BTV NEWS

កម្ពុជាអំពាវនាវឱ្យថៃ គោរពឱ្យបានខ្ជាប់ខ្ជួន ប្រកបដោយសុច្ឆន្ទៈ និងភាពស្មោះត្រង់នូវបទឈប់បាញ់ ដើម្បីឆ្ពោះទៅការធ្វើឱ្យប្រសើរឡើងវិញ ឆាប់រហ័សស្ថានភាពនៅតាមព្រំដែន

នគរបាលជាតិបង្ក្រាបទីតាំងប្រព្រឹត្តិបទល្មើសអនឡាញ រួមទាំងស្កេម នៅកាស៊ីណូ ខេត្តស្វាយរៀង ឃាត់ខ្លួនជនពាក់ព័ន្ធ១០៧នាក់

[TOP STORY] សម្ដេចធិបតី ចេញបទបញ្ជាឲ្យស្រាវជ្រាវបណ្ដាញលួចនាំប្រេងខុសច្បាប់ពីថៃ ចូលមកកម្ពុជា បើមានមន្ដ្រីពាក់ព័ន្ធត្រូវបញ្ចប់តួនាទី និងបណ្ដេញចេញពីក្របខណ្ឌ

លោកជំទាវ ហ៊ុន ម៉ាណា អញ្ជើញជាអធិបតីក្នុងពិធីសូត្រមន្តចម្រើនព្រះបរិត្ត ប្រសិទ្ធិពរជ័យ សិរីមង្គលសាទរឆ្នាំថ្មីប្រពៃណីជាតិខ្មែរ ក្រុមហ៊ុន អ័រគីដេ ឌីវែឡុបម៉ិន

ព័ត៌មានជាតិ

មជ្ឈមណ្ឌលបណ្តុះធុរកិច្ចថ្មីតេជោ បើកដំណើរការកម្មវិធីពន្លឿនអាជីវកម្មថ្នាលឌីជីថលរដូវកាលទី៥

មជ្ឈមណ្ឌលបណ្តុះធុរកិច្ចថ្មីតេជោ បើកដំណើរការជាផ្លូវការ នៃកម្មវិធីពន្លឿនអាជីវកម្មថ្នាលឌីជីថលរដូវកាលទី៥ ដើម្បីជ្រើសរើស ធុរកិច្ចថ្មីឆ្នើមចំនួន៥ ដែលនឹងមានឱកាសប្រកួតប្រជែងទទួលបានថវិកាគាំទ្រជាទុនឧបត្ថម្ភ ដែលមិនយកភាគហ៊ុនសរុបចំនួន ១២០ លានរៀល។ ឯកឧត្តមបណ្ឌិត តាំង ងួនលី នាយកប្រតិបត្តិមជ្ឈមណ្ឌលបណ្តុះធុរកិច្ចថ្មី “តេជោ” លើកឡើងនៅក្នុងពិធីបើកដំណើរការជា ផ្លូវការ នៃកម្មវិធីពន្លឿនអាជីវកម្ម ថ្នាលឌីជីថលរដូវកាលទី៥” នៅថ្ងៃទី៣០ ខែមីនា ឆ្នាំ២០២៦ ថា ធុរកិច្ចថ្មីមិនមែនគ្រាន់តែជាផ្នែក តូចមួយនៃសេដ្ឋកិច្ចប៉ុណ្ណោះទេ ប៉ុន្តែជាផ្នែកសំខាន់មួយនៃអនាគតសេដ្ឋកិច្ច។ ធុរកិច្ចថ្មីនាំមកនូវគំនិតច្នៃប្រឌិតគំរូអាជីវកម្មថ្មី និង បច្ចេកវិទ្យាថ្មី ដើម្បីដោះស្រាយបញ្ហាជាក់ស្តែងជូនប្រជាពលរដ្ឋស្ថាប័ន និងទីផ្សារ។ ឯកឧត្តមបណ្ឌិត បានគូសរំលេចពីសមិទ្ធផលក្នុងរយៈពេល៥ឆ្នាំកន្លងមក ដែលមជ្ឈមណ្ឌលបណ្តុះធុរកិច្ចថ្មី “តេជោ” បាន ពន្លឿនអាជីវកម្មគាំទ្រធុរកិច្ចថ្មីសរុបចំនួន៨១ ក្នុងនោះធុរកិច្ចថ្មីចំនួន ៥១ (ស្មើ៦៣%) នៅតែបន្តប្រតិបត្តិការយ៉ាងសកម្មក្នុងទីផ្សារ។ កម្មវិធីបានផ្តល់ទុនវិនិយោគដែលមិនយកភាគហ៊ុនសរុបចំនួន ៣២ ម៉ឺនដុល្លារ ទោះបីចំនួននេះមិនទាន់មានទំហំធំ ប៉ុន្តែបានរួម ចំណែកក្នុងការជំរុញធុរកិច្ចថ្មីក្នុងជំហានដំបូង។ ជាលទ្ធផល, រហូតមកដល់បច្ចុប្បន្នមានធុរកិច្ចថ្មីចំនួន ១៧ អាចកៀរគរទុនវិនិយោគ បន្ថែមពីប្រភពផ្សេងៗទៀតបានដោយជោគជ័យ និងបានរំលេចផងដែរអំពីការរៀបចំយុទ្ធសាស្ត្រជាតិស្តីពីការអភិវឌ្ឍធុរកិច្ចថ្មី ដែល គ្រោងនឹងផ្សព្វផ្សាយជាផ្លូវការក្នុងឆ្នាំនេះ។ យុទ្ធសាស្ត្រជាតិនេះ នឹងផ្តោតលើយុទ្ធសាស្ត្រអាទិភាពចំនួន៥រួមមាន៖ ១. ការរៀបចំ លិខិតបទដ្ឋានគាំទ្រ, ២. ការបង្កើនលទ្ធភាពទទួលបានហិរញ្ញប្បទាន, ៣. ការបង្កើនចំនួនបុគ្គលមានទេពកោសល្យ, ៤. ការពង្រឹង សមត្ថភាព តួអង្គក្នុងប្រព័ន្ធអេកូឡូស៊ីធុរកិច្ចថ្មី, និង ៥. ការតភ្ជាប់បណ្តាញ និងការពង្រីកទីផ្សារ។ ឯកឧត្តមបណ្ឌិត បានផ្តល់នូវអនុសាសន៍ដ៏សំខាន់ៗថា “នៅពេលដែលនិយាយអំពីការអភិវឌ្ឍរបស់ធុរកិច្ចថ្មីនៅកម្ពុជា គឺមិន ត្រឹមតែផ្តោតលើនវានុវត្តន៍សម្រាប់ទីផ្សារថ្មីនោះទេ តែក៏សំដៅទៅលើនវានុវត្តន៍សម្រាប់ទីផ្សារដែលមានស្រាប់។ ធុរកិច្ចថ្មីកម្ពុជាអាច បង្កើតនូវគុណតម្លៃទីផ្សារ តាមរយៈការធ្វើទំនើបកម្មវិស័យប្រពៃណី, ការអភិវឌ្ឍសេវាកម្មសម្រាប់ជីវភាពប្រចាំថ្ងៃ, ការដោះស្រាយ បញ្ហាប្រសិទ្ធភាពក្នុងស្រុក និងការបើកឱ្យមានកាលានុវត្តភាពថ្មីៗនៅក្នុងវិស័យបច្ចុប្បន្ន។”សូមបញ្ជាក់ថា កម្មវិធីពន្លឿនអាជីវកម្មថ្នាលឌីជីថលរដូវកាលទី៥នេះ មានរយៈពេល១៨សប្តាហ៍ រៀបចំឡើងក្នុងគោលបំណងពង្រឹង សមត្ថភាពធុរកិច្ចថ្មី លើការអភិវឌ្ឍផលិតផល ឬសេវាកម្មឌីជីថលឱ្យឆ្លើយតប នឹងតម្រូវការទីផ្សារជាក់ស្តែង តាមរយៈការតម្រង់ទិសពី អ្នកជំនាញ ការកំណត់យុទ្ធសាស្ត្រទីផ្សារ ការត្រៀមខ្លួនសម្រាប់កៀរគរទុនវិនិយោគ និងការបង្កើតបរិយាកាសអំណោយផល សម្រាប់ ធុរកិច្ចថ្មី ក្នុងការផ្សារភ្ជាប់បណ្តាញទំនាក់ទំនងជាមួយដៃគូយុទ្ធសាស្ត្រនានា៕អត្ថបទ៖ សុន រ៉ាឌី

ឆ្មក់ចុះបង្ក្រាបទីតាំងលួចលាក់ប្រព្រឹត្តិ Online Scams នៅទីតាំងផ្ទះសំណាក់មួយកន្លែងក្នុងខណ្ឌសែនសុខ ឃាត់ខ្លួនជនបរទេសជាង ៥០នាក់

ភ្នំពេញ ៖ កម្លាំងគណៈបញ្ជាការឯកភាពរដ្ឋបាលរាជធានីភ្នំពេញ នៅវេលាម៉ោង២១ និង៣០នាទីយប់ថ្ងៃទី៣០ ខែមីនា ឆ្នាំ២០២៦ បានបន្តការឆ្មក់ចុះបង្ក្រាបទីតាំងលួចលាក់ប្រព្រឹត្តិ Online Scams នៅទីតាំងផ្ទះសំណាក់មួយកន្លែង ក្នុងខណ្ឌសែនសុខ ឃាត់ខ្លួនជនបរទេសជាង៥០នាក់ ។ ប្រតិបត្តិការនេះបានធ្វើឡើងក្រោមការបញ្ជាផ្ទាល់ពីលោក ឃួង ស្រេង ប្រធានគណៈបញ្ជាការឯកភាពរាជធានីភ្នំពេញ និងលោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ដឹកនាំការបង្ក្រាបផ្ទាល់ដោយលោកឧត្តមសេនីយ៍ទោ ប៊ុន សុសិក្ខា ស្នងការរងផែនការងារសន្តិសុខ និងក្រោមការសម្របសម្រួលពីតំណាងអយ្យការអមសាលាដំបូងរាជធានីភ្នំពេញផងដែរ ។ ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានប្រាប់ឲ្យដឹងថា ៖ នេះជាប្រតិបត្តិការស្រាវជ្រាវស៊ើបអង្កេតរបស់កម្លាំងសមត្ថកិច្ចជំនាញ ដោយបានរកឃើញថា ទីតាំងនេះ មានក្រុមឧក្រិដ្ឋជនកំពុងប្រព្រឹត្តិបទល្មើសឆបោក Scams Online កម្លាំងសមត្ថកិច្ចបានបើកការចុះបង្ក្រាបភ្លាមតែម្តង ដោយក្រុមទាំងនេះ បានជួលទីតាំងផ្ទះសំណាក់ដើម្បីជ្រកកោន។ ក្នុងការបង្ក្រាបកម្លាំងអាជ្ញាធរ បានឃាត់ជនបរទេសសរុបជាង៥០នាក់ និងបានដកហូតសម្ភារ និងវត្ថុតាងពាក់ព័ន្ធមួយចំនួនធំទៀតផងដែរ ។ បច្ចុប្បន្ន ជនសង្ស័យទាំងអស់ ត្រូវបានបញ្ចូនខ្លួនទៅកាន់ស្នងការដ្ឋាននគរបាលរាជធានីភ្នំពេញ រងចាំចាត់វិធានការទៅតាមនីតិវិធីច្បាប់ ៕ អត្ថបទ៖ កុម្ភៈ

ឯកអគ្គរាជទូតកម្ពុជាប្រចាំប្រទេសជប៉ុន កោតសរសើរយ៉ាងខ្លាំងចំពោះឯកភាព សាមគ្គីភាព និងការចូលរួមយ៉ាងសកម្មរបស់និស្សិតខ្មែរនៅប្រទេសជប៉ុន

ឯកឧត្តម ជុំ សុន្ទរី ឯកអគ្គរាជទូតតែងតាំងនៃព្រះរាជាណាចក្រកម្ពុជាប្រចាំប្រទេសជប៉ុន បានកោតសរសើរយ៉ាងខ្លាំងចំពោះឯកភាព សាមគ្គីភាព និងការចូលរួមយ៉ាង សកម្មរបស់និស្សិតខ្មែរនៅប្រទេសជប៉ុន។ ឯកឧត្តម លើកឡើងអំពីការចូលរួមចំណែករបស់និស្សិតខ្មែរក្នុង ការលើកកម្ពស់មុខមាត់កម្ពុជានៅក្រៅប្រទេស និងការពង្រឹងចំណងមិត្តភាពរវាងប្រជាជនកម្ពុជា និង ជប៉ុន។ កសរកោតសរសើរនេះ ក្នុងជំនួនសម្តែងការគួរសមពីគណៈកម្មការនៃសមាគមនិស្សិតកម្ពុជា នៅប្រទេសជប៉ុន នៅស្ថានទូតកម្ពុជាប្រចាំទីក្រុងតូក្យូ កាលពីថ្ងៃទី៣០ ខែមីនា ឆ្នាំ២០២៦ ។ក្នុងជំនួប កញ្ញា តែ ម៉ីលី ប្រធានសមាគមនិស្សិតខ្មែរ បានពាំនាំនូវការស្វាគមន៍យ៉ាងកក់ក្តៅ និងការអបអរ សាទរជូនចំពោះ ឯកឧត្តមឯកអគ្គរាជទូត ក្នុងឱកាសដែលឯកឧត្តមអញ្ជើញមកបំពេញការងារនៅប្រទេស ជប៉ុន។ កញ្ញា ក៏បានសម្តែងការកោតសរសើរចំពោះការបន្តយកចិត្តទុកដាក់ និងការគាំទ្រជាបន្តបន្ទាប់របស់ រាជរដ្ឋាភិបាលកម្ពុជានិងស្ថានឯកអគ្គរាជទូតកម្ពុជា ចំពោះនិស្សិតកម្ពុជាដែលកំពុងសិក្សានៅប្រទេសជប៉ុន។គណៈកម្មការបានជម្រាបជូន ឯកឧត្តមឯកអគ្គរាជទូត ដោយសង្ខេប អំពីសកម្មភាពរបស់សមាគមដែល មានគោលដៅលើកកម្ពស់សាមគ្គីភាពក្នុងចំណោមនិស្សិតកម្ពុជា ការថែរក្សាវប្បធម៌និងប្រពៃណីខ្មែរ និង ការគាំទ្រដល់និស្សិតដែលរស់នៅក្នុងប្រទេសជប៉ុន។ គណៈកម្មការបានជម្រាបជូនផងដែរអំពីបច្ចុប្បន្នភាព នៃកិច្ចខិតខំប្រឹងប្រែងរបស់សមាគមក្នុងការកៀរគរការចូលរួម និងការផ្តល់ការគាំទ្រដល់និស្សិតដែលត្រូវការ ជំនួយ រួមទាំងគំនិតផ្តួចផ្តើមនានាពាក់ព័ន្ធនឹងសុខុមាលភាពសង្គម និងជំនួយមនុស្សធម៌។ ឯកឧត្តមឯកអគ្គរាជទូត បានកោតសរសើរយ៉ាងខ្លាំងចំពោះឯកភាព សាមគ្គីភាព និងការចូលរួមយ៉ាង សកម្មរបស់និស្សិតខ្មែរនៅប្រទេសជប៉ុន។ ឯកឧត្តម លើកឡើងអំពីការចូលរួមចំណែករបស់និស្សិតខ្មែរក្នុង ការលើកកម្ពស់មុខមាត់កម្ពុជានៅក្រៅប្រទេស និងការពង្រឹងចំណងមិត្តភាពរវាងប្រជាជនកម្ពុជា និង ជប៉ុន។ ឯកឧត្តមឯកអគ្គរាជទូត បានបញ្ជាក់ជាថ្មីអំពីការត្រៀមខ្លួនរបស់ស្ថានទូតក្នុងការបន្តគាំទ្រដល់ និស្សិតខ្មែរ ដើម្បីលើកកម្ពស់សុខុមាលភាព និងសកម្មភាពរបស់ពួកគេបន្ថែមទៀត។ ឯកឧត្តមឯកអគ្គរាជទូត និងគណៈកម្មការបានផ្លាស់ប្តូរទស្សនៈជុំវិញការពង្រឹងកិច្ចសហប្រតិបត្តិការ លើក កម្ពស់សកម្មភាពវប្បធម៌និងសង្គម និងចូលរួមចំណែកបន្ថែមទៀតដល់ការអភិវឌ្ឍទំនាក់ទំនងកម្ពុជា-ជប៉ុន។

ទិដ្ឋភាពកម្មវិធីជួបជុំរបស់បងប្អូនជនភៀសសឹក នៅវត្តពើងអង្កាម (បាក់កាំ) ស្រុកត្បែងមានជ័យ ខេត្តព្រះវិហារ

ក្រុមគ្រួសារសហភាពសហព័ន្ធយុវជនកម្ពុជាបានបន្តទៅចូលរួមកម្មវិធីជួបជុំក្នុងឱកាសការខិតចូលមកដល់នៃពិធីបុណ្យចូលឆ្នាំថ្មីប្រពៃណីជាតិ ជាមួយលោកយាយលោកតា អ៊ុពូមីង បងប្អូន និងកូនៗនៅខេត្តព្រះវិហារ ដែលរួមមាន ពិធីសូត្រមន្ត ការប្រគុំភ្លេងរាំចង្វាក់ប្រជាប្រិយ ការលេងល្បែងប្រជាប្រិយ ព្រមទាំងពិសារអាហារសាមគ្គីយ៉ាងកក់ក្តៅជាទីបំផុត។

សម្តេចធិបតី បញ្ជាឲ្យស្វែងរកចាប់ខ្លួនអ្នកបើកបររថយន្តពិតប្រាកដ ដែលបុកមនុស្សស្លាប់ទាំង៦នាក់ នៅស្រុកមោងឫស្សី យកមកផ្តន្ទាទោសឲ្យខាងតែបាន

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានបញ្ជាឱ្យឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងឯកឧត្តម ស ថេត អគ្គស្នងការនគរបាលជាតិ ត្រូវធ្វើការស្រាវជ្រាវឱ្យបានហ្មត់ចត់បំផុត និងស្វែងរកឱ្យឃើញអ្នកដែលបើកបររថយន្តពិតប្រាកដ ដែលបុកមនុស្សស្លាប់ទាំង៦នាក់ នៅស្រុកមោងឫស្សី ខេត្តបាត់ដំបង យកមកផ្តន្ទាទោសឲ្យខាតតែបាន ដើម្បីផ្ដល់ភាពយុត្តិធម៌ដល់ជនរងគ្រោះ។តាមរយៈបណ្តាញសង្គមហ្វេសបុក និងតេលេក្រាម នាព្រឹកថ្ងៃទី៣១ ខែមីនា ឆ្នាំ២០២៦នេះ សម្តេចធិបតី នាយករដ្ឋមន្រ្តី បានគូសបញ្ជាក់ថា សម្តេចបានឃើញមានការបញ្ចេញមតិជាច្រើនពាក់ព័ន្ធជាមួយនឹងគ្រោះថ្នាក់ចរាចរណ៍ដ៏រន្ធត់មួយដែលកើតឡោះងនៅយប់ថ្ងៃទី២៧ ខែមីនា ឆ្នាំ២០២៦ នៅស្រុកមោងឬស្សី ខេត្តបាត់ដំបង ដែលមនុស្សចំនួន៦នាក់ត្រូវបានស្លាប់ រួមទាំងទារកនៅក្នុងផ្ទៃមាតាផងដែរ ដែលបង្កឡើងដោយរថយន្តមួយគ្រឿងបុកពួកគាត់ហើយរត់គេចខ្លួនបាត់។ ជាមួយនឹងការសម្តែងការសោកស្តាយដល់ជនរងគ្រោះ មានបងប្អូនមួយចំនួនក៏បានសម្តែងការព្រួយបារម្ភ អំពីការដែលអ្នកប្រព្រឹត្តិអាចមិនត្រូវបានទទួលទោស ដោយសារមានគ្រួសារជាមន្ត្រី។តាមរយៈសំណេរសម្តេចធិបតីនាយករដ្ឋមន្រ្តី ក៏បានផ្ញើសារសូមចូលរួមមរណ:ទុក្ខជាមួយនឹងក្រុមគ្រួសារសពនៃជនរងគ្រោះទាំង៦នាក់ និងសូមវិញាណក្ខន្ធអ្នកទាំងអស់គ្នាបានទៅកាន់សុខគតិភពកុំបីឃ្លាតឡើយផងដែរ។ ចំពោះការទទួលខុសត្រូវតាមផ្លូវច្បាប់ក្នុងករណីនេះ សម្តេចធិបតី«បានចេញបទបញ្ជាឱ្យឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងឯកឧត្តម ស ថេត អគ្គស្នងការនគរបាលជាតិត្រូវធ្វើការស្រាវជ្រាវឱ្យបានហ្មត់ចត់បំផុតនិងរកឱ្យឃើញអ្នកដែលបើកបររថយន្តពិតប្រាកដ ដែលបុកមនុស្សស្លាប់ទាំង៦នាក់នេះ ហើយអនុវត្តច្បាប់ឱ្យបានម៉ឺងម៉ាត់ ដើម្បីផ្ដល់ភាពយុត្តិធម៌ដល់ជនរងគ្រោះ»។ ជាមួយគ្នានេះដែរ សម្តេចធិបតីនាយករដ្ឋមន្រ្តីក៏សូមអំពាវនាវបងប្អូនប្រជាពលរដ្ឋយើងធ្វើការបើកបរដោយប្រុងប្រយ័ត្នខ្ពស់ និងគោរពច្បាប់ចរាចរណ៍ផ្លូវគោក ឱ្យបានម៉ឺងម៉ាត់ ជាពិសេសក្នុងអំឡុងពេលបុណ្យចូលឆ្នាំប្រពៃណីជាតិខ្មែរនៅពេលខាងមុខតែម្តង។ សម្តេចធិបតី ក៏បានរំលឹកឡើងវិញផងដែរ ចំពោះការបើកបរដោយមិនគោរពច្បាប់ជាពិសេសការបើកបរដោយស្ថិតក្រោមស្ថានភាពស្រវឹង ដែលបានបង្កឱ្យមានគ្រោះថ្នាក់ ដល់អាយុជីវិតអ្នកដទៃ និងត្រូវទទួលខុសត្រូវតាមច្បាប់យ៉ាងតឹងរឹងបំផុត ដោយគ្មានការលើកលែង ដូចបានអនុវត្តនៅពេលកន្លងមក។ តាមរយៈសំណេរនេះដែរសម្តេចធិបតី បញ្ជាឲ្យគណ:បញ្ជាការឯកភាពរាជធានី-ខេត្ត ជាពិសេសសមត្ថកិច្ចពាក់ព័ន្ធទាំងអស់ត្រូវយកចិត្តទុកដាក់អនុវត្តបទបញ្ជារបស់រាជរដ្ឋាភិបាលឱ្យបានម៉ឺងម៉ាត់ ក្នុងការពង្រឹងសុវត្ថិភាពចរាចរណ៍ផ្លូវគោក ក្នុងឱកាសដែលបងប្អូនប្រជាជនខ្មែរនឹងត្រូវធ្វើដំណើរ ទៅស្រុកកំណើត ឬដំណើរកម្សាន្តពេលចូលឆ្នាំថ្មីប្រពៃណីជាតិខ្មែរ ដែលនឹងខិតជិតមកដល់នាពេលខាងមុខ នេះផងដែរ។ សូមបញ្ជាក់ ក្រោយមានគ្រោះថ្នាក់ចរាចរណ៍ដ៏រន្ធត់នៅស្រុកមោងឫស្សី កាលពីយប់ថ្ងៃទី២៧ កន្លង ទៅហើយបានបណ្តាលឲ្យមនុស្សក្មេងចាស់ ប្រុសស្រីបាត់បង់ជីវិតចំនួន៦នាក់នោះ ត្រូវបានមតិមហាជន រិះគន់យ៉ាងសម្បើម ដោយសារជនបង្កត្រូវបាន អាជ្ញាធរកំណត់មុខសញ្ញាបានហើយតែមិនទាន់ចាប់បាន ដើម្បីយកមកផ្តន្ទាទោសទៅតាមច្បាប់នោះ៕

ឃាត់ខ្លួនជនជាតិវៀតណាម ១៧នាក់ ក្នុងប្រតិបត្តិការឆែកឆេរអគារ MSK នៅទួលទំពូងពាក់ព័ន្ធករណី online scam

(ភ្នំពេញ)៖កម្លាំងជំនាញនៃគណៈបញ្ជាការឯកភាពរដ្ឋបាលរាជធានីភ្នំពេញ បានឃាត់ខ្លួនជនជាតិវៀតណាម ១៧នាក់ ក្នុងប្រតិបត្តិការឆែកឆេរអគារ MSK ស្ថិតក្នុងសង្កាត់ទួលទំពូងទី១ បន្ទាប់ពីមានការសង្ស័យថា លបលួចប្រព្រឹត្តិបទល្មើសឆបោកតាមប្រព័ន្ធបច្ចេកវិទ្យា។ ប្រតិបត្តិការបង្ក្រាបនេះ ធ្វើឡើងនៅថ្ងៃទី៣០ ខែមីនា ឆ្នាំ២០២៦ ក្រោមការបញ្ជាផ្ទាល់ពី ឯកឧត្តម ឃួង ស្រេង អភិបាលរាជធានីភ្នំពេញ និង ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ មានការចូលរួមពីអាជ្ញាធរខណ្ឌចំការមន និងដោយមានការសម្របសម្រួលនីតិវិធីពីលោក សេង រិទ្ធី ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។ក្រុមការងារបានពិនិត្យឃើញភាពមិនប្រក្រតីនៅជាន់ទី៧ និងជាន់ទី១០ ដោយបានឃាត់ខ្លួនមនុស្សសរុបចំនួន ១៧នាក់ (ស្រី្ត ០២នាក់) ជាជនជាតិវៀតណាម ដែលក្នុងនោះមាន ០៧នាក់ ពុំមានលិខិតឆ្លងដែនជាប់ខ្លួនឡើយ។ជាលទ្ធផលសមត្ថកិច្ចរកឃើញវត្ថុតាងដែលពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា រួមមានៈ ម៉ូនីទ័រចំនួន ៣០ គ្រឿង, ទូរសព្ទដៃ ចំនួន ៧៣ គ្រឿង , កុំព្យូទ័រ All In One ចំនួន ០៦ គ្រឿង និងCPUចំនួន ២៧ គ្រឿង។សមត្ថកិច្ចជំនាញបានឱ្យដឹងថា ក្រុមនេះ បានធ្វើសកម្មភាពលោងលោមស្នេហា មានគោលដៅច្បាស់លាស់ក្នុងការ "ជំរិតទារប្រាក់ ឬគំរាមកំហែង" ដោយប្រើប្រាស់វីដេអូអាសអាភាសដែលលួចថតបាន ទៅផ្ញើឱ្យក្រុមគ្រួសារ ឬកន្លែងការងាររបស់ជនរងគ្រោះ ដើម្បីបង្ខូចកេរ្តិ៍ឈ្មោះ ប្រសិនបើមិនធ្វើតាមការទាមទាររបស់ពួកគេ។បច្ចុប្បន្ន មនុស្សទាំង ១៧នាក់ រួមនិងវត្ថុតាងទាំងអស់ ត្រូវបានប្រគល់ជូនស្នងការដ្ឋាននគរបាលរាជធានីភ្នំពេញដើម្បីបន្តការសាកសួរ និងកសាងសំណុំរឿងបញ្ជូនទៅកាន់តុលាការ តាមនីតិវិធីច្បាប់។ លេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) សូមជម្រាបថា យុទ្ធនាការបោសសម្អាត Online Scams នៅទូទាំងប្រទេស គិតចាប់ពីឆ្នាំ២០២៥ រហូតដល់សប្តាហ៍ទី២ ខែមីនា ឆ្នាំ២០២៦ សមត្ថកិច្ច និងអាជ្ញាធររាជធានី-ខេត្ត បានបង្ក្រាប និងបិទខ្ទប់ (Sealed) ទីតាំងសរុបចំនួន ២៣៦ កន្លែង។ ក្នុងនោះមានទីតាំងកាស៊ីណូ ៩១កន្លែង និងប្រភេទបុរី វីឡា ខុនដូ លំនៅឋាន ចំនួន ១៤៥កន្លែង។តាមរបាយការណ៍របស់ក្រសួងយុត្តិធម៌ ក្នុងរយៈពេល ៨ខែចុងក្រោយនេះ តុលាការកម្ពុជាបានអនុវត្តនីតិវិធីផ្លូវច្បាប់លើសំណុំរឿងពាក់ព័ន្ធនឹងការឆបោកអនឡាញសរុបចំនួន៧៩ សំណុំរឿង ដោយផ្តន្ទាទោសមេខ្លោង និងបក្ខពួកចំនួន ៦៩៧ នាក់ (មានច្រើនសញ្ជាតិ រួមទាំងសំណុំរឿងធំៗដូចជា ចេន ស៊ី និង លី គួង ជាដើម)។ អាជ្ញាធរកត់សម្គាល់ថា មានក្រុមមេខ្លោង និងអ្នកពាក់ព័ន្ធប្រមាណជាង ២២ម៉ឺននាក់ បានគេចខ្លួនចេញពីកម្ពុជា ទាំងតាមផ្លូវអាកាស និងផ្លូវគោក។សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានប្ដេជ្ញាចិត្តយ៉ាងមុតមាំក្នុងការបោសសម្អាតឱ្យអស់នូវបទល្មើសឆបោកតាមប្រព័ន្ធបច្ចេកវិទ្យាចេញពីកម្ពុជា ត្រឹមខែមេសា ឆ្នាំ២០២៦។ សម្តេចធិបតីបានបញ្ជាក់យ៉ាងច្បាស់ថា កម្ពុជាមិនមែនជាកន្លែងសម្រាប់ឧក្រិដ្ឋជនបច្ចេកវិទ្យាប្រើប្រាស់ក្នុងការប្រព្រឹត្តបទល្មើសឡើយ ហើយបុគ្គល ឬអង្គភាពណាដែលនៅពីក្រោយសកម្មភាពទាំងនេះ នឹងត្រូវប្រឈមមុខនឹងទោសទណ្ឌខ្ពស់បំផុត ដោយគ្មានការយោគយល់ ឬអន្តរាគមន៍ឡើយ៕

ក្រសួងការងារ បើកសិក្ខាសាលាពិគ្រោះយោបល់ត្រីភាគី វាយតម្លៃការអនុវត្តផែនការមេលើកទី៣ ស្តីពីសុវត្ថិភាព និងសុខភាពការងារឆ្នាំ២០២៣-២០២៧

(ភ្នំពេញ)៖ នៅព្រឹកថ្ងៃចន្ទ ទី៣០ ខែមីនា ឆ្នាំ២០២៦ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ តំណាងដ៏ខ្ពស់ខ្ពង់របស់ឯកឧត្តម ហេង សួរ រដ្ឋមន្ត្រី ក្រសួងការងារ និងបណ្តុះបណ្តាលវិជ្ជាជីវៈបានអញ្ជើញជាអធិបតីក្នុងសិក្ខាសាលាពិគ្រោះយោបល់ត្រីភាគី ដើម្បីវាយតម្លៃលទ្ធផលពាក់កណ្តាលអាណត្តិនៃការអនុវត្តផែនការមេលើកទី៣ ស្តីពីសុវត្ថិភាព និងសុខភាពការងារ ឆ្នាំ២០២៣-២០២៧។ កម្មវិធីនេះត្រូវបានរៀបចំឡើងតាមប្រព័ន្ធនិម្មិត ZOOM ដោយមានការចូលរួមពីគ្រប់ភាគីពាក់ព័ន្ធទាំងអស់រួមមាន ក្រសួង ស្ថាប័ន អង្គការ និងដៃគូអភិវឌ្ឍន៍ ជាពិសេសសមាគមនិយោជក និងអង្គការវិជ្ជាជីវៈរបស់កម្មករនិយោជិត។ថ្លែងក្នុងឱកាសនេះ លោកជំទាវរដ្ឋលេខាធិការប្រចាំការ បានគូសបញ្ជាក់ថា សិក្ខាសាលានាពេលនេះមានសារៈសំខាន់បំផុតក្នុងការតាមដាន និងបូកសរុបលទ្ធផលការងារដែលបានអនុវត្តអស់រយៈពេល ៣ឆ្នាំកន្លងមក ក៏ដូចជាការប្រមូលធាតុចូលដើម្បីដោះស្រាយបញ្ហាប្រឈមនានាឱ្យកាន់តែមានប្រសិទ្ធភាព។ ការងារសុវត្ថិភាព និងសុខភាពការងារនេះ គឺជាផ្នែកមួយមិនអាចខ្វះបាននៃ «យុទ្ធសាស្ត្របញ្ចកោណ ដំណាក់កាលទី១» របស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលផ្តល់អាទិភាពលើការអភិវឌ្ឍធនធានមនុស្ស និងការលើកកម្ពស់លក្ខខណ្ឌការងារឱ្យកាន់តែប្រសើរឡើង សំដៅប្រែក្លាយកម្ពុជាជាប្រទេសមានចំណូលកម្រិតខ្ពស់នៅឆ្នាំ២០៥០។ក្នុងស្មារតីជំរុញការអនុវត្តផែនការមេលើកទី៣ លោកជំទាវបានលើកឡើងពីយុទ្ធសាស្ត្រគន្លឹះចំនួន ៦ ដែលក្រសួងកំពុងយកចិត្តទុកដាក់ ដោយក្នុងនោះរួមមាន ការរៀបចំក្របខ័ណ្ឌច្បាប់ និងគោលនយោបាយឱ្យស្របតាមបទដ្ឋានអន្តរជាតិ ការបង្កើតហេដ្ឋារចនាសម្ព័ន្ធគ្រប់គ្រងទាំងថ្នាក់ជាតិ និងសហគ្រាស ការពង្រឹងការអនុវត្តច្បាប់តាមរយៈអធិការកិច្ចការងារ ការបង្កើនកិច្ចសហការរវាងនិយោជកនិងកម្មករនិយោជិត ការលើកកម្ពស់បរិយាកាសការងារក្នុងសហគ្រាសខ្នាតតូចនិងមធ្យម និងការលុបបំបាត់ពលកម្មកុមារ ព្រមទាំងការបង្ការជំងឺផ្សេងៗនៅកន្លែងធ្វើការ។ លោកជំទាវបានមានប្រសាសន៍បន្ថែមថា ក្រសួងកំពុងពន្លឿនការកសាងសេចក្តីព្រាងច្បាប់ស្តីពីសុវត្ថិភាព និងសុខភាពការងារ ក្រោមការជួយជ្រោមជ្រែងពីជំនាញការនៃសាធារណរដ្ឋកូរ៉េ និងអង្គការ ILO ដើម្បីធានាបាននូវបរិយាកាសការងារល្អ និងបង្កើនផលិតភាពការងារ។ ក្រៅពីការរៀបចំច្បាប់ ក្រសួងក៏បានដាក់ចេញនូវកម្មវិធីគាំទ្រជាក់ស្តែងជាច្រើនដើម្បីដោះស្រាយបញ្ហាឱ្យដល់មូលដ្ឋាន។ ជាមួយគ្នានេះ លោកជំទាវ បានរំលេចនូវយន្តការប្រកួតប្រជែងពានរង្វាន់ «សហគ្រាសមួយជាសហគមន៍សុខសាន្តមួយ» និងកម្មវិធីកែលម្អរបៀបធ្វើការជាច្រើនទៀតដូចជា កម្មវិធី WISH សម្រាប់អ្នកធ្វើការតាមផ្ទះ កម្មវិធី WISE សម្រាប់សហគ្រាស កម្មវិធី WIND សម្រាប់តាមភូមិដ្ឋាន និងកម្មវិធីដទៃទៀតដែលគ្របដណ្តប់ទាំងផ្នែកសំណង់ យុវជន និងការគ្រប់គ្រងកាកសំណល់។ កម្មវិធីទាំងនេះត្រូវបានរៀបចំឡើងយ៉ាងយកចិត្តទុកដាក់ ដើម្បីធានាថាគ្មានកម្មករនិយោជិតណាម្នាក់ត្រូវបានបោះបង់ចោល ទោះបីជាពួកគេស្ថិតក្នុងវិស័យសេដ្ឋកិច្ចក្នុងប្រព័ន្ធ ឬក្រៅប្រព័ន្ធក៏ដោយ។ដើម្បីឱ្យការអនុវត្តការងារបន្តទៅមុខដោយជោគជ័យ លោកជំទាវបានផ្តល់អនុសាសន៍ឱ្យគ្រប់ភាគីពាក់ព័ន្ធបង្កើនកិច្ចសហការឱ្យកាន់តែជិតស្និទ្ធ បន្តកសាងសមត្ថភាពមន្ត្រីអធិការកិច្ចឱ្យមានជំនាញច្បាស់លាស់ និងត្រូវបង្កើតប្រព័ន្ធរាយការណ៍ទិន្នន័យសុវត្ថិភាពការងារឱ្យបានរឹងមាំសម្រាប់ជាមូលដ្ឋានក្នុងការដាក់ចេញគោលនយោបាយនាពេលអនាគត៕

អនុប្រធានទី១ អាជ្ញាធរមីន ស្នើឱ្យ UN-ESCAP បន្តផ្តល់កិច្ចសហប្រតិបត្តិការ និងការគាំទ្របន្ថែមចំពោះវិស័យសកម្មភាពមីនមនុស្សធម៌នៅកម្ពុជា

ឯកឧត្តមបណ្ឌិត លី ធុជ ទេសរដ្ឋមន្ត្រី ប្រធានគណៈកម្មាធិការជាតិអេស្កាប់ និងជាអនុប្រធានទី១ អាជ្ញាធរមីន បានស្នើឱ្យ UN-ESCAP ពិចារណាផ្តល់កិច្ចសហប្រតិបត្តិការ និងការគាំទ្របន្ថែមចំពោះវិស័យសកម្មភាពមីនមនុស្សធម៌នៅកម្ពុជា ជាពិសេសក្នុងកិច្ចសង្គ្រោះជនរងគ្រោះរួមទាំងការធ្វើបរិយាបន្នសេដ្ឋកិច្ចសង្គមសម្រាប់ជនរងគ្រោះ និងការចែករំលែកចំណេះដឹងនិងជំនាញរបស់កម្ពុជាទៅកាន់ប្រទេសនានាក្នុងតំបន់អាស៊ីនិងប៉ាស៊ីហ្វិក។ ឯកឧត្តមបណ្ឌិត លី ធុជ ទេសរដ្ឋមន្ត្រី បានស្នើឡើងបែបនេះ ក្នុងឱកាស អនុញ្ញាតឱ្យលោកជំទាវ Armida Salsiah Alisjahbana អគ្គលេខាធិការរងអង្គការសហប្រជាជាតិ និងជាប្រធានគណៈកម្មការសេដ្ឋកិច្ចនិងសង្គមប្រចាំតំបន់អាស៊ី និងប៉ាស៊ីហ្វិករបស់អង្គការសហប្រជាជាតិ (UN-ESCAP) ចូលជួបពិភាក្សាការងារ និងសំដែងការគួរសម នៅថ្ងៃទី៣០ ខែមីនា ឆ្នាំ២០២៦ នៅទីស្នាក់ការអាជ្ញាធរមីន។ ជំនួបនេះប្រព្រឹត្តទៅក្នុងអំឡុងពេលដែលលោកជំទាវ Armida Salsiah Alisjahbana អញ្ជើញមកកាន់កម្ពុជាដើម្បីចូលរួម «កិច្ចប្រជុំត្រួតពិនិត្យពាក់កណ្តាលអាណត្តិកម្មវិធីសកម្មភាពដូហា សម្រាប់ប្រទេសមានការអភិវឌ្ឍតិចតួច នៃតំបន់អាស៊ី និងប៉ាស៊ីហ្វិក» ដែលសហការរៀបចំដោយគណៈកម្មាធិការជាតិអេស្កាប់នៃរាជរដ្ឋាភិបាលកម្ពុជា ជាមួយ UN-ESCAP និងការិយាល័យតំណាងជាន់ខ្ពស់របស់អង្គការសហប្រជាជាតិសម្រាប់ប្រទេសអភិវឌ្ឍន៍តិចតួច ប្រទេសកំពុងអភិវឌ្ឍន៍ដែលគ្មានដែនសមុទ្រ និងរដ្ឋកំពុងអភិវឌ្ឍន៍កោះតូចៗ (UN-OHRLLS)។ក្នុងឱកាសនោះ ឯកឧត្តមទេសរដ្ឋមន្ត្រី បានថ្លែងអំណរគុណចំពោះលោកជំទាវ Armida Salsiah Alisjahbana ព្រមទាំងUN-ESCAP ដែលបានជ្រើសរើសកម្ពុជាជាដៃគូសហការរៀបចំកិច្ចប្រជុំត្រួតពិនិត្យពាក់កណ្តាលអាណត្តិ កម្មវិធីសកម្មភាពដូហា សម្រាប់ប្រទេសមានការអភិវឌ្ឍតិចតួចនៃតំបន់អាស៊ីនិងប៉ាស៊ីហ្វិក ដែលនេះបង្ហាញពីការផ្តល់ទំនុកចិត្តរបស់អង្គការសហប្រជាជាតិ មកលើរាជរដ្ឋាភិបាលកម្ពុជា។ឯកឧត្តម ក៏បានវាយតម្លៃខ្ពស់ចំពោះតួនាទីដ៏សំខាន់របស់ UN-ESCAP ក្នុងការជំរុញកិច្ចសហប្រតិបត្តិការតំបន់ ការអភិវឌ្ឍប្រកបដោយចីរភាព និងកំណើនប្រកបដោយបរិយបន្ន នៅក្នុងតំបន់អាស៊ីប៉ាស៊ីហ្វិក ក៏ដូចជាការគាំទ្រដល់កម្ពុជា ដើម្បីឱ្យធានាបានការចាកចេញពីឋានៈប្រទេសមានការអភិវឌ្ឍតិចតួចដោយរលូន និងប្រកបដោយចីរភាព។ពាក់ព័ន្ធនឹងសកម្មភាពមីន ឯកឧត្តមបានថ្លែងអំណរគុណ UN-ESCAP ដែលបានផ្តល់ការគាំទ្រក្នុងការរៀបចំសេចក្តីព្រាងគោលនយោបាយជាតស្តីពីសកម្មភាពមីន ឆ្នាំ២០២៦-២០៣៥ ដែលនឹងត្រូវអនុម័តដោយរាជរដ្ឋាភិបាលកម្ពុជានាពេលខាងមុខ។ ឯកឧត្តមគូសបញ្ជាក់ថា គោលនយោបាយនេះ នឹងក្លាយជាផែនទីបង្ហាញផ្លូវរយៈពេល១០ឆ្នាំរបស់កម្ពុជា ដើម្បីឱ្យកម្ពុជាសម្រេចបានការរំដោះផ្ទៃដីមីន និងសំណល់ជាតិផ្ទុះពីសង្គ្រាមទាំងស្រុង និងត្រៀមខ្លួនជាស្រេចក្នុងដំណាក់កាលគ្រប់គ្រងសំណល់យុទ្ធភណ្ឌគ្រឿងផ្ទុះដែលនៅសេសសល់ឱ្យបានជោគជ័យ។ ឯកឧត្តមលើកឡើងថា ការគាំទ្ររបស់ UN-ESCAP ក្នុងការរៀបចំគោលនយោបាយសកម្មភាពមីន បានគូសបញ្ជាប់ពីសារៈសំខាន់នៃវិស័យសកម្មភាពមីន ចំពោះការសម្រេចបានគោលដៅអភិវឌ្ឍប្រកបដោយចីរភាព និងប្រកបដោយបរិយាបន្ន។ ក្នុងន័យនេះផងដែរ តាមរយៈលោកជំទាវ Armida Salsiah Alisjahbana ឯកឧត្តមទេសរដ្ឋមន្ត្រី បានស្នើឱ្យ UN-ESCAP ពិចារណាផ្តល់កិច្ចសហប្រតិបត្តិការ និងការគាំទ្របន្ថែមចំពោះវិស័យសកម្មភាពមីនមនុស្សធម៌នៅកម្ពុជា ជាពិសេសក្នុងកិច្ចសង្គ្រោះជនរងគ្រោះរួមទាំងការធ្វើបរិយាបន្នសេដ្ឋកិច្ចសង្គមសម្រាប់ជនរងគ្រោះ និងការចែករំលែកចំណេះដឹងនិងជំនាញរបស់កម្ពុជាទៅកាន់ប្រទេសនានាក្នុងតំបន់អាស៊ីនិងប៉ាស៊ីហ្វិក។ ជាការឆ្លើយតប លោកជំទាវ Armida Salsiah Alisjahbana បានថ្លែងអំណរគុណដល់រាជរដ្ឋាភិបាលកម្ពុជា ដែលបានផ្តល់កិច្ចសហការរៀបចំកិច្ចប្រជុំត្រួតពិនិត្យពាក់កណ្តាលអាណត្តិ កម្មវិធីសកម្មភាពដូហា សម្រាប់ប្រទេសមានការអភិវឌ្ឍតិចតួច នៃតំបន់អាស៊ី ប៉ាស៊ីហ្វិក ។

អគ្គទេសាភិបាលធនាគារជាតិ លើកទឹកចិត្តដល់ធុរជនស្វែងយល់ការផ្គុំ QR រៀល និងដុល្លារ

អគ្គទេសាភិបាលធនាគារជាតិនៃកម្ពុជា អំពាវនាវដល់ស្ថាប័នពាក់ព័ន្ធ សមាគម ជាពិសេសក្រុមប្រឹក្សាទេសចរណ៍កម្ពុជា និងក្រសួង ទេសរណ៍ ជួយផ្សព្វផ្សាយអំពីការផ្គុំ QR ប្រាក់រៀល និងដុល្លារ ដល់ធុរជន ពាណិជ្ជករ ជាពិសេសអាជីវករលក់វត្ថុអនុស្សាវរីយ៍បម្រើឱ្យ ទេសចរណ៍ បានយល់ដឹងបន្ថែម លើការផ្តល់លទ្ធភាពងាយស្រួលរវាងអ្នកលក់ និងអ្នកទិញ។លោកជំទាវបណ្ឌិត ជា សិរី អគ្គទេសាភិបាលធនាគារជាតិនៃកម្ពុជា លើកឡើងនៅក្នុងការដាក់ឱ្យដំណើរការផ្លូវការ នៃការ ទូទាត់ប្រាក់ឆ្លងដែន QR Code រវាងកម្ពុជា និងសឹង្ហបុរី ដំណាក់កាលទី២ (ជនជាតិសឹង្ហបុរីស្កេនលេខកូដ KHQR របស់ប្រទេសកម្ពុជា នៅថ្ងៃទី៣០ ខែមីនា ឆ្នាំ២០២៦ នេះថា ជុំវិញការទូទាត់ឆ្លងដែននេះ កម្ពុជាបានតភ្ជាប់ជាមួយប្រទេសជាច្រើន ប៉ុន្តែអ្វីដែលធនាគារ ជាតិនៃកម្ពុជាបានធ្វើជាមួយប្រទេសម៉ាឡេស៊ី វៀតណាម និងប្រទេសឡាវ ដែលអនុវត្តកន្លងមក ក្នុងនោះសម្រាប់ភ្ញៀវមកកម្ពុជា គឺស្កេនអត់ចេញ។ បញ្ហានេះដោយសារអ្នកលក់នៅក្នុងស្រុក ពួកគាត់អត់ទទួលយកលុយរៀល។ លោកជំទាវបន្ថែមថា ចំណែកគោល បំណងដែលយើងធ្វើនេះ គឺដើម្បីលើកកម្ពស់លុយជាតិ (ស្រុកគេចាយលុយគេ ស្រុកយើងចាយលុយយើង) ។ លោកជំទាវបណ្ឌិត បន្ថែមថា ការដែលយើងជំរុញប្រើប្រាស់លុយរៀល តាម QR Code គឺជាការលើកទឹកចិត្តឱ្យអ្នកដែលប្រើ ប្រាស់គឺបានប្រើ។ តាមរយៈនៃបញ្ហានេះ ធនាគារជាតិនៃកម្ពុជាក៏បានបង្កើតផ្គុំ QR ជាមួយគ្នា ដើម្បីផ្តល់ភាពងាយស្រួលក្នុងការស្កេន មិនថាភ្ញៀវជាតិនិងអន្តរជាតិ។ ជុំវិញ QR Code នេះ, លោកជំទាវបណ្ឌិតអំពាវនាវដល់ស្ថាប័នពាក់ព័ន្ធ សមាគម ជាពិសេសក្រុមប្រឹក្សា ទេសចរណ៍កម្ពុជា និងក្រសួងទេសរណ៍ ជួយផ្សព្វផ្សាយអំពីការប្រើប្រាស់ប្រាក់រៀល តាមប្រព័ន្ធហ្សូអរកូត (QR Code) ដល់ធុរជន ពាណិជ្ជករ ជាពិសេសអាជីវករលក់វត្ថុអនុស្សាវរីយ៍បម្រើឱ្យទេសចរណ៍ បានយល់ដឹងបន្ថែម អំពីការផ្គុំ QR ប្រាក់រៀល និងដុល្លារ បញ្ចូលគ្នា ក្នុងគោលដៅផ្តល់លទ្ធភាពងាយស្រួលរវាងអ្នកលក់និងអ្នកទិញ។លោកជំទាវបណ្ឌិត ជា សិរី បញ្ជាក់បន្ថែមថា ការបង្កើតផ្គុំ QR ប្រាក់រៀល និងដុល្លារបញ្ចូលគ្នានេះ គឺដើម្បីសម្រួលដល់ ភ្ញៀវទេសចរណ៍បានទូទាត់ងាយស្រួលដល់អ្នកលក់ ដែលនេះគឺជាការជួយដល់បងប្អូនប្រជាពលរដ្ឋ។ លោកជំទាវបណ្ឌិត ទាក់ទិនការ បើក QR នេះដែរ ប្រសិនបើគ្រឹះស្ថានណាគិតសេវា លើការបើក QR ប្រាក់រៀល គឺខុសពីការណែនាំរបស់ធនាគារជាតិនៃកម្ពុជាទាំង ស្រុង៕អត្ថបទ៖ រ៉ាឌី

ស.ស.យ.ក វិស័យសង្គមកិច្ច និងមន្ត្រីចូលរួមសរសេរសារ និងផ្ដល់ជូនជាក្រមាជូនវីរកងទ័ពជួរមុខ

ក្រុមការងារសហភាពសហព័ន្ធយុវជនកម្ពុជា វិស័យសង្គមកិច្ច រួមទាំងមន្ត្រីនៃក្រសួង នាថ្ងៃទី ៣០ ខែមីនា ឆ្នាំ ២០២៦នេះ បានចូលរួមសរសេរជាសារ ក៏ដូចជាបរិច្ចាគជាក្រមាជូនដល់វីរកងទ័ពជួរមុខ។ សកម្មភាពនេះ រៀបចំឡើងនៅ ទីតាំងក្រសួងសង្គមកិច្ច ដោយផ្ទាល់។ជាការចូលរួមគាំទ្រដល់ កម្មវិធី ១ម៉ឺនក្រមា ១ម៉ឺនសារជូនវីរកងទ័ព ក្រុមការងារ ស.ស.យ.ក វិស័យសង្គមកិច្ច ក៏ដូចជាមន្ត្រីនៃក្រសួងសង្គមកិច្ចផ្ទាល់ បានរួមគ្នាផ្តល់ជូនជាក្រមា ក៏ដូចជាសរសេរជាសារ បង្ហាញពីទឹកចិត្តដឹងគុណ ដល់វីរកងទ័ព។ ដឹងគុណ ដែលវីរកងទ័ព ហ៊ានលះបង់ជីវិត សាច់ស្រស់ ឈាមស្រស់ ក្នុងការការពារបូរណភាពទឹកដី នៅតាមបណ្ដោយព្រំដែនកន្លងមកនេះ។ ការរៀបចំរបស់ ស.ស.យ.ក វិស័យសង្គមកិច្ច នៅទីតាំងក្រសួងនឹងបន្តរហូតដល់ថ្ងៃទី ៣ ខែមេសា នោះក្រុមការងារនឹងយកទៅប្រគល់ជូន ទីតាំងធំដែលរៀបចំនៅសួនវត្តបទុមវតី។ក្រុមការងារ ស.ស.យ.ក វិស័យសង្គមកិច្ច ក៏ដូចជាមន្ត្រី ដែលបានចូលរួមនៅថ្ងៃនេះ លើកឡើងថា ក្នុងនាមជាមន្ត្រីក្នុងនាមជាប្រជាពលរដ្ឋជួរក្រោយ ដែលទទួលបានការររស់នៅដោយសុខសាន្ត ពីការពលីរបស់វីរកងទ័ព គឺពិតជាដឹងគុណដល់គុណបំណាច់ធំធេង របស់វីរកងទ័ពគ្រប់រូប។ ក្នុងនាមជាជួរក្រោយ ពិតជាមានក្ដីនឹករលឹក ហើយសូមផ្ញើរក្ដីនឹករលឹកនេះ ក៏ដូចជាការដឹងគុណ តាមរយៈសារដែលខ្លួនបានសរសេរ។ក្រុមការងារ សហភាពសហព័ន្ធយុវជនកម្ពុជា នាពេលបច្ចុប្បន្ន បានរៀបចំជាព្រឹត្តិការណ៍ ក៏ដូចជាសកម្មភាពមួយចំនួន ដែលផ្សារភ្ជាប់ ប្រជាពលរដ្ឋជួរក្រោយ ទៅនឹងវីរកងទ័ពជួរមុខ និងប្រជាពលរដ្ឋភៀសសឹកនៅតាមបណ្ដាខេត្តជាប់បណ្ដោយព្រំដែន។ជាក់ស្ដែងក្រុមការងារ កំពុងវេចខ្ចប់នំខ្ញី និងអំបុក ប្រមាណ ៣តោន សម្រាប់ប្រជាពលរដ្ឋភៀសសឹក។ ក្រុមការងារស.ស.យ.ក ក៏កំពុងរៀបចំកម្មវិធី ១ម៉ឺនក្រមា ១ម៉ឺនសារជូនពរវីរកងទ័ព។ លើសពីនេះ នៅកំឡុងចុងខែ មីនានេះ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ក៏បានដឹកនាំក្រុមការងារ ដោយនាំយកពិធីបុណ្យចូលឆ្នាំប្រពៃណីជាតិខ្មែរ ជូនដល់ប្រជាពលរដ្ឋនៅតាមជំរុំភៀសសឹក។នៅថ្ងៃព្រឹត្តិការណ៍នគរសង្ក្រាន្តខាងមុខ សហភាពសហព័ន្ធយុវជនកម្ពុជា ក៏បានប្រកាសដែរថា ថវិកាដែល ស.ស.យ.ក ទទួលបានពីការលក់វត្ថុអនុស្សាវរីយ៍ គឺនឹងប្រគល់ជូនជួរមុខទាំងស្រុង។អត្ថបទ៖គឹមហុក

បណ្ដាញសង្គម

ព័ត៌មានថ្មីៗ

នាយករដ្ឋមន្ត្រីលីបង់និយាយថា សង្គ្រាមមួយខែនៅពុំទាន់មានសញ្ញាបញ្ចប់នៅឡើយទេ

កិច្ចពិភាក្សាដឹកនាំដោយអង់គ្លេសស្ដីពីវិបត្តិច្រកសមុទ្រ Hormuz បញ្ចប់ដោយគ្មានលទ្ធផល ខណៈទាមទារបើកឡើងវិញជាបន្ទាន់

អ្នកជំនាញអាមេរិកលើកឡើងថា ការវាយប្រហាររបស់អាមេរិកលើអ៊ីរ៉ង់ អាចស្មើនឹងឧក្រិដ្ឋកម្មសង្គ្រាម

UN ត្រៀមបោះឆ្នោតលើសេចក្តីសម្រេចច្រកសមុទ្រហ័រមូស ខណៈចិន ប្រឆាំងនឹងការប្រើប្រាស់កម្លាំង

ពិភពលោកអន្ទះសារចង់បើកច្រកសមុទ្រ Hormuz ខណៈលោក Trump និងអ៊ីរ៉ង់បន្តគំរាមដាក់គ្នាឥតឈប់

កុមារបួននាក់ ត្រូវបានចាក់សម្លាប់នៅសាលាមត្តេយ្យប្រទេសអ៊ុយហ្គង់ដា ជនសង្ស័យត្រូវបានចាប់ខ្លួន

សហរដ្ឋអាមេរិក កំណត់ការដំឡើងពន្ធថ្មី ១០០% លើឱសថ និងកែសម្រួលពន្ធលើលោហៈធាតុ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877