BTV NEWS

អ្នកនាំពាក្យ៖ កម្មវិធីនយោបាយ និងការអភិវឌ្ឍរបស់កម្ពុជា បាននិងកំពុងដំណើរការទៅមុខជានិច្ច បើទោះបីកម្ពុជារងការឈ្លានពានពីថៃ

ប្រតិភូសភាប្រើភាសាបារាំង ១៧ប្រទេសធ្វើសិក្ខាសាលា អំពីក្របខ័ណ្ឌ និងការប្រើប្រាស់ឌីជីថលក្នុងសភា

គណបក្សប្រជាជនកម្ពុជា បានទទួលសមាជិកថ្មីជិត១ ០០០នាក់ នៅសង្កាត់រការធំ ខេត្តកំពង់ស្ពឺ

ក្រសួងទេសចរណ៍បើកយុទ្ធនាការ ទស្សនាកម្ពុជានៅរដូវកាលបៃតងឆ្នាំ ២០២៦

ព័ត៌មានជាតិ

ប្រធានសមាគមធំៗអំពាវនាវដល់សហគ្រិនក្នុងស្រុកសិក្សាលទ្ធភាពលើការកែច្នៃផលិតជំនួសការនាំចូល

ប្រធានសមាគមធំៗចំនួនពីរ អំពាវនាវសហគ្រិនក្នុងស្រុក សិក្សាលទ្ធភាពលើការបង្កើតឧស្សាហកម្មកែច្នៃ និងការវេចខ្ចប់ចេញជា ផលិតផលសម្រេច ដើម្បីស្រូបយកផលដំណាំកសិកម្មផ្សេងៗ ជាពិសេសការកែច្នៃចេញជាគ្រឿងកំប៉ុង ខណៈសម្ទុះផលិតកម្មសត្វក្នុង ស្រុកកំពុងរីកចម្រើន។បណ្ឌិត សួន ម៉ិ ប្រធានសមាគមសហគ្រិនវីម៉ូកម្ពុជា លើកឡើងក្នុងវេទិកាជំនួបសហគ្រិនជំរុញសេដ្ឋកិច្ចឆ្នាំ២០២៦ ថា ជុំវិញ កិច្ចដំណើរការអាជីវកម្មក្នុងស្រុកឃើញថា នៅក្នុងរយៈពេលចុងក្រោយនេះ មានសម្ទុះងើបឡើងយ៉ាងផុលផុសលើការកែច្នៃ ក្នុងនោះក៏ មានឧស្សាហកម្ម និងសិប្បកម្មមួយចំនួនបាននិងកំពុងចាប់យកបច្ចេកវិទ្យា សម្រាប់ដំណោះស្រាយទីផ្សារ ស្របពេលប្រជាជនកម្ពុជា បានធ្វើពហិការ និងបានបង្កើតនូវគំរូអាជីវកម្មថ្មីផ្សេងៗគ្នា គាំទ្រដល់ទីផ្សារក្នុងស្រុក ដើម្បីចូលរួមជាមួយរាជរដ្ឋាភិបាល បង្កើតនូវ ផលិតផលថ្មីៗសម្រាប់ទីផ្សារ។បណ្ឌិតរូបនេះ បន្តថា ចំពោះផលិតផលកសិកម្មឃើញថា ពីមួយឆ្នាំទៅមួយឆ្នាំ កម្ពុជាបាននាំចេញកសិផលស្រស់មាន កំណើនឡើងជាលំដាប់។ បញ្ហានេះ, ឯកឧត្តមបណ្ឌិតក៏បានអំពាវនាវដល់សហគ្រិនក្នុងស្រុក សិក្សាលទ្ធភាពបន្ថែម លើគម្រោង វិនិយោគឧស្សាហកម្មកែច្នៃ ឬការវេចខ្ចប់ចេញជាផលិតផលសម្រេចផ្សេងៗ តាមរយៈការបង្កើតតម្លៃបន្ថែម និងការងារ ជាពិសេសការ ចូលរួមពង្រីងទីផ្សារក្នុងស្រុក ឱ្យមានផលិតផលកាន់តែសំបូរបែប ជំនួសទីផ្សារនាំចូល និងក៏ជាការបង្កើតចលនានៃលំហូរសាច់ប្រាក់ ក្នុងស្រុកឱ្យកាន់តែធំឡើងៗ។ជុំវិញការកែច្នៃនេះដែរ, លោក ស្រ៊ុន ពៅ ប្រធានសមាគមអ្នកចិញ្ចឹមសត្វនៅកម្ពុជា លើកឡើងផងដែរថា បច្ចុប្បន្នផលិតកម្ម សត្វនៅកម្ពុជាមានការីកចម្រើនគួរកត់សម្គាល់ ជាក់ស្តែងផលិតកម្មជ្រូកនិងមាន់បាននិងកំពុងកើនឡើង និងផ្គត់ផ្គង់ក្នុងទីផ្សារលើស តម្រូវការផងដែរ បញ្ហានេះលោកក៏បានអំពាវនាដល់វិនិយោគិនបរទេសក៏ដូចជាវិនិយោគិនក្នុងស្រុក ធ្វើការវិនិយោគក្នុងវិស័យឧស្សហ- កម្មកែច្នៃ ចេញជាផលិតផលសម្រេចផ្សេងៗដូចជា គ្រឿងកំប៉ុង សាច់ផាត់ ប៉ាតេ ប្រហិត ឬរោងចក្របង្កក់សាច់ជាដើម ខណៈផលិត ផលទាំងនេះ កំពុងមានតម្រូវការទីផ្សារក្នុងស្រុក ក្នុងនោះប្រសិនបើវិស័យនេះដំណើរកាន់តែប្រសើរ គឺមិនត្រឹមបង្កើតការងារប៉ុណ្ណោះ ទេ ថែមទាំងជួយដល់កសិករ តាមរយៈការផ្តល់វត្ថុធាតុដើម ដល់ឧស្សាហកម្មកែច្នៃចំណីសត្វផ្សេងៗផងដែរ។សូមបញ្ជាក់ថា ទាក់ទិនការកែច្នៃនេះ រាជរដ្ឋាភិបាលបានលើកទឹកចិត្តឱ្យមានការកែច្នៃចេញជាផលិតផលសម្រេចផ្សេងៗឱ្យបានច្រើន ជាពិសេសនៅក្នុងអាណត្តិទី៧នេះ រាជរដ្ឋាភិបាលបានបន្តធ្វើទំនើបកម្មក្នុងវិស័យកសិកម្ម បង្កើនផលិតភាព ធ្វើពិពិធកម្ម អភិវឌ្ឍន៍ ហេដ្ឋារចនាសម្ព័ន្ធគាំទ្រក្នុងខ្សែច្រវាក់ផលិតកម្មកសិកម្ម និងបង្កើនការនាំចេញជាដើម។ ក្រៅពីនេះគឺបន្តពង្រឹងសមត្ថភាពដល់កសិករ និងសហគមន៍កសិកម្ម ពង្រឹងខ្សែច្រវាក់ផ្គត់ផ្គង់សម្រាប់ការកែច្នៃផលិតផលកសិកម្ម និងបង្កើនផលិតភាពកែច្នៃផលិតផលកសិកម្ម ការ បន្តអនុវត្តវិធានការបច្ចេកទេស សំដៅធានាសុវត្ថិភាពអាហារ ដើម្បីលើកកម្ពស់សន្តិសុខស្បៀងជាដើម រួមជាមួយបន្តគាំទ្រ ដល់ការ ចិញ្ចឹមសត្វជាលក្ខណៈគ្រួសារ និងពាណិជ្ជកម្ម ក្នុងគោលដៅបង្កើនការផ្គត់ផ្គង់សាច់លើទីផ្សារ និងនាំចេញជាដើម៕ អត្ថបទ៖ សុន រ៉ាឌី

សមត្ថកិច្ចមូលដ្ឋានបន្តចុះអប់រំតាមសាលារៀនពីបញ្ហាគ្រឿងញៀន និងច្បាប់ចរាចរណ៍

សមត្ថកិច្ចតាមមូលដ្ឋានទាំងនៅរាជធានីភ្នំពេញ ក៏ដូចជានៅតាមបណ្ដាខេត្ត បានចុះទៅតាមសាលារៀន ក៏ដូចជាតាមសហគមន៍ជាប្រចាំ ដើម្បីផ្ដល់ការអប់រំលើបញ្ហាគ្រឿងញៀន ក៏ដូចជាការអប់រំលើច្បាប់ចរាចរណ៍។ជាការយកចិត្តទុកដាក់លើភូមិឃុំមានសុខសុវត្ថិភាព ក៏ដូចជាសុវត្ថិភាពនៅតាមដងផ្លូវ សមត្ថកិច្ចតាមមូលដ្ឋាន ទាំងនៅតាមបណ្ដាខេត្ត ក៏ដូចជានៅរាជធានីភ្នំពេញ មន្ត្រីមានសមត្ថកិច្ច បានបន្តចុះផ្ទាល់ដល់ទីតាំងសាលារៀនដើម្បីអប់រំដល់សិស្ស ក៏ដូចជាចុះដល់ទីតាំងសហគមន៍ផ្ទាល់ដើម្បីអប់រំដល់ប្រជាពលរដ្ឋលើបញ្ហាទាំងនេះ។ជាក់ស្ដែងនៅព្រឹកថ្ងៃទី១៨ ខែកុម្ភៈ ឆ្នាំ ២០២៦នេះ សមត្ថកិច្ចនៃសង្កាត់ស្ទឹងមានជ័យ ២ ខណ្ឌមានជ័យ បានចុះទៅអប់រំផ្សព្វផ្សាយ ពីបញ្ហាគ្រឿងញៀន បញ្ហាបារីអេឡិចត្រូនិក ក៏ដូចជាច្បាប់ចរាចរណ៍ដល់សិស្សសិក្សានៅសាលាបឋមសិក្សាភូមិឬស្សី។ លោក កឹក បូរិន ជានាយប៉ុស្តិ៍សង្កាត់ស្ទឹងមានជ័យ២ លើកឡលើងថា វាជាភាពចាំបាច់ដែលត្រូវបន្តអប់រំដល់ពួកគាត់ ទាំងសិស្សទាំងប្រជាពលរដ្ឋទូទៅលើរឿងទាំងនេះ។ ពិសេសការអប់រំ ដល់កុមារដែលជាទំពាំងស្នងឫស្សីជាធនធានបន្តវេន។ ការអប់រំឱ្យពួកគាត់ដឹងច្បាស់ពីច្បាប់ ដឹងច្បាស់ពីផលប៉ះពាល់ ជារឿងចាំបាច់បំផុត។ក្នុងឱកាសដដែលនេះ លោកគ្រូ ប៉ាន់ ស្រ៊ា ជានាយកសាលាបឋមសិក្សាភូមិឫស្សី លើកឡើងដែរថា សាលាក៏តែងមានការអប់រំជាប្រចាំដល់កុមារតូចៗ លើបញ្ហាគ្រឿងញៀន និងបញ្ហាចរាចរណ៍ផងដែរ។ លោកថា គ្រប់យ៉ាងគឺធ្វើឡើងក្នុងគោលដៅរួមមួយ គឺបណ្ដុះកុមារទាំងនេះឱ្យក្លាយជាធនធានមនុស្ស ជាសិស្សល្អ ជាកូនល្អ ជាពលរដ្ឋល្អចៀសឆ្ងាយពីគ្រឿងញៀន ក៏ដូចជាមិនបំពានច្បាប់ចរាចរណ៍ សុខសុវត្ថិភាពតាមដងផ្លូវ។សម្រាប់កុមារដែលទទួលបានការអប់រំពន្យល់បន្ថែមនៅថ្ងៃនេះ ក៏សូមអរគុណដល់សមត្ថិកិច្ច ក៏ដូចជាអរគុណដល់លោកគ្រូ អ្នកគ្រូ ដែលយកចិត្តទុកដាក់លើពួកគាត់ ពន្យល់ឱ្យពួកគាត់យល់ដឹងកាន់តែច្បាស់លើបញ្ហាទាំងនេះ។ ពួកគេសន្យានឹងធ្វើតាម ឱ្យបានខ្ជាប់ខ្ជួន។បញ្ហាគ្រឿងញៀន បញ្ហាក្មេងទំនើង ក៏ដូចជាបញ្ហាចរាចរណ៍ សុទ្ធតែជារឿងដែលរាជរដ្ឋាភិបាលកំពុងយកចិត្តទុកដាក់ក្នុងការដោះស្រាយ។ ថ្មីនេះៗក្រសួងមហាផ្ទៃ ក៏បានប្រកាសក្នុងការរឹតបន្តឹងការអនុវត្តច្បាប់ចរាចរណ៍ជាថ្មីវិញដែរ ក្រោយមួយរយៈនៃការបន្ធូរបន្ថយការអនុវត្តច្បាប់ មានការកើនឡើងគ្រោះថ្នាក់ចរាចរណ៍៕ អត្ថបទ៖ គឹមហុក

អាជ្ញាធរនឹងចាត់វិធានការច្បាប់ចំពោះម្ចាស់ទីតាំងដែលលួចលាក់ផ្តល់ការស្នាក់នៅដល់ជនបរទេសប្រព្រឹត្តបទល្មើស

អាជ្ញាធរមានសមត្ថកិច្ច នឹងចាត់វិធានការច្បាប់ រួមទាំងពិន័យប្រាក់ ទៅលើម្ចាស់ទីតាំងទាំងឡាយ ណាដែលលួចលាក់ផ្តល់ការស្នាក់នៅដល់ជនបរទេសប្រព្រឹត្តិបទល្មើស Online Scams នៅក្នុងប្រទេសកម្ពុជា។ ឆ្លើយតបទៅនឹងបទបញ្ជាដ៏ម៉ឺងម៉ាត់ និងអនុវត្តតាមអនុក្រឹត្យរបស់រាជរដ្ឋាភិបាល ស្តីពីការគ្រប់ គ្រងសន្តិសុខសុវត្ថិភាពតាមទីតាំងរស់នៅប្រមូលផ្តុំនានា កម្លាំងអាជ្ញាធរមានសមត្ថកិច្ចនៅទូទាំងប្រទេសកំពុងបន្តសស្រាក់សស្រាំបំផុត ក្នុងការបោសសម្អាតឧក្រិដ្ឋកម្មឆបោកតាមប្រព័ន្ធអនឡាញចេញពីកម្ពុជា ខណៈក្រសួងមហាផ្ទៃ បានដាក់ឱសានវាទ ឬបន្ទាត់ក្រហម ត្រឹមកំឡុងខែមេសា ឆ្នាំ២០២៦ ។ សម្រាប់ក្របខ័ណ្ឌ នៃរាជធានីភ្នំពេញ ថ្មីៗនេះ កម្លាំងនគរបាលរាជធានី ដឹកនាំដោយលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានដឹកនាំកិច្ចប្រជុំផ្សព្វផ្សាយអំពីផែនការបន្តទប់ស្កាត់ និងបង្ក្រាបដាច់ខាត លើទីតាំងជួលការស្នាក់នៅទាំងឡាយ ដែលបានលួចលាក់បន្តផ្តល់ការស្នាក់នៅដល់ជនបរទេសដោយខុសច្បាប់ ពិសេសការរស់នៅសម្រាប់ប្រព្រឹត្តិបទល្មើស ឆបោកតាមប្រព័ន្ធបច្ចេកវិទ្យា។ នេះជាការឆ្លើយតបទៅនឹង ការដាក់ឱសានវាទរបស់រដ្ឋបាលរាជធានីភ្នំពេញផងដែរ ដែលបានកំណត់បន្ទាត់ក្រហមត្រូវលុបបំបាត់បទល្មើសឆបោកនេះឲ្យអស់ និងមានប្រសិទ្ធិភាពខ្ពស់ត្រឹមដំណាច់ចុងខែមីនា ឆ្នាំ២០២៦ ។ ប្រជាពលរដ្ឋ សម្តែងការគាំទ្រចំពោះវិធានការខាងលើនេះ ក៏ដូចជាវិធានការទាំងឡាយនានាជាច្រើនទៀតរបស់អាជ្ញាធរនៅទូទាំងប្រទេស ក៏ដូចជារាជរដ្ឋាភិបាល ក្នុងការប្រយុទ្ធប្រឆាំង និងបោសសម្អាតដាច់ណាត់នូវរាល់បទល្មើសឧក្រិដ្ឋទាំងឡាយ ដែលកើតមានឡើងនៅក្នុងប្រទេសជាតិ ពិសេសគឺឧក្រិដ្ឋកម្មឆបោកអនឡាញនេះតែម្តង ។ យោងលើជំពូកទី៦ មាត្រាទី២០ នៃអនុក្រឹត្យថ្មី របស់រាជរដ្ឋាភិបាលកម្ពុជា កាលពីដើមខែមករា ឆ្នាំ២០២៦ ក៏បានកំណត់ផងដែរចំពោះ ម្ចាស់ទីតាំងរស់នៅ ប្រមូលផ្តុំ ឬអ្នកគ្រប់គ្រងទីតាំងរស់នៅប្រមូលផ្តុំ ដែលមានចេតនាលាក់បាំង និងអនុញ្ញាតឲ្យជនបរទេសដែលចូលមកកម្ពុជាដោយខុសច្បាប់ ស្នាក់នៅក្នុងទីតាំងស្ថិតនៅក្រោមការ ទទួលខុសត្រូវរបស់ខ្លួន ត្រូវផាកពិន័យជាប្រាក់ចំនួន៤,០០០,០០០រៀល សម្រាប់ជនបរទេសម្នាក់ ដោយមិនទាន់គិតដល់ទោសព្រហ្មទណ្ឌដែលបានកំណត់ក្នុងច្បាប់ជាធរមានឡើយ ៕ អត្ថបទ៖ លីហេង

ផលិតផលខ្មែរថ្មីៗរាប់សិបមុខត្រូវបានផលិតឡើងក្រោមសម្ទុះគាំទ្រពីពលរដ្ឋ

ផលិតផលខ្មែរថ្មីៗរាប់សិបមុខ ត្រូវបានផលិតឡើងបន្តបន្ទាប់ ក្រោយមានការគាំទ្រ យ៉ាងខ្លាំងពីសំណាក់ប្រជាពលរដ្ឋខ្មែរ ជាពិសេសអំឡុងពេល នៃការឈ្លានពានរបស់កងទ័ពថៃ មកលើអធិបតេយ្យភាពកម្ពុជា និងការពហិការមិនប្រើប្រាស់ និងមិនបរិភោគទំនិញថៃ ។ផលិតផលខ្មែរច្រើនមុខថ្មីៗ កំពុងត្រូវបានផលិត មានដូចជាចំណីអាហារ ក្នុងនោះមានត្រីខ ទឹកត្រី ទឹក ស៊ីអ៊ីវ ភេសជ្ជៈ នំក្រៀម និងអាហារកំប៉ុងជាដើម ខណៈរបស់ប្រើប្រាស់មួយចំនួន ដូចជាសាប៊ូ កក់សក់ សាប៊ូដុស ខ្លួន ថ្នាំដុសធ្មេញ ។ល។ ដោយផលិតផលទាំងអស់នេះ សុទ្ធសឹងតែជា ផលិតផលជំនួសទំនិញរបស់ថៃ។អ្នកស្រី សេរី នាង ម្ចាស់ផលិតផលសាប៊ូឈ្មោះ “ខ្មែរយើង” និងលោក សុខ ឃឿន ម្ចាស់ ផលិតផល ថ្នាំដុសធ្មេញធ្វើពីម្លូ និងស្លាឈ្មោះ “ហាហា” បានឲ្យដឹងថា ក្រោយពីឃើញសម្ទុះ នៃ ការគាំទ្ររបស់ពលរដ្ឋខ្មែរ លើផលិតផលជាតិយ៉ាងខ្លាំងក្លា លើសពេលណាៗទាំងអស់នោះ ក៏បានសម្រេចបោះទុនបង្កើត ផលិតផល ដែលមានសុវត្ថិភាពសម្រាប់អ្នកប្រើប្រាស់ ហើយ នៅក្រោយពេលផលិតឡើងហើយនោះ គឺ មានការគាំទ្រពីសំណាក់ប្រជាពលរដ្ឋផងដែរ។ចំណែកអ្នកស្រី ហេង ស៊ីនួន ម្ចាស់ហាងសម្រស់ខ្មែរ ដែលទទួលយកនូវផលិតផលខ្មែរ ប្រភេទ គ្រឿងសម្អាងចែកចាយបន្ត បានឲ្យដឹងថា ក្រោយពេលមានសង្គ្រាមព្រំដែនកម្ពុជា-ថៃ សម្ទុះនៃការគាំទ្រផលិតផលជាតិ ពិតជាមានការកើនឡើងគួរឲ្យកត់សម្គាល់ ប៉ុន្តែគាត់នៅមាន ការព្រួយបារម្ភខ្លះដោយសាររយៈពេលចុងក្រោយនេះ ការគាំទ្រហាក់មានការថយចុះព្រោះ អ្នកខ្លះទោះបីផលិតផលមួយចំនួនខ្មែរអាចផលិតបាន បែរជានៅនាំគ្នាគាំទ្រផលិតផលរបស់ថៃទៅវិញ។ គួរបញ្ជាក់ថា ជាមោទនភាពយ៉ាងខ្លាំង ដោយនារយៈពេលចុងក្រោយនេះ ប្រជាពលរដ្ឋ កម្ពុជាទាំងក្នុង និងក្រៅប្រទេស បានជួយគាំទ្រផលិតផលជាតិ ជាមួយនោះក្រសួងស្ថាប័នជាច្រើនក៏បានបង្កើតព្រឹត្តិការណ៍មានការតាំងពិព័រណ៍ផលិតផលជាតិ ដើម្បីផ្សព្វផ្សាយឲ្យប្រជា ពលរដ្ឋផ្សេងៗបានដឹង ដែលសកម្មភាពទាំងអស់នេះ ក៏បានជំរុញ និងលើកទឹកចិត្តដល់អ្នក ផលិត បង្កើនការផលិតបន្ថែមទៀតផងដែរ៕ អត្ថបទ បាន សុខរិទ្ធិ

គ.ជ.ប នឹងទទួលបាន SERVERS សម្រាប់គ្រប់គ្រងទិន្នន័យអ្នកបោះឆ្នោតដ៏មានសារសំខាន់ពីជប៉ុន

អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់ថា សម្ភារបរិក្ខារ បច្ចេកទេសប្រព័ន្ធម៉ាស៊ីនមេ (SERVERS) សម្រាប់ការគ្រប់គ្រងទិន្នន័យអ្នកបោះឆ្នោតដែលជប៉ុនផ្តល់គឺ មានទំហំធំជាងមុន និងបច្ចេកវិទ្យាការរីកចំរើនជាងមុន។ ហើយបើមានបញ្ហាយ៉ាងណានោះក៏គ.ជ.ប នៅតែគ្រប់គ្រងស្ថានការណ៍បាន ដោយសារច្បាប់ដើមត្រូវរក្សាទុកនៅក្នុងអង្គចងចាំប្រកបដោយសុវត្ថិភាព។ឯកឧត្តម ហង្ស ពុទ្ធា អ្នកនាំពាក្យ គ.ជ.ប បានឱ្យដឹងថា ជប៉ុន តែងតែយកចិត្តទុកដាក់ក្នុងការ រួមសហការជាមួយ គ.ជ.ប ក្នុងការផ្តល់ជាបច្ចេកទេស និងសម្ភារ ដើម្បីធានាថា ការបោះឆ្នោតនៅកម្ពុជាមានភាពសេរី ត្រឹមត្រូវ និងយុត្តិធម៌។ ក្នុងនោះអង់ចង់ចាំដែលជប៉ុនផ្តល់ឲ្យមកកម្ពុជា គឺជាការបន្តនិរន្តភាព នៃការរៀបចំបញ្ជីបោះឆ្នោតឲ្យកាន់តែប្រសើរ។ ដោយសារអង់ចងចាំដែលជប៉ុនផ្តល់ឲ្យតាំងពីឆ្នាំ២០១៦ គឺផុតការធានារ៉ាប់រងទោះបីជាប្រើការបានក៏ដោយ។ ហើយការបន្តជួយរបស់ជប៉ុនមានទំហំធំជាងមុន និងបច្ចេកវិទ្យាក៏មានការរីកចំរើនជាងមុន។ឯកឧត្តមបានបញ្ជាក់ថា ការប្រើប្រាស់អង្គចងចាំរក្សាទុកប្រកបដោយសុវត្ថិភាព ហើយកូពីស្ថាន ភាពដដែលនេះយកមកប្រើប្រាស់ខាងក្រៅ ហើយបើមានការហេកយ៉ាងណានោះ ក៏គ.ជ.ប នៅតែគ្រប់គ្រងស្ថានការណ៍បាន ដោយសារច្បាប់ដើមត្រូវរក្សាទុកនៅក្នុងអង់ចងចាំប្រកបដោយសុវត្ថិភាព។សូមជម្រាបថា នៅថ្ងៃទី១៩ ខែកុម្ភៈ ឆ្នាំ២០២៦ រដ្ឋាភិបាលជប៉ុន នឹងផ្តល់ជំនួយសម្ភារបរិក្ខារ បច្ចេកទេសប្រព័ន្ធម៉ាស៊ីនមេ (SERVERS) សម្រាប់ការគ្រប់គ្រងទិន្នន័យអ្នកបោះឆ្នោត ដល់គណៈកម្មាធិការជាតិរៀបចំការបោះឆ្នោត (គ.ជ.ប) ក្រោមអធិបតីភាពឯកអគ្គរាជទូតជប៉ុនប្រចាំកម្ពុជា និងឯកឧត្តម ប្រាជ្ញា ចន្ទ ប្រធានគណៈកម្មាធិការជាតិរៀបចំការបោះឆ្នោត ដែលនឹងប្រព្រឹត្តទៅនៅទីស្តីការ គ.ជ.ប៕ អត្ថបទ៖ វង្ស សុភាព

កម្ពុជាបង្ហាញលទ្ធផលអំពីយុទ្ធនាការប្រឆាំងនឹងឧក្រិដ្ឋកម្មតាមអ៊ីនធឺណែត ជូនអង្គទូតបរទេសនានានៅកម្ពុជា

នៅថ្ងៃនេះ កម្ពុជាបង្ហាញពីយុទ្ធនាការប្រឆាំងនឹងឧក្រិដ្ឋកម្មតាមអ៊ីនធឺណែតជូនអង្គទូតបរទេស ក្រោយធ្វើប្រតិបត្តិការបង្ក្រាបយ៉ាងសកម្មក្នុងរយៈពេលចុងក្រោយនេះ ជាមួយនឹងការឃាត់ខ្លួនជនបរទេសរាប់ពាន់នាក់។ក្រសួងការបរទេស និងសហប្រតិបត្តិការអន្តរជាតិ នៅព្រឹកថ្ងៃទី១៨ ខែកុម្ភៈ ឆ្នាំ២០២៦ នេះ បានធ្វើបទបង្ហាញ ស្តីពីយុទ្ធនាការប្រឆាំងនឹងឧក្រិដ្ឋកម្មតាមអ៊ីនធឺណែតជូនអង្គទូតបរទេស ក្រោមអធិបតីភាពលោកជំទាវ អ៊ាត សោភា រដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ និងឯកឧត្តមសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រី និងជាប្រធានលេខាធិការដ្ឋាន នៃគណៈកម្មការប្រយុទ្ធប្រឆាំងនឹងការឆបោកតាមអ៊ីនធឺណែត។ អង្គទូតដែលអញ្ជើញចូលរួមមានចំនួន ២៥អង្គទូត។ឯកឧត្តមសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធាន លេខាធិការដ្ឋានគណៈកម្មការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ធ្លាប់បានបញ្ជាក់ថា កម្ពុជា នឹងបន្តកិច្ចសហប្រតិបត្តិការជាមួយបណ្តាប្រទេសជាដៃគូ ដើម្បីបន្តធ្វើការរួមគ្នាអនុវត្តប្រតិបត្តិការបង្ក្រាប ក្រុមឧក្រិដ្ឋកម្មឆបោកតាមប្រព័ន្ធបច្ចេកវិទ្យាប្រកបដោយសង្គតិភាព សំដៅធ្វើយ៉ាងណាបំបែកសម្បុក ក្រុមឧក្រិដ្ឋជនឱ្យដល់ឬសគល់។ សម្រាប់រាល់ករណីអំពើល្មើសដែលត្រូវបានស្រាវជ្រាវ កំណត់មុខសញ្ញា ជនសង្ស័យ ដោយផ្អែកតាមរបាយការណ៍ស្រាវជ្រាវច្បាស់លាស់ និងភស្តុតាងជាក់ស្តែង រហូតដល់នីតិវិធី បញ្ជូនដល់ដៃតុលាការនេះ បានបង្ហាញពីភាពម៉ឺងម៉ាត់របស់សមត្ថកិច្ចកម្ពុជា ក្នុងការអនុវត្តច្បាប់ និងបទ បញ្ជាដែលរាជរដ្ឋាភិបាលបានដាក់ចុះ ក្នុងក្របខណ្ឌនៃយុទ្ធនាការបោសសម្អាតការឆបោកតាមប្រព័ន្ធ បច្ចេកវិទ្យាទូទាំងប្រទេស។រាជរដ្ឋាភិបាលកម្ពុជា មានជំហររឹងមាំ និងជាក់លាក់ក្នុងការដាក់វិធានការបង្ក្រាប និងបោសសម្អាត ទីតាំង និងក្រុមឧក្រិដ្ឋជនឆបោកតាមប្រព័ន្ធបច្ចេកវិទ្យា ក៏ដូចជាការអនុវត្តនីតិវិធីលើមេក្លោង និងគូកន។ ទន្ទឹមនេះ កម្ពុជានឹងបន្តកិច្ចសហប្រតិបត្តិការជាមួយបណ្តាប្រទេស ជាដៃគូ ដើម្បីបន្តធ្វើការរួមគ្នាអនុវត្តប្រតិបត្តិការបង្ក្រាបប្រកបដោយសង្គតិភាពសំដៅធ្វើយ៉ាងណាបំបែកសម្បុកក្រុមឧក្រិដ្ឋជនឱ្យដល់ឫសគល់៕ អត្ថបទ៖ វង្ស សុភាព

ក្រុមហ៊ុន អ័រគីដេ ចុះ MOU ជាមួយសាលា ប៊ែលធី អន្តរជាតិ ដើម្បីផ្តល់អត្ថប្រយោជន៍ជូនដល់អតិថិជនក្រុមហ៊ុនទាំងពីរ

ក្នុងទិវាថ្ងៃបុណ្យនៃក្តីស្រឡាញ់ ១៤ កុម្ភៈកន្លងទៅនេះ ក្រុមហ៊ុន អ័រគីដេ ឌីវែឡុបម៉ិន និងសាលា ប៊ែលធី អន្តរជាតិ បានរៀបចំពិធីចុះហត្ថលេខាលើអនុស្សរណៈយោគយល់គ្នាលើកិច្ចសហប្រតិបត្តិការល្អដោយផ្តល់ជូននូវអត្ថប្រយោជន៍ជាច្រើនជូនដល់អតិថិជនបុរីអ័រគីដេ និងអ្នកអាណាព្យាបាលសិស្សនៃសាលា ប៊ែលធី អន្តរជាតិ។ ពិធីចុះហត្ថលេខាដ៏មានអត្ថន័យនេះ ធ្វើឡើងក្រោមវត្តមានរបស់ លោក គ្រួច សុភក្ត្រា នាយកចាត់ការទូទៅ នៃក្រុមហ៊ុន អ័រគីដេ ឌីវែឡុបម៉ិន និងឯកឧត្តម លី ប៊ុនឆៃ អគ្គនាយករង ប៊ែលធី គ្រុប និងជាប្រធានគណៈគ្រប់គ្រងនាយកសាខា នៃសាលា ប៊ែលធី អន្តរជាតិ ។ យោងតាមសេចក្តីប្រកាសព័ត៌មាន ក្រោយចប់ពិធីចុះហត្ថលេខានេះ បានឱ្យដឹង ភាគីទាំងពីរ បានព្រមព្រៀងគ្នា ធ្វើកិច្ចសហប្រតិបត្តិការល្អ ដោយផ្តល់នូវការសម្របសម្រួល និងអត្ថប្រយោជន៍បន្ថែមទៅវិញទៅមកជូនដល់អតិថិជន នៃក្រុមហ៊ុនទាំងពីរ ដែលរួមមាន ១. ផ្តល់ជូនអតិថិជនគ្រប់គម្រោងបុរីអ័រគីដេទាំងអស់ នៃក្រុមហ៊ុន អ័រគីដេ ឌីវែឡុបម៉ិន នូវអាហារូបករណ៍ ឬការបញ្ចុះតម្លៃរហូតដល់ ២0% សម្រាប់ការសិក្សានៅសាលា ប៊ែលធី អន្តរជាតិទី៣០ (សាខាអ័រគីដេ៦អា) ស្ថិតនៅក្នុងបុរី Orkide The Botanic City នេះផ្ទាល់ និងសាលា ប៊ែលធី អន្តរជាតិទី៣២ (សាខាក្រាំងធ្នង់) ដែលជាសាខាដែលនៅកៀកនឹងគម្រោងអ័រគីដេដឹពោធិ៍ចិនតុង។ ដែលការផ្តល់ជូននេះមានរយៈពេលវែងរហូតដល់ទៅ ៥ឆ្នាំសិក្សា។ និង២. ផ្តល់ជូនអ្នកអាណាព្យាបាលសិស្ស ឬបុគ្គលិករបស់សាលា ប៊ែលធី អន្តរជាតិទាំងអស់ នូវការបញ្ចុះតម្លៃពិសេសបន្ថែម ទៅលើការទិញផ្ទះ ឬបន្ទប់ខុនដូ ពីគ្រប់គម្រោងនៃក្រុមហ៊ុន Orkide Development។ រាល់លក្ខខណ្ឌនានាត្រូវបានអនុវត្ត។ លោក គ្រួច សុភក្ត្រា បានគូសបញ្ជាក់ថា រាល់គម្រោងបុរីអ័រគីដេទាំងអស់ មិនត្រឹមតែផ្តល់ជូននូវលំនៅដ្ឋានសម្រាប់រស់នៅប៉ុណ្ណោះទេ ក៏ផ្តល់ជូននូវសហគមន៍មួយប្រកបដោយផាសុកភាព សុវត្ថិភាព និងសុខដុមរមនា។ ជាក់ស្តែងនៅគម្រោង The Botanic City នេះផ្ទាល់ យើងនៅតែបន្តអភិវឌ្ឍនូវហេដ្ឋារចនាសម្ព័ន្ធថ្មីៗ ដូចជា៖ មជ្ឈមណ្ឌលពហុកីឡា ដឹប៊ូតានិចស្ព័តក្លឹបដ៏ធំផ្តាច់គេ ដែលទើបតែបុកគ្រឹះសាងសង់កាលពីពេលថ្មីៗនេះ ដែលផ្តល់ជូននូវកីឡាចម្រុះ និងជាទីកន្លែងលំហែកម្សាន្តដ៏សម្បូរបែប។ ឯកឧត្តម លី ប៊ុនឆៃ បានមានប្រសាសន៍ថា សាលា ប៊ែលធី អន្តរជាតិ មាន ៣៣ទីតាំង និងកម្មវិធីសិក្សា ៥ធំៗ ត្រូវបានទទួលស្គាល់គុណភាពទាំងកម្រិតជាតិ និងអន្តរជាតិ។ ក្នុងនោះ សាលាទទួលបាន ISO កម្រិតជាតិពីវិទ្យាស្ថានស្តង់ដារកម្ពុជា និងកម្រិតអន្តរជាតិពីស្ថាប័ន ACM និង UKAS នៃចក្រភពអង់គ្លេស និងស្ថានប័ន AXE Register នៃសហភាពអឺរ៉ុប ដោយបានរៀបចំបំពេញតាមលក្ខខណ្ឌរបស់ ISO គឺប៊ែលធីស្តង់ដារ ដែលមានគំរូឯកភាពគ្នាតែមួយសម្រាប់អនុវត្តដូចៗគ្នានៅគ្រប់ទីតាំងប៊ែលធីទាំងអស់ ដូចជាស្តង់ដារអគារ បន្ទប់រៀន កម្មវិធីសិក្សាធំៗទាំង៥ កម្មវិធីសិក្សាបន្ថែមទាំង១២ ព្រមទាំងគុណវុឌ្ឍគ្រូបង្រៀន។ សូមបញ្ជាក់ថា គម្រោង Orkide The Botanic City ជាសហគមន៍រស់នៅដ៏ធំមួយ ស្ថិតលើផ្ទៃដីសរុបជាង ២០០ហិចតា អមដោយទន្លេសងខាងធំៗពីរ គឺទន្លេសាប និងទន្លេមេគង្គ។ គម្រោងនេះ ត្រូវបានបែងចែកជាច្រើនផ្នែកទៀត ដែលមានសក្តានុពលស្អាតដាច់គេ ធំជាងគេនៅក្នុងតំបន់ ដែលភ្ជាប់ជាមួយនឹងផ្លូវសាធារណៈសំខាន់ៗជាច្រើនខ្សែផងដែរ។ ជាពិសេស Orkide The Botanic City ក៏ជាគម្រោងបុរីតែមួយគត់ក្នុងខណ្ឌជ្រោយចង្វារ ដែលផ្តល់ជូននូវសួនច្បារធំទូលាយ និងសម្បូរបែប ផ្លូវដាច់ដោយឡែកសម្រាប់ជិះកង់ ដែលជាក្តីប្រាថ្នានៃការរស់នៅសម្រាប់គ្រួសារទំនើប និងបច្ចុប្បន្ន មានប្រជាពលរដ្ឋកំពុងរស់នៅក្នុងគម្រោងប្រមាណជាង ៣ ០០០គ្រួសារ៕អត្ថបទ៖ ឈិត បូរ៉ាវី

មួយឆ្នាំ២០២៥ មនី្ទរពេទ្យកុមារជាតិ បានពិនិត្យ ពិគ្រោះជំងឺជូនពលរដ្ឋមិនសម្រាកនៅមន្ទីរពេទ្យជាង ២៤ម៉ឺនករណី

ឆ្នាំ២០២៥កន្លងមកនេះ មនី្ទរពេទ្យកុមារជាតិ បានពិនិត្យ ពិគ្រោះជំងឺក្រៅ មាន ២៤៩,១២៦ករណីអ្នកជំងឺសម្រាកពេទ្យ មាន ៥៥,៤០៥ ករណី អត្រាប្រើប្រាស់គ្រែនៅមន្ទីរពេទ្យ ១៥២% ដោយមានគ្រែសម្រាប់អ្នកជំងឺ ៤០០ គ្រែ។ការលើកឡើងរបស់ឯកឧត្ដមវេជ្ជបណ្ឌិត ញឹប អង្គាបុស្ស នាយកមន្ទីរពេទ្យកុមារជាតិ យ៉ាងដូច្នេះ ក្នុងពិធីបើកសន្និបាតបូកសរុបការងារឆ្នាំ២០២៥ និងលើកទិសដៅឆាំ្ន២០២៦ របស់មន្ទីរពេទ្យកុមារជាតិ ក្រោមអធិបតីភាពឯកឧត្តមសាស្រ្តាចារ្យ ឈាង រ៉ា រដ្ឋមន្រី្តក្រសួងសុខាភិបាល នាព្រឹកថ្ងៃទី១៨ ខែកុម្ភៈ ឆ្នាំ២០២៦នេះ។ ឯកឧត្តមវេជ្ជបណ្ឌិត នាយកមនី្ទរពេទ្យកុមារជាតិ បន្តថា តាមគំរោងផែនការសកម្មភាពឆ្នាំ២០២៥ របស់មន្ទីរពេទ្យកុមារជាតិ ដោយមានការគំាទ្រជាគោលនយោបាយ និងយុទ្ធសាស្ត្រយ៉ាងពេញលេញពីក្រសួងសុខាភិបាលដៃគូរអភិវឌ្ឍនានារួមជាមួយ នឹងការប្តេជ្ញាចិត្តខ្ពស់របស់ថ្នាក់ដឹកនាំ និងបុគ្គលិកមន្ទីរពេទ្យកុមារជាតិ ទំាងមូលបានធ្វើអោយមន្ទីរពេទ្យកុមារជាតិ សម្រេចបាននូវសមិទ្ធផលមួយចំនួនគួរជាទីមោទនៈ និងសក្តិសមជា មន្ទីរពេទ្យថ្នាក់ជាតិ ក្នុងការចូលរួមគំាទ្របច្ចេកទេសដល់ មន្ទីរពេទ្យកុមារជាតិនានានៅទូទាំងប្រទេស និងចូលរួមក្នុងការកាត់បន្ថយអត្រាមរណៈភាពកុមារ ទារក បានសមស្រប ទៅតាមគោលដៅដែលបានកំណត់ដោយក្រសួងសុខាភិបាល និងដោយមានការប្តេជ្ញាចិត្តខ្ពស់អនុវត្តតាមគោលនយោបាយរបស់រាជរដ្ឋាភិបាលក្រោមការដឹកនាំដ៏វាងវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងយុទ្ធសាស្ត្ររបស់ក្រសួងសុខាភិបាល ក្រោមការដឹកនាំរបស់ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល។ឯកឧត្តមវេជ្ជបណ្ឌិត ញឹប អង្គាបុស្ស បញ្ជាក់ថា មន្ទីរពេទ្យកុមារជាតិ មានបុគ្គលិកសរុបចំនួន ៧៩៩នាក់ ក្នុងនេះអត្រាភេទស្រី មានច្រើនជាភេទ ប្រុស ដោយភេទស្រីមាន ៤៧៣នាក់ ស្មើ ៦០% ភេទប្រុស ៣២៦នាក់ ស្មើ ៤០%។ មន្ទីរពេទ្យនៅក្នុងឆ្នាំ២០២៥ ទទួលប្រភេទអ្នកជំងឺដែលប្រើប្រាស់ សេវាមន្ទីរពេទ្យរួមមាន៖ - បង់ថ្លៃ មានចំនួន៥៦% - ប្រើប្រាស់ ប.ស.ស មានចំនួន ២៦% - មូលនិធិសមធម៌ មានចំនួន១៧% - មិនបង់ថ្លៃ (គ្មានលទ្ធភាព)១%។ ដើម្បីចូលរួមឆ្លើយតបទៅនឹងការប្តេជ្ញាចិត្តរបស់រាជរដ្ឋាភិបាលនិងក្រសួងសុខាភិបាល ក្នុងការលើកកំពស់គុណភាព លើវិស័យសុខាភិបាលរួមជាមួយ និងការគាំទ្រមិនចេះនឿយហត់ពីសំណាក់ ថ្នាក់ដឹកនាំក្រសួងសុខាភិបាល ថ្នាក់ដឹកនាំព្រមទាំងបុគ្គលិកមន្ទីរពេទ្យកុមារជាតិទាំងអស់ សូមធ្វើការប្តេជ្ញាចិត្តយ៉ាងក្លៀវក្លាក្នុងការចូលរួមលើកកំពស់សេវារបស់មន្ទីរពេទ្យកុមារជាតិ ទាំងបរិមាណ និងគុណភាព ដោយផ្តោតជាពិសេសទៅលើ ក្រមសីសធម៌វិជ្ជាជីវៈដើម្បីពង្រឹងសេវា មន្ទីរពេទ្យកុមារជាតិ ឲ្យឈានទៅដល់កម្រិត បទដ្ឋានមួយដែលផ្តល់នូវទំនុកចិត្តខ្ពស់ពីប្រជាពលរដ្ឋ៕អត្ថបទ រដ្ឋា

កម្ពុជា រក្សាកំណើនជើងហោះហើរទ្វេទិសជាង១០ភាគរយ ពីមួយសប្តាហ៍ទៅមួយសប្តាហ៍

អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលបានឱ្យដឹងថា ពីមួយសប្តាហ៍ទៅមួយសប្តាហ៍ នៅក្នុងខែមករា និងកុម្ភៈ ដើមឆ្នាំ២០២៦នេះ ទទួលកំណើនជើងយន្តហោះហើរចេញចូលកម្ពុជា ក្នុងរង្វង់ជាង ១០ភាគរយ។ឯកឧត្តម ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានប្រាប់BTV ថ្ងៃទី១៨ ខែកុម្ភៈ នេះថា បច្ចុប្បន្ន គ្រប់ក្រុមហ៊ុនអាកាសចរណ៍ជាតិ និងអន្តរជាតិ ទាំង៣៦ ដែលបានប្រតិបត្តិការបើកជើងហោះហើរចេញចូលកម្ពុជា មានស្ថិរភាព និងរក្សាកំណើនជើងហោះហើរបានល្អប្រសើរក្នុងនោះ សម្រាប់អាកាសយានដ្ឋានអន្តរជាតិតេជោ TIA នៅរាជធានីភ្នំពេញ មានជើងយន្តហោះហើរ ចេញចូលជិត១០០០ជើង អាកាសយានដ្ឋានអន្តរជាតិខេត្តសៀមរាប ទទួលជើងហោះហើរទ្វេទិស ប្រមាណ៤០០ជើង និងខេត្តព្រះសីហនុ ប្រមាណ៧០ជើង។ឯកឧត្តម បានឱ្យដឹងបន្តថា ថ្មីៗនេះ រដ្ឋលេខាធិការដ្ឋានអាកាសចរណ៍ស៊ីវិល បានចរចា និងព្រម ព្រៀងជាមួយក្រុមហ៊ុនអាកាសចរណ៍នៅប្រទេសអង់គ្លេស សហការជាមួយក្រុមហ៊ុនអាកាសចរណ៍នានាទៀត រួមគ្នាផ្សព្វផ្សាយលក់សំបុត្រយន្តហោះ ដឹកជញ្ជូនអ្នកដំណើរ និងទេសចរពីប្រទេសអង់គ្លេសមកប្រទេសកម្ពុជា ។អ្នកដំណើរអន្តរជាតិ បានលើកឡើងថា នៅអាកាសយានដ្ឋានអន្តរជាតិតេជោ ក្នុងអំឡុងពេលនេះ គឺហាក់មានភាពមមាញឹកខ្លាំង ក្នុងការទទួលជើងហោះចេញចូល។ អ្នកដំណើរទាំងនោះ បានសន្យាថានឹងជួយផ្សព្វផ្សាយពីកម្ពុជា ដែលមានទីតាំងទស្សនាច្រើន ពិសេសទិសដៅវិនិយោគ និងទេសចរណ៍នៅរាជធានីភ្នំពេញ ខេត្តសៀមរាប ខេត្តព្រះសីហនុ និងខេត្តតាមដងទន្លេមេគង្គ ជាដើមគឺមានសក្តានុពល និងមានសុវត្ថិភាពល្អប្រសើរ។របាយការណ៍រដ្ឋលេខាធិការដ្ឋានអាកាសចរណ៍ស៊ីវិល នៅក្នុងឆ្នាំ២០២៥ តាមអាកាសយដ្ឋាន អន្តរជាតិធំៗទាំង៤នៅកម្ពុជា ទទួលបានអ្នកដំណើរអន្តរជាតិប្រមាណជិត៧លាននាក់ កើន១៣ភាគរយ ចំនួនជើងហោះហើរទេ្វទិសចេញចូលកម្ពុជា មានប្រមាណជាង៥៨០០០ជើង កើនឡើង១១ភាគរយ បើប្រៀបធៀបរយៈដូចគ្នាក្នុងឆ្នាំ២០២៤៕ អត្ថបទ៖ ស៊ុម សុខជា

អ្នកនាំពាក្យ៖ គុណតម្លៃសន្តិភាពរបស់កម្ពុជា ត្រូវបានទទួលស្គាល់ជាសាកលគឺកើតចេញពីការលះបង់របស់ថ្នាក់ដឹកនាំកម្ពុជា

ភ្នំពេញ៖ គុណតម្លៃសន្តិភាពរបស់កម្ពុជាដែលត្រូវបានទទួលស្គាល់ជាសាកល គឺបានកើតឡើងពីកិច្ចខិតខំប្រឹងប្រែង និងការលះបង់ដ៏ធំធេងរបស់ថ្នាក់ដឹកនាំរបស់កម្ពុជា ពោលគឺកម្ពុជាបានរកឃើញរូបមន្តបញ្ចប់សង្គ្រាមដ៏រ៉ាំរ៉ៃដែលបានអូសបន្លាយជាច្រើនទសវត្សរ៍តាមរយៈនយោបាយឈ្នះឈ្នះរបស់សម្តេចតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រី ហើយបាននាំមកនូវសន្តិភាពពេញលេញ និងការផ្សះផ្សារបង្រួបបង្រួមជាតិខ្មែរក្នុងរយៈពេលជិត ៣ទសវត្សរ៍ចុងក្រោយ និងបន្តថែរក្សាសន្ដិភាពនេះដោយសម្ដេចធិបតី ហ៊ុន ម៉ាណែត នាយករដ្ឋមន្រ្ដីបច្ចុប្បន្ន។ នេះបើតាមការបញ្ជាក់របស់អ្នកនាំពាក្យរាជរដ្ឋាភិបាលកម្ពុជា។ ឯកឧត្តម ប៉ែន បូណា អ្នកនាំពាក្យ រាជរដ្ឋាភិបាលកម្ពុជា បានថ្លែងតាមរយៈសន្និសីទសារព័ត៌មាននៅថ្ងៃទី១៨ ខែកុម្ភៈ ឆ្នាំ២០២៦នេះថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានិងគណៈប្រតិភូជាន់ខ្ពស់ កំពុងត្រៀមអញ្ជើញចូលរួមកិច្ចប្រជុំដំបូងនៃ ក្រុមប្រឹក្សាសន្តិភាព (The Board of Peace) នៅថ្ងៃទី១៩ ខែកុម្ភៈ ឆ្នាំ ២០២៦ នៅឯវិទ្យាស្ថានសន្តិភាពសហរដ្ឋអាម៉េរិក ដូណាល់ ជេ ត្រាំ ក្នុងរដ្ឋធានីវ៉ាស៊ីនតោន តបតាមការអញ្ជើញរបស់ឯកឧត្តមប្រធានាធិបតីសហរដ្ឋអាម៉េរិក Donald J. Trump កាលពីថ្ងៃទី១៦ ខែមករា ឆ្នាំ២០២៦។ ឯកឧត្តមបន្តថា កិច្ចប្រជុំនេះ គឺជាការចាប់ផ្តើមជាផ្លូវការនៃអាណត្តិការងាររបស់ក្រុមប្រឹក្សាសន្តិភាព ស្របតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលត្រូវបានអនុម័តកាលពីថ្ងៃទី១៧ ខែវិច្ឆិកា ឆ្នាំ២០២៥ ក្នុងគោលដៅជំរុញសន្តិភាព និងកិច្ចខិតខំប្រឹងប្រែងឆ្ពោះទៅរកការកសាងឡើងវិញនៃតំបន់ហ្គាហ្សា។ មេដឹកនាំដែលអញ្ជើញចូលរួមកិច្ចប្រជុំនេះក៏រំពឹងថា នឹងពិភាក្សាគ្នាយ៉ាងទូលំទូលាយអំពីសន្តិភាព ស្ថិរភាព និងការអភិវឌ្ឍក្នុងតំបន់ ក៏ដូចជាក្នុងពិភពលោក។សម្តេចមហាបវរធិបតី នាយករដ្ឋមន្ត្រី ក៏ធ្លាប់បានគូសបញ្ជាក់ថា ការចូលរួមរបស់កម្ពុជាក្នុងក្រុមប្រឹក្សាសន្តិភាពគឺដើម្បីបង្ហាញពីឆន្ទៈរបស់កម្ពុជាក្នុងការគាំទ្រ និងរួមចំណែកដល់ការលើកកម្ពស់ការរក្សាសន្តិភាពសកលពីព្រោះកម្ពុជាមានសុឆន្ទៈ និងតែងតែប្រកាន់ខ្ជាប់នូវគោលការណ៍ស្រឡាញ់សន្តិភាព ហើយតែងតែគាំទ្រនិងរួមចំណែក ដល់ការកសាង និងរក្សាសន្តិភាពជារៀងរហូតមក ជាពិសេសតាមរយៈការបញ្ជូនកងកម្លាំងរក្សាសន្តិភាព ក្រោមឆ័ត្រអង្គការសហប្រជាជាតិទៅបំពេញបេសកកម្មក្នុងបណ្តាប្រទេសមួយចំនួនដែលមានសង្រ្គាម។ អ្នកនាំពាក្យរាជរដ្ឋាភិបាលបញ្ជាក់ថា គុណតម្លៃសន្តិភាពរបស់កម្ពុជាដែលត្រូវបានទទួលស្គាល់ជាសាកលកើតឡើងពីកិច្ចខិតខំប្រឹងប្រែង និងការលះបង់ដ៏ធំធេងរបស់ថ្នាក់ដឹកនាំនៃយើងពោលគឺកម្ពុជាបានរកឃើញរូបមន្តបញ្ចប់សង្គ្រាមដ៏រ៉ាំរ៉ៃដែលបានអូសបន្លាយជាច្រើនទសវត្សរ៍តាមរយៈនយោបាយឈ្នះឈ្នះរបស់សម្តេចតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្ត្រី ហើយបាននាំមកនូវសន្តិភាពពេញលេញនិងការផ្សះផ្សារបង្រួបបង្រួមជាតិខ្មែរក្នុងរយៈពេលជិត៣ទសវត្សរ៍ចុងក្រោយ។ កម្ពុជាក៏បានប្រើប្រាស់កាលានុវត្តភាពនៃសន្តិភាពដ៏កម្រនេះដើម្បីអភិវឌ្ឍន៍ប្រទេសឱ្យងើបចេញពីគំនរផេះផង់ ពីអន្លង់ឈាមនិងទឹកភ្នែក មកស្គាល់ការរីកចម្រើនក្នុងសម័យទំនើបដូចសព្វថ្ងៃ។ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីបច្ចុប្បន្ន គឺជាអ្នកបន្តឈរការពារយ៉ាងប្តូរផ្តាច់នូវសន្តិភាពនិងចាត់ទុកសន្តិភាពជាអាទិភាពមច្បងបំផុតមួយរបស់រាជរដ្ឋាភិបាល។ អ្នកនាំពាក្យបន្តថា លើសពីនេះកម្ពុជាតែងចូលរួមយ៉ាងសកម្មក្នុងការថែរក្សាសន្តិភាពក្នុងតំបន់ ក៏ដូចជាក្នុងសាកលលោក ពោលគឺ ទីណាមានសកម្មភាពសន្តិភាព ទីនោះតែងតែមានការគាំទ្រ និងការចូលរួមចំណែកពីកម្ពុជាដោយមិនចេះនឿយហត់។ នេះគឺជាហេតុផលដែលធ្វើឱ្យពិភពលោកនឹកឃើញកម្ពុជាភ្លាមនៅពេលនិយាយពីសន្តិភាព។ ការអញ្ជើញសម្តេចបវរធិបតី ហ៊ុន ម៉ាណែត ក្នុងនាមនាយករដ្ឋមន្ត្រីកម្ពុជាឱ្យចូលជាសមាជិកស្ថាបនិកនៃក្រុមប្រឹក្សាសន្តិភាពពីសំណាក់ឯកឧត្តមប្រធានាធិបតី ដូណាល់ត្រាំ និងការសម្រេចចូលរួមរបស់កម្ពុជាតាមការអញ្ជើញនេះ គឺជាឧទាហរណ៍ជាក់ស្តែងដែលបញ្ជាក់ពីការទទួលស្គាល់គុណតម្លៃសន្តិភាពរបស់កម្ពុជានិងសុឆន្ទៈមិនចេះរីងស្ងួតរបស់កម្ពុជាក្នុងបុព្វហតុសន្តិភាពសាកល។ បើតាមឯកឧត្តម ប៉ែន បូណា វត្តមានរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅឯកិច្ចប្រជុំក្រុមប្រឹក្សាសន្តិភាពពេលនេះនឹងធ្វើឱ្យគុណតម្លៃសន្តិភាពរបស់កម្ពុជាត្រូវបានពង្រឹង និងពង្រីកថែមទៀតនៅលើឆាកអន្តរជាតិ។ ពិភពលោកនឹងសម្លឹងមើលកម្ពុជាកាន់តែស៊ីជម្រៅថា ជាប្រទេសដែលមានឆន្ទៈស្រឡាញ់និងការពារសន្តិភាពយ៉ាងពិតប្រាកដ។ បន្ថែមពីលើនេះ កម្ពុជាក៏ជាប្រទេសដែលការពារច្បាប់អន្តរជាតិយ៉ាងសកម្មតាមរយៈការបើកចំហយ៉ាងទូលំទូលាយក្នុងដំណោះស្រាយបញ្ហាព្រំដែនដោយគោរពយ៉ាងម៉ឺងម៉ាត់និងស្មោះត្រង់នូវអនុសញ្ញា សន្ធិសញ្ញា គោលការណ៍ និងច្បាប់អន្តរជាតិ។ឯកឧត្តមបន្តថា ជាក់ស្តែង លិខិតរបស់សម្តេចមហាបវរធិបតី ហ៊ុន ម៉ាណែត ទៅកាន់ឯកឧត្តម អេម៉ានុយអែល ម៉ាក្រុង ប្រធានាធិបតីនៃសាធារណរដ្ឋបារាំងកាលពីថ្ងៃទី៤ ខែកុម្ភៈ ឆ្នាំ ២០២៦ ដើម្បីសុំឱ្យបារាំងពិចារណាផ្តល់ការប្រឹក្សាយោបល់ និងសម្របសម្រួលដល់ការប្រគល់និងទទួលឯកសារប្រវត្តិសាស្ត្រ និងបច្ចេកទេសពាក់ព័ន្ធបញ្ហាព្រំដែនកម្ពុជាថៃ សបញ្ជាក់យ៉ាងច្បាស់ពីការគោរព និងផ្តល់តម្លៃដល់ច្បាប់អន្តរជាតិ និងការចង់បានដំណោះស្រាយដោយសន្តិវិធីរបស់កម្ពុជា។ អ្នកនាំពាក្យរាជរដ្ឋាភិបាលគូសបញ្ជាក់ជាថ្មីថា ក្នុងស្មារតីស្រឡាញ់សន្តិភាពនិងគោរពច្បាប់អន្តរជាតិ កម្ពុជានៅតែបន្តអនុវត្តយ៉ាងម៉ឺងម៉ាត់នូវបទឈប់បាញ់ និងគ្រប់ចំណុចនៃសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ ក៏ដូចជាកិច្ចព្រមព្រៀងផ្សេងទៀតដែលមានស្រាប់។ កម្ពុជាប្រកាន់ជំហរម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់ដាច់ខាតនូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ៕

បណ្ដាញសង្គម

ព័ត៌មានថ្មីៗ

កូរ៉េខាងជើងច្រានចោលការចោទប្រកាន់របស់អាមេរិកថា ទីក្រុងព្យុងយ៉ាង គឺជាការគំរាមកំហែងតាមប្រព័ន្ធអ៊ីនធឺណិត

ប្រធានាធិបតីគុយបាបរិហារទណ្ឌកម្មថ្មីរបស់សហរដ្ឋអាមេរិកលើប្រទេសរបស់លោក

មនុស្ស ១១នាក់ស្លាប់ ក្នុងហេតុការណ៍ក្រឡាប់រថយន្តក្រុងនៅភាគខាងលិចម៉ិកស៊ិក

ក្រុមមន្រ្តីនិយាយថា សហរដ្ឋអាមេរិកដកទាហាន ៥ពាន់នាក់ចេញពីប្រទេសអាល្លឺម៉ង់

ជម្លោះនៅតែកើតមានរវាងក្រុមហេសបូឡា និងអ៊ីស្រាអែលនៅតំបន់ភាគខាងត្បូងលីបង់

លោក Trump និយាយថា មានលទ្ធភាពដែលអាមេរិកអាចចាប់ផ្តើមវាយប្រហារអ៊ីរ៉ង់ម្តងទៀត

មនុស្សយ៉ាងហោច ៩នាក់ស្លាប់ ក្នុងហេតុការណ៍អគ្គិភ័យនៅទីក្រុងញូវដែល្លី ប្រទេសឥណ្ឌា

សហរដ្ឋអាមេរិកអនុម័តលក់អាវុធតម្លៃ ៨,៦ពាន់លានដុល្លារដល់សម្ព័ន្ធមិត្តមជ្ឈិមបូព៌ា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877