នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
អ្នកនាំពាក្យ៖ កម្មវិធីនយោបាយ និងការអភិវឌ្ឍរបស់កម្ពុជា បាននិងកំពុងដំណើរការទៅមុខជានិច្ច បើទោះបីកម្ពុជារងការឈ្លានពានពីថៃ
ប្រតិភូសភាប្រើភាសាបារាំង ១៧ប្រទេសធ្វើសិក្ខាសាលា អំពីក្របខ័ណ្ឌ និងការប្រើប្រាស់ឌីជីថលក្នុងសភា
គណបក្សប្រជាជនកម្ពុជា បានទទួលសមាជិកថ្មីជិត១ ០០០នាក់ នៅសង្កាត់រការធំ ខេត្តកំពង់ស្ពឺ
ក្រសួងទេសចរណ៍បើកយុទ្ធនាការ ទស្សនាកម្ពុជានៅរដូវកាលបៃតងឆ្នាំ ២០២៦

ព័ត៌មានជាតិ

សភាកម្ពុជា ត្រៀមលក្ខណៈធ្វើជាម្ចាស់ផ្ទះរៀបចំព្រឹត្តិការណ៍អន្តរជាតិធំៗជាច្រើនក្នុងឆ្នាំ២០២៦នេះ ដើម្បីពង្រឹងឥទ្ធិពល «ការទូតសភា» លើឆាកតំបន់ និងសកលលោក

2026/02/18 02:08:35 pm        184
Facebook Telegram Linkin
ភ្នំពេញ៖ ថ្នាក់ដឹកនាំអគ្គលេខាធិការដ្ឋានរដ្ឋសភា បានបើកកិច្ចប្រជុំដើម្បីត្រៀមរៀបចំការងារបច្ចេកទេសនិងខ្លឹមសារ ក្នុងគោលដៅបម្រើសេវាកម្មជូនថ្នាក់ដឹកនាំ និងតំណាងរាស្ត្រត្រៀមចូលរួមមហាសន្និបាតអន្តរសភាអាស៊ាន (AIPA) លើកទី៤៧ នៅប្រទេសហ្វីលីពីន ក៏ដូចជាការត្រៀមលក្ខណៈរៀបចំព្រឹត្តិការណ៍អន្តរជាតិសំខាន់ៗជាច្រើនទៀត ដែលកម្ពុជាគ្រោងធ្វើជាម្ចាស់ផ្ទះក្នុងឆ្នាំ២០២៦នេះ។កិច្ចប្រជុំដែលបានប្រព្រឹត្តទៅនាព្រឹកថ្ងៃទី១៨ ខែកុម្ភៈ ឆ្នាំ២០២៦នេះ ស្ថិតក្រោមអធិបតីភាព ឯកឧត្តម ឡេង ប៉េងឡុង អគ្គលេខាធិការរដ្ឋសភា និង ឯកឧត្តមបណ្ឌិត កែវ ពិសិដ្ឋ អគ្គលេខាធិការរងប្រចាំការ និងជានាយកខុទ្ទកាល័យសម្ដេចប្រធានរដ្ឋសភា ដោយមានការចូលរួមពីថ្នាក់ដឹកនាំនៃអគ្គនាយកដ្ឋានទំនាក់ទំនងអន្តរជាតិ ពិធីការ និងព័ត៌មាន ដើម្បីពិនិត្យលើប្រតិទិនការងារ និងខ្លឹមសារនយោបាយសំខាន់ៗ។យោងតាមប្រតិទិនការងាររបស់អន្តរសភាអាស៊ាន (AIPA) សភាកម្ពុជាបានត្រៀមខ្លួនរួចជាស្រេចនូវ   "ទស្សនទានគន្លឹះ" ដើម្បីធ្វើវិភាគទានដល់ការសម្រេចបាន នូវសុខដុមនីយកម្ម និងការរីកចម្រើនក្នុងគ្រួសារអាស៊ាន ដោយផ្ដោតលើការទាញយកផល ប្រយោជន៍ជាអតិបរមាពីយន្តការការទូតសភា ដើម្បីបម្រើផលប្រយោជន៍ជាតិ និងប្រជាជនជាចម្បង។ បន្ថែមលើនេះ ក្នុងឆ្នាំ២០២៦ កម្ពុជានឹងបំពេញតួនាទីជាម្ចាស់ផ្ទះនៃការរៀបចំព្រឹត្តិការណ៍ការទូតកម្រិតខ្ពស់ជាបន្តបន្ទាប់ រួមមានសិក្ខាសាលាថ្នាក់ជាតិស្ដីពីអាកាសធាតុ ក្រោមការគាំទ្រពីលេខាធិការដ្ឋានអាស៊ាន និងអង្គការ Tara Climate ដើម្បីជំរុញដំណោះស្រាយលើបញ្ហាបរិស្ថានសកល។ទន្ទឹមនឹងនេះ កម្ពុជានឹងរៀបចំកិច្ចប្រជុំស្ដីពីក្របខណ្ឌអាហារូបត្ថម្ភ ដែលជាយន្តការតំបន់ដ៏សំខាន់ក្នុងការឆ្លើយតបទៅនឹងបញ្ហាសន្តិសុខស្បៀង និងសុខុមាលភាព រួមទាំងការធ្វើជាម្ចាស់ផ្ទះនៃសន្និសីទប្រធានសភានៃអន្តរសភា (ISC) ដែលជាវេទិកាកម្រិតសកលសម្រាប់ថ្នាក់ដឹកនាំសភាជុំវិញពិភពលោក ក្នុងការរួមគ្នាដោះស្រាយបញ្ហាប្រឈមសកល និងការពង្រឹងសន្តិភាព។ ជាមួយគ្នានេះ វេទិកាសភាអាស៊ីប៉ាស៊ីហ្វិកស្ដីពីសុខភាពពិភពលោក ក៏នឹងត្រូវរៀបចំឡើងក្នុងគោលបំណងកសាងឆន្ទៈនយោបាយ និងពង្រឹងសមត្ថភាពសមាជិកសភាក្នុងវិស័យសុខាភិបាលផងដែរ។ស្ថាប័ននីតិប្បញ្ញត្តិកម្ពុជា ស្ថិតក្រោមការដឹកនាំដ៏ខ្ពង់ខ្ពស់របស់ សម្ដេចតេជោ ហ៊ុន សែន ប្រធានព្រឹទ្ធសភា និង សម្ដេចមហារដ្ឋសភាធិបតី ឃួន សុដារី ប្រធានរដ្ឋសភា បាននិងកំពុងបង្ហាញនូវសមត្ថភាពដឹកនាំដ៏លេចធ្លោក្នុងកិច្ចសហប្រតិបត្តិការអន្តរជាតិ តាមរយៈការប្រកាន់ខ្ជាប់នូវយន្តការច្បាប់ អន្តរជាតិ និងការចែករំលែកឧត្តមានុវត្តន៍ កម្ពុជាបានបញ្ជាក់ ពីចេតនាពិតប្រាកដក្នុងការលើកកម្ពស់សន្តិភាព ស្ថិរភាព និងលទ្ធិប្រជាធិបតេយ្យ។គួរបញ្ជាក់ថា កម្ពុជាបានចូលជាសមាជិកពេញសិទ្ធិនៃអាយប៉ា (AIPA) តាំងពីឆ្នាំ១៩៩៩ និងធ្លាប់បានធ្វើជាម្ចាស់ផ្ទះមហាសន្និបាតចំនួន ៣លើករួចមកហើយ។ សម្រាប់ប្រតិទិនការងារឆ្នាំ២០២៦នេះ សភាកម្ពុជាបានត្រៀមលក្ខណៈក្នុងកម្មវិធីសរុបចំនួន ៣២ ដើម្បីឆ្លើយតបទៅនឹងចក្ខុវិស័យអាស៊ានឆ្នាំ២០៤៥ ឱ្យសម្រេចបាននូវលទ្ធផលជាផ្លែផ្កាជូនជាតិមាតុភូមិ៕

ជប៉ុនផ្តល់ថវិកាប្រមាណ ១លានដុល្លារដល់អង្គការ ILO ដើម្បីពង្រឹងយន្តការឆ្លើយតបឱ្យកាន់តែមានប្រសិទ្ធភាព សម្រាប់ជួយលើកកម្ពស់ការផ្តល់ឱកាសការងារ ដល់អតីតពលករកម្ពុជាវិលត្រឡប់មកពីប្រទេសថៃ

2026/02/18 01:24:10 pm        173
Facebook Telegram Linkin
ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញធ្វើជាសក្ខីភាពក្នុងពិធីចុះហត្ថលេខាលើគម្រោងស្តីពី «ការលើកកម្ពស់មុខរបរនិងការងារដល់ពលករចំណាកស្រុកត្រឡប់មកវិញ ដែលរងផលប៉ះពាល់ពីជម្លោះព្រំដែន» ដោយឯកឧត្ដម អ៊ូអិណុ អាត់ស៊ូស៊ី (UENO Atsushi) ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំកម្ពុជា និងលោកស្រី ស៊ាវយៀន ឈាន (Xiaoyan Qian) នាយិកាការិយាល័យអង្គការ ILO ប្រចាំកម្ពុជា ឡាវ និងថៃ នាព្រឹកថ្ងៃទី១៨ ខែកុម្ភៈ ឆ្នាំ២០២៦ នៅស្ថានទូតជប៉ុន។ គម្រោងនេះមានរយៈពេល២៤ខែ និងដឹកនាំដោយ ILO និងក្រសួងការងារ និងបណ្ដុះបណ្ដាលវិជ្ជាជីវៈ ដោយមានការគាំទ្រពីក្រសួងការបរទេសជប៉ុនក្នុងទំហំទឹកប្រាក់ប្រមាណជា ១លានដុល្លារអាមេរិក ដែលនឹងជួយពលករចំណាកស្រុកឲ្យទទួលបានការងារសមរម្យ និងធ្វើសមាហរណកម្មចូលក្នុងសេដ្ឋកិច្ចក្នុងស្រុក តាមរយៈកញ្ចប់រួមគ្នានៃការគាំពារ មុខរបរនិងការងារ និងសេវាកម្មជំនាញ។ សកម្មភាពសំខាន់ៗក្នុងគម្រោងរួមមាន៖ ការបង្កើតមជ្ឈមណ្ឌលធនធានពលករចំណាកស្រុកថ្មីចំនួន ៣ ក្នុងខេត្តដែលមានពលករវិលត្រឡប់មកវិញច្រើន ដូចជា៖ ខេត្តឧត្តរមានជ័យ ពោធិ៍សាត់ និងព្រះវិហារ ដើម្បីផ្តល់សេវាពិគ្រោះយោបល់ ការចុះផ្សព្វផ្សាយ ការប្រមូលទិន្នន័យ និងជំនួយផ្នែកច្បាប់។ គម្រោងនេះក៏នឹងគាំទ្រដល់ការឆ្លើយតបផ្នែកការងារ តាមរយៈការពិគ្រោះយោបល់ជាមួយនិយោជក និងអង្គការវិជ្ជាជីវៈកម្មករនិយោជិត ពិព័រណ៍ការងារនៅកម្រិតឃុំ/សង្កាត់ និងយុទ្ធនាការលើកកម្ពស់ការយល់ដឹងតាមគោលដៅ ជាពិសេសនៅក្នុងវិស័យប្រើប្រាស់កម្លាំងពលកម្មច្រើន ដូចជា៖ វិស័យកាត់ដេរ សំណង់ និងផលិតកម្ម។ ការពង្រឹងជំនាញ និងរៀនជំនាញថ្មីតាមតម្រូវការទីផ្សារ ក៏នឹងត្រូវអនុវត្តផងដែរ តាមរយៈវគ្គបណ្តុះបណ្តាលខ្លីៗ ការទទួលស្គាល់ជំនាញមានពីមុន (RPL) ការបណ្តុះបណ្តាលសមត្ថភាពរកការងារ និងសហគ្រិនភាព ព្រមទាំងការពង្រឹងប្រព័ន្ធថ្នាក់ជាតិ ដើម្បីធានាការធ្វើសមាហរណកម្មឡើងវិញដោយចីរភាពទៅក្នុងប្រព័ន្ធការងារសមរម្យ។នាឱកាសនោះ ឯកឧត្ដម អ៊ូអិណុ បានមានប្រសាសន៍ថា ប្រទេសជប៉ុនមានមោទនភាពក្នុងការគាំទ្រកម្ពុជា និង ILO ក្នុងការឆ្លើយតបទៅនឹងតម្រូវការបន្ទាន់របស់ពលករដែលត្រឡប់មកវិញ ដែលបង្ហាញពីការប្តេជ្ញាចិត្តរបស់រាជរដ្ឋាភិបាលជប៉ុនចំពោះសន្តិសុខមនុស្សជាតិ និងស្ថិរភាពតំបន់។ គម្រោងនេះបញ្ជាក់ឡើងវិញពីភាពជាដៃគូយូរអង្វែងរវាងជប៉ុន និងកម្ពុជា ក៏ដូចជាការគាំទ្ររបស់ជប៉ុនចំពោះទីផ្សារការងារដែលរួមបញ្ចូល និងមានភាពធន់។ទន្ទឹមនឹងនេះ ឯកឧត្តម ហេង សួរ បានគូសបញ្ជាក់ថា ការវិលត្រឡប់របស់ពលករកម្ពុជា តម្រូវឲ្យមានការឆ្លើយតបកម្រិតថ្នាក់ជាតិមួយប្រកបដោយការសម្របសម្រួល។ គម្រោងនេះស្របតាមយុទ្ធសាស្ត្រអភិវឌ្ឍធនធានមនុស្សដ៏ទូលំទូលាយរបស់រាជរដ្ឋាភិបាលកម្ពុជា និងរួមចំណែកដល់ការអភិវឌ្ឍទីផ្សារការងាររយៈពេលវែង ដែលនឹងពង្រឹងសមត្ថភាពកម្ពុជាក្នុងការតភ្ជាប់អតីតពលករ ទៅកាន់ការអភិវឌ្ឍជំនាញ សេវាកម្មមុខរបរនិងការងារ និងជីវភាពរស់នៅប្រកបដោយផលិតភាព ដើម្បីជួយឲ្យពួកគាត់កសាងជីវិតឡើងវិញដោយមានកិត្តិយស។ជាមួយនឹងការថ្លែងអំណរគុណចំពោះការគាំទ្ររបស់ប្រទេសជប៉ុន ដែលជួយស្តារកិត្តិយស ជីវភាពរស់នៅ និងការទទួលបានការងារសមរម្យសម្រាប់អតីតពលករ លោកស្រី ស៊ាវយៀន ឈាន បានលើកឡើងថា គម្រោងនេះជួយពង្រឹងប្រព័ន្ធសមាហរណកម្មថ្នាក់ជាតិ ដោយតភ្ជាប់ការទទួលស្គាល់ជំនាញ ការផ្គូផ្គងការងារ និងការការពារសង្គម ដោយធានាថា អតីពលករចំណាកស្រុកត្រូវបានគាំទ្រប្រកបដោយប្រសិទ្ធភាព។ក្នុងនាមរាជរដ្ឋាភិបាលកម្ពុជា ឯកឧត្តម ហេង សួរ បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលជប៉ុនដែលបានគាំទ្រ និងបង្កើនគម្រោងនេះឡើងតាមការស្នើសុំរបស់ក្រសួងការងារ ក៏ដូចជាអរគុណដល់ ILO សម្រាប់កិច្ចសហប្រតិបត្តិការយូរអង្វែង ដែលធានាថា អតីតពលករមិនត្រឹមតែទទួលបានការសមាហរណកម្មប៉ុណ្ណោះទេ ប៉ុន្តែត្រូវបានពង្រឹងសមត្ថភាពឲ្យអាចកសាងអនាគតដែលមានស្ថិរភាព មានផលិតភាព និងមានកិត្តិយស នៅក្នុងមាតុភូមិរបស់ខ្លួន៕

សម្ដេចធិបតីប្រាប់រ៉យទ័រថា «ថៃកំពុងកាន់កាប់ទឹកដីកម្ពុជាបន្ទាប់ពីបទឈប់បាញ់ ខណៈ​កម្ពុជា​ជំរុញ​ឱ្យ​កំណត់​ខណ្ឌសីមា​រួម»

2026/02/18 12:21:02 pm        328
Facebook Telegram Linkin
សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែង​ប្រាប់​សារ​ព័ត៌​មាន​រ៉យទ័រ​កាលពីថ្ងៃទី១៧ ខែកុម្ភៈ ឆ្នាំ២០២៦នេះថា កងកម្លាំងថៃ កំពុង​តែកាន់​កាប់​ទឹក​ដី​របស់​កម្ពុជា ​បន្ទាប់ពីជម្លោះកាលពីឆ្នាំមុន បើទោះបី​ជា​មាន​កិច្ច​ព្រម​ព្រៀង​សន្តិភាព​ដែល​សម្រប​សម្រួល​ដោយ​ផ្ទាល់​ពី​លោក​ប្រធានាធិបតីអាមេរិក ដូណាល់ ត្រាំ ក៏ដោយ ហើយសម្ដេចបវរធិបតី បាន​អំពាវ​នាវ​ឱ្យ​ប្រទេស​ថៃ អនុញ្ញាតឱ្យគណៈកម្មការព្រំដែនរួម ចាប់ផ្តើម​ធ្វើ​ការ​លើ​ព្រំដែន​ដែល​មាន​ជម្លោះ​របស់​ភាគីទាំងពីរ។នៅក្នុងបទសម្ភាសន៍លើកដំបូងជាមួយប្រព័ន្ធផ្សព្វផ្សាយអន្តរជាតិ សម្ដេចធិបតី មាន​ប្រសាសន៍​ថា រាជរដ្ឋាភិបាលកម្ពុជា កំពុងប្រឹង​ប្រែង​ធ្វើ​ការ​ដើ​ម្បី​ដោះ​ស្រាយ​មណ្ឌល​ឆបោក​តាម​ប្រព័ន្ធ​អ៊ីន​ធឺណិត ​ដែលរីករាលដាលនៅក្នុងប្រទេស។ សម្ដេចធិបតី នាយករដ្ឋមន្រ្ដី បានអញ្ជើញទៅកាន់ទីក្រុងវ៉ាស៊ីនតោន ដើម្បី​ចូល​រួម​កិច្ច​ប្រជុំ​ក្រុម​ប្រឹក្សា​សន្តិភាព​របស់លោក ត្រាំ ក្នុងសប្តាហ៍នេះ ហើយសម្ដេចបានមានប្រសាសន៍ថា សម្ដេច​សង្ឃឹម​ថា ​ស្ថាប័នថ្មីនេះអាចដើរតួនាទីក្នុងការបន្ធូរបន្ថយស្ថានការណ៍នៅតាមព្រំដែន ដែល​សម្ដេច​​បាន​ពិពណ៌នាថាមានភាព «ផុយស្រួយ» ទោះបីជាមានបទឈប់បាញ់ខែធ្នូ ដែល​បាន​បញ្ចប់​ការ​ប្រយុទ្ធគ្នាជាថ្មីនោះក៏ដោយ។សូមបញ្ជាក់ជូនថា ក្រុមប្រឹក្សាសន្តិភាពនេះ ត្រូវបានបង្កើត​ឡើង​ដើម្បី​ត្រួត​ពិនិត្យ​ផែន​ការ​សន្តិភាព​តំបន់​ហ្កាហ្សា ប៉ុន្តែលោក ត្រាំ បានមានប្រសាសន៍ថា ស្ថាប័ននេះ​ក៏​អាច​ដើរ​តួនាទី​កាន់​តែ​ទូលំ​ទូលាយ​។សម្ដេចធិបតី បានថ្លែងប្រាប់សារព័ត៌មានរ៉យទ័រថា៖ «យើងនៅតែមានកងកម្លាំងថៃ ដែល​កំពុង​កាន់​កាប់​ចូល​ជ្រៅ​ចូល​ទៅ​ក្នុង​ទឹកដីរបស់កម្ពុជា នៅក្នុងតំបន់ជាច្រើន។ នេះ​គឺ​ហួស​ឆ្ងាយ​ពី​ការ​អះអាង​ជា​ឯកតោភាគីផ្ទាល់របស់ថៃទៅទៀត... លើខ្សែបន្ទាត់ព្រំដែន»។សម្ដេច​មាន​ប្រសាសន៍ថា កងទ័ពថៃបានដាក់ទូកុងតឺន័រ និងរាយបន្លា​លួស​នៅ​ខាង​ក្នុង​អ្វី​ដែល​ថៃ​បាន​ទទួល​ស្គាល់​ជាយូរមកហើយថាជាទឹកដីរបស់កម្ពុជា ហើយ​អ្នក​ស្រុក​មិន​អាច​ត្រឡប់​ទៅ​កាន់​ផ្ទះ​សម្បែង​របស់​ពួក​គេវិញបាន។ សម្ដេចមានប្រសាសន៍ថា៖ «នេះមិនមែនជាការចោទប្រកាន់ទេ ប៉ុន្តែ​នេះ​គឺ​ជា​សេចក្តីថ្លែងការណ៍នៃការពិតជាក់ស្ដែងនៅទីតាំងនោះ»។សម្ដេចធិបតីបានបន្តថា កម្ពុជាមិនអាចទទួលយកនូវអ្វីដែលសម្ដេចហៅថា «ការ​រំលោភ​បំពាន​លើ​អធិប​តេយ្យ​ភាព ឬបូរណភាពទឹកដីរបស់កម្ពុជាបានឡើយ»។សម្ដេចធិបតីមានប្រសាសន៍ថា «មធ្យោបាយតែមួយគត់ដើម្បីផ្ទៀងផ្ទាត់រឿងនោះ គឺ​ការ​ប្រើ​ប្រាស់​យន្ត​ការ​បច្ចេកទេសដែលយើងមាន ដោយផ្អែកលើសន្ធិសញ្ញានានា ដោយ​ផ្អែក​លើ​កិច្ច​ព្រម​ព្រៀង​ទាំង​អស់​ដែល​យើងមាន។ ដូច្នេះ យើងសង្ឃឹមថាប្រទេសថៃនឹងយល់ព្រម ហើយចាប់​ផ្តើម​អនុញ្ញាត​ឱ្យ JBC (គណៈកម្មការព្រំដែនរួម) ធ្វើការឱ្យបានឆាប់តាមដែលអាចធ្វើទៅបាន»។សម្ដេចបានបន្ថែមថា ប្រទេសថៃ បានលើកយកការបោះឆ្នោតថ្ងៃទី៨ ខែកុម្ភៈរបស់ខ្លួន ថា​ជា​ហេតុ​ផល​មួយ​ដែល​មិនអាចចាប់ផ្តើមការងារខណ្ឌសីមាព្រំដែនបាន។ នាយករដ្ឋមន្ត្រីថៃ លោក អនុទីន ឆាន​វីរៈគុល បានប្រើប្រាស់បញ្ហាជាតិនិយមជាដើមទុនក្នុងការបោះឆ្នោត បន្ទាប់ពីជម្លោះព្រំដែន។សម្ដេចធិបតី មានប្រសាសន៍ថា៖ «ឥឡូវនេះ ការបោះឆ្នោតធ្វើឡើងរួចរាល់ហើយ យើងសង្ឃឹមថា ប្រទេស​ថៃ​អាច​ចាប់ផ្តើម យ៉ាងហោចណាស់នៅកម្រិតបច្ចេកទេស ដើម្បីចាប់ផ្តើមវាស់វែង ចាប់​ផ្តើម​ខណ្ឌ​សីមានៅក្នុងតំបន់ក្តៅ ដើម្បីឱ្យយើងអាចបន្តជីវិតប្រចាំថ្ងៃវិញបាន»។គួរ​រម្លឹកថា ការប្រយុទ្ធដ៏អាក្រក់បំផុតក្នុងរយៈពេលជាងមួយទសវត្សរ៍ ដែល​បាន​ផ្ទុះ​ឡើង​នៅ​ក្នុង​ខែ​កក្កដា ​និងខែធ្នូ ឆ្នាំ២០២៥កន្លងទៅ បានបង្ខំឱ្យមនុស្សរាប់សែននាក់ត្រូវរត់ភៀសសឹក និង​បាន​រំខាន​ដល់​ពាណិជ្ជកម្មឆ្លងកាត់ព្រំដែនរវាងភាគីទាំងពីរ៕

វិស័យសេវាកម្ម ពិសេសវិស័យទេសចរណ៍ កំពុង​មានតម្រូវ​ការ​កម្លាំង​ពលកម្ម​ជំនាញ​រាប់​ពាន់​កន្លែង

2026/02/18 11:58:06 am        168
Facebook Telegram Linkin
វិស័យ​សេវាកម្ម ជាពិសេសវិស័យទេសចណ៍នៅកម្ពុជា កំពុង​ត្រូវការ​កម្លាំង​ពលកម្ម​រាប់​ពាន់​កន្លែង​នា​​ពេលនេះ ខណៈអ្នកប្រកបរបរ ក្នុងវិស័យនេះ ក៏កំពុងត្រូវការបុគ្គលិកជំនាញជាចាំបាច់ ដើម្បី​ឆ្លើយ​តប​ទៅ​នឹងកំណើនភ្ញៀសទេសចរ និងតម្រូវការទីផ្សារ។លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជិវៈ បានប្រាប់ BTVថា រាជរដ្ឋាភិបាល​កម្ពុជា បានទទួលស្គាល់សក្ដានុពលនៃឧស្សាហកម្មទេសចរណ៍ថា ជាប្រភពនៃ​កំណើន​សេ​ដ្ឋកិច្ច-សង្គមរបស់កម្ពុជា រួមមានការបង្កើតការងារ និងការកាត់បន្ថយភាពក្រីក្រ។ ហើយ​វិស័យបដិសណ្ឋារកិច្ច គឺជាវិស័យសេវាកម្មដែលផ្តោតលើការផ្តល់ភាពកក់ក្តៅ ការស្នាក់នៅ ការ​ហូបចុក និងការកម្សាន្តជូនភ្ញៀវទេសចរ។ វិស័យនេះ រួមមាន សណ្ឋាគារ និងការស្នាក់នៅ, ភោជនីយ​ដ្ឋាន និងសេវាកម្មម្ហូបអាហារ ជាដើម។ លោកបន្តថា គិតមកដល់ពេលនេះ វិស័យសេវាកម្ម មានតម្រូវការកម្លាំងពលកម្មប្រមាណ ៣ពាន់​នាក់ ហើយឱកាសការងារនៅមានជាច្រើនកន្លែងទៀត។ គិតត្រឹមខែមករា ឆ្នាំ ២០២៦នេះ ក្រសួង​ការងារ បានបណ្តុះបណ្តាលជំនាញដល់សិស្សបានចំនួន ៣ម៉ឺននាក់ (ស្រី្តជាង ២ពាន់​នាក់​) ​នៅក្នុងវិស័យទេសចរណ៍។ ក្នុងចំណោមនោះ សិស្សបញ្ចប់ការសិក្សាមានចំនួនជាង ១ម៉ឺន​នាក់ និងអ្នកទទួលបានការងារធ្វើមានប្រមាណជា ៧ពាន់ ៦រយនាក់។ចំណែកលោកស្រី ជា ម៉ា ឡែន ម្ចាស់ភោជនីយដ្ឋាន «ល្បាប់» បានពន្យល់ថា វិស័យនេះ​ត្រូវ​ការ​បុគ្គលិក​ជំនាញ​ជាចាំបាច់ ដែលជាផ្នែកមួយ​នៃ​ការ​ទាក់​ចិត្ត​អតិថិជន​មក​ទទួល​ទាន​អាហារ​នៅ​ក្នុង​ភោជនីយដ្ឋានរបស់លោកស្រី។ ដោយសារលោកស្រី មានបទពិសោធន៍​លើ​វិស័យ​បដិ​សណ្ឋារ​កិច្ច​ប្រ​មាណ​១០ឆ្នាំ សម្រាប់បុគ្គលិកនៅ«ល្បាប់» គឺភាគច្រើនទទួល​បាន​ការ​បណ្តុះ​បណ្តាល​បន្ថែម​ពី​លោក​ស្រី​ផ្ទាល់។សូមបញ្ជាក់ថា គិតមកដល់ពេលនេះ វិស័យសេវាកម្ម មានសហគ្រាសជាង ៣ម៉ឺន ៨ពាន់​សហ​គ្រាស​ បាននិងកំពុងផ្តល់ការងារសរុបប្រមាណ ៦៦ម៉ឺននាក់។ ដោយឡែក ក្នុងផ្នែក ភោជនីយ​ដ្ឋាន ​និងផ្ទះសំណាក់ មានសហគ្រាសប្រមាណ ៥ពាន់ ៥រយ សហគ្រាស បានផ្តល់​ការងារ​ជូន​ប្រជា​ពលរដ្ឋ​ប្រមាណ ៩ម៉ឺននាក់។ នេះបើតាមអ្នកនាំពាក្យក្រសួងការងារ និងបណ្តុះប​ណ្តាល​វិជ្ជា​ជីវៈ​៕ អត្ថបទ៖ ធូ វិរៈ

ភ្ញៀវទេសចរជិត ៣ម៉ឺននាក់មកសម្រាកលម្ហែនៅខេត្តកំពត ក្នុងថ្ងៃទី១​នៃ​បុណ្យចូល​ឆ្នាំថ្មី​ប្រពៃណី​ចិន

2026/02/18 11:43:01 am        139
Facebook Telegram Linkin
ភ្ញៀវទេសចរជាតិ និងអន្តរជាតិជិត៣ម៉ឺននាក់ បានមកសម្រាកលម្ហែនៅខេត្តកំពត ក្នុង​ឱកាស​បុណ្យ​ចូល​ឆ្នាំថ្មីប្រពៃណីជនជាតិចិន និងវៀតណាម។ ភ្ញៀវជាតិ និងអន្តរជាតិថាខេត្តកំពតស្អាត សម្បូរ​កន្លែងដើរលេង សេវាកម្មល្អ តម្លៃសមរម្យ សន្តិសុខសណ្តាប់ និងសុវត្ថិភាពល្អ អនាម័យ​ស្អាត​ ខណៈដែលមន្ត្រីជំនាញថាចូលឆ្នាំចិនថ្ងៃទី១នេះ ភ្ញៀវកើនឡើងជាងឆ្នាំមុន។ ទេសចរ​ជាតិ អន្តរជាតិ និងក្រុមនិស្សិតខេត្តកំពត បានប្រាប់ឲ្យដឹងថា ទោះកម្ពុជា​មាន​បញ្ហា​ព្រំដែន​ក៏​ពិត​មែន​ ប៉ុន្តែសម្រាប់ការអភិវឌ្ឍន៍នៅតែបន្ត លំហូរភ្ញៀវកាន់តែល្អឡើង ពិសេស​ខេត្ត​កំពត​ក្រោម​ការ​ដឹក​នាំរ​បស់ឯកឧត្តមបណ្ឌិត ម៉ៅ ធនិន សមិទ្ធផលទេសចរណ៍ថ្មី​ៗ​ជា​ច្រើន​បាន​លេច​ចេញ​រូបរាងជាបន្តបន្ទាប់ ធ្វើឲ្យទេសចរមកលេងកាន់តែច្រើន។ ជាក់ស្តែងក្នុង​ឱកាស​បុណ្យ​ចូល​ឆ្នាំ​ថ្មី​ប្រពៃណីជនជាតិចិនថ្ងៃទី១នេះ ភ្ញៀវបានមកលេងក្រុងកំពតច្រើន ពិសេសភ្ញៀវបរទេស ថា​ ពួក​គេ​រីករាយណាស់ដែលបានមកដល់កម្ពុជា ពិសេសខេត្តកំពត ពួកគេមិនព្រួយ​បារម្ភ​រឿង​សុវត្ថិភាព​នោះ​ទេ ទោះកម្ពុជាមានជម្លោះព្រំដែនជាមួយថៃក៏ដោយ។ប្រធានមន្ទីរទេសចរណ៍ លោក សយ ស៊ីណុល បានប្រាប់ឲ្យដឹងថានៅថ្ងៃទី១ នៃពិធី​បុណ្យ​ចូល​ឆ្នាំ​ថ្មី​ប្រពៃណី​ជនជាតិចិន វៀតណាម ភ្ញៀវទេសចរជាតិ អន្តរជាតិ និងបងប្អូន​ប្រជាពលរដ្ឋ​បាន​ធ្វើ​ដំណើរ​កម្សាន្តតាមរមណីយដ្ឋាន សហគមន៍ទេសចរណ៍ គោលដៅទេសចរណ៍ និង​ក្រុង​កំពត​សរុប​ចំនួន​២៩ ៨៧៤នាក់ ក្នុងនោះទេសចរបរទេសចំនួន ៥៤៣នាក់។ លោកបានបញ្ជាក់ថា ចំនួន​ភ្ញៀវ​ថ្ងៃទី១នេះ កើនឡើងជាងឆ្នាំមុន ដែលមានត្រឹមតែ១ ៧០០០នាក់ប៉ុណ្ណោះ។ លោកបានបញ្ជាក់ដែរថា ជាទូទៅពេលមានបុណ្យទាន ក្រុមការងា​រ​មន្ទីរ​តែង​តែ​បាន​ចុះ​តាម​រមណីយ​ដ្ឋាន សហគមន៍គោលដៅទេសចរណ៍នានា និងតាមសេវាកម្មម្ហូបអាហារ និង សេវា​ស្នាក់​នៅ ទូកទេសចរណ៍ ដើម្បីផ្សព្វផ្សាយសេចក្តីណែនាំរបស់មន្ទីរទេសចរណ៍ ផ្តោតសំខាន់​លើ​ការងារ​បដិ​សណ្ឋារកិច្ច អនាម័យចំណីអាហារ សុវត្ថិភាព តម្លៃសេវាកម្មជាដើម ធ្វើយ៉ាងណា​ដើម្បី​រក្សា​បាន​នូវ​សេចក្តី​ថ្លៃថ្នូរ និងកិត្តិស័ព្ទល្អរបស់ខេត្តកំពត តទៅថ្ងៃមុខទៀត៕

សម្ដេចតេជោ ហ៊ុន សែន ផ្ដាំសួរសុខទុក្ខអតីតនាយករដ្ឋមន្រ្ដីសិង្ហបុរី លី សៀនឡុង និងអតីតមេដឹកនាំផ្សេងទៀត ខណៈមេដឹកនាំអាស៊ានកាលពី១០ឆ្នាំមុនពិតជាមានការស្រឡាញ់រាប់អានគ្នាខ្លាំងណាស់

2026/02/18 11:07:29 am        216
Facebook Telegram Linkin
ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នៅព្រឹកថ្ងៃទី១៨ ខែកុម្ភៈ ឆ្នាំ២០២៦នេះ បានផ្ញើសារផ្ដាំសួរសុខទុក្ខអតីតនាយករដ្ឋមន្រ្ដីសិង្ហបុរី លី សៀនឡុង និងអតីតមេដឹកនាំផ្សេងទៀត ដោយសម្ដេចបានរម្លឹកថា មេដឹកនាំអាស៊ានកាលពី១០ឆ្នាំមុនពិតជាមានការស្រឡាញ់រាប់អានគ្នាខ្លាំងណាស់។ការផ្ញើសារផ្ដាំសួរសុខទុក្ខរបស់សម្ដេចតេជោ នាពេលនេះ បន្ទាប់ពីបានទទួលរូបថតមួយសន្លឹក ដែលឯកឧត្តម លី សៀនឡុង អតីតនាយករដ្ឋមន្ត្រីសិង្ហបុរីបង្ហោះរំលឹកខួប១០ឆ្នាំនៃការប្រជុំអាស៊ាន-អាមេរិក(17.2.2016.17.2.2026)។ សម្ដេចតេជោ បានសរសេរថា៖«ខ្ញុំទទួលបានរូបថតមួយសន្លឹកដែលឯកឧត្តម លី សៀនឡុង អតីតនាយករដ្ឋមន្ត្រីសិង្ហបុរីបង្ហោះរំលឹកខួប១០ឆ្នាំនៃការប្រជុំអាស៊ាន-អាមេរិក(17.2.2016.17.2.2026) ដែលអតីតប្រធានាធិបតីអាមេរិកបារ៉ាក់ អូបាម៉ាធ្វើជាម្ចាស់ផ្ទះ»។សម្ដេចតេជោបានថ្លែងថា៖«ខ្ញុំនៅចាំបានថាពេលនោះឯកឧត្តម លី សៀនឡុងជាអ្នកថត និងបង្ហោះលើគណនីFacebook របស់គាត់។ និយាយតាមត្រង់ពេលនោះ មេដឹកនាំអាស៊ានពិតជាមានការស្រឡាញ់រាប់អានគ្នាខ្លាំងណាស់»។សម្ដេចតេជោ បានលើកឡើងថា ក្នុងចំណោមនាយករដ្ឋមន្ត្រីទាំង៤នាក់នេះខ្ញុំមានអាយុតិចជាងគេនិងឯកឧត្តម ថោង លន់(ឡាវ) អាយុច្រើនជាងគេ។សម្ដេចបានផ្តាំសួរសុខទុក្ខថ្នាក់ដឹកនាំទាំង៣រូបនិងសូមអរគុណឯកឧត្តម លី សៀនឡុង ដែលបានចែករំលែក រូបថតនេះដល់សម្ដេច និងមេដឹកនាំបណ្ដាប្រទេសដទៃទៀត៕

ភ្ញៀវទេសចរយ៉ាងច្រើនកុះករ អញ្ជើញមកដើរលេងកម្សាន្ត សប្បាយនៅខេត្តបាត់ដំបង ក្នុងឱកាសចូលឆ្នាំចិន-វៀតណាម

2026/02/18 11:00:32 am        165
Facebook Telegram Linkin
បាត់ដំបង៖ ថ្ងៃទី១នៃពិធីបុណ្យចូលឆ្នាំចិន ត្រូវនឹងថ្ងៃទី១៧ ខែកុម្ភៈ ឆ្នាំ២០២៦ មានបងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិយ៉ាងច្រើនកុះករបានដើរលេងកម្សាន្តសប្បាយរីករាយនៅតាមរមណីយដ្ឋាន និងគោលដៅទេសចរណ៍នានាក្នុងខេត្តបាត់ដំបង។បើតាមរបាយការណ៍របស់មន្ទីរទេសចរណ៍ខេត្តបាត់ដំបង បានឱ្យដឹងថា ភ្ញៀវដែលមកទស្សនាកម្សាន្តក្នុងខេត្តបាត់ដំបងក្នុងឱកាសបុណ្យចូលឆ្នាំចិន វៀតណាម ត្រូវនឹងថ្ងៃទី១៧ ខែកុម្ភៈ ឆ្នាំ២០២៦មានចំនួនសរុប ៣៣,២៤៧ នាក់ក្នុងនោះភ្ញៀវទេសចរជាតិស្នាក់នៅ ៤,០២៥ នាក់ ប្រជាពលរដ្ឋដើរលេងវិលល្ងាច ២៨,៧៨៥ នាក់និងភ្ញៀវទេសចរអន្តរជាតិ ៤៣៧នាក់។ភ្ញៀវទេសចរ បានបង្ហាញអារម្មណ៍សប្បាយរីករាយ និងលើកសរសើរពីសក្ដានុពលដ៏សំបូរបែបនៃវិស័យទេសចរណ៍ក្នុងខេត្តបាត់ដំបង ជាពិសេសម្ហូបអាហារមានរសជាតិឆ្ងាញ់។ភ្ញៀវទេសចរ បានអំពាវនាវដល់បងប្អូនប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ សូមអញ្ជើញមកទស្សនាកម្សាន្តនៅខេត្តបាត់ដំបងឱ្យបានច្រើនកុះករក្នុងឱកាសនៃពិធីបុណ្យចូលឆ្នាំចិន។សូមជម្រាបថា ខេត្តបាត់ដំបង គឺជាទឹកដីដ៏ស្រស់ប្រិមប្រិយមានទាំងរមណីយដ្ឋានបែបប្រវត្តិសាស្រ្ត វប្បធម៌ ប្រពៃណី សិល្បៈ ម្ហូបអាហារ និងមានគោលដៅទេសចរណ៍សរុបចំនួន១១៥កន្លែងក្នុងនោះរួមមាន៖ រមណីយដ្ឋានទេសចរណ៍ចំនួន២២កន្លែង  សហគមន៍ទេសចរណ៍ និងអេកូទេសចរណ៍ចំនួន៤កន្លែង តំបន់គោលដៅទេសចរណ៍ចំនួន៥៤កន្លែង សារមន្ទីរចំនួន២កន្លែង ទេសចរណ៍បែបសាសនាចំនួន២៩កន្លែង និងគោលដៅកសិទេសចរណ៍ចំនួន៤កន្លែង។ដើម្បីបង្កលក្ខណៈសប្បាយរីករាយប្រកបដោយសុខសុវត្ថិភាពជូនដល់ប្រជាពលរដ្ឋ ភ្ញៀវទេសចរជាតិ និងអន្តរជាតិដែលមកទស្សនាកម្សាន្តនៅខេត្តបាត់ដំបងក្នុងឱកាសនៃពិធីបុណ្យចូលឆ្នាំចិននេះ មន្ទីរទេសចរណ៍ខេត្តបាត់ដំបង បានសហការជាមួយកម្លាំងនគរបាលទេសចរណ៍ និងអាជ្ញាធរពាក់ព័ន្ធចុះសម្របសម្រួលការរៀបចំសណ្តាប់ធ្នាប់ អនាម័យបរិស្ថាន និងធានាសន្តិសុខសុវត្ថិភាពជូនភ្ញៀវផងដែរ៕

ឆ្នាំ២០២៥ ការវិនិយោគបរទេសផ្ទាល់នៅកម្ពុជា មានទុនសរុបប្រមាណជិត ៥ ១០០ លានដុល្លារ

2026/02/18 10:48:51 am        134
Facebook Telegram Linkin
ការវិនិយោគបរទេសផ្ទាល់នៅកម្ពុជា នៅក្នុងឆ្នាំ២០២៥ មានទំហំទុនវិនិយោគសរុបប្រមាណជិត ៥ ១០០ លានដុល្លារអាមេរិក ដោយក្នុងនោះការវិនិយោគលើវិស័យកម្មន្តសាល មានភាពលេចធ្លោ ឈរក្នុងលំដាប់ទី១ ខណៈការវិនិយោគផ្នែកហិរញ្ញវត្ថុ ស្ថិតក្នុងលំដាប់ទី២។ធនាគារជាតិនៃកម្ពុជា បង្ហាញរបាយការណ៍វិនិយោគនៅក្នុងឆ្នាំ២០២៥ ដែលក្នុងនោះការវិនិយោគផ្ទាល់បរទេសនៅកម្ពុជា មានទុនវិនិយោគសរុបប្រមាណជិត ៥ ១០០ លានដុល្លារអាមេរិក មានកំណើនកើនឡើង ១៦ ភាគរយ បើធៀបទៅនិងឆ្នាំ ២០២៤ ក្នុងនោះការវិនិយោគលើវិស័យកម្មន្តសាល មានជាង ៦៩ ភាគរយ, វិស័យហិរញ្ញវត្ថុ ជិត ១២ ភាគរយ, សំណង់ ជាង ៦ ភាគរយ, ថាមពលជាង ៣ ភាគរយ, កសិកម្ម ជិត ៣ ភាគរយ, សណ្ឋាគារនិងការកម្សាន្ត ជាង ២ ភាគរយ, អចលទ្រព្យ ២ ភាគរយ, និងការវិនិយោគលើវិស័យផ្សេងៗមានជាង ៣ ភាគរយ។ចំណែកវិនិយោគិនបរទេសដែលមកវិនិយោគផ្ទាល់នៅកម្ពុជា មានសមាមាត្រច្រើនជាងគេរួមមាន៖ វិនិយោគិនមកពីប្រទេសចិន មានទុនវិនិយោគ សរុបជាង ៣ ៧០០ លានដុល្លារ ស្មើប្រមាណជិត ៧៤ ភាគរយ, សឹង្ហបុរី មានចំនួន ៣៤៧ លានដុល្លារ ស្មើជិត ៧ ភាគរយ, កាណាដា ២៣០ លានដុល្លារ ស្មើជាង ៥ ភាគរយ, ម៉ាឡេស៊ី ១៧៤ លានដុល្លារ ស្មើជាង ៣ ភាគរយ, កូរ៉េខាងត្បូង ១៦៥ លានដុល្លារ ស្មើជាង ៣ ភាគរយ និងមានបណ្តាវិនិយោគមកពីប្រទេសផ្សេងៗជាច្រើនទៀត។ជុំវិញការវិនិយោគនេះ បើយោងតាមរបាយការណ៍ក្រុមប្រឹក្សាអភិវឌ្ឍន៍កម្ពុជា បានបង្ហាញឱ្យដឹងថា នៅក្នុងបំណាច់ឆ្នាំ ២០២៥, ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគសរុប មានចំនួន ៦៣០ មានទំហំទុនវិនិយោគប្រមាណជាង ១០ ពាន់លានដុល្លារអាមេរិក កើនឡើង ៥២ ភាគរយ បើធៀបនិងឆ្នាំ២០២៤ ក្នុងនោះគម្រោងវិនិយោគដែលមានទីតាំងស្ថិតនៅក្រៅ តំបន់សេដ្ឋកិច្ចពិសេស មានចំនួន ៣៨៧ និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេស មានចំនួន ២៤៣ គម្រោង៕អត្ថបទ៖ សុន រ៉ាឌី

ស្ពានហាលខាងកើតប្រាសាទបេងមាលា និងចម្លាក់បង្កាន់ដៃនាគ មានភាពរឹងមាំ និងមានសោភ័ណភាពគួរឱ្យទាក់ទាញ ក្រោយពេលអ្នកជំនាញការនៃអាជ្ញាធរជាតិអប្សរាបានជួសជុល និងពង្រឹងឡើងវិញ

2026/02/18 10:31:38 am        139
Facebook Telegram Linkin
ក្រោយចំណាយពេលច្រើនខែ ដើម្បីជួសជុលស្ពានហាលខាងកើត រួមនិងបង្កាន់ដៃ ចម្លាក់នាគសងខាងចំនួន៤កម្រាល ធ្នឹម និងសសរនៃប្រាសាទបេងមាលា ត្រូវបានជួសជុលសង្គ្រោះ និងយកទៅដាក់នៅទីតាំងដើម ហើយរន្ធតាដេវក៏អាចឱ្យទឹកហូរឆ្លងកាត់ឡើងវិញ។ បច្ចុប្បន្ន ស្ពានហាលនេះសាធារណជនអាចមើលឃើញពីរចនាសម្ពន្ធយ៉ាងពេញលេញ ជាពិសេសចម្លាក់នាគទាំងសងខាងឈរយាមស្ពានយ៉ាងអង់អាច និងរឹងមាំ ដែលទិដ្ឋភាពនេះបានបាត់បង់ជាច្រើនរយឆ្នាំកន្លងមកហើយ ដោយសារតែរងការខូចខាត និងទ្រុឌទ្រោមស្ទើរតែបាត់រូបរាង។លោក ឮ ចាន់ណូរ៉ា បុរាណវិទូនៃអាជ្ញាធរជាតិអប្សរា បានឱ្យដឹងថា ស្ពានហាលប្រាសាទបេងមាលាដែលបានរងការខូចខាត និងទ្រុឌទ្រោមជាខ្លាំងស្ទើរតែបាត់រូបរាង បានប្រែក្លាយជាមានភាពរឹងមាំ និងសោភ័ណភាពគួរជាទីមោទនៈ។ អ្នកជំនាញរូបនេះបញ្ជាក់ថា ក្រោយពេលជួសជុលស្ពានហាលនេះ អាជ្ញាធរជាតិអប្សរាបានយកចិត្តទុកដាក់ថែទាំត្រួតពិនិត្យជាប្រចាំ សម្អាតស្មៅ ឬរុក្ខជាតិ ចៀសវាងការបង្កការខូចខាតដល់រចនាសម្ពន្ធស្ពានហាលជាបន្តទៀត។ ក្រុមការងារបានបង្ហាញការសប្បាយរីករាយក្នុងការរួមចំណែកជួសជុលមរតកដូនតា ជាប្រវត្តិសាស្ត្រមួយថ្មី និងបានទាក់ទាញទេសចរមកទស្សនាប្រាសាទបេងមាលាបន្ថែមទៀត។សូមបញ្ជាក់ថា គម្រោងជួសជុលស្ពានហាលខាងកើតប្រាសាទបេងមាលា ក្នុងដំណាក់កាលទី១ មានប្រវែងបណ្តោយ១០០ម៉ែត្រ ទទឹង១៣ម៉ែត្រ ដែលជាកិច្ចសហប្រតិបត្តិការរវាងអាជ្ញាធរជាតិអប្សរា ក្រោមការឧបត្ថម្ភដោយមូលនិធិពិសេសមេគង្គ-ឡានឆាង នៃសាធារណរដ្ឋប្រជាមានិតចិន៕ ប្រភព៖អាជ្ញាធរអប្សរា

សម្ដេចព្រះពោធិវ័ង្សកិត្តិបណ្ឌិត ណយ ច្រឹក និងសប្បុរសជន រៀបចំអំណោយផ្ដល់​ជូន​វីរកងទ័ព​នៅ​សមរភូមិមុខ

2026/02/17 05:19:09 pm        284
Facebook Telegram Linkin
សម្ដេចព្រះពោធិវ័ង្សកិត្តិបណ្ឌិត ណយ ច្រឹក សម្ដេចព្រះសង្ឃនាយករងទី១ នៃ​ព្រះរាជា​ណា​ចក្រ​កម្ពុជា ​និងជាព្រះគ្រូចៅអធិការវត្តច័ន្ទបុរីវង្ស និងសប្បុរសជននានា បានរៀបចំ​អំណោយ​ផ្ដល់​ជូន​វីរ​ក​​ងទ័ព កំពុងឈរការពារបូរណភាពទឹកដីនៅទិសថ្មដា ភូមិភាគ៥។សម្រាប់អំណោយជាស្បៀងអាហារ និងសម្ភារប្រើប្រាស់ផ្សេងៗ រួមមានថវិកា ១០​លាន​រៀល​ដែល​ជា​បច្ច័យ​របស់​សម្តេចព្រះគ្រូចៅអធិការ, អង្ករមួយតោន, ទឹកក្រូច ១០កេស, មី ៥កេសធំ, ត្រីខ ៤កេស, សាប៊ូ ៥បាវធំ, ទឹកសុទ្ធ ៥០០កេស, អំបិល ១បាវធំ (៥០គីឡូក្រាម), ទឹកត្រី ១០យួរ, ទឹកស៊ីអ៊ីវ ១០យួរ, ទឹកម្ទេស ២កេសធំ, សៀង ១កេសធំ, នំទ្រៀបបាយ ៣កេស, ថ្នាំផ្ដាសាយ ១កេស, ថ្នាំឈឺបំពង់ក ១កេស និងពងទាប្រៃ ១ពាន់គ្រាប់ ។សម្ដេចព្រះពោធិវ័ង្សកិត្តិបណ្ឌិត ណយ ច្រឹក មានព្រះបន្ទួលថា ការនាំ​យក​អំណោយ​ផ្ដល់​ជូន​ដល់​វីរ​កង​ទ័ពជាបន្តបន្ទាប់នេះ គឺបង្ហាញពីការគាំទ្រ និងលើកទឹកចិត្តទៅដល់វីរកងទ័ព ដែល​កំពុង​ឈរ​ការ​ពារ​បូរណភាពទឹកដី និងបានបង្ហាញពីកម្លាំងសាមគ្គីជាតិខ្មែរ ប្រឆាំងទៅនឹងអំពើឈ្លានពាន។ជាមួយនេះ សម្ដេចព្រះសង្ឃនាយករងទី១ មានព្រះបន្ទួលបន្តថា បានបង្ហាញនូវជំនឿមុតមាំ ចំពោះ​សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅក្នុងកិច្ចប្រជុំ​ក្រុម​ប្រឹក្សា​សន្តិភាព​ នៅរដ្ឋធានីវ៉ស៊ីនតោន សហរដ្ឋអាមេរិក នឹងមានជំនួបជាមួយ ប្រធានាធិបតី​សហរដ្ឋ​អាមេរិក​ លោក ដូណាល់ត្រាំ ក្នុងការស្ដារសន្តិភាពនៅកម្ពុជាឡើងវិញ ធ្វើប្រទេស​កម្ពុជា​មាន​ភាព​សុខសាន្ត​បញ្ចប់នូវសង្គ្រាមព្រំដែន ។ក្នុងឱកាសនេះ សម្ដេចព្រះពោធិវ័ង្សកិត្តិបណ្ឌិត ណយ ច្រឹក មានព្រះបន្ទួលបួងសួង ដល់គុណ​ព្រះរតនត្រៃ មានព្រះពុទ្ធ ព្រះធម៌ និងព្រះសង្ឃ និងវត្ថុសក្តិសិទ្ធក្នុងលោក ជួយ​បី​បាច់​ថែ​រក្សា​ប្រទេស​កម្ពុជា ថ្នាក់ដឹកនាំ ប្រជាជន និងវីរកងទ័ពកម្ពុជា ជួបតែសេចក្តីសុខសេចក្តីចម្រើន និង​បន្ត​រស់​នៅក្នុងសន្តិភាពរហូតទៅ។តំណាងវីរកងទ័ពនៅទិសថ្មដា បានសម្ដែងនូវក្តីដឹងគុណ និងអរព្រះគុណ​ដល់​សម្ដេច​ព្រះ​ពោធិ​វ័ង្ស​ ណយ ច្រឹក និងសប្បុរសជននានា ដែលតែងផ្ដល់ជំនួយគ្រឿងឧបភោគបរិភោគ និងសម្ភារ​ផ្សេង​ៗ​ជា​ហូរហែរ ជាមួយនឹងការលើក​ទឹកចិត្ត​ដល់វី​រ​កង​ទ័ពក្នុង​​បុព្វ​ហេតុ​ការពារបូរណភាពទឹកដី ហើយនេះគឺជាកម្លាំងចិត្តដល់ធំក្រៃលែង សម្រាប់កងទ័ពទាំងអស់ ។គួរបញ្ជាក់ថា ជាបន្តបន្ទាប់ សម្ដេចព្រះពោធិវ័ង្សកិត្តិបណ្ឌិត ណយ ច្រឹក រួមទាំង​គណៈ​សង្ឃ​នាយក​នៃ​ព្រះរាជាណាចក្រកម្ពុជា និងសប្បុរសជន តែងតែនាំយកស្បៀងអាហារ និងសម្ភារ​ប្រើ​ប្រាស់​ផ្សេងៗទៅផ្ដល់ជូនវីរកងទ័ពនៅសមរភូមិមុខ និងអ្នកភៀសសឹក ដើម្បីបង្ហាញ​ពី​ការ​ចូល​រួម​ជា​មួយ​រាជរដ្ឋាភិបាល ទឹកចិត្តស្នេហារជាតិ សាមគ្គីជាតិ និងការពារទឹកដីឲ្យបានគង់វង់៕

បណ្ដាញសង្គម

ព័ត៌មានថ្មីៗ

កូរ៉េខាងជើងច្រានចោលការចោទប្រកាន់របស់អាមេរិកថា ទីក្រុងព្យុងយ៉ាង គឺជាការគំរាមកំហែងតាមប្រព័ន្ធអ៊ីនធឺណិត
05/03/2026 01:05 PM
Facebook Telegram Linkin
ប្រធានាធិបតីគុយបាបរិហារទណ្ឌកម្មថ្មីរបស់សហរដ្ឋអាមេរិកលើប្រទេសរបស់លោក
05/03/2026 01:05 PM
Facebook Telegram Linkin
មនុស្ស ១១នាក់ស្លាប់ ក្នុងហេតុការណ៍ក្រឡាប់រថយន្តក្រុងនៅភាគខាងលិចម៉ិកស៊ិក
05/03/2026 01:05 PM
Facebook Telegram Linkin
ក្រុមមន្រ្តីនិយាយថា សហរដ្ឋអាមេរិកដកទាហាន ៥ពាន់នាក់ចេញពីប្រទេសអាល្លឺម៉ង់
05/03/2026 12:05 PM
Facebook Telegram Linkin
អ្នកនាំពាក្យ៖ កម្មវិធីនយោបាយ និងការអភិវឌ្ឍរបស់កម្ពុជា បាននិងកំពុងដំណើរការទៅមុខជានិច្ច បើទោះបីកម្ពុជារងការឈ្លានពានពីថៃ
05/03/2026 12:05 PM
Facebook Telegram Linkin
ប្រតិភូសភាប្រើភាសាបារាំង ១៧ប្រទេសធ្វើសិក្ខាសាលា អំពីក្របខ័ណ្ឌ និងការប្រើប្រាស់ឌីជីថលក្នុងសភា
05/03/2026 12:05 PM
Facebook Telegram Linkin
ជម្លោះនៅតែកើតមានរវាងក្រុមហេសបូឡា និងអ៊ីស្រាអែលនៅតំបន់ភាគខាងត្បូងលីបង់
05/03/2026 12:05 PM
Facebook Telegram Linkin
លោក Trump និយាយថា មានលទ្ធភាពដែលអាមេរិកអាចចាប់ផ្តើមវាយប្រហារអ៊ីរ៉ង់ម្តងទៀត​
05/03/2026 12:05 PM
Facebook Telegram Linkin
មនុស្សយ៉ាងហោច ៩នាក់ស្លាប់ ក្នុងហេតុការណ៍អគ្គិភ័យនៅទីក្រុងញូវដែល្លី ប្រទេសឥណ្ឌា
05/03/2026 11:05 AM
Facebook Telegram Linkin
សហរដ្ឋអាមេរិកអនុម័តលក់អាវុធតម្លៃ ៨,៦ពាន់លានដុល្លារដល់សម្ព័ន្ធមិត្តមជ្ឈិមបូព៌ា
05/03/2026 11:05 AM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.