BTV NEWS

កម្ពុជា-ជប៉ុន ចុះកិច្ចព្រមព្រៀងហិរញ្ញប្បទានចំនួន ២ មានទំហំទឹកប្រាក់សរុបជាង ១៧១ លានដុល្លារ

ក្រសួងមុខងារសាធារណៈ ផ្សព្វផ្សាយ និងពង្រឹងសមត្ថភាពមន្ត្រីជំនាញ លើការគ្រប់គ្រងគ្រូបង្រៀន និងបុគ្គលិកសុខាភិបាល

រដ្ឋមន្ដ្រីស្តីទីក្រសួងមុខងារសាធារណៈ ចុះពិនិត្យការធ្វើជំរឿនមន្ដ្រីជាក់ស្ដែងដោយផ្ទាល់ នៅទីស្តីការក្រសួងទេសចរណ៍

រដ្ឋមន្រ្តីសុខាភិបាល៖ «សូមកុំខ្លាចនឹងទទួលយកកង្វះខាតរបស់យើង ទោះទទួលបានតាមវិធីណាក៏ដោយ ហើយខិតខំបន្តកែលម្អលើកិច្ចការដែលនៅមានចន្លោះប្រហោង ដើម្បីសុខភាពពលរដ្ឋ»

ព័ត៌មានជាតិ

រដ្ឋបាលរាជធានីភ្នំពេញ ចាប់ផ្តើមដាក់ការដ្ឋានរៀបចំតុបតែងប្រារព្ធកម្មវិធីសង្ក្រាន្តវត្តភ្នំ

នៅថ្ងៃទី២១ ខែមីនា ឆ្នាំ២០២៥នេះ ក្រុមការងារនៃមន្ទីរវប្បធម៌ និងវិចិត្រសិល្បៈ រាជធានីភ្នំពេញ បានចាប់ផ្តើមដាក់ការដ្ឋានរៀបចំតុបតែងគ្រឿងភ្លើងលំអរ ឆាកប្រគំតន្ត្រី ស្តង់ពិព័រណ៍ និងរៀបចំទីតាំងសប្បាយភាពនានាទៀត ដើម្បីត្រៀមប្រារព្វព្រឹត្តិការណ៍សង្ក្រាន្តវត្តភ្នំ នៅក្នុងបរិវេណរមណីយដ្ឋាន វប្បធម៌ ប្រវត្តិសាស្ត្រវត្តភ្នំ អបអរសាទរបុណ្យចូលឆ្នាំថ្មី ប្រពៃណីខ្មែរ ចាប់ពីថ្ងៃទី១៤ ដល់ថ្ងៃទី១៦ ខែមេសានេះ។បើតាមលោក ទុយ សុភា មន្ត្រីតំណាងមន្ទីរវប្បធម៌ និងវិចិត្រសិល្បៈរាជធានីភ្នំពេញ បានថ្លែងថា នៅក្នុងដំណើរការដាក់ការដ្ឋានសាងសង់ រៀបចំរចនាតុបតែងភ្លើងពណ៌ ឆាកប្រគំតន្ត្រី ស្តង់ពិព័រណ៍នៅពេលនេះ ត្រៀមប្រារព្វកម្មវិធីសង្ក្រាន្តវត្តភ្នំឆ្នាំនេះ គឺមានរៀបចំទីតាំងធ្វើកម្មវិធីបង្ហាញទម្រង់សិល្បៈ ល្បែង របាំ ម្ហូបអាហារ តាមបែបវប្បធម៌ ប្រពៃណីខ្មែរ ប្រមាណ១៥ទីតាំង ក្នុងនោះមានដូចជា ទីតាំងពិធីធ្វើកិច្ចសាសនា ហែរក្បួនពុទ្ធរូប ទីតាំងស្តង់ពិព័រណ៍បង្ហាញសម្បតិ្តវប្បធម៌ខ្មែរ ទីតាំងសួនផ្ការំដួល ទីតាំងសម្តែងរបាំសិល្បៈទស្សនីយភាព និងទីតាំងរាំកម្សាន្តសប្បាយតាមបែបខ្មែរជាដើម។តាមការគ្រោងទុក រដ្ឋបាលរាជធានីភ្នំពេញ នឹងរៀបចំពិធីក្រុងពិលីបើកការដ្ឋានសាងសង់រៀបចំទីតាំងប្រារព្វកម្មវិធីសង្ក្រាន្តវត្តភ្នំ នៅថ្ងៃទី២៧ ខែមីនានេះ ហើយការដ្ឋានរៀបចំទីតាំងប្រារព្វពិធីទាំងមូល នឹងធ្វើឲ្យហើយ នៅមុនថ្ងៃបុណ្យចូលឆ្នាំថ្មីប្រពៃណីខ្មែរឈានចូលមកដល់ ។មន្ទីរទេសចរណ៍រាជធានីភ្នំពេញរំពឹងថា ព្រឹត្តិការណ៍សង្ក្រាន្តវត្តភ្នំឆ្នាំ២០២៥នេះ នឹងមានពលរដ្ឋ ភ្ញៀវទេសចរជាតិអន្តរជាតិ ចូលរួមទស្សនាកម្សាន្តសប្បាយកើនលើសឆ្នាំកន្លងទៅ ខណៈព្រឹត្តិការណ៍សង្ក្រាន្តវត្តភ្នំរយៈពេល៤ថ្ងៃ នៅក្នុងឆ្នាំ២០២៤កន្លងទៅ គឺមានពលរដ្ឋ ភ្ញៀវទេសចរជាតិ អន្តរជាតិចូលទស្សនាកម្សាន្តសប្បាយ មានប្រមាណ១លាន២៤ម៉ឺននាក់ និងបានធ្វើឲ្យរាជធានីភ្នំពេញទាំងមូលដ្ឋានទទួលបានភ្ញៀវទេសចរជាតិ អន្តរជាតិ ប្រមាណជាង ១លាន៣០ម៉ឺននាក់ ទេសចរអន្តរជាតិជិតពីរម៉ឺននាក់ ៕ អត្ថបទ៖ ស៊ុម សុខជា

ឆ្នាំ២០២៤ កម្មវិធីជាតិកំចាត់រោគរបេង សម្រេចបាននូវអត្រាព្យាបាលជោគជ័យ លើសពី ៩០%

ឯកឧត្តមវេជ្ជបណ្ឌិត ម៉ៅ តាន់អ៊ាង អនុរដ្ឋលេខាធិការ តំណាងដ៏ខ្ពង់ខ្ពស់ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអៈអាងថា ក្នុងឆ្នាំ២០២៤ កម្មវិធីជាតិកំចាត់រោគរបេង សម្រេចបានសមិទ្ធិផលសំខាន់ៗថ្មីបន្ថែមទៀត ពិសេស ការបន្ត រក្សាបាននូវអត្រាព្យាបាលជោគជ័យ លើសពី ៩០% និងបានស្រាវជ្រាវរកឃើញ ជំងឺរបេង គ្រប់សណ្ឋានសរុប ចំនួន ៣៣ ៧៦៩ ករណី ។ ការថ្លែងរបស់ឯកឧត្តមវេជ្ជបណ្ឌិត ម៉ៅ តាន់អ៊ាង អនុរដ្ឋលេខាធិការ យ៉ាងដូច្នេះក្នុងពិធីបិទ សន្និបាតការងារកំចាត់រោគរបេងទូទាំងប្រទេស លើកទី២៨ ប្រចាំឆ្នាំ ២០២៤ ដែលបានប្រព្រឹត្តិទៅ អស់រយៈពេល ២ថ្ងៃ យ៉ាងសកម្ម និងមានការទទួលខុសត្រូវខ្ពស់ ព្រមទាំងប្រកបទៅដោយ បរិយាកាស ស្និទ្ធស្នាល និង រីករាយក្រៃលែង, នារសៀលថ្ងៃទី១៩ ខែមីនា ឆ្នាំ២០២៥។ឯកឧត្តមវេជ្ជបណ្ឌិត ម៉ៅ តាន់អ៊ាង បន្តថា ការរក្សាបាន ការគ្របដណ្តប់នៃដំណើរការសេវារបេង នៅគ្រប់មន្ទីរពេទ្យបង្អែក មណ្ឌលសុខភាពទាំងអស់ទូទាំងប្រទេស ព្រមទាំងមានសេវារបេងនៅតាមសហគមន៍ ផងដែរ។ ជំនះដោះស្រាយនូវរាល់ចំណុចខ្វះខាតទាំងនេះ រួចហើយពង្រឹងចំណុចខ្លាំង ឱ្យកាន់តែមានលក្ខណៈប្រសើរឡើង ដើម្បីចូលរួម សម្រេចឱ្យបាននូវ គោលដៅអភិវឌ្ឍន៍ ប្រកបដោយចិរភាព នាដំណាច់ ឆ្នាំ២០៣០ និងគោលដៅនៅបណ្តាឆ្នាំបន្ត ក៏ដូចជារួមចំណែក ការអភិវឌ្ឍន៍សេដ្ឋកិច្ច និងសុខុមាលភាពសង្គម ។ឆ្លៀតក្នុងឱកាសនេះតាងនាមអោយក្រសួងសុខាភិបាល ឯកឧត្តម សូមថ្លែងអំណរគុណយ៉ាង ជ្រាលជ្រៅបំផុត និងកត្តញ្ញូតាធម៍ជូនចំពោះសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលជានិច្ចកាល សម្តេច ជួយឧបត្ថម្ភគាំទ្រដល់វិស័យសុខាភិបាល បានយកចិត្តទុកដាក់យ៉ាងខ្លាំង ដល់សុខភាព និងសុខុមាលភាពរបស់ប្រជាជនកម្ពុជា រួមទាំងជំងឺរបេងផងដែរ។ ក្នុងក្តីសោមនស្សរីករាយ ចំពោះលទ្ធផលខាងលើផងដែរ ក៏សូមថ្លែងអំណរគុណដល់មន្ត្រីសុខាភិបាល អាជ្ញាធរមូលដ្ឋាន និងភាគីអង្គការអន្តរជាតិ ជាដៃគូទាំងអស់ដែលមានជាអាទិ៍ អង្គការសុខភាពពិភពលោក (WHO), អង្គការមូលនិធិសកល (Global Fund), អង្គការ USAID និងអង្គការផ្សេងៗទៀត ដែលបានឧបត្ថម្ភគាំទ្រ ដល់ការងាររបេង គ្រប់ថ្នាក់ និងគ្រប់ផ្នែក រាប់ទាំងការងារ អភិវឌ្ឍន៍ធនធានមនុស្ស ការផ្គត់ផ្គង់សំភារៈបរិក្ខារ ឱសថ និងការងារ បច្ចេកទេស ធ្វើឱ្យការងារកំចាត់រោគរបេង បានទទួលជោគជ័យយ៉ាងត្រចះត្រចង់ ។បើតាមរបាយការណ៍បូកសរុបសន្និបាត ស្តីពីការងារកំចាត់រោគរបេង របស់លោកប្រធានមជ្ឈមណ្ឌលជាតិ កំចាត់រោគរបេង និងហង់សិន ថា ដំណើរការសន្និបាតក្នុងរយៈពេល ២ថ្ងៃកន្លង មកនេះ បានប្រព្រឹត្តទៅប្រកបដោយជោគជ័យ ដែលឆ្លុះបញ្ចាំងឱ្យឃើញពីការខិតខំប្រឹងប្រែងរួមគ្នា រវាង ស្ថាប័ន សុខាភិបាល និងប្រតិបត្តិករ គ្រប់លំដាប់ថ្នាក់ ស្ថាប័នពាក់ព័ន្ធផ្សេងៗ ព្រមទាំងអង្គការជាតិ និង អន្តរជាតិនានា ទៀត ផង។ អាស្រ័យដោយមានកិច្ចទំនាក់ទំនង និងសហការបានយ៉ាងល្អដូច្នេះហើយ ទើបការងារកំចាត់រោគរបេងកន្លង មក ទទួលបានជោគជ័យ គួរជាទីមោទនៈ៕អត្ថបទ រដ្ឋា

ការទប់ស្កាត់នាំចូលសាច់បង្កករបស់រាជរដ្ឋាភិបាល បានគាំទ្រភាពរីកចម្រើន នៃការចិញ្ចឹមសត្វក្នុងស្រុក

ប្រធានសមាគមអ្នកចិញ្ចឹមសត្វនៅកម្ពុជា ថា វិធានការណ៍ទប់ស្កាត់នៃការនាំចូលសាច់បង្កករបស់រាជរដ្ឋាភិបាល ក្នុងរយៈពេល១ឆ្នាំមក នេះ បានគាំទ្រពេញទំហឹងលើការចិញ្ចឹមសត្វក្នុងស្រុក និងបានកែប្រែកសិដ្ឋានមួយចំនួន ឈានទៅចិញ្ចឹមសត្វជាលក្ខណៈឧស្សាហកម្ម ទំទើប ឆ្លើយតបដល់ការផ្គត់ផ្គង់សាច់លើទីផ្សារ និងការនាំចេញ។លោក ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជា ថ្លែងលើកឡើងក្នុងសម្ភាសន៍ជាមួយអ្នកយកព័ត៌មាន ស្តីពីការចិញ្ចឹម នៅកម្ពុជា នេះថា ជុំវិញការចិញ្ចឹមសត្វជ្រូក គោ មាន់ ទាន នៅកម្ពុជា, នៅដើមឆ្នាំ២០២៤ អ្នកចិញ្ចឹមនៅកម្ពុជា ជាពិសេសការចិញ្ចឹមជ្រូក កសិករបានជួបឧបសគ្គបន្តិចបន្តួច ប៉ុន្តែបន្ទាប់ពីរាជរដ្ឋាភិបាលបានបិទផ្អាកបំណែកនៃសាច់បង្កក បានធ្វើឱ្យសកម្មភាពនៃការចិញ្ចឹមសត្វ ក្នុងស្រុកកម្រើកឡើងយ៉ាងផុលផុស និងបានជំរុញផ្គត់ផ្គង់ជំនួសការនាំចូលបានទាំងស្រុង ដែលនេះបានបង្ហាញឱ្យឃើញពីការរីកចម្រើន យ៉ាងឆាប់រហ័សនៃការចិញ្ចឹមសត្វនៅកម្ពុជា។លោក ស្រ៊ុន ពៅ បន្ថែមថា មកដល់បច្ចុប្បន្ន វិស័យចិញ្ចឹមសត្វជ្រូកនៅកម្ពុជា បានកំពុងវិវត្តន៍រីកច្រើន និងកំពុងកែប្រែឈានទៅ ចិញ្ចឹមជាលក្ខណៈឧស្សាហកម្មទំទើប ប្រកបដោយអនាម័យ និងស្របតាមស្តង់ដារខ្ពស់ សម្រាប់ផ្គត់ផ្គង់សាច់ក្នុងស្រុកដែលមានគុណភាព និងកំពុងតម្រង់ទិសទៅរកទីផ្សារនាំចេញ។ របត់នៃការរីកចម្រើននេះ នឹងបន្តទៅមុខប្រកបដោយទំនុកចិត្ត ទោះបីរាជរដ្ឋាភិបាល បើកឱ្យ នាំចូលសាច់បង្កកឡើងវិញក៏ដោយ ។ បញ្ហានេះផងដែរ លោកក៏បានសំណូមពរខ្លះៗ ដល់ក្រសួងស្ថាប័នពាក់ព័ន្ធ សូមអនុញ្ញាតឱ្យនាំចូល សាច់ដែលមានគុណភាព ចំណែកប្រភេទសាច់ដែលកម្ពុជាមាន គួរកាត់បន្ថយនៃការនាំចូល ដើម្បីជំរុញការរីកលូតលាស់ក្នុងការចិញ្ចឹម សត្វ និងផ្គត់ផ្គង់សាច់សត្វប្រកបដោយនិរន្តរភាព។សូមបញ្ជាក់ថា កន្លងមកនេះ បន្ទាប់ពីទីផ្សារចិញ្ចឹមសត្វក្នុងស្រុកបានស្រុតចុះ រាជរដ្ឋាភិបាលក៏បានដាក់ចេញនូវអន្តរាគមន៍ មានរយៈពេល រយៈពេល ៦ ខែ ចាប់ផ្ដើមពីខែ មីនា ឆ្នាំ២០២៤ និងបានបន្តការអន្តរាគមន៍រយៈពេល ៦ ខែបន្ថែម លើវិធាការណ៍ទប់ស្កាត់នៃការនាំ ចូលសាច់បង្កក ដើម្បីជួយជ្រោមជ្រែង និងលើកកម្ពស់ ការចិញ្ចឹមសត្វក្នុងស្រុក ឲ្យការរីកចម្រើនខ្លាំងក្លា សម្រាប់ផ្គត់ផ្គង់ទីផ្សារក្នុងស្រុក ក៏ដូចជាការនាំចេញ។ ជុំវិញវិស័យកសិកម្មនេះដែរ នៅក្នុងឆ្នាំ ២០២៥ នេះ រាជរដ្ឋាភិបាលរំពឹងថា វិស័យកសិកម្ម នឹងបន្តសម្រេចបាន កំណើនល្អក្នុងរង្វង់ ១,១% ដោយសារការបន្តនិន្នាការល្អនៃអនុវិស័យដំណាំ និងការបន្តងើបឡើងវិញនៃអនុវិស័យនេសាទ ខណៈដែល អនុវិស័យចិញ្ចឹមសត្វនៅបន្តមានស្ថិរភាព, ដោយសារការរំពឹងទុកនូវការកើនឡើងនៃផលិតកម្ម ដែលជំរុញដោយតម្រូវការក្នុងស្រុក សម្រាប់បម្រើការបន្តងើបឡើងវិញនៃវិស័យទេសចរណ៍ គួបផ្សំជាមួយវិធានការអន្តរាគមន៍របស់រាជរដ្ឋាភិបាល និងការអនុវត្តរបស់គម្រោង របស់ដៃគូរអភិវឌ្ឍន៍នានា៕អត្ថបទ៖ សុន រ៉ាឌី

សម្ដេចធិបតីបញ្ជាក់អំពីការពង្រីកបរិមាណ និងគុណភាពអប់រំ ឱ្យដល់តំបន់ចុងកាត់មាត់ញក

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងបញ្ជាក់អំពីការខិតខំយក ចិត្តទុកដាក់ក្នុងការពង្រីកបរិមាណ និងគុណភាពអប់រំឱ្យដល់តំបន់ចុងកាត់មាត់ញក បង្កើតលទ្ធភាពការ ទទួលបានការសិក្សារបស់កូនចៅប្រជាពលរដ្ឋគ្រប់តំបន់ ។ក្នុងពិធីសម្ពោធអគារសិក្សា និងសមិទ្ធផលនានា នៃវិទ្យាល័យ ហ៊ុន សែន សេរីភាព ក្នុងក្រុងតាខ្មៅ នាព្រឹកថ្ងៃទី២១ ខែមីនា នេះ សម្ដេចធិបតី ហ៊ុន ម៉ាណែត បានណែនាំក្រសួងអប់រំ យុវជន និងកីឡា ជំរុញ ពង្រឹងការអប់រំរៀនសូត្រចាប់ពីថ្នាក់បឋមរហូតដល់ថ្នាក់ទី១២ ដែលជាមូលដ្ឋានគ្រឹះរឹងមាំ។ បង្កើនបរិ មាណសាលា និងគុណភាពដល់គ្រប់តំបន់ទាំងអស់តាមជំហ៊ាន ដើម្បីជួយសម្រួលដល់លទ្ធភាពរបស់ កូនចៅប្រជាពលរដ្ឋនៅគ្រប់តំបន់ទាំងអស់។សម្ដេចធិបតី ក៏បានបញ្ជាក់អំពីការការធ្វើទំនើបកម្មលើវិស័យអប់រំជាបន្តបន្ទាប់តាមជំហ៊ានៗ ចាប់ តាំងពីថ្នាក់មូលដ្ឋានឡើងទៅ ដើម្បីលើកកម្ពស់ធនធានមនុស្សរបស់ប្រទេសកម្ពុជាឱ្យកាន់តែខ្លាំងក្លា ។ ជំរុញពង្រឹងគុណវុឌ្ឍិរបស់លោកគ្រូ អ្នកគ្រូ តាមរយៈការជំរុញលោកគ្រូអ្នកគ្រូ ឱ្យខិតខំសិក្សាស្រាវជ្រាវជាប់ ជាប្រចាំ ដើម្បីគុណភាពនៃការបង្រៀន ៕អត្ថបទ៖ វ៉ាន់

សម្ដេចធិបតី អំពាវនាវដល់សិស្សានុសិស្សឱ្យចៀសឆ្ងាយពីគ្រឿងញៀន ដែលនឹងនាំឱ្យខូចអនាគត

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានធ្វើការអំពាវនាវដល់សិស្សានុសិស្សទាំង ឡាយឱ្យចៀសឆ្ងាយពីគ្រឿងញៀន ដែលនឹងនាំឱ្យខូចអនាគត ងាកមកខិតខំប្រឹងប្រែងរៀនសូត្រដើម្បីឆ្លើយតបទៅ នឹងការខិតខំលះបង់របស់ឪពុកម្ដាយដែលចង់ឃើញកូនមានអនាគតល្អ ។សម្ដេចធិបតី ហ៊ុន ម៉ាណែត នាយករដ្ឋមន្ត្រី ក្នុងឱកាសអញ្ជើញជាអធិបតីសម្ពោធអគារសិក្សា និង សមិទ្ធផលនានា នៃវិទ្យាល័យ ហ៊ុន សែន សេរីភាព ក្នុងក្រុងតាខ្មៅ នាព្រឹកថ្ងៃទី២១ ខែមីនា នេះ បាន ណែនាំសិស្សានុសិស្សឱ្យចៀសឆ្ងាយពីគ្រឿងញៀន នាំខូចអនាគតខ្លួន ជាពិសេស ឪពុកម្ដាយខូចចិត្ត ដែលបានខិតខំលះបង់គ្រប់យ៉ាងដើម្បីចិញ្ចឹមបីបាច់ថែរក្សាកូន ចង់ឃើញកូនបានល្អ តែមិនបានដូចបំ ណងប្រាថ្នា ។សម្ដេចធិបតី ហ៊ុន ម៉ាណែត បានលើកឡើងប្រាប់សិស្សានុសិស្ស គ្រូបង្រៀនទាំងអស់ អំពីការខិតខំគិតគូរ គ្រប់បែបយ៉ាងនាពេលនេះចំពោះវិស័យអប់រំ ពិសេសគឺការរឹតបន្តឹងការសិក្សាអប់រំ ការប្រឡងនាពេលចុង ក្រោយនេះ គឺដើម្បីអនាគតរបស់យុវជន ដែលជាអ្នកបន្តវេនរបស់ប្រទេសជាតិ ដូច្នេះសិស្សានុសិស្សទាំង អស់ត្រូវតែខិតខំរៀនសូត្រឱ្យបានក្លាយខ្លួនទៅជាធនធានមនុស្សប្រកបដោយថាមពលរបស់ជាតិ ៕អត្ថបទ៖ វ៉ាន់

កម្ពុជារៀបចំពិធីអបអរសាទរទិវាទឹក និងឧតុនិយមពិភពលោកឆ្នាំ២០២៥

ក្រសួងធនធានទឹក និងឧតុនិយម គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប នៅព្រឹកថ្ងៃទី២១ខែមីនានេះ បានរៀបចំពិធីអបអរសាទរទិវា«ទឹក និងឧតុនិយម ពិភពលោក ឆ្នាំ២០២៥» នៅទីស្តីការក្រសួងធនធានទឹក និងឧតុនិយម ក្រោមអធិបតីភាពឯកឧត្តម ថោ ជេដ្ឋា រដ្ឋមន្ត្រីក្រសួង ធនធានទឹក និងឧតុនិយម ដោយមានការអញ្ជើញចូលរួមពីតំណាង ក្រសួងស្ថាប័នពាក់ព័ន្ធ និងនិស្សិតមកពីសាកលវិទ្យាល័យនានាសរុបប្រមាណ ៤០០នាក់ ។នៅក្នុងអង្គពិធីឯកឧត្តមរដ្ឋមន្រ្តី បានថ្លែងថា ទឹក គឺជាជីវិតជាទស្សនទានដ៏ពេញនិយមបំផុតលើសកលលោកក្នុងសហស្សវត្សរ៍ថ្មីនេះ ដែលសំដៅដល់ការកកើតឡើង និងការទ្រទ្រង់នៃជីវិតមនុស្ស សត្វ និងរុក្ខជាតិ លើភពផែនដីនេះដោយសារទឹក។ហើយធនធានទឹក ជាស្នូលនៃការអភិវឌ្ឍសង្គម សេដ្ឋកិច្ច បរិស្ថាន និងវប្បធម៌។ ក្នុងន័យនេះ ក្រសួងធនធានទឹក និងឧតុនិយម នឹងបន្តពង្រឹងកិច្ចសហប្រតិបត្តិការបន្ថែមទៀតជាមួយក្រសួង-ស្ថាប័នពាក់ព័ន្ធទាំងអស់ ក្នុងការអនុវត្តតាមគោលនយោបាយទឹករបស់ព្រះរាជាណាចក្រកម្ពុជាឱ្យកាន់តែមានប្រសិទ្ធភាព និរន្តរភាព និងបរិយាបន្ន ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។គួរបញ្ជាក់ដែរថា «ទិវាទឹក និងឧតុនិយមពិភពលោក» គឺជាព្រឹត្តិការណ៍ដែលត្រូវបានទទួលស្គាល់ជាសកល ដោយបង្ហាញពីសារៈសំខាន់នៃធនធានទឹក និងសេវាឧតុនិយម ក្នុងការអភិវឌ្ឍប្រកបដោយចីរភាព ការកាត់បន្ថយហានិភ័យគ្រោះមហន្តរាយ និងភាពធន់នឹងអាកាសធាតុ។ ទិវាទឹក និងឧតុនិយមពិភពលោកក្នុងឆ្នាំនេះ ផ្តោតលើប្រធានបទ«ការការពារផ្ទាំងទឹកកក» និង«រួមគ្នាបិទគម្លាតការប្រកាសព្រមានជាមុន»។ ប្រធានបទទាំងពីរនេះ បង្ហាញពីសារៈសំខាន់នៃការការពារប្រភពទឹក និងការពង្រឹងប្រព័ន្ធប្រកាសព័ត៌មានឱ្យដឹងមុន ដើម្បីកាត់បន្ថយផលប៉ះពាល់នៃការប្រែប្រួលអាកាសធាតុ និងព្រឹត្តិការណ៍អាកាសធាតុធ្ងន់ធ្ងរ៕ អត្ថបទ៖ទូច សោភ័ណ

គ្រឹះស្ថានឧត្តមសិក្សាកំពុងចូលរួមជួយប្រែក្លាយកម្លាំងយុវជន ទៅជាសសរស្ដម្ភ និងជាឆ្អឹងខ្នងរបស់ជាតិ

ភ្នំពេញ៖ ឯកឧត្តម ស សុខា អនុប្រធានសហភាពសហព័ន្ធយុវជនកម្ពុជា (ស.ស.យ.ក) និងជាប្រធានក្រុមប្រឹក្សាយុវជនគ្រឹះស្ថានឧត្តមសិក្សា (ក.យ.គ.) បានថ្លែងថា គ្រឹះស្ថានឧត្តមសិក្សារដ្ឋ និងឯកជន កំពុងចូលរួមជាមួយរាជរដ្ឋាភិបាល ធ្វើការប្រមូលផ្ដុំ និងប្រែក្លាយកម្លាំងយុវជន ទៅជាសសរស្ដម្ភ និងជាឆ្អឹងខ្នងរបស់ប្រទេសជាតិ ។ក្នុងពិធីបើកសន្និបាតបូកសរុបលទ្ធផលការងារ ឆ្នាំ២០២៤ និងលើកទិសដៅការងារឆ្នាំ២០២៥ នៅថ្ងៃទី២១ ខែមីនា ឆ្នាំ២០២៥ មានការអញ្ជើញចូលរួមពីថ្នាក់ដឹកនាំ និងសមាជិក ក.យ.គ. សរុបចំនួន៥៥០នាក់ ឯកឧត្តម ស សុខា មានប្រសាសន៍ថា ឯកឧត្តម ហ៊ុន ម៉ានី ប្រធានសហភាព សហព័ន្ធយុវជនកម្ពុជា តែងតែណែនាំតម្រង់ទិស និងដាក់ចេញនូវផែនការ ជាបន្តបន្ទាប់ សម្រាប់ជាមូលដ្ឋានឱ្យ ក.យ.គ. យកមកអនុវត្ត ដើម្បីសម្រេចបានតាមចក្ខុវិស័យ និងគោលបំណងរបស់ ស.ស.យ.ក. ។លទ្ធផលការងារសំខាន់ៗនោះ ត្រូវបានឯកឧត្តម ស សុខា កត់សម្គាល់ជាអាទិ៍ ការចូលរួមរៀបចំ កម្មវិធីសាទរកម្ពុជា ការចូលរួមក្នុងកម្មវិធីកីឡា ការធ្វើសកម្មភាពសង្គមតាមគ្រឹះស្ថានឧត្តមសិក្សា និងតាមសហគមន៍ ការរៀបចំសិក្ខាសាលា បាឋកថា និងវគ្គបណ្ដុះបណ្ដាលជាច្រើននៅតាមគ្រឹះស្ថានឧត្តមសិក្សា ។ឯកឧត្តមបានបន្តថា ក្រៅពីនោះ បានកៀរគរយុវជនឱ្យចូលរួមសកម្មភាពនានា និងចូលជាសមាជិក ស.ស.យ.ក. និងការពង្រីករចនាសម្ព័ន្ធរបស់ ក.យ.គ. ដោយបន្ថែមគណៈដឹកនាំចលនាយុវជនស្ម័គ្រចិត្ត និងបង្កើតក្រុមការងារយុវជន ស.ស.យ.ក. ប្រចាំគ្រឹះស្ថានឧត្តមសិក្សារដ្ឋ និងឯកជនបន្ថែមទៀត ក្នុងន័យដើម្បីប្រមូលផ្ដុំ និងប្រែក្លាយកម្លាំងយុវជនឱ្យទៅជាសសរស្ដម្ភ និងជាឆ្អឹងខ្នងដ៏រឹងមាំរបស់ជាតិមាតុភូមិ និងប្រជាជន រួមពូនជ្រុំកសាងសង្គមជាតិមួយដ៏ទំនើប រស់រវើក មានសុវត្ថិភាព បរិស្ថានរស់នៅល្អប្រសើរ និងមានវឌ្ឍនភាពគ្រប់វិស័យ ។ សូមបញ្ជាក់ថា សន្និបាតឆ្នាំនេះ មានគោលបំណងត្រួតពិនិត្យ និងវាយតម្លៃលទ្ធផលការងារសម្រេចបាន ចំណុចខ្លាំង បញ្ហាប្រឈម ដំណោះស្រាយ ព្រមទាំងដាក់ចេញនូវទិសដៅការងារបន្តសម្រាប់ឆ្នាំ២០២៥ ដោយមានការធ្វើបទអន្តរាគមន៍លើប្រធានបទចំនួន៥ ទាក់ទងទៅនឹងការសិក្សាជំនាញ STEAM តម្រូវការទីផ្សារការងារក្នុងសម័យឌីជីថល ការបណ្ដុះបណ្ដាលជំនាញវិជ្ជាជីវៈនិងបច្ចេកទេស ការចូលរួមចំណែករបស់យុវជនក្នុងសង្គមជាតិ និងការប្រើប្រាស់បច្ចេកវិទ្យាឌីជីថល ៕អត្ថបទ បាន សុខរិទ្ធិ

ឧត្តមសេនីយ៍ឯក ចាន់ វ៉ាន់ធឿន អញ្ជើញចូលរួមបិទវគ្គបំប៉នជំនាញកម្មសិទ្ធិបញ្ញាស្តីពី “ការកំណត់អត្តសញ្ញាណផលិតផល”

ភ្នំពេញ ៖ ឯកឧត្តមឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច សហការជាមួយក្រុមហ៊ុន S&O INTELLECTUAL PROPERTY CAMBODIA រៀបចំវគ្គបំប៉នជំនាញកម្មសិទ្ធិបញ្ញាស្តីពី “ការកំណត់អត្តសញ្ញាណផលិតផល”។កាលពីរសៀលថ្ងៃទី២០ ខែមីនា ឆ្នាំ២០២៥ម្សិលមិញនេះ ដោយទទួលបានការអនុញ្ញាតពី ឯកឧត្តម នាយឧត្ដមសេនីយ៍ ស ថេត អគ្គស្នងការនគរបាលជាតិ កម្លាំងជំនាញនាយកដ្ឋាននគរបាលប្រឆាំងបទល្មើសសេដ្ឋកិច្ច បានសហការជាមួយក្រុមហ៊ុន S&O INTELLECTUAL PROPERTY CAMBODIA រៀបចំវគ្គបំប៉នជំនាញកម្មសិទ្ធិបញ្ញាស្តីពី “ការកំណត់អត្តសញ្ញាណផលិតផល” នៅសណ្ឋាគារ SUNWAY រាជធានីភ្នំពេញ ជូនដល់សិក្ខាកាមជាមន្ត្រីនគរបាលប្រឆាំងបទល្មើសសេដ្ឋកិច្ចសរុបចំនួន ៣២រូប ដែលមកពីនាយកដ្ឋាននគរបាលប្រឆាំងបទល្មើសសេដ្ឋកិច្ច ស្នងការដ្ឋាននគរបាលរាជធានីភ្នំពេញ ខេត្តកណ្តាល និងកំពង់ឆ្នាំង។ក្នុងវគ្គបណ្ដុះបណ្ដាលនេះមានគោលបំណង កសាងសមត្ថភាពជំនាញដល់មន្ត្រីនគរបាលប្រឆាំងបទល្មើសសេដ្ឋកិច្ច ដើម្បីបង្កើនការជឿទុកចិត្តលើប្រព័ន្ធយុត្តិធម៌កម្ពុជា ស្របតាមកម្មវិធីនយោបាយ និងយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧នៃរដ្ឋសភា ក្រោមការដឹកនាំប្រកបដោយគតិបណ្ឌិតឈ្លាសវៃ និងទស្សនវិស័យកំណែទម្រង់របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងដើម្បីឈានទៅដល់ការកែសម្រួល កែលម្អ កែតម្រូវ និងកែទម្រង់ ព្រមទាំងជម្រុញការងារឱ្យកាន់តែមានប្រសិទ្ធភាពខ្ពស់បន្ថែម ក្នុងការអនុវត្តច្បាប់កម្មសិទ្ធិបញ្ញាសម្រាប់ពេលបច្ចុប្បន្ន និងអនាគត ។ ឯកឧត្តម ឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច បានថ្លែងក្នុងពិធីបិទវគ្គ សូមអរគុណដល់ក្រុមហ៊ុន S&O INTELLECTUAL PROPERTY CAMBODIA និងដៃគូរ ដែលបានឧបត្ថម្ភ គាំទ្រសម្រាប់វគ្គបំប៉នជំនាញកម្មសិទ្ធិបញ្ញា ដ៏មានសារៈសំខាន់មួយនេះ និងអរគុណដល់វាគ្មិនមកពីនាយកដ្ឋានកម្មសិទ្ធិបញ្ញា ក្រសួងពាណិជ្ជកម្ម ព្រមទាំងគ្រូបង្គោលរបស់ នាយកដ្ឋាននគរបាលប្រឆាំងបទល្មើសសេដ្ឋកិច្ច ក៏ដូចជាតំណាងម្ចាស់ម៉ាក ដែលចំណាយពេលដ៏មានតម្លៃមកធ្វើបទបង្ហាញ និងចែករំលែកបទពិសោធន៍ដល់សិក្ខាកាម ។ ជាចុងក្រោយ ឯកឧត្តម ឧត្តមសេនីយ៍ឯកប្រធាននាយកដ្ឋាន បានផ្តាំផ្ញើដល់សិក្ខាកាមទាំងអស់ សូមយកនូវចំណេះដឹងដែលទទួលបានពីវគ្គបំប៉ននៅពេលនេះទៅបំពេញចំណុចខ្វះខាត ការយល់ច្រឡំ និងសំណូមពរចាំបាច់នានា ឆ្លើយតបទៅនឹងតម្រូវការ នៃការប្រតិបត្តិច្បាប់ពាក់ព័ន្ធជាមូលដ្ឋានក្នុងការពិនិត្យ ពិចារណា និងកែសម្រួលលើការអនុវត្តតួនាទី និងភារកិច្ចរបស់មន្រ្តីនគរបាលយុត្តិធម៌ ឲ្យស្របតាមក្រមនីតិវីធីព្រហ្មទណ្ឌ ក៏ដូចជាស្របតាមច្បាប់ និងបទប្បញ្ញត្តិជាធរមាន ឱ្យមានប្រសិទ្ធភាពខ្ពស់ ដើម្បីបង្កើនការជឿទុកចិត្តពីសំណាក់អ្នកវិនិយោគ អាជីវករ កម្មសិទ្ធិករ សហគមន៍ និងប្រជាពលរដ្ឋ មកលើ មន្ត្រីនគរបាលជាតិ ៕អត្ថបទ៖ កុម្ភៈ

គម្ពីរព្រះត្រៃបិដកចំនួន៥០០០ច្បាប់ ត្រូវបានតម្កល់ទុកនៅមជ្ឈមណ្ឌលវិបស្សនាធុរៈ ភូមិភាគឦសាននៃកម្ពុជា

នៅព្រឹកថ្ងៃទី២១ ខែមីនា ឆ្នាំ២០២៥នេះ លោកជំទាវបណ្ឌិត ពេជ ចន្ទមុនី ហ៊ុនម៉ាណែត រួមជាមួយគណៈប្រតិភូអមដំណើរ និងអភិបាលនៃគណៈអភិបាលខេត្តព្រះវិហារ ព្រះសង្ឃ មន្ត្រីរាជការ សិស្សានុសិស្ស ដូនជី តាជី និងប្រជាពុទ្ធបរិស័ទ ជាច្រើនកុះករ បានអញ្ជើញចូលរួមដង្ហែ និងសូត្រអានគម្ពីរព្រះត្រៃបិដក ព្រះពុទ្ធសាសនាខ្មែរ នៅមជ្ឈមណ្ឌលវិបស្សនាធុរៈ ភូមិភាគឦសាននៃកម្ពុជា ក្នុងវត្តពោធិ៍៥០០០ដើម ស្ថិតនៅភូមិគូលែនត្បូង ឃុំគូលែនត្បូង ស្រុកគូលែន ខេត្តព្រះវិហារ។តាមរបាយការណ៍របស់ឯកឧត្ដម គីម រិទ្ធី អភិបាល នៃគណៈអភិបាលខេត្តព្រះវិហារ បានឱ្យដឹងថា ខណៈប្រទេសជាតិមានសុខសន្តិភាព ទើបប្រជាពលរដ្ឋគ្រប់រូបមានឱកាសធ្វើបុណ្យ ធ្វើទាន ជាក់ស្តែងដូចជាកន្លងមកអស់រយៈពេលមួយឆ្នាំហើយនេះ ដែលពុទ្ធសាសនិកគ្រប់មជ្ឈដ្ឋាន តែងតែបានយល់ច្បាស់អំពីគុណតម្លៃ នៃគម្ពីរព្រះត្រៃបិដក ព្រះពុទ្ធសាសនាខ្មែរ ហើយក៏បានស្រុះស្រួលបបួលគ្នាចំណាយនូវធនធាន ដើម្បីបោះពុម្ពគម្ពីរព្រះត្រៃបិដក បាលីនិងសេចក្តីប្រែជាភាសាខ្មែរ ចំនួន៥០០០ច្បាប់ យកមកតម្កល់ទុកនៅក្នុង មជ្ឈមណ្ឌលវិបស្សនាធុរៈ ភូមិភាគឦសាននៃកម្ពុជានេះ។ ឯកឧត្តម សូមគោរពថ្លែងអំណរគុណដល់ ពុទ្ធសាសនិកជន ដែលបានឧបត្ថម្ភ និងបានសហការជាមួយថ្នាក់ដឹកនាំគ្រប់លំដាប់ថ្នាក់ ក្រោមព្រះរាជតម្រិះដ៏ខ្ពង់ខ្ពស់បំផុត សម្តេចព្រះមហាសុមេធាធិបតី សម្ដេចព្រះសង្ឃនាយក នៃព្រះរាជាណាចក្រកម្ពុជា ព្រមទាំងពុទ្ធបរិស័ទគ្រប់មជ្ឈដ្ឋាន ដែលបានអញ្ជើញចូលរួម ក្នុងពិធីដង្ហែ និងសូត្រអានគម្ពីរព្រះត្រៃបិដក ព្រះពុទ្ធសាសនាខ្មែរនាឱកាសនេះ។ក្នុងឱកាសដ៏កម្រនេះលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ឧត្តមភរិយានាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា ថ្ងៃនេះពិតជាវិសេសវិសាសណាស់ ដែលបានអញ្ជើញចូលរួមក្នុងពិធីដង្ហែ និងសូត្រអានគម្ពីរព្រះត្រៃបិដក ដែលជាឧបករណ៍សម្រាប់សិក្សាអប់រំរៀនសូត្រ។ លោកជំទាវបណ្ឌិត បន្តថា គម្ពីរព្រះត្រៃបិដកជាក្បួនច្បាប់ យ៉ាងសំខាន់បំផុតសម្រាប់សិក្សាអប់រំ ជូនដល់មនុស្សជាតិ ឱ្យស្ថិតនៅក្នុងសីលសមាធិបញ្ញា និងមានសមត្ថភាពប្រព្រឹត្តិ និងប្រតិបត្តិបានត្រឹមត្រូវល្អប្រសើរ ក្នុងឆាកជីវិតផ្ទាល់ខ្លួន សង្គមគ្រួសារ សង្គមជាតិ និងសាសនា ថែមទាំងមានសមត្ថភាពដឹកនាំមនុស្សជាតិឱ្យធ្វើតែអំពើល្អ ប្រកបតាមធម៌បានយ៉ាងមានប្រសិទ្ធភាពបំផុត។ ការអានព្រះត្រៃបិដកជាកំពូលនៃចំណេះដឹង វិជ្ជាប្រាជ្ញា ធ្វើឲ្យសម្រេចនៅផលប្រយោជន៍ដល់ជនអ្នកអាន ព្រះត្រៃបិដកគឺមានសមត្ថភាពអាចយល់ឃើញត្រូវ ត្រិះរិះត្រូវ និយាយបានត្រឹមត្រូវ ប្រកបការងារបានល្អប្រសើរ ចេះរៀបចំមុខរបរចិញ្ចឹមជីវិតប្រកបដោយប្រយោជន៍ត្រឹមត្រូវ ថែមទាំងធ្វើអោយអ្នកអានព្រះត្រៃបិដកមានសេចក្តីព្យាយាមយ៉ាងមោះមុត មានសតិស្មារតីរឹងមាំ និងចេះតាំងចិត្តឲ្យនឹងនរ ឲ្យប្រពៃត្រឹមត្រូវប្រកបដោយសេចក្តីថ្លៃថ្នូរ សុខសុវត្ថិភាព រហូតទទួលបាននូវផលជោគជ័យពេញមួយជីវិត ទាំងប្រយោជន៍បច្ចុប្បន្ន បរៈលោក និងលោកុត្តរ យ៉ាងស័ក្តិសិទ្ធិបំផុត។លោកជំទាវបណ្ឌិត បានថ្លែងអំណរគុណគណៈកម្មការអាចារ្យវត្ត ព្រះចៅអធិការវត្ត និងប្រជាពុទ្ធបរិស័ទ គ្រប់ទិសទី ដែលបានអញ្ជើញចូលរួម ក្នុងឱកាសនេះ និងជម្រុញលើកទឹកចិត្តដល់ ប្រជាពុទ្ធបរិស័ទចូលមកសិក្សា អានស្តាប់នូវព្រះពុទ្ធវចនៈ ដែលជាពាក្យប្រៀនប្រដៅរបស់ ព្រះសម្មាសម្ពុទ្ធបរមគ្រូនៃយើង ដែលជាហេតុនាំឲ្យរក្សាបាននូវមរតកវប្បធម៌ ព្រះពុទ្ធសាសនា ដែលជាសាសនាជាតិផង ម្យ៉ាងទៀតនាំមនុស្សជាតិឲ្យបានសម្រេចមគ្គផលតាមផ្លូវកាយ សុចរិត វិចីសុចរិត និងមនោសុចរិត ប្រកបដោយប្រយោជន៍ សេចក្តីសុខ សេចក្តីចម្រើនគ្រប់ប្រការផងដែរ៕ អត្ថបទ៖ សំ ងីម

សម្ដេចធិបតី នឹងចុះពិនិត្យតាមមណ្ឌលសុខភាពដោយមិនប្រាប់មុននោះឡើយ ដើម្បីតាមដានសេវាសុខាភិបាល

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងពិធីសម្ពោធអគារសិក្សា និងសមិទ្ធផលនានាក្នុងវិទ្យាល័យ ហ៊ុន សែន សេរីភាព ក្នុងក្រុងតាខ្មៅ ខេត្តកណ្ដាលនាថ្ងៃទី២១ ខែមីនា ឆ្នាំ២០២៥ សម្ដេចបានព្រលយឱ្យដឹងថា សម្ដេចនឹងចុះតាមដានរាល់សកម្មភាពនៅតាមស្ថាប័ននានា មណ្ឌលសុ ខភាព និងការអនុវត្តកម្មវិធីរបស់រដ្ឋាភិបាលនៅតាមមូលដ្ឋានផងដែរ។ សម្ដេចបញ្ជាក់បន្ថែមថា ការចុះតាមដាននេះនឹងមិនប្រាប់ឱ្យដឹងជាមុននោះឡើយ។ មានប្រសាសន៍ក្នុងពេលអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធនោះ ក្រៅពីរម្លឹកពីការចុះដោយមិនប្រាប់ឱ្យដឹងជាមុននៅតាមទីតាំងមួយចំនួន ដើម្បីតាមដានការអនុវត្តកម្មវិធីរបស់រដ្ឋាភិបាល និងស្វែងយល់ពីតម្រូវការ ព្រមទាំងសុខទុក្ខរបស់ប្រជាពលរដ្ឋនោះ សម្ដេចធិបតីនៅថ្ងៃនេះក៏បានព្រ លយឱ្យដឹងថា សម្ដេចនឹងចុះទៅពិនិត្យតាមមណ្ឌលសុខភាពនៅពេលយប់ ដោយមិនប្រាប់ឱ្យដឹង នោះឡើយ ដើម្បីតាមដានសេវាព្យាបាលជំងឺជូនប្រជាពលរដ្ឋ ២៤ ម៉ោងលើ ២៤ ម៉ោង។សម្ដេចមហាបវរធិបតី នាយករដ្ឋមន្ត្រី រម្លឹកបន្ថែមថា ដើម្បីពលរដ្ឋមានសុខភាពល្អ គឺគ្រូពេទ្យត្រូវពិនិត្យវាយតម្លៃលើអ្នកជំងឺឱ្យត្រូវតាមស្ថានភាពរបស់អ្នកជំងឺ ពង្រឹងគុណភាពសុខាភិបាលឱ្យកាន់តែប្រសើរ និងត្រូវចេះបង្ការកុំឱ្យមានជំងឺ៕ ដោយ៖ គង់ ឌិន

បណ្ដាញសង្គម

ព័ត៌មានថ្មីៗ

អាជ្ញាធរស៊ូដង់បោសសម្អាតរថយន្តរងការបំផ្លិចបំផ្លាញ និងត្រូវបានគេលួចរាប់ពាន់គ្រឿងចេញពីផ្លូវនៅទីក្រុង Khartoum

ប៉ាឡេស្ទីនរិះគន់ការជំរុញរបស់អ៊ីស្រាអែល ដើម្បីគ្រប់គ្រងទីតាំងបុរាណនៅតំបន់វ៉េសប៊ែង

រដ្ឋមន្រ្តីអាកាសធាតុស៊ុយអែតនាំទារករបស់លោកស្រីមកចូលរួមជំនួបសហភាពអឺរ៉ុប

តម្លៃប្រេងវិលត្រឡប់មករកកម្រិតមុនសង្រ្គាមអ៊ីរ៉ង់វិញ ខណៈការផ្គត់ផ្គង់កើនឡើងពីមជ្ឈិមបូព៌ា

រថយន្តបើកបុកចូលហ្វូងអ្នកគាំទ្របាល់ទាត់ម៉ិកស៊ិក នៅទីក្រុង Cabo San Lucas ដោយមានអ្នករបួសជាច្រើននាក់

កងកម្លាំងឆ្មាំបដិវត្តន៍អ៊ីរ៉ង់ បញ្ជាក់ថា អ៊ីស្រាអែលត្រូវតែដកទ័ពចេញពីលីបង់ទាំងស្រុង

កុងហ្គោចេញនីតិវិធីចត្តាឡីស័ក ចំពោះអ្នកធ្វើដំណើរមកពីតំបន់រងប៉ះពាល់ដោយជំងឺ Ebola

កិច្ចព្រមព្រៀងពាណិជ្ជកម្ម រវាង EU និងអាមេរិក នឹងចូលជាធរមានមុនថ្ងៃកំណត់របស់លោក Trump

លោក Trump លើកឡើងថា មេដឹកនាំអ៊ុយក្រែន កំពុងធ្វើបាន «ល្អ» ក្នុងការតទល់នឹងរុស្ស៊ី

ដាណឺម៉ាកអនុម័តការដាក់ពង្រាយបេសកកម្ម នៅច្រកសមុទ្រ Hormuz

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877