BTV NEWS

ឯកឧត្តម ឌី វិជ្ជា និងលោកជំទាវ ហ៊ុន ម៉ាណា អញ្ជើញនាំយកទេយ្យវត្ថុ ប្រគេនព្រះសង្ឃ និងចែកអំណោយប្រជាពលរដ្ឋ នៅស្រុកភ្នំស្រួច ខេត្តកំពង់ស្ពឺ

ឯកឧត្តមកិត្តិសង្គហបណ្ឌិត គន់ គីម អញ្ជើញជួបប្រជាពលរដ្ឋភៀសសឹក និងពិនិត្យទីតាំងរៀបចំផ្សារបណ្តោះអាសន្ន ក្នុងខេត្តបន្ទាយមានជ័យ

ក្រសួងការងារ៖ ខេត្តស្ថិតក្នុងតំបន់ទំនាបកណ្ដាលចំនួន៣ មានឱកាសការងារជាង ៨,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ក្រសួងការងារ៖ នៅខេត្តជាប់សមុទ្រទាំង៤ មានឱកាសការងារជិត ៧,០០០កន្លែង ដែលកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ព័ត៌មានជាតិ

លោកជំទាវ ភឿង សកុណា សម្ដែងក្ដីរីករាយចំពោះស្មារតីរបស់យុវជនបានបំផុសឡើងវិញនូវល្បែងប្រជាប្រិយខ្មែរ និងនូវអ្វីដែលជាវប្បធម៌ជាតិ

លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានថ្លែងថា ក្នុងនាមយើងជាខ្មែរ ក្នុងនាមយើងជាអ្នកបម្រើការងារក្នុងក្រសួងវប្បធម៌ និងវិចិត្រសិល្បៈ យើងមានសេចកី្តរីករាយក្នុងការឃើញផុសផុលឡើងវិញចំពោះស្មារតីរបស់យុវជនយើង បានបំផុសឡើងវិញនូវល្បែងប្រជាប្រិយខ្មែរ និងនូវអ្វីដែលជាវប្បធម៌ជាតិ។ការថ្លែងរបស់លោកជំទាវបណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ យ៉ាងដូច្នេះ ក្នុងពិធីនិមន្តព្រះសង្ឃសូត្រមន្ត ប្រោះព្រំប្រសិទ្ធពរជ័យ សិរីមង្គល ជូនថ្នាក់ដឹកនាំ ព្រឹទ្ធាចារ្យសិល្បៈ សិល្បករ សិល្បការិនី និងមន្រី្តរាជការ នៃក្រសួងវប្បធម៌ និងវិចិត្រសិល្បៈ ក្នុងឱកាសបុណ្យចូលឆ្នាំថ្មី ប្រពៃណីជាតិ ឆ្នាំម្សាញ់ សប្តស័ក ព.ស ២៥៦៩ កាលពីល្ងាចថ្ងៃទី៤ ខែមេសា ឆ្នាំ២០២៥ នាទីសី្តការក្រសួងវប្បធម៌ និងវិចិត្រសិល្បៈ។ លោកជំទាវបណ្ឌិតសភាចារ្យ រដ្ឋមន្រី្ត បានលើកឡើងទៀតថា ជាពិសេសយើងទាំងអស់គ្នាបានដឹងហើយ ក្នុងឆ្នាំ២០២៥នេះ សហភាពសហព័ន្ធយុវជនកម្ពុជា បានរៀបចំព្រឹតិ្តការណ៍អង្គរសង្រ្កាន្ត នៅខេត្តសៀមរាប ឲ្យបានធំ ហើយសម្តេចមហាបវរធិបតី ហ៊ុន ម៉ាណែត នាយករដ្ឋមន្រី្តនៃព្រះរាជាណាចក្រកម្ពុជា ក៏បានណែនាំក្នុងទិវាវប្បធម៌ជាតិ ៣មិនា បំផុសឲ្យការលេងល្បែងប្រជាប្រិយខ្មែរ ឲ្យបានផុលផុសឡើងវិញ។នាឱកាសនោះលោកជំទាវបណ្ឌិតសភាចារ្យ ភឿង សកុណា បានបញ្ជាក់ទៀតថា ជារៀងរាល់ឆ្នាំថ្នាក់ដឹកនាំព្រឹទ្ធាចារ្យសិល្បៈ សិល្បករ សិល្បការិនី និងមន្រី្តរាជការ នៃក្រសួងវប្បធម៌ និងវិចិត្រសិល្បៈ បានតែងមកជួបជុំគ្នា ដើម្បីប្រារព្ធពិធីបុណ្យចូលឆ្នាំថ្មី ហើយមិនថាតែក្រសួងវប្បធម៌មួយនោះទេ គឺគ្រប់ក្រសួង ស្ថាប័នទាំងអស់ ឆ្នាំថ្មី គឺជាការនាំមកនូវចិត្តគំនិតថ្មី ការខិតខំប្រឹងប្រែងពុះពារស្វែងរកនូវសមិទ្ធផលថ្មីៗ សម្រាប់ជូនជាតិ និងប្រជាជន តាមការដឹកនាំនូវគោលនយោបាយរបស់រាជរដ្ឋាភិបាល ក្រោមការដឹកនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត ជាប្រមុខរាជរដ្ឋាភិបាល ក៏ដូចជាការជួបជុំរបស់មន្រី្តរាជការទាំងអស់។ ជាពិសេសការជួបជុំនេះ បង្ហាញនូវការសាមគី្គភាព ការស្រលាញ់រាប់អានគ្នាទៅវិញទៅមក ក្នុងនោះការជួបជុំគ្នានេះមិនមែនតែត្រឹមក្រសួង ស្ថាប័នប៉ុណ្ណោះទេ ក៏ជាឱកាសមួយ ដែលក្រុមគ្រួសារអាចជួបជុំគ្នា ជាការតបស្នងសងគុណចំពោះឪពុក ម្តាយផង ក៏ដូចជាទៅវត្តអារាម ដើម្បីជាការតបស្នងសងគុណនូវវិញ្ញាណក្ខន្ធរបស់បុព្វបុរសខ្មែរ អ្នកដែលបានប្រគល់ទឹកដីនេះ ថែរក្សាទឹកដីនេះ ស្វែងរកសុខសន្តិភាពឲ្យប្រជាជនយើងទាំងអស់គ្នា។ ហើយការជួបជុំគ្នានាពេលនេះ មន្រី្តរាជការយើងក៏បានលេងល្បែងកម្សាន្តនានា ដូចជា៖ បោះអង្គញ់ចោលឈូង ជាដើម។ បានរំលឹកឡើងវិញនូវវប្បធម៌ប្រពៃណីដែលជាកិច្ចការសំខាន់ក្នុងពិធីបុណ្យចូលឆ្នាំថ្មី។ ជាមួយគ្នានោះដែរ លោកជំទាវបណ្ឌិតសភាចារ្យ រំលេចថា ខ្មែរយើងតែងតែមានជំនឿថា ធ្វើបុណ្យជាមួយគ្នា ស្គាល់គ្នាមិនត្រឹមតែជាតិនេះប៉ុណ្ណោះទេ គឺជាតិក្រោយក៏មាននិស្ស័យជួបគ្នាទៀតដែរ។ ដូច្នេះប្រពៃណីទាំងអស់នេះ គឺជាការបន្តនូវទំនៀមទំលាប់របស់ខ្មែរយើង បង្ហាញនូវសាមគ្គីធម៌ សាមគ្គីភាព និងការថែរក្សានូវទំនៀមទំលាប់ប្រពៃណីរបស់ជាតិយើងឲ្យមានភាពចីរកាលជាយូរអង្វែងតទៅផងដែរ៕ អត្ថបទ រដ្ឋា

សម្តេចធិបតីប្រកាសទទួលស្វាគមន៍នាវាប្រទេសនានាមកចូលចត និងហ្វឹកហ្វឺននៅមូលដ្ឋានសមុទ្ររាម

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានប្រកាសស្វាគមន៍នាវា របស់ ប្រទេសជាមិត្តទាំងឡាយ ចូលចតធ្វើទស្សនកិច្ច ឬហ្វឹកហាត់រួមគ្នា នៅមូលដ្ឋានសមុទ្ររាម (ផែរាម) ដើម្បី បញ្ជាក់ថា មូលដ្ឋាននេះ គ្មានអាថ៌កំបាំងអ្វីនោះឡើយ ។ក្នុងពិធីសម្ពោធសមិទ្ធផល ដែលសម្រេចបាននៅក្រោមកិច្ចសហប្រតិបត្តិការរកម្ពុជា-ចិន ទៅលើ ការអភិវឌ្ឍកសាងនូវមជ្ឈមណ្ឌលទំនើបកម្មមូលដ្ឋានសមុទ្ររាម និងសមិទ្ធផលមជ្ឈមណ្ឌលភស្តុភារ និង ហ្វឹកហ្វឺនរួមគ្នាកម្ពុជា-ចិន ផែរាម នៅព្រឹកថ្ងៃទី៥ ខែមេសា នេះ សម្ដេចធិបតី ហ៊ុន ម៉ាណែត បានបញ្ជាក់ថា ចាប់ពីថ្ងៃនេះទៅ មូលដ្ឋានសមុទ្ររាម នឹងបើកស្វាគមន៍ភាគីមិត្តទាំងអស់ ដោយមិនមានអ្វីលាក់លៀម ឡើយ។ មូលដ្ឋាននេះ ស្ថិតនៅក្រោមអធិបតេយ្យភាពកម្ពុជាទាំងស្រុង គ្មានចំណែកណាត្រូវបានកាត់ដាក់ ឱ្យស្ថិតក្រោមការត្រួតត្រារបស់កងទ័ពប្រទេសណាឡើយ ។សូមជម្រាបជូនថា មូលដ្ឋានសមុទ្ររាម ត្រូវបានបង្កើតឡើងនៅឆ្នាំ១៩៥៤ តាមព្រះរាជក្រឹត្យ លេខ១៥៣/នស/រក/១៩៥៤ បន្ទាប់ពីកម្ពុជាទទួលបាននូវឯករាជ្យជាតិ ពីអាណានិគមនិយមបារាំង។ បច្ចុប្បន្នមូលដ្ឋានសមុទ្ររាម ស្ថិតនៅភូមិ អុង សង្កាត់រាម ក្រុងកំពង់សោម ខេត្តព្រះសីហនុ មានផ្ទៃដីសរុប៨៧ហិកតា និងត្រូវបានរៀបចំ គ្រប់គ្រង និងប្រើ ប្រាស់ដូចខាងក្រោម ៖ក.ទីតាំងគ្រប់គ្រង និងប្រើប្រាស់ដោយមូលដ្ឋានសមុទ្ររាម មានទំហំ៥១៧,៥៩៨ម៉ែត្រការ៉េខ. ទីតាំងបម្រុងទុក ហ្វឹកហ្វឺនរួមគ្នា ទំហំសរុប៣៥៥,៧៤៨ម៉ែត្រការ៉េ។កោះដែលស្ថិតនៅជិតមូលដ្ឋានសមុទ្ររាម និងទីបញ្ជាការមូលដ្ឋានសមុទ្ររាម មានចំនួន០៧ រួមមាន កោះត្រេះ កោះប្រើស កោះច្រលុះ កោះឬស្សី កោះតាគៀវ កោះស្រមោច និងកោះសំពោជ៕ អត្ថបទ៖ មុត សុទ្ធ

វិទ្យាស្ថានជាតិពហុបច្ចេកទេសតេជោសែន រៀបចំកម្មវិធីសង្រ្កាន្ត ដើម្បីអបអរពិធីបុណ្យចូលឆ្នាំខ្មែរ

វិទ្យាស្ថានជាតិពហុបច្ចេកទេសតេជោសែន ក្រុងតាខ្មៅ ខេត្តកណ្តាល បានរៀបចំកម្មវិធីសង្ក្រាន្តចំនួនពីរថ្ងៃ ចាប់ពីថ្ងៃទី០៣ ដល់ថ្ងៃទី០៤ ខែមេសាម្សិលមិញ ដើម្បីអបអរសាទរពិធីបុណ្យចូលឆ្នំាថ្មី ប្រពៃណីខ្មែរ ដោយមានចូលរួមពីលោក ច្រឹង ណារី នាយក វិទ្យាស្ថានជាតិពហុបច្ចេកទេសតេជោសែន លោកគ្រូ អ្នកគ្រូ និងនិស្សិតជាច្រើនកុះករ។នៅក្នុងកម្មវិធីសង្គ្រាន្ត លោកច្រឹង ណារី បានឱ្យដឹងថា ការរៀបចំកម្មវីធីសង្រ្កាន្តនៅពេលនេះ ធ្វើឡើងក្នុងគោលបំណងជួបជុំគ្នាលេងល្បែងប្រជាប្រិយខ្មែរជាច្រើនប្រភេទ និងរាំលេងកម្សាន្ត ដើម្បីអបអរពិធីបុណ្យចូលឆ្នាំថ្មីប្រពៃណីជាតិ។ លោកបន្តថា ការលេងល្បែងប្រជាប្រិយខ្មែរនោះមានដូចជា៖ ទាញព្រ័ត្រ វាយក្អម លាក់កន្សែង ស្តេចចង់ និងលោកបាវជាដើម។មុនពិធីបុណ្យចូលឆ្នាំថ្មី ប្រពៃណីជាតិ ចូលមកដល់ គេសង្កេតឃើញថា នៅតាមបណ្តាសាលារៀន វត្តអារាម ស្ថាប័នរដ្ឋ និងវិស័យឯកជននានា បានរៀបចំកម្មវិធីសង្ក្រាន្តយ៉ាងផុសផុស ដើម្បីអបអរពិធីបុណ្យចូលឆ្នាំថ្មី ប្រពៃណីជាតិ។ ការរៀបចំកម្មវិធីនេះបាន ដោយសារប្រទេសជាតិមានសុខសន្តិភាពពេញលេញ ក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្រ្តី និងបច្ចុប្បន្ន បន្តមកសម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។គួរបញ្ជាក់ដែរថា ឆ្នាំ២០២៥នេះ ពិធីបុណ្យចូលថ្មី ប្រពៃណីជាតិ នឹងរៀបចំធ្វើឡើង ក្នុងរយៈពេល៣ថ្ងៃ ចាប់ពីថ្ងៃទី១៤ ដល់ថ្ងៃ១៦ ខែមេសា ដោយថ្ងៃទី១. ហៅថា ថ្ងៃមហាសង្រ្កាន្ត ថ្ងៃទី២.វារៈវ័នបត និងថ្ងៃទី៣.វារៈឡើងស័ក ឬហៅថា ថ្ងៃឆ្លងឆ្នាំ៕ អត្ថបទ៖ទូច សោភ័ណ

កម្ពុជា មិនអនុញ្ញាតឱ្យប្រទេសណាមួយមកដាក់មូលដ្ឋានទ័ពនៅកម្ពុជា ហើយកម្ពុជាក៏មិនដាក់មូលដ្ឋានទ័ពរបស់ខ្លួននៅបរទេស គឺធ្វើស្របតាមមាត្រា៥៣ ថ្មី នៃរដ្ឋធម្មនុញ្ញនៃព្រះរាជរាជាណាចក្រកម្ពុជា

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវសមិទ្ធផលទំនើបកម្មមូលដ្ឋានសមុទ្ររាម និងមជ្ឈមណ្ឌលភស្តុភារនិង ហ្វឹកហ្វឺនរួមគ្នាកម្ពុជា-ចិន ផែរាម នាព្រឹកថ្ងៃសៅរ៍ ទី ៥ ខែមេសា ឆ្នំា ២០២៥ ថា៖ កម្ពុជាមិនអនុញ្ញាតឱ្យប្រទេសណាមួយមកដាក់មូលដ្ឋានទ័ពនៅកម្ពុជា ហើយកម្ពុជាក៏មិនដាក់មូលដ្ឋានទ័ពរបស់ខ្លួននៅបរទេស ពោលគឺធ្វើស្របតាមមាត្រា៥៣ ថ្មី នៃរដ្ឋធម្មនុញ្ញនៃព្រះរាជរាជាណាចក្រកម្ពុជា ។ ជាមួយគ្នានេះ, ការធ្វើទំនើបកម្មមូលដ្ឋានទ័ពរាម មិនបានធ្វើឱ្យកម្ពុជាបាត់បង់អធិបតេយ្យ ហើយគ្មានអ្នកណាការពារអធិបតេយ្យកម្ពុជា ជំនួសកម្ពុជា នោះទេ ។ ជាងនេះទៅទៀត, គ្មានផ្នែកណាមួយនៃមូលដ្ឋានទ័ពរាមនឹងក្លាយជាកម្មសិទ្ធិរបស់បរទេសណាឡើយ គឺមូលដ្ឋានទ័ពរាមគឺជាកម្មសិទ្ធិរបស់កម្ពុជាតែមួយគត់ ។ មូលដ្ឋានទ័ពរាមនឹងបើកចំហស្វាគមន៍ឱ្យកងទ័ពមកពីគ្រប់បណ្ដាប្រទេសមិត្តចូលចតបានទាំងអស់ ឱ្យតែស្របតាមលក្ខណៈបច្ចេកទេស ហើយកម្ពុជានឹងផ្ដល់ទាំងកន្លែងស្នាក់នៅបន្ថែមទៀត ។ ជាមួយគ្នានេះ, បើប្រជាពលរដ្ឋខ្មែរយើងស្រឡាញ់ជាតិពិតប្រាកដគួរមានមោទនភាពនៅពេលដែលកម្ពុជា អាចធ្វើទំនើបកម្ម និងបង្កើនសមត្ថភាពកងទ័ពរបស់យើង។ សម្ដេចបវរធិបតី នាយករដ្ឋមន្ត្រី ក៏បានគូសបញ្ជាក់ថា៖ ការធ្វើទំនើបកម្មមូលដ្ឋានសមុទ្ររាម និងការកសាងមជ្ឈមណ្ឌលភស្តុភារ និងហ្វឹកហ្វឺនរួមគ្នា កម្ពុជា-ចិន ផែរាម មិនត្រឹមតែបានឆ្លុះបញ្ចាំងពីកិច្ចសហប្រតិបត្តិការប្រកបដោយផ្លែផ្ការវាងកងទ័ពនៃប្រទេសទាំងពីរ កម្ពុជា-ចិន ប៉ុណ្ណោះទេ គឺថែមទាំងជាការលើកកម្ពស់សមត្ថភាពការពារជាតិរបស់កម្ពុជា ក៏ដូចជា ការគិតគូរដល់ផលប្រយោជន៍ជាតិ, ធានាសន្តិសុខជាតិ, សុវត្ថិភាព និងសណ្តាប់ធ្នាប់សាធារណៈ ស្របតាមបាវចនានៃគោលដៅជាយុទ្ធសាស្រ្តលើវិស័យការពារជាតិរបស់ព្រះរាជាណាចក្រកម្ពុជា គឺ "សន្តិសុខ ការអភិវឌ្ឍ និង កិច្ចសហប្រតិបត្តិការអន្តរជាតិ" ព្រោះ កងទ័ព មិនត្រឹមតែជាកម្លំាងស្នូលក្នុងកិច្ចការពារបូរណភាពទឹកដីប៉ុណ្ណោះទេ គឺថែមទាំងជាកម្លាំងសំខាន់មួយ ដែលរួមចំណែកដល់ការអភិវឌ្ឍប្រទេសជាតិ ក៏ដូចជាការរក្សាសន្តិភាព និងសន្តិសុខក្នុងតំបន់ និងអន្តរជាតិផងដែរ។ មុននឹងបញ្ចប់, សម្ដេចបវរធិបតី នាយករដ្ឋមន្ត្រី បានផ្ដល់អនុសាសន៍មួយចំនួន រួមមាន ៖ ទី១. បន្តពង្រឹង និង អភិវឌ្ឍវិស័យការពារជាតិរបស់ព្រះរាជាណាចក្រកម្ពុជា ដោយឈរលើមូលដ្ឋាននៃការគោរពរដ្ឋធម្មនុញ្ញ, ច្បាប់ជាតិ និង អន្តរជាតិ ។ ការពាររឹងមាំ ដាច់ខាតនូវឯករាជ្យ, អធិបតេយ្យ និងបូរណភាពទឹកដី នៃព្រះរាជាណាចក្រកម្ពុជា ។ បន្តពង្រឹងខឿនការពារជាតិកម្ពុជា ដោយយកចិត្តទុកដាក់ធ្វើការអភិវឌ្ឍកងកម្លាំង ឱ្យក្លាយជាកងទ័ពដែលមានវិជ្ជាជីវៈខ្ពស់ មានស្មារតី ឆន្ទៈដាច់ខាតស្មោះត្រង់ ចំពោះជាតិមាតុភូមិ និងប្រជាជន។ ទី២. ក្រសួងការពារជាតិ ត្រូវយកចិត្តទុកដាក់ដល់ការងារកែទម្រង់កងយោធពលខេមរភូមិន្ទ កសាង និង អភិវឌ្ឍធនធានមនុស្ស សម្ភារៈ និងមធ្យោបាយបម្រើឱ្យវិស័យការពារជាតិ ក្នុងនោះ ត្រូវបន្តពង្រឹងការងារហ្វឹកហ្វឺន, រៀនសូត្រ, បណ្តុះបណ្តាល, កសាងប្រភពកម្លាំង ក្នុងជួរកងទ័ព, ទាំងបរិមាណ និង គុណភាព, ដើម្បីបម្រើឱ្យវិស័យការពារជាតិកាន់តែមានប្រសិទ្ធភាពខ្ពស់។ ជាពិសេស ចំពោះ កងទ័ពជើងទឹក ត្រូវយកចិត្តទុកដាក់ដល់ការហ្វឹកហ្វឺន និងល្បាតក្នុងដែនទឹក និង តាមបណ្តាកោះ ឆ្នេរ ។ ទី៣. ក្រសួងការពារជាតិ ត្រូវយកចិត្តទុកដាក់ដល់ការប្រើប្រាស់ធនធាន និងទ្រព្យសម្បត្តិរបស់អង្គភាព ក៏ដូចជាជំនួយរបស់ភាគីមិត្តឱ្យបានល្អ, ស្ថិរភាព និងមានប្រសិទ្ធភាព, ពោល គឺ ប្រើប្រាស់ និង គ្រប់គ្រង ថែរក្សាបច្ចេកទេស ទាំងកម្លាំង និង មធ្យោបាយ សម្ភារៈ យោធាបរិក្ខារ និង ស្បៀងអាហារ ឱ្យបានសមស្របទៅនឹងតម្រូវការជាក់ស្តែង និង តាមជំនាញត្រឹមត្រូវ តាមលក្ខណៈបច្ចេកទេស ហើយរក្សាបាននូវភាពគង់វង្ស និង គ្រប់គ្រាន់ ឆ្លើយតបទៅតាមសំណូមពរ និង តម្រូវការចាំបាច់ក្នុងវិស័យការពារជាតិ។ ទី៤. ក្រសួងការពារជាតិ ត្រូវបន្តពង្រឹងកិច្ចការពារព្រំដែន (គោក, ទឹក, អាកាស) សហការល្អជាមួយ កងកម្លាំងនគរបាលជាតិ ក៏ដូចជា សមត្ថកិច្ចពាក់ព័ន្ធ និងអាជ្ញាធរដែនដីគ្រប់លំដាប់ថ្នាក់ ។ ទំនាក់ទំនងល្អក្នុងការកសាងមិត្តភាពរឹងមាំជាមួយប្រទេសជិតខាង ដោយប្រើប្រាស់មធ្យោបាយការទូត និងការចរចាដោយសន្តិវិធី ក្នុងគោលដៅ "កសាងព្រំដែនជាតំបន់ព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ" ។ ទី៥. ក្រសួងការពារជាតិ ត្រូវបន្តពង្រឹងកិច្ចសហប្រតិបត្តិការអន្តរជាតិលើវិស័យ យោធាដោយឈរលើមូលដ្ឋានច្បាប់ជាតិ និងអន្តរជាតិ ក្រោមបាវចនា "កែទម្រង់ខាងក្នុង បង្កើនមិត្តខាងក្រៅ ក្នុងស្មារតីឯករាជ្យ" ។ ចំពោះកងទ័ពជើងទឹក ត្រូវបន្តយកចិត្តទុកដាក់ពង្រឹង និងពង្រីកទំនាក់ទំនងការទូតយោធា និងកិច្ចសហប្រតិបត្តិការជាមួយបណ្តាប្រទេស ជាមិត្ត ទាំងក្នុងតំបន់ និងសកលលោក ដោយឈរលើគោលការណ៍ស្មើភាព, គោរពឯករាជ្យ, អធិបតេយ្យ និងផលប្រយោជន៍រួមគ្នាទៅវិញទៅមក ។

សម្ដេចធិបតី ហ៊ុន ម៉ាណែត ដឹកនាំគណៈប្រតិភូ អញ្ជើញដល់ប្រទេសឡាវ ដើម្បីចូលរួមគោរពវិញ្ញាណក្ខន្ធសព ឯកឧត្តម នាយឧត្តមសេនីយ៍ ខាំតៃ ស៊ីផាន់ដន

នារសៀលថ្ងៃសៅរ៍ ទី៥ ខែមេសា ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដឹកនាំគណៈប្រតិភូរាជរដ្ឋាភិបាលកម្ពុជា អញ្ជើញដល់សាធារណរដ្ឋប្រជាធិបតេយ្យប្រជាមានិតឡាវ ដើម្បីចូលរួមគោរពវិញ្ញាណក្ខន្ធសព ឯកឧត្តម នាយឧត្តមសេនីយ៍ ខាំតៃ ស៊ីផាន់ដន (Khamtay Siphandone) អតីតប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ ដែលត្រូវជាឪពុកបង្កើតរបស់ ឯកឧត្តមបណ្ឌិត សនសៃ ស៊ីផាន់ដន (Sonexay Siphandone) នាយករដ្ឋមន្ត្រី នៃសាធារណរដ្ឋប្រជាធិបតេយ្យប្រជាមានិតឡាវ និងជួបពិភាក្សាការងារជាមួយឯកឧត្តម Thongloun Sisoulith អគ្គលេខាធិការបក្ស និងជាប្រធានរដ្ឋឡាវ និងឯកឧត្តមបណ្ឌិត Sonexay Siphandone នាយករដ្ឋមន្ត្រី នៃសាធារណរដ្ឋប្រជាធិបតេយ្យប្រជាមានិតឡាវ។

អង្គការសំអាតទន្លេ-សមុទ្រ សហការជាមួយរដ្ឋបាលខេត្តកណ្តាលប្រារព្ធ «ទិវាអំពើល្អ» លើកទី៦

អង្គការសំអាតទន្លេ សមុទ្រ (River Ocean Cleanup) សហការជាមួយរដ្ឋបាលខេត្តកណ្ដាល នៅល្ងាចថ្ងៃទី៤ខែមេសាម្សិលមិញ បានរៀបចំប្រារព្ធ «ទិវារអំពើល្អ» លើកទី៦ សំដៅដល់ការជំរុញលើកទឹកចិត្តដល់ប្រជាពលរដ្ឋចូលរួមធ្វើអំពើល្អនៅក្នុងសង្គម។ ពិធីនេះរៀបចំធ្វើឡើងនៅក្រុងតាខ្មៅ ខេត្តកណ្តាល ក្រោមអធិបតីភាព ឯកឧត្តម គ្រុយ ម៉ាឡែន អភិបាលរងខេត្តកណ្ដាល ដោយមានការចូលរួមពីលោក នូ សុវណ្ណ នាយកប្រតិបត្តិ អង្គការសំអាតទន្លេ-សមុទ្រ អាជ្ញាធខេត្តកណ្តាល វិស័យឯកជន ប្រជាពលរដ្ឋ និងសិស្សានុសិស្ស សរុបប្រមាណ៧០០រយនាក់។បើតាមលោក នូ សុវណ្ណ នាយកប្រតិបត្តិ អង្គការសំអាតទន្លេ សមុទ្រ បានប្រាប់BTVឱ្យដឹងថា គោលបំណងចម្បងនៃការប្រារព្ធទិវាអំពើល្អ គឺជាការចូលរួមជាមួយពិភពលោកផ្សព្វផ្សាយនៃអំពើល្អ ដែលទិវានេះ ត្រូវបានធ្វើឡើងជារៀងរាល់ឆ្នាំនៅក្នុងខែមេសា។ លោកបន្តថា ដោយសារអង្គការសំអាតទន្លេសមុទ្រ ធ្វើការងារទៅលើវិស័យបរិស្ថាន ដូច្នេះនៅថ្ងៃប្រារព្ធទិវាអំពើល្អនេះ គឺមានសកម្មភាពធ្វើអំពើល្អដូចជា៖សំអាតសំរាមតាមច្រាំងទន្លេបាក់សាក់ ប្រលែងកូនត្រី និងចែកកូនឈើជាដើម។លោកបានបន្តទៀតថា ចាប់តំាងពីឆ្នាំ២០២០ មកដល់ខែមេសា ឆ្នាំ២០២៥ នេះ អង្គការសំអាតទន្លេ-សមុទ្រ ប្រមូលសំរាមបានចំនួនជាង២ពាន់តោន ពីទន្លេមេគង្គ ទន្លេសាប និងទន្លេបាសាក់ ដែលនេះជាអំពើល្អសំរាប់ជាប្រយោជន៍ដល់ប្រជាពលរដ្ឋទូទាំងប្រទេស ជំរុញការទាក់ទាញភ្ញៀវទេសចរ និងការថែទាំធនធានធម្មជាតិនៅប្រទេសកម្ពុជា។ លើសពីនេះ បានជំរុញដល់ប្រជាពលរដ្ឋនៅក្នុងប្រទេសកម្ពុជា ជាពិសេសពលរដ្ឋរស់នៅតាមដងទន្លេចូលរួមថែរក្សាអនាម័យទឹកទន្លេឲ្យបានស្អាត តាមរយៈសកម្មភាពកុំបោះចោលសំរាមចូលក្នុងទឹកទន្លេ។អ្នកចូលរួមក្នុងទិវាអំពើល្អ បានលើកឡើងដែរថា កន្លងទៅពួកគេតែងតែបានធ្វើអំពើល្អដូចជាការផ្តល់ទានដល់ចាស់ជរា និងសំអាតអនាម័យ បរិស្ថានជាដើម។ ពួកគេបន្តថា ពេលបានធ្វើអំពើល្អបានធ្វើឲ្យផ្លូវចិត្តរីករាយ។គួរបញ្ជាក់ថា អំពើល្អ ជាទង្វើងាយៗ ទាំងឡាយណាដែលផ្តល់នូវផលវិជ្ជមានតិច ឫច្រើន សម្រាប់ការរស់នៅរបស់មនុស្ស សត្វ និង និរន្តរភាពរបស់ធនធានធម្មជាតិ។ អំពើល្អ ចាប់ផ្តើមពីបុគ្គលម្នាក់ ពីការគិតល្អ និយាយល្អ និងការប្រព្រឹត្តអំពើល្អ នោះលទ្ធផលនឹងទទួលបានជាវិជ្ជមាន៕ អត្ថបទ៖ ទូច សោភ័ណ

ឯកឧត្តមអភិសន្តិបណ្ឌិត បញ្ជាក់ជាថ្មីអំពីឆន្ទៈរួមចំណែកផ្ដល់ភាពកក់ក្ដៅជូនវិនិយោគទុនជប៉ុន!

ក្នុងនាមជាតួអង្គមួយក្នុងចំណោមបណ្ដាតួអង្គផ្សេងទៀតនៃរាជរដ្ឋាភិបាលកម្ពុជា ក្រោមការដឹកនាំប្រកបដោយប្រតិភាណរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានបន្តអះអាងជាថ្មីទៀត អំពីការត្រៀមខ្លួនជានិច្ចក្នុងការផ្តល់កិច្ចសហការសម្របសម្រួល ជំរុញ និងលើកកម្ពស់បរិយាកាស នៃការវិនិយោគ ដើម្បីធានាជួយទាក់ទាញវិនិយោគិនជប៉ុន និងមកពីប្រទេសផ្សេងៗ។ ក្នុងជំនួបជាមួយ ឯកឧត្តម TAKAHASHI FUMIAKI អតីតឯកអគ្គរាជទូតជប៉ុនប្រចាំកម្ពុជា និង ជាប្រធានសមាគមជប៉ុន-កម្ពុជា (JCA) នៅទីស្តីការក្រសួងមហាផ្ទៃ នារសៀលថ្ងៃទី៤ ខែមេសា ឆ្នាំ២០២៥ នេះ ឯកឧត្តមអភិ សន្តិបណ្ឌិត ស សុខា បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល និងប្រជាជនជប៉ុន ដែលជានិច្ចកាល តែងយក ចិត្តទុកដាក់ឧបត្ថម្ភគាំទ្រដល់បុព្វហេតុសុខសន្តិភាព និងការអភិវឌ្ឍសេដ្ឋកិច្ច សង្គមនៅកម្ពុជាឱ្យកាន់តែមានការរីកចម្រើនជាបន្តបន្ទាប់។ ឯកឧត្តមអភិសន្តិបណ្ឌិត ស សុខា និង ឯកឧត្តម TAKAHASHI FUMIAKI បានវាយតម្លៃខ្ពស់ ចំពោះកិច្ចសហប្រតិបត្តិការកន្លងមក រវាងភាគី ទាំងពីរ រួមមានជាអាទិ៍ វិស័យសេដ្ឋកិច្ច នយោបាយ និងសន្តិសុខ។ បើតាមឯកឧត្តមអភិសន្តិបណ្ឌិត ក្រសួងមហាផ្ទៃបាននឹងកំពុងអនុវត្តតួនាទី និងភារកិច្ចថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ហើយ ការងារនេះ ក៏ត្រូវការកិច្ចសហការជាមួយភាគីពាក់ព័ន្ធរួមទាំងវិស័យឯកជន។ ជាការឆ្លើយតប ឯកឧត្តម TAKAHASHI FUMIAKI បានជម្រាបជូនប្រមុខក្រសួងមហាផ្ទៃ ថាភាគីជប៉ុននឹងដឹកនាំប្រតិភូ ធុរកិច្ចជប៉ុនមកប្រទេសកម្ពុជា ជាបន្តបន្ទាប់ ក្នុងនោះនាខែវិច្ឆិកាខាងមុខនេះ ឯកឧត្តមនឹងដឹកនាំប្រតិភូមួយក្រុមទៀតមកកាន់ប្រទេសកម្ពុជា ដើម្បីបង្កឱកាសសម្រាប់វិនិយោគិនជប៉ុន សិក្សាពីសក្តានុពលផ្សេងៗដែលកម្ពុជាមាន ដើម្បីវិនិយោគ។ ឯកឧត្តមអភិសន្តិបណ្ឌិត ស សុខា បានសម្តែងការស្វាគមន៍ចំពោះ គំនិតផ្តួចផ្តើមក៏ដូចជាគម្រោងទស្សនកិច្ចរបស់ប្រតិភូធុរកិច្ចជប៉ុនមកកាន់ ព្រះរាជាណាចក្រកម្ពុជានាខែវិច្ឆិកាខាងមុខ ព្រមទាំងអរគុណចំពោះភាគីជប៉ុន សម្រាប់កិច្ចខិតខំប្រឹងប្រែងពង្រឹង និងពង្រីកទំនាក់ទំនងរវាងប្រទេសទាំងពីរជាពិសេសតាមរយៈការវិនិយោគ៕

ប្រមុខការពារជាតិកម្ពុជាអះអាងថាមជ្ឈមណ្ឌលទំនើបកម្មសមុទ្ររាមគឺជាកន្លែងពង្រឹងសមត្ថភាពកងទ័ពជើងទឹកកាន់តែខ្លាំងបន្ថែមទៀតទាំងវិជ្ជាជីវៈនិងយុទ្ធោបករណ៍

នាយឧត្តមសេនីយ៍ ទៀ សីហា ឧបនាយករដ្ឋមន្រ្តីរដ្ឋមន្រ្តីក្រសួងការពារជាតិកម្ពុជា បានថ្លែងអះអាងថា មជ្ឈមណ្ឌលទំនើបកម្មសមុទ្ររាមគឺជាកន្លែងបង្កើនសមត្ថភាពរបស់កងទ័ពជើងទឹកឲ្យកាន់តែខ្លាំងក្លាបន្ថែមទៀតទាំងវិជ្ជាជីវៈ គ្រឿងបំពាក់បញ្ចេកទេស និងយុទ្ធោបករណ៍ ស្របទៅតាមនៃការកែទម្រង់ដល់កងកម្លាំងប្រដាប់អាវុធរបស់រាជរដ្ឋាភិបាលកម្ពុជា។ក្នុងពិធីសម្ពោធដាក់ឲ្យប្រើប្រាស់ជាផ្លូវការនូវសមិទ្ធផលទំនើបកម្មមូលដ្ឋានសមុទ្ររាម និងមជ្ឈមណ្ឌលភស្តុភារ និងហ្វឹកហ្វឺនរួមគ្នារវាងកម្ពុជា និងចិន នាថ្ងៃទី៥ ខែមេសា ឆ្នាំ២០២៥នេះក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដែលស្ថិតនៅភូមិអុង សង្កាត់រាម ក្រុងកំពង់សោម ខេត្តព្រះសីហនុ នាយឧត្តមសេនីយ៍ ទៀ សីហា បានបញ្ជាក់ថា មជ្ឈមណ្ឌលទំនើបកម្មសមុទ្ររាម គឺជាមរតកប្រវត្តិសាស្រ្តនៃការពង្រឹង និងការពង្រីកទំនាក់ទំនងជាប្រពៃណី រវាងរាជរដ្ឋាភិបាល និងកងទ័ពប្រទេសកម្ពុជា និងចិន បន្តពីប្រពៃណីដែលធ្លាប់បានឆ្លងកាត់ជាប្រវត្តិសាស្រ្តដ៏យូរលង់ និងកាន់តែមានភាពកក់ក្តៅជឿជាក់រឹងមាំ ជាពិសេសនៅក្នុងរាជរដ្ឋាភិបាលនីតិកាលទី៧ នៃរដ្ឋសភា ដែលដឹកនាំដោយសម្តេចធិបតីនាយករដ្ឋមន្រ្តី បានបន្តប្តេជ្ញាចិត្តការពារនូវសមិទ្ធផល ដែលថ្នាក់ដឹកនាំជំនាន់មុន បានបន្សល់ទុកឲ្យរឹងមាំស្ថិតស្ថេរ និងបន្តអភិវឌ្ឍន៍កាន់តែរីកចម្រើនបន្ថែមទៀត។នាយឧត្តមសេនីយ៍ ទៀ សីហា បានលើកឡើងទៀតថា ការកសាងនូវមជ្ឈមណ្ឌលភស្តុភារ និងហ្វឹកហ្វឺនរួមគ្នារវាងកម្ពុជា និងចិននេះ ឬហៅថាផែរាម ហើយត្រូវបានសម្ពោធដាក់ឲ្យប្រើប្រាស់នាពេលនេះ «គឺបានប្រព្រឹត្តទៅស្របតាមគោលដៅនៃការ ពង្រឹងសមត្ថភាពកងទ័ពជើងទឹក ដែលជាជ្រុងអាទិភាពមួយនៃការកែទម្រង់កងកម្លាំងប្រដាប់អាវុធ ក្នុងយុទ្ធសាស្រ្តរបស់រាជរដ្ឋាភិបាល សៀវភៅការពារជាតិ សំដៅធ្វើទំនើបកម្ម និងបង្កើនសមត្ថភាពវិជ្ជាជវៈដល់កងទ័ពជើងទឹក បន្តធានាកិច្ចការពារ ប្រកបដោយប្រសិទ្ធភាពនូវអធិបតេយ្យជាតិ បូរណភាពទឹកដី សន្តិភាព សន្តិសុខ និងសុវត្ថិភាពជូនប្រជាជន»។ទន្ទឹមនេះដែរ នាយឧត្តមសេនីយ៍ ទៀ សីហា បានលើកឡើងផងដែរថា ដើម្បីជាមូលដ្ឋានក្នុងការលើកកម្ពស់សមត្ថភាព បំពេញតួនាទីភារកិច្ចរបស់កងទ័ពជើងទឹកឲ្យមានការអភិវឌ្ឍ ទាំងវិជ្ជាជីវៈគ្រឿងបំពាក់ ឧបករណ៍បម្រើបច្ចេកទេស យុទ្ធោបករណ៍ សំដៅឈានទៅធ្វើទំនើបកម្មកងទ័ពជើងទឹកកម្ពុជាឲ្យឆ្លើយតបនឹងភាពជឿនលឿននៃបច្ចេកវិទ្យាទំនើប និងនវានុវត្តន៍យោធាក្នុងតំបន់ក្រសួងការពារជាតិកម្ពុជា ស្នើសុំភាគីចិន បន្តគាំទ្រ និងជួយឧបត្ថម្ភដល់កងទ័ពជើងទឹកកម្ពុជា ជាពិសេសការបណ្តុះបណ្តាល និងបំបន់ធនធានមនុស្សលើផ្នែកគ្រឿងបំពាក់ជំនាញ ដែលកំពុងមាននៅក្នុងមូលដ្ឋានសមុទ្ររាម និងសុំអ្នកជំនាញបច្ចេកទេស ដែលមានបទពិសោធន៍ខ្ពស់មកធ្វើការហ្វឹកហ្វឺនលើការជួសជុល ផលិត និងថែទាំនាវា ឬបញ្ជូនខាងកម្ពុជាទៅហ្វឹកហ្វឺនបំប៉នលើការជួសជុល ផលិត និងការថែទាំនាវនៅតាមបណ្តារោងចក្រ សហគ្រាស់នៅប្រទេសចិន។ក្នុងពិធីសម្ពោធនោះដែរ នាយឧត្តមសេនីយ៍ ទៀ សីហាក៏បានលើកឡើងផងដែរថា កន្លងមកទោះបីជាមានការចោទប្រកាន់ឥតឈប់ឈរមកលើសិទ្ធិ និងអធិបតេយ្យរបស់កម្ពុជាក៏ដោយ ប៉ុន្តែកម្ពុជានៅតែប្រកាន់យកការអនុវត្តស្របតាមរដ្ឋធម្មនុញ្ញរបស់ខ្លួន បានយ៉ាងខ្ជាប់ខ្ជួន និងសូមគូសបញ្ជាក់ជាថ្មីឡើងវិញថា កម្ពុជាមានគោលជំហររឹងមាំក្នុងការគោរពសិទ្ធិ និងផលប្រយោជន៍អ្នកដទៃ និង«គ្មានមហិច្ឆតាបង្កការគំរាមកំហែងដល់ប្រទេស ឬតំបន់ណាមួយនោះឡើយ»។នាយឧត្តមសេនីយ៍ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា បានឲ្យដឹងទៀតថា បន្ទាប់ពីបញ្ចប់ដំណើរការ ធ្វើទំនើបកម្មមូលដ្ឋានសមុទ្ររាម កម្ពុជានឹងមានសមត្ថភាពកើនឡើងមួយកម្រិតទៀត ក្នុងការគ្រប់គ្រងសភាពការណ៍ក្នុងដែន សមុទ្រកម្ពុជា ដើម្បីបង្ការ ការពារ ទប់ស្កាត់ និងឆ្លើយតបទៅនឹងឧបទ្ទវហេតុនានាបានទាន់ពេលវេលា និងមានប្រសិទ្ធភាព និងឱកាសឱ្យកាន់តែទូលំទូលាយនៅក្នុងកិច្ចសហប្រតិបត្តិការផ្នែកសន្តិសុខលំហសមុទ្រជាមួយដៃគូរអន្តរជាតិ នៅក្នុងក្របខណ្ឌតំបន់ ស្របតាមគោលនយោបាយជាតិ និងយុទ្ធសាស្រ្តជាតិស្តីពីសន្តិសុខលំហសមុទ្ររបស់កម្ពុជា៕ អត្ថបទ៖ បាន ចក់

ប្រសាសន៍សំខាន់ៗរបស់សម្ដេចធិបតី ហ៊ុន ម៉ាណែត ក្នុងពិធីសម្ពោធមជ្ឈមណ្ឌលទំនើបកម្មមូលដ្ឋានសមុទ្ររាម និងមជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា-ចិន ផែរាម ខេត្តព្រះសីហនុ

នៅព្រឹកថ្ងៃទី៥ ខែមេសា ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធមជ្ឈមណ្ឌលទំនើបកម្មមូលដ្ឋានសមុទ្ររាម និងមជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា-ចិន ផែរាម ខេត្តព្រះសីហនុ។ ខាងក្រោមនេះជាប្រសាសន៍សំខាន់ៗរបស់សម្ដេចធិបតី នាយករដ្ឋន្ត្រី៖-សម្តេចធិបតី ហ៊ុន ម៉ាណែត៖ សមិទ្ធផលទំនើបកម្មមូលដ្ឋានសមុទ្ររាម និងមជ្ឈមណ្ឌលភស្តុភារ និងហ្វឹកហ្វឺនរួមគ្នារវាងកម្ពុជា និងចិននាពេលនេះ គឺជាសមិទ្ធផលយ៉ាងធំធេង និងជាមរតកប្រវត្តិសាស្រ្តសម្រាប់កងទ័ពកម្ពុជា និងមិត្តភាព និងបង្កើនទំនាក់ទំនងកម្ពុជា-ចិន ឲ្យកាន់តែប្រសើរឡើងបន្ថែមទៀត ដើម្បីរួមចំណែកជាមួយប្រទេសក្នុងតំបន់ ក្នុងការពង្រឹងសន្តិសុខក្នុងលំហសមុទ្រ ។-សម្ដេចធិបតី នាយករដ្ឋមន្ត្រី៖ កងទ័ព មិនត្រឹមជាកម្លាំងស្នូលក្នុងការការពារទឹកដីប៉ុណ្ណោះទេ តែកងទ័ពក៏ជាចំណែកចូលរួមដល់ការអភិវឌ្ឍរីកចម្រើនរបស់ប្រទេសជាតិផងដែរ ។-សម្តេចធិបតី ហ៊ុន ម៉ាណែត ប្រកាសជាឱឡារិកថា រាជរដ្ឋាភិបាលកម្ពុជាដឹកនាំដោយគណបក្សប្រជាជនកម្ពុជា នឹងមិនអនុញ្ញាតឲ្យប្រទេសណាមួយដាក់មូលដ្ឋានកងទ័ពនៅកម្ពុជានោះឡើយ មិនថាអតីកាល ថ្ងៃនេះ ថ្ងៃស្អែក ឬទៅថ្ងៃអនាគត។-សម្ដេចធិបតី៖ ការធ្វើទំនើបកម្មមូលដ្ឋានសមុទ្ររាម ការធ្វើទំនើបកម្មកងទ័ព នោះហើយគឺជាការគិតគូរអំពីការការពារអធិបតេយ្យភាពជាតិ ទប់ទល់នឹងការឈ្លានពានពីខាងក្រៅ។-សម្ដេចធិបតី នាយករដ្ឋមន្ត្រី៖ នៅពេលដែលមិត្តបរទេសមួយចំនួនបង្ហាញពីការបារម្ភចំពោះចិនដែលធ្វើឱ្យបាត់បង់អធិបតេយ្យភាពរបស់កម្ពុជា ខ្ញុំ(សម្ដេចធិបតី)បញ្ជាក់ទៅមិត្តបរទេសទាំងនោះថា គ្មាននរណាស្រឡាញ់អធិបតេយ្យកម្ពុជា ការពារអធិបតេយ្យកម្ពុជា ជាងកម្ពុជានោះទេ។-សម្ដេចធិបតី ហ៊ុន ម៉ាណែត៖ ក្រោយមជ្ឈមណ្ឌលទំនើបកម្មមូលដ្ឋានសមុទ្ទរាមបញ្ចប់ការសាងសង់រួចហើយ កម្ពុជាស្វាគមន៍ភាគីមិត្តបរទេសទាំងអស់ មកធ្វើសមយុទ្ធហ្វឹកហ្វឺនរួមគ្នាជាមួយកម្ពុជានៅមជ្ឈមណ្ឌលនេះ។-សម្ដេចធិបតី៖ មូលដ្ឋានរាម គឺស្ថិតនៅក្រោមការគ្រប់គ្រងរបស់កម្ពុជាតែមួយគត់ គ្មានចំណែកណាត្រូវ បានកាត់ទៅដាក់ឱ្យស្ថិតនៅក្រោមការគ្រប់គ្រងរបស់កងទ័ពណានោះឡើយ។-សម្ដេចធិបតី នាយករដ្ឋមន្ត្រី៖ មានប្រទេសជាច្រើនក្នុងតំបន់បានដាក់ឱ្យមានមូលដ្ឋានកងទ័ពបរទេសនៅលើទឹកដីខ្លួនដោយចំហ តែកម្ពុជាមិនអនុញ្ញាតឱ្យមានមូលដ្ឋានកងទ័ពបរទេសនៅលើដែនអធិបតេយ្យរបស់ខ្លួននោះឡើយ។ សម្ដេចធិបតីបញ្ជាក់បន្ថែមថា បើកម្ពុជាចង់បើកឱ្យ មានមូលដ្ឋានកងទ័ពបរទេសនៅកម្ពុជាមែននោះ គឺកម្ពុជាធ្វើវិសោធនកម្មរដ្ឋធម្មនុញ្ញត្រង់មាត្រានោះគឺបានហើយ តែកម្ពុជាមិនមានបំណង មិនមានចេតនាធ្វើវិសោធនកម្មរដ្ឋធម្មនុញ្ញលើមាត្រានេះនោះទេ ដោយកម្ពុជាប្ដេជ្ញាបន្តគោរពតាមរដ្ឋធម្មនុញ្ញដែលមានស្រាប់ជាដដែល។-សម្ដេចធិបតី៖ ចាប់ពីពេលនេះទៅ ស្វាគមន៍រាល់នាវាប្រទេសនានា ចូលចតនៅមូលដ្ឋានសមុទ្ររាម (នាវាទម្ងន់ក្រោមពីរម៉ឺនតោន) ដើម្បីធ្វើការហ្វឹនហ្វឺនរួមគ្នា ដែលនេះជាការបង្ហាញថា មូលដ្ឋានរាមនេះ គឺគ្រប់គ្រងដោយកម្ពុជា។-សម្ដេចធិបតី ហ៊ុន ម៉ាណែត៖ ការធ្វើទំនើបកម្មកងទ័ព គឺជាស្មារតីស្នេហាជាតិពិតប្រាកដ។-សម្ដេចធិបតី ស្នើកងទ័ពរំដោះប្រជាជនចិន ជួយបង្កើនសមត្ថភាពកងទ័ពកម្ពុជាបន្ថែមទៀត ពិសេសកម្លាំងការពារកោះឆ្នេរ ដោយបំពាក់នូវយុទ្ធោបករណ៍ទំនើបៗផង។-សម្តេចធិបតី ហ៊ុន ម៉ាណែត ក្រើនរំលឹកដល់កងទ័ពទាំងអស់ត្រូវបន្តពង្រឹងសមត្ថភាពក្នុងកិច្ចការពារបូរណភាពទឹកដី និងខឿនការពារឲ្យកាន់តែខ្លាំងក្លាបន្ថែមទៀតប្រកបដោយសមត្ថភាព និងវិជ្ជាជីវៈទំាងផ្លូវអាកាស ទឹក និងជើងគោក។

យន្តហោះ Air Cambodia អបអរសាទរពិធីបុណ្យចូលឆ្នាំខ្មែរ ជាមួយអត្តសញ្ញាណថ្មី និងចក្ខុវិស័យថ្មី

ភ្នំពេញ ៖ កាលពីរាត្រី នៅថ្ងៃទី០៤ ខែមេសា ឆ្នាំ២០២៥ ក្រុមហ៊ុនអាកាសចរណ៍ជាតិកម្ពុជា (Air Cambodia) បានរៀបចំកម្មវិធី អបអរសាទរពិធីបុណ្យចូលឆ្នាំប្រពៃណីជាតិខ្មែរ ជាមួយអត្តសញ្ញាណថ្មី និងចក្ខុវិស័យថ្មី ដោយបានប្រកាសជា ផ្លូវការនៃការផ្លាស់ប្តូរអត្តសញ្ញាណថ្មី ពីឈ្មោះ ក្រុមហ៊ុនអាកាសចរណ៍ជាតិកម្ពុជា អង្គរ អ៊ែរ ទៅ ជា អាកាសចរណ៍ជាតិកម្ពុជា ដែលមានការអញ្ជើញចូលរួមពីឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល និងជា្រធានក្រុមប្រឹក្សាភិបាលក្រុមហ៊ុន Air Cambodia ហើយក៏មានការអញ្ជើញចូលរួមពីឯកឧត្តម ហួត ហាក់ រដ្ឋមន្ត្រីក្រសួងទេសចរណ៍។ថ្លែងក្នុងពិធីអបអរសាទរនេះឯកឧត្តមបណ្ឌិត ម៉ៅ ហាវណ្ណាល់ បានលើកឡើងថា យន្តហោះ Air Cambodia មានសេចក្ដីសោមនស្សរីករាយបំផុត ដោយបានប្រកាសជា ផ្លូវការនៃការផ្លាស់ប្តូរអត្តសញ្ញាណថ្មី ពីឈ្មោះ ក្រុមហ៊ុនអាកាសចរណ៍ជាតិកម្ពុជា អង្គរ អ៊ែរ ទៅ ជា អាកាសចរណ៍ជាតិកម្ពុជា (Air Cambodia) រួមជាមួយការដាក់ចេញនូវចក្ខុវិស័យថ្មី លើការពង្រីក ជើងហោះហើរទាំងក្នុងស្រុក និងអន្តរជាតិថ្មីៗបន្ថែមទៀត ប្រកបដោយផាសុកភាព ស្របជាមួយការចាប់ផ្តើមប្រើប្រាស់យន្តហោះប្រភេទ TR72-600 ចំនួន៣គ្រឿង ក្នុងពាក់កណ្ដាលខែឧសភា ឆ្នាំ២០២៥ នេះ។ ទន្ទឹមនឹងនេះ សុខុមាលភាពរបស់បុគ្គលិកក្រុមហ៊ុន និងការយកចិត្តទុកដាក់ក្នុងការបណ្តុះបណ្តាលធនធានមនុស្សទ ក៏ត្រូវបានពង្រឹង និងពង្រីកជាបន្តបន្ទាប់។ឆ្លៀតក្នុងឱកាសដ៏ថ្លៃថ្លានេះ ឯកឧត្តមបានថ្លែងអំណរគុណយ៉ាងជ្រាលជ្រៅបំផុតចំពោះគ្រប់បណ្តាភាគីពាក់ព័ន្ធទាំងអស់ មានដូចជាក្រសួង ស្ថាប័ន ដៃគូអាជីវកម្ម ទីភ្នាក់ងារទេសចរណ៍ និង បុគ្គលិកក្រុមហ៊ុន ដែលបានខិតខំជួយជ្រោមជ្រែង និងគាំទ្រកិច្ចដំណើរការអាជីវកម្មរបស់ក្រុមហ៊ុន អាកាសចរណ៍ជាតិកម្ពុជាឱ្យទទួលបានជោគជ័យ ដោយរក្សាបានសន្តិសុខនិងសុវត្ថិភាពល្អប្រសើរ ជូនអ្នកដំណើរតាមផ្លូវអាកាស ដោយអនុវត្តយ៉ាងខ្ជាប់ខ្ជួនតាមស្តង់ដា សុវត្ថិភាពហោះហើររបស់សមាគមន៍ដឹកជញ្ជូនតាមផ្លូវអាកាសអន្តរជាតិ (IOSA) ។ មិនត្រឹមតែសុវត្ថិភាពប៉ុណ្ណោះទេ ក្រុមហ៊ុនក៏បានយកចិត្តទុកដាក់អំពីផាសុខភាពរបស់អ្នកដំណើរដែរ គឺសេវាកម្មរបស់អាកាសចរណ៍ជាតិទទួល បានចំណាត់ថ្នាក់ផ្កាយបី ពីសេវាកម្មអាកាសចរណ៍ Skytrax ទៀតផង។ជាលទ្ធផល ក្នុងឆ្នាំ២០២៤កន្លងមកនេះ ក្រុមហ៊ុនសម្រេចបាននូវសមិទ្ធិផលគួរឱ្យកត់សំគាល់ ដោយមានការកើនឡើង នៃប្រាក់ចំណូលដល់ទៅ៥០% បើប្រៀបធៀបទៅនឹងឆ្នាំ2023។ ភាព ជោគជ័យទាំងនេះ ឆ្លុះបញ្ចាំងពីការប្តេជ្ញារបស់ថ្នាក់ដឹកនាំ និងបុគ្គលិកក្រុមហ៊ុនអាកាសចរណ៍ជាតិកម្ពុជា ចំពោះសុវត្ថិភាព និងសេវាកម្មល្អប្រណិត និងភាពរីកចំរើនដោយចីរភាពក្នុងវិសយ័អាកាសចរ របស់កម្ពុជា៕ដោយ ៖ គង់ រ៉េន

បណ្ដាញសង្គម

ព័ត៌មានថ្មីៗ

ឯកឧត្តមឧបនាយករដ្ឋមន្ត្រី ហ៊ុន ម៉ានី៖ វិញ្ញាសាតាក់តែងចប់ភ្លាម ប្រឡងភ្លាមតែម្តង

រដ្ឋមន្រ្តីការពារជាតិជប៉ុនលោក Koizumi ច្រានចោលការចោទប្រកាន់ពីយោធានិយមថ្មី

ក្រសួងការងារ៖ ខេត្តចំនួន៤ នៅភូមិភាគឦសាន្ត មានឱកាសការងារជិត ៤,០០០កន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ប្រមុខ WHO ទទួចសុំឲ្យមានការបញ្ចុះសពដោយសុវត្ថិភាព អំឡុងធ្វើដំណើរទៅកាន់តំបន់រីករាលដាលឆ្លងជំងឺអេបូឡា

អាជ្ញាធរជាតិអប្សរា និង JQA បិទបញ្ចប់កម្មវិធីអប់រំបរិស្ថានសម្រាប់កុមារ ឆ្នាំ២០២៦ និងប្រគល់រង្វាន់ដល់សិស្សឆ្នើម

អ៊ីរ៉ង់និយាយថា កិច្ចប្រជុំជាមួយអាមេរិកកំពុងបន្ត តែពុំឈានដល់កិច្ចព្រមព្រៀងផ្តាច់ព្រ័ត្រនោះទេ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

សម្តេចធិបតីប្រកាសទទួលស្វាគមន៍នាវាប្រទេសនានាមកចូលចត និងហ្វឹកហ្វឺននៅមូលដ្ឋានសមុទ្ររាម

វិទ្យាស្ថានជាតិពហុបច្ចេកទេសតេជោសែន រៀបចំកម្មវិធីសង្រ្កាន្ត ដើម្បីអបអរពិធីបុណ្យចូលឆ្នាំខ្មែរ

អង្គការសំអាតទន្លេ-សមុទ្រ សហការជាមួយរដ្ឋបាលខេត្តកណ្តាលប្រារព្ធ «ទិវាអំពើល្អ» លើកទី៦

ឯកឧត្តមអភិសន្តិបណ្ឌិត បញ្ជាក់ជាថ្មីអំពីឆន្ទៈរួមចំណែកផ្ដល់ភាពកក់ក្ដៅជូនវិនិយោគទុនជប៉ុន!

យន្តហោះ Air Cambodia អបអរសាទរពិធីបុណ្យចូលឆ្នាំខ្មែរ ជាមួយអត្តសញ្ញាណថ្មី និងចក្ខុវិស័យថ្មី

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

សម្តេចធិបតីប្រកាសទទួលស្វាគមន៍នាវាប្រទេសនានាមកចូលចត និងហ្វឹកហ្វឺននៅមូលដ្ឋានសមុទ្រ​រាម

វិទ្យាស្ថានជាតិពហុបច្ចេកទេសតេជោសែន រៀបចំកម្មវិធីសង្រ្កាន្ត ដើម្បីអបអរពិធីបុណ្យចូលឆ្នាំខ្មែរ

អង្គការសំអាតទន្លេ-សមុទ្រ សហការជាមួយរដ្ឋបាលខេត្តកណ្តាលប្រារព្ធ «ទិវាអំពើល្អ» លើកទី៦

ឯកឧត្តមអភិសន្តិបណ្ឌិត បញ្ជាក់ជាថ្មីអំពីឆន្ទៈរួមចំណែកផ្ដល់ភាពកក់ក្ដៅជូនវិនិយោគទុនជប៉ុន!

យន្តហោះ Air Cambodia អបអរសាទរពិធីបុណ្យចូលឆ្នាំខ្មែរ ជាមួយអត្តសញ្ញាណថ្មី និងចក្ខុវិស័យថ្មី

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

សម្តេចធិបតីប្រកាសទទួលស្វាគមន៍នាវាប្រទេសនានាមកចូលចត និងហ្វឹកហ្វឺននៅមូលដ្ឋានសមុទ្ររាម