BTV NEWS

រដ្ឋាករទឹកស្វយ័តក្រុងភ្នំពេញគ្រោងប្រមូលចំណូលឆ្នាំ២០២៦នេះ ក្នុងរង្វង់ជិត ៤០០ ប៊ីលានរៀល

សម្ដេចធិបតី ណែនាំដល់អាជ្ញាធរមូលដ្ឋានគ្រប់លំដាប់ថ្នាក់ និងភាគីពាក់ព័ន្ធបន្តពង្រឹងយន្តការគាំទ្រ និងលើកកម្ពស់សិទ្ធិកុមារ

សម្ដេចធិបតី៖ អត្រាមរណភាពរបស់មាតា កុមារ និងទារកនៅកម្ពុជាបានថយចុះគួរឱ្យកត់សម្គាល់ដែលនេះ គឺជាការពន្លឿនវឌ្ឍនភាពឆ្ពោះទៅសម្រេចគោលដៅអភិវឌ្ឍប្រកបដោយចីរភាពឆ្នាំ២០៣០

អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ចុះសួរទុក្ខប្រជាពលរដ្ឋភៀសសឹកស្នាក់នៅផ្ទះបណ្តោះអាសន្ន ក្នុងខេត្តព្រះវិហារ

ព័ត៌មានជាតិ

ដឹងមូលហេតុហើយករណីឆេះឃ្លាំងនៅស្រុកអង្គស្នួលគឺដោយសារផ្ទុះធុងហ្គាស

កណ្តាល ៖ ដឹងមូលហេតុហើយករណីភ្លើងឆាបឆេះឃ្លាំងស្តុក សម្ភារៈជ័រធ្វើស័ង្កសី នៅស្រុកអង្គស្នួល ខេត្តកណ្តាល គឺបណ្តាលមកពីផ្ទុះធុងហ្គាស ។កាលពីវេលាម៉ោង៩ និង ៥០នាទី ថ្ងៃទី០១ ខែមេសា ឆ្នាំ២០២៥ មានករណីអណ្តាតភ្លើងឆាបឆេះឃ្លាំងស្តុក សម្ភារៈជ័រធ្វើស័ង្កសី និងផ្ទះប្រជាពលរដ្ឋ នៅចំណុចភូមិថ្លើក ឃុំពើក ស្រុកអង្គស្នួល ខេត្តកណ្ដាល បង្កឲ្យមានការភ្ញាក់ផ្អើលដល់សមត្ថកិច្ចជំនាញពន្លត់អគ្គីភ័យបញ្ចេញកម្លាំងជួយអន្តរាគមន៍ភ្លាមៗ ។ នៅក្នុងករណីគ្រោះអគ្គីភ័យនេះឃើញវត្តមាន លោក គួច ចំរើន អភិបាលខេត្តនៃគណៈអភិបាលខេត្តកណ្តាល និង លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានចុះត្រួតពិនិត្យដល់ទីតាំង ។ យោងតាមរបាយការណ៍ពីជំនាញបញ្ជាក់ថា គ្រោះអគ្គីភ័យនេះបានបណ្តាលឲ្យឆេះឃ្លាំងរោងចក្រ ចំនួន ០៣ឃ្លាំង និងឆេះផ្ទះប្រជាពលរដ្ឋ ចំនួន ០៤ខ្នង។ ក្នុងកិច្ចប្រតិបត្តិការពន្លត់អគ្គិភ័យនេះ ជំនាញបានគ្រប់គ្រងទាំងស្រុង នៅវេលាម៉ោង១៤ និង០៥នាទី នារសៀលថ្ងៃខែឆ្នាំដដែល ដោយប្រើប្រាស់រថយន្តពន្លត់អគ្គិភ័យ ចំនួន ៤៣គ្រឿង ប្រើប្រាស់ទឹកអស់ ចំនួន ១១៣ឡាន ដោយមានរថយន្តចូលរួមជួយពីក្រសួងមហាផ្ទៃ, អគ្គស្នងការដ្ឋាននគរបាលជាតិ, ស្នងការដ្ឋាននគរបាលខេត្តកណ្តាល, អង្គភាព៩១១, អង្គភាព៧១១, អង្គភាព១១៩, ស្នងការដ្ឋាននគរបាលខេត្តកំពង់ស្ពឺ, តំបន់សេដ្ឋកិច្ចកាណាឌីយ៉ា, បូរីសង្ឃឹមថ្មី, ក្រុមហ៊ុនខ្មែរប៊ូប៊ើរីជីស។នគរបាលបន្តថា ចំពោះករណីនេះ បង្កឡើងដោយសារផ្ទុះធុងហ្គាស់ចេញពីឃ្លាំងផ្ទុកសម្ភារៈជ័រ ផ្លាស្ទីក ។ ប៉ុន្តែមិនបានបង្កឱ្យមានអ្នករងរបួសនោះទេ ៕តារាវុទ្ធី

សង្រ្កាន្តនៅវិទ្យាល័យហ៊ុនសែនបរិបូណ៌ ឆ្លុះបញ្ចាំងពី វប្បធម៌ ទំនៀមទម្លាប់ ប្រពៃណី និងការអភិវឌ្ឍសមត្ថភាពរបស់យុវជនជាសហគ្រិនភាព

កំពង់ឆ្នាំង ៖ លោកគ្រូ អ្នកគ្រូ និងសិស្សានុសិស្ស នៅថ្ងៃទី០១ ខែមេសា ឆ្នាំ២០២៥នេះ បានអោយដឹងថា សង្រ្កាន្តនៅវិទ្យាល័យហ៊ុនសែនបរិបូណ៌ ខេត្តកំពង់ឆ្នាំង បង្ហាញពីវប្បធម៌ ទំនៀមទម្លាប់ ប្រពៃណី និងការអភិវឌ្ឍសមត្ថភាពរបស់យុវជនជាសហគ្រិនភាព នៅក្នុងសម័យកាលនៃសន្តិភាព។ ការលើករបស់លោកគ្រូអ្នកគ្រូសិស្សានុសិស្ស នេះបានធ្វើឡើងនៅក្នុងពិធីបើកសង្រ្កាន្ត វិទ្យាល័យហ៊ុនសែនបរិបូណ៌ ដែលបានប្រព្រឹត្តទៅក្នុងថ្ងៃទី០១ និង០២ ខែមេសា ឆ្នាំ២០២៥ និងមានការអញ្ជើញចូលរួមពីលោក ចេង ចាន់ដូណា អភិបាលស្រុកបរិបូណ៌ ។ លោកគ្រូ អ្នកគ្រូ និងសិស្សានុសិស្ស បានសំដែងនូវការសប្បាយរីករាយ ជាខ្លាំងព្រោះនេះជាព្រឹត្តិការណ៍មួយថ្មីសម្រាប់វិទ្យាល័យ ហ៊ុន សែន បរិបូណ៌ ដែលបានបង្ហាញនូវទំនៀមទម្លាប់ប្រពៃណីវប្បធម៌របស់ខ្មែរយើង ។ សង្ក្រាន្តនេះ បានបណ្តុះគំនិតដល់យុវជនជំនាន់ក្រោយ អោយចេះស្រឡាញ់នូវវប្បធម៌ប្រពៃណីរបស់ខ្មែរយើង និង ចូលថែរក្សាឱ្យនៅគង់វង្សយូអង្វែងតទៅផងដែរ ។ កម្មវិធីសង្ក្រាន្តវិទ្យាល័យ ហ៊ុន សែន បរិបូណ៌នេះ រៀបចំឡើងបានផ្តោតលើសសរស្តម្ភចំនួនបួន គឺវប្បធម៌ ប្រពៃណី យុវជន និងការអភិវឌ្ឍន៏។ គោលបំណងសំខាន់នោះគឺ ចូលរួមផ្សព្វផ្សាយ និងលើកតម្កើង វប្បធម៌សិល្បៈបុរាណ និងប្រពៃណី ដោយរួមបញ្ជូលទាំង អ្វីដែលជារបស់ខ្មែរតាំងបុរាណកាលមក។ ក្រៅពីនេះសង្រ្កាន្តមានអត្ថន័យយ៉ាងធំធេង ដោយបានបង្ហាញពីទេពកោ សល្យយុវជន លើការច្នៃប្រឌិត ផ្សារភ្ជាប់នូវស្មារតីសាមគ្គីភាព ក្នុងការបញ្ជ្រាបការយល់ដឹងអំពីវប្បធម៌ ប្រពៃណីខ្មែរ ដ៏ល្អផូរផង់ដែលបានបន្សល់ពីកេរ្តិ៍ដំណែលដូនតាតាំងពីបុរាណកាលរៀងមក។ លោក ចេង ចាន់ដូណា អភិបាលស្រុកបរិបូណ៌បានបញ្ជាក់ថា៖ តាមរយៈនៃកម្មវិធីសង្រ្កាន្តវិទ្យាល័យ ហ៊ុន សែន បរិបូណ៌ឆ្នាំនេះ យុវជន នឹងមានឱកាសស្វែងយល់ពីការងារជាក្រុម បំណិតជីវិត តាមរយៈការផ្សារភ្ជាប់សាមគ្គីភាព និងលើកទឹកចិត្តយុវជនក្នុងសាលានេះ ឱ្យចូលរួមជាសហគមន៍តែមួយ។ យើងចង់ឱ្យសិស្សានុសិស្ស មានការប្រមូលផ្តុំគ្នាជាធ្លុងមួយ ដើម្បីលើកតម្កើងវប្បធម៌ប្រពៃណីជាតិរបស់យើង។ អាជ្ញាធរស្រុក សូមចូលរួមគាំទ្រដល់យុវជនទាំងអស់ក្នុងការរៀបចំនូវព្រឹត្តិការសង្រ្កាន្តវិទ្យាល័យនេះ ដើម្បីឱ្យយុវជនយើងជំនាន់ក្រោយបានកាន់តែយល់ច្បាស់ អំពីតម្លៃនៃវប្បធម៌ដ៏ផូរផង់របស់ខ្មែរយើងដែលមានតាំងពីយូលង់ណាស់មកហើយ ។ សូមបញ្ជាក់ថា៖ សង្រ្កាន្តវិទ្យាល័យ ហ៊ុន សែន បរិបូណ៌នេះ បានប្រារព្វធ្វើឡើងរយៈពេល២ថ្ងៃ គឺថ្ងៃទី០១ ដល់ថ្ងៃទី០២ ខែមេសា ឆ្នាំ២០២៥ សម្រាប់សង្រ្កាន្តរយៈពេល២ថ្ងៃនេះ គឺបានតាំងពិពណ៌ស្នាដៃសិស្ស លើកកម្មនៃការសិក្សាផ្សារភ្ជាប់និងការអនុវត្តន៍ និងបំណិនជីវិត ក្នុងជីវភាពប្រចាំថ្ងៃ លើកកិច្ចការងារសហគ្រិនភាពផងដែរ៕ កាំង ហុងវាស្នា

គណៈកម្មាធិការជាតិសុវត្ថិភាពចរាចរណ៍ផ្លូវគោកចេញសេចក្តីអំពាវនាវ ស្តីពី ការទប់ស្កាត់គ្រោះថ្នាក់ចរាចរណ៍ផ្លូវគោក ក្នុងឱកាសពិធីបុណ្យចូលឆ្នាំថ្មី ប្រពៃណីជាតិ

ភ្នំពេញ ៖ គណៈកម្មាធិការជាតិសុវត្ថិភាពចរាចរណ៍ផ្លូវគោក នាថ្ងៃទី១ ខែមេសា ឆ្នាំ២០២៥នេះ បានចេញសេចក្តីអំពាវនាវ ស្តីពី ការទប់ស្កាត់គ្រោះថ្នាក់ចរាចរណ៍ផ្លូវគោក ក្នុងឱកាសពិធីបុណ្យចូលឆ្នាំថ្មី ប្រពៃណីជាតិ នៅថ្ងៃទី១៤ ដល់ ថ្ងៃទី១៦ ខែមេសា ឆ្នាំ២០២៥។គណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ) សូមកោតសរសើរចំពោះអ្នកប្រើប្រាស់ផ្លូវដ៏ច្រើនលើស លប់ ដែលបានយកអស់ស្មារតីគោរពច្បាប់ស្តីពីចរាចរណ៍ផ្លូវគោក រួមចំណែកទប់ស្កាត់ កាត់បន្ថយគ្រោះថ្នាក់ចរាចរណ៍ក្នុងឆ្នាំ២០២៤ កន្លងទៅ។ឆ្លៀតឱកាសនេះ គ.ស.ច.គ បានកត់សំគាល់នៅពេលមានពិធីបុណ្យនានា ការធ្វើចរាចរណ៍មានភាពមមាញឹក និងមាន កំណើនខ្ពស់នូវគ្រោះថ្នាក់ចរាចរណ៍ផ្លូវគោក។ ដូចនេះ ដើម្បីបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោក ក្នុងឱកាសពិធីបុណ្យ ចូលឆ្នាំថ្មី ប្រពៃណីជាតិ នៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥ខាងមុខនេះ គ.ស.ច.គ. សូមធ្វើការអំពាវនាវដល់ សាធារណជនជាអ្នកប្រើប្រាស់ផ្លូវ ត្រូវបើកបរដោយគោរពច្បាប់ស្តីពីចរាចរណ៍ផ្លូវគោក និងចូលរួមទប់ស្កាត់ កាត់បន្ថយគ្រោះថ្នាក់ចរាចរណ៍ផ្លូវគោក ដូចខាងក្រោម៖១-កុំបើកបរលើសល្បឿនកំណត់។២-សូមកុំបើកបរក្រោមឥទ្ធិពលនៃគ្រឿងស្រវឹង ឬគ្រឿងញៀន។៣-ត្រូវគោរពសិទ្ធិអាទិភាព គោរពភ្លើង-ផ្លាកសញ្ញាចរាចរណ៍ និងសញ្ញាបញ្ជារបស់មន្ត្រីនគរបាលចរាចរណ៍ផ្លូវគោក។៤-ត្រូវបើកបរក្នុងគន្លងផ្លូវដែលកំណត់ដោយច្បាប់ស្តីពីចរាចរណ៍ផ្លូវគោក និងមិនត្រូវបើកបរជាន់លើគំនូសសញ្ញា បែងចែកគន្លងផ្លូវ។៥-ត្រូវប្រុងប្រយ័ត្នជានិច្ចក្នុងការបត់ ការជែង ការចត និងការឈប់។៦-ត្រូវត្រួតពិនិត្យមុនចេញដំណើរនូវលក្ខណៈបច្ចេកទេសយានយន្ត ដូចជា: សំបកកង់ ហ្វាំង ភ្លើងបំភ្លឺ និងចង្កូត ជាដើម ។៧-ត្រូវពាក់មួកសុវត្ថិភាពជានិច្ចក្នុងពេលធ្វើដំណើរតាមទោចក្រយានយន្តទោះជិត ឬឆ្ងាយ។៨-មិនត្រូវលេងគប់ទឹក ឬប៉ាតម្សៅដល់អ្នកប្រើប្រាស់ផ្លូវ។៩-សូមកុំផ្ទុកអ្នកដំណើរ ឬទំនិញលើសច្បាប់កំណត់។ ចំពោះរថយន្តដឹកអ្នកដំណើរ ឬដឹកកម្មករមិនឱ្យផ្ទុកអ្នកដំណើរ ឬ កម្មករលើដំបូល និងសូមមេត្តាកុំដំឡើងថ្លៃធ្វើដំណើរក្នុងឱកាសនេះ។គណៈកម្មាធិការជាតិសុវត្ថិភាពចរាចរណ៍ផ្លូវគោក សូមសំដែងនូវសេចក្តីសង្ឃឹមជឿជាក់លើអ្នកប្រើប្រាស់ផ្លូវគ្រប់រូប នឹងចូលរួមគោរពអនុវត្តច្បាប់ស្តីពីចរាចរណ៍ផ្លូវគោក ក៏ដូចជាអនុវត្តតាមសេចក្តីអំពាវនាវនេះ ដើម្បីនាំមកនូវសុវត្ថិភាព និងសេចក្តីសុខក្សេមក្សាន្ត ក្នុងឱកាសពិធីបុណ្យចូលឆ្នាំថ្មី ប្រពៃណីជាតិ ខាងមុខនេះ ៕អត្ថបទ រដ្ឋា

សម្ដេចតេជោ៖«បងប្រុសថ្ងៃស្អែករូបកាយរបស់បងនឹងបញ្ចុះទៅក្នុងព្រះធរណីជាមួយបងស្រីដែលពួកបងបែកគ្នា១២ឆ្នាំហើយនឹងបានជួបគ្នាវិញដែលជាទីកន្លែងបងទាំងពីរសម្រាកចុងក្រោយ»

ភ្នំពេញ៖សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី នៅរសៀលថ្ងៃទី១ ខែមេសា ឆ្នាំ ២០២៥នេះ បានសរសេរនៅលើបណ្ដាញសង្គមហ្វេសប៊ុករបស់សម្ដេចដោយបង្ហាញក្ដីអាឡោះអាល័យ ខណៈនៅថ្ងៃទី២ ខែមេសា ឆ្នាំ២០២៥ស្អែកនេះសពរបស់ ឯកឧត្តមអ្នកឧកញ៉ា ឧត្តមមេត្រីវិសិដ្ឋ ហ៊ុន សាន រដ្ឋលេខាធិការក្រសួងសាធារណការ និងដឹកជញ្ជូន និងត្រូវជាបងប្រុសទី១ របស់សម្ដេចតេជោនឹងត្រូវញ្ចុះតាមប្រពៃណីនៅវត្តច័ន្ទបុរីវង្ស ស្ថិតនៅភូមិសំរោងជើង សង្កាត់សំរោង ខណ្ឌព្រែកព្នៅ រាជធានីភ្នំពេញ។សម្ដេចតេជោ បានសរសេរថា៖«ថ្ងៃស្អែកបែកគ្នា! ខ្ញុំមកប្រចាំការនៅជាមួយបងប្រុសខ្ញុំតាំងពីមុនគាត់ចែកឋានរហូតមកដល់ពេលនេះ និងបន្តរហូតយកទៅបញ្ចុះនៅព្រឹកស្អែក ២ មេសា ២០២៥ ព្រមទាំងបញ្ចប់ត្រឹមធ្វើបុណ្យ ៧ ថ្ងៃ និង ១០០ថ្ងៃនៅល្ងាចស្អែក និងបញ្ចប់នៅព្រឹកខានស្អែក ៣មេសា២០២៥»។សម្ដេចមានប្រសាសន៍ទាំងអាឡោះអាល័យថា៖«ខ្ញុំយំ និងស្រកទឹកភ្នែករាល់ថ្ងៃរាល់យប់នឹកអាណិតបងប្រុស។ ថ្ងៃសំអាតខ្លួនបងប្រុសមុនពេលបញ្ចូលមឈូសខ្ញុំយំដោយនិយាយខ្លាំងៗថា (ឲ្យខ្ញុំសូមទោសមកពីខ្ញុំប្រហែសពេកមិនបានមើលថែទាំបងឲ្យបានដិតដល់។ខ្ញុំបានជួយជិវិតមនុស្សមួយនគរតែមិនអាចជួយបងខ្លួនបាន)»។សម្ដេចតេជោបានលើកឡើងថា រឿងដែលធ្វើឲ្យសម្ដេចកាន់សង្វេគ គឺក្មួយស្រីសម្ដេចម្នាក់កំពុងជួលផ្ទះគេនៅ កូនៗមិនបានចូលរៀនពេញលេញ។ សម្ដេចតេជោថ្លែងថា៖«ក្មួយខ្ញុំគោរពតាមការណែនាំរបស់ឪពុកដែលបានប្រាប់កូនៗថា កុំទៅ (រំខានពូរបស់ពួកឯង)។ ខ្ញុំបានជួយមនុស្សមួយចំនួនឲ្យមានផ្ទះនៅ ហេតុអ្វីបានក្មួយខ្ញុំអត់ផ្ទះនៅ? នេះមកពីខ្ញុំមិនដឹង»។សម្ដេចតេជោមានប្រសាសន៍បញ្ជាក់ថា៖«បងប្រុសថ្ងៃស្អែករូបកាយរបស់បងនឹងបញ្ចុះទៅក្នុងព្រះធរណីជាមួយបងស្រីដែលពួកបងបែកគ្នា ១២ ឆ្នាំហើយ និងបានជួបគ្នាវិញដែលជាទីកន្លែងបងទាំងពីរសម្រាកចុងក្រោយ។ យើងលែងបានជួបគ្នាជារៀងរហូតតែខ្ញុំនៅជំពាក់បំណុលបងច្រើនណាស់ដែលខ្ញុំត្រូវខិតខំសងតាមរយៈជួយមើលការខុសត្រូវចំពោះកូនៗ និងចៅៗរបស់បង»៕

កយកា-KOICA ចូលរួមលើកកកម្ពស់សុខភាពកុមារកម្ពុជា ឱ្យកាន់តែប្រសើរចៀសផុតពីជំងឺឆ្លង និងជំងឺមិនឆ្លងផ្សេងៗ

ភ្នំពេញ ៖ មនី្ទរពេទ្យកុមារជាតិ នៃក្រសួងសុខាភិបាល បានសហការជាមួយក្រុមអ្នកស្ម័គ្រចិត្ត ទីភ្នាក់ងារសហប្រតិបត្តិការអន្តរជាតិកូរ៉េ ដែលហៅកាត់ថា កយកា -KOICA បានរៀបចំយុទ្ធនាការអាហារូបត្ថម្ភលើកទី២ ដើម្បីសុខភាពកុមារ ដែលប្រព្រឹតិ្តទៅនៅមនី្ទរពេទ្យកុមារជាតិ នាព្រឹកថ្ងៃទី១ ខែមេសា ឆ្នាំ២០២៥នេះ។ថ្លែងក្នុងកម្មវិធីផ្តល់អាហារូបត្ថម្ភដល់កុមារ សម្រាកព្យាបាលនៅមន្ទីរពេទ្យកុមារជាតិ ជាគម្រោងអង្គការ KOICA លោកវេជ្ជបណ្ឌិត ញឹប អង្គាបុស្ស នាយកមន្ទីរពេទ្យកុមារជាតិ បានថ្លែងថា គម្រោងនេះមានរយៈពេល៣ឆ្នាំ ចាប់ពីឆ្នាំ២០២៥ ដល់ឆ្នាំ២០២៧ខាងមុខ ដោយផ្តោតទៅលើសកម្មភាពមួយចំនួន ដូចជា៖ ការផ្តល់អាហារូបត្ថម្ភដល់កុមារទូទៅ ដែលសម្រាកព្យាបាលជំងឺនៅមន្ទីរពេទ្យទៅតាមអាយុ និងសុខភាព ដោយក្នុងមួយថ្ងៃផ្តល់ ៣ពេល ដោយឥតគិតថ្លៃ ដើម្បីបំប៉នសុខភាពឱ្យបានល្អឆាប់ជាសះស្បើយ។ ព្រោះថាអាហារូបត្ថម្ភនេះ មានសារសំខាន់ណាស់ សម្រាប់កុមារតូចៗដែលត្រូវការលូតលាស់ ពិសេសកុមារអាយុក្រោម៥ឆ្នាំ។លោកវេជ្ជបណ្ឌិត ញឹប អង្គាបុស្ស បន្ថែមទៀតថា ក្រៅពីនេះមានបន្ទប់ប្រឹក្សាយោបល់សម្រាប់ពិគ្រោះជាមួយមាតាបិតាកុមារ ដើម្បីណែនាំឱ្យពួកគាត់ចេះពីរបៀបចិញ្ចឹមកូន ឱ្យមានសុខភាពល្អ ខណៈបច្ចុប្បន្ននេះបញ្ហាជំងឺមិនឆ្លងកំពុងក្លាយជាបញ្ហាសុខភាពសាធារណៈដ៏ចម្បងសម្រាប់ប្រទេសកម្ពុជា ខណៈពីមុនយកចិត្តទុកដាក់តែទៅលើបញ្ហាកង្វះអាហារូបត្ថម្ភដោយសារក្មេងស្គមស្គាំង ស្លេកស្លាំង ក្រិន មិនគ្រប់គីឡូ ប៉ុន្តែឥឡូវលើសអាហារទៅវិញធ្វើឱ្យក្មេងធាត់ពេក ក៏ជាបញ្ហាដែរ។ ការចិញ្ចឹមបីបាច់កុមារ ឱ្យបានល្អធ្វើឱ្យក្មេងមានសុខភាពល្អ មានបញ្ញាឆ្លាតវៃ និងក្លាយជាធនធានមួយដ៏ល្អមួយទៅថ្ងៃអនាគត។លោកវេជ្ជបណ្ឌិត បានបញ្ជាក់ទៀតថា លើសពីនេះទៀត យើងក៏គិតគូរពីបញ្ហាផ្លូវចិត្ត និងអារម្មណ៍របស់កុមារផងដែរ ក្នុងនោះយើងបានរៀបចំបង្កើតជាកន្លែងលេង បណ្ណាល័យកុមារចល័ត ដែលអាចឱ្យកុមារគូរូប និងមើលសៀវភៅនិទានរឿងផ្សេងៗ ដើម្បីឱ្យពួកគេមានអារម្មណ៍ស្រស់ស្រាយ និងសប្បាយចិត្ត និងចាត់ទុកមន្ទីរពេទ្យដូចជានៅផ្ទះ ឬនៅសាលារៀនដែរ ព្រោះថាការព្យាបាលជំងឺ មិនមែនប្រើតែថ្នាំពេទ្យតែមួយមុខនោះទេ គឺយើងត្រូវផ្តល់អាហារដែលមានជីវជាតិគ្រប់គ្រាន់ និងបញ្ហាផ្លូវចិត្ត និងអារម្មណ៍របស់កុមារផងដែរ។សូមបញ្ជាក់ផងដែរថា យុទ្ធនាការអាហារូបត្ថម្ភនេះ មានផ្តល់ជូនការប្រឹក្សាពីស្ថានភាពអាហារូបត្ថម្ភ និងការលូតលាស់ដល់កុមារ ដោយឥតគិតថ្លៃ និងមានការតាំងពិព័រណ៍ពីការចម្អិនអាហារដែលផ្តល់សុខភាពល្អដល់កុមាររបស់ផ្នែកអាហារូបត្ថម្ភ និងពីសំណាក់ដៃគូសហការនានា៕អត្ថបទ រដ្ឋា

សម្តេចប្រធានរដ្ឋសភា គំាទ្រការរៀបចំវេទិកាសភាអាស៊ី-ប៉ាស៊ីហ្វិកលើកទី៩ ស្តីពីសុខភាពសកលនៅឆ្នាំ២០២៦ សហការរៀបចំដោយគណៈកម្មការទី៨សភាជាមួយWHO

ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី១ ខែ មេសាឆ្នាំ២០២៥ បានទទួលជួបពិភាក្សាការងារជាមួយ លោកស្រី ម៉ារីអានណា ទ្រីអាស (Marianna Trias) តំណាងអង្គការសុខភាពពិភពលោក (WHO) ប្រចាំនៅកម្ពុជា និងគណៈប្រតិភូ ដែលបានអញ្ជើញមកបំពេញទស្សនកិច្ចនៅកម្ពុជា ក្នុងការចូលរួមសិក្ខាសាលាសភាថ្នាក់តំបន់ស្តីពី«បម្រែបម្រួលប្រជាសាស្រ្ត និងជំងឺមិនឆ្លង៖ គោលនយោបាយឆ្លើយតបបញ្ហាប្រឈមសម្រាប់ប្រជាជនសកម្ម និងយុវជន» នៅវិមានរដ្ឋសភានៃព្រះរាជាណាចក្រកម្ពុជា កាលពីថ្ងៃទី៣១ខែមីនា ឆ្នាំ២០២៥ ។សម្តេចប្រធានរដ្ឋសភាបានថ្លែងអំណរគុណដល់អង្គការសុខភាពពិភពលោកសម្រាប់ការគាំទ្រដល់រាជរដ្ឋាភិបាលនិងរដ្ឋសភាកម្ពុជា ក្នុងការជំរុញវិស័យថែទាំសុខុមាលភាពប្រជាជនកម្ពុជា។ សម្តេចក៏បានកោតសរសើរចំពោះការខិតខំប្រឹងប្រែង របស់លោកជំទាវ ឡោក ខេង ប្រធានគណៈកម្មការទី៨នៃរដ្ឋសភា ក្នុងការលើកកម្ពស់ការយល់ដឹងជាសាធារណៈនិងការចូលរួមក្នុងការអភិវឌ្ឍន៍គោលនយោបាយព្រមទាំងការកសាងភាពជាដៃគូដើម្បីពង្រឹងវិស័យថែទាំសុខភាពរួមទាំងយុទ្ធនាការទប់ស្កាត់ជំងឺមិនឆ្លងនានា ក្នុងន័យថាការការពារគឺតែងតែប្រសើរជាងការព្យាបាល។ជាមួយគ្នានេះ សម្តេចបានវាយតម្លៃខ្ពស់ចំពោះគម្រោងរៀបចំវេទិកាសភាអាស៊ី-ប៉ាស៊ីហ្វិកលើកទី៩ ស្តីពីសុខភាពសកលនៅឆ្នាំ២០២៦ខាងមុខនេះ។ សម្តេចបានគូសបញ្ជាក់ថា៖«ខ្ញុំពិតជាមានសេចក្តីរីករាយដែលបានជ្រាបថា អង្គការសុខភាពពិភពលោកនឹងចូលរួមសហការជាមួយគណៈកម្មការទី៨រដ្ឋសភា ដើម្បីរៀបចំវេទិកាសភាអាស៊ី-ប៉ាស៊ីហ្វិកលើកទី៩ ស្តីពីសុខភាពសកល នាពេលខាងមុខនេះ»។ វេទិកាសភាអាស៊ី-ប៉ាស៊ីហ្វិកនេះ នឹងដើរតួនាទីជាវេទិកាដ៏មានសារៈសម្រាប់សមាជិកសភាក្នុងការផ្លាស់ប្តូរយោបល់ ការកសាងគោលនយោបាយ ការពង្រឹងសមត្ថភាពនិងការជំរុញកិច្ចសហប្រតិបត្តិការឆ្ពោះទៅរកសកម្មភាពសុខភាពប្រកបដោយចីរភាព។ សម្តេចរដ្ឋសភាធិបតី បានរំលេចថាសមាជិកសភា បានដើរតួនាទីយ៉ាងសំខាន់ ក្នុងការរៀបចំអនាគតវិស័យសុខាភិបាល តាមរយៈការអនុម័តច្បាប់ ការផ្តល់មូលនិធិ ការបែងចែកធនធាន ការធានានូវគណនេយ្យភាព និងតម្លាភាពរបស់រដ្ឋាភិបាល ដោយធ្វើការសម្របសម្រួលនូវកិច្ចខិតខំប្រឹងប្រែងសម្រាប់គោលដៅជាតិ និងសកល រួមទាំងការលើកកម្ពស់ការចូលរួមពីសាធារណជនក្នុងកិច្ចពិភាក្សា ស្ដីពីសុខភាព។សម្តេចមានជំនឿមុតមាំថា វេទិកានេះនឹងផ្តល់នូវឱកាស ក៏ដូចជាបរិយាកាសដ៏សមស្រប ហើយនិងបើកចំហទូលំទូលាយ ក្នុងការសហការគ្នាបង្កើតការធ្វើនវានុវត្តន៍ និងការបង្កើតដំណោះស្រាយ ដើម្បីបង្កើនប្រព័ន្ធថែទាំសុខភាព។លោកស្រី ម៉ារីអានណា ទ្រីអាស ថ្លែងអំណរគុណជ្រាល់ជ្រៅសម្តេចប្រធានរដ្ឋសភាដែលបានអនុញ្ញាតជូនលោកស្រីនិងគណៈប្រតិភូបានចូលជួបពិភាក្សាការងារនៅក្នុងឱកាសនេះ។ សម្តេចបានថ្លែងអំណរគុណដែលសភាកម្ពុជា បានយកចិត្តទុកដាក់ជាអាទិភាពលើសុខុមាលភាពប្រជាពលរដ្ឋ។ ជាមួយគ្នានេះ លោកស្រីបានថ្លែងការកោតសរសើរពីការរីកចម្រើនយ៉ាងឆាប់រហ័សរបស់កម្ពុជានាពេលបច្ចុប្បន្ន ធៀបទៅទសវត្សរ៍ឆ្នាំ៩០ ដែលលោកស្រីធ្លាប់បានមកបំពេញទស្សនកិច្ចនៅកម្ពុជានោះ។នៅក្នុងឱកាសនេះ លោកស្រីតំណាងអង្គការសុខភាពពិភពលោក ជម្រាបជូនសម្តេចពីគម្រោងនានាដែលWHO នឹងបន្តសហការជាមួយគណៈកម្មការទី៨រដ្ឋសភា ដើម្បីជួយលើការពង្រឹងប្រព័ន្ធសុខាភិបាលនិងសុខមាលភាពប្រជាពលរដ្ឋ។ លោកស្រី ម៉ារីអានណា ទ្រីអាស បានគូសបញ្ជាក់ថា ការថែរក្សាសុខភាពបឋម(Primary Health Care)នៅថ្នាក់មូលដ្ឋាន ជាការសំខាន់ ដូច្នេះការចូលរួមពីគ្រួសារនិងសហគមន៍ ដើរតូនាទីសំខាន់ នៅក្នុងការពង្រឹងប្រព័ន្ធសុខាភិបាល។ ចំណែកការប៉ះពាល់សុខភាពពីបម្រែបម្រួលអាកាសធាតុ ក៏ជារបៀបវារៈសំខាន់ ថ្មីរបស់WHO ផងដែរ។ បញ្ហាសុខភាពផ្លូវចិត្ត ក៏ជាបញ្ហាសាកល មួយកំពុងប្រឈមខ្លាំងណាស់ដែរចំពោះសុខភាពសាធារណៈ ដែលជាផ្នែកមួយនៃជំងឺមិនឆ្លងនោះ។លោកស្រីបានវាយតម្លៃខ្ពស់ចំពោះការចូលរួមរបស់សភាកម្ពុជា លើបញ្ហាសុខភាពហើយបានរៀបចំវេទិកាសិក្ខាសាលាសភាថ្នាក់តំបន់ស្តីពី«បម្រែបម្រួលប្រជាសាស្រ្ត និងជំងឺមិនឆ្លង៖ គោលនយោបាយឆ្លើយតបបញ្ហាប្រឈមសម្រាប់ប្រជាជនសកម្ម និងយុវជន » កាលពីថ្ងៃទី៣១ខែមីនា ទទួលបានជោគជ័យ ដោយមានការចូលរួមពីថ្នាក់ដឹកនាំជាច្រើនក្នុងកម្រិតជាតិនិងអន្តរជាតិ ចូលរួមផ្តល់យោបល់យ៉ាងផុសផុល ស្វែងរកមធ្យោបាយ រួមទាំងការទប់ស្កាត់ ការបង្ការ ជំងឺមិនឆ្លង(NCD)។ជាថ្មីម្តងទៀត សម្តេចប្រធានរដ្ឋសភា បានសម្តែងនូវជំនឿជឿជាក់យ៉ាងមុតមាំថា វេទិកាសភាអាស៊ី-ប៉ាស៊ីហ្វិក លើកទី៩ដែលនឹងប្រព្រឹត្តឡើងក្នុងពេលឆាប់ៗនេះ នឹងក្លាយជាព្រឹត្តិការណ៍ដ៏សំខាន់មួយ ក្នុងការពង្រឹងនូវកិច្ចសហប្រតិបត្តិការអន្ដរជាតិ និងភាពជាដៃគូពហុភាគី ក្នុងការដោះស្រាយបញ្ហាប្រឈមសុខភាពនានាប្រកបដោយនិរន្ដរភាព និងបរិយាបន្ន៕

សម្តេច ឃួន សុដារី សង្ឃឹមថា AFPPD នឹងពង្រីកវិសាលភាពការងារនៅកម្ពុជា ដើម្បីសុខុមាលភាពប្រជាពលរដ្ឋ

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃទី១ ខែ មេសា ឆ្នាំ២០២៥ បានទទួលជួបពិភាក្សាការងារជាមួយ លោកបណ្ឌិត ហ្វារ៉ូក អ៊ូសម៉ូនាវ (Farrukh Usmonov) នាយកប្រតិបត្តិនៃវេទិកាសមាជិកសភាអាស៊ីស្តីពីប្រជាជន និងការអភិវឌ្ឍ ដែលហៅកាត់ថា (AFPPD) នៅវិមានរដ្ឋសភា។ លោកបណ្ឌិត ហ្វារ៉ូក អ៊ូសម៉ូនាវ និងគណៈប្រតិភូ បានអញ្ជើញបំពេញទស្សនកិច្ចនៅកម្ពុជា ដើម្បីចូលរួមចែករំលែកបទពិសោធន៍ និងទស្សនៈ នៅក្នុងសិក្ខាសាលាសភាថ្នាក់តំបន់ស្តីពី «បម្រែបម្រួលប្រជាសាស្រ្ត និងជំងឺមិនឆ្លង៖ គោលនយោបាយឆ្លើយតបបញ្ហាប្រឈមសម្រាប់ប្រជាជនសកម្ម និងយុវជន » ដែលសភាកម្ពុជា បានរៀបចំធ្វើឡើង នៅវិមានរដ្ឋសភា កាលពីថ្ងៃទី៣១ ខែមីនា មិ្សលមិញនេះ។ សម្តេចប្រធានរដ្ឋសភា បានមានប្រសាសន៍ថា វត្តមានរបស់គណៈប្រតិភូវេទិកា AFPPD និងដៃគូអភិវឌ្ឍផ្សេងៗទៀតនៅក្នុងសិក្ខាសាលាសភាថ្នាក់តំបន់នេះ បានបង្ហាញច្បាស់ពីសារៈសំខាន់នៃកិច្ចសហប្រតិបត្តិការពហុភាគី ក្នុងការឆ្លើយតបចំពោះបញ្ហាប្រឈមនានាដែលកើតមាននៅក្នុងតំបន់ មិនត្រឹមអំពីបញ្ហាជំងឺមិនឆ្លងប៉ុណ្ណោះនោះទេ។ សម្តេចបានគូសបញ្ជាក់ថា វត្តមានដៃគូអភិវឌ្ឍន៍នានាក្នុងសិក្ខាសាលាជាការបង្ហាញនូវកិច្ចសហការរួមគ្នាធ្វើ រួមគ្នាគិត និងរួមគ្នាដោះស្រាយលើបញ្ហាអ្វីមួយ បញ្ហានោះប្រាកដជានឹងអាចដោះស្រាយបានជាមិនខាន។ លោកបណ្ឌិត ហ្វារ៉ូក អ៊ូសម៉ូនាវ បានថ្លែងអំណរគុណជ្រាលជ្រៅជូន សម្តេចប្រធានរដ្ឋសភាដែលបានចំណាយពេលវេលាដ៏មមាញឹកទទួលជួបលោកនិងគណៈប្រតិភូនៅក្នុងឱកាសនោះ។ លោកបណ្ឌិត បានវាយតម្លៃខ្ពស់អំពីការចូលរួមរបស់សភាកម្ពុជាក៏ដូចជាការអញ្ជើញជាអធិបតីដ៏ខ្ពង់ខ្ពស់របស់ សម្តេចប្រធានរដ្ឋសភា ក្នុងពិធីបើកសិក្ខាសលាសភាតំបន់ កាលពីម្សិលមិញ ដែលបង្ហាញពីការយកចិត្តទុកដាក់ខ្ពស់ចំពោះសុខុមាលភាពពលរដ្ឋពីសំណាក់សភាកម្ពុជា។ ជាមួយគ្នានេះ លោកបណ្ឌិត បានវាយតម្លៃខ្ពស់ចំពោះ ការរីកចម្រើនរបស់ប្រទេសកម្ពុជា នាពេលបច្ចុប្បន្នដែលមានការខុសគ្នាឆ្ងាយពីឆ្នាំ២០១២ ពេលដែលលោកបណ្ឌិត បានមកដល់កម្ពុជាជាលើកទី១នោះ។លោកបណ្ឌិត ហ្វារ៉ូក អ៊ូសម៉ូនាវ បានសន្យាថា AFPPD នឹងផ្តល់ការសហការគាំទ្រចំពោះសភាកម្ពុជាក្នុងបុព្វហេតុសុខុមាលភាពពលរដ្ឋធ្វើយ៉ាងណាឱ្យប្រជាជនមានសុខភាពល្អ ។ ជាក់ស្តែងនៅខែឧសភាខាងមុខនេះ នឹងមានវេទិកាទាក់ទងនឹងមនុស្សចាស់ ដែលប្រារព្ធធ្វើនៅកម្ពុជាផងដែរ។ ព្រឹត្តិការណ៍នេះ បានកើតចេញពីកិច្ចសហប្រតិបត្តិការល្អ រវាង AFPPD និងសភាកម្ពុជា ដែលមានគណៈកម្មការទី៨ជាសេនាធិការនោះដែរ។ សម្តេចរដ្ឋសភាធិបតី បានថ្លែងការកោតសរសើរថា ក្នុងរយៈពេលកន្លងមកនេះ AFPPD បានធ្វើការយ៉ាងសកម្ម និងបានរួមវិភាគទានដ៏មានតម្លៃដល់ការងារប្រជាជន និងការអភិវឌ្ឍ តាមរយៈការផ្តល់ឱកាសឱ្យសមាជិកសភាពីក្នុងតំបន់អាស៊ី បានជួបជជែក ពិភាក្សា និងផ្លាស់ប្តូរយោបល់គ្នា សំដៅដោះស្រាយបញ្ហាប្រឈមនានាក្នុងតំបន់ ជាពិសេស បញ្ហាសុខភាព យេនឌ័រ ការលើកកម្ពស់ស្រ្តី និងក្មេងស្រី បញ្ហាយុវជន និងបញ្ហាមនុស្សចាស់ជរា ជាដើម។ បន្ថែមពីនេះ AFPPD ក៏តែងបានគាំទ្រ និងធ្វើកិច្ចសហការយ៉ាងជិតស្និទ្ធជាមួយរដ្ឋសភាកម្ពុជា តាំងពីនីតិកាលមុនៗ រហូតដល់បច្ចុប្បន្ន។ ជាក់ស្តែង លោកជំទាវ ឡោក ខេង ដែលមានវត្តមាននៅទីនេះស្រាប់ គឺជាសមាជិកាម្នាក់ដ៏សកម្មរបស់រដ្ឋសភាកម្ពុជា ដែលតែងបានចូលរួម និងសហការជាមួយ AFPPD ក្នុងនោះ លោកជំទាវក៏បានកាន់តួនាទីជាហេរញ្ញិក នៃវេទិកា AFPPD នេះថែមទៀតផង។រដ្ឋសភាកម្ពុជា សូមថ្លែងអំណរគុណយ៉ាងជ្រាលជ្រៅចំពោះវេទិកា (AFPPD) ដែលក្នុងរយៈពេលកន្លងមក បានជួយគាំទ្រ និងផ្តល់កិច្ចសហការជាមួយរដ្ឋសភាកម្ពុជា ក្នុងការលើកកម្ពស់វិស័យសុខភាពនិងសុខុមាលភាពសង្គម ជាពិសេសកិច្ចសហការរៀបចំវេទិកាសភាតំបន់ដ៏មានសារៈសំខាន់នាពេលនេះ។ សម្តេចរដ្ឋសភាធិបតី ឃួន សុដារី បានគូសបញ្ជាក់ថាវត្តមានរបស់ AFPPD នៅកម្ពុជា នឹងអាចជួយពង្រឹង និងពង្រីកវិសាលភាព ឥទ្ធិពលការងាររបស់ខ្លួន នៅក្នុងប្រទេសកម្ពុជា ក៏ដូចជានៅតំបន់មេគង្គ ដោយអាចប្រើប្រាស់ជាមជ្ឈមណ្ឌលមួយនៃកិច្ចសហប្រតិបត្តិការការងារ និងការតភ្ជាប់ បណ្តាញសម្រាប់តំបន់។ វេទិកានេះ នឹងដើរតួនាទីដ៏មានសារៈសំខាន់មួយ សម្រាប់សមាជិកសភាក្នុងការផ្លាស់ប្តូរយោបល់ ទស្សនៈ ការកសាងឆន្ទៈនយោបាយ ការពង្រឹងសមត្ថភាព និងការជំរុញកិច្ចសហប្រតិបត្តិការ ឆ្ពោះទៅកសាងអនាគតកាន់តែប្រសើរ សម្រាប់តំបន់អាស៊ីរបស់យើង។“ខ្ញុំយល់ច្បាស់ថា តាមរយៈកិច្ចសហប្រតិបត្តិការអន្តរជាតិ និងការតភ្ជាប់ បណ្តាញ ការចែករំលែកចំណេះដឹង ជំនាញ និងការកសាងសមត្ថភាព យើងនឹងអាចលើកកម្ពស់គុណភាពជីវិត និងសុខុមាលភាពរបស់មនុស្សជាតិ ព្រមទាំងឈានទៅសម្រេចបាននូវគោលដៅអភិវឌ្ឍន៍ប្រកបដោយចីរភាព (SDGs) ជាមិនខាន។” នេះជាការគូសបញ្ជាក់របស់ សម្តេចរដ្ឋសភាធិបតី ឃួន សុដារី ៕

សង្ក្រាន្តសាលាមធ្យមវិចិត្រសិល្បៈចាប់ផ្តើមនៅថ្ងៃនេះ ជាមួយទស្សនីយភាពសិល្បៈវប្បធម៌ចម្រុះ

កម្មវិធីសង្រ្កាន្តសាលាមធ្យមវិចិត្រសិល្បៈ ចាប់ផ្តើមពីថ្ងៃទី១ និងទី២ ខែមេសានេះ ដោយមានការ សម្ដែងទស្សនីយភាពសិល្បៈវប្បធម៌ចម្រុះ និងការតាំងពិព័រណ៍។ ពិធីបើកកម្មវិធីនេះ បានរៀបចំធ្វើឡើង នៅព្រឹកថ្ងៃទី១ ខែមេសា នេះ ក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រ សួងវប្បធម៌ និងវិចិត្រសិល្បៈ ដោយមានអ្នកចូលរួមពីមន្រ្តីក្រសួងវប្បធម៌ និងវិចិត្រសិល្បៈ ព្រមទាំងសិស្សា នុសិស្សសាលាមធម្យវិចិត្រសិល្បៈ ។នៅក្នុងពិធីបើកកម្មវិធីសង្ក្រាន្តសាលាមធ្យមវិចិត្រសិល្បៈ លោកជំទាវរដ្ឋមន្រ្តីក្រសួងវប្បធម៌ និងវិចិត្រសិល្បៈ ភឿង សកុណា បានថ្លែងអំណរគុណចំពោះគំរូវីរៈរបស់អ្នកគ្រប់គ្រង និងលោកគ្រូអ្នកគ្រូ នៅសាលា មធ្យមវិចិត្រសិល្បៈ ដែលបានលៈបង់កម្លាំងកាយចិត្ត ក្នុងបណ្តុះបណ្តាលជំនាញសិល្បៈផ្សេងៗ នៅដល់យុវជនជំនាន់ក្រោយ។ លោកជំទាវ បានអំពាវនាវដល់ប្រជាពលរដ្ឋ ជាពិសេសយុវជនចូលរួម លេងល្បែងប្រជាប្រិយខ្មែរក្នុងឱកាសពិធីបុណ្យចូលឆ្នាំថ្មី ប្រពៃណីជាតិ ។លោក ហេង កំសាន្ត នាយកសាលាមធ្យមវិចិត្រសិល្បៈ បានប្រាប់BTVថា សង្ក្រាន្ត នៅសាលា មធ្យមវិចិត្រសិល្បៈ មានការសម្ដែងទស្សនីយភាពចម្រុះជាច្រើន ដូចជា ល្ខោនខោល ល្ខោនបាក់សាក់ ល្ខោននិយាយ លេងល្បែងប្រជាប្រិយ និងការប្រគំតន្រ្តីសម័យ ជាដើម។ លើសពីនេះ លោកបានអំពាវនាវ ដល់សាធារណជនអញ្ជើញចូលរួមលេងកម្សាន្តក្នុងសង្រ្កាន្តសាលាមធ្យមវិចិត្រសិល្បៈឲ្យបានច្រើនកុះករ។យុវជន បានបង្ហាញអារម្មណ៍រីករាយពេលបានចូលរួមក្នុងកម្មវិធីសង្រ្កាន្តសាលាមធ្យមវិចិត្រសិល្បៈ ដែលមានការរៀបចំតុបតែងលម្អយ៉ាងស្អាត ព្រមទាំងមានស្តង់លក់ម្ហូបអាហារផងដែរ ។ជាការកត់សម្គាល់ មុនពិធីបុណ្យចូលឆ្នាំថ្មី ប្រពៃណីជាតិ ចូលមកដល់ គេសង្កេតឃើញថា នៅតាម បណ្តាវត្តអារាម សាលារៀន ស្ថាប័នថ្នាក់ជាតិ ថ្នាក់ក្រោមជាតិ និងវិស័យឯកជននានា បានរៀបចំកម្មវិធី សង្ក្រាន្តយ៉ាងផុលផុស ដើម្បីអបអរពិធីបុណ្យចូលឆ្នាំថ្មី ប្រពៃណីជាតិ។ ជាក់ស្តែងដូចជាសាលាមធ្យមវិ ចិត្រសិល្បៈ ជាដើម៕ អត្ថបទ៖ សោភ័ណ

រថយន្ដក្រុងមួយគ្រឿង សង្ស័យអ្នកបើកបរងងុយដេករេចង្កូតបុកចូលផ្ទះប្រជាពលរដ្ឋ ទាំងកម្រោល ស្ថិតនៅស្រុកចុងកាល់

ឧត្តរមានជ័យ៖ រថយន្តក្រុងប្រភេទទេសចរ៤៥កៅអីមួយគ្រឿង របស់ក្រុមហ៊ុនធីវីរៈ បើកបរក្នុងល្បឿនលឿនរេចង្កូត បុកផ្ទះប្រជាពលរដ្ឋទាំងកម្រោល បានបង្កការភ្ញាក់ផ្អើលដល់អ្នកភូមិ ព្រមទាំងអ្នកធ្វើដំណើរមានការភ័យស្លន់ស្លោនាំគ្នារត់ចេញពីក្នុងឡាន។ហេតុការណ៍គ្រោះថ្នាក់ចរាចរណ៍នេះ បានកើតឡើងនៅលើផ្លូវជាតិលេខ៦៨ ស្ថិតនៅត្រង់ចំណុចភូមិ(ក) ខាងត្បូងផ្សារភូមិ(ក) ចម្ងាយ១០០ម៉ែត្រ ឃុំចុងកាល់ ស្រុកចុងកាល់ ខេត្តឧត្តរមានជ័យ កាលពីវេលាម៉ោង៦ជាង ថ្ងៃទី០១ខែមេសា ឆ្នាំ២០២៥នេះ។តាមប្រភពពីកន្លែងកើតហេតុបានឲ្យដឹងថាមុនដំបូងឡើយគាត់បានឃើញរថយន្តក្រុងពណ៌ស ខាងលើនេះ បើកបរពីទិសដៅពីត្បូងទៅជើង លុះមកដល់ចំណុចកើតហេតុទំនងជាតៃកុងឡានងោកមួយភាំង ក៏បានរេចង្កូតធ្លាក់ផ្លូវ ឆ្ពោះទៅមុខបុកចូលផ្ទះប្រជាពលរដ្ឋ ទាំងកម្រោលតែម្ដង ។យោងតាមសាក្សីនៅទីតាំងកើតហេតុផ្ទាល់ បានអះអាងបន្តថា ឡានក្រុងពណ៌ស ដែលបុកចូលផ្ទះប្រជាពលរដ្ឋនេះដែរ ត្រូវគេស្គាល់ថា ជាក្រុមហ៊ុន (ធីវរៈដឹកអ្នកដំណើរមានទីតាំងស្ថិតនៅ ក្នុងក្រុងសំរោង ខេត្តឧត្តរមានជ័យ)។ករណីនេះ សមត្ថកិច្ចមូលដ្ឋាននៅកន្លែងកើតហេតុ បានឲ្យដឹងថា ចំពោះករណីនេះពុំមានបង្កគ្រោះថ្នាក់ដល់មនុស្ស និងអ្នកធ្វើដំណើរអ្វីនោះឡើយគ្រាន់តែខូចខាត សម្ភារៈ របស់អ្នកផ្ទះបន្តិចបន្តួចតែប៉ុណ្ណោះ ។សូមបញ្ជាក់ថា ភា្លមៗនោះដែរក្រោយកើតហេតុរួច ខាងក្រុមហ៊ុនឡានក្រុងបានព្រមសងសំណងទៅដល់ម្ចាស់ផ្ទះ និងបានហៅរថយន្តស្ទូច ដើម្បីស្ទូចយកទៅខេត្តសៀមរាបភ្លាមៗ នៅព្រឹកនេះវិញផងដែរ៕

សម្តេចធិបតី និងលោកជំទាវបណ្ឌិត ចូលរួមបច្ច័យ ១ម៉ឺនដុល្លារជូនក្រុមគ្រួសារ និងរៀបចំពិធីបុណ្យសពលោក មាស សាវ៉ាង ដែលទទួលមរណភាពដោយសារការរញ្ជួយដី ក្នុងប្រទេសថៃ

ស្ថិតនៅក្នុងបរិយាកាសដ៏ក្រៀមក្រំនាព្រឹកថ្ងៃទី១ ខែមេសា ឆ្នាំ២០២៥ នេះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ តំណាងដ៏ខ្ពង់ខ្ពស់ សម្តេចបវរធិបតី នាយករដ្ឋមន្ត្រី និងលោកជំទាវបណ្ឌិត រួមជាមួយនឹងរដ្ឋបាលខេត្តបន្ទាយមានជ័យ បានពាំនាំសាររំលែកទុក្ខរបស់រាជរដ្ឋាភិបាល ជូនចំពោះលោក សែ វិត និងលោកស្រី ភិន រី ជាឪពុកម្តាយនៃសព ព្រមទាំងក្រុមគ្រួសារ ស្ថិតនៅក្នុងភូមិបាល័ង្គ ឃុំតាគង់ ស្រុកម៉ាឡៃ ខេត្តបន្ទាយមានជ័យ ចំពោះការបាត់បង់កូនជាទីស្រឡាញ់ ដែលបានលាចាកលោក និងលាចាកពីក្រុមគ្រួសារ ដោយសារការរញ្ជួយដីក្នុងប្រទេសថៃ កាលពីថ្ងៃទី២៨ ខែមីនា ឆ្នាំ២០២៥ ខណៈកំពុងស្នាក់នៅ និងធ្វើការនៅប្រទេសថៃ ដែលជាហេតុការណ៍ពោរពេញដោយភាពក្តុកក្តួលរន្ធត់ចិត្តជាពន់ពេក ។ នៅក្នុងឱកាសនោះដែរ ឯកឧត្តមរដ្ឋមន្ត្រី ក៏បាននាំយកបច្ច័យរបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ចំនួន ១ម៉ឺនដុល្លារ ជូនក្រុមគ្រួសារនៃសព រួមទាំងថវិការបស់ក្រសួងការងារ និងបណ្តុះបណ្តាលវិជ្ជាជីវៈ ចំនួន ២០លានរៀល, ថវិការបស់ឯកឧត្តមអភិបាលខេត្ត ចំនួន ២លានរៀល, ថវិការបស់ក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជានៅទ្វីបអាស៊ីខាងកើត និងអាគ្នេយ៍ (ESEA) ចំនួន ១៥លានរៀល ព្រមទាំងថវិការបស់សមាគមភ្នាក់ងារជ្រើសរើសពលករកម្ពុជា (ACRA) ១៥លានរៀល ផងដែរ។ សូមឧទ្ទិសបួងសួងដល់ដួងវិញ្ញាណក្ខន្ធ លោក មាស សាវ៉ាង សូមបានទៅកាន់សុគតិភពកុំបីឃ្លៀងឃ្លាតឡើយ៕

បណ្ដាញសង្គម

ព័ត៌មានថ្មីៗ

អារ៉ាប់រួម រិះគន់ការសម្រុកចូលបរិវេណវិហារអ៊ីស្លាម Al-Aqsa ដោយក្រុមអ្នកតាំងលំនៅឋានអ៊ីស្រាអែល

អាមេរិក និងអ៊ីរ៉ង់ បាញ់ផ្លោងដាក់គ្នាជាថ្មីទៀតលើគោលដៅរៀងៗខ្លួន ខណៈនៅតែពុំទាន់រកឃើញចំណុចបញ្ចប់សង្គ្រាមបាន

សហរដ្ឋអាមេរិក៖ បម្រាមលើការដឹកជញ្ជូនបន្ទះអេឡិចត្រូនិក AI អនុវត្តចំពោះក្រុមហ៊ុនចិននៅខាងក្រៅប្រទេសចិន

មន្ត្រីអាមេរិក៖ អាមេរិកស្នើផែនការដើម្បីបន្ធូរបន្ថយភាពតានតឹងនៅប្រទេសលីបង់

ប្រភពការទូត៖ ការឈ្លានពាននៅលីបង់របស់អ៊ីស្រាអែល «ធ្វើឱ្យប៉ះពាល់ដល់លទ្ធភាព» នៃដំណោះស្រាយ

អ៊ីរ៉ង់និយាយថា មិនទុកចិត្តសហរដ្ឋអាមេរិកទេ ខណៈលោក Trump រឹតបន្តឹងលក្ខខណ្ឌ

ចិនល្បាតដែនទឹកភាគខាងកើតកោះតៃវ៉ាន់ ដើម្បីឆ្លើយតបទៅនឹងការចរចាព្រំដែនសមុទ្រជប៉ុន និងហ្វីលីពីន

Jonas Vingegaard គ្រងជើងឯកប្រណាំងកង់ Grand Tour លើកទីបួនក្រោយឈ្នះ Giro d’Italia

ភ្នំពេញក្រោនរក្សាកំណត់ត្រាល្អការប្រកួតលីគបាល់ទាត់នារី គ្រាសៀមរាប និងបឹងកេតឈ្នះរៀងៗខ្លួន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877