BTV NEWS

កម្ពុជា និងចិនបានបញ្ជាក់ពីការបន្តពង្រឹងកិច្ចសហប្រតិបត្តិការកាន់តែប្រសើរថែមទៀត ក្នុងវិស័យបរិស្ថាន

ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាននៃព្រះរាជាណាចក្រកម្ពុជា បានទទួលជួបឯកឧត្តម ZHAO Yingmin អនុរដ្ឋមន្ត្រីក្រសួងអេកូឡូស៊ី និងបរិស្ថាន នៃសាធារណរដ្ឋប្រជាមានិតចិនថ្ងៃទី២០ ខែវិច្ឆិកា ឆ្នាំ ២០២៤ ក្នុងអំឡុងសន្និសីទលើកទី២៩ នៃបណ្តាភាគីអនុសញ្ញាក្របខណ្ឌសហប្រជាជាតិស្តីពីការប្រែប្រួលអាកាសធាតុ នាទីក្រុងបាគូ ប្រទេសអាស៊ែបៃស្សង់។ ឯកឧត្តមបណ្ឌិតរដ្ឋមន្រ្តី បានលើកឡោះងថា កម្ពុជា បានរួមចំណែកយ៉ាងច្រើនទៅលើកិច្ចប្រឹងប្រែងដោះស្រាយបញ្ហាប្រែប្រួលអាកាសធាតុនៅក្នុងប្រទេស និងចូលរួមជាមួយសហគមន៍អន្តរជាតិ ក្នុងការប្រយុទ្ធប្រឆាំងនឹងការប្រែប្រួលអាកាសធាតុ។ នៅក្នុងសន្និសីទ COP29 ឆ្នាំនេះ ប្រទេសកម្ពុជាបានដាក់ចេញនូវគោលបំណងច្បាស់លាស់ក្នុងការប្រយុទ្ធប្រឆាំងនឹងការប្រែប្រួលអាកាសធាតុ ក្នុងជំរុញឱ្យប្រទេសអភិវឌ្ឍន៍ឆ្លើយតបការសន្យាក្នុងការកាត់បន្ថយការកើនឡើងកំដៅ និងផ្តល់មូលនិធីដើម្បីឆ្លើយតបនឹងការប្រែប្រួលអាកាសធាតុ សម្រាប់ជួយប្រទេសកំពុងអភិវឌ្ឍន៍ ដែលជាប្រទេសរងគ្រោះពីបញ្ហានេះផងដែរ។ ឯកឧត្តម ZHAO Yingmin បានវាយតម្លៃខ្ពស់ ចំពោះសមិទ្ធផលសេដ្ឋកិច្ចសង្គមរបស់កម្ពុជា ជាពិសេស ការប្តេជ្ញាចិត្ត និងការចូលរួមរបស់កម្ពុជា ក្នុងអំឡុងសន្និសីទលើកទី២៩ បណ្តាភាគីអនុសញ្ញាក្របខណ្ឌសហប្រជាជាតិស្តីពីការប្រែប្រួលអាកាសធាតុ នាទីក្រុងបាគូ ប្រទេសអាស៊ែបៃស្សង់។ ប្រទេសចិននឹងគាំទ្រដល់កិច្ចសហប្រតិបត្តិការកាន់តែប្រសើរលើវិស័យបរិស្ថាន ជាពិសេស ការប្រយុទ្ធប្រឆាំង នឹងការប្រែប្រួលអាកាសធាតុ ដែលទាមទារនូវកិច្ចខិតខំប្រឹងប្រែងរួម ពីគ្រប់ប្រទេស និងតំបន់ទាំងអស់។ ជាចុងក្រោយថ្នាក់ដឹកនាំក្រសួងបរិស្ថាននៃប្រទេសទាំង២កម្ពុជា ចិន បានឯកភាពបន្តពង្រឹងកិច្ចសហប្រតិបត្តិការទ្វេភាគី និងពហុភាគី នៅគ្រប់កម្រិតទាំងអស់ ដើម្បីដោះស្រាយបញ្ហានៃការប្រែប្រួលអាកាសធាតុ ការអភិវឌ្ឍន៍បញ្ចេញកាបូនទាប ដើម្បីសម្រេចបាននូវយុទ្ធសាស្ត្រចក្រាវិស័យ ដែលផ្តោតលើមុំយុទ្ធសាស្រ្ត៣គឺ ស្អាត បៃតង និងចីរភាព។ក្នុងឱកាសនេះ ភាគីចិនបានប្រកាសផ្តល់ជូនជាសម្ភារក្រោមកិច្ចសហប្រតិបត្តិការខាងត្បូង-ខាងត្បូងសម្រាប់ការប្រយុទ្ធប្រឆាំងការប្រែប្រួលអាកាសធាតុនៅឆ្នាំ២០២៤ រួមមាន៖ អំពូលសូឡា LED បំភ្លឺផ្លូវសាធារណចំនួន១៥០០គ្រឿង ផ្ទាំងប្រព័ន្ធថាមពលព្រះអាទិត្យចំនួន ២0០០គ្រឿង រថយន្តត្រួតពិនិោត្យគុណភាពខ្យល់ចល័ត ចំនួន២ គ្រឿង។ សូមបញ្ជាក់ តាំងពីឆ្នាំ២០១៩ ដល់ឆ្នាំ២០២៤ ក្រសួងអេកូឡូស៊ីនិងបរិស្ថានចិន តាមរយៈកិច្ចសហប្រតិបត្តិការខាងត្បូង-ខាងត្បូង សម្រាប់ការប្រយុទ្ធប្រឆាំងការប្រែប្រួលអាកាសធាតុនៅឆ្នាំ២០២៤ បានផ្តល់ជូនក្រសួងបរិស្ថាននូវជំនួយសម្ភារៈដើម្បីដោះស្រាយបញ្ហានៃការប្រែប្រួលអាកាសធាតុ ការអភិវឌ្ឍន៍បញ្ចេញកាបូនទាប រួមមាន អំពូលសូឡា LED ចំនួន៤៣០០ ក្រឿង ផ្ទាំងសូឡា ចំនួន ២២០០ គ្រឿង រថយន្តត្រួតពិនិត្យគុណភាពខ្យល់ចល័ត ចំនួន២ គ្រឿង និងម៉ូតូអគ្គិសនី ចំនួន២០០គ្រឿងរួចមកហើយ៕

សម្ដេចធិបតី លើកទឹកចិត្តឱ្យផ្សព្វផ្សាយវិជ្ជមានពីកម្ពុជា ដើម្បីទាក់ទាញទេសចរ និងអ្នកវិនិយោគមកកាន់កម្ពុជា

ក្នុងឱកាសអញ្ជើញជាអធិបតីដ៏ខ្ពង់ខ្ពស់ប្រគល់សញ្ញាបត្រជូន និស្សិតជ័យលាភីថ្នាក់បរិញ្ញាបត្រ និងបរិញ្ញាបត្រជាន់ខ្ពស់ នៃសាកលវិទ្យាល័យភូមិន្ទភ្នំពេញ នាព្រឹកថ្ងៃទី២១ ខែវិច្ឆិកា ឆ្នាំ២០២៤នេះដែរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះជាណាចក្រកម្ពុជា បានអំពាវនាវ និងលើកទឹកចិត្តឱ្យប្រជាពលរដ្ឋ និងអ្នកផលិតមាតិកានានា ចូលរួមធ្វើការផ្សព្វផ្សាយរូបភាពវិជ្ជមានពីកម្ពុជា ដើម្បីទាក់ទាញទេសចរ និងអ្នកវិនិយោគមកកាន់កម្ពុជា ដើម្បីជាប្រយោជន៍រួមរបស់កម្ពុជា។ ក្នុងឱកាសនោះ សម្ដេចធិបតី នាយករដ្ឋមន្រ្ដី បានថ្លែងអំណរគុណបងប្អូនប្រជាពលរដ្ឋគ្រប់មជ្ឍដ្ឋានដែលបានចូលរួមផ្សព្វផ្សាយពីសក្ដានុពល និងតំបន់ទេសចរណ៍របស់កម្ពុជា ក្នុងឱកាសព្រះរាជពិធីបុណ្យអុំទូក កន្លងទៅនេះ។ សម្ដេចធិបតី បានលើកឡើងថា តាមរយៈការចូលរួមផ្សព្វផ្សាយពីសំណាក់បងប្អូនប្រជាពលរដ្ឋ និងក្រុមអ្នកផលិតមាតិកា បានធ្វើឱ្យទេសចរបរទេសជាច្រើនបានអញ្ជើញមកទស្សនាកម្ពុជា ក្នុងឱកាសព្រះរាជពិធីបុណ្យអុំទូកកន្លងទៅនេះ។ យោងតាមរបាយការណ៍របស់ក្រសួងទេសចរណ៍ បានឱ្យដឹងថា ក្នុងឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក រយៈពេល៣ថ្ងៃ ចាប់ពីថ្ងៃទី១៤ដល់១៦ ខែវិច្ឆិកា ឆ្នាំ២០២៤ មានភ្ញៀវទេសចរជាតិ និងអន្តរជាតិចេញដើរលេងកម្សាន្តទូទាំងប្រទេសសរុប ៧,៨៤៤,៣៨៨ នាក់ ក្នុងនោះ មានទេសចរជាតិចំនួន ៧,៧៥៥,០៩២នាក់ កើនឡើង ២១.៤% និងទេសចរបរទេសមានចំនួន ៨៩,២៩៦នាក់ កើនឡើង ២៨.៧% ធៀបនឹងរយៈពេលដូចគ្នាឆ្នាំ២០២៣។ ខណៈរាជធានីភ្នំពេញទទួលបានភ្ញៀវទេសចរច្រើនជាងគេ ដែលមានប្រមាណជាង ៦លាននាក់ និងខេត្តសៀមរាប ទទួលបានភ្ញៀវទេសចរប្រមាណជាង ៣០ម៉ឺននាក់៕

សម្ដេចធិបតី៖ ក្រុមជ្រុលនិយមយករឿងព្រំដែនមកបំភ្លៃញុះញង់ពលរដ្ឋ ប៉ុនប៉ងបង្កើតចលានាផ្ដួលរំលំរាជរដ្ឋាភិបាល

ក្នុងឱកាស អញ្ជើញជាអធិបតីដ៏ខ្ពង់ខ្ពស់ប្រគល់សញ្ញាបត្រជូន និស្សិតជ័យលាភីថ្នាក់បរិញ្ញាបត្រ និងបរិញ្ញាបត្រជាន់ខ្ពស់ នៃសាកលវិទ្យាល័យភូមិន្ទភ្នំពេញ នាព្រឹកថ្ងៃទី២១ ខែវិច្ឆិកា ឆ្នាំ២០២៤នេះដែរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះជាណាចក្រកម្ពុជា បានមានប្រសាសន៍ឱ្យដឹងថា ក្រុមជ្រុលនិយមនៅក្រៅស្រុក ដឹកនាំដោយទណ្ឌិតក្បត់ជាតិ ពួកគេបានខិតខំបង្កើតព័ត៌មានមិនពិតនានាទាក់ទងនឹងរឿបូរណភាពទឹកដី និងរឿងព្រំដែន មកបំភ្លៃ ដើម្បីតែញុះញង់ពលរដ្ឋ បង្កើតចលានាផ្ដួលរំលំរាជរដ្ឋាភិបាលតែប៉ុណ្ណោះ។ សម្ដេចធិបតី នាយករដ្ឋមន្រ្ដី មានប្រសាសន៍ថា ក្រុមជ្រុលនិយមនៅក្រៅស្រុក បានប៉ុនប៉ងបង្កើតចលនាផ្ដួលរំលំរាជរដ្ឋាភិបាលជាច្រើនលើកច្រើនសារមកហើយ តាមរយៈការប្រឌិតព័ត៌មានមិនពិតរឿងបញ្ហាព្រំដែននេះ ដើម្បីញុះញង់ពលរដ្ឋឱ្យចូលរួមចលនារបស់ពួកគេហើយឈានទៅផ្ដួលរំលំរាជរដ្ឋាភិបាល។ សម្ដេចធិបតី បានបញ្ជាក់ឱ្យដឹងថា ករណីកោះគុត ស្ថិតនៅដែនទឹក នៃភូមិសាស្ដ្រខេត្តកោះកុង ក៏មិនខុសពីរឿងកិច្ចសហប្រតិបត្តិការអភិវឌ្ឍតំបន់ត្រីកោណអភិវឌ្ឍ CLV-DTA ដែរ គឺកាលនោះក្រុមជ្រុលនិយមបង្កើតចលនានេះឡើង ដើម្បីញុះញង់ពលរដ្ឋឱ្យចេញមកផ្ដួលរំលំរាជរដ្ឋាភិបាលនៅថ្ងៃទី១៨ ខែសីហា កន្លងទៅ ប៉ុន្ដែទៅបានរាជរដ្ឋាភិបាលទប់ស្កាត់ បង្ក្រាបធ្វើឱ្យផែនការរបស់ពួកគេបរាជ័យ។ ចំណែកករណី កោះគុតនេះ គឺពួកគេមានបំណងញុះញង់ពលរដ្ឋឱ្យងើបមកធ្វើបាតុកម្ម ក្នុងឱកាសពលរដ្ឋចូលរួមព្រះរាជពិធីបុណ្យអុំទូក កន្លងទៅនេះ ដូច្នេះរឿងនេះ គឺជានយោបាយអាក្រក់ដដែលៗរបស់ក្រុមជ្រុលនិយម ដើម្បីបំផ្លាញសន្ដិភាពរបស់កម្ពុជា។ ក្នុងឱកាសនេះសម្ដេចធិបតី នាយករដ្ឋមន្រ្ដី បានអំពាវនាវដល់ប្រជាពលដ្ឋ ធ្វើការវិភាគ និងពិចារណាឱ្យបានច្បាស់លាស់ជុំវិញការប្រឌិតព័ត៌មានរបស់ក្រុមជ្រុលនិយមនៅក្រៅស្រុក ពីព្រោះពួកគេធ្វើសកម្មភាពដើម្បីតែសម្រេចមហិច្ឆតានយោបាយរបស់ពួកគេ គឺប៉ុនប៉ងផ្ដួលរំលំរាជរដ្ឋាភិបាល។ សម្ដេចធិបតី នាយករដ្ឋមន្ត្រី បានបញ្ជាក់ថា មកដល់បច្ចុប្បន្ន ព្រំដែនកម្ពុជាដែលបានវាស់វែងត្រួសៗដោយប្រើបច្ចេកវិទ្យាទំនើប គឺមានទំហំ ១៨១ ៤៣៦ គីឡូម៉ែត្រការ៉េ មិនមែន ១៨១ ០៣៥ គីឡូម៉ែត្រការ៉េនោះទេ។ តួលេខវាស់វែងត្រួសៗដោយប្រើបច្ចេកវិទ្យាថ្មីនេះ កើនជាង ៣០០ គីឡូម៉ែត្រការ៉េ ដោយនៅមិនទាន់រាប់បញ្ចូលដែនដីកោះនៅឡើយនោះទេ។សម្ដេចធិបតី ក៏បានមានប្រសាសន៍ឱ្យបុគ្គលខ្លះ ដែលបានសាក់ទឹកដីកម្ពុជាមានទំហំត្រឹម ១៨១ ០៣៥ គីឡូម៉ែត្រការ៉េ ទៅលុបសាក់ចេញ នៅក្រោយកម្ពុជាចរចាបញ្ហាព្រំដែនចប់សព្វគ្រប់ ដែលមានទំហំកើនលើសតួលេខ ១៨១ ០៣៥ គីឡូម៉ែត្រការ៉េទៅទៀត៕

សម្ដេចធិបតី ហ៊ុន ម៉ាណែត បញ្ជាក់ពីរចំណុចជូនជនរួមជាតិទាក់ទងនឹងករណី កោះគុត

ក្នុងឱកាស អញ្ជើញជាអធិបតីដ៏ខ្ពង់ខ្ពស់ប្រគល់សញ្ញាបត្រជូន និស្សិតជ័យលាភីថ្នាក់បរិញ្ញាបត្រ និងបរិញ្ញាបត្រជាន់ខ្ពស់ នៃសាកលវិទ្យាល័យភូមិន្ទភ្នំពេញ នាព្រឹកថ្ងៃទី២១ ខែវិច្ឆិកា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះជាណាចក្រកម្ពុជា បានបញ្ជាក់ចំនួនពីរចំណុចទៅកាន់ប្រជាពលរដ្ឋ និងជនរួមជាតិទាក់ទងនឹងករណី ក្រុមជ្រុលនិយមនៅក្រៅប្រទេសបំភ្លៃព័ត៌មាន រឿងកោះគុត ស្ថិតនៅព្រំដែនទឹក កម្ពុជា-ថៃ ។ សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់ថា ពាក់ព័ន្ធនឹងករណី កោះគុត ស្ថិតនៅដែនសមុទ្រ ក្នុងភូមិសា្រស្ដខេត្តកោះកុង ដែលក្រុមជ្រុលនិយមចោទប្រកាន់ថា រាជរដ្ឋាភិបាលស្ងាត់នោះ មូលហេតុដែលរាជរដ្ឋាភិបាលមិនឆ្លើយតបទៅក្រុមជ្រុលនិយមនៅក្រៅ ដោយមូលហេតុចំនួនពីរ គឺទី១ រាជរដ្ឋាភិបាលមានភាពចាស់ទុំខាងនយោបាយ និងទី២ រាជរដ្ឋាភិបាលមានការទទួលខុសត្រូវចំពោះប្រជាជន លើបូរណភាពទឹកដី និងអធិបតេយ្យជាតិ។ សម្ដេច បន្តថា ភាពចាស់ទុំ រាជរដ្ឋាភិបាល ដែលជាអ្នកដឹកនាំប្រទេសមិនអាចលេងល្បែងនយោបាយដូចកូនក្មេងជាមួយក្រុមជ្រុលនិយមនៅក្រៅស្រុកនោះទេ ហើយកត្តានេះ គឺដើម្បីកុំឱ្យយកភ្លើងពីខាងក្រៅចូលមកផ្ទះ ខណៈរឿងព្រំដែនកម្ពុជា-ថៃ បានធ្វើតាំងពីឆ្នាំ ២០០៦ រហូតមកដល់បច្ចុប្បន្ន ជាពិសេសព្រំដែនទឹក មិនទាន់ឯកភាពបញ្ចប់នៅឡើយ។ ប៉ុន្ដែករណី កោះគុតនេះ ក្រុមប្រឆាំងនៅប្រទេសថៃ បានចោទប្រកាន់រាជរដ្ឋាភិបាលរបស់គេថា ធ្វើឱ្យបាន កោះគុតមកកម្ពុជា ចំណែកក្រុមជ្រុលនិយមនៅក្រៅស្រុកបានទាញយករឿងនេះមកដើម្បីតែផលប្រយោជន៍នយោបាយរបស់ពួកគេដែរ។សម្ដេចធិបតី នាយករដ្ឋមន្រ្ដី ចោទសួរថា ក្រុមប្រឆាំងនៅថៃ បានចោទទៅរាជរដ្ឋាភិបាលថៃថា បានធ្វើឱ្យបាត់កោះគុត មកកម្ពុជា ចំណែកក្រុមជ្រុលនិយមនៅក្រៅស្រុក បានចោទកម្ពុជាថា ធ្វើឱ្យបាត់កោះគុត ទៅថៃ ដូច្នេះតើកោះនេះបាត់ទៅណា ឬបាត់ទៅជនទីបី ឬលិចចូលទៅក្នុងសមុទ្រ? ខណៈព្រំដែនសមុទ្រកម្ពុជា-ថៃ មិនទាន់បានបោះបង្គោលឯកភាពគ្នាចប់សព្វគ្រប់នៅឡើយ។ក្នុងឱកាសនេះសម្ដេចធិបតី ហ៊ុន ម៉ាណែត នាយករដ្ឋមន្ត្រី បញ្ជាក់ជូនជនរួមជាតិសារជាថ្មីថា រដ្ឋាភិបាលប្ដេជ្ញាការពារបូរណភាពទឹកដីកម្ពុជា មិនឱ្យបាត់បង់មួយមិល្លីម៉ែត្រនោះឡើយ។ សម្ដេចធិបតី បន្ថែមថា ការដោះស្រាយបញ្ហាព្រំដែន គឺរាជរដ្ឋាភិបាលប្រកាន់ជំហរដោះស្រាយដោយសន្តិវិធី ដោះស្រាយតាមយន្តការដែលមានស្របតាមច្បាប់ និងបច្ចេកទេសអន្តរជាតិ៕

ទាក់ទងនឹងបញ្ហាកោះគុត សម្តេចតេជោ ហ៊ុន សែន ផ្តាំទៅក្រុមជ្រុលនិយមថា ដំបៅមិនឈឺកុំយកឈឺចាក់

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា បានផ្តាំ ទៅក្រុមប្រឆាំងជ្រុលនិយមមួយក្តាប់តូច ដែលបានកំពុងតែវង្វេងប្រវត្តិសាស្រ្តនោះថា កុំបង្វែរស្ថានការណ៍ឲ្យក្តៅ និងញុះញង់អុចអាលពលរដ្ឋឲ្យមានការយល់ច្រឡំខុសពីការពិតទាក់ទងនឹងបញ្ហាកោះគុតឲ្យសោះ ខណៈកោះនេះ គឺជាតំបន់ត្រួតស៊ីគ្នារវាងកម្ពុជា និងថៃ ហើយរាជរដ្ឋាភិបាលនៃប្រទេសទាំងពីរក៏បានកំពុងរកដំណោះស្រាយគ្នាជាទ្វេភាគី និងដោយសន្តិវិធីផងដែរ។ផ្ញើសារចេញពីកម្មវិធីបើកអនុសំវច្ចរមហាសន្និបាតមន្រ្តីសង្ឃទូទាំងប្រទេសលើកទី៣២ឆ្នាំ២០២៤ នៅសាលវិទ្យាស្ថានអប់រំ នាថ្ងៃទី២១ ខែ វិច្ឆិកា ឆ្នាំ២០២៤នេះ សម្តេចតេជោ ហ៊ុន សែន បានលើកឡើងថា នាប៉ុន្មានថ្ងៃមកនេះមានក្រុមជ្រុលនិយមមួយក្តាប់តូច ដែលមានក្រុមក្បត់ជាតិបីជំនាន់នៅពីក្រោយខ្នងធ្វើ ការញុះញង់អុចអាលនោះ បានកំពុងយកបញ្ហាកោះគុតបញ្ឆេះពលរដ្ឋឲ្យមានការភ័នច្រឡំធ្វើបាតុកម្មប្រឆាំង នឹងរាជរដ្ឋាភិបាល និងរុញរាជរដ្ឋាភិបាលឲ្យប្តឹងភាគីថៃទៅកាន់តុលាការយុត្តិធម៌អនុ្តរជាតិ ICJ ហើយតាមរយៈការញុះញង់ពីជនអគតិទាំងនោះអាចនឹងធ្វើឲ្យកម្ពុជា និងថៃមើលមុខគ្នាមិនចំ រហូតអាចឈានដល់ផ្ទុះអាវុធផងដែរ។ សម្តេចតេជោ បានបន្ថែមទៀតថា «ដំបៅមិនឈឺយកឈើចាក់»។សម្តេចតេជោ ហ៊ុន សែន ក៏បានបញ្ជាក់ផងដែរថា ការប្តឹងផ្តល់គ្នាទៅតុលាការយុត្តិធម៌អន្តរជាតិលើបញ្ហាកោះគុតតាមការញុះញង់របស់ជនអគតិមួយក្តាប់តូចនៅក្រៅប្រទេសនោះ មិនមែនជាការងាយស្រួលនោះទេ ខណៈបញ្ហាកោះគុតនេះ កម្ពុជាមានក្រុមក្បត់ជាតិបីជំនាន់ជាអ្នកបញ្ឆេះ ហើយខាងភាគីថៃ ក៏មានក្រុមជ្រុលនិយម បានកំពុងបញ្ឆេះរឿងនេះដែរ ដែលកត្តានេះ អាចនឹងធ្វើឲ្យកម្ពុជា និងថៃមានបញ្ហា ដាក់គ្នាដូចករណីប្រាសាទព្រះវិហារ និងកោះតាក្របីយ៉ាងដូច្នេះដែរ៕ អត្ថបទបាន ចក់

សម្តេចតេជោ អំពាវនាវឱ្យពលរដ្ឋរក្សាភាពស្ងៀមស្ងាត់លើបញ្ហាកោះគុត ទុកឱ្យរដ្ឋាភិបាលដោះស្រាយ

សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានអំពាវនាវដល់បងប្អូនប្រជាពលរដ្ឋ និងកងកងទ័ពទាំងអស់ រក្សាភាពស្ងៀមស្ងាត់កុំស្តាប់តាមការញុះញង់អុចអាលពីក្រុមជុលនិយមមួយក្តាប់តូចលើបញ្ហាកោះគុតនេះ ដោយគប្បីត្រូវទុកលទ្ធភាពករណីនេះ ឲ្យរដ្ឋាភិបាលកម្ពុជា និងថៃដោះស្រាយគ្នាដោយទ្វេភាគី និងដោយសន្តិវិធី។ថ្លែងនៅក្នុងវិធីបើកអនុសំវច្ចរមហាសន្និបាតមន្រ្តីសង្ឃទូទាំងប្រទេសលើកទី៣២ ឆ្នាំ២០២៤ នៅសាលវិទ្យាស្ថានអប់រំ នាព្រឹកថ្ងៃទី២១ ខែ វិច្ឆិកា ឆ្នាំ២០២៤នេះ សម្តេចតេជោ ហ៊ុន សែន អតីតនាយក រដ្ឋមន្រ្តីនៃកម្ពុជា បានលើកឡើងថា នាពេលបច្ចុប្បន្នកម្ពុជា និងថៃបានកំពុងរក្សាបាននូវព្រំដែនសន្តិភាព ជាមួយគ្នាដោយបានធ្វើឲ្យប្រជាជននៃប្រទេសទាំងពីរសក្សាទំនាក់ទំនងគ្នាបានល្អ ដូច្នេះកុំគ្រាន់តែឮពាក្យ ញុះញង់ខុសពីការពិតពីក្រុមជ្រុលនិយមមួយក្តាប់តូចបែជាធ្វើឲ្យប្រទេសទាំងពីរមានភាពប្រេះឆា ជាមួយគ្នានោះ។សម្ដេចតេជោ ហ៊ុន សែន ក៏បានលើកឡើងផងដែរថា ប្រទេសណាក៏មានក្រុមជ្រុលនិយមដែរ ប៉ុន្តែក្រុមជ្រុលនិយមនៅកម្ពុជាគឺបានជ្រុលនិយមហួសកម្រិតដោយពិបាកទទួលយក។ ត្រង់ន័យនេះ គឺសម្តេចតេជោ បានសំដៅទៅលើក្រុមក្បត់ជាតិបីជំនាន់ ដែលជាក្រុមជ្រុលនិយម ហើយបានកំពុងរុញស្ថានការណ៍ឱ្យក្ដៅ ខណៈទង្វើនេះ គឺមានចេតនាបំផ្លាញប្រយោជន៍ពលរដ្ឋ និងប្រទេសជាតិ ។ជាក់ស្តែងលើបញ្ហាកោះគុតនេះតែម្តង បានកំពុងបញ្ឆេះឲ្យពលរដ្ឋធ្វើបាតុកម្មរាជរដ្ឋាភិបាល។យ៉ាងណាក៏ដោយ ទាក់ទងនឹងបញ្ហាកោះកុតនេះសម្តេចតេជោ ហ៊ុន សែន បានប្រាប់ដល់កងកងទ័ព ទាំងអស់ទាំងជើងទឹក ជើងគោក និងជើងអាកាសកុំធ្វើការចល័តទ័ពផ្ដេសផ្ដាសនៅតំបន់កោះនោះឲ្យសោះ ដោយគ្រាន់តែទទួលព័ត៌មានមិនច្បាស់លាស់ និងស្តាប់តាមការអុចអាលពីក្រុមប្រឆាំងជ្រុលនិយមមួយក្តាប់តូចនោះ។ ទាក់ទងនឹងបញ្ហានេះដែរ សម្តេចតេជោ ក៏បានស្នើរឲ្យមានការតាក់តែងច្បាប់ដោយដាក់ក្រុមជ្រុលនិយមទាំងនោះ ទៅជាក្រុមភេរវកម្មផងដែរ៕អត្ថបទ៖ បាន ចក់

សាលាដំបូងខេត្តកំពង់ឆ្នាំង បើកសវនាកាជំនំជំរះក្តីលើជនល្មើស៣នាក់ ដែលបានចូលទៅឈូសទន្ទ្រានព្រៃលិចទឹកតំបន់២ក្នុងស្រុកកំពង់លែងកាលពីដើមខែមេសា ឆ្នាំ២០២៤

កំពង់ឆ្នាំង៖ ជនជាប់ចោទ៣នាក់ដែលពាក់ព័ន្ធក្នុងករណីឈូសបំផ្លាញព្រៃលិចទឹកតំបន់២ ក្នុងស្រុកកំពង់លែង ដែលត្រូវអង្គភាពប្រឆាំងអំពើពុករលួយចាប់ខ្លួន បញ្ជូនមកដាក់ពន្ធធនាគាកាលពីដើមខែមេសា ឆ្នាំ២០២៤នោះ ត្រូវបានសាលដំបូងខេត្តកំពង់ឆ្នាំង យកមកបើកសវនាកាសួរដេញដោលពេញ១ថ្ងៃ ដោយមានការចូលរួមពីឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្ត, លោក ស៊ិន ច័ន្ទសុភ័ក្រ្ត ចៅក្រម, លោក កែវ វ៉ាន់នី ព្រះរាជអាជ្ញារង, លោក វ៉ែន កែវសារឿត ក្រឡាបញ្ជី និងមានការចូលរួមពីមន្ត្រីនៃអង្គភាពប្រឆាំងអំពើពុករលួយចំនួន៥រូប រួមនិងមេធាវីការពារក្តីអោយជនល្មើស៤រូបផងដែរ។ លោក ហុង គឹមហាក់ អ្នកនាំពាក្យសាលាដំបូងខេត្តកំពង់ឆ្នាំង បានអោយដឹងថា៖ មកដល់ថ្ងៃបើកសវនាកានេះ ជនជាប់ចោទទាំង៣នាក់បានជាប់ពន្ធធនាគារអស់រយៈពេលជាង៧ខែហើយ ។ អង្គសវនាកា បានផ្តើមដំណើរការចាប់ពីម៉ោង៨ព្រឹក រហូតដល់ម៉ោង៦និង៣០នាទីល្ងាច ថ្ងៃទី២០ ខែវិច្ឆិកា ឆ្នាំ២០២៤ ដោយបានដេញដោលសួរជនជាប់ចោទទាំង៣នាក់ រួមនិងសាក្សីជាង១០នាក់ផ្សេងទៀត ដើម្បីយកចម្លើយមកផ្ទៀងផ្ទាត់។ ក្រោយសាកសួរពេញ១ថ្ងៃនោះ អង្គសវនាកា បានសម្រេចយកទៅពិចារណា និងដាក់ទោសទណ្ឌទៅលើជនទាំង៣នាក់នេះប៉ុន្មានឆ្នាំ នឹងបានដឹងនៅពេលចេញសាលក្រម។ សូមរំលឹកថា៖ កាលពីវេលាម៉ោង១០និង៥៥នាទី ថ្ងៃទី០៣ ខែមេសា ឆ្នាំ២០២៤ ជនជាប់ចោទ៣នាក់ដែលបានពាក់ព័ន្ធនឹងការឈូសបំផ្លាញព្រៃលិចទឹកនៅចំណុចបឹងតាទុំ ភូមិកង្កែប ឃុំច្រណូក ស្រុកកំពង់លែងកន្លងទៅ ត្រូវបានអង្គភាពប្រឆាំងអំពើពុករលួយបញ្ជូនមកដល់អយ្យការអមសាលាដំបូងខេត្តកំពង់ឆ្នាំងវិញ និងបានបញ្ជូនទៅពន្ធនាគារខេត្តកំពង់ឆ្នាំងនៅវេលាម៉ោង១១និង៤៥នាទីថ្ងៃដដែល។ជនជាប់ចោទទាំង៣នាក់ រួមមានឈ្មោះ ពុំ សុផល ជាអភិបាលរងស្រុកកំពង់លែង និងជាប្រធានក្រុមចំរុះទប់ស្កាត់បទល្មើសព្រៃលិចទឹកក្នុងដែនឃុំច្រណូក ស្រុកកំពង់លែង(ជាអ្នកអនុញាតអោយកើតមានបទល្មើស), ឈ្មោះ លឹម ដានីន ប្រធានការិយាល័យប្រជាពលរដ្ឋស្រុកកំពង់លែង (ជាអ្នកសំរបសំរួលលុយកាក់អោយមន្ត្រី ឬសមត្ថកិច្ចដែលដឹងរឿងនេះ), ឈ្មោះ ជួន តុំ ជាអ្នករកស៊ីទិញលក់ដីក្នុងស្រុកកំពង់លែង (ជាអ្នកឈូសបំផ្លាញព្រៃលិចទឹក និងជាអ្នកសំរបសំរួលលុយកាក់ដល់មន្ត្រី ឬសមត្ថកិច្ចដែលដឹងរឿងនេះផងដែរ)។ ជនល្មើស២នាក់ ឈ្មោះ លឹម ដានីន និង ជួន តុំ ត្រូវបានរដ្ឋបាលខេត្តកំពង់ឆ្នាំង អយ្យការសាលាដំបូងខេត្ត និងមន្ទីរកសិកម្មខេត្ត ចាប់ឃាត់ខ្លួនភ្លាមៗ ក្រោយពីពួកគេបានចូលទៅឈូសបំផ្លាញព្រៃលិចទឹកនៅចំណុចបឹងតាទុំ ស្ថិតក្នុងកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង អស់ប្រមាណ៤ហិកតា ក្នុងចំណោម២០ហិកតា ចាប់ពីថ្ងៃទី២២ដល់ថ្ងៃទី២៧ ខែមីនា ឆ្នាំ២០២៤កន្លងមក និងបានបញ្ជូនខ្លួនទៅអង្គភាពប្រឆាំងអំពើពុករលួយកាលពីថ្ងៃទី៣០ ខែមីនា ឆ្នាំ២០២៤។ ដោយឡែកឈ្មោះ ពុំ សុផល ត្រូវបានអង្គភាពប្រឆាំងអំពើពុករលួយ កោះហៅអោយចូលខ្លួន ដើម្បីសាកសួរនៅថ្ងៃទី០១-០២ ខែមេសា ឆ្នាំ២០២៤ ហើយបានឃាត់ខ្លួនបញ្ជូនមកអយ្យការអមសាលាដំបូងខេត្តវិញនៅថ្ងៃទី០៣ ខែមេសា ឆ្នាំ២០២៤ តែម្តង។កន្លងមក សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវអោយប្រជាពលរដ្ឋ អាជ្ញាធរមានសមត្ថកិច្ចទាំងអស់ ចូលរួមទប់ស្កាត់ ថែរក្សាព្រៃលិចទឹក កុំអោយមានការបំផ្លាញតទៅទៀត ក្រោយពីសម្តេចដឹងថា ព្រៃលិចទឹកជុំវិញបឹងទន្លេសាបជាច្រើនពាន់ហិកតារងការបំផ្លាញពីក្រុមជនល្មើស។ ក្រោយពីសម្តេចធិបតីមានប្រសាសន៍រួច អាជ្ញាធរខេត្តកំពង់ឆ្នាំង អយ្យការអមសាលាដំបូងខេត្តកំពង់ឆ្នាំង និងមន្ទីរកសិកម្ម រុក្ខាប្រម៉ាញ់ និងនេសាទខេត្ត បានសហការបង្ក្រាបបទល្មើសនេះបានចំនួន២ករណី និងចាប់បានជនល្មើសបំផ្លាញព្រៃលិចទឹកចំនួន៥នាក់ ផ្តន្ទាទោសតាមនីតិវិធី ហើយមួយចំនួនទៀតកំពុងរត់គេចខ្លួនផងដែរ ៕ កាំង ហុងវាស្នា

ប្រសាសន៍សំខាន់ៗរបស់សម្ដេចធិបតី ហ៊ុន ម៉ាណែត ក្នុងពិធីប្រគល់សញ្ញាបត្រជូននិស្សិតសាកលវិទ្យាល័យភូមិន្ទភ្នំពេញ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី២១ ខែវិច្ឆិកា ឆ្នាំ២០២៤ នេះ បានអញ្ជើញប្រគល់សញ្ញាបត្រជូនដល់និស្សិតសាកលវិទ្យាល័យភូមិន្ទភ្នំពេញ ។ប្រសាសន៍សំខាន់ៗរបស់សម្ដេចធិបតី ហ៊ុន ម៉ាណែត ដែលមានខ្លឹមសារដូចខាងក្រោម៖-សម្ដេចធិបតី ហ៊ុន ម៉ាណែត នាយករដ្ឋមន្រ្ដី លើកទឹកឱ្យធ្វើការផ្សព្វផ្សាយវិជ្ជមានពីកម្ពុជា ព្រោះតែការផ្សព្វផ្សាយនេះហើយទើបធ្វើឱ្យភ្ញៀវទេសចរមកកម្ពុជាកើនឡើង។ សម្ដេចធិបតីបញ្ជាក់ថា គ្មានប្រទេសណាល្អឥតខ្ចោះនោះទេ ប៉ុន្ដែការផ្សព្វផ្សាយវិជ្ជមាន គឺដើម្បីកម្ពុជាទាំងអស់គ្នា។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី បញ្ជាក់សារជាថ្មីថា គ្មានការដោះដូរ វិទ្យាស្ថានបច្ចេកវិទ្យាកម្ពុជា (សាលាតិចណូ) នោះទេ ប៉ុន្ដែគឺមានការពង្រីកសាលាបន្ថែមដោយសារតែកំណើននិស្សិតមានការចុះឈ្មោះចូលរៀននៅសាលានេះកាន់តែច្រើន។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី ប្រកាសថ្លែងអំណរគុណដល់បណ្ដាសាកលវិទ្យា ដែលបានផ្ដល់អាហារូបករណ៍ដល់សម្ដេចតេជោ (សមាគមសិស្ស-និស្សិតអាហារូបករណ៍ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត) ដែលអាចផ្ដល់ឱកាសដល់និស្សិតដែលគ្មានលទ្ធភាពអាបន្តការសិក្សានៅសាកលវិទ្យាល័យបាន។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី៖ ឱកាសការងារមានច្រើនកម្រិត ច្រើនប្រភេទ និងច្រើនទីកន្លែង អ៊ីចឹងការទទួលបានការងារក៏ផ្សេងៗគ្នា ហើយការទទួលបានការងារមុខតំណែងកាន់តែធំ ការទទួលខុសត្រូវកាន់តែខ្ពស់ និងជំនាញកាន់តែខ្ពស់ ដូច្នេះឱកាសដែលមានអាស្រ័យទៅលើសមត្ថភាព ចំណេះដឹង និងគុណវុឌ្ឍិរបស់សិស្ស និស្សិតផ្ទាល់។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី៖ នៅកម្ពុជាគ្មានការបែងចែកវណ្ណៈនោះទេ ដូច្នេះកូនអ្នកនេសាទ ឬកូនអ្នកកសិករ អ្នកស្រែចម្ការ ក៏អាចក្លាយជាមន្រ្ដីរាជការ អ្នកដឹកនាំនៅតាមបណ្ដាក្រសួង ស្ថាប័ននានា ក៏ដូចជាអ្នកជោគជ័យនៅក្នុងជំនួញផងដែរ លទ្ធផលទាំងនេះ គឺអាស្រ័យទៅលើការអប់រំរបស់ពួកគេ។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី៖ សភាពការណ៍ពិភពលោកដើរលឿនណាស់ ហើយការប្រកួតប្រជែងក៏មានការប្រកួតប្រជែងខ្លាំងណាស់ដែរ ទាំងវិស័យនយោបាយ និងសេដ្ឋកិច្ច ដូច្នោះទាមទារឱ្យកម្ពុជាមានធនធានមនុស្សដែលខ្លាំង និងមានសមត្ថភាពក្នុងការប្រកួតប្រជែង ខណៈដែរកម្ពុជាមិនត្រឹមតែទាក់ទាញការវិនិយោគក្នុងវិស័យរោងចក្រកាត់ដេរប៉ុណ្ណោះទេ ប៉ុន្ដែយើងក៏ត្រូវទាក់ទាញកាវិនិយោគលើវិស័យបច្ចេកវិទ្យា និងយានយន្តទំនើបផងដែរ។-សម្ដេចធិបតី ហ៊ុន ម៉ាណែត នាយករដ្ឋមន្រ្ដីបញ្ជាក់ថា ក្រុមហ៊ុន BYD កំពុងចរចាមកបើករោងចក្រផលិតរថយន្តអគ្គិសនីនៅកម្ពុជានៅឆ្នាំក្រោយ ខណៈកម្ពុជាក៏កំពុងមានក្រុមហ៊ុនរថយន្តរបស់ជប៉ុន កូរ៉េ និងក្រុមហ៊ុនរថយន្តជាច្រើនទៀតកំពុងវិនិយោគលើវិស័យយានយន្តនៅកម្ពុជា។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី បញ្ជាក់ថា វិស័យ ឧស្សាហកម្ម និងកម្មន្តសាល និងបច្ចេកវិទ្យា ជាវិស័យអាទិភាពចំបងក្នុងការជំរុញកំណើនសេដ្ឋកិច្ចជាតិ ដូច្នេះរាជរដ្ឋាភិបាលកំពុងជំរុញការអភិវឌ្ឍ និងវិនិយោគលើវិស័យនេះ ដើម្បីអនុវត្តនៅឆ្នាំ ២០២៥ ខាងមុខ។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី បានបញ្ជាឱ្យសិក្សាបន្ថែមលើការស្ថាបនាផ្លូវរថភ្លើងខ្លីមួយខ្សែបន្ថែមនៅលើទឹកដីខេត្តសៀមរាប ដើម្បីផ្ដល់ភាពងាយស្រួលដល់ការដឹកញ្ជូន វិស័យទេសចរណ៍នៅខេត្តសៀមរាប។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី បញ្ជាក់ថា ដោយសារតែបញ្ហាសេដ្ឋកិច្ចសាកលប្រទេសជិតខាងកម្ពុជាមួយចំនួនមានបញ្ហាអតិផរណា ដែលបណ្ដាលឱ្យទំនិញមួយចំនួនឡើងថ្លៃរហូតដល់ទៅ ៣០% ប៉ុន្ដែប្រទេសកម្ពុជាយើងអាចគ្រប់គ្រងបាន មិនឱ្យមានបញ្ហាអតិផរណានេះ កើតឡើងឡើយ។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី ផ្ដាំទៅនិស្សិតថា ប្អូនអាចធ្វើការងារធំជោគជ័យទៅបាន ទាល់តែប្អូនអាចធ្វើការងារជោគជ័យពីតូចៗទៅជាមុនសិន ខណៈដែលរាជរដ្ឋាភិបាលក៏បានអនុវត្តបែបនេះដែរ គឺអនុវត្តឱ្យបានល្អតាំងតែពីការងារតូច ល្អិត ទៅតែម្ដង។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី ផ្ដាំទៅនិស្សិតឱ្យប្រើប្រាស់ចំណេះដឹងឱ្យសាកសមជាបញ្ញវន្ត កុំពឹងលើការសម្រេចចិត្តរបស់អ្នកដទៃ និស្សិតដែលខិតខំសិក្សារៀនសូត្រត្រូវយកចំណេះដឹងមកសម្រេចចិត្តដោយឯករាជ្យ ម្ចាស់ការលើខ្លួនឯង ក្រោយទទួលបានព័ត៌មានគ្រប់ជ្រុងជ្រោយ។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី ផ្ដាំទៅនិស្សិតឱ្យយកចំណេះរបស់ខ្លួនដែលបានខិតខំរៀនសូត្រ យកទៅអនុវត្តឱ្យស្របទៅនឹងការអភិវឌ្ឍរបស់ប្រទេសជាតិ កុំយកចំណេះទៅអនុវត្តខុស។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី ផ្ញើសារជូនបងប្អូនជនរួមជាតិ ពាក់ព័ន្ធនឹងរឿងកោះគុត នៅខេត្តកោះកុង ដែលក្រុមជ្រុលនិយមចោទប្រកាន់ថា រាជរដ្ឋាភិបាលស្ងាត់នោះ គឺទី១ រាជរដ្ឋាភិបាលមានភាពចាស់ទុំខាងនយោបាយ ទី២ រាជរដ្ឋាភិបាលមានការទទួលខុសត្រូវចំពោះប្រជាជន លើបូរណភាពទឹកដី និងអធិបតេយ្យជាតិ។ សម្ដេចបន្តថា ភាពចាស់ទុំ គឺមិនយកភ្លើងចូលផ្ទះ ខណៈរឿងព្រំដែនកម្ពុជា-ថៃ បានធ្វើតាំងពីឆ្នាំ ២០០៦ រហូតមកដល់បច្ចុប្បន្នមិនទាន់បញ្ចប់នៅឡើយ។ ប៉ុន្ដែរឿងនេះ ក្រុមប្រឆាំងជ្រុលនិយមមួយក្ដាប់តូច បានទាញយកមកដើម្បី តែផលប្រយោជន៍នយោបាយរបស់ពួកគេ។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី ចោទសួរថា ក្រុមប្រឆាំងនៅថៃ បានចោទទៅរាជរដ្ឋាភិបាលថៃថា បានធ្វើឱ្យបាត់កោះគុត មកកម្ពុជា ចំណែកក្រុមជ្រុលនិយមនៅក្រៅស្រុក បានចោទកម្ពុជាថា ធ្វើឱ្យបាត់កោះគុត ទៅថៃ ដូច្នេះតើកោះនេះបាត់ទៅណា ឬបាត់ទៅជនទីបី ឬលិចចូលនៅក្នុងសមុទ្រ? ខណៈព្រំដែនសមុទ្រកម្ពុជា-ថៃមិនទាន់បានបោះបង្គោលឯកភាពគ្នាចប់សព្វគ្រប់នៅឡើយ។-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បញ្ជាក់ជាសាធារណៈជាថ្មីថា រដ្ឋាភិបាលប្ដេជ្ញាការពារបូរណភាពទឹកដីកម្ពុជា មិនឱ្យបាត់បង់មួយមិល្លីម៉ែត្រនោះឡើយ។ សម្ដេចធិបតីបញ្ជាក់បន្ថែមថា ការដោះស្រាយបញ្ហាព្រំដែន គឺយើងប្រកាន់ជំហរដោះស្រាយដោយសន្តិវិធី ដោះស្រាយតាមយន្ត ការដែលមាន តាមច្បាប់ និងបច្ចេកទេសអន្តរជាតិ។-សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី៖ ការស្នើឱ្យរដ្ឋាភិបាលបញ្ចេញឯកសារ និងយុទ្ធវិធីដោះស្រាយបញ្ហាព្រំដែនជាមួយប្រទេសជិតខាង ជាការស្នើដែលមានភាពល្ងង់ខ្លៅបំផុត។ សម្ដេចធិបតីបន្ថែមថា ចង់ដឹងពីវិធីសាស្ត្រដោះស្រាយបញ្ហាព្រំដែន សូមរង់ចាំមើលលទ្ធផល។ សម្ដេចធិបតីបញ្ជាក់បន្ថែមថា រដ្ឋាភិបាលនឹងប្រឹងប្រែងដោះស្រាយបញ្ហាព្រំដែនឱ្យបានប្រយោជន៍ជាអតិបរមា(ច្រើនបំផុត)ដល់កម្ពុជា។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី បញ្ជាក់ថា ក្រោយកម្ពុជាបោះបង្កោលព្រំដែនដីគោក និងព្រំដែនទឹកចប់សព្វគ្រប់ដែនដីកម្ពុជា អាចកើនឡើងលើពីផែនទីកំណត់បច្ចុប្បន្ន ដូច្នេះបងប្អូនដែលទៅចាក់សាក់លើទំហំផ្ទៃដី បច្ចុប្បន្នអាចត្រូវលុបចេញ និងផ្លាស់ប្ដូរ។-សម្ដេចធិបតី ហ៊ុន ម៉ាណែត នាយករដ្ឋមន្រ្ដី បញ្ជាក់ថា ក្រុមជ្រុលនិយមនៅក្រៅស្រុក ខិតខំយករឿងព្រំដែនមកនិយាយ ដូចជារឿងកោះគុតជាដើម មកបន្តបំភ្លៃព័ត៌មាន គឺដើម្បីឈានទៅបង្កើតចលានាផ្ដួលរំលំរាជរដ្ឋាភិបាលរបស់ពួកគេ។

ប្រសាសន៍សំខាន់ៗរបស់សម្ដេចតេជោ ហ៊ុន សែនក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងប្រទេស លើកទី៣២ ឆ្នាំ២០២៤

នាព្រឹកថ្ងៃទី២១ ខែវិច្ឆិកា ឆ្នាំ២០២៤នេះ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់បើកអនុសំវច្ឆរមហាសន្និបាតមន្ត្រីសង្ឃទូទាំងប្រទេស លើកទី៣២ ឆ្នាំ២០២៤ នៅវិទ្យាស្ថានជាតិអប់រំ ។ ខាងក្រោមនេះ ជាប្រសាសន៍សំខាន់ៗរបស់សម្ដេចតេជោ៖-សម្តេចតេជោ ហ៊ុន សែន ថ្លែងអំណរព្រះគុណ និងអំណរគុណដល់ព្រះ សង្ឃទំាងពីរគណៈដែលបានយាង និងនិមន្តចូលរួមក្នុងវិធីបើកអនុសំវច្ចរមហាសន្និបាតមន្រ្តីសង្ឃទូទាំងប្រទេសលើកទី៣២ ឆ្នាំ២០២៤ ដើម្បីរួមគ្នារកដំណោះស្រាយរាល់បញ្ហាប្រឈមនានានៅក្នុងសង្គម។ -សម្ដេចតេជោ ហ៊ុន សែន៖ ការប្រតិបត្តិសាសនានៅក្នុងសង្គមជាតិនីមួយៗតែងតែមានជាប់ទាក់ទងទៅនឹងប្រពៃណីទំនៀមទម្លាប់វប្បធម៌របស់ជាតិសាសន៍នោះ ដែលជាអត្តសញ្ញាណ នៃគុណតម្លៃរួម នៃជីវិតរបស់មនុស្សនៅក្នុងសង្គមនីមួយៗ សកម្មភាពមនុស្សមានភាពទៀងត្រង់នឹងមានលក្ខណៈប្រហាក់ប្រហែលអាចរស់នៅជាមួយគ្នាប្រកបដោយភាពសុខដុមរមនា។ -សម្តេចតេជោ ហ៊ុន សែន សម្តែងមោទនភាពយ៉ាងខ្លាំងចំពោះប្រទេសកម្ពុជា ដែលពោរពេញដោយសុខដុមរមនីយកម្មជាតិសាសន៍ និងសាសនា ខណៈបច្ចុប្បន្នកម្ពុជាមានអ្នកកាន់សាសនាផ្សេងៗច្រើន ប៉ុន្តែមិនមានការរើសអើងគ្នា និងបែកបាក់សាមគ្គីភាពគ្នានោះឡើយ។ -សម្តេចតេជោ ហ៊ុន សែន ប្រកាសថា កម្ពុជាសុខចិត្តលះបង់សេដ្ឋកិច្ចក្នុងសង្គម មិនសុខចិត្តឲ្យកម្ពុជាមានការបែកបាក់សាមគ្គី និងសង្គ្រាមដោយសារតែការញុះញង់ពីក្រុមពួកអគតិមួយក្តាប់តូចនោះឡើយ។ ត្រង់ន័យនេះត្រូវបានសម្តេចបានបញ្ជាក់ថា កម្ពុជាសម្រេចដកខ្លួនចេញពីកិច្ចសហប្រតិបត្តិការCLV គឺដើម្បីលុបបំបាត់មន្ទិលសង្ស័យពីបងប្អូនប្រជាពលរដ្ឋ។ -សម្តេចតេជោ ហ៊ុន សែន ប្រកាសថា តំបន់កោះគុត គឺជាតំបន់ត្រួតស៊ីគ្នារវាងកម្ពុជា និងថៃ ខណៈកោះនេះគឺរាជរដ្ឋាភិបាលកម្ពុជា និងថៃកំពុងបន្តជជែកគ្នាយ៉ាងក្តៅគគុកនៅឡើយ ប៉ុន្តែមានជនអគតិមួយក្តាប់តូច(ក្រុមក្បត់ជាតិបីជំនាន់)កំពុងតែធ្វើការញុះញង់អុចអាលលើបញ្ហានេះ ហើយការញុះញង់បែបនេះអាចនឹងធ្វើឲ្យកម្ពុជា និងថៃឈានដល់មានការផ្ទុះអាវុធ។ -សម្ដេចតេជោ ហ៊ុន សែន៖ កត្តា២យ៉ាងធំៗដែលធ្វើឲ្យប្រទេសជាតិមានការរីកចម្រើនគឺការឯកភាពផ្ទៃក្នុង និងសន្តិភាពជាមួយប្រទេសជិតខាង -សម្តេចតេជោ ហ៊ុន សែន បញ្ជាក់ថា ការប្តឹងផ្តល់គ្នាទៅតុលាការអន្តរជាតិលើបញ្ហា កោះគុតតាមការញុះញង់របស់ជនអគតិមួយក្តាប់តូចនៅក្រៅប្រទេសនោះមិនមែនជាការងាយស្រួលនោះទេ -សម្ដេចតេជោ ហ៊ុន សែន អំពាវនាវដល់ប្រជាពលរដ្ឋទុកលទ្ធភាពឲ្យរដ្ឋាភិបាលចរចាជាមួយនឹងរដ្ឋាភិបាលថៃរឿងកោះគុត ហើយសង្ឃឹមថាខាងអ្នកជ្រុលនិយមនៅក្នុងប្រទេសថៃក៏ត្រូវទុកលទ្ធភាពឲ្យរដ្ឋាភិបាលក្នុងប្រទេសថៃធ្វើការចរចាដែរ។ - សម្តេចតេជោ ហ៊ុន សែន ផ្តាំទៅក្រុមប្រឆាំងដែល កំពុងរត់ចោលស្រុក និងបងប្អូន ប្រជាពលរដ្ឋខ្មែរទាំងអស់ថា «ដំបៅមិនឈឺកុំយកឈឺរុក» ខណៈបញ្ហាកោះគុត រាជរដ្ឋាភិបាលកម្ពុជា និងថៃកំពុងរកដំណោះស្រាយគ្នាដោយសន្តិភាពវិធី -សម្ដេចតេជោ ហ៊ុន សែន៖ ការបោះបង្គោលព្រំដែនជាមួយនឹងឡាវបានចំនួន ៨៦ភាគរយ ជាមួយវៀតណាមបានចំនួន ៨៤ ភាគរយ និងបានបោះបង្គោលព្រំដែនតូចៗបន្ថែមទៀត ដើម្បីឱ្យពលរដ្ឋដែលទៅកម្សាន្តនៅតាមព្រំដែន ងាយឃើញ ងាយយល់។ -សម្ដេចតេជោ ហ៊ុន សែន៖ ក្រុមជ្រុលនិយមនៅកម្ពុជាជាក្រុមជ្រុលនិយមមិនធម្មតាដែលទាមទារឲ្យធ្វើច្បាប់ ដើម្បីដាក់ទោស និងការពារសុខសន្តិភាព និងការអភិវឌ្ឍនៅកម្ពុជា -សម្ដេចតេជោ ហ៊ុន សែន អំពាវនាវដល់កងទ័ពទាំងជើងទឹក និងជើងគោកទាំងអស់ មិនត្រូវចល័តកម្លាំងទៅតំបន់កោះគុត ក្រោយទទួលព័ត៌មានពីបញ្ហានៅកោះគុតនោះឡើយ។ សម្ដេចតេជោបញ្ជាក់បន្ថែមថា កម្ពុជា និងថៃនៅតែបន្តចរចាពីបញ្ហានេះដោយសន្តិវិធីនៅឡើយ។ -សម្ដេចតេជោ ហ៊ុន សែន ស្នើដល់រដ្ឋមន្ត្រីក្រសួងធម្មការ និងសាសនា ពិនិត្យកែតម្រូវឡើងវិញលើការរៀបចំមន្ត្រីសង្ឃគង់ឱ្យបានត្រឹមត្រូវទៅតាមឋានន្តរសក្ដិ និងតួនាទីដឹកនាំរបស់មន្ត្រីសង្ឃ នៅក្នុងពិធីផ្លូវការនានា។ -សម្ដេចតេជោ ហ៊ុន សែន មានប្រសាសន៍ឱ្យពិនិត្យពិចារណាលើការរៀបចំចេតិយ ដោយរកដីនៅកន្លែងណាមួយដើម្បីរៀបចំជាកន្លែងទុកឱ្យប្រជាពលរដ្ឋសាងសង់ធ្វើចេតិយ ដើម្បីបញ្ជៀសកំណើនធ្វើចេតិយនៅក្នុងវត្ត។ -សម្ដេចតេជោ បានស្នើដល់ក្រសួងធម្មការសាសនាគួរបណ្ដុះបណ្ដាលអាចារ្យដើម្បីស្នងអាចារ្យដោយសព្វថ្ងៃនេះមានវិបត្តិខ្វះអាចារ្យ។ ជាពិសេសតាមទីវត្តអារាមនីមួយៗអាចទទួលការបណ្ដុះបណ្ដាលអាចារ្យស្នងបាន៕

សារមន្ទីរទួលស្លែង សម្ពោធបើកពិព័រណ៍មិនអចិន្ត្រៃយ៍ ស្តីពី «កុមារភាពក្នុងអន្ធការ»

ភ្នំពេញ ÷ ឯកឧត្តម ប្រាក់ សុណ្ណារ៉ា រដ្ឋលេខាធិការតំណាងដ៏ខ្ពង់ខ្ពស់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានអញ្ជើញជាអធិបតីក្នុងពិធីសម្ពោធបើកពិព័រណ៍មិនអចិន្ត្រៃយ៍ ស្តីពី "កុមារភាពក្នុងអន្ធការ” នៅសារមន្ទីរទួលស្លែង នារសៀលថ្ងៃទី២០ ខែវិច្ឆិកា ឆ្នាំ២០២៤នេះ។ ពិធីសម្ពោធបើកពិព័រណ៍មិនអចិន្ត្រៃយ៍ មានការអញ្ជើញចូលរួមពីឯកឧត្តម សាដាម អ៊ូម៉ា អាឡាម (Sadar Umar Alam) តំណាងការិយាល័យយូណេស្កូភ្នំពេញ និងលោកជំទាវ ហេលែន ចាវីស (Helen Jarvis) ទីប្រឹក្សារាជរដ្ឋាភិបាលកម្ពុជា។លោក ហង្ស និស្ស័យ ប្រធានការិយាល័យសារមន្ទីរទួលស្លែង បានលើកឡើងថា ពិព័រណ៍មិនអចិន្ត្រៃយ៍ស្តីពី “កុមារភាពក្នុងអន្ធការ” ក្រុមការងាររំលេចសំខាន់ពីកុមារដែលត្រូវខ្មែរក្រហមចាប់ចូលមកមន្ទីរ ស-២១។ ទោះបីជាមានការសិក្សាដោយសាលាក្តីខ្មែរក្រហមអំពីចំនួនកុមារនៅ ស-២១ ក្តី ប៉ុន្តែមិនទាន់ផ្សព្វផ្សាយឲ្យលម្អិតពីស្ថានភាពកុមារដែលត្រូវចាប់យកមកជាមួយ ឪពុក ម្តាយនោះដែរ។ ដោយមើលឃើញពីចំណុចទាំងនេះ ទើបក្រុមការងារពិព័រណ៍នៃសារមន្ទីរទួលស្លែង បានរៀបចំពិព័រណ៍មិន អចិន្ត្រៃយ៍ស្តីពី “កុមារភាពក្នុងអន្ធការ” នេះ ឡើង។ ក្រុមការងារសារមន្ទីរ បានចាប់ផ្តើមការសិក្សាស្រាវជ្រាវ នេះចាប់ពីខែសីហា ឆ្នាំ២០២៣ ដោយចាប់ផ្តើមពីការសិក្សាក្នុងបណ្ណសារសារមន្ទីរ ការសិក្សាលើប្រភពឯកសារ បោះពុម្ព និងនៅបណ្ណសារផ្សេងៗ។ ជាលទ្ធផល ក្រុមការងារបានសម្រេចរៀបចំព័ត៌មាននិងតម្លើងផ្ទាំងពិព័រណ៍ចំនួន ពីរបន្ទប់ដោយបង្ហាញពីទិដ្ឋភាពទូទៅរបស់កុមារក្នុងសម័យខ្មែរក្រហម និងស្ថានភាពកុមារក្នុងមន្ទីរ ស-២១។ ដោយក្នុងនោះលោក នង ចាន់ផល និង នង ចាន់លី ជាកុមារ ២រូប ក្នុងចំណោមកុមារ ៤រូប ដែលអាចរស់រានមានជីវិតពី មន្ទីរ ស-២១។ បច្ចុប្បន្ន ជនរងគ្រោះដែលនៅមានជីវិតចំនួន៤រូប (ក្នុងចំណោម ១២រូប ដែលអាចរួចផុតពីសេចក្តីស្លាប់នៅ មន្ទីរ ស-២១) តែងតែចូលរួមផ្សព្វផ្សាយនិងចែករំលែកពីបទពិសោធន៍របស់ខ្លួននាសម័យខ្មែរក្រហម ពិសេសនៅ មន្ទីរ ស-២១។នាឱកាសនោះឯកឧត្តម ប្រាក់ សុណ្ណារ៉ា បានថ្លែងថា របបកម្ពុជាប្រជាធិបតេយ្យបានបំផ្លិចបំផ្លាញ ប្រទេសជាតិស្ទើរតែទាំងស្រុង ជាពិសេសធនធានមនុស្សដែលត្រូវបានខ្មែរក្រហមសម្លាប់និងស្លាប់ដោយសារអត់ អាហារ ជម្ងឺ ធ្វើការបាក់កម្លាំងអស់ជិត២លាននាក់ ក្នុងរយៈពេល ៣ឆ្នាំ ៨ខែ និង២០ថ្ងៃ។ ទោះបីជារបបវាលពិឃាត បានបញ្ចប់នៅឆ្នាំ១៩៧៩ សង្គ្រាមស៊ីវិលក្នុងប្រទេសកម្ពុជា នៅតែបន្តអូសបន្លាយរហូតដល់ឆ្នាំ១៩៩៨។ ប្រជាជនកម្ពុជា បានស្គាល់សុខសន្តិភាពជាលើកដំបូងក្រោយពេលឆ្លងកាត់បទពិសោធន៍សង្គ្រាម ជាង២ទសវត្សរ៍ ពិសេសក្រោយការអនុវត្តដោយជោគជ័យនូវយុទ្ធសាស្រ្តឈ្នះឈ្នះរបស់សម្តេចអគ្គមហាសេនាបតីតេជោ ហ៊ុន សែន ស្ថាបនិកសន្តិភាពសម្រាប់ប្រជាជាតិ នៃព្រះរាជាណាចក្រកម្ពុជា។ ឯកឧត្តម រដ្ឋលេខាធិការ បានសង្កត់ធ្ងន់ថា ក្នុងចំណោមជនរងគ្រោះដែលមានជីវិត ពីសម័យខ្មែរក្រហម ប្រហែលជា៥លាននាក់ ក្នុងនោះមានប្រមាណ ៧០% ជាស្ត្រី និងកុមារ (នេះបើយោងតាមស្ថិតិ របស់មហាវិទ្យាល័យវេជ្ជសាស្ត្រ និងនាយកដ្ឋានមាតា និងទារក ក្នុងឆ្នាំ១៩៨៩) ហើយកុមារ ៤៣,៥% (អាយុចន្លោះពី ១ឆ្នាំ ទៅ១៥ឆ្នាំ) មានបញ្ហាខ្វះអាហារូបត្ថម្ភ អនាម័យ និងជំងឺផ្សេងៗទៀត។ ដោយសារតែបទពិសោធន៍ដ៏ឈឺចាប់របស់ប្រជាជនកម្ពុជា ទើបរាជរដ្ឋាភិបាលកម្ពុជាបានខិតខំប្រឹងប្រែង ស្វែងរកសន្តិភាព និងបានចូលរួមជាមួយសហគមន៍អន្តរជាតិ ក្នុងន័យធានាថាប្រជាជនត្រូវរស់ក្នុងភាពសុខដុម រួមទាំងកុមារផងដែរ។ តួយ៉ាងរាជរដ្ឋាភិបាលតែងតែយកចិត្តទុកដាក់អនុវត្តតាមអនុសញ្ញាអន្តរជាតិផ្សេងៗ ពិសេសស្តីពី “សិទ្ធិកុមារ” របស់អង្គការសហប្រជាជាតិ ដែលប្រទេសកម្ពុជាបានប្រកាសទទួលស្គាល់និងចូលជារដ្ឋភាគីហត្ថលេខី ស្តីពីសិទ្ធិកុមារនៅថ្ងៃទី២៩ ខែកញ្ញា ឆ្នាំ១៩៩២។ ជាពិសេសនៅក្រោមរាជរដ្ឋាភិបាលអាណត្តិទី៧ ដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីដែលជាប្រមុខដឹកនាំដ៏ឆ្នើម បានយកចិត្តទុកដាក់យ៉ាង ខ្លាំងលើការថែទាំកុមារ ទាំងសុខុមាលភាព និងការអប់រំ ព្រមទាំងធានានូវសេចក្តីសុខនិងការអភិវឌ្ឍជូនប្រជាជនកម្ពុជា។ ការរៀបចំសម្ពោធពិព័រណ៍មិនអចិន្ត្រៃយ៍ស្តីពី “កុមារភាពក្នុងអន្ធការ” នាថ្ងៃនេះ គឺជាការរំលឹកដល់ខួបទី៣៥ នៃការអនុម័តលើអនុញ្ញាអន្តរជាតិស្តីពី “សិទ្ធិកុមារ” ដោយអង្គការសហប្រជាជាតិ ដែលទាមទារឲ្យប្រទេសក្នុងសកលលោកត្រូវយកចិត្តទុកដាក់ និងមានភារកិច្ចផ្តល់ឲ្យកុមារនូវសិទ្ធចម្បងៗរបស់ខ្លួន (សិទ្ធរស់រានមានជីវិត សិទ្ធទទួលនូវការអភិវឌ្ឍ សិទ្ធទទួលបាននូវការការពារ និងសិទ្ធក្នុងការចូលរួមកិច្ចការផ្សេងៗ)៕អត្ថបទ រដ្ឋា

ព័ត៌មានជាតិ

កម្ពុជា និងចិនបានបញ្ជាក់ពីការបន្តពង្រឹងកិច្ចសហប្រតិបត្តិការកាន់តែប្រសើរថែមទៀត ក្នុងវិស័យបរិស្ថាន

សម្ដេចធិបតី លើកទឹកចិត្តឱ្យផ្សព្វផ្សាយវិជ្ជមានពីកម្ពុជា ដើម្បីទាក់ទាញទេសចរ និងអ្នកវិនិយោគមកកាន់កម្ពុជា

សម្ដេចធិបតី៖ ក្រុមជ្រុលនិយមយករឿងព្រំដែនមកបំភ្លៃញុះញង់ពលរដ្ឋ ប៉ុនប៉ងបង្កើតចលានាផ្ដួលរំលំរាជរដ្ឋាភិបាល

សម្ដេចធិបតី ហ៊ុន ម៉ាណែត បញ្ជាក់ពីរចំណុចជូនជនរួមជាតិទាក់ទងនឹងករណី កោះគុត

ទាក់ទងនឹងបញ្ហាកោះគុត សម្តេចតេជោ ហ៊ុន សែន ផ្តាំទៅក្រុមជ្រុលនិយមថា ដំបៅមិនឈឺកុំយកឈឺចាក់

សម្តេចតេជោ អំពាវនាវឱ្យពលរដ្ឋរក្សាភាពស្ងៀមស្ងាត់លើបញ្ហាកោះគុត ទុកឱ្យរដ្ឋាភិបាលដោះស្រាយ

សារមន្ទីរទួលស្លែង សម្ពោធបើកពិព័រណ៍មិនអចិន្ត្រៃយ៍ ស្តីពី «កុមារភាពក្នុងអន្ធការ»

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

កម្ពុជា និងចិនបានបញ្ជាក់ពីការបន្តពង្រឹង​កិច្ចសហប្រតិបត្តិការ​កាន់តែ​ប្រសើរថែមទៀត ក្នុង​វិស័យ​បរិស្ថាន

សម្ដេចធិបតី លើកទឹកចិត្តឱ្យផ្សព្វផ្សាយវិជ្ជមានពីកម្ពុជា ដើម្បីទាក់ទាញទេសចរ និងអ្នកវិនិយោគមកកាន់កម្ពុជា

សម្ដេចធិបតី៖ ក្រុមជ្រុលនិយមយករឿងព្រំដែនមកបំភ្លៃញុះញង់ពលរដ្ឋ ប៉ុនប៉ងបង្កើតចលានាផ្ដួលរំលំរាជរដ្ឋាភិបាល

សម្ដេចធិបតី ហ៊ុន ម៉ាណែត បញ្ជាក់ពីរចំណុចជូនជនរួមជាតិទាក់ទងនឹងករណី កោះគុត

ទាក់ទងនឹងបញ្ហាកោះគុត សម្តេចតេជោ ហ៊ុន សែន ផ្តាំទៅក្រុមជ្រុលនិយមថា ដំបៅមិនឈឺកុំយកឈឺចាក់

សម្តេចតេជោ អំពាវនាវឱ្យពលរដ្ឋរក្សាភាពស្ងៀមស្ងាត់លើបញ្ហាកោះគុត ទុកឱ្យរដ្ឋាភិបាលដោះស្រាយ

សារមន្ទីរទួលស្លែង សម្ពោធបើកពិព័រណ៍មិនអចិន្ត្រៃយ៍ ស្តីពី «កុមារភាពក្នុងអន្ធការ»

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

កម្ពុជា និងចិនបានបញ្ជាក់ពីការបន្តពង្រឹងកិច្ចសហប្រតិបត្តិការកាន់តែប្រសើរថែមទៀត ក្នុងវិស័យបរិស្ថាន