នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កិច្ចសន្ទនារវាងកម្ពុជា-កូរ៉េ ឆ្លុះបញ្ចាំងពីការយកចិត្តទុកលើការថែទាំគាំទ្រវិនិយោគបរទេសនៅកម្ពុជា
អភិបាលខេត្តប៉ៃលិន ផ្តាំផ្ញើដល់បងប្អូនពលករដែលវិលត្រឡប់មកពីថៃ កុំព្រួយបារម្ភរឿងអត់ការងារធ្វើ ព្រោះរាជរដ្ឋាភិបាលកម្ពុជាបានត្រៀមរួចរាល់ហើយ
ឯកឧត្តមសាស្រ្តាចារ្យ ឈាង រ៉ា ចុះជួបមន្រី្តសុខាភិបាល នៅមណ្ឌលសុខភាពព្រែកលួង ដើម្បីស្វែងយល់ពីមូលដ្ឋាន និងការបម្រើសេវាសុខភាព
ពលករខ្មែរមកពីថៃថ្លែងអំណរគុណអភិបាលខេត្តប៉ៃលិនចំពោះការយកចិត្តទុកដាក់លើសុខភាពពួកគេ

ព័ត៌មានជាតិ

ឯកឧត្ដ​ម​អភិសន្តិបណ្ឌិត និងនាយកអង្គការយូនីសេហ្វ វាយតម្លៃជាវិជ្ជមាន នៃកិច្ចសហប្រតិបត្តិការជាមួយក្រសួងមហាផ្ទៃ

2025/06/19 07:16:23 pm        81
Facebook Telegram Linkin
ភ្នំពេញ​÷ ក្នុងជំនួបពិភាក្សាទ្វេភាគី នៅទីស្ដីការក្រសួងមហាផ្ទៃ នាព្រឹកថ្ងៃទី១៩ ខែមិថុនា ឆ្នាំ២០២៥នេះ ឯកឧត្ដ​ម​អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកបណ្ឌិត វីល ផាក (Will Parks នាយកអង្គការយូនីសេហ្វប្រចាំនៅកម្ពុជា បានពិភាក្សានិងផ្លាស់ប្ដូរយោបល់គ្នាប្រកបដោយវិជ្ជមានជាពិសេសអំពីលទ្ធផលនៃកិច្ចសហប្រតិបត្តិការរវាងយូនីសេហ្វ និងក្រសួងមហាផ្ទៃ។ ឯកឧត្ដ​ម​អភិសន្តិបណ្ឌិត បានថ្លែងអំណរគុណអង្គការយូនីសេហ្វ ដែលតែងគិតគូរ យកចិត្តទុកដាក់ និងជួយឧបត្ថម្ភគាំទ្រដល់ការកសាង បណ្ដុះបណ្ដាលធនធានម​នុស្ស និងអភិវឌ្ឍន៍ប្រទេសកម្ពុជា និងបានកោតសរសើរនូវលទ្ធផលផ្លែផ្កានៃការអនុវត្តកម្មវិធីសហប្រតិបត្តិការរបស់អង្គការយូនីសេហ្វ និងរាជរដ្ឋាភិបាលកម្ពុជាកន្លងមក ដែលនាំយកមកនូវសមិទ្ធផលសំខាន់ៗជាច្រើនរួមចំណែកដល់ការរីកចម្រើនរបស់ប្រទេសកម្ពុជា។ ក្នុងនាម រាជរដ្ឋាភិបាលកម្ពុជា ឯកឧត្ដ​ម​អភិសន្តិបណ្ឌិត ក៏បានថ្លែងអំណរគុណយូនីសេហ្វផងដែរ ដែលបានសហការជាមួយក្រសួងមហាផ្ទៃ ក្នុងការអនុវត្តគម្រោងធំៗចំនួន២ កន្លងមក គឺគម្រោងលើកកម្ពស់សេវាសង្គម និងគម្រោងកិច្ចការពារកុមារ ដែលជាគម្រោងដ៏មានសារៈសំខាន់ក្នុងការលើកកម្ពស់ជីវភាព និងគម្រោងសុខុមាលភាពប្រជាពលរដ្ឋកម្ពុជា ជាពិសេសជនងាយរងគ្រោះ ដែលមានទាំងស្ត្រីក្រីក្រ កុមារកំព្រា ចាស់ជរា ជនមានពិការភាពជាដើម។ លោកបណ្ឌិត វីល ផាក បានរាយការណ៍អំពីវឌ្ឍនភាព និងផែនការការងារនៃការអនុវត្តឆ្នាំ២០២៤ ព្រមទាំងសកម្មភាពសំខាន់ៗទាំងឡាយរបស់អង្គការ ដូចជាកម្មវិធីគោលនយោបាយសង្គម កម្មវិធីអប់រំ កម្មវិធីសុខភាព និងអាហារូបត្ថម្ភ និងកម្មវិធីកិច្ចការពារកុមារ។ ឯកឧត្តមអភិសន្តិបណ្ឌិត និងលោកបណ្ឌិត វីល ផាក ក៏បានអបអរសាទរចំពោះវឌ្ឍនភាព និងវាយតម្លៃខ្ពស់ចំពោះកិច្ចសហការរវាងអង្គការយូនីសេហ្វ និងក្រសួងមហាផ្ទៃ ក្នុងការបន្តពង្រឹង លើកកម្ពស់ និងអភិវឌ្ឍរដ្ឋបាលថ្នាក់ក្រោមជាតិ​ ៕

រដ្ឋមន្ត្រីទេសចរណ៍ម៉ាឡេស៊ី ប្ដេជ្ញាពង្រឹង និងពង្រីកកិច្ចសហប្រតិបត្តិការទេសចរណ៍ជាមួយកម្ពុជា

2025/06/19 06:53:35 pm        66
Facebook Telegram Linkin
ភ្នំពេញ៖ នារសៀល ថ្ងៃទី១៩ ខែមិថុនា ឆ្នាំ២០២៥, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម Dato' Sri Tiong King Sing រដ្ឋមន្ត្រីក្រសួងទេសចរណ៍ សិល្បៈ និងវប្បធម៌ម៉ាឡេស៊ី ចូលជួបសម្ដែងការគួរសម និងពិភាក្សាការងារ នៅវិមានសន្ដិភាព ។ក្នុងឱកាសនៃជំនួប, ឯកឧត្តមរដ្ឋមន្ត្រីបានថ្លែងអំណរគុណយ៉ាងជ្រាលជ្រៅចំពោះសម្ដេចបវរធិបតី ដែលបានអនុញ្ញាតឱ្យរូបឯកឧត្តម និងគណប្រតិភូ ចូលជួបសម្ដែងការគួរសម និងពិភាក្សាការងារ នាឱកាសនេះ។ ឯកឧត្តមបានបង្ហាញការពេញចិត្តចំពោះទំនាក់ទំនង និងកិច្ចសហប្រតិបត្តិការដ៏ល្អរវាងម៉ាឡេស៊ី និងកម្ពុជា ជាពិសេសកិច្ចសហប្រតិបត្តិការរវាងក្រសួងទេសចរណ៍នៃប្រទេសទាំងពីរ។ ឯកឧត្តមបានលើកឡើងពីសារៈសំខាន់នៃវិស័យទេសចរណ៍ដែលជាវិស័យមួយចូលរួមចំណែកដល់ការធានានូវកំណើនសេដ្ឋកិច្ចជាតិ, ការបង្កើតការងារ, និងការលើកកម្ពស់វប្បធម៌ជាតិ។ ដើម្បីជំរុញវិស័យនេះ ឯកឧត្តមបានគូសបញ្ជាក់ពីការប្ដេជ្ញាចិត្តរបស់ក្រសួងទេសចរណ៍ម៉ាឡេស៊ី ក្នុងការបន្តពង្រឹងនិងពង្រីកការតភ្ជាប់ផ្នែកទេសចរណ៍ជាមួយកម្ពុជា និងការផ្លាស់ប្ដូររវាងប្រជាជននិងប្រជាជន។ ក្នុងន័យនេះ, ក្រសួងទេសចរណ៍នៃប្រទេសទាំងពីរនឹងបន្តសហការគ្នា ដើម្បីជំរុញវិស័យទេសចរណ៍ រួមទាំងទេសចរណ៍បែបវប្បធម៌ និងសិល្ប: រវាងប្រទេសទាំងពីរ។ជាការឆ្លើយតប, សម្ដេចបវរធិបតីបានសម្ដែងនូវការស្វាគមន៍ចំពោះឯកឧត្តមរដ្ឋមន្ត្រី និងគណប្រតិភូ ដែលបានអញ្ជើញបំពេញទស្សនកិច្ចនៅប្រទេសកម្ពុជា។ សម្ដេចបវរធិបតីក៏បានចូលរួមអបអរសាទរ ម៉ាឡេស៊ី ចំពោះជោគជ័យក្នុងការរៀបចំកិច្ចប្រជុំកំពូលអាស៊ានលេីកទី៤៦ និងកិច្ចប្រជុំពាក់ព័ន្ធ នាពេលកន្លងមក។ សម្ដេចបវរធិបតីក៏បានឯកភាពចំពោះការលើកឡើងរបស់ឯកឧត្តមរដ្ឋមន្ត្រី ចំពោះសារៈសំខាន់របស់វិស័យទេសចរណ៍ ក្នុងការជំរុញកំណើនសេដ្ឋកិច្ច និងការតភ្ជាប់រវាងប្រជាជននិងប្រជាជន។ ជាមួយគ្នានេះ, សម្ដេចបវរធិបតីបានរំលឹកអំពីជំនួបទ្វេភាគីរវាងសម្ដេចបវរធិបតី និង ឯកឧត្តម Anwar Ibrahim នាយករដ្ឋមន្ត្រី នៃប្រទេសម៉ាឡេស៊ី នាពេលកន្លងមក ដោយបានឯកភាពពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរ ក្នុងវិស័យសំខាន់ៗមួយចំនួន រួមទាំងវិស័យទេសចរណ៍។ សម្ដេចបវរធិបតីក៏បានបង្ហាញនូវការពេញចិត្តចំពោះការសម្រេចបាននូវការតភ្ជាប់ជើងហោះហើរត្រង់ ពីកម្ពុជាទៅកាន់កោះប៉េណាំង និងបានគូសបញ្ជាក់ថា ប្រទេសទាំងពីរនៅមានសក្ដានុពលច្រើនទៀត ដែលអាចពង្រឹងនិងពង្រីកក្នុងការតភ្ជាប់ជេីងហោះហេីរបន្ថែមទៀត។ ក្នុងន័យនេះ សម្ដេចបវរធិបតីបានលើកទឹកចិត្តក្រសួងទេសចរណ៍នៃប្រទេសទាំងពីរបន្តផ្សារភ្ជាប់ទំនាក់ទំនង និងសហការគ្នាក្នុងការពង្រឹង និងពង្រីកកិច្ចសហប្រតិបត្តិការលើវិស័យទេសចរណ៍ រួមទាំងជំរុញការបង្កើតនូវកញ្ចប់ទេសចរណ៍រួមគ្នា។ក្រៅពីនេះ, សម្ដេចបវរធិបតីក៏បានលើកទឹកចិត្តឱ្យក្រសួងទេសចរណ៍នៃប្រទេសទាំងពីរ ពិនិត្យលទ្ធភាពក្នុងការស្វែងរកកាលានុវត្តភាព និងការភ្ជាប់ទំនាក់ទំនង ផ្នែកទេសចរណ៍នៅថ្នាក់ក្រោមជាតិ ដូចជាការភ្ជាប់ទីក្រុងនិងទីក្រុង និង ខេត្តនិងខេត្ត ដើម្បីលើកកម្ពស់ការយល់ដឹងអំពីទេសចរណ៍ វប្បធម៌ និងសិល្បៈ រវាងប្រទេសទាំងពីរ៕

ឯកឧត្តមទេសរដ្ឋមន្ត្រី អ៊ុក រ៉ាប៊ុន ជំរុញអោយអាជ្ញាធរឃុំស្រុក ត្រូវអនុវត្តច្បាប់ចំពោះជនសង្ស័យដែលប្រព្រឹត្តបទល្មើសនេសាទក្នុងរដូវបិទនេសាទនេះ

2025/06/19 06:46:07 pm        96
Facebook Telegram Linkin
កំពង់ឆ្នាំង៖ ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានក្រុមប្រឹក្សាស្តារ អភិវឌ្ឍន៍វិស័យកសិកម្ម និងជនបទ បានជំរុញដល់អាជ្ញាធរឃុំស្រុកក្នុងខេត្តកំពង់ឆ្នាំងទាំងអស់ ត្រូវអនុវត្តច្បាប់អោយបានតឹងរឹងចំពោះជនសង្ស័យដែលបានប្រព្រឹត្តបទល្មើសនេសាទគ្រប់ប្រភេទ ក្នុងរដូវបិទនេសាទនេះ ជាពិសេសគឺបទល្មើសដាក់សម្រាស់ ឆក់ត្រជាក់ឆក់ក្តៅ និងបទល្មើសនេសាទផ្សេងៗទៀត។ ឯកឧត្តមបានមានប្រសាសន៍បែបនេះ ក្នុងពេលឯកឧត្តម និងក្រុមការងារបានចុះជួបសំណេះសំណាលជាមួយក្រុមប្រឹក្សាឃុំទាំង៥នៃស្រុកជលគីរី និងក្រុមប្រឹក្សាស្រុកជលគីរី ខេត្តកំពង់ឆ្នាំង នាថ្ងៃទី១៩ ខែមិថុនា ឆ្នាំ២០២៥នេះ។ ឯកឧត្តបានបន្តថា៖ ក្រោយពីថ្នាក់ដឹកនាំ បានអោយកម្លាំងកងទ័ពចុះបង្ក្រាបបទល្មើសនេសាទនៅតាមដងទន្លេសាបក្នុងដែនសមត្ថកិច្ចខេត្តកំពង់ឆ្នាំង និងបណ្តាខេត្តមួយចំនួនទៀត ឃើញថាមានប្រជាពលរដ្ឋជាច្រើនបានសាទរនឹងចំណាត់ការនេះ និងសំណូមពរអោយបន្តវិធានការបង្ក្រាបបន្ថែមទៀត តែជនសង្ស័យជាម្ចាស់សម្រាស់ ជាម្ចាស់ឧបករណ៍ល្មើសច្បាប់នេសាទមួយចំនួនតូច បែរជាថាការចាត់វិធានការបែបនេះ នឹងនាំអោយពួកគាត់ដាច់បាយទៅវិញ។ រឿងឈ្មួញដាក់សម្រាស់ធំៗ មិនសូវឃើញចេញមុខមកតវ៉ាទេ ព្រោះពួកគេខ្លាចច្បាប់។  ឯកឧត្តមបណ្ឌិតសភាចារ្យ បានជំរុញអោយអាជ្ញាធរមានសមត្ថកិច្ចនៅក្នុងឃុំ និងស្រុក ត្រូវចាត់វិធានការច្បាប់ភ្លាម ប្រសិនបើរកឃើញ ឬចាប់បានជនសង្ស័យដែលកំពុងប្រព្រឹត្តបទល្មើសដាក់សម្រាស់ និងបទល្មើសនេសាទផ្សេងៗទៀតដែលច្បាប់ហាមឃាត់នៅក្នុងរដូវបិទនេសាទឆ្នាំនេះ បញ្ជូនខ្លួនទៅតុលាការ និងកុំយោគយល់អោយសោះ ព្រោះយើងជាអាជ្ញាធរមានសមត្ថកិច្ច ហើយការងារទាំងនេះ ជាការងាររបស់មន្ត្រីរាជការ។សូមរំលឹកថា៖ បទល្មើសនេសាទដាក់របាំងស្បៃមុង របាំងសាច់អួនខុសច្បាប់ សម្រាស់តូចធំ និងបទល្មើសនេសាទផ្សេងៗទៀត ត្រូវបានកម្លាំងកងទ័ពចុះបង្ក្រាបជាបន្តបន្ទាប់ រហូតអស់ពីផ្ទៃទន្លេសាបក្នុងខេត្តកំពង់ឆ្នាំង។ មកដល់ខែមិថុនា ឆ្នាំ២០២៥នេះ គឺជារដូវបិទនេសាទ ដែលប្រជានេសាទលក្ខណៈគ្រួសារទាំងអស់ បានមានសង្ឃឹមក្នុងថានឹងបិទកុំអោយមានឈ្មួញ និងជនខិលខូចដាក់បទល្មើស ហើយផលត្រីនឹងកើនឡើងវិញក្នុងពេលដ៏ខ្លីខាងមុខសំរាប់ពួកគាត់ប្រកបរបរនេសាទចិញ្ចឹមជីវិត។ ប្រជានេសាទលក្ខណៈគ្រួសារ ក៏បានសំណូមពរដល់អាជ្ញាធរមានសមត្ថកិច្ចគ្រប់លំដាប់ថ្នាក់ កម្លាំងជលផល កម្លាំងកងទ័ព និងកម្លាំងនគរបាល សូមបន្តចាត់វិធានការបង្ក្រាបបទល្មើសនេសាទតទៅទៀត និងចាត់វិធានការច្បាប់ទៅលើឈ្មួញធំៗផង៕ កាំង ហុងវាស្នា

រដ្ឋមន្រ្តីសុខាភិបាល «មន្ទីរពេទ្យ ហ្លួង ម៉ែ គឺជាមជ្ឈមណ្ឌលព្យាបាលជំងឺមហារីក ដែលដំណើរការគ្រប់ជ្រុងជ្រោយទាំង សុវត្ថិភាព សមត្ថភាព គុណភាព និងបម្រើសេវាជូនអ្នកជំងឺប្រកបដោយសមធម៌»

2025/06/19 06:40:15 pm        94
Facebook Telegram Linkin
ភ្នំពេញ ៖ នាព្រឹកថ្ងៃទី១៩ ខែមិថុនា ឆ្នាំ២០២៥ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងថ្នាក់ដឹកនាំ ទទួលបន្ទុក បានចុះពិនិត្យវឌ្ឍនភាពមន្ទីរពេទ្យ ហ្លួង ម៉ែ ដែលជាមជ្ឈមណ្ឌលឯកទេសផ្នែកជំងឺមហារីក ដើម្បីដំណើរការឱ្យបានរលូន មានលក្ខណៈល្អប្រសើរ គ្រប់ជ្រុងជ្រោយទាំង សុវត្ថិភាព សមត្ថភាព គុណភាព បម្រើសេវាសុខាភិបាលជូនប្រជាពលរដ្ឋ។ឯកឧត្តមសាស្រ្តាចារ្យរដ្ឋមន្រ្តី បានអញ្ជើញចុះពិនិត្យ និងសាកសួរសុខទុក្ខដល់ថ្នាក់ដឹកនាំ បុគ្គលិក បម្រើសេវានៅតាមផ្នែកនីមួយៗ និងអ្នកជំងឺដែលមកទទួលសេវា ព្រមទាំងបានផ្តល់ការណែនាំ ដើម្បីបង្កើនសមត្ថភាព ការបម្រើសេវាឯកទេសផ្នែកជំងឺមហារីក ដល់ប្រជាពលរដ្ឋប្រកបដោយគុណភាព ប្រសិទ្ធភាព សុវត្ថិភាព និងសមធម៌។ ក្នុងឱកាសនេះដែរ ឯកឧត្តមសាស្រ្តាចារ្យរដ្ឋមន្រ្តី បានបង្ហាញនូវការកោតសរសើរចំពោះវឌ្ឍនភាពរបស់មន្ទីរពេទ្យ ព្រមទំាងការរៀបចំចក្ខុវិស័យ និងផែនការបានច្បាស់លាស់ ទាំងរយៈពេលខ្លី រយៈពេលមធ្យម និងរយៈពេលវែង។ ឯកឧត្តមសាស្រ្តាចារ្យរដ្ឋមន្រ្តី បានណែនាំដល់ថ្នាក់ដឹកនាំ និងមន្រ្តីនៃមន្ទីរពេទ្យ នូវអនុសាសន៍គន្លឹះ មួយចំនួន ដើម្បីក្លាយជាមន្ទីរពេទ្យគ្រប់ជ្រុងជ្រោយ ដែលមានសុវត្ថិភាព និងគុណភាព បម្រើសេវាជូនអ្នកជំងឺប្រកបដោយសមធម៌ ដូចខាងក្រោម៖១) ពិនិត្យ និងសិក្សា លើអត្រាជំងឺមហារីក ដែលមានកំណើនខ្ពស់ ដើម្បីជំនួយដល់ការធ្វើរោគវិនិច្ឆ័យឱ្យបានលឿន និងប្រកបដោយប្រសិទ្ធភាពខ្ពស់។ ការបង្កើនវិធីសាស្ត្រព្យាបាលឱ្យបានគ្រប់ជ្រុងជ្រោយ និងរក្សាទំនាក់ទំនងរវាងមន្ទីរពេទ្យ និងមន្ទីរពេទ្យ លើប្រព័ន្ធនៃការបញ្ជូនអ្នកជំងឺ។២) បន្តពង្រឹងការផ្តល់សេវាជូនអ្នកជំងឺ ប្រកបដោយការយកចិត្តទុកដាក់ និងមានក្រមសីលធម៌ ធ្វើយ៉ាងណាមិនឱ្យមានការគិតថ្លៃសេវាបន្ថែម លើសពីការកំណត់នោះទេ។៣) បង្កើនវិធីសាស្ត្រនៃការព្យាបាលជំងឺមហារីកពហុជំនាញ មានដូចជា វះកាត់ បាញ់កាំរស្មី ការចាក់ថ្នាំគីមី ជាដើម ដោយត្រូវសហការគ្នា ជាមួយមន្ទីរពេទ្យផ្សេងៗទៀត ឱ្យបានរឹងមាំ ។ ៤) បណ្តុះបណ្តាល និងពង្រឹងសមត្ថភាពដល់បុគ្គលិក និងថ្នាក់ដឹកនាំផ្នែកជាប្រចាំ ដោយអ្នកចាស់បង្រៀនអ្នកថ្មី និងសហការយកអ្នកឯកទេសពីបរទេសមកបង្ហាត់បង្ហាញ។ ជាមួយគ្នានេះ ត្រូវរក្សាធនធានដែលបានបណ្តុះបណ្តាលរួច ឱ្យនៅបន្តបម្រើអង្គភាពជាចាំបាច់។៥) ការចូលរួមចែករំលែកព័ត៌មានសុខាភិបាលរួមគ្នា ដើម្បីការបណ្តុះបណ្តាល ការចងក្រងព័ត៌មាន និងការធ្វើផែនការជាតិជាមួយគ្នា និងការគាំពារសង្គម៦) ត្រូវរក្សាឱ្យបាននូវការការពារសារធាតុវិទ្យុសកម្ម ដែលសាយភាយពីការប្រើប្រាស់ថាមពលសម្រាប់ការព្យាបាលជំងឺមហារីក៧) ត្រូវធ្វើទំនើបកម្មឧបករណ៍ សម្ភារៈបរិក្ខារពេទ្យ ទំនើប ទាន់សម័យ សម្រាប់ការប្រើប្រាស់លើការព្យាបាល និងត្រូវគិតឱ្យបានល្អិតល្អន់ផងដែរ ពីការថែទាំ និងជួសជុល។មុននឹងបញ្ចប់ ឯកឧត្តមសាស្រ្តាចារ្យរដ្ឋមន្រ្តី បានក្រើនរំលឹកដល់ថ្នាក់ដឹកនាំមន្ទីរពេទ្យ ត្រូវ៖ ១) ការប្រុងប្រយ័ត្នអំពីការងារដែលបំពេញមិនទាន់គ្រប់ជ្រុងជ្រោយ ឬខ្វះសុវត្ថិភាព ២) រៀបចំឱ្យមានប្រូតូកូល ឬនីតិវិធីស្តង់ដារ ដើម្បីអនុវត្ត ៣) ការប្រើប្រាស់ឱសថឱ្យស្របតាមនីតិវិធីស្តង់ដា ៤) សម្របសម្រួល ជាមួយមន្ទីរពេទ្យផ្សេងទៀត ដើម្បីរៀបចំផែនការជាតិជំងឺមហារីក ។មន្ទីរពេទ្យហ្លួងម៉ែ មានទីតាំងស្ថិតនៅផ្លូវលេខ១០៩ ភូមិព្រៃសខាងកើត សង្កាត់ព្រៃស ខណ្ឌដង្កោ រាជធានីភ្នំពេញ។ មន្ទីរពេទ្យ ហ្លួង ម៉ែ ជាមន្ទីរពេទ្យឯកទេសជំងឺមហារីក ដែលត្រូវបានបង្កើតឡើងតាមការចង្អុលបង្ហាញ និងយកចិត្តទុកដាក់ដ៏ខ្ពង់ខ្ពស់ពីសំណាក់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា នៃព្រះរាជាណាចក្រកម្ពុជា និងបន្តការគាំទ្រអនុវត្តដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ក៏ដូចជាពីសំណាក់ ឯកឧត្តមសាស្ត្រាចារ្យរដ្ឋមន្ត្រីក្រសួងសុខាភិបាល ដែលមន្ទីរពេទ្យនេះ បានរៀបចំជួសជុលកែលម្អហេដ្ឋារចនាសម្ព័ន្ធរួចរាល់ក្នុងដំណាក់កាលដំបូង និងបានដាក់ឱ្យដំណើរការនៅថ្ងៃទី១៦ ខែកញ្ញា ឆ្នាំ២០២៤ ហើយមន្ទីរពេទ្យគ្រោងនឹងបើកដំណើរការពេញលេញជាមន្ទីរពេទ្យឯកទេសព្យាបាលជំងឺមហារីក មានកម្រិតស្ដង់ដារអន្តរជាតិនៅចុងឆ្នាំ២០២៥ ខាងមុខនេះ៕អត្ថបទ រដ្ឋា

អ្នកនាំពាក្យសម្ដេចតេជោ អស់សំណើចចំពោះអ្នកនាំពាក្យក្រសួងការបរទេសថៃដែលចោទប្រកាន់សម្ដេចតេជោ និងប្រទេសកម្ពុជាដោយភាពក្មេងខ្ចី និងគ្មានហេតុផល

2025/06/19 06:33:39 pm        110
Facebook Telegram Linkin
ភ្នំពេញ៖លោក ជា ធីរិទ្ធ អ្នកនាំពាក្យ សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភានៃកម្ពុជា នៅរសៀលថ្ងៃទី១៩ ខែមិថុនា ឆ្នាំ២០២៥នេះ បានបង្ហាញការអស់សំណើច ចំពោះអ្នកនាំពាក្យក្រសួងការបរទេសថៃនៅពេលនិយាយចោទប្រកាន់សម្ដេចតេជោ និងប្រទេសកម្ពុជាដោយភាពក្មេងខ្ចី និងគ្មានហេតុផល។ លោក ជា ធីរិទ្ធ បង្ហាញការអស់សំណើចបែបនេះ បន្ទាប់ពីមាន អ្នកសារព័ត៌មាននៅក្នុងប្រទេសកម្ពុជា សួរអំពីរឿងអ្នកនាំពាក្យរូបនេះវាយប្រហារចោទប្រកាន់មកលើសម្តេចតេជោ។ លោក ជា ធីរិទ្ធ បានថ្លែងថា៖«ខ្ញុំគិតថា វាជារឿងគួរឱ្យអស់សំណើចទៅវិញទេ នៅពេលដែលអ្នកនាំពាក្យក្រសួងការបរទេសថៃនិយាយម្ដងៗ ចោទប្រកាន់សម្ដេចតេជោ ហើយហ៊ាន ហាមាត់ទៅរួចថា សំឡេងសម្ដេចតេជោ គឺប៉ះពាល់ដល់ក្រមសីលធម៌ការទូត និងបំផ្លាញទំនាក់ទំនងទ្វេភាគីរវាងថៃជាអ្នកជិតខាងនឹងគ្នា»។ លោកបានចោទសួរត្រលប់ទៅអ្នកនាំពាក្យក្រសួងការបទេសថៃវិញថា៖ ថៃ នរណាគេបាញ់សម្លាប់ទាហានខ្មែរកាលពីថ្ងៃទី ២៨ ខែឧសភា? ថៃ តើនរណាគេជាអ្នកបិទព្រំដែនជាឯកតោភាគី? ថៃ តើអាហ្នុងឬជាក្រមសីលធម៌ការទូត? តើហ្នុងឬមិនមែនជាសកម្មភាពដែលរំលោភក្រមសីលធម៌ការទូត? លោកបន្តចោទសួរទៅភាគីថៃថា តើនរណាគេជាអ្នកបំផ្លាញទំនាក់ទំនងទ្វេភាគីរវាងប្រទេសទាំងពីរ ខណៈថៃបានបាញ់ទាហានកម្ពុជាស្លាប់, បិទព្រំដែនដោយឯកតោភាគី, តើអាហ្នុងឬជាសកម្មភាពពូនជ្រំទំនាក់ទំនងប្រទេសទាំងពីរ? ប៉ុន្ដែវាជាសកម្មភាពបំផ្លាញទំនាក់ទំនង! តើនរណាគេជាអ្នកធ្វើមុនឱ្យពិតប្រាកដ?លោកបន្តថា៖«អីចឹង ខ្ញុំគិតថាសម្ដេចអ្នកនាំពាក្យក្រសួងការបរទេសថៃរូបនេះ គឺជាសម្ដីមួយដែលគួរឱ្យអស់សំណើច អត់មានការខ្មាស់អៀន។ ខ្ញុំមិនចង់អត្ថាធិប្បាយច្រើនចំពោះគាត់ប៉ុន្មានទេ ព្រោះគាត់និយាយមកគឺក្មេងខ្ចី និងចោទប្រកាន់ដែលគ្មានហេតុផល»៕

ពលរដ្ឋខេត្តស្វាយរៀងគាំទ្ររាជរដ្ឋាភិបាលដែលនាំយករឿងប្រាសាទតាមាន់តូច តាមាន់ធំ តាក្របី និងមុំ៣ ទៅICJ

2025/06/19 06:28:35 pm        52
Facebook Telegram Linkin
ស្វាយរៀង ៖ យុវជននិងពលរដ្ឋខេត្តស្វាយរៀងក្នុងពេលចូលរួម ពិធីផ្សព្វផ្សាយអប់រំតាមបែបព្រះពុទ្ធសាសនាផ្សារភ្ជាប់និងសង្គម ជូនដល់​​សិស្សានុសិស្ស​អនុវិទ្យាល័យនិង សាលាបឋមសិក្សាអណ្តូងពោធិ ស្រុករមាសហែក ខេត្តស្វាយរៀង នៅថ្ងៃទី១៨ ខែមិថុនា ឆ្នាំ២០២៥នេះ បានមានចំណាប់អារម្មណ៍ ដោយសំដែងអបអរសាទរចំពោះរាជរដ្ឋាភិបាល សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានរៀបចំសំណុំរឿងប្រាសាទតាមាន់តូច តាមាន់ធំ ប្រាសាទតាក្របី និងតំបន់មុំ៣ ទៅកាន់តុលាការអន្តរជាតិ សំដៅធ្វើអោយតុលាការធ្វើការវិនិច្ឆ័យបញ្ជាក់ភាពច្បាស់លាស់និងផ្ដល់យុត្តិធម៌ដល់ប្រទេសកម្ពុជាដែលជាម្ចាស់ប្រាសាទ ដោយបានស្នើដល់រាជរដ្ឋាភិបាលពន្លឿនដល់តុលាការអន្តរជាតិធ្វើការវិនិច្ឆ័យដើម្បីផ្ដល់ភាពយុត្តិធម៌ដែលពលរដ្ឋកម្ពុជាទន្ទឹមរង់ចាំ។​ សូមបញ្ជាក់ទាក់ទងទៅនិងរឿងរ៉ាវ ប្រាសាទតាមាន់តូច តាមាន់ធំ ប្រាសាទតាក្របី និងតំបន់មុំ៣ ដែលប្រទេសថៃបង្កជាមួយ ព្រះរាជាណាចក្រកម្ពុជា ពលរដ្ឋ និងមន្ត្រីរាជការខេត្តស្វាយរៀងបានចាត់ទុកថា រឿងនេះគឺជារឿងឈ្លានពានដោយកំរោល​ បង្កអសន្តិសុខ នៃប្រទេសទាំង២ ដោយគ្មានគោរពសិទ្ធនៃប្រទេសភូមិផងនិងគ្នា ពោលគឺបំពានលើផែនទីនៃប្រទេទាំង២ដែលទទួលស្គាល់ជាលក្ខណៈអន្តរជាតិ ។    

ឯកឧត្តមបណ្ឌិត លី ធុជ បានជំរុញលើកទឹកចិត្តដល់វិនិយោគិនចិនទាំងអស់ ឱ្យពិចារណាសិក្សាពីលទ្ធភាពក្នុងការវិនិយោគនៅកម្ពុជា ស្របតាមទស្សនវិស័យដឹក នាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដើម្បីជំរុញការវិនិយោគដោយផ្ទាល់នៅកម្ពុជា

2025/06/19 06:00:42 pm        52
Facebook Telegram Linkin
(ភ្នំពេញ) ថ្ងៃទី១៩ ខែមិថុនា ឆ្នាំ២០២៥ ឯកឧត្តមបណ្ឌិត លី ធុជ ទេសរដ្ឋមន្រ្តីទទួលបន្ទុកបេសកកម្មពិសេស បានអនុញ្ញាតឱ្យគណៈប្រតិភូវិនិយោគិនមកពីសាធារណរដ្ឋប្រជាមានិតចិន ដែលដឹកនាំដោយ លោក Wang Andy ស្ថាបនិក និងជាប្រធានប្រតិបត្តិសកលនៃ President Club (President Speech Union) ចូលជួបសម្តែងការគួរ និងពិភាក្សាការងារ។   ក្នុងជំនួបនោះ តាងនាមឱ្យរាជរដ្ឋាភិបាលកម្ពុជា ឯកឧត្តមទេសរដ្ឋមន្រ្តី លី ធុជ បានសម្តែងនូវការស្វាគមន៍យ៉ាងកក់ក្តៅចំពោះវត្តមានរបស់ លោក Wang Andy រួមជាមួយគណៈប្រតិភូនៃ President Club និងអ្នកវិនិយោគិនចិនទាំងអស់ ដែលបានអញ្ជើញមកទស្សនកិច្ច និងឈ្វេងយល់ឱកាសវិនិយោគនៅកម្ពុជា។ ឯកឧត្តមបណ្ឌិត លី ធុជ បានវាយតម្លៃខ្ពស់ចំពោះក្លឹប President Club ដែលមានទស្សនវិស័យ គោល បំណង គោលដៅ និងវិសាលភាពការងារច្បាស់លាស់ ក្នុងការរួមចំណែកលើកកម្ពស់សន្តិភាព ជំរុញវប្បធម៌សុខដុមរមនា និងការរីកចំរើនរបស់ពិភពលោក ក៏ដូចជាសម្របសម្រួលការផ្លាស់ប្តូរ និងកិច្ចសហប្រតិបត្តិការសេដ្ឋកិច្ចសកល ដែលទាំងនេះពិតជាមានសារៈសំខាន់ និងបានផ្តល់នូវអត្ថន័យយ៉ាងធំធេងសម្រាប់កម្ពុជា ដែលជាប្រទេសធ្លាប់រងគ្រោះដោយសារសង្រ្គាមរ៉ាំរ៉ៃ អស់ជាង ៣ទសវត្សរ៍។ ក្នុងឱកាសនោះ ឯកឧត្តមទេសរដ្ឋមន្ត្រី បានសង្កត់ធ្ងន់ថា កម្ពុជា មានលក្ខណៈសម្បត្តិគ្រប់គ្រាន់ និងមានហេដ្ឋរចនាសម្ព័ន្ធប្រកបដោយគុណភាព រួមទាំងផ្លូវថ្នល់ ផ្លូវដែក កំពង់ផែ ព្រលានយន្តហោះ ប្រព័ន្ធគមនាគមន៍ អគ្គីសនី បណ្តាញចែកចាយទឹកស្អាត និងកម្លាំងពលកម្មវ័យក្មេងនិងសកម្ម ព្រមទាំងមានច្បាប់វិនិយោគលើកទឹកចិត្តវិនិយោគិន ដែលផ្តល់អំណោយផលយ៉ាងខ្លាំង ដល់ការវិនិយោគលើកគ្រប់វិស័យនៅកម្ពុជា ជាពិសេសកម្ពុជាក៏មានកិច្ចព្រមព្រៀងពាណិជ្ជកម្មសេរីជាមួយប្រទេសចិន ផងដែរ។ ឯកឧត្តមបណ្ឌិត លី ធុជ បានជំរុញលើកទឹកចិត្តដល់វិនិយោគិនចិនទាំងអស់ ឱ្យពិចារណាសិក្សាពីលទ្ធភាពក្នុងការវិនិយោគនៅកម្ពុជា ស្របតាមទស្សនវិស័យដឹក នាំរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីជំរុញការវិនិយោគដោយផ្ទាល់នៅកម្ពុជា។ ឯកឧត្តម ក៏បានគូសបញ្ជាក់ផងដែរថា កម្ពុជា និងចិន គឺជាបងប្អូនល្អ និងមិត្តភក្តិពិត ប្រាកដ ហេតុដូចច្នេះ កម្ពុជាស័ក្តិសមជាដៃគូវិនិយោគដ៏ល្អរបស់វិនិយោគិនចិន៕ ដោយ ៖ ភា រម្យ

សម្ដេចតេជោ ហ៊ុន សែន ស្នើប្រទេសម៉ាឡេស៊ីពង្រីកជើងហោះហើរបន្ថែមទៀតមកកាន់កម្ពុជា

2025/06/19 04:49:20 pm        137
Facebook Telegram Linkin
នៅព្រឹកថ្ងៃទី១៩ ខែមិថុនា ឆ្នាំ២០២៥នេះ សម្តេចអគ្គមហាសេនាបតីតេជោ ហ៊ុន សែន ប្រធាន​ព្រឹទ្ធសភា​នៃព្រះរាជាណាចក្រកម្ពុជា អនុញ្ញាតឲ្យ ឯកឧត្តម Dato SRI Tiong King Sing រដ្ឋ​មន្ត្រី​ក្រសួងទេសចរណ៍ សិល្បៈ និងវប្បធម៍ នៃប្រទេសម៉ាឡេស៊ី ចូលជួបសម្តែងការគួរសម នៅ​វិមាន​ព្រឹទ្ធសភា រាជធានីភ្នំពេញ។បើតាមឯកឧត្តម ជា ធីរិទ្ធ អ្នកនាំពាក្យ ព្រឹទ្ធសភា បានឱ្យដឹងនៅក្រោយជំនួបនេះថា ជាកិច្ច​ចាប់​ផ្ដើម​ក្នុង​ជំនួបនេះសម្ដេចតេជោ ហ៊ុន សែន បានស្វាគមន៍ចំពោះ ឯកឧត្តម Dato SRI Tiong King Sing រដ្ឋមន្ត្រីក្រសួងទេសចរណ៍ សិល្បៈ និងវប្បធម៍ នៃប្រទេសម៉ាឡេស៊ី និងគណៈប្រតិភូ ដែល​បាន​អញ្ជើញមកចូលជួបសម្តែងការគួរសមសម្ដេចនាពេលនេះ។សម្ដេចតេជោ បានចាត់ទុកដំណើរទស្សនកិច្ចរបស់ ឯកឧត្តម រដ្ឋមន្ត្រីក្រសួងទេសចរណ៍ សិល្បៈ និង​វប្បធម៌ នៃប្រទេសម៉ាឡេស៊ីមកកាន់ប្រទេសកម្ពុជា នាពេលនេះ គឺផ្នែកមួយ​នៃ​ការ​ជំរុញ​ការងារ​ទំនាក់​ទំនងរវាងកម្ពុជា និងម៉ាឡេស៊ីឱ្យកាន់តែល្អប្រសើរថែមទៀត។ ជា​ពិសេស​ទាក់​ទង​នឹង​វិស័យ​ទេសចរណ៍ វប្បធម៌នៃប្រទេសទាំងពីរឱ្យកាន់តែរីកចម្រើនបន្ថែមទៀត។ ក្នុង​ឱកាសនោះ ឯកឧត្តម រដ្ឋមន្ត្រីក្រសួងទេសចរណ៍ បាន​សម្ដែង​នូវ​ការ​អរគុណ​ចំពោះ​សម្ដេច​តេជោ ​ដែលបានសំណាយពេលវេលាដ៏មមាញឹកផ្ដល់ឱកាសដល់ឯកឧត្តម និងសហការី​បាន​ជួប​សម្ដែង​ការ​គួរសមនៅក្នុងឱកាសនេះ។ ឯកឧត្តម រដ្ឋមន្ត្រីក្រសួងទេសចរណ៍ ក៏បានលើក​ឡើង​នូវ​សក្ដា​នុពលទេសចររវាងកម្ពុជា និងម៉ាឡេស៊ី ជាពិសេស​ចំនួន​អ្នក​ទេសចរ​ពី​ប្រទេស​កម្ពុជា​ទៅ​កាន់​ប្រទេស​ម៉ាឡេស៊ី។ ក្នុងឱកាសនោះ សម្ដេចតេជោ ហ៊ុន សែន បានផ្ដល់យោបល់ឱ្យភាគីទាំងពីរ ពង្រីកនូវទំនា​ក់​ទំនង​វិស័យ​ទេសចរណ៍ជាមួយគ្នាឱ្យកាន់តែរីកចម្រើន តាមរយៈការ​បង្ក​លក្ខ​ណៈ​ងាយ​ស្រួល​ដល់អ្ន​ក​ទេសចរណ៍ រវាងប្រទេសទាំងពីរដែលជាផ្នែកមួយសំខាន់ក្នុងការជំរុញទំនាក់ទំនងរវាងប្រជាជន និង​ប្រជាជនរវាងប្រទេសទាំងពីរ។ នៅក្នុងឱកាសនោះសម្ដេចតេជោ ក៏បានស្នើ​ទៅ​ម៉ាឡេស៊ី​ឱ្យ​ពង្រីក​ជើង​ហោះហើរបន្ថែមទៀត ពីប្រទេសម៉ាឡេស៊ីមកកាន់កម្ពុជា ក្នុងនោះក្រៅពីហោះ​ហើរ​មក​កាន់​រាជ​ធានី​ភ្នំពេញ គឺអាចពង្រីកបន្ថែមទៅខេត្តសៀមរាប និងក្រុងព្រះសីហនុ ដើម្បីពង្រីក​វិស័យ​ទេសចរ​ណ៍​ប្រទេសទាំងពីរឱ្យកាន់តែរីកចម្រើន៕

សម្ដេចតេជោប្រាប់ការពិតអំពីជម្លោះព្រំដែនកម្ពុជា-ថៃ ទៅប្រធានប្តូរវេនអាស៊ាន នាយករដ្ឋមន្រ្ដី​ម៉ាឡេស៊ី

2025/06/19 04:37:23 pm        313
Facebook Telegram Linkin
សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ប្រាប់​ការ​ពិត និងជំហរដោះស្រាយដោយសន្ដិវិធី និងច្បាប់អន្តរជាតិរបស់កម្ពុជាទៅកាន់ឯកឧត្តម អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានប្តូរវេនអាស៊ាននាពេលបច្ចុប្បន្ន។សម្ដេចតេជោបានប្រាប់ទៅកាន់នាយករដ្ឋមន្ត្រីម៉ាឡេស៊ី និងជា​ប្រធាន​ប្តូរ​វេន​អាស៊ាន​បែប​នេះ​ក្នុង​ឱកាស​អនុញ្ញាត​ឲ្យ ឯកឧត្តម Dato SRI Tiong King Sing រដ្ឋមន្ត្រីក្រសួងទេសចរណ៍ សិល្បៈ និង​វប្បធម៌ នៃប្រទេសម៉ាឡេស៊ី ចូលជួបសម្តែងការគួរសម នៅវិមានព្រឹទ្ធសភា នៅព្រឹកថ្ងៃទី១៩ ខែមិថុនា ឆ្នាំ២០២៥នេះ។ នេះបើតាមឯកឧត្តម ជា ធីរិទ្ធ អ្នកនាំពាក្យ ព្រឹទ្ធសភា បានឱ្យ​ដឹង​នៅ​ក្រោយ​ជំនួប​។ក្នុងឱកាសនោះសម្ដេចតេជោ បានរំលេចទៅឡើងថា ស្ថានភាពពិត​ប្រាកដ​នៃ​ការ​កើត​ឡើង​នៃ​ជម្លោះ​ព្រំដែន​រវាង​កម្ពុជា និងថៃ ជាពិសេសបានកើតឡើង​មក​ពីយោធា​ថៃ​បាន​បាញ់​សម្លាប់​យោធា​ខ្មែរ ​កាលពីថ្ងៃទី២៨ ខែឧសភាកន្លងទៅ ដែលជាការប្រមាថមកលើកម្ពុជា និង​ជា​ការ​ឈ្លាន​ពាន​មក​លើប្រទសកម្ពុជា។ សម្ដេចតេជោ គ៏បានបញ្ជាក់អំពីរឿងរ៉ាវ​នៃ​ជម្លោះ​ដែល​បង្ក​ឡើង​ដោយ​ភាគី​ថៃជា​ពិសេស​គឺ​តាមរយៈ​កា​​របិទច្រកព្រំដែនរវាងកម្ពុជា និងថៃដោយឯកតោភាគី, ការប្រមាថ​របស់​ភាគី​ថៃ​មក​លើ​កម្ពុជា ​តាមរយៈការគំរាមផ្ដាច់អគ្គិសនី ផ្ដាច់អ៊ិនធឺណិត និងការប្រមាថ​មក​លើ​ពលករ​កម្ពុជា​ជា​ដើម​។ ប៉ុន្ដែ​កម្ពុជា​បាន​ចាត់​វិធាន​ការ​ឆ្លើយ​តប​ទៅវិញទាន់​ពេល​វេលា​ហើយ​មិន​អនុញ្ញាត​ឱ្យ​បរទេស ​ជាពិសេសប្រទេសថៃប្រមាថមកលើប្រទេសកម្ពុជា ប្រជាជនកម្ពុជា ឬប្រមាថ​មក​លើ​បូរណ​ភាព​ដែនដីរបស់កម្ពុជានោះទេ។ សម្ដេចតេជោបានពន្យល់អំពីទិដ្ឋភាពពិតជាក់ស្ដែងអំពីបញ្ហាវិវាទព្រំដែនកម្ពុជា និងថៃនេះទៅ​កាន់​ប្រធាន​អាស៊ាន​ទៀតថា កម្ពុជារក្សាជំហរដោះស្រាយបញ្ហាដោយសន្ដិវិធី ដូច្នេះទើប​កម្ពុជា​អនុវត្ត​នូវ​ការ​ចរចា​ទ្វេភាគី ប៉ុន្ដែការចរចាទ្វេភាគីគ្មានប្រសិទ្ធភាព ទើបកម្ពុជាសម្ដេច​បញ្ជូ​នរឿង​ក្ដី​នេះទៅ​តុលាការ​យុត្តិធម៌អន្តរជាតិ (ICJ) ដែលជាយន្តការតាមច្បាប់អន្តរជាតិ ជាយន្តការចាស់ទុំ ផ្អែក​តាម​ទិដ្ឋភាព​ច្បាប់។ ដូច្នេះ​សម្ដេច​តេជោ​ស្នើ​ឱ្យ​ប្រធាន​អាស៊ាន​មាន​ការ​គាំទ្រ​ចំពោះជំ​ហរ​រប​ស់​កម្ពុជា​លើ​ការដោះស្រាយបញ្ហាព្រំដែនជាមួយភាគីថៃ។ សម្ដេចតេជោបានបញ្ជាក់ថា កម្ពុជាមិនចង់មានសង្គ្រាម និងមិនចង់ប្រយុទ្ធ​ជាមួយ​ប្រទេស​ជិត​ខាង​ទេ ​ប៉ុន្ដែសម្ដេចតេជោបានបញ្ជាក់ថា ក្នុងករណីបើមានការឈ្លានពានមកលើកម្ពុជាបន្តទៀត គឺ​កម្ពុជារក្សាសិទ្ធិនៅក្នុងការការពារខ្លួន និងអាចវាយ​បក​ត្រឡប់​ទៅ​វិញ​បើ​សិន​ជា​ករណី​ថៃ​បន្ត​ឈ្លាន​ពាន​មកលើកម្ពុជា។ សម្ដេចបញ្ជាក់ថា កម្ពុជាបានព្យាយាម​ដោះស្រាយ​ដោយ​សន្ដិវិធី​តាម​ផ្លូវ​ច្បាប់ ​ប៉ុន្ដែខាងភាគីយោធាថៃ តែងតែរុញបញ្ហាបង្កជម្លោះមកកាន់កម្ពុជា។ សម្ដេចតេជោ បាន​បញ្ជាក់​ថា កម្ពុជានាំករណីវិវាទកម្ពុជា-ថៃទៅកាន់តុលាការយុត្តិធម៌អន្តរជាតិ (ICJ) ដោយ​សារ​យន្ត​ការ​ច្បាប់អន្តរជាតិ គឺជាយន្តការដែលពិភពលោកត្រូវដោះស្រាយ។ ជាការឆ្លើយ​តប ឯកឧត្តម រដ្ឋមន្ត្រីក្រសួងទេសចរណ៍ម៉ាឡេស៊ី បានសន្យានាំសារ​របស់​សម្ដេច​តេជោ​ទៅ​កាន់នាយករដ្ឋមន្រ្ដីម៉ាឡេស៊ី ដែលជាប្រថានប្ដូរវេនអាស៊ាន ដើម្បីពិនិត្យថា តើម៉ាឡេស៊ី​ក្នុង​នាម​ប្រធានប្ដូរវេនអាស៊ាននឹងចូលរួមដោះស្រាយយ៉ាងដូចម្ដេចចំពោះបញ្ហាកម្ពុជា-ថៃ​នា​ពេល​នេះ៕

ពិធីផ្សព្វផ្សាយអប់រំតាមបែបព្រះពុទ្ធសាសនាផ្សារភ្ជាប់នឹងសង្គមជូនដល់សិស្សានុសិស្ស​ក្នុងស្រុករមាសហែក

2025/06/19 04:36:59 pm        92
Facebook Telegram Linkin
ស្វាយរៀង ៖ កម្មវិធីសប្បុរសធម៌ដើម្បីការអប់រំនៃកម្ពុជា ដឹកនាំដោយព្រះតេជគុណ ជា សារ៉ាវីត ព្រះប្រធានគណៈកម្មការប្រតិបត្តកម្មវិធីសប្បរសធម៌ការអប់រំនៃកម្ពជា នៅថ្ងៃទី១៨ ខែមិថុនា ឆ្នាំ២០២៥នេះ បានប្រាររព្ធរៀបចំធ្វើការផ្សព្វផ្សាយអប់រំជូនដល់សិស្សានុសិស្សសាលាបឋមសិក្សា និងអនុវិទ្យាល័យអណ្តូងពោធិ៍ ឃុំអណ្ដូងពោធិ៍ ស្រុករមាសហែក ខេត្តស្វាយរៀង ដោយមានការនិមន្តនិងអញ្ជើញចូលរួមពីព្រះសង្ឃលោកគ្រូអ្នកគ្រូ សិស្សនុសិស្ស និងបងប្អូនពលរដ្ឋក្នុងភូមិប្រមាណជាង៥០០អង្គ/នាក់ផងដែរ។ ​លោក ចក់ សាត អនុប្រធានគណៈកម្មការប្រតិបត្តិកម្មវិធីសប្បុរសធម៌ដើម្បីអប់រំ នៃកម្ពុជា បានបញ្ជាក់ថា ការផ្សព្វ ផ្សាយរបស់កម្មវិធីនៅពេលនេះមានគោលបំណងសំខាន់បី រួមមាន បណ្ដុះគំនិតជូនដល់សិស្សានុសិស្សឱ្យមានមនសិការ ស្នេហាជាតិ ស្រឡាញ់ជាតិ ពលរដ្ឋ បំផុសសិស្សានុសិស្សឱ្យគោរពច្បាប់ជាតិ បញ្ជៀសរាល់អំពើអបាយមុខ ពិសេសគ្រឿង ញៀន និងអប់រំ បំផុសឱ្យសិស្សានុសិស្សថែរក្សាសុខភាព តាមរយៈធ្វើអនាម័យសម្អាតបរិស្ថាន បញ្ជៀសការប្រើប្រាស់ ភេសជ្ជៈ និងអាហារវេចខ្ចប់ដែលគ្មានកាលបរិច្ឆេទច្បាស់លាស់ ។លោកចក់ សាត បានបញ្ជាក់បន្ថែមថា កម្មវិធីសប្បុរសធម៌ដើម្បីអប់រំនៃកម្ពុជា (អ.ស.ក)បង្កើតឡើង ក្នុងគោលបំណងផ្ដល់ចំណេះដឹងដល់សិស្សានុសិស្ស ពុទ្ធបរិស័ទតាមរយះអប់រំតាមបែបព្រះពុទ្ធសាសនា គិតមកដល់បច្ចុប្បន្នកម្មវិធីនេះដំណើរការអប់បានចំនួន១០លើក ដោយមានការចូលរួមគាំទ្រទាំងស្មារតីសម្ភារៈថវិកាពី ព្រះសង្ឃនិងសប្បុរសជនក្នុងនិងក្រៅខេត្ត។  ដោយ ៖ ភា សារិទ្ធ

បណ្ដាញសង្គម

ព័ត៌មានថ្មីៗ

កិច្ចសន្ទនារវាងកម្ពុជា-កូរ៉េ ឆ្លុះបញ្ចាំងពីការយកចិត្តទុកលើការថែទាំគាំទ្រវិនិយោគបរទេសនៅកម្ពុជា
06/25/2025 09:06 PM
Facebook Telegram Linkin
ក្រុមហ៊ុននេប៉ាល់ ប្រើប្រាស់យានដ្រូន ដើម្បីដឹកជញ្ជូនសម្ភារៈ និងកាកសំណល់នៅលើភ្នំ Everest
06/25/2025 08:06 PM
Facebook Telegram Linkin
លោក Macron ៖ អឺរ៉ុបនឹងចំណាយបន្ថែមទៀតលើថ្លៃការពារ ដើម្បីប្រឈមការគំរាមកំហែងពីរុស្ស៊ី
06/25/2025 08:06 PM
Facebook Telegram Linkin
ពលរដ្ឋហ្កាហ្សាចូលរួមពិធីបុណ្យសពអ្នកកាសែតដែលត្រូវបានសម្លាប់ក្នុងការវាយប្រហាររបស់អ៊ីស្រាអែល
06/25/2025 07:06 PM
Facebook Telegram Linkin
អាកាសយានដ្ឋានក្រុងតែល អាវីវ ចាប់ផ្តើមជើងហោះហើរអន្តរជាតិឡើងវិញ ក្រោយមានបទឈប់បាញ់ជាមួយអ៊ីរ៉ង់
06/25/2025 07:06 PM
Facebook Telegram Linkin
លោក Medvedev របស់រុស្ស៊ី ហៅ EU ថា ជា «ការគំរាមដោយផ្ទាល់» និងថា ភាពជាសមាជិករបស់អ៊ុយក្រែន នឹងបង្កគ្រោះថ្នាក់
06/25/2025 07:06 PM
Facebook Telegram Linkin
សមាជិកសភារុស្ស៊ី ព្រមានថា ទីក្រុងមូស្គូ នឹងស្វែងរកការឆ្លើយតបចំពោះការគំរាមកំហែងណាមួយពី ណាតូ
06/25/2025 07:06 PM
Facebook Telegram Linkin
លោក Grossi៖ឱកាសសម្រាប់ដំណោះស្រាយការទូតចំពោះបញ្ហានុយក្លេអ៊ែរអ៊ីរ៉ង់បច្ចុប្បន្ន បានបើកចំហ
06/25/2025 07:06 PM
Facebook Telegram Linkin
សង្រ្គាមច្រកអាកាសអ៊ីស្រាអែល-អ៊ីរ៉ង់ធ្វើឲ្យក្រុមវិនយោគព្រួយបារម្ភពីច្រកសមុទ្រ Hormuz
06/25/2025 07:06 PM
Facebook Telegram Linkin
សារព័ត៌មាន Yonhap៖ តុលាការកូរ៉េខាងត្បូងបដិសេធមិនចេញដីកាចាប់ខ្លួនអតីតប្រធានាធិបតី
06/25/2025 07:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.