នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សាខាសមាគមសិស្សនិស្សិតបញ្ញវន្តក្មេងវត្តខណ្ឌព្រែកព្នៅ បានចូលរួមផ្សព្វផ្សាយផែនការអាជីព និងការជ្រើសរើសជំនាញសិក្សា
យុវជន០២នាក់ជាសិស្សរងរបួសធ្ងន់ធ្ងរ ក្រោយគ្រោះថ្នាក់ចរាចរណ៍ រថយន្តបុកពីមុខយ៉ាងពេញទំហឹង
ផ្លូវបេតុងអាមេ ១ខ្សែ ប្រវែង ១០០០ម៉ែត្រ នៅក្រុងតាខ្មៅ ត្រូវបានបើកការដ្ឋានសាងសង់
អ្នកវិនិយោគចិន គ្រោងពង្រីកសាខាក្រុមហ៊ុន និងបណ្តុះបណ្តាលវិស្វករជំនាញ ក្នុងភូមិសាស្ត្រខេត្តកំពង់ស្ពឺ

ព័ត៌មានជាតិ

ក្រសួងការងាររៀបចំវេទិកាការងារនៅខេត្តបាត់ដំបង ផ្ដល់ឱកាសការងាររាប់ម៉ឺនកន្លែងដល់អតីតពលករ

2026/06/05 02:51:20 pm        96
Facebook Telegram Linkin
ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ បានរៀបចំវេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈនៅខេត្តបាត់ដំបងដើម្បីផ្តល់ឱកាសការងារប្រមាណជាង៩ម៉ឺនកន្លែង រួមទាំងអត្ថប្រយោជន៍នៃរបបសន្តិសុខសង្គម (ប.ស.ស.) និងវគ្គបណ្តុះបណ្តាលជំនាញបច្ចេកទេស និងវិជ្ជាជីវៈ ដោយឥតគិតថ្លៃជូនអ្នកកំពុងស្វែងរកការងារធ្វើ ជាពិសេសបងប្អូនអតីតពលករត្រឡប់មកពីប្រទេសថៃ។ក្នុងវេទិកាការងារ នៅថ្ងៃទី៥ ខែមិថុនា ឆ្នាំ២០២៦នេះ នៅបរិវេណវត្តឧត្តមមានជ័យសិរីមុន្នី ហៅវត្តស្តុកប្រវឹក ស្រុករុក្ខគីរី ឯកឧត្តម សាន គីមហុង អនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈបានលើកឡើងពីអត្ថប្រយោជន៍ដ៏ច្រើនលើសលប់សម្រាប់ការងារនៅក្នុងស្រុកតាមរយៈទទួលបានរបបសន្តិសុខសង្គម (ប.ស.ស.)រួមមាន៖១.ផ្នែកថែទាំសុខភាព៖ បងប្អូនទទួលបានការពិនិត្យ និងព្យាបាលជំងឺ ឬគ្រោះថ្នាក់ការងារ នៅតាមមន្ទីរពេទ្យដៃគូដោយមិនអស់ប្រាក់ ដែលជួយសម្រាលបន្ទុកចំណាយក្នុងគ្រួសារបានយ៉ាងច្រើន។២.ផ្នែកសោធននិវត្តន៍៖ ធានានូវសន្តិសុខសេដ្ឋកិច្ចនៅពេលចាស់ជរា ដោយបងប្អូននឹងទទួលបានប្រាក់ចូលនិវត្តន៍ប្រចាំខែសម្រាប់ចិញ្ចឹមជីវិត ដូចមន្ត្រីរាជការដែរ។៣.ផ្នែកហានិភ័យការងារ៖ ផ្ដល់ការគាំពារ និងប្រាក់បំណាច់ផ្សេងៗ ក្នុងករណីមានគ្រោះថ្នាក់កើតឡើងជាយថាហេតុក្នុងពេលបំពេញការងារ ឬពេលធ្វើដំណើរ។ជាមួយគ្នានេះ ការងារក្នុងស្រុកជួយឱ្យបងប្អូនបានរស់នៅជួបជុំគ្រួសារ មើលថែទាំកូន និងឪពុកម្ដាយ ចៀសផុតពីការកេងប្រវ័ញ្ចកម្លាំងពលកម្មខុសច្បាប់នៅក្រៅប្រទេស។បន្ថែមពីនេះ ឯកឧត្តម បានលើកទឹកចិត្តឱ្យប្រជាពលរដ្ឋ យុវជន និងអតីតពលករស្វែងរកឱកាសការងារក្នុងស្រុក និងចាប់យកការបណ្ដុះបណ្ដាលជំនាញបច្ចេកទេស (TVET ១,៥លាននាក់) ដើម្បីបង្កើនសមត្ថភាព និងទទួលបានប្រាក់ចំណូលកាន់តែខ្ពស់។ ប្រជាពលរដ្ឋ និងអតីតពលករខ្មែរវិលត្រឡប់មកពីថៃ បានបង្ហាញអារម្មណ៍សប្បាយរីករាយ និងថ្លែងអំណរគុណដល់រាជរដ្ឋាភិបាលតាមរយៈក្រសួងការងារ និងបណ្ដុះបណ្ដាលវិជ្ជាជីវៈដែលបាននាំយកឱកាសការងាររាប់ម៉ឺនកន្លែង និងកម្មវិធីបណ្ដុះបណ្ដាលជំនាញបច្ចេកទេសវិជ្ជាជីវៈមកផ្ដល់ជូនពួកគាត់ដល់មូលដ្ឋាន។សូមជម្រាបថា វេទិកាការងារនាថ្ងៃនេះ មានសហគ្រាស ក្រុមហ៊ុន និងរោងចក្រជាច្រើនចូលរួមសម្ភាសជ្រើសរើសបុគ្គលិកនៅកន្លែងផ្ទាល់ហើយអ្នកចូលរួមទាំងអស់ទទួលបានព័ត៌មានអំពីឱកាសការងារដ៏សម្បូរបែប វគ្គបណ្តុះបណ្តាលបច្ចេកទេស និងអត្ថប្រយោជន៍របស់បេឡាជាតិសន្តិសុខសង្គម។បន្ថែមពីនេះអ្នកចូលរួមទទួលបានអាហារ ភេសជ្ជៈ ការដឹកជញ្ជូនទៅចូលរួមវេទិកាដោយឥតគិតថ្លៃ៕អត្ថបទ៖ សុភ័ក្ដ្រ

សង្គមស៊ិវិលគាំទ្ររដ្ឋាភិបាលប្រើប្រាស់យន្តការផ្សះផ្សាដោយបង្ខំក្រោមអនុសញ្ញា UNCLOS

2026/06/05 02:47:19 pm        210
Facebook Telegram Linkin
អង្គការសង្គមស៊ិវិល គាំទ្រចំពោះចំណាត់ការដ៏ត្រឹមត្រូវប្រកបដោយការទទួលខុសត្រូវ និង​ស្រប​តាម​គោលការណ៍ច្បាប់អន្តរជាតិរបស់រាជរដ្ឋាភិបាលកម្ពុជា ក្នុងការ​ចាប់​ផ្តើម​ដំណើរ​ការ​យន្ត​ការ​ផ្សះ​ផ្សាដោ​​យបង្ខំក្រោមអនុសញ្ញាអង្គការសហប្រជាជាតិ ស្តីពីនីតិសមុទ្រ។ បណ្ឌិត ហ៊ាង គឹមស្រឿន ប្រធានសមាគមសហព័ន្ធដើម្បីសន្តិភាព បានថ្លែងថា សមាគម​យល់​ស្រប​ចំពោះ​ការសម្រេចចិត្តរបស់រាជរដ្ឋាភិបាល នៅក្នុងការជូនដំណឹងជាផ្លូវការទៅកាន់ភាគីថៃ និង​អគ្គលេខាធិការអង្គការសហប្រជាជាតិ ដើម្បីចាប់​ផ្តើម​ដំណើរ​ការ​យន្ត​ការ​ផ្សះផ្សា​ដោយ​បង្ខំ​ក្រោមអនុសញ្ញាអង្គការសហប្រជាជាតិស្តីពីនីតិសមុទ្រ ឆ្នាំ១៩៨២។ ហើយ​ការ​សម្រេច​ចិត្ត​រប​ស់​រដ្ឋាភិបាល គឺជាការសម្រេចចិត្តមួយដោយឈរលើគោលការណ៍អនុវត្តច្បាប់អន្តរជាតិ។ ចំណែកក្រុមយុវជនសមាគមនៃយុវជនអ្នកបន្តវេន បាន​បង្ហាញ​ការ​គាំទ្រ​យ៉ាង​ពេញ​ទំហឹង​ទៅ​លើ​រាជ​រដ្ឋាភិបាល ក្រោមការដឹកនាំដោយសម្តេចធិបតី ហ៊ុន ម៉ាណែត ដែលបាន​ប្រើ​ប្រាស់​យន្ត​ការ​ការ​ផ្សះផ្សាដោយបង្ខំ និងជាយន្តការមួយដែលនឹងធ្វើឱ្យកម្ពុជាទទួលបានយុត្តិធម៌ និង​បន្សល់​ទុក​ព្រំដែន​មួយ​ច្បាស់ លាស់ដល់អ្នកជំនាន់ក្រោយ។ សម្តេចធិបតី ហ៊ុន ម៉ាណែត នាយករដ្ឋមន្ត្រី បានបញ្ជាក់ហើយបញ្ជាក់ទៀតថា កម្ពុជា​តែង​តែ​ប្រកាន់​ភ្ជាប់​នូវគោលការណ៍ដោះស្រាយវិវាទជាមួយប្រទេសជិតខាងដោយសន្តិវិធី។ កម្ពុជា​នៅ​តែ​មាន​បំណង​កសាង​ទំនាក់​ទំនង​ជាមួយ​ភាគី​ថៃ​ដោយ​ឈរ​លើ​មូលដ្ឋាន​សន្តិភាព​កិច្ច​សហ​ប្រតិបត្តិ​ការ​ និងការគោរពគ្នាទៅវិទៅមក។ ទន្ទឹមនឹងនេះ អធិបតេយ្យភាពជាតិ និងសិទ្ធិ​លើ​ដែន​សមុទ្រ​របស់​កម្ពុជា​ត្រូវ​តែគោរពជាដាច់ខាត៕ អត្ថបទ៖ វង្ស សុភាព

កូនខ្មែរ ៣នាក់បងប្អូន ប្រឡងក្នុងប្រទេស ក្រៅប្រទេសទទួលបានពានរង្វាន់និងមេដាយជាង ៣០០មេដាយ

2026/06/05 02:38:24 pm        261
Facebook Telegram Linkin
កូនខ្មែរ ៣នាក់បងប្អូនបង្កើត ដែលទើបសិក្សាថ្នាក់ទី ៣ ថ្នាក់ទី ៥ និងថ្នាក់ទី ៧ បានក្លាយជាគំរូ និងជាធនធានល្អមួយសម្រាប់សង្គមជាតិនាពេលអនាគត។ ជាធនធាន ជាគំរូ ស្របពេលដែលពួកគាត់ ព្យាយាមសិក្សាជាប្រចាំ ចូលរួមប្រកួតប្រជែងជាញឹកញាប់ ដោយត្រឹមរយៈពេលជាង ២ឆ្នាំ ពួកគេទាំង ៣នាក់បងប្អូន ទទួលបានពានរង្វាន់ប្រមាណ ២០ និងមានមេដាយរហូតដល់ជាង ៣០០មេដាយពីការប្រកួតប្រជែងក្នុងស្រុក និងក្រៅប្រទេស។ត្រឹមរយៈពេលជាង ២ឆ្នាំ ប៉ុណ្ណោះ កុមារា ឆោម ឆាយាភ្រឹត ថ្នាក់ទី៧ កុមារា ឆោម ចក្រាយុធ ថ្នាក់ទី៥ និងកុមារី ឆោម ឆដាភា ថ្នាក់ទី ៣ ជាបងប្អូនបង្កើតនឹងគ្នា បានបន្តចូលរួមប្រកួតប្រជែងជាបន្តបន្ទាប់ លើមុខវិជ្ជាគណិតវិទ្យា វិទ្យាសាស្ត្រ និងភាសាអង់គ្លេស។ ពួកគេភាគច្រើនចូលរួមប្រកួតប្រជែង ទាំង ៣នាក់បងប្អូន ទាំងការប្រកួតក្នុងស្រុក ក៏ដូចជាការចេញទៅប្រកួតប្រជែងនៅក្រៅប្រទេស។ ការប្រកួតប្រជែងនេះ មានភាពញឹកញាប់ ដោយពេលខ្លះ ពួកគាត់ចូលរួមប្រឡងស្ទើររៀងរាល់សប្ដាហ៍។ ចូលរួមប្រកួតប្រជែង តែងត្រឡប់មកវិញ នូវមេដាយ និងពានរង្វាន់។ ការចូលរួមប្រកួតប្រជែង ការទទួលបានមេដាយត្រឡប់មកវិញ ផ្ដល់នូវស្នាមញញឹម ផ្ដល់នូវភាពសប្បាយចិត្ត និងជាការតាំងចិត្តក្នុងចូលរួមប្រកួតប្រជែងជាបន្តបន្ទាប់។សម្រាប់លោកស្រី ផ្លុង ស៊ីសុវណ្ណាសក្ខ័នា ជាម្ដាយកុមារទាំង ៣ បានបង្ហាញភាពសប្បាយចិត្តជាខ្លាំង ដែលកូនៗ ព្យាយាមសិក្សារៀនសូត្រ និងតែងសម្រេចបានលទ្ធផលល្អទាំងការបប្រកួតប្រជែងក្នុងស្រុក និងការប្រកួតប្រជែងក្រៅស្រុក។ ជាអាណាព្យាបាល គាត់តែងតែលើកទឹកចិត្តកូន ជុំរុញកូន តែមិនដាក់សម្ពាធលើកូននោះទេ។សម្រាប់កុមារទាំង ៣នាក់បងប្អូន នាពេលខាងមុខ នឹងបន្តចូលរួមប្រកួតប្រជែងជាបន្តបន្ទាប់បន្ថែមទៀត។ ជាក់ស្ដែង សាលារៀនតែងផ្ដល់ព័ត៌មានពីកម្មវិធីប្រកួតប្រជែង ពេលខ្លះអាណាព្យាបាលស្វែងរកការប្រកួតប្រជែងជូនកូន៕ អត្ថបទ៖ គឹមហុក

សម្តេចប្រធានរដ្ឋសភា៖ រដ្ឋសភាកម្ពុជាត្រៀមខ្លួនជាស្រេចដើម្បីផ្តល់ការគាំទ្រ និងកិច្ចសហការយ៉ាងជិតស្និទ្ធជាមួយស្ថានទូតសិង្ហបុរី ដើម្បីផលប្រយោជន៍ទៅវិញទៅមក

2026/06/05 02:29:47 pm        147
Facebook Telegram Linkin
សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានមានប្រសាសន៍ជម្រាបឯកអគ្គរដ្ឋទូតថ្មីនៃប្រទេសសិង្ហបុរី ប្រចាំនៅកម្ពុជាថា រដ្ឋសភាកម្ពុជាត្រៀមខ្លួនជាស្រេចដើម្បីផ្តល់ការគាំទ្រ និងកិច្ចសហការយ៉ាងជិតស្និទ្ធជាមួយ ឯកឧត្តម និងសហការី ដើម្បីពង្រឹងបន្ថែមទៀតនូវចំណងមិត្តភាព និងកិច្ចសហប្រតិបត្តិការជាក់ស្តែងរវាងកម្ពុជា-សិង្ហបុរី ដើម្បីផលប្រយោជន៍ទៅវិញទៅមក សម្រាប់ប្រទេស និងប្រជាជនទាំងសងខាង។ សម្តេចរដ្ឋសភាធិបតី បានមានប្រសាសន៍បែបនេះ នៅក្នុងឱកាសទទួលជួបសម្តែងការគួរសម និងពិភាក្សាការងារជាមួយ ឯកឧត្តម ប៉ាង ឈី វី (PANG Chee Wee) ឯកអគ្គរដ្ឋទូតទើបតែងតាំងថ្មីនៃសាធារណរដ្ឋសិង្ហបុរី នៅកម្ពុជានាព្រឹកថ្ងៃទី ៥ ខែមិថុនា ឆ្នាំ២០២៦ នៅវិមានរដ្ឋសភា។ សម្តេចប្រធានរដ្ឋសភា សូមស្វាគមន៍យ៉ាងកក់ក្តៅចំពោះវត្តមានឯកឧត្តម ប៉ាង ឈី វី និងបានអបអរសាទរចំពោះ ឯកឧត្តម ដែលត្រូវបានតែងតាំងជាឯកអគ្គរដ្ឋទូតវិសាមញ្ញ និងពេញសមត្ថភាព ប្រចាំព្រះរាជាណាចក្រកម្ពុជា។ សម្តេចមានជំនឿយ៉ាងមុតមាំថា ក្នុងអាណត្តិបេសកកម្មការទូតនេះ ឯកឧត្តមនឹងបន្តជំរុញកាន់តែខ្លាំងក្លាថែមទៀតដល់ការលើកកម្ពស់ទំនាក់ទំនង និងកិច្ចសហប្រតិបត្តិការទ្វេភាគីរវាងប្រទេសទាំងពីរ កាន់តែស៊ីជម្រៅ ទូលំទូលាយ ហើយឈានដល់កម្រិតខ្ពស់ថ្មីមួយទាំងស្ថាប័ននីតិប្បញ្ញត្តិ និងនីតិប្រតិបត្តិ។ កម្ពុជា និងសិង្ហបុរី គឺជារដ្ឋតូចនៅក្នុងតំបន់អាស៊ីអាគ្នេយ៍ ដែលគោរពច្បាប់អន្តរជាតិ ការពារសន្តិភាព ការពារបូរណភាពទឹកដី ឯករាជ្យភាព និងលើកកម្ពស់គោលការណ៍ពហុនិយម។ សម្តេចប្រធានរដ្ឋសភាបានគូសបញ្ជាក់ថា នៅក្នុងបរិបទបច្ចុប្បន្ននេះ ដែលពិភពលោកប្រឈមបញ្ហាស្មុគស្មាញ ហ៊ុមព័ទ្ធដោយសង្គ្រាម រួមផ្សំនឹងការប្រែប្រួលធម្មជាតិផង ក្នុងឋានៈជារដ្ឋតូច ត្រូវបន្តគាំទ្របរិយាកាសអន្តរជាតិដែលផ្អែកលើច្បាប់ សំដៅរក្សាបាននូវស្ថិរភាព និងការអភិវឌ្ឍយូរអង្វែង។ ឯកឧត្តម ប៉ាង ឈី វី បានថ្លែងអំណរគុណជូន សម្តេចប្រធានរដ្ឋសភាដែលបានទទួលស្វាគមន៍ឯកឧត្តម និងគណៈប្រតិភូយ៉ាងកក់ក្តៅបំផុត និងបានឯកភាពតាមប្រសាសន៍លើកឡើងរបស់សម្តេចប្រធានរដ្ឋសភា និងបានគូសបញ្ជាក់ពីសារៈសំខាន់នៃទំនាក់ទំនងដ៏ល្អរវាងប្រទេសទាំងពីរ។ ឯកឧត្តម បានគូសបញ្ជាក់ថា ទំនាក់ទំនងប្រទេសទាំងពីរត្រូវបានលើកកម្ពស់ដោយថ្នាក់ដឹកនាំទាំងពីរប្រទេសគ្រប់ជំនាន់ ជាពិសេសនៅក្នុងពេលបច្ចុប្បន្ន ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងឯកឧត្តម Lawrence Wong នាយករដ្ឋមន្ត្រីសិង្ហបុរី។ ថ្នាក់ដឹកនាំប្រទេសទាំងពីរបានផ្លាស់ប្តូរដំណើរទស្សនកិច្ចគ្នាទៅវិញទៅមក និងបានជួបគ្នាជាញឹកញាប់នៅក្នុងវេទិកាតំបន់ និងអន្តរជាតិ។ ឯកឧត្តមបានជម្រាបសម្តេចពីការប្តេជ្ញាចិត្តខ្ពស់របស់ឯកឧត្តមនៅក្នុងការលើកកម្ពស់ទំនាក់ទំនង និងកិច្ចសហប្រតិបត្តិការប្រទេសទាំងពីរ។ នៅក្នុងនោះ ស្ថានទូតសិង្ហបុរីបានបង្កើតមជ្ឈមណ្ឌលមួយដើម្បីលើកកម្ពស់ការអប់រំ សមត្ថភាពជំនាញ សិស្ស និស្សិត មន្ត្រីរាជការកម្ពុជា។ មជ្ឈមណ្ឌលដែលអនុវត្តនយោបាយឈ្នះ-ឈ្នះ នាំមកនូវផលប្រយោជន៍ជូនប្រទេសទាំងសងខាងនោះ ក៏មានការបណ្តុះបណ្តាលជំនាញឯកទេស (TVET) សម្រាប់ពលរដ្ឋកម្ពុជា ដែលមានបំណងស្វែងរកការងារនៅប្រទេសសិង្ហបុរីផងដែរ។ ជាមួយគ្នានេះ ឯកឧត្តមបញ្ជាក់ថា កម្ពុជា និងសិង្ហបុរី នៅមានសក្តានុពលជាច្រើនទៀតដែលត្រូវភ្ជាប់ទំនាក់ទំនងជាមួយគ្នា ដូចជាវិស័យទេសចរណ៍ ពិសេសអេកូទេសចរណ៍ កសិកម្ម ជាដើម។ ឯកឧត្តមបញ្ជាក់ថា ពលរដ្ឋសិង្ហបុរីមានការពេញចិត្តអង្ករកម្ពុជាជាខ្លាំង។ សម្តេចប្រធានរដ្ឋសភាបានលើកទឹកចិត្ត និងគាំទ្រពេញទំហឹងចំពោះគម្រោងការងាររបស់ឯកឧត្តមឯកអគ្គរដ្ឋទូត និងស្នើបន្ថែមដល់ឯកឧត្តម ជួយជំរុញការវិនិយោគលើវិស័យអប់រំ សុខាភិបាល និងសហគ្រាសធុនតូច និងមធ្យមនៅកម្ពុជាផងដែរ។ សម្តេចបានគូសបញ្ជាក់ថា សិង្ហបុរីមានការរីកចម្រើនឧស្សាហកម្មធំៗ ដូច្នេះដើម្បីគាំទ្រដល់ដំណើរការនោះ សិង្ហបុរីក៏គួរចែករំលែកផ្នែកតូចៗ ដែលផ្គត់ផ្គង់ច្រវ៉ាក់ផលិតកម្មធំៗនៅកម្ពុជា។ ក្នុងស្មារតីលើកកម្ពស់កិច្ចសហប្រតិបត្តិការឱ្យកាន់តែល្អរឹងមាំបន្ថែមទៀត ក្នុងការបម្រើផលប្រយោជន៍ប្រទេស និងប្រជាពលរដ្ឋទាំងពីរ សម្តេចប្រធានរដ្ឋសភា និងឯកឧត្តមឯកអគ្គរដ្ឋទូតសិង្ហបុរី បានពិភាក្សាគ្នាដោយចំហ និងស្មោះត្រង់។ សម្តេចប្រធានរដ្ឋសភាបានស្នើដល់សិង្ហបុរីគាំទ្រខាងបច្ចេកវិទ្យា (AI) ដល់រដ្ឋសភាកម្ពុជាផងដែរ។ រដ្ឋសភានីតិកាលទី៧ កំពុងធ្វើកំណែទម្រង់ និងអភិវឌ្ឍស្ថាប័នជាសភាឌីជីថល ដែលទាមទារការបណ្តុះបណ្តាលធនធានមនុស្សលើផ្នែកបច្ចេកវិទ្យា (AI) ដើម្បីប្រសិទ្ធភាពការងារ និងគ្រប់គ្រងរដ្ឋបាលសាធារណៈឱ្យកាន់តែមានប្រសិទ្ធភាពឡើង៕

កម្ពុជា និងចិន ចុះហត្ថលេខា ដើម្បីជួយសម្រួល​វិស័យ​ធុរៈកិច្ច​ពាណិជ្ជកម្ម​អន្តរជាតិ​នៃ​ប្រទេសទាំងពីរ

2026/06/05 02:13:47 pm        160
Facebook Telegram Linkin
អគ្គនាយកដ្ឋានគយ និងរដ្ឋាករកម្ពុជា បានរៀបចំពិធីចុះហត្ថលេខាទទួលស្គាល់គ្នាទៅវិញទៅមក នៃកម្មវិធីប្រតិបត្តិករសេដ្ឋកិច្ចបានទទួលការអនុញ្ញាត របស់អគ្គនាយកដ្ឋានគយនិងរដ្ឋាករកម្ពុជា និង រដ្ឋបាលគយចិន (Cambodia-China Authorized Economic Operator Mutual Recognition Arrangement : Cambodia-China AEO MRA) ។ ពិធីនេះចុះហត្ថលេខានេះ បានដឹកនាំរៀបចំនិងចុះហត្ថលេខាដោយ ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ជាមួយលោកជំទាវ Sun Meijun រដ្ឋមន្ត្រីនៃអគ្គរដ្ឋបាលគយនៃសាធារណៈរដ្ឋប្រជាមានិតចិន កាលពីរសៀលថ្ងៃទី ៤ ខែមិថុនា ឆ្នាំ២០២៦ នៅរាជធានីភ្នំពេញ។ តាមការលើកឡើងរបស់ ឯកឧត្តមបណ្ឌិត គុណ ញឹម បានមានប្រសាសន៍ឱ្យដឹងថា ការរៀបចំទទួលស្គាល់គ្នាទៅវិញទៅមក នៃកម្មវិធីប្រតិបត្តិករសេដ្ឋកិច្ចបានទទួលការអនុញ្ញាតកម្ពុជា-ចិន នឹងជួយគាំទ្រសម្រួលដល់វិស័យធុរៈកិច្ចពាណិជ្ជកម្មអន្តរជាតិ នៃប្រទេសទាំងពីរ នូវភាពសាមញ្ញនីតិវិធីគយ តាមរយៈការកាត់បន្ថយការត្រួតពិនិត្យរូបវន្តទំនិញ និងការពន្លឿនការបំពេញបែបបទគយ សម្រាប់ក្រុមហ៊ុនដែលមានអនុលោមភាពខ្ពស់។ បច្ចុប្បន្ន កម្ពុជាមានក្រុមហ៊ុនជា AEO ចំនួន ១១ ហើយកម្ពុជាមានគោលដៅបង្កើនក្រុមហ៊ុន AEO ឲ្យបានចំនួន៣០ មុនបញ្ចប់ឆ្នាំ២០២៦នេះ។ ឯកឧត្តម បានបន្តថា ការរៀបចំយន្តការទទួលស្គាល់គ្នាទៅវិញទៅមកលើកម្មវិធី AEO នាពេលនេះ គឺមានសារៈសំខាន់ជាយុទ្ធសាស្ត្រ ក្នុងការបន្តជំរុញទំហំពាណិជ្ជកម្ម និងការវិនិយោគឱ្យកាន់តែរីកចម្រើនបន្ថែមទៀត តាមរយៈការកាត់បន្ថយពេលវេលានិងថ្លៃដើម, ការពង្រឹងភាពប្រកួតប្រជែងរបស់ធុរជន, និងការធានាសុវត្ថិភាពខ្សែច្រវាក់ផ្គត់ផ្គង់នៃប្រទេសទាំងពីរ។ ​ព្រឹត្តិការណ៍ខាងលើនេះ គឺជាសក្ខីភាពមួយទៀត ដែលឆ្លុះបញ្ចាំងពីស្មារតីនៃ «មិត្តភាពដែកថែប» និងកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយរវាង កម្ពុជានិងចិន ជាពិសេសការជំរុញសហគមន៍វាសនារួម កម្ពុជា-ចិន ក្នុងយុគសម័យថ្មី ឱ្យកាន់តែរឹងមាំ និងមានផ្លែផ្កា។ ស្របតាមស្មារតីនៃកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយនេះ សាធារណរដ្ឋប្រជាមានិតចិន មិនត្រឹមតែជាមិត្តដ៏ល្អនោះទេ ប៉ុន្តែគឺជាដៃគូពាណិជ្ជកម្ម និងជាប្រភពទុនវិនិយោគផ្ទាល់ពីបរទេស (FDI) ដ៏ធំបំផុត និងសំខាន់បំផុតរបស់កម្ពុជា ដែលបាននិងកំពុងរួមចំណែកយ៉ាងធំធេង ដល់ការអភិវឌ្ឍសេដ្ឋកិច្ច និងហេដ្ឋារចនាសម្ព័ន្ធនៅកម្ពុជា៕ អត្ថបទ៖ ឈិត បូរ៉ាវី  

សម្តេចបវរធិបតី ហ៊ុន ម៉ាណែត សាទរ និងកោតសរសើរលើកិច្ចខិតខំប្រឹងប្រែងការពារ អភិរក្ស​ធនធានធម្មជាតិ និងបរិស្ថាន រហូតកម្ពុជាទទួលចំណាត់ថ្នាក់ ជាប្រទេស​មានបរិស្ថាន​ធម្មជាតិលេខ​១ លើពិភពលោក

2026/06/05 02:05:15 pm        78
Facebook Telegram Linkin
(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានថ្លែងអបអរសាទរ និងកោតសរសើរចំពោះកិច្ចខិតខំប្រឹងប្រែង ក្នុងការពារនិងអភិរក្សធនធានធម្មជាតិនិងបរិស្ថាន នៅកម្ពុជានាពេលកន្លងមក ដែលនាំឱ្យប្រទេសកម្ពុជា ទទួលបានចំណាត់ថ្នាក់លេខ១ ជាប្រទេសដែលមានបរិស្ថានធម្មជាតិល្អបំផុតនៅលើពិភពលោក។ តាមរយៈលិខិតរបស់ទីស្តីការគណៈរដ្ឋមន្រ្តី ចុះថ្ងៃទី ៤ មិថុនា ឆ្នាំ ២០២៦ សម្តេចប្រមុខរាជរដ្ឋាភិបាលកម្ពុជា បានមានប្រសាសន៍លើកឡើងដ៏ខ្ពង់ខ្ពស់ថា៖ «រាជរដ្ឋាភិបាលបានឃើញរបាយការណ៍ស្តីពីការផ្តល់ចំណាត់ថ្នាក់ប្រទេសកម្ពុជាជាប្រទេសមានបរិស្ថាន ធម្មជាតិលេខ១ លើពិភពលោកដោយស្ថាប័ន U.S. News & World Report និងសូមអបអរសាទរ និងកោតសរសើរ»។ជាមួយគ្នានេះ សម្តេចបវរធិបតី ហ៊ុន ម៉ាណែត បានណែនាំឱ្យធ្វើការផ្សព្វផ្សាយឱ្យបានទូលំទូលាយ ព្រោះសមិទ្ធផលនេះជាមោទនភាពរបស់ប្រទេសជាតិ។សូមបញ្ជាក់ថា ប្រទេសកម្ពុជាទទួលបានចំណាត់ថ្នាក់លេខ១ ជាប្រទេសដែលមានបរិស្ថានធម្មជាតិល្អបំផុតនៅលើពិភពលោក នៅក្នុងឆ្នាំ ២០២៦ នេះ នៅក្នុងរបាយការណ៍ស្ទង់មតិ និងចំណាត់ថ្នាក់សកលរបស់ U.S. News & World Report។ការវាយតម្លៃនេះផ្អែកលើលក្ខណសម្បត្តិសំខាន់ៗរួមមាន៖ ការគ្រប់គ្រងបរិស្ថានបានល្អ និងការផ្តល់ខ្យល់អាកាសបរិសុទ្ធ មានការគ្រប់គ្រងធនធានធម្មជាតិ ប្រកបដោយនិរន្តរភាព និងកិច្ចខិតខំប្រឹងប្រែង ក្នុងការអភិរក្សជីវៈចម្រុះ ប្រកបដោយប្រសិទ្ធភាព៕ 

កម្ពុជានាំចេញអង្ករជាង ៥៦ម៉ឺនតោន គិតជាទឹកប្រាក់ជាង ៣២៧លានដុល្លារ​រយៈពេល៥ខែ ឆ្នាំ ២០២៦នេះ

2026/06/05 01:59:26 pm        299
Facebook Telegram Linkin
ភ្នំពេញ៖ កម្ពុជាបាននាំចេញអង្ករសម្រេចបានក្នុងបរិយមាណ​ជាង ៥៦ម៉ឺនតោន កើឡើង ៦៥,២៨% គិតជាប្រាក់ចំនួនជាង ៣២៧ កើនឡើង ២៩,៧៦% បើធៀបនឹង​រយៈពេលដូច​គ្នា​កាល​ពីឆ្នាំមុន​ ខណៈ តំបន់អឺរ៉ុប, ចិន, និងបណ្តាប្រទេសតំបន់អាស៊ាន នៅ​តែ​ជា​ទីផ្សារ​ចម្បង​ជាង​គេ​សម្រាប់អង្ករកម្ពុជានាពេលនេះ​​។​របាយការណ៍សហព័ន្ធស្រូវអង្ករកម្ពុជា បានបង្ហាញថា ក្នុងរយៈពេល៥ខែ នៃឆ្នាំ២០២៦ កម្ពុជា​បាន​នាំ​ចេញអង្ករបានចំនួន ៥៦៨ ៩១២ តោន គិតជាប្រាក់ជាង ៣២៧,៤៣ លាន​ដុល្លារ​អាម៉េរិក​​។​ ការនាំចេញអង្ករនេះ តាមរយៈក្រុមហ៊ុននាំចេញអង្ករចំនួន ៦១ ក្រុមហ៊ុន ទៅ​កាន់​ទីផ្សារ​​គោ​លដៅចំនួន ៦៣ ជុំវិញពិភពលោក​។ ក្នុងនោះ បណ្តាប្រទេសនៅក្នុងតំបន់អឺរ៉ុបចំនួន ៣១ គឺជាទីផ្សារធំលំដាប់ទី១ សម្រាប់កម្ពុជា ដែលបានទិញអង្ករចំនួន ១៥៤ ២៥៤ តោន គិត​ជា​ទឹក​ប្រាក់​ចំនួន ១០៥,១២លានដុល្លារសហរដ្ឋអាមេរិក។បន្ទាប់មកប្រទេសចិន និងហុងកុង ដែលជា​ទីផ្សារធំលំដាប់ទី២ សម្រាប់អង្ករកម្ពុជា ដែល​បាន​បញ្ជា​ទិ​ញចំនួន ១៦២ ១២៥តោន គិតជាទឹកប្រាក់ចំនួន ៩៤,៩២ លានដុល្លារសហរដ្ឋអាមេរិក។ បណ្តា​ប្រទេសក្នុងអាស៊ាន ចំនួន ៥ ក៏ជាទីផ្សារចម្បងសម្រាប់អង្ករកម្ពុជា ផងដែរ​ ដែលបាន​បញ្ជា​ទិញ​អង្ករ​ចំនួន​ ២០៨ ៥៩៣តោន គិតជាទឹកប្រាក់ចំនួន ៨៧,៣២ លានដុល្លារសហរដ្ឋអាមេរិក និ​ង​ទៅកាន់គោលដៅចំនួន ២៤ ប្រទេសផ្សេងទៀតមាន អាហ្វ្រិក និងមជ្ឈឹមបូព៌ា។ល។ មាន​ចំនួន​ ៤៣ ៩៤០​ តោន គិតជាទឹកប្រាក់ចំនួន ៤០,០៧ លានដុល្លារសហរដ្ឋអាមេរិក។កម្ពុជាបាននាំចេញអង្ករក្រអូបគ្រប់ប្រភេទ​ចំនួន ៥៩,២០% ប្រភេទអង្ករសគ្រាប់វែង ២២,២៨% អង្ករ​ចំហ៊ុយ ១,៧២% អង្ករសរីរាង្គចំនួន ១.០៤%​, អង្ករបាក់គ្រប់ប្រភេទ ១៥,៥៨% និង​អង្ករ​ផ្សេង​ៗ​ចំនួន ០,១៨%%។ប្រទេសកម្ពុជាក៏បាននាំចេញស្រូវចំនួន ២ ៧៥៣ ៨១៦ តោន ស្រូវសើម ដែល​គិត​ជា​ទឹក​ប្រាក់​បាន​ប្រមាណ ៥៩១,៤១ លានដុល្លារសហរដ្ឋអាមេរិក៕ អត្ថបទ៖ ធូ វិរៈ 

កម្ពុជា​យកយន្តការ UN ដោះស្រាយ​បញ្ហា​ព្រំដែន​សមុទ្រ​ជាមួយ​ថៃ​បន្ទាប់​ពី​ជម្រើស​ទ្វេភាគី​អស់​លទ្ធ​ភាព

2026/06/05 01:45:47 pm        225
Facebook Telegram Linkin
អ្នកនាំពាក្យរាជរដ្ឋាភិបាលកម្ពុជា ឯកឧត្តម ប៉ែន បូណា បានបញ្ជាក់​តាម​រយៈ​សន្និសីទ​សារ​ព័ត៌​មាន​នៅ​ថ្ងៃ​ទី៥ ខែមិថុនា ឆ្នាំ២០២៦នេះថា ការ​ដែលកម្ពុជាជ្រើស​រើស​យក​យន្ត​ការ​ផ្សះ​ផ្សា​ដោយ​បង្ខំ​ ( Compulsory Conciliation) ក្រោមអនុសញ្ញាអង្គការសហប្រជាជាតិ UNCLOS ដើម្បី​ដោះ​​ស្រាយ​ការទាមទារដែនសមុទ្រត្រួតស៊ីគ្នាជាមួយប្រទេសថៃ ដោយសារ​កម្ពុជា​មើល​ឃើញ​ច្បាស់​ និងខិតខំអស់លទ្ធភាព​ក្នុងការ​ចរចាទ្វេភាគីជាមួយថៃ ជាពិសេស​ភាគីថៃបានសម្រេច​លុប​ចោល​អនុស្សរណៈនៃការយោគយល់គ្នាឆ្នាំ ២០០១ ជាឯកតោភាគីដែលនេះជាយន្តការ​ទ្វេ​ភាគី​តែ​មួយគ​ត់សម្រាប់ប្រទេសទាំងពីរក្នុងការ​ពិភាក្សា​ដោះស្រាយ​បញ្ហា​ព្រំដែនសមុទ្រជាមួយគ្នា​។ ឯកឧត្តម ប៉ែន បូណា បានថ្លែងថា​ សម្តេចធិបតី ហ៊ុន ម៉ាណែត នាយករដ្ឋមន្ត្រី កាលពីថ្ងៃទី២ ខែ​មិថុនា ឆ្នាំ ២០២៦ បានប្រកាសពីការ​ចាប់ផ្តើម​ប្រើប្រាស់យន្តការផ្សះផ្សាដោយបង្ខំ ( Compulsory​ Conciliation) ក្រោមអនុសញ្ញាអង្គការសហប្រជាជាតិ UNCLOS ដើម្បីដោះ​ស្រាយ​ការ​ទាមទារដែនសមុទ្រត្រួតស៊ីគ្នាថាជាមួយប្រទេសថៃ។ ឯកឧតុ្តម​បានបញ្ជាក់ថា មូលហេតុដែលកម្ពុជា​ប្រើប្រាស់យន្តការនេះ ដោយសារ​អស់​រយៈ​ពេល​ជា​ច្រើន​ឆ្នាំ​មក​ហើយ ដែលកម្ពុជា និងថៃមានក្របខណ្ឌ​ទ្វេភាគី​ដើម្បី​ស្វែង​រក​ដំណោះ​ស្រាយ​ដោយ​សន្តិ​វិធី​លើ​ការទាមទារដែនសមុទ្រត្រួតស៊ីគ្នា។ ក្របខណ្ឌទ្វេភាគីនោះ គឺអនុស្សរណៈ​នៃការ​យោគ​យល់​គ្នា​ឆ្នាំ២០០១ ឬហៅកាត់ថា MoU 2001។ អនុស្សរណៈនៃការយោគយល់គ្នានេះ ឆ្លុះ​បញ្ចំាង​ពី​ការ​យល់ឃើញជាមួយគ្នាថា ប្រទេសទាំងពីរគួរតែធ្វើការរួមគ្នាដើម្បីដោះស្រាយ​ព្រំដែនសមុទ្រ និង​អភិវឌ្ឍធនធាននៅក្នុងតំបន់ទាមទារដែនសមុទ្រត្រួតស៊ីគ្នាដោយសន្តិវិធី និងសម្រាប់​ផល​ប្រយោជន៍​ទៅ​វិញទៅមក។ សម្តេចបន្តថា នៅពេលដែលរាជរដ្ឋាភិបាល​ថៃបានប្រកាសថា នឹងដកខ្លួនចេញ​ពី​ក្រប​ខណ្ឌ​ទ្វេភាគី​ដ៏​យូរអង្វែងនេះ កម្ពុជាបានស្នើឱ្យភាគីថៃពិចារណាឡើងវិញ ប៉ុន្តែ ជាការគួរឱ្យ​សោក​ស្តាយ ភាគីថៃនៅតែសម្រេចចិត្តដើរចេញពីក្របខណ្ឌទ្វេភាគីនេះដដែល។ ការណ៍នេះមានន័យថា MoU 2001 ដែលជា​ក្រប​ខណ្ឌ​ទ្វេភាគី​ព្រម​ព្រៀង​គ្នាតែ​មួយ​គត់​សម្រាប់​ដោះ​ស្រាយ​តំបន់​ទាមទារ​ដែន​សមុទ្ទ​ត្រួតស៊ីគ្នាក្នុងរយៈពេលជាង២៥ឆ្នាំកន្លងមក មិនអាច​ យកមក​ប្រើ​ប្រាស់​ទៀត​បាន​ឡើយ​។ ការណ៍នេះបង្ហាញយ៉ាងច្បាស់ថា ឱកាសចរចា​ទ្វេភាគី​ដើម្បី​ឈាន​ទៅ​រក​ដំណោះ​ស្រាយ​ត្រូវ​បាន​ប្រើប្រាស់អស់លទ្ធភាពហើយ។ ហេតុដូច្នេះ រាជរដ្ឋាភិបាលកម្ពុជា​បានពិចារណា​យ៉ាង​ម៉ត់​ចត់​បំផុត​នូវរាល់ជម្រើសផ្លូវច្បាប់ និងដោយសន្តិវិធីដែលមាន និង​​ដែលអាចអនុវត្តទៅបាន។ អនុ​សញ្ញាអង្គការសហប្រជាជាតិស្ដីពីនីតិសមុទ្រដែលស្គាល់ជាទូទៅថា UNCLOS ជា​សន្ធិ​សញ្ញា​អន្តរ​ជាតិ​ដែលកំណត់នូវសិទ្ធិ និងការទទួល​ខុស​ត្រូវ​រប​ស់​រដ្ឋ​ភាគី​នានា​ពាក់ព័ន្ធ​នឹង​ដែន​សមុទ្រ​ដែល​ក្នុង​នោះទាំងកម្ពុជានិងថៃជារដ្ឋភាគីនៃអនុសញ្ញានេះ។ ការផ្សះផ្សារដោយបង្ខំ ដែល​ជា​យន្ត​ការ​ផ្លូវច្បាប់ដោយសន្តិវិធីនៅក្រោមអនុសញ្ញា UNCLOS នឹងអនុញ្ញាត​ឱ្យ​ប្រទេស​ទាំង​ពីរ​បង្ហាញ​ជំហរ​របស់​ខ្លួន​នៅចំពោះមុខគណៈកម្មការឯករាជ្យ​មួយ​ដែល​មាន​សមាជិក​ជា​អ្នក​ផ្សះផ្សារ​ចំនួន​៥រូ​ប និងសុទ្ធតែជាអ្នកជំនាញឈានមុខផ្នែកច្បាប់អន្តរជាតិ។ កម្ពុជាសង្ឃឹមយ៉ាងមុតមាំថា ដំណើរ​ការ​នេះ​នឹងបង្ហាញជាថ្មីម្ដងទៀតនូវតម្លៃពិតប្រាកដនៃច្បាប់អន្តរជាតិ និងការដោះ​ស្រាយ​ជំលោះ​ដោ​​យសន្តិវិធី។ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានិងជាប្រមុខរដ្ឋស្តីទីក៏ធ្លាប់​សម្តែង​ការសោកស្តាយ​ដែលថៃលុបចោល MOU 2001 ហើយ​សម្តេច​បានគូសបញ្ជាក់យ៉ាង​ច្បាស់ថា កម្ពុជា​ធ្វើ​ដំណើ​រទៅកាន់ច្បាប់អន្តរជាតិ ដូច្នេះ សូមកុំចោទប្រកាន់​ថា​កម្ពុជា​ធ្វើ​អន្ត​រ​ជា​តូបនីយ​កម្ម​បញ្ហា​ទ្វេភាគី និងសូមកុំនិយាយថាធ្លាក់ចូលអន្ទាក់កម្ពុជាដែលចង់ឱ្យភាគីទី៣ឬអន្តរជាតិចូលរួម និង​ក៏សូមកុំបបួលកម្ពុជារៀបចំយន្តការទ្វេភាគីថ្មីជំនួសយន្តការ​ទ្វេភាគី​ចាស់​ដែល​ថៃ​លុប​ចោល​ជាឯ​កតោភាគី។ សម្តេចតេជោសង្ឃឹមថា កម្ពុជានិងថៃនឹងដឹកដៃគ្នាទៅកាន់យន្តការអន្តរជាតិ ដែល​មានសមត្ថកិច្ចលើបញ្ហាសមុទ្រ។ ឯកឧត្តម ប៉ែន បូណា បានបញ្ជាក់ថា ជំហររបស់រាជរដ្ឋាភិបាលកម្ពុជាក្នុងការ​សម្រេច​ចាប់ផ្តើម​ប្រើ​ប្រាស់​យន្តការ​ផ្សះផ្សាដោយបង្ខំ ( Compulsory Conciliation ) ក្រោមអនុសញ្ញា UNCLOS ​បាន​ទទួលការគាំទ្រ​យ៉ាងពេញទំហឹងពីស្ថាប័នកំពូល​របស់​ជាតិ ក្រសួង ស្ថាប័ន រហូត​រដ្ឋ​បាល​ថ្នាក់​ក្រោម​ជាតិ និងប្រជាពលរដ្ឋគ្រប់មជ្ឈដ្ឋាន។ អាចនិយាយបានថា ប្រជាជាតិ​ខ្មែរ​កំពុ​​ង​ឈរ​នៅ​លើ​ជំហរ​ឯក​ភាពជាតិដ៏រឹងមាំមួយឆ្ពោះទៅការ​ដោះស្រាយបញ្ហាដោយសន្តិវិធី តាមរយៈការផ្សះផ្សា​ដោយ​ភាគី​អន្តរជាតិ និងស្របតាមច្បាប់អន្តរជាតិ ដើម្បីទទួលបានដំណោះស្រាយមួយ​ត្រឹមត្រូវ យុត្តិធម៌​និងយូរអង្វែងសម្រាប់ប្រជាជាតិទាំងពីរក៏ដូចជាសម្រាប់​សន្តិភាព ស្ថិរភាព​ និងវិបុលភាព​ក្នុង​តំបន់ទាំងមូល៕

ផ្ទះ៣ខ្នង និងអណ្តូងចំនួន៣ផ្សេងទៀត ជាព្រះរាជអំណោយរបស់សម្តេចព្រះវររាជមាតាជាតិខ្មែរ តាមរយៈសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនប្រជានុរាស្ត្រ៣គ្រួសារទៀតនៅស្រុកបន្ទាយអំពិល

2026/06/05 01:27:59 pm        150
Facebook Telegram Linkin
បន្ទាប់ពីបានទទួលព្រះរាជទ្រព្យដ៏ឧត្តុង្គឧត្តមចំនួន ៣ម៉ឺនដុល្លារអាម៉េរិក របស់សម្តេចព្រះមហាក្សត្រី ព្រះវររាជមាតាជាតិខ្មែរ ប្រោសប្រទានជូនសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងឱកាសថ្ងៃខួបកំណើតកាលពីថ្ងៃទី១៥ ខែធ្នូ ឆ្នាំ២០២៥កន្លងទៅ, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ចែងព្រះរាជទ្រព្យដ៏ឧត្តុង្គឧត្តមនេះសាងសង់ផ្ទះចំនួន ៣ខ្នង និងអណ្តូងទឹកចំនួន ៣អណ្តូង ជូនប្រជានុរាស្ត្រងាយរងគ្រោះបំផុតចំនួន ៣គ្រួសារ រស់នៅឃុំគោកខ្ពស់ ស្រុកបន្ទាយអំពិល ខេត្តឧត្តរមានជ័យ។ ផ្ទះនិងអណ្តូងខាងលើនេះ បានសាងសង់រួចរាល់កាលពីថ្ងៃទី១ ខែមិថុនាកន្លងទៅ ហើយដែលពិធីប្រគល់-ទទួលជាផ្លូវការបានប្រព្រឹត្តទៅនៅព្រឹកថ្ងៃទី៥ ខែមិថុនា ឆ្នាំ២០២៦នេះ ក្រោមវត្តមានលោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា។ ព្រះរាជអំណោយដ៏ឧត្តុង្គឧត្តមខាងលើនេះ បានប្រគល់ជូនគ្រួសារទី១ លោកយាយ យ៉ុង យុត អាយុ ៧២ឆ្នាំ រស់នៅជាមួយកូនប្រុសឈ្មោះ កេម ចាន់ធា អាយុ ៣៤ឆ្នាំ។ គ្រួសារទី២ លោកតា យិត សុខ អាយុ ៧០ឆ្នាំ ជាជនពិការជើងម្ខាង រស់នៅជាមួយភរិយាឈ្មោះ ដួង ច័ន្ទ អាយុ ៦៤ឆ្នាំ និងចៅស្រី។ គ្រួសារទី៣ លោកតា នូ យិន អាយុ ៧២ឆ្នាំ រស់នៅជាមួយភរិយាឈ្មោះ អែម សុច អាយុ ៦៩ឆ្នាំ និងចៅស្រី។ គ្រួសារនីមួយៗទទួលបាន ផ្ទះ ១ខ្នង ដែលផ្ទះនីមួយៗមានទំហំ ៦ម៉ែត x ៧ម៉ែត សង់ពីថ្ម ដំបូលស័ង្កសី មានចង្ក្រានបាយនិងបន្ទប់ទឹកក្នុងផ្ទះ មានបំពាក់ប្រព័ន្ធសូឡាបំភ្លឺខាងក្នុងនិងខាងមុខផ្ទះ សម្ភារប្រើប្រាស់ក្នុងផ្ទះ និងសម្ភារផ្ទះបាយ ព្រមទាំងអណ្តូងស្នប់មួយ ដែលចំណាយថវិកាចំនួន ១ម៉ឺនដុល្លារអាម៉េរិក។ សូមបញ្ជាក់ជូនថា ព្រះរាជូបត្ថម្ភនូវព្រះរាជទ្រព្យដ៏ឧត្តុង្គឧត្តមរបស់ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ប្រោសប្រទានជូនសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានកសាងជាព្រះរាជសមិទ្ធផលនានាជូនដល់ប្រជានុរាស្ត្រងាយរងគ្រោះបំផុតរស់នៅទីជនបទឆ្ងាយដាច់ស្រយាល ដែលមានដូចជា៖ បានសាងសង់ផ្ទះចំនួន ៣១ខ្នង (ក្នុងនោះ ផ្ទះ ២ខ្នង នៅខេត្តព្រះវិហារ, ៧ខ្នង នៅឧត្តរមានជ័យ, ៥ខ្នង នៅកំពង់ឆ្នាំង, ៥ខ្នង នៅកំពង់ស្ពឺ, ១០ខ្នង នៅពោធិ៍សាត់, និងផ្ទះ ២ខ្នង នៅខេត្តកំពង់ធំ)។ ជាមួយគ្នានេះ បានសាងសង់អណ្តូងទឹកស្អាតចំនួន ៣៦អណ្តូង (ក្នុងនោះ អណ្តូងចំនួន៣ នៅខេត្តព្រះវិហារ, អណ្តូង១៩ នៅឧត្តរមានជ័យ, អណ្តូង៣ នៅមណ្ឌលគិរី, អណ្តូង៦ នៅកំពង់ឆ្នាំង, អណ្តូង២ នៅកំពង់ស្ពឺ, និងអណ្តូង៣ នៅខេត្តកំពង់ធំ)។ ទន្ទឹមនឹងនេះ ក៏បានសាងសង់កន្លែងលាងសម្អាតដៃចំនួន ១៣កន្លែង (ក្នុងនោះកន្លែងលាងសម្អាតដៃ ៦កន្លែងនៅខេត្តកំពង់ធំ និង ៧កន្លែង នៅខេត្តមណ្ឌលគិរី)។ បន្ថែមពីនេះ ក៏បានសាងសង់បង្គន់អនាម័យ ៤ខ្នង (មាន១៣បន្ទប់) ក្នុងនោះបង្គន់អនាម័យ ៣ខ្នង នៅខេត្តកំពង់ធំ និង ១ខ្នង នៅខេត្តមណ្ឌលគិរី ផងដែរ៕

សម្តេចកិត្តិព្រឹទ្ធបណ្ឌិត ឧបត្ថម្ភថវិកា៥ម៉ឺនដុល្លារ និងសម្ភារជូនមន្ទីរពេទ្យកុមារអង្គរ ដើម្បីអបអរសាទរទិវាកុមារអន្តរជាតិ

2026/06/05 01:12:27 pm        168
Facebook Telegram Linkin
ដើម្បីអបអរសាទរទិវាកុមារអន្តរជាតិ១មិថុនា កាកបាទក្រហមកម្ពុជា បានបន្តផ្តល់ការឧបត្ថម្ភដល់មន្ទីរពេទ្យកុមារអង្គរ ខេត្តសៀមរាប ជាលើកទី៩ ដោយថវិកា៥ម៉ឺនដុល្លារអាម៉េរិក រួមជាមួយគ្រឿងឧបភោគបរិភោគ និងសម្ភារប្រើប្រាស់ជាច្រើនមុខ ដើម្បីចូលរួមចំណែកសង្គ្រោះជីវិតកុមារកម្ពុជា។ពិធីប្រគល់-ទទួលនៅថ្ងៃទី៤ ខែមិថុនា ឆ្នាំ២០២៦ ក្រោមអធិបតីភាពលោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា ក្នុងឱកាសនោះលោកជំទាវបានគូសបញ្ជាក់ថា ការឧបត្ថម្ភនេះគឺឆ្លុះបញ្ចាំងពីទឹកចិត្តដ៏សប្បុរសធម៌ និងការយកចិត្តទុកដាក់ខ្ពស់របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលតែងតែគិតគូរពីសុខុមាលភាពរបស់កុមារនិងប្រជាពលរដ្ឋងាយរងគ្រោះបំផុត។ ជាមួយគ្នានេះលោកសាស្ត្រាចារ្យវេជ្ជបណ្ឌិត ង៉ែត ពិសេស នាយករងមន្ទីរពេទ្យកុមារអង្គរ បានថ្លែងអំណរគុណយ៉ាងជ្រាលជ្រៅចំពោះ កាកបាទក្រហមកម្ពុជា ដែលតែងតែជួយទ្រទ្រង់បេសកកម្មរបស់មន្ទីរពេទ្យជាបន្តបន្ទាប់។ លោកនាយករងបានឱ្យដឹងថា មន្ទីរពេទ្យ ផ្តល់សេវាព្យាបាលដោយឥតគិតថ្លៃ ដល់កុមារប្រមាណ៤០០នាក់ក្នុងមួយថ្ងៃ ហើយថវិកាដែលទទួលបាននាពេលនេះនឹងជួយសម្រួលដល់ការចំណាយលើការព្យាបាលកុមារបានប្រមាណ១,០០០នាក់បន្ថែមទៀត។ក្រៅពីការឧបត្ថម្ភថវិកា ៥ម៉ឺនដុល្លារ អំណោយដែលផ្តល់ជូនរួមមាន៖ អង្ករ២តោន, មី, ត្រីខ, គ្រឿងទេស, ទឹកបរិសុទ្ធ និងសម្ភារប្រើប្រាស់ផ្សេងៗទៀត។ ក្នុងឱកាសនោះ ក្រុមការងារកាកបាទក្រហមកម្ពុជា ក៏បានចុះសួរសុខទុក្ខ និងផ្តល់អំណោយផ្ទាល់ជូនគ្រួសារកុមារដែលកំពុងសម្រាកព្យាបាលនៅក្នុងមន្ទីរពេទ្យចំនួន១០០នាក់ផងដែរ។គួររំលឹកថា ចាប់តាំងពីឆ្នាំ២០១៦មក កាកបាទក្រហមកម្ពុជា បានឧបត្ថម្ភមន្ទីរពេទ្យកុមារអង្គរសរុបចំនួន៩លើក គិតជាទឹកប្រាក់ជាង ៣៤ម៉ឺនដុល្លារអាម៉េរិក។ បេសកកម្មនេះ មិនត្រឹមតែជួយសង្គ្រោះជីវិតកុមារប៉ុណ្ណោះទេ ប៉ុន្តែថែមទាំងជាគំរូដ៏ល្អក្នុងសង្គមខ្មែរដើម្បីរួមគ្នាលើកកម្ពស់សុខុមាលភាពកុមារដែលជាទំពាំងស្នងឫស្សីរបស់ជាតិ៕

បណ្ដាញសង្គម

ព័ត៌មានថ្មីៗ

ស្នងការដឹកជញ្ជូនសហភាពអឺរ៉ុប៖ EU ពុំមើលឃើញកង្វះខាតប្រេងយន្តហោះនោះទេខណៈតម្លៃប្រេងហក់ឡើងខ្ពស់
06/05/2026 08:06 PM
Facebook Telegram Linkin
លោក Putinនិយាយថា រុស្ស៊ីបានទាក់ទងអាមេរិកពាក់ព័ន្ធនឹងបញ្ហាវិបត្តិនៅប្រទេសគុយបា
06/05/2026 08:06 PM
Facebook Telegram Linkin
អ្នកថែសន្តិភាព UNម្នាក់ ស្លាប់ និង ២នាក់ រងរបួស អំឡុងការផ្លោងគ្រាប់កាំភ្លើងត្បាល់នៅលីបង់
06/05/2026 08:06 PM
Facebook Telegram Linkin
អាហ្វ្រិកខាងត្បូងបញ្ជូនបេ្រសិតទៅកាន់អាហ្វ្រិក និងទ្វីបផ្សេងទៀត ក្រោយការវាយប្រហាររើសអើងជនបរទេស
06/05/2026 08:06 PM
Facebook Telegram Linkin
ក្រុមមេដឹកនាំជួបជុំគ្នា មុនកិច្ចប្រជុំកំពូល សហភាពអឺរ៉ុប-តំបន់បាល់កង់ខាងលិច នៅប្រទេសម៉ុនតេណេហ្គ្រូ
06/05/2026 08:06 PM
Facebook Telegram Linkin
អាមេរិកបង្កើនសម្ពាធលើគុយបា ខណៈពួកគេដាក់ទណ្ឌកម្មលោកប្រធានាធិបតី Diaz-Canel
06/05/2026 08:06 PM
Facebook Telegram Linkin
រដ្ឋមន្រ្តីការពារជាតិអាមេរិកចាត់ទុកបាតុកម្មនៅបូលីវីថា ប្រៀបបាននឹងការផ្តួលរំលំរដ្ឋាភិបាល
06/05/2026 08:06 PM
Facebook Telegram Linkin
ទីក្រុងគីវ កាន់ទុក្ខកុមារអ៊ុយក្រែន ៧០៧នាក់ដែលត្រូវបានសម្លាប់ ចាប់តាំងពីឆ្នាំ ២០២២
06/05/2026 08:06 PM
Facebook Telegram Linkin
WFP៖ ជម្លោះមជ្ឈិមបូព៌ា ជំរុញឲ្យមនុស្សរាប់លាននាក់ធ្លាក់ក្នុងភាពអត់ឃ្លាន
06/05/2026 08:06 PM
Facebook Telegram Linkin
UN បង្កើនការអំពាវនាវសុំជំនួយទ្វេដងសម្រាប់លីបង់ ខណៈសង្រ្គាមធ្វើឲ្យកើនឡើងតម្រូវការមនុស្សធម៌
06/05/2026 08:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.