នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សហគ្រាសក្នុងស្រុកគាំទ្រវិធានការរបស់រាជរដ្ឋាភិបាលក្នុងការទប់ស្កាត់ការគេចពន្ធ និងការនាំចូលទំនិញខុសច្បាប់
ក្រសួងបរិស្ថានសម្រេចជ្រើសរើសសហគមន៍តំបន់ការពារធម្មជាតិ នៅខេត្តពោធិ៍សាត់ ធ្វើជាគំរូដំបូងគេដាំស្មៅយក្ស
សមត្ថកិច្ចចុះត្រួតពិនិត្យ៤ទីតាំង​​ ក្នុងក្រុងប៉ោយប៉ែតរកឃើញជនបរទេស​ស្នាក់នៅ​ជាង១០០នាក់ ដែលកំពុងប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា
ជនជាតិវៀតណាមចំនួន ៩៨នាក់ ព័ន្ធករណីOnline Scams ត្រូវបានបណ្ដេញចេញពីកម្ពុជា

ព័ត៌មានជាតិ

ឯកឧត្តម ចាយ បូរិន ជួបសំណេះសំណាលជាមួយគណៈប្រតិភូព្រះមន្ត្រីសង្ឃខ្មែរក្រោម និមន្តមកពីខេត្តត្រាវិញ

2024/11/27 08:10:34 am        152
Facebook Telegram Linkin
គណៈប្រតិភូព្រះមន្ត្រីសង្ឃខ្មែរក្រោម ខេត្តត្រាវិញ នៃសាធារណរដ្ឋសង្គមនិយមវៀតណាម បាន បន្តនិមន្តចូលជួបសំណេះសំណាលជាមួយឯកឧត្តម ចាយ បូរិន រដ្ឋមន្ត្រីក្រសួងធម្មការ និងសាសនា។ក្រោយពីការចូលក្រាបថ្វាយបង្គំគាល់សម្តេចព្រះមហាសង្ឃរាជ និងសម្តេចព្រះសង្ឃនាយក ទាំង២គណៈរួចមក គណៈប្រតិភូព្រះមន្ត្រីសង្ឃខ្មែរក្រោម ទាំង៦ព្រះអង្គ ដឹកនាំដោយព្រះតេជព្រះគុណ ថាច់ ញឹក ព្រះចៅអធិការវត្តស្វាយសៀមថ្មី បានបន្តនិមន្តចូលជួបសំណេះសំណាលជាមួយឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការ និងសាសនា នៃព្រះរាជាណាចក្រកម្ពុជា នារសៀលថ្ងៃទី២៦ ខែវិច្ឆិកា ឆ្នាំ២០២៤។ក្នុងឱកាសដ៏មានតម្លៃនេះដែរ គណៈប្រតិភូបានពាំនាំនូវទឹកព្រះទ័យ និងទឹកចិត្តរបស់ព្រះសង្ឃ និងប្រជាជនខ្មែរក្រោម នៃខេត្តត្រាវិញ ថ្លែងអំណរគុណចំពោះឯកឧត្តមរដ្ឋមន្ត្រី ថ្នាក់ដឹកនាំ និងមន្ត្រីទាំងអស់របស់ក្រសួងធម្មការ និងសាសនា ដែលបានចូលរួមយ៉ាងសកម្មក្នុងនាមជាសេនាធិការជំនាញរបស់រាជរដ្ឋាភិបាលលើវិស័យធម្មការ និងសាសនា ក្នុងការជួយរៀបសម្របសម្រួលការរៀបចំពិធីបុណ្យកឋិនទានមហាសាមគ្គីគ្រួសារខ្មែរ ដែលជាប្រវត្តិសាស្ត្រសម្រាប់ខ្មែរក្រោម។ ព្រះតេជព្រះគុណបានអរគុណឯកឧត្តមរដ្ឋមន្ត្រី ដែលចាត់តាំងក្រុមការងារទទួលគណៈប្រតិភូ និងបានសម្របសម្រួលឱ្យគណៈប្រតិភូបានចូលក្រាបបង្គំគាល់សម្តេចព្រះសង្ឃទាំងពីរគណៈ ដើម្បីទូលថ្វាយសម្តេចជាអម្ចាស់ពីស្ថានភាព នៃការបដិបត្តិធម្មវិន័យ ការសិក្សារៀនសូត្ររបស់ព្រះសង្ឃខ្មែរក្រោមគ្រប់កម្រិតពុទ្ធិកសិក្សានៅខេត្តត្រាវិញ និងការបន្តថែរក្សានូវមរតក៌ វប្បធម៌ប្រពៃណីរបស់ខ្មែរក្រោមនៅតាមទីអារាម។ ព្រមជាមួយគ្នានេះផងដែរ គណៈប្រតិភូស្នើសុំឱ្យក្រសួង បន្តគាំទ្រដល់ព្រះសង្ឃខ្មែរក្រោម ដែលកំពុងស្នាក់នៅ និងសិក្សានៅតាមពុទ្ធិកសិក្សានៅក្នុងរាជធានីភ្នំពេញ។ ទន្ទឹមនឹងនេះគណៈប្រតិភូក៏មានបំណង សុំឱ្យមានការចែករំលែកនូវឯកសារស្តីពី ប្រជុំទំនៀមទម្លាប់ ប្រពៃណីសាសនា និងភាសា ដែល ក្រសួងមាន ដើម្បីយកទៅប្រើប្រាស់បន្ថែមទៀតជាឧត្តមប្រយោជន៍របស់កូនចៅខ្មែរក្រោមនៅក្នុងខេត្តត្រាវិញ។ជាការឆ្លើយតបវិញនោះ ឯកឧត្តមរដ្ឋមន្ត្រី បានស្វាគមន៍ចំពោះព្រះវត្តមានរបស់ប្រតិភូ ព្រះសង្ឃខ្មែរក្រោម ដែលបាននិមន្តមកទស្សនកិច្ចនៅក្នុងព្រះរាជាណាចក្រកម្ពុជា ជាពិសេសនៅក្រសួងធម្មការ និងសាសនា នាពេលនេះ។ ឯកឧត្តមបានគាំទ្រចំពោះសំណើររបស់ព្រះអង្គក្នុងការបន្តយកចិត្តទុកដាក់ចំពោះព្រះសង្ឃខ្មែរក្រោម ដែលកំពុងសិក្សានៅតាមបណ្តាពុទ្ធិកសិក្សានៅក្នុងព្រះរាជាណាចក្រកម្ពុជា។ ចំពោះឯកសារស្តីពី ប្រជុំទំនៀមទម្លាប់ ប្រពៃណីសាសនា និងភាសាខ្មែរនោះ ក្រសួងនឹងផ្តល់ប្រគេន ដើម្បីព្រះអង្គយកទៅប្រើប្រាស់ជាឧត្តមប្រយោជន៍ របស់បងប្អូនខ្មែរក្រោមក្នុងខេត្តត្រាវិញ។ ឯកឧត្តម បានបន្តទៀតថា ក្រសួងធម្មការ និងសាសនា ក្នុងនាមជាសេនាធិការរបស់រាជរដ្ឋាភិបាល នៅក្នុងនីតិកាលទី៧ នៃរដ្ឋសភា ដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបន្តយកចិត្តទុកដាក់បន្ថែមទៀតលើការលើកកម្ពស់សុខដុមនីយកម្មសាសនា ពិសេសលើវិស័យព្រះពុទ្ធសាសនា ដែលជាសាសនារបស់រដ្ឋ។ ជាងនេះទៅទៀត សម្តេចធិបតីនាយករដ្ឋមន្ត្រី តែងគាំទ្រលើវិស័យសិក្សាអប់រំ បំពេញបន្ថែមនូវចំណេះដឹករបស់ព្រះសង្ឃឱ្យបានខ្ពង់ខ្ពស់តាមរយៈពុទ្ធិកវិទ្យាល័យ ពុទ្ធិកសាកលវិទ្យា ទាំងរាជធានី-ខេត្តទូទាំងប្រទេស។ ក្នុងឱកាសនោះ ឯកឧត្តមបានប្រគេនប្រតិភូនូវឯកសារមួយចំនួនដូចជា សៀវភៅរាជសព្ទ-សង្ឃសព្ទ សៀវភៅកម្រងឧទ្ទេសាចារ្យខ្មែរ សៀវភៅព្រះរាជីវប្រវត្តិសម្តេចព្រះមហាសុមេធាធិបតី នន្ទ ង៉ែត និងសៀវភៅកម្រងសង្ឃប្រកាស នៃអនុសង្ឃវច្ឆរមហាសន្និបាតមន្ត្រីសង្ឃ។ជាទីបញ្ចប់ឯកឧត្តមបានប្រគេនពរជ័យគណៈប្រតិភូ និងផ្តាំផ្ញើក្ដីនឹករលឹកដល់ប្រជាពុទ្ធ បរិស័ទខ្មែរក្រោម ខេត្តត្រាវិញទាំងអស់ សូមជួបតែពុទ្ធពរទាំង៤ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕អត្ថបទ រដ្ឋា

កម្មវិធីពានរង្វាន់សហគ្រិនខ្មែរឆ្នាំ២០២៤ ឆ្លុះបញ្ចាំងឧត្តមភាពសហគ្រិនភាពនៅកម្ពុជា

2024/11/26 10:14:13 pm        143
Facebook Telegram Linkin
ភ្នំពេញ៖ កម្មវិធីពានរង្វាន់សហគ្រិនខ្មែរឆ្នាំ២០២៤ បានជ្រើសរើសជ័យលាភី ជាក្រុមហ៊ុន និងក្រុមប្រកួត ដែលបានបង្ហាញនវានុវត្តន៍ និងការរួមចំណែកដល់ប្រព័ន្ធអេកូឡូស៊ីសហគ្រិនភាពរបស់កម្ពុជា។ កម្មវិធីនេះត្រូវបានធ្វើឡើងក្រោមអធិបតីភាព ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាបរធនបាលនៃសហគ្រិនខ្មែរ ដោយបិទបញ្ចប់ការប្រកួតប្រជែងរយៈពេលពេញមួយឆ្នាំ ក្នុងចំណោមបេក្ខជនចូលរួមជិត ២,០០០ក្រុម និងក្រុមហ៊ុន។ នៅក្នុងពិធីប្រគល់ពានរង្វាន់សហគ្រិនខ្មែរ ឆ្នាំ២០២៤ កាលពីល្ងាចថ្ងៃទី២៥ ខែវិច្ឆិកាកន្លងទៅ ឯកឧត្តម ហែម វណ្ណឌី បានកោតសរសើរដល់ជ័យលាភីទាំងអស់ និងបានលើកទឹកចិត្តអ្នកចូលរួមប្រកួត ឱ្យខិតខំបន្តអភិវឌ្ឍសមត្ថភាពបន្ថែមដើម្បីចាប់យកឧត្តមភាព។ ឯកឧត្តមបានលើកឡើងថា ភាពជោគជ័យមិនមែនស្ថិតនៅលើពានរង្វាន់នារាត្រីនេះតែមួយមុខទេ។ សហគ្រិនគួរមានភាពក្លាហាន ហ៊ានចូលរួមប្រកួតប្រជែង សាកល្បងសមត្ថភាព ទទួលយកចំណេះដឹងថ្មីៗ និងប្រែក្លាយឧបសគ្គជាឱកាសដើម្បីភាពជោគជ័យនាពេលខាងមុខ។ ពានរង្វាន់សហគ្រិនខ្មែរ ឆ្នាំ២០២៤ មានបួនប្រភេទគឺ៖ ពានរង្វាន់សហគ្រិនកម្រិតវិទ្យាល័យ, ពានរង្វាន់សហគ្រិនមហាវិទ្យាល័យ, ពានរង្វាន់ធុរកិច្ចថ្មី និងពានរង្វាន់សហគ្រាសធុនតូចនិងមធ្យម។ ពានរង្វាន់ទាំងនេះឆ្លុះបញ្ចាំងពីតួអង្គសំខាន់ៗនៃសហគ្រិនភាពដែលកំពុងរីកចម្រើនរបស់កម្ពុជា។ ជ័យលាភីត្រូវបានទទួលស្គាល់ចំពោះភាពច្នៃប្រឌិត ភាពធន់ និងការខិតខំប្រឹងប្រែងក្នុងការជំរុញនវានុវត្តន៍ និងកំណើនសេដ្ឋកិច្ច។ឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួលបន្ទុកជានាយកប្រតិបត្តិសហគ្រិនខ្មែរ បានលើកឡើងថា កម្មវិធីពានរង្វាន់សហគ្រិនខ្មែរ ឆ្នាំ២០២៤ បង្ហាញពីការយកចិត្តទុកដាក់របស់រាជរដ្ឋាភិបាលកម្ពុជា ក្នុងការលើកកម្ពស់នវានុវត្តន៍ និងកសាងប្រព័ន្ធអេកូឡូស៊ីសហគ្រិនភាពជាតិមួយ ដែលពូនជ្រុំគំនិតឱ្យរីកចម្រើន និងបណ្តុះធុរកិច្ចឱ្យរីកលូតលាស់។ជ័យលាភីពានរង្វាន់សហគ្រិនខ្មែរ ឆ្នាំ២០២៤ រួមមាន៖ ១. ពានរង្វាន់សហគ្រាសធុនតូច និងមធ្យមជ័យលាភីពានរង្វាន់សហគ្រិនខ្មែរ ឆ្នាំ២០២៤ រួមមាន៖ ១. ពានរង្វាន់សហគ្រាសធុនតូច និងមធ្យម៖ ជ័យលាភីពានរង្វាន់សហគ្រាសធុនតូចនិងមធ្យម ឆ្នាំ២០២៤៖ ជ័យលាភីសហគ្រាសធុនតូច និងមធ្យម PPF Yummy Manucaturing ទទួលបានពាន និងទឹកប្រាក់ ២៨,០០០,០០០ រៀល (៧,០០០ដុល្លារ) , ជ័យលាភីពានរង្វាន់សហគ្រាសធុនតូចនិងមធ្យម ផ្នែកនវានុវត្តន៍៖ ជ័យលាភីនវានុវត្តន៍ La Fattoria ទទួលបានពាន និងទឹកប្រាក់ ២៨,០០០,០០០ រៀល (៧,០០០ដុល្លារ) , ជ័យលាភីពានរង្វាន់សហគ្រាសធុនតូចនិងមធ្យម ផ្នែកនាំចេញ៖ Khmer Green Charcoal Co. Ltd ទទួលបានពាន រង្វាន់ និងទឹកប្រាក់ ២៨,០០០,០០០ រៀល (៧,០០០ដុល្លារ) , ជ័យលាភីពានរង្វាន់សហគ្រាសធុនតូចនិងមធ្យម ផ្នែកសង្គម៖ Cambodian Standard Development & Supply Co Ltd ទទួលបានពាន រង្វាន់ និងទឹកប្រាក់ ២៨,០០០,០០០ រៀល (៧,០០០ដុល្លារ)២. ពានរង្វាន់ធុរកិច្ចថ្មី៖ ជ័យលាភីពានរង្វាន់ធុរកិច្ចថ្មី ឆ្នាំ២០២៤ ៖ Anon (Cambodia) CO.Ltd ទទួលបានពាន និងទឹកប្រាក់ ២0,000,000 រៀល (៥,000 ដុល្លារ) , ជ័យលាភីពានរង្វាន់ធុរកិច្ចថ្មី ផ្នែកនវានុវត្តន៍៖ JMLH Enterprise ទទួលបានពាន និងទឹកប្រាក់ ២0,000,000 រៀល (៥,000 ដុល្លារ) , ជ័យលាភីពានរង្វាន់ធុរកិច្ចថ្មី ផ្នែកបច្ចេកវិទ្យា៖ WORKINGNA ទទួលបានពាន និងទឹកប្រាក់ ២0,000,000 រៀល (៥,000 ដុល្លារ) , ជ័យលាភីពានរង្វាន់ធុរកិច្ចថ្មី ផ្នែកសង្គម៖ Chenda Khmer Recycle Co. LTD ទទួលបានពាន និងទឹកប្រាក់ ២0,000,000 រៀល (៥,000 ដុល្លារ) ៣. ពានរង្វាន់សហគ្រិនមហាវិទ្យាល័យ៖ ពានរង្វាន់សហគ្រិនមហាវិទ្យាល័យ ជ័យលាភីលេខ១៖ ECO Craft ទទួលបានពាន និងទឹកប្រាក់ ១៦,០០០,០០០ រៀល (៤,០០០ ដុល្លារ) , ពានរង្វាន់សហគ្រិនមហាវិទ្យាល័យ ជ័យលាភីលេខ២៖ INNO BOXទទួលបានពាន និងទឹកប្រាក់ ១២,០០០,០០០ រៀល (៣,០០០ ដុល្លារ) , ពានរង្វាន់សហគ្រិនមហាវិទ្យាល័យ ជ័យលាភីលេខ៣៖ ZAZAR security ទទួលបានពាន និងទឹកប្រាក់ ៨,០០០,០០០ រៀល (២,០០០ ដុល្លារ) និងទី៤. ពានរង្វាន់សហគ្រិនកម្រិតវិទ្យាល័យ៖ ជ័យលាភីពានរង្វាន់សហគ្រិនកម្រិតវិទ្យាល័យ ផ្នែកនវានុវត្តន៍ ៖ Power of Griffins ទទួលបានពាន និងទឹកប្រាក់ ៨,០០០,០០០ រៀល (២,០០០ ដុល្លារ) , ជ័យលាភីពានរង្វាន់សហគ្រិនកម្រិតវិទ្យាល័យ ផ្នែកធុរកិច្ចប្រកបដោយចីរភាព៖ ក្រុម UNLIMITED ទទួលបានពាន និងទឹកប្រាក់ ៨,០០០,០០០ រៀល (២,០០០ ដុល្លារ) , ជ័យលាភីពានរង្វាន់សហគ្រិនកម្រិតវិទ្យាល័យ ផ្នែកសង្គម ៖ ក្រុម 3in1 ទទួលបានពាន និងទឹកប្រាក់ ៨,០០០,០០០ រៀល (២,០០០ ដុល្លារ)កម្មវិធីពានរង្វាន់សហគ្រិនខ្មែរ ឆ្នាំ២០២៤ ដែលឈានចូលដល់ឆ្នាំទីប្រាំនេះ បង្ហាញពីបេសកកម្មរបស់សហគ្រិនខ្មែរ ក្នុងការថែបំប៉នប្រព័ន្ធអេកូឡូស៊ីសហគ្រិនភាពនៅកម្ពុជា។ កម្មវិធីនេះផ្តល់ឱកាសសម្រាប់ការបណ្តុះបណ្តាល ការកសាងបណ្តាញធុរកិច្ច និងការចូលរួមក្នុងការប្រកួតប្រជែងថ្នាក់ជាតិ និងអន្តរជាតិ ក្នុងគោលដៅជំរុញកំណើនអាជីវកម្មនៅគ្រប់កម្រិត៕

កម្ពុជាប្តេជ្ញាកាត់បន្ថយឧស្ម័នផ្ទះកញ្ចក់ឲ្យដល់ចំណុច ០% នៅឆ្នាំ២០៥០

2024/11/26 09:03:20 pm        115
Facebook Telegram Linkin
ភ្នំពេញ ÷ ព្រះរាជាណាចក្រកម្ពុជា ជាប្រទេសដែល ងាយរងគ្រោះដោយសារផលប៉ះពាល់ខាងលើ ជាក់ស្តែងកម្ពុជា បានបញ្ចេញឧស្ម័នផ្ទះកញ្ចក់ត្រឹម តែចំនួន០,០២%ប៉ុណ្ណោះ។ ប៉ុន្តែកម្ពុជា បានប្តេជ្ញាចិត្តកាត់បន្ថយឧស្ម័នផ្ទះកញ្ចក់ឲ្យដល់ចំណុច ០% នៅឆ្នាំ២០៥០ ។ មានប្រសាសន៍ ក្នុងពេលទទួលជួបសំដែងការគួរសម និងពិភាក្សាការងារជាមួយ គណៈប្រតិភូដឹកនាំដោយឯកឧត្តម Park Huk-Hyum សមាជិកសភា និងជាអនុប្រធានសម្ព័ន្ធសភា នៃសាធារណរដ្ឋកូរ៉េ ស្តីពី «ការប្រែប្រួលអាកាសធាតុ” នាព្រឹកម៉ិញនេះ នៅវិមានរដ្ឋសភា ឯកឧត្តមបណ្ឌិត ម៉ា ឈឿន ប្រធានស្តីទីគណៈកម្មការទី៣ នៃរដ្ឋសភាបានឲ្យដឹងថា៖ បច្ចុប្បន្ន យើងកំពុងស្ថិតក្នុងសករាជនៃភាពបាត់បង់ និងខូចខាត ដែលបណ្តាលមក ពីផលប៉ះពាល់បំរែបំរួលអាកាសធាតុ។ ផលប៉ះពាល់បំរែបំរួលអាកាសធាតុ កំពុងតែរីករាលដាលយ៉ាងខ្លាំង ដែលយើងមិនអាចគ្រប់គ្រងបាន នៅជុំវិញសកលលោក។ ហេីយកម្ពុជាកំពុងយកចិត្តទុកដាក់លើវិស័យបរិស្ថាន ៣ប្រភេទសំខាន់ៗមានដូចជា៖ បរិស្ថានធម្មជាតិ បរិស្ថានសង្គមវប្បធម៌ និងបរិស្ថានមនុស្ស។ មូលហេតុនានាដែលបណ្តាលឲ្យភពផែនដីមានការ កើនឡើងកម្ដៅ គឺអាស្រ័យដោយការបញ្ចេញឧស្ម័នផ្ទះកញ្ចក់ ដែលបង្កឡើងដោយសកម្មភាព មនុស្ស ជាពិសេសពីបណ្តាប្រទេសអភិវឌ្ឍន៍នានា។  ឯកឧត្តមបានបន្ដថា៖ ប្រទេសកម្ពុជា ផ្តល់អាទិភាពដល់ការ លើកកម្ពស់ការស្តុកកាបូន តាមរយៈការការពារ និងការស្តារព្រៃឈើឡើងវិញ រួមបញ្ចូលទាំងការអនុវត្តយុទ្ធសាស្ត្រ REDD+ ដោយផ្តោតលើការកាត់បន្ថយការបំភាយឧស្ម័នពីការកាប់បំផ្លាញព្រៃឈើ និងការរិចរិលព្រៃឈើ។កិច្ចខិតខំប្រឹងប្រែង រួមមានការបង្កើនគម្របព្រៃឈើដល់ 60% នៃផ្ទៃដីសរុបនៅឆ្នាំ២០៣០ និង ការលើកកម្ពស់ការអនុវត្តការ ប្រើប្រាស់ដីប្រកបដោយនិរន្តរភាព ដើម្បីធានាបាននូវសុខភាពរយៈពេលវែង នៃប្រព័ន្ធអេកូឡូស៊ី។ ឆ្លៀតក្នុងឱកាសនោះ ឯកឧត្តមបណ្ឌិត ម៉ា ឈឿន ក៏បានសំណូមពរដល់សាធារណរដ្ឋកូរ៉េ លើការសំខាន់ៗចំនួន២ គឺ សូមជួយលើការងារកសាងផែនការការពារបរិស្ថាន និងសូមជួយក្នុងវិស័យបណ្តុះបណ្តាលធនធានមនុស្សឲ្យយល់កាន់ច្បាស់ពីបរិស្ថាន។ ជាការឆ្លើយតប ឯកឧត្តម Park Huk-Hyum សមាជិកសភា និងជាអនុប្រធានសម្ព័ន្ធសភា នៃសាធារណរដ្ឋកូរ៉េ ស្តីពី «ការប្រែប្រួលអាកាសធាតុ” បានកោតសរសេីរចំពោះការរីកចម្រើនយ៉ាងឆាប់រហ័សលើគ្រប់វិស័យរបស់កម្ពុជា និងជឿជាក់ថា ក្រោមការដឹកនាំប្រកបដោយភាពឈ្លាសវៃរបស់សម្ដេចបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាច្រកម្ពុជា នឹងបន្តអភិវឌ្ឍន៍រីកចម្រើន ហើយទំនាក់ទំនង និងកិច្ចសហប្រតិបត្តិការរវាងកូរ៉េ-កម្ពុជានឹងកាន់តែរឹងមាំបន្ថែមទៀត។ នៅក្នុងឱកាសនេះ ឯកឧត្តមបានថ្លែងអំណរគុណដល់រាជរដ្ឋាភិបាលកម្ពុជា ដែលបាននិងកំពុងខិតខំប្រឹងប្រែងក្នុងការកាត់បន្ថយឧស្ម័នផ្ទះកញ្ចក់ឲ្យដល់ចំណុច ០% នៅឆ្នាំ២០៥០ ។

កម្ពុជា​-កូរ៉េ ឯកភាពរួមគ្នាទប់ស្កាត់បទល្មើស និងបណ្តុះបណ្តាលសមត្ថភាពមន្រ្តី

2024/11/26 08:55:29 pm        88
Facebook Telegram Linkin
ភ្នំពេញ: ក្នុងឱកាសទទួលជួប ឯកឧត្តម Park Jung-Wook ឯកអគ្គរដ្ឋទូតវិសាមញ្ញ និងពេញសមត្ថភាព នៃ សាធារណរដ្ឋកូរ៉េ ប្រចាំនៅកម្ពុជា នារសៀលថ្ងៃទី២៦ ខែវិច្ឆិកា ឆ្នាំ២០២៤ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងភាគីកូរ៉េ បានឯកភាពគ្នាលើកិច្ចសហប្រតិបត្តិការ ទប់ស្កាត់បទល្មើស និងការបណ្តុះបណ្តាលធនធានមនុស្សនៅកម្ពុជាឱ្យកាន់តែរីកចម្រើនឡើងថែមទៀត ។ ក្នុង​ជំនួប​នោះ​ ឯកឧត្តម Park Jung-Wook បានជម្រាបឯកឧត្តមអភិសន្តិបណ្ឌិត អំពីកិច្ចសហប្រតិបត្តិការផ្នែកសន្តិសុខ រវាងសធារណរដ្ឋកូរ៉េ និងព្រះរាជាណាចក្រកម្ពុជា ក្នុងការពង្រឹង និងការការពារនឹងការឆបោកក្នុងរូបភាពផ្សេងៗ ដែលជាបញ្ហាប្រឈមធ្វើឱ្យពលរដ្ឋទទួលភាពរងគ្រោះ ។ ឯកឧត្តមអភិសន្តិបណ្ឌិត ស សុខា បានឯកភាពលើចំណុចនេះ និងបានស្នើទៅភាគីកូរ៉េ បន្តជួយ ឧបត្ថម្ភគាំទ្រ ក្នុងការជួយបណ្តុះបណ្តាលលើកកម្ពស់សមត្ថភាពមន្ត្រីនគរបាល មន្ត្រីពន្ធនាគារ និងមន្ត្រីរាជការស៊ីវិល ក្នុងការពង្រឹងបន្ថែមនៃការអភិវឌ្ឍធនធានមនុស្ស របស់ក្រសួងមហាផ្ទៃកម្ពុជា ។ ឯកឧត្តមអភិសន្តិបណ្ឌិត ក្នុងនាមក្រសួងមហាផ្ទែ ក៏បានកោតសរសើរ និងវាយតម្លៃខ្ពស់ចំពោះ ទំនាក់ទំនាក់ទំនងការទូត ក្នុងរយៈពេលដ៏យូរអង្វែង ជាងបីទសវត្សរ៍ ដោយបាននាំមកនូវសមិទ្ធផលជាច្រើន បម្រើដល់ការអភិវឌ្ឍរីកចម្រើន នៃប្រទេសទាំងពីរ ។ឯកឧត្តម Park Jung-Wook ក៏បានថ្លែងអំណរគុណចំពោះ ឯកឧត្តមអភិសន្តិបណ្ឌិត ស សុខា ដែលបានអនុញ្ញាតឱ្យលោកចូលជួបសម្តែងការគួរសម និងបានសម្តែងនូវការឯកភាពចំពោះការវាយតម្លៃរបស់ ឯកឧត្តមអភិសន្តិបណ្ឌិត លើទំនាក់ទំនងដ៏យូរអង្វែងរវាងប្រទេសទាំងពីរកម្ពុជា-កូរ៉េ ។ឯកឧត្តមអភិសន្តិបណ្ឌិត សូមស្វាគមន៍យ៉ាងកក់ក្តៅ ចំពោះបេសកកម្មរបស់ឯកឧត្តម មកកម្ពុជានៅពេលនេះ និងសង្ឃឹមជឿជាក់យ៉ាងមុតមាំថា តាមរយៈបេសកកម្មនេះ កិច្ចសហប្រតិបត្តិការរវាងប្រទេសទាំងពីរ នឹងត្រូវបានបន្តពង្រឹងពង្រីកឥតឈប់ឈរ ទាំងក្នុងពេលបច្ចុប្បន្ន និងតទៅអនាគត​ ៕

ប្រទេសតាជីគីស្ថានប្រកាសថានឹងបង្កើតតំណាងស្ថានទូតជាផ្លូវការរបស់ខ្លួននៅក្នុងព្រះរាជាណាចក្រកម្ពុជានៅឆ្នាំ២០២៥ ខាងមុខនេះ

2024/11/26 08:10:44 pm        88
Facebook Telegram Linkin
(សៀមរាប) ៖ នៅឆ្នាំ២០២៥ ខាងមុខ ប្រទេសតាជីគីស្ថាន នឹងបង្កើតតំណាងស្ថានទូតជាផ្លូវការរបស់ខ្លួននៅក្នុងព្រះរាជាណាចក្រកម្ពុជា និងបានស្នើសុំឱ្យមានការគាំទ្រ និងបង្កើតនូវទំនាក់ទំនង និងកិច្ចសហប្រតិបត្តិការយ៉ាងល្អប្រសើររវាងប្រទេសតាជីគីស្ថាន និងកម្ពុជា។ ការប្រកាសនេះ ខណះឯកឧត្តម Muzaffar Ashuriyon រដ្ឋមន្រ្តីយុត្តិធម៌ និងជាប្រធានគណៈប្រតិភូនៃសាធារណរដ្ឋតាជីគីស្ថានចូលជំនួបទ្វេភាគីជាមួយឯកឧត្តមបណ្ឌិត លី ធុជ ទេសរដ្ឋមន្រ្តី និងជាប្រធានអនុសញ្ញាអូតាវ៉ាឆ្នាំ២០២៤  ក្រៅកិច្ចប្រជុំកំពូលសៀមរាប-អង្គរស្តីពីពិភព លោកមួយដែលគ្មានមីន នៃអនុសញ្ញាអូតាវ៉ា នៅថ្ងៃទី២៦ ខែវិច្ឆិកា ឆ្នាំ២០២៤ ។ឯកឧត្តម Muzaffar Ashuriyon ក៏បានកោតសរសើរ និងថ្លែងអំណរគុណដល់កម្ពុជា ដែលបានរៀបចំកិច្ចប្រជុំកំពូលសៀមរាម-អង្គរដ៏មានសារៈសំខាន់ និងកិច្ចប្រជុំសម្រាប់មន្រ្តីជាន់ខ្ពស់ ហើយបានវាយតម្លៃខ្ពស់ចំពោះប្រទេសកម្ពុជា ជាប្រទេសដែលមានបទពិសោធន៍ច្រើនសម្រាប់វិស័យសកម្មភាពមីន។   ជាការឆ្លើយតបក្នុងជំនួបនោះ ឯកឧត្តមបណ្ឌិត លី ធុជ បានថ្លែង អំណរគុណចំពោះគណៈប្រតិភូនៃសាធារណរដ្ឋតាជីគីស្ថាន ដែលបានចូលរួមក្នុងកិច្ចប្រជុំកំពូលសៀមរាប-អង្គរ និងបានចាត់ទុកការចូលរួមរបស់តាជីគីស្ថាន គឺជាផ្នែកមួយនៃគ្រួសារអនុសញ្ញាអូតាវ៉ា។ ជាមួយគ្នានោះ ឯកឧត្តម លី ធុជ បានថ្លែងអំណរគុណចំពោះការប្តេជ្ញាចិត្ត និងការរួមចំណែករបស់តាជីគីស្ថានក្នុងការសម្រេចបាននូវគោលដៅរួមនៃអនុសញ្ញា និងបានស្នើសុំឱ្យប្រទេសតាជីគីស្ថានបន្តចូលរួមដោះស្រាយបញ្ហាមីន ផងដែរ៕ អត្ថបទ,ភារម្យ

ACU និងគណៈប្រទេសចិនបានផ្លាស់ប្តូរបទពិសោធន៍លើការងារប្រឆាំងអំពើពុករលួយ

2024/11/26 07:40:21 pm        166
Facebook Telegram Linkin
ភ្នំពេញ៖ លោក Wang Jianghua អនុលេខានៃគណៈអធិការកិច្ចវិន័យបក្ស កុម្មុយនីស្តចិន ខេត្តយូណាន និងជាអនុប្រធាន នៃគណៈត្រួតពិនិត្យកិច្ចការដ្ឋចិន ខេត្តយូណាន នៅរសៀលថ្ងៃទី២៦ ខែវិច្ឆិកានេះ បានដឹកនាំសមាជិកប្រតិភូចំនួន៥រូប អញ្ជើញទស្សនៈកិច្ចនៅអង្គភាពប្រឆាំងអំពើពុករលួយ (ACU) ដោយទទួលការស្វាគមន៍ពី កិត្តិនីតិកោសលបណ្ឌិត ទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយ (អ.ប.ព.) នៃព្រះរាជាណាចក្រកម្ពុជា។បន្ទាប់មកឯកឧត្តម យន់ ស៊ីណាត អនុប្រធានអង្គភាពប្រឆាំងអំពើពុករលួយតំណាងដ៏ខ្ពង់ខ្ពស់កិត្តិនីតិកោសលបណ្ឌិត ទេសរដ្ឋមន្ត្រី ឱម យិនទៀង បានអញ្ជើញដឹកនាំគណៈប្រតិភូទស្សនកិច្ចនៅអង្គភាពACU និងជួបពិភាក្សាការងារ។  នៅក្នុងជំនួបពិភាក្សាការងារ ឯកឧត្តម យន់ ស៊ីណាត អនុប្រធានអង្គភាពប្រឆាំងអំពើពុករលួយ បានមានប្រសាសន៍ថា អង្គភាពប្រឆាំងអំពើពុករលួយ មានបេសកកម្មប្រយុទ្ធប្រឆាំងអំពើពុករលួយគ្រប់រូបភាព គ្រប់វិស័យ និងគ្រប់ជាន់ថ្នាក់នៅទូទាំងប្រទេសកម្ពុជា តាមរយៈវិធានការអប់រំ បង្ការ ទប់ស្កាត់ និងអនុវត្តច្បាប់បង្រ្កាបបទល្មើសពុករលួយដោយមានការចូលរួមពីសាធារណៈជន និងប្រតិបត្តិបការ។ជាមួយគ្នា លោក Wang Jianghua អនុលេខានៃគណៈអធិការកិច្ចវិន័យបក្ស កុម្មុយនីស្តចិន ខេត្តយូណាន និងជាអនុប្រធាន នៃគណៈត្រួតពិនិត្យកិច្ចការដ្ឋចិន ខេត្តយូណាន បានបង្ហាញក្តីរំភើបរីករាយ និងប្តេជ្ញាពង្រឹងកិច្ចសហប្រតិបត្តិការប្រឆាំងអំពើពុករលួយឲ្យកាន់តែស៊ីជម្រៅបន្ថែមទៀតជាមួយភាគីកម្ពុជា។គួរបញ្ជាក់ដែរថា គណៈប្រតិភូខេត្តយូណាននៃប្រទេសចិន បានបំពេញទស្សនកិច្ចផ្លូវការនៅព្រះរាជាណាចក្រកម្ពុជា ចាប់ពីថ្ងៃទី ២៥ ដល់ ២៩ ខែវិច្ឆិកា ឆ្នាំ២០២៤ ក្នុងគោលបំណង បង្កើន និងពង្រឹងទំនាក់ទំនងកិច្ចសហប្រតិបត្តិការ ផ្លាស់ប្តូរបទពិសោធន៍រវាងស្ថាប័នទាំងពីរ លើការងារប្រឆាំងអំពើពុករលួយ។ អត្ថបទ៖ ទូច សោភ័ណ

ក្រសួងអភិវឌ្ឍន៍ជនបទ ចាត់ទុកការស្ថាបនា ស្តារ និងថែទំាផ្លូវ ជាការជំរុញធ្វើពិពិធកម្ម សេដ្ឋកិច្ចជនបទ

2024/11/26 07:36:29 pm        66
Facebook Telegram Linkin
ស្វាយរៀង ៖ ក្រសួងអភិវឌ្ឍន៍ជនបទ ចាត់ទុកការស្ថាបនាផ្លូវ ស្តារ ថែទំា និងការកែលម្អហេដ្ឋរចនាសម្ព័ន្ធតាមជនបទ គឺជារឿងដ៏ចាំបាច់ ក្នុងការ បន្តជំរុញការធ្វើពិពិធកម្មសកម្មភាពសេដ្ឋកិច្ចជនបទ ដើម្បីបង្កើនប្រាក់ចំណូលប្រចាំថ្ងៃតាមគ្រួសារនីមួយៗ ជាពិសេសការតភ្ជាប់ផ្លូវ ព្រំដែនសម្រាប់ការចរាចរទំនិញផងដែរ។​ឯកឧត្តម សាន វិសាល រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹក នាំគណៈកម្មការលទ្ធកម្មអន្តរក្រសួង ចុះត្រួតពិនិត្យ និងវាយតម្លៃ បញ្ចប់សុពលភាព លើការងារស្ថាបនាផ្លូវក្រាលកៅស៊ូ DBST ចំនួន ១ ខ្សែ ប្រវែង ២ ១០០ ម៉ែត្រ ស្ថិតនៅភូមិថ្មី ទៅភូមិវាល ឃុំបុសមន ស្រុករំដួល ខេត្តស្វាយរៀង នៅថ្ងៃទី ២៦ ខែ វិច្ឆិកា នេះថា ជុំវិញ ការអភិវឌ្ឍន៍នៅតាមជនបទ រាជរដ្ឋាភិបាលក្នុងអាណត្តិទី៧ នៃរដ្ឋសភា, ក្រោមការដឹកនាំប្រកបដោយគតិបណ្ឌិត របស់សម្តេចមហា បវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានបន្តកែលម្អលក្ខខណ្ឌនៃការរស់នៅរបស់សហគមន៍ជនបទ តាមរយៈការស្តារ, ថែទាំ, ការស្ថាបនា, និងការកែលម្អហេដ្ឋារចនាសម្ព័ន្ធគមនាគមន៍ដឹកជញ្ជូននៅជនបទ ដែលនេះជាជំរុញការធ្វើ ពិពិធកម្មសកម្មភាពសេដ្ឋកិច្ចជនបទ ដើម្បីបង្កើនប្រាក់ចំណូលប្រចាំថ្ងៃតាមគ្រួសារនីមួយៗនៅតាមសហគមន៍ជនបទ មានជីវភាព សមរម្យ។ឯកឧត្តម បន្តថា ជុំវិញបញ្ហាផ្លូវនេះ បច្ចុប្បន្នក្រសួងអភិវឌ្ឍន៍ជនបទ បានកំពុងប្រែក្លាយផ្លូវក្រាលក្រួសជាច្រើនខ្សែ ទៅជាផ្លូវ ក្រាលកៅស៊ូ ឬផ្លូវបេតុង សំដៅធានាបានការប្រើប្រាស់យូរអង្វែង ធន់នឹងការប្រែប្រួលអាកាសធាតុ ដើម្បីជំរុញដំណើរអន្តរកម្មផ្នែក សង្គម-សេដ្ឋកិច្ច និងការផ្សារភ្ជាប់សកម្មភាពធុរកិច្ចផ្សេងៗ រវាងតំបន់ជនបទនិងទីប្រជុំជន និងជាការលើកកម្ពស់កម្រិតជីវភាព រស់នៅរបស់ប្រជាពលរដ្ឋនៅតាមជនបទឱ្យកាន់តែប្រសើរ, ជាក់ស្តែងផ្លូវក្រាលកៅស៊ូ DBST នេះជាដើម ដោយផ្លូវនេះមិនត្រឹមជួយ សម្រួលដល់ការរស់នៅរបស់ប្រជាពលរដ្ឋក្នុងសហគមន៍ប៉ុណ្ណោះទេ ផ្លូវនេះក៏ជាច្រកមួយដ៏សំខាន់ផងដែរ សម្រាប់ការផ្ទេរទំនិញចុះ ឡើង រវាងកម្ពុជានិងវៀតណាមផងដែរ។ ជុំវិញការចុះពិនិត្យផ្លូវខាងលើនេះ, ឯកឧត្តមរដ្ឋលេខាធិការ និងគណៈកម្មការអន្តរក្រសួង បានជួបសំណេះសំណាលជាមួយអាជ្ញាធរ និងប្រជាពលរដ្ឋ, ក្នុងនោះឯកឧត្តមបានពាំនាំនូវប្រសាសន៍ផ្តាំផ្ញើសាកសួរសុខទុក្ខ ពីសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវបណ្ឌិត ពេជ ចន្ទមុន្នី និងឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងលោកជំទាវ, ដែលសម្តេច និងលោកជំទាវបណ្ឌិត ឯកឧត្តម-លោកជំទាវ តែងតែគិតគូរពីសុខទុក្ខ និងការរស់នៅរបស់ប្រជាពលរដ្ឋ។ ក្នុងពិធីសំណេះសំណាលនេះដែរ ឯកឧត្តម ក៏បាននាំយកអំណោយដ៏ថ្លៃថ្លារបស់ឯកឧត្តម ឆាយ ឫទ្ធិសែន ក្រសួងអភិវឌ្ឍន៍ ជនបទ ចែកជូនប្រជាពលរដ្ឋ ដោយម្នាក់ៗទទួលបានក្រម៉ាចំនួន១៕អត្ថបទ ៖ សុនរ៉ាឌី

ទូកង ឌី សែនជ័យបារមីបូរណព៌ា និងសាឯម សែនជ័យបារមីស្វាយជ្រុំ ខេត្តស្វាយរៀង ជប់លៀងអបអរសាទរជ័យជម្នះ

2024/11/26 07:03:13 pm        195
Facebook Telegram Linkin
ស្វាយរៀង ÷ ទូកង ឌី សែនជ័យបារមីបូរព៌ា និងសាឯម សែនជ័យបារមីស្វាយជ្រុំ ខេត្តស្វាយរៀង បានរៀបចំធ្វើពិធីជប់លៀងដល់មូលដ្ឋានចំណុះទូកង នៅភូមិ/ឃុំ ស្រុកកំណើតរបស់កីឡាករ ថ្ងៃទី២៦ ខែវិច្ឆិកា ឆ្នាំ២០២៤ បន្ទាប់ពីទទួលបានជ័យជម្នះបីថ្ងៃជាប់គ្នា នៅក្នុងការប្រណាំងទូកង នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅរាជធានីភ្នំពេញនាពេលថ្មីៗកន្លងទៅ។ នៅក្នុងពិធីជប់លៀងនេះ លោក សេង ម័រ ប្រធានគណៈកម្មកាទូកងតំណាង ឯកឧត្តម ឌី វិជ្ជា និងលោកជំទាវ ហ៊ុន ម៉ាណា សូមថ្លែងការអបអរសាទរ និងការកោតសរសើរដល់ក្រុមកីឡាករចំណុះទូក ឌី សែនជ័យបារមីបូរព៌ា និងសាឯម សែនជ័យបារមីស្វាយជ្រុំទាំងអស់ ដែលបានខិតខំប្រឹងប្រែងរហូតទទួលបានជ័យជម្នះបីថ្ងៃជាប់គ្នា។ លោក សេង ម័រ បានបញ្ជាក់ដែរថា ជានិច្ចកាល ឯកឧត្តម ឌី វិជ្ជា និងលោកជំទាវ ហ៊ុន ម៉ាណា តែងបានពាំនាំនូវការសាកសួរសុខទុក្ខ និងដាស់តឿន ជាពិសេសការឧបត្ថមគាំទ្រ ដល់បងប្អូនក្រុមកីឡាករចំណុះទូកទាំងពីរនេះជាប្រចាំ និងបានកោតសរសើរចំពោះស្មារតី និងទឹកចិត្តដ៏មោះមុត រួមកម្លាំងសាមគ្គីភាពគ្នាបានយ៉ាងល្អ ប្រឹងប្រែងរហូតទទូលបានជោគជ័យ។ ចំណែកភាពជោកជ័យ និងភាពសប្បាយរីករាយក្នុងពិធីអបអរសាទរជ័យជម្នះ ដែលយើងមាននាពេលនេះ គឺកើតចេញពីកត្តាសុខសន្តិភាព និងការអភិវឌ្ឍរបស់ប្រទេសជាតិ រួមជាមួយការខិតខំប្រឹងប្រែងរបស់បងប្អូន ហើយភាពសប្បាយរីករាយនេះ សបញ្ជាក់ឲ្យឃើញថា ប្រទេសជាតិដែលដឹកនាំដោយសម្តេចតេជោ ហ៊ុន សែន អតីតនាយករដ្ឋមន្ត្រី និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី អាណត្តិទី៧នេះ មានសេរីភាព និងភាពសម្បូរសប្បាយ ដូច្នេះយើងទាំងអស់គ្នាត្រូវបន្តការខិតខំប្រឹងប្រែង និងចូលរួមថែរក្សាសន្តិភាពជាបន្តទៀត។ ទន្ទឹមនោះ លោក សេង ម័រ ក៏បានថ្លែងអរគុណផងដែរ ដល់ក្រុមកីឡាករទាំងអស់ដែលរក្សាបាននូវវិន័យ និងសីលធម៌បានយ៉ាងល្អ នៅក្នុងអំឡុងពេលដែលបំពេញការងារ នៅក្នុងព្រះរាជពិធីបុណ្យអុំទូកនេះ ហើយជាមួយគ្នានោះ លោក ក៏បាននាំយកអំណោយដ៏ថ្លៃថ្លារបស់លោកជំទាវ ម៉ែន ភក្តី ហុកឡង់ឌី ឯកឧត្តម ឌី វិជ្ជា និងលោកជំទាវ ហ៊ុន ម៉ាណា ដល់ក្រុមកីឡាករចំណុះទូកផងដែរ ដែលរួមមាន អង្ករចំនួន ១២៤៥០ គីឡូក្រាម និងថវិការសរុប ២១៩០០ ដុល្លា ក្នុងនោះក្រុមកីឡាករម្នាក់ៗទទួលបាថវិកា ១០០ ដុល្លា អង្ករ ៧៥ kg និងឃីត១កញ្ចប់ និងឧបត្ថម្ភដល់គណៈកម្មការទូកម្នាក់ៗទទួលបាន ២៥០ដុល្លា។ សូមជម្រាបដែរថា ក្នុងពិធីជប់លៀងនេះ ក៏មានការអញ្ជើញចូលរួមពីលោកអភិបាលស្រុក និងអាជ្ញាធរមូលដ្ឋាន រួមទាំងក្រុមគ្រួសារចំណុះទូកច្រើនកុះករ និងបង្កភាពសប្បាយរីករាយយ៉ាងខ្លាំងផងដែរ៕ ដោយ សេង ម័រ

សន្និសីទប្រចាំឆ្នាំស្តីពីការពង្រឹងប្រព័ន្ធអេកូឡូស៊ីសហគ្រិនភាពនៅកម្ពុជា២០២៤ ជំរុញឱ្យមានថាមពលនៃកិច្ចសហការដើម្បីផលវិជ្ជមាន

2024/11/26 06:59:11 pm        85
Facebook Telegram Linkin
ភ្នំពេញ៖ កម្មវិធីសន្និសីទប្រចាំឆ្នាំស្តីពីការពង្រឹងប្រព័ន្ធអេកូឡូស៊ីសហគ្រិនភាពនៅកម្ពុជា២០២៤ (CAMESCO24) ត្រូវបានរៀបចំឡើងដោយមានអ្នកចូលរួមប្រមាណ២០០នាក់ មកពីបណ្តាស្ថាប័នប្រមាណជិត១០០ស្ថាប័ន។ ប្រធានបទរបស់ម្មវិធីសន្និសីទ CAMESCO24 គឺ "ថាមពលនៃ កិច្ចសហការដើម្បីផលវិជ្ជមាន" ដែលជាកិច្ចសហការ និងទទួលបានការគាំទ្រថវិកាដោយសហគ្រិនខ្មែរ (KE) ទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) និងទីភ្នាក់ងារសហប្រតិបត្តិការ អន្តរជាតិកូរ៉េ (KOICA)។ គំនិតផ្តួចផ្តើមនេះ គឺជាសកម្មភាពសំខាន់មួយដែលបានសហការអនុវត្តដោយ សហគ្រិនខ្មែរ (KE) និងអង្គការស្វីសខន់ថាក់ (SC)។ ឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួលបន្ទុកជានាយកប្រតិបត្ដិនៃសហគ្រិនខ្មែរ ក្នុងកម្មវិធីបេីកសន្នសីទ នៅថ្ងៃទី២៥ ខែវិច្ឆិកានេះ បានមានប្រសាសន៍ថា “សហគ្រិនខ្មែរ បានកសាងនិងជំរុញប្រព័ន្ធអេកូឡូស៊ីសហគ្រិនភាពឱ្យកាន់តែរឹងមាំ និងស្វែងរកសក្តានុពលដែលមិនទាន់ប្រើប្រាស់អស់ពីលទ្ធភាព ដើម្បីបង្កើតជាឱកាសនិងបង្កើនសក្តានុពលសម្រាប់ជួយដល់សហគ្រាសធុនតូចនិងមធ្យម ធុរកិច្ចបង្កើតថ្មី យុវជន គំនិតច្នៃប្រឌិត និងក្តីសង្ឃឹមរបស់ពួកគេ។ សហគ្រិនខ្មែរដើរតួជាកាតាលីករជំរុញកិច្ចសហការជាមួយដៃគូពាក់ព័ន្ធ ដើម្បីជួយពន្លឿនដល់ដំណើរការនៃការ ប្រែក្លាយគំនិតទាំងនោះឲ្យក្លាយទៅជាសកម្មភាពដែលអាចធ្វើបានប្រកបដោយប្រសិទ្ធិភាព ដែលទាក់ទាញ វិនិយោគិនក្នុងតំបន់បន្ថែម ឲ្យចាប់យកឱកាសវិនិយោគនៅក្នុងប្រទេសកម្ពុជា”។កម្មវិធីសនិ្នសីទCAMESCO24 មានគោលបំណងបន្តពង្រឹងប្រព័ន្ធអេកូឡូស៊ីសហគ្រិនភាពនៅកម្ពុជា តាមរយៈការរំលេចអំពីសកម្មភាពដែលបានបំពេញមួយឆ្នាំ រួមមាន៖ កម្មវិធីជួបជុំ១ថ្ងៃដើម្បីសហគ្រិន (Give A Day) កម្មវិធីកិច្ចប្រជុំបណ្តាញអ្នកកសាងប្រព័ន្ធអេកូឡូស៊ីសម្រាប់សហគ្រិនភាព (Ecosystem Builder Network) និងសកម្មភាពពង្រឹងប្រព័ន្ធអេកូឡូស៊ីមួយចំនួនថែមទៀត។ កិច្ចខិតខំប្រឹងប្រែងនេះ បានឆ្លុះបញ្ចាំងពីការយកចិត្ត ទុកដាក់ក្នុងការជំរុញនវានុវត្តន៍ និងកិច្ចសហការនានានៅក្នុងប្រព័ន្ធអេកូឡូស៊ីសហគ្រិនភាព។ កម្មវិធីសន្និសីទ ប្រចាំឆ្នាំនេះ ជំរុញទៅលើការលើកកម្ពស់ការវិនិយោគផលវិជ្ជមាន និងការកៀរគរថវិកាបន្ថែមចូលទៅក្នុងប្រព័ន្ធ អេកូឡូស៊ីដែលផ្តោតទៅលើសង្គម និងបរិស្ថាន។លោក Daniel Nugraha នាយកប្រចាំប្រទេសនៃអង្គការស្វីសខន់ថាក់ បានមានប្រសាសន៍ថា “អង្គការស្វីសខន់ថាក់ និងសហគ្រិនខ្មែរ ពិតជាមានមោទកភាពជាខ្លាំងដែលឃើញកម្មវិធីសន្នីសិទCAMESCO24 វិវត្តន៍ទៅជាវេទិកាដ៏សំខាន់មួយសម្រាប់ប្រព័ន្ធអេកូឡូស៊ីសហគ្រិននៅកម្ពុជា។ កិច្ចខិតខំប្រឹងប្រែងរួមគ្នានេះ បានបង្ហាញឱ្យឃើញពីថាមពលនៃភាពជាដៃគូក្នុងការជំរុញឱ្យមានផលវិជ្ជមានពិតប្រាកដ។ យើងទាំងអស់គ្នាសង្ឃឹមថា អ្នកចូលរួមទាំងអស់បានទទួលចំណេះដឹងដ៏មានតម្លៃពីកិច្ចពិភាក្សា ក៏ដូចជាបន្សល់ទុកនូវស្មារតីបំផុសគំនិតដើម្បីបន្តជំរុញនវានុវត្តន៍ និងការរីកចម្រើននៅក្នុងប្រព័ន្ធអេកូឡូស៊ី។”គួរកត់សម្គាល់ ក្នុងឆ្នាំ២០២៤ កម្មវិធីសន្និសីទមានប្រធានបទចំនួនពីរ៖ ប្រធានបទទី១ “ផ្តោតលើការបង្កើន ថាមពលដើម្បីកសាងសេដ្ឋកិច្ចដែលមានផលវិជ្ជមាន” និងប្រធានបទទី២ “ផ្តោតទៅលើការបង្កើនថាមពលដើម្បី ជំរុញប្រព័ន្ធអេកូឡូស៊ីសហគ្រិនភាព”។ ជាលទ្ធផលក្រុមប្រឹក្សាវិនិយោគ ត្រូវបានប្រកាស អាចតម្រង់ទិស និងផ្តល់ យោបល់ជូនវិនិយោគិនក្នុងតំបន់ដែលចង់ធ្វើការវិនិយោគដើម្បីផលវិជ្ជមាននៅក្នុងប្រទេសកម្ពុជា។

ក្រុមមិត្តភាពរដ្ឋសភាកម្ពុជា និងស៊ែប៊ី ប្តេជ្ញាជំរុញកិច្ចសហប្រតិបត្តិការឱ្យបន្តកាន់តែរឹងមាំ

2024/11/26 06:28:56 pm        119
Facebook Telegram Linkin
ភ្នំពេញ ៖ ឯកឧត្តម ជាម យៀប អនុប្រធានទី១ រដ្ឋសភា ថ្លែងថា ក្រុមមិត្តភាពរដ្ឋសភាកម្ពុជា និងស៊ែប៊ី ប្តេជ្ញាជំរុញកិច្ចសហប្រតិបត្តិការឱ្យបន្តកាន់តែរឹងមាំ ដើម្បីជំរុញឱ្យទទួលបានផលប្រយោជន៍សម្រាប់ប្រទេសទាំងពីរ។ នៅរសៀលថ្ងៃទី២៦ ខែវិច្ឆិកា ឆ្នាំ២០២៤ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១នៃរដ្ឋសភា បានអនុញ្ញាតឱ្យ ឯកឧត្តម Damjan Jovic រដ្ឋលេខាធិការក្រសួងការបរទេសស៊ែប៊ី ជួបសម្តែងការគួរសម និងពិភាក្សាការងារ អំឡុងពេលបំពេញទស្សនកិច្ចនៅកម្ពុជា។នាឱកាសនោះ ឯកឧត្ដមកិត្តិសេដ្ឋាបណ្ឌិត ជាម យៀប មានប្រសាសន៍ថា ដំណើរទស្សនកិច្ចរបស់ឯកឧត្តម Damjan Jovic មកកាន់កម្ពុជានាពេលនេះ គឺជាការបង្ហាញពីពេលវេលាដ៏សំខាន់មួយ ក្នុងការពង្រឹងចំណងមិត្តភាព ដែលផ្តោតលើចំណងការទូត សេដ្ឋកិច្ច និងវប្បធម៌ និងកិច្ចសហប្រតិបត្តិការរវាងប្រទេសទាំងពីរឱ្យកាន់តែប្រសើរឡើង។ ឯកឧត្ដម មានប្រសាសន៍ទៀតថា សភាកម្ពុជាបាននិងកំពុងបន្តពង្រឹង និងពង្រីកទំនាក់ទំនងការទូតសភា តាមរយៈសកម្មភាពចូលរួម និងទទួលរៀបចំធ្វើជាម្ចាស់ផ្ទះនៃវេទិកាសភាអន្តរជាតិនានា សំដៅរួមចំណែកលើកកម្ពស់ ការថែរក្សាសន្តិភាព ស្ថិរភាព និងការអភិវឌ្ឍក្នុងតំបន់ និងសកលលោក។ជាក់ស្តែង កាលពីថ្មីៗនេះកម្ពុជាបានរៀបចំកិច្ចប្រជុំពេញអង្គលើកទី១១ នៃសភាអន្ដរជាតិដើម្បីភាពអត់ឱន និងសន្ដិភាព(IPTP) ដែលក្នុងសម័យប្រជុំនេះបានដាក់ចេញនូវសេចក្ដី ប្រកាសទីក្រុងភ្នំពេញ ជាពិសេសធម្មនុញ្ញសន្ដិភាពសកល (Universal Peace Charter) ដែលជាគំនិតផ្ដួចផ្ដើមរបស់សម្ដេចតេជោ ហ៊ុន សែន អតីតនាយករដ្ឋមន្រ្ដី និងជាប្រធានព្រឹទ្ធសភា។ឯកឧត្ដម បានបន្តថា នៅក្នុងការងារការទូតសភានេះដែរ សភាកម្ពុជាបានខិតខំពង្រឹង ពង្រីកទំនាក់ទំនងទាំងកម្រិតទ្វេភាគី និងពហុភាគី ដោយជំរុញកិច្ចសហប្រតិបត្ដិការផ្លាស់ប្ដូរដំណើរទស្សកិច្ចជាមួយបណ្ដាប្រទេសជាមិត្ដនៅលើសកលលោក ព្រមទាំងបានបង្កើតក្រុមមិត្ដភាពរដ្ឋសភាកម្ពុជា ជាមួយសភាជាមិត្ដជាច្រើន។ ក្នុងនោះក៏បានបង្កើតក្រុមមិត្តភាពរដ្ឋសភាកម្ពុជា-ស៊ែប៊ីផងដែរ។ជាការឆ្លើយតប ឯកឧត្តម Damjan Jovic បានលើកឡើងពីកិច្ចសហប្រតិបត្តិការដ៏ល្អរវាងប្រទេសទាំងពីរលើវិស័យការទូត សេដ្ឋកិច្ច និងវប្បធម៌ ដោយរដ្ឋសភាស៊ែប៊ី ក៏បានបង្កើតក្រុមមិត្តភាពសភា ដើម្បីធ្វើកិច្ចសហប្រតិបត្តិការជាមួយសភានៃប្រទេសនៅតំបន់អាស៊ីភាគអាគ្នេយ៍។ឯកឧត្តម Damjan Jovic បានបន្តថា ស៊ែរប៊ីបានខិតខំនៅក្នុងការបន្តធ្វើកិច្ចសហប្រតិបត្តិការជាមួយព្រះរាជាណាចក្រកម្ពុជាលើគ្រប់វិស័យ ហើយក្នុងឱកាសនេះដែរ ភាគីស៊ែរប៊ី ក៏បានស្នើសុំដល់ភាគីកម្ពុជា ក្នុងការបញ្ជូននិស្សិតទៅបន្តការសិក្សានៅប្រទេសស៊ែប៊ី លើវិស័យបច្ចេកវិទ្យាបញ្ញាសប្បនិម្មិត បច្ចេកវិទ្យាកសិកម្ម និងវិទ្យាសាស្ត្រថ្នាំពេទ្យ ដែលប្រទេសស៊ែប៊ីមានការរីកចម្រើនខ្លាំងនាពេលបច្ចុប្បន្ន។ ឆ្លៀតក្នុងឱកាសនោះ ឯកឧត្ដមកិត្តិសេដ្ឋាបណ្ឌិត អនុប្រធានទី១រដ្ឋសភា បានថ្លែងអំណរគុណ ចំពោះការលើកឡើងរបស់ឯកឧត្តម Damjan Jovic ដោយបានស្នើភាគីស៊ែប៊ី ជួយជំរុញទំហំពាណិជ្ជកម្មនៃប្រទេសទាំងពីរឱ្យមានការកើនឡើងថែមទៀត ជាពិសេសស្នើជួយជំរុញប្រជាពលរដ្ឋស៊ែប៊ីមកធ្វើទេសចររណ៍ទស្សនានៅកម្ពុជា ព្រោះកម្ពុជាមានតំបន់ទេសចរណ៍ច្រើន ទាំងតំបន់ទេសចរណ៍បែបប្រវត្តិសាស្ត្រ ដូចជា ប្រាសាទបុរាណរាប់ពាន់ប្រាសាទ តំបន់ទេសចរណ៍បែបធម្មជាតិ និងទេសចរណ៍កែច្នៃក៏មានច្រើនដែរ។ លើសពីនេះ ឯកឧត្ដមកិត្តិសេដ្ឋាបណ្ឌិត ជាម យៀប ក៏បានស្នើភាគីស៊ែប៊ី ជំរុញវិនិយោគិនស៊ែប៊ី មកបណ្ដាក់ទុននៅកម្ពុជាផងដែរ ដោយសារកម្ពុជាមានសក្ដានុពលច្រើនសម្រាប់ការវិនិយោគ ដូចជាវិស័យកសិកម្ម កសិ-ឧស្សហកម្ម ទេសចរណ៍ និងវិស័យរ៉ែជាដើម៕

បណ្ដាញសង្គម

ព័ត៌មានថ្មីៗ

បូលីវី ចុះកិច្ចព្រមព្រៀងជាមួយសហជីពកម្មករក្រោយការតវ៉ាប្រឆាំងរដ្ឋាភិបាលរយៈពេល៥០ថ្ងៃ
06/20/2026 11:06 AM
Facebook Telegram Linkin
អ្នកគាំទ្រកងជីវពលអ៊ីរ៉ាក់ដែលគាំទ្រអ៊ីរ៉ង់ បានទៅប្រមូលផ្តុំគ្នានៅខាងក្រៅស្ថានទូតអ៊ីរ៉ង់ក្នុងទីក្រុង Baghdad
06/20/2026 11:06 AM
Facebook Telegram Linkin
អ៊ីរ៉ង់ នាំចេញប្រេងឆៅចំនួន១៨លានបារ៉ែលក្នុងរយៈពេល ៥ ថ្ងៃកន្លងទៅនេះ
06/20/2026 11:06 AM
Facebook Telegram Linkin
អាមេរិក ប្រកាសការចរចាជុំថ្មីរវាងអ៊ីស្រាអែលនិងលីបង់ក្នុងទីក្រុងវ៉ាស៊ីនតោន នៅសប្តាហ៍ក្រោយ
06/20/2026 11:06 AM
Facebook Telegram Linkin
មនុស្សយ៉ាងហោចណាស់៣០នាក់ស្លាប់ នៅជំរំប្រទេសកុងហ្គោដែលបង្ហាញថាជំងឺអេបូឡា អាចរាលដាលយ៉ាងឆាប់រហ័ស
06/20/2026 11:06 AM
Facebook Telegram Linkin
សហគ្រាសក្នុងស្រុកគាំទ្រវិធានការរបស់រាជរដ្ឋាភិបាលក្នុងការទប់ស្កាត់ការគេចពន្ធ និងការនាំចូលទំនិញខុសច្បាប់
06/20/2026 11:06 AM
Facebook Telegram Linkin
នាយករដ្ឋមន្ត្រីអ៊ីតាលី៖ លោក Trump ប្រឌិតរឿងទាំងស្រុង ដែលថាលោកស្រីបានអង្វរសុំលោកថតរូបជាមួយ
06/20/2026 10:06 AM
Facebook Telegram Linkin
បេសកជនអ៊ីស្រាអែល និងមន្ត្រីអង្គការសហប្រជាជាតិប៉ះពាក្យសម្តីគ្នាក្នុងសវនាការស្តីពីកុមារក្នុងជម្លោះ
06/20/2026 10:06 AM
Facebook Telegram Linkin
អនុប្រធានាធិបតីអាមេរិក លោក JD Vance៖ ការចរចាជាមួយអ៊ីរ៉ង់អាចប៉ះពាល់ដល់ការកើនឡើងផ្នែកនយោបាយ
06/20/2026 10:06 AM
Facebook Telegram Linkin
បេសកជនរបស់លោក Trump ធ្វើដំណើរទៅកាន់ប្រទេសស្វីសសម្រាប់ការចរចារវាងអាមេរិក និងអ៊ីរ៉ង់
06/20/2026 10:06 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.