BTV NEWS

ឯកឧត្តម កែប ជុតិមា បង្ហាញពីផលប៉ះពាល់នៃជម្លោះព្រំដែនកម្ពុជា-ថៃ លើវិស័យអប់រំនិងវប្បធម៌ និងវឌ្ឍនភាពភាសាបារាំង ក្នុងមហាសន្និបាត APF នៅកាមេរូន

ឱកាសការងារជាង ៣ពាន់កន្លែងអត្ថប្រយោជន៍ ប.ស.ស. និងកម្មវិធី TVET ត្រូវបានផ្សព្វផ្សាយដល់មូលដ្ឋានក្នុងខេត្តសៀមរាប

ក្រសួងការងារ៖ ខេត្ត៤ជាប់សមុទ្រមានឱកាសការងារជិត ៣ពាន់កន្លែងកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ក្រសួងការងារ៖ រាជធានីភ្នំពេញមានឱកាសការងារជាង ២ម៉ឺនកន្លែង កំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ព័ត៌មានជាតិ

កម្ពុជាដាក់ឱ្យប្រើប្រាស់ “មជ្ឈមណ្ឌលសេវានាំចេញ” ដើម្បីពង្រីកសក្ដានុពលផលិតផលខ្មែរនិងជំរុញការនាំចេញ

ភ្នំពេញ៖ ក្រសួងពាណិជ្ជកម្ម បានសម្ពោធដាក់ឱ្យប្រើប្រាស់ជាផ្លូវការនូវ “មជ្ឈមណ្ឌលសេវានាំចេញ” (Export Service Center-ESC) ដើម្បីលើកកម្ពស់ដល់ការនាំចេញរបស់កម្ពុជា ក៏ដូចជាដើម្បីពង្រីកនូវសក្ដានុពលផលិតផលកម្ពុជា (Product of Cambodia) ទៅកាន់ទីផ្សារអន្តរជាតិ ដែលប្រព្រឹត្តទៅក្រោមវត្តមានរបស់ លោកជំទាវរដ្ឋមន្រ្តី ចម និម្មល។នៅក្រោយចប់កម្មវិធីសម្ពោធ នៅថ្ងៃទី៥ វិច្ឆិកា ឆ្នាំ២០២៤នេះ ក្រសួងពាណិជ្ជកម្ម បានឲ្យដឹងថា ការពង្រីកសក្ដានុពលផលិតផលជាតិទៅកាន់ទីផ្សារអន្តរជាតិ នឹងធ្វើឡើងតាមរយៈការជួយឱ្យអ្នកនាំចេញទទួលបាននូវការយល់ដឹងសំខាន់ៗ មានដូចជា៖ ការបណ្តុះបណ្តាលអំពីនីតិវិធីក្នុងការនាំចេញ និងឱកាសក្នុងការបង្កើតបណ្តាញជាមួយនឹងអ្នកជំនាញ និងអ្នកទិញសក្ដានុពលនៅក្នុងទីផ្សារគោលដៅ។ប្រភពដដែលនេះ បានលើកឡើងបន្តថា ការបង្កើតមជ្ឈមណ្ឌលសេវានាំចេញនេះ គឺជាគំនិតផ្តួចផ្តើមថ្មីរបស់ក្រសួងពាណិជ្ជកម្ម សហការជាមួយមជ្ឈមណ្ឌលសម្រាប់ជំរុញការនាំចូលពីប្រទេសកំពុងអភិវឌ្ឍន៍ (CBI) ក្នុងគោលបំណងលើកកម្ពស់ដល់ការនាំចេញរបស់កម្ពុជា និងជួយដល់ពាណិជ្ជករក្នុងការត្រៀមខ្លួនក្នុងការនាំចេញ ព្រមទាំងជួយជំរុញដល់ពាណិជ្ជករឱ្យមានទំនុកចិត្តក្នុងការប្រកួតប្រជែងលើទីផ្សារអន្តរជាតិផងដែរ៕

ក្រុមយុវជន ផលិតធ្យូងអនាម័យ ពីខេត្តកំពង់ស្ពឺ ឈ្នះជ័យលាភីក្នុងការប្រកួត ផែនការអាជីវកម្ម របស់ក្រសួងអប់រំ

កំពង់ស្ពឺ ៖ ក្រុមយុវជន ដែលមានអាជីវកម្មផលិតធ្យូងអនាម័យចេញពីកាកអំពៅ មកពីខេត្ត កំពង់ស្ពឺ បានក្លាយជា ជ័យលាភីលេខ ១ ក្នុងការប្រកួតប្រជែងផែនការអាជីវកម្មរបស់ក្រសួងអប់រំ យុវជន និងកីឡា។ ក្រុមយុវជនជ័យលាភីនេះ ជាសិស្សសិក្សាទើបបញ្ចប់ការសិក្សាថ្នាក់ទី ១១ ឡើងទី ១២ នៅវិទ្យាល័យ សម្ដេចតេជោ ហ៊ុនសែន រលាំងឈូក ខេត្តកំពង់ស្ពឺ។ ក្រោយឆ្លងកាត់ការចូលរួមប្រកួតប្រជែង ជម្រុះជាច្រើនខែមកនេះ ការប្រកួតប្រជែងផែនការអាជីវកម្ម បានឈានដល់វគ្គផ្ដាច់ព្រ័ត នៅថ្ងៃទី ៥ ខែវិច្ឆិកា ឆ្នាំ ២០២៤នេះ។ ការប្រកួតវគ្គផ្ដាច់ព្រ័ត ជាការប្រកួតរវាង ៥ក្រុមចុងក្រោយ ដែលមកពី ៥ខេត្តផ្សេងគ្នា ក្នុងនោះមានក្រុមយុវជន មកពីខេត្តកំពង់ស្ពឺ ខេត្តសៀមរាប ខេត្តប៉ៃលិន បន្ទាយមានជ័យ និងខេត្តរតនគិរី។ជាលទ្ធផលក្រោយចំណាយពេលពេញមួយព្រឹក ការប្រកួតប្រជែងបានបិទបញ្ចប់ ដោយរកឃើញថា ក្រុមយុវជន ផលិតធ្យូងអនាម័យពីកាកអំពៅ ខេត្តកំពង់ស្ពឺ បានជាប់ជ័យលាភីលេខ ១ ខណៈដែលក្រុមអាជីវកម្មក្រវាញ ខេត្តប៉ៃលិន ទទួលបានលេខ ២ រីឯក្រុមជីស្រកីដូងធម្មជាតិ មកពីខេត្តសៀមរាប ទទួលបានជ័យលាភីលេខ ៣។ជាក្ដីរីករាយផងដែរ សម្រាប់ក្រុមទាំងមូល ដែលបានចូលរួមប្រកួតប្រជែង ហើយទទួលបានជ័យលាភីលេខ១។ ពួកគេទទួលបានលើសពីជ័យជម្នះ នោះគឺជាចំណេះដឹងថ្មីៗ យល់ដឹងកាន់តែច្រើនពីការធ្វើអាជីវកម្ម ក៏ដូចជាទំនាក់ទំនង។ក្រុមជ័យលាភីលេខ ១ដែលមកពីខេត្តកំពង់ស្ពឺ បច្ចុប្បន្ននេះ ពួកគេកំពុងមានអាជីវកម្មដំណើរការស្រាប់ ដោយកំពុងផលិតធ្យូងអនាម័យពីកាកអំពៅផ្គត់ផ្គង់តម្រូវការអតិថិជន។ ជាលទ្ធភាពជាក់ស្ដែង ការផលិតរបស់ពួកគេនៅមានកម្រិត ពុំទាន់អាចផ្គត់ផ្គង់តម្រូវការទាំងស្រុងនោះទេ។ ជាគោលដៅ គឺពួកគេនឹងបន្តពង្រីកអាជីវកម្មមួយនេះ។ កម្មវិធីប្រកួតប្រជែងផែនការអាជីវកម្មនេះ ជាការរៀបចំដោយក្រសួងអប់រំ យុវជន និងកីឡា។ កម្មវិធីនេះ ប្រព្រឹត្តិទៅជារៀងរាល់ឆ្នាំ។ បច្ចុប្បន្នកម្មវិធីនេះ កំណត់យកបេក្ខជនចូលរួមប្រកួត ត្រឹមថ្នាក់វិទ្យាល័យ ដោយផ្តោតលើសិស្សថ្នាក់ទី ១០ និងសិស្សថ្នាក់ទី ១១។ អត្ថបទ៖គឹមហុក

អ្នកជំនាញអាជ្ញាធរជាតិអប្សរាកំពុងជួសជុលប្រាសាទទ្រមូង ឱ្យរឹងមាំឡើងវិញ

ក្រុមអ្នកជំនាញរបស់នាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា កំពុងអនុវត្តគម្រោងជួសជុលប្រាសាទទ្រមូង ដែលស្ថិតនៅខាងលិច នៃខ្លោងទ្វារតាកាវ ក្រុងអង្គរធំ ឱ្យរឹងមាំឡើងវិញ។ ប្រាសាទទ្រមូងគឺជាមន្ទីរពេទ្យបុរាណមួយ ក្នុងចំណោមមន្ទីរពេទ្យបុរាណចំនួន៤ របស់អតីតក្រុងអង្គរធំដែលបច្ចុប្បន្នកំពុងរងការខូចខាតខ្លាំង។បុរាណវិទូ និងជាប្រធានការងារការដ្ឋាន លោក ជា សារិទ្ធ ឱ្យដឹងថា ប្រាសាទទ្រមូង រងការខូចខាតខ្លាំងនៅត្រង់តួប៉មកណ្តាល ដោយមានការដួលរលំស្ទើរទាំងស្រុង គឺនៅសល់ទ្រង់ទ្រាយដើមប្រហែល២០-៣០ភាគរយប៉ុណ្ណោះ។ ចំណែក ថ្មចាប់ពីជញ្ជាំងរហូតទៅដល់ផ្នែកដំបូលវិញ បានរលំនិងធ្លាក់ចុះមកលើដីទាំងស្រុង ដោយនៅសេសសល់ តែស៊ុមទ្វារផ្នែកខាងមុខ ខឿនផ្នែកខាងត្បូង និងផ្នែកខាងកើត។ ចំណែក រចនាសម្ពន្ធផ្នែកខាងលិច និងខាងជើងក៏បាត់ថ្មអស់ប្រហែល៥០ភាគរយដែរ។ដោយសារតែប្រាសាទទ្រមូង រងការខូចខាតធ្ងន់ធ្ងរ ទើបបច្ចុប្បន្នក្រុមការងារ នៃអាជ្ញាធរជាតិអប្សរា ចាប់ផ្ដើមអនុវត្តគម្រោងជួសជុល ថែទាំឡើងវិញទៅតាមដំណាក់កាល។ ដំណាក់កាលទី១ គឺក្រុមការងារ ចាប់ផ្ដើមធ្វើសម្រង់ប្លង់បច្ចុប្បន្នរបស់ប្រាសាទធ្វើការវិភាគវិនិច្ឆ័យលក្ខណៈរបស់សំណង់ និងការខូចខាត ដើម្បីឈានដល់ការជួសជុល។ ចំណែកដំណាក់កាលទី២ គឺធ្វើការចុះបញ្ជីថ្មដែលកំពុងរាយប៉ាយ ដើម្បីកំណត់មុខងារ និងទីតាំងរបស់ថ្ម។ លោក ជា សារិទ្ធ បញ្ជាក់ថា តាមការចុះបញ្ជីកន្លងមក អាចឱ្យដឹងថា ថ្មដែលនៅរាយប៉ាយលើដី នាផ្នែកខាងលិចនៃប្រាសាទ គឺមានចំនួនរហូតទៅដល់៥០០ដុំ ផ្នែកខាងជើងមានចំនួន៦០០ដុំ។ ថ្មទាំងនោះ បានកំណត់អត្តសញ្ញាណរួចហើយមានដូចជា ថ្មដំបូល ថ្មជញ្ជាំង ថ្មខឿន ផ្តែរ សសរពេជ្រ និងទ្វារបញ្ឆោតរបស់ប្រាសាទជាដើម។ល។បច្ចុប្បន្ន ក្រុមការងារនៃអាជ្ញាធរជាតិអប្សរា កំពុងដំណើរការជួសជុលប្រាសាទទ្រមូងនេះ ដោយចាប់ផ្ដើមពីដំណាក់កាលនៃការពង្រឹងខឿន គ្រឹះរបស់តួប៉មកណ្តាល៕

គ្រឹះស្ថានឧត្ដមសិក្សាមិនដំឡើងថ្លៃសិក្សាឆ្នាំថ្មី ខណៈសិស្សកំពុងបន្តចុះឈ្មោះចូលរៀន

ស្របតាមសំណើរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា គ្រឹះស្ថានឧត្តមសិក្សាបានសម្រេចមិនដំឡើងថ្លៃសិក្សាក្នុងឆ្នាំ២០២៤-២០២៥។ ស្របពេលជាមួយគ្នានេះ សិស្សទើបប្រឡង បាក់ឌុបជាប់នេះ កំពុងបន្តទៅចុះឈ្មោះចូលរៀនទៅតាមគ្រឹះស្ថានឧត្តមសិក្សាទាំងឡាយផងដែរ ។ឯកឧត្តមបណ្ឌិត ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជា នៅថ្ងៃទី០៥ ខែវិច្ឆិកា នេះ បានប្រាប់BTVថា ស្របតាមអនុសាសន៍ណែនាំរបស់សម្ដេចធិបតី ហ៊ុន ម៉ាណែត ជានាយករដ្ឋមន្ដ្រីកម្ពុជា សមាជិកសមាគមគ្រឹះស្ថានឧត្តមសិក្សាកម្ពុជា បានសម្រេចឯកភាពគ្នាមិនដំឡើងថ្លៃសិក្សាសម្រាប់ឆ្នាំថ្មីនេះ និងពិនិត្យលទ្ធភាពបញ្ចុះតម្លៃសិក្សាជូនសិស្ស-និស្សិតទៅតាមលទ្ធភាពរៀងៗខ្លួន ដើម្បីបង្កលក្ខណៈងាយស្រួលជូនដល់សិស្ស-និស្សិតមានលទ្ធភាព អាចចុះឈ្មោះចូលរៀនបានគ្រប់ៗគ្នា ជាពិសេសអ្នកមកពីតាមបណ្តាខេត្ត។ ឯកឧត្តមបណ្ឌិតបានបន្តថា សម្រាប់តម្លៃសិក្សានៅក្នុងប្រទេសកម្ពុជាបែងចែកជាពីរប្រភេទរួមមាន៖ តម្លៃសិក្សាតាមកម្មវិធីអន្តរជាតិ ចាប់ពី៣ពាន់ដុល្លាឡើងទៅក្នុងមួយឆ្នាំ រៀនចាប់ពីថ្នាក់បរិញ្ញាបត្រឡើងទៅ និងតម្លៃសិក្សាកម្មវិធីជាតិចាប់ពីបីរយដុល្លាឡើងទៅក្នុងមួយឆ្នាំ រៀនចាប់ពីថ្នាក់បរិញ្ញាបត្រឡើងទៅ តាមជំនាញផ្សេងៗពីគ្នា។ បន្ថែមលើនេះ ឯកឧត្តមបណ្ឌិត បានលើកទឹកចិត្តដល់សិស្សទើបប្រឡងបាក់ឌុបជាប់ គួរទៅចុះឈ្មោះចូលរៀននៅតាមគ្រឹះស្ថានឧត្តមសិក្សា ដើម្បីអនាគតខ្លួនឯង និងប្រទេសជាតិ។សិស្សត្រៀមចូលរៀននៅវិទ្យាស្ថានវ៉ាន់ដា រាជធានីភ្នំពេញ បានលើកឡើងដែរថា បន្ទាប់ពីប្រឡងបាក់ឌុបជាប់ មានបំណងចង់ចូលរៀនជំនាញគណនី និងហិរញ្ញវត្ថុ ព្រោះស្រលាញ់ និងចូលចិត្តជំនាញនេះ។ លើសពីនេះ សិស្សទាំងអស់នោះ បានបង្ហាញអារម្មណ៍រីករាយ និងគាំទ្រនៅពេលគ្រឹះស្ថានឧត្តមសិក្សាមិនបានតម្លៃថ្លៃសិក្សាក្នុងឆ្នាំថ្មី ដែលជាការចូលរួមចំណែកកាត់បន្ថយការចំណាយលើថ្លៃសិក្សាបានមួយកំរិត និងជំរុញដល់ពួកគេមានឱកាសបានចូលរួមរៀនផងដែរ។គួរបញ្ជាក់ដែរថា រាជរដ្ឋាភិបាល នីតិកាលទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានចាត់ទុកការលើកកម្ពស់គុណភាពវិស័យអប់រំ និងកសាងមូលធនមនុស្ស ជាអាទិភាពដ៏សំខាន់ និងចាំបាច់បំផុត ដែលត្រូវបានកំណត់នៅក្នុងគោលនយោបាយជាអាទិភាពរបស់រាជរដ្ឋាភិបាល។ ក្នុងន័យនេះ រាជរដ្ឋាភិបាលបានផ្តល់ការគាំទ្រ និងដាក់ចេញនូវគោលនយោបាយអនុគ្រោះជាបន្តបន្ទាប់ សំដៅលើកទឹកចិត្ត និងជួយសម្រួលដល់វិស័យអប់រំ ជាពិសេសដើម្បីជួយសម្រាលបន្ទុកចំណាយដល់សកលវិទ្យាល័យ សាលារៀន ក៏ដូចជាឪពុកម្តាយ អ្នកអាណាព្យាបាល និងសិស្ស-និស្សិត៕ អត្ថបទ៖ ទូច សោភ័ណ

ទេសរដ្ឋមន្រ្តី លី ធុជ វាយតម្លៃខ្ពស់ចំពោះភាពជាដៃគូរវាងកម្ពុជា និងសហរដ្ឋអាមេរិក សម្រាប់វិស័យសកម្មភាពមីនមនុស្សធម៌ និងស្នើសុំអាមេរិកបន្តគាំទ្រដល់ការបោសសម្អាតគ្រាប់បែកចង្កោម ដែលជាកិច្ចការអាទិភាពទី២របស់កម្ពុជា

ភ្នំពេញ ៖ ឯកឧត្តមបណ្ឌិត លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន ខណះទទួលជួបពិភាក្សាជាមួយ លោកស្រី Bridgette L Walker ភារធាទីនៃស្ថានទូតសហរដ្ឋ អាមេរិកប្រចាំនៅកម្ពុជា ស្តីពីភាពជាដៃគូ និងកិច្ចសហប្រតិបត្តិការសកម្មភាពមីន ថ្ងៃទី០៥ ខែវិច្ឆិកា ឆ្នាំ២០២៤ នេះនៅទីស្នាក់ការអាជ្ញាធរមីន បានវាយតម្លៃខ្ពស់ចំពោះភាពជាដៃគូរវាងកម្ពុជា និងសហរដ្ឋអាមេរិក សម្រាប់វិស័យសកម្មភាពមីនមនុស្សធម៌ និងស្នើសុំអាមេរិកបន្តគាំទ្រដល់ការបោសសម្អាតគ្រាប់បែកចង្កោម ដែលជាកិច្ចការអាទិភាពទី២របស់កម្ពុជា។ក្នុងជំនួបនោះ ឯកឧត្តមទេសរដ្ឋមន្រ្តី លី ធុជ ក៏បានផ្តោតអំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា រួមជាមួយប្រទេសជាមិត្ត និងដៃគូអភិវឌ្ឍន៍ ក្នុងការដោះស្រាយបញ្ហាមីន និងសំណល់ជាតិផ្ទុះពីសង្រ្គាម និងកិច្ចសង្រ្គោះជនរងគ្រោះដោយសារមីននៅកម្ពុជា ។ ក្នុងនោះសហរដ្ឋអាមេរិក គឺជាប្រទេសម្ចាស់ជំនួយធំជាងគេដែលបានរួមចំណែកដល់វិស័យសកម្មភាពមីនមនុស្សធម៌ បន្ទាប់ពីរាជរដ្ឋា ភិបាលកម្ពុជា។ ទន្ទឹមនេះឯកឧត្តម បានវាយតម្លៃខ្ពស់ចំពោះភាពដៃគូ និងកិច្ចសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិ បាលអាមេរិក ព្រមទាំងបានទទួលស្គាល់ចំពោះការរួមចំណែករបស់សហរដ្ឋអាមេរិក អស់រយៈ ពេលជាង ៣០ ឆ្នាំ ពិតជាបានជួយសង្រ្គោះអាយុជីវិត និងផ្តល់ដីប្រកបដោយសុវត្ថិភាពជូនដល់ប្រជា ជនកម្ពុជាបានយ៉ាងច្រើន តាមរយៈវិស័យសកម្មភាពមនុស្សធម៌នេះ។ តាងនាម សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាប្រធានអាជ្ញាធរមីន ឯកឧត្តមទេសរដ្ឋមន្រ្តី លី ធុជ បានថ្លែង អំណរគុណចំពោះការគាំទ្ររបស់សហរដ្ឋអាមេរិក ព្រមទាំងបានស្នើសុំឱ្យសហរដ្ឋអាមេរិកបន្តការគាំទ្រដល់សកម្មភាពមីន ក្នុងនោះរួមមាន ការផ្តល់សម្ភារៈបោសសម្អាតមីននិងគ្រាប់ អាវការពារ និងការបណ្តុះបណ្តាលជំនាញបច្ចេកទេស ជាដើម។ ជាងនេះទៅទៀត ឯកឧត្តមទេសរដ្ឋមន្រ្តី លី ធុជ បានស្នើសុំឱ្យសហរដ្ឋអាមេរិកបង្កើនការគាំទ្រសម្រាប់ការបោសសម្អាតគ្រាប់បែកចង្កោម ដែលជាកិច្ចការអាទិភាពទី២របស់កម្ពុជា បន្ទាប់ពីការងារបោសសម្អាតមីន។ ជាមួយគ្នានោះ តាងនាមកម្ពុជាជាប្រធានអនុសញ្ញាអូតាវ៉ា ឯកឧត្តមទេសរដ្ឋមន្រ្តី លី ធុជ បានបញ្ជាក់ពីការគាំទ្ររបស់សហរដ្ឋ អាមេរិកក្នុងការជំរុញឱ្យសម្រេចបាននូវគោលដៅរបស់អនុសញ្ញា និងបានថ្លែងអំណរគុណចំពោះការគាំទ្ររបស់សហរដ្ឋអាមេរិកលើការអនុវត្តអនុសញ្ញាអូតាវ៉ា អស់រយៈពេលជាច្រើនឆ្នាំកន្លងមក ទោះ បីសហរដ្ឋ អាមេរិក មិនមែនជារដ្ឋភាគី។ លោកស្រី Bridgette L Walker បានសម្តែងនូវការអបអរសាទរចំពោះភាពជាប្រធានរបស់កម្ពុជាសម្រាប់អនុសញ្ញាអូតាវ៉ា និងការរួមចំណែករបស់កម្ពុជាដល់ការអនុវត្តអនុសញ្ញាអូតាវ៉ា ព្រមទាំងបានកោតសរសើរកម្ពុជាក្នុងភាពជាអ្នកដឹកនាំ និងជំនាញសម្រាប់វិស័យសកម្មភាពមីន។ ជាមួយគ្នានោះ លោកស្រី Bridgette L Walker បានបញ្ជាក់ថា សហរដ្ឋអាមេរិកប្តេជ្ញារក្សាកិច្ចសហប្រតិបត្តិការយ៉ាងជិតស្និទ្ធជាមួយកម្ពុជា និងគាំទ្រដល់ការងារបោសសម្អាតមីន និងសំណល់ជាតិផ្ទុះពីសង្រ្គាម៕ អត្ថបទ,ភារម្យ

សម្តេចធិបតី ហ៊ុន ម៉ាណែត អញ្ជើញដឹកនាំគណៈប្រតិភូកម្ពុជាចូលរួមកិច្ចប្រជុំកំពូលមហាអនុតំបន់មេគង្គលើកទី៨ និងកិច្ចប្រជុំពាក់ព័ន្ធ នៅប្រទេសចិន

ភ្នំពេញ ៖ នៅរសៀលថ្ងៃទី៥ ខែវិច្ឆិកា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញដឹកនាំគណៈប្រតិភូកម្ពុជា ចូលរួមកិច្ចប្រជុំកំពូលមហាអនុតំបន់មេគង្គ លើកទី៨ ក្រោមមូលបទ «ឆ្ពោះទៅកាន់សហគមន៍កាន់តែប្រសើរឡើង តាមរយៈការអភិវឌ្ឍដែលជំរុញដោយនវានុវត្តន៍» និងកិច្ចប្រជុំជាច្រើនទៀតនៅទីក្រុងគុនមិញប្រទេសចិន ដែលកិច្ចប្រជុំនេះនឹងប្រព្រឹត្តទៅរយៈពេលពីរថ្ងៃ គឺចាប់ពីថ្ងៃទី៦ដល់៧ខែវិច្ឆិកា ឆ្នាំ២០២៤នេះ។ ឯកឧត្តម មាស សុភ័ណ្ឌ ប្រធានក្រុមអ្នកនាំពាក្យនាយករដ្ឋមន្ត្រី បានអញ្ជើញផ្ដល់បទសម្ភាសន៍ដល់អ្នកសារព័ត៌មាន ស្ដីពី ដំណើរទស្សនកិច្ចរបស់សម្តេចធិបតី នាយករដ្ឋមន្រ្តី នៅរសៀលថ្ងៃទី៥ ខែវិច្ឆិកា ឆ្នាំ២០២៤នេះ នៅព្រលានយន្តហោះអន្តរជាតិភ្នំពេញថា ក្នុងឱកាសដំណើរចូលរួលកិច្ចប្រជុំនេះ សម្ដេចធិបតី នាយករដ្ឋមន្រ្ដី នឹងចូលរួមកិច្ចប្រជុំកំពូលមហាអនុតំបន់មេគង្គ (GMS) លើកទី៨ ក្រោមមូលបទ «ឆ្ពោះទៅកាន់សហគមន៍ កាន់តែប្រសើរឡើង តាមរយៈការអភិវឌ្ឍដែលជំរុញដោយនវានុវត្តន៍» កិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាយ៉េយ៉ាវ៉ាឌី-ចៅប្រាយ៉ា-មេគង្គ (អេកម៉ិក-ACMECS) លើកទី១០ ក្រោមមូលបទ «ឆ្ពោះទៅកាន់ការតភ្ជាប់ដោយរលូនសម្រាប់សមាហរណកម្មអនុតំបន់មេគង្គ និងកិច្ចប្រជុំកំពូលកិច្ចសហប្រតិបត្តិការ កម្ពុជា-ឡាវ-មីយ៉ាន់ម៉ា-វៀតណាម (CLMV) លើក១១ ក្រោមមូលបទ «មិត្តភាព និងសាមគ្គីភាពសម្រាប់សហគមន៍ប្រកបដោយភាពធន់ និងវិបុលភាព» ដែលនឹងប្រព្រឹត្តទៅនៅ ថ្ងៃទី ៦-៧ ខែវិច្ឆិកា ឆ្នាំ២០២៤ នៅទីក្រុងគុនមិញ ខេត្តយូណានសាធារណរដ្ឋប្រជាមានិតចិន។ឯកឧត្តម មាស សុភ័ណ្ឌ បានឱ្យដឹងថា ក្នុងឱកាសដំណើរទស្សនកិច្ចនេះ គណប្រតិភូអញ្ជើញអមដំណើរ សម្តេចធិបតី ក្នុងឱកាសចូលរួមកិច្ចប្រជុំនេះរួមមាន ឯកឧត្តមឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីការបរទេស និងសហប្រតិបត្តិការអន្តរជាតិ, ឯកឧត្តមទេសរដ្ឋមន្ត្រី ឈៀង យ៉ាណារ៉ា រួមនឹងរដ្ឋមន្ត្រី, មន្ត្រីជាន់ខ្ពស់នៃរាជរដ្ឋាភិបាល, ថ្នាក់ដឹកនាំមកពីសភាពាណិជ្ជកម្ម និងសមាគមឧកញ៉ាកម្ពុជាផងដែរ។ឯកឧត្តមបញ្ជាក់ថា កិច្ចប្រជុំកំពូលទាំងនេះនឹងពិនិត្យលើសមិទ្ធិផលដែលសម្រេចបាន និងកំណត់ទិសដៅ អនាគត សម្រាប់ការពង្រីកកិច្ចសហប្រតិបត្តិការ និងជំរុញបន្ថែមនូវទំនុកចិត្តទៅវិញទៅមក ក៏ដូចជា ពង្រឹងភាពជាដៃគូក្នុងចំណោមបណ្តាប្រទេសសមាជិក ដែលរួមចំណែកដល់ការអភិវឌ្ឍសង្គម-សេដ្ឋកិច្ច និងការលើកកម្ពស់សុខុមាលភាពរបស់ប្រជាជនក្នុងតំបន់ ព្រមទាំងបង្ហាញផងដែរអំពីសារៈសំខាន់ នៃសន្តិភាពប្រកបដោយនិរន្តភាព និងការអភិវឌ្ឍប្រកបដោយចីរភាពយូរអង្វែង ក៏ដូចជាការរួមរស់ដោយ សន្តិសហវិជ្ជមាន ក្នុងចំណោមប្រទេសសមាជិក។ ក្នុងអំឡុងពេលស្នាក់នៅក្នុងទីក្រុងគុនមិញ សម្តេចធិបតី គ្រោងនឹងមានជំនួបទ្វេភាគី ជាមួយថ្នាក់ដឹកនាំ និងធុរជនបរទេសផងដែរ៕

អាជ្ញាធររុះរើសំណង់មិនរៀបរយក្រោមស្ពានព្រែកក្ដាម ដើម្បីរៀបចំគម្រោងសួនច្បារ និងទីធ្លាហាត់ប្រាណសាធារណៈ

គណៈបញ្ជាការឯកភាពស្រុកពញាឮ ខេត្តកណ្តាល ដឹកនាំដោយលោក ថន សុវណ្ណា អភិបាលស្រុកពញាឮ នៅព្រឹកថ្ងៃទី៥ ខែ វិច្ឆិកា ឆ្នាំ២០២៤នេះ បានចុះរុះរើសំណង់មិនរៀបរយ និងរៀបចំសណ្តាប់ធ្នាប់ នៅក្រោមស្ពានព្រែកក្តាម ដើម្បីរៀបគម្រោង ធ្វើសួនច្បារ និងទីធ្លាហាត់ប្រាណដល់សាធារណៈ និងដើម្បីឲ្យក្លាយជាកន្លែងមានសោភ័ណភាព ខណៈកន្លែងស្ពានព្រែកក្តាមនេះ គឺជាតំបន់ប្រសបឆ្លងកាត់រវាងផ្លូវជាតិលេង៥ ទៅកាន់ផ្លូវជាតិលេខ៦។ថ្លែងប្រាប់អ្នកសារព័ត៌មាន ខណៈកំពុងចុះបញ្ជាផ្ទាល់នោះ លោក ថន សុវណ្ណា អភិបាលស្រុក ពញាឮ បានលើកឡើងថា ការដែលលោកបានដឹកកងកម្លាំងឯកភាពចុះរុះរើ និងរៀបចំ សណ្តាប់ធ្នាប់នេះ គឺរដ្ឋបាលស្រុកពញាឮបានធ្វើការជូនដំណឹងដល់អាជីវករជាច្រើន លើកច្រើនសារមកហើយ រួមទាំងរដ្ឋបាលខេត្តកណ្តាល ក៏បានចេញលិខិតជូនដំណឹង និងដាក់ឱសានវាទឲ្យពួកគាត់រុះរើដោយខ្លួនឯងក្នុងរយៈពេលមួយខែផងដែរ ហើយបងប្អូនអាជីវករភាគច្រើនបានសម្រេចរុះរើតាមការជូនដំណឹងរបស់អាជ្ញាធរ ប៉ុន្តែអាជីវករមួយចំនួនតូចទៀតគាត់នៅបន្តលក់ទើបអាជ្ញាធរសម្រេចចិត្តចចុះរុះរើដោយផ្ទាល់តែម្តង។បើតាមលោកអភិបាលស្រុកពញាឮ បានលើកឡើងផងដែរថា ក្រោយធ្វើការរុះរើ និងរៀបចំសណ្តាប់សាធារណៈឲ្យបានរៀបរយហើយនោះ តំបន់ប្រសបរវាងផ្លូវជាតិលេខ៥ ឆ្លងទៅកាន់ផ្លូវជាតិលេខ៦នេះ នឹងកាន់តែមានសោភ័ណភាពល្អ ហើយការធ្វើចរាចរណ៍ឆ្លងកាត់ក៏មានភាពងាយស្រួល និងមិនសូវ ព្រួយបារម្ភ និងរងហានិភ័យចំពោះគ្រោះថ្នាក់ចរាចរណ៍ផងដែរ។យ៉ាងណាក៏ដោយលោកអភិបាលស្រុក ក៏បានអំពាវនាវឲ្យបងប្អូនអាជីវករទាំងអស់ រួមទាំងបងប្អូន ដែលកំពុងរស់នៅតំបន់ប្រសប់នេះមានការយោគយល់ និងធ្វើការសហការជាមួយអាជ្ញាធរដើម្បីសោភ័ណភាពតំបន់បរិវេណស្ពានព្រែកក្តាម ខណៈតំបន់នេះ មានភ្ញៀវទេសចរណ៍ជាតិ និងអន្តរជាតិធ្វើដំណើរឆ្លងកាត់ជាច្រើន និងជារៀងរាល់ថ្ងៃនោះ៕អត្ថបទបាន ចក់

បណ្ដេញជនជាតិថៃ០៤នាក់ចេញពីកម្ពុជា ក្រោយរកឃើញថា លួចស្នាក់នៅធ្វើការងារខុសច្បាប់

បន្ទាយមានជ័យ៖ ជនជាតិថៃប្រុសស្រី ០៤នាក់ ត្រូវបានសមត្ថកិច្ចប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត សហការជាមួយកម្លាំងការិយាល័យអនុវត្តនីតិវិធី និងគ្រប់គ្រងកន្លែងត្រៀមបណ្ដេញចេញ នៃនាយកដ្ឋានស៊ើបអង្កេត និងអនុវត្តនីតិវិធី ធ្វើការបណ្តេញចេញពីប្រទេសកម្ពុជា បន្ទាប់ពី រកឃើញថា លួចស្នាក់នៅធ្វើការងារខុសច្បាប់ និងគ្មានលិខិតឆ្លងដែន ។ ពិធីប្រគល់-ទទួល និងបញ្ជូនចេញនូវជនជាតិថៃខាងលើ ធ្វើឡើងកាលពីថ្ងៃទី០៥ ខែវិច្ឆិកា ឆ្នាំ២០២៤ នៅនឹងប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត នៃខេត្តបន្ទាយមានជ័យ ដោយខាងកម្ពុជាដឹកនាំដោយលោកអនុសេនីយ៍ឯក ជន លីណា ឋានៈនាយរងផ្នែក និងខាងភាគីថៃដឹកនាំដោយលោកស្រីអនុសេនីយ៍ឯក ANUSARA THAINGTHAM ឋានៈនាយរងផ្នែក ប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិបានខ្លងលឹក ស្រុកអារញ្ញប្រាថេត ខេត្តស្រះកែវ ប្រទេសថៃ ។ ជនជាតិថៃដែលត្រូវបានបញ្ជូនចេញខាងលើ មានចំនួន០៤នាក់ ស្រី០១នាក់ (ខ្វះប្រកាសបណ្តេញចេញ) ពាក់ព័ន្ធបទល្មើសលួចស្នាក់នៅធ្វើការងារខុសច្បាប់ និងគ្មានលិខិតឆ្លងដែន ។ យោងតាមបញ្ជាលោកឧត្តមសេនីយ៍ត្រី ប្រធាននាយកដ្ឋានច្រកទ្វារទី១ ជនជាតិថៃខាងលើ ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត បានប្រថាប់ត្រាហាមចូលប្រទេសរយៈពេល០៥ឆ្នាំ ៕

មន្រ្ដីជាន់ខ្ពស់ក្រសួងសុខាភិបាល៖ ជំងឺមហារីក គឺជាឃាតករលាក់មុខដែលត្រូវតែប្រយុទ្ធយ៉ាងសកម្មជាបន្តទៅទៀត

ឯកឧត្តម ង៉ូវ កាង រដ្ឋលេខាធិការ តំណាងឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាលបានអះអាងថា ជំងឺមហារីក គឺជាឃាតករលាក់មុខ ដែលយើងត្រូវតែប្រយុទ្ធយ៉ាងសកម្មជាបន្តទៅទៀត ស្របពេលកន្លងទៅនេះយើងបានធ្វើកិច្ចការ នេះជាច្រើនមកហើយ បើទោះបីជាយើងមិនទាន់មានផែនការជាតិប្រយុទ្ធនឹងជំងឺមហារីកក៏ដោយចុះ។ការថ្លែងរបស់ឯកឧត្តម ង៉ូវ កាង យ៉ាងដូច្នេះ ក្នុងសិក្ខាសាលា ពិគ្រោះយោបល់លើសេចក្តីព្រាងផែនការជាតិប្រយុទ្ធនឹងជំងឺមហារីក ឆ្នាំ២០២៥-២០៣០ នាព្រឹកថ្ងៃទី៥ ខែវិច្ឆិកា ឆ្នាំ២០២៤នេះ។ឯកឧត្តមរដ្ឋលេខាធិការ បានបន្តថា សិក្ខាសាលានាថ្ងៃនេះធ្វើឡើងដើម្បីប្រមូលធាតុចូល ដែលជាផ្នែកមួយដ៏សំខាន់មុននឹងផែនការជាតិត្រូវបានដាក់ចេញឱ្យអនុវត្ត សម្រាប់ការប្រយុទ្ធនឹងជំងឺមហារីក ដែលជាឃាតកលាក់មុខឱ្យទទួលបានជោគជ័យ។បើតាមលោកជំទាវវេជ្ជបណ្ឌិត រ័ត្ន បូតា អគ្គនាយករងនៃមន្ទីរពេទ្យកាល់ម៉ែត និងជាទីប្រឹក្សាក្រសួងសុខាភិបាលបានបញ្ជាក់ថា នាពេលបច្ចុប្បន្នកត្តាកំណើនអាយុ ការវិវឌ្ឍន៍សកលភាវូបនីយកម្ម និងនគរូបនីយកម្ម រួមផ្សំនិងរបៀបរស់នៅដែលមិនមានសុខភាពល្អ បានធ្វើឱ្យជំងឺមិនឆ្លងកើនឡើងនៅទូទាំងពិភពលោក ហើយថា ក្នុងចំណោមករណីស្លាប់ទាំងអស់មាន ៦០ភាគរយ គឺបណ្តាលមកពីជំងឺមិនឆ្លងបួនប្រភេទ ដែលក្នុងនោះមានជំងឺមហារីកផងដែរ។ តាមការប៉ាន់ស្មាន ជារៀងរាល់ឆ្នាំមានអ្នកស្លាប់បណ្តាលមកពីជំងឺមហារីកប្រហែល ១០លាននាក់ ក្នុងនោះ៧៥ភាគរយ នៅប្រទេសមានចំណូលទាបនិងមធ្យម។ ដោយឡែកនៅប្រទេសកម្ពុជា ជំងឺមិនឆ្លង កំពុងតែកើនឡើង ដែលជាបញ្ហាប្រឈមផ្នែកសុខភាពសាធារណៈដ៏ធំមួយ។ ជំងឺមិនឆ្លង បានសម្លាប់ប្រជាជនកម្ពុជាជិត ៦០.០០០នាក់ជារៀងរាល់ឆ្នាំ ដែលស្មើនឹង៦៤ភាគរយ នៃករណីស្លាប់ទាំងអស់ ក្នុងឆ្នាំ២០១៨ ដែលក្នុងនោះជំងឺមហារីកជាមូលហេតុនៃការស្លាប់ប្រមាណ១៤ភាគរយ ហើយថាតាមការប៉ាន់ប្រមាណនៅកម្ពុជា មានករណីជំងឺមហារីកថ្មីចំនួន ១៩.៧៩៥នាក់ ក្នុងនោះ ១០.៦២៤ករណីជាស្ត្រី ហើយជំងឺមហារីកថ្លើមបានដើរតួចម្បងជាងគេ ក្នុងចំណោមជំងឺមហារីកទាំងអស់ ដែលកើតលើប្រជាជនទាំងពីរភេទ បន្ទាប់មកគឺ ជំងឺមហារីកសួត សុដន់ ពោះវៀនធំ និងមាត់ស្បូន។ ចំពោះស្ត្រី ជំងឺមហារីកដែលឈរជួរទី១ គឺមហារីកសុដន់ បន្ទាប់មកគឺមហារីកមាត់ស្បូន ថ្លើម ពោះវៀនធំ និងសួត។ ដើម្បីឆ្លើយតបនឹងបញ្ហានេះឱ្យកាន់តែមានប្រសិទ្ធភាព និងស័ក្តិសិទ្ធិភាព ក៏ដូចជាការចូលរួមអភិវឌ្ឍវិស័យសុខាភិបាលឱ្យឈានឆ្ពោះទៅការគ្របដណ្តប់សុខភាពជាសកលនៅកម្ពុជា ជាពិសេសក្រោមការដឹកនាំ និងចង្អុលបង្ហាញរបស់ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ក្រុមការងារក៏បានផ្តួចផ្តើមរៀបចំកសាងផែនការជាតិប្រយុទ្ធនឹងជំងឺមហារីកឆ្នាំ២០២៥-២០៣០ ដោយនៅក្នុងដំណើរការនៃការរៀបចំនេះការពិគ្រោះយោបល់ជាមួយភាគីពាក់ព័ន្ធនានា គឺជាជំហានមួយដែលមិនអាចខ្វះបានដើម្បីធានាបាននូវភាពល្អិតល្អន់ និងគុណភាព៕ អត្ថបទ រដ្ឋា

មន្ទីរសាធារណៈការខេត្តតាកែវ ជូនដំណឹង ស្តីពីការផ្អាកចរាចរណ៍រថយន្តដឹកទំនិញធុនធ្ងន់គ្រប់ប្រភេទលើកំណាត់ផ្លូវជាតិលេខ៣

តាកែវ៖ មន្ទីរសាធារណការ និងដឹកជញ្ជូនខេត្តតាកែវ នៅថ្ងៃអង្គារទី៥ ខែវិច្ឆិកាឆ្នាំ ២០២៤នេះ បានជូនដំណឹងស្ដីពីការផ្អាកចរាចរណ៍រថយន្តដឹកទំនិញធុនធ្ងន់គ្រប់ប្រភេទលើកំណត់ផ្លូវជាតិលេខ ៣ ក្នុងភូមិសាស្ត្រខេត្តតាកែវ ជាបណ្ដោះអាសន្ន។ សេចក្ដីជូនដំណឹងដដែល បានឱ្យដឹងទៀតថា ដោយសារស្ថានភាពទឹកភ្លៀងចុងឆ្នាំក្នុងរដូវវស្សាឆ្នាំ ២០១៤នេះ ចាប់ផ្ដើមធ្លាក់ក្នុងកម្រិតមធ្យមទៅច្រើនបង្កឲ្យមានជំនន់ទឹកភ្លៀង ដែលត្រូវមានការប្រុងប្រយ័ត្នខ្ពស់ និងអាចបង្កឲ្យមានផលប៉ះពាល់ដល់អាយុជីវិតមនុស្សសត្វ ។ ជាមួយគ្នានេះដែរ ជំនន់ទឹកភ្លៀងតែបាននឹងកំពុងជាន់ឡើងជាហេតុបណ្ដាលឲ្យលិចលង់នៅតាមកំណត់ផ្លូវជាតិលេខ ៣ ចន្លោះគីឡូម៉ែត្រលេខ ៤១ ដល់គីឡូម៉ែត្រលេខ ៤៣ ផ្សារត្រាំខ្នារ និងចន្លោះគីឡូម៉ែត្រលេខ ៥៣ ដល់គីឡូម៉ែតលេខ ផ្សារប៉ាំងសី ដែលស្ថានភាពបែបនេះ ធ្វើឲ្យផ្លូវថ្នល់ស្ពានមិនអាចទ្រ នឹងទម្ងន់រថយន្តដឹកទំនិញធុនធ្ងន់បាន ដូច្នោះដើម្បីបង្ការគ្រោះថ្នាក់ជាយថាហេតុ និងទប់ស្កាត់ការខូចខាតហេដ្ឋារចនាសម្ព័ន្ធផ្លូវថ្នល់ស្ពានមន្ទីរសាធារណការដឹកជញ្ជូនខេត្តតាកែវ សូមធ្វើការផ្អាកចរាចរណ៍រថយន្តទឹកទំនិញធ្ងន់ធ្ងន់គ្រប់ប្រភេទ ជាបណ្ដោះអាសន្នលើកំណត់ផ្លូវជាតិលេខ៣ចន្លោះគីឡូម៉ែត្រលេខ៤១ ដល់៤៣ និងចន្លោះគីឡូម៉ែត្រលេខ៥៣ ដល់៥៣ ជាបណ្ដោះអាសន្នរហូតមានសេចក្ដីជូនដំណឹងសារជាថ្មី។សេចក្ដីជូនដំណឹងខាងលើ ក៏បានស្នើឲ្យបងប្អូនប្រជាពលរដ្ឋជាម្ចាស់រថយន្តដឹកទំនិញធុនធ្ងន់ ទាំងអស់ ដែលធ្វើចរាចរណ៍ពីរាជធានីភ្នំពេញឆ្ពោះទៅកាន់ខេត្តកំពត និងសម្រាប់ទិសដៅខេត្តកំពតឆ្ពោះទៅរាជធានីភ្នំពេញ សូមធ្វើដំណើរវាងតាមផ្លូវជាតិលេខ ២២ ហួសទៅផ្លូវជាតិលេខ ២ ស្តុបអង្គតាសោមក្រុងដូនកែវ ឬវាងទៅតាមផ្លូវជាតិលេខ ៤១ ជាបណ្ដាះអាសន្នសិន៕

បណ្ដាញសង្គម

ព័ត៌មានថ្មីៗ

កងកម្លាំងអ៊ុយក្រែនប្រាប់ថា បានវាយប្រហារនាវាដឹកប្រេងរុស្ស៊ី ២១គ្រឿង នៅសមុទ្រ Azov

ការឆ្លងជំងឺ Ebola កើនឡើងដល់ជាង ១.៨០០ករណី នៅកុងហ្គោ ខណៈវីរុសរាលដាលដល់ខេត្តទី៤

អ៊ីរ៉ង់បានតបធ្ងន់ៗទៅលោក Trump វិញ បន្ទាប់ពីលោកទទូចថា បទឈប់បាញ់គឺចប់ហើយ

ក្រសួងការងារ៖ ខេត្តស្វាយរៀងមានឱកាសការងារជាង ២ពាន់កន្លែងកំពុងរង់ចាំអតីតពលករត្រឡប់មកពីថៃ និងអ្នកកំពុងស្វែងរកការងារធ្វើ

ជប៉ុនបាញ់បង្ហោះ និងចុះចតរ៉ូកែតដែលអាចប្រើប្រាស់ឡើងវិញបានដោយជោគជ័យ

មនុស្សយ៉ាងហោចណាស់ ១០នាក់រងរបួស ខណៈរុស្ស៊ីវាយប្រហារទីក្រុងគីវ ដោយមីស៊ីល

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877