នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
អ្នកនាំពាក្យសម្តេចតេជោ ចំអកទៅអ្នកនាំពាក្យក្រសួងការទេសថៃថា ពិតជាមិនចេះខ្មាស់មែន!
ទិវាជាតិ ធីវ៉េត លើកទី៨ ឆ្នាំនេះ ទទួលបានអ្នកចូលរួម និងអ្នកទស្សនាសរុបចំនួនប្រមាណ ៧ម៉ឺននាក់ នៅទូទាំងប្រទេស
គ.ជ.អ.អ បើកកិច្ចប្រជុំលើកដំបូងដើម្បីជំរុញការអភិវឌ្ឍសហគមន៍ទេសចរណ៍ និងអេកូទេសចរណ៍
ឯកឧត្តម នាយឧត្តមសេនីយ៍ គន់ គីម ចុះសួរសុខទុក្ខបងប្អូនប្រជាពលរដ្ឋ ដែលបានភៀសខ្លួនទៅទីសុវត្ថិភាពបណ្ដោះអាសន្ននៅខេត្តព្រះវិហារ

ព័ត៌មានជាតិ

អ្នកនាំពាក្យសម្តេចតេជោ ចំអកទៅអ្នកនាំពាក្យក្រសួងការទេសថៃថា ពិតជាមិនចេះខ្មាស់មែន!

2025/06/17 12:29:56 am        236
Facebook Telegram Linkin
ភ្នំពេញ៖ លោក ជា ធីរិទ្ធ អ្នកនាំពាក្យសម្តេចតេជោ នៅយប់ថ្ងៃទី១៦ មិថុនានេះចំអកទៅអ្នកនាំពាក្យក្រសួងការទេសថៃថា ពិតជាមិនចេះខ្មាស់មែន។លោកបានលើកឡើងថា ពិតជាមិនចេះខ្មាស់មែន! នៅពេលសម្តេចតេជោ ព្រមានបិទការនាំចូលបន្លែ ផ្លែឈេី លោក Nikorndej Balankura អ្នកនាំពាក្យក្រសួងការទេសថៃ ចេះនិយាយថា អ្នកជិតខាងល្អ មិនគួរធ្វេីអុីចឹង ចុះត្រង់ប្រទេសលោកឯងបិទព្រំដែនដោយឯកតោភាគី តេីនេះជាចរិតអ្នកជិតខាងល្អមែនទេ? ចេះបេីកមាត់ទៅរួច? បិទព្រំដែនខ្លួនឯង ហេីយចង់ឲ្យគេចរចា ខ្លាចអន់ ហេីយចង់លេងការទូតខ្សែរលេីគេទៀត។ លោកបានថ្លែងថា៖«ខ្ញុំសូមបញ្ជាក់ជំហររបស់សម្តេចតេជោ ប្រធានបក្សកាន់អំណាច ជាថ្មីថា បិទខ្លួនឯង ត្រូវបេីកខ្លួនឯង។ ថ្ងៃមុនព្រមានផ្តាច់ភ្លេីង លេីសម្តងហេីយ នៅមិនចេះប្រយ័ត្នសម្តី»៕

ទិវាជាតិ ធីវ៉េត លើកទី៨ ឆ្នាំនេះ ទទួលបានអ្នកចូលរួម និងអ្នកទស្សនាសរុបចំនួនប្រមាណ ៧ម៉ឺននាក់ នៅទូទាំងប្រទេស

2025/06/16 09:31:57 pm        49
Facebook Telegram Linkin
ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ឱ្យដឹងថា នៅរាជធានីភ្នំពេញ គិតក្នុងរយៈពេល២ថ្ងៃកន្លងទៅនេះ ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៨ ឆ្នាំ២០២៥នេះ មានអ្នកចូលរួម និងអ្នកទស្សនារហូតដល់ប្រមាណ ៧ម៉ឺននាក់ មកពីក្រសួងស្ថាប័នពាក់ព័ន្ធ ដៃគូអភិវឌ្ឍ អង្គការ សមាគម វិស័យឯកជន អាជ្ញាធរដែនដី គ្រឹះស្ថានអប់រំបណ្តុះបណ្តាលបច្ចេកទេសនិងវិជ្ជាជីវៈ សាលាចំណេះទូទៅ និងសាធារណជនទូទៅ។​ឯកឧត្តម ហ៊ីង ស៊ីដេត ប្រតិភូរាជរដ្ឋាភិបាលទទួលបន្ទុកជាអគ្គនាយកអប់រំបណ្តុះបណ្តាលបច្ចេកទេស និងវិជ្ជាជីវៈ នៅក្នុងកម្មវិធីបិទ ទិវាជាតិ ធីវ៉េត កាលពីរសៀលថ្ងៃទី១៦ ខែមិថុនាថា ទិវាជាតិឆ្នាំនេះ មានការដាក់តាំងនូវស្នាដៃសំខាន់ៗ និងសមិទ្ធផលផ្សេងៗនៅតាមស្តង់ចំនួន ២០៥ស្តង់ មកពីក្រសួង ស្ថាប័ន គ្រឹះស្ថានបណ្តុះបណ្ដាលសាធារណៈ អង្គការ សមាគម ក្រុមហ៊ុនឯកជន និងដៃគូអភិវឌ្ឍបានចូលរួមបង្ហាញសមិទ្ធផលស្នាដៃថ្មីៗជាច្រើន ដែលបានបង្កើតឡើង ដោយសិស្ស និស្សិតមកពី គ្រឹះស្ថានអប់រំបណ្តុះបណ្តាលបច្ចេកទេសនិងវិជ្ជាជីវៈ ឧបករណ៍សម្ភារៈដែលជាបច្ចេកវិទ្យាថ្មីៗ ដែលកំពុងប្រើប្រាស់ក្នុងការបង្រៀន និងការរៀននៅតាមគ្រឹះស្ថានអប់រំបណ្តុះបណ្តាលបច្ចេកទេសនិងវិជ្ជាជីវៈ និងការដាក់តាំងបង្ហាញនូវខ្សែចង្វាក់ផលិតកម្ម តាមបែបទំនើបក្នុងយុគសម័យឌីជីថល ដែលកំពុងប្រើប្រាស់នៅតាមរោងចក្រ សហគ្រាស និងក្រុមហ៊ុននានាជាដើម។ ឯកឧត្តមអគ្គនាយក បានបញ្ជាក់ថា បច្ចុប្បន្ន វិស័យ ធីវ៉េត បាននិងកំពុងចូលរួមយ៉ាងសកម្មក្នុងការផលិតមូលធនមនុស្ស ជាពិសេសការអភិវឌ្ឍកម្លាំងពលកម្មឱ្យមានជំនាញ ចំណេះដឹង សមត្ថភាព និងភាពប្រកួតប្រជែងខ្ពស់ ដែលឆ្លើយតបតម្រូវការនៃការវិវត្តយ៉ាងឆាប់រហ័សនៃមូលដ្ឋានសេដ្ឋកិច្ច ឧស្សាហកម្ម និងបច្ចេកវិទ្យាឌីជីថល និងស្របតាមការតម្រង់ទិសគោលនយោបាយរបស់រាជរដ្ឋាភិបាលកម្ពុជា។លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ នៃក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា វិស័យអប់រំបណ្តុះបណ្តាលបច្ចេកទេស និងវិជ្ជាជីវៈនៅកម្ពុជា បានកំពុងបោះជំហានទៅមុខគួរជាទីមោទនៈ ដោយមានកូនខ្មែរជាច្រើនរូបដែលជាសិស្ស និស្សិតរបស់គ្រឹះស្ថាន TVET បានបង្កើតនូវរ៉ូបូតទំនើបៗជាច្រើនប្រភេទ, ព្រមទាំងមានវត្តមានរបស់ក្រុមហ៊ុនទាំងក្នុង និងក្រៅប្រទេសជាច្រើនចូលរួមបង្ហាញផលិតផល។ លោកជំទាវ បានអំពាវនាវដល់ក្រសួង ស្ថាប័នពាក់ព័ន្ធ អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ វិស័យឯកជន អង្គការជាតិ អន្តរជាតិ និងដៃគូអភិវឌ្ឍទាំងអស់ បន្តចូលរួមសហការគ្នាឱ្យបានផុលផុសប្រកបដោយស្មារតីទទួលខុសត្រូវខ្ពស់ក្នុងការប្រារព្ធទិវាជាតិមួយនេះ ព្រមទាំងសូមបន្តរួមចំណែកចូលរួម និងគាំទ្រលើកទឹកចិត្តទាំងធនធានថវិកា និងធនធានបច្ចេកទេសក្នុងផ្នែកអប់រំបណ្តុះបណ្តាលបច្ចេកទេសនិងវិជ្ជាជីវៈ ដើម្បីអភិវឌ្ឍន៍កម្លាំងពលកម្មជំនាញនៅកម្ពុជា។សូមបញ្ជាក់ថា ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈលើកទី៨ ឆ្នាំ២០២៥ បានប្រារព្ធធ្វើឡើង ក្រោមប្រធានបទ «TVET បង្កើតឱកាសការងារ សាងក្តីសង្ឃឹមដល់យុវជន» ។ ទិវានេះ រៀបចំឡើងក្នុងគោលបំណងលើកកម្ពស់គុណភាព គុណតម្លៃ និងកិត្តិនាមនៃការអប់រំបណ្តុះបណ្តាលបច្ចេកទេស និងវិជ្ជាជីវៈ តាមរយៈការផ្សព្វផ្សាយជំរុញលើកទឹកចិត្តទៅ ដល់សិស្សានុសិស្ស និស្សិត យុវជន មាតាបិតា អាណាព្យាបាល កម្មករនិយោជិត និយោជក និងផ្នែកឯកជន ព្រមទាំងសាធារណជនទូទៅ ឱ្យបានយល់ដឹងកាន់តែច្បាស់ និងទូលំទូលាយអំពីសារៈសំខាន់នៃការអប់រំបណ្តុះបណ្តាលបច្ចេកទេស និងវិជ្ជាជីវៈ ព្រមទាំងចូលរួមយ៉ាងសកម្មក្នុងការអភិវឌ្ឍកម្លាំងពលកម្មជំនាញប្រកបដោយគុណភាព ដើម្បីឆ្លើយតបទៅនឹងតម្រូវការទីផ្សារការងារទាំងក្នុង និងក្រៅប្រទេស៕អត្ថបទ៖ ឈិត បូរ៉ាវី

គ.ជ.អ.អ បើកកិច្ចប្រជុំលើកដំបូងដើម្បីជំរុញការអភិវឌ្ឍសហគមន៍ទេសចរណ៍ និងអេកូទេសចរណ៍

2025/06/16 09:12:41 pm        48
Facebook Telegram Linkin
ភ្នំពេញ ៖គណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ (គ.ជ.អ.អ.) បានបើកកិច្ចប្រជុំជាលើកដំបូង ដើម្បីជំរុញការអភិវឌ្ឍសហគមន៍ទេសចរណ៍ និងអេកូទេសចរណ៍។ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ (គ.ជ.អ.អ.) នៅថ្ងៃទី១៦ខែមិថុនា ឆ្នាំ២០២៥ បានដឹកនាំកិច្ចប្រជុំលើកដំបូងរបស់គណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ ក្នុងអាណត្តិ រាជរដ្ឋាភិបាល នីតិកាលទី៧ នៃរដ្ឋសភា ក្នុងគោលដៅជំរុញការអភិវឌ្ឍសហគមន៍ទេសចរណ៍ និងអេកូទេសចរណ៍ ប្រកបដោយចីរភាព និងការទទួលខុសត្រូវ។ កិច្ចប្រជុំដ៏មានសារៈសំខាន់នេះ ក៏មានការអញ្ជើញចូលរួមពីឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងជាអនុប្រធានអចិន្ត្រៃយ៍ គ.ជ.អ.អ., ឯកឧត្តម ចាន់ ចេស្តា រដ្ឋលេខាធិការ តំណាងឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងជាអនុប្រធាន គ.ជ.អ.អ, ព្រមទាំងស្ថាប័នពាក់ព័ន្ធនានាសរុបចំនួនជាង១០០នាក់ ស្ថិតនៅទីស្តីការក្រសួងទេសចរណ៍។នៅកិច្ចប្រជុំ ឯកឧត្តម ហួត ហាក់ បានថ្លែងថា កម្ពុជាត្រូវបានទទួលស្គាល់ជាលក្ខណៈអន្តរជាតិលើការងារសហគមន៍ និងអេកូទេសចរណ៍ តាមរយៈការអនុវត្តគំរូអភិវឌ្ឍសហគមន៍ទេសចរណ៍ ក្រោមទម្រង់ភាពជាដៃគូ-រដ្ឋ-ឯកជន-ប្រជាជន (4Ps : Public Private People Partnership) ដោយលើកទឹកចិត្តការវិនិយោគ តម្រូវឱ្យមានការចូលរួមពីប្រជាជនមូលដ្ឋាន, ការផ្តល់សិទ្ធិអំណាចដល់ប្រជាពលរដ្ឋសហគមន៍, ការផ្តល់ប្រយោជន៍អតិបរមាដល់មូលដ្ឋាន ព្រមទាំងការគោរពគោលការណ៍ចីរភាព និងទទួលខុសត្រូវ។គួរបញ្ជាក់ដែរថា នៅឆ្នាំ២០២៥នេះ គណៈកម្មាធិការជាតិគ្រប់គ្រង និងអភិវឌ្ឍសហគមន៍ទេសចរណ៍ និងអេកូទេសចរណ៍ បានដាក់ចេញទិសដៅការងារអាទិភាពសម្រាប់អនុវត្តដូចជា៖បន្តជំរុញការអនុវត្ត«គោលនយោបាយជាតិអេកូទេសចរណ៍២០១៩-២០៣០»។ បន្តជំរុញការអនុវត្តស្តង់ដាសហគមន៍ទេសចរណ៍អាស៊ាន ស្តង់ដាទេសចរណ៍កម្ពុជា និងស្តង់ដាពាក់ព័ន្ធទាំងកម្រិតអាស៊ាន និងកម្ពុជា ព្រមទាំងការងារទិអាទិភាពសំខាន់ៗជាច្រើនទៀត។ អត្ថបទ៖ទូច សោភ័ណ​

ឯកឧត្តម នាយឧត្តមសេនីយ៍ គន់ គីម ចុះសួរសុខទុក្ខបងប្អូនប្រជាពលរដ្ឋ ដែលបានភៀសខ្លួនទៅទីសុវត្ថិភាពបណ្ដោះអាសន្ននៅខេត្តព្រះវិហារ

2025/06/16 08:42:47 pm        66
Facebook Telegram Linkin
ព្រះវិហារ៖ នារសៀលថ្ងៃទី១៦ ខែមិថុនា ឆ្នាំ២០២៥ ឯកឧត្តម នាយឧត្តមសេនីយ៍កិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ នៃគណ:កម្មាធិការជាតិគ្រប់គ្រងគ្រោះមហន្តរាយ បានអញ្ជើញសំណេះសំណាល និងសួរសុខទុក្ខបងប្អូនប្រជាពលរដ្ឋ ដែលបានភៀសខ្លួនមករកទីសុវត្ថិភាពបណ្ដោះអាសន្ន ស្ថិតក្នុងមណ្ឌលវត្តពោធិ៍៥,០០០ដើម ក្នុងភូមិគូលែនត្បូង ឃុំគូលែនត្បូង ស្រុកគូលែន ខេត្តព្រះវិហារ។ក្នុងពិធីសំណេះសំណាលសួរសុខទុក្ខ រួមមានថ្នាក់ដឹកនាំគណ:កម្មាធិការជាតិគ្រប់គ្រងគ្រោះមហន្តរាយ, ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ និងលោក លោកស្រីជាប្រធានមន្ទីរ-អង្គភាពជុំវិញខេត្ត។ ក្នុងឱកាសនោះ ឯកឧត្តម ទេសរដ្ឋមន្រ្តី គន់ គីមបានថ្លែងនាំនូវប្រសាសន៍ផ្តាំផ្ញើសាកសួរសុខទុក្ខ សេចក្តីនឹករលឹក និងសេចក្តីស្រឡាញ់ដ៏ជ្រាលជ្រៅ ព្រមទាំងពរសព្ទសាធុការពីសំណាក់ សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវបណ្ឌិត ពេជ ចន្ទមុនី ជូនចំពោះបងប្អូនប្រជាពលរដ្ឋទាំងអស់នៅក្នុងទីតាំងនេះ។ឯកឧត្តម ទេសរដ្ឋមន្រ្តី បានបញ្ជាក់ថា ពិធីសំណេះសំណាល និងសួរសុខទុក្ខនេះ គឺជាការបង្ហាញអំពីការយកចិត្តទុកដាក់លើសុខទុក្ខរបស់បងប្អូនប្រជាពលរដ្ឋគ្រប់រូប នៅគ្រប់កាលៈទេសៈ ដោយមិនទុកបងប្អូនណាម្នាក់ចោលឱ្យលំបាកឡើយ។ឯកឧត្តម ទេសរដ្ឋមន្រ្តី បានផ្ដាំផ្ញើដល់បងប្អូនប្រជាពលរដ្ឋទាំងអស់ត្រូវចេះរក្សាសាមគ្គីភាព ចេះយោគយល់គ្នា យល់ទុក្ខធុរៈគ្នា និងចេះយកអសារគ្នាទៅវិញទៅមក ជាពិសេសត្រូវរក្សាសុខភាពឱ្យល្អ ដោយការប្រតិបត្តិអនាម័យ និងថែរក្សាបរិស្ថានឱ្យស្អាត ដើម្បីចៀសវាងពីការឆ្លងមេរោគផ្សេងៗ៕

លោកជំទាវបណ្ឌិត ពេជ ចន្ទមុន្នី អញ្ជើញសំណេះសំណាលជាមួយសិល្បករ និងអ្នកផលិតមាតិកាលើបណ្តាញសង្គម

2025/06/16 07:38:18 pm        156
Facebook Telegram Linkin
ភ្នំពេញ ៖ នៅរសៀលថ្ងៃទី១៦ ខែមិថុនាឆ្នាំ ២០២៥នេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយស នៃមូលនិធិគន្ធបុប្ផាកម្ពុជា បានផ្ដល់កិត្តិយសដ៏ខ្ពង់ខ្ពស់ អញ្ជើញជួបសំណេះសំណាល ជាមួយក្រុមអ្នកមានប្រជាប្រិយភាពតាម បណ្តាញសង្គមចំនួន៦០នាក់ និងក្រុមសិល្បករមកពីផលិតកម្មបារមីចំនួន៣០នាក់ នាសណ្ឋាគាររ៉ាហ្វលឡឺរ៉ូយ៉ាល់ ដើម្បី ថ្លែងអំណរគុណ ក្នុងការចូលរួមជួយផ្សព្វផ្សាយក្នុង យុទ្ធនាការកៀរគររកមូលនិធិគន្ធបុប្ផាកម្ពុជា «១ម៉ឺនរៀល ១ម៉ឺននាក់» ឆ្នាំ២០២៥។ក្នុងឱកាសជួបសំណេះសំណាលសួរសុខទុក្ខ ដល់ក្រុមទាំងពីរខាងលើ លោកជំទាវបណ្ឌិត ប្រធានកិត្តិយស នៃមូលនិធិគន្ធបុប្ផាកម្ពុជា បានពាំនាំការសួរសុខទុក្ខពីសំណាក់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ជូនចំពោះ ក្រុមបង្កើតមាតិកាសង្គម ក៏ដូចជាក្រុមសិល្បករ ក្នុងការចូលរួមជួយផ្សព្វផ្សាយ ការគៀងគររកមូលនិធិគន្ធបុប្ផាកម្ពុជាឆ្នាំ 2025 ដែលជាកម្លាំងសាមគ្គីរួមគ្នា ជួយដល់ការងារសប្បុរសធម៌នៅក្នុងសង្គម។ លោកជំទាវបណ្ឌិតសូមថ្លែងអំណរគុណដល់ក្រុមទាំងពីរខាងលើ ដែលបានបូជាកម្លាំងកាយចិត្ត ក្នុងស្មារតីខ្មែរជួយខ្មែរ ជួយដល់មន្ទីរពេទ្យគន្ធបុប្ផាកម្ពុជា។ លោកជំទាវឱ្យដឹងថា មូលនិធិនេះបានបង្កើតឡើងដោយសម្ដេចតេជោ ហ៊ុន សែន និង សម្ដេចគតិព្រឹទ្ធបណ្ឌិត ប៊ុន រ៉ានី ហ៊ុនសែន សម្រាប់ជួយទៅដល់កុមារក្រីក្រ មកពីបណ្ដាខេត្តនានានៅទូទាំងប្រទេសកម្ពុជា ដោយក្នុងមួយថ្ងៃៗមន្ទីរពេទ្យគន្ធបុប្ផាកម្ពុជា ត្រូវចំណា យថវិកាប្រមាណ12ម៉ឺនដុល្លារអាមេរិកជាប្រចាំ ឬមួយឆ្នាំជាង43ម៉ឺនដុល្លារអាមេរិក ហើយឆ្នាំនេះគឺជាលើកទីពីរហើយ ដែលលោកជំទាវបណ្ឌិត បានចូលរួមនៅក្នុងការកៀរគរកមូលនិធិ ដោយឆ្នាំនេះឃើញថាមានសន្ទុះខ្លាំងជាងឆ្នាំមុន គិតត្រឹមរយៈ ពេល16ថ្ងៃ នៃយុទ្ធនាការ មានចំនួនអ្នកចូលរួមបរិច្ចាគរហូតដល់ជាង25ម៉ឺននាក់ គិតជាថវិកាបានចំនួនជាង4លានដុល្លារអាមេរិក គិតត្រឹមថ្ងៃទី១៦ខែមិថុនានេះ។ តំណាងក្រុមបុគ្គលមានប្រជាប្រិយភាព ក៏ដូចជាក្រុមសិល្បករ ដែលបានចូលរួមបានលើកឡើងថា ពួកគាត់ពិតមាន មោទនភាព ដែលរួចចំណែកក្នុងការផ្សព្វផ្សាយរកមូលនិធិនេះដើម្បីកុមារកម្ពុជា ដែលមានលោកជំទាវបណ្ឌិត ពេជ ចន្ទមុន្នី ហ៊ុនុម៉ាណែត ជាប្រធានកិត្តិយសបានអនុញ្ញាតឲ្យក្រុមទាំងពីរ បានចូលរួមក្នុងយុទ្ធនាការនេះ ដូច្នេះក្នុងនាមជាខ្មែរ ត្រូវមានកាតព្វកិច្ចចូលរួមក្នុងន័យ ខ្មែរជួយខ្មែរ ដែលកំពុងត្រូវការជំនួយប្រចាំថ្ងៃ នេះជាការលើកឡើងរបស់ពួកគាត់។ ​លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយស នៃមូលនិធិគន្ធបុប្ផាកម្ពុជា បានថ្លែងអំណរគុណ និងសូមកោតសរសើរអស់ពីចិត្ត ដល់ក្រុមបុគ្គលដែលមានប្រជាប្រិយភាព និងក្រុមសិល្បករ តំណាងអ្នកសារព័ត៌មាន ក៏ដូចជាអ្នកបង្កើតមាតិកាផ្សេងៗទៀត ដែលជួយផ្សព្វផ្សាយ ក៏ដូចជាសូមបន្តចូលរួមផ្សព្វផ្សាយ ឱ្យកាន់តែទូលំទលាយបន្ថែមទៀត។ លើសពីនោះទៀត លោកជំទាវបណ្ឌិត ក៏សូមថ្លែងអំណរគុណដល់ក្រុមប្រតិបត្តិករ នៃមូលនិធិគន្ធបុប្ផាកម្ពុជាទាំងអស់ ដែលបាន បង្កើតនូវសកម្មភាពថ្មីៗប្រចាំចុងសប្តាហ៍ ក្នុងការកៀរគររកមូលនិធិ ដែលទាំងអស់នេះជាគុណបុណ្យ ដ៏ធំ សម្រាប់យើងទាំងអស់គ្នា ដែលនេះបានបង្ហាញឱ្យឃើញច្បាស់អំពីស្មារតីសាមគ្គីភាពជាធ្លុងមួយ តាមរយៈមូលនិធិគន្ធបុប្ផាកម្ពុជា ក្នុងការសង្គ្រោះជីវិតទារក និងកុមារ ដែលជាទំពាំងស្នងឬស្សីរបស់ប្រទេសជាតិយើង៕ អត្ថបទៈ សំ ងីម

មន្ត្រីជាន់ខ្ពស់ក្រសួងមហាផ្ទៃលើកទឹកចិត្តដល់សិស្សបឹងធំ ឱ្យខំរៀនសូត្រ ដើម្បីចូលរួមអភិវឌ្ឍន៍សេដ្ឋកិច្ច-សង្គម

2025/06/16 07:22:02 pm        62
Facebook Telegram Linkin
ភ្នំពេញ ៖ មន្រ្តីជាន់ខ្ពស់ក្រសួងមហាផ្ទៃ លើកទឹកចិត្តដល់សិស្សានុសិស្សនៅវិទ្យាល័យបឹងធំ យកចិត្តទុកដាក់ខិតខំរៀនសូត្រ និងត្រូវធ្វើ ខ្លួនឲ្យទៅជាទំពាំងស្នងឫស្សីដ៏ល្អ ក្លាយជាធនធានដែលមានសក្តានុពល ដើម្បីចូលរួមក្នុងការអភិវឌ្ឍន៍សង្គម-សេដ្ឋកិច្ចកម្ពុជា ឲ្យមាន ការរីកចំរើន។​ លោកជំទាវ សំបូរ សម្ភស្ស អនុរដ្ឋលេខាធិការក្រសួងមហាផ្ទៃ លើកឡើងនៅក្នុងពិធីចែករង្វាន់សិស្សពូកែ នៅវិទ្យាល័យបឹងធំ និងការទទួលទានអាហារសាមគ្គី នៅក្នុងសង្កាត់បឹងធំ ខណ្ឌកំបូល រាជធានីភ្នំពេញ នៅថ្ងៃ១៥ ខែមិថុនា ឆ្នាំ២០២៥ នេះថា ជុំវិញការ អភិវឌ្ឍន៍ធនធានមនុស្ស រាជរដ្ឋាភិបាលអាណត្តិទី៧នៃរដ្ឋសភា, បាននិងកំពុងបន្តយកចិត្តទុកដាក់យ៉ាងខ្លាំង លើការពង្រឹងគុណភាព វិស័យអប់រំ កីឡា វិទ្យាសាស្រ្ត និងបច្ចេកវិទ្យា, និងការបណ្តុះបណ្តាលជំនាញបច្ចេកទេស ជាពិសេសនៅក្នុងសម័យនេះ ក្រៅពីការ រៀននៅសាលា ឬការអានសៀវភៅ ប្អូនៗអាចសិក្សា ស្រាវជ្រាវ នៅតាមប្រព័ន្ធបច្ចេកវិទ្យាឌីជីថលផ្សេងៗទៀត ដើម្បីបំពេញនូវចំនុច ខ្វះខាត ឬការទទួលបានព័ត៌មានថ្មីៗ សម្រាប់ជាពុទ្ធិពង្រឹកចំណេះដឹងបន្ថែម។ លោកជំទាវ បន្តថា ការសិក្សារៀនសូត្រ មិនត្រឹមតែអនុវត្តន៍បន្តពេញមួយជីវិតប៉ុណ្ណោះទេ ប៉ុន្តែគឺជាការងារមួយ តម្រូវឲ្យ មានការលើកកម្ពស់ និងអភិវឌ្ឍន៍គ្មានទីបញ្ចប់ ផលិតនូវធនធានមនុស្សប្រកបដោយគុណភាព និងមានសក្តានុពល ដើម្បីចូលរួម ចំណែកក្នុងការអភិវឌ្ឍន៍សង្គមជាតិឲ្យមានការរីកចំរើន ភាពសុខដុម និងចីរភាព ក្នុងនោះការអបរំត្រូវតែឆ្លើយតបទៅនឹងទីផ្សារ ពលកម្ម និងមានដំណើរការឆ្លើយតបទៅនឹងបរិការណ៍នៃសកលភាវូបនីយកម្ម ព្រោះការអប់រំល្អ គឺជាកូនសោរសម្រាប់ដោះស្រាយ នូវរាល់បញ្ហាសង្គម និងសេដ្ឋកិច្ចជាតិ។ជុំវិញស្ថានភាពនយោបាយដែលកំពុងបង្កដោយទាហ៊ានថៃ, ឯកឧត្តម ប៊ុន សំបូរ រដ្ឋលេខាធិការទីស្តីការគណៈរដ្ឋមន្រ្តី បាន អំពាវដល់សិស្សានុសិស្ស និងប្រជាពលរដ្ឋនៅក្នុងសង្កាត់បឹងធំ សូមកុំមានការភ័យខ្លាច ឬជឿពាក្យញ៉ោះញ៉ង់ពីជនមួយក្តាប់តូច ដែល តែងតែអុកឡុកក្នុងសង្គម បញ្ហានេះ, សូមបងប្អូនទាំងអស់ ជឿជាក់លើរាជរដ្ឋាភិបាល ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ជាពិសេសសិស្សានុសិស្ស ត្រូវខិតខំរៀនសូត្រឱ្យបានពូកែ ដើម្បីចូលរួមវិស័យការងារ និងការអភិវឌ្ឍន៍ ប្រទេសជាតិយើងឱ្យកាន់តែរុងរឿង។លោកជំទាវ អៀង ឫទ្ធា ប៊ុន សំបូរ បានលើកឡើងផងដែរថា ជុំវិញវិស័យអប់រំ រាជរដ្ឋាភិបាលបានវិនិយោគ និងចំណាយ ថវិការជាតិយ៉ាងច្រើនលើសលុប ដើម្បីគាំទ្រ ពង្រឹងគុណភាព និងគាំទ្រសេវាអប់រំ ការបណ្តុះ បណ្តាលជំនាញវិជ្ជាជីវៈ និងបច្ចេកទេស ដើម្បីបង្កើតអភវិឌ្ឍន៍ធនធានមនុស្សប្រកបដោយសក្តានុពល ។ បញ្ហានេះ សូមក្មួយៗដែលជាសិស្សពូកែ ត្រូវយកចិត្តទុកដាក់ខិតខំ រៀនសូត្របន្ថែម និងត្រូវធ្វើខ្លួនឲ្យទៅជាទំពាំងដ៏ល្អ ដើម្បីឈានទៅចូលរួមអភិវឌ្ឍន៍ប្រទេសជាតិ។សូមបញ្ជាក់ថា នៅក្នុងពិធីនេះដែរ ឯកឧត្តមនិងលោកជំទាវ ក៏បានចែកជូនវិញ្ញាបនបត្រ សម្ភារៈសិក្សា និងថវិកាមួយចំនួន ជូនដល់ សិស្សពូកែនៅវិទ្យាល័យបឹងធំ និងក៏មានការចាប់រង្វាន់ជាច្រើនមុខ ដើម្បីលើកទឹកចិត្តដល់សិស្សានុសិស្ស ដែលទទួលបានចំណាត់ ថ្នាក់លេខ១ លេខ២ និងលេខ៣ និងសិស្សានុសិស្សដែលមិនជាប់លំដាប់ថ្នាក់ លោកគ្រូ-អ្នកគ្រូ និងប្រជាពលរដ្ឋ និងការចែករទេះ រុញជូនជនពិការភាព១នាក់ និងការចែកកុំព្យូទ័រដល់វិទ្យាល័យបឹងធំផងដែរ៕ អត្ថបទ៖ សុន រ៉ាឌី

TOP STORY កម្ពុជាបានបញ្ជូនបណ្ដឹងផ្លូវការទៅដល់ ICJ ដើម្បីជួយស្វែងរកដំណោះស្រាយបញ្ហាវិវាទព្រំដែនជាមួយថៃ

2025/06/16 05:33:22 pm        732
Facebook Telegram Linkin
ភ្នំពេញ៖ រាជរដ្ឋាភិបាលកម្ពុជា នៅថ្ងៃទី១៦ ខែមិថុនា ឆ្នាំ២០២៥នេះ បានបញ្ជូនលិខិតផ្លូវការរបស់កម្ពុជាទៅកាន់តុលាការយុត្តិធម៌អន្តរជាតិ (ICJ) ដើម្បីជួយស្វែងរកដំណោះស្រាយបញ្ហាវិវាទព្រំដែននៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី។ សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានបញ្ជាក់នៅលើបណ្ដាញសង្គមនៅថ្ងៃនេះថា ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងកិច្ចសហប្រតិបត្តិការអន្តរជាតិទើបរាយការណ៍មកថា នៅថ្ងៃចន្ទទី ១៦ មិថុនា ២០២៥ វេលាម៉ោង ១១:៣០ នាទីព្រឹក នៅទីក្រុងឡាអេ (ត្រូវនឹងម៉ោង ៤:៣០នាទី ល្ងាចនៅរាជធានីភ្នំពេញ)ថាលិខិតផ្លូវការរបស់កម្ពុជាទៅកាន់តុលាការយុត្តិធម៌អន្តរជាតិ (ICJ) ដើម្បីជួយស្វែងរកដំណោះស្រាយបញ្ហាវិវាទព្រំដែននៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ត្រូវបានលោកជំទាវ គឹមសួគ៌ សុវណ្ណារី ឯកអគ្គរាជទូតកម្ពុជាប្រចាំប្រទេសហូឡង់ ប្រគល់ដោយផ្ទាល់ដៃជូនលោកក្រឡាបញ្ជី Philippe Gautier នៅតុលាការយុត្តិធម៌អន្តរជាតិ (ICJ)។សម្ដេចធិបតី នាយករដ្ឋមន្រ្ដីបានបញ្ជាក់ថា កម្ពុជាមិនដកថយទេ ពាក់ព័ន្ធនឹងការស្នើសុំអោយតុលាការយុត្តិធម៌អន្តរជាតិ (ICJ) ជួយដោះស្រាយបញ្ហាព្រំដែនកម្ពុជា-ថៃ នៅប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី។ សម្ដេចបានថ្លែងថា រាជរដ្ឋាភិបាលនឹងបន្តកិច្ចការនេះប្រកបដោយការប្តេជ្ញាចិត្ត និងការទទួលខុសត្រូវខ្ពស់ ដើម្បីការពារបូរណភាពទឹកដី ក៏ដូចជាឧត្តមប្រយោជន៍ជាតិនិងប្រជាជនខ្មែរ៕រូបហ្វេសប៊ុកសម្ដេចធិបតី

អភិបាលខេត្តបន្ទាយមានជ័យ៖ ក្រុមការងារពាក់ព័ន្ធកំពុងត្រៀមទទួលពុកម៉ែបងប្អូនមានកន្លែងស្នាក់នៅបណ្តោះអាសន្ន រយៈពេលវែង និងសម្រួលឯកសារពាក់ព័ន្ធ

2025/06/16 04:34:46 pm        79
Facebook Telegram Linkin
បន្ទាយមានជ័យ៖ នៅល្ងាចថ្ងៃទី១៦ ខែមិថុនានេះ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានអំពាវនាវដល់បងប្អូនពលករខ្មែត្រូវមកពីប្រទេសថៃ តាមច្រកអន្តរជាតិទាំងពីរក្នុងខេត្តបន្ទាយមានជ័យ ក្រុមការងារចម្រុះក្រសួង ខេត្ត កងកម្លាំងពាក់ព័ន្ធ បាននឹងកំពុងត្រៀមទទួលពុកម៉ែបងប្អូនមានកន្លែងស្នាក់នៅបណ្តោះអាសន្នរយៈពេលវែង និងសម្រួលឯកសារពាក់ព័ន្ធ តាមរយៈសារសំឡេងផ្សព្វផ្សាយតាមបណ្តាញសង្គមនាព្រឹកថ្ងៃទី១៦ ខែមិថុនា ឆ្នាំ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំទៅឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា និងសារពិសេសសម្តេចតេជោ ហ៊ុន សែន ប្រធានព្រឹទ្ធិសភានៃព្រះរាជាណាចក្រកម្ពុជា ប្រាក់ទៅស្ថានកុងស៊ុលខ្មែរនៅ ប្រទេសថៃ ជួយសម្រួលឯកសារនានា ដែលពលករខ្មែរខ្វះខាតសម្រាប់ឆ្លងដែន មកកម្ពុជា។ឯកឧត្តម អ៊ុំ រាត្រី បានថ្លែងថា ក្នុងកំលុងពេលដែលកម្ពុជា និងថៃមានវិវាទព្រំដែនជាមួយគ្នានេះ មានជនជ្រុលនិយមថៃមួយចំនួនបានគំរាមដេញពលករខ្មែរត្រឡប់មកប្រទេសវិញ ហើយពលរដ្ឋថៃ ដែលមានភាពជ្រុលនិយមខ្លះ ក៏បានរើសអើងសម្រាប់ពលករខ្មែរផងដែរ។សូមជម្រាបជូនពុកម៉ែបងប្អូនពលករខ្មែរ នៅប្រទេសច្រកព្រំដែន កម្ពុជា-ថៃ ច្រកទ្វារអន្តរជាតិប៉ោយប៉ែត ច្រកទ្វារព្រំដែនស្ទឹងបត់ អាជ្ញាធរខេត្ត ក្រុមការងារក្រសួងការងារ និងបណ្តុះបណ្តាលវិជ្ជាជីវ: បាននិងកំពុងប្រចាំការដើម្បីរង់ចាំទទួលស្វាគមន៍បងប្អូនប្រជាពលរដ្ឋ និងពលករខ្មែរ ដែលត្រឡប់មកពីប្រទេសថៃវិញ។សូមពុកម៉ែបងប្អូនប្រជាពលរដ្ឋទាំងអស់កុំមានការព្រួយបារម្ភចំពោះការវិលត្រឡប់វិញទោះជាគ្មានឯកសារគ្រប់គ្រានក៍ដោយ តាមបទបញ្ជា និងសារសម្លេងរបស់សម្តេច ក្រុមការងារបានត្រៀមលក្ខណះសម្រួលឯកសារនានា មានអាហារបណ្តោះអាសន្ន រយ:ពេលវែងកន្លែងទទួលសមរម្យ និងរថយន្តជួយដឹកជញ្ជូនបងប្អូនត្រឡប់ទៅស្រុកកំណើតវិញ។ ជាមួយគ្នានេះ ក្រសួងការងារ និងបណ្ដុះបណ្ដាលវិជ្ជាជីវៈ ដែលជាសេនាធិការរបស់រាជរដ្ឋាភិបាល បានត្រៀមខ្លួនរួចជាស្រេចក្នុងការទទួលស្វាគមន៍បងប្អូនប្រជាពលរដ្ឋ និងពលករខ្មែរ ដែលវិលត្រឡប់ពីប្រទេសថៃមកមាតុភូមិកម្ពុជានៅគ្រប់ច្រកព្រំដែន កម្ពុជា-ថៃ ដើម្បីជួយសម្របសម្រួលជូនបងប្អូនទាំងផ្លូវច្បាប់ ការផ្ដល់ការងារថ្មីនៅក្នុងស្រុក និងផ្ដល់ការបណ្ដុះបណ្ដាលជំនាញបច្ចេកទេស និងវិជ្ជាជីវៈមួយច្បាស់លាស់ ជាមួយគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈនានានៅកម្ពុជា ដែលក្នុងនោះអង្គភាពក្រោមឱវាទក្រសួងការងារ និងបណ្តុះបណ្តាលវិជ្ជាជីវៈ ដែលមានទីភ្នាក់ងារជាតិមុខរបរ និងការងារ (NEA), TVET, និងបេឡាជាតិសន្តិសុខសង្គម (ប.ស.ស.) ព្រមទាំងមន្រ្តី ទាំងថ្នាក់ជាតិ និងថ្នាក់ក្រោមជាតិ ក៏បាននឹងកំពុងសស្រាក់សស្រាំអស់ពីកម្លាំងកាយចិត្ត ក្នុងការអនុវត្តលើការងារនេះផងដែរ៕

គណៈប្រតិភូនៃប្រទេសនីហ្សេរីយ៉ា មួយក្រុមមកសិក្សាស្វែងយល់ពីដំណើរការកសាងសន្ដិភាព និងការអភិវឌ្ឍឡើងវិញលើគ្រប់វិស័យ ជាពិសេសការអភិវឌ្ឍសេដ្ឋកិច្ចសង្គមនៅកម្ពុជាតាមរយៈការបោសសម្អាតមីន

2025/06/16 04:09:53 pm        52
Facebook Telegram Linkin
(ភ្នំពេញ) ៖ នាព្រឹកថ្ងៃចន្ទ ទី១៦ ខែមិថុនា ឆ្នាំ២០២៥ នៅទីបញ្ជាការស៊ីម៉ាក់ភ្នំពេញឯកឧត្តម ហេង រតនា ប្រតិភូរាជ រដ្ឋាភិបាលកម្ពុជាទទួលបន្ទុកជាអគ្គនាយកនៃមជ្ឍមណ្ឌលសកម្មភាពកំចាត់មីនកម្ពុជា បានទទួលស្វាគមន៍ និងពិភាក្សាការងារជាមួយគណៈប្រតិភូប្រទេសនីហ្សេរីយ៉ា ដឹកនាំដោយលោក Mohammed Goni Alkali នាយកប្រតិបត្តិនៃគណៈកម្មាធិការអភិវឌ្ឍន៍ភូមិភាគឦសាននៃប្រទេសនីហ្សេរីយ៉ា ក្នុងឱកាសបំពេញទស្សនកិច្ចការងារចាប់ពីថ្ងៃទី ១៦ ដល់ថ្ងៃទី ២០ ខែមិថុនា ឆ្នាំ២០២៥។​ ក្នុងជំនួបសម្តែងការគួរសម និងពិភាក្សាការងារនេះ គណៈប្រតិភូនៃប្រទេសនីហ្សេរីយ៉ា មានបំណងសិក្សាស្វែង យល់អំពីបទពិសោធរបស់ប្រទេសកម្ពុជាដែលធ្លាប់ឆ្លង កាត់សម័យសង្រ្គាមជាង៣ទស្សវត្សរ៍ ការបង្រួបបង្រួមជាតិតាមរយៈការអនុវត្តនយោបាយឈ្នះឈ្នះ ការស្វែងយល់ឲ្យស៊ីជម្រៅពីដំណើរការកសាងសន្ដិភាព ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន និងដំណើរការស្ដារនិងការកសាងឡើងវិញ ព្រមទាំងការអភិវឌ្ឍឡើងវិញលើគ្រប់វិស័យប្រកបដោយចីរភាព ជាពិសេសការអភិវឌ្ឍសេដ្ឋកិច្ចសង្គមតាមរយៈការបោស សម្អាតមីន ។ តាមរយៈជំនួបពិភាក្សានេះ លោក Mohammed Goni Alkali បានសម្តែងនូវការកោតសរសើរចំពោះការ សម្រេចបានរបស់រាជរដ្ឋាភិបាលកម្ពុជាក្នុងការរក្សាបាននូវសុខសន្តិភាពពេញលេញឡើងវិញប្រកបដោយភាពខ្លាំង ជាពិសេសការដាក់ចេញនូវគោលនយោបាយវិស័យសកម្ម ភាពកំចាត់មីន ដែលកម្ពុជាសម្រេចបានលទ្ធផលយ៉ាងត្រចះត្រចង់លើឆាកអន្តរជាតិ ។ លោកសង្ឃឹមថា អង្គភាព CMAC និងចែករំលែកបទពិសោធន៍ដែលបានអនុវត្តប្រកបដោយជោគជ័យកន្លងមក លើការងារបោសសម្អាតមីនមនុស្សធម៌ និងការពង្រឹងការចូលរួមរបស់ប្រជាជននៅក្នុងការការពារពីគ្រោះថ្នាក់ដោយសារគ្រាប់មីន និងសំណល់យុទ្ធភណ្ឌសង្គ្រាម។ ឯកឧត្តម ហេង រតនា បានឲ្យដឹងដែរថា គណ:ប្រតិភូពិតជាមានបំណងស្វែង យល់សន្តិភាពនិងសកម្មភាពកម្ចាត់មី&សំណល់យុទ្ធភណ្ឌសង្គ្រាមនៅកម្ពុជា។ឯកឧត្តមបានបន្តថា រដ្ឋាភិបាលជប៉ុនតាមរយៈJICA​ បានរៀបចំដំណេីរទស្សនកិច្ចសិក្សានេះឡេីង​ ដេីម្បីពង្រឹងកិច្ចសហ ប្រតិ បត្តិការអន្តរជាតិ​ និងការចែករំលែកបទពិសោធសកម្មភាពកម្ចាត់មីនមនុស្សធម៌របស់រាជរដ្ឋាភិបាលកម្ពុជា​ ជាមួយប្រទេសមានបញ្ហាមីន&សំណល់យុទ្ធភណ្ឌសង្គ្រាមនៅលេីពិភពលោក ។  ជាក់ស្តែង​ អង្គភាពសុីម៉ាក់ត្រៀមសហការជាមួយប្រទសអាហ្វិកចំនួន៥រួមមាន​ប្រទេសនីហ្សេរីយ៉ា​ ស៊ូដង់ខាងត្បូង​ អេចូពី ស៊ូដង់​ និងប្រទេសសូម៉ាលី​ ដេីម្បីការហ្វឹកហ្វឺនសកម្មភាពមីនមនុស្សធម៌ក្រោមការគាំទ្រពីរដ្ឋាភិបាលជប៉ុន។សូមបញ្ជាក់ថា​ សាធារណរដ្ឋសហព័ន្ធនីហ្សេរីយ៉ា (Federal Republic of Nigeria) គឺជាប្រទេសមួយស្ថិតនៅក្នុងតំបន់អាហ្រ្វិកខាងលិចជាប្រទេស​ ដែលមានចំនួនប្រជាជនច្រើន ជាងគេនៅទ្វីបអាហ្រ្វិក។ នីហ្សេរីយ៉ាមានទីតាំងភូមិសាស្ត្រនៅរវាងវាលលំហសាហែលទៅភាគខាងជើង និង ឈូង សមុទ្រគីនេនៅភាគខាងត្បូងក្នុងមហា សមុទ្រអាត្លង់ទិក ដោយគ្របដណ្ដប់លើផ្ទៃដីសរុប ៩២៣,៧៦៩ គីឡូម៉ែត្រការ៉េ និងមានប្រជាជនជាង ២២៨ លាននាក់​ (គិតត្រឹមឆ្នាំ២០២៣)​ ជាប់លេខ៦លេីសកលលោក ។ ប្រទេសនីហ្សេរីយ៉ា​ នេះមានសង្គ្រាមកាលពីឆ្នាំ ១៩៦៧ -១៩៧០​ និងបន្តមានសង្គ្រាមជាហូរហែរមកទៀតដោយមានជនជាតិ ភាគតិចប្រមាណ២៥០៕  ដោយ ៖ ភារម្យ

សម្ដេចតេជោ អំពាវនាវឱ្យពលរដ្ឋខ្មែរងាកមកប្រើប្រាស់បន្លែផ្លែឈើក្នុងស្រុក ដោយព្រមានបិទការនាំចូលពីថៃ

2025/06/16 04:01:30 pm        84
Facebook Telegram Linkin
សម្តេចតេជោ ហ៊ុន សែន ប្រធានព្រឹទ្ធសភា បានអំពាវនាវឱ្យប្រជាពលរដ្ឋខ្មែរងាកមកប្រើប្រាស់ បន្លែផ្លែ ឈើក្នុងស្រុកវិញ ដោយព្រមានបិទការនាំចូលបន្លែផ្លែឈើពីប្រទេសថៃ ប្រសិនបើយោធាថៃ មិនព្រមផ្លាស់ប្ដូរ ការសម្រេចចិត្តក្នុងបិទច្រកព្រំដែននោះ ។សម្តេចតេជោ ហ៊ុន សែន ប្រធានព្រឹទ្ធសភា នៅព្រឹកថ្ងៃទី១៦ ខែមិថុនានេះ មុនដឹកនាំកិច្ចប្រជុំពេញ អង្គព្រឹទ្ធសភា បានឆ្លៀតឱកាសផ្ញើសារពិសេសជូនជនរួមជាតិ ដោយបានបញ្ជាក់ថា ប្រើសិនបើភាគីថៃ មិន បើកព្រំដែនវិញនៅថ្ងៃនេះ កម្ពុជានឹងលែងឱ្យមានការនាំចូលទំនិញគ្រប់ ប្រភេទ ពិសេសគឺបន្លែផ្លែឈើ។សម្ដេចតេជោ ហ៊ុន សែន បានអំពាវនាវដល់ប្រជាពលរដ្ឋខ្មែរ អ្នកលក់ផលិតផលខ្មែរ ក្នុង កាលៈទេសៈនេះ កុំដំឡើងថ្លៃទំនិញរបស់ខ្មែរ បើសិនជាមានការបិទលែងឱ្យនាំទំនិញ ពី​ប្រទេសថៃចូលមក។របាយការណ៍របស់ក្រសួងពាណិជ្ជកម្ម បានឱ្យដឹងថា នៅឆ្នាំ២០២៤ កម្ពុជា នាំទំនិញទៅថៃ មាន តម្លៃជាង ១.១ពាន់លានដុល្លារ ឯការនាំចូលពីថៃ មានតម្លៃជាង ៥.២ពាន់លានដុល្លារ ពោល​គឺការនាំចូលពីថៃ ច្រើនជាង៤.១ពាន់លានដុល្លារ។ សម្រាប់រយៈពេល៥ខែឆ្នាំ២០២៥នេះ កម្ពុជា នាំចេញទៅថៃ មានជាង ២០០លានដុល្លារ​ ឯការនាំចូលពីថៃ មានជាង១.៥ពាន់លានដុល្លារ៕អត្ថបទ៖ ទូច សោភ័ណ

បណ្ដាញសង្គម

ព័ត៌មានថ្មីៗ

អ្នកនាំពាក្យសម្តេចតេជោ ចំអកទៅអ្នកនាំពាក្យក្រសួងការទេសថៃថា ពិតជាមិនចេះខ្មាស់មែន!
06/17/2025 12:06 AM
Facebook Telegram Linkin
ទិវាជាតិ ធីវ៉េត លើកទី៨ ឆ្នាំនេះ ទទួលបានអ្នកចូលរួម និងអ្នកទស្សនាសរុបចំនួនប្រមាណ ៧ម៉ឺននាក់ នៅទូទាំងប្រទេស
06/16/2025 09:06 PM
Facebook Telegram Linkin
គ.ជ.អ.អ បើកកិច្ចប្រជុំលើកដំបូងដើម្បីជំរុញការអភិវឌ្ឍសហគមន៍ទេសចរណ៍ និងអេកូទេសចរណ៍
06/16/2025 09:06 PM
Facebook Telegram Linkin
ក្តីសង្ឃឹម និងក្តីសាទរបានកើតមាននៅតំបន់កាស្មៀរប្រទេសឥណ្ឌា ខណៈតំបន់ទេសចរណ៍បើកឡើងវិញ
06/16/2025 08:06 PM
Facebook Telegram Linkin
ឯកឧត្តម នាយឧត្តមសេនីយ៍ គន់ គីម ចុះសួរសុខទុក្ខបងប្អូនប្រជាពលរដ្ឋ ដែលបានភៀសខ្លួនទៅទីសុវត្ថិភាពបណ្ដោះអាសន្ននៅខេត្តព្រះវិហារ
06/16/2025 08:06 PM
Facebook Telegram Linkin
លោក Netanyahu៖ កងទ័ពអាកាសអ៊ីស្រាអែល គ្រប់គ្រងបានដែនអាកាសលើទីក្រុងតេអេរ៉ង់
06/16/2025 08:06 PM
Facebook Telegram Linkin
ជនប៉ាឡេស្ទីននៅតំបន់ហ្កាហ្សា នាំគ្នាកាន់ទុក្ខអ្នកដែលត្រូវបានសម្លាប់ដោយការវាយប្រហាររបស់អ៊ីស្រាអែល
06/16/2025 08:06 PM
Facebook Telegram Linkin
អ៊ុយក្រែន៖ ការធ្វើមាតុភូមិនិវត្តន៍នៃអ្នកស្លាប់ក្នុងសង្រ្គាម ចប់ហើយ ក្រោយទទួលបានសព ១.២៤៥នាក់ទៀតពីរុស្ស៊ី
06/16/2025 08:06 PM
Facebook Telegram Linkin
វិមានក្រឹមឡាំង៖ ទាំងលោក Putin និងលោក Erdogan ថ្កោលទោសវិធានការរបស់អ៊ីស្រាអែល លើអ៊ីរ៉ង់
06/16/2025 08:06 PM
Facebook Telegram Linkin
អ៊ីស្រាអែលរិះគន់ការសម្រេចរបស់បារាំង ក្នុងការបាំងស្តង់ពិព័រណ៍យន្តហោះ នៅក្រុងប៉ារីស
06/16/2025 08:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.