នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
មន្ត្រីជាន់ខ្ពស់ក្រសួងការងារ៖ បច្ចុប្បន្ន ការងារ និងសាលារៀន រត់រកមនុស្សដល់មូលដ្ឋាន ហើយការធ្វើការងារក្នុងស្រុកជួយកសាងសេដ្ឋកិច្ចជាតិ
សម្ដេចធិបតី ហ៊ុន ម៉ាណែត៖ អាទិភាពរបស់រាជរដ្ឋាភិបាល​ គឺ ប្រទេសជាតិ​,​ប្រជាជន, ទឹកដី និង​ ឯករាជ្យភាពជាតិ
ប្រធានក្រុមការងារយុវជនគណបក្សចុះមូលដ្ឋានស្រុកប្រាសាទបល្ល័ង្ក អញ្ជើញជាអធិបតីក្នុងពិធីបញ្ចុះបឋមសិលាសាងសង់ស្ពានដែកបាឡេ ឆ្លងស្ទឹងស្ទោង ដើម្បីសម្រួលដល់ការធ្វើដំណើររបស់ប្រជាពលរដ្ឋ
សម្ដេចធិបតី៖ យុទ្ធនាការកម្ចាត់ Online Scams ប៉ុន្មានខែចុងក្រោយនេះ បានស្ដារមុខមាត់កម្ពុជាមកវិញ

ព័ត៌មានជាតិ

ឯកឧត្តម គីម រិទ្ធី ផ្ដាំផ្ញើដល់សិក្ខាកាមពលទាហានទាំងអស់ ត្រូវប្រឆាំងដាច់ខាត រាល់ឧបាយកលសង្គ្រាមចិត្តសាស្ត្ររបស់ពួកអមិត្ត ញុះញង់ បំបែកបំបាក់ផ្ទៃក្នុងជាតិ

2024/11/20 03:32:32 pm        477
Facebook Telegram Linkin
ព្រះវិហារ៖ ក្នុងពិធីបិទវគ្គហ្វឹកហ្វឺន បំប៉ន ពង្រឹង នាយទាហាន នាយទាហានរង ពលទាហាន វគ្គហ្វឹកហ្វឺនម្ចាស់ការនៅនឹងកន្លែង និងបើកវគ្គហ្វឹកហ្វឺនក្បាច់គុន កងយោធពលខេមរភូមិន្ទ របស់តំបន់ប្រតិបត្តិការសឹករងព្រះវិហារ ចំណុះយោធភូមិភាគទី៤ នៅព្រឹកថ្ងៃទី២០ ខែវិច្ឆិកា ឆ្នាំ២០២៤ ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ បានផ្ដាំផ្ញើដល់សិក្ខាកាម នាយទាហាន នាយទាហានរង ពលទាហានទាំងអស់ ត្រូវប្រឆាំងដាច់ខាត រាល់ឧបាយកលសង្គ្រាមចិត្តសាស្ត្ររបស់ពួកអមិត្ត ញុះញង់ បំបែកបំបាក់ផ្ទៃក្នុងជាតិ ។ក្នុងឱកាសនោះដែរ ឯកឧត្តមអភិបាលខេត្ត ក៏បានផ្តាំផ្ញើ និងជំរុញឱ្យនាយទាហាន នាយទាហានរង ពលទាហាន និងសិក្ខាកាមទាំងអស់ ត្រូវមានទស្សនៈស្មោះត្រង់ និងជឿជាក់លើការដឹកនាំរបស់រាជរដ្ឋាភិបាល នឹងត្រូវគោរពវិន័យ និងបទបញ្ជាឱ្យបានម៉ឺងម៉ាត់ ហើយយកចិត្តទុកដាក់ខិតខំរៀនសូត្រគ្រប់មុខវិជ្ជាដែលគ្រូបានឧទ្ទេសនាមទាំងនៅក្នុងថ្នាក់ និងនៅលើទីលានហ្វឹកហាត់ នឹងបន្តខិតខំយកចិត្តទុកដាក់អនុវត្តតាមផែនការរបស់ថ្នាក់លើជាពិសេស គឺការបើកវគ្គហ្វឹកហ្វឺនប្រចាំឆ្នាំតាមផែនការប្រកបដោយភាពទទួលខុសត្រូវខ្ពស់ និងត្រូវត្រៀមខ្លួនជានិច្ចអនុវត្តរាល់បទបញ្ជាដែលថ្នាក់លើប្រគល់ជូន។ឯកឧត្តម គីម រិទ្ធី មានប្រសាសន៍បន្ថែមទៀតថា ថ្វីត្បិតតែប្រទេសយើងមានសុខសន្តិភាពពេញលេញ ប៉ុន្តែការអភិវឌ្ឍសមត្ថភាពកងកម្លាំង ទាំងសមត្ថភាពចំណេះដឹង ជំនាញ និងការពង្រឹងនូវកាយសម្បទាឱ្យមានភាពរឹងមាំ ស្វាហាប់ ក្នុងការអនុវត្តតួនាទី ភារកិច្ចរបស់ខ្លួន គឺពិតជាមានសារៈសំខាន់ និងត្រូវធ្វើឱ្យបានជាប់ជាប្រចាំ ដូចមានក្នុងទិសស្លោក “កងកម្លាំង គឺត្រូវមានកម្រិតយល់ដឹងខ្ពស់ មានកាយសម្បទារឹងមាំ ស្វាហាប់ និងរហ័សរហួនជាប់ជានិច្ច”ដើម្បីត្រៀមកម្លាំងអន្តរាគមន៍ដោះស្រាយនូវគ្រប់សភាពការណ៍ផ្សេងៗ ដែលអាចនឹងកើតឡើងជាយថាហេតុ។បើតាមឯកឧត្តម ឧត្តមសេនីយ៍ទោ ច័ន្ទ សុភ័ក្រ្តា មេបញ្ជាការតំបន់ប្រតិបត្តិការសឹងរងខេត្តព្រះវិហារ បានថ្លៃងបញ្ជាក់ពីការបិទវគ្គហ្វឹកហ្វឺនបំប៉នពង្រឹង នាយទាហាន នាយទាហានរង ពលទាហាន និងវគ្គហ្វឹកហ្វឺនម្ចាស់ការនៅនឹងកន្លែង យុទ្ធវិធីថ្មើរជើងថ្នាក់ ពួក ក្រុម កងអនុសេនាតូច បានបញ្ចប់ប្រកបដោយជោគជ័យ គួរជាទីមោទនៈ ដោយមានគោលការណ៍ដឹកនាំដ៏ឈ្លាសវៃ ប្រកបដោយប្រសិទ្ធិភាព ពីសំណាក់ថ្នាក់ដឹកនាំគ្រប់ជាន់ថ្នាក់ ដែលជានិច្ចជាកាល តែងតែផ្តល់នូវការរំលឹកដាស់តឿន ទំនុកបំរុងឧបត្ថម្ភនានា លើការងារហ្វឹកហ្វឺន បំប៉នជំនាញ គ្រប់លំដាប់ថ្នាក់ គ្រប់កងឯកភាព ហ្វឹកហ្វឺន ជាប្រចាំសំដៅធ្វើឱ្យកងទ័ពមានសមត្ថភាពគុណភាព និងប្រសិទ្ធភាព ក្នុងការដឹកនាំបញ្ជាសម្រេចបានជោគជ័យនាពេលនេះ៕ 

ឯកឧត្ដម​ឧបនាយករដ្ឋមន្ត្រីប្រចាំការ វង្សី វិស្សុត ទទួលជួបពិភាក្សាការងារ ជាមួយ​អនុរដ្ឋមន្រ្តីក្រសួងយុត្តិធម៌​ចិន

2024/11/20 03:30:15 pm        440
Facebook Telegram Linkin
នាថ្ងៃទី១៩ ខែវិច្ឆិកា ឆ្នាំ២០២៤ នៅទីស្តីការគណៈរដ្ឋមន្រ្តី, ឯកឧត្ដម វង្សី វិស្សុត ឧបនាយក​រដ្ឋមន្ត្រី​ប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី, ប្រធានក្រុមប្រឹក្សាអ្នកច្បាប់ និង​ជា​ប្រធាន​គណៈកម្មាធិការដឹកនាំការកែទម្រង់ច្បាប់ បានអនុញ្ញាតឱ្យឯកឧត្ដម WANG Zhenjiang អនុ​រដ្ឋមន្ត្រីក្រសួងយុត្តិធម៌នៃសាធារណរដ្ឋប្រជាមានិតចិន និងគណៈប្រតិភូ ចូល​ជួប​សម្ដែង​ការ​គួរសម និងពិភាក្សាការងារ នៅក្នុងឱកាស​ដែល​ឯកឧត្តម​ដឹកនាំ​គណៈ​ប្រតិភូ​មក​បំពេញ​ទស្សន​កិច្ច​នៅ​កម្ពុជា ដើម្បីពង្រឹងកិច្ច​សហប្រតិបត្តិការ​ឱ្យ​កាន់​តែ​ស៊ី​ជម្រៅលើ​វិស័យ​ច្បាប់ និង​យុត្តិធម៌​រវាង​កម្ពុជា-ចិន។ជាកិច្ចចាប់ផ្តើម ឯកឧត្តម វង្សី វិស្សុត បានសម្ដែងនូវការស្វាគមន៍យ៉ាងកក់ក្ដៅចំពោះឯកឧត្ដម WANG Zhenjiang និងគណៈប្រតិភូ ដែលបានអញ្ជើញមកបំពេញទស្សនកិច្ចការងារនៅកម្ពុជា និង​ជូនពរឱ្យទទួលបានជោគជ័យ។ ពាក់ព័ន្ធនឹងទំនាក់ទំនងកម្ពុជា-ចិន, ឯកឧត្តម​ឧប​នាយករដ្ឋ​មន្រ្តី​ប្រចាំ​ការ មានប្រសាសន៍ថា ទំនាក់ទំនងជាមិត្តភាពរវាងកម្ពុជា-ចិន មានប្រវត្តិយូរ​លុង​ណាស់​មក​ហើយ​។ ចិនជាមិត្តល្អរបស់កម្ពុជា និងគួរប្រកាន់យក តាម រយៈព្រឹត្តិការណ៍ជា​ប្រវត្តិសាស្រ្ត​រាប់ពាន់ឆ្នាំកន្លងមក និងរីកលូតលាស់មកទល់សព្វថ្ងៃ។ ឯកឧត្តមបានបន្តថា ទំនាក់​ទំនងការទូតរវាងកម្ពុជា-ចិន ត្រូវបានបង្កើតឡើងដោយ ព្រះករុណាព្រះបាទសម្តេចព្រះនរោត្តម សីហនុ ព្រះបរមរតនកោដ្ឋ និងថ្នាក់ដឹកនាំជំនាន់មុននៃប្រទេសចិន ហើយត្រូវបានពូនជ្រំ ថែបំប៉ន និង​បានបន្ដរីកលូតលាស់យ៉ាងរឹងមាំ ក្រោមការដឹកនាំរបស់សមេ្តចតេជោ ហ៊ុន សែន និង​ឯកឧត្តម​ប្រធានាធិបតី Xi Jinping ដោយបានប្រែក្លាយ​ទំនាក់​ទំនង​រវាង​ប្រទេ​ស​ទាំង​ពីរឈាន​ទៅ​ជា​ភាព​ដៃគូ​សហប្រតិបតិ្តការយុទ្ធសាស្រ្តគ្រប់ជ្រុងជ្រោយ និងជាមិត្តដែកថែប ហើយ​បាន​បង្កើត​សហគមន៍​ជោគវាសនារួមកម្ពុជា-ចិន។ ទំនាក់ទំនងនេះ កាន់តែត្រូវបានពង្រឹង និងពង្រីក​ដល់​កម្រិត​ខ្ពស់​ថ្មីមួយទៀត គឺកិច្ចសហប្រតិបត្តិការត្បូងពេជ្រ ក្រោមការដឹកនាំដ៏ប៉ិនប្រសព្វរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបន្តវេនពី សមេ្តចតេជោ ហ៊ុន សែន។ឯកឧត្ដម WANG Zhenjiang បានសម្ដែងនូវ​អំណរគុណ​យ៉ាង​ជ្រាល​ជ្រៅ​ជូន​ចំពោះ​ឯកឧត្ដម​ឧបនាយក​រដ្ឋ​មន្ត្រីប្រចាំការ ដែលបានធ្វើការស្វាគមន៍យ៉ាងកក់ក្ដៅ និងអនុញ្ញាតឱ្យ​មាន​ជំនួប​នា​ពេល​នេះ។​ ឯកឧត្ដមអនុរដ្ឋមន្ត្រីក្រសួងយុត្តិធម៌ចិនក៏បានជម្រាបជូនផងដែរ អំពីតួនាទី​ភារកិច្ច​សំខាន់​ៗ និងរចនាសម្ព័ន្ធរបស់ក្រសួងយុត្តិធម៌ចិន ក៏ដូចជា​សមិទ្ធផល​ដែល​សម្រេច​បាន​នា​ពេល​កន្ល​ង​មក ពិសេសពាក់ព័ន្ធនឹងការកសាងច្បាប់។ ទន្ទឹមនេះ ឯកឧត្តម​ក៏​បាន​ចែក​រំលែក​អំពី​កិច្ច​ដំណើរ​ការ និងបែបបទនីតិវិធី នៃការកសាងច្បាប់របស់ប្រទេសចិន ចាប់ពីដំណាក់កាលតា​ក់​តែង​ដំបូង រហូតដល់ដំណាក់កាលនៃការតាមដានអនុវត្តច្បាប់ ក៏ដូចជាសមត្ថកិច្ច​របស់​ក្រសួង​ស្ថាប័ន​ពាក់ព័ន្ធ​នៅ​ក្នុងដំណាក់កាលនីមួយៗ។ ជាមួយគ្នានេះ ឯកឧត្តមក៏បានជម្រាបផងដែរ អំពីបទ​ពិសោធន៍ នៃ​ការកែទម្រង់ច្បាប់ និងគោល​ការណ៍​សំខាន់​ៗ​ក្នុង​ការ​កសាង​ប្រព័ន្ធ​ច្បាប់​របស់​ប្រទេស​ចិន សំដៅគាំទ្រដល់ការកសាង និងការធ្វើទំនើបកម្មសង្គមតាមបែបចិន ក៏ដូច​ជា​ការ​បំពេញ​សេចក្តី​ត្រូវការរបស់ប្រជាជនចិន។ឯកឧត្តម វង្សី វិស្សុត បន្តមានប្រសាសន៍ថា រាជរដ្ឋាភិបាលកម្ពុជា​ ក្រោម​ការ​ដឹកនាំ​ដ៏​ឈ្លាស​វៃ​របស់​សម្ដេច​មហាបវរធិបតី ហ៊ុន ម៉ាណែត ជាប្រមុខ តែងបានប្រកាន់ខ្ជាប់នូវ​គោលការណ៍​នៃ​ការ​ពង្រឹង​នីតិរដ្ឋនៅកម្ពុជា ដោយបាននិងកំពុងកសាងប្រព័ន្ធច្បាប់និងការកែទម្រង់ច្បាប់ ដោយឈរ​លើ​គោលការណ៍ភាពជាម្ចាស់, គុណតម្លៃនៃវប្បធម៌ និងប្រពៃណីទំនៀមទម្លាប់, យុត្តិធម៌ និង​សមភាព​នៅ​ចំពោះមុខច្បាប់, ការពារសិទ្ធិនិងសេរីភាពប្រជាជន, បរិការណ៍នៃសង្គមនិងសេដ្ឋកិច្ច, ឧត្តមានុវត្តន៍ជាអន្តរជាតិ និងគោលការណ៍នៃការគាំទ្រដល់ការអភិវឌ្ឍសេដ្ឋកិច្ច និង​សង្គម​របស់​កម្ពុជា​ជាដើម។ល។ ឯកឧត្ដមឧបនាយករដ្ឋមន្ត្រីប្រចាំការ ក៏បានលើកឡើង​អំពី​មុខងារ​របស់​ទីស្តី​ការ​គណៈ​រដ្ឋមន្រ្តីលើការងារពាក់ព័ន្ធនឹងការកសាងច្បាប់ ដែលមានក្រុមប្រឹក្សាអ្នកច្បាប់ និង​គណៈ​កម្មាធិការដឹកនាំការកែទម្រង់ច្បាប់ដែលជាសេនាធិការ ក៏ដូចជាតួនាទី និងភារកិច្ច​រវាង​ក្រុម​ប្រឹក្សា​អ្នក​ច្បាប់ និងគណៈកម្មាធិការដឹកនាំការកែទម្រង់ច្បាប់ផងដែរ។ឯកឧត្តម វង្សី វិស្សុត បានលើកឡើងផងដែរថា ទោះបីប្រព័ន្ធនយោបាយរវាងកម្ពុជា និងចិន មិន​ដូចគ្នាក៏ពិតមែន តែភាគីទាំងពីរក៏អាចធ្វើការរៀនសូត្រ និងចែករំលែកបទពិសោធល្អៗពីគ្នា ពាក់​ព័ន្ធ​នឹង​ការកសាងប្រព័ន្ធច្បាប់ និងការកែទម្រង់ច្បាប់បានផងដែរ។ ម្យ៉ាងវិញទៀត ប្រព័ន្ធ​ច្បាប់​របស់​ចិន​ក៏​មាន​ភាព​ជឿនលឿនផងដែរ ហើយបច្ចុប្បន្នចិន គឺជាដៃគូសេដ្ឋកិច្ច និង​ពាណិជ្ជកម្ម​ធំ​ជាង​គេរ​បស់កម្ពុជា ហើយនៅកម្ពុជាក៏មានវត្តមាននៃវិនិយោគិនចិនកំពុងធ្វើការវិនិយោគ និង​ធ្វើ​ធុរកិច្ច​ច្រើន​ផងដែរ។ក្នុងឱកាសនោះដែរ ឯកឧត្ដមឧបនាយករដ្ឋមន្ត្រីប្រចាំការ វង្សី វិស្សុត និងឯកឧត្ដម WANG Zhenjiang បានធ្វើការពិភាក្សា និងផ្លាស់ប្តូរមតិយោបល់គ្នាផងដែរ លើការពង្រឹង និង​ពង្រីក​កិច្ច​សហ​ប្រតិបត្តិការលើវិស័យនីតិកម្មរវាងទីស្ដីការគណៈរដ្ឋមន្ត្រី និងក្រសួងយុត្តិធម៌នៃប្រទេសចិន តាម​រយៈ​ការពិនិត្យលទ្ធភាពក្នុងផ្លាស់ប្តូរដំណើរទស្សនកិច្ចការងារ, ការបណ្តុះបណ្តាល និង​ការ​កសាង​សមត្ថភាពផ្នែកច្បាប់ ព្រមទាំងការផ្លាស់ប្តូរបទពិសោធល្អៗ ក្នុងការកែទម្រង់ច្បាប់។ នៅចុងបញ្ចប់ ភាគីទាំងពីរនឹងជំរុញកិច្ចសហប្រតិបត្តិការនេះឱ្យកាន់តែរឹងមាំ និងប្រកប ដោយ​ផ្លែផ្កា៕​

ឧបនាយករដ្ឋមន្ត្រី ហ៊ុន ម៉ានី៖ ការវិភាគមុខងារក្រសួង ស្ថាប័ន គឺដើម្បីពង្រឹងស្ថាប័នកាន់តែរឹងមាំ បម្រើប្រយោជន៍ជាតិ និងប្រជាជន

2024/11/20 03:16:13 pm        413
Facebook Telegram Linkin
ក្រសួងមុខងារសាធារណៈ ដោយមានកិច្ចសហការជាមួយធនាគារពិភពលោក នៅថ្ងៃទី ២០ ខែវិច្ឆិកានេះ បានបន្តរៀបចំ សិក្ខាសាលា ស្តីពី«ការពិនិត្យឡើងវិញ និងការវិភាគមុខងារ និង​រចនា​សម្ព័ន្ធ​ក្រសួង-ស្ថាប័ន៖ កំណែទម្រង់រចនាសម្ព័ន្ធ ដើម្បីលើកកម្ពស់​ប្រសិទ្ធភាព​ នៃ​វិស័យ​សាធារណៈ​»។ ឯកឧត្តម ឧបនាយករដ្ឋមន្ត្រី ហ៊ុន ម៉ានី លើកឡើងថា កិច្ចការដ៏សំខាន់នេះ គឺ​ជា​ភារកិច្ច​ដែល​ត្រូវបំពេញ ដើម្បីពង្រឹងស្ថាប័នឱ្យកាន់តែរឹងមាំ និងមានប្រសិទ្ធភាពខ្ពស់ ដើម្បីបម្រើ​ឧត្តម​ប្រយោជន៍ជាតិ និងប្រជាជន។ឯកឧត្តម ឧបនាយករដ្ឋមន្ត្រី ហ៊ុន ម៉ានី បានបញ្ជាក់ពីគុណប្រយោជន៍ និង​គោលដៅ​នៃ​ការ​ពិនិត្យ​ឡើង​វិញ និងការវិភាគមុខងារ និងរចនាសម្ព័ន្ធក្រសួង ស្ថាប័ន នៃរាជរដ្ឋាភិបាលកម្ពុជា។ ឯកឧត្តម​ឧបនាយករដ្ឋមន្ត្រី មានប្រសាសន៍ថា "ការពិនិត្យឡើងវិញ និងការវិភាគមុខងារ និង​រចនា​សម្ព័ន្ធ​ក្រសួង-ស្ថាប័ន មិនមែនជាការវះកាត់រចនាសម្ព័ន្ធ ឬធ្វើឱ្យប៉ះពាល់ដល់​ផល​ប្រយោជន៍​របស់​មន្ត្រី​នោះ​ទេ ប៉ុន្តែគឺជាការពង្រឹងស្ថាប័នឱ្យកាន់តែរឹងមាំ និងមានប្រសិទ្ធភាពខ្ពស់ ដើម្បីបម្រើ​ឧត្តម​ប្រយោជន៍​ជាតិ និងប្រជាជន។" ឯកឧត្តមឧបនាយករដ្ឋមន្ត្រី បានគូសបញ្ជាក់បន្ថែមទៀតថា "ការពិនិត្យឡើងវិញ និង​ការ​វិភាគ​មុខងារ និងរចនាសម្ព័ន្ធក្រសួង ស្ថាប័ន មិនមែនជាការងារថ្មីទេ។ រាជរដ្ឋាភិបាល នីតិកាលទី៧ គ្រប់​ក្រសួង ស្ថាប័ន ត្រូវធ្វើទាំងអស់គ្នា ស្របពេលជាមួយគ្នា ហើយក្រសួង ស្ថាប័ននីមួយៗ គឺ​ជា​ម្ចាស់​នៃ​ការងារនេះ។ ការងារនេះមិនមែនជាការងារដែលធ្វើឡើងដោយចៃដន្យនោះទេ តែជាការងារ​ដែល​ធ្វើ​ឡើង​ដោយ​មាន​ការ​គិតគូរ​ច្បាស់លាស់ និងគ្រប់ជ្រុងជ្រោយដែលបានតម្រង់ទិសពីរាជរដ្ឋាភិបាល និង​ជា​មូល​ដ្ឋាន​កំណត់​ក្នុង​ស្នូលនៃយុទ្ធសាស្រ្តបញ្ចកោណរាជរដ្ឋាភិបាល ក្នុងគោលបំណង ដើម្បីពង្រឹង​ប្រសិទ្ធ​ភាព នៃ​ការរៀបចំ និងអនុវត្តមុខងារ និងរចនាសម្ព័ន្ធរបស់ក្រសួង ស្ថាប័ន ដោយផ្អែក​លើ​អភិក្រម​នៃ​ប្រព័ន្ធតួអង្គតែមួយ។ ភាពជោគជ័យនៃការធ្វើវិភាគមុខងារ របស់ក្រសួង ស្ថាប័ន នឹង​ក្លាយ​ជា​មូលដ្ឋានដ៏សំខាន់ក្នុងការពង្រឹងភាពធន់ និងភាពច្បាស់លាស់ក្នុងការបំពេញតួនាទី ភារកិច្ច​របស់ក្រសួង ស្ថាប័ន ដែលជាផ្នែកមួយយ៉ាងសំខាន់ ក្នុងការចូលរួម​ចំណែក​ដល់​ការ​អនុវត្ត​យុទ្ធ​សាស្ត្រ​បញ្ចកោណដំណាក់កាលទី១ និងដំណាក់កាលបន្តបន្ទាប់ទៀត ឆ្ពោះទៅការ​សម្រេច​បាន​ចក្ខុ​វិស័យ​ឆ្នាំ២០៥០។ ក្នុងសិក្ខាសាលានេះដែរ ឯកឧត្តម Igor Driesmans ឯកអគ្គរាជទូត​សហភាព​អ៊ឺរ៉ុប​ប្រចាំ​ព្រះរាជាណាចក្រកម្ពុជា បានលើកឡើងថា "សិក្ខាសាលានាពេលនេះ មាន​សារ​សំខា​ន់ណាស់ក្នុងការដោះស្រាយបញ្ហាពាក់ព័ន្ធនឹងការធ្វើកំណែទម្រង់ស្ថាប័ន ការ​ពង្រឹង​ការ​អភិវឌ្ឍ​វិស័យ​សាធារណៈ គាំទ្រការត្រួសត្រាយផ្លូវប្រទេសកម្ពុជា ឆ្ពោះទៅរកគោលដៅឆ្នាំ២០៥០ ជា​ប្រទេសដែលមានប្រាក់ចំណូលខ្ពស់។ ការពិនិត្យមុខងារ ឬការវិភាគមុខងារ ពិតជា​មាន​សារ​សំខាន់​ក្នុង​ការពង្រឹងស្ថាប័ន និងជាមូលដ្ឋាន​គ្រឹះ​ក្នុង​ការ​ដាក់​នូវ​គោល​នយោបាយ​ប្រកប​ដោយ​ប្រសិទ្ធ​ភាព​។" ឯកឧត្តម ក៏បានលើកឡើងបន្ថែមថា ការវិភាគមុខងារ បម្រើនូវគោលបំណង​សំខាន់​ៗ រួមមាន ការធានានូវការផ្តល់ទំនុកចិត្តដល់រាជរដ្ឋាភិបាល ការវាយតម្លៃស្ថាប័ន ការ​វាយ​តម្លៃ​ធន​ធានមនុស្ស និងការកែលម្អឥតឈប់ឈរ៕ អត្ថបទ៖ គឹម ហុក

ក្រសួងបរិស្ថានកម្ពុជា និងអង្គការFAO ប្តេជ្ញាចិត្តរួមគ្នាកៀរគរធនធាន សម្រាប់ដោះស្រាយបញ្ហា​ប្រែប្រួលអាកាសធាតុ

2024/11/20 02:04:22 pm        200
Facebook Telegram Linkin
ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន នៅថ្ងៃទី១៩ ខែវិច្ឆិកា ឆ្នាំ២០២៤ នា​ទី​ក្រុង​បាគូ ប្រទេសអាសែបៃហ្សង់ បានទទួលជួបជាមួយលោក Kaveh Zahedi ប្រធាន​ការិយាល័យ​ការ​ប្រែប្រួលអាកាសធាតុ ជីវៈចម្រុះ និងបរិស្ថាន (OCB) នៃអង្គការស្បៀង និង​កសិកម្ម​ នៃ​សហប្រជាជាតិ (FAO) ។ ឯកឧត្តមរដ្ឋមន្ត្រីបានលើកឡើងពីកិច្ចសហប្រតិបត្តការជាមួយគ្នាកន្លងមក ដោយអង្គការFAO ជា​ដៃ​គូរ​ដ៏​ល្អរបស់កម្ពុជា ក្នុងការអនុវត្តការងារប្រែប្រួលអាកាសធាតុ ការស្ដារព្រៃឈើឡើងវិញ និង​កសិកម្ម និងស្បៀងអាហារ។ ឯកឧត្តមរដ្ឋមន្ត្រីបានបង្ហាញថា កម្ពុជាបានរៀបចំគោលនយោបាយ ផែន​ការយុទ្ធសាស្ត្រ និងវិស័យអាទិភាព ដើម្បីដោះ​ស្រាយ​បញ្ហា​ប្រឈម​ដោយ​ការ​ប្រែប្រួល​អាកាស​ធាតុ និងបរិស្ថាន ឱ្យមានប្រសិទ្ធភាពផងដែរ។ ជាមួយគ្នានេះ ឯកឧត្តមបណ្ឌិតរដ្ឋមន្រ្តី បាន​ត្រៀមខ្លួនជាស្រេច ដើម្បីការធ្វើពាណិជ្ជកម្មឥណទានកាបូន ដោយ​កម្ពុជា​បាន​ប្រកាស​ដាក់​ឱ្យ​ប្រើប្រាស់ នូវវិធានប្រតិបត្តិ នៃមាត្រា៦ នៃកិច្ចព្រមព្រៀងទីក្រុងប៉ារីស៍ ស្តីពីការប្រែប្រួល​អាកាស​ធាតុ និងការរៀបចំរបាយការណ៍រួមចំណែកជាតិ NDC3.0។លោក Kaveh Zahedi បានសាទរជូន​ចំពោះ​ឯកឧត្តម​រដ្ឋមន្ត្រី​ដែល​បាន​ដឹកនាំ​គណៈ​ប្រតិភូ​មក​ចូល​រួម COP29។ លោកតំណាងអង្គការ FAO បានលើកឡើង​ពីកិច្ចសហប្រតិបត្តិការ និង​ការ​ជួ​យ​គាំទ្រ​រាជរដ្ឋាភិបាលកម្ពុជា និងស្វែងរកប្រភពធនធានសម្រាប់ជួយដោះស្រាយ ការប្រែ​ប្រួល​អាកាស​ធាតុ​នៅកម្រិតសហគមន៍ និងគាំទ្រក្នុងការរៀបចំរបាយការណ៍រួមចំណែកជាតិ NDC3.0 របស់​កម្ពុជាផងដែរ៕

ក្រសួងពាណិជ្ជកម្មបើកសិក្ខាសាលាផ្សព្វផ្សាយអត្ថប្រយោជន៍កិច្ចព្រមព្រៀងភាពជាដៃគូរវាងកម្ពុជា និងអេមីរ៉ាតអារ៉ាប់រួម

2024/11/20 01:55:29 pm        223
Facebook Telegram Linkin
ក្រសួងពាណិជ្ជកម្មកម្ពុជា នៅព្រឹកថ្ងៃទី២០ ខែវិច្ឆិកានេះ បានរៀបចំសិក្ខាសាលាផ្សព្វផ្សាយអំពី អត្ថប្រយោជន៍នៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ រវាងកម្ពុជា និង​អេមីរ៉ាត​អារ៉ាប់រួម (Cambodia-UAE CEPA) ក្រោយបញ្ចប់កិច្ចចរចារទ្វេរភាគីរយៈពេល ៦ខែកន្លងទៅ និង​ចូលជាធរមានជាផ្លូវការនាខែមករា ឆ្នាំ២០២៤នេះ។លើកឡើងក្នុងពិធីបើកសិក្ខាសាលានេះ លោកជំទាវ តឹករ៉េត កំរង រដ្ឋលេខាធិការ​ក្រសួង​ពាណិជ្ជ​កម្ម​ បានមានប្រសាសន៍ថា គោលបំណងសំខាន់ នៃការ​បង្កើត​កិច្ច​ព្រមព្រៀង​ភាព​ជាដៃគូ​សេដ្ឋកិច្ច​គ្រប់​ជ្រុងជ្រោយ រវាងកម្ពុជា និងអេមីរ៉ាតអារ៉ាប់រួមនេះ គឺដើម្បីជំរុញ​ការធ្វើ​សមាហរណ​កម្ម​សេដ្ឋកិច្ចពាណិជ្ជកម្ម ជាពិសេសការបើកទីផ្សារកម្ពុជា ដែលក្នុងនោះ​ក៏​មាន​ការ​ជំរុញ​សម្រួល​ពាណិជ្ជ​កម្ម រវាងប្រទេសទាំងពីរ ហើយក៏មានពាក់ព័ន្ធ​ទៅ​នឹង​ការ​បង្កើន​ក្រប​ខណ្ឌ​កិច្ច​សហ​ប្រតិបត្តិការ​សេដ្ឋកិច្ចផងដែរ។លោកជំទាវ បានគូសបញ្ជាក់ថា កិច្ចព្រមព្រៀងនេះ គឺ​ជា​សមិទ្ធផល​មួយ​ក្នុង​ការ​ចូលរួ​ម​ជំរុញ​ការ​អនុវត្ត​យុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល ដែលដឹកនាំ​ដោយ​សម្តេច​នាយករដ្ឋ​មន្រ្តី ហ៊ុន ម៉ាណែត។ លោកជំទាវបានបន្តថា តាមរយៈកិច្ចព្រមព្រៀងនេះ កម្ពុជាអាចនាំទំនិញ​ទៅ​ទីផ្សារ​អេមីរ៉ាត​អារ៉ាប់រួម​ជាមួយ​អត្រាព​ន្ធ​សូន្យ​លើ​មុខ​ទំនិញ​សំខាន់​ៗ​ដូចជា​៖ កាបូបធ្វើដំណើរ, ស្បែកជើង, សម្លៀកបំពាក់, កង់, ផ្លែឈើ និងប្រភេទ​ទំនិញ​កសិកម្ម​កែច្នៃ​។ល។ កិច្ចព្រមព្រៀងនេះដែរ ក៏នឹងអនុញ្ញាត​ឱ្យ​កម្ពុជា​អាច​ផ្គត់ផ្គង់​សេវា​ពាណិជ្ជកម្ម​សំខាន់​ៗ​ដូ​ច​ជា៖​ សេវាកម្មអាជីពនិងធុរកិច្ច សេវាកម្មសំណង់និងវិស្វកម្ម និងសេវាកម្មបរិស្ថាន ជាដើម។ លោក​បណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា បានឲ្យដឹងថា សភា​ពាណិជ្ជកម្ម​កម្ពុជា ត្រៀមខ្លួនជាស្រេច ដើម្បីជួយដល់ធុរជនទាំងអស់គ្រប់ជំហាន ទាំងការតភ្ជាប់​ទំនាក់​ទំនង​ជាមួយ​ធុរជន​អេមីរ៉ាតអារ៉ាប់រួម ក៏ដូចជាសម្របសម្រួល​ជំនួប​ពាណិជ្ជកម្ម​ទៅ​តាម​តម្រូវ​ការ​ធុរជន​ទាំង​ពីរ​ប្រទេស។ លោកក៏បានលើកទឹកចិត្តធុរជនកម្ពុជា ពង្រឹងឧត្តមភាពធុរកិច្ចខ្លួន លើកកម្ពស់​ស្តង់​ដារ បង្កើនប្រសិទ្ធភាព និងបង្កើនគុណភាពផលិតផល ដើម្បីអាចប្រកួ​តប្រជែង​ជាមួយ​ប្រទេស​ដទៃ​ទៀតបាន។អ្នកឧកញ៉ា លី ឃុនថៃ ប្រធានសមាគមអ្នកវិនិយោគកម្ពុជា បានបង្ហាញជំនឿជឿជាក់ថា កិច្ចព្រម​ព្រៀង​ភាព​ជាដៃគូសេដ្ឋកិច្ចគ្រប់ជ្រុងជ្រោយ រវាងកម្ពុជានិងអេមីរ៉ាតអារ៉ាប់រួម ពិតជានឹងដើរ​តួនាទី​យ៉ាង​សំខាន់ ក្នុងការចូលរួមជំរុញកំណើនសេដ្ឋកិច្ចកម្ពុជា និងពង្រឹងចំណងមិត្តភាព រវា​ង​ប្រទេស​ទាំង​ពីរ​ឱ្យកាន់តែរឹងមាំថែមទៀត។យោងតាមក្រសួងពាណិជ្ជកម្ម គិតក្នុងរយៈ ១០ខែ ឆ្នាំ២០២៤នេះ ទំហំពាណិជ្ជកម្ម រវាងកម្ពុជា និ​ងអេមីរ៉ាតអារ៉ាប់រួមសម្រេចបានក្នុងទំហំទឹកប្រាក់សរុបចំនួនប្រមាណ ៧៥លានដុល្លារអាម៉េរិក កើន​ឡើង៧% ប្រៀបធៀបរយៈពេលដូចគ្នាទៅនឹង ឆ្នាំ២០២៣។ ក្នុងនោះ ទំនិញនាំចេញសំខាន់ៗគឺ សម្លៀកបំពាក់ ស្បែកជើង កាបូប យានយន្តនិងគ្រឿងបង្គុំ ផលិតផលកៅស៊ូ រីឯទំនិញនាំចូលសំខាន់ៗពីអេមីរ៉ាតអារ៉ាប់រួមរួមមាន៖ ប្រេងនិងកៅស៊ូប៊ីទីម ថ្នាំជក់ ផលិតផលប្លាស្ទិក ម៉ាស៊ីននិងឧបករណ៍អគ្គិសនី ចំណីកែច្នៃសម្រាប់សត្វ និងគ្រឿងសង្ហារឹម -ល-៕

ប្រជាសហគមន៍ជនជាតិដើមភាគតិច «ពូនង» មកពីសហគមន៍ទេសចរណ៍ទឹកធ្លាក់លែងពិរ ទទួលបានការបណ្ដុះបណ្ដាលហូកាលើជំនាញចុងភៅ

2024/11/20 01:07:47 pm        245
Facebook Telegram Linkin
កាលពីថ្ងៃទី១៩ ខែវិច្ឆិកា ឆ្នាំ២០២៤ លោក ស៊ាង សឿន ប្រធានមន្ទីរទេសចរណ៍ខេត្តមណ្ឌលគិរី បាន​បើកវគ្គបណ្តុះបណ្តាល ហូកា លើជំនាញចុងភៅ ដល់ប្រជាសហគមន៍ជនជាតិដើមភាគតិច ពូនង នៃសហគមន៍ទឹកធ្លាក់លែងពិរ រយៈពេល០៤ថ្ងៃ មានសិក្ខាកាមចំនួន ១២រូប ដែល​រៀប​ចំ​ឡើង​នៅ​ភូមិ​ពូទឺត ឃុំប៊ូស្រា ស្រុកពេជ្រាដា ខេត្តមណ្ឌលគិរី។វគ្គបណ្ដុះបណ្ដាលខាងលើ ផ្តោតសំខាន់លើការផ្ដល់នូវចំណេះ និងជំនាញរួមមាន៖ (១) ចង​ក្រង​រូប​មន្ត​ម្ហូប​ដែលជាអត្តសញ្ញាណរបស់ខេត្តនីមួយៗឱ្យបានច្បាស់លាស់ (២)ការបង្កើតម្ហូបថ្មីៗ (៣) ​ការវាល់ថ្លឹងបន្លែ សាច់ និងគ្រឿងទេស (៤) ការរចនាម្ហូបអាហារ (៥) ការធ្វើទឹកជ្រលក់ (៦)​ ការគណនាថ្លៃដើម និងការលក់ចេញ (៧) រចនាសម្ព័ន្ធនៅក្នុងផ្ទះបាយ (៨) ការ​អនុវត្ត​គោល​ការណ៍ និងតួនាទីនៅផ្ទះបាយ (៩) ការពិនិត្យមើលគុណភាពត្រី/សាច់ (១០) ភាព​បទ​បែន​ក្នុង​ការធ្វើម្ហូបអាហារ (១១) ការចងក្រងសៀវភៅម្ហូបអាហារសម្រាប់តំបន់ឦសាន្ត។សូមរំលឹកផងដែរថា គណៈគ្រប់គ្រងគម្រោងហូកា ក្រោម​កិច្ច​សហការ​ជាមួយ​អង្គការ​ស្វីស​ខន​ថាក់ ​និងមន្ទីរទេសចរណ៍ខេត្តមណ្ឌលគិរី បានរៀបចំនូវមុខម្ហូបប្រចាំខេត្តមណ្ឌលគិរីចំនួន៦ មាន​ដូច​ជា ញាំចុងផ្តៅ សម្លបុកត្រប់ សម្លម្សៅ ខ្ទៀម (កាតៀម)បុក បុកគល់ស្លឹកគ្រី និងបុក​តៀម​អំពិល​ខ្ចី​៕

ក្រុមហ៊ុន DP World របស់អេមីរាត់អារ៉ាប់រួម បង្ហាញចំណាប់អារម្មណ៍វិនិយោគ​នៅក្នុងប្រទេសកម្ពុជា

2024/11/20 12:18:31 pm        155
Facebook Telegram Linkin
នាព្រឹកថ្ងៃទី២០ ខែវិច្ឆិកា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រ​កម្ពុជា បានអនុញ្ញាតឱ្យ ឯកឧត្ដម Sultan Ahmed Bin Sulayem ប្រធានក្រុមហ៊ុន DP World ចូលជួបសម្ដែងការគួរសម និងពិភាក្សាការងារ នៅវិមានរដ្ឋសភា។នៅក្នុងឱកាសនៅជំនួប ឯកឧត្ដមនាយកប្រតិបត្តិក្រុមហ៊ុន DP World បានគោរពជម្រាបជូនសម្ដេចបវរធិបតីថា ក្រុមហ៊ុន DP World គឺជាក្រុមហ៊ុនរបស់ប្រទេសអេមីរាត់អារ៉ាប់រួម ដែលមានជំនាញក្នុងវិស័យកំពង់ផែ ឡូជីស្ទីក និងបច្ចេកវិទ្យាខាងខ្សែច្រវាក់ផ្គត់ផ្គង់និងមានប្រតិបត្តិការអាជីវកម្ម នៅក្នុងតំបន់អាស៊ាន និងតាមបណ្ដាប្រទេសជាច្រើនក្នុងពិភពលោក។ ដោយប្រទេសកម្ពុជាមានទីតាំងភូមិសាស្ត្រអំណោយផលដ៏ល្អប្រសើរ នៅក្នុងតំបន់អាស៊ាន ក្រុមហ៊ុន DP World មានចំណាប់អារម្មណ៍ក្នុងការស្វែងរកឱកាសវិនិយោគនៅកម្ពុជា លើវិស័យសំខាន់ៗ រួមមាន៖ វិស័យដឹកជញ្ជូន វិស័យឡូជីស្ទីក និងការអភិវឌ្ឍសួនឧស្សាហកម្ម។ ជាការឆ្លើយតប សម្ដេចបវរធិបតីបានសម្ដែងនូវការស្វាគមន៍ចំពោះចំណាប់អារម្មណ៍របស់ក្រុមហ៊ុនក្នុងការស្វែងរកកាលានុវត្តភាពវិនិយោគនៅព្រះរាជាណាចក្រកម្ពុជា។ សម្ដេចបវរធិបតី បានគូសបញ្ជាក់អំពីគោលនយោបាយ និងយន្តការនានារបស់រាជរដ្ឋាភិបាល ដែលគាំទ្រការវិនិយោគ និងបានសង្កត់ធ្ងន់ថា កម្ពុជាមានការតភ្ជាប់ជាមួយនឹងទីផ្សារក្នុងតំបន់ និងពិភពលោក តាមរយៈកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគីជាច្រើន ដែលក្នុងនោះ កម្ពុជា និងអេមីរ៉ាតអារ៉ាប់រួមបានចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ ផងដែរ។ សម្ដេចបវរធិបតី បានលើកទឹកចិត្តឱ្យក្រុមហ៊ុនពិចារណា ក្នុងការវិនិយោគលើវិស័យឡូជីស្ទីក ក៏ដូចជាការអភិវឌ្ឍសួនឧស្សាហកម្ម ដែលជាវិស័យសក្តានុពល និងបានលើកទឹកចិត្តឱ្យក្រុមហ៊ុនបន្តពិភាក្សាជាមួយក្រសួង-ស្ថាប័នពាក់ព័ន្ធរបស់កម្ពុជា៕

សម្ដេចធិបតី៖ ការកែសម្រួលសមាសភាពរដ្ឋមន្រ្ដីក្រសួងការបរទេស គឺពិតជានឹងបង្កើន​សមត្ថភាព និងប្រសិទ្ធភាពរបស់រាជរដ្ឋាភិបាលនៅក្នុងការអនុវត្តនយោបាយការបទេស

2024/11/20 12:13:30 pm        173
Facebook Telegram Linkin
សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា បាន​ជម្រាប​ទៅ​កាន់​កិច្ច​ប្រជុំ​ពេញអង្គរដ្ឋសភា នាព្រឹកថ្ងៃទី២០ ខែវិច្ឆិកា ឆ្នាំ ២០២៤នេះថា ការកែសម្រួល និង​តែង​តាំង​បំពេញបន្ថែមសមាសភាពរាជរដ្ឋាភិបាលនេះ គឺពិតជានឹងបង្កើនសមត្ថភាព និងប្រសិទ្ធ​ភាព​របស់​រាជរដ្ឋាភិបាលនៅក្នុងការអនុវត្តនយោបាយការបទេស និងពាណិជ្ជកម្ម​របស់​កម្ពុជា​នៅ​លើ​ឆាក​អន្តរជាតិប្រកបដោយភាពបត់បែន និងអាចប្រែក្លាយបញ្ហាប្រឈមនានា ទៅជាកាលា​នុវត្តភាព សម្រាប់លើកកម្ពស់ផលប្រយោជន៍ជាត។ ក្នុងឱកាសចូលរួមប្រជុំរដ្ឋសភាពេញអង្គ នីតិកាលទី៧ ដើម្បី​បោះឆ្នោត​ផ្តល់​សេច​ក្តី​ទុក​ចិត្ត​លើ​ការ​កែស​ម្រួលស​មាសភាពរាជរដ្ឋាភិបាល នៃព្រះរាជាណាចក្រកម្ពុជា នាព្រឹកនេះ សម្ដេចធិបតី នាយករដ្ឋ​មន្រ្ដី បានថ្លែងទៅកាន់កិច្ចប្រជុំពេញអង្គនៃរដ្ឋសភាថា ក្នុងរយៈពេលជាង ១ ឆ្នាំ​កន្លង​មក​នេះ ជាមួយនឹ​ង​ការ​ខិតខំ​ប្រឹង​ប្រែង​យ៉ាង​ប្ដូរ​ផ្ដាច់​មិ​ន​រា​ថយ​ទោះ​បី​នៅ​ក្នុង​ដំណាក់​កាល​ដែល​សភាពការណ៍​សាកលមានការវិវត្តប្រកបដោយភាពស្មុគស្មាញ ពោពេញដោយ​ភាព​មិន​ប្រាក​ដ​ប្រជា និងពិបាកស្មាន ក៏រាជរដ្ឋាភិបាលនៅតែបានចាប់ផ្ដើម និងកំពុងបន្ត​ធ្វើ​ដំណើ​រ​យ៉ាង​ស្វាហាប់​នៅ​លើ​កន្លងវិជ្ជមាន​ដោយ​សម្រេច​បាន​នូវ​សមិទ្ធផល​សំខាន់ៗ​ជា​ច្រើន​ជា​បន្ត​បន្ទាប់​ជូន​ប្រជាជាតិ​កម្ពុជា ពិសេសគឺការរក្សាបាននូវសន្ដិភាព ស្ថិរភាពនយោបាយ សន្ដិសុខ និងការ​ពង្រឹង​សណ្ដាប់​ធ្នាប់​សង្គម​។សម្ដេចធិបតី នាយករដ្ឋមន្រ្ដីបានបញ្ជាក់ថា រាជរដ្ឋាភិបាលពិតជាមានភាពចាំបាច់ នៅក្នុង​ការ​បង្កើន​ និងពង្រឹងបន្ថែមនូវសមត្ថភាព និងប្រសិទ្ធ​ភាព​នៃ​យន្តការ​ដឹកនាំ​នៅ​ក្នុង​ការ​អនុវត្ត​ការងារ​របស់​ខ្លួន ជាពិសេសនៅក្នុងវិស័យការបរទេស និងកិច្ចសហប្រតិបត្តិការអន្តរជាតិ និងវិស័យ​ពាណិជ្ជ​កម្ម ដោយផ្ដោត​ជា​សំខាន់​នូវ​ការ​ជំរុញ​អនុវត្ត​គោល​នយោបាយ​ការ​បរទេស​ប្រកប​ដោយ​ភាព​បត់​បែន និងយូរអង្វែង ឈរលើមូលដ្ឋានឯករាជ្យ និងច្បាប់អន្តរជាតិ ការប្ដេជ្ញាការពារ​ផល​ប្រយោជន៍​ស្នូល​របស់កម្ពុជា, ការការពារឯករាជ្យ អធិបតេយ្យ បូរណភាពទឹកដី, ការការពារ​សិន្ដិភាព និងស្ថិរភាពសង្គម, ការការពារយុត្តិធម៌ និងកិត្យនុភាពកម្ពុជា, ការបន្តយកចិត្តទុកដាក់ ក្នុង​ការ​ថែរក្សា និងលើកកម្ពស់ទំនាក់ទំនងមិត្តភាពជាប្រពៃណី សាមគ្គីភាព និងកិច្ច​សហប្រតិបត្តិ​ការ​គ្រប់​វិស័យ ដែលផ្ដល់ផ​ល​ប្រយោជន៍​ទៅ​វិញ​ទៅ​មក​ជា​មួយ​បណ្ដា​ប្រទេស​ជាដៃ​គូ​សំខាន់​ៗ​ទាំង​ក្នុង​តំបន់ និងក្រៅតំបន់នៅលើឆាកអន្តរជាតិ ព្រមទាំង​ការ​បន្ត​ចូល​រួម​ឱ្យកាន់​តែ​សកម្ម​នៅ​ក្នុង​បុព្វហេតុ​សន្ដិភាព ស្ថិរភាព និងការចូលរួមដោះស្រាយបញ្ហាប្រឈមនានាលើពិភពលោក។ ឈរ​លើ​មូលដ្ឋាននេះ សម្ដេចធិបតី បានជម្រាបទៅកាន់អង្គរដ្ឋសភាថា យោងតា​ម​តម្រូ​វ​ការ​ចាំបា​ច់​ក្នុង​ការជំរុញការ​អនុវត្តឱ្យសម្រេច​បាន​ឱ្យកាន់តែប្រ​សើរថែម​ទៀត​នូវ​ប្រសិទ្ធ​ភាព​ការងារ​របស់​រាជ​រដ្ឋាភិបាល នីតិកាលទី៧ នៃរដ្ឋសភា ក្នុងនាមជានាយករដ្ឋមន្រ្ដី នៃព្រះរាជាណាចក្រកម្ពុជា សម្ដេច​បាន​ស្នើដល់អង្គរដ្ឋសភា ពិនិត្យ និងបោះឆ្នោតផ្ដល់សេចក្ដីទុកចិត្តលើការកែសម្រួល និងការ​តែង​តាំងបំពេញបន្ថែមសមាសភាពនៃរាជរដ្ឋាភិបាលកម្ពុជានាពេលនេះ។ ក្នុង​នោះ​បោះឆ្នោតផ្ដល់សេចក្ដីទុកចិត្តដល់ ឯកឧត្តម ប្រាក់ សុខុន ជាឧបនាយករដ្ឋមន្រ្ដី និងជារដ្ឋ​មន្រ្ដី​ក្រសួងការបរទេស និងសហប្រតិបត្តិការអន្តរជាតិ និងឯកឧត្តម សុខ ចិន្តាសោភា ជាឧ​ប​នាយក​រ​ដ្ឋមន្រ្ដី។ សម្ដេចធិបតី មានប្រសាសន៍បញ្ជាក់ថា៖«ជាមួយនឹងបទពិសោធន៍របស់ឯកឧត្តម ប្រាក់ សុខុន នៅ​ក្នុងវិស័យការបរទេស និងសហប្រតិបត្តិការអន្តរជាតិ និងបទពិសោធន៍របស់ឯកឧត្តម សុខ ចិន្តា​សោភា នៅក្នុងវិស័យពាណិជ្ជកម្ម និងវិនិយោគ ការកែសម្រួល និងតែងតាំង​បំពេញ​បន្ថែម​សមាស​ភាព​រាជរដ្ឋាភិបាលដូចបានស្នើសុំនេះ គឺពិតជានឹងបង្កើនសមត្ថភាព និងប្រសិទ្ធភាព​របស់​រាជ​រដ្ឋាភិបាលនៅក្នុងការអនុវត្តនយោបាយការបទេស និងពាណិជ្ជកម្ម​របស់​កម្ពុជា​នៅ​លើឆាក​អន្តរជាតិ​ប្រកបដោយភាពបត់បែន និងអាចប្រែក្លាយបញ្ហាប្រឈមនានា ទៅជាកាលានុវត្តភាព សម្រាប់​លើកកម្ពស់ផលប្រយោជន៍ជាតិ»។ក្រោយ​កិច្ចប្រជុំពេញអង្គរដ្ឋសភាបោះឆ្នោតគាំទ្រទាំងស្រុង ឱ្យឯកឧត្តម ប្រាក់ សុខុន កាន់​តំណែង​ជា រដ្ឋមន្រ្តីក្រសួងការបរទេស ជំនួស ឯកឧត្តម សុខ ចិន្តាសោភា នាព្រឹកថ្ងៃទី២០ ខែវិច្ឆិកា ឆ្នាំ២០២៤, សម្ដេចធិបតី ហ៊ុន ម៉ាណែត នាយករដ្ឋមន្រ្ដី បានផ្ញើសារអបអរសាទរដល់ ឯកឧត្ដម​ឧបនាយករដ្ឋមន្ត្រី ប្រាក់ សុខុន ដែលត្រូវបានរដ្ឋសភាបោះឆ្នោតផ្តល់សេចក្តីទុកចិត្ត ជា រដ្ឋមន្ត្រី​ក្រសួងការបរទេស និងសហ​ប្រតិបត្តិការ​អន្តរជាតិ​នៅ​ក្នុង​សមាស​ភាព​រាជ​រដ្ឋាភិបាល​នីតិកាលទី៧ នៃរដ្ឋសភានេះផងដែរ៕ អត្ថបទ៖ វ៉ន ដារ៉ា

អង្គការ UNIDO មានឆន្ទៈខ្ពស់ គាំទ្រដល់កំណើនសេដ្ឋកិច្ច និងភាពធន់នៃសេដ្ឋកិច្ចនៅកម្ពុជា

2024/11/20 11:14:12 am        135
Facebook Telegram Linkin
អង្គការ UNIDO មានឆន្ទៈមុតមាំ ដើម្បីគាំទ្រដល់កំណើនសេដ្ឋកិច្ច និងភាពធន់ នៃ​សេដ្ឋកិច្ច​នៅ​កម្ពុជា តាមរយៈការរួមចំណែកបង្កើនផលិតភាព ជួយដល់ខ្សែច្រវាក់ផលិតកម្មក្នុងស្រុក និង​ភាព​ប្រកួត​ប្រជែង​របស់ MSMEs ផលិតសម្រាប់ផ្គត់ផ្គង់ចូល ទីផ្សារ ការប្រកួតប្រជែង និងការ​នាំ​ចេញ​។លោក សុខ ណារិន តំណាងអង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO) ប្រចាំ​នៅ​កម្ពុជា លើកឡើងនៅក្នុងសិក្ខាសាលា​ស្តីពី “ការអភិវឌ្ឍការភ្ជាប់ទំនាក់​ទំនង​រវាង​សាកល​វិទ្យាល័យ និងសហគ្រាសឧស្សាហកម្ម” ក្នុងគោលដៅកសាងប្រព័ន្ធ អេកូឡូស៊ីនវានុវត្តន៍ និង​រួម​ចំណែក​ដល់​ការរីកចម្រើននៃសហគ្រាសឧស្សាហកម្ម និងសេដ្ឋកិច្ចកម្ពុជា នៅថ្ងៃទី១៩ ខែវិច្ឆិកា ឆ្នាំ​២០២៤ នេះថា ប្រទេសកម្ពុជាកំពុងរីកចម្រើនលើវិស័យវិទ្យាសាស្រ្ត បច្ចេកវិទ្យា និងនវានុវត្តន៍ ក៏​ប៉ុន្តែការខ្វះខាតជំនួយហិរញ្ញវត្ថុបានបង្ករជា ឧបសគ្គ ដល់កិច្ចសហការសិក្សាស្រាវជ្រាវ ដែល​មាន​លក្ខណៈ​អន្តរវិស័យ ការចូលរួមកាត់បន្ថយគម្លាតចង្អៀត និងការបង្កើតក្របខណ្ឌ ច្បាប់​សម្រាប់​​ការតភ្ជាប់ប្រដោយប្រសិទ្ធភាព រវាងគ្រឹះស្ថានឧត្តមសិក្សា និងវិស័យឧស្សាហកម្ម ដើម្បី​ជំរុញ​លើកកម្ពស់នវានុវត្តន៍នៃផលិត ភាពរបស់វិស័យឯកជន ជាពិសេសសហគ្រាសធុនមីក្រូ តូច និង​មធ្យម ដែលដើរតួនាទីសំខាន់ក្នុងសេដ្ឋកិច្ចជាតិ និងជាប្រភពបង្កើត ការងារផងដែរ។លោកបន្ថែមថា ជុំវិញបញ្ហានេះ, អង្គការសហប្រជាជាតិដើម្បីអភិវឌ្ឍន៍ឧស្សាហកម្ម UNIDO មាន​ឆន្ទៈ​ខ្ពស់ ក្នុងការជួយគាំទ្រ ដល់កំណើនសេដ្ឋ និងភាពធន់នៃសេដ្ឋកិច្ចកម្ពុជា, តាមរយៈ​គំនិត​ផ្តួច​ផ្តើម​ការ​អនុវត្តន៍គម្រោងរបស់អង្គការ UNIDO គឺបានចូលរួម ចំណែកក្នុងការបង្កើនផលិតភាព និង​ភាព​ប្រកួតប្រជែងរបស់សហគ្រាសធុនមីក្រូ តូច និងមធ្យមនៅក្នុងប្រទេសកម្ពុជា និង​ដើម្បី​ជំរុញ​ ឈានចូលទីផ្សារជាតិ តំបន់ និងអន្តរជាតិឱ្យបានកាន់តែទូលំទូលាយ តាមរយៈ​នៃកា​រអ​នុវត្ត​​គម្រោងផលិតផល ជលផល ក្រោយពី ប្រមូលផល ដែលទទួលបាន​មូល​និធិ​ស​ហ​ហិរញ្ញ​ប្ប​ទាន​ពី​សហភាពអឺរ៉ុប ដោយបានបង្កើតដាក់ឱ្យស្រាវជ្រាវនវានុវត្តន៍ និងបច្ចេកវិទ្យា, និងការ​វិនិយោគ​តាម​ថ្នាលបច្ចេកវិទ្យាចំណីអាហារជាដើម ។ ថ្នាលនេះនឹងនាំ​យក​នូវ​គ្រឹះស្ថាន​សិក្សា​មក​ជំនួស ដើម្បីធ្វើការសហការជា មួយវិស័យឯកជន ក៏ដូចជាស្ថាប័នរបស់រាជរដ្ឋាភិបាល ដើម្បី​ធ្វើ​ការ​សិក្សា​ស្រាវជ្រាវ និងរិះរកដំណោះស្រាយបែបនវានុវត្តន៍ និងកិច្ច ឆ្លើយតបទៅ​និង​តម្រូវ​ការ​សហ​គ្រាស និងឧស្សាហកម្មនៅកម្ពុជា។ចំណែក លោក Bryan Fornari នាយកផ្នែកកិច្ចសហប្រតិបត្តិការនៃសហភាពអឺរ៉ុប ប្រចាំ​នៅ​កម្ពុជា​ ក៏បានលើក ឡើងអំពីតួនាទីរបស់សហភាពអឺរ៉ុប ក្នុងការ​លើក​កម្ពស់​ទំនាក់​ទំនង​រវាង​សាកល​វិទ្យាល័យ និងសហគ្រាស ដែលជាមូលដ្ឋាននៃការ រីកចម្រើន សេដ្ឋកិច្ច និងសង្គម។ លោក​បានថ្លែងថា សហភាពអឺរ៉ុបទទួលស្គាល់ថា ទំនាក់ទំនងរវាងសាកលវិទ្យាល័យ និង​សហ​គ្រាស មានសារៈ សំខាន់សម្រាប់នវានុវត្តន៍ និងភាពប្រកួតប្រជែងរបស់កម្ពុជា។ តាមរយៈ​ការ​បង្កើត​ទំនាក់​ទំនងទាំងនេះ យើងអាចធានា បានថា ចំណេះដឹងត្រូវបានប្រើប្រាស់ ដើម្បី​បង្កើត​ដំណោះ​ស្រាយ​ដែលផ្តោតលើតម្រូវការទីផ្សារ បង្កើតឱកាសសេដ្ឋកិច្ច បង្កើតការងារ និងពង្រឹង​ភាព​ ប្រកួតប្រជែងផងដែរ។សម្រាប់បញ្ហានេះ, ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ បានលើកទឹក ចិត្តឱ្យនវានុវត្តន៍ករ ការពារកម្មសិទ្ធិបញ្ញាលើលទ្ធផលស្រាវជ្រាវ និងការរកឃើញថ្មីៗរបស់ពួកគេ តាមរយៈប្រកាសនីយបត្រតក្កកម្ម។ ឯកឧត្តម បានបន្ថែមថា នវា​នុវត្តន៍​ករ​អាចការពារស្នាដៃរបស់ខ្លួន ដើម្បីអភិវឌ្ឍស្នាដៃទាំងនោះបន្ថែមនៅក្នុងវិស័យរៀងខ្លួន៕ អត្ថបទ៖ សុន រ៉ាឌី

អេស្ប៉ាញ ស្នើសុំកម្ពុជារៀបចំវេទិការធុរកិច្ច ដើម្បីបញ្ជ្រាបព័ត៌មានវិនិយោគដល់ធុរជនអេស្ប៉ាញ

2024/11/20 10:46:32 am        186
Facebook Telegram Linkin
ឯកឧត្តមឯកអគ្គរាជទូត អេស្ប៉ាញ ស្នើសុំទៅកាន់ក្រុមប្រឹក្សាអភិវឌ្ឍន៍កម្ពុជា ពិនិត្យលទ្ធភាព សម្រប​សម្រួលរៀបចំ វេទិការធុរកិច្ច ក្នុងប្រទេសកម្ពុជា ដើម្បីបញ្ជ្រាបព័ត៌មានវិនិយោគ និងវិស័យ​លើក​ទឹក​ចិត្ត​នានា ជូនដល់ធុរជនអេស្ប៉ាញបន្ថែមទៀត។ ឯកឧត្តម Felipe De La Morena Casado ឯកអគ្គរាជទូតនៃព្រះរាជាណាចក្រអេស្ប៉ាញ ប្រចាំ​កម្ពុជា​ នៅក្នុងជំនួបពិភាក្សាការងារជាមួយ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុ​ប្រធាន​ទី១​ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី១៩ ខែវិច្ឆិកាម្សិលមិញនេះ ឯកឧត្តម បាន​បញ្ជាក់​អំពី​ការតាំងចិត្ត​ក្នុងការលើកកម្ពស់ទំនាក់ទំនងទ្វេភាគី រួមទាំងកិច្ចការងារ វិនិយោគរវាងកម្ពុជា និង​អេស្ប៉ាញ។ បន្ថែមពីនេះ ឯកឧត្តម ឯកអគ្គរាជទូត ក៏បានលើកឡើងអំពីកង្វល់មួយចំនួន ក្នុង​កិច្ច​ការងារទាក់ទាញ និងជំរុញវិនិយោគ ទាមទារឱ្យកម្ពុជាពិនិត្យ និងសម្រប សម្រួល​ដោះស្រាយ​ឱ្យ​បាន​កាន់​តែ​ល្អប្រសើរផងដែរ។ក្រៅពីគោលការណ៍ខាងលើ, ឯកឧត្តមឯកអគ្គរាជទូត ក៏បានស្នើសុំទៅកាន់ក្រុមប្រឹក្សា​អភិវឌ្ឍន៍​កម្ពុជា​ ក្នុងការពិនិត្យលទ្ធភាព សម្របសម្រួលរៀបចំវេទិការធុរកិច្ចក្នុងប្រទេសកម្ពុជា ដើម្បី​បញ្ជ្រាប​ព័ត៌មានវិនិយោគ និងវិស័យលើកទឹកចិត្តនានា ជូនដល់ធុរជនអេស្ប៉ាញបន្ថែមទៀត។ ឆ្លៀត​ឱកាសនេះ ឯកឧត្តម បានដើម្បីសាកសួរអំពីលទ្ធផលនៃដំណើរទស្សនកិច្ច របស់​ឯកឧត្តម​ឧប​នាយករដ្ឋមន្ត្រី ទៅកាន់ប្រទេសអេស្ប៉ាញកាលពីខែមិថុនាកន្លងទៅផងដែរ។  ជាការឆ្លើយតប ឯកឧត្តមឧបនាយករដ្ឋមន្ត្រី ស៊ុន ចាន់ថុល បាន​ជម្រាប​ជូន​អំពី​លទ្ធផល​យ៉ាង​ល្អ​ប្រ​សើរ និងប្រកបដោយ ផ្លែផ្កា ដែលទទួលបាន​ពី​បេសកកម្ម​គោះទ្វារ​វិនិយោគ​នៅ​ប្រទេស​អេស្ប៉ាញ ​ដោយដែលក្រុមប្រឹក្សាអភិវឌ្ឍន៍កម្ពុជាបានសហការ រៀបចំជាមួយបណ្ដាក្រសួងស្ថាប័ន និង​គ្រប់​ភាគីពាក់ព័ន្ធ កាលពីខែ មិថុនា ឆ្នាំ២០២៤ កន្លងទៅនេះ។ ឯកឧត្តមឧបនាយករដ្ឋមន្ត្រី បាន​បញ្ជាក់​ការគាំទ្រយ៉ាងពេញទំហឹង ចំពោះក្រុមហ៊ុនអេស្ប៉ាញ ដែលគ្រោង​នឹង​បណ្ដាក់​ទុន​វិនិយោគ​នៅ​កម្ពុជាបន្ថែម​៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

មន្ត្រីជាន់ខ្ពស់ក្រសួងការងារ៖ បច្ចុប្បន្ន ការងារ និងសាលារៀន រត់រកមនុស្សដល់មូលដ្ឋាន ហើយការធ្វើការងារក្នុងស្រុកជួយកសាងសេដ្ឋកិច្ចជាតិ
06/27/2026 06:06 PM
Facebook Telegram Linkin
តំបន់​គ្រីមៀប្រកាសស្ថានភាព​គ្រា​អាសន្ន បន្ទាប់ពីអ៊ុយក្រែនវាយប្រហារបណ្តាញថាមពល
06/27/2026 05:06 PM
Facebook Telegram Linkin
លោក Zelenskyy៖ មីស៊ីល Flamingo បានវាយប្រហារដោយជោគជ័យ​ លើ​រោងចក្រយោធាដ៏​សំខាន់របស់រុស្ស៊ី
06/27/2026 04:06 PM
Facebook Telegram Linkin
អ៊ីរ៉ង់ថ្កោលទោសការវាយប្រហាររបស់​អាមេរិក ដោយចោទប្រកាន់ថា រំលោភលើកិច្ចព្រមព្រៀងសន្តិភាព
06/27/2026 04:06 PM
Facebook Telegram Linkin
មនុស្សយ៉ាងតិច ២នាក់ស្លាប់ ខណៈកោះ​តៃវ៉ាន់ជូនដំណឹងថ្មី អំពីភ្លៀងធ្លាក់ខ្លាំង ក្រោយ​មាន​ទឹកជំនន់គ្រប់ទីកន្លែង​
06/27/2026 03:06 PM
Facebook Telegram Linkin
សម្ដេចធិបតី ហ៊ុន ម៉ាណែត៖ អាទិភាពរបស់រាជរដ្ឋាភិបាល​ គឺ ប្រទេសជាតិ​,​ប្រជាជន, ទឹកដី និង​ ឯករាជ្យភាពជាតិ
06/27/2026 03:06 PM
Facebook Telegram Linkin
ទីក្រុងសេអ៊ូល បញ្ជាក់​ថា យន្តហោះយោធាចិន និងរុស្ស៊ី ចូលទៅក្នុងតំបន់ការពារដែនអាកាសរបស់ខ្លួន
06/27/2026 03:06 PM
Facebook Telegram Linkin
អ្នកគាំទ្រក្រុម​ហេសបូឡា ចេញមក​តាមដងផ្លូវទីក្រុងបេរូត ដើម្បីតវ៉ា​កិច្ចព្រមព្រៀងជាមួយ​អ៊ីស្រាអែល
06/27/2026 03:06 PM
Facebook Telegram Linkin
អ្នកការទូតជាន់ខ្ពស់​ប៉ាគីស្ថាន និងអ៊ីរ៉ង់ បញ្ជាក់ពី​ការប្តេជ្ញាចិត្ត ចំពោះសន្តិភាពក្នុងតំបន់ ក្រោយ​មាន​ការវាយប្រហារថ្មី
06/27/2026 03:06 PM
Facebook Telegram Linkin
លោក Trump បង្ហាញលិខិតឆ្លងដែនសហរដ្ឋ​អាមេរិកថ្មីដែល​មាន​រូបភាពរបស់លោក​
06/27/2026 03:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.