នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជាអំពាវនាវឱ្យមានសកម្មភាពសកលកាន់តែខ្លាំងឡើងប្រឆាំងនឹងអំពើហិង្សាផ្លូវភេទក្នុងជម្លោះ
អាគារខណ្ឌរដ្ឋបាលជលផល​កែប សម្ពោធដាក់ឱ្យប្រើប្រាស់ជាផ្លូវការដើម្បីលើកកម្ពស់ជីវភាពប្រជានេសាទ
អាមេរិក ព្យាយាមបញ្ចៀសការវាយប្រហារលើអ៊ីរ៉ង់ បន្ទាប់ពីកិច្ចខិតខំប្រឹងប្រែងកាត់បន្ថយភាពតានតឹងក្នុងតំបន់
CDC ផ្សព្វផ្សាយរបាយការណ៍ វេទិការាជរដ្ឋាភិបាល-ផ្នែកឯកជនលើកទី១៩ ប្រចាំឆមាសទី២ ឆ្នាំ២០២៥

ព័ត៌មានជាតិ

កសិផលខ្មែរចំនួន ៥មុខ ត្រូវបានជ្រើសរើសនិងកែច្នៃក្នុងកម្មវិធីប្រកួតប្រជែងធ្វើម្ហួបអាហារ

2024/11/07 09:51:03 pm        103
Facebook Telegram Linkin
ភ្នំពេញ ÷ ខណៈពិព័រណ៍វិស័យផ្គត់ផ្គង់ម្ហូបអាហារ ភេសជ្ជៈ សណ្ឋាគារ និងបដិសណ្ឋារកិច្ច បានកំពុងដំណើរការ កម្មវិធីនេះ ក៏មានរៀបចំការប្រកួតប្រជែងធ្វើម្ហូបថ្នាក់ជាតិផងដែរ ដែលបង្ហាញពីភាពច្នៃប្រឌិតខាងផ្នែកម្ហូបអាហារ។ ក្នុងនោះ សមាគមចុងភៅកម្ពុជា បាននាំយកកសិផលរបស់កម្ពុជាចំនួន៥មុខ ដើម្បីដាក់ឱ្យកែច្នៃធ្វើជាមុខម្ហូប នៅក្នុងព្រឹត្តិការណ៍ប្រកួតប្រជែង។ ជួបសម្ភាសន៍ជាមួយ លោក តុង សេង ប្រធានសមាគមចុងភៅកម្ពុជា លោកបានឲ្យព័ត៌មាន ប៊ីធីវី ដឹងថា កសិផលសំខាន់ៗទាំង៥មុខ របស់កម្ពុជានេះ រួមមាន៖ ប្រហុក គ្រាប់ស្វាយចន្ទីរ ទឹកត្រី ទឹកប៉េងប៉ោះ និងទឹកស៊ីអ៊ីវ ដែលសុទ្ធសឹងជាផលិតផលខ្មែរសុទ្ធសាធ។ លោករៀបរាប់បន្តថា មុខម្ហូបដែលបានលើកយកមកប្រឡងឆ្នាំនេះ មានដូចជានំបុ័ង និងការឆ្លាក់បន្លែផ្លែឈើជាដើម។ លោកប្រធានសមាគម បានឲ្យដឹងទៀតថា នៅក្នុងព្រឹត្តិការណ៍ប្រកួតប្រជែងនេះ បើសិនជាចុងភៅរូបណា អាចយកកសិផលទាំងនោះ មកកែច្នៃជាម្ហូប ហើយទទួលបានជ័យលាភី មុខម្ហូបនោះ នឹងត្រូវចាត់ចូលជាម្ហូបថ្នាក់ជាតិ ហើយនឹងផ្សព្វផ្សាយក្នុងការជំរុញនាំចេញកសិផលទាំងអស់នោះទៅកាន់ទីផ្សារអន្តរជាតិផងដែរ។ ក្រុមបេក្ខភាព ដែលបានចូលរួមប្រកួតប្រជែងម្ហូបអាហារនេះ បានសម្តែងក្តីសប្បាយរីករាយ និងលើកឡើងថា តាមរយៈព្រឹត្តិការណ៍ប្រកួតប្រជែងនេះ ផលិតផលរបស់កម្ពុជានឹងត្រូវបានយកចិត្តទុកដាក់ពីអ្នកប្រើប្រាស់ ជាពិសេសក្នុងការនាំយកទៅកែច្នៃចេញជាម្ហូបអាហារ ក៏ដូចជាជំរុញទីផ្សារនាំចេញ ដែលនឹងអាចធ្វើឱ្យផលិតផលរបស់ខ្មែរកាន់តែមានសក្ដានុពល។សូមបញ្ជាក់ថា ពិព័រណ៍វិស័យផ្គត់ផ្គង់ម្ហូបអាហារ ភេសជ្ជៈ សណ្ឋាគារ និងបដិសណ្ឋារកិច្ច មានរយៈពេល ៣ថ្ងៃ ចាប់ពីថ្ងៃទី៦ ដល់៨ ខែវិច្ឆិកា ឆ្នាំ២០២៤ នៅមជ្ឈមណ្ឌលសន្និបាតពិព័រណ៍កោះពេជ្រ។ ព្រឹត្តការណ៍នេះ រៀបចំឡើងដើម្បីផ្សារភ្ជាប់ដៃគូអាជីវកម្ម ការពង្រីកពាណិជ្ជកម្ម ក្នុងគោលបំណងអភិវឌ្ឍន៍វិស័យទេសចណ៍នៅកម្ពុជាឲ្យកាន់តែរីកចម្រើនបន្ថែមទៀតទៅថ្ងៃអនាគតខាងមុខ៕អត្ថបទ ឈិត បូរ៉ាវី

សម្តេចធិបតីផ្តល់គំនិតដល់សមាជិកមហាអនុតំបន់មេគង្គគប្បីរួបរួមគ្នាទ្រទ្រង់កំណើនសេដ្ឋកិច្ច និងការពារ ពាណិជ្ជកម្មសេរី

2024/11/07 09:30:03 pm        174
Facebook Telegram Linkin
ភ្នំពេញ ÷ រដ្ឋមន្រ្តីប្រតិភូអមនាយករដ្ឋមន្រ្តី ឯកឧត្តម តាន់ ហ្សង់ហ្វ្រង់ស្វ័រ បានថ្លែងថា នៅក្នុងកិច្ចប្រជុំកំពូលមហាអនុតំបន់មេគង្គ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានផ្តល់គំនិតមួយចំនួនដល់រដ្ឋាភិបាលនៃប្រទេសជាសមាជិកមហាអនុតំបន់មេគង្គទាំងអស់ គប្បីរួបរួមគ្នាទ្រទ្រង់កំណើនសេដ្ឋកិច្ច ការពារនូវពាណិជ្ជកម្មសេរី និងទប់ទល់ហានិភ័យនៃការប្រែប្រួលអាកាសធាតុជាដើម។ ថ្លែងនៅក្នុងសន្និសីទសារព័ត៌មាន នាយប់ថ្ងៃទី៧ ខែវិច្ឆិកា ឆ្នាំ២០២៤នេះ ស្តីពីលទ្ធផលបេសកកម្មរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ចូលរួមកិច្ចប្រជុំកំពូលនៅប្រទេសចិនថ្ងៃទី ៦-៧ ខែវិច្ឆិកានេះ នៅទីក្រុងគុនមិញ ប្រទេសចិននោះ ឯកឧត្តម តាន់ ហ្សង់ហ្វ្រង់ស្វ័រ បានលើកឡើងថា នៅ ក្នុងកិច្ចប្រជុំខាងលើ ដែលមានប្រទេសជាមាជិកដូចជា ចិន កម្ពុជា ឡាវ មីយ៉ាន់ម៉ា ថៃ និងវៀតណាម នេះ គឺភាគីទាំងអស់បានពិភាក្សាគ្នាជាច្រើនវិធានបទ ក្នុងនោះវិធានបទដែលសំខាន់ជាងគេ ហើយថែម ទាំងបានអនុម័តផងនោះគឺ«ឆ្ពោះទៅកាន់សហគមន៍មួយកាន់តែប្រសើរឡើងតាមរយៈការអភិវឌ្ឍ» ដែល ជំរុញដោយនវានុវត្តន៍ ពោលគឺការប្រើប្រាស់បច្ចេកវិទ្យាថ្មី និងវិធីសាស្រ្តថ្មី ត្រូវតែជួយពង្រីក និងពង្រឹង កិច្ចសហប្រតិបត្តិការសេដ្ឋកិច្ចរវាងប្រទេសចិនជាមួយប្រទេសជាសមាជិកដើម្បីធ្វើយ៉ាងណាឲ្យមហាអនុតំបន់មេគង្គនៅទីបំផុតក្លាយជាសហគមន៍មួយកាន់តែល្អប្រសើរជាលំដាប់។ តាមរយៈសន្និសីទសារព័ត៌មានខាងលើនេះ ឯកឧត្តម តាន់ ហ្សង់ហ្វ្រង់ស្វ័រ បានឲ្យដឹងទៀតថា នៅលើវេទិកានៃកិច្ចប្រជុំកំពូលមហាអនុតំបន់មេគង្គនេះ សម្តេចធិបតី ហ៊ុន ម៉ាណែត បានថ្លែងសុន្ទរកថា ដោយបានផ្តល់នូវគំនិតសំខាន់ៗមួយចំនួនប្រាប់ដល់ថ្នាក់ដឹកនាំប្រទេសជាសមាជិកទាំងអស់ថា« អ្វីដែល ជាសំខាន់នោះ គឺពីពេលនេះតទៅ គឺប្រទេសជាសមាជិកទាំង៦នៃមហាអនុតំបន់មេគង្គត្រូវតែរួបរួមគ្នា ទ្រ ទ្រង់កំណើនសេដ្ឋកិច្ច ការពារពាណិជ្ជកម្មសេរី ទប់ទល់ហានិភ័យនៃការប្រែប្រួលអាកាសធាតុ។ មូលហេតុ គឺដោយសារតែមហាអនុតំបន់មេគង្គទាំងមូល ជាសេដ្ឋកិច្ចដែលពឹងផ្អែកជាពិសេសលើការនាំចេញ និងជា ដែនដីដែលងាយនឹងទទួលរងគ្រោះពីមហន្តរាយធម្មជាតិ»។ ឯកឧត្តមរដ្ឋមន្រ្តីប្រតិភូអមនាយករដ្ឋមន្រ្តីបានឲ្យដឹងទៀតថា លើវេទិកានោះ សម្តេចធិបតី ហ៊ុន ម៉ាណែត នាយករដ្ឋមន្រ្តី ក៏បានសម្តែងនៅសេចក្តីសោមនរីករាយចំពោះការដែលប្រទេសមហាអនុតំបន់មេ គង្គសម្រេចចាប់យកដោយមិនបានបង្អែរបង្អង់នវានុវត្តន៍ និងឌីជីថលូបនីយកម្ម ព្រមទាំងបញ្ញាសិប្បនិមិត្តផងដែរ។ មួយវិញទៀតសម្តេចធិបតី ក៏បានលើកឡើងផងដែរថា មហាអនុតំបន់មេគង្គ នឹងទាញយកបាននូវអត្ថប្រយោជន៍បន្ថែម ធំ និងច្រើនទៀតពីដំណើរការឌីជីថលូបនីយកម្ម ដើម្បីពង្រឹង កិច្ចសហប្រតិបត្តិការ និងការអភិវឌ្ឍន៍សេដ្ឋកិច្ចរវាងបណ្តាប្រទេសជាសមាជិកទាំងអស់ផងដែរ។ ឯកឧត្តម ឯកឧត្តម តាន់ ហ្សង់ហ្វ្រង់ស្វ័រ ក៏បានលើលកឡើងផងដែរថា កិច្ចប្រជុំកំពូលមហាអនុតំបន់មេគង្គ (GMS) លើកទី៨ កិច្ចប្រជុំកំពូលយុទ្ធសាស្ត្រនៃកិច្ចសហប្រតិបត្តិការសេដ្ឋកិច្ចអាយ៉េយ៉ាវ៉ាឌី-ចៅប្រាយ៉ា-មេគង្គ (អេកម៉ិក) លើកទី១០ និងកិច្ចប្រជុំកំពូលកម្ពុជា-ឡាវ-មីយ៉ាន់ម៉ា-វៀតណាម (CLMV) លើកទី១១ជាដើមនោះគឺផ្តោតសំខាន់បំផុតគឺលើកកម្ពស់វិស័យសេដ្ឋកិច្ចរវាងប្រទេសផងខ្លួន និងបានជួយឲ្យសេដ្ឋកិច្ចកម្ពុជា ក៏ដូចជាទីផ្សារបស់កម្ពុជា កាន់តែល្អប្រសើរបន្ថែមទៀតតាមរយៈកិច្ចសហប្រតិបត្តិការខាងលើនេះ។ សូមបញ្ជាក់ថា នៅក្នុងអំឡុងពេលចូលរួមកិច្ចប្រជុំកំពូលនានាខាងលើនេះ នៅទីក្រុងគុនមិញប្រ ទេសចិននោះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាក៏បានឆ្លៀងឱកាសជួបសម្តែងការគួរ សម និងពិភាក្សាការងារមួយចំនួនជាមួយថ្នាក់ដឹកនាំប្រទេសជាមិត្តផងដែរ ហើយមិនតែប៉ុណ្ណោះ សម្តេចក៏បានអនុញ្ញាតិឲ្យថ្នាក់ដឹកនាំ និងតំណាងបណ្តាក្រុមហ៊ុនធំៗជាច្រើនរបស់ចិនចូលជួបពិភាក្សាការងារផង ដែរ៕អត្ថបទបាន ចក់

ក្រុមហ៊ុន Yunnan Investment Group មានបំណងពង្រីកការវិនិយោគបន្ថែមនៅកម្ពុជា

2024/11/07 06:41:24 pm        131
Facebook Telegram Linkin
ភ្នំពេញ ៖ នារសៀល ថ្ងៃទី៦ ខែវិច្ឆិកា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យ លោក Lu Xiaolong ប្រធានក្រុមហ៊ុន Yunnan Investment Group ចូលជួបសម្តែងការគួរសម និងពិភាក្សាការងារ នាឱកាសនៃការអញ្ជើញចូលរួមកិច្ចប្រជុំកំពូលមហាអនុតំបន់មេគង្គ (GMS) លើកទី៨ នៅថ្ងៃទី៦-៧ ខែវិច្ឆិកា ឆ្នាំ២០២៤ នៅទីក្រុងគុនមិញ ខេត្តយូណាន សាធារណរដ្ឋប្រជាមានិតចិន។ក្នុងឱកាសនៃជំនួប លោក Lu Xiaolong បានគោរពរាយការណ៍ជូនសម្ដេចបវរអធិបតីអំពីវឌ្ឍនភាព នៃដំណើរការវិនិយោគរបស់ក្រុមហ៊ុន លើអាកាសយានដ្ឋានអន្តរជាតិសៀមរាបអង្គរ ក្នុងរយៈពេល១ឆ្នាំកន្លងមក និងថ្លែងអំណរគុណដល់រាជរដ្ឋាភិបាលកម្ពុជា ដែលបានផ្តល់ការគាំទ្រដល់ក្រុមហ៊ុនផងដែរ។ លោក Lu Xiaolong ក៏បានជម្រាបសម្តេចបវរធិបតី អំពីបំណងនៃការពង្រីកការវិនិយោគរបស់ក្រុមហ៊ុន នៅកម្ពុជា បន្ថែមទៀត លើវិស័យទេសចរណ៍ និងថាមពលស្អាត។ ជាការឆ្លើយតប សម្តេចបវរធិបតី បានអរគុណចំពោះរបាយការណ៍វឌ្ឍនភាពរបស់ក្រុមហ៊ុនអាកាសយានដ្ឋានអន្តរជាតិសៀមរាប-អង្គរ ដែលមិនត្រឹមតែបម្រើដល់ការធ្វើដំណើរ និងវិស័យទេសចរណ៍ប៉ុណ្ណោះទេ ប៉ុន្តែក៏បានរួមចំណែកនៅក្នុងការលើកកម្ពស់វិស័យឧស្សាហកម្មអាកាសចរនៅកម្ពុជា ឱ្យក្លាយជាមជ្ឈមណ្ឌលអាកាសចរណ៍មួយក្នុងតំបន់ផងដែរ។ បន្ថែមពីនេះ សម្តេចបវរធិបតី ក៏បានគូសបញ្ជាក់អំពីវិធានការ និងគោលនយោបាយលើកទឹកចិត្តមួយចំនួន ដែលរាជរដ្ឋាភិបាលបានដាក់ចេញរួចហើយ និងគ្រោងដាក់ចេញបន្ថែមទៀត ដើម្បីលើកកម្ពស់វិស័យអាកាសចរណ៍ បង្កើនការតភ្ជាប់ជើងហោះហើរ និងទាក់ទាញភ្ញៀវទេសចរណ៍មកកម្ពុជាឱ្យបានច្រើនបន្ថែមទៀត។ ចំពោះបំណងពង្រីកការវិនិយោគរបស់ក្រុមហ៊ុន សម្ដេចបវរអធិបតីបានលើកទឹកចិត្តឱ្យ ក្រុមហ៊ុនបន្តពិភាក្សាជាមួយក្រសួងស្ថាប័នពាក់ព័ន្ធរបស់កម្ពុជា៕

កូរ៉េខាងត្បូង ប្រគល់សម្ភារៈបរិក្ខាពេទ្យជូនមនី្ទរពេទ្យកុមារជាតិ ដើម្បីចូលរួមចំណែកក្នុងការធ្វើឲ្យល្អប្រសើរនៅសេវាព្យាបាល

2024/11/07 05:04:51 pm        237
Facebook Telegram Linkin
ភ្នំពេញ ៖ ប្រទេសកូរ៉េខាងត្បូង ប្រគល់សម្ភារៈបរិក្ខារពេទ្យជូនដល់មនី្ទរពេទ្យកុមារជាតិ នៃក្រសួងសុខាភិបាល ដើម្បីចូលរួមចំណែកក្នុងការធ្វើឲ្យល្អប្រសើរ នៅសេវាព្យាបាលរបស់មនី្ទរពេទ្យ ក៏ដូចជាការជួយលើការថែទាំ និងព្យាបាលសុខុមាលភាពរបស់កុមារកម្ពុជា។​ក្នុងពិធីប្រគល់ ទទួលសម្ភារៈបរិក្ខាពេទ្យ នាព្រឹកថ្ងៃទី៧ ខែវិចិ្ឆកា ឆ្នាំ២០២៤នេះ លោកសាស្រ្តាចារ្យ ញឹប អង្គាបុស្ស នាយកមនី្ទរពេទ្យកុមារជាតិ សូមថ្លែងអំណរគុដល់លោក Sumi Kim CEO មនី្ទរពេទ្យ Daegu Fatima Hospital (ដេហ្គូ ហ្វាទីម៉ា ហោស៍ពីថល) នៃប្រទេសកូរ៉េខាងត្បូង និងលោកស្រី Insoo Kim Director of Fatima Ladies of charity និងគណៈប្រតិភូរបស់មនី្ទរពេទ្យ Fatima ទាំងអស់ ដែលបានអញ្ជើញមកមនី្ទរពេទ្យកុមារជាតិ ដែលបានផ្តល់ការយកចិត្តទុកដាក់លើការជួយចូលរួមចំណែកក្នុងការធ្វើឲ្យល្អប្រសើរនៅសេវាព្យាបាលរបស់មនី្ទរពេទ្យ ក៏ដូចជាការជួយលើការថែទាំ និងព្យាបាលសុខុមាលភាពរបស់កុមារកម្ពុជា តាមរយៈការផ្តល់ជំនួយជាសម្ភារៈ រួមមានៈ៖ ម៉ាស៊ីន Infat Incubator ចំនួន5គ្រឿង និងម៉ាស៊ីន Jaundice Treatment Set ចំនួន5គ្រឿង សម្ភារៈទាំងអស់នេះ នឹងត្រូវយកទៅថែទាំ និងព្យាបាលទារកឲ្យបានជាសៈស្បើយពីជំងឺជាច្រើន និងមានតម្លៃមិនអាចកាត់ថ្លៃបាន។ លោកសាស្រ្តាចារ្យ ញឹប អង្គាបុស្ស បានបន្តថា ការផ្តល់ម៉ាស៊ីនទាំងនេះពិតជាមានសារសំខាន់ណាស់សម្រាប់មន្ទីរពេទ្យកុមារជាតិ ក្នុងការជួយបង្កើនគុណភាពព្យាបាលជំងឺ និងថែរក្សាសុខភាពដល់កុមារ ក៏ដូចជាជួយកាត់បន្ថយអត្រាស្លាប់របស់ទារក ពិសេសទារកកើតមកមិនគ្រប់ខែ និងគ្រប់គីឡូអាចជួយឱ្យពួកគេមានសុខភាពល្អវិវត្តន៍ដូចទារកធម្មតាដែរ។ ព្រោះថាមន្ទីរពេទ្យកុមារជាតិ ជាមន្ទីរពេទ្យកុមារ ដ៏ធំតែងតែទទួលសង្គ្រោះ និងព្យាបាលបន្តកុមារដែលមានបញ្ហាកើតមិនគ្រប់ខែ និងបញ្ហាផ្សេងៗដែលបញ្ជូនមកពីតាមមន្ទីរពេទ្យរដ្ឋ និងពេទ្យឯកជនមួយចំនួន ប្រមាណ៨០នាក់ក្នុង១ថ្ងៃ។ សង្ឃឹមថា តាមរយៈជំនួយទាំងនេះនឹងជួយឱ្យមន្ទីរពេទ្យកាន់តែមានសមត្ថភាពខ្ពស់បន្ថែមទៀតក្នុងការជួយព្យាបាល និងសង្គ្រោះទារកកើតមកមិនគ្រប់ខែ ឬទារកកើតមកមានបញ្ហាផ្សេងៗពីកំណើត។ ជាមួយគ្នានោះដែរ លោកស្រី Insoo Kim Director of Fatima Ladies of charity មានអារម្មណ៍ភ្ញាក់ផ្អើល ដែលសង្កេតឃើញថាមនី្ទរពេទ្យកុមារជាតិ បានផ្តល់សេវាព្យាបាលជំងឺជូនទារកទើបនឹងកើត លោកស្រី សង្ឃឹមថាមនី្ទរពេទ្យ និងមានការសហការគ្នាសម្រាប់ឆ្នាំថ្មីខាងមុខបន្តទៀត ដើម្បីជួយដល់សុខភាព ប្រជាជនកម្ពុជា ឲ្យកាន់តែប្រសើរផងដែរ។ចុងក្រោយគណៈគ្រប់គ្រងនៃមន្ទីរពេទ្យកុមារជាតិ និងមន្ទីរពេទ្យដេហ្គូហ្វាទីម៉ា បានចុះអនុស្សារណយោគយល់គ្នា ដើម្បីធ្វើកិច្ចសហប្រតិបត្តិទៅលើផ្នែកវេជ្ជសាស្ត្រ និងបណ្តុះបណ្តាលធនធានមនុស្សរវាងមន្ទីរពេទ្យទាំងពីរផងដែរ៕អត្ថបទ រដ្ឋា

អតីតសកម្មជនបក្សប្រឆាំង បង្ហាញការសោកស្តាយចំពោះការជឿ និងបំផុសព័ត៌មានមិនពិតពីស្ថានភាពព្រំដែន

2024/11/07 04:55:42 pm        237
Facebook Telegram Linkin
អតីតសកម្មជនគណបក្សប្រឆាំនៅប្រទេសជប៉ុនលោក ហៃ វណ្ណា បានបង្ហាញការសោកស្តាយចំពោះការជឿ និងបំផុសព័ត៌មានមិនពិតពីស្ថានភាពព្រំដែនកន្លងមក។ថ្លែងប្រាប់អ្នកសារព័ត៌មាន បន្ទាប់ពីបានធ្វើដំណើរចុះពិនិត្យស្ថានភាពតាមបន្ទាត់ព្រំដែន និងការរស់នៅរបស់ប្រជាពលរដ្ឋរវាងប្រទេសកម្ពុជា-វៀតណាម ក្នុងស្រុកកែវសីមា ខេត្តមណ្ឌលគិរី ដែលក្រោមការសម្របសម្រួលពីឯកឧត្តម យូ សិរីវុឌ្ឍ បេសកជនពិសេសសម្តេចតេជោ ហ៊ុន សែន និងជាប្រធានក្រុមការងាររចលនាកសាងសមាជិកមូលដ្ឋានរាជធានី-ខេត្តនៃគណបក្សប្រជាជនកម្ពុជា នៅថ្ងៃទី៧ ខែវិច្ឆិកា ឆ្នាំ២០២៤ លោក ហៃ វណ្ណា បានសម្តែងការ​ភ្ញាក់ផ្អើល​ចំពោះការអភិវឌ្ឍ ​និងភាពរីកចម្រើនតាមបន្ទាត់ព្រំដែនដែល​ឆ្លុះបញ្ចាំង​ពីភាពវិជ្ជមាន និង​ផ្ទុយស្រឡះពីការបំភ្លៃរបស់ក្រុមប្រឆាំងនៅឯបរទេសដែលមិនបានធ្វើដំណើរដល់បន្ទាត់ព្រំដែន។អតីតសកម្មជនរូបនេះ បញ្ជាក់ថា ការចោទប្រកាន់លើបញ្ហាព្រំដែនរបស់ខ្លួនកន្លងមក ពាក់ព័ន្ធ នឹងកិច្ចសហប្រតិបត្តិការអភិវឌ្ឍតំបន់ត្រីកោណ (CLV-DTA) ​ជាការគួរឱ្យសោកស្តាយ ដោយ​សារមិនមានមូលដ្ឋាន ហើយក្តីបារម្ភនាពេលនោះ ត្រូវបានលាតត្រដាង​រឹតតែច្បាស់លាស់​តាមរយៈការជួប​ និងពន្យល់របស់រាជរដ្ឋាភិបាល។ជាមួយគ្នានេះ អតីតសកម្មជនគណបក្សប្រឆាំងរូបនេះ អះអាងថា រយៈពេល៩ឆ្នាំ​ដែល​រូបលោក​ប្រឡូក​កិច្ចការជាមួយគណបក្សប្រឆាំង ​គឺមិនដែល​ឃើញគណបក្សប្រឆាំង​ធ្វើ​នយោបាយ​ចង់រួមរួបគ្នានោះ ​ផ្ទុយទៅវិញ​គណប្រឆាំង​បានធ្វើនយោបាយមានតែសាចទឹក​ដាក់គ្នាតែប៉ុណ្ណោះ។យ៉ាងណាមិញ​អតីតសកម្មជនគណបណបក្សប្រឆាំងរូបនេះ ​សង្ឃឹម​ជឿជាក់ថា ​ទាំងអ្នក​មាន​និន្នាការស្រប ឬប្រឆាំង ត្រូវរួមគ្នា ដើម្បីធ្វើឲ្យប្រទេសជាតិតែរឹងមាំ ដោយសារ​ប្រទេសកម្ពុជា​មានប៉ូល២​ គឺប៉ូលទេសចរណ៍​វប្បធម៌ ​និងប៉ូលអេកូទេសចរណ៍។សូមជម្រាបថា ​ការធ្វើដំណើរទៅពិនិត្យតាមបន្ទាត់ព្រំដែនរបស់អតីតសកម្មជនគណបក្សប្រឆាំង លោក ហៃ វណ្ណា គឺជាលើកទី១ ក្នុងជីវិត​ ចាប់​តាំងពីអតីត​សកម្មជន​គណបក្សប្រឆាំង បានប្រឡូក​ជីវភាពនយោបាយរហូត​សម្រេចចិត្តចូលរួម​ជីវភាពនយោបាយជាមួយគណបក្សប្រជាជនកម្ពុជា ៕ អត្ថបទ សេក ឧត្តម ថត 

កម្ពុជា-ចិន បើកសម្ពោធជាផ្លូវការកម្មវិធី«ដំណើរភាពយន្តចល័តដ៏ឆ្នើម លើកទី៨»

2024/11/07 04:52:54 pm        216
Facebook Telegram Linkin
ភ្នំពេញ ៖ ពិធីសម្ពោធជាផ្លូវការកម្មវិធី“ដំណើរភាពយន្តចល័តកម្ពុជា-ចិនដ៏ឆ្នើម លើកទី៨“ ដែលនឹងចាក់បញ្ចាំងនៅរាជធានីភ្នំពេញ និងតាមបណ្តាខេត្តមួយចំនួនក្នុងព្រះរាជាណាចក្រកម្ពុជា, នៅរោងភាពយន្តលេជេន អូឡាំព្យ៉ា នារសៀលថ្ងៃ ទី៧ ខែវិច្ឆិកា ឆ្នាំ ២០២៤នេះ។​លោក ចេន ឆង (Chen Cong) អគ្គទីប្រឹក្សានៃស្ថានទូតសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា បានលើកឡើងថា ឆ្នាំ២០២៤នេះជា «ឆ្នាំនៃការផ្លាស់ប្តូរប្រជាជន និងប្រជាជនចិន និងកម្ពុជា» ដែលកំណត់រួមគ្នា ដោយលោក Xi Jinping ប្រធានរដ្ឋចិន និងសម្តេចធិបតី ហ៊ុន ម៉ាណែត នាយករដ្ឋមន្ត្រី កម្ពុជា ដែលជានិមិត្តសញ្ញាមួយក្នុងប្រវត្តិសាស្ត្រផ្លាស់ប្តូរប្រជាជន និងប្រជាជនរវាងប្រទេសទាំងពីរ។ ពីដើមឆ្នាំមក សកម្មភាពដ៏គួរអោយចាប់អារម្មណ៍នានា បានរៀបចំឡើងជាបន្តបន្ទាប់ដូចជា ៖ ពិធីចាប់ដំណើរការ«ឆ្នាំនៃការផ្លាស់ប្តូរប្រជាជន និងប្រជាជន ចិននិងកម្ពុជា» សកម្មភាព«រីករាយបុណ្យ ចូលឆ្នាំថ្មីចិន» កម្មវិធីបទសម្ភាសន៍ឈ្មោះ«BING BING YOU LI LE» វេទិកាធនាគារគំនិត និងការទូតសាធារណៈចិននិងកម្ពុជា។ កម្មវិធីវប្បធម៌«ទឹកតែ និងពិភពលោក» ពិព័រណ៍រូបថត«កម្ពុជា-ចិន ក្នុងស៊ុមតែមួយ» ការសន្ទនា រវាងយុវជនចិន និងកម្ពុជា ការផ្លាស់ប្តូរក្បាច់គុនចិននិងខ្មែរដូចជា «ការសម្តែងក្បាច់គុនសៅលីញ និងគុនល្បុក្កតោនៅអង្គរ» «ការសម្តែងក្បាច់គុនរួមគ្នាល្បុក្កតោ - សៅលីញ ហឺណាន-កម្ពុជា» ជាដើម ការផ្លាស់ប្តូរប្រជាជន និងប្រជាជនរវាងចិន និងកម្ពុជាកាន់តែញឹកញាប់។ មិត្តភាពរវាងចិននិងកម្ពុជា ចាក់ឬសយ៉ាងជ្រៅ ខណៈការផ្លាស់ប្តូរនៃប្រជាជន និងប្រជាជនបានដំណើរការរហូតមកមិនដែលអាក់ខាននោះទេ ។ ស្ថានទូតចិនប្រចាំនៅកម្ពុជា នឹងគាំទ្ររាល់សកម្មភាពផ្លាស់ប្តូរប្រជាជន និងប្រជាជនក្នុងគ្រប់វិស័យតាមទម្រង់ខុសៗគ្នា ដែលក្នុងនោះបូករួមទាំងការបង្កើនកិច្ចសហប្រតិបត្តិការលើវិស័យភាពយន្ត និងទូរទស្សន៍រវាងចិន និងកម្ពុជាផងដែរ។ឆ្លៀតក្នុងឱកាសនោះឯកឧត្តម ហាប់ ទូច រដ្ឋលេខាធិការប្រចាំការតំណាងលោកជំទាវបណ្ឌិតសភាចារ្យ រដ្ឋមន្រី្តក្រសួងវប្បធម៌ និងវិចិត្រសិល្បៈនៃព្រះរាជាណាចក្រកម្ពុជា បានថ្លែងថា ការរៀបចំព្រឹត្តិការណ៍ដំណើរភាពយន្តចល័តកម្ពុជា-ចិននេះ ពិតជាមានសារៈសំខាន់ ក្នុងការរួមចំណែក លើកកម្ពស់ទំនាក់ទំនងរវាងប្រជាជននិងប្រជាជននៃប្រទេសទាំងពីរ ឱ្យកាន់តែរីកចម្រើនថែមទៀត។ យើងដឹងហើយថា ទំនាក់ទំនងរវាងប្រជាជននិងប្រទេសយើងទាំងពីរ កម្ពុជា-ចិន មានតាំងពីសម័យកាល យូរលង់មក ហើយ។ ឈរលើមូលដ្ឋាននៃទំនាក់ទំនងជាប្រវត្តិសាស្រ្តនេះ ថ្នាក់ដឹកនាំនៃប្រទេសទាំងពីរ បាន រួមគ្នាប្រឹងប្រែងពូនជ្រំ ចំណង មិត្ត ភាព និងកិច្ច សហ ប្រតិបត្តិការទ្វេភាគី ឱ្យកាន់តែរឹង មាំ ថែមទៀត ជាលំដាប់លើគ្រប់វិស័យ រហូតឈានដល់កិច្ចសហប្រតិបត្តិការភាពជា ដៃគូ យុទ្ធសាស្ត្រ គ្រប់ ជ្រោងជ្រោយ។ ឯកឧត្តម រដ្ឋលេខាធិការ បានសង្កត់ធ្ងន់ថា ក្រោមគំនិតផ្តួចផ្តើម នៃយុទ្ធសាស្រ្ត ខ្សែក្រវ៉ាត់និងផ្លូវ ប្រទេសយើងទាំងពីរបានប្តេជ្ញាបន្ត ពង្រីក កិច្ច សហ ប្រតិបត្តិ ការលើវិស័យសំខាន់ៗជាច្រើន ក្នុងនោះ វិស័យវប្បធម៌ ក៏ត្រូវបានលើក កម្ពស់ ដែលរួមចំណែកដ៏សំខាន់ ជាស្ពានតភ្ជាប់ទំនាក់ទំនងរវាងប្រជាជននិងប្រជាជន រវាងសង្គម និងសង្គម ដែលជា មូលដ្ឋាន គ្រឹះ ក្នុងការកសាង សហគមន៍ ជោគ វាសនា រួម ដោយការរួមរស់ជាមួយគ្នាប្រកប ដោយ សុខសន្តិភាព និង ការ អភិវឌ្ឍ៕ អត្ថបទ រដ្ឋា

សម្ដេចធិបតី ហ៊ុន ម៉ាណែត៖ កម្ពុជាគាំទ្រកិច្ចប្រជុំកំពូលមហាអនុតំបន់ទន្លេមេគង្គលើកទី៨ ក្រោមមូលបទ «ឆ្ពោះទៅកាន់សហគមន៍កាន់តែប្រសើរ តាមរយៈការអភិវឌ្ឍដែលជំរុញដោយនវានុវត្តន៍»

2024/11/07 04:48:37 pm        155
Facebook Telegram Linkin
ភ្នំពេញ ៖ ក្នុងឱកាសអញ្ជើញថ្លែងសុន្ទកថា ក្នុងកិច្ចប្រជុំពេញអង្គ នៃកិច្ចប្រជុំកំពូលមហាអនុតំបន់ទន្លេមេគង្គលើកទី៨ ក្រោមមូលបទ «ឆ្ពោះទៅកាន់សហគមន៍កាន់តែប្រសើរ តាមរយៈការអភិវឌ្ឍដែលជំរុញដោយនវានុវត្តន៍» នៅខេត្តយូណាន សាធារណរដ្ឋប្រជាមានិតចិន នៅព្រឹកថ្ងៃទី៧ វិច្ឆិកា ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានបញ្ចាក់ថា កម្ពុជា គាំទ្រកិច្ចប្រជុំកំពូលមហាអនុតំបន់ទន្លេមេគង្គលើកទី៨ ក្រោមមូលបទ «ឆ្ពោះទៅកាន់សហគមន៍កាន់តែប្រសើរ តាមរយៈការអភិវឌ្ឍដែលជំរុញដោយនវានុវត្តន៍»។​ក្នុងឱកាសនោះសម្ដេចធិបតី បានបានកោតសរសើរដល់កិច្ចខិតខំប្រឹងប្រែងក្នុងការតាក់តែងយុទ្ធសាស្រ្ដ ស្ដីពីនវានុវត្តន៍សម្រាប់ការអភិវឌ្ឍអនុតំបន់មេគង្គឆ្នាំ២០២៣ និងស្វាគមន៍ចំពោះគំនិតផ្គួចផ្ដើម មូលនិធិនវានុវត្តន៍ត្តសម្រាប់អនុតំបន់មេគង្គ។សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានយល់ស្របតាមការវាយតម្លៃថា ប្រទេសក្នុងអនុតំបន់ទន្លេមេគង្គមានភាពចាំបាច់ក្នុងការពន្លឿនសកម្មភាព ជំរុញវឌ្ឍនភាព និងត្រូវកំណត់ដោះស្រាយបញ្ហាប្រឈមដែលកំពុងកើតមានឡើងនៅក្នុងអនុតំបន់ទន្លមេគង្គ។ក្នុងឱកាសនោះសម្ដេចធិបតី នាយករដ្ឋមន្រ្ដីបានបញ្ជាក់ថា សម្ដេចមានសេចក្ដីសោមនស្សដែលបានឃើញនូវវឌ្ឍភាពដែលគួរឱ្យគត់សម្គាល់ដែលបណ្ដាលក្រុមការងារ តាមវិស័យនៃកិច្ចសហប្រតិបត្តិការ និងការងារពាក់ព័ន្ធសម្រេចបាននៅក្នុងការអនុវត្តយុទ្ធសាស្រ្ដ និងផែនការសកម្មភាពនាពេលកន្លងទៅនេះ ចំពោះកិច្ចការងារមហាអនុតំបន់ទន្លេមេគង្គ។ ឯកឧត្តមបញ្ជាក់ថា កិច្ចប្រជុំកំពូលទាំងនេះបានពិនិត្យលើសមិទ្ធិផលដែលសម្រេចបាន និងកំណត់ទិសដៅ អនាគត សម្រាប់ការពង្រីកកិច្ចសហប្រតិបត្តិការ និងជំរុញបន្ថែមនូវទំនុកចិត្តទៅវិញទៅមក ក៏ដូចជា ពង្រឹងភាពជាដៃគូក្នុងចំណោមបណ្តាប្រទេសសមាជិក ដែលរួមចំណែកដល់ការអភិវឌ្ឍសង្គម-សេដ្ឋកិច្ច និងការលើកកម្ពស់សុខុមាលភាពរបស់ប្រជាជនក្នុងតំបន់ ព្រមទាំងបង្ហាញផងដែរអំពីសារៈសំខាន់ នៃសន្តិភាពប្រកបដោយនិរន្តភាព និងការអភិវឌ្ឍប្រកបដោយចីរភាពយូរអង្វែង ក៏ដូចជាការរួមរស់ដោយ សន្តិសហវិជ្ជមាន ក្នុងចំណោមប្រទេសសមាជិក៕

អាជ្ញាធរជាតិអប្សរា បញ្ចប់ការជួសជុលខ្លោងទ្វារខាងកើតនៃប្រាសាទប្រែរូប ផ្នែកខាងជើង

2024/11/07 04:40:45 pm        727
Facebook Telegram Linkin
ក្រុមការងារអាជ្ញាធរជាតិអប្សរា ​បន្តជួសជុលខ្លោងទ្វារជើង ផ្នែកខាងកើត របស់ប្រាសាទប្រែរូប ដំណាក់កាលទី២ សម្រេចបានប្រមាណ៩០ភាគរយ។ ការងារជួសជុលនេះ ដំណើរការតាំងពីពាក់កណ្តាលខែឧសភា ឆ្នាំ២០២៤ នឹងបញ្ចប់នៅ​ខែ វិច្ឆិកា ឆ្នាំ២០២៤ នេះ។លោក សូរ ប៉ោត បុរាណវិទូ និងគ្រប់គ្រងការដ្ឋានជួសជុលប្រាសាទប្រែរូប​ ឱ្យដឹងថា ស្ថានភាពនៃខ្លោងទ្វារខាងជើងផ្នែកខាងកើតរបស់ប្រាសាទ​ប្រែរូប ​បានខូចខាត និង​មានហានិភ័យ​ដល់សំណង់ ព្រមទាំងភ្ញៀវទេសចរមិនអាចដើរឆ្លងកាត់។ ដើម្បី​សង្គ្រោះ​ខ្លោងទ្វារនេះ​ឱ្យរឹងមាំ​ឡើងវិញ ក្រុមការងារជួសជុលពង្រឹងផ្នែកខាងក្នុងនៃស្លាបខាងជើង ​ផ្នែកខាងក្រៅផ្នែកខាងលិច និងផ្នែកខាងកើត​ ព្រមទាំងជួសជុល​ពង្រឹងរចនាសម្ពន្ធឥដ្ឋដែលខូចខាតធ្ងន់ធ្ងរ គ្មានស្ថិរភាព​នៅផ្នែកខាងលើនៃតួខ្លោងទ្វារ។ បិទបំពេញស្នាមប្រេះហែកការពារជម្រាបទឹក និងបន្ថែមរចនា​សម្ពន្ធមួយចំនួនសម្រាប់ភាពរឹងមាំយូអង្វែងដល់រចនាសម្ពន្ធខ្លោងទ្វារទាំងមូល។លោក សូរ ប៉ោត បញ្ជាក់ថា ​ការងារជួសជុលខ្លោងទ្វារខាងកើតប្រាសាទប្រែរូប ​ផ្នែកខាងជើង រួចរាល់ ​គឺរចនាសម្ពន្ធនៃសំណង់ខ្លោងទ្វារទាំងមូល នឹង​មានភាពរឹងមាំឡើងវិញ មានសុវត្ថិភាព​ទាំងខ្លោងទ្វារ ​ហើយភ្ញៀវទេសចរក៏អាចដើរចេញចូលទស្សនាតាម​ខ្លោងទ្វារទិសខាងកើត​ដ៏​សំខាន់នេះដោយសុវត្ថិភាព។អ្នកជំនាញរូបនេះរម្លឹកថា ​ការខូចខាតនៃរចនាសម្ពន្ធប្រាសាទប្រែរូប បណ្តាលមកពីការកង្វះការ​ថែទាំយូរអង្វែង ​មានដើមឈើនិងស្មៅដុះចាក់ឬស កំណកដី ​និងបណ្ដាលពីអាយុកាល​នៃ​សម្ភារសំណង់ អាកាសធាតុ ​ពិសេសទឹកភ្លៀងហូរជ្រាបចូលក្នុងប្រាសាទ ដែលធ្វើឱ្យរចនាសម្ពន្ធ​ចុះខ្សោយ ថ្មប្រាសាទងាយនឹងពុកផុយ។សូមបញ្ជាក់ថា កន្លងមកនៅប្រាសាទប្រែរូបក៏ធ្លាប់មានការជួសជុលនៅសម័យបារាំង និងក្រោយមកទៀត មានប្រទេសអ៊ីតាលីផង៕

ទឹកភ្លៀងជាង៦០លានម៉ែត្រត្រីគុណត្រូវបានប្រមូលទុកនៅតំបន់រមណីយដ្ឋានអង្គរនារដូវវស្សានេះ

2024/11/07 03:32:39 pm        195
Facebook Telegram Linkin
សៀមរាប ៖ ទោះបីស្ថានភាពទឹកភ្លៀងឆ្នាំនេះមានការអូសបន្លាយ និងមិនទៀងទាត់យ៉ាងណាក៏ដោយ ប៉ុន្តែអាជ្ញាធរជាតិអប្សរា បានរៀបចំប្រមែប្រមូលទឹកពេញអាងស្ដុកទឹកទាំងអស់ដែលមានក្នុង តំបន់រមណីយដ្ឋានអង្គរ។ តាមមន្រ្តីអាជ្ញាធរជាតិអប្សរា ទឹកភ្លៀងជាង៦០លានម៉ែត្រត្រីគុណ ឬម៉ែត្រគីប ត្រូវបានប្រមូលទុកនារដូវវស្សាឆ្នាំនេះ។ប្រធាននាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ នៃអាជ្ញាធរជាតិអប្សរា លោក ភឿន សុឃីម បានឱ្យដឹងថា គិតមកដល់ខែវិច្ឆិកា ការប្រមូលទឹកចូលអាងស្ដុកទឹកសំខាន់ៗនៅតំបន់រមណីយដ្ឋានអង្គរ គឺសម្រេចបាន១០០ភាគរយ ក្នុងនោះរាប់ទាំងបារាយណ៍តូចធំ កសិន្ធុទឹក អូរ និងប្រឡាយជាដើម។ ទឹកដែលប្រមូលបានទាំងនេះមានបរិមាណជាង៦០លានម៉ែត្រត្រីគុណ ដែលត្រៀមសម្រាប់ការប្រើប្រាស់នារដូវប្រាំងខាងមុខ ក្នុងនោះរាប់ទាំងការងារអភិរក្សប្រាសាទ បរិស្ថាន និងវិស័យកសិកម្មសម្រាប់ប្រជាពលរដ្ឋនៅតំបន់ជុំវិញប្រមាណ៧ពាន់ហិកតា។ អ្នកជំនាញបញ្ជាក់ថា បរិមាណនេះ គឺមានចំនួនប្រហាក់ប្រហែលនឹងឆ្នាំទៅមិញដែរ ដោយមិនបារម្ភពីកង្វះខាតទឹកនៅតំបន់ឡើយ។បើតាមការបញ្ជាក់ពីលោក ភឿន សុឃីម ការងារគ្រប់គ្រងទឹកនៅតំបន់រមណីយដ្ឋានអង្គរ កាន់តែល្អប្រសើរពីមួយឆ្នាំទៅមួយឆ្នាំ ក្រោយអាជ្ញាធរជាតិអប្សរាបានរៀបចំ និងស្ដារប្រព័ន្ធទឹកបុរាណក្នុងតំបន់រមណីយដ្ឋានអង្គរឡើងវិញចាប់ពីឆ្នាំ២០១២មក។ ជាងនេះទៅទៀត ក្រោមការគិតគូរដ៏វែងឆ្ងាយ និងភាពឈ្លាសវៃពីថ្នាក់ដឹកនាំអាជ្ញាធរជាតិអប្សរា ដោយយល់ពីសារសំខាន់ នៃការងារគ្រប់គ្រងទឹក ដែលធ្វើឱ្យប្រព័ន្ធគ្រប់គ្រងទឹកក្នុងតំបន់កាន់តែមានភាពជឿនលឿន និងមានប្រសិទ្ធភាពខ្ពស់។ តួយ៉ាង នាឆ្នាំ២០២៤នេះ សំណង់ទ្វារទឹកមួយចំនួនត្រូវបានស្ដារ និងជួសជុលឡើងវិញជាបន្តបន្ទាប់ ក្នុងបំណងដើម្បីធានាថា ការងារគ្រប់គ្រងទឹកនឹងមានវិសាលភាព កាន់តែទូលំទូលាយ និងពេញលេញ ដើម្បីបំពេញតម្រូវការក្នុងតំបន់រមណីយដ្ឋានអង្គរ។ចំពោះការប្រើប្រាស់ទឹកវិញ លោក ភឿន សុឃីម បញ្ជាក់ថា ទឹកមានសារសំខាន់នៅតំបន់ប្រាសាទដោយសារបុព្វបុរសសម័យមុនបានរៀបចំ និងកសាងប្រាសាទដោយមានគ្រឹះដីខ្សាច់ ដូច្នេះទើបកសាងកសិន្ធុជុំវិញដើម្បីបញ្ចូលទឹកឱ្យគ្រឹះរឹងមាំល្អ។ ប្រសិនគ្មានទឹក ប្រាសាទនឹងរងការដួលរលំ និងបាក់បែកខ្លាំង។ ក្រៅពីនេះ ទឹកក៏ជាបង្កើនសម្រស់ និងសោភ័ណភាពនៅតំបន់ប្រាសាទផង។ ទឹកក៏ជួយឱ្យដើមឈើលូតលាស់បានល្អ ទាក់ទាញទេសចរ និងជួយកាត់បន្ថយការកើនឡើងនៃរលកកម្ដៅខ្លាំងនារដូវប្រាំង៕

ឱកាសការងារប្រមាណជាង ៤ម៉ឺនកន្លែង បានប្រកាសអំពីតម្រូវការកម្លាំង​ពលកម្មនៅទូទាំងប្រទេស

2024/11/07 02:51:27 pm        689
Facebook Telegram Linkin
ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឱ្យ​ដឹងថា ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាល​វិជ្ជាជីវៈ បានប្រកាសពីឱកាសការងារក្នុងស្រុកចំនួន ៤៤៩,៣៥កន្លែង ក្នុងវិស័យសំខាន់ៗ ចំនួន៣ធំៗ នៅទូទាំងប្រទេស សម្រាប់សាធារណជន យុវជន ងាយស្រួលជ្រើសរើសចូលបម្រើការងារតាមជំនាញដែលខ្លួនមាន។  នៅក្នុងឆាណែលតេឡេក្រាម ចេញផ្សាយ នៅព្រឹកថ្ងៃទី៧ វិច្ឆិកា ឆ្នាំ២០២៤នេះ ឯកឧត្តមរដ្ឋលេខាធិការ បានបញ្ជាក់ថា ឱកាសការងារខាងលើនេះ មានក្នុងវិស័យដូចជា៖ វិស័យឧស្សាហកម្ម ចំនួន ៣២,១៥៥កន្លែង , វិស័យកសិកម្មចំនួន ៣,០៧៦កន្លែង និងសេវាកម្មចំនួន ៩,៧០៤កន្លែង ដែលត្រូវបានប្រកាសជ្រើសរើសនៅក្នុងបណ្តាខេត្តជាច្រើនដូចជា៖ ខេត្តកំពង់ស្ពឺ, ខេត្តកំពង់ឆ្នាំង, រាជធានីភ្នំពេញ, ខេត្តស្វាយរៀង, រតនគីរី, ក្រចេះ, តាកែវ, កណ្តាល, បន្ទាយមានជ័យ, ស្ទឹងត្រែង, កំពង់ចាម និងបណ្តាខេត្តផ្សេងៗទៀត។ ក្នុងនោះ តម្រូវការកម្លាំងពលកម្មមានដូចជា មន្រ្តីឥណទាន និងប្រាក់កម្ចី, អ្នកបញ្ជាម៉ាស៊ីនដេរ, អ្នកត្រួតពិនិត្យដំណើរការផលិតលោហធាតុ, យន្តការី និងអ្នកដំឡើងអគ្គិសនី និងបុគ្គលិកផ្នែកកត់ត្រាស្ថិតិ ហិរញ្ញវត្ថុ និងធានារ៉ាប់រង និងមុខរបរផ្សេងៗជាច្រើនទៀត។ ឯកឧត្តម កត្តា អ៊ន បានបញ្ជាក់បន្ថែមថា សម្រាប់យុវជន សិស្ស និស្សិត ដែលមានបំណងចង់ស្វែងរកការងារ ឬដាក់ពាក្យការងារ អាចទំនាក់ទំនងបានតាមរយៈទីភ្នាក់ងារជាតិមុខរបរ និងការងារ (NEA) តាមលេខទូរស័ព្ទ 1297 ឬ 1286 ឬតេលេក្រាម និង CoolApp លេខ 077 23 23 78 ដើម្បីចុះឈ្មោះ និងសម្ភាសភ្លាមៗ។ ឯកឧត្តម បានអំពាវនាវដល់ប្រជាពលរដ្ឋខ្មែរទាំងអស់ សូមចាប់យកឱកាសការងារដែលនៅក្បែរខ្លួន ហើយសូមកុំទៅធ្វើការងារដោយខុសច្បាប់នៅក្រៅប្រទេស ខណៈឱកាសការងារនៅក្នុងស្រុកត្រូវបានប្រកាសជាហូរហែរ និងជាច្រើនម៉ឺនកន្លែងជារៀងរាល់សប្តាហ៍ ដោយក្រសួងការងារ និងបណ្តុះបណ្តាលវិជ្ជាជីវៈ។ ឯកឧត្តមរដ្ឋលេខាធិការ បានលើកទឹកចិត្តជូនដល់ប្រជាពលរដ្ឋទាំងអស់ទៀតថា សូមធ្វើការពិចារណាអំពីឱកាសការងារនៅក្នុងស្រុកដែលកំពុងមានតម្រូវការជាខ្លាំងនៅឆ្នាំ២០២៤ និងឆ្នាំ២០២៥ខាងមុខ ខណៈការធ្វើការនៅក្នុងស្រុកនាពេលបច្ចុប្បន្នគឺទទួលបានអត្ថប្រយោជន៍ច្រើនដូចទៅនឹងបណ្តាប្រទេសជិតខាងផងដែរ ទី១.គឺប្រាក់ឈ្នួលសមរម្យ ទី២.កន្លែងការងារនៅក្បែរផ្ទះ និងទី៣.ការចំណាយទាបដែលអាចឱ្យបងប្អូនសន្សំសំចៃការចាយវាយជាប្រចាំបាន។ គិតចាប់ពីខែសីហា ឆ្នាំ២០២៣ ដល់ខែសីហា ឆ្នាំ២០២៤ ពោលគឺមួយឆ្នាំដំបូងនៃរាជរដ្ឋាភិបាលអាណត្តិទី៧ NEA សម្រេចបានសមិទ្ធិផលគួរឱ្យកត់សម្គាល់លើកិច្ចការស្វែងរកឱកាសការងារជូនពលរដ្ឋកម្ពុជា។ ទន្ទឹមនេះ NEA បានរៀបចំកម្មវិធី "វេទិកាការងារ" ជាប្រចាំដើម្បីបង្កើតកន្លែងជួបគ្នាដោយងាយស្រួលរវាងនិយោជក និងអ្នកស្វែងរកការងារ ក្នុងការដាក់ពាក្យ និងសម្ភាសការងារភ្លាមៗ ដែលរួមមាន៖ កិច្ចសម្ភាសការងារ វេទិកាការងារ និងពិព័រណ៍ការងារថ្នាក់ខេត្ត និងថ្នាក់ជាតិ ដែលក្រុមហ៊ុន សហគ្រាប់ធំៗជាច្រើនអាចចូលរួមដាក់តាំងបង្ហាញឱកាសការងារជូនសាធារណជន។ លើសពីនេះ NEA ក៏មានមជ្ឈមណ្ឌលការងារចំនួន ១៤ និងមជ្ឈមណ្ឌលការងារចល័តចំនួន ៧ ដើម្បីផ្តល់ព័ត៌មាន និងសេវាការងារដោយផ្ទាល់ ជូនយុវជន សិស្ស/និស្សិតនៅតាមគ្រឹះស្ថានអប់រំបណ្តុះបណ្តាល និងសាកលវិទ្យាល័យនានានៅទូទាំងប្រទេសផងដែរ៕

បណ្ដាញសង្គម

ព័ត៌មានថ្មីៗ

កីឡាករអេស្ប៉ាញសរសើរអ្នកចាំទី Courtois មុនប៉ះបែលហ្ស៊ិកនៅវគ្គ៨ក្រុមចុងក្រោយ World Cup
07/10/2026 10:07 AM
Facebook Telegram Linkin
កម្ពុជាអំពាវនាវឱ្យមានសកម្មភាពសកលកាន់តែខ្លាំងឡើងប្រឆាំងនឹងអំពើហិង្សាផ្លូវភេទក្នុងជម្លោះ
07/10/2026 10:07 AM
Facebook Telegram Linkin
មនុស្សជាង១០នាក់បានស្លាប់ក្នុងចំហេះព្រៃនៅភាគខាងត្បូងប្រទេសអេស្ប៉ាញ
07/10/2026 10:07 AM
Facebook Telegram Linkin
យោធាអាមេរិក ច្រានចោលការជាប់ពាក់ព័ន្ធបន្ទាប់ពីការផ្ទុះត្រូវបានលាន់ឮនៅក្នុងប្រទេសអ៊ីរ៉ង់
07/10/2026 10:07 AM
Facebook Telegram Linkin
មេដឹកនាំកូរ៉េខាងជើងថា មានតែការពង្រឹងកម្លាំងនុយក្លេអ៊ែររបស់ខ្លួនទេទើបអាចទប់ស្កាត់ការគំរាមកំហែងគ្រប់ប្រភេទបាន
07/10/2026 10:07 AM
Facebook Telegram Linkin
គួច សុកុម្ភៈ បង្ហាញគោលបំណងធំ ២ ក្រោយចូលរួមជាមួយ ​ISI​ តែ​មិន​ប្រាកដ​ជាទី​បញ្ចប់​នៃអាជីពរបស់ខ្លួន
07/10/2026 10:07 AM
Facebook Telegram Linkin
អាគារខណ្ឌរដ្ឋបាលជលផល​កែប សម្ពោធដាក់ឱ្យប្រើប្រាស់ជាផ្លូវការដើម្បីលើកកម្ពស់ជីវភាពប្រជានេសាទ
07/10/2026 10:07 AM
Facebook Telegram Linkin
Mbappe រកបានគ្រាប់ទី៨ នៅ World Cup ឆ្នាំនេះឱ្យបារាំងទម្លាក់ម៉ារ៉ុក ឡើងវគ្គពាក់កណ្តាលផ្តាច់ព្រ័ត្រ
07/10/2026 10:07 AM
Facebook Telegram Linkin
អាជ្ញាធរស៊ីរី៖ ក្រុមមានទំនាក់ទំនងជាមួយរដ្ឋអ៊ិស្លាមនៅពីក្រោយការបំផ្ទុះគ្រាប់បែកនៅក្រុងដាម៉ាសត្រូវបានចាប់ខ្លួន
07/10/2026 09:07 AM
Facebook Telegram Linkin
ប្រទេសអាល្លឺម៉ង់ នឹងទិញមីស៊ីល Tomahawk របស់សហរដ្ឋអាមេរិក
07/10/2026 09:07 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.