BTV NEWS

កម្ពុជា-ចិន ប្ដេជ្ញាបន្តជំរុញទំនាក់ទំនង និងកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅ

ឯកអគ្គរដ្ឋទូតឡាវប្តេជ្ញាចិត្តបន្តពង្រឹង និងពង្រីកទំនាក់ទំនងដ៏ល្អប្រសើររវាងប្រទេសកម្ពុជា និងឡាវ លើគ្រប់វិស័យ

កិច្ចប្រជុំរវាងរដ្ឋមន្ត្រីការបរទេស និងរដ្ឋមន្ត្រីការពារជាតិកម្ពុជានិងចិនបានចាប់ផ្តើមជាផ្លូវការ

ឯកឧត្តម ហ៊ុន ម៉ានី៖ ពាក់ព័ន្ធលើរឿង “អាវក្រៅ jacket” គឺត្រូវមើលលើសពី “ម៉ាក brand របស់អាវ” ដែលនៅលើអាវ ដោយបង្វែរមកមើលពីសារៈសំខាន់ពីអត្ថន័យ និងអនុស្សាវរីយ៍នៃ “អាវក្រៅ jacket” វិញ

ព័ត៌មានជាតិ

ប្រមុខការទូតកម្ពុជា៖ កម្ពុជារង់ចាំពង្រឹងកិច្ចសហប្រតិបត្តិការបន្ថែមទៀតជាមួយអូស្ត្រាលី លើវិស័យសក្តានុពល និងការធ្វើសមយុទ្ធរបស់កងទ័ពជើងទឹក

ភ្នំពេញ៖ ក្នុងឱកាសជំនួបជាមួយប្រមុខការពារជាតិអូស្រ្ដាសី, ប្រមុខការទូតកម្ពុជាបានបញ្ជាក់ថា កម្ពុជាទរង់ចាំពង្រឹងកិច្ចសហប្រតិបត្តិការបន្ថែមទៀតជាមួយអូស្ត្រាលីលើវិស័យដែលសក្តានុពល និងការធ្វើសមយុទ្ធរបស់កងទ័ពជើងទឹក។ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានថ្លែងបញ្ជាក់បែបនេះ ក្នុងឱកាស អញ្ជើញជួបពិភាក្សាទ្វេភាគីជាមួយ ឯកឧត្តមឧបនាយករដ្ឋមន្ត្រី Richard Marles រដ្ឋមន្ត្រីការពារជាតិអូស្ត្រាលីនៅថ្ងៃទី១៦ ខែមីនា ឆ្នាំ២០២៦នេះ។ ក្នុងឱកាសជំនួបនេះ ឯកឧត្តមឧបនាយករដ្ឋមន្ត្រី បានសម្តែងនូវការពេញចិត្តចំពោះវឌ្ឍនភាព នៃកិច្ចសហប្រតិបត្តិការលើវិស័យការពារជាតិ និងសន្តិសុខ រវាងកម្ពុជា និងអូស្ត្រាលី ហើយបានថ្លែងអំណរគុណចំពោះប្រទេសអូស្ត្រាលី ដែលបន្តគាំទ្រដល់ការកសាងសមត្ថភាព និងការបណ្តុះបណ្តាលដល់កងកម្លាំងយោធា។ ឯកឧត្តមថ្លែងថា៖«កម្ពុជាទន្ទឹងរង់ចាំក្នុងការពង្រឹងកិច្ចសហប្រតិបត្តិការបន្ថែមទៀតជាមួយអូស្ត្រាលី លើវិស័យដែលសក្តានុពលនានា ដូចជាការផ្លាស់ប្តូរព័ត៌មាន និងការធ្វើសមយុទ្ធរបស់កងទ័ពជើងទឹក»។ក្នុងជំនួបនេះ ឯកឧត្តមឧបនាយករដ្ឋមន្ត្រីទាំងពីរ បានធ្វើការផ្លាស់ប្តូរទស្សនៈគ្នាលើបញ្ហាតំបន់ និងអន្តរជាតិនានា ក្នុងពេលដែលសភាពការណ៍ពិភពលោកមានការប្រែប្រួលយ៉ាងឆាប់រហ័ស។ ចំណែកឯវឌ្ឍនភាពថ្មីៗនៃស្ថានភាពព្រំដែនកម្ពុជា-ថៃ ក៏ត្រូវបានលើកយកមកពិភាក្សាគ្នាយ៉ាងស៊ីជម្រៅផងដែរ៕

កម្ពុជា-អូស្រ្តាលី បើកទំព័រថ្មីសម្រាប់កិច្ចសហប្រតិបត្តិការក្នុងវិស័យ TVET តាមរយៈភាពជាដៃគូបង្កើតមជ្ឈមណ្ឌលឧត្តមភាពយានយន្តនៅកម្ពុជា (អេស ខេមបូឌា)

ភ្នំពេញ៖ នាព្រឹកថ្ងៃទី១៦ ខែមីនា ឆ្នាំ២០២៦ នេះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោកស្រី Bridget Collier ភារធារីស្ថានទូតអូស្ត្រាលីប្រចាំកម្ពុជា បានអញ្ជើញជាអធិបតីភាពក្នុងពិធីសម្ពោធជាផ្លូវការមជ្ឈមណ្ឌលឧត្តមភាពយានយន្តនៅកម្ពុជា (ACE-C) ហៅកាត់ថា អេស ខេមបូឌា ជាគំនិតផ្តួចផ្តើមដ៏មានសារៈសំខាន់ ក្រោមភាពជាដៃគូរវាងក្រសួងការងារ និងបណ្តុះបណ្តាលវិជ្ជាជីវៈ និងវិទ្យាស្ថាន Bendigo Kangan (BKI) អូស្ត្រាលី ហើយគាំទ្រដោយរដ្ឋាភិបាលអូស្ត្រាលី។ ថ្លែងក្នុងពិធីសម្ពោធនាព្រឹកនេះ ឯកឧត្តមរដ្ឋមន្ត្រី ហេង សួរ បានសម្តែងនូវការអបអរសាទរ និងវាយតម្លៃខ្ពស់ចំពោះកិច្ចប្រឹងប្រែងរហូតសម្រេចបានសមិទ្ធផលថ្មីនេះ ដោយឯកឧត្តមសង្កត់ធ្ងន់ថា ការបង្កើតបាន និងបើកឱ្យដំណើរជាផ្លូវការ អេស ខេមបូឌា នាថ្ងៃនេះ គឺមិនត្រឹមតែជាការពង្រឹងនិងពង្រីកកិច្ចសហប្រតិបត្តិការវាងកម្ពុជា និងអូស្ត្រាលីប៉ុណ្ណោះទេ តែក៏ជាព្រឹត្តិការណ៍ប្រវត្តិសាស្ត្រនៃភាពជាដៃគូរវាងភាគីទាំងពីរ ដោយផ្អែកលើការប្តេជ្ញាចិត្តរួមគ្នារបស់យើងចំពោះការអភិវឌ្ឍជំនាញ និងការរៀនសូត្រពេញមួយជីវិត ស្របតាមយុទ្ធសាស្ត្របញ្ចកោណ ដំណាក់កាលទី១ ក្រោមចក្ខុវិស័យដ៏មុតស្រួច និងវែងឆ្ងាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដូច សម្តេច បានរំលឹកឡើងវិញថ្មីៗនេះ នៅក្នុងកិច្ចប្រជុំកំពូលធុរកិច្ចអាស៊ាន-កម្ពុជាឆ្នាំ២០២៦ ថា “ប្រជាជន” គឺជាទ្រព្យសម្បត្តិដ៏ធំបំផុតរបស់កម្ពុជា។ឯកឧត្តមរដ្ឋមន្រ្តីក៏បានគូសបញ្ជាក់ថា អេស ខេមបូឌា នឹងដើរតួនាទីជាវេទិកាឈានមុខក្នុងការបណ្តុះបណ្តាលជាក់ស្តែងផ្នែកយានយន្ត ហើយមានគោលបំណងលើកកម្ពស់ស្តង់ដា ពង្រឹងការត្រៀមខ្លួនចូលធ្វើការ និងណែនាំវិធីសាស្ត្រ “រៀនផង ធ្វើការផង” ដោយយកគំរូតាមប្រព័ន្ធសិស្សរបស់អូស្ត្រាលី។ កិច្ចសហប្រតិបត្តិការនេះផ្តោតលើអាទិភាពយុទ្ធសាស្ត្រចម្បងចំនួន ៥ ដូចជា៖ (១) ការពង្រឹងជំនាញ និងការរៀនជំនាញថ្មី, (២) នវានុវត្តន៍ និងគម្រោងសាកល្បង, (៣) ការបំប្លែងឌីជីថលក្នុង TVET, (៤) ការសម្របសម្រួលគោលនយោបាយ និង(៥) ការផ្ទេរចំណេះដឹង និងបច្ចេកវិទ្យា។ តាមរយៈការរួមបញ្ចូលកម្មវិធីសិក្សារបស់ BKI និងបច្ចេកវិទ្យាឧស្សាហកម្មទំនើបរបស់ RMA, កម្ពុជាមិនត្រឹមតែបង្កើតមជ្ឈមណ្ឌលបណ្តុះបណ្តាលមួយប៉ុណ្ណោះទេ ប៉ុន្តែបានបង្កើតមជ្ឈមណ្ឌលគំរូសម្រាប់នវានុវត្តន៍ក្នុងការវិភាគវិនិច្ឆ័យ, យានយន្តអគ្គិសនី និងសុវត្ថិភាព ហើយក៏ធានាថា សិស្សបញ្ចប់ការសិក្សាមានភាពត្រៀមខ្លួនសម្រាប់ការងារតាំងពីថ្ងៃដំបូង។ ឯកឧត្តមរដ្ឋមន្ត្រី បានបន្តសង្កត់ធ្ងន់ថា តាមរយៈផ្លែផ្កានៃកិច្ចសហការនេះ យើងនឹងរួមគ្នាបង្កើតប្រព័ន្ធ TVET ជំរុញដោយឧស្សាហកម្មទំនើប ដែលផ្តល់ឱ្យយុវជននូវសមត្ថភាពឧស្សាហកម្មជាមួយនឹងទេពកោសល្យ ដែលអាចជួយប្រទេសកម្ពុជាជាមួយនឹងទំនុកចិត្តដើម្បីសម្រេចបាននូវចក្ខុវិស័យឆ្នាំ២០៥០។ លោកស្រី Bridget Collier ក៏បានចាត់ទុកមជ្ឈមណ្ឌលនេះ គឺជាជំហានថ្មីមួយទៀតក្នុងកិច្ចសហប្រតិបត្តិការរវាងអូស្ត្រាលី និងកម្ពុជា ដែលបានបន្តយូរមកហើយក្នុងវិស័យអប់រំ និងការអភិវឌ្ឍសមត្ថភាពមនុស្ស ខណៈពេលដែលកម្ពុជាកំពុងបន្តរីកចម្រើន ធ្វើពិពិធកម្មសេដ្ឋកិច្ច និងឆ្ពោះទៅរកឧស្សាហកម្មកម្រិតខ្ពស់ជាងមុន ហើយតម្រូវការកម្លាំងពលកម្មជំនាញ ក៏ក្លាយជាកត្តាស្នូលកាន់តែសំខាន់សម្រាប់ការសម្រេចបំណងអភិវឌ្ឍរបស់ខ្លួន។លោកស្រី Sharan Burrow ប្រធានក្រុមប្រឹក្សាវិទ្យាស្ថាន BKI, លោក ងន សាំង អគ្គនាយកក្រុមហ៊ុន RMA Cambodia និងលោក វ៉ាន់ វិចិត្រ ដេវីត នាយកមជ្ឈមណ្ឌល អេស ខេមបូឌា សុទ្ធតែបានសង្កត់ធ្ងន់ទៅលើភាពជាដៃគូនៃកិច្ចសន្ទនា ដែលនាំឱ្យមានសមិទ្ធផលនេះ ដែលអូស្រ្តាលីពិតជាមានមោទនភាពដែលបានរួមចំណែកបង្កើតឡើងដែលនឹងគាំទ្រដល់សិស្សរាប់ពាន់នាក់នៅក្នុងឆ្នាំខាងមុខ ក្នុងការកសាងជំនាញ ពង្រឹងអាជីព និងការរីកចម្រើនបន្តទៀតនៃវិស័យយានយន្ត និងវិស័យផលិតកម្មកម្ពុជា។នាឱកាសនោះដែរ ឯកឧត្តមរដ្ឋមន្រ្តី ក៏បានសម្តែងនូវអំណរគុណយ៉ាងជ្រាលជ្រៅចំពោះឯកឧត្តម Derek YIP ឯកអគ្គរដ្ឋទូតអូស្ត្រាលី និងលោកស្រី Bridget COLLIER, លោកស្រី Sharan BURROW ប្រធានក្រុមប្រឹក្សាវិទ្យាស្ថាន BKI, ក្រុមហ៊ុន RMA Cambodia, មូលនិធិអភិវឌ្ឍជំនាញ និងដៃគូដទៃទៀត ចំពោះការជឿទុកចិត្ត និងភាពជាដៃគូជាមួយក្រសួងការងារ និងបណ្តុះបណ្តាលវិជ្ជាជីវៈ បង្កើតការវិនិយោគលើគំរូភាពជាដៃគូរដ្ឋ-ឯកជន នេះឡើង (PPP) ដែលជួយបង្កើនភាពធនសម្រាប់សេដ្ឋកិច្ចកម្ពុជា៕

ការធ្វើទំនើបកម្មដាំដុះបន្លែសុវត្ថិភាព បានចូលរួមផ្គត់ផ្គង់ទីផ្សារបន្លែក្នុងស្រុក និងកាត់បន្ថយការនាំចូល

អគ្គនាយកក្រុមហ៊ុនដំាដុំបន្លែប្រើផ្ទះសំណាញ់ស្រុកមួយ បង្ហាញនូវមោទនភាពនៃការចូលរួមផ្គត់ផ្គង់បន្លែសម្រាប់ទីផ្សារ ខណៈដែល ប្រជាពលរដ្ឋកម្ពុជាបានគាំទ្របន្ថែសុវត្ថិភាព បាននិងកំពុងចូលរួមជាមួយរាជរដ្ឋាភិបាល តាមរយៈនៃការកាត់បន្ថយការនាំចូលបន្លែពីក្រៅ ប្រទេស។អ្នកឧកញ៉ា ហ៊ុន ឡាក់ អគ្គនាយកក្រុមហ៊ុន Tropicam Fruit and Vegetable លើកឡើងក្នុងកិច្ចសម្ភាសន៍ជាមួយសារព័ត៌មាន ស្តីពីការអនុវត្តន៍កសិកម្មល្អ នៃដាំដុះបន្លែសុវត្ថិភាព ថា ជុំវិញវិស័យកសិកម្ម រាជរដ្ឋាភិបាលបានជំរុញឱ្យមានការដាំដុះដំណាំរួមផ្សំ ជាពិសេសបន្លែបង្ការ សម្រាប់ផ្គត់ផ្គង់តម្រូវការប្រចាំថ្ងៃ ឬឈើបហូបផ្លែជាដើម។ តាមរយៈនេះឃើញថា ក្រសួងកសិកម្ម រុក្ខាប្រមាញ់ និង នេសាទ បាននិងកំពុងខិតខំប្រឹងប្រែងដូចជា ការរៀបចំឱ្យមានសហគមន៍កសិកម្មទំនើប ដើម្បីបង្ហាញដល់ផលិករដែលមានការដាំដុះដាច់ ដោយឡែក ឱ្យងាកមកចង់ក្រងជាសហគមន៍។ ការចង់ក្រងជាសហគមន៍នេះគឺផ្តល់លទ្ធភាពជាច្រើនដល់អ្នកដាំដុះពីរាជរដ្ឋាភិបាលដូចជា បច្ចេកទេស ទុនវិនិយោគ និងទីផ្សារ តាមយន្តការធ្វើកសិកម្មតាមកិច្ចសន្យា។ទាក់ទិនការដាំដុះបន្លែដោយប្រើប្រាស់ផ្ទះសំណាញ់ អ្នកឧកញ៉ា បន្តថា គិតមកដល់ពេលនេះ ក្រុមហ៊ុនបានពង្រីកការដាំដុះនៅ ក្នុងខេត្តចំនួន៧រួមមាន៖ ខេត្តកណ្តាល កំពង់ស្ពឺ កែប កំពត តាកែវ កំពង់ឆ្នាំង និងខេត្តកំពង់ចាម បច្ចុប្បន្នប្រភេទបន្លែទាំងនោះបាន ទទួលការគាំទ្រពីប្រជាពលរដ្ឋយ៉ាងខ្លាំង ជាបន្លែដែលផ្តល់នូវសុខភាព ជាពិសេសបាននិងកំពុងចូលរួមចំណែកកាត់បន្ថយនៃការនាំចូល បន្លែពីក្រៅប្រទេសផងដែរ។ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានថ្លែងប្រាប់ BTV នាពេលថ្មីៗនេះថា ជុំវិញការ ដាំដុះបន្លែ ក្រសួងកសិកម្ម រុក្ខាប្រមាញ់ និងនេសាទ បាននិងកំពុងយកចិត្តទុកដាក់ខ្ពស់ ជាពិសេសការជំរុញដាំដុះដំណាំដោយប្រើផ្ទះ សំណាញ់ ដែលការដាំដុះរបៀបនេះគឺធន់និងអាកាសធាតុ។ ចំណែកការផ្គត់ផ្គង់បន្លែតាមទីផ្សារក្នុងស្រុកវិញឃើញថា កម្ពុជាមានភាព សម្បូរទៅតាមរយៈរដូវកាល ដោយមានរដូវខ្លះអាចផ្គត់ផ្គង់លើសតម្រូវការ និងនៅរដូវខ្លះទៀតអាចថមថយដោយសារបញ្ហាអាកាសធាតុ តែទោះបីយ៉ាងណាបន្លែដែលដាំដុះក្នុងស្រុក អាចផ្គត់ផ្គង់បានក្នុងរង្វង់ប្រមាណ ៨០ ភាគរយ និង ២០ ភាគរយទៀត កម្ពុជានៅត្រូវការ នាំចេញចូល។ចំណែកការនាំចេញវិញ បើយោងតាមបាយការណ៍របស់អគ្គនាយកដ្ឋានគយ និងរដ្ឋាករកម្ពុជា នៅក្នុងរយៈពេល២ ខែ ដើមឆ្នាំ២០២៦ នេះ កម្ពុជាបាននាំចេញបន្លែសម្រាប់បរិភោគ ឬស និងមើមផ្សេងៗ មានទឹកប្រាក់ប្រមាណជាង ២៧៩ លានដុល្លារអាម៉េរិក កើនឡើង ជាង ៣៩% បើធៀបរយៈពេលដូចគ្នានឹងឆ្នាំ២០២៥៕ អត្ថបទ៖ សុន រ៉ាឌី

អ្នកនាំពាក្យ៖ ថ្នាក់ដឹកនាំកម្ពុជាចង់ឱ្យកូនខ្មែរគ្រប់រូបរក្សាសាមគ្គី និងពង្រឹងខ្លួន ដើម្បីការពារអធិបតេយ្យភាពជាតិ និងបូរណភាពទឹកដី

អ្នកនាំពាក្យរាជរដ្ឋាភិបាលកម្ពុជា បានរម្លឹកឡើងវិញនូវប្រសាសន៍របស់ថ្នាក់ដឹកនាំនៃយើង ដែលបានដាស់ស្មារតីកូនខ្មែរគ្រ់រូបឱ្យរក្សាមហាសាមគ្គីជាតិជាធ្លុងមួយ និងពង្រឹងខ្លួនឱ្យរឹងមាំដើម្បីការពារអធិបតេយ្យភាពជាតិ និងបូរណភាពទឹកដី។ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល ក្នុងសន្និសីទសារព័ត៌មាន នៅថ្ងៃទី១៦ ខែមីនា ឆ្នាំ២០២៦នេះ បាន រម្លឹកឡើងវិញនូវប្រសាសន៍ដ៏មានអត្ថន័យជ្រាលជ្រៅរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ដែលបានដាស់ស្មារតីកូនខ្មែរក្នុងសារអបអរសាទរខួប៤៧ឆ្នាំ នៃទិវាជ័យជំនៈ៧មករា ឆ្នាំ២០២៦, ដោយនៅពេលនោះ សម្ដេចតេជោបានថ្លែងថា៖«នៅលើមាគ៌ាឆ្ពោះទៅមុខបន្តទៀត សូមជនរួមជាតិគ្រប់រូបបន្តលើកកម្ពស់ស្មារតីស្នេហាជាតិ ប្រឹងឈរខ្លួនឯង ខិតខំខ្លួនឯង និងពង្រឹងភាពម្ចាស់ការខ្លួនឯង ដើម្បីធានាដល់ការការពារនិងកសាងប្រទេសជាតិយើង។ សម្ដេចតេជោ មានជំនឿយ៉ាងមុតមាំថា ផ្អែកលើកម្លាំងមហាសាមគ្គី និងស្មារតីស្នេហាជាតិដ៏មោះមុត យើងពិតជាបន្តយកឈ្នះលើរាល់ឧបសគ្គបាន មិនថាឧបសគ្គនោះធំប៉ុណ្ណាឡើយ។ យើងចងចាំប្រវត្តិសាស្ត្រនេះ ចងចាំឧក្រិដ្ឋកម្មបំផ្លាញមរតកវប្បធម៌ដែលជាដួងព្រលឹងរបស់ជាតិ ចងចាំការប្រមាថមើលងាយមកលើជាតិ មាតុភូមិ និងប្រជាជនយើង»។ចំណែកឯសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងសារទៅកាន់វីរយុទ្ធជន និងជនរួមជាតិកាលពីថ្ងៃទី២៩ ធ្នូ ឆ្នាំ ២០២៥ បន្ទាប់ពីបទឈប់បាញ់ចូលជាធរមានក៏បានអង្រួនស្មារតីកូនខ្មែរដែរថា៖ ទុក្ខលំបាក និងពលិកម្មសាច់ស្រស់ ឈាមស្រស់ របស់វីរជនយើងនៅឯសមរភូមិ គឺជាការដាស់តឿនមិនឱ្យយើងបំភ្លេចបានមួយវិនាទីណាឡើយថា «បែកបាក់គឺស្លាប់ សាមគ្គីរឹងមាំគឺរស់»។ ដូច្នេះ ស្របតាមពាក្យចាស់ពោលថា «ចង្កឹះមួយបាច់ គេកាច់មិនបាក់» យើងត្រូវយកការលំបាកនៅពេលនេះធ្វើជាឱកាសដើម្បីឱ្យខ្មែរគ្រប់រូបចេះពួតដៃគ្នាកសាងជាតិខ្មែរយើងឱ្យកាន់តែរឹងមាំ និងកាន់តែប្រសើរឡើងប្រកបដោយភាពធន់ នៅក្រោមម្លប់ដ៏សែនត្រជាក់នៃអង្គព្រះមហាក្សត្រជាទីគោរពសក្ការៈនៃយើង»។ សម្តេចតេជោ ហ៊ុន សែន ដែលជាស្ថាបនិកនិងប្រតិបត្តិករសន្តិភាព និងជាស្ថាបនិកនៃការកសាងកម្ពុជាសម័យទំនើបបានបន្តទៀតថា៖«ខ្ញុំសូមអំពាវនាវដល់បងប្អូនជនរួមជាតិទាំងអស់នៅគ្រប់ទិសទីសូមបន្តរួបរួមសាមគ្គីគ្នាជាធ្លុងមួយក្រោមបាវចនា ជាតិ សាសនា ព្រះមហាក្សត្រ និងរួមសាមគ្គីជុំវិញរាជរដ្ឋាភិបាល ប្រកបដោយជំនឿមុតមាំ ចំពោះបុព្វហេតុដ៏យុត្តិធម៌របស់យើង។ សាមគ្គីរស់ សាមគ្គីឈ្នះ ហើយគ្មានអានុភាពណាមកបំផ្លាញឆន្ទៈរបស់យើងបានឡើយ។ កម្ពុជាសូមបញ្ជាក់ជាថ្មីនូវការប្តេជ្ញាចិត្តយ៉ាងមុតមាំក្នុងការខិតខំដើម្បីសម្រេចនូវគោលដៅចម្បងរបស់ខ្លួន គឺការបញ្ចប់ទុក្ខវេទនារបស់ប្រជាជន ទប់ស្កាត់ការបំផ្លិចបំផ្លាញ និងបន្តដើរលើមាគ៌ាឆ្ពោះទៅរកសន្តិភាព ដំណោះស្រាយប្រកបដោយយុត្តិធម៌ និងចីរកាល។ ទន្ទឹមនោះ កម្ពុជានឹងមិនធ្វើសម្បទាននូវអធិបតេយ្យ ឬសេចក្តីថ្លៃថ្នូររបស់ខ្លួនឡើយ»។ ចំណែកឯសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងសារទៅកាន់វីរយុទ្ធជន និងជនរួមជាតិកាលពីថ្ងៃទី២៩ ធ្នូ ឆ្នាំ ២០២៥ បន្ទាប់ពីបទឈប់បាញ់ចូលជាធរមាន ក៏បានអង្រួនស្មារតីកូនខ្មែរដែរថា៖ ទុក្ខលំបាកនិងពលិកម្មសាច់ស្រស់ ឈាមស្រស់ របស់វីរជនយើងនៅឯសមរភូមិ គឺជាការដាស់តឿនមិនឱ្យយើងបំភ្លេចបានមួយវិនាទីណាឡើយថា«បែកបាក់គឺស្លាប់ សាមគ្គីរឹងមាំគឺរស់» ។ ដូច្នេះ ស្របតាមពាក្យចាស់ពោលថា «ចង្កឹះមួយបាច់ គេកាច់មិនបាក់» យើងត្រូវយកការលំបាកនៅពេលនេះធ្វើជាឱកាសដើម្បីឱ្យខ្មែរគ្រប់រូបចេះពួតដៃគ្នាកសាងជាតិខ្មែរយើងឱ្យកាន់តែរឹងមាំ និងកាន់តែប្រសើរឡើងប្រកបដោយភាពធន់ នៅក្រោមម្លប់ដ៏សែនត្រជាក់នៃអង្គព្រះមហាក្សត្រជាទីគោរពសក្ការៈនៃយើង»។ សម្តេចធិបតី នាយករដ្ឋមន្ត្រី ក៏បានបង្ហាញក្តីសង្ឃឹមថា៖«បងប្អូនប្រជាពលរដ្ឋយើងគ្រប់មជ្ឈដ្ឋាននិងគ្រប់ទិសទី នឹងបន្តផ្តល់ជំនឿដ៏មុតមាំលើរាជរដ្ឋាភិបាល និងរួបរួមសាមគ្គីគ្នាក្នុងស្មារតីជាតិខ្មែរតែមួយ ប្រើប្រាស់តម្លៃនៃសន្តិភាពដើម្បីអភិវឌ្ឍខ្លួនឱ្យក្លាយជាពលរដ្ឋឆ្នើមរបស់កម្ពុជា និងក្លាយជាកម្លាំងដ៏រឹងមាំមិនអាចបំបែកបំបាក់បានក្នុងកិច្ចការពារអធិបតេយ្យជាតិ និងបូរណភាពទឹកដី ក៏ដូចជាក្នុងការអភិវឌ្ឍជាតិ មាតុភូមិកម្ពុជា ជាទីស្នេហាបំផុតនៃយើងឱ្យកាន់តែរីកចម្រើនខ្លាំងក្លាឡើងជាលំដាប់និងក្លាយជាប្រជាជាតិមួយប្រកបដោយមោទនភាពនិងកិត្យានុភាពខ្ពស់ត្រដែតលើឆាកអន្តរជាតិ»។ កាលពីថ្ងៃទី១០ខែកុម្ភៈ ឆ្នាំ២០២៦ សម្តេចប្រមុខរាជរដ្ឋាភិបាលក៏បានបញ្ជាក់ប្រាប់ប្រជាជាតិខ្មែរទាំងមូលថា៖«ការការពារបូរណភាពទឹកដី និងប្រជាជន គឺជាអាទិភាពខ្ពស់បំផុតរបស់រាជរដ្ឋាភិបាល»។អ្នកនាំពាក្យរាជរដ្ឋាភិបាលបានកត់សម្គាល់ថា ទន្ទឹមនឹងប្រសាសន៍ដ៏មានអត្ថន័យជ្រាលជ្រៅរបស់ថ្នាក់ដឹកនាំនៃយើងដូចបានលើកឡើងខាងលើ យើងទាំងអស់គ្នាក៏បានសង្កេតឃើញយ៉ាងច្បាស់គ្រប់ៗគ្នាថា កម្លាំងមហាសាមគ្គីឯកភាពជាតិខ្មែរដើម្បីបុព្វហេតុការពារអធិបតេយ្យភាពជាតិ និងបូរណភាពទឹកដី ពិតជាមានទំហំធំធេង និងខ្លាំងក្លាក្រៃលែង។ សំឡេងប្រឆាំងសង្គ្រាម និងទាមទារសន្តិភាពបានលាន់លឺគ្រប់ទិសទី ពោលគឺ ទីណាមានជនជាតិខ្មែររស់នៅ ទីនោះមានកម្លាំងសាមគ្គីដើម្បីការពារបូរណភាពទឹកដី។ ភាពអង់អាចក្លាហានរបស់វីរយុទ្ធជនជួរមុខ និងកម្លាំងមហាសាមគ្គីជាតិដ៏រឹងមាំរបស់ប្រជាពលរដ្ឋនៅសមរភូមិក្រោយ ក្រោមគោលនយោបាយការទូតសកម្មដោយផ្អែកលើច្បាប់អន្តរជាតិរបស់រាជរដ្ឋាភិបាល គឺជាចំណុចខ្លាំងដ៏ពិតប្រាកដរបស់ខ្មែរក្នុងការការពារបូរណភាពទឹកដី។អ្នកនាំពាក្យរាជរដ្ឋាភិបាលក៏បានរម្លឹក ជូនជនរួមជាតិដែរថា ប្រទេសជាតិយើងនិងប្រជាជនយើងបានហែលឆ្លងកាត់ដំណាក់កាលដ៏លំបាកលំបិនបំផុត ឈឺចាប់ខ្លោចផ្សារបំផុត និងខ្ទេចខ្ទាំបំផុតរួចមកហើយកាលពីក្នុងសងម័យសង្គ្រាមស៊ីវិល សម័យកាលនៃការបែកបាក់ជាតិ និងជាពិសេសក្នុងរបបប្រល័យពូជសាសន៍ប៉ុលពត។ ថ្នាក់ដឹកនាំរាមច្បងរបស់យើងក៏បានបិទទំព័រដ៏ខ្មៅងងឹតនេះចោល និងបានបើកទំព័រប្រវត្តិសាស្ត្រថ្មីប្រកបដោយក្តីសង្ឃឹមសម្រាប់យើងទាំងអស់គ្នា។ ដូច្នេះ ការលំបាករបស់យើងនៅពេលនេះមិនអាចវាយបំបាក់ទឹកចិត្តស្នេហាជាតិដ៏ជ្រាលជ្រៅរបស់ខ្មែរបានឡើយ។ ផ្ទុយទៅវិញ វាបានក្លាយជាកម្លាំងចលករដ៏ខ្លាំងក្លាដើម្បីការពារអធិបតេយ្យភាពនិងបូរណភាពទឹកដីរបស់យើងឱ្យខាងតែបានតាមមធ្យោបាយសន្តិវិធីស្របតាមច្បាប់អន្តរជាតិ។ អ្នកនាំពាក្យបញ្ជាក់ថាក្នុងន័យនេះ កម្ពុជាប្រកាន់ជំហរយ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់នូវ ការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ៕

ប្រមុខការទូតកម្ពុជា បន្តបង្ហាញអំពីស្ថានភាពព្រំដែនកម្ពុជា-ថៃ ដល់ប្រមុខការទូតអូស្ត្រាលី

ភ្នំពេញ៖ ប្រមុខការទូតកម្ពុជា ឯកឧត្តមឧបនាយករដ្ឋមន្ត្រី ប្រាក់ សុខុន បន្តបង្ហាញអំពី វឌ្ឍនភាពថ្មីៗ នៃស្ថានភាពព្រំដែនកម្ពុជា-ថៃ ផ្លាស់យោបល់គ្នាលើបញ្ហាតំបន់ និងសកលដែលជាប្រយោជន៍ និងកង្វល់រួមជាមួយប្រមុខការទូតអូស្ត្រាលី ក្នុងឱកាសបំពេញទស្សនកិច្ចនៅថ្ងៃទី១៦ ខែមីនា ឆ្នាំ២០២៦នេះ។នៅរសៀលថ្ងៃទី១៦ ខែមីនា ឆ្នាំ២០២៦ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានអញ្ជើញជួបពិភាក្សាទ្វេភាគីជាមួយ លោកជំទាវ Penny Wong រដ្ឋមន្ត្រីការបរទេសអូស្ត្រាលី។ ក្នុងជំនួបពិភាក្សាខាងលើ ឯកឧត្តមឧបនាយករដ្ឋមន្ត្រី បានថ្លែងអំណរគុណដល់លោកជំទាវរដ្ឋមន្ត្រីការបរទេស ក្នុងការទទួលស្វាគមន៍យ៉ាងកក់ក្តៅ និងផ្តល់បដិសណ្ឋារកិច្ច ជូនឯកឧត្តម និងគណៈប្រតិភូ ក្នុងឱកាសនៃដំណើរទស្សនកិច្ចផ្លូវការលើកដំបូងរបស់ឯកឧត្តម នៅប្រទេសអូស្ត្រាលីនេះ។ ឯកឧត្តមក៏បានបង្ហាញនូវជំនឿចិត្តយ៉ាងមុតមាំថា ទស្សនកិច្ចផ្លូវការនេះនឹងពង្រឹងកិច្ចសហប្រតិបត្តិការប្រទេសទាំងពីរឱ្យកាន់តែរឹងមាំ។ឯកឧត្តមឧបនាយករដ្ឋមន្ត្រី បានជម្រាបជូនលោកជំទាវរដ្ឋមន្ត្រីការបរទេសអូស្ត្រាលី ពាក់ព័ន្ធនឹងវឌ្ឍនភាពថ្មីៗនៃស្ថានភាពព្រំដែនកម្ពុជា-ថៃ ហើយក៏បានឆ្លៀតឱកាសផ្លាស់យោបល់គ្នាលើបញ្ហាតំបន់ និងសកលដែលជាប្រយោជន៍ និងកង្វល់រួម៕

ការបង្កើតតំបន់សេដ្ឋកិច្ចពិសេសថ្មីនឹងជំរុញការអភិវឌ្ឍសង្គម និងសេដ្ឋកិច្ចក្នុងស្រុកកាន់តែខ្លាំង

រាជរដ្ឋាភិបាលបានសម្រេចបង្កើតតំបន់សេដ្ឋកិច្ចពិសេសថ្មី គឺតំបន់សេដ្ឋកិច្ចពិសេសខេត្តព្រះសីហនុ និងតំបន់សេដ្ឋកិច្ចពិសេសខេត្តកំពង់ស្ពឺ រួមនឹងការបង្កើតកំពង់ផែពហុបំណង និងមណ្ឌលភស្តុភាកម្មកំពង់ឆ្នាំង ដែលគេរំពឹងថា នឹងបង្កើតការងាររាប់ពាន់កន្លែង ជាពិសេសក្នុងវិស័យផលិតកម្ម និងបច្ចេកវិទ្យា។ អ្នកក្នុងវិស័យអចនលទ្រព្យ លើកឡើងថា ការបង្កើតតំបន់សេដ្ឋកិច្ចពិសេសថ្មីនេះ អាចជួយជំរុញការអភិវឌ្ឍសង្គម និងសេដ្ឋកិច្ចក្នុងស្រុក។រាជរដ្ឋាភិបាល បានចេញអនុក្រឹត្យសម្រេចបង្កើតតំបន់សេដ្ឋកិច្ចពិសេសថ្មីមួយទៀតនៅខេត្តកំពង់ស្ពឺ ដោយមានផ្ទៃដីជាង ៥០០ហិកតា គឺ«តំបន់សេដ្ឋកិច្ចពិសេសកាណាឌីយ៉ាផ្លូវជាតិលេខ៥១» ស្ថិតក្នុងភូមិសាស្ត្រនៃស្រុកសំរោងទង និងស្រុកសាមគ្គីមុនីជ័យ ខេត្តកំពង់ស្ពឺ។ទន្ទឹមនឹងនេះ រដ្ឋាភិបាលក៏បានសម្រេចបង្កើតតំបន់សេដ្ឋកិច្ចពិសេសខេត្តព្រះសីហនុថ្មីមួយទៀត មានឈ្មោះថា «អាយ អេស អាយ (ISI SEZ) នឹងត្រូវសាងសង់ឡើងនៅលើផ្ទៃដី ២០៦ហិកតា ស្ថិតក្នុងឃុំជើងគោ ស្រុកព្រៃនប់ ខេត្តព្រះសីហនុ។ តំបន់សេដ្ឋកិច្ចពិសេសនេះ មានទុនវិនិយោគ ៥០លានដុល្លារអាម៉េរិក និងអាចបង្កើតការងារជូនពលរដ្ឋបានប្រមាណ ៧ពាន់កន្លែង។ជាមួយគ្នានេះ រាជរដ្ឋាភិបាលក៏ទើប សម្រេចបង្កើតកំពង់ផែពហុបំណង និងមណ្ឌលភស្តុភាកម្មកំពង់ឆ្នាំង លើផ្ទៃដីជាង៣០ហិកតានៅស្រុកកំពង់លែង ខេត្តកំពង់ឆ្នាំងផងដែរ។ កំពង់ផែពហុបំណង និងមណ្ឌលភស្តុភាកម្មកំពង់ឆ្នាំងនេះ មានទីតាំងស្ថិតនៅ ភូមិចំបក់ខ្ពស់ ឃុំស្វាយរំពារ ស្រុកកំពង់លែង ខេត្តកំពង់ឆ្នាំង ដើម្បីបម្រើឱ្យនាវាដែលធ្វើនាវាចរណ៍ជាលក្ខណៈអន្តរជាតិ ចូលចេញ ផ្ទេរផ្ទុក និងលើកដាក់ទំនិញទូទៅ រួមទាំងកុងតឺន័រនិងទំនិញចាក់ធារ។អ្នកឧកញ៉ាបណ្ឌិត សំ សុខនឿន ប្រធានសម្ព័ន្ធក្រុមហ៊ុន SAM SN Group បានលើកឡើងថា ការបង្កើតតំបន់សេដ្ឋកិច្ចពិសេសថ្មី អាចជួយជំរុញការអភិវឌ្ឍសង្គម និងសេដ្ឋកិច្ចក្នុងស្រុកតាមរយៈ ការទាក់ទាញវិនិយោគ និងការបង្កើតការងារជូនប្រជាពលរដ្ឋ ហើយការបង្កើតតំបន់សេដ្ឋកិច្ចពិសេស ត្រូវការអភិវឌ្ឍន៍ ផ្លូវ អគ្គិសនី ទឹក សេវាកម្មដឹកជញ្ជូន និងបច្ចេកវិទ្យា ដើម្បីជួយអភិវឌ្ឍសេដ្ឋកិច្ចក្នុងសហគមន៍មូលដ្ឋាន។សូមជម្រាបថា បើយោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) បានឲ្យដឹងថា គិតត្រឹមឆ្នាំ២០២៥ នៅទូទាំងប្រទេសកម្ពុជាមានតំបន់សេដ្ឋកិច្ចពិសេសដែលកំពុងដំណើរការសរុប ៣៤ តំបន់ ស្ថិតនៅក្នុង ១១ រាជធានី-ខេត្ត ដែលមានកំណើន ៤តំបន់ ធៀបនឹងឆ្នាំ២០២៤។ ក្នុងចំណោមរាជធានី/ខេត្តទាំង១១ ដែលមានតំបន់សេដ្ឋកិច្ចពិសេសដំណើរការ ក្នុងនោះខេត្តស្វាយរៀងមានតំបន់សេដ្ឋកិច្ចដែលមានរោងចក្រដំណើរការច្រើនជាងគេរហូតដល់១២តំបន់ បន្ទាប់មក គឺខេត្តព្រះសីហនុ មានចំនួន៦តំបន់ ខេត្តកណ្ដាល ៣តំបន់ ខេត្តកោះកុង ៣តំបន់ ខេត្តបន្ទាយ ៣តំបន់ កំពង់ស្ពឺ ២តំបន់។ ដោយឡែកខេត្តចំនួន៥ផ្សេងទៀត រួមមានខេត្តកំពង់ចាម កំពត ក្រចេះ ពោធិ៍សាត់ និងរាជធានីភ្នំពេញ មានតំបន់សេដ្ឋកិច្ចចំនួន១តំបន់ដូចគ្នា។CDC បានឱ្យដឹងដែរថា កាលពីឆ្នាំ ២០២៥ កន្លងទៅ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគក្នុងតំបន់សេដ្ឋកិច្ចពិសេសចំនួន ២៤៣ គម្រោង នៃគម្រោងសរុប ៦៣០គម្រោង៕ អត្ថទប៖ ធូ វិរៈ

កម្ពុជាបង្ហាញពីបេតិកភណ្ឌវប្បធម៌របស់ខ្លួន នៅក្នុងព្រឹត្តិការណ៍សប្តាហ៍ហ្វ្រង់កូហ្វូនី នៅទីក្រុងតូក្យូ

ថ្ងៃទី១៥ ខែមីនា ឆ្នាំ២០២៦ ស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុន បានចូលរួមក្នុងព្រឹត្តិការណ៍សប្តាហ៍ហ្វ្រង់កូហ្វូនីឆ្នាំ២០២៦ ដែលប្រារព្ធឡើងនៅថ្ងៃទី១៥ ខែមីនា ឆ្នាំ២០២៦ នៅវិទ្យាស្ថានភាសាបារាំងនៃទីក្រុងតូក្យូ ប្រទេសជប៉ុន ដោយបានរៀបចំស្តង់វប្បធម៌មួយដែលបង្ហាញពី បេតិកភណ្ឌ ប្រពៃណី ផលិតផលក្នុងស្រុកដ៏សម្បូរបែបរបស់កម្ពុជា និងទំនាក់ទំនងដ៏រស់រវើករបស់ខ្លួនទៅ កាន់ពិភពហ្វ្រង់កូហ្វូន។ក្នុងព្រឹត្តិការណ៍នេះ ឯកឧត្តម ជុំ សុន្ទរី ឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុន បាន អញ្ជើញចូលរួមជាមួយឯកអគ្គរាជ/រដ្ឋទូត ភារធារី និងតំណាងស្ថានទូតនៃប្រទេស/រដ្ឋជាសមាជិកនៃអង្គការ អន្តរជាតិហ្វ្រង់កូហ្វូនី (OIF) ប្រចាំប្រទេសជប៉ុន។ ព្រឹត្តិការណ៍នេះត្រូវបានសហការរៀបចំឡើងដោយ ក្រុមប្រឹក្សាលើកតម្កើងហ្វ្រង់កូហ្វូនីនៅជប៉ុន (CPFJ) និងស្ថានទូតនៃប្រទេស/រដ្ឋជាសមាជិកOIF និងស្ថាប័ន ហ្វ្រង់កូហ្វូនផ្សេងទៀត។ព្រឹត្តិការណ៍ខាងលើ បានផ្តល់ឱ្យអ្នកទស្សនាជប៉ុននិងសហគមន៍អន្តរជាតិ នូវឱកាសស្វែងយល់ពីវប្បធម៌ កម្ពុជា កន្លែងទាក់ទាញទេសចរណ៍ ផលិតផលខ្មែរ និងការចូលរួមយូរអង្វែងរបស់កម្ពុជានៅក្នុងសហគមន៍ ហ្វ្រង់កូហ្វូន។ នេះក៏ជាវេទិកាដ៏មានតម្លៃសម្រាប់ការផ្លាស់ប្តូរវប្បធម៌ និងការសន្ទនាក្នុងចំណោមបណ្តា ប្រទេសហ្វ្រង់កូហ្វូន និងសាធារណជនជប៉ុនផងដែរ។ឆ្លៀតក្នុងឱកាសនោះ ស្ថានទូតបានតាំងបង្ហាញនូវស្នាដៃសិល្បៈ និងចែកជូននូវសៀវភៅផ្សព្វផ្សាយនានា ដែលបង្ហាញពីប្រវត្តិសាស្ត្រ អត្តសញ្ញាណវប្បធម៌ និងគោលដៅទេសចរណ៍សំខាន់ៗរបស់កម្ពុជា ព្រមទាំង ការចាក់បញ្ចាំងវីដេអូផ្សព្វផ្សាយដែលកម្ពុជាជាប្រទេសម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនី ដែល គ្រោងនឹងប្រព្រឹត្តទៅនៅថ្ងៃទី ១៥-១៦ ខែវិច្ឆិកា ឆ្នាំ២០២៦។សូមកត់សម្គាល់ផងដែរថា តាមការស្នើរបស់ស្ថានឯកអគ្គរាជទូតកម្ពុជា មុខម្ហូបខ្មែរ “សាច់គោឡុកឡាក់” ត្រូវបានបង្ហាញនៅក្នុងបញ្ជីមុខម្ហូបរបស់ភោជនីយដ្ឋាន L'Oiseau de France ដែលមានទីតាំងនៅក្នុង វិទ្យាស្ថានភាសាបារាំងនៃទីក្រុងតូក្យូ និងជាទីតាំងនៃការរៀបចំព្រឹត្តិការណ៍។ ការដាក់បញ្ចូលមុខម្ហូបកម្ពុជា ដ៏ល្បីនេះបានផ្តល់ឱ្យអ្នកទស្សនានូវរសជាតិនៃកេរដំណែលស្នាដៃម្ហូបខ្មែរ និងបានបន្ថែមនូវមុខម្ហូបដ៏ពិសេស មួយនៅក្នុងព្រឹត្តិការណ៍នេះ។ក្នុងនាមជាប្រទេសសមាជិកដ៏សកម្មនៃអង្គការអន្តរជាតិហ្វ្រង់កូហ្វូនី កម្ពុជាបន្តលើកកម្ពស់កិច្ចសហប្រតិបត្តិការ ផ្នែកវប្បធម៌ និងភាសាបារាំង។ ការចូលរួមក្នុងព្រឹត្តិការណ៍នានា ដូចជាសប្តាហ៍ហ្វ្រង់កូហ្វូនី នៅទីក្រុងតូក្យ បានឆ្លុះបញ្ចាំងពីការប្តេជ្ញាចិត្តរបស់កម្ពុជាក្នុងការពង្រឹងការទូតវប្បធម៌ និងលើកកម្ពស់មិត្តភាពរវាងបណ្តា ប្រទេសប្រើប្រាស់ភាសាបារាំង និងប្រទេសជប៉ុន៕

សម្ដេចតេជោប្រមុខរដ្ឋស្ដីទី ជំរុញឱ្យកម្ពុជា និងដាណឺម៉ាក់ ពង្រីកទំនាក់ទំនងពាណិជ្ជកម្ម វិនិយោគ និងសេដ្ឋកិច្ចជាមួយគ្នាបន្ថែមទៀត

សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា បានជំរុញឱ្យកម្ពុជា និងដាណឺម៉ាក់ ពង្រីកទំនាក់ទំនងផ្នែកពាណិជ្ជកម្ម វិនិយោគ និងសេដ្ឋកិច្ចជាមួយគ្នាបន្ថែមទៀត ខណៈនៅឆ្នាំក្រោយ គឺជាខួប ៦០ឆ្នាំនៃទំនាក់ទំនងរវាងប្រទេសទាំងពីរដែលនឹងមានការរៀបចំនូវកម្មវិធីនានាដើម្បីអបអរសាទរផងដែរ។សម្តេចតេជោ ហ៊ុន សែន ប្រមុខរដ្ឋស្ដីទី បានជំរុញបែបនេះ ក្នុងឱកាស អនុញ្ញាតជូនឯកឧត្តម Danny Annan ឯកអគ្គរាជទូតនៃប្រទេសដាណឺម៉ាក់ ប្រចាំនៅកម្ពុជា ចូលជួបសម្តែងការគួរសម និងពិភាក្សាការងារ នៅវិមានសាមគ្គីភាព រាជធានីភ្នំពេញ នៅព្រឹកថ្ងៃទី១៦ ខែមីនា ឆ្នាំ២០២៦នេះ។ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងនៅក្រោយជំនួបនេះថា ជាកិច្ចចាប់ផ្ដើមនៃជំនួបនេះ សម្ដេចតេជោ បានសម្ដែងនូវការស្វាគមន៍ និងរីករាយដែលបានជួបជាមួយ ឯកឧត្តម ឯកអគ្គរាជទូតនៃប្រទេសដាណឺម៉ាក់ ប្រចាំនៅកម្ពុជា ហើយសម្ដេចតេជោ សង្ឃឹមថា ទំនាក់ទំនងរវាងកម្ពុជា និងដាណឺម៉ាក់នឹងកាន់តែរីកចម្រើនបន្ថែមទៀតក្រោមការដឹកនាំរបស់ឯកឧត្តមឯកអគ្គរាជទូតថ្មីនេះ។ សម្ដេចតេជោ ហ៊ុន សែន ក៏បានបង្ហាញនូវការពេញចិត្តចំពោះទំនាក់ទំនងរវាងប្រទេសទាំងពីរនាពេលកន្លងមកដែលមានភាពល្អប្រសើរ ដោយសង្ឃឹមថានៅឆ្នាំក្រោយដែលជាខួប ៦០ឆ្នាំនៃទំនាក់ទំនងរវាងកម្ពុជា និងដាណឺម៉ាក់ ប្រទេសទាំងពីរនឹងមានការរៀបចំនូវកម្មវិធីនានាដើម្បីអបអរសាទរនៃខួប ៦០ឆ្នាំដែលនឹងឈានមកដល់នៅឆ្នាំក្រោយនេះ។ នៅក្នុងឱកាសនោះ ឯកឧត្តម ឯកអគ្គរាជទូតនៃប្រទេសដាណឺម៉ាក់ បានសម្ដែងនូវការអរគុណជាអនេកចំពោះសម្ដេចតេជោ ដែលបានអនុញ្ញាតឱ្យឯកឧត្តម និងសហការីបានជួបសម្ដែងការគួរសមនៅក្នុងឱកាសនេះ។ ឯកឧត្តមបានលើកឡើងថា នៅក្នុងការបំពេញបេសកកម្មរបស់ឯកឧត្តមនៅកម្ពុជានេះនឹងខិតខំប្រឹងប្រែងនូវក្នុងការពង្រីកទំនាក់ទំនងរវាងកម្ពុជា និងដាណឺម៉ាក់ ឱ្យកាន់តែរីកចម្រើនទាំងនៅក្នុងក្របខណ្ឌនៃកាទូត នយោបាយ ជាពិសេសសេដ្ឋកិច្ច ពាណិជ្ជកម្ម និងការវិនិយោគរវាងប្រទេសទាំងពីរ។ សម្ដេចតេជោ បានពេញចិត្តចំពោះការលើកឡើងរបស់ ឯកឧត្តម ឯកអគ្គរាជទូតនៃប្រទេសដាណឺម៉ាក់ ដោយសម្ដេចឯកភាពទៅលើការធ្វើយ៉ាងណាឱ្យទំនាក់ទំនងរវាងកម្ពុជា និងដាណឺម៉ាក់ ជាពិសេសលើទំនាក់ទំនងសេដ្ឋកិច្ច ពាណិជ្ជកម្ម និងការវិនិយោគឱ្យមានភាពល្អប្រសើរ និងមានការកើនឡើងឱ្យស្របទៅនឹងទំនាក់ទំនងនយោបាយ និងការទូតរវាងប្រទេសទាំងពីរដែលមានជាមួយគ្នា។ សម្ដេចតេជោបានលើកឡើងថា ទំនាក់ទំនងរវាងកម្ពុជា និងដាណឺម៉ាក់នៅមានសក្ដានុពលជាច្រើនទៀត ដែលភាគីទាំងពីរអាចពង្រីកជាមួយគ្នា ជាពិសេសក្នុងផ្នែកពាណិជ្ជកម្ម វិនិយោគ និងសេដ្ឋកិច្ចនេះ។ ក្នុងឱកាសនោះសម្ដេចតេជោក៏បានចែករំលែកអំពីស្ថានការណ៍អន្តរជាតិមួយចំនួនដែលកំពុងកើតមាន ឡើង ជាពិសេសបញ្ហាព្រំដែនរវាងកម្ពុជា និងថៃដែលបានកើតឡើងនាពេលកន្លងមក ហើយមកដល់ពេលនេះភាគីទាំងពីរកំពុងតែអនុវត្តនូវបទឈប់បាញ់។ សម្ដេចតេជោ ក៏បានបញ្ជាក់អំពីជំហររបស់រាជរដ្ឋាភិបាលកម្ពុជានាពេលកន្លងមក ភាគីកម្ពុជារក្សានូវជំហរគោរពបទឈប់បាញ់ និងការដោះស្រាយបញ្ហាដោយការចរចា និងសន្ដិវិធី។ នៅក្នុងឱកាសនោះ ឯកឧត្តមឯកអគ្គរាជទូតក៏បានពេញចិត្តចំពោះជំហររបស់កម្ពុជាក្នុងការដោះស្រាយបញ្ហាព្រំដែនរវាងកម្ពុជា និងថៃ ដោយឈរលើការគោរពបទឈប់បាញ់ និងការដោះស្រាយបញ្ហាដោយសន្ដិវិធី៕

ក្រសួងកសិកម្មណែនាំ ៤ចំណុច ដោះស្រាយបញ្ហាប្រឈមពាក់ព័ន្ធតម្លៃប្រេងឥន្ធនៈជូនប្រជាកសិករ

ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានចេញសេចក្ដីណែនាំចំនួន៤ចំណុច ស្តីពីការសម្របសម្រួលដោះស្រាយបញ្ហាប្រឈមពាក់ព័ន្ធនឹងតម្រូវការផ្គត់ផ្គង់ និងតម្លៃប្រេង និងឧស្ម័នឥន្ធនៈជូនប្រជាកសិករ និងសហគមន៍កសិកម្ម។តាមសេចក្ដីណែនាំក្រសួងកសិកម្មបានបញ្ជាក់ថា បន្ទាប់ពីក្រសួងកសិកម្ម រុក្ខាប្រមាញ់ និងនេសាទ បានពិភាក្សាជាមួយក្រសួងរ៉ែ និងថាមពល និងក្រសួងពាណិជ្ជកម្ម ពាក់ព័ន្ធនឹងក្តីបារម្ភរបស់ប្រជាកសិករ ឬសហគមន៍កសិកម្មជុំវិញតម្រូវការផ្គត់ផ្គង់ និងតម្លៃប្រេង និងឧស្ម័នឥន្ធនៈដែលជាតម្រូវការចាំបាច់បំផុតសម្រាប់ដំណើរការគ្រឿងចក្រកសិកម្ម ប្រព័ន្ធស្រោចស្រព និងការដឹកជញ្ជូនកសិផល ក្រសួងកសិកម្ម រុក្ខាប្រមាញ់ និងនេសាទ ក្រសួងបានជម្រាបជូន លោក-លោកស្រីប្រធានមន្ទីរកសិកម្ម រុក្ខាប្រមាញ់ និងនេសាទរាជធានី-ខេត្ត ទាំងអស់ ត្រូវបន្តតាមដាន និងយកចិត្តទុកដាក់៖ ១. ចូលរួមសម្របសម្រួល និងតាមដានដោយយកចិត្តទុកដាក់លើស្ថានភាពផ្គត់ផ្គង់ និងតម្លៃប្រេងនិងឧស្ម័នឥន្ធនៈ ក្នុងភូមិសាស្ត្ររាជធានី-ខេត្តសាមី។ ចំពោះតម្លៃប្រេងនិងឧស្ម័នឥន្ធនៈ ត្រូវអនុវត្តតាមតារាងតម្លៃដែលចេញផ្សាយ ដោយក្រសួងរ៉ែ និងថាមពល និង/ឬក្រសួងពាណិជ្ជកម្ម។២. សម្របសម្រួលដោះស្រាយឱ្យបានឆាប់រហ័សក្នុងករណីប្រជាកសិករ ឬសហគមន៍កសិកម្មមានបញ្ហាប្រឈម និងការលំបាកក្នុងការទទួលបាននូវប្រេងឥន្ធនៈ ដោយធ្វើការជូនដំណឹងដល់ មន្ទីររ៉ែ និងថាមពល និង/ឬ មន្ទីរពាណិជ្ជកម្មប្រចាំរាជធានី-ខេត្តសាមី។៣. ចូលរួមសហការផ្សព្វផ្សាយដល់ប្រជាកសិករ ឬសហគមន៍កសិកម្មអំពីការប្រើប្រាស់មធ្យោបាយផ្ទុក (ប៊ីដុង ឬកាន) ក្នុងកម្រិតចំណុះដែលមានសុវត្ថិភាព និងធានាការពារកុំឱ្យមានហានិភ័យឆាបឆេះ ធ្វើឱ្យប៉ះពាល់ដល់ ទ្រព្យសម្បត្តិ ឬអាយុជីវិតផ្ទាល់ខ្លួន និងការរស់នៅរបស់ប្រជាជនក្នុងមូលដ្ឋាន៤. ក្នុងករណីពិនិត្យឃើញថាមានបញ្ហាប្រឈមពាក់ព័ន្ធនឹងការផ្គត់ផ្គង់ប្រេងនិងឧស្ម័នឥន្ធនៈ និងមានការដំឡើងថ្លៃ ខុសប្រក្រតី ត្រូវរាយការណ៍ជាបន្ទាន់មក អគ្គលេខាធិការដ្ឋាននៃក្រសួងកសិកម្ម រុក្ខាប្រមាញ់ និងនេសាទ ដើម្បីមានវិធានការកម្រិតថ្នាក់ជាតិ។សូមបញ្ជាក់ថា តាមសេចក្ដីជូនដំណឹងរបស់ក្រសួងពាណិជ្ជកម្ម តម្លៃលក់រាយប្រេងឥន្ធនៈនៅព្រះរាជាណាចក្រកម្ពុជា (អនុវត្តចាប់ពីថ្ងៃទី១៤ ដល់ថ្ងៃទី១៦ខែមីនា ឆ្នាំ២០២៦) ប្រេងសាំងលក់ក្នុងតម្លៃ ៥,២០០រៀលក្នុង១លីត្រ ចំណែកប្រេងម៉ាស៊ូត លក់ក្នុងតម្លៃ ៦,៤០០រៀលក្នុង១លីត្រ៕

គិតត្រឹមខែកុម្ភៈ ឆ្នាំនេះកម្ពុជាទទួលបានការចុះបញ្ជីវិនិយោគតាមថ្នាលជាតិមានទុនជាង ២២,២ ប៊ីលានដុល្លារ

គិតត្រឹមថ្ងៃទី២៨ ខែកុម្ភៈ ឆ្នាំ២០២៦, កម្ពុជាទទួលបានក្រុមហ៊ុនចុះបញ្ជី តាមប្រព័ន្ធចុះបញ្ជីអាជីវកម្មនៃថ្នាលបច្ចេកវិទ្យាព័ត៌មាន ដែលបានអនុម័ត មានចំនួនសរុបជាង ៥៥,៣ ពាន់ក្រុមហ៊ុន-សហគ្រាស មានដើមទុនវិនិយោគចំនួនប្រមាណជាង ៩១ ទ្រីលានរៀល ត្រូវជាង ២២,២ ប៊ីលានដុល្លាអាមេរិក។យោងតាមសេចក្ដីប្រកាសព័ត៌មានរួម នៃប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ហៅកាត់ថា CamDX ជាថ្នាល បច្ចេកវិទ្យាឌីជីថលមួយ សម្រាប់សម្រួលដល់កិច្ចការវិនិយោគរបស់រាជរដ្ឋាភិបាល, គិតមកដល់ថ្ងៃទី២៨ ខែកុម្ភៈ ឆ្នាំ២០២៦ កម្ពុជាទទួល បានក្រុមហ៊ុនចុះបញ្ជីតាមថ្នាលជាតិ មានចំនួនជាង ៥៥,៣ ពាន់ក្រុមហ៊ុន/សហគ្រាស ដែលមានដើមទុនវិនិយោគប្រមាណជាង ៩១ទ្រីលានរៀល ត្រូវប្រមាណជាង ២២,២ប៊ីលានដុល្លារអាមេរិក។ តាមរយៈនៃការចុះបញ្ជីនេះបង្ហាញឱ្យឃើញថា កម្ពុជានៅតែទទួល បានក្រុមហ៊ុនវិនិយោគថ្មីៗជាបន្តបន្ទាប់ និងបង្ហាញឲ្យឃើញពីវឌ្ឍនភាពនៃការរីកចម្រើន សម្រាប់ការធ្វើអាជីវកម្ម ពាណិជ្ជកម្ម ក្នុងការប្រកួតប្រជែងប្រកបដោយបរិយាបន្នរបស់ធុរកិច្ចគ្រប់ៗនៅកម្ពុជា។ជាក់ស្តែងគិតមកដល់រយៈពេលនេះ កម្ពុជាទទួលបានការចុះបញ្ជីតាមថ្នាលបច្ចេកវិទ្យាព័ត៌មានរួមមាន៖ សកម្មភាពអចលនទ្រព្យ ដោយប្រើប្រាស់អចលនទ្រព្យផ្ទាល់ខ្លួន ឬជួលពីគេ មានទឹកប្រាក់វិនិយោគជិត ២ប៊ីលានដុល្លារ, សកម្មភាពសេវាកម្ម ស្នាក់នៅ ១,៦៤ ប៊ីលានដុល្លារ, ការសាងសង់អគារ ១,៥៦ ប៊ីលានដុល្លារ, កម្មន្តសាលសម្លៀកបំពាក់លើកលែងសម្លៀកបំពាក ធ្វើពីរោម ១,១៦ ប៊ីលានដុល្លារ, សកម្មភាពពិគ្រោះយោបល់ផ្នែកគ្រប់គ្រង ៩៥៣ លានដុល្លារ និងការចុះបញ្ជីរបស់ក្រុមហ៊ុនអាជីវកម្មផ្សេងៗទៀត មានចំនួនជិត ១៥ ប៊ីលានដុល្លារ។ គិតត្រឹមរយៈពេលនេះដែរ, ក្រុមហ៊ុន និងសហគ្រាសដែលទទួលបានចុះបញ្ជីច្រើនជាងគេរួមមាន៖ សកម្មភាពសេវាភោជនីយដ្ឋាន និងសេវាផ្គត់ផ្គង់សេវាចល័តមានចំនួនជិត ៤ ពាន់សហគ្រាស, ការលក់ដុំឯកទេសផ្សេងៗជាង ៣,០០០ សហគ្រាស, ការលក់ដុំ ទំនិញសម្រាប់ការប្រើប្រាស់ក្នុងផ្ទះជាង ២,៦០០ សហគ្រាស, ការសាងសង់អគារ ២,២០០ ក្រុមហ៊ុន, ការលក់រាយទំនិញផ្សេងៗ នៅក្នុងហាងឯកទេស ២,១៥៥ សហគ្រាស និងអាជីវកម្មផ្សេងៗមានចំនួនជាង ៤០ ក្រុមហ៊ុន-សហគ្រាស៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ចៅក្រម ICC បដិសេធសំណើសុំដោះលែងអតីតប្រធានាធិបតីហ្វីលីពីន លោក Duterte

អ៊ីរ៉ង់និយាយថា ការទូតពឹងផ្អែកលើផលប្រយោជន៍ជាតិ ពុំមែនការសម្រេចចិត្តលើការចរចាទេ

អ្នកការទូត បញ្ជាក់ថា អ៊ីរ៉ង់ «នឹងមិនចរចាក្រោមការគំរាមកំហែង» នោះឡើយ

ប្រទេសលីបង់ និងរុស្ស៊ី ចុះហត្ថលេខាលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងពិសេស

លីបង់នឹងស្នើសុំការបន្តបទឈប់បាញ់រយៈពេលមួយខែ ក្នុងជំនួបជាមួយអ៊ីស្រាអែល

អាល្លឺម៉ង់ប្ដេជ្ញាកសាងកងទ័ពខ្លាំងបំផុតរបស់អឺរ៉ុប នៅឆ្នាំ២០៣៩ ដើម្បីរារាំងរុស្ស៊ី

EU អនុម័តប្រាក់កម្ចី ៩០ពាន់លានអឺរ៉ូដល់អ៊ុយក្រែន និងទណ្ឌកម្មថ្មី លើរុស្ស៊ី ក្រោយហុងគ្រីបោះបង់សិទ្ធិវេតូ

រដ្ឋមន្ត្រីការបរទេសអ៊ីស្រាអែលអំពាវនាវឲ្យលីបង់ធ្វើការជាមួយអ៊ីស្រាអែល ប្រឆាំងនឹងក្រុមហេសបូឡា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877