមដឹកនាំបក្ស និងជាអនុប្រធានគណៈកម្មាការអភិវឌ្ឍន៍កែទម្រង់ក្រុងប៉េកាំង និងជាអភិបាលក្រុមមីឃុន បានឲ្យដឹងថា អ្នកវិនិយោគរបស់ចិន គ្រោងបោះទុនជាច្រើនលានដុល្លាបន្ថែមទៀត ដើម្បីពង្រីកសាខាក្រុមហ៊ុនសាងសង់មួយនៅក្នុងខេត្តកំពង់ស្ពឺ ខណៈសាខាមួយត្រូវបាន និងកំពុងដំណើរការដោយជោគជ័យនៅប្រទេសម៉ាឡេស៊ី ។នៅក្នុងជំនួបជាមួយឯកឧត្តមបណ្ឌិត ជាម ចន្ទ័សោភ័ណ អភិបាលខេត្តកំពង់ស្ពឺ នៅថ្ងៃទី៥ ខែមិថុនា ឆ្នាំ២០២៦ លោក វ៉ាង ហាយឆិន បានលើកឡើងថា ក្រុមហ៊ុនប៉េកាំងប្រូដាកសិន ជាក្រុមហ៊ុនមួយដែលទទួលបានការគាំទ្រ ក្នុងការសាងសង់សំណង់រឹងមាំ និងអាគារធំៗ នៅក្នុងប្រទេសចិន ក្នុងនោះមានផ្លូវដែក អាកាសយានដ្ឋាន និងមន្ទីរពេទ្យ ហើយបច្ចុប្បន្នក៏កំពុងតែជោគជ័យខ្លាំង នៅក្នុងប្រទេសម៉ាឡេស៊ីផងដែរ ហើយការចាប់អារម្មណ៍លើទីផ្សារកម្ពុជានេះ គឺដោយមើលឃើញពីកត្តាសុខសន្តិភាព និងភាពរីកចម្រើននៅកម្ពុជា និងក៏ជាឱកាសក្នុងការពង្រីកបុត្រសម្ព័ន្ធក្រុមហ៊ុនផង ណាមួយម្ចាស់ភាគហ៊ុនទាំងអស់ ក៏សម្រេចចិត្តជ្រើសយកប្រទេសកម្ពុជាជាសាខាបន្ទាប់ ដោយយកទីតាំងខេត្តកំពង់ស្ពឺជាខេត្តគោលដៅ។ប្រធានប្រតិបត្តិ នៃក្រុងស៊ុនយី និងជាអនុប្រធាន(កម្រិតនាយកដ្ឋាន) នៃការិយាល័យក្រុមថ្នាក់ដឹកនាំក្រុងប៉េកាំង សម្រាប់ការសម្របសម្រួលការអភិវឌ្ឍន៍តំបន់ប៉េកាំង ធានជើង ហឺប៉ី រូបនេះ បានបញ្ជាក់ថា ខេត្តកំពង់ស្ពឺ មានសក្តានុពលគ្រប់គ្រាន់ ដែលអាចផ្តល់ជាវត្ថុធាតុដើមសម្រាប់ទ្រទ្រង់ដល់ដំណើរការរបស់ក្រុមហ៊ុន ដើម្បីធ្វើសកម្មភាព ហើយក្រុមហ៊ុនប៉េកាំង នឹងត្រូវចុះ MOU ជាមួយខេត្តកំពង់ស្ពឺ នៅពេលខាងមុខ បន្ទាប់ពីក្រុមការងារទាំងពីរចុះសិក្សាទីតាំងសាងសង់រួចរាល់ ។ ក្រោយមករាល់សកម្មភាពសាងសង់ធំៗ នៅក្នុងប្រទេសកម្ពុជា គឺខេត្តកំពង់ស្ពឺ អាចដាក់ក្រុមហ៊ុនរបស់ខ្លួនបាន ដោយមិនប្រើប្រាស់ឈ្មោះ ក្រុមហ៊ុនប៉េកាំងប្រូដាកសិនទៀតទេ ហើយក្នុងនោះក៏អាចទទួលគម្រោងសាងសង់ធំៗ ជាអន្តរជាតិផងដែរ ។លោកបានបន្ថែមថា លើសពីនេះក្រុមហ៊ុន មានគម្រោងបន្ថែមចំណេះជំនាញ ដល់បុគ្គលិកក្រុមហ៊ុនជាជនជាតិខ្មែរ ឱ្យក្លាយជាវិស្វករពិតប្រាកដ ហើយអាចចូលរួមទទួលការងារជាអន្តរជាតិ នាពេលអនាគតក្រោយក្រុមហ៊ុនដំណើរបាន៥ឆ្នាំ ទៅ១០ឆ្នាំខាងមុខផងដែរ ។ក្នុងឱកាសនោះ ឯកឧត្តមបណ្ឌិត ជាម ច័ន្ទសោភ័ណ បានសម្តែងការត្រេកអរជំនួសឱ្យប្រជាពលរដ្ឋអ្នកខេត្តកំពង់ស្ពឺ ដែលទទួលបានឱកាសការងារថ្មីបន្ថែមទៀត ពិសេសការប្រែក្លាយសមត្ថភាពជាកម្មករជំនាញមួយដ៏ពិតប្រាកដ ក្នុងការចូលរួមការងារជាអន្តរជាតិ ។តាមរយៈគម្រោងនេះ ឯកឧត្តមអភិបាលខេត្ត បានរំពឹងថា ប្រទេសកម្ពុជា ពិសេសខេត្តកំពង់ស្ពឺ នឹងមានសំណង់រឹងមាំ ដែលមានគុណភាពមិនចាញ់ប្រទេសជឿនលឿន នៅលើសកលលោកនោះទេ ហើយប្រជាពលរដ្ឋ និងរដ្ឋាភិបាលក៏អាចមានចំណូលពីគម្រោងនេះដើម្បីអភិវឌ្ឍន៍ប្រទេសបន្ថែមទៀតផងដែរ ៕ អត្ថបទ បាន សុខរិទ្ធិ

ក្រសួងវប្បធម៌ ថ្កោលទោសចំពោះការបំផ្លិចបំផ្លាញថ្មីៗ​នេះដោយកងកម្លាំង​យោធាថៃ​ទៅ​លើ​ជណ្តើរ​ឈើ​ឡើង​ប្រាសាទខ្នារ

2026/06/05 03:52:21 pm        332
Facebook Telegram Linkin
ភ្នំពេញ៖ ក្រសួងវប្បធម៌និងវិចិត្រសិល្បៈ នៃព្រះរាជាណាចក្រកម្ពុជា បានថ្កោល​ទោស​យ៉ាង​ខ្លាំង​ក្លា​បំផុត​ចំពោះការបំផ្លិចបំផ្លាញថ្មីៗនេះដោយកងកម្លាំងយោធាថៃ​ទៅ​លើ​ជណ្តើរ​ឈើ​ឡើង​ប្រាសាទ​ខ្នារ ដែលជាហេដ្ឋារចនាសម្ព័ន្ធសម្រាប់ឡើងទៅកាន់ប្រាសាទខ្នារ និង​សម្រាប់​បម្រើ​ដល់​កិច្ច​ការ​អភិរក្សបេតិកភណ្ឌវប្បធម៌ និងដែល​ត្រូវ​បាន​សាង​សង់​ដោយ​អាជ្ញាធរ​កម្ពុជា​នៅ​ឆ្នាំ២០១៧​។ ជណ្តើរនេះមានចំនួន ១១៨១កាំ និងមានប្រវែង៣២៥ម៉ែត្រ ឆ្ពោះទៅកាន់ប្រាសាទ ដោយ​ត្រូវ​បាន​កសាងឡើងក្នុងគោលបំណងគាំទ្រដល់ការអភិរក្ស និងការគ្រប់គ្រងទីតាំងបេតិកភណ្ឌ ព្រម​ទាំងសម្រួលដល់ការចូលទស្សនារបស់ភ្ញៀវ អ្នកស្រាវជ្រាវ និងសហគមន៍មូលដ្ឋាន។ នេះបើ​​យោង​តាម​​សេចក្តីថ្លែងការណ៍របស់ក្រសួងក្រសួងវប្បធម៌និងវិចិត្រសិល្បៈនៅថ្ងៃទី៥ ខែមិថុនា ឆ្នាំ​២០២៦​។ ក្រសួងក្រសួងវប្បធម៌និងវិចិត្រសិល្បៈបានបញ្ជាក់ថា ការបំផ្លិចបំផ្លាញដោយចេតនាទៅលើហេដ្ឋារចនាសម្ព័ន្ធនេះ គឺជាទង្វើបង្កការខូចខាតយ៉ាងធ្ងន់ធ្ងរដល់បេតិកភណ្ឌវប្បធម៌ និងដល់កិច្ចខិតខំប្រឹងប្រែងអភិរក្សដែលកម្ពុជាបានអនុវត្តអស់រយៈពេលជាច្រើនឆ្នាំមកហើយ។ ទង្វើនេះគឺជាផ្នែកមួយនៃការប៉ុនប៉ងកាន់តែច្បាស់ក្នុងការផ្លាស់ប្តូរស្ថានភាពជាក់ស្តែងនៅលើដី បង្កើតស្ថានភាព Fait accompli និងជាការប៉ុនប៉ងលុបបំបាត់ភស្តុតាងជាក់ស្តែងដែលបង្ហាញពីការគ្រប់គ្រង ការអភិរក្ស និងការថែរក្សាទីតាំងប្រាសាទ និងទេសភាពវប្បធម៌ជុំវិញ ដោយកម្ពុជាជាយូរលង់មកហើយ។ សកម្មភាពបែបនេះផ្ទុយនឹងគោលការណ៍មូលដ្ឋានស្តីពីការការពារបេតិកភណ្ឌវប្បធម៌ និងមិនស្របតាមកាតព្វកិច្ចរបស់រដ្ឋភាគីក្នុងការការពារសម្បត្តិវប្បធម៌សម្រាប់មនុស្សជំនាន់បច្ចុប្បន្ន និងជនជំនាន់ក្រោយនោះទេ។ ជាមួយគ្នានេះ ក្រសួងវប្បធម៌និងវិចិត្រសិល្បៈសូមធ្វើការតវ៉ាយ៉ាងម៉ឺងម៉ាត់បំផុត និងបដិសេធទាំងស្រុងចំពោះផែនការរបស់ភាគីថៃក្នុងការរៀបចំព្រឹត្តិការណ៍សាធារណៈ ពិធីសាសនា សកម្មភាពទេសចរណ៍ និងការបើកប្រាសាទតាក្របីឱ្យសាធារណជនចូលទស្សនា ព្រមទាំងការលក់សំបុត្រចូលទស្សនា ដែលគ្រោងអនុវត្តនៅថ្ងៃទី៦ និងទី៧ ខែមិថុនា ឆ្នាំ២០២៦ខាងមុខនេះ។ ក្រសួងវប្បធម៌និងវិចិត្រសិល្បៈ សូមគូសបញ្ជាក់ជាថ្មីថា ប្រាសាទតាក្របី និងប្រាសាទខ្នារ ជាទីតាំងបេតិកភណ្ឌវប្បធម៌ និងប្រវត្តិសាស្ត្រដែលស្ថិតនៅក្នុងដែនអធិបតេយ្យនៃព្រះរាជាណាចក្រកម្ពុជា ដូចមានបញ្ជាក់ច្បាស់តាមសន្ធិសញ្ញានិងអនុសញ្ញាបារាំង-សៀម ឆ្នាំ១៩០៤ និងឆ្នាំ១៩០៧ ព្រមទាំងលិខិតូបករណ៍ច្បាប់ពាក់ព័ន្ធដែលត្រូវបានទទួលស្គាល់ក្រោមច្បាប់អន្តរជាតិ។ ការរៀបចំសកម្មភាពសាធារណៈ ការទទួលភ្ញៀវទេសចរ និងការប្រមូលថ្លៃចូលទស្សនាដោយអាជ្ញាធរថៃនៅប្រាសាទតាក្របី គឺជាការអនុវត្តអំណាចដោយខុសច្បាប់លើទឹកដីកម្ពុជា និងជាការរំលោភយ៉ាងធ្ងន់ធ្ងរលើអធិបតេយ្យភាព និងបូរណភាពទឹកដីរបស់កម្ពុជា។ សកម្មភាពទាំងនេះមិនអាចទទួលយកបានឡើយ ហើយជាគោលបំណងបង្កើតការយល់ច្រឡំថាមានការគ្រប់គ្រងរដ្ឋបាលរបស់ភាគីថៃលើទីតាំងបេតិកភណ្ឌវប្បធម៌របស់កម្ពុជា។ ក្រសួងវប្បធម៌និងវិចិត្រសិល្បៈ បដិសេធយ៉ាងដាច់ខាតចំពោះការប៉ុនប៉ងណាមួយក្នុងការធ្វើឱ្យមានភាពស្របច្បាប់ ឬធ្វើឱ្យក្លាយជារឿងប្រក្រតីលើការកាន់កាប់ទឹកដីកម្ពុជាដោយខុសច្បាប់នេះ តាមរយៈសកម្មភាពទេសចរណ៍ វប្បធម៌ សាសនា ឬរដ្ឋបាល។ សកម្មភាពទាំងនេះគ្មានអានុភាពផ្លូវច្បាប់ និងមិនអាចកែប្រែអធិបតេយ្យភាពស្របច្បាប់របស់កម្ពុជាលើប្រាសាទតាក្របីបានឡើយ។ ក្រសួងវប្បធម៌និងវិចិត្រសិល្បៈ អំពាវនាវដល់រាជរដ្ឋាភិបាលថៃឱ្យបញ្ឈប់ជាបន្ទាន់នូវសកម្មភាពទាំងអស់ខាងលើ រួមទាំងប្រតិបត្តិការទេសចរណ៍ ការលក់សំបុត្រចូលទស្សនា និងរាល់សកម្មភាពដែលបង្កការខូចខាត កែប្រែ ឬរំខានដល់ទីតាំងបេតិកភណ្ឌវប្បធម៌ដែលស្ថិតនៅក្នុងទឹកដីកម្ពុជា។ ក្រសួងក៏ជំរុញឱ្យភាគីថៃគោរពកាតព្វកិច្ចរបស់ខ្លួនក្រោមច្បាប់អន្តរជាតិ ចៀសវាងសកម្មភាពដែលអាចបង្កើនភាពតានតឹង និងចៀសវាងវិធានការណាមួយដែលអាចប៉ះពាល់ដល់ការដោះស្រាយបញ្ហានេះដោយសន្តិវិធី។ ព្រះរាជាណាចក្រកម្ពុជា នៅតែប្តេជ្ញាចិត្តយ៉ាងមុតមាំក្នុងការការពារអធិបតេយ្យភាពរបស់ខ្លួន អភិរក្សបេតិកភណ្ឌវប្បធម៌ និងបន្តស្វែងរកដំណោះស្រាយតាមផ្លូវច្បាប់ និងការទូតដោយសន្តិវិធី ស្របតាមច្បាប់អន្តរជាតិ ដើម្បីការពារបូរណភាពទឹកដី និងមរតកវប្បធម៌របស់ជាតិ៕ អត្ថបទ៖ វង្ស សុភាព

សម្តេចប្រធានរដ្ឋសភាកម្ពុជា លើកទឹកចិត្ត ឯកអគ្គរដ្ឋទូតតួកគីយ៉េ ជួយជំរុញការវិនិយោគ ពាណិជ្ជកម្ម និងអ្នកទេសចរណ៍ ពីតួកគីយ៉េមកកម្ពុជាបន្ថែមទៀត

2026/06/05 03:41:14 pm        48
Facebook Telegram Linkin
សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានលើកទឹកចិត្ត ឯកអគ្គរដ្ឋទូតថ្មី នៃសាធារណរដ្ឋតួកគីយ៉េ ប្រចាំនៅកម្ពុជា សំដៅជួយជំរុញបន្ថែមកិច្ចសហប្រតិបត្តិការវិស័យពាណិជ្ជកម្ម ទេសចរណ៍ កសិកម្ម អប់រំ បច្ចេកវិទ្យា ដើម្បីបម្រើផលប្រយោជន៍ពលរដ្ឋ និងប្រទេសទាំងពីរឱ្យកាន់តែរីកចម្រើនបន្ថែមទៀត។សំណើរបស់សម្តេចប្រធានរដ្ឋសភាបានលើកឡើងនៅក្នុងឱកាសដែលសម្តេចទទួលជួបសម្តែងការគួរសម និងពិភាក្សាការងារជាមួយ ឯកឧត្ដម មឺស៊ុត អូស្កាន (Mesut Özcan) ឯកអគ្គរដ្ឋទូតថ្មី នៃសាធារណរដ្ឋតួកគីយ៉េ ប្រចាំព្រះរាជាណាចក្រកម្ពុជា នៅថ្ងៃទី៥ ខែមិថុនា ឆ្នាំ២០២៦ នៅវិមានរដ្ឋសភា។នៅក្នុងឱកាសនោះ សម្តេចប្រធានរដ្ឋសភា និងឯកឧត្ដម មឺស៊ុត អូស្កាន បានសម្តែងការពេញចិត្តជាខ្លាំងនៃទំនាក់ទំនងដ៏ល្អរវាងប្រទេសទាំងពីរដែលមានតាំងពីយូរលង់ណាស់មកហើយ។ ក្នុងរយៈពេលចុងក្រោយនេះ ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ទាំងក្នុងក្របខណ្ឌនីតិប្រតិបត្តិ និងនីតិប្បញ្ញត្តិ មានការវិវឌ្ឍរីកចម្រើនគួរកត់សម្គាល់ និងបាននាំមកនូវផលប្រយោជន៍ដល់ប្រទេសនិងប្រជាជនទាំងសងខាង។ ទំនាក់ទំនង ការផ្លាស់ប្តូរ ការធ្វើអន្តរកម្ម និងការគាំទ្រគ្នាទៅវិញទៅមក ទាំងក្នុងកម្រិតទ្វេភាគី និងពហុភាគី បានប្រព្រឹត្តទៅជាញឹកញាប់ ដោយផ្តោតលើការគោរពគ្នា ការយោគយល់គ្នា និងផ្តល់ផលប្រយោជន៍ឱ្យគ្នាទៅវិញទៅមក។សម្តេចបានគូសបញ្ជាក់ថា ទំនាក់ទំនងរវាងប្រទេសយើងទាំងពីរដែលមានរយៈពេលជិត ៧ ទសវត្សរ៍មកនេះ បានចាក់ឫសដោយផ្អែកលើការជឿទុកចិត្តគ្នា ដោយផ្តោតលើលទ្ធផលជាក់ស្តែង និងផ្អែកលើផលប្រយោជន៍ប្រជាពលរដ្ឋជាស្នូល។ ដូចនេះ យើងត្រូវបន្តជំរុញកម្លាំងចលករដ៏ល្អនេះ តាមរយៈការផ្តោតលើផលប្រយោជន៍ប្រជាពលរដ្ឋជាស្នូលក្នុងគ្រប់វិស័យនៃកិច្ចសហប្រតិបត្តិការរបស់យើង។កម្ពុជា និងតួកគីយ៉េ មានគុណតម្លៃរួមជាច្រើន ក្នុងនោះគឺការលើកកម្ពស់តម្លៃនៃសន្តិភាព និងវិបុលភាពរួម។ ប្រទេសយើងទាំងពីរតែងតែប្រកាន់ខ្ជាប់ និងជឿជាក់លើច្បាប់អន្តរជាតិ និងពហុភាគីនិយម ដោយបើកចំហ និងបរិយាបន្ន។ សម្តេចបានថ្លែងអំណរគុណសមានចិត្តដ៏ល្អរបស់មិត្តតួកគីយ៉េ ដែលបានចេញលិខិតអំពាវនាវដល់ប្រទេសកម្ពុជា និងថៃ ពឹងផ្អែកលើការចរចាដើម្បីបញ្ចប់ជម្លោះព្រំដែន និងគោរពច្បាប់អន្តរជាតិ។សម្តេចប្រធានរដ្ឋសភាបានស្នើដល់ប្រទេសតួកគីយ៉េ បន្តយកចិត្តទុកដាក់លើករណីនេះបន្ថែមទៀត និងបានបញ្ជាក់ពីជំហររបស់កម្ពុជា ដែលស្រឡាញ់សន្តិភាព ការពារសន្តិភាព និងអនុវត្តច្បាប់អន្តរជាតិជាប់ជានិច្ច។ឯកឧត្ដម មឺស៊ុត អូស្កាន បានថ្លែងអំណរគុណយ៉ាងជ្រាលជ្រៅជូនសម្តេចប្រធានរដ្ឋសភា ដែលបានឆ្លៀតពេលដ៏មមាញឹកទទួលជួបពិភាក្សាការងារជាមួយឯកឧត្ដម និងសហការីនៅក្នុងឱកាសនេះ។ ឯកឧត្ដមបានបញ្ជាក់ថា នៅក្នុងអាណត្តិបេសកកម្មការទូតនៅកម្ពុជានេះ ឯកឧត្ដមនឹងខិតខំបំពេញបេសកកម្មឱ្យទទួលបានជោគជ័យ សម្រាប់ផលប្រយោជន៍ប្រទេសទាំងពីរ។ ក្នុងនាមជាតំណាងរាស្ត្រមណ្ឌលខេត្តកណ្តាល សម្តេចប្រធានរដ្ឋសភាបានថ្លែងអំណរគុណជូនប្រទេសតួកគីយ៉េផងដែរ ដែលបានផ្តល់ជំនួយផ្លូវគមនាគមន៍ ផ្ទះ និងហេដ្ឋារចនាសម្ព័ន្ធផ្សេងទៀត ដល់ពលរដ្ឋនៅក្នុងខេត្តកណ្តាលដើម្បីឱ្យពួកគាត់បានធ្វើកសិកម្មបែបទំនើប។សម្តេចបានកត់សម្គាល់ថា ដោយសារមានជើងហោះហើរត្រង់រវាងប្រទេសទាំងពីរ នៅក្នុងរយៈពេលចុងក្រោយនេះ ទំហំពាណិជ្ជកម្មកម្ពុជា និងតួកគីយ៉េ បានកើនឡើងដល់ ៧០ លានដុល្លារ។ សម្តេចមានជំនឿយ៉ាងមុតមាំថា ឯកឧត្ដមឯកអគ្គរដ្ឋទូតថ្មី នឹងពិនិត្យសក្តានុពលនៃប្រទេសទាំងពីរបន្ថែមទៀត ដើម្បីធ្វើយ៉ាងណាឱ្យពលរដ្ឋកម្ពុជា និងតួកគីយ៉េ ទទួលបានផ្លែផ្កាកាន់តែច្រើនពីទំនាក់ទំនងដ៏ល្អនេះ។ជាមួយគ្នានេះ សម្តេចរដ្ឋសភាធិបតី ឃួន សុដារី សង្ឃឹមថានៅក្នុងអាណត្តិការទូតរបស់ឯកឧត្ដម មឺស៊ុត អូស្កាន ទំនាក់ទំនងកម្ពុជា -តួកគីយ៉េ នឹងរីកចម្រើនមួយកម្រិតទៀត៕

មន្រី្តសុខាភិបាលនៅភ្នំពេញ បន្តសកម្មភាពអប់រំសុខភាព លុបបំបាត់ជម្រកមូសខ្លា បរិស្ថានស្អាត សុខភាពល្អដល់ពលរដ្ឋ

2026/06/05 03:25:18 pm        220
Facebook Telegram Linkin
មន្រី្តសុខាភិបាលរាជធានីភ្នំពេញ បានសហការជាមួយអាជ្ញាធរមូលដ្ឋាន តាមបណ្តាភូមិ សង្កាត់ ខណ្ឌនានា បន្តសកម្មភាពចុះអប់រំសុខភាព លុបបំបាត់ជម្រកមូសខ្លា បរិស្ថានស្អាតសុខភាពល្អ។រដូវវស្សាបានចូលមកដល់ ហើយមានភ្លៀងធ្លាក់ច្រើន ក៏ជាពេលវេលាមួយដែលមូសខ្លាកើតឡើង និងរីករាលដាលខ្លាំងបំផុត។ ទឹកភ្លៀង ដែលដក់តាមសម្ភារៈផ្សេងៗជុំវិញផ្ទះ បង្កើតជាទីតាំងអាចពង និងបង្កើតដង្កូវទឹកយ៉ាងលឿន។ឯកឧត្តមបណ្ឌិត ងី មានហេង ប្រធានមនី្ទរសុខាភិបាល នៃរដ្ឋបាលរាជធានីភ្នំពេញ ប្រាប់BTV ព័ត៌មាន នាថ្ងៃទី៥ ខែមិថុនា ឆ្នាំ២០២៦នេះថា មន្រី្តសុខាភិបាលរបស់យើង បានចុះតាមបណ្តាសហគមន៍(ខ្នងផ្ទះ) និងសាលារៀន ដោយចែកផ្ទាំងបដា (Banner) នៅខ្លឹមសារអប់រំអំពីវិធានការការពារ ទប់ស្កាត់ជំងឺគ្រុនឈាម ពន្យល់ណែនាំយ៉ាងលម្អិតអំពីហានិភ័យនៃជំងឺគ្រុនឈាម ដែលបង្កឡើងដោយសារមូសខ្លាខាំ និងបានដាក់ចេញនូវវិធានការណ៍សំខាន់ៗដូចខាងក្រោម៖ • ការលុបបំបាត់ជម្រកមូសខ្លា៖ ណែនាំឱ្យប្រជាពលរដ្ឋមានការប្រុងប្រយ័ត្នខ្ពស់ ចំពោះសម្ភារៈដក់ទឹកនៅជុំវិញផ្ទះ ដូចជា៖ អាងទឹក ថូផ្កា សំបកកង់ឡាន កំប៉ុង និងសំបកដប ដែលជាកន្លែងបង្កកំណើតនៃដង្កូវទឹក។ • ការអនុវត្តវិធានការ "៣កុំ និង ៣ការពារ"៖ ជម្រុញឱ្យមានការសម្អាតបរិស្ថានរស់នៅឱ្យមានពន្លឺ និងខ្យល់ចេញចូលល្អ ដើម្បីកុំឱ្យមូសជ្រកកោន។ •កុមារៗគឺជាក្រុមគោលដៅដែលងាយរងគ្រោះបំផុត។ ដូច្នេះមន្ត្រីសុខាភិបាល បានណែនាំឱ្យមាតាបិតា ត្រូវរៀបចំបញ្ចូនកូនៗឱ្យសម្រាន្តក្នុងមុង ទោះបីជាពេលថ្ងៃក៏ដោយ និងស្លៀកពាក់ខោអាវដៃវែង ជើងវែង ឱ្យបានត្រឹមត្រូវ។ ឯកឧត្តមបណ្ឌិត ងី មានហេង បានអំពាវនាវដល់អាណាព្យាបាលទាំងអស់ ក្នុងករណីសង្កេតឃើញកូនចៅមានអាការៈក្ដៅខ្លួនខ្លាំងខុសពីធម្មតា សូមកុំបង្អង់យូរ ឬព្យាបាលដោយខ្លួនឯង ត្រូវប្រញាប់បញ្ជូនអ្នកជំងឺមកកាន់មណ្ឌលសុខភាព ឬមន្ទីរពេទ្យបង្អែក ដែលនៅជិតផ្ទះបំផុត ដើម្បីទទួលបានការពិនិត្យ និងព្យាបាលឱ្យបានទាន់ពេលវេលា។ ជាពិសេសមន្ទីរសុខាភិបាលនៃរដ្ឋបាលរាជធានីភ្នំពេញ បានត្រៀមលក្ខណៈជាស្រេចនូវឱសថ ម៉ាស៊ីនបាញ់មូស និង«ថ្នាំអាបែត» (Abate) ដើម្បីចែកជូនប្រជាពលរដ្ឋដោយឥតគិតថ្លៃ និងប្រើប្រាស់អន្តរាគមន៍ក្នុងករណីមានការផ្ទុះឡើងនូវជំងឺគ្រុនឈាម។ ការចូលរួមរបស់បងប្អូនប្រជាពលរដ្ឋក្នុងការលុបបំបាត់ដង្កូវទឹក គឺជាគន្លឹះដ៏សំខាន់ក្នុងការលុបបំបាត់ជំងឺគ្រុនឈាមក្នុងសហគមន៍យើង៕អត្ថ បទ រដ្ឋា

ទេសចរ៖ បរិស្ថានធម្មជាតិស្រស់ស្អាតរបស់កម្ពុជាបានរួមចំណែកខ្លាំងទាក់ទាញទេសចរអន្តរជាតិ

2026/06/05 03:14:44 pm        149
Facebook Telegram Linkin
ខណៈថ្ងៃនេះ កម្ពុជា ប្រារព្ធទិវាបរិស្ថានជាតិ និងពិភពលោក ៥ មិថុនា, បណ្តា​ភ្ញៀវទេសចរ​អន្តរជាតិបានទទួលស្គាល់ថា កម្ពុជាជាប្រទេសមានបរិស្ថានធម្មជាតិបៃតងស្រស់ស្អាត អនាម័យ សោភ័ណភាព ខ្យល់អាកាសបរិសុទ្ធ មានសុវត្ថិភាព និងមានភាព​ទាក់ទាញ​ខ្លាំង​ក្នុង​ការ​ស្នាក់​នៅ​ដើរ​ទស្សនាកម្សាន្ត។ ទេសចរអន្តរជាតិ បានថ្លែងប្រាប់BTV នៅថ្ងៃទី៥ ខែមិថុនា នេះថា ការមកទស្សនាកម្ពុជា នៅក្នុង​អំឡុងពេលនេះ គឺគេចង់មកទទួលយកពិសោធន៍ការដើរកម្សាន្ត ការស្នាក់នៅ នៅប្រទេស​ដែល​មានបរិស្ថានធម្មជាតិស្រស់ស្អាតល្អបំផុតនៅក្នុងពិភពលោក។ គេមើលឃើញថា កម្ពុជា​មាន​ការ​អភិវឌ្ឍ ការរៀបចំតាំងពីទីក្រុងរហូតដល់ជនបទឱ្យមានបរិស្ថាតស្រស់ស្អាត ទេសភាពបៃតង អនាម័យ មានសុវត្ថិភាព ស្ងប់ស្ងាត់ នេះគឺពិតជាមានភាពទាក់ទាញខ្លាំង និងចង់មកទស្សនាកម្ពុជាម្តងហើយ ម្តងទៀត ពិសេសនៅក្នុងរដូវកាលទេសចរណ៍បៃតង។ បណ្តាភ្ញៀវទេសចរអន្តជាតិ ក៏បានណែនាំឲ្យទេសចរអន្តរជាតិ នាំគ្នាមកទស្សនាកម្ពុជា នៅក្នុងរដូវទេសចរណ៍បៃតងនេះដែរ ដើម្បីទស្សនាពីស្ថានភាពពិតជាក់ស្តែង ខណៈកម្ពុជាត្រូវបានគេទទួលស្គាល់ជាសកល នៅក្នុងបញ្ជីទេសចរណ៍បៃតងប្រចាំឆ្នាំ២០២៦ របស់ទស្សនាវដ្តី Wanderlust Magazine ហើយតាមការសិក្សាស្រាវជ្រាវរបស់ U.S. News & World Report ក៏បានចាត់ថ្នាក់កម្ពុជា ជាប្រទេសដែលមានបរិស្ថានធម្មជាតិល្អបំផុតលេខ១ នៅលើពិភពលោក នៅឆ្នាំ២០២៦ លើកិច្ចខិតខំប្រឹងប្រែងរបស់កម្ពុជា ដែលបានថែរក្សាតុល្យភាពយ៉ាងល្អរវាងការអភិវឌ្ឍ និងការការពារបរិស្ថាន ក្នុងនោះមានការគ្រប់គ្រងបរិស្ថាន ខ្យល់អាកាសល្អ ការគ្រប់គ្រងធនធានធម្មជាតិ និងការអភិរក្សជីវៈចម្រុះប្រកបដោយនិរន្តភាព។ សូមបញ្ជាក់ថា ទិវាបរិស្ថានជាតិ និងបរិស្ថានពិភពលោក ៥ មិថុនា ឆ្នាំ២០២៦នេះ ប្រារព្ធក្រោមប្រធានបទ «សំណល់សូន្យ» ហើយទិវានេះប្រារព្វក្នុងគោលបំណងលើកកម្ពស់ការយល់ដឹងអំពីបរិស្ថាន និងជំរុញចលនាប្រជាពលរដ្ឋព្រះសង្ឃ កងកម្លាំងប្រដាប់អាវុធ មន្ត្រីរាជការគ្រប់លំដាប់ថ្នាក់ សិស្ស និស្សិត និងសាធារណជនទាំងអស់ចូលរួមឱ្យបានផុសផុល ក្នុងកិច្ចគាំពារបរិស្ថាន ការគ្រប់គ្រងសំរាម ប្លាស្ទិក និងសំណល់រឹង ដើម្បីរួមគ្នាការពារភពផែនដី ឱ្យមានភាពស្អាត បៃតង និងចីរភាព ជាឧត្តមប្រយោជន៍ដល់សង្គម និងមនុស្សជាតិគ្រប់ជំនាន់៕ អត្ថបទ៖ ស៊ុម សុខជា

បណ្ដាញសង្គម

ព័ត៌មានថ្មីៗ

កម្ពុជាប្រារព្ធពិធីអបអរសាទរទិវាបរិស្ថានជាតិ និងបរិស្ថានពិភពលោក ៥ មិថុនា ឆ្នាំ២០២៦ ក្រោមប្រធានបទ “សំណល់សូន្យ”
06/05/2026 09:06 PM
Facebook Telegram Linkin
មន្ត្រីជាន់ខ្ពស់ក្រសួងអភិវឌ្ឍន៍ ចាត់ទុកការថែទាំផ្លូវជារឿងចាំបាច់ សម្រួលការធ្វើដំណើរ និងការប្រកបមុខរបរផ្សេងៗ
06/05/2026 09:06 PM
Facebook Telegram Linkin
ស្នងការដឹកជញ្ជូនសហភាពអឺរ៉ុប៖ EU ពុំមើលឃើញកង្វះខាតប្រេងយន្តហោះនោះទេខណៈតម្លៃប្រេងហក់ឡើងខ្ពស់
06/05/2026 08:06 PM
Facebook Telegram Linkin
លោក Putinនិយាយថា រុស្ស៊ីបានទាក់ទងអាមេរិកពាក់ព័ន្ធនឹងបញ្ហាវិបត្តិនៅប្រទេសគុយបា
06/05/2026 08:06 PM
Facebook Telegram Linkin
អ្នកថែសន្តិភាព UNម្នាក់ ស្លាប់ និង ២នាក់ រងរបួស អំឡុងការផ្លោងគ្រាប់កាំភ្លើងត្បាល់នៅលីបង់
06/05/2026 08:06 PM
Facebook Telegram Linkin
អាហ្វ្រិកខាងត្បូងបញ្ជូនបេ្រសិតទៅកាន់អាហ្វ្រិក និងទ្វីបផ្សេងទៀត ក្រោយការវាយប្រហាររើសអើងជនបរទេស
06/05/2026 08:06 PM
Facebook Telegram Linkin
ក្រុមមេដឹកនាំជួបជុំគ្នា មុនកិច្ចប្រជុំកំពូល សហភាពអឺរ៉ុប-តំបន់បាល់កង់ខាងលិច នៅប្រទេសម៉ុនតេណេហ្គ្រូ
06/05/2026 08:06 PM
Facebook Telegram Linkin
អាមេរិកបង្កើនសម្ពាធលើគុយបា ខណៈពួកគេដាក់ទណ្ឌកម្មលោកប្រធានាធិបតី Diaz-Canel
06/05/2026 08:06 PM
Facebook Telegram Linkin
រដ្ឋមន្រ្តីការពារជាតិអាមេរិកចាត់ទុកបាតុកម្មនៅបូលីវីថា ប្រៀបបាននឹងការផ្តួលរំលំរដ្ឋាភិបាល
06/05/2026 08:06 PM
Facebook Telegram Linkin
ទីក្រុងគីវ កាន់ទុក្ខកុមារអ៊ុយក្រែន ៧០៧នាក់ដែលត្រូវបានសម្លាប់ ចាប់តាំងពីឆ្នាំ ២០២២
06/05/2026 08:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.