BTV NEWS

TOP STORY កម្ពុជាបានបញ្ជូនបណ្ដឹងផ្លូវការទៅដល់ ICJ ដើម្បីជួយស្វែងរកដំណោះស្រាយបញ្ហាវិវាទព្រំដែនជាមួយថៃ

អភិបាលខេត្តបន្ទាយមានជ័យ៖ ក្រុមការងារពាក់ព័ន្ធកំពុងត្រៀមទទួលពុកម៉ែបងប្អូនមានកន្លែងស្នាក់នៅបណ្តោះអាសន្ន រយៈពេលវែង និងសម្រួលឯកសារពាក់ព័ន្ធ

គណៈប្រតិភូនៃប្រទេសនីហ្សេរីយ៉ា មួយក្រុមមកសិក្សាស្វែងយល់ពីដំណើរការកសាងសន្ដិភាព និងការអភិវឌ្ឍឡើងវិញលើគ្រប់វិស័យ ជាពិសេសការអភិវឌ្ឍសេដ្ឋកិច្ចសង្គមនៅកម្ពុជាតាមរយៈការបោសសម្អាតមីន

សម្ដេចតេជោ អំពាវនាវឱ្យពលរដ្ឋខ្មែរងាកមកប្រើប្រាស់បន្លែផ្លែឈើក្នុងស្រុក ដោយព្រមានបិទការនាំចូលពីថៃ

ព័ត៌មានជាតិ

សម្ដេចតេជោ ហ៊ុន សែន អញ្ជើញដឹកនាំកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភាលើរបៀបវារៈមួយចំនួន

ភ្នំពេញ៖ នៅព្រឹកថ្ងៃទី១៦ ខែមិថុនា ឆ្នាំ២០២៥នេះ នៅវិមានព្រឹទ្ធសភា សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា អញ្ជើញដឹកនាំកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា ដែលមានរបៀបវារៈមួយចំនួន។របៀបវារៈទាំងនោះរួមមាន៖១-ពិនិត្យ និងសម្រេចលើសំណើរបស់គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃព្រឹទ្ធសភា សុំដាក់សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលកម្ពុជាឱ្យបណ្តាក្រុមហ៊ុនវិនិយោគអភិវឌ្ឍថាមពលអគ្គិសនី ចំនួន ២៤ច្បាប់ ទៅក្នុងរបៀបវារៈសម័យប្រជុំលើកទី៣ ព្រឹទ្ធសភានីតិកាលទី៥។២-ពិនិត្យ និងសម្រេចលើសំណើរបស់គណៈកម្មការផែនការ នវិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម នៃព្រឹទ្ធសភា សុំដាក់សេចក្តីព្រាងច្បាប់ស្តីពីជលផល ទៅក្នុងរបៀបវារៈសម័យប្រជុំលើកទី៣ ព្រឹទ្ធសភានីតិកាលទី៥។៣-ពិនិត្យ និងសម្រេចលើការបោះឆ្នោតជ្រើសរើសបំពេញសមាជិកគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃព្រឹទ្ធសភា និងគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃព្រឹទ្ធសភា ទៅក្នុងរបៀបវារៈសម័យប្រជុំលើកទី៣ ព្រឹទ្ធសភានីតិកាលទី៥។៤-កំណត់កាលបរិច្ឆេទ និងរបៀបវារៈបន្តសម័យប្រជុំលើកទី៣ ព្រឹទ្ធសភានីតិកាលទី៥។៥-ផ្សេងៗ៕

សម្តេចធិបតីប្រាប់ឲ្យក្រសួង ស្ថាប័នពាក់ព័ន្ធ ជួយសម្រួលដល់ពលករខ្មែរ ដែលចង់វិលមកស្រុកវិញ ទោះបីមានឯកសារ ឬមិនមានក្តី

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅព្រឹកថ្ងៃទី១៦ ខែមិថុនា ឆ្នាំ២០២៥នេះបានចេញសារពិសេសខ្លីមួយ ដោយណែនាំដល់ក្រសួង-ស្ថាប័នពាក់ព័ន្ធ និងអាជ្ញាធររាជធានី-ខេត្តទាំងអស់ ធ្វើយ៉ាងណាផ្តល់សេវា និងធ្វើការសម្របសម្រួលចាំបាច់នានា ជូនដល់បងប្អូនពលករខ្មែរ ដែលមានបំណងត្រឡប់មកកម្ពុជាវិញ បើទោះបីជាពួកគាត់មានឯកសារ ឬមិនមានឯកសារត្រឹមត្រូវក៏ដោយនោះ។តាមរយៈសារដែលបានបង្ហោះក្នុងបណ្តាញសង្គមហ្វេសបុក និងឆាណែលតេលេក្រាមនោះ សម្តេចធិបតី ហ៊ុន ម៉ាណែត នាយករដ្ឋមន្រ្តីបានបញ្ជាក់ថា ឲ្យតែបងប្អូនប្រជាពលរដ្ឋខ្មែរ បើទោះបីជាពួកគាត់មាន ឬគ្មានឯកសារក្តី គឺត្រូវតែជួយសម្របសម្រួលឲ្យពួកគាត់វិលត្រឡប់មកវិញ ហើយដរាបណាដែលពួកគាត់វិលត្រឡប់មកវិញយ៉ាងកំហុកនោះ គឺត្រូវយករថយន្តដឹកពួកគាត់ដោយឥតគិតថ្លៃដល់ស្រុកកំណើតផងដែរ។សម្តេចធិបតី បានបញ្ជាក់ថា«ជូនឯកឧត្តម ប្រាក់ សុខុន ឯកឧត្តម ហេង សួរ ដោយមានការសំណូម ពរ និងសំណើរជាច្រើនរបស់បងប្អូនពលករយើង ដែលកំពុងរស់នៅ និងធ្វើការនៅប្រទេសថៃ ដែលចង់ វិលត្រឡប់មកកម្ពុជារបស់យើង ដោយបងប្អូនខ្លះមានបញ្ហាឯកសារ អញ្ចឹងហើយសូមឯកឧត្តមឲ្យគោលការណ៍ទៅស្ថានទូតរបស់យើងនៅថៃ នៅទីក្រុងបាងកក ក៏ដូចជាកុងស៊ុលរបស់យើងនៅខេត្តស្រះកែវ និង នៅកន្លែងផ្សេងៗទៀតដែលមានកុងស៊ុល គឺធ្វើយ៉ាងណាឲ្យសម្រួលឯកសារឲ្យគាត់ ដើម្បីបានប្រឡប់មក វិញ ហើយទីប្រឹក្សាពលកររបស់យើងនៅទីនោះក៏ខិតខំសហការជាមួយស្ថានទូត ដើម្បីជួយសម្រួលដល់ បងប្អូនដែលត្រូវត្រឡប់មកកម្ពុជាវិញ»។ជាមួយគ្នានោះដែរ សម្តេចធិបតី ហ៊ុន ម៉ាណែត ក៏បានប្រាប់ដល់រដ្ឋមន្រ្តីក្រសួងការងារ និងបណ្តុះ បណ្តាលវិជ្ជាជីវៈ ខណៈដែលបងប្អូនពលករខ្មែរវិលត្រឡប់មកកម្ពុជាវិញនោះ គប្បីឆ្លៀត និងភ្ជាប់ពួកគាត់ ជាមួយនឹងឱកាសការងារនៅក្នុងស្រុកដែលកម្ពុជាយើងកំពុងខ្វះកម្លាំងពលកម្មនោះផងដែរ៕អត្ថបទ បាន ចក់

លោកជំទាវ ហ៊ុន ម៉ាណា អញ្ជើញដឹកនាំក្រុមគ្រូពេទ្យស្ម័គ្រចិត្តចុះពិនិត្យ និងព្យាបាលជំងឺជូនបងប្អូនប្រជាពលរដ្ឋ នៅខេត្តកំពត

កំពត ÷ នៅព្រឹកថ្ងៃអាទិត្យ ទី១៥ ខែមិថុនា ឆ្នាំ២០២៥ លោកជំទាវ ហ៊ុន ម៉ាណា ប្រធានក្រុមវេជ្ជសាស្ត្រសម្ដេចតេជោ បានអញ្ជើញដឹកនាំក្រុមគ្រូពេទ្យស្ម័គ្រចិត្តចុះពិនិត្យ និងព្យាបាលជំងឺជូនដល់បងប្អូនប្រជាពលរដ្ឋ ដោយឥតគិតថ្លៃចំនួន២៥២៥នាក់ ដែលធ្វើឡើងទីតាំងវិទ្យាល័យប៊ុនរ៉ានីហ៊ុនសែនដងទង់ ក្នុងស្រុកដងទង់ ខេត្តកំពត ដែលជាបេសកកម្មលើកទី៩២។ ពិធីនេះ ក៏មានការអញ្ជើញចូលរួមផងដែរ ពីឯកឧត្តម ម៉ៅ ធនិន អភិបាលខេត្តកំពត និងអាជ្ញាធរស្រុកស្រុកដងទង់ជាច្រើនទៀត។ នាឱកាសនោះលោកជំទាវ ហ៊ុន ម៉ាណា បានមានប្រសាសន៍សំណេះសំណាល និងពាំនាំនូវការផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន , សម្ដេចមហាបវរអធិបតី ហ៊ុន ម៉ាណែត និងជំទាវបណ្ឌិត ពេជ ចន្ទមុន្នី ហ៊ុនម៉ាណែត ដល់បងប្អូនប្រជាពលរដ្ឋដែលបានចូលរួមពិនិត្យ ព្យាបាលជំងឺទាំងអស់។ លោកជំទាវមានប្រសាសន៍ទៀតថា សម្តេចតែងតែគិតគូរយកចិត្តទុកដាក់ដល់ប្រជាពលរដ្ឋ ដែលរស់នៅតាមតំបន់ដាច់ស្រយាលគ្រប់ទីកន្លែង និងគ្រប់ពេលវេលា។ លោកជំទាវបានថ្លែងអំណរគុណដល់អាជ្ញាធរគ្រប់លំដាប់ថ្នាក់នៃខេត្តកំពត ជាពិសេសអាជ្ញាធរស្រុកដងទង់ ដែលបានសម្របសម្រួលឲ្យប្រជាពលរដ្ឋបានមកទទួលការពិនិត្យ ព្យាបាលជំងឺដោយមិនគិតថ្លៃនាថ្ងៃនេះ។ មុនការពិនិត្យ ពិគ្រោះ និងព្យាបាលជំងឺ ក្រុមការងារក៏បានផ្តល់ជូនអាហារសម្រន់នៅពេលព្រឹក មានជានំបញ្ចុក នំបុ័ង បបរ និងភេសជ្ជៈ ឲ្យប្រជាពលរដ្ឋទទួលទានផងដែរ។ ជាលទ្ធផលចំនួនប្រជាពលរដ្ឋដែលទទួលបានការព្យាបាលទាំងអស់មានចំនួន២៥២៥ នាក់ រួមមាន៖ វះកាត់តូចចំនួន៥០នាក់ ពិនិត្យព្យាបាលរោគស្រ្តីចំនួន៩៥នាក់, សម្ភព និងអេកូសាស្ដ្រចំនួន១៦០នាក់ ,ពិនិត្យព្យាបាលមាត់ធ្មេញចំនួន២៥៦នាក់, និងផ្នែកជំងឺទូទៅ ចំនួន១៩៦០នាក់ និងបញ្ជូនអ្នកជំងឺមកព្យាបាល៤នាក់។ ជាមួយគ្នានោះ ក៏មានការចែកវែនតាជូនដល់លោកយាយលោកតាចំនួន៦០០នាក់ ចែកកាតាប និងសម្ភារៈដល់សិស្សានុសិស្សចំនួន៦០០នាក់,ចែករទេះរុញជនពិការចំនួន២០គ្រឿង, ចែកថង់អំណោយ(ឃីត) សម្ដេចតេជោ និងសម្ដេចកិត្តិព្រឹទ្ធបណ្ឌិត ជូនលោកយាយ លោកតា២០០នាក់ ដោយក្នុងថង់នោះមានសំលៀកបំពាក់,ស្បែកជើង១គូរ, សាប៊ូដុសខ្លួន១ដុំ,ថ្នាំដុសធ្មេញ១,ច្រាសដុសធ្មេញ១ ,ប្រេងកូឡា១ដុំ និងប្រេងខ្យល់១ដប និងជូនប្រជាពលរដ្ឋ ចំនួន៣០០នាក់ ដោយក្នុងថង់នោះរួមមាន ក្រមា១,សារុង១, ស្បែកជើង១គូរ, សាប៊ូដុសខ្លួន១ដុំ,ថ្នាំដុសធ្មេញ១,ច្រាសដុសធ្មេញ១ ,ប្រេងកូឡា១ដុំ និងប្រេងខ្យល់១ដប៕

និស្សិតមកពីសាលា TVET រីករាយយ៉ាងខ្លាំងនៅពេលបានបង្ហាញស្នាដៃរបស់ខ្លួនក្នុងកម្មវិធី TVET Day លើកទី៨

ក្រុមនិស្សិតមកពីបណ្ដាវិទ្យាស្ថានបណ្ដុះបណ្ដាលជំនាញបច្ចេកទេសវិជ្ជាជីវៈ (TVET) សុទ្ធតែបានបង្ហាញក្ដីរីករាយយ៉ាងខ្លាំងនៅពេលបាននាំយកស្នាដៃរបស់ខ្លួន រួមទាំងស្នាដៃរបស់សាលាពួកគេ មកបង្ហាញក្នុងឱកាសទិវាជាតិអប់រំបណ្ដុះបណ្ដាលបច្ចេកទេសនិងវិជ្ជាជីវៈ (TVET Day) លើកទី៨ រយៈពេល២ថ្ងៃ ចាប់ពីថ្ងៃទី១៥-១៦ ខែមិថុនា ឆ្នាំ២០២៥។កញ្ញា មួន ចន្ទសុបញ្ញា ជានិស្សិតឆ្នាំទី៣ នៃមហាវិទ្យាល័យវិស្វកម្មអគ្គិសនី នៃវិទ្យាស្ថានជាតិបណ្ដុះបណ្ដាលបច្ចេកទេស (NTTI) បាននាំយករ៉ូបូតឆុងកាហ្វេចំនួនពីរគ្រឿង ដែលសុទ្ធតែជាស្នាដៃរបស់កញ្ញា និងនិស្សិតដទៃទៀតនៃវិទ្យាស្ថាន NTTI មកដាក់បង្ហាញក្នុងឱកាស TVET Day លើកទី៨ និងបានដាក់ឱ្យដំណើរការឆុងកាហ្វេជូនអ្នកចូលរួមក្នុងកម្មវិធី ដោយទទួលបានការចាប់អារម្មណ៍គួរឱ្យកត់សម្គាល់។ជាអតីតនិស្សិតនៃវិទ្យាស្ថានជាតិបណ្ដុះបណ្ដាលបច្ចេកទេស (NTTI) មួយរូប លោក ជរ ច័ន្ទសោភ័ណ្ឌ ក៏បានដឹកនាំនិស្សិតជំនាន់ក្រោយនាំយកសុនកយន្តពីរគ្រឿងមកបង្ហាញក្នុងឱកាស TVET Day លើកទី៨នេះដែរ ក្នុងនោះមានសុនកយន្តដឹកជញ្ជូនចល័តមួយគ្រឿង និងសុនកយន្តចេះរាំមួយគ្រឿង ដែលសុទ្ធតែជាស្នាដៃរបស់លោក រួមជាមួយនិស្សិតនៃវិទ្យាស្ថាន NTTI។ សុនកយន្តទាំងពីរគ្រឿងនេះ ក៏បានទាក់ទាញអ្នកចូលរួមទស្សនាមិនតិចនោះឡើយ។ជាមួយគ្នានេះ លោក ប្រុស វិសាល ជានិស្សិតឆ្នាំទី២ នៃមហាវិទ្យាល័យអេឡិចត្រូនិក នៃវិទ្យាស្ថានជាតិពហុបច្ចេកទេសកម្ពុជា (NPIC) បាននាំយកម៉ាស៊ីនបោះពុម្ពថង់ប្លាស្ទិក និងក្រដាសពាក់កណ្ដាលស្វ័យប្រវត្តិ មកបង្ហាញក្នុងឱកាស TVET Day លើកទី៨នេះ។បន្ថែមពីនេះ លោក សុភា រតនៈ ជានិស្សិតឆ្នាំទី៣ នៃមហាវិទ្យាល័យមេកានិកទូទៅ នៃវិទ្យាស្ថានជាតិពហុបច្ចេកទេសកម្ពុជា (NPIC) ផងដែរនោះ ក៏បាននាំយកដ្រូន VTOL ដែលអាចហោះឡើងនិងចុះចតដោយបញ្ឈរ រួមជាមួយស្នាដៃដទៃច្រើនទៀតរបស់និស្សិតនៃវិទ្យាស្ថានជាតិ NPIC ក្នុងនោះមានទាំងសុនកយន្ត ដៃរ៉ូបូតដែលប្រើប្រាស់ក្នុងឧស្សាហកម្ម (Robot Arm) និងជណ្ដើរយោងជាដើម ដែលគួរឱ្យចាប់អារម្មណ៍ និងទាក់ទាញការចូលទស្សនានិងស្ដាប់បទបង្ហាញយ៉ាងច្រើន។ងាកទៅមើលស្នាដៃរបស់និស្សិតនៃវិទ្យាស្ថានបច្ចេកទេសឧស្សាហកម្ម (ITI) វិញ ក៏ទទួលបានការចាប់អារម្មណ៍ច្រើនណាស់ដែរ ពិសេសគឺរថយន្តបូមធូលីចល័តមួយគ្រឿង ដែលបើកទៅបើកមកបង្ហាញជូនអ្នកចូលរួមក្នុងឱកាស TVET Day នេះ គួរឱ្យចង់ទស្សនានិងស្វែងយល់។ លោក ជ័យ តុលា ជានិស្សិតឆ្នាំទី១ នៃមហាវិទ្យាល័យវិស្វកម្មរថយន្ត នៃវិទ្យាស្ថានបច្ចេកទេសឧស្សាហកម្ម បានឱ្យដឹងថា រថយន្តបូមធូលីចល័តនេះដំណើរការដោយពន្លឺព្រះអាទិត្យ (សូឡា) ដែលអាចជិះបណ្ដើរបូមធូលីបណ្ដើរ ហើយជាស្នាដៃរបស់សិស្សច្បងដែលបានផលិតឡើង និងទុកឱ្យសិស្សប្អូនៗបានសិក្សាពីបច្ចេកទេសបន្តនៅវិទ្យាស្ថាន ITI។គួរជម្រាបផងដែរថា ក្រុមនិស្សិតនៃបណ្ដាវិទ្យាស្ថានបណ្ដុះបណ្ដាលបច្ចេកទេសនិងវិជ្ជាជីវៈខាងលើ សុទ្ធតែបានបង្ហាញក្ដីរីករាយយ៉ាងខ្លាំងនៅពេលបាននាំយកស្នាដៃរបស់ខ្លួន មកបង្ហាញក្នុងឱកាស TVET Day លើកទី៨ និងបានអំពាវនាវដល់យុវជន សិស្ស និស្សិត ប្រជាពលរដ្ឋទូទៅ សូមមកទស្សនានូវស្នាដៃរបស់សាលាខ្លួន ព្រមទាំងស្ដាប់នូវបទបង្ហាញរបស់និស្សិតជាម្ចាស់ស្នាដៃ ដើម្បីឱ្យកាន់តែយល់ច្បាស់អំពីការសិក្សាជំនាញបច្ចេកទេស TVET និងសារៈសំខាន់នៃការសិក្សាជំនាញបច្ចេកទេស TVET ជាដើម៕

ក្រសួងការងារនាំយកឱកាសការងារ២៣ម៉ឺនកន្លែង ទៅកាន់ព្រំដែនកម្ពុជា-ថៃ សម្រាប់ពលករខ្មែរ

ក្រសួងការងារ និងបណ្ដុះបណ្ដាលវិជ្ជាជីវៈ បានបញ្ជូនមជ្ឈមណ្ឌលការងារចល័តរបស់ខ្លួន ទៅកាន់តំបន់ព្រំដែនកម្ពុជា-ថៃ ដើម្បីទទួលចុះឈ្មោះបងប្អូនពលករខ្មែរដែលត្រឡប់មកពីប្រទេសថៃវិញ ហើយមានបំណងចង់បានឱកាសការងារភ្លាមៗ ក៏ដូចជាការចុះឈ្មោះចូលរៀនវគ្គបណ្តុះបណ្តាលបច្ចេកទេស។ថ្លែងទៅកាន់អ្នកសារព័ត៌មាននៅថ្ងៃទី១៥ ខែមិថុនានេះ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ឯកឧត្តមហេង សួរ បានគូសបញ្ជាក់ថា ក្រសួង មានយន្តការគ្រប់គ្រាន់ និងមានលទ្ធភាពសមរម្យគ្រប់គ្រាន់ ដើម្បីផ្តល់ឱកាសការងារជូនបងប្អូនពលករខ្មែរដែលមានបំណង និងបានត្រឡប់មកកាន់ប្រទេសកម្ពុជាវិញ។បន្ថែមពីនេះ ឯកឧត្តមរដ្ឋមន្ត្រី បានគូសបញ្ជាក់ផងទៀតថា ក្រៅពីការផ្ដល់ឱកាសការងារហើយនោះក្រសួងក៏បានត្រៀមរៀបចំរួចរាល់។ ក្នុងការបណ្ដុះបណ្ដាលជំនាញបច្ចេកទេសវិជ្ជាជីវៈទៅ ដល់ប្រជាពលរដ្ឋកម្ពុជាជាទូទៅ និងពលករជាពិសេសផងដែរ។គិតត្រឹមថ្ងៃទី១៤ ខែមិថុនា ឆ្នាំ២០២៥នេះ កម្ពុជាមានឱកាសការងារនៅទូទាំងប្រទេសប្រមាណ២៣ ម៉ឺនកន្លែង។ នេះបើយោងតាមការប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈ៕

គណៈប្រតិភូព្រឹទ្ធសភា ចុះសួរសុខទុក្ខកងកម្លាំងជួរមុខការពារព្រំដែននៅខេត្តព្រះវិហារ

គណៈប្រតិភូព្រឹទ្ធសភានៃព្រះរាជាណាចក្រកម្ពុជា ដឹកនាំដោយឯកឧត្តម អ៊ុច បូររិទ្ធ អនុប្រធានទី១ ព្រឹទ្ធសភាតំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅថ្ងៃទី១២ ខែមិថុនា កន្លងមកនេះ បានអញ្ជើញចុះជួបសំណេះសំណាលសាកសួរសុខទុក្ខ និងនាំយកអំណោយជាគ្រឿងបរិភោគឧបភោគ សម្ភារៈប្រើប្រាស់ និងថវិកាមួយចំនួន ជូនដល់កងកម្លាំងជួរមុខការពារព្រំដែន ក្នុងខេត្តព្រះវិហារ។ ក្នុងឱកាសនោះក៏មានការអញ្ជើញចូលរួមពីឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា, សមាជិក សមាជិកា ព្រឹទ្ធសភា, ទីប្រឹក្សា, ថ្នាក់ដឹកនាំនិងមន្ត្រីខុទ្ទការល័យថ្នាក់ដឹកនាំព្រឹទ្ធសភា, ថ្នាក់ដឹកនាំនិងមន្ត្រីរាជការនៃអគ្គលេខាធិការដ្ឋានព្រឹទ្ធសភា ជាច្រើននាក់។ពិធីនេះបានប្រព្រឹត្តធ្វើឡើងនៅទីតាំងចំនួនពីរ ដាច់ដោយឡែកពីគ្នា គឺ ទី១.នៅកងពលតូចអន្តរាគមន៍លេខ៨ និងទី២. នៅទីបញ្ជាការដ្ឋាន កងអង្គរក្សការពារព្រំដែនតំបន់មុំបី នៃខេត្តព្រះវិហារ។ឆ្លៀតក្នុងឱកាសនោះ ឯកឧត្តម អ៊ុច បូររិទ្ធ បានពាំនាំនូវការផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់នាយទាហាន នាយទាហានរង និងពលទាហាន ដែលកំពុងឈរជើងនៅតាមបណ្តយព្រំប្រទល់កម្ពុជា-ថៃ ក្នុងខេត្តព្រះវិហារ ត្រៀមប្រយុទ្ធការពារបូរណភាពដែនដីនៃមាតុភូមិកម្ពុជា និងបានគូសបញ្ជាក់ពីការយកចិត្តទុកដាក់ខ្ពស់បំផុតរបស់ សម្តេចទាំងពីរ ចំពោះសុខទុក្ខរបស់ប្រជាពលរដ្ឋខ្មែរគ្រប់រូប ជាពិសេសសុខទុក្ខរបស់នាយទាហាន នាយទាហានរង និងពលទាហានទាំងអស់ ដោយចាត់ទុកជាសុខទុក្ខផ្ទាល់របស់សម្តេច ព្រមទាំងបានសម្តែងនូវគារវកិច្ចកោតសរសើរ និងគោរពចំពោះវីរភាពអង់អាចក្លាហានរបស់វីរយុទ្ធជន ដែលបានធ្វើពលីកម្មទាំងកម្លាំងកាយ កម្លាំងចិត្ត និងអាយុជីវិត ដើម្បីប្រទេសជាតិ។ ជាមួយគ្នានេះ ឯកឧត្តម បានរំឭកពីពាក្យពេចន៍ពីរឃ្លាដ៏ពិសិដ្ឋ និងមានអត្ថន័យដ៏ឧត្តុង្គឧត្តមថ្លៃថ្លារបស់សម្តេចតេជោ ដែលត្រូវបានចារទុកក្នុងទឹកចិត្តរបស់អ្នកស្នេហារជាតិគ្រប់ៗរូប ដែលមានខ្លឹមសារ “សន្តិភាពត្រូវបានការពារដូចជាអាយុជីវិតរបស់យើង ហើយដែនដីត្រូវបានការពារដូចជាដួងព្រលឹងរបស់យើង”។ ឯកឧត្តមបន្ថែមថា “សន្តិភាព” មិនមែនជាអំណោយនោះទេ តែជាសមិទ្ធផលដែលទទួលបានដោយលំបាក តាមរយៈការបូជាទាំងកម្លាំងកាយ ចិត្ត និងការធ្វើពលីកម្មគ្រប់បែបយ៉ាងរបស់សម្តេចតេជោ ដោយមានការគាំទ្រយ៉ាងក្លៀវក្លាពីសំណាក់បងប្អូនប្រជាពលរដ្ឋនៅទូទាំងប្រទេស និងកងកម្លាំងប្រដាប់អាវុធគ្រប់ប្រភេទ ដើម្បីជាគុណប្រយោជន៍ដល់ការអភិវឌ្ឍប្រទេសជាតិរីកចម្រើន រហូតមកដល់ពេលបច្ចុប្បន្ន។ តាងនាម សម្តេចតេជោប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ព្រមទាំងថ្នាក់ដឹកនាំ សមាជិក សមាជិកា ព្រឹទ្ធសភា ទីប្រឹក្សា ថ្នាក់ដឹកនាំ មន្ត្រីរាជការនៃអគ្គលេខាធិការដ្ឋានព្រឹទ្ធសភា ឯកឧត្តម អ៊ុច បូររិទ្ធ អនុប្រធានទី១ ព្រឹទ្ធសភា បានសម្តែងជាថ្មីម្តងទៀតនូវការគោរពនិងកោតសរសើរដ៏ជ្រាលជ្រៅចំពោះវីរភាពអង់អាចក្លាហានរបស់វីរយុទ្ធជននៃកងកម្លាំងប្រដាប់អាវុធទាំងអស់ និងបាននាំយកនូវអំណោយ និងវិភាគទានមួយចំនួនរបស់សម្តេចទាំងពីរ ជាមួយនឹងការចូលរួមវិភាគទានពីថ្នាក់ដឹកនាំ សមាជិក សមាជិកា ព្រឹទ្ធសភា ទីប្រឹក្សា ថ្នាក់ដឹកនាំនិងមន្រ្តីខុទ្ទកាល័យថ្នាក់ដឹកនាំទាំងបី ថ្នាក់ដឹកនាំនិងមន្ត្រីរាជការនៃអគ្គលេខាធិការដ្ឋានព្រឹទ្ធសភា ជូនដល់កងពលតូចអន្តរាគមន៍លេខ៨ និងកងអង្គរក្សការពារព្រំដែនតំបន់មុំបី នៃខេត្តព្រះវិហារ ។ បន្ទាប់ពីពិធីខាងលើ គណៈប្រតិភូព្រឹទ្ធសភាបានបន្តអញ្ជើញចូលរួមគោរពវិញ្ញាណក្ខន្ធលោកអនុសេនីយ៍ត្រី សោ វុទ្ធី មេបញ្ជាការកងអនុសេនាតូចស៊ើបការណ៍វរសេនាតូចលេខ៣៩២ ខេត្តព្រះវិហារ ដែលបានទទួលមរណភាព កាលពីថ្ងៃទី១០ ខែមិថុនា ឆ្នាំ២០២៥ ក្នុងជន្មាយុ ៤៨ឆ្នាំ និងបានផ្តល់ថវិកាជួយឧបត្ថម្ភដល់គ្រួសារសព ផងដែរ៕

ក្នុងកិច្ចប្រជុំ JBC កម្ពុជាបានបដិសេធយ៉ាងដាច់ខាតមិនទទួលស្គាល់ផែនទីដែលភាគីថៃ បានគូសជាឯកតោភាគី

នៅក្នុងកិច្ចប្រជុំ កិច្ចប្រជុំគណៈកម្មការចម្រុះព្រំដែន (JBC) កម្ពុជា-ថៃ លើកទី៦ ចាប់ពីថ្ងៃទី១៤-១៥ ខែមិថុនា ឆ្នាំ២០២៥ នៅរាជធានីភ្នំពេញ ឯកឧត្តម ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន និងជាប្រធានគណៈកម្មការចម្រុះព្រំដែនកម្ពុជា បានប្រាប់ទៅភាកីថៃ និងបានបដិសេធយ៉ាងដាច់ខាតថា កម្ពុជាមិនទទួលស្គាល់ផែនទីដែលភាគីថៃបានគូសជាឯកតោភាគីហើយយកមកប្រើប្រាស់ជាសំអាងដែលជាប្រភពចម្បងនាំមកនូវជម្លោះព្រំដែនដ៏រ៉ាំរ៉ៃ នាពេលកន្លងមក ក៏ដូចជាពេលបច្ចុប្បន្ន និងទៅអនាគត។នៅក្នុងកិច្ចប្រជុំនេះឯកឧត្តម ឡាំ ជា បានជម្រាបជូនសមភាគីថៃថា ដើម្បីជាប្រយោជន៍ធានាបាននូវដំណោះស្រាយលើបញ្ហាព្រំដែនប្រកបដោយយុត្តិធម៌ មិនលម្អៀង និងជាដំណោះស្រាយស្ថាពរសម្រាប់ប្រទេសទាំងពីរ ភាគីកម្ពុជាបានស្នើភាគីថៃចូលរួមជាមួយភាគីកម្ពុជានាំយកវិវាទព្រំដែន នៅតំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី ទៅតុលាការយុត្តិធម៌អន្តរជាតិ (ICJ)។ឯកឧត្តមបានបញ្ជាក់សាជាថ្មីអំពីជំហររបស់កម្ពុជា ក្នុងការចាប់ផ្តើមដំណើរការនីតិវិធីច្បាប់ដោយឯករាជ្យម្ចាស់ការ ទោះបីជាភាគីថៃបដិសេធសមត្ថកិច្ចរបស់តុលាការយុត្តិធម៌អន្តរជាតិ (ICJ) ក៏ដោយ។ លើសពីនេះទៀត ឯឧត្តមបានអះអាងបន្ថែមនៅចំពោះមុខភាគីថៃថា ចាប់ពីពេលនេះតទៅតំបន់ទាំងបួន៖ តំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របីលែងជាប្រធានបទឬកម្មវត្ថុនៃការពិភាក្សា និងដោះស្រាយនៅក្នុងក្របខណ្ឌគណៈកម្មការចម្រុះ ព្រំដែន JBC កម្ពុជា-ថៃ ទៀតហើយ។នៅក្នុងកិច្ចប្រជុំ JBC ដដែល ឯកឧត្តម ឡាំ ជា បានបញ្ជាក់ប្រាប់ភាគីថៃទៀតថា ក្រៅពីតំបន់ទាំងបួនដែលស្ថិតក្នុងបណ្ដឹងទៅតុលាការយុត្តិធម៌អន្តរជាតិ (ICJ) ភាគីកម្ពុជា នៅតែប្រកាន់ជំហរ និងសុច្ឆន្ទៈក្នុងការបន្តសហការជាមួយភាគីថៃ ដើម្បីជំរុញការវាស់វែង ខណ្ឌសីមា និងបោះបង្គោលព្រំដែន ដោយប្រើប្រាស់យន្តការគណៈកម្មការចម្រុះ ព្រំដែន (JBC) កម្ពុជា-ថៃ។ក្នុងនោះឯកឧត្តម ឡាំ ជា បានបញ្ជាក់អំពីគោលនយោបាយរបស់រាជរដ្ឋាភិបាលកម្ពុជា ក្នុងការប្រកាន់យក នូវសន្តិភាពនិយម និងចង់បានព្រំដែនមួយប្រកបដោយសន្តិភាព មិត្តភាព និងកិច្ចសហប្រតិបត្តិការល្អ ជាមួយភាគីថៃ ដោយផ្អែកលើមូលដ្ឋានលិខិតបទដ្ឋានគតិយុត្ត និងផែនទីដែលបានឯកភាពគ្នាដូចមាន ចែងក្នុងអនុស្សរណៈនៃការយោគយល់គ្នា (MOU) ឆ្នាំ ២០០០ ដែលភាគីទាំងពីរបានឯកភាពគ្នាប្រើប្រាស់ ផែនទីមាត្រដ្ឋាន១/២០០.០០០ ស្របតាមស្មារតីនៃអនុសញ្ញាបារាំង-សៀមឆ្នាំ១៩០៤ និងសន្ធិសញ្ញា បារាំង-សៀមឆ្នាំ១៩០៧ ដើម្បីអនុវត្តការងារខណ្ឌសីមា និងបោះបង្គោលព្រំដែន។ ឯកឧត្តមបន្តថា សូមជម្រាបថា កិច្ចប្រជុំគណៈកម្មការចម្រុះព្រំដែន (JBC) កម្ពុជា-ថៃ រយៈពេលពីរថ្ងៃ ថ្ងៃទី១៤-១៥ ខែមិថុនា ឆ្នាំ២០២៥ននេះ គឺបានប្រព្រឹត្តទៅក្នុងបរិយាកាសមិត្តភាព យោគយល់គ្នា ក្នុងស្មារតីពិភាក្សាគ្នាបើកចំហទៅវិញទៅមក និងប្រកបដោយភាពវិជ្ជមាន។ កិច្ចប្រជុំនេះបានបញ្ចប់ការពិភាក្សាទាំងស្រុងលើរបៀបវារៈដែលបានឯកភាពគ្នា និងបានចុះហត្ថលេខាលើកំណត់ហេតុជាផ្លូវការនៅថ្ងៃអាទិត្យ ទី១៥ ខែមិថុនា ឆ្នាំ២០២៥។ ភាគីទាំងពីរឯកភាពគ្នាគ្រោងជួបប្រជុំគ្នាសាជាថ្មីនៅខែកញ្ញា ឆ្នាំ២០២៥ ខាងមុ៕ អត្ថបទ៖ វ៉ន ដារ៉ា

កិច្ចប្រជុំ JBC កម្ពុជា-ថៃ រយៈពេលពីរថ្ងៃបញ្ចប់ដោយរលូន និងបានឯកភាពអនុម័តលើរបៀបវារៈចំនួន៤

ក្រោយបញ្ចប់កិច្ចប្រជុំរយៈពេលពីរថ្ងៃ នៃកិច្ចប្រជុំគណៈកម្មការចម្រុះព្រំដែន (JBC) កម្ពុជា-ថៃ លើកទី៦ ចាប់ពីថ្ងៃទី១៤-១៥ ខែមិថុនា ឆ្នាំ២០២៥ នៅរាជធានីភ្នំពេញ កិច្ចប្រជុំបានបញ្ចប់ទៅដោយរលូតន និងបានឯកភាពគ្នាអនុម័តលើរបៀបវារៈចំនួន ៤ ផងដែរ។នេះបើយោងតាមសេចក្តីប្រកាសព័ត៌មានរបស់ លេខាធិការដ្ឋានកិច្ចការព្រំដែនកម្ពុជា។ យោងតាមសេចក្ដីប្រកាសព័ត៌មាន របៀបវារៈទាំង ៤ ដែលភាគីទាំងពីរបានឯកភាពគ្នាអនុម័តរួមមាន៖ ទី១. ពិនិត្យ និងអនុម័តលើកំណត់ហេតុកិច្ចប្រជុំលើកទី៤របស់អនុគណៈកម្មការ បច្ចេកទេសចម្រុះព្រំដែន (JTSC) កម្ពុជា-ថៃ ថៃ-កម្ពុជា ចុះថ្ងៃទី១៤ ខែកក្កដា ឆ្នាំ២០២៤ នៅខេត្តសៀមរាប ព្រះរាជាណាចក្រកម្ពុជាទី២. ពិនិត្យ និងពិភាក្សាលើការកែសម្រួល TOR ឆ្នាំ២០០៣ ពាក់ព័ន្ធការផលិតផែនទី អ័រតូហូតូ (ជំហាន២ ក្នុងចំណុច៤ នៃ TOR)ទី៣. ពិភាក្សា និងអនុម័តលើការបញ្ជូនក្រុមវាស់វែងចម្រុះ ចុះវាស់វែង និងខណ្ឌសីមាព្រំដែន នៅលើដីជាក់ស្តែង នៅចន្លោះទីតាំងពិតប្រាកដនៃបង្គោលព្រំដែនដែលបានឯកភាពគ្នា (កំណាត់ខ្សែព្រំដែនដើរតាមផ្លូវទឹក និងកំណាត់ខ្សែត្រង់)ទី៤. ពិភាក្សាលើសេចក្តីណែនាំលើការវាស់វែងនៅ Sector 6 (ចំណុច IX នៃកិច្ចប្រជុំ លើកទី៤ និងកិច្ចប្រជុំពិសេសរបស់ JBC ឆ្នាំ២០០៩)។សូមជម្រាបថា ភាគីកម្ពុជា និងភាគីថៃបានរៀបចំកិច្ចប្រជុំគណៈកម្មការចម្រុះព្រំដែន (JBC) កម្ពុជា-ថៃ លើកទី៦ រយៈពេលពីរថ្ងៃចាប់ពីថ្ងៃទី១៤ ដល់ថ្ងៃទី១៥ ខែមិថុនា ឆ្នាំ២០២៥ នៅរាជធានីភ្នំពេញ ព្រះរាជាណាចក្រកម្ពុជា ដើម្បីបន្តពិភាក្សា និងជំរុញ ការងារខណ្ឌសីមា និងបោះបង្គោលព្រំដែនគោករវាងប្រទេសទាំងពីរ។ មុនកិច្ចប្រជុំពេញអង្គ JBC គឺមានកិច្ចប្រជុំចង្អៀតរវាងភាគីកម្ពុជា-ថៃដោយភាគីកម្ពុជាដឹកនាំដោយឯកឧត្តម ឡាំ ជា រដ្ឋមន្ត្រី ទទួលបន្ទុករដ្ឋលេខាធិការដ្ឋានកិច្ចការព្រំដែន និងជាប្រធានគណៈកម្មការចម្រុះព្រំដែនកម្ពុជា និងឯកឧត្តម ប្រាសាស ប្រាសាសវិនិច្ឆ័យ ទីប្រឹក្សាក្រសួងការបរទេសថៃ និងជាប្រធានគណៈកម្មការចម្រុះព្រំដែនថៃ៕

ក្រុមការងារ និងនិស្សិតអាហារូបករណ៍ អ.ម.ត ចូលរួមសហការរៀបចំ និងរត់ ក្នុងទិវារត់ប្រណាំងអន្តរជាតិពាក់កណ្តាលម៉ារ៉ាតុងភ្នំពេញ លើកទី១៣

នាព្រឹកព្រលឹមថ្ងៃទី១៥ ខែមិថុនា ឆ្នាំ២០២៥ ក្រុមការងារ និងនិស្សិតអាហារូបករណ៍ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.ត) បានចូលរួមសហការរៀបចំ និងរត់ ក្នុងទិវារត់ប្រណាំងអន្តរជាតិពាក់កណ្តាលម៉ារ៉ាតុងភ្នំពេញ លើកទី១៣ នៅសួនច្បារមុខវត្តបទុមវតី ដែលរៀបចំដោយគណៈកម្មាធិការជាតិអូឡាំពិកកម្ពុជា ដើម្បីអបអរសាទរព្រះរាជពិធីបុណ្យចម្រើនព្រះជន្មវស្សា សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ គម្រប់ ៨៩ យាងចូល ៩០ព្រះវស្សា។ក្រុមនិស្សិតអាហារូបករណ៍ អ.ម.ត បានគោរពថ្លែងអំណរគុណជូនចំពោះ សម្តេចធិបតី ហ៊ុន ម៉ាណែត ប្រធានកិត្តិយស និងលោកជំទាវបណ្ឌិត ពេជ ចន្ទមុន្នី ប្រធានសមាគម អ.ម.ត ដែលអនុញ្ញាតឱ្យពួកគេបានឱកាសចូលរួមកិច្ចការងារសង្គមនានា ដើម្បីទទួលបានចំណេះដឹង ចំណេះធ្វើ បទពិសោធ ការសាមគ្គី ការធ្វើការងារជាក្រុម និងការទំនាក់ទំនងល្អ បន្ថែមពីលើការសិក្សានៅក្នុងសាលាមួយកម្រិតទៀត។ក្នុងពិធីនេះផងដែរ គណៈកម្មាធិការជាតិអូឡាំពិកកម្ពុជា បានថ្លែងអំណរគុណដល់សមាគម អ.ម.ត ដែលជានិច្ចកាលបានចូលរួមសហការយ៉ាងសស្រាក់សស្រាំក្នុងព្រឹត្តិការណ៍កីឡានានា ជាក់ស្តែង សបញ្ជាក់តាមរយៈសកម្មភាពនាថ្ងៃនេះ និស្សិត អ.ម.ត បានចូលរួមសហការលើកិច្ចការសំខាន់ៗដូចជា ការរៀបចំការចេញដំណើរ-បញ្ចប់, ការប្រគល់មេដាយ, ការគ្រប់គ្រងស្ថានីយផ្តល់ទឹក, សហការសម្រួលចរាចរណ៍, ការសម្អាតបរិស្ថាន។ល។ ដែលជាចំណែកមួយញ៉ាំងឱ្យពិធីបានប្រព្រឹត្តទៅដោយរលូន៕

ឯកឧត្តម គួច ចំរើន៖ ជំនាញបច្ចេកទេសគឺស្ពានដ៏រឹងមាំឆ្ពោះទៅកាន់អនាគដ៏ភ្លឺស្វាង

ជំនាញបច្ចេកទេសគឺស្ពានដ៏រឹងមាំឆ្ពោះទៅកាន់អនាគដ៏ភ្លឺស្វាង។ នេះបើតាមប្រសាសន៍ឯកឧត្តម គួច ចំរើន អភិបាលនៃគណៈភិបាលខេត្តកណ្តាល បានថ្លែងក្នុងកម្មវិធីទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៨ ដែលរៀបចំដោយវិទ្យាស្ថានជាតិពហុបច្ចេកទេសតេជោសែន ស្ថិតនៅក្រុងតាខ្មៅ ខេត្តកណ្តាល នាព្រឹកថ្ងៃទី១៥ ខែមិថុនានេះ។នៅក្នុងអង្គពិធី ឯកឧត្តមគួច ចំរើន បានមានប្រសាសន៍ បន្តថា រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយឧត្តមគតិ និងការប្តេជ្ញាចិត្តយ៉ាងមុតស្រួចរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដើម្បី កំណើន ការងារ សមធម៌ ប្រសិទ្ធភាព និងចីរភាព ដែលបានកំណត់យកអាទិភាព គន្លឹះ៥ «មនុស្ស ផ្លូវ ទឹក ភ្លើង និងបច្ចេកវិទ្យា»។ អាទិភាព “មនុស្ស” គឺជាអាទិភាពចម្បង ទី១ ដែលផ្តោតសំខាន់លើការកសាង និងអភិវឌ្ឍន៍មូលធនមនុស្ស ប្រកបដោយគុណភាព សមត្ថភាព ជំនាញវិជ្ជាជីវៈច្បាស់លាស់ គំនិតច្នៃប្រឌិត និងភាពប្រកួតប្រជែងខ្ពស់ ដើម្បីសម្រេចឱ្យបាននូវគោលដៅ “ពលរដ្ឋម្នាក់មានជំនាញមួយយ៉ាងតិចប្រចាំជីវិត” ។ ក្នុងន័យនេះ រាជរដ្ឋាភិបាលបានកំណត់យ៉ាងជាក់លាក់ “ការបណ្តុះបណ្តាល ជំនាញបច្ចេកទេស” ជាមុំទី២ នៃបញ្ចកោណទី១ “ការអភិវឌ្ឍមូលធនមនុស្ស” ។ ជាមួយគ្នានេះ ឯកឧត្តមបានផ្តល់អនុសាសន៍មួយចំនួនដល់យុវជនដូចជា៖ចាប់យកឱកាសសិក្សាជំនាញដោយឥតគិតថ្លៃ លើជំនាញបច្ចេកទេស និង វិជ្ជាជីវៈណាមួយដែលខ្លួនស្រឡាញ់ ឬមានតម្រូវការទីផ្សារ ដើម្បីមានជំនាញមួយយ៉ាងតិចប្រចាំជីវិត ជាពិសេសយុវជនដែលមានបណ្ណសមធម៌ ឬងាយរងហានិភ័យ នឹងទទួលបានប្រាក់ឧបត្ថម្ភ ២៨ ម៉ឺនរៀល/ខែ។ ត្រូវតាំងចិត្តសិក្សាឱ្យបានខ្ជាប់ខ្ជួន នៅពេលបានចូលរៀនហើយ និងខិតខំរៀនសូត្រឱ្យបានពិតប្រាកដ ក្រេបជញ្ជក់យកចំណេះដឹង និងជំនាញឱ្យ បានច្បាស់លាស់ និងកុំមើលស្រាលជំនាញបច្ចេកទេស ដោយត្រូវយល់ថា "ជំនាញពិត ជីវិតប្រសើរ" ហើយជំនាញបច្ចេកទេសគឺជាស្ពានដ៏រឹងមាំឆ្ពោះទៅកាន់អនាគតដ៏ភ្លឺស្វាង។គួរបញ្ជាក់ដែរថា ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ ត្រូវបានរាជរដ្ឋាភិបាលបង្កើតឡើងនៅឆ្នាំ២០១៧ ដែលប្រារព្ធធ្វើឡើងនៅថ្ងៃទី១៥ ខែមិថុនា ជារៀងរាល់ឆ្នាំ ក្នុងគោលបំណងលើកកម្ពស់គុណភាព គុណតម្លៃ និងកិត្តិនាម នៃការអប់រំបណ្តុះបណ្តាលបច្ចេកទេស និងវិជ្ជាជីវៈ តាមរយៈការផ្សព្វផ្សាយ ជំរុញ លើកទឹកចិត្តទៅដល់ សិស្សានុសិស្ស និស្សិត យុវជន មាតាបិតា អាណាព្យាបាល កម្មករនិយោជិត និយោជក និងផ្នែកឯកជន ព្រមទាំង សាធារណជនទូទៅ ឱ្យបានយល់ដឹងកាន់តែច្បាស់ និងទូលំទូលាយអំពីសារៈសំខាន់នៃការអប់រំបណ្តុះបណ្តាល បច្ចេកទេស និងវិជ្ជាជីវៈ ក្នុងការអភិវឌ្ឍកម្លាំងពលកម្មជំនាញប្រកបដោយគុណភាព ដើម្បីឆ្លើយតបទៅនឹងតម្រូវ ការទីផ្សារការងារទាំងក្នុង និងក្រៅប្រទេស។នៅឆ្នាំ២០២៥នេះ ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី០៨ ប្រារព្ធធ្វើឡើងក្រោមប្រធានបទស្តីពី«TVET បង្កើតឱកាសការងារ និងសាងក្តីសង្ឃឹមដល់យុវជន»។ អត្ថបទ៖ទូច សោភ័ណ

បណ្ដាញសង្គម

ព័ត៌មានថ្មីៗ

រុស្ស៊ីត្រៀមជាស្រេចជួយសម្របសម្រួល ក្នុងបញ្ហាអ៊ីរ៉ង់ និងទទួលយកសារធាតុអ៊ុយរ៉ានីញ៉ូមរបស់ទីក្រុងតេអេរ៉ង់

ប្រមុខ IAEA៖ មិនមានការខូចខាតបន្ថែមទៀតឡើយ នៅទីតាំងចម្រាញ់អ៊ុយរ៉ានីញ៉ុមរបស់អ៊ីរ៉ង់

សមាជិកព្រឹទ្ធសភាអាមេរិក មានចំណាត់ការកម្រិតអំណាចសង្រ្គាមរបស់លោក Trump លើអ៊ីរ៉ង់ ខណៈជម្លោះ នៅមជ្ឈិមបូព៌ា កើនឡើង

ក្រុមហ៊ួទីនៅយេម៉ែន បានកំណត់គោលដៅលើអ៊ីស្រាអែល ជាមួយនឹងមីស៊ីលបាលីស្ទីក នៅក្នុងការសម្របសម្រួលជាមួយអ៊ីរ៉ង់

អាល្លឺម៉ង់ជំរុញឲ្យមានការខិតខំប្រឹងប្រែងការទូត ដើម្បីទប់ស្កាត់ការកើនឡើងភាពតានតឹងនៅមជ្ឈិមបូព៌ា

ប្រធានាធិបតីអ៊ីរ៉ង់ និយាយថា អាមេរិកអនុញ្ញាតឲ្យអ៊ីស្រាអែលវាយប្រហារអ៊ីរ៉ង់

ចំនួនអ្នកស្លាប់ដោយសារព្យុះទីហ្វុង Wutip នៅវៀតណាម កើនឡើងដល់ ៧នាក់

ក្រសួងសុខាភិបាល៖ មនុស្សយ៉ាងតិច ២៨៧នាក់ បានរងរបួស ក្នុងការវាយប្រហាររបស់អ៊ីរ៉ង់លើ អ៊ីស្រាអែល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877