នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
អគ្គលេខាធិការរងសមាគមអតីតយុទ្ធជន អញ្ជើញបើកវគ្គបណ្តុះបណ្តាលស្តីពីការងាររដ្ឋបាល និងការងារបេឡាមរណសង្គ្រោះ អ.ន.ក. ខេត្តបន្ទាយមានជ័យ
ឫទ្ធានុភាពនៃសិល្បៈឥដ្ឋដែលជាតម្លៃអស្ចារ្យនៃប្រាសាទក្រវ៉ាន់
គិតត្រឹមចុងខែមិថុនានេះ ស្ពានឆ្លងកាត់ទន្លេមេគង្គ ដីឥដ្ឋ-ថ្មគរ សាងសង់បានជាង ៥៣%ហើយ
នាយនាវីកម្ពុជាមួយរូបទៀតបានបញ្ចប់វគ្គហ្វឹកហ្វឺននាយនាវីប្រយុទ្ធលើលម្ហសមុទ្រពីប្រទេសអូស្រ្តាលី

ព័ត៌មានជាតិ

នាយឧត្តមសេនីយ៍ ស ថេត ជួបសំណេះសំណាលជាមួយថ្នាក់ដឹកនាំ និងមន្ដ្រីនៃស្នងការដ្ឋាននគរបាលខេត្តព្រះវិហារ

2025/03/19 05:34:48 pm        224
Facebook Telegram Linkin
ព្រះវិហារ៖ នាយឧត្តមសេនីយ៍ ស ថេត អគ្គស្នងការនគរបាលជាតិ នៅព្រឹកថ្ងៃទី១៩ ខែមីនា ឆ្នាំ២០២៥នេះ ​បាន​អញ្ជើញជួបសំណេះសំណាល​ជាមួយថ្នាក់ដឹកនាំ ​និងមន្ដ្រីនគរបាល នៃ​ស្នងការដ្ឋាននគរបាលខេត្ត​ព្រះវិហារ ក្នុង​ដំណើរ​នេះការចុះសួរសុខទុក្ខកម្លាំង​នគរបាល​តាមបណ្ដោយព្រំដែន។ថ្លែងក្នុងឱកាសនោះ នាយឧត្តមសេនីយ៍ ស ថេត បាននាំនូវការផ្តាំផ្ញើសួរសុខទុក្ខ និងជូនពរ​ពីសំណាក់​ សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា និងលោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជូនដល់កងកម្លាំងនគរបាលទាំងអស់ នៃ​ស្នងការដ្ឋាននគរបាលខេត្ដព្រះវិហារ និងក្រុមគ្រួសារ ពិសេសកងកម្លាំងនគរបាលការពារព្រំដែន កំពុងឈរជើងការពារអធិបតេយ្យជាតិ បូរណភាពទឹកដី ក្នុងឱកាសបុណ្យចូលឆ្នាំប្រពៃណីជាតិខ្មែរ និងសូមមានសុខភាពល្អ បំពេញភារកិច្ចសម្រេចដោយជោគជ័យជូនប្រទេសជាតិមាតុភូមិ។នាយឧត្តមសេនីយ៍ អគ្គស្នងការនគរបាលជាតិ បានធ្វើការកោតសរសើរ និងវាយតម្លៃខ្ពស់​ចំពោះកិច្ចខិតខំប្រឹងប្រែងរបស់ស្នងការដ្ឋាននគរបាលខេត្តព្រះវិហារ ក្រោមការដឹកនាំរបស់​លោកឧត្តមសេនីយ៍ទោ សួស សុខដារ៉ា ស្នងការនគរបាលខេត្ត ដែលរក្សាបានសុវត្ថិភាព សន្តិសុខ សណ្តាប់ធ្នាប់ ជូនប្រជាពលរដ្ឋ ពិសេសភ្ញៀវទេសចរណ៍ជាតិ អន្តរជាតិ ។ ក្នុងនាមកងកម្លាំង​នគរបាលជាតិ ត្រូវស្មោះត្រង់ចំពោះវិជ្ជាជីវៈរបស់ខ្លួន ក្នុងការបម្រើប្រជាពលរដ្ឋ និងមានសាមគ្គីភាព​ផ្ទៃក្នុង បង្កើនការយកចិត្តទុកដាក់លើកទឹកចិត្តផ្តល់រង្វាន់ចំពោះមន្រ្តីមានស្នាដៃ ចំពោះមន្រ្តី​ប្រព្រឹត្តខុស​ត្រូវអនុវត្តតាមវិន័យកងកម្លាំង ក្នុងករណីធ្ងន់ធ្ងរត្រូវអនុវត្តតាមច្បាប់ជាធរមាន ទន្ទឹមនោះត្រូវបង្កើនយកចិត្តទុកដាក់ចំពោះមន្រ្តីមានជំងឺឈឺថ្កាត់ ត្រូវចាត់តំណាង ឬក៏ចុះសួរសុខទុក្ខដោយផ្ទាល់។បន្ថែមពីនេះ នាយឧត្តមសេនីយ៍ ស ថេត ក៏បានកត់សម្គាល់នូវសភាពការណ៍ថ្មីៗ ដែលបាន​កើតឡើង ពិសេសឧបាយកលទុច្ចរិតរបស់ក្រុមប្រឆាំងជ្រុលនិយម ដែលនៅចិញ្ចឹមចិត្តប៉ុនប៉ងផ្ដួល​រំលំរាជរដ្ឋាភិបាលស្របច្បាប់តាមមធ្យោបាយផ្សេងៗ។ ប៉ុន្ដែសកម្មភាពទាំងអស់នោះ ត្រូវរាជ​រដ្ឋាភិបាលគ្រប់គ្រងបាន និងចាត់វិធានការតាមផ្លូវច្បាប់ ចំពោះអ្នកដែលពាក់ព័ន្ធ។នាយឧត្តមសេនីយ៍ ស ថេត បានណែនាំទៀតថា ដោយសារខេត្តព្រះវិហារ មានភូមិសាស្ដ្រជាប់​ជាមួយបណ្ដាប្រទេសដទៃ ហើយងាយប្រឈមជាមួយបទល្មើស​ដែលអាចកើតឡើងនៅតាមព្រំដែន ដូច្នេះហើយត្រូវពង្រឹង និងយកចិត្តទុកដាក់សហការជាមួយបណ្ដាអង្គភាពពាក់ព័ន្ធ និង​ប្រទេស​ជាមិត្ត ដើម្បីផ្លាស់ប្ដូរព័ត៌មានឲ្យគ្នាទៅវិញទៅមក សំដៅបង្ការ ទប់ស្កាត់ និងឈានទៅ​បង្ក្រាប​បទល្មើសឲ្យបានទាន់ពេលវេលា។នាយឧត្តមសេនីយ៍ ស ថេត បានណែនាំណែនាំឲ្យកងកម្លាំងនគរបាលទាំងអស់ ត្រូវត្រៀម​លក្ខណៈសម្បត្តិ​ឲ្យបានគ្រប់គ្រាន់ ដើម្បីរក្សាសុវត្ថិភាព សន្តិសុខ សណ្តាប់ធ្នាប់ ក្នុងឱកាស​បុណ្យចូលឆ្នាំថ្មី ប្រពៃណីជាតិខ្មែរ នាពេលខាងមុខ ទន្ទឹមនោះបណ្តាអង្គភាពជំនាញត្រូវពង្រឹង​សមត្ថភាព ក្នុងការបង្ការ ទប់ស្កាត់ និងបង្រ្កាបនូវរាល់បទល្មើសគ្រប់ប្រភេទ ពិសេសក្មេងទំនើង និងបទល្មើសគ្រឿងញៀន សំដៅរក្សាសុវត្ថិភាព សន្តិសុខ សណ្តាប់ធ្នាប់ជូនប្រជាពលរដ្ឋ និងសង្គមជាតិ។ ប៉ុស្តិ៍នគរបាលរដ្ឋបាល ត្រូវបើកទ្វារ ​២៤ម៉ោងលើ២៤ ​ដើម្បីទទួលពាក្យបណ្តឹង និង​បម្រើសេវាជូនប្រជាពលរដ្ឋ ជាមួយគ្នានោះស្នងការដ្ឋាននគរបាលខេត្ត ​ត្រូវមានមន្រ្តីប្រចាំបញ្ជា ២៤ម៉ោងលើ២៤ម៉ោង​ ដើម្បីទទួលពាក្យបណ្តឹង​ និងសេចក្តីរាយការណ៍ពីប្រជាពលរដ្ឋ ដើម្បីចាត់​វិធានការបានទាន់ពេលវេលា។អគ្គស្នងការនគរបាលជាតិ ​ក៏បានក្រើនរំលឹកដល់មន្ដ្រីនគរបាលទាំងអស់ នៃស្នងការដ្ឋាន​នគរបាលខេត្តព្រះវិហារ ត្រូវខិតខំបម្រើប្រជាពលរដ្ឋគ្រប់កាលៈទេសៈ និងលុបបំបាត់រាល់​នូវភាពអសកម្មនានា​ដែលបានខុសឆ្គងកន្លងមក ហើយប្ដូរមកធ្វើកិច្ចការងារសង្គមឲ្យបានច្រើន ពិសេសការសម្រួលចរាចរណ៍ដល់ពលរដ្ឋ ចាស់ជរា ជនមានពិការភាព បន្ថែមលើការងារជំនាញ​ដែលកំពុងបំពេញការងារប្រចាំថ្ងៃ៕

ក្រសួងសុខាភិបាល និងក្រសួងការងារ និងបណ្ដុះបណ្ដាលវិជ្ជាជីវៈ ចុះពិនិត្យប្រសិទ្ធភាពការបម្រើសេវាសុខាភិបាល ការប្រើប្រាស់បណ្ណមូលនិធិសមធម៌ និងប.ស.ស. នៅមន្ទីរពេទ្យព្រះអង្គឌួង

2025/03/19 05:15:22 pm        123
Facebook Telegram Linkin
ភ្នំពេញ ៖ នាព្រឹកថ្ងៃទី១៩ ខែមីនា ឆ្នាំ២០២៥នេះ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញចុះពិនិត្យស្ថានភាពផ្ទាល់ការបម្រើសេវាសុខាភិបាល និងការប្រើប្រាស់សេវាមូលនិធិសមធម៌សុខាភិបាល និងប.ស.ស របស់ប្រជាពលរដ្ឋ ដែលមកទទួលសេវានៅមន្ទីរពេទ្យព្រះអង្គឌួង។ការមកទទួលសេវារបស់បងប្អូនប្រជាពលរដ្ឋ និងការបម្រើសេវាសុខាភិបាលរបស់ក្រុមគ្រូពេទ្យ ជាពិសេសការបម្រើសេវាផ្នែក ប.ស.ស. និងមូលនិធិសមធម៌សុខាភិបាល ជូនដល់ប្រជាពលរដ្ឋ កាន់តែមានការកើនឡើង និងមានភាពមមាញឹកជាបន្តបន្ទាប់ ពីមួយថ្ងៃទៅមួយថ្ងៃ។ ការកើនឡើងនៃការមកទទួលបម្រើសេវានាពេលនេះ បង្ហាញពីការជឿទុកចិត្ត និងភាពរីកចម្រើនលើសេវាសាធារណៈ។ ទន្ទឹមនឹងការរីកចម្រើន ក្នុងនាមថ្នាក់ដឹកនាំក្រសួងសុខាភិបាល ក៏ដូចជាក្រសួងការងារ និងបណ្ដុះបណ្ដាលវិជ្ជាជីវៈ បានណែនាំ និងបន្តជម្រុញឱ្យថ្នាក់ដឹកនាំមន្ទីរពេទ្យ និងផ្នែក ប.ស.ស. កាន់តែបន្តយកចិត្តទុកដាក់ខ្ពស់បន្ថែមទៀត ដោយស្របតាមការអនុវត្តន័ នៃវិធានការគន្លឹះក្នុងវិស័យសុខាភិបាល ក្នុងគោលដៅលើកកម្ពស់គុណភាពសេវាសុខាភិបាល ឈានឆ្ពោះទៅសម្រេចបានការគ្របដណ្តប់សុខភាពជាសកល។ឆ្លៀតក្នុងឱកាសនោះដែរ ឯកឧត្តមសាស្ត្រាចារ្យ រដ្ឋមន្ត្រីក្រសួងសុខាភិបាល និង ឯកឧត្តមរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានជួបសំណេះសំណាល និងសួរសុខទុក្ខអ្នកជំងឺ គ្រួសារអ្នកជំងឺ ដែលមកទទួលសេវានៅមន្ទីរពេទ្យព្រះអង្គឌួង ដើម្បីស្វែងយល់ពីការបម្រើសេវារបស់មន្រ្តីសុខាភិបាល ក្នុងការពង្រឹងគុណភាពបម្រើសេវាប្រកបដោយប្រសិទ្ធភាព ស័ក្កិសិទ្ធភាព ជាមួយក្រមសីលធម៌វិជ្ជាជីវៈ និងដោយមិនមានការរើសអើង។ ជាចុងក្រោយ ឯកឧត្តមសាស្ត្រាចារ្យរដ្ឋមន្រ្តីក្រសួងសុខាភិបាល និងឯកឧត្តមរដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានសំដែងនូវការកោតសរសើរដល់ក្រុមការងារទាំងអស់ ទាំងមន្ទីរពេទ្យ និងប.ស.ស. អំពីការខិតខំបម្រើសេវាជូនប្រជាពលរដ្ឋ ដែលប្រៀបបានដូចជាកូន ជាចៅ និងក្រុមគ្រួសារផ្ទាល់ ដោយបានបង្ហាញពីភាពកក់ក្តៅ រួសរាយរាក់ទាក់ និងក្នុងឥរិយាបទល្អ សំដៅគុណភាព ប្រសិទ្ធិភាព និងស័ក្តិសិទ្ធភាព។ ក្នុងនោះដែរ ឯកឧត្តមសាស្រ្តាចារ្យរដ្ឋមន្រ្តី ផ្តល់ជាអនុសាសន៍គន្លឹះៗ ក្នុងការរៀបចំឱ្យមានភាពកាន់តែល្អប្រសើរបន្ថែមទៀត ដោយត្រូវចុះពិនិត្យ និងជួយសម្រួលឱ្យបានញឹកញាប់ដល់បងប្អូនដែលរង់ចាំ មិនត្រូវមើលរំលងករណីតម្រូវការជួយបន្ទាន់ ករណីចាស់ជរា ពិការភាព ករណីស្រ្តីមានផ្ទៃពោះ ជាដើម និងបន្តរក្សាប្រសិទ្ធភាពនៃការបម្រើសេវាឱ្យនៅតែមានគុណភាព ជាមួយនឹងការបង្កើតយន្តការរៀបចំផែនការរយៈពេលខ្លី និងរយៈពេលវែង ដោយពិនិត្យយ៉ាងល្អិតល្អន់បំផុត៕អត្ថបទ រដ្ឋា

ឯកឧត្ដមទេសរដ្ឋមន្រ្តី លី ធុជ ចុះពិនិត្យសកម្មភាពបោសសម្អាតមីន ដេីម្បីគាំទ្រដល់គម្រោងអភិវឌ្ឍន៍វិស័យទេសចរណ៍ធម្មជាតិ (Eco Tourism) ក្នុងតំបន់ភ្នំ​ ១៥០០​ ស្រុក​វាលវែង​ ខេត្ត​ពោធិ៍សាត់​

2025/03/19 05:11:09 pm        94
Facebook Telegram Linkin
(ពោធិ៍សាត់) ឯកឧត្ដមបណ្ឌិត លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន ថ្ងៃទី១៩ ខែមីនា ឆ្នាំ ២០២៥ នេះបានចុះពិនិត្យសកម្មភាពបោសសម្អាតមីនរបស់អង្គការ HALO Trust ដេីម្បីគាំទ្រដល់គម្រោងអភិវឌ្ឍន៍វិស័យទេសចរណ៍ធម្មជាតិរបស់រដ្ឋបាលខេត្ត ពោធិ៍សាត់​ ស្ថិតក្នុងតំបន់ភ្នំ​ ១៥០០​ ស្រុកវាលវែង ខេត្តពោធិ៍សាត់​។ ការចុះពិនិត្យនេះ មានការចូលរួមពី ឯកឧត្ដម ខូយ រីដា អភិបាលខេត្ត​ពោធិ៍សាត់​ ឯកឧត្ដម​ ទូច​ ភាព​ អនុរដ្ឋលេខាធិការ​ក្រសួង​បរិស្ថាន​ អាជ្ញាធរខេត្តពោធិ៍សាត់គ្រប់លំដាប់ថ្នាក់​ និងប្រតិបត្តិករ HALO Trust។ ក្នុងឱកាសនោះ ឯកឧត្ដមទេសរដ្ឋមន្រ្តី​ លី ធុជ បានគូសបញ្ជាក់អំពីសារៈសំខាន់​អំពីការងារបោសសម្អាតមីន ដេីម្បីគាំទ្រដល់ការអភិវឌ្ឍនៅនឹងកន្លែង ជាពិសេសចូលរួមផ្តល់សុខសុវត្ថិភាព និងលេីកកម្ពស់ដល់វិស័យទេសចរណ៍ធម្មជាតិនៅតាមតំបន់មួយចំនួនដែលកំពុងមានការចាប់អារម្មណ៍ និងទាក់ទាញភ្ញៀវទេសចរដេីរលេងកំសាន្តនិងសម្រាកលំហែកាយជាមួយនឹងធម្មជាតិដ៏ស្រស់ស្អាត ជាពិសេសតំបន់ភ្នំធម្មជាតិ ១៥០០ នៅវាលវែងនេះ។ ឯកឧត្ដមទេសរដ្ឋមន្រ្តី លី ធុជ បានបន្តទៀតថា បច្ចុប្បន្ននេះ អាជ្ញាធរមីន កំពុងយកចិត្តទុកដាក់លេីការងារបោសសម្អាតមីនដេីម្បីគាំទ្រវិស័យទេសចរណ៍ធម្មជាតិ ស្របតាមទស្សនវិស័យរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី ក្នុងការបង្កេីតតំបន់ទេសចរណ៍ធម្មជាតិថ្មីៗឱ្យបានច្រេីនប្រកបដោយសុវត្ថិភាព ដេីម្បីរួមចំណែកលេីកកម្ពស់ជីវភាពរស់នៅរបស់ប្រជាពលរដ្ឋនៅតាមសហគមន៍មូលដ្ឋាន​ ជា​ពិសេស​ក្នុង​ការប្រែក្លាយ​តំបន់​អតីត​សមរភូមិ​ និង​មាន​ហានិភ័យ​ខ្ពស់​ដោយសារ​គ្រាប់​មីន​ ទៅ​ជា​តំបន់​ទេសចរណ៍​ធម្មជាតិ​ និង​ដំណេីរកំសាន្ត​លក្ខណៈ​រុករក​។ ដំណេីរកំសាន្តរបស់ប្រជាពលរដ្ឋតាមតំបន់រមណីយដ្ឋានធម្មជាតិ ត្រូវ​តែ​មាន​ការរៀបចំជាមុន​ និងមានសុខសុវត្ថិភាពខ្ពស់ ស្របតាម​បំណងប្រាថ្នារបស់សម្តេចធិបតី។ ប៉ុន្ដែ​ទោះបីយ៉ាងណា ឯកឧត្ដមទេសរដ្ឋមន្រ្តី លី ធុជ នៅតែបន្តអំពាវនាវដល់បងប្អូនប្រជាពលរដ្ឋទាំងអស់​ សូមកុំចូលទៅតំបន់ណាដែលមិនដឹងប្រវត្តិច្បាស់​លាស់​ និងត្រូវសាកសួរអាជ្ញាធរមូលដ្ឋានមុនចូលតំបន់នោះ ៕ (ភារម្យ)

ក្រសួងពាណិជ្ជកម្មចុះ MoU ជាមួយក្រុមហ៊ុនផលិតចំណីសត្វ ដើម្បីជំរុញការប្រមូលទិញវត្ថុធាតុដើម

2025/03/19 04:53:10 pm        128
Facebook Telegram Linkin
ភ្នំពេញ៖ នាព្រឹកថ្ងៃទី១៩ ខែមីនា ឆ្នាំ២០២៥នេះ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានអញ្ជើញជាអធិបតីក្នុងពិធីចុះអនុស្សរណៈយោគយល់គ្នាស្តីពី កិច្ចសហប្រតិបត្តិការជំរុញការប្រមូលទិញផលិតផលពោតក្រហម ដំឡូងមី និងវត្ថុធាតុដើមដ៏ទៃទៀត រវាងក្រសួងពាណិជ្ជកម្ម និងក្រុមហ៊ុនផលិតចំណីសត្វចំនួន៦ នៅទីស្តីការក្រសួង។យោងតាមក្រសួងពាណិជ្ជកម្ម ការអនុស្សរណៈនៃការយោគយល់គ្នានេះ ក្រសួងពាណិជ្ជកម្ម នឹងសហការសម្របសម្រួលជាមួយក្រុមហ៊ុនទាំង៦ ដើម្បីប្រមូលទិញពោតក្រហមចំនួន ១៨៩ ០០០តោន ដំឡូងមីចំនួន ៨១ ៦០០តោន កញ្ជុងអង្ករចំនួន ៥១ ១៣០ និងកន្ទក់ចំនួន ៥៧ ៧៣០តោន។ ទាំងនេះ បានបង្ហាញឱ្យឃើញពីការចូលរួមជំរុញការវិនិយោគទៅលើការកែច្នៃកសិផលនៅក្នុងស្រុក ក៏ដូចជាបង្កើនគុណតម្លៃ និងការពង្រឹងខ្សែច្រវាក់តម្លៃផលិតផលស្របពេលដែលកម្ពុជាកំពុងតែជួបប្រទះបញ្ហាការកើនឡើងថ្លៃដើមចំណីសត្វ ព្រមទាំងបង្កើនឱកាសធុរកិច្ចក្នុងការអភិវឌ្ឍន៍វិស័យកសិ-ពាណិជ្ជកម្ម និងលើកស្ទួយសេដ្ឋកិច្ច-សង្គមប្រកបដោយបរិយាប័ន្ន។សូមជំរាបជូនថា ក្រុមហ៊ុនទាំង៦ ដែលចុះអនុស្សរណៈយោគយល់ជាមួយក្រសួងពាណិជ្ជកម្ម រួមមាន៖ ក្រុមហ៊ុន អិមភីក អេស៊ីអិមស៊ី (ខេមបូឌា), ក្រុមហ៊ុនបេតាហ្រ្គោ (ខេមបូឌា) ខមភេនី លីមីធីត, ក្រុមហ៊ុនអេហ្រ្គី-ម៉ាស្ទ័រ ខូអិលធីឌី, ក្រុមហ៊ុន ឌឹ ហឺស្ស ធីអិមអេច, ក្រុមហ៊ុន អេ អេន ធី ហ្វីដ ឯ.ក, និងក្រុមហ៊ុន ស៊ីជេ ជេលជីដាងហ្វីដ (ខេមបូឌា) ខូអិលធីឌី៕

អ្នកវិភាគ៖ ដំណើររបស់ទណ្ឌិតក្បត់ជាតិ៣ជំនាន់ទៅអាមេរិក គឺជារូបភាពនយោបាយប្រជាភិថុតិ និងបោកប្រាស់អ្នកគាំទ្ររបស់ខ្លួន

2025/03/19 04:52:23 pm        156
Facebook Telegram Linkin
អ្នកវិភាគស្ថានភាពនយោបាយ និងសង្គមបានលើកឡើងថា ដំណើររបស់លោក សម រង្ស៊ី អតីតប្រធានគណបក្សប្រឆាំងទៅកាន់សហរដ្ឋអាមេរិក គឺជារូបភាពនយោបាយប្រជាភិថុតិ និងបោកប្រាស់អ្នកគាំទ្ររបស់ខ្លួនប៉ុណ្ណោះ ប៉ុន្ដែគាត់មិនមានលទ្ធភាពក្នុងការភ្ជាប់ទំនាក់ទំនង និងសុំជំនួយពីរដ្ឋបាលលោក ដូណាល់ ត្រាំនោះទេ។លោកបណ្ឌិត យង់ ពៅ អ្នកវិភាគបញ្ហានយោបាយនៃរាជបណ្ឌិត្យសភាកម្ពុជាបានថ្លែងថា៖«ដំណើររបស់លោក សម រង្ស៊ី ទៅកាន់សហរដ្ឋអាមេរិកនេះ គឺគ្រាន់តែជាការបង្ហាញរូបភាពនយោបាយប្រជាភិថុតិ និងបោកប្រាស់អ្នកគាំទ្ររបស់គាត់ប៉ុណ្ណោះ ប៉ុន្ដែគាត់មិនមានលទ្ធភាពក្នុងការភ្ជាប់ទំនាក់ទំនងជាមួយមន្រ្តីការបរទេសអាមេរិក ឬក៏សុំជំនួយពីរដ្ឋបាលលោក ដូណាល់ ត្រាំនោះទេ»។លោកបណ្ឌិតបន្តថា៖«រដ្ឋាភិបាលអាមេរិក និងរាជរដ្ឋាភិបាលកម្ពុជា គឺមានទំនាក់ទំនងផ្លូវការជាមួយគ្នា ប៉ុន្ដែគេមិនអាចមានទំនាក់ទំនងភាគីផ្សេងពីទំនាក់ទំនងរវាងរដ្ឋាភិបាល និងរដ្ឋាភិបាលនោះទេ។ ដូច្នេះរូបភាពរបស់លោក សម រង្ស៊ី នៅអាមេរិកនេះ គឺជាការបោកប្រាស់ និងគ្មានផលចំនេញអ្វីពីអាមេរិកដែរ»។ជាការកត់សម្គាល់របស់លោកបណ្ឌិត យង់ ពៅ គឺលោក សម រង្ស៊ី តែងតែប្រើប្រាស់រូបភាពទៅជួបអ្នកមុខអ្នកការរបស់សហរដ្ឋអាមេរិក និងថ្នាក់ដឹកនាំជាន់ខ្ពស់របស់អ៊ឺរ៉ុបមួយចំនួនទៀត ដើម្បីទទួលឱកាសថតរូបប៉ុណ្ណោះ។ ចំណែករូបថតដែលឈរក្បែរវិមានរដ្ឋាភិបាលអាមេរិក គឺគ្រាន់តែល្បិចកលបោកអ្នកជឿតាមគាត់មួយចំនួនតូចប៉ុណ្ណោះ។ជុំវិញដំណើរទៅសហរដ្ឋអាមេរិកនេះទៀតសោធ គឺសម រង្ស៊ី គ្រាន់តែចង់បង្ហាញទំនុកចិត្តដល់អ្នកដែលហែរហមគាត់សព្វថ្ងៃនេះ ប៉ុន្ដែមិនមានផលប្រយោជន៍អ្វីដែលអាចជួយជីវិតនយោបាយរបស់អតីតគណបក្សប្រឆាំងនោះបានទេ។ កន្លងមក សម រង្ស៊ី ធ្លាប់បានរិះគន់លោក ដូណាល់ ត្រាំ ដោយឥតសំចៃមាត់ ព្រមទាំងចាត់ទុកប្រធានាធិបតីអាមេរិកជាជនផ្ដាច់ការ និងជាអ្នកនយោបាយបោកប្រាស់ផងដែរ។ចំណែកលោក ថុង ម៉េងដាវិត អ្នកវិភាគភូមិសាស្ដ្រនយោបាយ និងសន្ដិសុខបានថ្លែងថា៖«សម រង្ស៊ី ជាអ្នកនយោបាយទាល់ច្រក និងគ្មានទីពឹងអ្វីទៀតនោះ។ បើទោះបីជាកន្លងមក គាត់ធ្លាប់និយាយរិះគន់ធ្ងន់ៗទៅលើលោកប្រធានាធិបតី ដូណាល់ ត្រាំក៏ដោយ ក៏គាត់នៅតែហ៊ានធ្វើមុខក្រាស់ទៅសុំភ្ជាប់ទំនាក់ទំនង ឬសុំជំនួយពីអាមេរិកដែរ»។លោកបន្តថា រូបភាពសម រង្ស៊ីនៅសហរដ្ឋអាមេរិក គ្រាន់តែបោកបញ្ឆោតអ្នកគាំទ្ររបស់គាត់មួយក្ដាប់តូចប៉ុណ្ណោះ ខណៈរូបភាពនេះធ្លាប់បានប្រើប្រាស់យ៉ាងមានប្រសិទ្ធភាព ដើម្បីបោកពលរដ្ឋឱ្យបន្តគាំទ្រនយោបាយគាត់។ ទោះបីជាយ៉ាងណា ពលរដ្ឋបានដឹងច្បាស់ពីល្បិចកល ហើយឈប់ជឿទៅលើរូបភាពពីរបីសន្លឹកថតឈរក្បែរវិមានរដ្ឋាភិបាលអាមេរិកនោះដែរ។លោក ថុង ម៉េងដាវីត បានអំពាវនាំវឱ្យពលរដ្ឋកុំយកចិត្តទុកដាក់ចំពោះរូបភាពបោកបញ្ឆោតនេះ និងកុំមានការយល់ច្រឡំទៅលើរូបភាពរបស់លោក សម រង្ស៊ី នៅសហរដ្ឋអាមេរិកដែលគិតថាអាមេរិកជួយគាំទ្រនោះ ព្រោះរដ្ឋបាលលោក ដូណាល់ ត្រាំ មិនបានជួយគាំទ្រអ្វីដល់ក្រុមលោក សម រង្ស៊ីទេ។កាលពីថ្ងៃទី១៤ ខែមីនា ឆ្នាំ២០២៥ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជាបានថ្លែងចំអកឱ្យលោក សម រង្ស៊ី ដែលបានធ្វើទស្សនកិច្ចនៅអាមេរិកថា ចេះតែធ្វើទៅរួចដោយគ្មានការអៀនខ្មាស់ ព្រោះអតីតមេដឹកនាំបក្សប្រឆាំងរូបនេះធ្លាប់រិះគន់មិនសំចៃមាត់ចំពោះលោក ដូណាល់ ត្រាំ កាលនៅជាបេក្ខជនប្រធានាធិបតីអាមេរិក។គួររំឭកថា តាមរយៈវីដេអូនៃបទសម្ភាសរបស់លោក សម រង្ស៊ី ជាមួយនឹង The Cambodia Daily កាលពីថ្ងៃ១២ ខែកញ្ញា ឆ្នាំ២០២៤ ដែលអ្នកនយោបាយចាស់វស្សារូបនេះបានរិះគន់ទៅលើបុគ្គលិកលក្ខណៈរបស់លោក Donald Trump ដែលពេលនោះជាបេក្ខជនប្រធានាធិបតី សហរដ្ឋអាមេរិក ដោយចាត់ទុកលោក Donald Trump ជាមនុស្សនិយាយមិនពិត និងចូលចិត្តធ្វើនយោបាយប្រជាភិថុតិជាដើម៕

សម្ដេចធិបតី ស្នើឱ្យរៀបចំក្រុមការងារពិសេស ដើម្បីរៀបចំផ្ដល់មេដាយ​ជូន​មន្ត្រីដែលមិនធ្លាប់​បាន​ទទួល​មេដាយ

2025/03/19 04:42:31 pm        192
Facebook Telegram Linkin
សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៅថ្ងៃទី១៩ ខែមីនា ឆ្នាំ២០២៥ សម្ដេច​បាន​ចេញ​សារ​ស្នើ​ឱ្យមានក្រុមការងារពិសេស ដើម្បីផ្ដល់មេដាយ​ជូន​មន្ត្រី​ដែល​មិន​ធ្លាប់​ទទួល​បាន​មេដាយ។សម្ដេចមហាបវរធិបតី នាយករដ្ឋមន្ត្រី នៅថ្ងៃនេះបានផ្ញើសារសំឡេងជូនពលរដ្ឋ និង​សាធារណ​ជន​ទាំង​អស់​ជ្រាបពីការរៀបចំបង្កើតក្រុមការងារពិសេស ដើម្បីពិនិត្យ និងវិនិច្ឆយ​លើកា​រ​ផ្ដល់​មេដាយ​ជូន​មន្ត្រី​រាជការស្ថិតក្នុងក្របខណ្ឌ និងមន្ត្រីជាប់កិច្ចសន្យាដែលបានបំពេញការងារចាប់ពី ១០ឆ្នាំឡើងទៅ និងមិនធ្លាប់ទទួលបានមេដាយសោះ។សម្ដេច​ធិបតីបញ្ជាក់បន្ថែមថា ការផ្ដល់ជូននេះ គឺចំពោះតែមន្ត្រីដែលសកម្ម មិនដែលមាន​បញ្ហា​ក្នុង​ការ​បំពេញការងារ និងមិនធ្លាប់ទទួលបានមេដាយសោះ។តាមរយៈសារសំឡេងនេះដែរ សម្ដេចធិបតីនាយករដ្ឋមន្ត្រី ក៏បាន​ស្នើ​ឱ្យ​ពិនិត្យ​កែ​សម្រួល​សារាចរ​ដែល​មានហើយ ដើម្បីបង្កើន​ភាគរយ​ឱ្យ​បាន​សមរម្យ​នៅ​ក្នុង​ការ​ផ្ដល់​មេដាយ​ការងារ​ជូន​មន្ត្រី​រាជ​ការ​គ្រប់​ប្រភេទ។កន្លង​មកមន្ត្រីរាជការដែលត្រូវទទួលមេដាយការងារ គឺត្រូវឆ្លង​កាត់​ការ​ពិនិត្យ​វាយ​តម្លៃ​ពី​ប្រធាន​របស់​ខ្លួន ដែលមានតាំងពីថ្នាក់ការិយាល័យ, នាយកដ្ឋាន, អគ្គនាយកដ្ឋាន រហូតដល់​ប្រធាន​អង្គភាព​ផ្ទាល់សម្រេច។ មន្ត្រីដែលសកម្ម, មកបំពេញការងារបានទៀងទាត់ និងមានស្នាដៃល្អ តែង​ទទួលបានការវាយតម្លៃឱ្យទទួលមេដាយ។ មេដាយការងារ ដែល​មន្ត្រី​រាជការ​ត្រូវ​ទទួល​បាន​មាន​ មេដាយសំរឹទ្ធ, មេដាយប្រាក់ និងមេដាយមាស ដែលជាកម្រិតខ្ពស់បំផុត​ក្នុង​ការងារ​ជា​មន្ត្រី​រាជ​ការ​។ ការផ្ដល់មេដាយ ដែលសម្រេចដោយរាជរដ្ឋាភិបាល គឺក្នុងមួយ​ស្ថាប័ន​អនុញ្ញាត​ឱ្យ​មាន​ក្នុង​រង្វង់ ១០ភាគរយប៉ុណ្ណោះ៕ ដោយ៖ គង់ ឌិន

ក្រោយការកែទម្រង់រដ្ឋបាលសាធារណៈនៅដើមឆ្នាំ២០២៥ ចំនួនមន្ត្រីរាជការស៊ីវិលសរុបទូទាំងប្រទេសមានការថយចុះ ស្របតាមអភិក្រម «ពង្រឹងជាជាងពង្រីក»

2025/03/19 04:28:57 pm        214
Facebook Telegram Linkin
ភ្នំពេញ៖ ក្រោយការកែទម្រង់រដ្ឋបាលសាធារណៈនៅដើមឆ្នាំ២០២៥នេះ ចំនួនមន្ត្រីរាជការស៊ីវិលសរុបទូទាំងប្រទេសមានការថយចុះ ស្របតាមអភិក្រម «ពង្រឹងជាជាងពង្រីក»។ នេះបើតាមការបញ្ជាក់របស់ ឯកឧត្តម ហាស់ ប៊ុនថ្ថន អគ្គលេខាធិការនៃអគ្គលេខាធិការដ្ឋាន ក្រសួងមុខងារសាធារណៈ ក្នុងឱកាសបើកសន្និបាតបូកសរុបលទ្ធផលក្រសួងមុខងារសាធារណៈនៅថ្ងៃទី១៩ ខែមីនា ឆ្នាំ ២០២៥នេះ។ នៅក្នុងឱកាសសន្និបាតនេះ បន្ទាប់ពីពិធីបើកសន្និបាត ក្រោមអធិបតីភាពដ៏ខ្ពង់ខ្ពស់ ឯកឧត្តមឧបនាយករដ្ឋមន្ត្រី ហ៊ុន ម៉ានី រួចមក ថ្នាក់ដឹកនាំក្រសួងមុខងារសាធារណៈ បានចែករំលែកបទពិសោធ និងលទ្ធផលការងារ ជាព័ត៌មានសម្រាប់អង្គភាពដទៃទៀត បានទាញយកជាប្រយោជន៍ផង និងផ្លាស់ប្តូរយោបល់ផង ដើម្បីជាមូលដ្ឋានក្នុងការកំណត់ទិសដៅ យុទ្ធសាស្ត្រ និងរៀបចំផែនការសកម្មភាពសម្រាប់ឆ្នាំបន្តបន្ទាប់។មានប្រសាសន៍ក្នុងបទបង្ហាញ ស្តីពី «វឌ្ឍនភាពនៃការដឹកនាំ និងការគ្រប់គ្រងវិស័យមុខងារសាធារណៈ» ឯកឧត្តម ហាស់ ប៊ុនថ្ថន អគ្គលេខាធិការនៃអគ្គលេខាធិការដ្ឋានក្រសួងមុខងារសាធារណៈ បានលើកឡើងថា “សម្រាប់ដើមឆ្នាំ២០២៥ ចំនួនមន្ត្រីរាជការស៊ីវិលសរុបទូទាំងប្រទេស មានការថយចុះបើធៀបនឹងខែឧសភា ឆ្នាំ២០២៤។” ឯកឧត្តមបានពន្យល់បន្ថែមថា មន្ត្រីរាជការនៅថ្នាក់ក្រោមជាតិទំនោរថយចុះជាបន្តបន្ទាប់ និងមន្ត្រីថ្នាក់កណ្តាលមានចំនួនកើនឡើង ដោយសារមានតម្រូវការចាំបាច់របស់រាជរដ្ឋាភិបាល ជាពិសេសការជ្រើសរើសមន្ត្រីកសិកម្មឃុំ ដែលក្រសួងមុខងារសាធារណៈ បានដឹកនាំរៀបចំការប្រឡងប្រជែងជ្រើសរើសប្រកបដោយគុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។ ឯកឧត្តម អគ្គលេខាធិការបានបង្ហាញស្ថានភាពជារួមថា៖«ចំនួនមន្ត្រីរាជការស៊ីវិលទូទាំងប្រទេសមានការថយចុះ»។ បើតាម ឯកឧត្តម ហាស់ ប៊ុនថ្ថន ការថយចុះនៃចំនួនមន្ត្រីរាជការស៊ីវិល នេះជាផ្នែកមួយនៃការចូលរួមកែទម្រង់រដ្ឋបាលសាធារណៈ ស្របតាមអភិក្រម «ពង្រឹងជាជាងពង្រីក» រួមទាំងជាផ្នែកមួយដ៏សំខាន់ ក្នុងការចូលរួមសន្សំសំចៃបន្ទុកបុគ្គលិករបស់រាជរដ្ឋាភិបាលផងដែរ៕

ពិធីបិទផ្សាយជាសាធារណៈឯកសារការវិនិច្ឆ័យលើការចុះបញ្ជីដីធ្លី មានលក្ខណៈជាប្រព័ន្ធ

2025/03/19 03:31:00 pm        195
Facebook Telegram Linkin
បន្ទាយមានជ័យ៖ នៅរសៀលថ្ងៃទី១៨ ខែមីនា ឆ្នាំ ២០២៥ លោក លៀម សុដា អភិបាលរង នៃគណៈអភិបាលខេត្តតំណាងឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានអញ្ជើញក្នុងពិធីបិទផ្សាយជាសាធារណៈនូវឯកសារនៃការវិនិច្ឆ័យលើការចុះបញ្ជីដីធ្លីមានលក្ខណៈជាប្រព័ន្ធចំនួន១១ភូមិគឺភូមិអន្លង់សា ភូមិកំព្រាម ភូមិបត់ត្រង់ ភូមិតាអំ ឃុំប្រាសាទ, ភូមិទ្រលោកជើង ភូមិទ្រលោកលិច ភូមិទ្រលោកត្បូង ភូមិកំបោរ ឃុំភ្នំលៀប និងភូមិជូនប្រែង ក្នុងឃុំព្រះនេត្រព្រះ ស្រុកព្រះនេត្រព្រះ ក្រោយបញ្ចប់ការចុះវាស់វែងរួចរាល់មកនោះ។លោក ពិន សុវណ្ណារិទ្ធ តំណាងមន្ទីររៀបចំដែនដីនគរូបនីយកម្មសំណង និងសុរិយោដីខេត្ត បានបញ្ជាក់ថា នីតិវិធីនៃការចុះបញ្ជីដីធ្លីមានលក្ខណៈជាប្រព័ន្ធមាន ៥ ដំណាក់កាល ១-ត្រៀមរៀបចំ គឺជាការកំណត់តំបន់ធ្វើការវិនិច្ឆ័យ ការបង្កើតគណៈកម្មការរដ្ឋបាលការជូនដំណឹង កិច្ចប្រជុំផ្សព្វផ្សាយ និងដំណើរការផ្សព្វផ្សាយអំពីការចុះបញ្ជីដីធ្លីមានលក្ខណៈជាប្រព័ន្ធ។២-ប្រតិបត្តិការបច្ចេកទេស គឺជាការចុះកំណត់ព្រំ វាស់វែង និងវិនិច្ឆ័យ ដើម្បីកសាងប្លង់សុរិយោដី និងបញ្ជីឈ្មោះម្ចាស់ដី។៣-បិទផ្សាយជាសាធារណៈនូវឯកសារនៃការវិនិច្ឆ័យ មានប្លង់សុរិយោដី និងបញ្ជីឈ្មោះម្ចាស់ដី រយៈពេល១៥ថ្ងៃ ដើម្បីឱ្យម្ចាស់ដី និងអ្នកដែលពាក់ព័ន្ធធ្វើការផ្ទៀងផ្ទាត់ឈ្មោះ ស្ថានភាពគ្រួសារ និងក្បាលដីរបស់ខ្លួន ព្រមទាំងធ្វើការតវ៉ាក្នុងករណីមានការខុសឆ្គង។៤-សម្រេចលើឯកសារវិនិច្ឆ័យ របាយការណ៍ពីលទ្ធផលនៃការបិទផ្សាយជាសាធារណៈនូវឯកសារ នៃការវិនិច្ឆ័យរបស់គណៈកម្មការរដ្ឋបាល ធ្វើការបូកសរុប និងធ្វើសំណើទៅ ឯកឧត្តម អភិបាលខេត្ត ដើម្បីពិនិត្យ និងបញ្ជូនបន្តទៅក្រសួងរៀបចំដែនដី នគរូបនីយកម្ម និងសំណង់ ដើម្បីពិនិត្យ និងសម្រេចជូនអ្នកកាន់កាប់ណាដែលបានបំពេញគ្រប់លក្ខខណ្ឌតាមច្បាប់កំណត់ និងពុំមានទំនាស់។៥-ចុះបញ្ជីចេញបណ្ណនិងចែកបណ្ណជូនម្ចាស់ដី។លោក លៀម សុដា អភិបាលរងខេត្តបន្ទាយមានជ័យ បានលើកឡើងថា រាល់ភារកិច្ចដែលមន្ទីរ អាចសម្រេចបានជោគជ័យកន្លងមក គឺអាស្រ័យមានការចូលរួមការគាំទ្រ និងមានការសហការ​ពីអាជ្ញាធរមូលដ្ឋានគ្រប់លំដាប់ថ្នាក់ អង្គភាពពាក់ព័ន្ធ ពិសេសមានការដឹកនាំចង្អុលបង្ហាញ និងផ្តល់អនុសាសន៍ដ៏ខ្ពង់ខ្ពស់ពីសំណាក់ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួង រៀបចំដែនដី នគរូបនីយកម្ម និងសំណង់ និងថ្នាក់ដឹកនាំខេត្តគ្រប់លំដាប់ថ្នាក់។លោកអភិបាលរងខេត្តរូបនេះបន្តទៀតថា ក្នុងខេត្តបន្ទាយមានជ័យ មានក្បាលដីប៉ាន់ស្មាន​ប្រមាណចំនួន ៦៨៨ ២២៧ (ប្រាំមួយរយប៉ែតសិប ប្រាំបីពាន់ ពីរម្ភៃប្រាំពីរ) ក្បាលដី និងបានចុះបញ្ជីចេញវិញ្ញាបនបត្រសម្គាល់ម្ចាស់អចលនវត្ថុរួច ចំនួន ៣១៣ ៤២៥ (បីរយដប់បីពាន់ បួនរយម្ភៃប្រាំ) ក្បាលដី។ ដោយឡែកស្រុកមង្គលបូរី មានក្បាលដីប៉ាន់ស្មានប្រមាណចំនួន ១០៧ ០៦៤ (មួយរយប្រាំពីរពាន់ ហុកសិបបួន) ក្បាលដី បានបញ្ចប់ការវាស់វែង និងកំពុងប្រមូលទិន្នន័យ​បានចំនួន ៩៤ ៦៣៤ (កៅសិបបួនពាន់ ប្រាំមួយរយសាមសិបបួន) ក្បាលដី និងបានចុះបញ្ជី ចេញវិញ្ញាបនបត្រសម្គាល់ម្ចាស់អចលនវត្ថុរួចចំនួន ៧៧ ១២៥(ចិតសិបប្រាំពីរពាន់ មួយរយម្ភៃប្រាំ)ក្បាលដី៕ ឃិនសារិទ្ធ

ឯកឧត្ដម ទេសរដ្ឋមន្រ្តី គន់ គីម៖ ការរួមចំណែកពីគ្រប់ភាគីពាក់ព័ន្ធ​បានជួយសម្រួលដល់ជីវភាព​រស់​នៅ​រ​បស់បងប្អូនអតីតយុទ្ធជន

2025/03/19 03:03:36 pm        348
Facebook Telegram Linkin
ត្បូងឃ្មុំ៖ នៅថ្ងៃទី១៩ ខែមីនា ឆ្នាំ២០២៥នេះ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញ​ក្នុង​ពិធី​បញ្ចុះ​បឋម​សិលា​សាង​សង់ទីស្នាក់ការសមាគមអតីតយុទ្ធជនកម្ពុជាខេត្តត្បូងឃ្មុំ និងសំណេះ​សំណាល​ជាមួយ​អតីត​យុទ្ធជនជាច្រើនគ្រួសារ។ក្នុងពិធីនោះ ឯកឧត្តម ទេសរដ្ឋមន្រ្តី បានពាំនាំនូវ​ការផ្តាំ​ផ្ញើ​សាក​សួរ​សុខ​ទុក្ខ​ពី​សំណាក់​សម្តេច​តេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជនកម្ពុជា និងសម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី អនុប្រធានទី១ សមាគមអតីតយុទ្ធជនកម្ពុជា ដែល​សម្តេច​ទាំងទ្វេរមិនភ្លេចឡើយចំពោះបងប្អូនដែលជាអតីតយុទ្ធជន។ឯកឧត្តម ទេសរដ្ឋមន្រ្តី បានវាយតម្លៃខ្ពស់ចំពោះការរួមចំណែកពីគ្រប់ភាគីពាក់ព័ន្ធ ក្នុងការជួយ​សម្រួល​ដល់ជីវភាពរស់នៅរបស់បងប្អូនអតីតយុទ្ធជន ដែលធ្លាប់បានបូជាសាច់ស្រស់ ឈាម​ស្រស់​ និងលះបង់អាយុជីវិត ដើម្បីបុព្វហេតុជាតិ មាតុភូមិ នាំមកនូវសុខសន្តិភាពជូនប្រទេសជាតិ និង​ប្រជាជនកម្ពុជាកាលពីអតីតកាល។ ជាមួយគ្នានេះ ឯកឧត្ដម ទេសរដ្ឋមន្រ្ដី បាន​ថ្លែង​កោត​សរសើរ​ចំពោះ​សមាគម​អតីត​យុទ្ធជន​ខេត្ត​ត្បូងឃ្មុំ ដែលបានបំពេញមុខនាទីរបស់ខ្លួនបានល្អប្រសើរនាពេលកន្លងមក ហើយថា​ទី​ស្នាក់​ការ​សមាគម​អតីតយុទ្ធជនកម្ពុជាខេត្តត្បូងឃ្មុំ ដែលនឹងត្រូវបញ្ចប់ការសាងសង់នាពេលខាងមុខនេះ នឹង​ក្លាយជាទីតាំងដ៏មានសារៈសំខាន់បំផុតសម្រាប់ការបំពេញការងារប្រចាំថ្ងៃរបស់សមាគម ក្នុង​ការផ្តល់អត្ថប្រយោជន៍ទៅដល់បងប្អូនដែលជាអតីតយុទ្ធជនដែលមានគុណូបការៈដ៏ឧត្តុង្គឧត្តម និង​ពលីកម្មដ៏ធំធេងមិនអាចកាត់ថ្លៃបាន ដែលបានបូជាសាច់ស្រស់ ឈាមស្រស់ និងលះបង់​អាយុជី​វិត​ដើម្បីបុព្វហេតុជាតិ មាតុភូមិ នាំមកនូវសុខសន្តិភាពជូនប្រទេសជាតិ និងប្រជា​ជន​កម្ពុជា​។ ឯកឧត្ដម ទេសរដ្ឋមន្រ្ដី ថ្លែងថា ដើម្បីឆ្លើយត​ប​ទៅនឹ​ង​គុណ​ចំណាច់​របស់​អតីត​យុទ្ធ​ជន​ដែល​មាន​ចំពោះ​ជាតិ​ និងប្រជាជន រាជរដ្ឋាភិបាលបាន​ដាក់​ចេញ​នូវ​គោល​នយោបាយ​ជា​ច្រើន​ក្នុង​ការ​គាំទ្រ​ដល់​សុខុមាលភាព និងជីវភាពរស់នៅរបស់បងប្អូនជាអតីតយុទ្ធជន ដូចជាការផ្តល់បណ្ណ ប.ស.ស. ដែលពួកគាត់​អាច​ទទួល​បាន​ការ​ថែទាំ​សុខ​ភាព​ដោយ​ឥត​គិត​ថ្លៃ​នៅ​តាម​បណ្តា​មន្ទីរ​ពេទ្យ​រដ្ឋ និងឯកជនមួយចំនួន ពិសេសផ្តល់ឱកាសឱ្យបងប្អូនអតីតយុទ្ធជនអាចចូលរួមក្នុងសង្គម តាមរយៈតួនាទីមួយចំនួនក្នុងមូលដ្ឋាន ហើយលើសពីនេះក៏បានផ្តល់ជាអាហារូបករណ៍ និងផ្តល់​ឱកាស​ជា​អាទិភាពដល់កូនចៅអតីតយុទ្ធជន​បាន​ចូលបំ​រើ​ការងារ​កង​ទ័ព​បន្ត​វេន​ពី​ឪពុក​ម្តាយ​ផង​ដែរ​៕

កម្ពុជា និងទីម័រខាងកើត បង្ហាញគោលបំណងបង្កើតកិច្ចសហប្រតិបត្តិការលើវិស័យ TVET

2025/03/19 02:44:37 pm        151
Facebook Telegram Linkin
ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នា​រសៀល​ថ្ងៃ​ទី​១៨ មីនា ឆ្នាំ២០២៥ បានទទួលជួបសម្តែងការគួរសម និងពិភាក្សាការងារជាមួយឯកឧត្តម អឺមេ​ណេ​ហ្ស៉ី​​លដូ គុប៉ា ឡូប៉េស (Ermenegildo Krupa Lopes) ឯក​អគ្គ​រដ្ឋ​ទូត​នៃ​សាធារណ​រដ្ឋ​ប្រជាធិបតេយ្យ​ទីម័រខាងកើតប្រចាំនៅកម្ពុជា ដើម្បីពិភាក្សា​ការងារ​មួយ​ចំនួន​ពាក់​ព័ន្ធ​វិស័យ​អប់រំ​បណ្តុះ​បណ្តាល​បច្ចេកទេស និងវិជ្ជាជីវៈ (TVET) ។បើតាម ក្រសួងការងារ និងបណ្តុះបណ្តាលវិជ្ជាជីវៈ នៅក្នុងជំនួបការងារនេះ ឯកឧត្តម ហេង សួរ បាន​បង្ហាញការស្វាគមន៍និងជំរុញឱ្យមានកិច្ចសហប្រតិបត្តិការទ្វេភាគីរវាងកម្ពុជា និង​ទីម័រ​ខាង​កើត លើវិស័យបណ្តុះបណ្តាលបច្ចេកទេស និងវិជ្ជាជីវៈ ដោយក្នុងន័យនេះឯកឧត្តមរដ្ឋមន្ត្រី បាន​បង្ហាញ​ការ​ស្វាគមន៍ឱ្យមានកិច្ចសហប្រតិបត្តិការក្នុងកម្រិតនៃការចុះអនុស្សរណៈយោគយល់រួមគ្នា រវាង​គ្រឹះស្ថានអប់រំបណ្តុះបណ្តាលបច្ចេកទេសនៃប្រទេសទីម័រខាងកើត ជាមួយគ្រឹះស្ថាន​អប់រំ​បណ្តុះ​បណ្តាល​បច្ចេកទេស និងវិជ្ជាជីវៈរបស់កម្ពុជា។ ទន្ទឹមនេះ ឯកឧត្តមរដ្ឋមន្ត្រី បានគូសបញ្ជាក់ថាកម្ពុជា និងទីម័រខាងកើត មានទំនាក់ទំនង​ការ​ទូត​ជា​មួយ​គ្នា​រយៈពេល២៣ឆ្នាំមកហើយ ដូចនេះឯកឧត្តម ជឿជាក់ថា តាមរយៈបេសកកម្ម​ការ​ទូត​របស់​ឯក​អគ្គរដ្ឋទូតនៃសាធារណរដ្ឋប្រជាធិបតេយ្យទីម័រខាងកើតប្រចាំនៅកម្ពុជា នឹងជួយ​ពង្រឹង​ទំនាក់​ទំនង និងកិច្ចសហប្រតិបត្តិការរវាងប្រទេសទាំងពីរកាន់តែរឹងមាំថែមទៀត។ ជាការឆ្លើយតប ឯកឧត្តម Ermenegildo Krupa Lopes បានថ្លែងអំណរ​គុណ​ចំពោះ​រាជ​រដ្ឋាភិបាល​កម្ពុជា​ដែលតែងជួយគាំទ្រដល់រដ្ឋាភិបាលទីម័រខាងកើត ជាពិសេសឯកឧត្តម បាន​កោត​សរសើរ​ចំពោះប្រទេសកម្ពុជាដែលមានការអភិវឌ្ឍលើគ្រប់វិស័យមានចក្ខុវិស័យច្បាស់លាស់ ប្រជាជនរស់នៅក្នុងសន្តិភាព។ ទន្ទឹមនេះ ឯកឧត្តម ឯកអគ្គរដ្ឋទូតទីម័រខាងកើត បានសម្តែង​ការ​គាំទ្រ​ចំពោះ​ការជំរុញឱ្យមានកិច្ចសហប្រតិបត្តិការរវាងប្រទេសទីម័រខាងកើត និងប្រទេសកម្ពុជា ក្នុង​ការ​បណ្តុះបណ្តាលធនធានមនុស្សនិងកម្លាំងពលកម្មជំនាញរវាងប្រទេសទាំងពីរ ហើយក៏នឹង​ជំរុញ​ដល់​កិច្ចសហប្រតិបត្តិការលើវិស័យការងាររួមគ្នា ផងដែរ៕ 

បណ្ដាញសង្គម

ព័ត៌មានថ្មីៗ

យោធាកូរ៉េខាងត្បូងអះអាងថា បានឃាត់ខ្លួនទាហានកូរ៉េខាងជើងម្នាក់នៅជិតព្រំដែន
06/24/2026 07:06 PM
Facebook Telegram Linkin
លោក Kim ៖ កូរ៉េខាងជើងគួរផលិតនាវាចម្បាំង ២គ្រឿង ក្នុង ១ឆ្នាំ នៅរយៈពេល ៥ឆ្នាំក្រោយ
06/24/2026 06:06 PM
Facebook Telegram Linkin
អគ្គិភ័យបានឆាបឆេះឃ្លាំងស្តុកទំនិញមួយកន្លែងនៅទីក្រុង Gimpo របស់កូរ៉េខាងត្បូង
06/24/2026 06:06 PM
Facebook Telegram Linkin
រលកកម្ដៅនឹងមាន​នៅ​ភាគខាងជើង និងភាគ​កណ្តាលវៀតណាម ដោយសីតុណ្ហភាពអាចលើស ៤០​អង្សាសេ
06/24/2026 06:06 PM
Facebook Telegram Linkin
ភ្លៀងធ្លាក់ខ្លាំងលើកដំបូងក្នុងឆ្នាំ ២០២៦ វាយប្រហារទីក្រុងមជ្ឈមណ្ឌលហិរញ្ញវត្ថុម៉ុមបៃ ប្រទេសឥណ្ឌា
06/24/2026 06:06 PM
Facebook Telegram Linkin
រដ្ឋទី ២របស់អូស្រ្តាលី រាយការណ៍ករណីកើតមានជំងឺគ្រុនផ្តាសាយបក្សី H5N1
06/24/2026 06:06 PM
Facebook Telegram Linkin
បារាំងរកឃើញជំងឺ Ebola ដំបូង ជា​ករណី​ទី​១ នៅក្រៅទ្វីបអាហ្វ្រិក អំឡុង​ការផ្ទុះឡើងបច្ចុប្បន្ន
06/24/2026 06:06 PM
Facebook Telegram Linkin
ប៉ូឡូញព្រមានថា រុស្ស៊ីអាចនឹងកំពុងរៀបចំការវាយប្រហារ «ទង់ក្លែងក្លាយ» ក្រោយ​លោក Putin គំរាមកំហែង
06/24/2026 06:06 PM
Facebook Telegram Linkin
រូបភាពផ្កាយរណបបង្ហាញពីដំណើរបោកបក់របស់ព្យុះទីហ្វុង Mekkhala នៅសមុទ្រហ្វីលីពីន
06/24/2026 06:06 PM
Facebook Telegram Linkin
ជនសង្ស័យនៃក្រុម DAESH ត្រូវបានសម្លាប់ នៅក្នុងការវាយឆ្មក់ មុនកិច្ចប្រជុំកំពូល NATO នៅទីក្រុងអង់ការ៉ា
06/24/2026 06:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.