BTV NEWS

សម្តេចធិបតីនាយករដ្ឋមន្ត្រី ផ្តល់ស្ពានបេតុងចំនួន១ កន្លែង ប្រវែង ៩០ ម៉ែត្រ ជូនដល់ប្រជាពលរដ្ឋនៅស្រុកជីក្រែង ខេត្តសៀមរាប

កម្ពុជាតែងឈរលើគោលគំនិតសន្ដិភាពនិយម ព្រោះកម្ពុជាធ្លាប់ឆ្លងកាត់សង្គ្រាមជាង៣ទសវត្សរ៍ហើយ

ក្រសួងការងារ បន្តនាំយកឱកាសការងារជាង ១ម៉ឺនកន្លែង និងអត្ថប្រយោជន៍ ប.ស.ស. ព្រមទាំងកម្មវិធីបណ្តុះបណ្តាលជំនាញ TVET ដល់ពលរដ្ឋខេត្តពោធិ៍សាត់

ប្រមុខការពារជាតិរំឭកខ្មែរគ្រប់រូបរួបរួមគ្នាជាធ្លុងមួយក្រោកឡើងលើកតម្កើងកិត្យានុភាពជាតិ និងរួមគ្នាការពារជាតិទោះត្រូវលះបង់ក្នុងតម្លៃណាក៏ដោយ

ព័ត៌មានជាតិ

រដ្ឋបាលខេត្តបាត់ដំបងណែនាំឱ្យរុះរើស្លាកផ្សព្វផ្សាយគ្រឿងស្រវឹងគ្រប់ប្រភេទ

រដ្ឋបាលខេត្តបាត់ដំបងនៅថ្ងៃទី២២ ខែកក្កដា ឆ្នាំ២០២៤ បានណែនាំដល់អភិបាលក្រុង-ស្រុកទាំង១៤ឱ្យបន្តការផ្សព្វផ្សាយ ការអប់រំ និងរុះរើស្លាកផ្សព្វផ្សាយគ្រឿងស្រវឹងគ្រប់ប្រភេទតាំងបង្ហាញជាសាធារណៈ ដែលគ្មានច្បាប់អនុញ្ញាត។ តាមរយៈលិខិតរបស់រដ្ឋបាលខេត្តបាត់ដំបង បានឱ្យដឹងថាក្នុងកិច្ចប្រជុំគណៈបញ្ញាការឯកភាពរដ្ឋបាលខេត្តបាត់ដំបង នាថ្ងៃទី១០ ខែកក្កដា ឆ្នាំ២០២៤ រដ្ឋបាលខេត្តបានណែនាំឱ្យរដ្ឋបាលក្រុង ស្រុកទាំង១៤ ធ្វើការផ្សព្វផ្សាយ អប់រំ ណែនាំ និងរុះរើស្លាកផ្សព្វផ្សាយគ្រឿងស្រវឹងគ្រប់ប្រភេទតាំងបង្ហាញជាសាធារណៈ ដែលគ្មានច្បាប់អនុញ្ញាត តាមបណ្តា ក្រុង ស្រុក ក្នុងភូមិសាស្ត្រខេត្តបាត់ដំបង ដើម្បីចូលរួមចំណែកលើកកម្ពស់សោភ័ណភាព របៀបរៀបរយ និងសណ្តាប់ធ្នាប់ នៅតាមទីសាធារណៈ និងតាមដងផ្លូវនានា។ រដ្ឋបាលខេត្តបញ្ជាក់ថា កន្លងមកមានក្រុង ស្រុកមួយចំនួនបាននិងកំពុងអនុវត្តតាមការណែនាំ របស់រដ្ឋបាលខេត្ត តែមានស្រុកមួយចំនួនទៀត មិនទាន់បានអនុវត្តនៅឡើយទេ។ ទន្ទឹមនេះ រដ្ឋបាលខេត្តសូមរំលឹកដល់ លោកលោកស្រី អភិបាលនៃ គណៈអភិបាលក្រុង-ស្រុកទាំង១៤ ឱ្យអនុវត្តនូវខ្លឹមសារនៃកិច្ចប្រជុំគណៈបញ្ជាការឯកភាព រដ្ឋបាលខេត្ត ឱ្យបានម៉ត់ចត់ និងតឹងរឹងបំផុត ហើយសូមសម្រេចកិច្ចការនេះឱ្យបានរួចរាល់យ៉ាងយូរបំផុតត្រឹមថ្ងៃទី៣១ ខែសីហា ឆ្នាំ២០២៤ និងរាយការណ៍ជាលាយលក្ខណ៍អក្សរមករដ្ឋបាលខេត្ត។រដ្ឋបាលខេត្តសង្កត់ធ្ងន់ថា អាស្រ័យដូចបានជម្រាបជូនខាងលើ សូម លោក លោកស្រី អភិបាលនៃគណៈអភិបាលក្រុង-ស្រុកទាំង១៤ ចាត់ចែងអនុវត្តដោយស្មារតីទទួលខុសត្រូវ៕

អគ្គលេខាធិការរង UN ធ្វើទស្សនកិច្ចនៅទីតាំងសាលាហ្វឹកហ្វឺនរក្សាសន្តិភាព ក្នុងខេត្តកំពង់ស្ពឺ

នៅថ្ងៃទី២៣ ខែកក្កដានេះ ឯកឧត្តម អាទល់ ខារ៉េ (Atul KHARE) អគ្គលេខាធិការរង អង្គការសហប្រជាជាតិ UN ទទួលបន្ទុកផ្នែកទ្រទ្រង់ប្រតិបត្តិការរក្សាសន្តិភាព បានអញ្ជើញបំពេញទស្សនកិច្ចនៅទីតាំងសាលាហ្វឹកហ្វឺនរក្សាសន្តិភាព នៅស្រុកភ្នំស្រួច ខេត្តកំពង់ស្ពឺ។នាយឧត្តមសេនីយ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាពថ្លែងថា សាលាហ្វឹកហ្វឺនរក្សាសន្តិភាព PKO នៅខេត្តកំពង់ស្ពឺ គឺជាទីតាំងហ្វឹកហ្វឺនធំមួយ ដែលជាទូទៅគ្រប់កងកម្លាំងរក្សាសន្តិភាពទាំងអស់ត្រូវធ្វើការហ្វឹកហ្វឺនឲ្យមានជំនាញវិជ្ជាជីវៈច្បាស់លាស់ មុននឹងធ្វើការចុះចាត់បញ្ជូនចេញបំពេញបេសកកម្មថែរក្សាសន្តិភាព UN នៅបណ្តាប្រទេសមានជម្លោះសង្គ្រាមតាមសំណើរ UN។នៅក្នុងដំណើរបំពេញទស្សនៈកិច្ចសាលា PKO នោះ ឯកឧត្តម អាទល់ ខារ៉េ បានទស្សនា គ្រឿងចក្រធុនធំត្រៀមបំរុង បញ្ជូនទៅតំបន់បេសកកម្មរបស់ UN ទស្សនាទីលានធ្វើលំហាត់ហ្វឹកហ្វឺនដោះមីនកម្ទេចគ្រឿង និងថ្នាក់រៀនរបស់កងកម្លាំងជាដើម។ ឯកឧត្តម អាទល់ ខារ៉េ ថ្លែងថា តាមរយ:ការចុះទស្សនកិច្ចសាលាហ្វឹកហ្វឺន PKO នេះបង្ហាញថា កម្ពុជា មានការត្រៀមបានល្អប្រសើរ គ្រប់កងកម្លាំងបានធ្វើលំហាត់ហ្វឹកហ្វឺនជំនាញវិជ្ជាជីវៈច្បាស់លាស់ គោរពវិន័យមានការទទួលខុសត្រូវខ្ពស់ មានភាពអង់អាចក្លាហាន និងមានការតាំងចិត្តខ្ពស់ មុននឹងចាត់បញ្ជូនកងកម្លាំងថែរក្សាសន្តិភាពកម្ពុជាចេញបំពេញបេសកកម្មថែរក្សាសន្តិភាព UN ។ក្នុងឱកាសនោះ ឯកឧត្តមអគ្គលេខាធិការរង UN បានថ្លែងកោតសរសើរថា កម្ពុជា មានការត្រៀមខ្លួនបានល្អប្រសើរ ការធ្វើជាម្ចាស់ផ្ទះរៀបចំវគ្គហ្វឹកហ្វឺនស្តីពី កម្មវិធីភាពជាដៃគូត្រីភាគីកម្ពុជា សាធារណរដ្ឋកូរ៉េ និង UN នៅក្នុងខែវិច្ឆិកា ឆ្នាំ២០២៤។ ឯកឧត្តមបន្តថា ការរៀបចំវគ្គហ្វឹកហ្វឺនត្រីភាគី កម្ពុជា ជប៉ុន UN នៅដើមឆ្នាំ២០២៥ ដែលសកម្មភាពនេះ បញ្ជាក់ថា កម្ពុជាស្ថិតនៅលើគន្លងផ្លូវដ៏ប្រសើរ ដែលចាកចេញពីប្រទេសធ្លាប់ទទួលបេសកកម្មរក្សាសន្តិភាពរបស់ UN មកជាប្រទេសផ្តល់កងកម្លាំងរក្សាសន្តិភាពផង និងផ្តល់ការបណ្តុះបណ្តាលចែករំលែកបទពិសោធន៍ជូនកងទ័ពរក្សាសន្តិភាពបណ្តាប្រទេសផ្សេងៗ ទាំងផ្នែកយោធាប្រយុទ្ធការពារ ផ្នែកពេទ្យ និងគិលានុបដ្ឋាយិកា និងកងទ័ពបោសសម្អាតមីន ឱ្យកាន់តែមានសមត្ថភាព និងប្រសិទ្ធភាពជាដើម។សូមបញ្ជាក់ថា រយៈពេល១៨ឆ្នាំមកនេះ កម្ពុជាបានបញ្ជូនកងកម្លាំងរក្សាសន្តិភាពបំពេញបេសកកម្មថែរក្សាសន្តិភាព UN សរុប ៩៥៧៩នាក់ ក្នុងនោះ នារី ៨១៨ នាក់ ទៅកាន់ប្រទេសចំនួន១០ ដែលមាន១២បេសកកម្ម។ បច្ចុប្បន្ន កម្ពុជា មានកងកម្លាំងមួកខៀវ ប្រមាណ ៦២៧ នាក់ បាននិងកំពុងបំពេញបេសកកម្មតាមបណ្តាប្រទេសកំពុងមានជម្លោះសង្គ្រាមចំនួន៤ រួមមាន៖ ស៊ូដង់ខាងត្បូង លីបង់ អាហ្វិ្រកកណ្តាល និងសាធារណរដ្ឋប្រជាធិបតេយ្យកុងហ្គោ៕អត្ថបទ ស៊ុម សុខជា

អបអរសាទរ! កូនប្រុសសម្ដេចធិបតី ប្រឡងនៅសិង្ហបុរី បានមេដាយប្រាក់មួយ និងសំរឹទ្ធមួយ បន្ថែមទៀត

ភ្នំពេញ៖ តាមរយៈហ្វេសប៊ុកផ្លូវការរបស់សម្ដេចអគ្គមហាសេនាបតីតេជោ ហ៊ុន សែន បានបង្ហាញការអបអរសាទរដល់ ចៅប្រុសរបស់សម្ដេច គឺកូនប្រុសរបស់សម្ដេចធិបតី ហ៊ុន ម៉ាណែត ដែលទើបទទួលបាន មេដាយប្រាក់មួយ និងសំរឹទ្ធមួយ បន្ថែមទៀត ក្នុងការប្រឡងនៅប្រទេសសិង្ហបុរី។សម្ដេចតេជោ បានសរសេរថា៖ «ចៅ រិទ្ធសិទ្ធ ប្រឡងនៅសិង្ហបុរី បានមេដាយប្រាក់មួយ និងសំរិទ្ធមួយ។ ខុសពីនៅឌូបៃដែលចៅសិទ្ធរៀននៅមតេយ្យតែត្រូវប្រឡង ជាមួយសិស្សថ្នាក់ទី១។ លើកនេះ ចៅសិទ្ធត្រូវប្រឡងជាមួយសិស្សដែលមានកម្រិងខ្ពស់ជាង»៕

ពលរដ្ឋរស់នៅអមតាមគម្រោងព្រែកជីកហ្វូណនតេជោបន្តគាំទ្រ ខណៈពិធីបើកការដ្ឋានខិតជិតមកដល់

ប្រជាពលរដ្ឋរស់នៅអមនឹងគម្រោងព្រែកជីកហ្វូណនតេជោ បង្ហាញពីការគាំទ្រផុសផុល ខណៈពិធីបើកការដ្ឋានជាផ្លូវការនៅថ្ងៃទី៥ ខែសីហា ខាងមុខនេះ កាន់តែខិតជិតមកដល់។ស្របពេលពិធីបើកការដ្ឋានគម្រោងព្រែកជីកហ្វូណនតេជោ នៅសល់រយៈពេលតែជាង១០ថ្ងៃទៀតប៉ុណ្ណោះ ប្រជាពលរដ្ឋរស់នៅឃុំសំរោងធំ ស្រុកកៀនស្វាយ ខេត្តកណ្តាល ក្បែរនឹងទីតាំងត្រៀមពិធីបើការដ្ឋាននោះ បានប្រាប់ BTV ឱ្យដឹងនៅថ្ងៃទី២៣ ខែកក្កដា ឆ្នាំ២០២៤ថា ក្នុងនាមប្រជាពលរដ្ឋកម្ពុជាពិតជាមានការពេញចិត្តជាខ្លាំងចំពោះសមិទ្ធផលដ៏មានសារៈសំខាន់ និងជាប្រវត្តិសាស្រ្តសម្រាប់កម្ពុជាដែលមិនធ្លាប់មានពីមក។ជាមួយនឹងសមិទ្ធផលជាប្រវត្តិសាស្រ្តនេះ ប្រជាពលរដ្ឋ លើកឡើងថា ការគិតគូររបស់សម្តេចតេជោ ហ៊ុន សែន អតីតនាយករដ្ឋមន្រ្តី ពិតជាមានអត្ថប្រយោជន៍ដល់ជាតិ ជាពិសេសធ្វើឱ្យប្រទេសកម្ពុជាបង្កើតបានព្រែកជីកមួយដ៏យូរអង្វែង។សូមជម្រាបថា គម្រោងព្រែកជីកហ្វូណនតេជោ ត្រូវបានសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីប្រកាសពិធីបើកការដ្ឋាននៅថ្ងៃទី៥ ខែសីហា ឆ្នាំ២០២៤ខាងមុខនេះ។ គម្រោងនេះត្រូវបានមជ្ឈដ្ឋានក្នុង និងក្រៅប្រទេសបន្តគាំទ្រយ៉ាងពេញទំហឹង ដើម្បីឱ្យគម្រោងនេះក្លាយជាផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់ ដោយតភ្ជាប់ផ្លូវទឹករវាងទន្លេទៅកាន់សមុទ្រកម្ពុជា ខណៈគម្រោងគ្រោងចំណាយទុនសាងសង់ប្រមាណ ១,៧០០ លានដុល្លារ។ផ្លូវទឹកថ្មីទៅកាន់សមុទ្រតាមរយះគម្រោងព្រែកជីកហ្វូណនតេជោនេះមានប្រវែង១៨០គីឡូ ម៉ែត្រ ចាប់ពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ចូលតាមព្រែកតាហ៊ីងនៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន៤ រួមមាន៖ ខេត្តកណ្តាល តាកែវ កំពត និងខេត្តកែប និងមានប្រជាជនសរុបប្រមាណ ១,៦ លាននាក់រស់នៅអមសងខាងផ្លូវទឹកនេះ។ ផ្លូវទឹកនេះ មានទទឹងមុខកាត់ផ្នែកខាងលើ ប្រវែង ១០០ម៉ែត្រ និងមុខកាត់ផ្នែកខាងក្រោម ប្រមាណ៨០ម៉ែត្រ និងជម្រៅទឹកប្រមាណ ៥,៤ម៉ែត្រ ( ជម្រៅនាវាចរណ៍ ៤,៧ម៉ែត្រ និងគម្លាតសុវត្ថិភាព ០,៧ម៉ែត្រ ) មានគន្លងនាវាចរណ៍ ចំនួន២គន្លង អាចចេញ-ចូល និងចៀសគ្នាបានដោយសុវត្ថិភាព៕ អត្ថបទ៖ សេក ឧត្តម

សិក្ខាកាម នៃសាលាមធ្យមវិចិត្រសិល្បៈ ទទួលការបណ្តុះបណ្តាលគរុកោសល្យវិធីសាស្រ្ត នៃការបង្រៀន និងការគ្រប់គ្រងថ្នាក់រៀន

សិក្ខាកាមជាង១០០នាក់ សាលាមធ្យមវិចិត្រសិល្បៈ នៃក្រសួងវប្បធម៌ និងវិចិត្រសិល្បៈ បានបើកវគ្គបណ្តុះបណ្តាលគរុកោសល្យ វិធីសាស្រ្តនៃការបង្រៀន និងការគ្រប់គ្រងថ្នាក់រៀន (ជំហានទី២ ក្រុមទី២) នាព្រឹកថ្ងៃទី២៣ ខែកក្កដា ឆ្នាំ២០២៤នេះ។លោក ហេង កំសាន្ត នាយកសាលាមធ្យមវិចិត្រសិល្បៈបានឲ្យដឹងថា សាលាមធ្យមវិចិត្រសិល្បៈ បានសហការជាមួយសាលាបណ្តុះបណ្តាលក្របខណ្ឌវប្បធម៌ បានរៀបចំវគ្គបណ្តុះបណ្តាលស្តីពី គរុកោសល្យ និងវិធីសាស្រ្តបង្រៀន និងការគ្រប់គ្រងថ្នាក់រៀន ដោយគិតមកដល់ពេលនេះ បានចំនួន០៤លើករួចមកហើយ ក្នុងគោលបំណងដើម្បីលើកកម្ពស់វិស័យអប់រំ និងការស្វែងរកវិធីសាស្រ្តថ្មីៗ ក្នុងការបង្រៀន និងការគ្រប់គ្រងថ្នាក់រៀន សម្រាប់បំពេញបន្ថែមជូនលោកគ្រូ អ្នកគ្រូ ដើម្បីយកមកអនុវត្តនៅក្នុងថ្នាក់រៀនប្រកបដោយគុណភាព ប្រសិទ្ធភាព និងសេចកី្តថ្លៃថ្នូររបស់គ្រូបង្រៀន និងនវានុវត្តន៍ការងារ។លោក ប៊ុនថន សុខាណារិទ្ធ នាយកស្តីទីសាលាបណ្តុះបណ្តាលក្របខ័ណ្ឌវប្បធម៌ បានមានប្រសាសន៍ថា សម្រាប់វគ្គនេះ សាលាបានកំណត់ជ្រើសយកលោកគ្រូ-អ្នកគ្រូ និងបុគ្គលិករដ្ឋបាលសិក្សាដែលធ្លាប់ទទួលការបណ្តុះបណ្តាលនៅជំហាន១ ក្រុម២ ឆ្នាំ២០២៣ សរុបចំនួន ១០២រូប ក្នុងនោះសិក្ខាកាមជាស្រ្តីមានចំនួន ៥០រូប មកពីសាលាមធ្យមវិចិត្រសិល្បៈ ដើម្បីយកមកបណ្តុះបណ្តាលបន្តនូវជំហាន២ ក្រុម២ នា ឆ្នាំ២០២៤នេះ។ ការបើកវគ្គបណ្តុះបណ្តាលនាពេលនេះ ដើម្បីផ្សាភ្ជាប់ទៅនឹងគោលនយោបាយ និងផែនការយុទ្ធសាស្រ្តស្តីពីការអប់រំ របស់ក្រសួងអប់រំយុវជន និងកីឡា និងគោលនយោបាយជាតិស្តីពី៖ វប្បធម៌ ដោយផ្តោតសំខាន់ទៅលើ៖ ធានាឱ្យការអប់រំមានគុណភាព ប្រកបដោយសមធម៌ បរិយាបន្ន និងលើកកម្ពស់ឱកាសក្នុងការសិក្សាពេញមួយជីវិតសម្រាប់ទាំងអស់គ្នា, ធានាភាពស័ក្តិសិទ្ធ នៃភាពជាអ្នកដឹកនាំ និងគ្រប់គ្រងរបស់មន្រ្តីអប់រំគ្រប់លំដាប់ថ្នាក់ និងធានាគុណភាពក្នុងការសាបព្រោះចំណេះដឹងដល់អ្នកបន្តវេនសិល្បៈឲ្យទទួលបានចំណេះជំនាញច្បាស់លាស់ អាចយកទៅបម្រើដល់កិច្ចការងារសង្គម និងជីវភាពគ្រួសារ និងរួមចំណែកក្នុងការអភិរក្ស ជំនាញមរតកដូនតាខ្មែរ។នាឱកាសនោះឯកឧត្តម ធៀង វណ្ណដារ៉ុង អនុរដ្ឋលេខាធិការ តំណាងដ៏ខ្ពង់ខ្ពស់លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ បានថ្លែងថា សម្រាប់នីតិកាលទី៧នេះ រាជរដ្ឋាភិបាលកម្ពុជាថ្មី ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានបន្តយកចិត្តទុកដាក់លើការពង្រឹងសមត្ថភាពការងាររបស់មន្រ្តីរាជការ លោកគ្រូ អ្នកគ្រូ គ្រប់កម្រិតវិជ្ជាជីវៈ រួមទាំងជំនាញមរតកដូនតា ដើម្បីឱ្យដើរស្របតាមគោលនយោបាយ និងផែនការអភិវឌ្ឍគ្រប់ផ្នែក គ្រប់វិស័យ និងគ្រប់កម្រិត ដូចមានកំណត់នៅក្នុងបាវចនាទាំង៥ របស់យុទ្ធសាស្រ្តបញ្ចកោណគឺ កំណើន ការងារ សមធម៌ ប្រសិទ្ធភាព និងចីរភាព។ នៅក្នុងគោលនយោបាយធនធានមនុស្ស ដែលរាជរដ្ឋាភិបាលកម្ពុជាបានដាក់ចេញ គឺដើម្បីរួមចំណែកជួយដល់គ្រឹះស្ថានអប់រំ ក្នុងការពង្រឹងការគ្រប់គ្រង និងការអភិវឌ្ឍធនធានមនុស្ស ដែលនឹងធ្វើឱ្យប្រសើរឡើងនូវប្រសិទ្ធភាពការងារ និងការផ្តល់សេវាអប់រំប្រកបដោយគុណភាពល្អ អាចទុកចិត្តបាន និងឆ្លើយតបទាន់ពេលវេលាទៅនឹងតម្រូវការទីផ្សារការងារ។ នៅក្នុងនីតិកាលទី៧នេះ រាជរដ្ឋាភិបាលកម្ពុជា ក្រោមការដឹកនាំប្រកបដោយសេចក្តីស្វាហាប់ របស់ សម្តេចមហាបវរធិបតី ហ៊ុន ម៉ាណែត បានបន្តកំណត់យកគោលនយោបាយអភិវឌ្ឍធនធានមនុស្សជាអាទិភាពក្នុងចំណោមអាទិភាពទាំង៥ គឺមនុស្ស ផ្លូវ ទឹក ភ្លើង និងបច្ចេកវិទ្យា។ វគ្គបណ្ដុះបណ្ដាលរបស់យើងនាថ្ងៃនេះ ក៏ជាការបន្តរួមចំណែកធ្វើឱ្យគោលនយោបាយអាទិភាពរបស់រាជរដ្ឋាភិបាលទទួល បានជោគជ័យ ជាពិសេសក្នុងក្របខ័ណ្ឌនៃការបណ្ដុះបណ្ដាលធនធានមនុស្សលើវិស័យវប្បធម៌៕ អត្ថបទ រដ្ឋា

ក្រុមប្រឹក្សាឃុំ កងកម្លាំង ប្រជាពលរដ្ឋស្រុកបរិបូណ៌ ត្រៀមរួចរាល់ដើម្បីអបអរសាទរពិធីបើកការដ្ឋានព្រែកជីកហ្វូណនតេជោ

កំពង់ឆ្នាំង៖ នៅថ្ងៃទី២៣ ខែកក្កដា ឆ្នាំ២០២៤នេះ ក្រុមប្រឹក្សាឃុំ កងកម្លាំង ប្រជាពលរដ្ឋស្រុកបរិបូណ៌ បានត្រៀមរួចរាល់ដើម្បីអបអរសាទរពិធីបើកការដ្ឋានព្រែកជីកហ្វូណនតេជោ នៅថ្ងៃទី៥ ខែសីហា ឆ្នាំ២០២៤ខាងមុខ។ ក្រុមប្រឹក្សាឃុំ កងកម្លាំង ប្រជាពលរដ្ឋស្រុកបរិបូណ៌ជូនពរជ័យជូនដល់ថ្នាក់ដឹកនាំ និងក្រុមការងារសាងសង់ឲ្យរលូន និងទទួលជោគជ័យ ព្រោះពួកគាត់គិតថា ព្រែកជីកនេះ ជាដង្ហើមសេដ្ឋកិច្ចដ៏សំខាន់របស់ប្រទេស និងប្រជាជនខ្មែរទាំងមូល។ នៅថ្ងៃទី៥ ខែសីហា វេលាម៉ៅង ៩និង៩នាទីព្រឹក ដោយគ្រប់វត្តអារាម វិហារសាសនាទាំងអស់ ត្រូវចងទង់ជាតិ ទង់ជ្វាលា ទង់សាសនា សម្អាតបរិស្ថានទីធ្លាតាមគ្រឹះស្ថានសាសនានីមួយៗឲ្យបានស្អាត និងត្រូវវាយរគាំង ទូងស្គរ ទះប៉ោត គោះត្រដោក ដើម្បីបន្លឺសំឡេងឲ្យកង់រំពង។ មកដល់ថ្ងៃនេះ គ្រប់សាលារៀន វត្តអារាម បានត្រៀមរៀបចំរួចរាល់ហើយសម្រាប់អបអរសាទរក្នុងពិធីដ៏មានសារៈសំខាន់នេះ ។ ប្រជាពលរដ្ឋបានបង្ហាញការជឿជាក់ចំពោះការដឹកនាំរបស់រាជរដ្ឋាភិបាលចាប់តាំងពីអាណត្តិមុនៗក្រោមការដឹកនាំដោយសម្ដេចតេជោ ហ៊ុន សែន អតីតនាយករដ្ឋមន្រ្ដី និងអាណត្តិទី៧នេះក្រោមការដឹកនាំដោយសម្ដេចធិបតី ហ៊ុន ម៉ាណែត ជានាយករដ្ឋមន្រ្ដី និងធ្វើឱ្យគម្រោងព្រែកជីក ហ្វូណនតេជោ នេះក្លាយជាផលប្រយោជន៍ជាប្រវត្តិសាស្រ្ដសម្រាប់ប្រជាជន និងប្រទេសកម្ពុជាបន្ថែមទៀត៕ កាំង ហុងវាស្នា

កំណើនវិស័យទេសចរណ៍ និងវិស័យចម្បងៗរបស់កម្ពុជាកំពុងគាំទ្រសេដ្ឋកិច្ចជាតិឱ្យងើបឡើងវិញ

វិស័យចម្បងៗនៅក្នុងសកម្មភាពសេដ្ឋកិច្ច បានកើនឡើងវិញក្នុងល្បឿនខុសៗគ្នា ដោយបានជំរុញឱ្យសេដ្ឋកិច្ចរបស់កម្ពុជាបន្តងើបឡើងវិញជាបន្តៗ ក្នុងនោះមានវិស័យទេសចរណ៍កំពុងបន្តងើបឡើងវិញ ខណៈវិស័យសំណង់ និងអចលនទ្រព្យ នៅមានកំណើនតិចតួចនៅឡើយ។ធនាគារជាតិនៃកម្ពុជា បានបង្ហាញរបាយការណ៍ប្រចាំឆមាសទី១ និងទិសដៅការងារឆមាសទី២ ឆ្នាំ២០២៤ ក្នុងនោះសម្រាប់ ស្ថានភាពម៉ាក្រូសេដ្ឋកិច្ចកម្ពុជា ក្នុងរយៈពេល ៦ ខែ ឆ្នាំ ២០២៤នេះ ក្នុងនោះវិស័យកម្មន្តសាលត្រូវបានប៉ាន់ស្មានថាមានកំណើន ៧,៣% ដែលគាំទ្រជាចម្បងដោយផលិតផលកម្មន្តសាលសម្រាប់ការនាំចេញ (កើន ៧,៧%) ក្នុងនោះផលិតផលកាត់ដេរ សម្រាប់នាំចេញ កើន ១៧% ខណៈដែលផលិតផលមិនមែនកាត់ដេរថយ-៨%។ ចំណែកឯផលិតផលកម្មន្តសាលសម្រាប់បម្រើទីផ្សារក្នុងស្រុក មានកំណើន ៦,៤%។ ចំណែកវិស័យសេវាកម្មក្នុងរយៈនេះ វិស័យទេសចរណ៍បន្តទទួលបានកំណើនល្អ ដែលឆ្លុះបញ្ចាំងតាមរយៈកំណើនទាំងភ្ញៀវអន្តរជាតិ និងទេសចរក្នុងស្រុក។ ភាពប្រសើរឡើងនៃសេដ្ឋកិច្ចក្នុងតំបន់ និងសកល រួមជាមួយការកសាងហេដ្ឋារចនាសម្ព័ន្ធផ្លូវថ្នល់ និងអាកាសយានដ្ឋាន អន្តរជាតិ គួបផ្សំនឹងការតភ្ជាប់ជើងហោះហើរត្រង់ជាមួយនឹងប្រទេសនានា បានរួមចំណែកទាក់ទាញភ្ញៀវអន្តរជាតិឱ្យកើនដល់ប្រមាណ ៣,១ លាននាក់ (កើន ២១,២%) ទាបជាងកម្រិតគ្រាដូចគ្នាមុនវិបត្តិកូវីដ-១៩បន្តិច ដោយក្នុងនោះ ភ្ញៀវថៃបន្តឈរនៅ លំដាប់ទី១ នៃភ្ញៀវអន្តរជាតិដែលមកកម្សាន្តនៅប្រទេសកម្ពុជា (សមាមាត្រ ៣០%), វៀតណាម (២០%) និងចិន (១២%)។យ៉ាងណាមិញ ភ្ញៀវអន្តរជាតិដែលចូលមកតាមផ្លូវអាកាស មានប្រមាណ ៣៨% នៃភ្ញៀវអន្តរជាតិសរុប (៧០% គ្រាដូចគ្នា ឆ្នាំ២០១៩) និង ៦២% តាមផ្លូវគោក និងផ្លូវទឹក (៣០% គ្រាដូចគ្នាឆ្នាំ២០១៩)។ ទន្ទឹមនេះ ទេសចរក្នុងស្រុកបន្ដកើនដល់ប្រមាណ ៩,៧ លាននាក់ (កើន ៦,៧%) ក្នុងនោះតំបន់ឆ្នេរបន្តទទួលទេសចរច្រើនជាងគេ មានសមាមាត្រប្រមាណ ៥១% នៃទេសចរក្នុងស្រុកសរុប ខណៈរាជធានីភ្នំពេញឈរនៅលំដាប់ទី២ (២២%) ខេត្តសៀមរាប ឈរនៅលំដាប់ទី៣ (១៥%) និងតំបន់អេកូ ទេសចរឈក្នុងលំដាប់ទី ៤ មាន (៣%)។ ចំណូលនៃវិស័យទេសចរណ៍អន្តរជាតិ ត្រូវបានប៉ាន់ស្មានថា ទទួលបានប្រមាណ ១,៧ ប៊ីលានដុល្លារអាមេរិក ដែលបានកើនឡើង ៧% ធៀបនឹងឆមាសដូចគ្នាឆ្នាំមុន ។ចំពោះវិស័យកសិកម្ម៖ វិស័យកសិកម្មបន្តមានវឌ្ឍនភាពល្អ ដែលជាចម្បងគាំទ្រដោយផលស្រូវរដូវប្រាំង បានកើនឡើង ២១% ធៀបនឹងគ្រោះដូចគ្នាឆ្នាំមុន ដល់ ៣,៨ លានតោន ដោយសារភាពអំណោយផលនៃទីផ្សារ។ យ៉ាងណាមិញផ្ទៃដីដាំដុះស្រូវរដូវវស្សា បានថមថយបន្តិច -០,៦% មក ១,៧ លានហិកតា ដែលជាចម្បងបណ្ដាលមកពីការអូសបន្លាយនៃភ្លៀងធ្លាក់នៅដើមរដូវវស្សា។ផលកៅស៊ូបន្តទទួលបានកំណើនទាបប្រមាណ ១% ដល់ជាង ១៤០ ពាន់តោន ដែលអាចបណ្តាលមកពីកត្តាអាកាសធាតុ ខណៈតម្លៃ កៅស៊ូក្នុងមួយតោនជាមធ្យម បានងើបឡើងចាប់ពីដើមឆ្នាំ២០២៤ ដល់ ១ ៥០២ ដុល្លារអាមេរិក ក្នុងមួយតោន ដែលបានកើន ១១,៧% ដោយសារកំណើនតម្រូវការខាងក្រៅ។ដោយឡែក វិស័យសំណង់ វិស័យនេះត្រូវបានប៉ាន់ស្មានថា មានកំណើនទាបដែលគាំទ្រដោយគម្រោងអភិវឌ្ឍន៍សាធារណៈសំខាន់ៗដូចជា ផ្លូវ ស្ពាន និងអាកាសយានដ្ឋាន។ ការនាំចូលសម្ភារ និងបរិក្ខារសំណង់បន្តកើនឡើងគួរឱ្យកត់ សម្គាល់ ២២,១% ធៀបនឹង កំណើន ០,៤%នៅគ្រាដូចគ្នាឆ្នាំមុន។ តម្លៃគម្រោងសំណង់ទទួលបានការអនុម័តបានថយចុះ -២៣%“ ដែលក្នុងនោះសំណង់លំនៅឋាន (សមាមាត្រ ៤៦,៦%) ត្រូវបានប៉ាន់ស្មានថាថយចុះ -១៤,៩% និងសំណង់ផ្សេងៗ(៤៤,៧%) ថយចុះ -៣២,៩% ខណៈដែលសំណង់សាធារណៈ (៨,៧%) កើន ២,៧%៕ អត្ថបទ៖ សុន រ៉ាឌី

បណ្ឌិត្យសភាបច្ចេកវិទ្យាឌីជីថលកម្ពុជា និងស្ថានទូតបារាំង ចុះអនុស្សរណៈនៃការយោគយល់ ស្តីពីកម្មវិធីអាហារូបករណ៍របស់រដ្ឋាភិបាលបារាំង

នារសៀលថ្ងៃទី២២ ខែកក្កដា ឆ្នាំ២០២៤ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអញ្ជើញជាសក្ខីភាពក្នុងពិធីចុះហត្ថលេខាលើអនុស្សរណៈនៃការយោគយល់ ស្តីពីកម្មវិធីអាហារូបករណ៍របស់រដ្ឋាភិបាលបារាំង រវាងបណ្ឌិត្យសភាបច្ចេកវិទ្យាឌីជីថលកម្ពុជា តំណាងដោយ ឯកឧត្តម សេង សុភាព ប្រធានបណ្ឌិត្យសភាបច្ចេកវិទ្យាឌីជីថលកម្ពុជា និងស្ថានទូតបារាំង តំណាងដោយឯកឧត្តម Jacques PELLET ឯកអគ្គរដ្ឋទូតបារាំងប្រចាំកម្ពុជា នៅទីស្តីការក្រសួងប្រៃសណីយ៍និងទូរគមនាគមន៍។អនុស្សរណៈនៃការយោគយល់នេះ មានគោលបំណងដើម្បីបន្តកិច្ចសហប្រតិបត្តិការហិរញ្ញប្បទានរួមគ្នាក្នុងការផ្តល់អាហារូបកណ៍ដល់និស្សិតឆ្នើមកម្ពុជា ទៅសិក្សាថ្នាក់បណ្ឌិតជំនាញបច្ចេកវិទ្យាឌីជីថលនៅសាកលវិទ្យាប្រទេសបារាំង។ កិច្ចសហប្រតិបត្តិការនេះ ជាកិច្ចខិតខំប្រឹងប្រែងក្នុងការបង្កើនមូលធនមនុស្សជំនាញឌីជីថល និងការលើកកម្ពស់សមត្ថភាពស្រាវជ្រាវនិងនវានុវត្តន៍ គាំទ្រដល់ការសម្រេចបាននូវផែនទីបង្ហាញផ្លូវអភិវឌ្ឍន៍ជំនាញឌីជីថលនៅកម្ពុជា ២០២៤-២០៣៥។

ក្រុមហ៊ុនថៃធំៗលំដាប់អន្តរជាតិ កំពុងចូលមកវិនិយោគលើវិស័យជាច្រើននៅកម្ពុជា

ក្រុមហ៊ុនខ្នាតអន្តរជាតិប្រចាំប្រទេសថៃ បានកំពុងចាប់អារម្មណ៍ និងបានហូរចូលកម្ពុជាជាបណ្តើរៗ ដោយបានវិនិយោគលើវិស័យ ធំៗជាច្រើន ខណៈកម្ពុជាបានផ្តល់ទំនុកចិត្តខ្ពស់ លើបរិយាកាសវិនិយោគ ការធ្វើអាជីវកម្ម ពាណិជ្ជកម្ម ប្រកបដោយបរិយាប័ន្ន។លោកស្រី ជីរ៉ាណាន់ វង្សមង្គល ប្រធានសមាគមពាណិជ្ជកម្មថៃប្រចាំនៅកម្ពុជា លើកឡើងនៅក្នុងបទសម្ភាសន៍ជាមួយភ្នាក់ងារព័ត៌មាន ស្តីពីបរិយាកាសវិនិយោគនៅកម្ពុជា នេះថា កម្ពុជា-ថៃគឺជាប្រទេសដែលមានកិច្ចសហប្រតិបត្តិការយ៉ាងល្អ និងរវាងរាជរដ្ឋាភិ បាល និងរាជរដ្ឋាភិបាល ជាពិសេសការធ្វើទ្វេភាគីពាណិជ្ជកម្ម និងការវិនិយោគជាដើម, ដោយក្នុងនោះកម្ពុជា គឺជាប្រទេសមួយដែល មានការអភិវឌ្ឍន៍រីកចម្រើនស្ទើរគ្រប់វិស័យ និងជាប្រទេសផ្តល់ភាពអំណោយផលគ្រប់បែបយ៉ាង ដល់បរិយាកាសវិនិយោគ និងការធ្វើ ធុរកិច្ចផ្សេងៗ។លោកស្រី បន្តថា ដោយមើលឃើញពីសក្តានុពលទាំងនោះ វិនិយោគិនថៃបានមកបណ្តាក់ទុននៅកម្ពុជាជាបន្តបន្ទាប់ ជាក់ ស្តែងមកដល់បច្ចុប្បន្ននេះ ឃើញថា មានក្រុមហ៊ុនថ្មីៗចូលមកវិនិយោគនៅកម្ពុជាជាច្រើនដូចជា ការវិនិយោគលើផ្នែកភោជនីយដ្ឋាន, វិស័យដឹកជញ្ជូន, ក្នុងក្រុមហ៊ុន TCC Group ដែលវិនិយោគនៅកម្ពុជាកន្លងមក បច្ចុប្បន្នបានកំពុងជំរុញវិនិយោគបន្ថែម នៃការបង្កើត រោងចក្រផលិតស្រាបៀរ និងរោងចក្រផលិតទឹកដោះគោ និងមានក្រុមហ៊ុនថៃផ្សេងៗ កំពុងចាប់អារម្មណ៍ និងមានទំនុកចិត្តខ្ពស់ អំពី បរិយាកាសវិនិយោគនៅកម្ពុជាផងដែរ។ជុំវិញការទទួលបានគម្រោងវិនិយោគនេះ បើយោងតាមសេចក្តីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជា នៅក្នុងឆមាសទី១ ឆ្នាំ ២០២៤ នេះ កម្ពុជាទទួលបានគម្រោងវិនិយោគថ្មី ដែលអនុម័តដោយក្រុមប្រឹក្សាអភិវឌ្ឍន៍កម្ពុជា មានចំនួន ១៩០ គម្រោង មាន ទុនវិនិយោគសរុប ៣,២ ពាន់លានដុល្លារអាមេរិក ក្នុងនោះការវិនិយោគលើវិស័យឧស្សាហកម្ម មានចំនួនជាង ១ ៨០០ លានដុល្លារ, ទេសចរណ៍ជាង ៥៨៨ លានដុល្លារ, កសិកម្ម និងកសិឧស្សាហកម្មជាង ៧២ លានដុល្លារ, ហេដ្ឋារចនាសម្ព័ន្ធ និងផ្សេងៗ ជាង ៧៥៣ លានដុល្លារផងដែរ៕ អត្ថបទ៖ សុន រ៉ាឌី

សម្ដេចធិបតី ហ៊ុន ម៉ាណែត ផ្តល់កាណូតចំនួន៤គ្រឿង សម្រាប់ចម្លងសិស្សានុសិស្ស និងប្រជាពលរដ្ឋ នៅស្រុកសណ្តាន់

កំពង់ធំ៖ កាណូតចំនួន៤គ្រឿង ដែលជាអំណោយសម្ដេចមហាបវរធិបតី ហ៊ុន ម៉ាណែត និងលោកជំទាវ តាមរយៈឯកឧត្តមនាយឧត្តមសេនីយ៍ ម៉ៅ សុផាន់ ត្រូវបានប្រគល់ជូនប្រជាជនស្រុកសណ្ដាន់ ដើម្បីចម្លងសិស្ស និងពលរដ្ឋដោយឥតគិតថ្លៃ។ កាលពីថ្ងៃទី២២ ខែកក្កដា ឆ្នាំ២០២៤ លោកឧត្តមសេនីយ៍ទោ សូយ ណារិទ្ធ មេបញ្ជាការរងកងពលតូចលេខ៧០ បាននាំយកការណូតចំនួន៤គ្រឿង ទៅប្រគល់ជូនប្រជាជននៅឃុំដងកាំបិត និងឃុំមានជ័យ ស្រុកសណ្ដាន់ ខេត្តកំពង់ធំ។ ក្នុងឱកាសនោះ លោកឧត្តមសេនីយ៍ទោ លើកឡើងថា ការផ្តល់ជូនការណូតចំនួន ៤គ្រឿងនេះ គឺដើម្បីសម្រួលដល់ការដឹកជញ្ជូន លោកគ្រូអ្នកគ្រូ សិស្សានុសិស្ស និងប្រជាពលរដ្ឋឆ្លងកាត់ដងស្ទឹងសែនក្នុងរដូវវស្សា នៅក្នុងឃុំដងកាំបិត និងឃុំមានជ័យ ឆ្លងកាត់ទៅកាន់ឃុំខ្លែង ស្រុកសណ្ដាន់ ខេត្តកំពង់ធំ ដើម្បីបម្រើឲ្យនិរន្តរភាពការងារ របស់លោកគ្រូអ្នកគ្រូ សិស្សានុសិស្ស និងសកម្មភាពជីវភាពប្រចាំថ្ងៃ របស់ប្រជាពលរដ្ឋ។ លោកបន្តថា ក្រោមការចិត្តទុកដាក់របស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី តាមរយៈឯកឧត្តមនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក និងជាប្រធានក្រុមការងាររបស់ រាជរដ្ឋាភិបាលចុះមូលដ្ឋានស្រុកសណ្ដាន់ បានប្រគល់កាណូតចំនួន៤គ្រឿង ក្នុងនោះ ចំនួន ២ គ្រឿង ប្រគល់ជូនប្រជាជននៅឃុំដងកាំបិត និង ចំនួន ២ គ្រឿងទៀតប្រគល់ជូនប្រជាជននៅឃុំមានជ័យ និងឃុំខ្លែង ព្រមទាំង អាវពោងសុវត្ថិភាពចំនួន៤០ ប្រេងឥន្ធនៈ សម្រាប់ប្រើប្រាស់ប្រចាំថ្ងៃ បម្រើឲ្យការដឹកជញ្ជូន សិស្សានុសិស្ស លោកគ្រូអ្នកគ្រូ និងប្រជាពលរដ្ឋទូទៅ ដោយឥតគិតថ្លៃ និងមិនគិតនិន្នាការ នយោបាយណាឡើយ។ លោកឧត្តមសេនីយ៍ទោ ផ្តាំផ្ញើដល់ ក្រុមបច្ចេកទេសបើកបរកាណូតទាំងពីរគោលដៅ ត្រូវមានការប្រុង ប្រយ័ត្នខ្ពស់ក្នុងការបើកបរដឹកជញ្ជូនប្រជាពលរដ្ឋ និងសិស្សានុសិស្ស លោកគ្រូអ្នកគ្រូ ឆ្លងកាត់ដងស្ទឹងសែន ឱ្យមានសុវត្ថិភាព និងត្រូវគ្រប់គ្រងថែរក្សាលក្ខណៈបច្ចេកទេសម៉ាស៊ីនកាណូត ក្នុងការដឹកជញ្ជូនឲ្យបានល្អ ដើម្បីបម្រើសកម្មភាពក្នុងការដឹកជញ្ជូន បានយូរអង្វែង។ជាមួយគ្នានេះ លោក ស៊ិន វណ្ណវុឌ្ឍ អភិបាលស្រុកសណ្ដាន់ គោរពថ្លែងអំណរគុណ ដ៏ជ្រាលជ្រៅជាទីបំផុត ចំពោះសម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិតពេជ ចន្ទមុន្នី ដែលបានយកចិត្តទុកដាក់ខ្ពស់គិតគូរពីសុខទុក្ខ ជីវភាពរស់នៅ និងសុវត្ថិភាព របស់ប្រជាពលរដ្ឋ ព្រមទាំងសិស្សានុសិស្ស លោកគ្រូអ្នកគ្រូ ក្នុងការធ្វើដំណើរឆ្លងកាត់ដងស្ទឹងសែន និងសូមគោរពជូនពរសម្ដេច លោកជំទាវ ឯកឧត្តមអស់លោក លោកស្រីទាំងអស់ សូមទទួលបាននូវពុទ្ធពរទាំង៤ ប្រការ កុំបីឃ្លៀងឃ្លាតឡើយ៕

បណ្ដាញសង្គម

ព័ត៌មានថ្មីៗ

អ៊ីស្រាអែលបង្កើនការវាយប្រហារលើតំបន់ភាគខាងត្បូងលីបង់ បណ្តាលឲ្យមនុស្សយ៉ាងហោច ១៦នាក់ស្លាប់

រុស្ស៊ីចុះហត្ថលេខាលើកិច្ចព្រមព្រៀងតម្លៃ ១៦,៥ពាន់លានដុល្លារ ដើម្បីសាងសង់រោងចក្រថាមពលនុយក្លេអ៊ែរដំបូងនៅកាហ្សាក់ស្ថាន

រុស្ស៊ី៖ អឺរ៉ុបគួរបង្ហាញភ័ស្តុតាងពីអំណះអំណាងថាទីក្រុងមូស្គូរំខានសញ្ញា GPS

មន្ត្រីរុស្ស៊ី៖ គំនិតផ្តួចផ្តើមសន្តិភាពអ៊ុយក្រែន ជាមួយសហរដ្ឋអាមេរិក កំពុង «ជាប់គាំង»

ក្រុមហ៊ុន Temu របស់ចិនរងការផាកពិន័យ ២៣២លានដុល្លារ សម្រាប់ការបំពានច្បាប់លក់របស់ EU

ទីភ្នាក់ងារអាកាសធាតុអេស្ប៉ាញ ព្យាករសីតុណ្ហភាពខ្ពស់ខ្លាំងអំឡុងរដូវក្តៅ និងហានិភ័យភ្លើងឆេះព្រៃ

កូរ៉េខាងត្បូងធ្វើសមយុទ្ធបាញ់គ្រាប់ពិត ដើម្បីបញ្ជាក់ការជំរុញការការពារពឹងផ្អែកលើខ្លួនឯង

លោក Zelenskiy ៖ អ៊ុយក្រែនរៀបចំជំហានដឹរឹងមាំសម្រាប់យន្តហោះចម្បាំង Gripen

នាយករដ្ឋមន្រ្តីជប៉ុនលោកស្រី Takaichi ជួបពិភាក្សាការងារជាមួយប្រធានាធិបតីហ្វីលីពីននៅទីក្រុងតូក្យូ

កម្មករធ្វើផ្លូវនៅភាគនិរតីប្រទេសបារាំង ពិបាកស៊ូទ្រាំនឹងអាកាសធាតុក្តៅខ្លាំងអំឡុងខែឧសភា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

រដ្ឋបាល​ខេត្ត​បាត់ដំបង​ណែនាំឱ្យ​រុះរើស្លាកផ្សព្វផ្សាយគ្រឿងស្រវឹងគ្រប់ប្រភេទ